Tibetan
པ་དང༌། བྱང་བར་གྱུར་པ་དང༌། ཟད་པ་དང༌། འདོད་ཆགས་དང་བྲལ་བ་དང༌། འགོག་པ་དང༌། རྣམ་པར་ཞི་བ་དང༌། ནུབ་པ་ཞེས་བྱ་བའི་མིང་གི་རྣམ་གྲངས་དུ་མ་དང་ལྡན་པའོ། །ཞེས་པ་ལྟར་རོ། ། ན༤ བཞི་པ་བསྟེན་བྱ་ལམ་གྱི་བདེན་པ་ནི། གང་ལ་ཞུགས་ནས་གོ་འཕང་བགྲོད་བྱེད་ལམ། ། ཚོགས་སྦྱོར་མཐོང་སྒོམ་མི་སློབ་ལྔ་ཡིས་བསྡུས། ། གང་ལ་བརྟན་པའམ་ཞུགས་ནས་མྱ་ངན་ལས་འདས་པའི་གོ་འཕང་སྒྲུབ་པར་བྱེད་པའི་ཐབས་དེ་ནི་ལམ་གྱི་ངོ་བོ་ཡིན་ལ། དེ་ལ་ཐེག་པ་ཆེ་ཆུང་རྣམས་ནས་དབྱེ་བསྡུ་མང་དུ་བཤད་ཀྱང༌། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་པའི་ལམ་ལྔ་ཡིས་ཐམས་ཅད་བསྡུས་པ་ཤེས་པར་བྱའོ། ། འདི་དག་གི་རྣམ་གཞག་རྒྱས་པ་འོག་ཏུ་ལམ་བཤད་པའི་སྐབས་སུ་འབྱུང་བར་འགྱུར་རོ། ། ད༣ གསུམ་པ་སྤྱི་མཚན་བསྡུས་ཏེ་བསྟན་པ་ལ་བཞི། ན༡ སྡུག ། ན༢ ཀུན། ན༣ འགོག ། ན༤ ལམ་མོ། ། ན༡ དང་པོ་ནི། མི་རྟག་སྡུག་བསྔལ་སྟོང་པ་བདག་མེད་པ། ། སྡུག་བདེན་སྤྱིའི་མཚན་ཉིད་བསྡུ་ན། མི་རྟག །སྡུག་བསྔལ། སྟོང་པ། བདག་མེད་པ་བཞི་སྟེ། དེའང་གང་འདུས་བྱས་ཡིན་པ་དེ་མི་རྟག་པའི་མཚན་ཉིད་ཅན་དང༌། གང་མི་རྟག་པ་དེ་སྡུག་བསྔལ་བའི་མཚན་ཉིད་ཅན་དང༌། གང་སྡུག་བསྔལ་བ་དེ་སྟོང་པའི་མཚན་ཉིད་(༢༣༣ན)ཅན་དང༌། གང་སྟོང་པ་དེ་བདག་མེད་པའི་མཚན་ཉིད་ཅན་ནོ། ། ཞེས་རྣལ་འབྱོར་པ་རྣམས་རྣམ་པ་འདི་བཞིས་དཔྱད་པར་བྱ་བའོ། ། དེ་བཞིའི་ངེས་ཚིག་གམ་སྒྲའི་དོན་ནི། མཛོད་འགྲེལ་ལས། དེ་ལ་རྐྱེན་ལ་རགས་ལུས་པའི་ཕྱིར་མི་རྟག་པའོ། །གནོད་པའི་བདག་ཉིད་ཡིན་པའི་ཕྱིར་སྡུག་བསྔལ་བའོ། །བདག་གིར་ལྟ་བའི་མི་མཐུན་པའི་ཕྱོགས་ཀྱིས་སྟོང་པའོ། །བདག་ཏུ་ལྟ་བའི་མི་མཐུན་པའི་ཕྱོགས་ཀྱིས་བདག་མེད་པའོ། །ཞེས་སོ། ། རྣམ་པ་དེ་བཞི་ཁོང་དུ་ཆུད་པ་ན། རྟག་པ་དང་བདེ་བ་དང་བདག་གིར་དང་བདག་ཏུ་ལྟ་བ་རྣམས་ཀྱི་གཉེན་པོར་འགྱུར་བ་ཡིན་ནོ། ། ན༢ གཉིས་པ་[ཀུན་འབྱུང་]ནི། རྒྱུ་དང་ཀུན་འབྱུང་རབ་སྐྱེ་རྐྱེན་དང་ནི། ། ཀུན་འབྱུང་གི་སྤྱིའི་མཚན་ནི། རྒྱུ་དང༌། ཀུན་འབྱུང༌། རབ་སྐྱེ། རྐྱེན་བཞི་སྟེ། དེའང་ལས་དང་ཉོན་མོངས་པ་དེ་དག་ཀྱང་སྲིད་པ་སྐྱེ་བ་ཕྱི་མ་འགྲུབ་པའི་བག་ཆགས་ས་བོན་འཇོག་པའི་བྱེད་རྒྱུ་ཡིན་པའི་ཕྱིར། རྒྱུའི་མཚན་ཉིད་ཅན་དུ་དང༌། སེམས་ཅན་ལས་ཀྱི་བག་ཆགས་བསགས་པ་དེ་དང་དེ་དག་ལྷ་ལ་སོགས་པའི་སེམས་ཅན་གྱི་རིགས་དྲུག་པོ་དེ་དང་དེར་ནང་ཕན་ཚུན་ཆ་བྱད་དང་རིགས་འདྲ་བར་འབྱུང་བའི་བྱེད་རྒྱུ་ཡིན་པའི་ཕྱིར། ཀུན་འབྱུང་མཚན་ཉིད་ཅན་དུ་དང༌། སོ་སོ་རང་རང་གི་རྒྱུ་ཐ་དད་དུ་ངེས་པར་འབྱུང་བ་དང་འགྲོ་བ་དང་སྐྱེ་གནས་ལ་སོགས་པ་རྣམ་པ་ཐ་དད་དུ་འབྱུང་བ་དང་འགྲོ་བའི་མཆོག་ཏུ་སྲིད་པའི་རྩེ་མོར་འབྱུང་བའི་བྱེད་རྒྱུ་ཡིན་པའི་ཕྱིར། རབ་ཏུ་སྐྱེ་བའི་མཚན་ཉིད་ཅན་དུ་དང༌། སྔར་མ་ཐོབ་པའི་ལུས་གཞན་དང་གཞན་ཐོབ་པ་དང་ཐོབ་ཟིན་པའི་ལུས་གཞན་དང་གཞན་དུ་འདའ་བའི་བྱེད་རྒྱུ་ཡིན་པའི་ཕྱིར། རྐྱེན་གྱི་མཚན་ཉིད་ཅན་དུ་རིགས་པར་བྱ་བ་རྣམས་སོ། ། དེ་བཞིའི་ངེས་ཚིག་ནི། མཛོད་འགྲེལ་ལས། ས་བོན་གྱི་ཆོས་ཀྱི་ཚུལ་གྱིས་རྒྱུའོ། །འབྱུང་བའི་ཚུལ་གྱིས་ཀུན་འབྱུང་བའོ། །འབྲེལ་བའི་ཚུལ་གྱིས་རབ་ཏུ་སྐྱེ་བའོ། །མངོན་པར་སྒྲུབ་པའི་ཚུལ་གྱིས་ན་རྐྱེན་ཏེ། (༢༣༣བ)དཔེར་ན། འཇི་བའི་གོང་བུ་དང་ཐལ་ཞར་དང་འཁོར་ལོ་དང་ཐེ་གུ་དང་ཆུ་རྣམས་འདུས་པ་ལས་བུམ་པ་མངོན་པར་སྒྲུབ་པ་དེ་བཞིན་ནོ། །ཞེས་སོ། ། དེ་དག་ཀྱང་། རྒྱུ་མེད་དང༌། རྒྱུ་གཅིག་པུ་དང༌། རྒྱུ་འགྱུར་བ་དང༌། བློ་སྔར་བཏང་བར་བྱ་བ་སྤྱད་པའི་ལོག་ལྟའི་གཉེན་པོར་འགྱུར་བ་ཡིན་ནོ། ། ན༣ གསུམ་པ་[འགོག་པ་]ནི། འགོག་པ་ཞི་བ་གྱ་ནོམ་ངེས་པར་འབྱུང༌། ། འགོག་པའི་སྤྱི་མཚན་ནི། འགོག་པ། ཞི་བ། གྱ་ནོམ། ངེས་འབྱུང་བཞི་སྟེ། དེ་ལ་འགོག་པ་ནི། སྡུག་བསྔལ་འབྱུང་བའི་རྒྱུ་ཉོན་མོངས་པ་རྣམས་དང་བྲལ་བའི་མཚན་ཉིད་ཅན་དང༌། ཞི་བ་ནི། མ་ཞི་བར་བྱེད་པ་འདུ་བྱེད་སྡུག་བསྔལ་ཉེར་ལེན་གྱི་ཕུང་པོ་རྣམས་དང་བྲལ་བའི་མཚན་ཉིད་ཅན་དང༌། གྱ་ནོམ་ནི། ཉོན་མོངས་པ་དང་བྲལ་བས་གཙང་བ་དང་སྡུག་བསྔལ་དང་བྲལ་བས་བདེ་བའི་དངོས་པོ་ཡིན་པའི་མཚན་ཉིད་ཅན་དང༌