Tibetan
སྟན་ཅིག་ཏུ། ། སྦྱོར་ལམ་དྲོད་ནས་དགྲ་བཅོམ་བར་དུ་ཐོབ། ། རང་རྒྱལ་བསེ་རུ་ལྟ་བུ་ནི། ཤིན་ཏུ་དབང་པོ་རྣོན་པོ་ཡིན་ཏེ། དུད་འགྲོ་བསེ་རུ་ལ་རྭ་གཅིག་ལས་མེད་པ་ལྟར་འདུ་འཛི་གཡེང་བས་འཇིགས་ནས་གཅིག་པུར་གནས་པས་དེར་བཏགས་ལ། བསྐལ་ཆེན་བརྒྱར་སངས་རྒྱས་འབྱུང་བ་མཉེས་པར་བྱས་ནས་ཚོགས་བསགས། ཕུང་པོ་དང༌། ཁམས་དང༌། སྐྱེ་མཆེད་དང༌། རྟེན་འབྲེལ་དང༌། གནས་ཡིན་མིན་དང༌། བདེན་པ་སྟེ་བསླབ་པར་བྱ་བའི་གནས་དྲུག་ལ་མཁས་པར་བྱས་ནས་སྲིད་པ་ཐ་མ་པའི་ཚེ། སངས་རྒྱས་དང་ཉན་ཐོས་ཀྱིས་སྟོངས་པའི་འཇིག་རྟེན་དུ་སྐྱེ་བ་དང༌། སློབ་དཔོན་སོགས་ལ་མ་བསྟེན་པར་རང་གིས་བྱང་ཆུབ་མངོན་དུ་བྱེད་པ་དང༌། ངག་གི་རྣམ་པར་རིག་བྱེད་སོགས་ཀྱི་སྒོ་ནས་མ་ཡིན་པར་ལུས་ཀྱི་བརྡ་ཆོས་ཀྱི་རྣམ་རིག་གིས་གཞན་དོན་དུ་འགྱུར་བར་སྨོན་པ་སྟེ། སྨོན་ལམ་གསུམ་གྱིས་མཚམས་སྦྱར་བ་ལས། སྐྱེ་བ་ཐ་མར་སངས་རྒྱས་དང་ཉན་ཐོས་ཀྱིས་མ་བཟུང་བའི་འཇིག་རྟེན་དུ་དམངས་རིགས་མ་ཡིན་པའི་རིགས་གསུམ་གང་རུང་དུ་སྐྱེས། རྟེན་དེ་ལ་སྔོན་གྱི་སྨོན་ལམ་གྱི་དབང་གིས་མཁན་སློབ་མེད་པར་བསྙེན་པར་རྫོགས་ནས། བསམ་གཏན་བཞི་པའི་རབ་མཐའ་ཁྱད་པར་ཅན་ལ་བརྟེན་ཏེ་བདེན་བཞི་མི་རྟག་པ་(༢༤༦བ)སོགས་བཅུ་དྲུག་བསྒོམ་པ་ལས། སྟན་ཐོག་གཅིག་ཏུ་སྦྱོར་ལམ་ནས་ཟད་མི་སྐྱེ་ཤེས་པའི་དགྲ་བཅོམ་གྱི་ཡེ་ཤེས་ཀྱི་བར་འཐོབ་པའོ། ། འདི་ནི་ཉན་ཐོས་ཀྱི་ལུགས་ཡིན་ལ། ཐེག་ཆེན་གྱི་ཆོས་མངོན་པ་ལས་ནི་དྲོད་ནས་ཟད་མི་སྐྱེ་ཤེས་པའི་བར་དུ་སྐྱེ་བ་བརྒྱུད་དགོས་པར་བཤད་དོ། ། ཐ༢ གཉིས་པ་ཚོགས་ན་སྤྱོད་པ་ནི། ཚོགས་སྤྱོད་ཆུང་ངུ་དབང་རྟུལ་ཆེན་པོ་འབྲིང༌། ། སྐྱེ་བ་གཉིས་བརྒྱུད་རྣམ་ཐར་ཡིད་བྱེད་ཅན། ། སྒྲ་མེད་ལུས་ཀྱི་སྒོ་ནས་ཆོས་སྟོན་མཛད། ། རང་རྒྱལ་ཚོགས་སྤྱོད་ཅེས་པ་ནེ་ཙོ་ལྟར་ཁྱུས་ལྡིང་བ་ལ་བཤད་པའི་ཕྱིར། ཟླ་གྲོགས་དང་བཅས་ཏེ་སྒོམ་པ་གཞིར་བྱས་ནས། ཚོགས་སྤྱོད་ཆུང་ངུ་ཚོགས་བསགས་སྔར་དང་འདྲ་བ་ལས། སྲིད་པ་ཐ་མ་པའི་ཚེ་གནས་དྲུག་ལ་མཁས་པར་བྱས་