Tibetan
ཐོས་རྣམས་འཇུག་པའི་སྒོ་ནི། སྡུག་བསྔལ་བདེན་པ། ཀུན་འབྱུང་བདེན་པ། འགོག་པའི་བདེན་པ། ལམ་གྱི་བདེན་པ་སྟེ་འཕགས་པའི་བདེན་པ་བཞི་ལ་རེ་རེ་ལའང་ཆོས་བཟོད། ཆོས་ཤེས། རྗེས་བཟོད། རྗེས་ཤེས་སྦྱར་བའི་ཤེས་རྣམ་སྐད་ཅིག་མ་བཅུ་དྲུག་གི་སྒོ་ནས་འཇུག་གོ། ། ཐ༢ གཉིས་པ་[མཚན་ཉིད་ཀྱི་སྒོ་ནས་རྒྱས་པར་བཤད་པ་]ལ་གསུམ། ད༡ ཐུན་མོང་དུ་བཤད་པ། ད༢ བདེན་བཞི་སོ་སོར་བཤད་པ། ད༣ སྤྱི་མཚན་བསྡུས་ཏེ་བསྟན་པའོ། ། ད༡ དང་པོ་ལ་བཞི། ན༡ ངོ་བོ། ན༢ མཚན་ཉིད། ན༣ གྲངས་དང་གོ་རིམ། ན༤ ངེས་ཚིག་གོ། ། ན༡ དང་པོ་ནི། སྔ་མའི་ལས་ཉོན་གྱིས་བསྐྱེད་ཕུང་པོའི་རྒྱུན། ། འབྱུང་འགྱུར་ཉེར་ལེན་རྒྱུར་གྱུར་ལས་ཉོན་མོངས། ། གཉེན་པོས་སྤང་བྱ་བཅོམ་བའི་སྤངས་པ་དང༌། ། སྤོང་ཐོབ་ནུས་པའི་ཡེ་ཤེས་ངོ་བོ་འོ། ། དེའང་སྐྱེ་བ་སྔ་མའི་ལས་ཉོན་གྱིས་བསྐྱེད་པའི་ཉེར་ལེན་གྱི་ཕུང་པོའི་རྒྱུན་རྣམས་སྡུག་བསྔལ་བདེན་པའི་ངོ་བོ། འབྱུང་འགྱུར་ཉེར་ལེན་གྱི་ཕུང་པོའི་རྒྱུར་གྱུར་པའི་ལས་ཉོན་རྣམས་ཀུན་འབྱུང་གི་བདེན་པའི་ངོ་བོ། གཉེན་པོ་ལམ་གྱིས་སྤང་བྱ་ཀུན་འབྱུང་བཅོམ་པའི་སྤངས་པ་ནི་འགོག་བདེན་གྱི་ངོ་བོ། ཀུན་འབྱུང་སྤོང་བར་ནུས་ཤིང་འགོག་པ་ཐོབ་པར་ནུས་པའི་འཕགས་པ་རྣམས་ཀྱི་ཡེ་ཤེས་ནི་ལམ་བདེན་གྱི་ངོ་བོའོ། ། དེའི་དང་པོ་གཉིས་ཀྱིས་ཀུན་ནས་ཉོན་མོངས་པའི་འཁོར་བའི་རྒྱུ་འབྲས་མ་ལུས་པ་བསྡུས་ཤིང༌། ཕྱི་མ་གཉིས་ཀྱིས་རྣམ་པར་བྱང་བ་མྱ་ངན་ལས་འདས་པའི་རྒྱུ་འབྲས་མ་ལུས་པ་བསྡུས་སོ། ། ན༢ གཉིས་པ་མཚན་ཉིད་ནི། བསྟན་དང་མི་མཐུན་མེད་པ་མཚན་ཉིད་དོན། ། བསྡུ་བ་ལས། བསྟན་དང་མི་མཐུན་པ་མེད་པའི་མཚན་ཉིད་ཀྱི་དོན་ཅན། ཞེས་གསུངས་པ་ལྟར། ཀུན་འབྱུང་གིས་བསྐྱེད་པའི་འབྲས་བུ་ཟག་པ་དང་བཅས་པའི་ཕུང་པོ་བསྟན་པ་དང་མཐུན་པ་སྡུག་བསྔལ་བདེན་པའི་མཚན་ཉིད། སྡུག་བསྔལ་ཉེར་ལེན་གྱི་ཕུང་པོ་སྐྱེད་བྱེད་བསྟན་པ་དང་མཐུན་པ་ཀུན་འབྱུང་བདེན་པའི་མཚན་ཉིད། དེ་བཞིན་ཉིད་གློ་བུར་གྱི་དྲི་མས་དག་པ་བསྟན་པ་དང་མཐུན་པ་འགོག་བདེན་གྱི་མཚན་ཉིད། ཐར་པར་བགྲོད་པའི་འཇུག་ངོགས་བསྟན་པ་དང་མཐུན་པ་ལམ་བདེན་གྱི་མཚན་ཉིད་དོ། ། ན༣ གསུམ་པ་གྲངས་དང་གོ་རིམ་ངེས་པ་ནི། རྒྱུ་འབྲས་གཉིས་ཕྲུགས་གྲངས་དང་གོ་རིམ་ངེས། ། ཤེས་བྱ་སྤང་བྱ་ཐོབ་བྱ་བསྟེན་པར་བྱ། ། བདེན་པ་བཞིར་བྱས་པ་ལ་(༢༢༤བ)འཁོར་བ་དང་མྱང་འདས་གཉིས་སུ་ངེས་ཤིང༌། དེ་རེ་རེར་རྒྱུ་འབྲས་ཕྲུགས་རེར་ཡོད་པས་གཉིས་ཕྲུགས་སུ་ངེས་ཏེ། འཁོར་བ་ལའང་འབྲས་བུ་སྡུག་བསྔལ་དང་རྒྱུ་ཀུན་འབྱུང་གཉིས། མྱང་འདས་ལའང་འབྲས་བུ་འགོག་པ་དང་རྒྱུ་ལམ་བདེན་གཉིས་སུ་ངེས་པས་ན་བདེན་པ་བཞིར་གྲངས་ངེས་ལ། ཤེས་བྱ་ཐམས་ཅད་བདེན་བཞིར་བསྡུ་བ་ནི་མ་ཡིན་ཏེ། ནམ་མཁའ་དང་སོ་སོར་བརྟགས་མིན་གྱི་འགོག་པ་དང་མ་དག་པའི་དེ་བཞིན་ཉིད་དང༌། ཡོངས་སུ་དག་པའི་འཇིག་རྟེན་གྱི་ཁམས་ལ་སོགས་པ་རྣམ་པ་བཞི་པོ་གང་དུའང་མ་འདུས་པའི་ཕྱིར་རོ། ། གོ་རིམ་ནི། ཡུལ་ཅན་མངོན་པར་རྟོགས་པའི་རིམ་པ་དང་མཐུན་པར་ཡུལ་བདེན་པ་བཞི་བསྟན་པ་ཡིན་ཏེ། མཛོད་ལས། བདེན་པ་ཇི་ལྟར་མངོན་རྟོགས་རིམ། ། ཞེས་སོ། ། དེ་ཡང་འཁོར་བ་སྡུག་བསྔལ་གྱི་ཕུང་པོ་ནི་ནད་དང་འདྲ་བར་ཤེས་པར་བྱ་བ་དང༌། དེའི་རྒྱུ་ལས་དང་ཉོན་མོངས་པའི་ཀུན་འབྱུང་ནི་ནད་ཀྱི་རྒྱུ་དང་འདྲ་བར་སྤང་བར་བྱ་བ་དང༌། སྡུག་བསྔལ་མཐའ་དག་ལས་གྲོལ་བའི་འགོག་པ་ནི་ནད་མེད་པའི་བདེ་བ་དང་འདྲ་བར་ཐོབ་པར་བྱ་བ་དང༌། དེའི་ཐབས་སུ་ལམ་ཟག་མེད་སྒོམ་པ་ནི་སྨན་བཟང་པོ་དང་འདྲ་བར་བསྟེན་པར་བྱ་བ་རྟོགས་པའི་ཕྱིར་ཏེ། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། ། བདེར་གནས་ཐོབ་བྱ་སྨན་ནི་བསྟེན་པར་བྱ་བ་ལྟར། ། སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། ། ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། ། ཞེས་གསུངས་པ་ལྟར་རོ། ། ན༤ བཞི་པ་ངེས་ཚིག་ནི། རང་རང་ངོ་བོར་མི་བསླུ་བདེན་པར་བརྗོད། ། ཐུན་མོང་དུ་རང་རང་གི་ངོ་བོ་རྣམ་པ་བཞི་བཞིར་བདེན་ཞིང་མི་བསླུ་བར་གནས་པས་དེ་རྣམས་ཀྱི་རང་བཞིན་ཇི་ལྟ་བར་མཐོང་ན་ཕྱིན་ཅི་མ་ལོག་པའི་བློ་སྐྱེ་བས་ན་འཕགས་པའི་བདེན་པ་ཞེས་བྱ་ལ། ཁྱད་པར་དུ་སོ་སོའི་ངེས་ཚིག་ནི། མཛོད་འགྲེལ་ལས། གནོད་པའི་བདག་ཉིད་ཡིན་པའི་ཕྱིར་སྡུག་བསྔལ་བའོ། །ཀུན་འབྱུང་བའི་ཚུལ་(༢༢༥ན)གྱིས་ཀུན་འབྱུང་བའོ། །ཕུང་པོ་ཞིག་པའི་ཕྱིར་འགོག་པའོ། །བགྲོད་པའི་དོན་གྱིས་ལམ་མོ། །ཞེས་པ་ལྟར་རོ། ། ད༢ གཉིས་པ་བདེན་པ་སོ་སོར་བཤད་པ་ལ་བཞི་ལས། ན༡ ཤེས་བྱ་སྡུག་བསྔལ་བདེན་པ། ན༢ སྤང་བྱ་ཀུན་འབྱུང་བདེན་པ། ན༣ ཐོབ་བྱ་འགོག་པའི་བདེན་པ། ན༤ བསྟེན་བྱ་ལམ་གྱི་བདེན་པའོ། ། ན༡ དང་པོ་ལ་གཉིས། པ༡ རང་བཞིན་གཏན་ལ་དབབ་པ། པ༢ ངོ་བོའི་སྒོ་ནས་དབྱེ་བསྡུའོ། ། དང་པོ་ནི། ཁམས་གསུམ་ས་དགུ་སེམས་ཅན་སྐྱེ་བའི་གནས། ། དེར་སྐྱེས་འགྲོ་བ་སྡུག་བདེན་རང་བཞིན་ཏེ། ། མངོན་པ་ཀུན་བཏུས་ལས། སྡུག་བསྔལ་གྱི་བདེན་པ་གང་ཞེ་ན། དེ་ནི་སེམས་ཅན་སྐྱེ་བ་དང་སྐྱེ་བའི་གནས་ཀྱིས་ཀྱང་རིག་པར་བྱའོ། །ཞེས་གསུངས་ཏེ། གཟུགས་ཁམས་བསམ་གཏན་བཞིས་ཕྱེ་བས་ས་བཞི། གཟུགས་མེད་ཁམས་སྐྱེ་མཆེད་བཞིས་ཕྱེ་བས་ས་བཞི། འདོད་ཁམས་ས་མཚུངས་གཅིག་སྟེ། ཁམས་གསུམ་པོར་སེམས་ཀྱིས་ཕྱེ་བའི་ས་དགུ་ལ་བརྟེན་པ་སྣོད་ཀྱི་འཇིག་རྟེན་སེམས་ཅན་གང་དུ་སྐྱེ་བའི་གནས་དང༌། གཡོ་བ་བཅུད་ཀྱི་འཇིག་རྟེན་དེར་སྐྱེས་པའི་འགྲོ་བ་ཐམས་ཅད་སྡུག་བསྔལ་གྱི་བདེན་པའི་རང་བཞིན་དུ་ཤེས་པར་བྱའོ། ། གཉིས་པ་ངོ་བོའི་སྒོ་ནས་དབྱེ་བསྡུ་ནི། ངོ་བོ་བརྒྱད་དྲུག་གསུམ་མམ་གཉིས་སུ་འདུ། ། སྡུག་བསྔལ་ལ་ངོ་བོའི་སྒོ་ནས་དབྱེ་ན། སྐྱེ་བ་དང་། རྒ་བ་དང་། ན་བ་དང་། འཆི་བ་སྟེ། ནང་ལ་བརྟེན་པའི་སྡུག་བསྔལ་བཞི་དང༌། མི་སྡུག་པ་དང་ཕྲད་པ་དང༌། སྡུག་པ་དང་བྲལ་བ་དང༌། གང་འདོད་པ་བཙལ་གྱིས་མ་རྙེད་པ་སྟེ། ཕྱི་ལ་བརྟེན་པའི་སྡུག་བསྔལ་གསུམ་དང༌། ཆོས་མངོན་པ་ལས། མདོར་ན། ཉེ་བར་ལེན་པའི་ཕུང་པོ་ལྔ་ནི་སྡུག་བསྔལ་ལོ། །ཞེས་པ་ལྟར། ཐམས་ཅད་ཀྱི་རྒྱུར་གྱུར་པའི་གནས་ངན་ལེན་གྱི་སྡུག་བསྔལ་གཅིག་སྟེ་བརྒྱད་དོ། ། དེ་དག་ཀྱང་བསྡུ་ན། རྒ་ནད་འཆི་གསུམ་ན་ཚོད་དང་ཁམས་དང་སྲོག་འགྱུར་བ་ཡིན་པས་འགྱུར་བའི་སྡུག་བསྔལ་(༢༢༥བ)གཅིག་ཏུ་བགྲང་བ་དང༌། ལྷག་ལྔ་སྟེ་དྲུག་གོ། ། དེའང་བསྡུ་ན། སྡུག་བསྔལ་བརྒྱད་ཀྱི་སྐྱེ་རྒ་ན་འཆི་བཞི་དང་། མི་སྡུག་པ་དང་ཕྲད་པ་ལྔ། སྡུག་བསྔལ་མྱོང་བར་འགྱུར་བའི་ཆོས་ཀྱི་རང་གི་མཚན་ཉིད་ཡིན་པས་སྡུག་བསྔལ་གྱི་སྡུག་བསྔལ། སྡུག་པ་དང་བྲལ་བ་དང་འདོད་པ་བཙལ་གྱིས་མི་རྙེད་པ་གཉིས་བདེ་བ་མྱོང་བར་འགྱུར་བའི་ཆོས་འགྱུར་བའི་རང་གི་མཚན་ཉིད་ཡིན་པས་འགྱུར་བའི་སྡུག་བསྔལ། གནས་ངན་ལེན་ཉེར་ལེན་གྱི་ཕུང་པོ་ལྔ་ནི་བདེ་སྡུག་ལས་མ་གྲོལ་ཞིང་མི་རྟག་པ་ཉིད་རྗེས་སུ་འབྲེལ་ཏེ་གྲུབ་པ་དང་བདེ་བ་མ་ཡིན་པས་འདུ་བྱེད་ཀྱི་སྡུག་བསྔལ་ཏེ། དེ་གསུམ་དུ་འདུའོ།། དེ་ལས་ཀྱང་བསྡུ་ན། བརྒྱད་ཀྱི་དང་པོ་བདུན་ནི་རྟོགས་པར་སླ་བས་འཇིག་རྟེན་པའི་ཤེས་པས་ཀྱང་སྡུག་བསྔལ་དུ་རིག་ཅིང་དེའི་ཡུལ་ཡིན་པའི་ཕྱིར་ཀུན་རྫོབ་ཀྱི་བདེན་པར་སྡུག་བསྔལ་བ་དང༌། མཛོད་འགྲེལ་ལས། བྱིས་པ་ལག་མཐིལ་འདྲ་བ་ཡིས། ། འདུ་བྱེད་སྡུག་བསྔལ་སྤུ་མི་རྟོགས། ། འཕགས་པ་མིག་དང་འདྲ་བ་ཡིས། ། དེ་ཡིས་ཤིན་ཏུ་ཡིད་ཀྱང་འབྱུང༌། ། ཞེས་པ་ལྟར། བརྒྱད་པ་དེ་ནི་འཇིག་རྟེན་པས་རྟོགས་པར་དཀའ་ལ། འཇིག་རྟེན་ལས་འདས་པའི་ཤེས་པས་སྡུག་བསྔལ་དུ་རིག་ཅིང་དེའི་ཡུལ་ཡིན་པས་དོན་དམ་པའི་བདེན་པར་སྡུག་བསྔལ་བ་སྟེ་དེ་གཉིས་སུ་འདུའོ། ། ན༢ གཉིས་པ་སྤང་བྱ་ཀུན་འབྱུང་བདེན་པ་ལ་གཉིས། པ༡ མདོར་བསྟན། པ༢ རྒྱས་བཤད་དོ། ། པ༡ དང་པོ་ནི། ཉོན་མོངས་ཟག་བཅས་ལས་རྣམས་ཀུན་འབྱུང་བདེན། ། ཆོས་མངོན་པ་ལས། ཀུན་འབྱུང་བདེན་པ་གང་ཞེ་ན་ཉོན་མོངས་པ་དང་ཉོན་མོངས་པའི་དབང་གིས་བྱུང་བའི་ལས་སོ། །ཞེས་ཏེ། ཆགས་སོགས་ཉོན་མོངས་ཐམས་ཅད་དང་དེས་ཀུན་ནས་བསླང་བའི་དབང་གིས་བྱུང་བའི་ལས་ཟག་པ་དང་བཅས་པ་རྣམས་ཏེ། དེ་དག་ལས་སྡུག་བསྔལ་བ་ཀུན་འབྱུང་བའི་གཞིར་གྱུར་བའི་ཕྱིར་ཀུན་འབྱུང་བདེན་པ་ཞེས་བྱའོ། ། པ༢ གཉིས་པ་ལ་གཉིས། ཕ༡ ཉོན་མོངས་ཀུན་འབྱུང་དང༌། (༢༢༦ན) ཕ༢ ལས་ཀྱི་ཀུན་འབྱུང་ངོ༌། ། ཕ༡ དང་པོ་ལ་གསུམ། བ༡ འབྱུང་རྒྱུ། བ༢ ངོ་བོ། བ༣ རབ་དབྱེའོ། ། བ༡ དང་པོ་ནི། ཕྲ་རྒྱས་ཡུལ་དམིགས་ཚུལ་མིན་ཡིད་བྱེད་རྒྱུ། ། དེའང་མཛོད་ལས། ཕྲ་རྒྱས་སྤངས་པར་མ་གྱུར་དང༌། ། ཡུལ་ནི་ཉེ་བར་གྱུར་པ་དང༌། ། ཚུལ་བཞིན་མ་ཡིན་ཡིད་བྱེད་ལས། ། ཉོན་མོངས་རྒྱུ་ནི་ཚང་བ་ཡིན། ། ཞེས་ཏེ། ཉོན་མོངས་པ་གང་ཡིན་ཀྱང་རྒྱུའི་རྐྱེན་རིགས་ཕྲ་མོ་ལས་རྣམ་སྨིན་རྒྱས་འགྱུར་གྱི་ཕྲ་རྒྱས་ཏེ་ས་བོན་མ་སྤངས་པ་དང༌། དམིགས་པའི་རྐྱེན་ཡུལ་སྡུག་མི་སྡུག་སོགས་ཉེ་བར་གྱུར་བ་དང༌། བདག་པོའི་རྐྱེན་ཡུལ་དེ་དག་ལའང་མི་སྡུག་པ་ལ་སྡུག་པར་འཛིན་པ་སོགས་ཚུལ་བཞིན་མ་ཡིན་པ་ཡིད་ལ་བྱེད་པ་གསུམ་ལས་སྐྱེ་བར་འགྱུར་བ་ཡིན་ནོ། ། བ༢ གཉིས་པ་ངོ་བོ་ནི། སེམས་བྱུང་རབ་ཏུ་མ་ཞིའི་མཚན་ཉིད་ཅན། ། སེམས་ལས་བྱུང་བའི་ཆོས་གང་ཞིག་འབྱུང་བ་ན་རྣམ་གཡེང་དང་ཕྱིན་ཅི་ལོག་དང་རྒོད་པ་དང་རྨུགས་པ་དང་བག་མེད་པ་དང་འཛེམ་པ་མེད་པ་རྣམས་ལས་གང་ཡང་རུང་བས་རབ་ཏུ་མ་ཞི་བའི་མཚན་ཉིད་ཅན་དུ་འབྱུང་བ་སྟེ། བྱེད་ལས་ནི་དེ་བྱུང་བས་སེམས་ཀྱི་རྒྱུད་རབ་ཏུ་མ་ཞི་བར་བྱེད་པའོ། ། བ༣ གསུམ་པ་རབ་དབྱེ་ནི། རྩ་ཉོན་ཉེ་ཉོན་ལྟ་བའི་ཀུན་སློང་གིས། ། ཞེས་རྩ་བའི་ཉོན་མོངས་པ་དྲུག །དེའི་ལྟ་བ་ལ་ལྔར་དབྱེ་བས་བཅུ། རྩ་ཉོན་ལྟར་ཉོན་མོངས་པར་མི་བྱེད་ཀྱང་དེ་དང་ཉེ་བར་ཉོན་མོངས་པར་བྱེད་པའི་དོན་ཅན་གྱི་ཉེ་ཉོན་ཉི་ཤུ་སྟེ། དེ་དག་གི་མཚན་ཉིད་གོང་དུ་སྨོས་པ་ལྟར་རོ། ། སྤྱིར་ཉོན་མོངས་པ་ཐམས་ཅད་སྡུག་བསྔལ་ཀུན་འབྱུང་བའི་རྒྱུ་ཀུན་འབྱུང་ཡིན་ཀྱང་འཁོར་བའི་རྒྱུའི་གཙོ་བོའི་རྩ་བར་གྱུར་བ་ནི་མ་རིག་པའོ། ། འོ་ན་ཆོས་མངོན་པ་སོགས་ལས་ཀུན་འབྱུང་སྲེད་པ་ལ་བཤད་པ་ཅི་ཞེ་ན། སྲེད་པ་ནི་ཡང་སྲིད་དེ་མ་ཐག་ཏུ་འཕེན་པར་བྱེད་པ་དང༌། འཁོར་བར་ཉིང་མཚམས་སྦྱོར་བའི་རྒྱུའི་གཙོ་བོར་གྱུར་པའི་ཕྱིར། དེ་སྐད་དུ་བཤད་དེ། (༢༢༦བ) རྣམ་འགྲེལ་ལས། མི་ཤེས་སྲེད་པའི་རྒྱུ་ཡིན་ཀྱང༌། ། མ་བརྗོད་སྲེད་པ་ཉིད་བཤད་པ། ། རྒྱུ་ནི་འཕེན་པར་བྱེད་ཕྱིར་དང༌། ། དེ་མ་ཐག་ཕྱིར་ལས་ཀྱང་ཡིན། ། ཞེས་པ་ལྟར་རོ། ། དེས་ན་མ་རིག་པས་རྒྱུ་བྱས། སྲེད་པས་མཚམས་སྦྱར་གྱིས་ཀུན་ནས་བསླངས་ཏེ་ལས་ཀྱི་ཀུན་འབྱུང་དུ་གྲུབ་བོ། ། ཕ༢ གཉིས་པ་ལས་ཀྱི་ཀུན་འབྱུང་ལ་གཉིས། བ༡ ངོ་བོ་དང༌། བ༢ དེའི་དབྱེ་བའོ། ། བ༡ དང་པོ་ནི། སེམས་པའི་ལས་དང་དེས་བསྐྱེད་ལུས་ངག་ལས། ། ཞེས་ལས་ལ། སེམས་པའི་ལས་དང་། བསམ་པའི་ལས་གཉིས་ཀྱི། དང་པོ་ནི། དགེ་མི་དགེ་གང་ཡང་རུང་བའི་ལས་མངོན་པར་འདུ་བྱེད་པའི་རྒྱུའི་ཀུན་སློང་གི་སེམས་པ་ཡིད་ཀྱི་ལས་འབའ་ཞིག་པ་དང༌། གཉིས་པ་ནི། སེམས་པ་དེས་བསྐྱེད་པའི་ལས་མངོན་པར་འདུ་བྱེད་བཞིན་པའི་དུས་ཀྱི་ཀུན་སློང་གི་བསམ་པ་ལུས་ངག་ཡིད་གསུམ་ག་དང་འབྲེལ་བའོ། ། བ༢ གཉིས་པ་དབྱེ་བ་ལ་གཉིས་ཏེ། མ༡ ངོ་བོའི་སྒོ་ནས་དབྱེ་བ་དང༌། མ༢ དབྱེ་ཚུལ་གྱི་སྒོ་ནས་གཞན་བསྟན་པའོ། ། མ༡ དང་པོ་ལ་གཉིས། ཙ༡ རྩ་བས་མདོར་བསྟན། ཙ༢ འགྲེལ་པས་ཁ་བསྐངས་ཏེ་རྒྱས་པར་བཤད་པའོ། ། ཙ༡ དང་པོ་ནི། བསོད་ནམས་མིན་དང་བསོད་ནམས་མི་གཡོ་བ། ། ཞེས་ལས་ཀྱི་ལམ་ཐམས་ཅད་བསྡུ་ན། བསོད་ནམས་མ་ཡིན་པའི་ལས་སྡིག་པ། བསོད་ནམས་ཀྱི་ལས་དགེ་བ། མི་གཡོ་བའི་ལས་ཟག་བཅས་ཀྱི་ཏིང་ངེ་འཛིན་གསུམ་དུ་འདུའོ། ། ཙ༢ གཉིས་པ་ལ་གསུམ། བསོད་ནམས་མིན་པ། བསོད་ནམས། མི་གཡོ་བའི་ལས་བཤད་པའོ། ། དང་པོ་ནི། མི་དགེ་བའི་ལས་ལམ་ཇི་སྙེད་པ་རིགས་སམ་གཙོ་བོར་བསྡུས་ན། ལུས་ཀྱི་གསུམ། ངག་གི་བཞི། ཡིད་ཀྱི་གསུམ་སྟེ་བཅུར་འདུ་ཞིང༌། དེ་ལས་དང་པོ་སྲོག་གཅོད་པ་ནི། ཡན་ལག་ལྔ་དང་ལྡན་པ་སྟེ། གཞི་ནི། རང་ལས་རྒྱུད་ཐ་དད་པའི་སེམས་ཅན། བསམ་པ་ནི། དེར་འདུ་ཤེས་ཤིང་མ་འཁྲུལ་པ། (༢༢༧ན) སྦྱོར་བ་ནི། དུག་མཚོན་རིག་སྔགས་སོགས་ཀྱིས་རང་གིས་གསོད་པའམ་གཞན་ལ་གསོད་འཇུག་པ། ཉོན་མོངས་ནི། དུག་གསུམ་དང་སྤྱིར་འབྲེལ་བ་ལས་ཁྱད་པར་རྫོགས་བྱེད་ཞེ་སྡང༌། མཐར་ཐུག་ནི། བསད་བྱ་དེ་རང་མ་ཤི་བའི་སྔོན་དུ་ཤི་བའོ། ། དེ་ལྔས་ནི་སྲོག་གཅོད་ཀྱི་ལས་ལམ་རྫོགས་ལ། ཡན་ལག་ཅི་རིགས་མ་ཚང་བས་ནི་ཉེས་པ་བྱུང་ཡང་ལས་ལམ་མ་རྫོགས་པ་སྟེ། འདི་ཉིད་འོག་མ་རྣམས་ལའང་ཤེས་པར་བྱའོ། ། འདི་ལ་དབྱེ་ན། ཤ་ལ་སྲེད་པ་ལྟ་བུ་འདོད་ཆགས་ཀྱི་སྒོ་ནས་དང༌། ཁོན