Tibetan
ཕྱིར་ཞེས་པ་ནི་རྒྱུ་མཚན་མཚུངས་པའི་མགོ་སྙོམས་སོ། ། དེ་ལ་སྐྱེད་པའི་ནུས་པ་ཡོད་མེད་ཀྱི་ཁྱད་པར་ཡོད་དོ་ཞེ་ན། དེ་ནི་རྩ་བའི་བསྒྲུབ་བྱ་དང་མཚུངས་སོ་ཞེས་པ་ནི་སྒྲུབ་བྱེད་བསྒྲུབ་བྱ་དང་མཚུངས་པའི་མ་གྲུབ་པའོ། །(༢༦༩ན) དེས་ན། ས་བོན་ལས་མྱུ་གུ་མི་སྐྱེ་སྟེ། ས་མྱུག་གཉིས་རང་བཞིན་གྱིས་གཞན་ཡིན་པའི་ཕྱིར། ཞེས་པ་ནི། གཞན་ལ་གྲགས་ཀྱི་རྗེས་དཔག་གོ། ། གཅེར་བུ་པ་ནི། བདག་གཞན་གཉིས་ཀ་ལས་སྐྱེ་བར་འདོད་དེ། རྫ་བུམ་དེ་འཇིམ་པའི་བདག་ཉིད་ལས་སྐྱེ་བ་ནི་བདག་ལས་སྐྱེ་བའི་དོན་དང༌། རྫ་མཁན་དང་སྲད་བུ་དང་ཆུ་ལ་སོགས་པ་ལས་སྐྱེ་བ་ནི་གཞན་ལས་སྐྱེ་བའི་དོན་ནོ་ཞེས་ཟེར། དེ་འགོག་པའི་རིགས་པ་ནི། བདག་གཞན་རེ་རེ་བ་ལས་སྐྱེ་བ་འགོག་པའི་རིགས་པ་དེ་དག་གིས་ཁེགས་པ་ཡིན་ཏེ། འཇུག་པ་ལས། གཉིས་ལས་སྐྱེ་བའང་རིགས་པའི་ངོ་བོ་མ་ཡིན་གང་གི་ཕྱིར། ། བཤད་ཟིན་ཉེས་པ་དེ་དག་ཐོག་ཏུ་བབ་པ་ཡིན་ཕྱིར་རོ། ། ཞེས་བཤད་པའི་ཕྱིར། རྒྱང་འཕེན་པ་ནི། འཇིག་རྟེན་འདི་རྒྱུ་མེད་པ་ལས་སྐྱེ་བར་འདོད་དེ། དེ་དགག་པ་ལ་བཞི། དང་པོ་ནི། འཇིག་རྟེན་འདི་ཆོས་ཅན། མངོན་སུམ་གྱིས་གཟུང་དུ་མེད་པར་ཐལ། རྒྱུ་མེད་པའི་ཕྱིར་ཞེས་པ་ནི་འགལ་བ་བརྗོད་པའོ། ། དེ་ལ་ཁྱབ་པ་མ་ངེས་སོ་ཞེ་ན། ནམ་མཁའི་ཨུཏྤལའི་དྲི་མདོག་ཀྱང་གཟུང་དུ་ཡོད་པར་ཐལ། རྒྱུ་མེད་ཀྱང་གཟུང་དུ་ཡོད་པའི་ཕྱིར། ཞེས་པ་ནི་རྒྱུ་མཚན་མཚུངས་པའི་མགོ་སྙོམས་སོ། ། དེ་གཉིས་ལ་ངོ་བོ་ཡོད་མེད་ཀྱི་ཁྱད་པར་ཡོད་དོ་ཞེ་ན། དེ་ནི་རྩ་བའི་བསྒྲུབ་བྱ་དང་མཚུངས་སོ་ཞེས་པ་ནི་སྒྲུབ་བྱེད་བསྒྲུབ་བྱ་དང་མཚུངས་པའི་མ་གྲུབ་པའོ། ། དེས་ན། འཇིག་རྟེན་འདི་ཆོས་ཅན། རྒྱུ་མེད་ལས་མི་སྐྱེ་སྟེ། རེས་འགའ་སྐྱེ་བའི་ཕྱིར་ཞེས་པ་ནི་གཞན་ལ་གྲགས་ཀྱི་རྗེས་དཔག་གོ། ། ཐ་སྙད་འཇལ་བློར་འཁྲུལ་པའི་ཤེས་པས་ཁྱབ། ། ཡང་ལོག་ཀུན་རྫོབ་དོན་བྱེད་མི་བྱེད་མཉམ། ། བདེན་གཉིས་འཇོག་བྱེད་འཁྲུལ་བཅས་འཁྲུལ་མེད་དེ། ། མདོར་ན་རིག་ཚོགས་འགྲེལ་བྱེད་མཐར་ཐུག་གོ། ། གཞན་ཡང་ལུགས་སྲོལ་འདི་ལ་ཐ་སྙད་འཇལ་བའི་བློ་ལ་(༢༦༩བ)འཁྲུལ་ཤེས་ཀྱིས་ཁྱབ་པ་དང༌། བྱང་ཆུབ་སེམས་འགྲེལ་ལས། རྨི་ལམ་སད་པའི་གནས་སྐབས་ལ། ། དོན་བྱེད་པ་ལ་ཁྱད་པར་མེད། ། ཅེས་གསུངས་པ་ལྟར། སྒྱུ་མ་རྨི་ལམ་གྱི་རྟ་གླང་དང་རྟ་གླང་དངོས་སམ་རི་མོར་བྲིས་པའི་བ་དང་བ་དངོས་ལ་འཁྲུལ་ངོར་དོན་བྱེད་མཉམ་དང་། རིག་ངོར་མི་བྱེད་མཉམ་དང༌། འཇིག་རྟེན་ཀུན་རྫོབ་དང་རྣལ་འབྱོར་ཀུན་རྫོབ་གཉིས་ཀྱི་དངོས་པོ་ལ་ཡང་ལོག་ཡོད་ཀྱང་དེ་རང་ལུགས་མིན་ལ། རང་ལུགས་རྣལ་འབྱོར་ཀུན་རྫོབ་ལ་ཡང་ལོག་མེད་པས་ཙམ་པོར་འདོད་པ་དང༌། བདེན་པ་གཉིས་འཇོག་བྱེད་ཀྱང་ཀུན་རྫོབ་ཀྱི་ངོ་བོ་བློ་འཁྲུལ་པ་དང་བཅས་པའི་ངོར་རྫུན་སྣང༌། དོན་དམ་གྱི་ངོ་བོ་བློ་འཁྲུལ་པ་མེད་པའི་ངོར་སྣང་བ་སྟེ། མཐོང་བ་བརྫུན་པས་རྙེད་པའི་རྙེད་དོན་སྔ་མའི་མཚན་ཉིད། སྤྱིར་མ་རིག་པ། བྱེ་བྲག་བདེན་འཛིན། ཁྱད་པར་སོ་སྐྱེའི་རྒྱུད་ཀྱི་མ་རིག་པ་ནི་དེའི་མཚན་གཞི། མཐོང་བ་ཡང་དག་པས་རྙེད་པའི་རྙེད་དོན་ཕྱི་མའི་མཚན་ཉིད། མ་རིག་པའི་འགལ་ཟླར་གྱུར་པའི་བདེན་མེད་མངོན་སུམ་དུ་རྟོགས་པའི་ཡེ་ཤེས་ནི་དེའི་མཚན་གཞི་སྟེ། འཇུག་པ་ལས། དངོས་ཀུན་ཡང་དག་བརྫུན་པ་མཐོང་བ་ཡིས། ། དངོས་རྙེད་ངོ་བོ་གཉིས་ནི་འཛིན་པར་འགྱུར། ། ཡང་དག་མཐོང་ཡུལ་གང་དེ་དེ་ཉིད་དེ། ། མཐོང་བ་རྫུན་པ་ཀུན་རྫོབ་བདེན་པར་གསུངས། ། ཞེས་སོ། ། གཞན་ཡང་དེ་ཉིད་ལས། རབ་རིབ་མཐུ་ཡིས་སྐྲ་ཤད་ལ་སོགས་པའི། ། ངོ་བོ་ལོག་པ་གང་ཞིག་རྣམ་བཏགས་པ། ། དེ་ནི་བདག་ཉིད་གང་དུ་མིག་དག་པས། ། མཐོང་སྟེ་དེ་ཉིད་དེ་བཞིན་འདིར་ཤེས་ཀྱིས། ། ཞེས་གསུངས་ལ། དེའི་དོན་ནི། མ་རིག་པའི་དབང་གིས་རྟེན་འབྲེལ་སྣ་ཚོགས་སུ་སྣང་བ་ཀུན་རྫོབ་བདེན་པའི་མཚན་ཉིད་དང༌། སྣང་བ་དེ་འཕགས་པའི་ཡེ་ཤེས་ཀྱིས་ཅིར་ཡང་མ་གཟིགས་པའི་དབྱིངས་དེ་དོན་དམ་པའི་མཚན་ཉིད་དེ། དཔེར་ན། འཇིག་རྟེན་ན་རབ་རིབ་ཅན་ལ་(༢༧༠ན)སྐྲ་ཤད་དུ་སྣང་བ་ཀུན་རྫོབ་ཀྱི་དཔེ་དང༌། དེ་ཉིད་རབ་རིབ་མེད་པའི་མིག་གིས་ཅིར་ཡང་མ་མཐོང་བ་ནི་དོན་དམ་པའི་དཔེའོ། ། མདོར་ན། ལུགས་སྲོལ་འདི་ན་དབུ་མ་རིག་ཚོགས་ཀྱི་དགོངས་པ་འགྲེལ་བྱེད་མཐར་ཐུག་ཡིན་པར་བོད་ཀྱི་མཁས་པ་ཕལ་མོ་ཆེ་བཞེད་དོ། ། ཝ༢ གཉིས་པ་གཞུང་ཕྱི་མོའི་དབུ་མ་འཆད་པ་ལ་གཉིས། ཞ༡ སྤྱིར་བསྟན་པ་དང༌། ཞ༢ བྱེ་བྲག་ཏུ་བཤད་པའོ། ། ཞ༡ དང་པོ་ནི། ཟབ་མོ་སྟོང་པ་ཉིད་ཀྱི་གཏམ་གྱི་གཞི། ། གཞུང་ཀུན་ཕྱི་མོ་འཕགས་པ་ཡབ་སྲས་ལུགས། ། གནས་སྐབས་གསུམ་གྱིས་འཆད་ཅེས་མཁས་རྣམས་སྨྲ། ། དེ་བཞིན་གཤེགས་པའི་ཆོས་ཀྱི་འཁོར་ལོ་མཐའ་དག་གི་སྙིང་པོ། ཟབ་མོ་སྟོང་པ་ཉིད་ཀྱི་གཏམ་ཕྱིན་ཅི་མ་ལོག་པའི་གཞི། དབུ་མའི་གཞུང་ལུགས་ཀུན་གྱི་ཕྱི་མོ་འཕགས་པ་ཡབ་སྲས་ཀྱི་ལུགས་རྣམས་འཆད་པ་ན། མ་བརྟགས་མ་དཔྱད་པའི་གནས་སྐབས་དང༌། རིག་ཤེས་ཀྱིས་ཅུང་ཟད་དཔྱད་པའི་གནས་སྐབས་དང༌། བརྗོད་བྲལ་གྱིས་ལེགས་པར་དཔྱད་པའི་གནས་སྐབས་ཏེ། གནས་སྐབས་གསུམ་ལ་སྦྱར་ན་འཆད་པ་དང་ཉམས་སུ་བླང་ཤིན་ཏུ་བདེ་བས་མན་ངག་དམ་པ་ཡིན་ཅེས་སྟག་ཚང་ལོ་ཙཱ་དང༌། དེའི་རྗེས་སུ་བྱུང་བའི་མཁས་པ་ཕལ་ཆེ་བ་རྣམས་མགྲིན་གཅིག་ཏུ་སྨྲའོ། ། ཞ༢ གཉིས་པ་བྱེ་བྲག་ཏུ་བཤད་པ་ནི། གཞི་དང་སྤྱོད་ཕྱོགས་འབྲས་བུ་མ་དཔྱད་ངོར། ། ཀུན་རྫོབ་ཐ་སྙད་དག་དང་བསྟུན་ཏེ་སྦྱར། ། བདག་མེད་དོན་དམ་ཅུང་ཟད་དཔྱད་ངོར་གཞག ། ལེགས་པར་དཔྱད་པས་སྤྲོས་པ་ཀུན་ཞིའོ། ། སྤྱིར་འཁོར་ལོ་བར་པ་དང་སྒོས་ཀླུ་སྒྲུབ་ཡབ་སྲས་ཀྱི་གཞུང་ལས་གཞི་ཕུང་ཁམས་སྐྱེ་མཆེད། ལམ་སྤྱོད་པ་ཐབས་ཕྱོགས། འབྲས་བུ་སྐུ་དང་ཕྲིན་ལས་སོགས་ནི་མ་རྟགས་མ་དཔྱད་པའི་ངོར་གྲགས་པ། འཇིག་རྟེན་ཀུན་རྫོབ་ཀྱི་ཐ་སྙད་དག་དང་བསྟུན་ཏེ་སྦྱར་ལ། དེའང་ཕལ་ཆེར་འཇིག་རྟེན་ལ་གྲགས་ཚར་བའམ་གྲགས་(༢༧༠བ)རུང་གི་ཚུལ་གྱིས་འཇིག་རྟེན་ཀུན་རྫོབ་དང༌། མཉམ་རྗེས་ཀྱི་སྣང་ཚུལ་སོགས་ཁ་ཅིག་རྣལ་འབྱོར་ཀུན་རྫོབ་དང་བསྟུན་པའང་ཡོད་དོ། ། དགག་བྱ་བདག་གཉིས་བཀག་ནས་སྐྱེ་མེད་དང་སྟོང་ཉིད་དང་དོན་དམ་བདེན་པ་རྣམ་པར་འཇོག་པའི་སྐོར་རྣམས་ནི་ཅུང་ཟད་དཔྱད་པ་རིགས་ཤེས་ཀྱི་ངོར་རྣམ་པར་བཞག་ལ། ཡུམ་གྱི་དངོས་བསྟན་ཕལ་ཆེ་བ་ལྟ་བུ་ཡོད་མེད་དང་རྟག་མི་རྟག་དང་སྟོང་མི་སྟོང་ལ་སོགས་པ་གང་དུའང་མ་གྲུབ་ཅིང་ཅིར་ཡང