Tibetan
དང༌། གཟུགས་ཅན་གྱི་འབྱུང་འགྱུར་འབྱུང་བ་ལས་དང༌། ཤེས་རིག་གི་རྫས་མཚུངས་ལྡན་ལྔས་མཚུངས་པ་དང༌། ལྡན་མིན་གྱི་དངོས་པོ་གནས་སྐབས་ཅན་གྱི་གཟུགས་སེམས་ལས་སྐྱེ་བ་སྟེ་འདུས་བྱས་ཀྱི་སྐྱེ་ཚུལ་རྣམས་དང༌། ལམ་དང་འབྲས་བུའི་སྐབས་སུ། ཡུལ་བླང་དོར་བདེན་པ་བཞིའི་མཚན་གཞི་དང༌། མཚན་ཉིད་ཀྱི་གཙོ་བོ་དང༌། ཡུལ་ཅན་ལ་ཚོགས་སྦྱོར་མཐོང་སྒོམ་མི་སློབ་ལམ་སྟེ་ལམ་ལྔ་དང༌། སྐྱེས་བུ་ཟུང་བཞི་དང་གང་ཟག་ཡ་བརྒྱད་ཀྱི་གྲངས་དང་སྤངས་རྟོགས་ཕལ་ཆེ་བ་དང༌། བྱང་ཆུབ་སེམས་དཔའ་དང་པོར་ཐུགས་བསྐྱེད་ཚུལ། བར་དུ་ཚོགས་བསགས་ཚུལ། མཐར་འཚང་རྒྱ་ཚུལ། དེའང་སྲིད་པ་ཐ་མ་པ་རྒྱལ་བུ་དོན་གྲུབ་ཀྱིས་དུས་གྲངས་མེད་གསུམ་གྱི་ཚོགས་རྫོགས་ཀྱང་སོ་སྐྱེ་ཚོགས་ལམ་པ་འཆིང་བ་ཀུན་ལྡན་ཡིན་པ་དང༌། འོག་མིན་དུ་སངས་རྒྱས་པ་སོགས་མི་འདོད་པས། བྱང་ཆུབ་ཀྱི་ཤིང་དྲུང་དུ་སྲོད་ལ་བདུད་དཔུང་བྱེ་བ་ཕྲག་སོ་བདུན་བཏུལ་ནས། ཐོ་རངས་སྦྱོར་ལམ་སྟན་གཅིག་པ་ནས་ཟད་མི་སྐྱེ་ཤེས་པའི་བར་གྱི་སྤངས་རྟོགས་ཐམས་ཅད་བདེན་བཞི་མི་རྟག་སོགས་བཅུ་དྲུག་རྟོགས་པའི་ལམ་ཁོ་ནས་ཐོབ་ཅིང༌། དེའི་སྔོན་དུ་རིང་འཕུར་སྐྱེས་དང་ལྷག་སྤྱོད་ལས་འཇིག་རྟེན་པའི་བསམ་གཏན་གྱི་མན་ངག་བླངས་ཏེ་ཅི་ཡང་མེད་མིན་ལས་འདོད་ཆགས་དང་བྲལ་ཟིན་པའི་ཆགས་བྲལ་སྔོན་སོང་གི་སངས་རྒྱས་ཡིན་པ་དང༌། དེ་བཞིན་དུ་དགེ་འདུན་ཉི་ཤུའི་སྤངས་རྟོགས་ཀྱི་འཇོག་ཚུལ་དང་སྤངས་རྟོགས་ལས་ཉམས་ཚུལ་ཕྲན་ཚེགས་ཙམ་མ་གཏོགས་ཕལ་ཆེ་བ་དང༌། བསམ་གཏན་བཞི་དང༌། (༢༣༧བ)གཟུགས་མེད་བཞི་དང༌། ཚད་མེད་བཞི་སོགས་ཀྱི་ཡོན་ཏན་ཕལ་ཆེ་བ་དང༌། སངས་རྒྱས་ཀྱི་ས་ན་སྔོན་ལས་ཀྱིས་འཕངས་པའི་རྣམ་སྨིན་གྱི་ཕུང་པོ་དང་ཟག་བཅས་ལས་ཀྱི་ལྷག་མ་སོགས་སྡུག་བསྔལ་གྱི་བདེན་པ་ཡོད་པ་དང༌། ཉན་རང་སངས་རྒྱས་ཏེ་ལྷག་མེད་ཀྱི་མྱང་འདས་གསུམ་ག་ཤིང་ཟད་ཀྱི་མེ་བཞིན་རིག་པ་རྒྱུན་ཆད་པ་རྣམས་ཀྱང་མཐུན་པར་འདོད་པ་ཡིན་ནོ། ། ན༢ གཉིས་པ་འདོད་པ་མི་མཐུན་པ་ལ་གཉིས། པ༡ བྱེ་སྨྲ་དང་། པ༢ མདོ་སྡེ་པའོ། ། པ༡ དང་པོ་ནི། མི་མཐུན་བྱེ་སྨྲས་སྡེ་བདུན་བཀའ་རུ་འདོད། ། རྡུལ་ཕྲན་ཆ་མེད་སིལ་བུ་བར་དང་བཅས། ། རིགས་མཐུན་བྱ་བ་གཅིག་བྱེད་ནེའུ་གསིང་བཞིན། ། དབང་པོས་དོན་མཐོང་ཤེས་པས་དེ་ལ་འཛིན། ། གཟུང་འཛིན་རྒྱུ་འབྲས་ཕལ་ཆེར་དུས་མཉམ་སྐྱེ། ། བྱེ་མདོ་གཉིས་ཀྱི་གྲུབ་མཐའ་མི་མཐུན་པའི་ཁྱད་པར་མཛོད་ལས་མང་དུ་བྱུང་བ་ཆེ་ལོང་དུ་བསྡུས་ཏེ་བཤད་ན། བྱེ་བྲག་སྨྲ་བས་མངོན་པ་སྡེ་བདུན་མདོ་ལས་དངོས་སུ་གསུངས་པ་ཆེད་དུ་བརྗོད་པའི་ཚོམ་ལྟར་དགྲ་བཅོམ་པ་སོ་སོས་བསྡུས་པས་བཀའ་ཡིན་ཅེས་དང༌། ལུང་སོགས་ཆོས་ཀྱི་ཕུང་པོ་ནི་མིང་གི་ཕྲེང་བ་ལྡན་མིན་འདུ་བྱེད་ཀྱིས་བསྡུས་པར་འདོད། གཟུགས་ཀྱིས་བསྡུས་པ་རྣམས་ནི་འབྱུང་བ་དང་འབྱུང་འགྱུར་རམ་ཡང་ན་རྡུལ་ཕྲ་རབ་དང་བཅས་པ་ཡིན་ལ། ཕྲ་རབ་ཀྱིས་རགས་པ་རྩོམ་པ་ན་དབུས་རྡུལ་ལ་ཕྱོགས་དྲུག་གི་རྡུལ་གྱིས་བསྐོར་བ་ཡང་རྡུལ་ཕྲན་ཆ་མེད་སིལ་བུ་བར་སྟོང་དང་བཅས་པ་རྫས་སུ་གྲུབ་པ། རིགས་མཐུན་ཅིང་བྱ་བ་གཅིག་བྱེད་པ་ནི་གཡག་རྔ་དང་ནེའུ་གསིང་བཞིན་ཏེ། རྡུལ་ཕྲ་རབ་སིལ་བུ་སོ་སོར་གནས་ཀྱང་མི་འཇིག་པ་ནི་ལས་སམ་རླུང་གིས་གཟུང་བར་འདོད་པ་ལྟར། རགས་པ་ཡང་དེ་རྣམས་འཛིན་པར་བྱེད་པའི་རླུང་གིས་ཕྱོགས་གཅིག་ཏུ་བསྡུས་པ་དང༌། ཤེས་པས་ཡུལ་འཛིན་ཚུལ་ཡང༌། དབང་ཤེས་ཀྱི་རང་ཡུལ་སྐམ་པས་(༢༣༨ན)ལྕགས་སྦྲམ་ལྟར་རྣམ་མེད་ཐུག་ཕྲད་རྗེན་ཆེར་དུ་འཛིན་ལ། དེའང་དབང་པོས་དོན་གྱི་རང་མཚན་མཐོང་ནས་ཤེས་པས་འཛིན་པ་དང༌། དེའང་འདས་པ་དང་མ་འོངས་པ་རྣམ་ཤེས་བསྐྱེད་པའི་བྱ་བ་མི་བྱེད་པའི་ཕྱིར་གཟུང་འཛིན་རྒྱུ་འབྲས་ཕལ་ཆེར་དུས་མཉམ་དུ་སྐྱེ་བར་འདོད་དོ། ། གཞི་ལྔ་དུས་གསུམ་མྱང་འདས་རྫས་ཡོད་དང༌། ། འདུས་མ་བྱས་རྟག་འགོག་བདེན་དངོས་པོར་སྨྲ། ། ཤེས་པ་གཞན་རིག་ལ་སོགས་རྩ་བ་ནི། ། གསུང་རབ་ལ་བརྟེན་ཆེ་བཞི་སོགས་ཀྱིས་ཕྱེས། ། ཤེས་བྱའི་གཞི་ལྔ། དུས་གསུམ་མྱང་འདས་རྣམས་དང༌། ཁྱད་པར་ལྡན་མིན་འདུ་བྱེད་རྣམས་གང་གི་གནས་སྐབས་ལ་བཞག་པའི་གནས་སྐབས་ཅན་ལས་དོན་གཞན་རང་རྐྱ་ཐུབ་པའི་རྫས་ཡོད་དང༌། འདུས་མ་བྱས་གསུམ་རྟག་པར་འདོད་ཅིང༌། དེའང་ངོ་བོས་མ་གྲུབ་པའི་ཤེས་བྱ་འཇོག་མ་ཤེས་ནས་ཡོངས་གཅོད་དུ་གྲུབ་པའི་རྫས་སམ་དངོས་པོར་ཁས་ལེན་གྱི། འདུས་མ་བྱས་དངོས་པོར་འདོད་པ་དང་དོན་བྱེད་ནུས་པའི་འདུས་བྱས་ཀྱི་དངོས་པོར་ནམ་ཡང་མི་འདོད་དེ། འདུས་མ་བྱས་ལ་དེ་དག་མེད། ། ཅེས་དེ་ལ་རྒྱུ་འབྲས་གཉིས་མེད་པར་འདོད་པའི་ཕྱིར་རོ། ། ཡང་དགྲ་བཅོམ་ཉམས་ནས་ཕྱིར་འོང་སོགས་སུ་འགྱུར་བ་དང༌། འགོག་བདེན་དབང་པོ་ལྔའི་ཐོབ་བྱར་དང༌། ཆོས་ཐམས་ཅད་ཀྱི་མཆོག་ཏུ་དང༌། བྲལ་བའི་རྫས་སོགས་སུ་གསུངས་པས་དངོས་པོ་ཡིན་པར་སྨྲ་བ་དང༌། རལ་གྲི་རང་གིས་རང་མི་གཅོད་པ་བཞིན་དུ་ཤེས་པ་ལ་རང་མྱོང་རང་རིག་མི་འདོད་པས་ཤེས་པ་ཐམས་ཅད་གཞན་རིག་ཏུ་འདོད་པ་དང༌། སོགས་ཁོང་ནས། གང་ཟག་གི་བདག་བཀག་ཙམ་གྱི་མེད་དགག་ལ་དེ་བཞིན་ཉིད་དུ་འཇོག་མི་ཤེས་པ་སོགས་འདོད་པ་ཐུན་མོང་མ་ཡིན་པ་མང་པོ་འབྱུང་བ་ཞིབ་པར་མཛོད་ལས་ཤེས་པར་བྱ་བ་ལས། འདིར་སྨོས་སུ་མི་ལང་ངོ༌། ། གྲུབ་མཐའ་འདིའི་རྩ་བ་ནི་གསུང་རབ་ཉིད་ལས་ཅི་རིགས་པར་གསུངས་(༢༣༨བ)པ་ལ་བརྟེན་ཏེ་བཙུན་པ་ཆེན་པོ་བཞི་དང༌། ཁ་ཆེ་འདུས་བཟང༌། བཙུན་པ་གོ་ཆ་མཐའ་ཡས་སོགས་ཀྱིས་གསལ་བར་ཕྱེས་པར་གྲགས་སོ། ། པ༢ གཉིས་པ་[མདོ་སྡེ་པ་]ནི། དཔེ་སྟོན་སྡེ་པས་ཕལ་ཆེར་དེ་ལས་ལྡོག ། རྡུལ་ཕྲན་རེག་ལ་མ་འབྱར་པུསྟི་ལྟར། ། དབང་པོ་བེམ་པོ་ཕྱི་དོན་ལྐོག་ན་མོ། ། ཤེས་པས་མཐོང་མིན་རྣམ་པ་དོན་དུ་མྱོང༌། ། དཔེ་སྟོན་པ་སྟེ། མདོ་སྡེ་པས་བྱེ་སྨྲ་ལས་ཕལ་ཆེར་ལྡོག་པའི་ཚུལ་གྱིས་སྨྲ་བས་བཤད་མ་ཐག་པ་དེ་དག་ནི་མདོ་སྡེ་པས་མི་འདོད་དེ། ཇི་སྐད་དུ། ཡེ་ཤེས་ལ་འཇུག་ཀ་ཏྱཱའི་བུས། ། རབ་ཏུ་བྱེད་པ་དབྱིག་བཤེས་ཀྱིས། ། ཆོས་ཀྱི་ཕུང་པོ་ཤཱ་རིའི་བུས། ། གདགས་པའི་བསྟན་བཅོས་མཽངྒལ་བུས། ། རྣམ་ཤེས་ཚོགས་ནི་ལྷ་སྐྱེད་ཀྱིས། ། འགྲོ་བའི་རྣམ་གྲངས་གསུས་པོ་ཆེས། ། ཁམས་ཀྱི་ཚོགས་ནི་གང་པོས་བྱས། ། ཞེས་མངོན་པ་སྡེ་བདུན་དགྲ་བཅོམ་པ་དེ་དག་སོ་སོས་རང་དབང་དུ་བརྩམས་པས་བསྟན་བཅོས་ཡིན་པར་འདོད་པ་དང༌། ལུང་ཆོས་ཀྱི་ཕུང་པོ་སྒྲ་རང་གི་མཚན་ཉིད་གཞུང་ལུགས་ཀྱི་ཚད་དང་མཉམ་པ་གཟུགས་ཀྱི་ཕུང་པོས་བསྡུས་པ་དང༌། གཟུགས་ནི་སྔ་མ་ལྟར་ལ་རྩོམ་བྱེད་རྡུལ་ཕྲ་རབ་དང་དེས་བརྩམས་པའི་རགས་པ་གཉིས་ཡིན་ལ། རྡུལ་ཕྲ་རབ་རྣམས་ནི་བསྐོར་བ་མ་འབྱར་ལ་བར་མེད་པས་རེག་པར་འདུ་ཤེས་པ་པོ་ཏི་བསྡམས་པ་ལྟར་འདོད་པ་དང༌། དབང་པོ་ནི་བེམ་པོ་ཡིན་པའི་ཕྱིར་དོན་མཐོང་བྱེད་མ་ཡིན་ལ། ཕྱི་དོན་ནི་ལྐོག་ན་མོ་ཞེས་པ་འདས་པ་ཡིན་པའི་ཕྱིར་རྣམ་ཤེས་ཀྱིས་མཐོང་བ་མ་ཡིན། དེས་ན་རྣམ་པ་ཞེས་པ་དོན་གྱིས་གཏད་པའི་ཤེས་པ་ཉིད་སྣང་བ་ཡིན་ལ། དོན་འགག་ཀྱང་དེས་བཞག་པའི་ཤེས་པའི་རྣམ་པ་དོན་དང་འདྲ་བར་མྱོང་བས་དེ་མྱོང་བར་གདགས་ཤིང༌། ཤེས་པས་ཡུལ་འཛིན་པ་རྣམ་པས་བར་དུ་ཆོད་པར་འཛིན་པ་དང༌། གཟུང་འཛིན་རྒྱུ་འབྲས་དུས་མཉམ་དུ་མིན་པར་སྔ་ཕྱིར་འདོད་དོ། ། འདི་ལ་ཕྱི་དོན་ལྐོག་ན་མོ་ཞེས་ཟེར་ལ། འདི་(༢༣༩ན)དང་སེམས་ཙམ་རྣམ་བདེན་པ་གཉིས་སྣང་བ་ཤེས་པ་ཡིན་པར་མཚུངས་ཀྱང་། གཏོད་བྱེད་ཕྱི་དོན་ཡོད་མེད་ཀྱིས་འབྱེད་པའོ། ། གཟུགས་སེམས་ཚོར་འདུ་སེམས་པ་རྫས་སུ་ཡོད། ། གཞན་རྣམས་བཏགས་ཡོད་མཁའ་སོགས་མེད་པར་དགག ། རང་རིག་གཞན་རིག་དུས་གསུམ་བཏགས་དངོས་སོགས། ། དགེ་འདུན་སྲུང་དང་དཔལ་ལེན་སོགས་ཀྱིས་བཞེད། ། ཤེས་བྱའི་གཞི་ལྔ་ལས། གཟུགས་སེམས་གཉིས་དང་། སེམས་བྱུང་ཚོར་འདུ་གཉིས་སམ། སེམས་པ་དང་གསུམ་རྣམས་རྫས་ཡོད་ཡིན་གྱི། གཞན་མཐའ་དག་ཆ་ལ་བཏགས་པའི་བཏགས་ཡོད་ཀྱི་དངོས་པོ་དང་དངོས་མེད་དུ་འདོད་པ་དང༌། ནམ་མཁའ་སོགས་འདུས་མ་བྱས་གསུམ་རྟག་པར་འདོད་མོད་ཀྱང་མི་རྟག་པ་བཀག་ཙམ་གྱི་མེད་དགག་ཡོངས་གཅོད་དུ་རི་རྭ་དང་འདྲ་བར་ངོ་བོ་མ་གྲུབ་པའི་ཤེས་བྱ་ཙམ་དུ་འདོད་པ་དང༌། རང་མི་གསལ་ན་གཞན་ཡང་གསལ་མི་ནུས་པ་བཞིན་དུ་ཤེས་པ་ཁ་ནང་དུ་བལྟས་པའི་མྱོང་བ་རང་རིག་དང་ཕྱིར་བལྟས་པའི་མྱོང་བ་གཞན་རིག་གཉིས་སུ་འདོད་ལ། དེའང་ཤེལ་དག་པ་ལ་སྣང་བའི་ཚོན་གྱི་ཁ་དོག་ཤེལ་གྱི་ངོ་བོ་ཡིན་པ་ལྟར་རང་དང་ངོ་བོ་གཅིག་པའི་དོན་གྱི་རྣམ་པར་རིག་པས་རང་རིག་མཚན་ཉིད་པ་དང་དོན་རིག་བཏགས་པ་བར་འདོད་པ་དང༌། དུས་གསུམ་ཡང་རྫས་གྲུབ་ཏུ་མེད་པར་བློས་བཏགས་ཀྱི་དངོས་པོར་འདོད་པ་དང༌། སོགས་ཁོང་ནས། ལྷག་བཅས་དང་ལྷག་མེད་ཀྱི་མྱང་འདས་ཀུན་གཉེན་པོས་སྤང་བྱ་བཀག་པའི་མེད་དགག་ཅང་མེད་པར་འདོད་པ་དང༌། དགྲ་བཅོམ་པ་མཐོང་ཆོས་བདེར་གནས་ཀྱི་བསམ་གཏན་ཙམ་ལས་ཉམས་པར་འདོད་པས་ཉམས་པའི་ཆོས་ཅན་ཞེས་བྱ་ཡི་འབྲས་བུ་ལས་ཉམས་པར་མི་འདོད་པ་དང༌། འགོག་བདེན་གཟུགས་དང་ཚོར་བ་བཞིན་དུ་ངོ་བོ་དང་མིག་སོགས་བཞིན་དུ་ནུས་པ་ཚད་མས་མ་དམིགས་པའི་ཕྱིར་དང༌། མདོ་ལས་(༢༣༩བ)བྲལ་བ་དང་ཟད་པ་དང་ནུབ་པ་དང་འགག་པའི་སྒྲས་གསུངས་པས་དངོས་མེད་དུ་འདོད་པ་དང༌། གང་ཟག་གི་བདག་བཀག་ཙམ་གྱི་མེད་དགག་ལ་དེ་བཞིན་དུ་འཇོག་ཤེས་པ་སྟེ། གྲུབ་མཐའ་འདིའང་རྩ་བ་རྒྱལ་བའི་གསུང་རབ་མདོ་སྡེ་རྣམས་ལ་བརྟེན་ཅིང༌། བཙུན་པ་ཆེན་པོ་དགེ་འདུན་སྲུང་དང་དཔལ་ལེན་སོགས་ཀྱིས་བཞེད་པ་སྟེ། ཞིབ་པར་མཛོད་ཀྱི་རང་འགྲེལ་ལས་རྟོགས་པར་བྱའོ། ། ཐ༢ གཉིས་པ་སྡེ་པའི་སྒོ་ནས་དབྱེ་བ་ལ་གསུམ། ད༡ རྩ་བའི་སྡེ་པ་བཞི། ད༢ གྱེས་པ་བཅོ་བརྒྱད། ད༣ གཉིས་སུ་བསྡུ་བའོ། ། ད༡ དང་པོ་ནི། རྩ་བའི་སྡེ་པ་ཐམས་ཅད་ཡོད་པར་སྨྲ། ། ཕལ་ཆེར་གནས་བརྟན་མང་པོས་བཀུར་བ་བཞི། ། ཉན་ཐོས་སྡེ་པ་ལ་སློབ་དཔོན་སོ་སོའི་བཞེད་པས་གཅིག་དང་གཉིས་དང་གསུམ་དུ་བཤད་པ་སོགས་དབྱེ་བསྡུ་མང་ཡང་ཡོངས་གྲགས་སུ་རྩ་བའི་སྡེ་པ་བཞི་སྟེ། ཐམས་ཅད་ཡོད་པར་སྨྲ་བ། དགེ་འདུན་ཕལ་ཆེན་པ། གནས་བརྟན་པ། མང་པོས་བཀུར་བ་བཞིའོ། ། དེ་ལ་གཞི་ཐམས་ཅད་ཡོད་པར་སྨྲ་བ་ཞེས་བྱ་བ་ནི། སྡེ་པ་ཐམས་ཅད་ཀྱི་གཞི་ཡིན་པ་དང་ཤེས་བྱའི་གཞི་ལྔ་རྫས་ཡོད་དུ་སྨྲ་བས་དེ་ལྟར་གྲགས་ལ། སྡེ་པ་དེ་ནི་གསུང་རབ་སཾ་སྐྲྀ་ཏ་ལེགས་སྦྱར་གྱི་སྐད་དུ་འདོན། མཁན་པོ་རྒྱལ་རིགས་བསླབ་པ་ལ་གུས་པ་སྒྲ་གཅན་འཛིན་ལས་བརྒྱུད། སྣམ་སྦྱར་སྣམ་ཕྲན་དགུ་ཡན་ཉེར་ལྔ་མན་ལ་རྟགས་འཁོར་ལོ་དང་པདྨ། མིང་དཔལ་དང་བཟང་པོ་དང་སྙིང་པོ་གསུམ་གྱི་མཐའ་ཅན། གྲུབ་མཐའ་དུས་གསུམ་རྫས་སུ་ཡོད་པ་དང༌། འདུས་བྱས་ཐམས་ཅད་སྐད་ཅིག་མ་དང༌། གང་ཟག་གི་བདག་མེད་པ་དང༌། གྲངས་མེད་