་ཞུགས་པ་ལྟ་བུ་ཞེ་སྡང་གི་སྒོ་ནས་དང༌། མཆོད་སྦྱིན་ལྟ་བུ་གཏི་མུག་གི་སྒོ་ནས་སྲོག་གཅོད་པ་སྟེ་གསུམ་མོ། ། སྲོག་གཅོད་པའི་ནང་ནས་ཕ་ཡང་ཡིན་ལ་དགྲ་བཅོམ་པ་ཡང་ཡིན་པ་དེའི་སྲོག་གཅོད་པ་སྡིག་ཆེའོ། ། མ་བྱིན་ལེན་ནི། གཞི་ནི། གཞན་གྱིས་བཟུང་བའི་རྫས། དཀོན་མཆོག་ལ་བསྔོས་པའི་ཡོ་བྱད། མི་མ་ཡིན་གྱི་ནོར་ལྟ་བུ། བསམ་པ་ནི། གཡོ་སྒྱུའི་སེམས་དང་མཐུ་དང་འཇབ་བུས་ལེན་པར་འདོད་པའི་ཀུན་སློང༌། སྦྱོར་བ་ནི། རང་ངམ་བགྱིད་དུ་སྩལ་བ། ཉོན་མོངས་ནི། དུག་གསུམ་སྤྱི་དང་ཁྱད་པར་རྫོགས་བྱེད་འདོད་ཆགས་དང་སེར་སྣ། མཐར་ཐུག་ནི། རྫས་དེ་དག་གནས་ནས་སྤོས་སམ་མ་སྤོས་ཀྱང་རུང་ཐོབ་བློ་ནམ་སྐྱེས་པའོ། ། འདི་ལ་དབྱེ་ན། བསྙད་མེད་བཙན་ཕྲོགས་ལྟ་བུ་མཐུའི་སྒོ་ནས། ཁང་པ་འབུགས་པ་ལྟ་བུ་འཇབ་བུའི་སྒོ་ནས། བྲེ་སྲང་ལོག་པ་ལྟ་བུ་གཡོ་སྒྱུའི་སྒོ་ནས་མ་བྱིན་པར་ལེན་པ་སྟེ་གསུམ་མོ། ། མ་བྱིན་ལེན་གྱི་ནང་ནས་དཀོན་མཆོག་གི་རྫས་བརྐུ་བ་སྡིག་ཆེའོ། ། ལོག་གཡེམ་ནི། གཞི་ནི། རང་གི་ཆུང་མ་དང༌། གཞན་གྱིས་ཆེད་དུ་བྱིན་པ་སོགས་མིན་པའི་བདུན་བརྒྱུད་ཚུན་གྱི་ཉེ་དུ། བདག་པོ་ཅན་གྱི་ཆུང་མ། ཁྲིམས་ཀྱིས་སྲུང་བའི་དགེ་སློང་མ་སོགས་བགྲོད་བྱ་མ་ཡིན་པ། དཀོན་མཆོག་གི་རྟེན་དྲུང་སོགས་ཡུལ་མ་ཡིན་པ། གསོ་སྦྱོང་སྦྲུམ་མ་ཟླ་མཚན་ལྡན་ཅིང་ཉིན་མོ་སོགས་དུས་མ་ཡིན་པ་རྣམས་དང༌། བསམ་པ་ནི། བསྒྲོད་བྱ་མིན་པ་(༢༢༧བ)ལ་བསྒྲོད་འདོད་ཀྱི་ཀུན་སློང༌། སྦྱོར་བ་ནི། ལས་དེ་རྩོམ་པ། ཉོན་མོངས་ནི། དུག་གསུམ་དང་ཁྱད་པར་རྫོགས་བྱེད་འདོད་ཆགས། མཐར་ཐུག་ནི། དབང་པོ་གཉིས་རེག་པ་ལས་བྱུང་བ་ཚོར་བདེ་ཉམས་སུ་མྱོང་བ་ལ་སྲེད་པས་བདག་གིར་བྱས་པའོ། ། འདི་ལ་དབྱེ་ན། མ་སྲིང་ལྟ་བུ་རིགས་ཀྱིས་བསྲུང་བ་དང༌། གཞན་གྱི་ཆུང་མ་ལྟ་བུ་བདག་པོས་བསྲུང་བ་དང༌། དགེ་སློང་མ་ལྟ་བུ་ཆོས་ཀྱིས་བསྲུང་བ་སྟེ་གསུམ་མོ། ། འདོད་ལོག་གི་ནང་ནས་མ་ཡང་ཡིན་ལ་དགྲ་བཅོམ་པ་ཡང་ཡིན་པ་ལ་ལོག་པར་སྤྱོད་པ་སྡིག་ཆེའོ། ། དེ་དག་ནི་ལུས་ཀྱི་ལས་རྣམ་པ་གསུམ་མོ། ། རྫུན་སྨྲ་