Tibetan
འཇིག་རྟེན་ན་གྲགས་པས་དེ་ལྟར་བཤད་དེ། འཇུག་པ་ལས། གང་ཕྱིར་འཇིག་རྟེན་ས་བོན་ཙམ་བཏབ་ནས། ། བདག་གིས་བུ་འདི་སྐྱེད་ཅེས་སྨྲ་བྱེད་ཅིང༌། ། ཤིང་ཡང་བཙུགས་སོ་སྙམ་དུ་རྟོགས་དེས་ན། །(༢༧༣བ) གཞན་ལས་སྐྱེ་བ་འཇིག་རྟེན་ལས་ཀྱང་མེད། ། ཅེས་སོ། ། གཉིས་པ་གང་ཟག་བདག་མེད་སྒྲུབ་པ་རྣམ་བདུན་ཤིང་རྟའི་རིགས་པ་ནི། འཇུག་པ་ལས། ཤིང་རྟ་རང་ཡན་ལག་ལས་གཞན་འདོད་མིན། ། གཞན་མིན་མ་ཡིན་དེ་ལྡན་ཡང་མ་ཡིན། ། ཡན་ལག་ལ་མེད་ཡན་ལག་དག་དེར་མེད། ། འདུས་ཙམ་མ་ཡིན་དབྱིབས་མིན་ཇི་བཞིན་ནོ། ། ཞེས་ཤིང་རྟ་རང་གི་ཡན་ལག་གཟེར་བུ་སོགས་ལས་གཞན་མ་ཡིན་པ་སོགས་ལྔ་པོའི་སྟེང་དུ་ཚོགས་པ་དང་དབྱིབས་ལ་དཔྱད་པ་སྟེ། བརྟགས་དོན་རྣམ་པ་བདུན་གྱིས་བཙལ་ན་ཤིང་རྟ་དེ་རང་གི་ཡན་ལག་ཉིད་དང་དེ་ལས་གཞན་དུ་མི་རྙེད་པ་བཞིན་དུ། བདག་ཀྱང་ཕུང་པོ་ལས་གཞན་ནམ་ཕུང་པོ་ཉིད་དུ་བརྟགས་དོན་རྣམ་པ་བདུན་གྱིས་བཙལ་ན་མི་རྙེད་ཅིང༌། དེ་ལ་དབྱིབས་དང་ཚོགས་པ་ནི་དབྱིབས་ཅན་དང་ཚོགས་པ་ཅན་ལས་གཞན་དུ་མི་རྙེད་པས་ཞར་ལ་ཁེགས་སོ། ། དོན་དམ་དངོས་ཉིད་བློ་འདས་སྤྲོས་མི་འཇུག ། མཐའ་བརྒྱད་སེལ་སོགས་སྤྲོས་གཅོད་ཐ་སྙད་ཙམ། ། དེ་ལྟར་གཏན་ཚིག་གིས་བསྒྲུབ་པ་དེ་ཉིད་ཀུན་རྫོབ་གཞན་སེལ་གྱི་སྒོ་ནས་དོན་དམ་སྒྲུབ་པ་ལྟ་བུ་མ་ཡིན་ཏེ། དོན་དམ་པ་དངོས་ཉིད་ནི་བློ་དང་སྒྲ་རྟོག་གི་ཡུལ་ལས་རིང་དུ་འདས་པས་བློའི་སྤྲོས་པ་གང་ཡང་མི་འཇུག་པའི་ཕྱིར། དེས་ན། སྐྱེ་འགག །རྟག་ཆད། འགྲོ་འོང༌། གཅིག་ཐ་དད་དེ་མཐའ་བརྒྱད་ཀྱི་སྤྲོས་པ་སེལ་བ་ལ་སོགས་པའི་ཚིག་སྤྲོས་པ་རྣམས་ནི་ཀུན་རྫོབ་ཀྱི་སྤྲོས་པ་གཅོད་པ་ལ་གཞན་གྲགས་དང་སྒོ་བསྟུན་པའི་ཐ་སྙད་ཙམ་དུ་སྦྱར་བ་ཡིན་ནོ། ། དམ་བཅའ་བློ་ཡིན་བློ་ནི་ཀུན་རྫོབ་སྟེ། ། དེ་ཕྱིར་དམ་བཅའ་ཁས་ལེན་རང་རྒྱུད་མེད། ། སྐྱེ་མེད་སོགས་ཀྱང་དམ་བཅའ་མ་ཡིན་ཏེ། ། གདོད་ནས་མ་གྲུབ་དངོས་ཞེན་བཟློག་པའི་ཕྱིར། ། དེ་བཟློག་དངོས་མེད་འཛིན་པའང་སྤང་བར་གསུངས། ། ཇི་ཙམ་དུ་དམ་བཅའ་བ་དེ་ཐམས་ཅད་(༢༧༤ན)ནི་བློའི་བྱེད་པ་ཡིན་ཅིང