Tibetan
པས་དུས་འཁོར་རྩ་འགྲེལ། དབུ་མ་འཇུག་པ་སོགས་ལས་ཀྱང་ལེགས་པར་བཀག་པ་ཡིན་ལ། གཞི་ལམ་འབྲས་བུའི་རྣམ་གཞག་སྤྱི་རྣམས་ནི་གོང་མ་དང་མི་མཐུན་པ་ལྟར་སྣང་ཡང་མ་ནོར་བ་ཉན་ཐོས་རང་སའི་ལུགས་ཡིན་པས་ཡོན་ཏན་དང་ལྡན་པའོ། ། ཐ༣ གསུམ་པ་འབྲས་བུའི་སྒོ་ནས་དབྱེ་བ་ལ་གཉིས། ད༡ མདོར་བསྟན། ད༢ རྒྱས་བཤད་དོ། ། ད༡ དང་པོ་ནི། རྣམ་པ་བཅུ་དྲུག་བསྒོམས་པས་ལམ་ལྔ་པོ། ། བྱང་ཕྱོགས་ཀྱིས་བགྲོད་འབྲས་བུ་རྣམ་བཞི་འཐོབ། ། སངས་རྒྱས་འཇིག་རྟེན་དུ་བྱོན་ཅིང་ཆོས་གསུངས་པའི་བསྟན་པ་ལ་གནས་ཤིང་བསྒྲུབ་པའི་ཕྱིར། ཐོག་མར་སོ་ཐར་རིས་བདུན་ནམ་བརྒྱད་ཀྱི་ཚུལ་ཁྲིམས་ལ་གནས་པས་མཚན་ཉིད་དང་ལྡན་པའི་བཤེས་གཉེན་ལས་ཉན་ཐོས་དང་རྗེས་སུ་མཐུན་པའི་གསུང་རབ་ཡན་ལག་དགུ་སྡེ་སྣོད་གསུམ་གྱིས་བསྡུས་པ་དབང་པོའི་རིམ་པ་དང་འཚམས་པར་ཐོས་ཤིང༌། ཐོས་ནས་བསམ། བསམ་དོན་བདེན་བཞི་མི་རྟག་པ་སོགས་རྣམ་པ་བཅུ་དྲུག་བསྒོམས་པས། ཉན་ཐོས་ཀྱི་ཚོགས་སྦྱོར་སོགས་ལམ་ལྔ་བྱང་ཕྱོགས་སོ་བདུན་གྱིས་རིམ་པར་བགྲོད་དེ། འབྲས་བུ་ནི། རྒྱུན་ཞུགས། ལན་ཅིག་ཕྱིར་འོང༌། ཕྱིར་མི་འོང༌། དགྲ་བཅོམ་པ་སྟེ། རྣམ་པ་བཞི་ཐོབ་པའོ། ། ད༢ གཉིས་པ་ལ་གཉིས། ན༡ རིམ་གྱིས་པ་ཞིབ་པར་བཤད། (༢༤༢ན) ན༢ ཐོད་རྒལ་དང་ཅིག་ཅར་བ་འཕྲོས་དོན་དུ་བཤད་པའོ། ། ན༡ དང་པོ་ལ་བཞི། པ༡ རྒྱུན་ཞུགས། པ༢ ཕྱིར་འོང༌། པ༣ ཕྱིར་མི་འོང༌། པ༤ དགྲ་བཅོམ་པའོ། ། པ༡ དེའི་དང་པོ་ལ་གཉིས། ཕ༡ རྒྱུན་ཞུགས་ཞུགས་པ་དང༌། ཕ༢ འབྲས་གནས་སོ། ། ཕ༡ དང་པོ་ནི། རྒྱུན་ཞུགས་ཞུགས་པ་འདོད་ཉོན་ཡེ་མ་སྤངས། ། བཞི་ལྔ་སྤང་སྲིད་དྲུག་པ་སྤང་མི་སྲིད། ། སྐད་ཅིག་བཅོ་ལྔ་གང་ཡང་རུང་ལ་གནས། ། དད་དང་ཆོས་རྗེས་འབྲང་གཉིས། ཞེས་པ་སྟེ། ཉན་ཐོས་རྒྱུན་ཞུགས་ཀྱི་འབྲས་བུ་ལ་ཞུགས་པ་དེའི་སྤངས་པའི་ཁྱད་པར་ནི། འདོད་ཉོན་གཏན་མ་སྤངས་པ་ནས་བཞི་པ་ལྔ་པའི་བར་སྤངས་པའང་སྲིད། དྲུག་པ་གཏན་མ་སྤངས་པ་སྟེ་འདིའི་འབྲས་ཞུགས་ཀྱིས་དྲུག་པ་སྤངས་མི་སྲིད་པའོ། ། རྟོགས་པའི་ཁྱད་པར་ནི། མཐོང