། ངེས་འབྱུང་ནི། སླར་མི་ལྡོག་པར་སོང་བས་རྟག་པ་དང་དོན་དམ་པར་དགེ་བས་གཞན་ལ་ཕན་པའི་གཞི་ཡིན་པའི་མཚན་ཉིད་ཅན་རྣམས་སུ་རིགས་པར་བྱ་བའོ། ། དེ་བཞིའི་ངེས་ཚིག་ནི། མཛོད་འགྲེལ་ལས། འབྲེལ་པ་མེད་པས་འབྲེལ་པ་ཞིག་པའི་ཕྱིར་འགོག་པའོ། །འདུས་བྱས་ཀྱི་མཚན་ཉིད་གསུམ་དང་བྲལ་བའི་ཕྱིར་ཞི་བའོ། །དགེ་བའི་ཕྱིར་གྱ་ནོམ་པའོ། །ཡིད་བརྟན་པའི་མཆོག་ཡིན་པའི་ཕྱིར་ངེས་པར་འབྱུང་བའོ། །ཞེས་སོ། ། དེ་བཞི་བསྒོམས་པས། ཐར་པ་མེད་དོ། །སྡུག་བསྔལ་ལ་ཐར་པ་ཡིན་ནོ། །བསམ་གཏན་གྱི་བདེ་བ་ནི་གྱ་ནོམ་པའོ། །ཐར་པ་ནི་གཏན་དུ་བ་མ་ཡིན་ནོ་སྙམ་པའི་ལོག་པར་ལྟ་བ་ལས་ངེས་པར་འབྱུང་བ་ཡིན་ནོ། ། ན༤ བཞི་པ་[ལམ་]ནི། ལམ་རིགས་སྒྲུབ་དང་ངེས་འབྱིན་སྤྱི་མཚན་ནོ། ། ལམ་གྱི་སྤྱི་མཚན་ནི། ལམ། རིགས་པ། སྒྲུབ་པ། ངེས་པར་འབྱིན་པ་བཞི། དེ་ལ་ལམ་ནི། མཱརྒ་འཚོལ་བ་ལའོ། །ཞེས་པའི་བྱིངས་ལས་བསྒྲུབས་པས་ཆོས་ཀྱི་དབྱིངས་དེ་ཁོ་ནའི་དོན་འཚོལ་ཞིང་རྟོགས་པར་བྱེད་པའི་མཚན་ཉིད་ཅན་དང༌། (༢༣༤ན) རིགས་པ་ནི། རིགས་པ་མ་ཡིན་པ་ཉོན་མོངས་པའི་གཉེན་པོ་བྱེད་པའི་མཚན་ཉིད་ཅན་དང༌། སྒྲུབ་པ་ནི། འདུས་བྱས་རྟག་པར་འཛིན་པ་ལ་སོགས་པའི་ཕྱིན་ཅི་ལོག་ལས་བཟློག་ནས་དེ་ཁོ་ན་ཉིད་རྟོགས་པ་ལ་འཇོག་ཅིང་སེམས་ཕྱིན་ཅི་མ་ལོག་པར་སྒྲུབ་པའི་མཚན་ཉིད་ཅན་དང༌། ངེས་པར་འབྱིན་པ་ནི། འདུས་མ་བྱས་ཤིང་རྟག་པ་གཏན་དུ་བའི་མྱ་ངན་ལས་འདས་པའི་གནས་སུ་འགྲོ་བའི་མཚན་ཉིད་ཅན་རྣམས་སུ་ཤེས་པར་བྱའོ། ། དེ་བཞིའི་ངེས་ཚིག་ནི། མཛོད་འགྲེལ་ལས། བགྲོད་པའི་དོན་གྱིས་ལམ་མོ། །རིགས་པ་དང་ལྡན་པའི་ཕྱིར་རིགས་པའོ། །ཡང་དག་པར་སྒྲུབ་པའི་དོན་གྱིས་སྒྲུབ་པའོ། །ཤིན་ཏུ་ཡང་དག་པར་འདའ་བར་བྱེད་པའི་ཕྱིར་ངེས་པར་འབྱིན་པར་བྱེད་པའོ། །ཞེས་སོ། ། དེ་བཞི་བསྒོམས་པས། ལམ་མེད་དོ། །ལམ་འདི་ངན་ནོ། །གཞན་ཡང་ལམ་ཡིན་ནོ། །ལམ་འདིའང་ལྡོག་གོ་སྙམ་དུ་ལོག་པར་དཔྱད་པའི་ལྟ་བའི་གཉེན་པོར་འགྱུར་བ་ཡིན་ནོ། ། བདེན་བཞིའི་རྣམ་པར་གཞག་པ་འདི་དག་ཐེག་པ་ཐུན་མོང་གི་ཤེས་བྱར་ཡང་འགྱུར་བས་ན་ཀུན་བཏུས་ལས་ཀྱང་རྣམ་གྲངས་འགའ་ཞིག་བཏུས་པ་ཡིན་ཅིང༌། སྤྱིར་ཀུན་བཏུས་ཉིད་ཀྱང་རྗེ་བཙུན་གྲགས་པས་ནི་མདོ་སྡེ་པའི་གཞུང་ཡིན་པར་ལྗོན་ཤིང་ལས་ཞིབ་པར་གསུངས་སོ། ། ཏ༣ གསུམ་པ་བསྲུང་བྱའི་སྡོམ་པ་ནི། བསྲུང་བྱའི་སྡོམ་པ་ངེས་འབྱུང་སོ་ཐར་ཁྲིམས། ། ཉན་ཐོས་སྡེ་གཉིས་རང་རྒྱལ་དང་བཅས་པས་བསྲུང་བར་བྱ་བའི་སྡོམ་པ་ནི་ངེས་འབྱུང་གི་བསམ་པས་ཀུན་ནས་བསླངས་པའི། གཞན་གནོད་གཞིར་བཅས་སྤོང་བའི་སེམས་པ་མཚུངས་ལྡན་དང་བཅས་པའི་སོ་སོ་ཐར་པའི་ཚུལ་ཁྲིམས་ཏེ། དེའི་ཚུལ་ཞིབ་པར་གོང་དུ་བཤད་ཟིན་ཏོ། ། འདི་དག་ཏུ་མཚུངས་པར་ལྡན་ཚུལ་ལ་མངོན་པ་གོང་འོག་གཉིས་བཞེད་པ་མི་འདྲའོ། ། ཏ༤ བཞི་པ་རྟོགས་བྱའི་ལྟ་བ་ནི། ལྟ་བ་གང་ཟག་བདག་(༢༣༤བ)མེད་གཙོ་བོར་རྟོགས། ། ཉན་ཐོས་པས་ལྟ་བ་ནི་གང་ཟག་གི་བདག་མེད་གཙོ་བོར་རྟོགས་པ་ཡིན་ཏེ། དེའང་མུ་སྟེགས་བྱེད་ཀྱིས་བཏགས་པའི་གང་ཟག་གི་བདག་རྟག་པ་གཅིག་པུ་གཙང་བ་བྱེད་པ་པོ་རང་དབང་ཅན་ཞེས་པ་དེ་མེད་པའོ། ། དེ་ལྟ་བུའི་གང་ཟག་གི་བདག་ཡོད་པར་འཛིན་པའི་བློ་འཁྲུལ་པ་ཡིན་ཏེ། ཡུལ་མེད་པའི་བློ་ཡིན་པའི་ཕྱིར། ཐག་ཁྲ་ལ་སྦྲུལ་དུ་འཛིན་པ་བཞིན་ནོ། ། དེའང་ཕུང་པོ་ནི་གང་ཟག་གི་བདག་མ་ཡིན་ཏེ། མི་རྟག་པ་དང་དུ་མ་དང་མི་གཙང་བ་ཡིན་ཞིང་བྱེད་པ་པོ་མིན་ལ་གཞན་དབང་དུ་གྱུར་པའི་ཕྱིར། ཕུང་པོ་ལས་གཞན་དུའང་གང་ཟག་གི་བདག་མེད་དེ། གང་ཟག་གི་ཕུང་པོའི་རྒྱུན་རྒྱུ་ལས་དང་ཉོན་མོངས་པས་གང་ཞིང་ཟག་པ་ལས་བཏགས་ནས་བཞག་པའི་ཕྱིར། གཞན་ཡང༌། མཛོད་ལས། བདག་མེད་ཕུང་པོ་ཙམ་ཉིད་དོ། ། ཞེས་པ་ལྟར། གང་ཟག་གི་བདག་ཏུ་འཛིན་པོའི་བློ་ནི་ཕུང་པོའི་རྒྱུན་ཙམ་ལ་དམིགས་ནས་སྐྱེ་བའི་ཕྱིར། འདིར་གཙོ་བོའི་སྒྲས། རྒྱན་སྟུག་དང་ལང་གཤེགས་སོགས་ལས་ཉན་རང་གིས་ཆོས་ཀྱི་བདག་མེད་པ་མ་རྟོགས་པར་གསུངས་པ་ནི་བསྒོམས་པས་མངོན་སུམ་དུ་མ་བྱས་པ་ལ་དགོངས་ཤིང༌། ཁ་ཅིག་ཏུ་བདག་མེད་གཉིས་ཀ་རྟོགས་པར་བཤད་པ་ནི། ཐོས་པ་དང་བསམ་པ་དང་འདྲིས་པའི་ཤེས་བཞིན་དེས་ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་གྲོགས་བྱེད་པ་ལ་དགོངས་པས་སོ། ། དེས་ན་ཉན་རང་གིས་ཆོས་ཀྱི་བདག་མེད་རྟོགས་པར་བཞེད་པ་ཀླུ་སྒྲུབ་ཡབ་སྲས་དང༌། མ་རྟོགས་པར་བཞེད་པ་ཐོགས་མེད་སྐུ་མཆེད་ཀྱི་དགོངས་པ་ཡིན་པར་བོད་ཀྱི་མཁས་པ་ཁ་ཅིག་གིས་བཞེད་ཅིང༌། དེ་དག་གིས་ཉན་རང་རྣམས་བདག་མེད་གཉིས་ཀ་རྟོགས་པར་འདོད་དོ། ། ཏ༥ ལྔ་པ་འཐོབ་བྱའི་འབྲས་བུ་ནི། མྱང་འདས་མི་སྐྱེའི་ཆོས་ཅན་འདུས་མ་བྱས། ། མ་ཡིན་དགག་དང་མེད་དགག་བྱེ་མདོས་འདོད། ། ལྷག་བཅས་འདུས་བྱས་མ་བྱས་(༢༣༥ན)བརྒྱད་ཅུ་དགུ། ། འབྲས་བུ་བཞི་དང་ལྷག་མེད་རྒྱུན་ཆད་དོ། ། ཐེག་པ་གསུམ་གའི་ཐོབ་བྱའི་འབྲས་བུ་མྱང་འདས་སུ་མཚུངས་ཀྱང༌། འདིར་འགོག་པའི་མྱང་འདས་ཏེ། དེའི་ངོ་བོ་ནི། རིག་པ་དྲུག་ཅུ་པའི་འགྲེལ་པ་ལས། འོན་ཀྱང་རྒྱུ་དང་རྐྱེན་ལས་དང་ཉོན་མོངས་པ་མ་ཚང་བ་ལས་གཟུགས་ལ་སོགས་པའི་མཚན་ཉིད་དངོས་པོའི་རང་གི་ངོ་བོ་སླར་མི་སྐྱེ་བ་གང་ཡིན་པ་དེ་མྱ་ངན་ལས་འདས་པའོ། །ཞེས་ཉན་ཐོས་པའི་འདོད་པ་ཕྱོགས་སྔར་མཛད་པ་ལྟར་འདོད་ལ། དེའང་འདུས་བྱས་འདུས་མ་བྱས་གཉིས་ལས་འདུས་མ་བྱས་སོ། ། དེ་ལ་ཁ་ཅིག་བྱེ་སྨྲས། འདུས་མ་བྱས་གསུམ། ཡུལ་དབུས་ཀྱི་བྱེ་སྨྲ་རྣམས་དེ་བཞིན་ཉིད་བསྣན་ནས་བཞིར་འདོད་པར་བཤད་ཅིང༌། དེ་བཞི་ལས། བྱེ་བྲག་སྨྲ་བས། ལྷག་བཅས་བརྟགས་འགོག་དང་། ལྷག་མེད་བརྟགས་མིན་འགོག་ཏུ་འདོད་པ་དང༌། མདོ་སྡེ་པས། ཉོན་མོངས་པ་མེད་པ་བརྟགས་འགོག་དང་། ཕུང་པོ་མེད་པ་བརྟགས་མིན་འགོག་ཏུ་འདོད་པར་ཐུབ་པ་དགོངས་གསལ་ལས་བཤད་ཅིང༌། གཉིས་ཀ་འདུས་མ་བྱས་སུ་མཐུན་པ་ལ་ཁྱད་པར་ནི་བྱེ་བྲག་སྨྲ་བས་མ་ཡིན་དགག་དང༌། མདོ་སྡེ་པས་མེད་དགག་ཏུ་འདོད་པར་མཛོད་འགྲེལ་ལས་བཤད། དེ་དག་གི་དོན་ཀྱང་། བྱེ་སྨྲ་ནི། རྫས་སུ་ཡོད་པར་སྨྲ་བ་སྟེ་དངོས་པོ་ཡོད་པར་འདོད་པའོ། ། མདོ་སྡེ་པ་ནི། རྫས་སུ་མེད་པར་སྨྲ་བ་སྟེ་དངོས་པོ་མེད་པར་འདོད་པའོ། ། འདི་ལ། ལྷག་བཅས་དང་། ལྷག་མེད་གཉིས་སུ་བཞག་པའི། ལྷག་བཅས་ནི། ཉོན་མོངས་པ་མ་ལུས་པར་སྤངས་ཀྱང་ཕུང་པོའི་རྒྱུན་མ་ཆད་པ་སྟེ། དེའང་འདུས་བྱས་བརྒྱད་