Tibetan
རིག་གི་ཆ་དེ་དང༌། འདོད་ཆགས་ཀྱི་རྣམ་ཤེས་གསལ་རིག་གི་ཆ་དེ་གཉིས་རྣམ་པ་ཤིན་ཏུ་འདྲ་བ་ཡིན་ཡང༌། དངོས་པོ་ཐ་དད་པ་ཡིན་པས། ཕན་ཚུན་དུ་གཅིག་གིས་གཅིག་ལ་མ་ཁྱབ་པ་ཡིན་ལ། དེ་དང་དེའི་ཡོངས་གྲུབ་ལ་ནི་ངོ་བོ་དབྱེ་བ་མེད་པ་སྟེ་རོ་མཉམ་དུ་གྱུར་པས་སོ། ། དེས་ལམ་དང་འབྲས་བུའི་ཤེས་བྱ་རྣམས་ལའང་རིགས་འགྲེ་ཤེས་པར་བྱའོ། ། མཚན་ཉིད་གསུམ་གྱི་རྣམ་གཞག་འཁོར་ལོ་ཐ་མའི་མདོ་སྡེ་རྣམས་ནས་རྒྱ་ཆེར་འབྱུང་ཞིང༌། རྗེ་བཙུན་བྱམས་པ་དང༌། ཀླུ་སྒྲུབ་ཀྱི་སཱ་ལུ་ལྗང་པའི་མདོ་འགྲེལ་ལས་གསུངས་པའི་ངོས་འཛིན་གཅིག ། དབྱིག་གཉེན་གྱིས་སུམ་ཅུ་པའི་རབ་བྱེད་དུ་ཞལ་བཞེས་ཅུང་ཟད་ཁྱད་པར་ཡོད་པ་ནི། (༢༡༡ན)གཞན་སྟོང་པ་རྣམས་ལ་ཡོངས་སུ་གྲགས་པ་ལྟར་དང༌། རིག་པའི་དབང་ཕྱུག་གིས། རྣམ་པར་རྟོག་པས་བརྟགས་པའི་དོན། ། ཀུན་ཏུ་བརྟགས་པའི་ངོ་བོ་ཉིད། ། རྣམ་པར་རྟོག་པ་གཞན་གྱི་དབང༌། ། དེ་ཡི་སྟོང་ཉིད་ཡོངས་སུ་གྲུབ། ། ཅེས་རྣམ་གཞག་གསལ་བར་མཛད་དོ། ། ཁ་ཅིག །ངོ་བོ་ཉིད་གསུམ་གྱི་རྣམ་བཞག་སེམས་ཙམ་པ་ཁོ་ནའི་ལུགས་ཡིན་གྱི་དབུ་མ་པ་ལ་མ་གྲགས་སོ་སྙམ་པ་ནི་མི་འཐད་དེ། ཤེར་ཕྱིན་གྱི་མདོའི་བྱམས་ཞུས་ཀྱི་ལེའུ་ལས་ཀྱང༌། བྱམས་པ་གཟུགས་ཀྱི་རབ་ཏུ་དབྱེ་བ་ནི་རྣམ་པ་གསུམ་སྟེ། ཀུན་བརྟགས་པའི་མཚན་ཉིད་ཀྱིས་རབ་ཏུ་ཕྱེ་བ་དང༌། རྣམ་པར་བརྟགས་པའི་མཚན་ཉིད་ཀྱིས་རབ་ཏུ་ཕྱེ་བ་དང༌། ཆོས་ཉིད་ཀྱི་མཚན་ཉིད་ཀྱིས་རབ་ཏུ་ཕྱེ་བའོ། །ཞེས་དང༌། འཇུག་པའི་རང་འགྲེལ། དབུ་མ་རྒྱན་གྱི་རང་འགྲེལ་རྣམས་ལས་ཀྱང་རང་ལུགས་ཀྱི་རང་བཞིན་གསུམ་གྱི་རྣམ་གཞག་མཛད་པ་དང༌། དབུ་མ་སྣང་བ་ལས། དབུ་མ་པ་རྣམས་ཀྱང་ངོ་བོ་ཉིད་གསུམ་གྱི་རྣམ་པར་གཞག་པ་ཁས་མི་ལེན་པ་ནི་མ་ཡིན་ནོ། །གཞན་དུ་ན་མཐོང་བ་ལ་སོགས་པ་དང་འགལ་བ་ཇི་ལྟར་སྤང་བར་འགྱུར། ཞེས་སོགས་དབུ་མའི་གཞུང་ལུགས་རྣམས་སུ་ངོ་བོ་ཉིད་གསུམ་གྱི་རྣམ་གཞག་གསལ་བར་ཡང་ཡང་བསྟན་པའི་ཕྱིར་རོ། ། དེའང༌། བྱང་ཆུབ་སེམས་འགྲེལ་ལས། ཀུན་བརྟགས་དང་ནི་གཞན་དབང་དང༌། ། ཡོངས་སུ་གྲུབ་པ་ཉིད་དག་ནི། ། སྟོང་ཉིད་བདག་ཉིད་གཅིག་པུ་ཡི། ། ངོ་བོ་སེམས་ལ་བཏགས་པ་ཡིན། ། ཞེས་གསུངས་པའི་ངེས་པས་ཆོས་ཐམས་ཅད་སེམས། སེམས་དེའི་རང་བཞིན་འོད་གསལ་བའམ། སྟོང་པ་ཉིད་དམ་དོན་དམ་པའམ་ཁམས་བདེ་བར་གཤེགས་པའི་སྙིང་པོ་སོགས་མིང་དུ་མས་བསྙད་པ་ནི་ཡོངས་གྲུབ། སེམས་དེའི་ཀུན་རྫོབ་རྣམ་པར་རིག་པ་སྒྱུ་མ་ཙམ་དུ་སྣང་བ་དེ་གཞན་དབང༌། རྣམ་རིག་དེ་མེད་བཞིན་དུ་གཟུང་འཛིན་ལ་སོགས་པའི་(༢༡༡བ)གཉིས་ཆོས་སུ་བཏགས་པའི་ཆ་དེ་ཀུན་བཏགས་སུ་བཞེད་པ་ཡིན་ནོ། ། ཇ༣ རྩ་བའི་གསུམ་པ་རྟེན་འབྲེལ་གྱི་རྣམ་གཞག་ཐེག་པ་ཆེ་ཆུང་སྤྱི་ཁྱབ་ལྟར་བཤད་པ་ལ་གཉིས། ཉ༡ མཚམས་སྦྱར་བའི་ཚུལ་གྱིས་མདོར་བསྟན། ཉ༢ རབ་ཏུ་དབྱེ་བ་རྒྱས་པར་བཤད་པའོ། ། ཉ༡ དང་པོ་ནི། སྔ་མ་གཉིས་པོ་རྟེན་ཅིང་འབྲེལ་ལས་བྱུང༌། ། དེ་ཡང་བསྐྱེད་བྱ་སྐྱེད་བྱེད་རྒྱུ་འབྲས་ཅན། ། བཞག་བྱ་འཇོག་བྱེད་གཅིག་ལ་གཅིག་ལྟོས་པ། ། ཡང་དག་རྟེན་འབྲེལ་ཀུན་གཞིའི་རྣམ་ཤེས་བཅས། ། མཚན་ཉིད་གསུམ་གྱི་སྔ་མ་ཀུན་བརྟགས་གཞན་དབང་གཉིས་ཇི་ལྟར་བྱུང་ན་རྟེན་ཅིང་འབྲེལ་བར་འབྱུང་བའི་དབང་ལས་འབྱུང་ངོ༌། །ཡོངས་གྲུབ་ནི་ཀུན་རྫོབ་ཀྱི་རྟེན་འབྲེལ་དངོས་མ་ཡིན་ཀྱང་དོན་དམ་གྱི་རྟེན་འབྲེལ་ཡིན་པ་ལ་དགོངས་ནས་རྟེན་འབྲེལ་དུ་བཤད་པའང་ཡོད་དོ། ། རྟེན་འབྲེལ་དེའང་སྤྱི་ཙམ་དུ་བསྐྱེད་བྱ་སྐྱེད་བྱེད་ཀྱི་རྟེན་འབྲེལ། སྣོད་ཀྱི་འཇིག་རྟེན། བཅུད་ཀྱི་སེམས་ཅན། ནང་གི་ཤེས་པ་བཅས་རྒྱུ་དང་འབྲས་བུའི་ཚུལ་ཅན་གཙོ་བོར་གཞན་དབང་གི་ཕྱོགས་དང༌། བཞག་བྱ་འཇོག་བྱེད་ཀྱི་རྟེན་འབྲེལ་བསྐྱེད་བྱ་སྐྱེད་བྱེད་ལ་ལྟོས་པ་ས་བོན་དུ་སྣང་བའི་ཤེས་པ་ལས་མྱུ་གུར་སྣང་བའི་ཤེས་པ་སྐྱེ་བ་ལྟ་བུ་དང༌། དེར་མ་ལྟོས་པ་ཆེན་པོ་ལ་ལྟོས་ནས་ཆུང་ངུར་བཞག་པ་ལྟ་བུ་སྔ་མ་འཇོག་བྱེད་དང་ཕྱི་མ་བཞག་བྱ་སྟེ་མདོར་ན་གཅིག་ལ་གཅིག་ལྟོས་པ་ནི་གཙོ་བོར་ཀུན་བརྟགས་ཀྱི་ཕྱོགས་སུ་འཇོག །ཡང་དག་པའི་རྟེན་འབྲེལ་གྱི་ཀུན་གཞིའི་རྣམ་ཤེས་བག་ཆགས་ཀུན་དང་ལྡན་པ་ལ་འཇོག་སྟེ། དེའང་བསྐྱེད་བྱ་སྐྱེད་བྱེད་ཀྱི་རྟེན་འབྲེལ་ལ་གནས་སྐབས་པ་དང་ཡང་དག་པའི་རྟེན་འབྲེལ་གཉིས་སུ་དབྱེ་བའི་ཡ་རྒྱལ་ཡིན་པས་གཞན་དབང་དུ་འདུའོ། ། ཉ༢ གཉིས་པ་རྒྱས་བཤད་ལ་བརྒྱད། ཏ༡ ངོ་བོ། ཏ༢ ངེས་ཚིག ། ཏ༣ སྒྲ་དོན། ཏ༤ ཡན་ལག་བཅུ་གཉིས་སོ་སོའི་ངོས་འཛིན། ཏ༥ བྱེད་ལས། ཏ༦ རབ་དབྱེ། ཏ༧ དོན་བསྡུ། ཏ༨ རྟེན་འབྲེལ་གྱི་དེ་ཁོ་ན་ཉིད་(༢༡༢ན)བསྟན་པའོ། ། ཏ༡ དང་པོ་ནི། ངོ་བོ་སྣང་ཙམ་ལྟོས་གྲུབ་བརྟེན་ནས་སྐྱེས། ། ཆོས་ཐམས་ཅད་དཔྱད་ན་ངོ་བོ་ཅི་ཡང་མ་གྲུབ་པ་སྟོང་པ་ཉིད་དུ་གནས་ཀྱང་སྣང་ཙམ་དུ་ལྟོས་ནས་གྲུབ་ཅིང་བརྟེན་ནས་སྐྱེ་བ་ནི་རྟེན་འབྲེལ་གྱི་མཚན་ཉིད་དམ་ངོ་བོ་སྟེ། རྩ་ཤེ་ལས། རྟེན་ཅིང་འབྲེལ་བར་འབྱུང་བ་གང༌། ། དེ་ནི་སྟོང་པ་ཉིད་དུ་བཤད། ། དེ་ནི་བརྟེན་ནས་གདགས་པ་སྟེ། ། དེ་ཉིད་དབུ་མའི་ལམ་ཡིན་ནོ། ། གང་ཕྱིར་རྟེན་འབྱུང་མ་ཡིན་པའི། ། ཆོས་འགའ་ཡོད་པ་མ་ཡིན་ལ། ། དེ་ཕྱིར་སྟོང་པ་མ་ཡིན་པའི། ། ཆོས་འགའ་ཡོད་པ་མ་ཡིན་ནོ། ། ཞེས་སོ། ། ཏ༢ གཉིས་པ་ངེས་ཚིག་ནི། ངེས་ཚིག་རྒྱུ་རྐྱེན་ཚོགས་ལ་རྟེན་ཅིང་འབྲེལ། ། རྟེན་འབྲེལ་གྱི་སྐད་དོད་ལེགས་སྦྱར་ལ། པྲ་ཏཱི་དྱ་ས་མུཏ་པཱ་ད། ཞེས་འབྱུང་བའི་པྲ་ཏཱི་དྱ་ནི་མང་པོ་འཚོགས་ཤིང་འདུས་པའམ་ཕྲད་པའི་དོན་ཡིན་ལ། ས་མཏྤཱུ་ད་ནི་བསྐྱེད་པའམ་འབྱུང་བའི་དོན་ཡིན་པས། དངོས་པོ་གང་རྒྱུ་གཅིག་ལས་འབྲས་བུ་སྣ་ཚོགས་དང༌། རྒྱུ་སྣ་ཚོགས་ལས་འབྲས་བུ་གཅིག་ཁོ་ན་སྐྱེ་བ་ནི་མི་སྲིད་པས་རྒྱུ་རྐྱེན་སྣ་ཚོགས་ཕྲད་ཅིང་ཚོགས་པ་ལ་ལྟོས་ནས་འབྲས་བུ་སྣ་ཚོགས་སུ་འབྱུང་བའམ། ཡན་ལག་སྔ་མ་ལ་རྟེན་ཅིང་ཕྱི་མ་རྣམས་འབྲེལ་བར་འབྱུང་བའོ། ། ཏ༣ གསུམ་པ་སྒྲ་དོན་ནི། སྒྲ་དོན་བྱེད་པ་པོ་མེད་རྒྱུར་བཅས་སོགས། ། རྟེན་འབྲེལ་སྤྱིའི་སྒྲ་དོན་ནི་བཅུ་གཅིག་ཏུ་གསུངས་ཏེ། བྱེད་པ་པོ་མེད་པ། རྒྱུ་དང་བཅས་པ། སེམས་ཅན་མེད་པ། གཞན་གྱི་དབང༌། གཡོ་བ་མེད་པ། མི་རྟག་པ། སྐད་ཅིག་པ། རྒྱུན་མི་འཆད་པ། རྒྱུ་འབྲས་མཐུན་པ། སྣ་ཚོགས་པ། རྒྱུ་འབྲས་སོ་སོར་ངེས་པ་རྣམས་སོ། ། དེའང་དཔེར་ན། ཆོས་ཐམས་ཅད་བྱེད་པ་པོ་མེད་པར་རྟེན་ཅིང་འབྲེལ་བར་འབྱུང་བ་ཞེས་སོགས་གོ་བར་བྱའོ།། ཏ༤ བཞི་པ་ཡན་ལག་བཅུ་གཉིས་སོ་སོའི་ངོས་འཛིན་ནི། མ་རིག་རིག་པའི་འགལ་ཟླ་ཆོས་གསུམ་ལྡན། ། དབྱེ་སྒོ་(༢༡༢བ)མང་ཡང་ཉོན་མོངས་ལྡན་མིན་གཉིས། ། རྩ་བ་བདག་ཏུ་རྨོངས་པ་ཉོན་ཡིད་འཁོར། ། ཡན་ལག་བཅུ་གཉིས་ཀྱི་ཐོག་མ་མ་རིག་པའི་ངོ་བོ་རིག་པའི་འགལ་ཟླའམ། མི་མཐུན་ཕྱོགས་སུ་གྱུར་པ། ཤེས་པ་གང་ཞིག་རང་གི་ཡུལ་ལ་དམིགས་པ་དང༌། ཡུལ་དེའི་རྣམ་པ་ཤིན་ཏུ་མི་གསལ་བ་དང༌། དེ་ཉིད་སེམས་རྒྱུད་རབ་ཏུ་མ་ཞི་བ་ཉོན་མོངས་པ་སྐྱེ་བའི་སྒོར་གྱུར་པ་སྟེ་ཁྱད་ཆོས་གསུམ་དང་ལྡན་པའོ། ། དེ་ལ་དབྱེ་སྒོ་མང་ཡང་། ཉོན་མོངས་པ་ཅན་གྱི་མ་རིག་པ་དང༌། ཉོན་མོངས་པ་ཅན་མ་ཡིན་པའི་མ་རིག་པ་གཉིས། སྔ་མ་ནི་འཁོར་བའི་རྒྱུ་ཐར་པ་ལ་སྒྲིབ་བྱེད་ཉོན་མོངས་པའི་སྒྲིབ་པ། ཕྱི་མ་ནི་ཐམས་ཅད་མཁྱེན་པ་ལ་སྒྲིབ་བྱེད་ཤེས་བྱའི་སྒྲིབ་པའོ། ། དེའི་ལུགས་འདིའི་རྩ་བ་མ་རིག་པ་དངོས་ནི་བདག་ཏུ་རྨོངས་པ་ཞེས་ཉོན་ཡིད་ཀྱི་འཁོར་དུ་ཡོད་པ་དེ་ཡིན་ནོ། ། འགའ་ཞིག་འཇིག་ཚོགས་སུ་ལྟ་བ་ལ་ངོས་འཛིན་པ་ནི་རྣམ་པ་གསལ་བའི་ཕྱོགས་ནས་སྨོས་པ་ཙམ་ཡིན་ནོ།། འདུ་བྱེད་བསོད་ནམས་ཡིན་མིན་མི་གཡོའི་ལས། ། རྣམ་ཤེས་ཀུན་གཞི་ཆགས་བཅས་རྒྱུ་འབྲས་གཉིས། ། མིང་བཞི་མངལ་གྱི་སྐབས་ལྔ་གཟུགས་ཡིན་ཏེ། ། དབང་པོ་དྲུག་གསལ་སྐྱེ་མཆེད་ངོ་བོ་ཡིན། ། ཡན་ལག་གཉིས་པ་འདུ་བྱེད་ནི། བསོད་ནམས་ཀྱི་ལས། བསོད་ནམས་མིན་པའི་ལས། མི་གཡོ་བའི་ལས་རྣམས་སོ། ། དང་པོ་ནི། འདོད་ཁམས་ཀྱི་ལས་དགེ་བ། གཉིས་པ་ནི། འདོད་ཁམས་ཀྱི་མི་དགེ་བ། གསུམ་པ་ནི། ཁམས་གོང་མ་གཉིས་འགྲུབ་བྱེད་ཀྱི་ལས་ཏེ་ཏིང་ངེ་འཛིན་ནོ། ། ཡན་ལག་གསུམ་པ་རྣམ་ཤེས་ནི། ཀུན་གཞིའི་རྣམ་ཤེས་ཀྱི་སྟེང་དུ་ལས་ཀྱི་བག་ཆགས་ཡོངས་སུ་བཞག་པས་རྣམ་ཤེས་དེ་ཉིད་ཡོངས་སུ་འགྱུར་བའི་ཆ་ཡིན་ལ། དེ་ལའང་རྒྱུ་དུས་ཀྱི་རྣམ་ཤེས་དང༌། འབྲས་བུའི་དུས་ཀྱི་རྣམ་ཤེས་གཉིས་སུ་ཡོད་དོ། ། ཡན་ལག་བཞི་པའི་མིང་གཟུགས་ནི། མིང་ཞེས་པ་མིང་བཞིའི་ཕུང་པོ་ཡིན་ལ། དེའང་ཚོར་བ་སོགས་ཕུང་པོ་ཕྱི་མ་བཞིའོ། ། དེ་རྣམས་(༢༡༣ན)ལ་མིང་གཞིའི་ཕུང་པོར་འཇོག་པའི་རྒྱུ་མཚན་ཡང༌། གཟུགས་ཕུང་ནི་དབང་ཤེས་ལྔའི་སྤྱོད་ཡུལ་དུ་མངོན་སུམ་དུ་གྱུར་པས་ན་མིང་ལ་བརྟེན་ནས་རྟོགས་མི་དགོས་ལ། ཕུང་པོ་ཕྱི་མ་བཞི་ནི་གཞན་གྱི་རྒྱུ་ལ་ཡོད་པ་མིང་ལ་བརྟེན་ནས་རྟོགས་དགོས་པ་ཡིན་ནོ། ། ནུར་ནུར་པོ་དང༌། མེར་མེར་པོ་དང༌། གོར་གོར་པོ་དང༌། ཁྲང་འགྱུར་དང༌། རྐང་ལག་རྣམ་པར་འགྱུས་པ་སྟེ། མངལ་གྱི་གནས་སྐབས་ལྔ་ནི་གཟུགས་ཀྱི་ཡན་ལག་ཡིན་ནོ། ། ཡན་ལག་ལྔ་པ་སྐྱེ་མཆེད་དྲུག་ནི། མངལ་གནས་ལྔའི་རྗེས་སུ་དབང་པོ་དྲུག་གསལ་བར་འདོད་པ་ཉིད་སྐྱེ་མཆེད་རྣམས་ཀྱི་ངོ་བོ་ཡིན་ནོ། ། རེག་པ་བཙས་ནས་ཡུལ་དབང་ཤེས་གསུམ་ཕྲད། ། ཚོར་བ་དེར་བརྟེན་ཆགས་སྡང་བར་མ་མྱོང༌། ། འདོད་སྲེད་ཉེར་སྤྱོད་ཡོངས་བཟུང་སྲེད་པ་སྟེ། ། ཡན་ལག་དྲུག་པ་རེག་པ་ནི། མངལ་ནས་ཕྱིར་བཙས་ཏེ་ཡུལ་དང༌། དབང་པོ་དང༌། རྣམ་པར་ཤེས་པ་གསུམ་འདུས་པའི་རེག་པ་འབྱུང་བ་ཡིན་ཞིང༌། དེའང་རེག་པ་དངོས་ནི། རྣམ་ཤེས་ཡུལ་དང་ཕྲད་པ་ལས་ཡུལ་ངེས་ཤེས་པར་འགྱུར་བའི་ཆ་ཞིག་འབྱུང་བ་དེའོ། ། ཡན་ལག་བདུན་པ་ཚོར་བ་ནི། རེག་པ་དེ་ལ་བརྟེན་ནས་ཚོར་བ་བདེ་སྡུག་བར་མ་གསུམ་མྱོང་བ་ཡིན་ཏེ། མིག་དབང་དང༌། ཡུལ་གཟུགས་ཡིད་འོང༌། མིག་ཤེས་གསུམ་འདུས་པ་ལས་ཐོག་མར་མིག་ཤེས་ཀྱིས་ཡུལ་ཡོངས་སུ་གཅོད་པའི་རེག་པ་འབྱུང༌། དེའི་རྗེས་སུ་རེག་པས་ཡོངས་སུ་མྱོང་བའི་ཚོར་བ་བདེ་བར་འབྱུང་བས་མཚོན་ནོ། །དབང་ཤེས་དྲུག་ལ་ཚོར་བ་གསུམ་གྱི་དབྱེ་བས་ཡིད་ཉེ་བར་རྒྱུ་བ་བཅོ་བརྒྱད་ཅེས་བྱའོ། ། ཡན་ལག་བརྒྱད་པ་སྲེད་པ་ནི། ཚོར་བ་བདེ་སྡུག་བཏང་སྙོམས་གསུམ་ལ་སྲེད་ཅིང་ཞེན་པ་ཡིན་ལ། དེའང་བདེ་བ་ལ་མི་འབྲལ་བ་སྲེད་པ་དང༌། སྡུག་བསྔལ་འབྲལ་འདོད་ཀྱི་སྲེད་པ་དང༌། བཏང་སྙོམས་ལ་མི་འབྲལ་བར་འདོད་པའི་སྲེད་པ་སྐྱེ་བ་ཡིན་ཞིང༌། (༢༡༣བ) ཡང་སྲེད་པ་ལ། འདོད་པའི་སྲེད་པ་དང༌། སྲིད་པའི་སྲེད་པ་དང་། འཇིག་པའི་སྲེད་པ་དང་གསུམ། དང་པོ་འདོད་ཁམས། གཉིས་པ་ཁམས་གོང་མ་གཉིས། གསུམ་པ་ཉེར་སྤྱོད་ཡོངས་སུ་བཟུང་བར་སྲེད་པའོ།། འདོད་དང་སྲིད་ལྟ་བདག་སྨྲའི་ཉེར་ལེན་གྱིས། ། ཡང་སྲིད་འགྲུབ་བྱེད