Tibetan
ཚ༡ དང་པོ་ནི། དང་པོ་ཡང་དག་མིན་རྟོག་ཀུན་རྫོབ་ཡོད། ། གཟུང་འཛིན་བློས་བཏགས་ཙམ་ཡིན་ཡོད་པ་མིན། ། སྤྲོས་བྲལ་ཡེ་ཤེས་དེ་ཡི་ཆོས་ཉིད་ཚུལ། ། དེ་ལ་གློ་བུར་དྲི་མའང་འབྲལ་རུང་ཡོད། ། དེའང་དབུས་མཐའ་རྣམ་འབྱེད་ལས། ཡང་དག་མ་ཡིན་ཀུན་རྟོག་ཡོད། ། དེ་ལ་གཉིས་པོ་ཡོད་མ་ཡིན། ། སྟོང་པ་ཉིད་ནི་འདི་ལ་ཡོད། ། དེ་ལ་ཡང་ནི་དེ་ཡོད་དོ། ། སྟོང་པ་མ་ཡིན་མི་སྟོང་མིན། ། དེ་ལྟ་བས་ན་ཐམས་ཅད་བཤད། ། ཡོད་པས་མེད་པས་ཡོད་པས་ན། ། དེ་ནི་དབུ་མའི་ལམ་ཡིན་ནོ། ། ཞེས་གསུངས་ཏེ། དང་པོ་ཀུན་རྫོབ་ཀྱི་སྤྲོས་པ་གཅོད་པའི་དབང་དུ་བྱས་ནས། སྣང་བ་སྣ་ཚོགས་པར་འཆར་བའི་ཤེས་པ་ཡང་དག་མིན་རྟོག་ཙམ་ནི་ཀུན་རྫོབ་ཏུ་ཡོད་ལ། དེ་ལ་སྣང་བའི་གཟུང་ཆ་དང་འཛིན་ཆ་ནི་བློས་བཏགས་པ་ཙམ་ཡིན་པའི་ཕྱིར། ཀུན་རྫོབ་ཏུའང་ཡོད་པ་མ་ཡིན་ནོ། ། དེས་ན། ཀུན་རྫོབ་བདེན་པའང་མཐའ་གཉིས་ལས་གྲོལ་བ་ཡིན་ཏེ། ཀུན་རྟོག་ཀུན་རྫོབ་ཏུ་ཡོད་པ་ཙམ་ཁས་བླངས་པས་མེད་མཐའ་དང་ཆད་མཐའ་ལས་གྲོལ་ལ། གཟུང་ཆ་འཛིན་ཆ་སོགས་ལྟོས་ཆོས་སྒྲོ་བཏགས་ཐམས་ཅད་ལས་འདས་པས་རྟག་མཐའ་དང་ཡོད་མཐའ་ལས་གྲོལ་བ་ཡིན་ནོ། ། སྤྲོས་བྲལ་སྟོང་པ་ཉིད་ཀྱི་ཡེ་ཤེས་དེ་ནི། རྣམ་ཤེས་ཡང་དག་མིན་རྟོག་དེ་ལ་ཆོས་ཉིད་ཀྱི་ཚུལ་དུ་བདེན་པར་ཡོད་ཅིང༌། དྲི་བཅས་ཀྱི་སྐབས་ན་ཆོས་ཉིད་དེ་ལ་རྣམ་ཤེས་དེ་ཆོས་ཅན་དྲི་མ་གློ་བུར་བ་(༢༧༨བ)འབྲལ་རུང༌། སྤང་བྱ་དྲི་མ་བདེན་མེད་ཀྱི་ངོ་བོར་ཡོད་ཅེས་བྱ་སྟེ། དེས་ན། དོན་དམ་བདེན་པའང་མཐའ་གཉིས་དང་བྲལ་བ་ཞེས་བྱ་སྟེ། སྟོང་ཉིད་བདེན་གྲུབ་དང༌། ཀུན་རྟོག་སོགས་གཟུང་འཛིན་གཉིས་བསྡུས་ཀྱི་ཆོས་ཐམས་ཅད་བདེན་མེད་ཡིན་པའི་ཕྱིར། ཡོད་མེད་རྟག་ཆད་ཀྱི་མཐའ་ལས་འདས་པ་ཡིན་ནོ། ། ཀུན་རྫོབ་འཁྲུལ་སྣང་ཙམ་ཡིན་ངོ་བོས་སྟོང༌། ། ཆོས་ཉིད་འགྱུར་མེད་ངོ་བོས་སྟོང་པ་མིན། ། དེ་ལྟ་བས་ན་ཀུན་རྫོབ་གཟུང་འཛིན་ནི་འཁྲུལ་པའི་སྣང་བར་ཤར་བ་ཙམ་མ་གཏོགས་རང་གི་ངོ་བོས་གྲུབ་རྒྱུ་མེད་པའི་ཕྱིར་རང་གི་ངོ་བོས་སྟོང་ལ། རང་གཞན་གཉིས་ཀྱིས་ཟླས་ཕྱེ་བའི་གཞན་གྱི་ངོ་བོར་གྲུབ་པ་ཤེས་བྱ་ལ་མི་སྲིད་པའི་ཕྱིར། རྣམ་པ་ཀུན་ཏུ་སྟོང་པས་མི་སྟོང་པ་མིན་ལ། ཡེ་ཤེས་ཆོས་ཉིད་དེ་ནི་རང་གི་ངོ་བོས་གདོད་མ་ནས་གྲུབ་ཅིང་ནམ་དུའང་འགྱུར་བ་མེད་པའི་ཕྱིར་རང་གི་ངོ་བོས་སྟོང་པ་མ་ཡིན་ཞིང་རྟག་ཏུ་ཡོད་པས་སོ། ། ཀུན་བརྟགས་མེད་ལ་གཞན་དབང་ཀུན་རྫོབ་ཡོད། ། ཡོངས་གྲུབ་ཀུན་རྫོབ་མེད་ཀྱང་དོན་དམ་ཡོད། ། འོ་ན་མདོ་རྣམས་སུ་ཆོས་དབྱིངས་དེའང་སྟོང་པར་གསུངས་པ་མ་ཡིན་ནམ་ཞེ་ན། སྤྱིར་སྟོང་པ་དང་སྟོང་ཉིད་ཡིན་ཀྱང༌། རང་གི་ངོ་བོས་སྟོང་པ་ཡིན་མི་དགོས་ཏེ། ཡེ་ཤེས་རང་ལས་གཞན་གྱི་མཚན་ཉིད་ཅན་སྤྲོས་པའམ་གཟུང་འཛིན་ཐམས་ཅད་ཀྱིས་སྟོང་པས་སྟོང་ཉིད་ཅེས་བྱའོ། ། དེ་ལ། ཀུན་བརྟགས། གཞན་དབང༌། ཡོངས་གྲུབ་སྟེ་མཚན་ཉིད་གསུམ་ལས། ཀུན་བརྟགས་ནི། ནམ་མཁའ་ལ་སོགས་པ་དངོས་མེད་ཐམས་ཅད་དང༌། རྣམ་རྟོག་ལ་ཤར་བའི་གཟུགས་སོགས་ཡུལ་གྱི་སྣང་ཆ་རྣམས་དང༌། མིང་ལ་དོན་དུ་ཞེན་པ་དང༌། དོན་ལ་མིང་དུ་འཁྲུལ་པའི་མིང་དོན་གྱི་འབྲེལ་པ་དང༌། ཕྱི་ནང་མཐའ་དབུས། ཆེ་ཆུང་བཟང་ངན་ཕྱོགས་དུས་སོགས་བློས་སྒྲོ་བཏགས་ཀྱིས་གཟུང་བྱ་ཐམས་ཅད་དོ། ། གཞན་དབང་ནི། གཟུང་འཛིན་གྱི་དངོས་པོར་སྣང་བའི་(༢༧༩ན)རྣམ་པར་ཤེས་པ་ཙམ་སྟེ། མ་རིག་པའི་བག་ཆགས་ཀྱི་གཞན་དབང་དུ་གྱུར་པའི་སྣང་བ་ཡིན་པའི་ཕྱིར་རོ། ཡོངས་གྲུབ་ནི། རང་རིག་རང་གསལ་སྤྲོས་པ་ཐམས་ཅད་དང་བྲལ་བ་དེ་ཡིན་ཏེ། ཆོས་ཉིད་དང་ཆོས་དབྱིངས་དང་དེ་བཞིན་ཉིད་དང༌། དོན་དམ་པ་རྣམས་མིང་གི་རྣམ་གྲངས་སོ། ། དེ་ལ་གཞན་དབང་དང་ཀུན་བརྟགས་གཉིས་བདེན་པར་མེད་མཉམ་དང༌། འཁྲུལ་སྣང་ཡིན་མཉམ་དང༌། ཀུན་རྫོབ་དང་རྫུན་པ་ཡིན་མཉམ་ཡིན་ཀྱང༌། མཚན་ཉིད་སོ་སོར་དབྱེ་དགོས་པ་ནི། ཀུན་བརྟགས་ཀུན་རྫོབ་ཏུའང་མེད་ལ། གཞན་དབང་ཀུན་རྫོབ་ཏུ་ཡོད་པ་ཡིན་ཅིང༌། ཡོངས་གྲུབ་ནི་ཀུན་རྫོབ་ཏུ་མེད་ལ་དོན་དམ་ཏུ་ཡོད་པས་བདེན་པར་ཡོད་པའོ། ། དེ་གསུམ་བཏགས་ཡོད་རྫས་ཡོད་སྤྲོས་མེད་ཡོད། ། མེད་དང་ཡོད་དང་དོན་དམ་སྟོང་པ་ཉིད། ། མཚན་ཉིད་སྐྱེ་བ་དོན་དམ་ངོ་བོ་མེད། ། མཚན་ཉིད་དེ་གསུམ་ཡང་ཀུན་བརྟགས་ནི་བཏགས་པས་ཡོད་པ་དང༌། གཞན་དབང་ནི་རྫས་སུ་ཡོད་པ་དང༌། ཡོངས་གྲུབ་ནི་དེ་གཉིས་སུ་ཡོད་པ་མིན་ཡང་སྤྲོས་མེད་དུ་ཡོད་པའོ། ། དེ་བཞིན་དུ། ཀུན་བརྟགས་ནི་མེད་པའི་སྟོང་ཉིད། གཞན་དབང་ནི་ཡོད་པའི་སྟོང་ཉིད། ཡོངས་གྲུབ་ནི་དོན་དམ་སྟོང་ཉིད་ཅེས་བྱ་སྟེ། རྗེ་བཙུན་གྱིས། མེད་པའི་སྟོང་པ་ཉིད་ཤེས་ཤིང༌། ། དེ་བཞིན་ཡོད་པའི་སྟོང་ཉིད་དང༌། ། རང་བཞིན་སྟོང་པ་ཉིད་ཤེས་ན། ། སྟོང་ཉིད་ཤེས་པ་ཞེས་བརྗོད་དོ། ། ཞེས་སོ། ། གཞན་ཡང་ཀུན་བརྟགས་ནི་མཚན་ཉིད་ངོ་བོ་ཉིད་མེད་པ། གཞན་དབང་ནི་སྐྱེ་བ་ངོ་བོ་ཉིད་མེད་པ། ཡོངས་གྲུབ་ནི་དོན་དམ་ངོ་བོ་ཉིད་མེད་པ་སྟེ། ངོ་བོ་ཉིད་ནི་རྣམ་གསུམ་གྱི། ། ངོ་བོ་ཉིད་མེད་རྣམ་གསུམ་ལ། ། བརྟེན་ནས་ཆོས་རྣམས་ཐམས་ཅད་ནི། ། རང་བཞིན་མེད་པར་བསྟན་པ་ཡིན། ། ཅེས་གསུངས་སོ། ། དེ་ཕྱིར་ཤེས་བྱ་ཐམས་ཅད་སྟོང་ཉིད་ཀྱིས། ། ཁྱབ་ཅིང་(༢༧༩བ)ཡོངས་གྲུབ་རང་ངོ་ཀུན་རྫོབ་ཀྱི། ། ཆོས་དང་མ་འབྲེལ་མཚན་མཚོན་གཞི་གསུམ་སྤངས། ། སྤྲོས་བྲལ་རྟག་པ་ཆ་མེད་ཀུན་འགྲོར་བཞེད། ། རྣམ་གཞག་གཞན་དག་སེམས་ཙམ་པ་དང་མཐུན། ། དེའི་ཕྱིར་འདིའི་ལུགས་སུ་ཤེས་བྱ་ཐམས་ཅད་ལ་སྟོང་པ་ཉིད་དང་ངོ་བོ་ཉིད་མེད་པས་ཁྱབ་པར་བཞེད་ཅིང༌། ཡོངས་གྲུབ་བདེན་གྲུབ་ཏུ་ཡོད་ན་དེ་ལ་སྐྱེ་འགག་གནས་གསུམ། འགྲོ་འོང་འགྱུར་ལྡོག་ཕྱོགས་དུས་གཅིག་དང་དུ་མ་སོགས་ཡོད་དམ་ཞེ་ན་མ་ཡིན་ཏེ། དེ་རྣམས་ཡོད་ན་བདེན་མེད་ཡིན་པས་ཁྱབ་ཅིང༌། འདི་ནི་ཀུན་རྫོབ་ཀྱི་ཆོས་དེ་རྣམས་གང་དང་ཡང་མ་འབྲེལ་བ་སྟེ། སྐྱེ་འགག་གནས་གསུམ་འགྲོ་འོང་མེད་ཅིང༌། གཅིག་དུ་མ། རྒྱུ་དང་འབྲས་བུ་མ་ཡིན་པ། རང་གི་ངོ་བོས་མཚན་ཉིད། མཚོན་བྱ། མཚན་གཞི་གསུམ་ཀ་སྤངས་ཤིང་ཕྱོགས་དུས་སོགས་སྤྲོས་པ་ཐམས་ཅད་དང་བྲལ་བའི་ཕྱིར་རང་བཞིན་གྱིས་རྟག་པ། དེ་ལ་དུམ་བུ་ཐ་དད་དབྱེ་རུ་མེད་པའི་ཕྱིར་ཆ་མེད་ཡིན་ལ། ཆོས་ཐམས་ཅད་ཀྱི་ཆོས་ཉིད་ཡིན་པའི་ཕྱིར་ཀུན་འགྲོ་དང་ཀུན་ཁྱབ་ཏུ་བཞེད་ཅིང༌། གཞི་ལམ་འབྲས་བུའི་རྣམ་གཞག་གཞན་དག་ཕལ་མོ་ཆེ་སེམས་ཙམ་པ་དང་མཐུན་པར་སྨྲའོ། ། ཚ༢ གཉིས་པ་[སེམས་ཙམ་གྱི་སྐྱོན་ལས་གྲོལ་ཚུལ་བཤད་པ་]ནི། རྣམ་རྫུན་རྣམ་ཤེས་ངོ་བོ་བདེན་གྲུབ་སྨྲ། ། བློ་ཡི་ཡུལ་གྱུར་འདི་ནི་ཡེ་ཤེས་ཉིད། ། བདེན་གྲུབ་བཞེད་ཀྱང་འདུས་མ་བྱས་པའི་ཕྱིར། ། དོན་དམ་དངོས་པོར་སྨྲ་བའི་སྐྱོན་ལས་གྲོལ། ། བོད་དུ་གྲགས་པའི་སེམས་ཙམ་རྣམ་རྫུན་པའི་ལུགས་སུ་ཀུན་གཞིའི་རྣམ་པར་ཤེས་པའི་ངོ་བོ་བདེན་གྲུབ་ཏུ་སྨྲ་བར་བཤད་པས་རྣམ་ཤེས་ནི་བློའི་ཡུལ་དུ་གྱུར་པས་དངོས་པོར་སྨྲ་བ་ཡིན་ལ། ལུགས་འདིར་ནི་རྣམ་ཤེས་ལས་འདས་པ་སྤྲོས་པ་ཐམས་ཅད་དང་བྲལ་བའི་ཡེ་ཤེས་ཀྱི་ངོ་བོ་ཉིད་བདེན་གྲུབ་ཏུ་བཞེད་ཀྱང༌། སྤྲོས་བྲལ་གྱི་ཡེ་ཤེས་དེ་འདུས་མ་བྱས་ཡིན་པའི་ཕྱིར་དོན་དམ་གྱི་(༢༨༠ན)བདེན་པ་དངོས་པོར་སྨྲ་བའི་སྐྱོན་ཐམས་ཅད་ལས་གྲོལ་བར་གསུངས་སོ། ། ཚ༣ གསུམ་པ་[རང་སྟོང་གཞན་སྟོང་ཁྱད་པར་འབྱེད་ཚུལ་སོགས་བཤད་པ་]ནི། གཞན་སྟོང་རང་སྟོང་ཀུན་རྫོབ་སྟོང་ཚུལ་དང༌། ། མཉམ་གཞག་སྤྲོས་མཐའ་འགོག་ལ་ཁྱད་པར་མེད། ། རྗེས་ཐོབ་ཐ་སྙད་ཆོས་ཉིད་ཡོད་མེད་དང༌། ། དཔྱད་མཐར་ཡེ་ཤེས་བདེན་གྲུབ་མ་གྲུབ་ཁྱད། ། དོན་དམ་བདེན་པའང་རང་བཞིན་མ་གྲུབ་པའི། ། མེད་དགག་ཙམ་ནི་བེམ་སྟོང་ཡིན་པར་འདོད། ། གཉིས་སྟོང་ཡེ་ཤེས་རང་རིག་ཉིད་ལ་འཇོག ། མདོ་སྔགས་མཚམས་སྦྱོར་ཟབ་མོའི་ལྟ་བར་བཞེད། ། དབུ་མ་གཞན་སྟོང་དང་རང་སྟོང་གཉིས་སུ་གྲགས་པ་གཉིས་ཀར་ཀུན་རྫོབ་ཀྱིས་བསྡུས་པའི་ཆོས་ཐམས་ཅད་སྟོང་པ་ཉིད་དུ་གཏན་ལ་འབེབས་པའི་ཚུལ་དང༌། མཉམ་གཞག་ཏུ་སྤྲོས་པའི་མཐའ་ཐམས་ཅད་འགོག་པ་ལ་ཁྱད་པར་མེད་ཀྱང༌། རྗེས་ཐོབ་གྲུབ་མཐའ་ཤན་འབྱེད་པའི་སྐབས་