ཏེ་བཟོད་འབྲིང་མན་བསྐྱེད། ལམ་ལྷག་མ་བསྐྱེད་པའི་ཕྱིར་སླར་ཡང་གནས་དྲུག་ལ་མཁས་པར་བྱས་ཏེ་སྨོན་ལམ་གསུམ་གྱིས་མཚམས་སྦྱར་བ་ལས་སྐྱེ་བ་ཕྱི་མ་འབྲས་བུ་ཇི་ལྟར་རིགས་པ་མངོན་དུ་བྱེད་པའི་རིགས་ཅན་ཏེ་འདི་ནི་དབང་པོ་རྟུལ་པོའོ། ། ཚོགས་སྤྱོད་ཆེན་པོ་ནི། སྔ་མ་དང་འདྲ་བ་ལས་སྲིད་པ་ཐ་མའི་ཚེ་གནས་དྲུག་ལ་མཁས་པར་བྱས་པས་བདེན་པ་མཐོང༌། འབྲས་བུ་དང་པོ་གསུམ་གང་རུང་མངོན་དུ་བྱས། དགྲ་བཅོམ་པ་ཐོབ་པར་མ་ནུས་པས་དེ་ཐོབ་ཆེད་སླར་གནས་དྲུག་ལ་མཁས་པར་བྱས་ཏེ་སྨོན་ལམ་གསུམ་གྱིས་མཚམས་སྦྱར་བས། སྐྱེ་བ་ཕྱི་མ་ལ་ཇི་ལྟར་རིགས་པའི་འབྲས་བུ་མངོན་དུ་བྱེད་པའི་རིགས་ཅན་ཏེ་འདི་ནི་དབང་པོ་འབྲིང་པོ་སྟེ། དེ་དག་སྐྱེ་བ་གཉིས་རེ་བརྒྱུད་པའོ། ། འདི་གསུམ་གའང་རྟེན་འབྲེལ་ཟབ་མོ་དང་རྣམ་ཐར་སྒོ་གསུམ་ཡིད་ལ་བྱེད་ཅིང༌། གཞན་མ་དད་པ་བཟློག་པའི་ཆེད་དུ་རྫུ་འཕྲུལ་ཡང་ཅི་རིགས་པར་སྟོན་ལ། ཞི་བ་དང་(༢༤༧ན)དུལ་བས་བསོད་སྙོམས་ལ་འཇུག་པ་ན་སྒྲ་མེད་པ་ལུས་ཀྱི་རྣམ་པར་རིག་བྱེད་སྒོ་ནས་རྟེན་འབྲེལ་སོགས་རྟོགས་པར་འགྱུར་བའི་ཆོས་སྟོན་པར་ཡང་མཛད་དོ། ། སྤྱིར་ས་སྡེ་ལས་ཉན་རང་གཉིས་དབང་པོ་དང་འབྲས་བུ་ལ་མཆོག་དམན་ཡོད་ཀྱང༌། ལམ་གྱི་རྣམ་གཞག་ཕལ་ཆེར་མཚུངས་པས་སྡེ་སྣོད་ལོགས་སུ་ཡོད་པར་མ་བཤད་པ་བཞིན་རྒྱ་བོད་ཀྱི་གཞུང་ཕལ་ཆེ་བར་ཉན་རང་གཉིས་ཀྱི་གྲུབ་མཐའ་གཅིག་ཏུ་བསྡུ་བ་མང་ལ། མ་སྐྱེས་དགྲའི་འགྱོད་པ་བསལ་བའི་མདོ་དང་དུས་ཀྱི་འཁོར་ལོ་ལས་རང་སངས་རྒྱས་ཀྱི་སྡེ་སྣོད་ལོགས་སུ་ཡོད་པར་གསུངས་པ་བཞིན་གཞུང་འགའ་ཞིག་ལས་དེ་གཉིས་ཀྱི་གྲུབ་མཐའ་སོ་སོར་དབྱེ་བར་མཛད་མོད། འདིར་ནི་ཉན་རང་གི་གྲུབ་པའི་མཐའ་ཕལ་ཆེ་བ་གཅིག་ཀྱང༌། མི་གཅིག་པའི་ཁྱད་པར་ཡང་ཤིན་ཏུ་མང་བ་དང༌། གསུང་རབ་སྤྱིའི་སྐད་དུ་ཡང་ཐེག་པ་གསུམ་ཞེས་གྲགས་པས་ན་ཉན་རང་གཉིས་ཀྱི་གྲུབ་མཐའི་རྣམ་གཞག་སོ་སོར་བྱས་པ་ཡིན་ནོ། ། ཆ༢ གཉིས་པ་ཐེག་པ་ཆེན་པོའི་རྣམ་པར་གཞག་པ་ལ་གཉིས། ཇ༡ ཐེག་པ་ཆེ་ཆུང་གི་ཁྱད་པར་བརྗོད། ཇ༢ ཐེག་ཆེན་དངོས་ཉིད་རྣམ་པར་གཞག་པའོ། ། ཇ༡ དང་པོ་ནི། བདག་མེད་གཉིས་རྟོགས་བསམ་སྦྱོར་ཕ་རོལ་ཕྱིན། ། སྒྲིབ་གཉིས་ཀུན་སྤངས་སྲིད་ཞིའི་མཐར་མི་གནས། ། ཆེན་པོ་བདུན་ལྡན། ཞེས་པ་སྟེ། ཐེག་པ་ཆེན་པོའི་ཚུལ་རྣམ་པར་གཞག་པ་ལ་ཐོག་མར་ཐེག་པ་ཆེ་ཆུང་ལ་ཁྱད་པར་ཅི་ཡོད་སྙམ་ན། མི་བསྐྱོད་ཡབ་སྲས་འདི་ལྟར་དུ་བཞེད་དེ། ལྟ་བ་རྟོགས་པའི་ཁྱད་པར། བསམ་སྦྱོར་བསླབ་བྱའི་ཁྱད་པར། སྤང་བྱ་སྤོང་བའི་ཁྱད་པར། ཐོབ་བྱ་འབྲས་བུའི་ཁྱད་པར། ཆེན་པོ་བདུན་གྱི་ཁྱད་པར་རོ། ། དང་པོ་ནི། གང་ཟག་གི་བདག་མེད་པ་རྟོགས་པའི་སྟེང་དུ་ཆོས་ཀྱི་བདག་མེད་པ་གསལ་ཞིང་རྫོགས་པར་རྟོགས་པ་ཐེག་ཆེན་དང༌། མ་རྟོགས་པ་ཐེག་དམན་ཏེ། དབུ་མ་ལ་བསྟོད་པ་ལས། མཚན་མ་མེད་པ་མ་རྟོགས་པར། ། ཁྱོད་ཀྱིས་ཐར་པ་མེད་པར་གསུངས། ། དེ་ཕྱིར་ཁྱོད་ཀྱིས་ཐེག་ཆེན་ལས། ། དེ་ནི་ཚང་བར་བསྟན་པ་ལགས། ། ཞེས་པ་ལྟར་རོ། ། གཉིས་པ་ནི། བྱམས་སྙིང་རྗེ་བྱང་ཆུབ་སེམས་ཀྱི་བསམ་པས་ཀུན་ནས་བསླངས་ཏེ་སྦྱོར་བ་ཕ་རོལ་ཏུ་ཕྱིན་པ་དྲུག་ལ་བསླབ་པ་དང་མི་བསླབ་པའི་ཁྱད་པར་ཏེ། སློབ་དཔོན་དཔའ་བོས། བསེ་རུ་ལྟ་བུ་རྣམས་ལ་ནི། ། ཕ་རོལ་ཕྱིན་དྲུག་མིང་ཡང་མེད། ། བཅོམ་ལྡན་ཉག་གཅིག་ཕ་རོལ་ཕྱིན། ། དྲུག་གི་སྤྱི་ལ་བཞུགས་པ་ལགས། ། ཞེས་པ་ལྟར་རོ། ། གསུམ་པ་ནི། ཉོན་སྒྲིབ་མཐའ་དག་སྤོང་ནུས་རུང་ཤེས་སྒྲིབ་མཐའ་དག་སྤོང་མི་ནུས་པ་ཐེག་དམན་དང༌། སྒྲིབ་གཉིས་བག་ཆགས་དང་བཅས་པ་མཐའ་དག་སྤོང་བར་ནུས་པ་ཐེག་ཆེན་ནོ། ། བཞི་པ་ནི། ཐབས་དང་ཤེས་རབ་དམན་པས་ཞི་བ་མྱ་ངན་ལས་འདས་པ་ཙམ་འདོད་པ་ཐེག་དམན་དང༌། མངོན་རྟོགས་རྒྱན་ལས། ཤེས་པས་སྲིད་ལ་མི་གནས་ཤིང༌། ། སྙིང་རྗེས་ཞི་ལ་མི་གནས་པས། ། ཞེས་པ་ལྟར། ཤེས་རབ་ཟབ་པ་དང་ཐབས་རྒྱ་ཆེ་བས་སྲིད་ཞིའི་མཐའ་ལ་མི་གནས་པའི་མྱ་ངན་ལས་འདས་པ་འདོད་པའམ་སྒྲུབ་པ་ཐེག་པ་ཆེན་པོའོ། ། ལྔ་པ་ནི། མདོ་སྡེ་རྒྱན་ལས། དམིགས་པ་ཆེ་བ་ཉིད་དང་ནི། ། དེ་བཞིན་སྒྲུབ་པ་གཉིས་དག་དང༌། ། ཡེ་ཤེས་བརྩོན་འགྲུས་རྩོམ་པ་དང༌། ། ཐབས་ལ་མཁས་པར་