་ལས་སྟོབས་ལྡན་གྱུར་པས། ། ཉིང་མཚམས་སྦྱར་ཏེ་སྐྱེ་བ་ཐོབ་ནས་བརྩམས། ། སྐད་ཅིག་རྒྱུན་འགྱུར་སྲོག་འགག་རྒ་ཤིའོ། ། ཡན་ལག་དགུ་པ་ལེན་པ་ནི། དེ་ལྟར་སྲིད་པ་ལ་བརྟེན་ནས་ལེན་པ་འབྱུང་བ་ཡིན་ཏེ། དཔེར་ན། བཟའ་བཏུང་ལོངས་སྤྱོད་སོགས་ཡུལ་ཡིད་འོང་གི་རྣམ་པ་ལ་སྲེད་ཅིང་ཞེན་པར་གྱུར་པ་ན། དེ་ཉིད་ཡང་དང་ཡང་དུ་འབྱུང་བར་འདོད་པ་དང༌། དེ་ཉིད་ཀྱི་ཐབས་སུ་བྱ་བ་རྣམ་པ་སྣ་ཚོགས་པ་སྒྲུབ་པར་བྱེད་པའི་ནུས་པ་ཅན་དེ་ལ་ལེན་པ་ཞེས་བྱའོ། ། ལེན་པ་དེ་ལའང༌། འདོད་པའི་ལེན་པ་དང༌། སྲིད་པའི་ལེན་པ་དང༌། ལྟ་བའི་ལེན་པ་དང༌། བདག་ཏུ་སྨྲ་བའི་ཉེ་བར་ལེན་པ་དང་བཞིར་གསུངས་ལ། དེ་ཡིས་ཡན་ལག་ཕྱི་མ་འགྲུབ་བོ། ། ཡན་ལག་བཅུ་པ་སྲིད་པ་ལ། ཡང་སྲིད་མངོན་པར་འགྲུབ་པར་བྱེད་པའི་ལས་སྟོབས་དང་ལྡན་པ་དེའོ། ། ཡན་ལག་བཅུ་གཅིག་པ་སྐྱེ་བ་ནི། སྐྱེ་བའི་ཡན་ལག་མངོན་གྱུར་གྱི་དབང་དུ་བྱས་ནས། མངལ་དུ་ཉིང་མཚམས་སྦྱོར་བཞིན་པ་ནི་སྐྱེ་བ་ཡིན་ལ། ཉིང་མཚམས་སྦྱར་ཟིན་པ་ནི། བཅུ་གཉིས་པ་རྒ་ཤིའི་ཡན་ལག་ཡིན་ནོ། ། དེའང་ནུར་ནུར་པོ་ལ་སོགས་པ་སྐྱེ་བའི་གནས་སྐབས་ཐོབ་པ་ནས་བརྩམས། རིམ་པར་སྐད་ཅིག་གཅིག་གི་རྒྱུན་འགྱུར་བ་ནི་རྒས་པ་ཡིན་ལ། འདིར་རྒ་ཤི་ཞེས་ཡན་ལག་གཅིག་ཏུ་བསྡོམས་པ་ཡང༌། མ་རྒས་པ་ལ་འཆི་བ་ཡང་མེད་པས་ན། དེ་ལྟར་དུ་གསུངས་སོ། ། དེ་ལྟར་ན། ཡན་ལག་བཅུ་གཉིས་པོ་དེ་རྣམས་ཀྱིས་བག་ཆགས་ཀུན་གཞི་ལ་བཞག་པ་མངོན་དུ་གྱུར་པ་དང་ས་བོན་ཡོངས་སུ་སྨིན་པ་ལས་ཡན་ལག་བཅུ་གཉིས་མངོན་འགྱུར་བ་གཉིས་འབྱུང་བ་ཐམས་ཅད་ལ་ཤེས་པར་བྱའོ། ། ཏ༥ ལྔ་པ་བྱེད་ལས་ནི། བྱེད་ལས་(༢༡༤ན)དོན་ལ་སྒྲིབ་ཅིང་ས་བོན་འདེབས། ། འཁྲིད་དང་ཀུན་འཛིན་རྫོགས་དང་ཡོངས་སུ་གཅོད། ། སྤྱོད་སྡུད་སྦྱོར་ཕྱོགས་སྡུག་བསྔལ་འགྱུར་བར་བྱེད། ། དེ་དག་སོ་སོའི་བྱེད་ལས་ཀྱང་དབུས་མཐའ་ལས་ཤློཀ་ཕྱེད་དང་གཉིས་ཀྱིས་བསྟན་ཏེ། ཡང་དག་པའི་དོན་མཐོང་བ་ལ་སྒྲིབ་པར་བྱེད་པ་མ་རིག་པའི་བྱེད་ལས་དང༌། དེ་བཞིན་དུ། དེའི་དབང་གིས་ཀུན་གཞི་ལ་ལས་ཀྱིས་ས་བོན་འདེབས་པར་བྱེད་པ་འདུ་བྱེད་ཀྱི་དང༌། ས་བོན་དང་མཐུན་པར་སྐྱེ་གནས་སུ་འཁྲིད་པར་བྱེད་པ་རྣམ་པར་ཤེས་པའི་དང༌། ཁྲིད་པ་ལྟར་ལུས་ཀུན་ཏུ་འཛིན་པར་བྱེད་པ་མིང་གཟུགས་ཀྱི་དང༌། གཟུང་བ་ལྟར་ལུས་ཡོངས་སུ་རྫོགས་པར་བྱེད་པ་སྐྱེ་མཆེད་དྲུག་གི་དང༌། དེའི་མཐུས་ལས་གསུམ་འདུས་ནས་ཡུལ་ཡོངས་སུ་གཅོད་པར་བྱེད་པ་རེག་པའི་དང༌། བཅད་པ་ལྟར་བདེ་བ་སོགས་ལ་ཉེ་བར་སྤྱོད་པ་ཚོར་བའི་དང༌། དེའི་དབང་གིས་ལས་དང་མཐུན་པའི་ཡང་སྲིད་སྡུད་པར་བྱེད་པ་སྲེད་པའི་དང༌། སྲེད་པ་ལྟར་རྣམ་ཤེས་སྐྱེ་བ་ལ་སྦྱོར་བར་བྱེད་པ་ལེན་པའི་དང༌། སྦྱར་བ་ལྟར་ཡང་སྲིད་སྐྱེ་བ་ལ་མངོན་དུ་ཕྱོགས་པར་བྱེད་པ་སྲིད་པའི་དང༌། དེའི་དབང་གིས་སྡུག་བསྔལ་གྱི་ཕུང་པོ་འགྲུབ་པར་བྱེད་པ་སྐྱེ་བའི་དང༌། དེའི་ཉེས་དམིགས་ན་ཚོད་དང་སྲོག་འགྱུར་བར་བྱེད་པ་རྒ་ཤིའི་བྱེད་ལས་ཏེ་ཐམས་ཅད་ཀྱང་འཁོར་བར་ཀུན་ནས་ཉོན་མོངས་པར་བྱེད་པའོ། ཏ༦ དྲུག་པ་རབ་ཏུ་དབྱེ་བ་བཤད་པ་ལ་གཉིས། ཐ༡ མདོར་བསྟན། ཐ༢ རྒྱས་བཤད་དོ། ། ཐ༡ དང་པོ་ནི། རབ་དབྱེ་གསུམ་བརྒྱད་ཡན་ལག་བྱེ་བྲག་བཤད། ། རྟེན་འབྲེལ་གྱི་རབ་ཏུ་དབྱེ་བ་བཤད་པ་ལ་སྤྱིར་རྣམ་གྲངས་མང་ཡང༌། འདིར་གསུམ་དུ་དབྱེ་བ། བརྒྱད་དུ་དབྱེ་བ། ཡན་ལག་བཅུ་གཉིས་བྱེ་བྲག་ཏུ་བཤད་པའོ། ། ཐ༢ གཉིས་པ་ལ་གསུམ། ད༡ གསུམ། ད༢ བརྒྱད། ད༣ བྱེ་བྲག་གོ། ། ད༡ དང་པོ་ལའང་གསུམ། ན༡ ངོ་བོ་ཉིད་རྣམ་པར་འབྱེད་པའི། ན༢ སྡུག་པ་དང་མི་སྡུག་པ་རྣམ་པར་འབྱེད་པའི། ན༣ ཉེར་སྤྱོད་ཅན་གྱི་(༢༡༤བ)རྟེན་འབྲེལ་ལོ། ། ན༡ དང་པོ་ནི། གསུམ་ལས་ངོ་བོ་རྣམ་འབྱེད་ཆོས་ཐམས་ཅད། ། ཀུན་གཞི་ལས་སྤྲུལ་དབང་རབ་ཁོ་ནར་གསུངས། ། གསུམ་དུ་དབྱེ་བ་ལས་དང་པོ་ངོ་བོ་ཉིད་རྣམ་པར་འབྱེད་པའི་རྟེན་འབྲེལ་ནི། ཕྱི་ནང་གི་ཆོས་ཐམས་ཅད་ཀུན་གཞིའི་རྣམ་པར་ཤེས་པ་ལས་སྤྲུལ་ཞིང༌། དེའི་མཐུ་ལས་སྣང་བ་ལ་དེར་འཇོག་པ་ཡིན་ལ། དེ་ནི་དབང་རབ་ཐེག་པ་ཆེན་པོ་ལ་ཞུགས་པའི་བྱང་ཆུབ་སེམས་དཔའ་ཁོ་ནའི་བགོ་སྐལ་དུ་བསྟན་གྱི། རིགས་ཅན་གཞན་གཉིས་ལ་བསྟན་པ་མེད་ཅིང༌། དེའི་ཕྱིར་བྱང་ཆུབ་སེམས་དཔའ་འམ་སངས་རྒྱས་ཉག་གཅིག་གིས་རྟོགས་པ་ཡིན་གྱི། ཉན་ཐོས་དང་རང་རྒྱལ་གཉིས་ཀྱིས་ནི་ཕྱོགས་ཙམ་ཡང་རིག་པ་མ་ཡིན་ནོ། ། ན༢ གཉིས་པ་[སྡུག་པ་དང་མི་སྡུག་པ་རྣམ་པར་འབྱེད་པའི་རྟེན་འབྲེལ་]ནི། སྡུག་དང་མི་སྡུག་རྣམ་འབྱེད་ཉན་རང་ལ། ། གསུངས་ཏེ་ཀུན་ཉོན་རྣམ་བྱང་དབང་བྱས་གཉིས། ། འབྱེད་པ་ཞེས་བྱ་འཕེལ་ཞིང་རྒྱས་པའི་དོན། ། སྡུག་པ་ནི་ཡིད་དུ་འོང་བ་དང༌། མི་སྡུག་པ་ནི་ཡིད་དུ་མི་འོང་བ་སྟེ། དེ་གཉིས་རྣམ་པར་འབྱེད་པ་ནི་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ཏེ། དེ་ནི་ཉན་ཐོས་དང་རང་སངས་རྒྱས་ཀྱི་རིགས་ཅན་གཉིས་ཆར་ལ་བཅོམ་ལྡན་འདས་ཀྱིས་བསྟན་ཅིང༌། བསྟན་པ་ལྟར་གཉིས་ཆར་གྱིས་སྒོམ་པ་ཡིན་ཡང་རང་སངས་རྒྱས་རྣམས་ཀྱིས་ནི་ལུགས་འབྱུང་དང་ལུགས་ལྡོག་གི་རྟེན་འབྲེལ་རྣམས་རྒྱས་པར་རྟོགས་པ་ཡིན་ལ། ཉན་ཐོས་རྣམས་ཀྱིས་ནི་རང་རྒྱལ་ལྟར་རྟེན་འབྲེལ་ལ་རང་བྱན་ཆུད་པའི་སྒོ་ནས་ཤིན་ཏུ་རྟོགས་པ་ནི་མ་ཡིན་ནོ། ། དེ་ལའང་རྣམ་པ་གཉིས། ཀུན་ནས་ཉོན་མོངས་པ་དང༌། རྣམ་བྱང་གི་དབང་དུ་བྱས་པའོ། ། དང་པོ་ནི། མ་རིག་པ་དང་མཚུངས་ལྡན་གྱི་དགེ་བ་ཟག་བཅས་ཀྱི་མཐུ་ལས་མཐོ་རིས་ཀྱི་སྐྱེ་བ་ནི་སྡུག་པ་རྣམ་པར་འབྱེད་པའི་རྟེན་འབྲེལ་དང༌། མ་རིག་པ་དང་མཚུངས་པར་ལྡན་པའི་ལས་མི་དགེ་བའི་མཐུ་ལས་ངན་སོང་གསུམ་དུ་སྐྱེ་བ་ནི་མི་སྡུག་པ་རྣམ་པར་འབྱེད་པའི་རྟེན་འབྲེལ་ཅེས་བྱའོ། ། གཉིས་པནི། (༢༡༥ན)མ་རིག་པ་དང་མཚུངས་ལྡན་གྱི་ལས་དགེ་སྡིག་གི་མཐུ་ལས་རིགས་དྲུག་ཏུ་སྐྱེ་བ་ནི་མི་སྡུག་པ་རྣམ་པར་འབྱེད་པ་དང༌། དགེ་བ་ཟག་མེད་ཀྱི་མཐུ་ལས་ཐར་པ་ཐོབ་པ་ནི་སྡུག་པ་རྣམ་པར་འབྱེད་པའི་རྟེན་འབྲེལ་ཅེས་བྱའོ། ། རྣམ་པར་འབྱེད་པ་ཞེས་བྱ་བ་སྐབས་འདིར་འཕེལ་བ་དང་རྒྱས་པའི་དོན་ཡིན་པས། གཟུགས་སྒྲ་དྲི་རོ་རེག་བྱ་ལ་སོགས་པ་སྣང་བ་སྣ་ཚོགས་པ་རྣམས་དང༌། སེམས་དང་སེམས་ལས་བྱུང་བའི་ཡང་དག་པ་མ་ཡིན་པའི་ཀུན་ཏུ་རྟོག་པ་རྣམས་ཀྱིས་ཀུན་གཞི་ལ་བག་ཆགས་བཞག་ཅིང༌། ཀུན་གཞི་ཉིད་འཕེལ་ཞིང་རྒྱས་པར་བྱེད་པ་ཡིན་ནོ། ། ན༣ གསུམ་པ་[ཉེར་སྤྱོད་ཅན་གྱི་རྟེན་འབྲེལ་]ནི།