་གཟུང་དུ་མི་རུང་བར་གསུངས་པ་ལྟ་བུ་དང༌། བསྟན་བཅོས་རྩ་ཤེ་ལས་ཀྱང༌། སྟོང་ངོ་ཞེས་ཀྱང་མི་བརྗོད་དེ། ། མི་སྟོང་ཞེས་ཀྱང་མི་བྱ་ཞིང༌། ། གཉིས་དང་གཉིས་མིན་མི་བྱ་སྟེ། ། གདགས་པའི་དོན་དུ་བརྗོད་པར་བྱ། ། ཞེས་པའི་རྐང་པ་དང་པོ་གསུམ་པོ་ལྟ་བུ་མང་དུ་གསུངས་པ་རྣམས་ནི་ལེགས་པར་དཔྱད་པའི་གནས་སྐབས་ལ་སྦྱར་ཏེ་བཤད་པས་ཕན་ཚུན་འགལ་བ་ཅུང་ཟད་ཀྱང་མེད་པར་འགྱུར་རོ། ། དབུ་མ་ཤེས་རབ་ལ་འཇུག་པ་ལས། ཡེ་ནས་སྐྱེ་མེད་ངང་འདི་ལ། ། དགག་བྱ་མེད་ལ་བསྒྲུབ་བྱ་མེད། ། མྱ་ངན་འདས་དང་མ་འདས་པ། ། སྐྱེ་མེད་ངང་དུ་ཁྱད་པར་མེད། ། སྐྱེ་མེད་ཉིད་ཀྱང་མ་ཡིན་ཏེ། ། སྐྱེ་བའི་དངོས་པོ་མེད་ཕྱིར་རོ། ། ཀུན་རྫོབ་མེད་ལ་དོན་དམ་མེད། ། སངས་རྒྱས་མེད་ལ་སེམས་ཅན་མེད། ། ལྟ་བ་མེད་ཅིང་བསྒོམ་བྱ་མེད། ། སྤྱོད་པ་མེད་ཅིང་འབྲས་བུ་མེད། ། དེ་ཡི་བློ་ནི་བསྒོམ་བྱ་སྟེ། ། རྟོག་མེད་བློ་ནི་རང་ཞི་བཞག ། ངོས་བཟུང་མེད་ཅིང་གཡེང་བ་མེད། ། མཚན་མ་མེད་ཅིང་གསལ་བར་སྒོམ། ། ཞེས་གསུངས་པ་ཡང་ཤིན་ཏུ་དཔྱད་པའི་གནས་སྐབས་ཏེ། དབུ་མ་ཐལ་འགྱུར་པའི་བཞེད་པ་མཐར་ཐུག་པའོ།། གནས་སྐབས་དེ་གསུམ་ལ་སྦྱོར་དགོས་པའི་རྒྱུ་མཚན་ཀྱང་རིམ་པ་བཞིན་དུ། མ་བརྟགས་མ་དཔྱད་པའི་བླང་དོར་གྱིས་བསོད་ནམས་མིན་པ་དང་པོར་ཟློག་ནས་མཐོ་རིས་ཀྱི་ལམ་དང༌། ཅུང་ཟད་དཔྱད་(༢༧༡ན)པའི་ཉམས་ལེན་གྱིས་བར་དུ་བདག་ལྟ་གཉིས་བཟློག་ནས་ཐར་པའི་ལམ་དང༌། ལེགས་པར་དཔྱད་པའི་ཉམས་ལེན་གྱིས་ཐ་མར་ལྟ་བའི་སྤྲོས་པ་ཀུན་བཟློག་ནས་ཐམས་ཅད་མཁྱེན་པའི་ལམ་མཐར་ཕྱིན་པར་འགྱུར་བའི་ཕྱིར་རོ་ཞེས་བཤད་དོ། ། ཝ༣ གསུམ་པ་གཞི་ལམ་འབྲས་གསུམ་བྱེ་བྲག་ཏུ་བཤད་པ་ལ་གསུམ། ཞ༡ གཞི་དབུ་མ་བདེན་གཉིས་ཟུང་འཇུག ། ཞ༢ ལམ་དབུ་མ་ཐབས་ཤེས་ཟུང་འཇུག ། ཞ༣ འབྲས་བུ་དབུ་མ་སྐུ་གཉིས་ཟུང་འཇུག་གོ། ། ཞ༡ དང་པོ་ལ་གཉིས། ཟ༡ དངོས་དང༌། ཟ༢ སྒྲུབ་བྱེད་ཀྱི་ཚུལ་ལོ། ། ཟ༡ དང་པོ་ནི། འཇིག་རྟེན་ཀུན་རྫོབ་བདེན་པ་ཐབས་ཡིན་ཏེ། ། དོན་དམ་བདེན་པ་ཐབས་བྱུང་ཉིད་དུ་གསུངས། ། འཇིག་རྟེན་པའི་ཐ་སྙད་དུ་གྲགས་པ་ཀུན་རྫོབ་བདེན་པ་མ་དཔྱད་པའི་གནས་སྐབས་སུ་བློས་བཏགས་ནས་སྨྲ་བ་ནི་དོན་དམ་རྟོགས་པའི་ཐབས་སུ་གྱུར་པ་ཡིན་ཏེ། དོན་དམ་བདེན་པ་ནི་ཐབས་དེ་ལས་བྱུང་བ་ཉིད་དུ་གསུངས་ཤིང༌། འདི་ནི་དབུ་མ་པ་རྣམས་ཀྱི་ཤེས་བྱའི་གཞི་ཡིན་ལ། དེ་གཉིས་ཟུང་དུ་འཇུག་པའི་ཚུལ་ཡང་བོད་སྔ་མ་རྣམས་ཀྱི་གསུངས་ལས། སྣང་བས་ལས་ལམ་མི་འདོར་ཞིང༌། ། སྟོང་པས་མངོན་ཞེན་མི་སྐྱེ་བ། ། བདེན་གཉིས་ཟུང་འཇུག་དབུ་མའི་ལམ། ། མ་ནོར་མཆོག་འདི་མཉན་པར་བྱ། ། ཞེས་བཤད་པ་ལྟར་རོ། ། ཟ༢ གཉིས་པ་དེ་དག་སྒྲུབ་བྱེད་ཀྱི་ཚུལ་བཤད་པ་ནི། ཀུན་རྫོབ་འཇིག་རྟེན་གཞན་གྲགས་རྗེས་སུ་བརྗོད། ། དེའང་ཀུན་རྫོབ་ངེས་བྱེད་ཆོས་ཅན་སྤྱིའི་རྣམ་གཞག་ནི། རྟག་ཆད་དང་རྡུལ་ཕྲན་ཆ་མེད་གཉིས་སྟོང་ཤེས་པ་བདེན་གྲུབ་སོགས་གྲུབ་མཐའི་སྐྱོན་རྣམས་མ་ཡིན་པའི་འཇིག་རྟེན་ལ་གྲགས་པའི་ཚད་མ་དང་ཚད་མིན་ཡང་ལོག་གི་བདེན་རྫུན་སོགས་གཞན་གྲགས་ཀྱི་རྗེས་སུ་བརྗོད་པ་ཙམ་མཛད་དོ། ། དོན་དམ་ཆོས་ཀྱི་བདག་མེད་གཏན་ཚིགས་ལྔ། ། གང་ཟག་བདག་མེད་(༢༧༡བ)རྣམ་བདུན་རིགས་པས་སྒྲུབ། ། དོན་དམ་བདེན་པ་ངེས་བྱེད་ཀྱི་ཚད་མའི་དང་པོ་ནི་བསམ་བྱུང་ཁྱད་པར་ཅན་རིགས་ཤེས་རྗེས་དཔག་ཡིན་ལ། དེའང་གཏན་ཚིག་ལ་བརྟེན་ཅིང་དེ་ལ་གསལ་བའི་དབྱེ་བ་མང་ཡང་རིགས་བསྡུ་ན། ཐམས་ཅད་ཀྱང་དོན་ལ་དགག་བྱ་བདེན་པ་འགོག་པའི་དགག་རྟགས་ཁོ་ནར་ངེས་པའི་ཕྱིར་རྟོག་གེ་དང་སྒོ་བསྟུན་ན་སྒྲུབ་རྟགས་མི་སྲིད་དེ། དཔེར་ན། སྒྱུ་མ་ལྟ་བུ་ཡིན་ཏེ། རྟེན་འབྲེལ་ཡིན་པའི་ཕྱིར་ཞེས་པ་ཡང་། དངོས་བསྟན་སྒྲུབ་རྟགས་ལྟར་སྣང་ཡང་དོན་དམ་ངེས་བྱེད་དུ་མི་འགྲོ་ཞིང་། བསྒྲུབ་བྱར་སོང་ཚོད་ནི་བདེན་སྟོང་ཉིད་ཡིན་ནོ། ། དགག་རྟགས་ལ་འབྲེལ་ཟླ་མ་དམིགས་པ་དང་འགལ་ཟླ་དམིགས་པ་གཉིས་ལ་རྟེན་འབྲེལ་གྱི་རྟགས་ནི་ཕྱི་མ་དང་གཞན་རྣམས་སྔ་མའོ། ། དེའང་རྟགས་ཆེན་ལྔ་ནི་ཐལ་རང་ཐུན་མོང་པ་ཡིན་པའི་ཕྱིར། འདིར་ཡང་ཆོས་ཀྱི་བདག་མེད་སྒྲུབ་བྱེད་ཀྱི་གཏན་ཚིག་ནི་ངོ་བོ་ལ་དཔྱོད་པ་གཅིག་དུ་བྲལ་གྱི་གཏན་ཚིག་སོགས་ལྔ་ཁོ་ནའོ། ། གང་ཟག་གི་བདག་མེད་སྒྲུབ་བྱེད་དོན་དམ་ངེས་བྱེད་ཀྱི་གཏན་ཚིག་ནི་གཅིག་སྟེ། དཔེ་ཤིང་རྟ་ལ་དཔྱོད་པ་རྣམ་བདུན་རིགས་པས་གང་ཟག་གི་བདག་མེད་སྒྲུབ་པ་རིགས་པའི་རྒྱལ་པོའོ། ། འདིར་ཡང་ཞིབ་པར་སྨོས་ན། དང་པོ་གཏན་ཚིགས་ལྔའི། ངོ་བོ་ལ་དཔྱོད་པ་གཅིག་དང་དུ་བྲལ་ནི། རྣམ་པར་ཐར་པའི་སྒོ་སྟོང་པ་ཉིད་སྟོན་པ་སྟེ། དེའང་རྟགས་དགོད་པ་ནི། མྱུ་གུ་ལྟ་བུའི་ཆོས་ཀུན་ཆོས་ཅན། བདེན་པར་མེད་དེ། བདེན་པའི་གཅིག་དང་དུ་མས་དབེན་པའི་ཕྱིར། དཔེར་ན། མེ་ལོང་གི་གཟུགས་བརྙན་བཞིན་ནོ། ། རྟགས་དེའི་ཆོས་ཅན་ནི། མ་བརྟགས་མ་དཔྱད་པའི་སྣང་ཙམ་ཁོ་ན་སྟེ། དེ་ལ་གྲུབ་པའི་ཕྱོགས་ཆོས་ནི་བདེན་པའི་གཅིག་མིན་ཏེ། ཆ་བཅས་ཡིན་པའི་ཕྱིར། བདེན་པའི་དུ་མ་ནི་མིན་ཏེ། རྩོམ་བྱེད་བདེན་པའི་གཅིག་མེད་པའི་ཕྱིར། ཁྱབ་པ་ནི། བདེན་ན་གཅིག་དང་དུ་མ་གང་རུང་ཡིན་པས་ཁྱབ་སྟེ། དེ་གཉིས་ཕན་ཚུན་སྤངས་འགལ་ཡིན་པ་(༢༧༢ན)དང་ཁས་ཀྱང་བླངས་པས་འགྲུབ་བོ། ། གཉིས་པ་ནི། རྒྱུ་ལ་དཔྱོད་པ་དངོས་སྨྲའི་ལོག་རྟོག་གི་བྲག་རི་འཇིག་པ་རྡོ་རྗེ་གཟེགས་མ་ལྟ་བུའི་གཏན་ཚིག་ནི་རྣམ་པར་ཐར་པའི་སྒོ་མཚན་མ་མེད་པ་སྟོན་པ་སྟེ། དང་པོ་རྟགས་དགོད་པ་ནི། མྱུ་གུ་ཆོས་ཅན། བདེན་པའི་སྐྱེ་བ་མེད་དེ། རང་དང་གཞན་དང་གཉིས་ཀ་དང་གཉིས་མིན་ལས་སྐྱེ་བ་མེད་པའི་ཕྱིར། དཔེར་ན། གཟུགས་བརྙན་བཞིན་ནོ། ། གཉིས་པ་སྒྲུབ་ཚུལ་ཁྱབ་པ་ནི། དངོས་སྟོབས་སམ་ཡུལ་ངོས་སམ་དཔྱད་ངོའམ་སྐྱེ་བ་ལ་མཐའ་བཞི་གང་རུང་ལས་མ་འདས་པས་རྟོགས་སླ་བར་དགོངས་ནས་གཞུང་དུ་རྒྱས་པར་མ་གསུངས། ཕྱོགས་ཆོས་སྒྲུབ་པ་ལ་བཞི་ལས། དང་པོ་བདག་སྐྱེ་མེད་པའི་རྟགས་སྒྲུབ་ནི། གྲངས་ཅན་པས་མྱུ་གུ་ནི་གཙོ་བོའི་རྣམ་འགྱུར་ཙམ་དང༌། གཙོ་བོ་ནི་དེའི་རང་བཞིན་ཡིན་པས་རང་གི་རང་བཞིན་གྲུབ་ཟིན་རྟག་དངོས་ཤིག་ལས་སྐྱེས་པར་འདོད་ལ། དེ་ལྟ་ན་མྱུ་གུ་སྐྱེས་སྟོབས་ཀྱིས་ས་བོན་འགགས་པ་མི་འཐད་པས་ས་བོན་སྐྱེ་བ་ཐུག་མེད་དང༌། རྒྱུ་ས་བོན་མ་འགགས་པ་དེ་འདོད་ན་འབྲས་བུ་མྱུ་གུའི་སྐྱེ་བ་དང་མདོག་དབྱིབས་མི་རྙེད་པ་དང༌། རང་ཉིད་ལས་རང་ཉིད་སྐྱེ་ན་བྱ་བྱེད་མཐའ་དག་གཅིག་ཏུ་འགྱུར་བ་སོགས་སོ། ། གཉིས་པ་གཞན་སྐྱེ་མེད་པའི་རྟགས་སྒྲུབ་ནི། དངོས་སྨྲ་མཁས་པ་དག་གིས་གྲངས་ཅན་འདོད་པའི་བདག་སྐྱེ་འགོག་ཚུལ་ནི་ལེགས་ཀྱང༌། ཤེས་རིགས་དོན་མཐུན་རྣམས་རྐྱེན་བཞི་ག་དང༌། དངོས་པོ་ཕལ་ཆེར་རྒྱུ་དང་བདག་པོའི་རྐྱེན་ལས་སྐྱེ་ཞིང༌། དེའང་རྒྱུ་འབྲས་གཉིས་ཀ་བློས་བཏགས་ཙམ་མིན་པར་ཡུལ་རང་ངོས་ནས་གྲུབ་པ་བརྟགས་ཤིང་དཔྱད་མཐར་སྐྱེ་བས་གཞན་སྐྱེ་ཚད་མས་གྲུབ་པ་ཡིན་ཞེས་སྨྲའོ། ། འདི་འགོག་པའི་རིགས་པ་མང་ཡང་། གཞན་ལས་སྐྱེ་བ་མི་སྲིད་པ་དང༌། སྐྱེ་བ་ལ་གཞན་མི་སྲིད་པ་གཉིས་སུ་འདུས་པའི། དང་པོ་ནི། རྒྱུ་མིན་པ་(༢༧༢བ)ཀུན་ལས་འབྲས་བུ་མིན་པ་ཀུན་སྐྱེ་བར་འགྱུར་ཏེ། ནས་དང་སཱ་ལུའི་ས་བོན་གཉིས་ཀ་ཡང་སཱ་ལུའི་སྨྱུ་གུ་ལས་རང་གི་ངོ་བོས་གྲུབ་པའི་གཞན་དུ་མཚུངས་པའི་ཕྱིར་རོ། ། ཁྱབ་སྟེ། དེ་འདྲའི་གཞན་དུ་གྲུབ་ན་ཕན་ཚུན་རག་མ་ལས་པའི་ད་ལྟ་བ་རྭ་གཡས་གཡོན་བཞིན་དུ་འགྱུར་ལ། དེ་ལྟ་ཡིན་བཞིན་དུ་ཡང་རྒྱུ་འབྲས་སུ་འགྱུར་ན་སཱ་ལུའི་ས་བོན་གྱི་ཉེར་ལེན་གྱིས་ནས་ཀྱི་མྱུ་གུ་མི་བསྐྱེད་པའི་དོན་མེད་པའི་ཕྱིར་རོ། ། [གཉིས་པ་]སྐྱེ་བ་ལ་གཞན་མི་སྲིད་པ་ནི། མྱུ་གུ་ས་བོན་ལས་སྐྱེ་བར་འདོད་ན་དེ་གཉིས་རྫས་གཞན་ཐ་དད་དུ་ཡང་འདོད་མི་རུང་སྟེ། རྫས་གཞན་པའི་ཚུལ་ཡུལ་ངོས་ནས་གྲུབ་པ་ནི་དུས་མཉམ་མིན་པ་ལ་མི་སྲིད་ཅིང་རྒྱུ་འབྲས་དུས་མཉམ་རིགས་པས་ཁེགས་པའི་ཕྱིར་ཏེ། རྒྱུ་འབྲས་འགག་སྐྱེ་སྲང་མདའི་མཐོ་དམན་ལྟར་དུས་གཅིག་པ་མི་སྲིད་པའི་ཕྱིར་གཞན་ཡང་རྒྱུ་འབྲས་དུས་མཉམ་ལ་འབྲས་བུ་ཡོད་པ་སྐྱེད་དམ་མེད་པ་སྐྱེད་བརྟགས་པས་ཀྱང་ཁེགས་སོ། ། གསུམ་པ་གཉིས་སྐྱེ་མེད་པའི་རྟགས་སྒྲུབ་ནི། དེ་གཉིས་ཁེགས་པའི་ཤུགས་ལ་ཁེགས་པས་འགོག་བྱེད་རྒྱས་པར་མ་གསུངས་སོ། ། བཞི་པ་རྒྱུ་མེད་དགག་པ་ནི། རྒྱུ་མེད་ལས་སྐྱེ་ན་དངོས་པོ་རྣམས་དུས་ཐམས་ཅད་དུ་སྐྱེ་བའམ་གཏན་མི་སྐྱེ་བར་འགྱུར་བ་སོགས་ཧ་ཅང་ཐལ་ཞིང༌། ནམ་མཁའི་པདྨ་བཞིན་དུ་སྣང་མི་རུང་དུ་འགྱུར་པ་ལས་རྒྱུ་འབྲས་གསལ་བར་སྣང་བའི་མཐོང་བ་དང་འགལ་བ་དང༌། སྐྱེ་བ་སྔ་ཕྱི་མེད་པར་སྒྲུབ་པར་འདོད་ནས་ལུས་སེམས་འབྱུང་བའི་བདག་ཉིད་དེར་འཛིན་པའི་གྲུབ་མཐའ་འཁྲུལ་པ་ནི་འབྱུང་བ་འཛིན་པའི་མངོན་སུམ་འཁྲུལ་པས་གྲུབ་པར་རྒྱ་ཆེར་གསུངས་སོ། ། གསུམ་པ་གཞན་སྐྱེ་འགོག་པ་ལས་འཕྲོས་པ་འབྲས་བུ་ལ་དཔྱོད་པ་ཡོད་མེད་སྐྱེ་འགོག་ནི། རྣམ་པར་ཐར་པའི་སྒོ་སྨོན་པ་མེད་པ་སྟོན་པ་སྟེ། ཁ་ཅིག་འབྲས་བུ་རྒྱུ་དུས་ན་ཡོད་པའམ་མེད་པ་གང་སྐྱེ་ཞེ་ན། རང་རྒྱུད་པ་ཐ་སྙད་དུ་ཕྱི་(༢༧༣ན)མ་ཁས་ལེན་པར་གྲགས་མོད་ཀྱང༌། འབྲས་བུ་རྒྱུ་དུས་སུ་ཡོད་ན་གཞན་ལ་མ་ལྟོས་པར་གྲུབ་ཟིན་པས་རྒྱུས་ཅི་བྱ་ཞིང༌། གཏན་མེད་ན་རི་རྭ་ལྟར་རྒྱུས་ཅི་ཡང་བྱར་མེད་ལ། གཉིས་ཡིན་མི་འཐད་པས་གཏན་ཚིག་དེ་ལེགས་པར་གྲུབ་བོ། ། བཞི་པ་རྒྱུ་འབྲས་གཉིས་ཀ་ལ་དཔྱོད་པ་མུ་བཞི་སྐྱེ་འགོག་ནི། གོང་དུ་བསྟན་པ་ལྟར་འཁྲུལ་ངོར་ནི་ས་བོན་གཅིག་ལས་མྱུ་གུ་གཅིག་ཅེས་སོགས་མི་འགལ་ཡང༌། རིགས་ངོར་ནི་རྒྱུ་གཅིག་ཁོ་ན་ལས་འབྲས་བུ་གཅིག་ཁོ་ན་འབྱུང་བ་སོགས་མུ་བཞི་སྐྱེ་བ་མི་འཐད་དེ། རིགས་ངོར་གཅིག་ཉིད་མི་རིགས་ལ། དེས་དུ་མ་བདེན་གྲུབ་ཀྱང་ཁེགས་པས་སོ། ། ལྔ་པ་དབུ་མ་པ་རྣམས་ཀྱིས་བདེན་མེད་སྒྲུབ་པའི་རིགས་པའི་རྒྱལ་པོ་རྟེན་འབྲེལ་ཆེན་པོའི་རྟགས་ནི། རྩ་ཤེ་ལས། རྟེན་ཅིང་འབྱུང་བ་གང་ཡིན་པ། ། དེ་ནི་ངོ་བོ་ཉིད་ཀྱིས་ཞི། ། ཞེས་གསུངས་ཏེ། མྱུ་གུ་ཆོས་ཅན། བདེན་པར་མ་གྲུབ་སྟེ། རྟེན་ཅིང་འབྲེལ་འབྱུང་ཡིན་པའི་ཕྱིར། ཞེས་སོ།། འདི་ལའང་། རྟག་པའི་མཐའ་སེལ་ཚུལ་དང༌། ཆད་པའི་མཐའ་སེལ་ཚུལ་གཉིས་ལས། དང་པོ་ནི། ཕྱི་ནང་གི་དངོས་པོ་འདི་དག་ཆོས་ཅན། དོན་དམ་པར་ཡོད་པ་མ་ཡིན་ཏེ། རྟེན་འབྲེལ་ཡིན་པའི་ཕྱིར། གཉིས་པ་ནི། ཡང་དེ་ཆོས་ཅན། ཐ་སྙད་དུ་མེད་པ་མ་ཡིན་ཏེ། རྟེན་འབྲེལ་ཡིན་པའི་ཕྱིར་ཞེས་པའོ། ། དེ་ལྟར་ལྔ་པོ་འདི་དག་ཐལ་འགྱུར་བས་ནི་གཞན་ལ་གྲགས་སུ་འདོད་ཅིང༌། རང་རྒྱུད་པས་ནི་རང་རྒྱུད་ཀྱི་གཏན་ཚིགས་སུ་འདོད་དོ། ། མདོར་ན། ལུགས་འདིར་བདག་དང་གཞན་ལ་སོགས་པ་བཞིའི་སྒོ་ནས་སྐྱེ་བ་ནི་ཅུང་ཟད་ཀྱང་མེད་ལ། སྐྱེ་བ་ཡོད་པར་ནི་