Tibetan
ས་བོན་སྨིན་ཅིང་ཡོངས་སུ་འཕངས་པ་ཡིན་ཀྱང༌། ས་བོན་དེ་ཉིད་ནུས་པ་མཐུ་ཅན་ཙམ་དུ་བྱས་པ་ལས། ཡང་སྲིད་དེ་མྱུར་དུ་འགྲུབ་པར་མ་ངེས་པ་ལ་སྐྱེ་བ་རྟིང་མ་ལྟ་བུ་དུས་མྱུར་བ་ཞིག་ལ་ཡང་སྲིད་འགྲུབ་ངེས་སུ་བྱེད་པ་ནི་འགྲུབ་པའི་ཡན་ལག་སྟེ། དེ་ཡང་གང་གིས་འགྲུབ་པ་ནི། སྲིད་པ་དང༌། ལེན་པའི་ཡན་ལག་གཉིས་ཀྱིས་ཡིན་པ་དང༌། ཚུལ་ཇི་ལྟར་འགྲུབ་པ་ནི། སྔར་འཕངས་པས་ཡང་སྲིད་ཀྱིས་ས་བོན་དེ་ཉིད་ཡན་ལག་གི་ནུས་པ་མཐུ་ཅན་དུ་བྱས་པའི་ཚུལ་གྱིས་དང༌། གང་འགྲུབ་ན། ཡང་སྲིད་ཕྱི་མར་སྐྱེ་བའི་ཡན་ལག་གཅིག་ཉིད་དོ། ། དོན་བདུན་པ་ཉེས་དམིགས་གང་ཡིན་པ་ནི། རྒ་ཤིའི་ཡན་ལག་གཅིག་གིས་བསྟན་ཏོ། ། འདི་རྣམས་ཀྱང་གཙོ་ཆེ་བ་དཔེར་སྨོས་པ་ཙམ་ཡིན་གྱི་གཞན་ནི་ངེས་པ་མེད་དེ། ཚེ་རབས་མང་པོས་སྐྱེ་བ་གཅིག་འཕེན་པ་དང༌། ལས་འགའ་ཞིག་གི་རྣམ་པར་སྨིན་པའི་ལུས་བསྐལ་པ་བརྒྱའི་ཕ་རོལ་ལ་སོགས་པར་འབྱུང་བ་སྲིད་པའི་ཕྱིར་དང༌། ཚེ་གཅིག་ལ་རྫོགས་པའང་གོང་དུ་སྨོས་པ་ལྟར་ཏེ། དེའི་གོ་རིམ་དང་པོ་གསུམ་གྱི་རྗེས་སུ་སྲེད་ལེན་སྲིད་པ་གསུམ་སྦྱར་བ་སོགས་གོ་རིམ་དཀྲུགས་པའི་ཚུལ་འདི་ནི་ཤིན་ཏུ་མི་འཐད་པ་ཇོ་ནང་རྗེ་བཙུན་ཆེན་པོས་གསུངས་སོ། ། ཞར་བྱུང་དུ་ཁམས་གང་ན་རྟེན་འབྲེལ་གང་ཡོད་ཅིང་དེ་རྣམས་ཀྱང་ས་མཚུངས་པའམ་མི་མཚུངས་པ་ཇི་ལྟར་ཡིན་སྙམ་ན། འདོད་པའི་ཁམས་ན་ཡན་ལག་བཅུ་གཉིས་པོ་རྫོགས་པར་ཡོད་ལ། (༢༢༠ན) ཁམས་གོང་མ་གཉིས་ན་བཅུ་གཉིས་པོ་ཕྱོགས་རེ་ཡོད་དེ་དེ་ན་རྒ་བ་ཇི་ལྟར་ཡོད་ན་འདུ་བྱེད་རྣམས་རྙིང་པ་དང་དེངས་པའོ་ཞེས་འཆད་པས་སོ། ། གཟུགས་མེད་ན་ནི་རྟེན་འབྲེལ་གཟུགས་ཅན་རྣམས་མེད་དེ། ཁམས་གསུམ་གྱི་ས་དགུ་པོའང་རང་ས་དང་འོག་ས་དང་གོང་ས་གསུམ་མམ། འཆི་ས་དང་སྐྱེ་ས་དང་གཉིས་ཀ་མ་ཡིན་པ་དང་གསུམ་དུ་འདུའོ། ། དེ་ལ་མ་རིག་པ་ལས་གཞན་པའི་ཡན་ལག་གཅིག་ནི་གང་དུ་སྐྱེ་བར་འགྱུར་བ་དེའི་ས་པ་ཁོ་ནར་མཚུངས། མ་རིག་པ་ནི་འདོད་པ་ནས་འདོད་པར་སྐྱེ་ན་འདོད་པར་གཏོགས་པས་ཐམས་ཅད་ས་མཚུངས་ཤིང༌། ས་གོང་མ་བརྒྱད་རང་ས་ནས་རང་སར་སྐྱེ་བ་ལ་ནི་མ་རིག་པ་རང་གི་ས་པ་མེད་དེ། དེ་རྣམས་སུ་སྐྱེ་བ་འཕེན་པའི་ལས་ནི་ཞི་རགས་སུ་སྒོམ་པ་ཡིན་ལ། རང་ཉིད་རང་ས་དང་ཞི་རགས་སུ་སྒོམ་པ་མེད་པའི་ཕྱིར་རོ། ། འོན་ཀྱང་ཞིབ་མོར་བྱས་ན་དེ་ལའང་ཁྱད་པར་མང་དུ་བཤད་པ་ནི་མཁས་མཆོག་དབྱིག་གཉེན་གྱི་གཞུང་སོགས་ལས་རྟོགས་པར་བྱའོ། ། ཏ༧ བདུན་པ་རྟེན་འབྲེལ་གྱི་དོན་བསྡུ་བ་ལ་གསུམ། ཐ༡ སྐྱེ་འགག་རྟོགས་པ་རྟེན་འབྲེལ་ལས་བྱུང་ཚུལ། ཐ༢ དེ་བདེན་གཉིས་སུ་བསྡུ་བ། ཐ༣ ཟབ་འགལ་ལྔ་ཡིས་རྟོགས་པར་དཀའ་བའི་ཚུལ་གྱི་ཞར་བྱུང་རྟོགས་ན་ཕན་ཡོན་དང་ལྡན་པར་བཤད་པའོ། ། ཐ༡ དང་པོ་ནི། བྱས་མིན་མི་རྟག་ས་བོན་མཐུ་ལྡན་པས། ། དངོས་རྣམས་སྐྱེ་འགག་རྟེན་འབྲེལ་རྟོགས་ལས་འབྱུང༌། ། དངོས་པོ་རྣམས་སྐྱེ་འགག་བྱེད་པ་ནི། བྱེད་པ་པོའི་བློའི་རྣམ་པར་རྟོག་པའི་གཡོ་བས་བྱས་པ་མ་ཡིན་པ་དང༌། རྟག་ཅིང་བརྟན་པ་ལ་རྒྱུ་རྐྱེན་གྱི་སྐྱེ་འགག་མི་རུང་བས་མི་རྟག་པའི་ཆོས་རྣམས་སྐྱེ་ཞིང་འགག་པའི་རང་བཞིན་ཅན་ཡིན་པ་དང༌། དངོས་པོ་རྣམས་ནི་ས་བོན་མཐུ་དང་ལྡན་པ་ཡིན་པས། རང་རང་གི་འབྲས་བུ་སྐྱེད་དུ་རུང་བའི་རྒྱུ་ལས་སྐྱེ་བ་སྟེ། དེ་ལྟར་མཚན་ཉིད་གསུམ་དང་ལྡན་པའི་ཚུལ་གྱིས་དངོས་(༢༢༠བ)པོ་རྣམས་སྐྱེ་འགག་བྱེད་པ་མ་ཤེས་པས་ཕྱི་རོལ་པ་སོགས་ཀྱིས་རྟག་ཆད་སྣ་ཚོགས་སུ་སྨྲ་བས་ན་རྟེན་འབྲེལ་གྱི་དོན་རྟོགས་ན་དེ་ཉིད་ཤེས་པར་འགྱུར་བ་དང༌། དེ་གསུམ་ཤེས་པས་ཀྱང་རྟེན་འབྲེལ་ལ་ངེས་པ་རྙེད་པར་འགྱུར་རོ། ། ཐ༢ གཉིས་པ་[དེ་བདེན་གཉིས་སུ་བསྡུ་བ་]ནི། སྣང་ཙམ་ཀུན་རྫོབ་དེ་ཡི་ཆོས་ཉིད་ནི། ། དོན་དམ་རྟེན་འབྲེལ་ཙམ་འཇོག་ཤིན་ཏུ་ཕྲ། ། འདི་ལྟར་སྣང་བ་ཙམ་ནི་སྟོང་ཉིད་རྟེན་འབྲེལ་དུ་ཤར་བ་ཀུན་རྫོབ་ཀྱི་རྟེན་འབྲེལ། དེ་ཡིས་ཆོས་ཉིད་ནི་སྣང་ཡང་བདེན་པར་མ་གྲུབ་པ་དོན་དམ་སྟོང་པ་ཉིད་ཀྱི་རྟེན་འབྲེལ་སྒྲས་བརྗོད་ཙམ་དུ་འཇོག་པས་གནད་འདི་ནི་ཤིན་ཏུ་ཟབ་ཅིང་ཕྲ་བའི་ཕྱིར་སངས་རྒྱས་ཁོ་ནའི་མཁྱེན་པའི་ཡུལ་ཏེ། གསུང་ཆོས་འཁོར་ཐམས་ཅད་ཀྱིའང་རྩེ་མོར་གྱུར་པ་ནི་རྟེན་འབྲེལ་གྱི་ཚུལ་འདི་ཡིན་པས་སྨྲ་བ་རྣམས་ཀྱི་མཆོག་དམ་པ་ཞེས་བསྔགས་པར་མཛད་པ་ཡིན་ནོ། ། དེས་ན་རྟེན་འབྲེལ་གྱི་རྣམ་གཞག་ཇི་སྙེད་པའང་བདེན་པ་གཉིས་ཀྱི་ངོ་བོར་འདུ་བར་ཤེས་པར་བྱའོ། ། ཐ༣ གསུམ་པ་[ཟབ་འགལ་ལྔ་ཡིས་རྟོགས་པར་དཀའ་བའི་ཚུལ་གྱི་ཞར་བྱུང་རྟོགས་ན་ཕན་ཡོན་དང་ལྡན་པར་བཤད་པ་]ནི། རྒྱུ་དང་མཚན་ཉིད་སྐྱེ་གནས་འབྱུང་བས་ཟབ། ། འགལ་བ་ལྟར་སྣང་ལྔ་ཡིས་རྟོགས་པར་དཀའ། ། སྟོན་པ་ཐམས་ཅད་མཁྱེན་པ་མ་ཡིན་པ་གཞན་གྱིས་དོན་འདི་མི་རྟོགས་པའི་རྒྱུ་མཚན་ནི། རྒྱུས་ཟབ་པ། མཚན་ཉིད་ཀྱིས་ཟབ་པ། སྐྱེ་བས་ཟབ་པ། གནས་པས་ཟབ་པ། འབྱུང་བས་ཟབ་པ་སྟེ་ལྔ་དང༌། སྐད་ཅིག་པ་ཡང་ཡིན་ལ་གནས་པར་ཡང་དམིགས། གཡོ་བ་མེད་པའི་རྐྱེན་ལས་བྱུང་བ་ཡང་ཡིན་ལ་ནུས་པ་སོ་སོར་ངེས་པ་ཡང་དམིགས། སེམས་ཅན་མེད་པ་ཡང་ཡིན་ལ་སེམས་ཅན་དུ་ཡང་དམིགས། བྱེད་པ་པོ་ཡང་མེད་ལ་ལས་ཆུད་མི་ཟ་བར་ཡང་དམིགས། མཐའ་བཞི་ལས་ཀྱང་མི་སྐྱེ་ལ་བྱེད་པ་དོན་གཞན་ལ་ལྟོས་མེད་དུ་ཡང་འབྱུང་བ་སྟེ། འགལ་བ་ལྟར་སྣང་བ་ལྔ་ཡིས་ཤིན་ཏུ་རྟོགས་པར་དཀའོ། ། དེ་ལྟ་བུའི་རྟེན་འབྲེལ་ཟབ་མོའི་དོན་ཤེས་པ་ནི་དགོས་པ་རྒྱ་ཆེན་པོ་དང་ལྡན་ཏེ། སྟོང་ཉིད་དང་(༢༢༡ན)རྟེན་འབྲེལ་དབྱེར་མེད་པའི་ལྟ་བ་རྣམ་པར་དག་པ་ལ་བརྟེན་ནས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འགྱུར་བས་སོ། ། དེ་སྐད་དུའང༌། བཞི་བརྒྱ་པ་ལས། རྟེན་ཅིང་འབྲེལ་བར་འབྱུང་བ་ནི། ། མཐོང་ན་གཏི་མུག་འབྱུང་མི་འགྱུར། ། དེ་ཕྱིར་འབད་པ་ཀུན་གྱིས་འདིར། ། གཏམ་དེ་ཁོ་ན་བསྙད་པར་བྱ། ། ཞེས་དང༌། བཤེས་སྤྲིང་ལས། རྟེན་ཅིང་འབྲེལ་བར་འབྱུང་འདི་རྒྱལ་རྣམས་ཀྱི། ། གསུང་གི་མཛོད་ཀྱི་གཅེས་པ་ཟབ་མོ་སྟེ། ། གང་གིས་འདི་ནི་ཡང་དག་མཐོང་བ་དེས། ། ཆོས་མཐོང་དེ་ཡིས་དེ་བཞིན་གཤེགས་པ་མཐོང༌། ། ཞེས་གསུངས་པ་ལྟར་རོ། ། ཏ༨ བརྒྱད་པ་རྟེན་འབྲེལ་གྱི་དེ་ཁོ་ན་ཉིད་བསྟན་པ་ལ་གསུམ། ཐ༡ བདག་མེད་པའི་དེ་ཁོ་ན་ཉིད་དང༌། ཐ༢ ནང་གི་དེ་ཁོ་ན་ཉིད་དང༌། ཐ༣ རང་བཞིན་མེད་པའི་དེ་ཁོ་ན་ཉིད་དོ། ། ཐ༡ དང་པོ་ནི། ཆོས་ཀུན་བདག་མེད་རྟེན་ཅིང་འབྲེལ་འབྱུང་ཙམ། ། འཁོར་བ་དང་ལམ་དང་འབྲས་བུའི་ཆོས་ཀུན་རྫོབ་པའི་ཆ་ཐམས་ཅད་རྒྱུ་དང་རྐྱེན་འདུས་པ་ལས་སྐྱེས་པའི་ཕྱིར། མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པ་ཡིན་པ་ལས། དང་པོ་མི་རྟག་པ་ནི། དངོས་རྣམས་སྐད་ཅིག་གིས་སྐྱེ་འགག་བྱེད་པ་ཕྲ་བའི་མི་རྟག་པ་ཡིན་ལ། དེའང་སྐྱེས་ཟིན་པའི་རྗེས་སུ་འཇིག་པ་མ་ཡིན་གྱི། སྐྱེ་བཞིན་པའི་དེ་ཁོ་ན་ཉིད་འཇིག་བཞིན་པ་ཡིན་པའི་ཕྱིར། བར་དུ་གནས་པའི་གོ་སྐབས་ཅུང་ཟད་ཀྱང་མེད་པས་ནི་སྐྱེ་བཞིན་པ་དང་འཇིག་བཞིན་པ་མུ་སྦྱོར་བ་ཡིན་ནོ། ། སྡུག་བསྔལ་བ་ནི། མི་རྟག་པ་ཡིན་པའི་རྒྱུ་མཚན་གྱིས་སྡུག་བསྔལ་ཅན་དུ་གྲུབ་སྟེ། སྐད་ཅིག་ཙམ་ཡང་གནས་པའི་རང་དབང་མེད་པའི་ཕྱིར་རོ། ། སྟོང་པ་ནི། ཕྱི་ནང་གི་དངོས་པོ་གང་ལའང་རང་རང་གི་རྒྱུ་རྐྱེན་མི་རྟག་པའི་རང་བཞིན་ཅན་སྣ་ཚོགས་པ་དུ་མ་ལས་འབྲས་བུའང་མི་རྟག་པའི་རང་བཞིན་ཅན་སྣ་ཚོགས་པ་འབྱུང་བ་ཙམ་ཡིན་གྱི། བདག་དང་བྱེད་པ་པོ་ནམ་ཡང་མེད་པས་ན་སྟོང་པ་ཡིན་པ་(༢༢༡བ)དང༌། བདག་མེད་པ་ནི། ཆོས་འདི་རྣམས་བྱེད་པ་པོ་བདེན་པར་གྲུབ་པ་ཞིག་གིས་བྱས་པ་མ་ཡིན་པར་རྒྱུ་རྐྱེན་ལ་ལྟོས་ནས་བཏགས་པའི་རྟེན་ཅིང་འབྲེལ་བར་འབྱུང་བ་ཙམ་དུ་སྣང་བའོ། ། ཐ༢ གཉིས་པ་[ནང་གི་དེ་ཁོ་ན་ཉིད་]ནི། བདེན་མེད་རྣམ་རིག་ནང་གི་དེ་ཉིད་དང༌། ། དེ་ལྟར་བདག་མེད་པ་ཡིན་ཀྱང༌། ནང་ཤེས་པ་དང་ཕྱི་དངོས་པོའི་རྟེན་འབྲེལ་རྣམས་དེ་ཉིད་དུ་བདེན་ནོ་སྙམ་ན། རྟེན་ཅིང་འབྲེལ་བར་འབྱུང་བའི་ཆོས་ཐམས་ཅད་ནི་བཅོས་མ་གློ་བུར་བ་ཡིན་པས་དེ་ཉིད་དུ་བདེན་དངོས་སུ་གྲུབ་པ་ཅུང་ཟད་ཀྱང་མེད་དེ། ཕྱིན་ཅི་ལོག་ཏུ་འཁྲུལ་པའི་ཚུལ་མིན་ཡིད་བྱེད་ཀྱི་རྣམ་པར་རྟོག་པའམ། རྣམ་པར་རིག་པ་ཙམ་གྱི་མཐུ་ལས་བྱུང་བ་ནི་ནང་གི་དེ་ཁོ་ན་ཉིད་ཅེས་བྱའོ། ། ཐ༣ གསུམ་པ་[རང་བཞིན་མེད་པའི་དེ་ཁོ་ན་ཉིད་]ནི། དེ་ཡང་གདོད་ནས་མ་གྲུབ་སྣང་ཙམ་པ། ། མི་འགལ་གཉིས་ཀྱིས་བསླད་པའི་ཤེས་པ་བཞིན། ། རང་བཞིན་མེད་པའི་དེ་ཁོ་ན་ཉིད་ཡིན། ། འོད་གསལ་ཡེ་ཤེས་རྟེན་འབྲེལ་ཡུལ་ལས་འདས། ། བྱ་བྱེད་ལྟོས་བཞག་དག་ལས་གྲོལ་ཕྱིར་རོ། ། རྣམ་པ་རིག་པ་ཙམ་དེའང་གདོད་མ་ནས་ཡོད་མ་མྱོང་བས་བདེན་པར་གྲུབ་པ་མེད་ཀྱང་སྣང་ཙམ་ཞིག་མི་འགལ་ཏེ། དཔེར་ན། གཉིད་ཀྱིས་བསླད་པའི་རྨི་ལམ་གྱི་ཤེས་པ་ལ་རི་ར་བ་ཁང་ཁྱིམ་སོགས་སྣ་ཚོགས་སུ་ཤར་བའི། སྣང་བ་དེ་རྣམས་ནི་ཡོད་མ་མྱོང་ཡང་གཉིད་ལོག་པའི་ཤེས་པ་ཙམ་ཞིག་གནས་སྐབས་དེར་ཡོད་པ་བཞིན་ཡུལ་དང་དོན་གྱི་རྣམ་པ་ཇི་སྙེད་པ་ཤར་ཡང་དེ་རྣམས་ནི་གདོད་མ་ནས་བདེན་པར་གྲུབ་མ་མྱོང་ཡང༌། དེ་རྣམས་འཆར་བའི་གཞི་རྣམ་པར་རྟོག་པ་ཙམ་ཞིག་གནས་སྐབས་དེར་ཡོད་ལ། དེའང་རྨི་ལམ་གྱི་མེ་གདོད་ནས་ཡོད་མ་མྱོང་བ་ཡིན་ཀྱང༌། དེས་བུད་ཤིང་ཚིག་པར་སྣང་བ་བཞིན་དུ་ཡོད་མེད་རྟག་ཆད་ཀུན་ལས་འདས་པ་ཡིན་ཏེ། རྒྱུ་རྐྱེན་རྟེན་འབྲེལ་གྱི་རྣམ་པ་སྣ་ཚོགས་པ་སྣང་ཙམ་དུ་ཤར་བས་ན་མེད་པ་ལས་འདས་ཤིང༌། དེ་ནི་རང་བཞིན་དུ་མ་གྲུབ་པས་ན་ཡོད་པ་ལས་ཀྱང་འདས་པ་ཡིན་ནོ། །(༢༢༢ན) དེ་བཞིན་དུ། རྒྱུ་རྐྱེན་རྟེན་འབྲེལ་གྱི་སྣང་བ་རྣམས་སྔ་མ་སྔ་མ་འགག་ཅིང༌། ཕྱི་མ་ཕྱི་མ་སྐྱེ་བ་མི་རྟག་པའི་རང་བཞིན་ཅན་ཡིན་པས་ན་རྟག་པའི་མཐའ་ལས་ཀྱང་འདས་ཤིང༌། རྒྱུ་རྐྱེན་ལས་སྣང་བ་ཙམ་གྱི་འཆར་སྒོ་འགག་མེད་དུ་འབྱུང་བའི་ཕྱིར་ཆད་པའི་མཐའ་ལས་འདས་པ་ནི་རང་བཞིན་མེད་པའི་དེ་ཁོ་ན་ཉིད་ཡིན་ནོ། ། དེའི་ཕྱིར་ཀུན་བཏུས་ནས། བདག་ལས་མ་ཡིན། གཞན་ལས་མ་ཡིན། གཉིས་ཀ་ལས་མ་ཡིན། རྒྱུ་མེད་ལས་མ་ཡིན། བདག་གི་རང་བཞིན་དུ་མ་གྲུབ། གཞན་གྱི་རང་བཞིན་དུ་མ་གྲུབ། གཉིས་ཀའི་རང་བཞིན་དུ་མ་གྲུབ་བོ། །ཞེས་གསུངས་པ་སྟེ། མ་རིག་པའི་རྐྱེན་གྱིས་འདུ་བྱེད་འབྱུང་བ་དེ་ཡང༌། མ་རིག་པའི་བདག་ཉིད་གཅིག་པུ་ལས་བྱུང་བ་ཡང་མ་ཡིན་ཏེ། རྒྱུ་གཅིག་ཁོ་ནས་འབྲས་བུ་དུ་མ་སྐྱེ་མི་ནུས་པའི་ཕྱིར་དང༌། གཞན་གྱི་དངོས་པོ་ལས་འབྱུང་བ་ཡང་མ་ཡིན་ཏེ། རང་རྒྱུ་ལ་ལྟོས་པའི་ཕྱིར་དང༌། གཉིས་ཀ་ལས་ཀྱང་མ་ཡིན་ཏེ། བདག་གཞན་རེ་རེ་བ་ཁེགས་པའི་ཕྱིར་དང༌། རྒྱུ་མེད་ལས་མ་ཡིན་ཏེ། འབྲས་བུ་སྐྱེ་བ་རྒྱུ་ལ་ངེས་པར་ལྟོས་པ་མངོན་སུམ་དུ་མཐོང་བའི་ཕྱིར་རོ། ། ཁ་ཅིག་གིས་ཀླུ་སྒྲུབ་ཞབས་ཀྱི་རྟེན་འབྲེལ་རྣམ་གཞག་དབུ་མ་ལུགས