གྱུར་པ་དང༌། ། ཡང་དག་སྒྲུབ་པ་ཆེན་པོ་དང༌། ། སངས་རྒྱས་ཕྲིན་ལས་ཆེན་པོ་སྟེ། ། ཆེན་པོ་འདི་དང་ལྡན་པའི་ཕྱིར། ། ཐེག་ཆེན་ཞེས་ནི་ངེས་པར་བརྗོད། ། ཅེས་གསུངས་ཏེ། དེ་དག་ཀྱང་རིམ་པ་ལྟར་ཐེག་ཆེན་གྱི་སྡེ་སྣོད་རྒྱ་ཆེན་པོ་ལ་དམིགས་པ་དང༌། རང་གཞན་གཉིས་ཀའི་དོན་སྒྲུབ་པ་དང༌། བདག་(༢༤༨ན)མེད་པ་གཉིས་ཀ་རྟོགས་པ་དང༌། བསྐལ་པ་གྲངས་མེད་གསུམ་དུ་གུས་སྦྱོར་གྱི་བརྩོན་འགྲུས་རྩོམ་པ་དང༌། འཁོར་བ་ཡོངས་སུ་མི་གཏོང་ཞིང་ཀུན་ནས་ཉོན་མོངས་པ་མེད་པས་ལུས་ངག་གི་མི་དགེ་བ་བདུན་གནང་བ་ལྟ་བུ་དང༌། སྟོབས་དང་མི་འཇིགས་པ་དང་སངས་རྒྱས་ཀྱི་ཆོས་མ་འདྲེས་པ་ཡང་དག་པར་སྒྲུབ་པ་དང༌། ལྷུན་གྱིས་གྲུབ་ཅིང་རྒྱུན་མི་ཆད་པའི་ཕྲིན་ལས་རྣམས་ཡིན་ལ། དེ་བདུན་དང་ལྡན་པ་ནི་ཐེག་ཆེན་དང་མི་ལྡན་པ་ནི་ཐེག་དམན་ནོ། ། གཞན་ཡང་སྡུད་པ་ལས། གཏོང་བ་ཆེ་དང་བློ་ཆེ་བ་དང་མཐུ་ཆེ་དང༌། ། རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང༌། ། གོ་ཆ་ཆེན་པོ་བསྒོས་ཤིང་བདུད་ཀྱི་སྒྱུ་འདུལ་བ། ། དེ་ཡི་ཕྱིར་ན་སེམས་དཔའ་ཆེ་ཞེས་རབ་ཏུ་བརྗོད། ། ཅེས་དང༌། ཐེག་བསྡུས་ལས། ཤེས་བྱའི་གནས་དང་མཚན་ཉིད་དེར་འཇུག་དང༌། ། དེ་ཡི་རྒྱུ་འབྲས་དེ་རབ་དབྱེ་བ་དང༌། ། བསླབ་པ་གསུམ་དང་དེ་འབྲས་སྤངས་པ་དང༌། ། ཡེ་ཤེས་ཐེག་པ་མཆོག་གྱུར་ཁྱད་པར་འཕགས། ། ཞེས་གསུངས་པས་མཚོན་གསུང་རབ་དགོངས་འགྲེལ་དང་བཅས་པ་ལས་མཐའ་ཡས་པ་འབྱུང་ངོ༌། ། ཇ༢ གཉིས་པ་ཐེག་པ་ཆེན་པོ་དངོས་ཀྱི་རྣམ་གཞག་ལ་གཉིས་ཏེ། ༡ རྒྱུ་མཚན་ཉིད་ཕར་ཕྱིན་ཐེག་པ་དང༌། ༢ འབྲས་བུ་གསང་སྔགས་རྡོ་རྗེ་ཐེག་པའོ། །* དང་པོ་ལ་གཉིས། ཉ༡ མཚན་ཉིད་མདོར་བསྟན། ཉ༢ རྣམ་གཞག་རྒྱས་པར་སྨོས་པའོ། ། ཉ༡ དང་པོ་ནི། སངས་རྒྱས་ཐེག་པ་ཆེ། ། མཚན་ཉིད་རྒྱུ་ཡིས། ཞེས་པ་སྟེ། ཐེག་པ་འདིར་ཞུགས་ན་སངས་རྒྱས་སུ་བགྲོད་པར་བྱེད་པའི་སྟོབས་ཡོད་པ་དང༌། ཤེས་རབ་རྒྱ་ཆེ་ཞིང་སྤྱོད་ཡུལ་ཡངས་པ་དང༌། མངོན་མཐོའི་དགའ་བ་དང༌། ངེས་ལེགས་ཀྱི་བདེ་བ་ཐམས་ཅད་འཐོབ་པར་བྱེད་པས