༌། བློ་ནི་འཁྲུལ་ཤེས་ཀུན་རྫོབ་པ་ཡིན་པ་དེའི་ཕྱིར་ཐལ་འགྱུར་བ་ལ་དམ་བཅའ་དང་ཁས་ལེན་རང་རྒྱུད་པ་མེད་ལ། སྐྱེ་མེད་དང་སྤྲོས་བྲལ་ལ་སོགས་པ་རྣམས་ཀྱང་རང་རྒྱུད་ཀྱི་དམ་བཅའ་འགོད་པ་མ་ཡིན་ཏེ། ཚིག་ཏུ་བརྗོད་པ་ནི་ཆོས་དང་གང་ཟག་ལ་སོགས་པ་གདོད་ནས་མ་གྲུབ་ཀྱང་ཕྱི་རོལ་པ་དང་རང་སྡེའི་དངོས་སྨྲ་བ་རྣམས་སྒྲོ་སྐུར་གྱི་མཐར་ལྟུང་པས་དངོས་པོར་ཞེན་པ་བཟློག་པའི་ཕྱིར་དང༌། དངོས་ཞེན་དེ་ཉིད་བཟློག་ནས་དངོས་མེད་དུ་འཛིན་པའི་བློ་ཉིད་ཀྱང་སྤོང་བའི་ཕྱིར་བློ་འདས་དང་འཛིན་མེད་ལ་སོགས་པ་གསུངས་ཏེ། ཞི་བ་ལྷས། གང་ཚེ་དངོས་དང་དངོས་མེད་དག ། བློ་ཡི་མདུན་ན་མི་གནས་པ། ། དེ་ཚེ་རྣམ་པ་གཞན་མེད་པས། ། དམིགས་པ་མེད་པར་རབ་ཏུ་ཞི། ། ཞེས་གསུངས་པ་ལྟར་རོ། ། གྲུབ་མཐར་སྐྱེ་མེད་སྤྲོས་བྲལ་ཞིར་ཞུགས་ལས། ། འཛིན་སྟངས་མེད་པ་ནན་གྱིས་གསུངས་པ་ཡིན། ། ལུགས་འདིའི་རིགས་པས་དཔྱད་པའི་གྲུབ་མཐར་ཡང་སྐྱེ་མེད་སྤྲོས་པ་ཐམས་ཅད་དང་བྲལ་བའི་ཞི་བར་ཞུགས་པ་ལས། དམིགས་གཏད་ཀྱི་འཛིན་སྟངས་མེད་པ་འཕགས་པ་ཡབ་སྲས་ཐམས་ཅད་ཀྱིས་ནན་གྱིས་གསུངས་པ་ཡིན་ནོ། ། ཞ༢ གཉིས་པ་ལམ་དབུ་མ་ཐབས་ཤེས་ཟུང་འཇུག་ནི། ཐབས་ཤེས་ཟུང་འཇུག་མངོན་སུམ་རྟོགས་པ་ཡི། ། ཡེ་ཤེས་རྗེས་ཐོབ་རྟེན་སོགས་དབྱེ་བ་ཡི། ། ས་བཅུའི་རིམ་བགྲོད། ཅེས་པ་སྟེ། སློབ་དཔོན་ཟླ་བའི་ཞབས་ཀྱིས། མདོ་སྡེ་ས་བཅུ་པ་ནས་གསུངས་པའི་ཐབས་ཀྱི་ཆ་དང༌། རྩ་བ་ཤེས་རབ་ནས་གསུངས་པའི་ཤེས་རབ་ཀྱི་ཆ་གཉིས་ཟུང་འཇུག་ཏུ་སྦྱར་ནས་བཤད་པ་ཡིན་ལ། དེ་སྦྱོར་བའི་ཚུལ་ཡང༌། ས་བཅུ་དང་ཕ་རོལ་ཏུ་ཕྱིན་པ་བཅུ་རིམ་གྱིས་སྦྱར་ནས་བཤད་ཅིང༌། དོན་དམ་པའི་ངོ་བོ་ནི། སྤྲོས་པ་མཐའ་དག་དང་བྲལ་བའི་ཆོས་ཉིད་མངོན་སུམ་(༢༧༤བ)དུ་རྟོགས་པའི་ཡེ་ཤེས་ཤིག་ཡིན་ལ། ཆོས་ཉིད་རྟོགས་ཚུལ་ནི། འཕགས་པའི་ཡེ་ཤེས་ཀྱིས་ཆོས་རྣམས་ཀྱི་ངོ་བོ་ཅིར་ཡང་མ་གཟིགས་པ་ལ་ཆོས་ཉིད་རྟོགས་པའི་ཐ་སྙད་མཛད་པ་ཡིན་ཏེ། མ་མཐོང་བ་ཉིད་དེ་མཐོང་བར། ། ཤིན་ཏུ་ཟབ་པའི་མདོ་ལས་གསུངས། ། ཞེས་གསུངས་པ་ལྟར་རོ། ། ཡེ་ཤེས་དེ་ལ་རྗེས་ཐོབ་ཀྱི་ཆ་ནས་སྦྱིན་སོགས་ཀྱི་ཡོན་ཏན་གྱི་རྟེན་དུ་གྱུར་པ་ལ་སོགས་པའི་དབྱེ་བས་ཅུང་ཟད་ཕྱེ་བ་ཡིན་གྱི། ཡེ་ཤེས་དེའི་རང་གི་ངོ་བོ་ལ་ནི་དབྱེ་བ་ཡོད་པ་མ་ཡིན་ཏེ། ཡེ་ཤེས་དང་ཆོས་ཉིད་དབྱེར་མེད་ཅིང༌། ཆོས་ཉིད་ཀྱི་ངོ་བོ་ལ་དབྱེ་བ་མེད་པའི་ཕྱིར་རོ། ། ཞ༣ གསུམ་པ་འབྲས་བུ་དབུ་མ་སྐུ་གཉིས་ཟུང་འཇུག་ནི། སྐུ་གཉིས་ཟུང་འཇུག་བཞེད། ། ཅེས་པ་སྟེ། དངོས་བཏགས་མ་ཕྱེ་བའི་སྒོ་ནས་ཆོས་ཀྱི་སྐུ་དང་གཟུགས་ཀྱི་སྐུ་ལས། དང་པོའི་ངོས་འཛིན་ནི། སྒྲིབ་གཉིས་བག་ཆགས་དང་བཅས་པ་མ་ལུས་པར་སྤངས་པའི་དབྱིངས་ནམ་མཁའ་ལྟ་བུ་ཞིག་ལ་ཆོས་ཀྱི་སྐུ་ཞེས་བྱ་སྟེ། དབུ་མ་འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། ། བསྲེགས་པས་ཞི་དེ་རྒྱལ་རྣམས་ཆོས་སྐུ་སྟེ། ། དེ་ཚེ་སྐྱེ་བ་མེད་ཅིང་འགག་པ་མེད། ། སེམས་འགག་པ་དེ་སྐུ་ཡིས་མངོན་སུམ་མཛད། ། ཅེས་གསུངས་པ་ལྟར་རོ། ། འོ་ན་ལུགས་འདི་ལ་སངས་རྒྱས་ཀྱི་ས་ན་ཡེ་ཤེས་ཡོད་དམ་མེད་ཅེ་ན། འདི་ལ་རྗེ་བཙུན་གྲགས་པའི་ཞབས་ཀྱིས་ནི། སློབ་དཔོན་ཟླ་བ་གྲགས་པའི་ལུགས་ལ་སངས་རྒྱས་ཀྱི་ས་ན་ཡེ་ཤེས་མེད་པར་འདོད་པ་ནི། སློབ་དཔོན་དང་སངས་རྒྱས་གཉིས་ཀ་ལ་སྐུར་པ་འདེབས་པ་ཡིན་ནོ། །ཞེས་གསུངས། ཆོས་རྗེ་ས་སྐྱ་པཎྜིཏ་ནི། དོན་དམ་པར་སངས་རྒྱས་ཀྱི་ས་ན་ཡོད་མེད་ལས་འདས་ཤིང༌། ཐ་སྙད་དུ་ཡེ་ཤེས་དེ་སེམས་སེམས་བྱུང་ལ་འདོད་ན། སངས་རྒྱས་ཀྱི་ས་ན་མེད་དེ། སངས་རྒྱས་ལ་འཁྲུལ་པ་ཟད་པའི་ཕྱིར། (༢༧༥ན)ཞེས་གསུངས། རྗེ་མི་བསྐྱོད་ཞབས་དང༌ཟི་ལུང་པཎ་ཆེན་སོགས་ཀྱིས། དོན་དམ་པར་སངས་རྒྱས་ཀྱི་ས་ན་ཡེ་ཤེས་ཡོད་མེད་ལས་འདས་ཤིང༌། ཐ་སྙད་དུ་ནི་ཡེ་ཤེས་ཡོད་པར་བཞེད་དེ། མཁྱེན་བཟང་ཁྱོད་ཀྱིས་སྐད་ཅིག་གཅིག་གིས་ཤེས་བྱ་ཐམས་ཅད་མཁྱེན། །ཞེས་པས་སོ། ། འོ་ན་སངས་རྒྱས་ཀྱི་ངོས་འཛིན་ཆོས་ཉིད་ནམ་མཁའ་ལྟ་བུ་ཞིག་ལ་བྱེད་ན། སངས་རྒྱས་ཀྱིས་གཞན་དོན་མི་བྱེད་པ་ཡིན་ནམ་ཞེ་ན། དེ་ནི་སངས་རྒྱས་ཀྱི་སྔོན་གྱི་སྨོན་ལམ་དང༌། གདུལ་བྱའི་བསོད་ནམས་ཀྱི་དབང་གིས་གཟུགས་སྐུ་གཉིས་ལས་གཞན་དོན་རྒྱུན་མི་ཆད་དུ་འབྱུང་བ་ཡིན་ཏེ། དཔེར་ན། ཡིད་བཞིན་ནོར་བུ་དང༌། དཔག་བསམ་གྱི་ཤིང་རྣམས་ལ་རྣམ་པར་རྟོག་པ་མེད་ཀྱང༌། གཞན་གྱིས་གསོལ་པ་བཏབ་ན་དགོས་འདོད་འབྱུང་བ་བཞིན་ཏེ། འཇུག་པ་ལས། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང༌། ། ཡིད་བཞིན་ནོར་བུ་ཇི་བཞིན་རྣམ་མི་རྟོག ། འགྲོ་སྒྲོལ་བར་དུ་འཇིག་རྟེན་འབྱོར་སླད་རྟག ། དེ་ནི་སྤྲོས་དང་བྲལ་ལ་སྣང་བར་འགྱུར། ། ཞེས་གསུངས་པ་ལྟར་རོ། ། ཝ༤ བཞི་པ་གྲུབ་མཐའི་དོན་གཙོ་བོར་བསྡུ་བ་ནི། རྟོག་གེས་བཏགས་སྤོང་དངོས་ཀུན་མིང་རྐྱང་ཙམ། ། འདུས་བྱས་སླུ་ཆོས་སླུ་མེད་མྱ་ངན་འདས། ། སྲིད་རྩ་བདེན་འཛིན་དེས་བསྐྱེད་ཉོན་སྒྲིབ་ཡིན། ། ཐེག་གསུམ་གཟིགས་ཚུལ་མཚུངས་ཕྱིར་མཐོང་ལམ་གཅིག ། ཤེས་བྱ་ནུབ་པས་སངས་རྒྱས་གཞན་སྣང་ཙམ། ། གྲུབ་མཐའ་འདི་ཡི་ཁྱད་ཆོས་གཙོ་བོའོ། ། ལུགས་འདིའི་གྲུབ་མཐའི་ཁྱད་པར་མང་ཡང་གཙོ་ཆེ་བ་ལྔ་སྟེ། རིགས་ངོར་ལྟ་ཞོག་དབུ་མ་རང་ལུགས་ཀྱི་དང་འཇིག་རྟེན་ལུགས་གཉིས་ཀའི་ཐ་སྙད་ཙམ་དུའང་རང་རྒྱུད་པ་མན་ཆད་ཀྱི་རྟོག་གེས་བཏགས་པའི་ཚད་མ་དང་ཚད་མིན་གྱི་རྣམ་གཞག་ཀུན་སྤོང་སྟེ། ཕྱི་ནང་རྒྱུ་འབྲས་ཀྱི་ཆོས་ཀུན་(༢༧༥བ)ཡུལ་རང་ངོས་ནས་ཐ་སྙད་ཙམ་དུའང་མ་གྲུབ་པའི་བློས་བརྟགས་མིང་རྐྱང་བཏགས་ཡོད་ཉིད་དུ་བཞེད་པ་སྟེ། རྨི་ལམ་དང་སད་པའི་རྟ་གླང་ལ་བདེན་རྫུན་མཚུངས་པར་བཤད་པ་དང༌། འདུས་བྱས་ཡིན་ན་རང་གྲུབ་དུས་ཀྱི་སྐད་ཅིག་གཉིས་པར་མི་སྡོད་ཅིང་སྐད་ཅིག་ལ་བྱ་བྱེད་མེད་པས། རིགས་པས་དཔྱད་མི་བཟོད་པ་མ་ཟད་རིགས་ངོར་གྲུབ་པ་ཙམ་ཡང་མེད་པས་སླུ་ཆོས་རྫུན་པས་ཁྱབ་པའི་ཕྱིར་འདུས་བྱས་དང་ཚད་གྲུབ་ཀྱི་གཞི་མཐུན་མེད་པར་བཞེད་ལ། ལེགས་པར་དཔྱད་ན་མྱང་འདས་དང་དེ་ལས་ལྷག་པའི་ཆོས་ཀྱང་རང་ངོས་ནས་གྲུབ་པ་མེད་མོད། ཅུང་ཟད་དཔྱད་ངོར་སླུ་བ་མེད་པ་ནི། མྱ་ངན་འདས་པ་བདེན་གཅིག་པུ། ། གང་ཆོས་སངས་རྒྱས་རྣམས་གསུངས་པ། ། ཞེས་པ་ལྟར་མྱང་འདས་ཁོ་ན་ཡིན་པར་བཞེད་པ་དང༌། སྲིད་པའི་རྩ་བ་ནི་བདེན་འཛིན་ཡིན་ལ། དེ་དང་དེས་བསྐྱེད་པའི་ཆགས་སོགས་ཉོན་མོངས་འཁོར་བཅས་ཐམས་ཅད་ཉོན་སྒྲིབ་ཁོ་ན་ཡིན་གྱི། འཁོར་གསུམ་རྣམ་པར་རྟོག་པ་གང༌། ། དེ་ནི་ཤེས་བྱའི་སྒྲིབ་པར་འདོད། ། ཅེས་དང༌། ཤེས་སྒྲིབ་གཟུང་འཛིན་གྱི་རྣམ་རྟོག་བརྒྱ་རྩ་ཞེས་སོགས་བདེན་འཛིན་དང་ཤེས་སྒྲིབ་ཀྱི་གཞི་མཐུན་གཏན་མི་བཞེད་དེ། ཇི་སྲིད་ཕུང་པོར་འཛིན་ཡོད་པ། ། ཞེས་སོགས་ལྟར། བདེན་འཛིན་འཁོར་བའི་རྩ་བར་ངེས་པའི་ཕྱིར། ཞེས་བཞེད་ལ། འདིས་ནི་ཉན་རང་ལ་ཆོས་ཀྱི་བདག་མེད་རྟོགས་པ་མེད་དུ་མི་རུང་བ་ཡང་གྲུབ་བོ། ། ཐེག་པ་གསུམ་གྱི་མཐོང་ལམ་ལ་སྐད་ཅིག་བཅུ་དྲུག་དང་བཅོ་ལྔ་དང་བཅུ་གཉིས་དང་བཞི་སོགས་དུ་མ་མེད་དེ། འཇུག་པ་ལས། དེ་ཉིད་ཡུལ་ཅན་བློ་གྲོས་འདི་ཡང་ཐ་དད་འགྱུར་བ་མ་ཡིན་ཏེ། ། ཞེས་ཐེག་གསུམ་ཆོས་ཉིད་གཟིགས་ཚུལ་གཅིག་པར་བཞེད་པ་དང༌། སངས་རྒྱས་ཀྱི་གཟུགས་སྐུ་དང་ཕྲིན་ལས་བསམ་ཡས་བརྗོད་ཀྱིས་མི་ལང་བ་རྣམས་ཡིད་བཞིན་(༢༧༦ན)གྱི་ནོར་བུ་དང་མཁའ་ལྡིང་གི་མཆོད་སྡོང་བསྒྲུབས་པ་བཞིན་དུ་རྟོག་པ་མེད་པར་མ་ཟད། སེམས་བསྐྱེད་པ་ཙམ་ཡང་མི་དགོས་པར་སྔོན་གྱི་སྨོན་ལམ་དང་གདུལ་བྱའི་ལས་བཟང་པོའི་དབང་གིས་དེ་དང་དེའི་གཞན་སྣང་གི་རྣམ་རོལ་ཁོ་ན་ཡིན་ཏེ། སངས་རྒྱས་རང་ངོར་འཕགས་པ་ལྷས། མ་རིག་རྨོངས་པའི་གཉིད་སད་ན། ། འཁོར་བ་འདི་དག་མི་དམིགས་སོ། ། ཞེས་ཤེས་པ་དང་ཤེས་བྱའི་སྣང་བ་མཐའ་དག་ནུབ་པའི་ཕྱིར་སངས་རྒྱས་གཞན་སྣང་ཙམ་དུ་བཞེད་པ་རྣམས་སོ། ། བོད་ཕྱི་རབས་པ་རྣམས་ཀྱིས། ལུགས་འདིར་དགག་ཕྱོགས་ཀྱི་དམ་བཅའ་བཞི། སྒྲུབ་ཕྱོགས་ཀྱི་དམ་བཅའ་བཞི་སྟེ། ཐུན་མོང་མ་ཡིན་པའི་དམ་བཅའ་ཆེན་པོ་བརྒྱད་ཡོད་པར་བཤད་དེ། དང་པོ་ནི། ཐ་སྙད་དུའང་རང་གི་མཚན་ཉིད་ཀྱིས་གྲུབ་པར་ཁས་མི་ལེན་པ། ཐ་སྙད་དུའང་རང་རྒྱུད་ཀྱི་གཏན་ཚིག་ཁས་མི་ལེན་པ། ཐ་སྙད་དུའང་རང་རིག་ཁས་མི་ལེན་པ། ཐ་སྙད་དུའང་ཀུན་གཞི་ཁས་མི་ལེན་པ་རྣམས་སོ། ། གཉིས་པ་བཞི་ནི། ཕྱི་རོལ་གྱི་དོན་ཁས་ལེན་པ། བདེན་འཛིན་ལ་ཉོན་སྒྲིབ་ཀྱིས་ཁྱབ་པ། ཞིག་པ་དངོས་པོར་ཁས་ལེན་པ། ཉན་རང་འཕགས་པས་ཆོས་ཀྱི་བདག་མེད་རྟོགས་པ་རྣམས