་ཡིན་ལ། ཐོགས་མེད་སྐུ་མཆེད་གཉིས་ཀྱིས་གཞན་སྐྱེ་ཁས་བླངས་པའི་ཕྱིར་སེམས་ཙམ་ལུགས་ཡིན་ནོ་ཞེས་པ་ཁྱད་པར་འབྱེད་པར་རློམ་པ་ནི། ཀུན་བཏུས་ཀྱི་ལུང་བཤད་མ་ཐག་པ་དེས་མི་འཐད་པར་རྟོགས་ནུས་ལ། སྤྱིར་ནི། གཞན་ལས་སྐྱེ་བ་ནི་ཀུན་རྫོབ་ཙམ་དུ་གཞན་སྐྱེར་སྣང་བ་ཡིན་ལ། གཞན་ལས་མི་སྐྱེ་ཞེས་བཀག་པ་ནི་བདེན་གྲུབ་ཀྱི་གཞན་སྐྱེ་བཀག་པ་ཡིན་པས་སོ། ། དེང་སང་ཀླུ་སྒྲུབ་ཀྱི་ལུང་དོན་སྐྱོང་བར་བཞེད་པ་དག་མགྲིན་གཅིག་ཏུ་སྟོང་ཉིད་རྟེན་འབྲེལ་ཡིན་ཁྱབ་མཉམ་དུ་ཁས་ལེན་ཀྱང༌། དོན་དམ་རང་བཞིན་འོད་གསལ་བའི་ཡེ་ཤེས་ནི་རྟེན་འབྲེལ་ལས་འདས་པར་གོ་དགོས་ཏེ། དེ་སྒྲ་རྟོག་གི་ཡུལ་ལས་འདས་པའི་ཕྱིར། དེ་ལ་(༢༢༢བ)རྒྱུ་འབྲས་བསྐྱེད་བྱ་སྐྱེད་བྱེད་དང༌། རྣམ་པར་བཞག་བྱ་འཇོག་བྱེད་ཀྱི་ལྟོས་བཞག་གྲོལ་བའི་ཕྱིར། དེ་ཡང་རང་བཞིན་འོད་གསལ་དེ་ནི། རང་གི་ངོ་བོ་རྒྱུ་གང་གིས་ཀྱང་སྐྱེད་པ་མ་ཡིན་པའི་རང་བཞིན་ལྷུན་གྲུབ་གདོད་མའི་ཡེ་ཤེས་ཡིན་པ་དང༌། དེས་འབྲས་བུ་གཞན་དང་གཞན་དག་སྐྱེད་པའི་རྒྱུའི་བྱ་བ་མི་བྱེད་པའི་ཕྱིར་རོ། ། ཡེ་ཤེས་དེ་སྒྲ་རྟོག་གི་ཡུལ་ཡང་མ་ཡིན་ཏེ། སྔར་པོ་ཏ་ལ་མཐོང་མ་མྱོང་བ་ཞིག་གིས་དེའི་མཚན་ཉིད་ཇི་ཙམ་བརྗོད་ཅིང་བརྟགས་ཀྱང༌། ཇི་བཞིན་པ་ནམ་ཡང་མཚོན་མི་ནུས་པ་བཞིན་དུ། རང་བཞིན་འོད་གསལ་ཡང་སྒྲ་རྟོག་གིས་ཇི་ཙམ་དུ་བརྟགས་ཤིང་རྣམ་པར་གཞག་ཀྱང༌། དེའི་མཚན་ཉིད་ཇི་ལྟ་བ་བཞིན་དངོས་བརྒྱུད་གང་གི་སྒོ་ནས་ཀྱང་མཚོན་མི་ནུས་སོ། ། དེ་ལྟར་ན་ལྟོས་འཇོག་གི་རྟེན་འབྲེལ་འདི་རྣམས་སྤྱི་མཚན་ཡིན་པ། རྗོད་བྱེད་སྒྲའི་དངོས་ཀྱི་བརྗོད་བྱ་ཡིན་པས་རང་མཚན་གྱི་དངོས་པོ་འདི་རྣམས་ལའང་མི་ལྡན་ན། རང་བཞིན་འོད་གསལ་དེའི་ཡུལ་ལས་འདས་པས་ལྟ་སྨོས་ཀྱང་ཅི་དགོས་པས་སོ། ། དོན་དམ་རྟེན་འབྲེལ་མིན་ཀྱང་རྟེན་འབྲེལ་སྒོམ་པ་ལ་བརྟེན་ནས་དོན་དམ་རྟོགས་པ་ནི་མི་འགལ་ཏེ། ཆོས་ཐམས་ཅད་རྟེན་ཅིང་འབྲེལ་བར་འབྱུང་བ་ཁས་བླངས་པའི་ཕྱིར་རོ། ། རྟེན་འབྲེལ་གྱི་རྣམ་གཞག་འདིའང་མཚན་ཉིད་གསུམ་ལས་འཕྲོས་དོན་དུ་བཤད་པ་དང༌། རྒྱས་པའི་ཁོང་དུ་བསྡུས་པ་འདུ་བའི་ཕྱིར་ཐོགས་མེད་སྐུ་མཆེད་ཀྱི་གཞུང་ལུགས་གཙོ་བོར་བཤད་པ་ཡིན་ནོ། ། ཐེག་པ་ཆེ་ཆུང་ཤེས་བྱ་སྤྱིའི་གནས་རྣམ་པར་གཞག་པའི་སྐབས་སོ། ། ཐེག་པ་ཆེ་ཆུང་ཤེས་བྱ་སྤྱིའི་གནས་རྣམ་པར་གཞག་པ་སྐབས་གཉིས་པའི་འགྲེལ་པའོ།། །། གསུམ་པ། རྒྱུ་མཚན་ཉིད་ཀྱི་ཐེག་པ་རྣམ་པར་གཞག་པའི་སྐབས། ང༣ སྐབས་གསུམ་པ་རྒྱུ་མཚན་ཉིད་ཀྱི་ཐེག་པ་རྣམ་པར་གཞག་པ་ལ་གཉིས། ཅ༡ སྤྱིར་བསྟན་པ་དང༌། ཅ༢ བྱེ་བྲག་ཏུ་དབྱེ་བའོ། ། ཅ༡ དང་པོ་ནི། ནང་པའི་ཐེག་གསུམ་རྒྱལ་བས་རྣམ་པར་གཞག ། གྲུབ་མཐའ་བཞི་པོ་གང་ཟག་སོ་སོ་ཡི། ། རང་བློས་ལྟ་བ་མཐར་ཐུག་གྲུབ་དོན་ཏེ། །(༢༢༣ན) རང་སྡེ་ནང་པ་སངས་རྒྱས་པ་ལ་ཐེག་པ་གསུམ་དང༌། གྲུབ་མཐའ་སྨྲ་བ་བཞི་ཞེས་ཡོངས་སུ་གྲགས་པ་ལས། ཐེག་པ་གསུམ་ནི་རྒྱལ་བ་ཉིད་ཀྱིས་གསུང་རབ་རྣམས་སུ་རྣམ་པར་གཞག་ཅིང་། བསྐལ་བཟང་འདིའི་རྒྱལ་བ་བྱོན་དང་འབྱོན་འགྱུར་ཐམས་ཅད་ཀྱི་བསྟན་པ་ཡིན་ནོ། ། དེའང་སྤྱིར་ཐེག་པ་ཞེས་པ་ཁུར་དང་ལྡན་པའི་གླང་པོ་ཆེ་སོགས་ལ་གྲགས་པ་ཡང་ཁུར་ཁྱེར་ནས་བགྲོད་པར་བྱ་བའི་དོན་གྱིས་ཡིན་ལ། དེ་བཞིན་དུ། རང་དང་གཞན་དོན་གྱི་ཁུར་ཁྱེར་ནས་གོ་འཕང་མཆོག་ཏུ་བགྲོད་པར་བྱེད་པས་ཐེག་པ་ཞེས་པར་བཞག་ཅིང༌། དེའང་འདིས་བགྲོད་པ་རྒྱུ་ལམ་དང་འདིར་བགྲོད་པ་འབྲས་བུའི་ཐེག་པ་ཞེས་དང༌། རང་གཞན་གཉིས་ཀའི་དོན་སོགས་ཁུར་ཆེན་པོ་དང་ལྡན་པས་ཐེག་ཆེན་དང༌། རང་དོན་འབའ་ཞིག་པའི་ཁུར་ཆུང་ངུ་དང་ལྡན་པས་ཐེག་དམན་དུ་བཞག་པའོ། ། གྲུབ་མཐའ་བཞིའང་སྔགས་ཀྱི་ཚུལ་ལས་ནི་དཔལ་བརྟག་པ་གཉིས་པའི་ལྟ་བ་རིམ་འཇུག་གི་སྐབས་སུ། དེ་ལ་བྱེ་བྲག་སྨྲ་བ་བསྟན། ། མདོ་སྡེ་པ་ཡང་དེ་བཞིན་ཏེ། ། རྣལ་འབྱོར་སྤྱོད་པ་དེ་ལས་ཕྱིས། ། དེ་རྗེས་དབུ་མ་བསྟན་པར་བྱ། ། ཞེས་གསུངས་པ་དང༌། དུས་འཁོར་ཡེ་ཤེས་ལེའུར་བཅོམ་ལྡན་འདས་ཀྱི་ཞལ་བཞི་ལས་གྲུབ་མཐའ་སྨྲ་བ་བཞི་བྱུང་བར་གསུངས་པས་མཚོན་དགོས་པའི་དབང་གིས་མིང་ཙམ་གསུངས་པ་ཡོད་ཀྱང་། ཐེག་གསུམ་བཞིན་དུ་གཞི་ལམ་འབྲས་གསུམ་གྱི་རྣམ་པར་གཞག་པ་མ་བསྟན་པ་དང༌། རིག་བྱེད་བཞི་པོའང་དུས་ཀྱི་