གསུམ་གྱིས་འཚང་རྒྱ་བ་སོགས་བཞེད་དོ། ། ཕལ་ཆེན་པ་ཞེས་པ་ནི། གྱེས་པའི་ཚེ་དགེ་འདུན་ཕལ་ཆེ་བ་ཕྱོགས་གཅིག་ཏུ་གནས་པས་ཡིན་ལ། སྡེ་པ་དེ་ནི་པྲ་ཀྲྀ་ཏ་རང་བཞིན་གྱི་སྐད། མཁན་པོ་བྲམ་ཟེའི་རིགས་སྦྱངས་ཡོན་ལ་གནས་པའི་མཆོག་འོད་སྲུང༌། སྣམ་(༢༤༠ན)ཕྲན་བདུན་ནས་ཉེར་གསུམ་མན་ལ་རྟགས་དཔལ་བེའུ། མིང་ཡེ་ཤེས་དང་སྦས་པའི་མཐའ་ཅན། གྲུབ་མཐའ་བདག་ཕུང་ཐ་དད་པ་དང༌། བདེན་པ་ཅིག་ཆར་མཐོང་བ་དང༌། ཆོས་མཆོག་ལས་ཀྱང་ཉམས་སྲིད་པ་དང༌། དབང་པོས་ཡུལ་མི་འཛིན་པ་སོགས་སུ་འདོད་དོ། ། གནས་བརྟན་པ་ཞེས་པ་ནི། གནས་བརྟན་འཕགས་པའི་རིགས་ཡིན་པར་སྨྲ་བས་དེར་གྲགས་ལ། སྡེ་པ་དེ་ནི་པི་ཤཱ་ཙི་ཤ་ཟའི་སྐད། མཁན་པོ་སྨྱིག་མ་མཁན་གྱི་རིགས་མཐའ་འཁོབ་འདུལ་བའི་མཆོག་ཀ་ཏྱཱ་ཡ་ན། སྣམ་ཕྲན་ལྔ་ནས་ཉེར་གཅིག་མན་ལ་རྟགས་དུང༌། མིང་འབྱུང་གནས་དང་གོ་ཆའི་མཐའ་ཅན། གྲུབ་མཐའ་སངས་རྒྱས་ལེགས་སྦྱར་མ་གསུངས་པ་དང༌། འགོག་སྙོམས་ལ་སེམས་ཡོད་པ་དང༌། ལོག་ཤེས་མེད་པ་དང༌། གྲངས་མེད་བཅུ་ཡན་དང་སུམ་ཅུ་མན་གང་རུང་གིས་འཚང་རྒྱ་བ་སོགས་འདོད་དོ། ། མང་བཀུར་བ་ཞེས་པ་ནི། སློབ་དཔོན་སྐྱེ་བོ་མང་པོས་བཀུར་སྟི་བྱས་པའི་རིགས་འཛིན་པས་ཡིན་ལ། སྡེ་པ་དེ་ནི་ཨ་བ་བྷྲཾ་ཤ་ཟུར་ཆགས་གི་སྐད། མཁན་པོ་འདྲེག་མཁན་གྱི་རིགས་འདུལ་བ་འཛིན་པའི་མཆོག་ཉེ་བར་འཁོར། སྣམ་སྦྱར་གནས་བརྟན་པ་དང་མཐུན། མིང་འབངས་དང་སྡེའི་མཐའ་ཅན། གྲུབ་མཐའ་བརྗོད་དུ་མེད་པའི་བདག་ཡོད་པ་དང༌། ཤེས་བྱ་ཐམས་ཅད་བརྗོད་དུ་ཡོད་མེད་གཉིས་སུ་སྡུད་པ་དང༌། འདུས་བྱས་རྒྱུན་བརྟན་པ་རྣམས་འཇིག་བྱེད་དོན་གཞན་གྱིས་འཇིག་པ་དང༌། མཐོང་ལམ་སྐད་ཅིག་བཅུ་གཉིས་མན་ཡིན་པ་སོགས་ལ་འདོད་དོ། ། དེ་དག་རྣམས་སོ་ཐར་གྱི་མདོ་བཀླག་ཚུལ་དང༌། བཅས་ལྟུང་གི་རྣམ་གཞག་ཀྱང་མི་འདྲ་བ་ཡོད་ཅིང༌། རྩ་བའི་གཞི་ཕལ་ཆེན་སྡེ་པ་ཡིན་པར་བཤད་པའང་ཡོད་ཅིང༌། མིང་བརྗེ་བའང་ད་ལྟ་ལ་ཡིན་གྱི་སྔོན་ཆོག་ལ་མེད་དོ། །གོས་དང་མཚན་གྱི་དབྱེ་བ་སོགས་ཇོ་བོ་རྗེའི་གསུང་(༢༤༠བ)སྒྲོས་ལས་བྱུང་བར་བཤད་དོ། ། དགྱེས་རྡོར་བརྟག་པ་ཕྱི་མའི་ལེའུ་བཞི་པར་འཁོར་ལོ་བཞི་དང་སྡེ་པ་བཞི་སྦྱར་བ་དང༌། དུས་ཀྱི་འཁོར་ལོའི་ཞལ་བཞི་ནས་སྡེ་པ་བཞི་གསུངས་པར་བཤད་པས་ཀྱང་། རྩ་བའི་སྡེ་པ་བཞིར་འདོད་པའི་ཕྱོགས་འདི་ཁུངས་ཆེ་བ་ཡིན་ནོ། ། ད༢ གཉིས་པ་[གྱེས་པ་བཅོ་བརྒྱད་]ནི། ལྔ་བདུན་གསུམ་གསུམ་གྱེས་པ་བཅོ་བརྒྱད་དེ། ། རྩ་བའི་སྡེ་པ་བཞི་ལས་གྱེས་པ་བཅོ་བརྒྱད་བྱུང་བའི་ཚུལ་ནི། སློབ་དཔོན་དུལ་བའི་ལྷས་མཛད་པའི་སྡེ་པ་ཐ་དད་བཀླགས་པའི་འཁོར་ལོ་ལས། ཤར་དང་ནུབ་དང་གངས་རིར་གནས། ། འཇིག་རྟེན་འདས་པར་སྨྲ་བའི་སྡེ། ། བཏགས་པར་སྨྲ་བའི་སྡེ་པ་དང༌། ། ལྔ་ཚན་དགེ་འདུན་ཕལ་ཆེན་པ། ། གཞི་ཀུན་བ་དང་འོད་སྲུང་སྡེ། ། ས་སྟོན་སྡེ་དང་ཆོས་སྲུང་སྡེ། ། མང་ཐོས་གོས་དམར་སློབ་མ་དང༌། ། རྣམ་པར་ཕྱེ་སྟེ་སྨྲ་བའི་སྡེ། ། ཐམས་ཅད་ཡོད་པར་སྨྲ་བ་ཡིན། ། རྒྱལ་བྱེད་ཚལ་གནས་འཇིགས་མེད་གནས། ། གཙུག་ལག་ཁང་ཆེན་གནས་བརྟན་པ། ། ས་སྒྲོགས་རི་དང་སྲུང་བ་པ། ། གནས་མ་བུ་ཡི་སྡེ་རྣམས་ནི། ། ཀུན་གྱིས་བཀུར་བ་རྣམ་པ་གསུམ། ། ཡུལ་དོན་སློབ་དཔོན་བྱེ་བྲག་གིས། ། ཐ་དད་རྣམ་པ་བཅོ་བརྒྱད་གསུངས། ། ཞེས་དགེ་འདུན་ཕལ་ཆེན་པ་ལྔ། ཐམས་ཅད་ཡོད་སྨྲ་བདུན། གནས་བརྟན་པ་གསུམ། མང་བཀུར་བ་གསུམ་སྟེ་བཅོ་བརྒྱད་དུ་བཤད་པ་རྣམས་སོ། ། དེའང་། བཞུགས་གནས་ཡུལ་དང༌། གྲུབ་མཐའི་དོན་འདོད་ཚུལ་དང༌། སྲོལ་འབྱེད་སློབ་དཔོན་ཐ་དད་པའི་རྗེས་འབྲངས་སུ་གྱུར་པས་མི་འདྲ་བ་འབའ་ཞིག་བྱུང་ཡང༌། ཐམས་ཅད་རྣམ་པར་གྲོལ་བའི་ལམ་ལ་ཁྱད་པར་མེད་པ་ནི། རྒྱལ་པོ་ཀྲྀ་ཀྲཱིའིརྨི་ལམ་ལུང་བསྟན་གྱི་མདོ་ལས། རྒྱལ་པོ་ཆེན་པོ་ཁྱོད་ཀྱི་རྨི་ལམ་དུ་མི་བཅོ་བརྒྱད་ཀྱིས་རས་ཡུག་གཅིག་བགོས་ཀྱང་རས་སྔ་མ་མ་ཉམས་པར་མི་རེ་རེས་ཐོབ་པར་མཐོང་བ་གང་ཡིན་པ་དེ་ནི་ཤཱཀྱ་ཐུབ་པའི་(༢༤༡ན)བསྟན་པ་རྣམ་པ་བཅོ་བརྒྱད་དུ་གྱེས་པར་འགྱུར་ཡང༌། རྣམ་པར་གྲོལ་བའི་རས་ཡུག་ནི་ཉམས་པར་མི་འགྱུར་བ་དེའི་སྔ་ལྟས་ཡིན་ནོ། །ཞེས་གསུངས་པས། དེ་དག་ལ་བཟང་ངན་ཁྱད་པར་མེད་པ་ཤེས་དགོས་སོ། ། ད༣ གསུམ་པ་[གཉིས་སུ་བསྡུ་བ་]ལ། ན༡ གཉིས་སུ་བསྡུ་བ་དངོས་དང༌། ན༢ ཞར་བྱུང་རྣམ་པར་བརྟགས་པའོ། ། ན༡ དང་པོ་ནི། བདག་ཏུ་སྨྲ་དང་བདག་མེད་སྨྲ་རུ་འདུས། ། སྡེ་པ་བཅོ་བརྒྱད་ཀྱང་བསྡུ་ན། བདག་སྨྲ་དང་། བདག་མེད་སྨྲ་བ་གཉིས་སུ་འདུ་སྟེ། མང་བཀུར་ནང་ཚན་གནས་མ་བུ་པ་སོགས་སྡེ་པ་ལྔ་ཡིས་བརྗོད་དུ་མེད་པའི་བདག་འདོད་ཅིང༌། དེ་ཡང་གང་ཟག་སྟེ་ཕུང་པོ་དང་གཅིག་ཐ་དད། རྟག་མི་རྟག་སོགས་སུ་བརྗོད་དུ་མེད་ཀྱང་རང་རྐྱ་ཐུབ་པའི་རྫས་ཡོད་དུ་འདོད་ལ། བྱེ་སྨྲའི་ནང་ཚན་སྡེ་པ་གཞན་ཀུན་དང་མདོ་སྡེ་པའང་བདག་མེད་འདོད་པས་སོ། ། དེའང་རྟོག་གེ་འབར་བ་ལས། དེ་རྣམས་ལས་སྔར་བསྟན་པའི་དགེ་འདུན་ཕལ་ཆེན་པ་ལ་སོགས་པ་བརྒྱད་དང༌། ཕྱིས་བསྟན་པའི་གནས་བརྟན་པ་དང༌། ཐམས་ཅད་ཡོད་པར་སྨྲ་བ་དང༌། མང་སྟོན་པ་དང༌། ཆོས་མཆོག་པ་དང༌། འོད་སྲུངས་པ་རྣམས་ནི་བདག་མེད་པར་སྨྲ་བ་ཡིན་ཏེ། མུ་སྟེགས་པའི་འདོད་པས་བཏགས་པའི་བདག་དང་བདག་གིས་ནི་སྟོང་པ་ཡིན་པ་དང༌། ཆོས་ཐམས་ཅད་ནི་བདག་མེད་པར་སྨྲ་བ་ཡིན་ནོ། །ལྷག་མ་གནས་མ་བུ་པ་ལ་སོགས་པ་སྡེ་པ་ལྔ་ནི་གང་ཟག་ཏུ་སྨྲ་བ་ཡིན་ཏེ། གང་ཟག་ནི་ཕུང་པོ་དག་ལས་དེ་ཉིད་དང་གཞན་དུ་བརྗོད་དུ་མེད་པར་རྣམ་པར་ཤེས་པར་བྱ་བ། འཁོར་བར་འགྱུར་བ་ཡོངས་སུ་གསལ་བར་བྱ་བ་ཡིན་ནོ་ཞེས་ཟེར་རོ། །ཞེས་གསུངས་སོ། ། ན༢ གཉིས་པ་[ཞར་བྱུང་རྣམ་པར་བརྟགས་པ་]ནི། ཐེག་ཆེན་འགོག་དང་བདེན་གྲུབ་འདོད་སོགས་སྐྱོན། ། གཞན་རྣམས་མ་ནོར་རང་སའི་ལུགས་ཡིན་ནོ། ། ཉན་ཐོས་སྡེ་པ་འདི་དག་གིས་ཐེག་པ་ཆེན་པོ་འགོག་པ་ནི་ཟབ་(༢༤༡བ)རྒྱས་བློར་མ་ཤོང་བར་རྟོག་གེ་ཉིད་ཀྱི་ཤེས་རབ་དང་མོས་པ་དང་བསོད་ནམས་ཞན་པའི་དབང་གིས་ཡིན་པར་གསུངས་པ་ལྟར། དོན་དམ་བདེན་པ་རྫས་གྲུབ་ཏུ་འདོད་པ་ལ་སོགས་པའང་གསུངས་རབ་ཀྱི་དགོངས་པ་མ་རྟོགས་པའི་སྐྱོན་དང་བཅས་པ་ཡིན་པས། མདོ་སྡེ་རྒྱན་སོགས་ལས་ཐེག་ཆེན་བཀའ་སྒྲུབ་རྒྱས་པར་གསུངས་ཤིང༌། བྱེ་སྨྲའི་རྫས་ཡོད་མདོ་སྡེ་པས་བཀག་ལ། དེའི་བཏགས་ཡོད་སེམས་ཙམ་པས་ལུང་རིགས་མང་པོས་བཀག་པ་དང༌། ཁྱད་པར་བརྗོད་མེད་ཀྱི་བདག་ནི་ལྟ་བ་ཆེས་དམན་