Tibetan
གཉིས་སྣང་ལྟར་སེམས་སྣང་འབའ་ཞིག་ཡིན་པའི་ཕྱིར་དང༌། ཕྱི་རོལ་གྱི་དོན་བདེན་པར་ཡོད་ན་འཕགས་པའི་མཉམ་གཞག་རྣམ་པར་མི་རྟོག་པའི་ཡེ་ཤེས་ཀྱི་ངོར་ཡོད་དགོས་པ་ལས་དེའི་ངོར་མེད་པའི་ཕྱིར་དང༌། ཆུ་ཀླུང་གི་དངོས་པོ་གཅིག་ཉིད་ལས་བཟང་ངན་གྱི་དབང་གིས་ལྷ་ལ་བདུད་རྩི། མི་ལ་ཆུ། ཡི་དྭགས་ལ་རྣག་ཁྲག །ཚ་དམྱལ་བས་ཁྲོ་ཆུར་མཐོང་བ་སོགས་རིགས་དྲུག་གི་སྣང་བ་འཕྲལ་གྱི་འཁྲུལ་རྒྱུས་མ་བསླད་པ་ལའང་སོ་སོ་ཐ་དད་པར་སྣང་བའི་ཕྱིར་རོ། ། གཞན་ཡང་ལུང་དང་རིགས་པའི་ཚུལ་མང་པོས་ཕྱི་དོན་བཀག་སྟེ་རྣམ་རིག་ཙམ་དུ་བསྒྲུབ་པར་མཛད་དོ། ། པ༢ གཉིས་པ་ལ་གཉིས། ཕ༡ དངོས་དང༌། ཕ༢ ཞར་བྱུང་ངོ༌། ། ཕ༡ དང་པོ་ལ་གཉིས། བ༡ རྣམ་བདེན་པ། བ༢ རྣམ་རྫུན་པའི་དབྱེ་བའོ། ། བ༡ དང་པོ་ལའང་གཉིས། མ༡ སྤྱིར་རྣམ་བདེན་པའི་བཞེད་པ་དང༌། མ༢ དེའི་བྱེ་བྲག་དབྱེ་བའོ། ། མ༡ དང་པོ་ནི། དེ་ལ་འདོད་ཚུལ་གཉིས་ཡོད་རྣམ་བདེན་པ། ། སྣང་བ་གཟུང་བྱའི་སེམས་སུ་བདེན་པར་འདོད། ། སེམས་ཙམ་སྨྲ་བ་དེ་ལ་གྲུབ་མཐའི་གཙོ་བོ་རྣམ་བདེན་རྫུན་(༢༥༥བ)གྱི་འདོད་ཚུལ་གཉིས་སུ་ཡོད་པའི། དང་པོ་རྣམ་བདེན་པ་ནི། ཕྱི་རོལ་གྱི་དོན་བདེན་དངོས་སུ་གྲུབ་པ་མེད་ཀྱང་དོན་དུ་རྟོག་པའི་བག་ཆགས་ལས་ཤེལ་ཚོན་ཅན་བཞིན་ཤེས་པ་ཉིད་དོན་གྱི་རྣམ་པ་ཅན་དུ་སྐྱེ་བར་འདོད་པས། གཟུགས་ཅན་དུ་སྣང་བ་མཐའ་དག་སྣང་མཁན་གྱི་སེམས་ཉིད་བག་ཆགས་འཁྲུལ་པའི་དབང་གིས་རྒྱངས་ཆད་ཀྱི་དོན་དུ་སྣང་བ་ཙམ་ཡིན་གྱི། ཡིན་ལུགས་གཟུང་བྱའི་སེམས་སུ་བདེན་པས་ན་འགོག་བདེན་ཡང་སྤང་བྱ་དང་བྲལ་བའི་སེམས་ལ་འཇོག་པ་སོགས་མདོ་ལས་ཕུང་ཁམས་སྐྱེ་མཆེད་ཇི་སྙེད་གསུངས་པ་ཀུན་སེམས་ཀྱི་ཆོས་སུ་བདེན་པ་སྟེ། སེམས་ཉིད་དུ་འདོད་པས་མིང་ཡང་རྣམ་བདེན་པ་ཞེས་གྲགས་སོ། ། མ༢ གཉིས་པ་དེའི་དབྱེ་བ་བརྗོད་པ་ལ་གསུམ། ཙ༡ སྒོ་ང་ཕྱེད་ཚལ་པ། ཙ༢ གཟུང་འཛིན་གྲངས་མཉམ་པ། ཙ༣ སྣ་ཚོགས་གཉིས་མེད་པའོ། ། ཙ༡ དང་པོ་ནི། དེ་ཡང་ཤེས་རྣམ་རང་ཆར་བདེན་པ་དང༌། ། ཞེས་ཤེས་པའི་རྣམ་པ་གཟུང་བའི་ཡུལ་དང་འཛིན་པའི་ཤེས་པ་གཉིས་སྒོ་ང་གཤགས་པ་ལྟར་ཕྱེད་མ་དང༌། དེའང་རྣམ་པ་གཟུང་ཆར་བདེན་ལ་ཤེས་པ་འཛིན་ཆར་བདེན་པར་འདོད་པ་ཡིན་ཏེ། སློབ་དཔོན་ཛེ་ཏཱ་རིས། ཡང་ཁ་ཅིག་ནི། ནང་དུ་སྣང་བའི་རྣམ་པར་ཤེས་པ་དེ་ཉིད་ཀྱང་གཞན་ཡིན་ལ། ཕྱི་རོལ་ཏུ་སྣང་བ་དེ་ཉིད་ཀྱང་གཞན་ཡིན་ཏེ་དེ་གཉིས་ཀྱང་སོ་སོ་རང་རིག་པ་ཙམ་ཡིན་པའི་ཕྱིར་རོ། །ཀུན་ཏུ་རྟོག་པ་དེ་གཉིས་ཀྱི་སྟོབས་ཀྱིས་བྱུང་བས་གཟུང་བ་དང་འཛིན་པའི་ངོ་བོ་གཉིས་སུ་སྒྲོ་བཏགས་སོ་ཞེས་སོ། ། ཙ༢ གཉིས་པ་[གཟུང་འཛིན་གྲངས་མཉམ་པ་]ནི། གཟུང་རྣམ་ཇི་སྙེད་འཛིན་ཤེས་དེ་སྙེད་དང༌། ། དཀར་དམར་ལ་སོགས་པའི་རྫས་ཐ་དད་པའི་གཟུང་བའི་རྣམ་པ་ཇི་སྙེད་པ་འཛིན་པའི་ཤེས་པ་ཡང་རྫས་ཐ་དད་པ་དེ་སྙེད་དུ་གྲངས་མཉམ་ཞིང༌། སྣང་ཡང་དཀར་དམར་སྣ་ཚོགས་དུ་མར་སྣང་ལ་བདེན་ཡང་སྣ་ཚོགས་དེ་རྣམས་རྫས་སོ་སོར་བདེན་པ་ལྟར་སྣང་མཁན་དབང་ཤེས་ཀྱང་(༢༥༦ན)རྫས་དུ་མའི་ངོ་བོར་བདེན་པར་འདོད་པ་ཡིན་ཏེ། དབུ་མ་རང་འགྲེལ་ལས། གང་དག་བདེ་བ་ལ་སོགས་པ་ལྟར་སྔོན་པོ་ལ་སོགས་པའི་རྣམ་པ་རྣམས་ཀྱང་མྱོང་བའི་བདག་ཉིད་ཁོ་ན་སྟེ། ཤེས་པ་དེ་དག་ནི་མང་ལ་དེ་དག་ཀྱང་རིགས་མཐུན་པ་ཤ་སྟག་སྟེ། རིགས་མི་མཐུན་པའི་ཤེས་པ་དུ་མ་ཅིག་ཆར་འབྱུང་བ་བཞིན་དུ་འབྱུང་ངོ་ཞེས་སྨྲ། ཞེས་འབྱུང་བ་ལྟར་རོ། ། ཙ༣ གསུམ་པ་[སྣ་ཚོགས་གཉིས་མེད་པ་]ནི། སྣ་ཚོགས་སྣང་ཡང་ངོ་བོ་གཉིས་མེད་སྨྲ། ། ཤེས་པ་གཅིག་ཁོ་ན་དཀར་དམར་སོགས་སུ་སྣང་བ་ཡིན་པས་ན་སྣང་བ་སྣ་ཚོགས་དུ་མར་སྣང་ཡང་ཐམས་ཅད་ཤེས་པ་ཆ་མེད་ཀྱི་ངོ་བོར་བདེན་པས་གཉིས་མེད་པར་འདོད་པ་ཡིན་ཏེ། དབུ་མ་རང་འགྲེལ་ལས། གང་དག་ནོར་བུ་གཟི་བཞིན་དུ་རྣམ་པར་ཤེས་པ་གཅིག་ཁོ་ནས་སྣ་ཚོགས་པའི་ངོ་བོ་བླངས་སོ་ཞེས་སྨྲ་བ། ཞེས་འབྱུང་བ་ལྟར་རོ། ། བ༢ གཉིས་པ་རྣམ་རྫུན་པ་ལའང་གཉིས། མ༡ འདོད་པ་སྤྱིར་བཤད་པ། མ༢ བྱེ་བྲག་ཏུ་དབྱེ་བའོ། ། མ༡ དང་པོ་ནི། རྣམ་རྫུན་སྣང་བ་མིག་གི་རབ་རིབ་བཞིན། ། མེད་པ་གསལ་སྣང་མི་བདེན་རྫུན་པ་སྟེ། ། གཉིས་སྟོང་ཤེས་པ་གཅིག་པུ་བདེན་པར་འདོད། ། སེམས་ཙམ་རྣམ་རྫུན་པ་རྣམས་ནི། དཀར་ནག་ལ་སོགས་པའི་སྣང་བ་ཐམས་ཅད་མིག་བཙིར་བས་ཟླ་བ་གཉིས་སུ་སྣང་བ་དང་། མིག་རབ་རིབ་ཅན་ལ་སྐྲ་ཤད་འཛག་པ་ལྟར་མེད་བཞིན་དུ་སྣང་བའི་མེད་པ་གསལ་སྣང་དོན་ལ་མི་བདེན་རྫུན་པ་རྨི་ལམ་སྒྱུ་མ་ལྟ་བུ་ཡིན་ཏེ། གལ་ཏེ་ཤེས་པར་བདེན་པ་ཡིན་ན། གཟུགས་སོགས་ཡུལ་རིག་པར་འགྱུར་བ་ལས་མི་རིག་པའི་ཕྱིར། གཟུང་འཛིན་གཉིས་སྟོང་གི་ཤེས་པ་རང་རིག་རང་གསལ་ཤེལ་གོང་གཡའ་དག་པ་ལྟ་བུ་དོན་གྱིས་ཁ་མ་བསྒྱུར་ཞིང་སྣང་བའི་དྲི་མས་མ་གོས་པ་དེ་ཉིད་གཅིག་པུ་བདེན་པར་འདོད་དེ། མདོར་ན། ཤེས་པ་ནི། ཤེལ་(༢༥༦བ)གོང་དག་པ་ལྟར་སྣང་བའི་དྲི་མས་མ་གོས་ཤིང༌། སྣང་བ་ནི། སྐྲ་ཤད་འཛག་པ་ལྟར་མེད་བཞིན་དུ་སྣང་བའི་རྫུན་པར་འདོད་པ་མིང་ཡང་རྣམ་མེད་པའམ་རྣམ་རྫུན་པར་གྲགས་སོ། ། མ༢ གཉིས་པ་[བྱེ་བྲག་ཏུ་དབྱེ་བ་]ནི། སྣང་བས་ཤེས་ངོར་གོས་དང་མ་གོས་དང༌། ། སངས་རྒྱས་ས་ན་གཉིས་སྣང་ཡོད་མེད་ཀྱི། ། འདོད་པས་དྲི་བཅས་དྲི་མེད་གཉིས་སུ་དབྱེ། ། རྣམ་ཤེས་འདི་རྣམས་བདེ་སྡུག་སོགས་ཀྱི་འཛིན་རྣམ་དེ་ཉིད་དུ་དོན་ལ་གནས་ཀྱང་མ་རིག་པའི་མཐུས་ཕྱི་རོལ་གྱི་གཟུང་བའི་རྣམ་པར་སྣང་བས་རྣམ་ཤེས་རང་གི་ངོ་བོ་རྣམ་པར་རྫུན་པ་དེས་གོས་པར་སྨྲ་བས་རྣམ་རྫུན་དྲི་བཅས་པ་དང༌། དོན་དམ་པར་ཕྱིའི་རྣམ་པས་གོས་པ་མེད་པར་རྣམ་ཤེས་འདི་དག་གི་ངོ་བོ་ཤེལ་གོང་དག་པ་ལྟ་བུ་ཡིན་ཀྱང་། དེ་སོ་སྐྱེས་རྟོགས་མི་ནུས་པར་སངས་རྒྱས་ཁོ་ནས་མཁྱེན་པར་སྨྲ་བས་རྣམ་རྫུན་དྲི་མེད་པ་ཞེས་བྱ་ལ། ཡང་དཀར་དམར་དུ་སྣང་བ་འདི་སངས་རྒྱས་ཀྱི་ས་ལ་ཡོད་ཀྱང་། འཁྲུལ་པར་མི་འགྱུར་ཏེ། རྫུན་པ་ལ་རྫུན་པར་རྟོགས་པའི་ཕྱིར། དེས་ན་དོན་དང་ཤེས་པ་དེ་ཉིད་དང་གཞན་དུ་བརྗོད་དུ་མེད་པའོ་ཞེས་སངས་རྒྱས་ཀྱི་ས་ན་གཉིས་སྣང་ཡོད་པར་འདོད་པ་དང༌། དཀར་དམར་དུ་སྣང་བ་འདི་ཤེས་པའི་ངོ་བོར་བདེན་ན་སངས་རྒྱས་ལ་ཡང་སྣང་བར་འགྱུར་བ་ལས་མི་སྣང་བའི་ཕྱིར། དེས་ན་ཤེས་པ་དོན་ལ་འབྲེལ་བ་མེད་བཞིན་དུ་སྣང་བའོ་ཞེས་སངས་རྒྱས་ཀྱི་ས་ན་གཉིས་སྣང་མེད་པར་འདོད་པས་དྲི་བཅས་