འཁོར་ལོའི་ཞལ་བཞི་ལས་བྱུང་བར་གསུངས་ཀྱང་དེ་དག་སངས་རྒྱས་ཀྱིས་རྣམ་པར་བཞག་པར་མི་འགྲུབ་པ་དང༌། ཤིང་རྟའི་སྲོལ་འབྱེད་སྟོན་པ་ལས་ཕྱིས་སུ་བྱུང་བའི་གང་ཟག་རྣམས་ཀྱིས་བྱས་པའི་ཕྱིར་གྲུབ་མཐའ་བཞི་པོ་ནི་གང་ཟག་སོ་སོའི་རང་བློས་རྣམ་པར་དཔྱད་པའི་ལྟ་བ་མཐར་ཐུག་གི་གྲུབ་དོན་ཏེ། དེས་ན་ཀུན་མཁྱེན་རོང་སྟོན་ཆེན་པོས། གྲུབ་མཐའི་དོན་ནི། བླང་དོར་གྱི་དོན་(༢༢༣བ)ལ་རྣམ་པར་དཔྱོད་པ་ཞུགས་པའི་གང་ཟག་རང་རང་གི་འདོད་པས་ཡོངས་སུ་དཔྱད་པའི་དོན་ཡིན་ལ། སྒྲ་དོན་ནི། རང་རང་གི་ལུགས་ཀྱི་ལུང་རིགས་ཀྱིས་གྲུབ་པ་དེ་ལས་ཕར་ནམ་ཡང་འགྲོ་ས་མེད་པའི་དོན་ལ་བཤད་དོ། །ཞེས་གསུངས་པ་ལྟར་རོ། ། ཅ༢ གཉིས་པ་[བྱེ་བྲག་ཏུ་དབྱེ་བ་]ལ་གཉིས། ཆ༡ ཐེག་པ་ཆུང་ངུའི་རྣམ་གཞག་དང༌། ཆ༢ ཐེག་པ་ཆེན་པོའི་རྣམ་གཞག་གོ། ། ཆ༡ དང་པོ་ལ་གཉིས། ཇ༡ མདོར་བསྟན། ཇ༢ རྒྱས་བཤད་དོ། ། ཇ༡ དང་པོ་ནི། ཐེག་པ་དམན་ལ་ཉན་ཐོས་རང་རྒྱལ་གཉིས། ། ཞེས་སོ། །(༢༢༤ན) ཇ༢ གཉིས་པ་ལ་གཉིས། ཉ༡ ཉན་ཐོས་ཀྱི་ཐེག་པ་དང༌། ཉ༢ རང་སངས་རྒྱས་ཀྱི་ཐེག་པའོ། ། ཉ༡ དང་པོ་ལ་དྲུག ། ཏ༡ སྒྲ་དོན་ངེས་ཚིག ། ཏ༢ གང་ལ་འཇུག་སྒོ། ཏ༣ བསྲུང་བྱའི་སྡོམ་པ། ཏ༤ རྟོགས་བྱའི་ལྟ་བ། ཏ༥ འཐོབ་བྱའི་འབྲས་བུ། ཏ༦ རབ་ཏུ་དབྱེ་བའོ། ། ཏ༡ དང་པོ་ནི། གཞན་བརྟེན་ཐོས་སྒྲོག་ཉན་ཐོས། ཞེས་པ་སྟེ། དེའང་ལེགས་སྦྱར་སྐད་དུ། ཤྲ་བ་ཀ་ཞེས་པ་ཉན་པ་དང་ཐོས་པ་གཉིས་ཀ་ལ་འཇུག་པས་ཉན་ཐོས་ཞེས་བྱ་བ་ཡིན་ཏེ། བུདྡྷ་ནི། སངས་པ་དང་རྒྱས་པ་གཉིས་ཀ་ལ་འཇུག་པས་སངས་རྒྱས་ཞེས་བརྗོད་པ་ལྟར་རོ། ། རྣམ་པ་གཅིག་ཏུ་ན། གཞན་བརྟེན་ཐོས་སྒྲོག་ཅེས་པས། སློབ་དཔོན་གཞན་ལ་བརྟེན་ཞིང་དེ་ལས་ཐོས་པ་དག་ཡུལ་གཞན་ལ་སྒྲོག་པས་ཐོས་སྒྲོག་གམ་ཉན་ཐོས་ཞེས་བྱའོ། ། ཏ༢ གཉིས་པ་གང་ལ་འཇུག་པའི་སྒོ་བཤད་པ་ལ་གཉིས། ཐ༡ རྣམ་གྲངས་ཀྱི་སྒོ་ནས་མདོར་བསྟན། ཐ༢ མཚན་ཉིད་ཀྱི་སྒོ་ནས་རྒྱས་པར་བཤད་པའོ། ། ཐ༡ དང་པོ་ནི། འཇུག་པའི་སྒོ། ། སྡུག་བསྔལ་ཀུན་འབྱུང་འགོག་ལམ་བདེན་པ་བཞི། ། ཆོས་རྗེས་བཟོད་ཤེས་བཅུ་དྲུག་རྣམ་པ་ཅན། ། དེ་ལ་ཉན་