Tibetan
སོ། ། གསུམ་པ་ནི། འཇིག་རྟེན་ལ་གྲགས་པ་འབའ་ཞིག་གི་གཞན་ངོར་ཕྱི་དོན་འདོད་པ་སྟེ། ཟླ་བ་གྲགས་པ་སོགས་སོ། ། ཡང་ཁ་ཅིག །དོན་དམ་འདོད་ཚུལ་གྱི་སྒོ་ནས་སྒྱུ་མ་རིགས་གྲུབ་པ་དང་། རབ་ཏུ་མི་གནས་པར་སྨྲ་བ་གཉིས་ཏེ། དང་པོ་ནི། མྱུ་གུ་སོགས་ཀྱི་ཆོས་ཅན་དང་བདེན་མེད་ཀྱི་སྣང་བ་ཚོགས་པ་དོན་དམ་བདེན་པར་འདོད་པ་སྟེ། ཀ་མ་ལ་ཤཱི་ལ་སོགས་སོ། ། ཕྱི་མ་ནི། སྣང་བ་ལ་སྤྲོས་པ་རྣམ་པར་བཅད་པའི་ཡོངས་གཅོད་དོན་དམ་བདེན་པར་འདོད་པ་སྟེ། སངས་རྒྱས་བསྐྱངས་སོགས་སོ། ། སློབ་དཔོན་ཤཱནྟི་པས། ཀུན་རྫོབ་ཤེས་པའི་རྣམ་པར་སྨྲ་བ་དང༌། ཀུན་རྫོབ་བག་ཆགས་སུ་སྨྲ་བའི་དབུ་མ་པ་གཉིས་སུ་དབྱེ། སློབ་དཔོན་མཻ་ཏྲི་པས། སྒྱུ་མ་ལྟར་གཉིས་མེད་དུ་སྨྲ་བ་དང༌། ཆོས་ཐམས་ཅད་རབ་ཏུ་མི་གནས་པར་སྨྲ་བ་གཉིས་ཀྱི་དབྱེ་བ་མཛད། ཁ་ཆེའི་མཁས་པ་ལཀྴ་མཱིས་ནི། མདོ་(༢༦༠ན)སྡེ་པའི་དབུ་མ། རྣལ་འབྱོར་སྤྱོད་པའི་དབུ་མ། རྒྱལ་བའི་ཡུམ་གྱི་དབུ་མ་གསུམ་དུ་དབྱེ་བར་བཤད་པ་སོགས། དོན་དམ་སྟོང་ཚུལ་དང༌། ཁྱད་པར་ཀུན་རྫོབ་ཞལ་གྱིས་བཞེས་ཚུལ་ལ་བརྟེན་དབྱེ་སྒོ་མི་འདྲ་བ་མང་ཡང་། མདོར་བསྡུ་ན། མདོ་དང་སྔགས་ཀྱི་དབུ་མའི་ཚུལ་གཉིས་སུ་ངེས་པ་ཡིན་ནོ། ། པ༢ གཉིས་པ་[རྒྱས་བཤད་]ལ་གཉིས། ཕ༡ ཐུན་མོང་མདོ་ལུགས་ཀྱི་དབུ་མ་དང༌། ཕ༢ ཟབ་མོ་གསང་སྔགས་ཀྱི་དབུ་མའོ། ། ཕ༡ དང་པོ་ལའང་གཉིས། བ༡ མིང་གི་སྒོ་ནས་མདོར་བསྟན། བ༢ མཚན་ཉིད་ཀྱི་སྒོ་ནས་རྒྱས་པར་བཤད་པའོ། ། བ༡ དང་པོ་ནི། མདོ་ལུགས་ངོ་བོ་ཉིད་མེད་རྣལ་འབྱོར་སྤྱོད། ། གཙོ་ཕལ་ཕྲ་རགས་ལ་སོགས་བརྡ་ཡང་སྦྱོར། ། བོད་དུ་རང་སྟོང་གཞན་སྟོང་ཞེས་སུ་གྲགས། ། ཐེག་པ་ཆེན་པོའི་མདོ་སྡེ་རྣམས་ཀྱི་དགོངས་པ་འགྲེལ་བའི་ཚུལ་ལམ་ལུགས་སྲོལ་ཅུང་ཟད་མི་འདྲ་བའི་དབང་གིས་ངོ་བོ་ཉིད་མེད་པར་སྨྲ་བའི་དབུ་མ་དང༌། རྣལ་འབྱོར་སྤྱོད་པའི་དབུ་མ་པ་གཉིས་སུ་རིགས་ངེས་ཤིང༌། དེ་དག་ལ་ཁ་ཅིག་གིས། དབུ་མ་པ་ལ་གཙོ་ཕལ་གཉིས་ཀྱི་བརྡ་སྦྱར་ལ། སློབ་དཔོན་བྷ་བྱ་སོགས་ཀྱིས་ཕྱི་མ་ལ་ཕྲ་བ་ནང་གི་དབུ་མ་དང༌། སྔ་མ་ལ་རགས་པ་ཕྱིའི་དབུ་མ་ཞེས་པའི་བརྡ་ལ་སོགས་པ་ཡང་སྦྱོར་ཞིང༌། བོད་དུ་ཇོ་ནང་ཆོས་རྗེ་ཀུན་མཁྱེན་ཆེན་པོ་ཕྱིན་ཆད་ནས། དབུ་མ་རང་སྟོང་དང་གཞན་སྟོང་གི་ལུགས་ཞེས་ཡོངས་སུ་གྲགས་སོ། ། བ༢ གཉིས་པ་མཚན་ཉིད་ཀྱི་སྒོ་ནས་རྒྱས་པར་བཤད་པ་ལ་གཉིས། མ༡ རང་སྟོང༌། མ༢ གཞན་སྟོང་ངོ༌། ། མ༡ དང་པོ་ལ་གཉིས། ཙ༡ དབྱེ་བ་མདོར་སྨོས། ཙ༢ རྣམ་གཞག་ཞིབ་མོར་བཤད་པའོ། ། ཙ༡ དང་པོ་ནི། སྔ་མར་རང་རྒྱུད་པ་དང་ཐལ་འགྱུར་གཉིས། ། སྔ་མར་སྨོས་པ་ངོ་བོ་ཉིད་མེད་པར་སྨྲ་བའི་དབུ་མ་པ་ལའང་། ལེགས་ལྡན་འབྱེད་ཀྱི་རྗེས་འབྲང་ཐ་སྙད་དུ་ཆོས་ཐམས་ཅད་སྐྱེ་བ་མེད་པ་དང་སྟོང་པ་ཉིད་ལ་སོགས་པ་རང་ལུགས་སུ་ཁས་བླངས་ནས། ཚུལ་(༢༦༠བ)གསུམ་དངོས་སྟོབས་ཀྱིས་གྲུབ་པའི་རང་རྒྱུད་ཀྱི་གཏན་ཚིག་གཙོ་བོར་སྒྲུབ་བྱེད་དུ་འགོད་པའི་ཕྱིར་རང་རྒྱུད་པ་ཞེས་བྱ་བ་དང༌། ཟླ་གྲགས་ཀྱི་རྗེས་འབྲང་སྐྱེ་མེད་དང་སྟོང་ཉིད་ལ་སོགས་པ་གཞན་གྱི་ལོག་རྟོག་དགག་པའི་གཞན་ངོ་འབའ་ཞིག་ཏུ་ཁས་ལེན་ཅིང༌། ཚུལ་གསུམ་དངོས་སྟོབས་ཀྱིས་གྲུབ་པའི་གཏན་ཚིགས་རང་རྒྱུད་པ་མེད་པས་དངོས་སྨྲ་བ་ལ་ནང་འགལ་སྟོན་པའི་ཐལ་འགྱུར་ཙམ་གཙོ་བོར་འགོད་པའི་ཕྱིར་ཐལ་འགྱུར་བ་ཞེས་གྲགས་པ་གཉིས་སུ་ཡོད་དོ། ། ཙ༢ གཉིས་པ་རྣམ་གཞག་ཞིབ་མོར་བཤད་པ་ལ་གསུམ། ཚ༡ ཐལ་རང་ཐུན་མོང་བའི་ལུགས། ཚ༢ དེ་གཉིས་ཀྱི་ཁྱད་པར། ཚ༣ དེ་དག་སོ་སོའི་ལུགས་སོ། ། ཚ༡ དང་པོ་ལ་གཉིས། ཛ༡ བདག་མེད་གཉིས། ཛ༢ རིགས་པའི་ཚུལ་ལོ། ། ཛ༡ དང་པོ་ནི། ཐུན་མོང་ལྟ་བའི་འབྱུང་གནས་གང་ཟག་དང༌། ། སྒྲིབ་རྩ་ཆོས་ཀྱི་བདག་གཉིས་རིགས་པས་བཀག ། དབུ་མ་ཐལ་རང་གཉིས་ཐུན་མོང་དུ། ལྟ་བ་དང་ཉོན་མོངས་པ་ཐམས་ཅད་ཀྱི་འབྱུང་གནས་བདག་ཏུ་ལྟ་བ་གང་ཟག་གི་བདག་དང༌། སྒྲིབ་པ་གཉིས་ཀྱི་རྩ་བ་ཕྱི་ནང་གི་ཆོས་ཐམས་ཅད་རང་མཚན་དུ་བདེན་པར་ཞེན་པ་ཆོས་ཀྱི་བདག་གཉིས་ལུང་དང་རིགས་པའི་རྣམ་གྲངས་མང་པོས་བཀག་ནས་བདག་མེད་གཉིས་ལ་སེམས་མཉམ་པར་འཇོག་པ་སྟེ། དེ་དག་གི་ཚུལ་བསམ་སྒོམ་གྱི་སྐབས་སུ་ཅུང་ཟད་རྒྱས་པར་འབྱུང་ངོ༌། ། ཛ༢ གཉིས་པ་རིགས་པའི་ཚུལ་ནི། ཆོས་ཅན་སྟེང་དུ་དགག་བྱ་བཏགས་པ་དང༌། ། བསྒྲུབ་བྱ་ལ་ཡང་དོན་དང་ཐ་སྙད་གཉིས། ། གཏན་ཚིག་རྒྱུ་འབྲས་གཉིས་ཀ་ངོ་བོ་ལ། ། དཔྱོད་བྱེད་བཞི་ཡིས་དངོས་སྨྲའི་ཡོད་མཐའ་སེལ། ། སྣང་ཙམ་ལ་དཔྱོད་རྟེན་འབྲེལ་རིགས་པ་ཡིས། ། མཐའ་གཉིས་བསལ་བའི་དོན་དམ་མི་མཐུན་མེད། ། དེ་ལ་ཐོག་མར་ཆོས་ཅན་ཞེས་པ་ནི་རྩོད་གཞི་ཡིན་ལ། དེའང་རྒོལ་ཕྱིར་རྒོལ་གཉིས་ཀའི་ཚད་མས་(༢༦༡ན)གྲུབ་ཅིང༌། དངོས་པོ་ཞེས་པ་ལྟ་བུ་རགས་པ་དང༌། མྱུ་གུ་ཞེས་པ་ལྟ་བུ་ཕྲ་བ་གང་ཡང་རུང་བ་ལུགས་འདིར་བསྒྲུབ་པར་བྱ་བའི་མི་མཐུན་ཕྱོགས་དངོས་པོར་ཞེན་པ་སྐྱེ་བར་འགྱུར་བ་རྣམས་སོ། ། དགག་བྱ་ནི། ཆོས་ཅན་དེའི་སྟེང་དུ་རྣམ་པར་དཔྱད་ན་སྣང་བ་དང་བཏགས་པའི་དགག་བྱ་གཉིས་སུ་ངེས་པ་ལས། རེ་ཞིག་སྣང་བ་ནི་འགོག་པར་རིགས་པ་མ་ཡིན་ཏེ། དཔེར་ན། མིག་རབ་རིབ་ཀྱིས་བསླད་པ་རྣམས་ཇི་སྲིད་མིག་སྐྱོན་དང་མ་བྲལ་བ་དེ་སྲིད་དུ་སྐྲ་ཤད་དང་ཟླ་བ་གཉིས་སོགས་ཀྱི་སྣང་བ་མི་ལྡོག་པ་བཞིན་དུ། ཇི་སྲིད་ཉོན་མོངས་པ་ཅན་མ་ཡིན་པའི་མ་རིག་པ་མ་སྤངས་པ་དེ་སྲིད་དུ་ཚོགས་དྲུག་གི་སྣང་བ་སྒྱུ་མ་ལྟ་བུ་འདི་མི་ལྡོག་པས་དེ་ཉིད་རིགས་པས་དགག་མི་ནུས་པའི་ཕྱིར་རོ། ། དགག་དགོས་པ་ཡང་མ་ཡིན་ཏེ། ཉེས་པ་རྣམས་ནི་སྣང་བ་ལས་བྱུང་བ་མིན་པར་དེ་ལ་ཞེན་པ་ལས་བྱུང་བ་ཡིན་པའི་ཕྱིར་ཏེ། དཔེར་ན། སྒྱུ་མ་མཁན་རང་གིས་སྤྲུལ་པའི་ན་ཆུང་ལ་མི་ཆགས་པ་བཞིན་དུ་སྣང་བ་ཡོད་ཀྱང་ཞེན་པ་མེད་ན་མི་འཆིང་བའི་ཕྱིར་དང༌། བྱིས་པ་རྣམས་སྒྱུ་མའི་ན་ཆུང་ལ་ཆགས་པ་སྐྱེ་བ་ལྟར་མངོན་པར་ཞེན་པ་ལས་ཉོན་མོངས་འཕེལ་བའི་ཕྱིར་རོ། ། ཆེད་ཀྱིས་བཀག་ན་ཉེན་པར་ཡང་འགྱུར་ཏེ། སྣང་བ་བཀག་ན་སྟོང་ཉིད་དངོས་པོ་མེད་པའི་དོན་ཅན་དུ་འགྱུར་ཞིང༌། སྟོང་ཉིད་སྒོམ་པའི་རྣལ་འབྱོར་པའང་ཅང་མེད་ཀྱི་བཀག་པ་ཡིད་ལ་བྱེད་པས་ཆད་མཐར་ལྟུང་བའི་ཕྱིར་རོ། ། དེ་བས་ན། ཀུན་བརྟགས་པ་འབའ་ཞིག་འགོག་པར་བྱེད་དེ། དེ་ནི་ཐག་པ་ལ་སྦྲུལ་བཞིན་དུ་བློས་ཞེན་པ་ཙམ་མ་གཏོགས་དོན་ལ་མ་ཞུགས་པས་དགག་པར་ནུས་པའི་ཕྱིར་དང༌། རྣམ་འགྲེལ་ལས། འདི་ཡུལ་སུན་དབྱུང་མེད་པར་ནི། ། དེ་སྤོང་བར་ནི་ནུས་མ་ཡིན། ། ཞེས་གསུངས་(༢༦༡བ)པ་ལྟར། ཡུལ་མ་བཀག་པར་ཡུལ་ཅན་དགག་མི་ནུས་པ་དངོས་པོའི་མཚན་ཉིད་ཡིན་པས། བརྟགས་པ་མ་བཀག་པར་ཡང་དེའི་ཡུལ་ཅན་གྱི་མངོན་པར་ཞེན་པ་དགག་མི་ནུས་ལ། དེ་མ་བཀག་པར་ཡང་ཀུན་ནས་ཉོན་མོངས་པ་མི་ལྡོག་སྟེ། དེ་ནི་དེའི་རྩ་བ་ཅན་ཡིན་པའི་ཕྱིར་རོ། ། དེས་ན། དབུ་མ་པས་དགག་བྱ་ནི་བཏགས་པ་ཁོ་ན་ཡིན་ལ། དེ་ལའང་རྣམ་པ་གཉིས་ཏེ། གཅིག་ནི་ཐ་སྙད་ཙམ་དུ་གྲུབ་པ་དགག་པར་བྱ་བ་ཡིན་ལ། གཞན་ནི་དོན་ལ་གྲུབ་པ་དགག་པར་བྱ་བ་ཡིན་གྱི། ཐ་སྙད་དུ་མ་ཡིན་པ་གང་ཡིན་པའོ། ། དང་པོ་ནི། རང་གཞན་གྱི་གྲུབ་མཐའ་སྨྲ་བ་རྣམས་ཀྱིས་བདག་དང་ཆོས་སུ་ཀུན་བརྟགས་པ་གང་ཡིན་པ་རྣམས་ཏེ། དེ་དག་ནི་ཀུན་རྫོབ་ཀྱི་བདེན་པར་ཡང་མ་གྲུབ་པར་གོང་དུ་བཤད་པ་ལྟར་རོ། ། གཉིས་པ་ནི། འཇིག་རྟེན་ན་གྲགས་པའི་ཐ་སྙད་རྟེན་ཅིང་འབྲེལ་བར་འབྱུང་བ་རྒྱུ་དང་རྐྱེན་འདི་ཙམ་པ་ཉིད་དོ། ། འདི་ལའང་འཇིག་རྟེན་ན་དངོས་སུ་གྲགས་པ་སོང་ཞིག །འདུག་ཅིག །ཟོ་ཞིག་ལ་སོགས་པ་དང༌། དངོས་སུ་མ་གྲགས་ཀྱང༌གྲགས་རུང་གི་ཐ་སྙད་རྒྱུ་འབྲས་དང་ས་ལམ་སྤང་གཉེན་སོགས་གསུང་རབ་ལ་གྲགས་པ་རྣམས་སོ། ། དེ་ལ་འཇིག་རྟེན་པའི་ཐ་སྙད་དུ་གྲགས་པ་དེ་ཉིད་ཐ་སྙད་ཙམ་དུ་དགག་པར་མི་བྱ་བའི་ཚུལ་ཡང་གོང་དུ་སྣང་སེལ་གྱི་སྐབས་སུ་སྨོས་པ་ལྟར་རོ། ། བསྒྲུབ་བྱ་ལའང་། དོན་སྒྲུབ་པ་དང་། ཐ་སྙད་སྒྲུབ་པ་གཉིས་ལས། དོན་སྒྲུབ་པ་ལ་ཡང་། རྒོལ་བའི་ཤེས་འདོད་ཐ་དད་པའི་དབང་གིས་དངོས་པོའི་རང་བཞིན་མེད་པའི་མེད་པར་དགག་པ་དང༌། རང་བཞིན་ཙམ་གྱི་དགག་བྱ་དེ་མེད་པའི་མེད་པར་དགག་པ་གཉིས་ཡོད་ལ། དེའང་ཆོས་ཅན་རང་བཞིན་གྱིས་གྲུབ་པ་དང་བདེན་པ་སོགས་བཀག་ཙམ་གྱི་མེད་པར་དགག་པ་ནི་འདིར་བསྒྲུབ་བྱ་ཡིན་ཏེ། དཔེར་ན། སྣང་བ་འདི་ཡང་དག་པའི་རང་བཞིན་དུ་ཡོད་པ་མ་ཡིན་ཏེ། ཞེས་སམ། (༢༦༢ན)ཇི་ལྟར་བརྟགས་པ་དེ་ལྟར་དུ་མེད་དོ་ཞེས་པ་ལྟ་བུའི་མེད་དགག་རྣམ་གཅོད་དགག་བྱ་ཆད་ཙམ། སྤྲོས་པ་དང་བྲལ་ཙམ་དེ་ཉིད་མ་གཏོགས་ཡོངས་གཅོད་ཀྱི་བསྒྲུབ་བྱ་གང་ཡང་མེད་པའོ། ། དེ་མེད་པས་གཞན་གྱིས་བརྩད་དུ་ཡང་མེད་དེ། རྩོད་ཟློག་ལས། གལ་ཏེ་ངས་དམ་བཅས་འགའ་ཡོད། ། དེས་ན་ང་ལ་སྐྱོན་དེ་ཡོད། ། ང་ལ་དམ་བཅའ་མེད་པའི་ཕྱིར། ། ང་ནི་སྐྱོན་མེད་ཁོ་ན་ཡིན། ། གལ་ཏེ་མངོན་སུམ་ལ་སོགས་པའི། ། དོན་གྱིས་འགའ་ཞིག་དམིགས་ན་ནི། ། སྒྲུབ་པའམ་ཟློག་པར་བྱ་ན་དེ། ། མེད་ཕྱིར་ང་ལ་ཀླན་ཀ་མེད། ། ཅེས་སོ། ། དེ་ལ་མེད་པར་དགག་པའི་དོན་ནི་ཅི་ཡང་མ་ཡིན་པ་ལ་བྱ་སྟེ། མདོ་ལས། ཅི་ཡང་མ་ཡིན་ཆོས་འདི་སུས་ཤེས་པ། ། དེ་ནི་ཆོས་རྣམས་ཀུན་ལ་ཆགས་མེད་འགྱུར། ། ཞེས་པས་སྒྲ་རྟོག་གི་མཐུ་ཟད་ནས་ངལ་བ་ངལ་སོས་པ་ལྟ་བུ་ཡིན་པར་བཤད་དོ། ། དགག་སྒྲུབ་ཀྱི་དོན་མདོར་ན། བྱས་པས་སྒྲ་མི་རྟག་པར་སྒྲུབ་པ་ན། སྒྲ་རྟག་པར་སྒྲོ་འདོགས་པའི་ཤེས་པ་ནི་དགག་བྱ་དངོས་དང༌། སྒྲ་མི་རྟག་པར་སྒྲོ་འདོགས་པའི་ཤེས་པ་ནི་བསྒྲུབ་བྱ་དངོས་ཏེ། འདི་ལ་དགོངས་ནས། ཀླུ་སྒྲུབ་ཞབས་ཀྱིས། རང་བཞིན་མེད་པ་གོ་བར་བྱེད་པ་ཡིན་གྱི། སྐྱེ་བ་སེལ་བ་མ་ཡིན་ནོ། །ཞེས་སོ། ། སྒྲུབ་བྱེད་གཏན་ཚིག་ནི། སྤྱིར་དབུ་མའི་རིགས་པའི་རྟགས་ཀྱི་ཚུལ་ལ། དགག་པ་འགོད་པ་དང་། སྒྲུབ་པ་འགོད་པ་གཉིས་ལས། དང་པོ་ལ། རྒྱུ་ལ་རྣམ་པར་དཔྱད་ནས་འགོག་པ་རྡོ་རྗེ་གཟེགས་མ། འབྲས་བུ་ལ་དཔྱད་ནས་འགོག་པ་ཡོད་མེད་སྐྱེ་འགོག །རྒྱུ་འབྲས་གཉིས་ཀ་ལ་དཔྱད་ནས་འགོག་པ་མུ་བཞི་སྐྱེ་འགོག །རང་གི་ངོ་བོ་ལ་དཔྱད་ནས་འགོག་པ་གཅིག་དང་དུ་བྲལ་ཏེ་བཞི་ཡོད་པའི། དང་པོ་ནི། སཱ་ལུ་ལྗང་པའི་མདོ་དང་། ཕྱི་མ་ནི། ལང་གཤེགས་ལས་གསུངས་ཤིང་། བར་པ་གཉིས་ཀྱང་མདོ་ཅི་རིགས་ནས་(༢༦༢བ)འབྱུང་ལ། འདི་བཞིས་དངོས་སྨྲ་བས་རང་བཞིན་གྱིས་ཡོད་པར་སྒྲོ་འདོགས་པ་སེལ་བས་ཡོད་མཐའ་སྤོང་བའོ། ། དེ་བཞི་ཡང་རིམ་པ་བཞིན་དུ། རྒྱུ་ལ་དཔྱད་པ་ནི། མྱུ་གུ་སྐྱེ་ན། བདག་ལས་སམ། གཞན་ལས་སམ། གཉིས་ཀ་ལས་སམ། རྒྱུ་མེད་ལས་སྐྱེ་ཞེས་དཔྱད་པས། རིགས་ངོར་གང་ལས་ཀྱང་མི་སྐྱེ་བས་སྐྱེ་མེད་དུ་སྒྲུབ་པའོ། ། འབྲས་བུ་ལ་དཔྱོད་པ་ནི། མྱུ་གུ་སྐྱེ་ན། ས་བོན་གྱི་སྐབས་ཡོད་པ་སྐྱེའམ། མེད་པ་སྐྱེ་ཞེས་དཔྱད་པས། ས་བོན་གྱི་སྐབས་ཡོད་པ་སྐྱེ་ན་མྱུ་གུ་ས་བོན་ལས་མ་སྐྱེས་པ་དང༌། རྒྱུ་ལ་མ་ལྟོས་པར་གྲུབ་ཟིན་པས་རྒྱུ་ལ་དགོས་པ་མེད་པ་དང༌། མེད་པ་སྐྱེ་ན་རི་རྭ་བཞིན་དུ་རྒྱུས་ནུས་པ་ཅི་ཡང་བྱར་མེད་པ་དང༌། གཉིས་ཡིན་རིགས་པ་དེས་ཁེགས་ཤིང་གཉིས་མིན་མི་སྲིད་པས། དོན་ལ་མྱུ་གུ་སྐྱེ་མེད་དུ་སྒྲུབ་པའོ། ། རྒྱུ་འབྲས་གཉིས་ཀ་ལ་དཔྱོད་པ་ནི། འཁྲུལ་ངོར་ས་བོན་གཅིག་ལས་མྱུ་གུ་གཅིག་ཅེས་དང༌། རྐྱེན་གསུམ་ལས་མིག་ཤེས་གཅིག་ཅེས་དང༌། ཕ་གཅིག་ལས་བུ་དུ་མ་དང༌། ས་བོན་ཆུ་ལུད་དུ་མ་ལས་སྟོན་ཐོག་དུ་མ་ཞེས་སོགས་འགལ་བ་མེད་མོད། རིགས་ངོར་ནི་མུ་བཞིའི་ནང་ནས་རྒྱུ་གཅིག་ཁོ་ན་ལས་འབྲས་བུ་གཅིག་ཁོ་ན་དང༌། རྒྱུ་གཅིག་ཉིད་ལས་འབྲས་བུ་དུ་མ་དང༌། རྒྱུ་དུ་མ་ལས་འབྲས་བུ་གཅིག་ཁོ་ན་དང༌། རྒྱུ་དུ་མ་ལས་འབྲས་བུ་དུ་མ་འབྱུང་བ་མི་འཐད་དེ། རིགས་ངོར་གཅིག་ཉིད་མི་རིགས་ལ། དེས་དུ་མ་བདེན་གྲུབ་ཀྱང་ཁེགས་པས། སྐྱེ་མེད་སྒྲུབ་པའོ། ། ངོ་བོ་ལ་དཔྱོད་པ་ནི། མྱུ་གུ་ལྟ་བུ་བདེན་པའི་གཅིག་དང་བདེན་པའི་དུ་མས་དབེན་པའི་རྟགས་ཀྱིས་བདེན་མེད་དུ་སྒྲུབ་པ་སྟེ། གཅིག་དུ་བྲལ་གྱི་རིགས་པ་འདི་ནི་ནང་པའི་གྲུབ་མཐའ་བཞི་པོ་ཐམས་ཅད་ཀྱི་དགག་བྱ་བདེན་གྲུབ་འགོག་པའི་རིགས་པའི་རྩ་བ་ཡིན་ཞིང༌། དེའི་ཕྱིར་དབུ་མ་རྩ་བར། སྐྱེ་འགག །རྟག་ཆད། འགྲོ་འོང་། དོན་གཅིག་པ་དང་ཐ་དད་པ་སྟེ། བརྒྱད་པོ་བཀག་པ་བསྟན་(༢༦༣ན)བཅོས་ཀྱི་མདོར་བསྟན་དུ་གསུངས་པ་ལ་གཞན་དྲུག་པོ་གཅིག་དང་ཐ་དད་དགག་པ་ལ་རག་ལས་ཤིང༌། གཅིག་དང་ཐ་དད་དགག་པ་ནི་གཅིག་དུ་བྲལ་ཉིད་དོ། ། རྟགས་ཀྱི་ཚུལ་ལ་སྒྲུབ་པ་དགོད་པ་ནི། སྣང་ཙམ་ལ་དཔྱོད་པ་རྟེན་འབྲེལ་གྱི་རིགས་པ་སྟེ། ཀླུའི་རྒྱལ་པོ་མ་དྲོས་པས་ཞུས་པ་ལས་འབྱུང༌། དེ་ནི་རྟེན་ཅིང་འབྲེལ་འབྱུང་གི་རྟགས་ཀྱིས་མྱུ་གུ་ལྟ་བུ་བདེན་མེད་དུ་སྒྲུབ་པ་སྟེ། འདི་ཉིད་སྒྲུབ་རྟགས་སུ་བཞག་པ་དངོས་བསྟན་གྱི་དབང་དུ་བྱས་ཀྱི། དོན་དུ་ན། འདི་ཡང་དགག་བྱ་བདེན་པ་འགོག་པས་དགག་རྟགས་སུ་འགྱུར་ལ། འདི་ནི་དབུ་མ་པས་བདེན་སྟོང་སྒྲུབ་པའི་རིགས་པའི་རྒྱལ་པོ་ཡིན་ཏེ། རྟག་ཆད་གཉིས་ཀའི་མཐའ་སེལ་བས་སོ། ། དེ་ཡང་རྟེན་ཅིང་འབྲེལ་བར་འབྱུང་བ་ཡིན་པའི་ཕྱིར་ཐ་སྙད་དུ་མེད་པ་མ་ཡིན་པས་ཆད་མཐའ་སེལ་ཞིང༌། རང་རྒྱུ་དང་རྐྱེན་གཞན་ལ་རག་ལས་པས་རྟག་པ་དང་ངོ་བོ་ཉིད་ཀྱིས་སྒྲུབ་པའི་དོན་མི་གནས་པའི་ཕྱིར་རང་བཞིན་མེད་པར་གྲུབ་པས་རྟག་མཐའ་སེལ་ལོ། ། དེ་ལྟར་དུ་མ་དྲོས་པས་ཞུས་པ་ལས། མཁས་པས་རྟེན་འབྱུང་ཆོས་རྣམས་རྟོགས་འགྱུར་ཏེ། ། མཐར་ལྟ་བ་ལ་བརྟེན་པར་ཡོངས་མི་བྱེད། ། ཅེས་སོ། ། འདི་དག་གི་སྐབས་སུ། དངོས་པོའི་རང་བཞིན་ཤེས་བྱ་ལ་མི་སྲིད་པས་ཁྱབ་པར་བྱ་བ་དང་ཁྱབ་པར་བྱེད་པའི་འབྲེལ་པ་མེད་པའི་ཕྱིར་ལྡོག་པའི་ཁྱབ་པ་མེད་ཀྱང༌། སྤྱིར་བུམ་པ་ཡོད་ན་བུམ་པ་གཅིག་གམ་དུ་མ་གང་ཡང་རུང་བར་གྲུབ་པའི་ཁྱབ་པ་ངེས་པ་ལྟ་བུ་དང༌། མཐུན་པའི་དཔེ་སྒྱུ་མ་དང་གཟུགས་བརྙན་ལ་སོགས་པ་སྦྱོར་ཞིང༌། གཏན་ཚིག་དེ་ལ་བརྟེན་པའི་རྗེས་དཔག་གིས་གཞལ་བྱ་ནི་གཏན་ཚིག་དེས་བསྒྲུབ་པར་བྱ་བ་ཉིད་ཡིན་ཏེ། ཚུལ་དེ་དག་དང་དོན་དམ་བདེན་པའི་གནས་ལ་ཐལ་རང་གཉིས་མི་མཐུན་པ་མེད་དོ། ། ཚ༢ གཉིས་པ་དེ་དག་གི་ཁྱད་པར་བཤད་པ་ནི། ཀུན་རྫོབ་རྩོད་ངག་ལ་(༢༦༣བ)སོགས་ཁྱད་པར་མང༌། ། ཐལ་རང་གཉིས་ཀས་བདེན་གཉིས་རྣམ་པར་འཇོག་པར་བྱེད་ཅིང་། དོན་དམ་བདེན་པ་ལ་ནི་གོང་སྨོས་ལྟར་མི་མཐུན་པ་ཅུང་ཟད་ཀྱང་མེད་དེ། གཞན་དུ་ན་དངོས་པོའི་གནས་ལུགས་དུ་མ་མེད་པས་གང་ཡང་རུང་བ་ཞིག་དབུ་མ་མ་ཡིན་པར་ཐལ་བར་འགྱུར་བའི་ཕྱིར། ཀུན་རྫོབ་ཀྱི་བདེན་པ་རྣམ་པར་འཇོག་པ་དེ་ལ་མི་མཐུན་པ་ཡིན་ཏེ། དེའང་རང་རྒྱུད་པ་རྣམས་ནི་ཀུན་རྫོབ་ཀྱི་རྣམ་གཞག་འཇིག་རྟེན་པའི་ཐ་སྙད་ཀྱི་རྗེས་སུ་མི་འབྲང་སྟེ། འཇིག་རྟེན་པ་རྣམས་ནི་རིགས་པས་དཔྱད་པ་མེད་པ་ཁོ་ནར་རང་གར་ཐ་སྙད་ལ་འཇུག་པས་འཁྲུལ་པ་སྲིད་པའི་ཕྱིར་རོ་སྙམ་དུ་བསམས་ནས། རྣམ་རིག་པ་དང་མདོ་སྡེ་པ་ལ་སོགས་པ་རིགས་པ་ཤེས་པ་རྣམས་དང་རྗེས་སུ་མཐུན་པར་ཀུན་རྫོབ་རྣམ་པར་འཇོག་པར་བྱེད་ཅིང་རྣམ་རིག་པ་སོགས་དོན་དམ་པའི་བདེན་པ་ལས་ཉམས་ཀྱང་ཀུན་རྫོབ་ཀྱི་བདེན་པ་ལས་མ་ཉམས་པར་འདོད། ཐལ་འགྱུར་བ་ནི། དཔེར་ན། ཤིང་ལ་འཛེག་པ་མི་མཁས་པའི་རང་བཞིན་ཅན་དག་ཁྱད་པར་དུ་འགྲོ་བར་འདོད་པས་ཤིང་གི་ཡལ་ག་འོག་མ་བཏང་ནས་གོང་མ་སྙེགས་པས་མ་སླེབ་སྟེ་བར་མ་དོའི་གཡང་སར་ལྟུང་བ་ལྟར། དངོས་སྨྲ་བ་རྣམས་ཀྱང་དེ་ཁོ་ན་ཉིད་འཚོལ་བའི་བསམ་པས་འཇིག་རྟེན་གྱི་ཐ་སྙད་ལས་འདས་ཤིང་ཡང་དག་པའི་དོན་ཡང་མ་རྟོགས་པར་བར་མ་དོར་རྟག་ཆད་ཀྱི་མཐར་ལྟུང་བས་བདེན་པ་གཉིས་ཀ་ལས་ཉམས་པར་སྨྲ་སྟེ། འཇུག་པ་ལས། འཕགས་པ་ཀླུ་སྒྲུབ་ཞབས་ཀྱི་ལམ་ལས་ནི། ། ཕྱི་རོལ་གྱུར་ལ་ཞི་བའི་ཐབས་མེད་དོ། ། དེ་དག་ཀུན་རྫོབ་དེ་ཉིད་བདེན་ལས་ཉམས། ། བདེན་གཉིས་ཉམས་ལས་ཐར་པ་འགྲུབ་ཡོད་མིན། ། ཞེས་བཤད་པའི་ཕྱིར་རོ། ། དེ་བས་ན། སློབ་དཔོན་དེ་དག་ནི་གྲུབ་མཐའ་སྨྲ་བ་གཞན་གྱི་རྗེས་སུ་མི་འབྲང་བར་འཇིག་རྟེན་པ་ཁོ་ནའི་ཐ་སྙད་ཀྱི་རྗེས་སུ་འབྲང་ནས་ཀུན་རྫོབ་ཀྱི་བདེན་པ་འཇོག་པར་བྱེད་དེ། (༢༦༤ན)ཇི་ལྟར་དོན་དམ་པའི་བདེན་པ་ལ་འཕགས་པ་རྣམས་ཁོ་ན་ཚད་མ་ཡིན་པ་ལྟར་ཀུན་རྫོབ་ཀྱི་བདེན་པ་འཇོག་པ་ལ་ཡང་འཇིག་རྟེན་པ་ཁོ་ན་ཚད་མ་ཡིན་པའི་ཕྱིར་སྙམ་དུ་དགོངས་པ་ཡིན་ནོ། ། མདོར་ན། འཇིག་རྟེན་པས་ནི་བདག་དང་གཞན་ལས་ཞེས་བྱ་བ་ལ་སོགས་པའི་རྣམ་པར་དཔྱོད་པ་འཇུག་པ་མེད་པར་བྱས་ནས། རྒྱུ་ལས་འབྲས་བུ་འབྱུང་ངོ་ཞེས། འདི་ཙམ་ཞིག་རྟོགས་པ་ཡིན་ལ། ཐལ་འགྱུར་བ་ཡང་ཀུན་རྫོབ་དེ་ལྟར་རྣམ་པར་གཞག་པ་མཛད་པ་ཡིན་ནོ། ། ཐ་སྙད་དུ་ཁས་ལེན་པའི་ཚུལ་ཡང་མི་འདྲ་སྟེ། རང་རྒྱུད་པ་རྣམས་ཀུན་རྫོབ་ཀྱི་བདེན་པ་ཐ་སྙད་དུ་རང་ལུགས་སུ་ཁས་ལེན་པར་བྱེད་ལ། ཐལ་འགྱུར་པ་རྣམས་ནི་དོན་དམ་དང་ཐ་སྙད་གང་དུ་ཡང་རང་ལུགས་སུ་རྣམ་པར་གཞག་པར་བྱ་བ་ཅུང་ཟད་ཀྱང་མེད་ཀྱི། འོན་ཀྱང་དགོས་པའི་དབང་ཁོ་ནར་ཀུན་རྫོབ་ཀྱི་བདེན་པ་ཡང་འཇིག་རྟེན་གཞན་ངོ་འབའ་ཞིག་ཏུ་ཁས་བླངས་པ་མ་གཏོགས་ཐ་སྙད་ཙམ་དུ་ཡང་རང་གི་ལུགས་ཡིན་པར་ཁས་མི་ལེན་ཏེ། དེ་ཉིད་ལས། ཇི་ལྟར་ཁྱོད་ཀྱིས་གཞན་དབང་དངོས་འདོད་ལྟར། ། ཀུན་རྫོབ་ཀྱང་ནི་བདག་གིས་ཁས་མ་བླངས། །