དང་དྲི་མེད་གཉིས་སུ་དབྱེ་བར་བཤད་དོ། ། མདོར་ན། སེམས་ཙམ་རྣམ་བདེན་པ་རྣམས་ནི་སྒོ་ལྔའི་དབང་ཤེས་ལ་ཕྱི་རོལ་དོན་དུ་སྣང་བ་ཐམས་ཅད་ནང་ཤེས་པའི་རྫས་སུ་བདེན་པར་འདོད་ཅིང༌། རྣམ་རྫུན་པ་རྣམས་ནི་སྒོ་ལྔའི་དབང་ཤེས་ལ་དོན་དུ་སྣང་བ་ཐམས་ཅད་ནང་སེམས་ཀྱི་རྫས་སུ་མི་བདེན་གྱི་བརྫུན་པའམ་བཏགས་པའི་ཡོད་པ་ཞིག་ཏུ་འདོད་པར་ལཀྵ་མཱི་(༢༥༧ན)སོགས་མཁས་པ་མང་པོས་བཤད་པ་ལྟར་ཤེས་པར་བྱའོ། ། སེམས་ཙམ་དེ་གཉིས་ཀའང་གཟུང་འཛིན་གཉིས་ལས་གྲོལ་བའི་རྣམ་ཤེས་ཆ་མེད་སྐད་ཅིག་རེ་རེ་བ་དོན་དམ་པའི་བདེན་པར་འདོད་པས་རྣམ་རིག་པའམ་སེམས་ཙམ་པ་ཞེས་བྱ་དགོས་ཀྱི། དོན་སྣང་སེམས་སུ་འདོད་པ་འབའ་ཞིག་ལ་དེར་བྱས་ན་མདོ་སྡེ་པ་ལ་ཁྱབ་ཆེས་ཤིང་རྣམ་རྫུན་པ་ལ་མ་ཁྱབ་པའི་སྐྱོན་དུ་འགྱུར་རོ། །ཞེས་ཀརྨ་ཕྲིན་ལས་པས་གསུངས་སོ། ། གཉིས་ཀའང་གཟུང་འཛིན་གཉིས་མེད་ཀྱི་ཤེས་པ་རང་རིག་རང་གསལ་དོན་དམ་པ་ཉིད་གཉིས་སྣང་གི་སྒྲིབ་པས་བསྒྲིབས་པས་འཕགས་ཆོས་ཐོབ་པའི་ཚེ་ཡང་དེ་ཉིད་གཉིས་སྣང་དང་བྲལ་བ་ཙམ་དུ་འདོད་དོ། ། བོད་ལས་ཀྱིས་འདི་དག་ཏུ་སློབ་དཔོན་དབྱིག་གཉེན་གྱི་གསུང་ལུང་དུ་དྲངས་པ་ནི། དེས་ཡེ་ཤེས་བདེན་གྲུབ་ཏུ་ཞལ་གྱིས་བཞེས་པ་དང༌། འདིར་རྣམ་ཤེས་བདེན་གྲུབ་སྨྲ་བ་དེ་གཉིས་ཀྱི་དབྱེ་བའང་འབྱེད་པར་འཁྱོག་པོར་སྨྲ་བའི་སྐྱོན་དུ་ཟད་དོ། ། ཕ༢ གཉིས་པ་ཞར་བྱུང་ལ་གཉིས། བ༡ དེ་དག་བཞེད་པ་པོའི་སློབ་དཔོན། བ༢ དེ་འགོག་ཚུལ་ལོ། ། བ༡ དང་པོ་ནི། སྔོན་གྱི་སློབ་དཔོན་ལྔ་བརྒྱ་སོགས་ཀྱི་སྲོལ། ། བོད་རྣམས་མགྲིན་གཅིག་ཏུ་མངོན་རྟོགས་རྒྱན་མ་གཏོགས་པའི་བྱམས་ཆོས་གཞན་རྣམས་ཀྱིས་སེམས་ཙམ་བསྟན་ཟེར། ཁ་ཅིག་གིས་རྒྱུད་བླ་མ་དབུ་མའི་དོན་དུ་གནས་པར་འདོད། བཀའ་འཁོར་ལོ་ཐ་མའང་སེམས་ཙམ་འབའ་ཞིག་པ་ལས་དབུ་མ་མི་བསྟན་པར་འདོད། ཤིང་རྟའི་སྲོལ་འབྱེད་ཐོགས་མེད་སྐུ་མཆེད་དང་དེ་དག་གི་གཞུང་ཐམས་ཅད་སེམས་ཙམ་ཡིན་ཅིང་རྣམ་བདེན་རྫུན་སོགས་དེའི་རྗེས་འབྲང་དུ་བྱུང༌། ཕྱོགས་གླང་ཡབ་སྲས་ཀྱིས་རྣམ་བདེན་རྫུན་གཉིས་ཀའི་ཕྱོགས་བཞེད། (༢༥༧བ)ཅེས་དང༌། ཡང་འཕགས་པ་ཀླུ་སྒྲུབ་ཀྱིས་ཀྱང་དེ་གཉིས་ཀའི་ཕྱོགས་བཞེད། ཅེས་སོགས་དང༌། ཐོགས་མེད་དབུ་མ་པའི་སློབ་དཔོན་ཡིན་ཀྱང་བསྟན་བཅོས་སེམས་ཙམ་དུ་བརྩམས་པ་ལ་འགལ་བ་མེད་དེ་དབྱིག་གཉེན་གྱི་མངོན་མཛོད་ལྟ་བུའོ་ཞེས་སོགས་རང་རང་གི་འདོད་པ་སྣ་ཚོགས་སུ་སྨྲ་ཞིང༌། ཇོ་ནང་ཆོས་རྗེ་ཀུན་མཁྱེན་ཆེན་པོས། འཁོར་ལོ་ཐ་མ་དང་བྱམས་ཆོས་བར་པ་རྣམས་ཀྱིས་བོད་རྣམས་ཀྱིས་འདོད་པའི་དབུ་མ་དེ་མི་སྟོན་ཀྱང་རྒྱལ་བ་སྲས་དང་བཅས་པས་བཞེད་པའི་དབུ་མ་དེ་སྟོན། འཕགས་པའི་གཞུང་རིག་ཚོགས་ལ་སོགས་པའི་དགོངས་པའང་བོད་རྣམས་ཀྱིས་འདོད་པ་དེ་ནི་ཕྱོགས་རེ་ཙམ་ལས་མཐར་ཐུག་མིན་གསུངས། ཇོ་ནང་རྗེ་བཙུན་ཆེན་པོ་རྗེས་འབྲང་དང་བཅས་པས་ཀྱང་ཐོགས་མེད་སྐུ་མཆེད་དབུ་མའི་སློབ་དཔོན་དང་དེའི་གྲུབ་མཐའ་དབུ་མ་ཆེན་པོར་དམ་འཆའ། འོ་ན་སེམས་ཙམ་པ་སྲོལ་འབྱེད་ཀྱི་སློབ་དཔོན་གང་ཡིན་ཅེ་ན། སྔོན་གྱི་བཙུན་པ་ཆེན་པོ་ཨ་བི་ཏརྐ་ལ་སོགས་པ་ཐེག་ཆེན་གྱི་སློབ་དཔོན་ལྔ་བརྒྱ་དང༌། སོགས་ཁོངས་ནས། དེའི་རྗེས་འབྲང་འགའ་ཞིག་དང༌། ཕྱིས་སུའང་རྣམ་རིག་ཙམ་དུ་སྨྲ་བ་འགའ་ཞིག་བྱུང་བའི་སྲོལ་ལོ། །ཞེས་བཞེད་དོ། ། བ༢ གཉིས་པ་[དེ་འགོག་ཚུལ་]ནི། དངོས་སྨྲའི་སྐྱོན་རྣམས་འཕགས་ཞབས་གཞུང་གིས་བཀག ། སྣང་བ་ལ་འཁྲུལ་པས་ཁྱབ་པར་འདོད་པའི་རྣམ་རྫུན་པ་མན་གྱིས་འཁྲུལ་པ་དང་བྱ་བྱེད་མཐའ་དག་འཇོག་པ་ནི་གཞི་རྟེན་བདེན་གྲུབ་མེད་པར་མ་ཤེས་པའི་ཕྱིར་དངོས་པོར་སྨྲ་བ་ཞེས་གྲགས་ལ། དགག་གཞི་བདེན་གྲུབ་རེའི་སྟེང་དུ་གྲུབ་མཐའ་འོག་མ་འོག་མས་བརྟགས་པའི་དགག་བྱ་རེ་བཀག་མོད་ཀྱང༌། མཐར་དངོས་པོར་སྨྲ་བ་རྣམས་ཀྱི་གྲུབ་མཐའི་བློ་སྐྱོན་ཡོངས་སུ་རྫོགས་པ་རྣམས་འཕགས་ཞབས་ཀྱི་གཞུང་རིག་པའི་ཚོགས་དང༌། དེའི་རྗེས་འབྲང་བཅས་པས་ལེགས་པར་བཀག་ནས། འཁྲུལ་པ་གཞི་མེད་ལ་བྱ་བྱེད་འཇོག་པར་མཁྱེན་པ་དབུ་མ་པའི་ཁྱད་ཆོས་(༢༥༨ན)རབ་ཏུ་གསལ་བར་མཛད་དོ། ། དེའི་ཕྱིར། ལྟ་འདོད་མདོར་བསྟན་ལས། བྱེ་བྲག་སྨྲ་དང་མདོ་སྡེ་དང༌། ། རྣལ་འབྱོར་སྤྱོད་པའི་གཞུང་རྣམས་སུ། ། ཅུང་ཟད་བདེན་དང་མི་བདེན་ཀྱང༌། ། ཐམས་ཅད་བདེན་པ་དབུ་མའི་ལུགས། ། ཞེས་གསུངས་སོ། ། སེམས་ཙམ་དང་དབུ་མའི་ཁྱད་པར་ཡང༌། གཞི་ལམ་འབྲས་བུའི་སྒོ་ནས་ཁྱད་པར་ཆེ་བ་སོགས་འགའ་ཞིག་སྨྲ་ཡང༌། གཟུང་འཛིན་གཉིས་ཀྱིས་སྟོང་པའི་ཤེས་པ་རང་རིག་རང་གསལ་དོན་དམ་གྲུབ་པར་འདོད་པ་དང་མི་འདོད་པ་ཐེག་ཆེན་སྡེ་གཉིས་ཀྱི་ཁྱད་པར་གྱི་གཙོ་བོ་ཡིན་ཏེ། ཡེ་ཤེས་སྙིང་པོ་ཀུན་བཏུས་སོགས་ལས། གཟུང་དང་འཛིན་པ་རྣམ་གྲོལ་བའི། ། རྣམ་པར་ཤེས་པ་དོན་དམ་ཡོད། ། ཅེས་སེམས་ཙམ་པའི་གྲུབ་མཐའ་འཆད་སྐབས་སུ་གསུངས་པ་དང༌། རྣམ་ཤེས་དེ་ཡང་དོན་དམ་དུ། ། ཡོད་པར་མཁས་རྣམས་མི་བཞེད་དེ། ། ཞེས་དབུ་མ་པའི་གྲུབ་མཐའ་ཆད་སྐབས་སུ་གསུངས་པ་ལྟར་རོ། ། ད༢ གཉིས་པ་དབུ་མའི་རྣམ་པར་གཞག་པ་ལ་བདུན། ན༡ སྒྲ་དོན་ངེས་ཚིག ། ན༢ གང་ལ་འཇུག་སྒོ། ན༣ བསྲུང་བྱའི་སྡོམ་པ། ན༤ རྟོགས་བྱའི་ལྟ་བ། ན༥ ཐོབ་བྱའི་འབྲས་བུ། ན༦ རབ་ཏུ་དབྱེ་བ། ན༧ གཞི་ལམ་འབྲས་གསུམ་མདོར་བསྡུ་བའོ། ། ན༡ དང་པོ་ནི། མཐའ་ལས་རྣམ་གྲོལ་དབུ་མ་གྲུབ་མཐའི་མཆོག ། ཡོད་མེད་སྐྱེ་འགག་ལ་སོགས་པའི་མཐའ་ཐམས་ཅད་ལས་རྣམ་པར་གྲོལ་བས་གང་ལའང་དམིགས་པ་མེད་པར་སྨྲ་བ་ནི་དབུ་མ་པ་ཞེས་བྱ་སྟེ། དཀོན་བརྩེགས་ལས། ཆོས་ཐམས་ཅད་ལ་རྟག་པར་མི་རྟོག་གོ། །མི་རྟག་པར་མི་རྟོག་གོ། །རྟག་ཅེས་བྱ་བ་དེ་ནི་མཐའ་གཅིག་གོ། །མི་རྟག་ཅེས་བྱ་བ་དེ་ནི་མཐའ་གཉིས་སོ། །མཐའ་གཉིས་ཀྱི་དབུས་གང་ཡིན་པ་དེ་ནི་དཔྱད་དུ་མེད་པ། བསྟན་དུ་མེད་པ། རྟེན་མ་(༢༥༨བ)ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པ་སྟེ། འོད་སྲུང་། འདི་ནི་དབུ་མའི་ལམ་ཆོས་རྣམས་ཡང་དག་པར་སོ་སོར་རྟོག་པའོ། །ཞེས་དང༌། དབུ་མ་རྒྱན་ཆུང་ལས། ཡོད་པ་མ་ཡིན་མེད་པའང་མིན། ། གཉིས་ཀྱང་མ་ཡིན་གཉིས་མེད་མིན། ། མཐའ་བཞི་དག་དང་བྲལ་བ་ལ། ། དབུ་མ་པ་ཞེས་རབ་ཏུ་བརྗོད། ། ཅེས་པ་ལྟར་རོ། ། ན༢ གཉིས་པ་གང་ལ་འཇུག་སྒོ་ནི། འཇུག་སྒོ་བདེན་པ་གཉིས་སྟེ་མ་དཔྱད་ངོར། ། སྣང་ཡང་བདེན་པར་མ་གྲུབ་ཤེས་པ་ཡིས། ། བླང་དོར་ལེགས་སྤྱོད་ཀུན་རྫོབ་བདེན་པར་དང༌། ། གང་ལའང་བླང་དོར་དགག་སྒྲུབ་མ་མཆིས་པར། ། སྣང་ཙམ་ཉིད་ནས་སྟོང་པར་ཤེས་པ་ཡིས། ། དོན་དམ་ལ་འཇུག་ཚོགས་གཉིས་ཟུང་དུ་སྦྲེལ། ། དབུ་མ་པ་རྣམས་འཇུག་པའི་སྒོ་ནི། རང་བཞིན་གཙོ་ཆེ་བའི་དབང་དུ་བྱས་ནས་ཆོས་ཐམས་ཅད་བདེན་པ་གཉིས་སུ་བསྡུས་ཏེ་འཆད་ལ། དེའང་མ་བརྟགས་མ་དཔྱད་པའི་སྣང་བ་འདི་རྣམས་ཇི་ལྟར་སྣང་ཡང་དེའི་ངོ་བོར་བདེན་པར་མ་གྲུབ་པར་ཤེས་པས། ཀུན་རྫོབ་རྟེན་འབྲེལ་ཙམ་དུ་བྱང་ཆུབ་ཀྱི་སེམས་ཀྱིས་ཀུན་ནས་བསླངས་ཏེ་སྒྱུ་མ་ལྟ་བུའི་བློས་སྦྱིན་སོགས་ཀྱི་དགེ་བ་རྒྱ་ཆེན་པོ་སྒྲུབ་ཅིང་མི་དགེ་བ་སྤོང་བའི་ཚུལ་གྱིས་བླང་དོར་མ་འཆོལ་བར་ལེགས་པར་སྤྱོད་དེ་ཀུན་རྫོབ་བདེན་པ་ལ་འཇུག་ལ། ཡང་དག་པར་ཆོས་གང་ལའང་བླང་དོར་དང་དགག་སྒྲུབ་དང་སྤང་བླང་མ་མཆིས་པར་སྣང་ཙམ་ཉིད་ནས་དེ་དང་དེའི་རང་བཞིན་གྱིས་སྟོང་པར་ཤེས་པའི་སྒོ་ནས་དོན་དམ་པའི་བདེན་པ་ལ་འཇུག་ཅིང༌། དེ་ལྟར་བདེན་པ་གཉིས་ཀྱི་སྒོ་ནས་འཇུག་པ་དེ་ཡང་ལྟ་སྤྱོད་དམ་ཐབས་ཤེས་སམ་ཚོགས་གཉིས་ཟུང་དུ་འབྲེལ་བའི་ཚུལ་གྱིས་འཇུག་པ་ཡིན་ནོ། ། ན༣ གསུམ་པ་བསྲུང་བྱའི་སྡོམ་པ་ནི། བསྲུང་བྱ་བྱང་ཆུབ་སེམས་དཔའི་སྡོམ་པ་སྟེ། །(༢༥༩ན) བསྲུང་བྱ་ནི་བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ཏེ། དེའང་དོན་དམ་པར་སྤྲོས་མཚན་དང་བྲལ་བའི་ཤེས་རབ་ཆེན་པོས་བྱིན་གྱིས་བརླབས་ཏེ་ཉམས་སུ་ལེན་པ་ཡིན་ནོ། ། ན༤ བཞི་པ་རྟོགས་བྱའི་ལྟ་བ་ནི། རྟོགས་བྱ་ཀུན་རྫོབ་ཆོས་རྣམས་ཆུ་ཟླ་ལྟར། ། མེད་བཞིན་སྣང་ལ་དོན་དམ་སྤྲོས་མཚན་ཀུན། ། ཉེར་ཞིའི་བདེན་གཉིས་ཕྱིན་ཅི་མ་ལོག་རྟོགས། ། དབུ་མ་པས་རྟོགས་བྱའི་ལྟ་བ་ནི། ཀུན་རྫོབ་ཏུ་ཆོས་ཐམས་ཅད་ཆུ་ཟླ་ལྟར་མེད་བཞིན་དུ་སྣང་བ་དང༌། དོན་དམ་པར་སྤྲོས་པ་དང་མཚན་མ་ཐམས་ཅད་ཉེ་བར་ཞི་བའི་ཚུལ་གྱིས་བདེན་པ་གཉིས་ཀྱི་གནས་ལུགས་ཕྱིན་ཅི་མ་ལོག་པར་དཔྱིས་ཕྱིན་ཏུ་རྟོགས་པ་ཡིན་ནོ། ། ན༥ ལྔ་པ་ཐོབ་བྱའི་འབྲས་བུ་ནི། འབྲས་བུ་ཞི་བ་སྐུ་གཉིས་མངོན་དུ་བྱེད། ། རང་རང་གི་ཐོབ་བྱའི་འབྲས་བུ་མཐར་ཐུག་མྱ་ངན་ལས་འདས་པ་ཡིན་པར་ཐེག་པ་གསུམ་ག་འདྲ་ལ། འོན་ཀྱང་དབུ་མ་པ་ནི་ཉོན་མོངས་པ་དང་ཕུང་པོ་འགགས་པ་ཙམ་ལ་མྱང་འདས་སུ་མི་འདོད་ཀྱི། སྤྲོས་པ་ཐམས་ཅད་ཉེ་བར་ཞི་བའི་ཚུལ་གྱིས་དག་པ་དང་མ་དག་པའི་ཆོས་རྣམས་ཀྱི་དེ་ཁོ་ན་ཉིད་ཕྱིན་ཅི་མ་ལོག་པར་མངོན་སུམ་དུ་བྱས་པ་ལ་འདོད་དེ། རྩ་ཤེ་ལས། སྤངས་པ་མེད་པ་ཐོབ་མེད་པ། ། ཆད་པ་མེད་པ་རྟག་མེད་པ། ། འགག་པ་མེད་པ་སྐྱེ་མེད་པ། ། དེ་ནི་མྱ་ངན་འདས་པར་བརྗོད། ། ཅེས་དང༌། དཔེ་མེད་པར་བསྟོད་པ་ལས། ཁྱོད་ཀྱིས་ཀུན་ནས་ཉོན་མོངས་དང༌། ། རྣམ་བྱང་རོ་གཅིག་ཉིད་དུ་མཁྱེན། ། ཆོས་ཀྱི་དབྱིངས་དང་དབྱེར་མེད་པས། ། ཁྱོད་ནི་ཀུན་ནས་རྣམ་དག་གྱུར། ། ཅེས་སོགས་མང་དུ་འབྱུང་བ་ལྟར་རོ། ། མྱང་འདས་ལའང་ལྷག་བཅས་དང་ལྷག་མེད་གཉིས་སུ་འཇོག་པ་ལ་ཐེག་ཆེན་ལྟར་ན། གསེར་འོད་དམ་པ་ལས། སྐུ་གཉིས་ནི་ལྷག་མ་དང་བཅས་པའོ། ། ཆོས་ཀྱི་སྐུ་ནི་ལྷག་མ་མེད་པའོ། ། ཞེས་པ་ལྟར། (༢༥༩བ)འཕགས་པ་ཀླུས་ཀྱང་སྐུ་གསུམ་ལ་འཇུག་པའི་སྒོར་གསུངས་ཏེ། དེའང་སྤྲོས་པ་ཉེ་བར་ཞི་བའི་མྱང་འདས་ཐོབ་པ་ན་ཚོགས་གཉིས་ཡོངས་སུ་རྫོགས་པའི་མཐུ་ལས་རང་དོན་དུ་ཆོས་ཀྱི་སྐུ་དང་གཞན་དོན་དུ་གཟུགས་ཀྱི་སྐུ་གཉིས་མངོན་དུ་གྱུར་ནས་རྣམ་པར་མི་རྟོག་བཞིན་དུ་ནོར་བུ་རིན་པོ་ཆེ་ལྟར་གདུལ་བྱ་རྒྱུད་དག་པ་དང་མ་དག་པ་མཐའ་ཡས་པའི་དོན་མཛད་པར་གསུངས་སོ། ། ན༦ དྲུག་པ་རབ་ཏུ་དབྱེ་བ་ལ་གཉིས། པ༡ མདོར་བསྟན། པ༢ རྒྱས་བཤད་དོ། ། པ༡ དང་པོ་ནི། དབྱེ་སྒོ་མང་ཡང་མདོ་སྔགས་དབུ་མ་གཉིས། ། དབུ་མའི་གྲུབ་མཐའ་སྨྲ་བ་དེ་དག་ལའང་ནང་གསེས་དབྱེ་བའི་ཚུལ་རྒྱ་བོད་གཉིས་སུ་འགའ་ཞིག་བཤད་དེ། དེ་ལ་ཁ་ཅིག །མདོ་སྡེ་སྤྱོད་པའི་དབུ་མ་དང༌། རྣལ་འབྱོར་སྤྱོད་པའི་དབུ་མ་དང༌། འཇིག་རྟེན་གྲགས་སྡེ་སྤྱོད་པའི་དབུ་མ་གསུམ་དུ་འདོད་དེ། དང་པོ་ནི། ཐ་སྙད་དུ་ཕྱི་རོལ་གྱི་དོན་ཡོད་པར་འདོད་པ་སྟེ། ལེགས་ལྡན་འབྱེད་སོགས་སོ། ། གཉིས་པ་ནི། ཐ་སྙད་དུ་ཕྱི་དོན་མེད་པར་འདོད་པ་སྟེ། ཞི་བ་འཚོ་སོགས་