་སོ། ། དེ་ལ་གསེར་མདོག་པཎ་ཆེན་ཡབ་སྲས་རྣམས་ནི། ཉན་རང་འཕགས་པས་ཆོས་ཀྱི་བདག་མེད་རྟོགས་ཞེས་པའི་མིང་ཙམ་ཞིག་མ་གཏོགས་གཞན་བདུན་པོ་དབུ་མ་ཐལ་འགྱུར་བས་རྨི་ལམ་དུའང་མི་རྨི་བའི་གྲུབ་མཐའ་ཡིན་གསུངས། རྗེ་བརྒྱད་པའང་ཕལ་ཆེར་དེ་དང་མཚུངས་པར་བཞེད་དོ། ། མ༢ གཉིས་པ་དབུ་མ་གཞན་སྟོང་གི་ལུགས་འཆད་པ་ལ་གསུམ། ཙ༡ ལུགས་སྲོལ་སྤྱིར་བསྟན། ཙ༢ རྣམ་གཞག་བྱེ་བྲག་ཏུ་འཆད། ཙ༣ འཕྲོས་དོན་སྙིང་ལ་གདམས་པའོ། ། ཙ༡ དང་པོ་ནི། བྱམས་པའི་དགོངས་པ་ཐོགས་མེད་མཆེད་ཀྱིས་བཀྲལ། ། རྣལ་འབྱོར་(༢༧༦བ)སྤྱོད་དང་དོན་དམ་རྣམ་ངེས་ཀྱི། ། ལུགས་གཉིས་ལྟ་བའི་ངོ་བོར་ཁྱད་མེད་ཀྱང༌། ། ཐེག་གསུམ་ལ་སོགས་བྱམས་ཆོས་དང་པོའི་ལུགས། ། མཐར་ཐུག་ཐེག་གཅིག་མ་རིག་བག་ཆགས་ས། ། ཟད་མེད་ལས་སྐྱེ་རྒྱུད་བླའི་དགོངས་པ་སྟེ། ། ཐུན་མོང་ཐུན་མིན་སྤྲོས་གཅོད་དོན་དམ་ཚུལ། ། རྗེ་བཙུན་བྱམས་པའི་ཆོས་སྡེ་ཐོགས་མེད་སྐུ་མཆེད་ཀྱིས་བཀྲལ་བའི་གྲུབ་མཐའ་སྤྱི་ཕྱོགས་གླང་དང་བློ་བརྟན་སོགས་སློབ་བརྒྱུད་བཟང་ལ་མང་བ་རྣམས་ཀྱིས་རྒྱ་ཆེར་བཤད། ཐུན་མོང་མ་ཡིན་པའི་གྲུབ་མཐའ་སློབ་མ་མཆོག་རྣམས་སྙན་ནས་སྙན་དུ་བརྒྱུད་པའི་ཚུལ་གྱིས་གནས་པ། བོད་དུ་ལོ་ཙཱ་བ་གཟུ་བཙན་གཉིས་ལས་བརྒྱུད། གྲུབ་ཆེན་ཡུ་མོ་སོགས་ཀྱིས་ཡིག་ཆའི་སྲོལ་ཐོག་མར་གཏོད་ཅིང༌། རྒྱལ་བའི་དབང་པོ་རང་བྱུང་རྡོ་རྗེ། ཀུན་མཁྱེན་དྲི་མེད་འོད་ཟེར་སོགས་ཀྱི་གསུང་རབ་རྣམས་སུ་ལྟ་བའི་གནད་ཐུན་མོང་མ་ཡིན་པ་དེ་ཆེས་གསལ་བར་མཛད་ཅིང་། དེའང་ངེས་དོན་མཐར་ཐུག་ཏུ་གསལ་བར་ཞལ་གྱིས་བཞེས་ལ། ཁྱད་པར་གཞན་སྟོང་དབུ་མ་ཞེས་པའི་སེང་གེའི་སྒྲ་སྒྲོག་པ་ནི། ཆོས་རྗེ་ཀུན་མཁྱེན་དོལ་པོ་པ་ཆེན་པོ་སྟེ། ཕྱིས་སུ་གསེར་མདོག་པཎ་ཆེན་དང༌། རྗེ་བཙུན་སྒྲོལ་བའི་མགོན་པོ་སོགས་ཀྱིས་ཀྱང་གྲུབ་མཐའི་གནད་ཐུན་མོང་མ་ཡིན་པ་ཆེས་གསལ་བའི་ཤིང་རྟའི་སྲོལ་ཆེན་པོ་དབྱེ་བར་མཛད་པར་སྣང་ངོ༌། ། དེ་དག་གི་བཞེད་སྲོལ་ལའང་ནང་གསེས་ཕྲ་རགས་ཀྱི་ཁྱད་པར་ཅི་རིགས་མཆིས་ཀྱང་གཙོ་བོར་བསྡུ་ན། བྱམས་ཆོས་དང་པོ་གསུམ་གྱི་འཆད་ཚུལ་རྣལ་འབྱོར་སྤྱོད་པའི་དབུ་མ་པ་དང༌། རྒྱུད་བླ་མའི་འཆད་ཚུལ་དོན་དམ་རྣམ་པར་ངེས་པའི་དབུ་མ་ལ་གཉིས་སུ་ཡོད་པ་ཟི་ལུང་པཎ་ཆེན་བཞེད། དེའང་ལུགས་གཉིས་ལྟ་བའི་ངོ་བོ་ལ་ཁྱད་པར་ཆེར་མེད་ཀྱང༌། མཐར་ཐུག་ཐེག་པ་གསུམ་དུ་བཤད་པ་དང༌། སོགས་ཁོངས་ནས། (༢༧༧ན)རྒྱུད་བླ་ནས་འབྱུང་བའི་འཆད་ཚུལ་འགའ་ཞིག་མི་མཛད་པ་ནི་བྱམས་ཆོས་དང་པོའི་ལུགས་ཡིན་ལ། མཐར་ཐུག་ཐེག་པ་གཅིག་ཏུ་བཤད་པ་དང༌། མ་རིག་བག་ཆགས་ཀྱི་ས་དང༌། ཟག་མེད་ལས་ཀྱི་སྐྱེ་བ་ལེན་པ་ཞེས་བྱ་བའི་འཆད་ཚུལ་རྣམས་ནི་རྒྱུད་བླ་མའི་དགོངས་པ་ཡིན་ཏེ། དེ་དག་ཀྱང་གདུལ་བྱ་ཐུན་མོང་དང་ཐུན་མོང་མ་ཡིན་པ་གཉིས་ལ་ཐོས་བསམ་གྱི་སྤྲོས་པ་གཅོད་པ་དང༌། སྒོམ་པས་དོན་དམ་རྣམ་པར་ངེས་པའི་འཆད་ཚུལ་དུ་ཤེས་པར་བྱའོ། ། མཐར་ཐུག་ཐེག་གསུམ་འཆད་པས་དབུ་མའི་གཞུང་དུ་མི་འགྱུར་བ་བོད་ཕལ་མོ་ཆེས་འཆད་ཀྱང༌། ཕྱོགས་འདི་འཛིན་པའི་སློབ་དཔོན་དག་གིས་ནི། ཉན་རང་ལྷག་མེད་དུ་མྱ་ངན་ལས་འདས་ནས་ཐེག་པ་ཆེན་པོའི་ལམ་དུ་མི་འཇུག་པར་བཤད་པ་ཙམ་གྱིས་དབུ་མ་མ་ཡིན་པར་འཆད་མི་ནུས་ཏེ། དབུ་མར་འཇོག་པ་ནི་ལྟ་བའི་ཆ་ནས་ཡིན་ལ། མཁས་པའི་དབང་པོ་པདྨའི་ངང་ཚུལ་སོགས་ཀྱིས། ཤེས་བྱ་ཐམས་ཅད་སྟོང་པ་ཉིད་དུ་རོ་གཅིག་པ་དང༌། སེམས་ཅན་ཐམས་ཅད་ལ་ཁམས་བདེ་བར་གཤེགས་པའི་སྙིང་པོས་ཁྱབ་པ་དང༌། ཐམས་ཅད་འཚང་རྒྱ་བར་རུང་བ་དབུ་མ་པའི་ཁྱད་ཆོས་སུ་བཤད་པ་དེ་དག་འདི་ལའང་ཡོད་པའི་ཕྱིར་རོ་གསུངས། ཇོ་ནང་ཀུན་མཁྱེན་ཆེན་པོས། བྱམས་ཆོས་སྡེ་ལྔ་ཀར་ལྟ་བ་མི་འདྲ་བ་མེད། རང་སྟོང་གི་ལྟ་བ་མངོན་རྒྱན་ནས་མ་བཤད། མཐར་ཐུག་ཐེག་གསུམ་དང་རིགས་ཆད་གང་དུའང་འཆད་པ་མེད་གསུངས་ནས་གཞན་སྟོང་དབུ་མ་ལ་མཆོག་དམན་གྱི་དབྱེ་བ་འདི་གཉིས་མི་མཛད་དོ། ། བོད་རྣམས་ཀྱིས་བྱམས་པའི་གཞུང་གསུམ་གྱི་དབུ་མའི་ལུགས་འདི་ལ་སེམས་ཙམ་རྣམ་རྫུན་པའི་ལུགས་ཞེས་འཆད་ཀྱང༌། སྤྱིར་སེམས་ཙམ་པ་གཞིར་བྱས་ཀྱི་རྣམ་བདེན་རྫུན་གྱི་ཐ་སྙད་ནི་བོད་རྣམས་ཀྱིས་རང་དགར་བཏགས་པར་ཟད་(༢༧༧བ)ལ། དོན་སྣང་གི་ཤེས་པ་དོན་དུ་སྣང་བའི་རྣམ་པ་བདེན་པ་དང་རྫུན་པར་སྒྲུབ་པའི་སྐབས་གཉིས་ཙམ་ཞིག་ནི་གཞུང་རྣམས་སུ་འབྱུང་ངོ༌། ། ཁྱད་པར་པཎ་ཆེན་ཤཱཀ་མཆོག་པའི་ཞལ་ནས། རྒྱུད་བླ་མའི་ལྟ་བ་སེམས་ཙམ་གྱི་ལྟ་བ་ཡིན་པར་འདོད་ན། དེ་དེར་སྒྲུབ་བྱེད་ཀྱི་ལུང་དང་རིགས་པ་ནི་ཡོད་པ་མ་ཡིན་ཏེ། ལུགས་འདི་ལ་ཚད་མར་གྱུར་པའི་ལུང་དང་རིགས་པ་ནི་མི་འབྱུང༌། སྲོལ་གཞན་ནས་དྲངས་པའི་ལུང་དང་རིགས་པས་སྒྲུབ་པ་དང་སུན་འབྱིན་པར་བྱེད་ན་ནི། དབུ་མའི་ལྟ་བ་མ་ནོར་བར་ཁས་ལེན་པའི་དབུ་མ་པ་ནི་མི་རྙེད་པའི་ཕྱིར་དང༌། རྗེ་བཙུན་བྱམས་པ་དང་ཐོགས་མེད་ཀྱིས་དབུ་མར་བཤད་པས་དེར་མི་འགྲུབ་ན་ནི། བསྟན་པ་འདི་ལ་ཚད་མར་གྱུར་པའི་དཔང་པོ་གཞན་མི་རྙེད་པའི་ཕྱིར། ལེགས་ལྡན་འབྱེད་དང་ཀ་མ་ལ་ཤཱི་ལས་ནི། འཕགས་པ་ཡིན་པ་དང༌། བདེ་བར་གཤེགས་པས་ལུང་བསྟན་པའི་གཏན་ཚིགས་ཀྱིས་ཀླུ་སྒྲུབ་ཀྱི་གཞུང་ལུགས་དབུ་མར་བསྒྲུབ་ལ། དེ་ནི་འདི་ལའང་ཡོད་པའི་ཕྱིར་རོ། །ཡོངས་གྲུབ་དོན་དམ་པའི་བདེན་པར་བཤད་པས་དབུ་མར་མི་འགྱུར་ན་ནི། སྟོང་ཉིད་མེད་དགག་གི་ཆ་དོན་དམ་པའི་བདེན་པར་འདོད་པའི་བོད་སྔ་ཕྱི་མང་པོ་དག་དབུ་མ་པ་ཉིད་དུ་ཇི་ལྟར་འགྱུར། དེ་བས་ན་བྱམས་པ་དང་ཐོགས་མེད་ཀྱི་རང་ལུགས་ལ་ནི། བྱམས་པའི་ཆོས་ཕྱི་མ་ནས་བསྟན་པའི་དབུ་མ་འདི་ཉིད་ལས་ལོགས་སུ་གྱུར་པའི་དབུ་མའི་ལྟ་བ་སྟོན་བྱེད་ཀྱི་བཀའ་དང་བསྟན་བཅོས་གཞན་ཡོད་པར་མི་འཆད་པ་ནི། བྱམས་པའི་གཞུང་རྩ་བ་ཁོ་ནར་མ་ཟད། བསྡུ་བ་བཞི་དང༌། སྡོམ་རྣམ་གཉིས་ཀྱི་གཞུང་བཀླགས་པ་ཙམ་གྱིས་ཤེས་པར་འགྱུར་བ་ཡིན་ཏེ། ཆོས་ཐམས་ཅད་ངོ་བོ་ཉིད་མེད་པར་སྟོན་པའི་མདོ་སྒྲ་ཇི་བཞིན་པ་མ་ཡིན་པ་ཉིད་དུ་གསལ་བར་བཤད་པ་དང༌། དེ་སྒྲ་ཇི་བཞིན་པར་ཁས་བླངས་ན་ཆད་པར་སྨྲ་བ་(༢༧༨ན)ཉིད་དུ་འགྱུར་རོ་ཞེས་ལུགས་འདི་ཉིད་ལས་གསལ་བར་འགྱུར་བའི་ཕྱིར་རོ། །ཞེས་སོགས་གསུངས་སོ། ། ཙ༢ གཉིས་པ་རྣམ་གཞག་བྱེ་བྲག་ཏུ་འཆད་པ་ལ་གསུམ། ཚ༡ བདེན་པ་གཉིས་གཏན་ལ་འབེབས་ཚུལ། ཚ༢ སེམས་ཙམ་གྱི་སྐྱོན་ལས་གྲོལ་ཚུལ། ཚ༣ རང་སྟོང་གཞན་སྟོང་ཁྱད་པར་འབྱེད་ཚུལ་སོགས་བཤད་པའོ།