ཅུ་རྩ་དགུ་དང་འདུས་མ་བྱས་བརྒྱད་ཅུ་རྩ་དགུའམ། དགེ་སྦྱོང་གི་འབྲས་བུ་བཞི་ཡིན་པ་དང༌། ལྷག་མེད་ནི། དགྲ་བཅོམ་པ་ཉོན་མོངས་པ་མ་ལུས་པར་སྤངས་པ་ཚེའི་འདུ་བྱེད་བཏང་ཞིང་ཕུང་པོའི་རྒྱུན་ཆད་པས་སྡུག་བསྔལ་ལམ་ཕུང་པོའི་ལྷག་མ་ཅུང་ཟད་ཀྱང་མ་(༢༣༥བ)ལུས་པར་མར་མེ་ཤི་བ་ལྟ་བུའོ། ། དགྲ་བཅོམ་པ་གྲོངས་ཕན་ཆད་རིག་པ་ཕྱི་མ་མཚམས་མི་སྦྱོར་བར་ཉན་ཐོས་སྡེ་གཉིས་ཀ་འདོད་དོ། ། ཏ༦ དྲུག་པ་རབ་ཏུ་དབྱེ་བ་ལ་གསུམ། ཐ༡ གྲུབ་མཐའི་སྒོ་ནས། ཐ༢ སྡེ་པའི་སྒོ་ནས། ཐ༣ འབྲས་བུའི་སྒོ་ནས་དབྱེ་བའོ། ། ཐ༡ དང་པོ་ལ་གཉིས། ད༡ དབྱེ་བ་དངོས། ད༢ དེའི་འདོད་པ་བརྗོད་པའོ། ། ད༡ དང་པོ་ནི། གྲུབ་མཐའ་བྱེ་བྲག་སྨྲ་དང་མདོ་སྡེ་པ། ། ཉན་ཐོས་ཀྱི་ཐེག་པ་ལ་རང་རང་གི་ཞེ་འདོད་ཀྱིས་བཏགས་པའི་གྲུབ་མཐའ་མི་འདྲ་བའི་ཁྱད་པར་ཕྲ་མོ་མང་དུ་ཡོད་ཀྱང༌། རགས་པ་གཙོ་ཆེ་བའི་སྒོ་ནས་ཕྱེ་བས་བྱེ་བྲག་ཏུ་སྨྲ་བ་དང་མདོ་སྡེ་པ་གཉིས་སུ་བྱུང་ལ། དེའང་གནས་བརྟན་བྱང་བཟང་གིས། དུས་གསུམ་དག་རྫས་ཀྱི་བྱེ་བྲག་ཏུ་ཡོད་པར་སྨྲ་བས་སམ། བྱེ་བྲག་ཏུ་བཤད་པ་ཆེན་པོའི་གཞུང་དང་མཐུན་པར་སྨྲ་བས་དེ་དག་ལ་དེ་སྐད་ཅེས་བྱའོ། ། ཞེས་འབྱུང་ཞིང༌། སྡེ་པ་རྣམས་ལས་གཞི་ཐམས་ཅད་ཡོད་པར་སྨྲ་བའི་བྱེ་བྲག་ཡིན་པར་བཤད་དོ། ། མདོ་སྡེ་པ་ནི། སྔ་མ་དེ་ཉིད་ཀྱིས། འདི་ནི་སྒོ་དྲུག་པ་དང་འཕགས་པ་བཟང་པོ་སྤྱོད་པ་ལ་སོགས་པའི་མདོ་སྡེ་རྣམས་སྒྲ་ཇི་བཞིན་པར་ཁས་ལེན་ཅིང་མདོ་སྡེ་དེ་དག་གི་རྗེས་སུ་འབྲང་བས་མདོ་སྡེ་པ་སྟེ། མིང་གཞན་དཔེས་སྟོན་པ་ལ་མཁས་པས་དཔེས་སྟོན་པའོ། །ཞེས་སོ། ། ད༢ གཉིས་པ་འདོད་པ་བརྗོད་པ་ལ་གཉིས། ན༡ འདོད་པ་མཐུན་པ་དང༌། ན༢ མི་མཐུན་པའོ། ། ན༡ དང་པོ་ནི། ཐུན་མོང་ཐེག་ཆེན་གསུང་རབ་ཁས་མི་ལེན། ། རྟག་གཅིག་བདག་སྤངས་བྱེད་པོ་ལས་སུ་སྨྲ། ། ཉན་ཐོས་སྡེ་གཉིས་ཀ་ཐུན་མོང་དུ་ཐེག་ཆེན་གྱི་གསུང་རབ་འཁོར་ལོ་བར་པ་དང༌། ཐ་མ་གཉིས་རྒྱལ་བའི་བཀའ་མ་ཡིན་ནོ་ཞེས་ཟེར་ཞིང་ཁས་མི་ལེན་ཏེ། འདི་ལྟར་ལོངས་སྐུ་རྟག་ཏུ་བཞུགས་པའི་ཕྱིར་དང༌། བྱང་སེམས་བདེ་བར་འགྲོ་བའི་ཕྱིར་དང༌། ཇི་སྐད་དུ། བདག་མེད་མཆོག་གི་བདག་ཐོབ་ནས། ། ཞེས་བདག་མཆོག་འདོད་པའི་ཕྱིར་དང༌། ཉན་རང་ལྷག་མེད་དུ་ཞུགས་ཚར་བ་(༢༣༦ན)བསླངས་ནས་སླར་ཡང་འཚང་རྒྱ་དགོས་པའི་ཕྱིར་ཆོས་ཀྱི་སྡོམ་བཞི་དང་འགལ་བ་དང༌། སངས་རྒྱས་ཀྱི་བསྟན་པ་ལ་སྡེ་པ་བཅོ་བརྒྱད་ལས་མེད་པ་ལ་དེ་མ་འདུས་པའི་ཕྱིར་དང༌། ཐུན་མོང་གི་འདུལ་བ་ལ་མི་སྣང༌། མདོ་སྡེ་ལ་མི་འཇུག །ཆོས་ཉིད་དང་འགལ་བའི་སྒོ་ནས་སྡེ་སྣོད་གསུམ་དུ་མ་འདུས་པའི་ཕྱིར། ཞེས་ཟེར་ལ། ཆོས་ཀྱི་བདག་དང་ཤེས་སྒྲིབ་མི་འདོད་པས་བདག་མེད་གཉིས་དང་སྒྲིབ་གཉིས། ཀུན་གཞི་དང་ཉོན་ཡིད་མི་འདོད་པས་རྣམ་ཤེས་ཚོགས་བརྒྱད། ཐེག་ཆེན་གྱི་མདོ་ཤིན་ཏུ་རྒྱས་པའི་སྡེ་སྣོད་མི་འདོད་པས་དེ་ནས་འབྱུང་བའི་ས་བཅུ། སངས་རྒྱས་ས་ལ་ལས་དང་སྡུག་བསྔལ་ལྷག་ཡོད་པའི་སྒོ་ནས་སྐྱོན་ཀུན་ཟད་དུ་མི་འདོད་པས་གནས་གྱུར། འོག་མིན་གྱི་ལོངས་སྐུ་མི་འདོད་པས་སྐུ་གསུམ་དང་ཡེ་ཤེས་བཞི་སོགས་མི་འདོད་ཅིང་ཁས་མི་ལེན་ནོ། ། སྡེ་གཉིས་ཀས་གཞིའི་སྐབས་སུ། ཕྱི་རོལ་པས་བརྟགས་པའི་བདག་རྟག་པ་གཅིག་པུ་རང་དབང་ཅན་ལ་སོགས་པ་ནི་ཐག་པའི་སྦྲུལ་བཞིན་དུ་ཀུན་རྫོབ་ཏུའང་མི་འདོད་པ་དང༌། ཕྱྭ་དང་དབང་ཕྱུག་སོགས་སྣོད་བཅུད་བྱེད་པ་པོ་གཞན་མེད་པ་དང༌། འཇིག་རྟེན་སྣ་ཚོགས་ལས་ལས་སྐྱེས། ། ཞེས་གང་བྱེད་པ་པོ་ནི་ལས་སུ་འདོད་པ་དང༌། ཕུང་པོ་ལྔ། ཁམས་བཅོ་བརྒྱད། སྐྱེ་མཆེད་བཅུ་གཉིས། སྐྱེ་གནས་བཞི། འགྲོ་བ་ལྔ། ཁམས་དང་རེག་པ་དང་སེམས་པ་དང་རྣམ་པར་ཤེས་པའི་ཟས་ཏེ་ཟས་བཞི་སོགས་ཀྱིས་རབ་ཏུ་དབྱེ་བ་སོགས་མཐུན་པར་འདོད་དོ། ། གང་ལ་དམིགས་ན་ཟག་པ་རྒྱས་མིན་ཕྱིར། ། འདུས་བྱས་ཟག་བཅས་ལམ་བདེན་འདུས་མ་བྱས། ། ཟག་མེད་ཆོས་ཡིན་གཞིག་དང་སེལ་བྱེད་ཀྱིས། ། དེར་འཛིན་འདོར་རུང་དངོས་དང་རྒྱུན་དག་ནི། ། ཀུན་རྫོབ་ཡོད་པ་དོན་དམ་དོན་བྱེད་མིན། ། མི་འདོར་རྡུལ་ཕྲན་ཆ་མེད་སྐད་ཅིག་སེམས། ། དོན་དམ་ཡོད་པ་དེ་ལ་དོན་བྱེད་ཡིན། ། གཞིའི་ཤེས་བྱའི་གཙོ་བོ་ཟག་བཅས་(༢༣༦བ)དང་ཟག་མེད་ཀྱི་བདེན་གཉིས་འཇོག་ཚུལ་ཡང་མཐུན་ཏེ། ཆགས་བཅས་ཀྱི་བློ་གང་གིས་ཆོས་དེའི་རང་བཞིན་ཤེས་ནས་དེ་ལ་དམིགས་པས་ཟག་པ་ཉོན་མོངས་རྣམས་དམིགས་པ་དང་མཚུངས་ལྡན་ལྔ་པོ་གང་རུང་གི་སྒོ་ནས་རྒྱས་ཤིང་གནས་པར་འགྱུར་བ་དང༌། གང་ལ་དམིགས་ན་དེ་དག་རྒྱས་པར་མི་འགྱུར་བའི་ཕྱིར། རིམ་བཞིན་ལམ་བདེན་ལས་གཞན་པའི་འདུས་བྱས་མཐའ་དག་ཟག་བཅས་ཀྱི་མཚན་གཞི་དང༌། ལམ་བདེན་དང་འདུས་མ་བྱས་རྣམས་ནི་ཟག་མེད་ཆོས་ཀྱི་མཚན་གཞི་ཡིན་ནོ། །བདེན་གཉིས་ཀྱི་འཇོག་ཚུལ་ཡང༌། མཛོད་ལས། གང་ལ་བཅོམ་དང་ཡིས་གཞན། ། བསལ་ན་དེ་བློ་མི་འཇུག་པ། ། བུམ་ཆུ་བཞིན་དུ་ཀུན་རྫོབ་ཏུ། ། ཡོད་དེ་དོན་དམ་ཡོད་གཞན་ནོ། ། ཞེས་ཏེ། ཆོས་གང་ལ་གཞིག་བྱེད་ཀྱིས་གཞིག་པ་དང༌། སེལ་བྱེད་ཀྱི་བློས་ཆ་གཞན་བསལ་བས་དེར་འཛིན་གྱི་བློ་འདོར་དུ་རུང་བ་ནི་ཀུན་རྫོབ་བདེན་པ་སྟེ། དེའང་སྣོད་བཅུད་སོགས་དངོས་པོ་རགས་པ་རྣམས་ནི་ཕྱོགས་ཀྱི་ཆ་དང་བཅས་ཤིང་བློས་ཆ་གཞན་བསལ་དུ་རུང་བས་རྫུན་པ་དང༌། ལོ་ཟླ་ཞག་སོགས་དུས་གསུམ་དུ་རྣམ་པར་བརྟགས་པའི་རྒྱུན་ནི་ཆ་དབྱེ་བར་རུང་བས་མི་བདེན་པ་སྟེ། ཀུན་རྫོབ་ཡོད་པ་དེ་དག་དོན་དམ་པར་དོན་བྱེད་ནུས་པ་མ་ཡིན་ནོ། ། ཆ་བསལ་བས་དེར་འཛིན་གྱི་བློ་མི་འདོར་བ་རྡུལ་ཕྲ་རབ་ནི་ཕྱོགས་ཀྱི་ཆ་མེད་པས་དངོས་པོ་རྩོམ་བྱེད་བདེན་པར་གྲུབ་པ་དང༌། ནང་འཛིན་པའི་སེམས་ཀྱང་སྐད་ཅིག་མ་དུས་ཀྱི་རྒྱུན་རྩོམ་བྱེད་དུ་ཡོད་པ་ནི་དོན་དམ་བདེན་པ་སྟེ། དོན་དམ་དུ་ཡོད་པ་དེ་དག་ནི་དེ་ལ་སྟེ་དོན་དམ་པར་དོན་བྱེད་ནུས་པའོ། ། བུམ་པ་སོགས་ཀུན་རྫོབ་ཡིན་པའི་རྒྱུ་མཚན་ནི། བུམ་པ་སོགས་ཀྱིས་དོན་དམ་པར་དོན་བྱེད་མི་ནུས་ཏེ། དོན་དམ་པར་ཡུལ་རང་ངོས་ནས་དོན་བྱེད་ནུས་པ་དེ་ནི་རང་འཛིན་འཁྲུལ་མེད་སྐྱེད་པར་བྱེད་པའི་དོན་ཆོས་རང་གི་(༢༣༧ན)མཚན་ཉིད་ལ་འདོད་ན། བུམ་པ་སོགས་དེ་དག་བརྡ་སོགས་ནང་གི་ཡན་ལག་ལ་ལྟོས་པའི་བློ་གྲོས་ཀུན་རྫོབ་ཡིན་པའི་ཕྱིར། ཞེས་སོ། ། འདུས་བྱས་སྐྱེ་ཚུལ་ལམ་འབྲས་ཕལ་ཆེར་མཐུན། ། སྤྱིར་སེམས་སེམས་བྱུང་གི་མཚན་ཉིད་ཡུལ་གྱི་ངོ་བོ་དང་ཁྱད་པར་ཙམ་འཛིན་པ་