བ་ནི། གཞི་ནི། རང་ལས་ཐ་དད་པའི་ཡུལ། བསམ་པ་ནི། གཞན་བསླུ་སེམས་ཀྱིས་མ་མཐོང་བ་ལ་མཐོང་ཞེས་པ་ལྟ་བུ་སྨྲ་འདོད་ཀྱི་ཀུན་སློང༌། སྦྱོར་བ་ནི། ལས་དེ་ལུས་ངག་གི་རྣམ་པ་རིག་བྱེད་དུ་ཐོན་པ། ཉོན་མོངས་ནི། དུག་གསུམ་གང་རུང་གིས་རྫོགས་པ། མཐར་ཐུག་ནི། ཕ་རོལ་པོས་དོན་གོ་བའོ། ། འདིའི་སྦྱོར་བ་དག་གི་རྣམ་པ་རིག་བྱེད་ཁོ་ནར་མ་ངེས་ཏེ། ལུས་ཀྱི་བརྡ་ལས་རྫུན་དུ་འགྱུར་བ་གསོ་སྦྱོང་གི་ཚེ་གནས་བརྟན་གྱིས་ཡང་དག་དྲིས་པ་ན་ལྟུང་བ་དང་བཅས་བཞིན་དུ་ཅི་ཡང་མ་སྨྲས་པ་ལས་རྫུན་སྨྲར་འགྱུར་བ་སོགས་སོ། ། འདི་ལ་དབྱེ་ན། མིའི་ཆོས་བླ་མ་ལྟ་བུ་ཕམ་པའི་རྫུན། བདག་གཞན་ལ་ཕན་གནོད་ཡོད་པ་ལྟ་བུ་རྫུན་ཆེན་པོ། ཕན་གནོད་མེད་པ་ལྟ་བུ་རྫུན་ཕྲ་མོ་སྟེ་གསུམ་མོ། ། རྫུན་གྱི་ནང་ནས་དེ་བཞིན་གཤེགས་པ་ལ་སྐུར་པ་བཏབ་པ་དང༌། བླ་མའི་དབུ་གཡོགས་པ་སྡིག་ཆེའོ། ། ཕྲ་མ་ནི། གཞི་ནི། ཕ་རོལ་པོ་མཐུན་པ། བསམ་པ་ནི། དབྱེ་བར་འདོད་པ། སྦྱོར་བ་ནི། ལས་རྩོམ་པ། ཉོན་མོངས་ནི། དུག་གསུམ་ལས་ཁྱད་པར་རྫོགས་བྱེད་ཞེ་སྡང༌། མཐར་ཐུག་ནི། ཕ་རོལ་པོས་དོན་གོ་བའོ། ། མི་མཐུན་པ་བསྡུམ་པར་རྩོམ་པ་སླར་མི་བསྡུམ་པའི་བསམ་སྦྱོར་བྱེད་པའང་འདིར་གཏོགས་སོ། ། འདི་ལ་དབྱེ་ན། མཛའ་བ་ངོས་སུ་འབྱེད་པ་ལྟ་བུའི་བཙན་ཕྲ། གཞོགས་(༢༢༨ན)སྤོང་བྱས་ནས་དབྱེ་བ་ལྟ་བུའི་གཞོགས་ཕྲ། ལྐོག་ཏུ་དབྱེན་བྱེད་པ་ལྟ་བུའི་ལྐོག་ཕྲ་སྟེ་གསུམ་མོ། ། ཕྲ་མའི་ནང་ནས་དགེ་འདུན་གྱི་དབྱེན་བྱེད་པ་སྡིག་ཆེའོ། ། ཚིག་རྩུབ་ནི། གཞི་ནི། སེམས་ཅན་གྱི་རྒྱུད་དུ་གཏོགས་པ། བསམ་པ་ནི། མི་སྙན་པ་བརྗོད་འདོད་ཀྱི་ཀུན་སློང༌། སྦྱོར་བ་ནི། ངག་གི་རྣམ་པར་རིག་བྱེད་དུ་ཐོན་པ། ཉོན་མོངས་ནི། དུག་གསུམ་དང་རྫོགས་བྱེད་ཞེ་སྡང༌། མཐར་ཐུག་ནི། ཕ་རོལ་པོས་ཐོས་ཤིང་དོན་གོ་བའོ། ། འདི་ལ་དབྱེ་ན། གཞན་ལ་དངོས་སུ་ངན་འཚང་སྨྲ་བ་ལྟ་བུ་ངོར་རྩུབ་པ། ཀྱལ་ཀ་དང་བསྲེས་ནས་གཞན་ལ་ཚིག་ངན་སྨྲ་བ་ལྟ་བུ་གཞོགས་ཏེ་རྩུབ་པ། གཞན་གྱི་མཛའ་བོ་སོགས་ལ་ངན་མཚང་སྨྲ་བ་ལྟ་བུ་བརྒྱུད་ནས་རྩུབ་པ་སྟེ་