་ལམ་ལ་སྡུག་བསྔལ་ཆོས་བཟོད། ཆོས་ཤེས། རྗེས་བཟོད། རྗེས་ཤེས་ནས། ཀུན་འབྱུང་དང༌། འགོག་པ་དང༌། ལམ་ལའང་ཆོས་བཟོད། ཆོས་ཤེས། རྗེས་བཟོད། རྗེས་ཤེས་ཀྱི་བར་རེ་རེ་བཞིན་སྦྱར་བའི་སྐད་ཅིག་མ་བཅུ་དྲུག་ལས། སྐད་ཅིག་དང་པོ་བཅོ་ལྔ་གང་རུང་ལ་གནས་པ་དབང་རྟུལ་དད་པའི་རྗེས་འབྲང་དང༌། དབང་རྣོན་ཆོས་ཀྱི་རྗེས་འབྲང་གཉིས་སོ། ། ཕ༢ གཉིས་པ་[འབྲས་གནས་]ནི། འབྲས་གནས་པ། ། སྐད་ཅིག་བཅུ་དྲུག་པ་ལ་རྟོགས་པ་ཐོབ། ། དབང་པོ་རྟུལ་རྣོ་སྐྱེ་བ་བདུན་དང་གཉིས། ། རྒྱུན་ཞུགས་འབྲས་གནས་ཀྱི་སྤངས་པའི་ཁྱད་པར་སྔ་མ་དང་འདྲ། རྟོགས་པའི་ཁྱད་པར་སྐད་ཅིག་མ་བཅུ་དྲུག་པ་ལམ་གྱི་རྗེས་ཤེས་ལ་རྟོགས་པ་ཐོབ་པའོ། ། འདི་ལ་དབྱེ་ན། དབང་པོ་རྟུལ་རྣོ། སྐྱེ་བ་ལེན་ཚུལ་གྱིས་བཞིར་འགྱུར་ཏེ། དང་པོ་ནི། ཞུགས་པའི་སྐབས་ཀྱི་དབང་རྟུལ་གནས་གྱུར་པ་དད་པས་མོས་པ་དང༌། དབང་རྣོན་གནས་གྱུར་པ་མཐོང་བས་ཐོབ་པ་གཉིས་སོ། ། གཉིས་པ་སྐྱེ་བ་ལེན་ཚུལ་ནི། སྲིད་པ་ལན་བདུན་པ་དང༌། རིགས་ནས་རིགས་སུ་(༢༤༢བ)སྐྱེ་བ་ཞེས་སྐྱེ་བ་གཉིས་ལེན་པ་གཉིས་ཡོད་པ་ལས། དང་པོ་ནི། རྒྱུན་ཞུགས་འབྲས་གནས་ཡིན་པ་གཞིར་བཞག་ནས། འདོད་ཉོན་གཏན་མ་སྤངས་པ་དེ་ལྷའི་རྟེན་ལ་ཐོབ་ན་ལྷའི་སྐྱེ་བ་བདུན། མིའི་བདུན། དེ་གཉིས་ཀྱི་བར་སྲིད་བདུན་བདུན་ཏེ་ཉི་ཤུ་རྩ་བརྒྱད་དང༌། མིའི་རྟེན་ལ་ཐོབ་ནའང་མིའི་ལན་བདུན། ལྷའི་བདུན། བར་སྲིད་བདུན་བདུན་ཏེ་ཉེར་བརྒྱད་ལས་ལན་ཅིག་ཕྱིར་འོང་གི་ཞུགས་པར་འགྲོ། འདི་ལ་སྲིད་པ་ལན་བདུན་པ་ཞེས་ཟེར་བ་ནི་བདུན་ཚན་དུ་ཆོས་མཚུངས་པའི་ཕྱིར་ཏེ། དཔེར་ན་གནས་བདུན་ལ་མཁས་པ་དང་ཤིང་ལོ་མ་བདུན་པ་བཞིན་ནོ། །འདི་ལ་བཞེད་ཚུལ་གཞན་ཡང་ཡོད་དོ། ། གཉིས་པ་རིགས་ནས་རིགས་སུ་སྐྱེ་བ་ནི། རྒྱུན་ཞུགས་འབྲས་གནས་ཡིན་པ་གཞིར་བྱས་ནས། འདོན་ཉོན་གསུམ་པ་དང་བཞི་པ་སྤངས་པའང་སྲིད། ལྔ་པ་གཏན་མ་སྤངས་པ་དེ་ལྷ་མིའི་རྟེན་གང་ལ་ཐོབ་པ་དེའི་སྐྱེ་བ་རིགས་མཐུན་གཉིས་ལེན་ནོ། ། པ༢ གཉིས་པ་ལན་གཅིག་ཕྱིར་འོང་བ་ལ་གཉིས་ཏེ། ཕ༡ ཕྱིར་འོང་ཞུགས་པ་དང༌། ཕ༢ འབྲས་གནས་སོ། ། ཕ༡ དང་པོ་ནི། དེ་ཡིས་བསྒོམས་པས་ཕྱིར་འོང་ཞུགས་པར་འགྱུར། ། དྲུག་པ་སྤངས་ཤིང༌། ཞེས་པ་སྟེ། རྒྱུན་ཞུགས་འབྲས་གནས་དེས་ལན་ཅིག་ཕྱིར་འོང་གི་འབྲས་བུ་ཐོབ་པའི་ཕྱིར་དུ་དེའི་ལམ་སྒོམ་པ་ལ་བརྩོན་པར་བྱས་པ་ན་ཕྱིར་འོང་ཞུགས་པར་འགྱུར་ལ། དེས་ཉོན་མོངས་དྲུག་པ་ནམ་སྤངས་པའི་ཚེ་འབྲས་གནས་སུ་འགྲོའོ། ། ཕ༢ གཉིས་པ་[འབྲས་གནས་]ནི། དགུ་པ་གཏན་མ་སྤངས། ། འབྲས་གནས་བར་ཆད་གཅིག་པ་ཕྱིར་འོང་ངེས། ། འབྲས་གནས་དེའི་ནང་ཚན་ཚེ་གཅིག་བར་ཆད་པ་ཞེས་བྱ་བ་ཡོད་དེ། དེ་ལ། སྤངས། རྟོགས་གཉིས་ལས། སྤངས་པ་ལ། འདོད་ཉོན་བདུན་པ་དང་བརྒྱད་པ་སྤངས་སྲིད། དགུ་པ་གཏན་མ་སྤངས་པའོ། ། རྟོགས་པ་ནི། སྔར་བཞིན་ནོ། ། ལན་(༢༤༣ན)ཅིག་ཕྱིར་འོང་ཞེས་པ་འདོད་པར་ལན་ཅིག་ཕྱིར་འོང་བའི་རིགས་ཅན་ཡིན་ཀྱང་ཕྱིར་མི་འོང་གི་ལམ་ལ་བརྩོན་ན་དེར་འགྲོ་ལ། ནང་ཚན་ཚེ་གཅིག་བར་ཆད་གཅིག་པ་ཡིན་ན་ངེས་པར་ཕྱིར་འོང་ངོ༌། ། པ༣ གསུམ་པ་ཕྱིར་མི་འོང་ལ་གཉིས་ཏེ། ཕ༡ ཕྱིར་མི་འོང་ཞུགས་པ་དང༌། ཕ༢ འབྲས་གནས་སོ། ། ཕ༡ དང་པོ་ནི། འབྲེལ་ཆགས་བརྩོན་པས་ཕྱིར་མི་འོང་ལ་ཞུགས། ། ལན་ཅིག་ཕྱིར་འོང་འབྲས་གནས་དེས་ཕྱིར་མི་འོང་གི་འབྲས་བུ་ཐོབ་པར་བྱ་བའི་ཕྱིར་དེའི་ལམ་ལ་འབྲེལ་ཆགས་སུ་བརྩོན་པར་བྱས་པས་ཕྱིར་མི་འོང་ཞུགས་པར་འགྱུར་བ་ཡིན་ནོ། ། ཕ༢ གཉིས་པ་[འབྲས་གནས་]ནི། དགུ་པ་སྤངས་པས་འབྲས་གནས་གཟུགས་སུ་འགྲོ། ། བར་དོ་སྐྱེས་ནས་འདའ་དང་གོང་དུ་འཕོ། ། གཟུགས་མེད་ཉེར་འགྲོ་མཐོང་ཞི་ལུས་མངོན་བྱེད། ། ཕྱིར་མི་འོང་ཞུགས་པ་དེས་འདོད་ཉོན་དགུ་པ་ནམ་སྤངས་པའི་ཚེ་དེའི་འབྲས་གནས་སུ་འགྱུར་ཞིང༌། དེ་ལ་བཞི། གཟུགས་སུ་ཉེར་འགྲོ། གཟུགས་མེད་ཉེར་འགྲོ། མཐོང་ཆོས་ལ་ཞི། ལུས་མངོན་བྱེད་དོ། ། དང་པོ་ལ་གསུམ་སྟེ། བར་དོར་འདའ་བ། སྐྱེས་ནས་འདའ་བ། གོང་དུ་འཕོ་བའོ། ། དང་པོ་ནི། ཕྱིར་མི་འོང་འབྲས་གནས་ཡིན་པ་གཞིར་བྱས་ནས། ཚངས་ཆེན་མ་གཏོགས་པའི་གཟུགས་ཁམས་བཅུ་དྲུག་གང་ཡང་རུང་བའི་རྟེན་གྱི་བར་དོ་ལ་མྱ་ངན་འདའ་བའི་རིགས་ཅན་ནོ། ། གཉིས་པ་ལའང་གསུམ། སྐྱེས་ནས་འདའ་བ། འདུ་བྱེད་བཅས་པ། འདུ་བྱེད་མེད་པའོ། ། དང་པོ་ནི། ཚངས་ཆེན་མ་གཏོགས་པ་གཟུགས་ཁམས་བཅུ་དྲུག་གང་རུང་གི་རྟེན་ལ་སྐྱེས་པ་ཙམ་གྱིས་མྱ་ངན་ལས་འདའ་བའི་རིགས་ཅན་ནོ། ། གཉིས་པ་ནི། རྟེན་དེ་རྣམས་སུ་སྐྱེས་ནས་ལམ་ལ་འབད་རྩོལ་དང་བཅས་ཏེ་འདའ་བའི་རིགས་ཅན་ནོ། ། གསུམ་པ་ནི། དེར་སྐྱེས་ནས་ལམ་ལ་ཞུགས་པ་ཙམ་ལས་འབད་རྩོལ་མེད་པར་འདའ་བའི་རིགས་ཅན་ནོ། (༢༤༣བ)གསུམ་པ་གོང་དུ་འཕོ་བ་ལ་གཉིས་ཏེ། འོག་མིན་དུ་འཕོ་བ་དང༌། སྲིད་རྩེར་འཕོ་བའོ། ། དང་པོ་ལ་གསུམ་སྟེ། འཕར་བ། ཕྱེད་འཕར། ཀུན་འཕོའོ། ། དང་པོ་ནི། ཕྱིར་མི་འོང་འབྲས་གནས་དེ་སྐྱེ་བ་ཕྱི་མ་ཚངས་རིས་སུ་སྐྱེས། དེ་ལས་འོག་མིན་གྱི་རྟེན་དུ་འཕར་ཏེ་མྱ་ངན་ལས་འདའ་བའི་རིགས་ཅན་ནོ། ། གཉིས་པ་ནི། དེ་ལྟ་བུ་དེ་སྐྱེ་བ་ཕྱི་མ་ལ་ཚངས་རིས། དེ་ལས་གཙང་གནས་བཞི་གང་རུང༌། དེ་ལས་འོག་མིན་དུ་སྐྱེས་ནས་མྱ་ངན་ལས་འདའ་བའི་རིགས་ཅན་ནོ། ། གསུམ་པ་ནི། དེ་ལྟ་བུ་དེ་སྐྱེ་བ་ཕྱི་མ་ཚངས་ཆེན་མ་གཏོགས་པའི་གཟུགས་ཁམས་བཅུ་དྲུག་གི་གནས་ཐམས་ཅད་དུ་རིམ་གྱིས་སྐྱེས་ཤིང་ཤི་འཕོས་ནས། མཐར་འོག་མིན་གྱི་རྟེན་ལ་མྱ་ངན་ལས་འདའ་བའི་རིགས་ཅན་ནོ། ། གཉིས་པ་སྲིད་རྩེར་འཕོ་ནི། དེ་ལྟ་བུ་དེ་སྐྱེ་བ་ཕྱི་མ་ཚངས་རིས་སུ་སྐྱེས། དེ་ལས་སྲིད་པའི་རྩེ་མོའི་རྟེན་དུ་འཕོས་ཏེ་མྱ་ངན་ལས་འདའ་བའི་རིགས་ཅན་ནོ། ། གཉིས་གཟུགས་མེད་ཉེར་འགྲོ་ནི། དེ་ལྟ་བུ་དེ་སྐྱེ་བ་ཕྱི་མར་གཟུགས་མེད་དང་པོ་གསུམ་གང་རུང་དུ་སྐྱེས་ནས། མཐར་སྲིད་རྩེའི་རྟེན་ལ་མྱ་ངན་ལས་འདའ་བའི་རིགས་ཅན་ནོ། ། འདི་ལའང༌། གཟུགས་མེད་གང་དུ་ཤི་བ་དེ་ནའོ། །ཞེས་པས་བར་དོར་འདའ་བའི་རིགས་ཅན་མི་འབྱུང་ཡང་སྐྱེས་ནས་འདའ་བ་གསུམ་དང་འཕར་གསུམ་སོགས་སྔར་བཞིན་འབྱུང་ངོ༌། ། གསུམ་པ་མཐོང་ཆོས་ལ་ཞི་ནི། ཕྱིར་མི་འོང་འབྲས་གནས་ཐོབ་པའི་རྟེན་དེ་ཉིད་ལ་མྱ་ངན་ལས་འདའ་བའི་རིགས་ཅན་ནོ། ། བཞི་པ་ལུས་མངོན་བྱེད་ནི། འགོག་སྙོམས་མངོན་དུ་བྱས་ནས་མྱ་ངན་ལས་འདའ་བའི་རིགས་ཅན་ནོ། ། པ༤ བཞི་པ་དགྲ་བཅོམ་པ་ལ་གཉིས་ཏེ། ཕ༡ དགྲ་བཅོམ་ཞུགས་པ་དང༌། ཕ༢ དགྲ་བཅོམ་འབྲས་གནས་སོ། ། ཕ༡ དང་པོ་ནི། སྲིད་ཉོན་དགུ་པ་སྤང་ཕྱིར་དགྲ་བཅོམ་ཞུགས། ། ཕྱིར་མི་འོང་འབྲས་གནས་དེ་སྲིད་ཉོན་དགུ་པ་སྤོང་བའི་ཕྱིར་(༢༤༤ན)དུ་ཞུགས་པ་ནི་དགྲ་བཅོམ་ཞུགས་པ་ཞེས་བྱའོ། ། ཕ༢ གཉིས་པ་[དགྲ་བཅོམ་འབྲས་གནས་]ནི། དེ་སྤངས་ཁམས་གསུམ་འཆིངས་གྲོལ་འབྲས་གནས་ལ། ། གཉིས་ཀ་ཤེས་རབ་ཆ་ལས་རྣམ་པར་གྲོལ། ། རྫུ་འཕྲུལ་མངོན་ཤེས་རྒྱན་ཅན་རྒྱན་མེད་དང༌། ། ཉེར་ལེན་ཕུང་པོའི་ལྷག་བཅས་ལྷག་མེད་དབྱེ། ། སྲིད་ཉོན་དགུ་པ་དེ་ནམ་སྤངས་ན་ཁམས་གསུམ་གྱི་ཀུན་སྦྱོར་འཆིང་བ་ལས་གྲོལ་ཏེ་དགྲ་བཅོམ་འབྲས་གནས་སུ་འགྲོ་བ་ཡིན་ཏེ། དེ་ལ་དབྱེ་ན་གསུམ། སྤངས་པའི་སྒོ་ནས་དབྱེ་ན། གཉིས་ཀའི་ཆ་ལས་རྣམ་གྲོལ་དང་། ཤེས་རབ་ཀྱིས་རྣམ་གྲོལ་གཉིས་ཀྱི། སྔ་མ་ནི། ཉོན་སྒྲིབ་དང་སྙོམས་འཇུག་གི་སྒྲིབ་པ་གཉིས་ཀ་ལས་རྣམ་པར་གྲོལ་བ་དང༌། ཕྱི་མ་ནི། ཉོན་སྒྲིབ་འབའ་ཞིག་ལས་རྣམ་པར་གྲོལ་བའོ། ། ཡོན་ཏན་གྱི་སྒོ་ནས་རྣམ་པར་དབྱེ་ན། རང་སའི་ཟག་བཅས་ཀྱི་རྫུ་འཕྲུལ་གྱི་མངོན་ཤེས་སོགས་དང་ལྡན་པ་རྒྱན་ཅན་དང༌། མི་ལྡན་པ་རྒྱན་མེད་གཉིས་དང༌། རྣམ་གྲོལ་གྱི་སྒོ་ནས་དབྱེ་ན། སྡུག་བསྔལ་ཉེར་ལེན་གྱི་ཕུང་པོའི་ལྷག་མ་དང་བཅས་པ་དང༌། དེ་ཉིད་ཟད་ཅིང་མཐར་ཕྱིན་པས་ལྷག་མེད་དགྲ་བཅོམ་ཞེས་དབྱེའོ། ། ན༢ གཉིས་པ་ཐོད་རྒལ་དང་ཅིག་ཅར་བ་འཕྲོས་དོན་དུ་སྨོས་པ་ནི། སྐྱེས་བུ་ཟུང་བཞི་གང་ཟག་ཡ་བརྒྱད་དེ། ། ཐོག་མཐར་ཅིག་ཆར་བར་གཉིས་ཐོད་རྒལ་ཡོད། ། དེ་ལྟར་སྤྱིར་འབྲས་བུ་བཞི་པོ་ལ། སྐྱེས་བུ་ཟུང་བཞི་དང༌བྱེ་བྲག་ནང་གསེས་སུ་ཞུགས་འབྲས་གཉིས་རེར་དབྱེ་བས། གང་ཟག་ཡ་བརྒྱད་དུ་གྲགས་པ་སྟེ། དེ་དག་གི་ཐོག་མཐའ་གཉིས་ལ་ཅིག་ཆར་བ་དང༌། བར་པ་གཉིས་ལ་ཐོད་རྒལ་བའི་བཞག་མཚམས་ཡོད་ཅིང༌། སྤང་བྱ་ཅིག་ཅར་བ་ནི་ཉན་ཐོས་དང་ཐུན་མོང་བ་ལ་མེད་ཀྱི། ཐེག་ཆེན་ཐུན་མོང་མིན་པའི་ཆོས་མངོན་པ་ལས་གསུངས་སོ། ། ཉ༣ གཉིས་པ་རང་སངས་རྒྱས་ཀྱི་ཐེག་པ་ལ་གཉིས་ཏེ། ཏ༡ ཉན་རང་གི་ཁྱད་པར་(༢༤༤བ)དང༌། ཏ༢ རང་རྒྱལ་གྱི་རྣམ་གཞག་གོ། ། ཏ༡ དང་པོ་ནི། རང་རྒྱལ་མྱུར་བ་སྲིད་པ་གསུམ་གྱིས་ཐར། ། བསེ་རུ་བསྐལ་བརྒྱས་ཆེ་ཆུང་ཟབ་པར་སྐྱེ། ། ཉན་རང་གཉིས་ཐེག་དམན་ཙམ་དུ་མཚུངས་ཀྱང༌། རྒྱུ་དང་འབྲས་བུའི་སྒོ་ནས་ཁྱད་པར་ཆེ་སྟེ། རྒྱུ་ནི། མཛོད་ལས། མྱུར་བ་སྲིད་པ་གསུམ་གྱིས་ཐར། ། བསེ་རུ་བསྐལ་པ་བརྒྱ་ཡི་རྒྱུས། ། ཞེས་པ་ལྟར་རོ། ། འབྲས་བུ་ལ་རིགས་ཀྱི་ཁྱད་པར་ནི། རང་རྒྱལ་གྱི་རིགས་ཅན་ང་རྒྱལ་ཆེ་བས་སངས་རྒྱས་དང་ཉན་ཐོས་ཀྱིས་སྟོང་པའི་འཇིག་རྟེན་དུ་སློབ་དཔོན་དང་འགྲན་ཟླ་མེད་པར་རང་གཅིག་པུ་བྱང་ཆུབ་མངོན་དུ་བྱེད་འདོད་པ་དང༌། ཉོན་མོངས་པ་རང་བཞིན་གྱིས་ཤས་ཆུང་བས་འདུ་འཛི་ལ་མི་དགའ་བར་དབེན་པ་དོན་དུ་གཉེར་བ། སྙིང་རྗེ་ཤས་ཆུང་བས་གཞན་དོན་ལ་མི་སྤྲོ་བ་སེམས་ལས་ཆུང་ངུར་གནས་པ། ཉན་ཐོས་ལས་ཤེས་རབ་ཟབ་པས་གཞན་གྱིས་བསྟན་མ་དགོས་པར་རང་གིས་ཤེས་ནས་བྱང་ཆུབ་མངོན་དུ་བྱེད་པའོ། ། ལམ་གྱི་ཁྱད་པར་བདེན་བཞི་མི་རྟག་པ་སོགས་བཅུ་དྲུག་གི་སྟེང་དུ་རྟེན་འབྲེལ་བཅུ་གཉིས་ཀྱི་འཇུག་ལྡོག་དང༌། གང་ཟག་གི་བདག་མེད་ཀྱི་སྟེང་དུ་གཟུང་བ་རང་བཞིན་མེད་པར་རྟོགས་པ་སྟེ། བདག་མེད་ཕྱེད་དང་གཉིས་ཀྱི་སྒོ་ནས་རྟོགས་རིས་ལ་ཁྱད་པར་ཡོད་པར་གསུངས་པ་རྣམས་སོ། ། ཉ༢ གཉིས་པ་རང་རྒྱལ་གྱི་རྣམ་གཞག་ལ་དྲུག་སྟེ། ཏ༡ སྒྲ་དོན་ངེས་ཚིག ། ཏ༢ གང་ལ་འཇུག་སྒོ། ཏ༣ བསྲུང་བྱའི་སྡོམ་པ། ཏ༤ རྟོགས་བྱའི་ལྟ་བ། ཏ༥ ཐོབ་བྱའི་འབྲས་བུ། ཏ༦ རབ་ཏུ་དབྱེ་བའོ། ། ཏ༡ དང་པོ་ནི། སྒྲ་དོན་གཞན་ལ་ལྟོས་མིན་རང་བྱང་ཆུབ། ། རང་སངས་རྒྱས་ཞེས་པའི་སྒྲ་དོན་ནི། སློབ་དཔོན་གཞན་ལ་མ་ལྟོས་པར་རང་གི་བྱང་ཆུབ་རང་གི་ཤེས་རབ་ཀྱི་རྩལ་གྱིས་མངོན་དུ་བྱེད་པས་ན་རང་བྱང་ཆུབ་ཅེས་བྱའོ། ། ཡང་དམིགས་པ་གང་ཡང་རུང་བའི་རྐྱེན་གྱིས་རྟེན་འབྲེལ་ཤེས་པའི་ཡེ་(༢༤༥ན)ཤེས་རྟོགས་པས་རྐྱེན་རྟོགས་པ་ཞེས་བྱ་བའང་བློ་གྲོས་མི་ཟད་པས་བསྟན་པའི་མདོ་འགྲེལ་ལས་འབྱུང་ངོ༌། ། ཏ༢ གཉིས་པ་ལ། ཐ༡ གང་ལ་འཇུག་སྒོ་སྤྱིར་བསྟན། ཐ༢ སྒོམ་ཚུལ་བྱེ་བྲག་ཏུ་བཤད་པའོ། ། ཐ༡ དང་པོ་ནི། འཇུག་སྒོ་ཕྱི་ཡི་རྒྱུ་འབྲས་དཔེར་བྱས་ནས། ། ནང་གི་རྟེན་འབྲེལ་ལུགས་འབྱུང་ལུགས་ལྡོག་སྟེ། ། རང་རྒྱལ་འཇུག་པའི་སྒོ་ནི་རྟེན་འབྲེལ་ཡན་ལག་བཅུ་གཉིས་ཀྱི་སྒོ་ནས་འཇུག་སྟེ། དེའང་ཕྱི་ནང་གཉིས་ཀྱི་ཕྱིའི་རྟེན་འབྲེལ་ལ་རྒྱུའི་རྟེན་འབྲེལ་ས་དང་ཆུ་དང་མེ་དང་ནམ་མཁའ་དང་དུས་སོ། ། འབྲས་བུའི་རྟེན་འབྲེལ་ལ། རྩ་བ་དང་སྡོང་པོ་དང་ཡལ་ག་དང་ལོ་མ་དང་མེ་ཏོག་དང་འབྲས་བུའོ། ། དེའང་རྒྱུ་ཡོད་ན་འབྲས་བུ་རྣམས་འབྱུང་བའི་ལུགས་འབྱུང་དང༌། རྒྱུ་ལྡོག་ན་འབྲས་བུ་རྣམས་ལྡོག་པའི་ལུགས་ལྡོག་དཔེར་བྱས་ནས། ནང་གི་རྟེན་འབྲེལ་ནི་ཀེང་རུས་ལ་བརྟགས་ཏེ། ཀེང་རུས་འདི་རྒ་ཤི་ལས་བྱུང༌། དེ་ལྟར་རིམ་གྱིས་འཁོར་བའི་རྩ་བ་མ་རིག་པའི་བར་དུ་རྟོགས་ཏེ་ལུགས་འབྱུང་དང༌། མ་རིག་པ་ལྡོག་པས་འདུ་བྱེད་ལྡོག་པ་ནས་རྒ་ཤིའི་བར་དུ་ལྡོག་པས་ཏེ། ལུགས་ལྡོག་གི་རྟེན་འབྲེལ་རྟོགས་པར་བྱེད་པའོ། ། ཐ༢ གཉིས་པ་[སྒོམ་་ཚུལ་བྱེ་བྲག་ཏུ་་བཤད་པ་]ནི། དེ་ཡང་འཁོར་འདས་འབྱུང་ལྡོག་ཕྲུག་གཉིས་ལྡན། ། རྟེན་འབྲེལ་དེའང་། འཁོར་འདས་ཀྱི་འབྱུང་ལྡོག་ཕྲུགས་གཉིས་དང་ལྡན་པར་བསྒོམ་པ་སྟེ། དང་པོ་ནི། ཀུན་ནས་ཉོན་མོངས་པའི་དབང་གིས་འཁོར་བར་འཇུག་ཚུལ་གྱི་ལུགས་དང་མཐུན་པ་ནི་རིམ་པ་ཇི་ལྟ་བ་སྟེ། མདོ་ལས། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། ཞེས་པ་ནས། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བ་དང་འཁྲུགས་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པ་འདི་འབྱུང་བར་འགྱུར་རོ། །ཞེས་(༢༤༥བ)གསུངས་པ་ལྟ་བུ་དང༌། ལུགས་ལྡོག་ནི་རིམ་པ་ལྡོག་པ་སྟེ། རྒ་ཤི་ལ་སོགས་པ་སྐྱེ་བ་ལས་འབྱུང༌། སྐྱེ་བ་སྲིད་པ་ལས། སྲིད་པ་ལེན་པ་ལས་འབྱུང་ཞེས་པ་ནས། འདུ་བྱེད་མ་རིག་པ་ལས་འབྱུང་ཞེས་པའི་བར་ཡིན་ཞིང༌། དེ་དག་ཀྱང་རིམ་པའི་སྒོ་ནས་ཆ་གཉིས་སུ་ཕྱེ་བ་མ་གཏོགས་དོན་ནི་འཁོར་བའི་རྒྱུ་འབྲས་ལ་ཡིད་ཆེས་བསྐྱེད་པར་མཚུངས་པ་ཉིད་དོ། ། གཉིས་པ་ནི། རྣམ་པར་བྱང་བའི་དབང་གིས་མྱ་ངན་ལས་འདས་པར་འཇུག་ཚུལ་གྱི་ལུགས་དང་མཐུན་པ་ནི། ཡས་རིམ་གྱིས་མ་རིག་པ་འགག་ན་འདུ་བྱེད་དགག །འདུ་བྱེད་འགག་ན་རྣམ་པར་ཤེས་པ་དགག་ཅེས་པ་ནས། སྐྱེ་བ་འགག་ན་རྒ་ཤི་ལ་སོགས་པ་འགག་ཅེས་པ་དང༌། ལུགས་ལྡོག་ནི་སྐྱེ་བ་འགག་ན་རྒ་ཤི་འགག །སྲིད་པ་འགག་ན་སྐྱེ་བ་འགག་ཅེས་པ་ནས། མ་རིག་པ་འགག་ན་འདུ་བྱེད་འགག་ཅེས་པའི་བར་ཏེ། རིམ་པ་ཙམ་མ་གཏོགས་དོན་ནི་མྱ་ངན་ལས་འདས་པ་འཐོབ་ཚུལ་དུ་གཅིག་པ་ཉིད་དོ། ། དེས་ནི་རྩ་བ་མ་རིག་པ་འགག་ན་སྡུག་བསྔལ་མཐའ་དག་ལས་གྲོལ་བར་འགྱུར་བས། དེ་སྤང་བའི་ཆེད་དུ་ཡང་དག་པའི་ཡེ་ཤེས་སྐྱེད་པར་བྱེད་པའོ། ། ཏ༣ གསུམ་པ་བསྲུང་བྱའི་སྡོམ་པ་ནི། སྡོམ་པ་སོ་ཐར། ཞེས་པ་སྟེ། རང་རྒྱལ་གྱི་སྡོམ་པའང་སོ་སོ་ཐར་པའི་ཁྲིམས་ཏེ། ཉན་ཐོས་དང་འདྲའོ། ། ཏ༤ བཞི་པ་རྟོགས་བྱའི་ལྟ་བ་ནི། གང་ཟག་བདག་མེད་དང༌། ། གཟུང་དོན་རང་བཞིན་མེད་རྟོགས། ཞེས་པ་སྟེ། ས་སྡེ་ལས། འདིས་ཉན་ཐོས་དང་འདྲ་བར་གང་ཟག་གི་བདག་མེད་ཙམ་རྟོགས་པར་བཤད་ཀྱང༌། མངོན་རྟོགས་རྒྱན་ལས། གཟུང་དོན་རྟོག་པ་སྤོང་ཕྱིར་དང༌། ། འཛིན་པ་མི་སྤོང་ཕྱིར་དང་ནི། ། རྟེན་གྱིས་བསེ་རུ་ལྟ་བུའི་ལམ། ། ཡང་དག་བསྡུས་པ་ཤེས་པར་བྱ། ། ཞེས་གསུངས་པ་ལྟར། གང་ཟག་གི་བདག་མེད་པར་རྟོགས་པའི་སྟེང་དུ་ཆོས་ཀྱི་བདག་(༢༤༦ན)གི་ཕྱོགས་གཅིག་གཟུང་བའི་དོན་རང་བཞིན་མེད་པར་རྟོགས་པ་ཕལ་མོ་ཆེ་བཞེད་པ་མཐུན་ནོ། ། ཏ༥ ལྔ་པ་ཐོབ་བྱའི་འབྲས་བུ་ནི། ལྷག་བཅས་ལྷག་མེད་ཀྱི་མྱང་འདས་གཉིས་ཏེ། འདི་ཡང་ཉན་ཐོས་དང་འདྲ་བས། འདིར་ཟུར་དུ་དབྱེ་བ་མ་བྱས་སོ། ། ཏ༦ དྲུག་པ་རབ་ཏུ་དབྱེ་བ་ལ་གཉིས། ཐ༡ བསེ་རུ་ལྟ་བུ་དང༌། ཐ༢ ཚོགས་ན་སྤྱོད་པའོ། ། ཐ༡ དང་པོ་ནི། དབང་རྣོན་ནི། ། སྲིད་མཐར་སྨོན་ལམ་གསུམ་གྱིས་མཚམས་སྦྱར་ནས། ། བསྙེན་རྫོགས་བཞི་པའི་རབ་མཐའ་ཁྱད་ཅན་བརྟེན། ། རྣམ་པ་བཅུ་དྲུག་བསྒོམས་པས་