་ཐེག་པ་ཆེན་པོ་ཞེས་བྱ་སྟེ། སྡུད་པ་ལས། ཅི་ཕྱིར་འདི་ནི་བྱང་ཆུབ་ཐེག་ཆེན་བྱ་ཞེ་ན། །(༢༤༨བ) དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། ། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། ། དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག ། ཅེས་གསུངས་པས་སོ། ། གཞན་ཡང་མཐར་ཐུག་གི་འབྲས་བུ་ཟུང་འཇུག་རྡོ་རྗེ་འཆང་གི་གོ་འཕང་ལ་དངོས་སུ་སྦྱོར་བའི་ལམ་འཁོར་དང་བཅས་པ་མཚོན་པར་བྱེད་པས་ན་མཚན་ཉིད་ཅེས་དང༌། འབྲས་བུའི་མཐར་ཐུག་མི་གནས་པའི་མྱ་ངན་ལས་འདས་པའི་ཟུང་འཇུག་གི་ཡེ་ཤེས་ལ་ལྟོས་ཏེ་དེའི་རྒྱུའི་ཕྱེད་ཙམ་དུ་སྦྱོར་བར་བྱེད་པས་ན་རྒྱུའི་ཐེག་པ་ཞེས་བྱ་བ་སོགས་སུ་བརྗོད་པ་ཡིན་ནོ། ། བྱེད་སྒྲ་ནི་ཚིག་ཕྱི་མ་དྲང་བའི་དོན་ཏོ། ། ཉ༢ གཉིས་པ་རྣམ་གཞག་དངོས་ལ་གཉིས། ཏ༡ བསླབ་བྱ་ཉམས་ལེན་སྤྱིར་བསྟན། ཐ༢ གྲུབ་མཐའི་དབྱེ་བ་བྱེ་བྲག་ཏུ་བཤད་པའོ། ། ཏ༡ དང་པོ་ལ་གསུམ། ཐ༡ སློབ་པ་པོའི་གང་ཟག ། ཐ༢ བསླབ་བྱ་སྦྱོར་བ་ཕྱིན་དྲུག ། ཐ༣ དངོས་གཞི་ཞི་ལྷག་བཤད་པའོ། ། ད༡ དང་པོ་ནི། བགྲོད་བྱེད་གང་ཟག་ནི། ། བློ་ཆེན་དབང་པོ་རིམ་གསུམ། ཞེས་པ་སྟེ། སྤྱིར་ཐེག་པ་ཆེན་པོའི་ལམ་གྱིས་བགྲོད་པར་བྱེད་པའི་གང་ཟག་ནི། ཐེག་པ་ཆེན་པོའི་རིགས་རྐྱེན་གྱིས་སད་པ། བསམ་པ་བྱང་ཆུབ་ཀྱི་སེམས་གཉིས་བསྐྱེད་པ། སྦྱོར་བ་བྱང་ཆུབ་ཀྱི་སྤྱོད་པ་རླབས་པོ་ཆེ་ལ་སྤྱོད་ནུས་པའི་བློ་ཆེ་བ་གཞིར་བྱས། དབང་པོ་ལ། རྟུལ། རྣོན། ཤིན་ཏུ་རྣོན་པོའི་རིམ་པ་གསུམ་དུ་ཡོད་པ་ལས། དབང་པོ་རྟུལ་པོ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མོས་ཤིང་བཟོད་པ་ཡོད་དུ་ཟིན་ཀྱང་སྦྱིན་སོགས་དང་པོ་ལྔ་ལ་སྤྱོད་པ་ན་ཤེར་ཕྱིན་གྱིས་ཟིན་པར་སྤྱོད་མི་ནུས་པ་སྟེ། འདི་ལ་བྱང་ཆུབ་སེམས་དཔའ་ལས་དང་པོ་བ་ཡང་ཟེར་རོ། ། དབང་པོ་རྣོན་པོ་ནི། སྦྱིན་སོགས་ཤེར་ཕྱིན་གྱིས་ཟིན་པར་སྤྱོད་པའོ། ། ཤིན་ཏུ་རྣོན་པོ་ནི། སྦྱིན་སོགས་ཤེར་ཕྱིན་ཁྱད་པར་ཅན་སོ་སོ་རང་རིག་གི་མངོན་སུམ་(༢༤༩ན)གྱིས་ངོ་བོ་ཉིད་དུ་ཟིན་པར་སྤྱོད་ནུས་པའོ། ། ཐ༢ གཉིས་པ་[བསླབ་བྱ་སྦྱོར་བ་ཕྱིན་དྲུག་བཤད་པ་]ནི། སེམས་བསྐྱེད་ནས། ། སྦྱོར་བ་ཕ་རོལ་ཕྱིན་པ་དྲུག་ལ་བསླབ། ། དེ་ཡང་ངོ་བོ་མཚན་ཉིད་ངེས་ཚིག་དང༌། ། དབྱེ་བསྡུས་ཡང་དག་གཙོ་ཁྱད་སློབ་པའི་ཚུལ། ། འབྲས་བུ་དྲང་ངེས་རིམ་པས་ཤེས་པར་བྱ། ། དབང་པོ་རིམ་པ་གསུམ་ཀས་ཐུན་མོང་དུ་བསླབ་པར་བྱ་བའི་གནས་ནི་བྱང་ཆུབ་ཏུ་སེམས་བསྐྱེད་དེ་བྱང་ཆུབ་ཀྱི་སྤྱོད་པ་ལ་བསླབ་པ་ཡིན་ལ། དེའང་གཙོ་བོར་སྦྱོར་བ་ཕ་རོལ་ཏུ་ཕྱིན་པ་དྲུག་ལ་བསླབ་པར་བྱ་སྟེ། འདི་དག་གི་དོན་འགའ་ཞིག་བྱང་སྡོམ་སྐབས་སུ་སྨོས་ཟིན་ཀྱང༌། འདིར་ཡང་མདོ་ཙམ་སྨོས་ན། དང་པོ་ངོ་བོ་ནི། རིན་ཆེན་ཕྲེང་བ་ལས། སྦྱིན་པ་རང་ནོར་ཡོངས་གཏོང་བ། ། ཚུལ་ཁྲིམས་གཞན་ལ་ཕན་བྱེད་པའོ། ། བཟོད་པ་ཁྲོ་བ་སྤངས་པ་སྟེ། ། བརྩོན་འགྲུས་དགེ་བ་ཡོངས་འཛིན་པའོ། ། བསམ་གཏན་རྩེ་གཅིག་ཉོན་མོངས་མེད། ། ཤེས་རབ་བདེན་དོན་གཏན་ལ་འབེབས། ། ཞེས་སོ། ། གཉིས་པ་མཚན་ཉིད་ནི། སེར་སྣ་སོགས་རང་རང་གི་མི་མཐུན་ཕྱོགས་ཉམས་པ། འཁོར་གསུམ་རྣམ་པར་མི་རྟོག་པའི་ཡེ་ཤེས་དང་ལྡན་པ། སྤྱོད་པས་གཞན་དོན་རྫོགས་པ། རེ་རེས་ཀྱང་སེམས་ཅན་གྱི་རྒྱུད་སྨིན་པས་མཚན་ཉིད་བཞི་དང་ལྡན་པ་སྟེ། རྒྱན་ལས། སྦྱིན་པ་མི་མཐུན་ཕྱོགས་ཉམས་དང༌། ། རྣམ་པར་མི་རྟོག་ཡེ་ཤེས་ལྡན། ། འདོད་པ་ཐམས་ཅད་ཡོངས་རྫོགས་བྱེད། ། སེམས་ཅན་རྣམ་སྨིན་བྱེད་རྣམ་གསུམ། ། ཞེས་སོགས་གསུངས་པ་ལྟར་རོ། ། གསུམ་པ་ངེས་ཚིག་ནི། དེ་ཉིད་ལས། དབུལ་བ་འདོར་བར་བྱ་བ་དང༌། ། བསིལ་བ་ཐོབ་དང་ཁྲོ་བཟོད་དང༌། ། མཆོག་སྦྱོར་བ་དང་ཡིད་འཛིན་དང༌། ། དོན་དམ་ཤེས་པའི་ཕྱིར་བཤད་དོ། ། ཞེས་འབྱུང་བ་ལྟར། དབུལ་བ་འདོར་བ་སྦྱིན་པའི་(༢༤༩བ)ངེས་ཚིག་ཏུ་བཞག་པ་ལ་སྦྱིན་པའི་སྐད་དོད་དཱ་ན་སྟེ། དཱ་ནི་དཱ་རི་དྲཱའི་སྒྲ་ལས་དབུལ་བ་སོགས་ལ་འཇུག །ན་ནི་སེལ་བའི་དགག་ཚིག་སྟེ་དབུལ་བ་སེལ་ཞིང་འདོར་བས་སྦྱིན་པ་ལ་འཇུག་པ་ལྟར་ཀུན་ལ་ཤེས་པར་བྱའོ། ། བཞི་པ་ལ། དབྱེ། བསྡུ་གཉིས་ལས། དབྱེ་བ་ནི། བྱང་སྡོམ་སྐབས་སུ་སྨོས་པ་ལྟར་རྩ་བའི་དབྱེ་བ་བཅོ་བརྒྱད་པོ་རེ་རེ་ལའང་སེམས་ཅན་གྱི་དོན་དུ་བྱེད་པ་དང༌། སེམས་ཅན་ལ་མི་གནོད་པར་བྱེད་པ་དང༌། བྱ་དཀའི་སྡུག་བསྔལ་བཟོད་པར་བྱེད་པ་དང༌། བྱ་བ་གཞན་གྱིས་བར་མ་ཆོད་པར་བྱེད་པ་དང༌། སེམས་མ་ཡེངས་པར་བྱེད་པ་དང༌། ཐམས་ཅད་སྟོང་པ་དང་སྒྱུ་མ་ལྟ་བུར་ཤེས་པར་བྱེད་པ་སྟེ་དྲུག་དྲུག་དང་ལྡན་པས་བརྒྱ་རྩ་བརྒྱད་དམ། ཡང་ན། མངོན་རྟོགས་རྒྱན་ལས། སྦྱིན་པ་ལ་སོགས་རྣམ་དྲུག་ལ། ། དེ་དག་སོ་སོར་བསྡུས་པ་ཡིས། ། གོ་ཆའི་སྒྲུབ་པ་གང་ཡིན་དེ། ། དྲུག་ཚན་དྲུག་གིས་ཇི་བཞིན་བཤད། ། ཅེས་པ་ལྟར། སྦྱིན་པའི་སྦྱིན་པ། སྦྱིན་པའི་ཚུལ་ཁྲིམས་སོགས་དྲུག་པོ་རེ་རེ་ཡང་དྲུག་དྲུག་དང་ལྡན་པས་སུམ་ཅུ་རྩ་དྲུག་ཏུའང་དབྱེར་ཡོད་དོ། ། བསྡུ་བ་ནི། རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱི། ། ཚོགས་ཡིན་ཤེས་རབ་ཡེ་ཤེས་ཀྱི། ། གསུམ་པོ་གཞན་ནི་གཉིས་ཀའི་སྟེ། ། ལྔ་ཆར་ཡང་ནི་ཡེ་ཤེས་ཚོགས། ། ཞེས་གསུངས་པ་ལྟར། ཚོགས་གཉིས་སམ། ཤེས་རབ་ཀྱིས་ཟིན་ན་ལྔ་གའང་ཡེ་ཤེས་ཀྱི་ཚོགས་སུ་འགྱུར་རོ། ། ཡང་ན། དང་པོ་ལྔ་ཐབས་དང༌། དྲུག་པ་ཤེས་རབ་སྟེ་ཐབས་ཤེས་གཉིས་སུའང་འདུ་བ་ཡིན་ནོ། ། ལྔ་པ་ནི། ལན་དང་རྣམ་སྨིན་ལ་མི་རེ་བས་སྦྱིན་པ་ཡང་དག་པར་འགྱུར་བ་སོགས་ཏེ། རྒྱན་ལས། རེ་བ་མེད་པའི་སྦྱིན་པ་དང༌། ། ཡང་སྲིད་མི་འདོད་ཚུལ་ཁྲིམས་དང༌། ། ཐམས་ཅད་ལ་ནི་བཟོད་པ་དང༌། ། ཡོན་ཏན་ཀུན་འབྱུང་བརྩོན་འགྲུས་དང༌། ། དེ་བཞིན་བསམ་གཏན་གཟུགས་མེད་མིན། ། ཤེས་རབ་ཐབས་དང་ལྡན་པ་ནི། ། ཕ་རོལ་ཕྱིན་པ་དྲུག་པོ་ལ། ། བརྟན་པ་རྣམས་ཀྱིས་ཡང་དག་སྦྱོར། ། ཞེས་སོ། །(༢༥༠ན) དྲུག་པ་གཙོ་བོ་ནི། སྦྱིན་པའི་ནང་ནས་དམ་པའི་ཆོས་ཀྱི་སྦྱིན་པ་གཙོ་བོར་གྱུར་པ་སོགས་ཤེས་པར་བྱ་སྟེ། དེ་ཉིད་ལས། ཆོས་སྦྱིན་ཚུལ་ཁྲིམས་དག་པ་དང༌། ། མི་སྐྱེ་བཟོད་པ་ཐོབ་ཉིད་དང༌། ། ཐེག་ཆེན་བརྩོན་འགྲུས་རྩོམ་པ་དང༌། ། མཐའ་ལ་སྙིང་རྗེ་ལྡན་གནས་དང༌། ། ཤེས་རབ་བློ་ལྡན་རྣམས་ཀྱིས་ནི། ། ཕ་རོལ་ཕྱིན་པ་གཙོ་བོར་འདོད། ། ཅེས་གསུངས་ཤིང༌། དེ་དག་ཀྱང་འཁོར་དང་བཅས་པའི་དབང་དུ་ན། དམ་པ་དྲུག་ལྡན་དུ་ཉམས་སུ་བླངས་དགོས་ཏེ། དེའང་རྟེན་དམ་པ་བྱང་ཆུབ་ཀྱི་སེམས་དང་ལྡན་པ། དངོས་པོ་དམ་པ་སྦྱིན་སོགས་ཀྱི་དངོས་པོ་ཕྱོགས་རེ་བ་མིན་པར་རིས་མེད་པ། ཆེད་དུ་བྱ་བ་དམ་པ་གཞན་དོན་དུ་སྦྱོར་བ། ཐབས་དམ་པ་འཁོར་གསུམ་མི་རྟོག་པའི་ཤེས་རབ་ཀྱིས་ཟིན་པ། བསྔོ་བ་དམ་པ་བླ་ན་མེད་པའི་བྱང་ཆུབ་ཏུ་དུག་མེད་པའི་བསྔོ་བས་རྒྱས་འདེབས་པ། དག་པ་དམ་པ་སྒྲིབ་པ་གཉིས་ཀྱི་དངོས་གཉེན་དུ་སྤྱོད་པ་རྣམས་སོ། ། བདུན་པ་ཁྱད་པར་ལའང་གཉིས། མི་མཐུན་པ་དང་གཉེན་པོའི་ཁྱད་པར་ནི། ལོངས་སྤྱོད་ལ་ཆགས་པ་སྦྱིན་པའི་མི་མཐུན་ཕྱོགས་ཉམས་པའི་སྐལ་བ་ཅན་ཡིན་ལ། མ་ཆགས་པ་གཉེན་པོ་ཁྱད་པར་དུ་འགྱུར་བའི་སྐལ་བ་ཅན་སོགས་ཏེ། ལོངས་སྤྱོད་ཆགས་དང་ཉམས་བཅས་དང༌། ། ང་རྒྱལ་ཉིད་དང་བསོད་ཉམས་དང༌། ། རོ་མྱང་བ་དང་རྣམ་རྟོག་ནི། ། བརྟན་པ་རྣམས་ཀྱི་ཉམས་པའི་རྒྱུ། ། དེ་དག་གཉེན་པོ་ལ་གནས་པའི། ། བྱང་ཆུབ་སེམས་དཔའ་རྣམས་ཀྱིས་ནི། ། དེ་ལས་བཟློག་ཕྱིར་ཁྱད་པར་གྱི། ། སྐལ་ཅན་ཆོས་སུ་ཤེས་པར་བྱ། ། ཞེས་གསུངས་སོ། །(༢༥༠བ) [གཉིས་པ་]བཅོས་མ་དང་ཡང་དག་པའི་ཁྱད་པར་ཡང༌། སྤྲུལ་པ་དང་ནི་ཚུལ་འཆོས་དང༌། ། བཞིན་གྱི་མཛེས་ནི་སྟོན་པ་དང༌། ། དེ་བཞིན་ཕྲ་ལ་འཇུག་པ་དང༌། ། ལུས་དང་ངག་ནི་ཞི་བ་དང༌། ། དེ་བཞིན་སྨྲ་མཁས་ཕུན་སུམ་ཚོགས། ། དེ་དག་སྒྲུབ་དང་བྲལ་བ་ནི། ། བྱང་ཆུབ་སེམས་དཔའ་རྣམ་དག་གི ། ཡང་དག་མིན་པ་ཉིད་དུ་བཤད། ། བཟློག་པ་རབ་ཏུ་སྦྱོར་རྣམས་ཀྱིས། ། དེ་དག་ཡང་དག་ཉིད་དུ་བཤད། ། ཅེས་གསུངས་པ་ལྟར་རོ། ། བརྒྱད་པ་སློབ་ཚུལ་ནི། སོ་སོའི་ཕན་ཡོན་དང་མི་མཐུན་ཕྱོགས་ཀྱི་ཉེས་དམིགས་ཤེས་པའི་སྒོ་ནས་རེ་རེའང་ཕར་ཕྱིན་དྲུག་ལྡན་དུ་ཉམས་སུ་ལེན་པར་བྱ་སྟེ། སྦྱིན་པ་ལ་མཚོན་ན། ལུས་ལོངས་སྤྱོད་དགེ་རྩ་བཅས་གཏོང་བ་སྦྱིན་པ། དེའི་ཚེ་ཉན་རང་གི་ཡིད་