ཐ་སྙད་ཀྱི་ཁས་ལེན་ཙམ་དུ་ཆོས་ཉིད་དེ་བཞིན་ཉིད་ཡོད་དོ་ཞེས་པ་དང༌། མེད་དོ་ཞེས་པའི་ཤེས་བརྗོད་ཀྱི་ཐ་སྙད་འདོགས་ཚུལ་དང༌། དོན་དམ་དཔྱོད་བྱེད་ཀྱི་རིགས་པས་དཔྱད་པ་མཐར་ཐུག་པའི་ཚེ་ན་གཉིས་མེད་ཀྱི་ཡེ་ཤེས་བདེན་པར་གྲུབ་པ་དང་མ་གྲུབ་པའི་ལྟ་བའི་ཁྱད་པར་ཡོད་དོ། ། དེས་ན་གཞན་སྟོང་སྨྲ་བ་རྣམས་ཀྱིས་ནི། ཀུན་བརྟགས་གཞན་དབང་གཉིས་ཀུན་རྫོབ། ཡོངས་གྲུབ་དོན་དམ་བདེན་པར་བཞེད་ཅིང་དེའང་བདེན་པར་མ་གྲུབ་པའི་མེད་དགག་ཙམ་དུ་ལྟ་བ་ནི་བེམ་སྟོང་སྟེ་ཀུན་རྫོབ་ཀྱི་སྟོང་ཚུལ་གྱི་དོན་དམ་སྟོང་པ་ཉིད་ཀྱི་གནས་ལུགས་ནི་མ་ཡིན་པར་འདོད་ཅིང༌། དེ་ནི་མདོར་ན། གཟུང་འཛིན་གཉིས་སྟོང་གི་ཡེ་ཤེས་སོ་སོ་རང་རིག་པ་ལ་འཇོག །ལུགས་འདི་ནི་རྒྱུད་སྡེ་ཆེན་པོ་རྣམས་ཀྱི་དགོངས་པ་དང་ཆེས་མཐུན་པས་མདོ་སྔགས་གཉིས་མཚམས་སྦྱོར་བའི་ཟབ་མོའི་ལྟ་བ་དབུ་མའི་ལུགས་སྲོལ་རྣམས་ཀྱི་རྩེ་མོར་སོན་པའང་བཞེད་དོ། ། འདིར་གཞན་གྱིས་བརྟགས་(༢༨༠བ)པའི་མཐའ་བསལ་བ་སྙིང་པོ་བསྡུས་པ། རྗེ་བཙུན་སྒྲོལ་བའི་མགོན་པོའི་གསུང་ལས། གཞན་དག་ལངྐར་གཤེགས་པ་ལས། བདེ་གཤེགས་སྙིང་པོ་མཚན་དཔེ་ཅན་ཡོད་ན་མུ་སྟེགས་པའི་བདག་དང་མཚུངས་པར་འགྱུར་བ་མིན་ནམ། ཞེས་ཞུས་པས། ལན་དུ། མི་མཚུངས་ཏེ། སྟོང་པ་ཉིད་ཡིན་པའི་ཕྱིར་ཞེས་གསུངས་པས། བདེ་གཤེགས་སྙིང་པོ་བདེན་མེད་ཡིན་ཅིང༌། མཚན་དཔེ་སོགས་ཡོད་ན་མུ་སྟེགས་པའི་ལུགས་སུ་འགྱུར་པས། ནམ་མཁའ་ལྟར་ཅིར་ཡང་མ་གྲུབ་པ་ཞིག་ལ་བདེ་གཤེགས་སྙིང་པོ་ཞེས་བྱའོ་ཞེས་ཟེར་བ་ནི་སྟོང་ཉིད་ཡིན་ཚད་བདེན་མེད་ཀྱི་དོན་དང༌། རྣམ་མེད་ཅིར་ཡང་མ་གྲུབ་པ་ཙམ་ལ་ངོས་འཛིན་པ་རང་གི་གྲུབ་མཐའ་ངན་པ་ལ་ཞེན་པའི་བློ་སྐྱོན་ཡིན་ཅིང༌། མདོ་ལས་ཀྱང༌། མུ་སྟེགས་དང་མི་མཚུངས་པའི་རྒྱུ་མཚན་སྟོང་ཉིད་ཡིན་པར་བཀོད་ཀྱི། མཚན་དཔེ་མེད་པ་མ་བཀོད་པའི་ཕྱིར། མཚན་དཔེ་གསལ་རྫོགས་ཀྱི་བདེ་གཤེགས་སྙིང་པོ་དྲང་དོན་དུ་བཤད་ཟེར་བ་ཡང་རྫུན་གྱིས་འཇིག་རྟེན་བསླུ་བ་ཙམ་དུ་ཟད་དོ། ། ཡང་སྙིང་པོ་རྟག་པར་འདོད་པ་མུ་སྟེགས་ཀྱི་ལུགས་སོ་ཟེར་བ་ཡང་སྙིང་པོའི་མདོ་རྣམས་ལ་དགག་པ་བྱེད་པར་ཟད་ལ། རྟག་པའི་དོན་རྒྱུན་གྱིས་རྟག་པ་ལ་འདོད་པའང་མི་འཐད་དེ། རྒྱུན་གྱིས་རྟག་པ་ཙམ་ནི་འཁོར་བ་དང་གཟུང་འཛིན་ཀུན་ཡང་ཡིན་པའི་ཕྱིར་དང༌། རྒྱུན་གྱིས་རྟག་པ་ཙམ་གྱིས་རྟག་པའི་གོ་ཆོད་ན་འདུས་བྱས་ཐམས་ཅད་ཀྱང་རྟག་པར་འགྱུར་རོ། ། དང་པོ་དྲི་བཅས་ཡིན་པ་ཕྱིས་དྲི་མེད་དུ་འགྱུར་བས་མི་རྟག་པ་ཡིན་ནོ་སྙམ་ན། ཆོས་དབྱིངས་ཀྱི་ངོས་ནས་དང་པོ་དྲི་བཅས་མ་ཡིན་ལ། ཕྱིས་དྲི་མེད་དུ་སོང་བ་ཡང་མ་ཡིན་མོད། དྲི་བཅས་དང་དྲི་མེད་དུ་འགྲོ་ཚུལ་ནི་གང་ཟག་གི་རྒྱུད་ལ་ལྟོས་ནས་ཡིན་པའི་ཕྱིར། སེམས་ཅན་གནས་སྐབས་འགྱུར་བས་ཆོས་ཉིད་གནས་སྐབས་འགྱུར་བར་མི་འགྲོའོ། ། སེམས་ཅན་གྱི་རྒྱུད་ལ་སངས་(༢༨༡ན)རྒྱས་ཀྱི་ཡེ་ཤེས་ཡོད་པ་ནི་མི་འཐད་དོ་སྙམ་ན། སངས་རྒྱས་ཡེ་ཤེས་སེམས་ཅན་ཚོགས་ཞུགས་ཕྱིར། ། ཞེས་དངོས་སུ་གསུངས་པ་དང་འགལ་ལོ། ། སེམས་ཅན་གྱི་རྒྱུད་ལ་སངས་རྒྱས་ཀྱི་ཡོན་ཏན་ཡོད་པ་མི་འཐད་དེ། དཔེར་མཚོན་ན། གནས་དང་གནས་མ་ཡིན་པ་མཁྱེན་པའི་སྟོབས་སེམས་ཅན་གྱི་རྒྱུད་ལ་ཡོད་ན། གནས་དང་གནས་མ་ཡིན་པ་ཐམས་ཅད་སེམས་ཅན་གྱིས་ཤེས་པར་ཐལ་ལོ་ཞེས་ཟེར་བའང་ཡང་དག་པ་མ་ཡིན་ཏེ། སེམས་ཅན་གྱི་རྒྱུད་ཡིན་ཚད་སངས་རྒྱས་ཡིན་ནོ་ཞེས་ཁོ་བོ་ཅག་ནི་མི་འདོད་པའི་ཕྱིར་དང༌། སེམས་ཅན་གྱི་རྒྱུད་ལ་སངས་རྒྱས་དང་དེའི་ཡོན་ཏན་བཞུགས་པས་དེར་ཐལ་ན། གདན་ཁྲི་ལ་སངས་རྒྱས་བཞུགས་པ་ན། གདན་ཁྲིས་ཀྱང་ཤེས་བྱ་ཐམས་ཅད་ཤེས་པར་ཐལ་བར་འགྱུར་རམ། དེས་ན་སེམས་ཅན་གྱི་རྒྱུད་རྣམ་པར་ཤེས་པའི་ཚོགས་བརྒྱད་སངས་རྒྱས་ག་ལ་ཡིན་ཅིང༌། དེ་ལ་བཞུགས་པའི་སངས་རྒྱས་ཀྱང་ཀུན་རྫོབ་རྟེན་བརྟེན་པའི་ཚུལ་གྱིས་བཞུགས་པ་མ་ཡིན་ལ། དོན་དམ་ཆོས་ཉིད་ཚུལ་གྱིས་བཞུགས་པ་ཡིན་ནོ། །ཞེས་གསུངས་སོ། ། ཙ༣ གསུམ་པ་འཕྲོས་དོན་སྙིང་ལ་གདམས་པ་ནི། བོད་སྟོན་ཕལ་ཆེར་ལུགས་འདི་སེམས་ཙམ་ཞེས། ། བྱམས་གཞུང་ཐོགས་མེད་མཆེད་བཅས་དམན་པར་འཛིན། ། ཐུབ་བསྟན་ནམ་མཁའི་རྒྱན་གྱུར་ཉི་ཟླ་ནི། ། ཤིང་རྟ་གཉིས་ཀྱི་གཞུང་ལུགས་ཁོ་ན་སྟེ། ། གཞུང་ཕྲན་རྒྱུ་སྐར་བྲག་ཅའི་རྗེས་ཟློས་ཀྱི། ། ཕྱོགས་ཞེན་སྤངས་ནས་མཚུངས་པར་འཇུག་པར་རིགས། ། བོད་ཀྱི་སྟོན་པ་སྔ་ཕྱི་ཕལ་མོ་ཆེ་རྣམས་དང༌། རྒྱ་གར་དུའང་པཎྜི་ཏ་ཕལ་པ་ཁ་ཅིག་གིས་ལུགས་འདི་སེམས་ཙམ་པའི་གྲུབ་མཐའོ་ཞེས་དབུ་མའི་གྲལ་ནས་འབུད་པ་མ་ཟད། མཁས་པ་དེ་དག་གི་དགོངས་པ་ཇི་ལྟ་བ་མ་ལོངས་པར་བཤད་སྲོལ་གྱི་རྗེས་སུ་ཟློ་བར་རློམས་པ་དུ་མ་དག་གིས་(༢༨༡བ)རྗེ་བཙུན་བྱམས་པའི་གཞུང་ལུགས་དང༌། འཕགས་པ་ཐོགས་མེད་སྐུ་མཆེད་བཅས་སེམས་ཙམ་པའོ་ཞེས་འཕགས་པ་ཀླུ་སྒྲུབ་སོགས་དང་མཆོག་དམན་ཆེན་པོར་ཡོད་པར་འཛིན་ཅིང་དེ་ལ་བརྟེན་ནས་ཆོས་སྤོང་གི་ལས་མཐའ་ཡས་པ་ཞིག་ཀྱང་བསགས་པར་གྱུར་ཏོ། ། ཐུབ་བསྟན་ནམ་མཁའི་རྒྱན་གཅིག་པུ་བ་ཉི་ཟླ་གཉིས་དང་མཚུངས་པ་ནི་ཤིང་རྟ་ཆེན་པོ་གཉིས་ཀྱི་གཞུང་ལུགས་ཁོ་ན་ལས་གཞན་དུ་མ་མཆིས་པས། དེ་དག་དང་བསྟུན་ན་པཎྜི་ཏ་ཕལ་པའི་གཞུང་ཕྲན་རྒྱུ་སྐར་དང་མཚུངས་པ་རྣམས་བྲག་ཅ་ལྟར་རྗེས་སུ་ཟློས་ཏེ་ལྟར་སྣང་གི་ལུང་རིགས་མང་པོས་དགག་སྒྲུབ་ཀྱི་སྤྲོས་པ་ལྷུར་ལེན་ཅིང༌། ཕྱོགས་རེར་ཞེན་ནས་ཉི་ཚེ་བར་བཤད་པའི་འབྲས་བུ་རང་གཞན་མང་པོ་ཉེས་པའི་གཡང་ས་ལ་སྦྱོར་བར་བྱེད་པ་དེ་དག་སྤངས་ནས། ཤིང་རྟ་གཉིས་ཀྱི་ལུགས་མཆོག་ནི་གཅིག་གིས་གཅིག་ལ་འགལ་བ་འདུ་བ་མ་ཡིན་པར་ཕྱི་དང་ནང་གི་བདག་ཉིད་དུ་གཙོ་བོར་གནས་པའི་ཕྱིར་ཐོས་བསམ་སྒོམ་པའི་གནས་ལ་མཚུངས་པ་ཁོ་ནར་འཇུག་པར་རིགས་སོ། ། དེ་ལྟར་ཡང་མ་ཧཱ་པཎྜི་ཏ་ཤཱཀྱ་མཆོག་ལྡན་གྱི་ཞལ་ནས། ཐོགས་མེད་བཞེད་གཞུང་ཀུན་གཞིའི་ཆོས་ལུགས་དང༌། ། སྟོང་ཉིད་གསུམ་གྱི་རྣམ་གཞག་འདི་མེད་ན། ། ཚུལ་ཆེན་གཞུང་གི་སྦྱང་གཞི་སྦྱོང་བྱེད་དང༌། ། ཕྱི་ནང་གཞན་གསུམ་རྣམ་གཞག་གང་གིས་འཆད། ། གཉིས་མེད་ཡེ་ཤེས་ངོ་བོས་སྟོང་པའི་ཚུལ། ། ཐལ་རང་གཞུང་གིས་ཕྱེ་བ་འདི་མེད་ན། ། ཟབ་གསལ་ཡེ་ཤེས་བདེན་པར་འཛིན་པ་དང༌། ། གྱ་ནོམ་ལྷར་ཞེན་རྟོག་པ་གང་གིས་སྤོང༌། ། ཞེས་དང༌། བསྟན་པ་འདི་ལ་དབུ་མ་ནི་རྣམ་པ་གཉིས་ཏེ། རྗེ་བཙུན་བྱམས་པའི་གཞུང་གི་ངེས་དོན་གྱི་སྙིང་པོར་གྱུར་པ་མཐར་ཐུག་པ་དང༌། ཀླུ་སྒྲུབ་ཞབས་ཀྱི་གཞུང་གི་ངེས་དོན་གྱི་སྙིང་པོར་གྱུར་པ་མཐར་ཐུག་པའོ། ། དང་པོ་ནི། གཟུང་འཛིན་གཉིས་མེད་ཀྱི་(༢༨༢ན)ཡེ་ཤེས་སོ། ། དེ་གང་དུ་འབྱུང་བ་ནི། རྒྱན་གཉིས། འབྱེད་གཉིས་དང༌། རྒྱུད་བླ་མའི་བསྟན་བཅོས་སུའོ། ། ལྟ་བ་དེ་དབུ་མའི་ལམ་དུ་སྒྲུབ་པ་ནི་དབུས་དང་མཐའ་རྣམ་པར་འབྱེད་པའི་བསྟན་བཅོས་སོ། ། དེ་ཇི་ལྟར་ཡིད་ལ་བྱེད་པའི་རིམ་པ་སྟོན་པ་ནི་ཆོས་དང་ཆོས་ཉིད་རྣམ་པར་འབྱེད་པའི་བསྟན་བཅོས་སུའོ།། གཉིས་པ་ནི། སྤྲོས་པའི་མཐའ་ཐམས་ཅད་བཀག་པའི་མེད་པར་དགག་པ་ཙམ་མོ། ། དེ་གང་དུ་འབྱུང་བའི་བསྟན་བཅོས་ནི་རིགས་པའི་ཚོགས་ཡིན་ལ། བསྟོད་པའི་ཚོགས་སུ་འབྱུང་བ་ནི་བྱམས་པའི་ཆོས་དང་མཐུན་ནོ། ། དེ་དག་གང་གིས་གཏན་ལ་འབེབས་པའི་སྲོལ་འབྱེད་ནི་གཉིས་ཏེ། ཀླུ་སྒྲུབ་ཞབས་དང༌། ཐོགས་མེད་ཞབས་སོ། ། ཇི་ལྟར་གཏན་ལ་ཕབ་པའི་ཚུལ་ནི་གཉིས་ཏེ། བདེན་པ་གཉིས་ངོ་བོས་སྟོང་པར་གཏན་ལ་འབེབས་པ་རང་སྟོང་གི་ལུགས་དང༌། ཀུན་རྫོབ་ཀྱི་ངོ་བོ་ཙམ་ཞིག་རང་སྟོང་དུ་གཏན་ལ་ཕབ་པས་དོན་དམ་ལ་སྤྲོས་པ་ཆོད་པ་གཞན་སྟོང་གི་ལུགས་གཉིས་སོ། ། ཡང་མངོན་རྟོགས་རྒྱན་གྱི་དགོངས་པ་རང་སྟོང་ལྟར་འཆད་པ་འཕགས་སེང་གི་ལུགས་དང༌། རིགས་ཚོགས་ཀྱི་དགོངས་པ་གཞན་སྟོང་ལྟར་འཆད་པ་འཇིགས་མེད་ཆོས་སྐྱོང་ཞབས་ཀྱི་ལུགས་གཉིས་ཀྱང་ཡོད་དོ། ། མདོར་ན། སྲོལ་འབྱེད་དེ་བཞི་ཀའང་དབུ་མའི་ལམ་ཉིད་དུ་མཚུངས་པ་ཡིན་ཏེ། དེ་ཐམས་ཅད་ཀྱང་ཚད་ལྡན་གྱི་གཞུང་ལུགས་དག་ལས་དབུ་མའི་ལུགས་ཉིད་དུ་གསལ་བར་གསུངས་པའི་ཕྱིར་རོ། ། དེའང་རང་སྟོང་གི་ཚུལ་དེ་དབུ་མའི་ལམ་ཉིད་དུ་ཐལ་རང་དུ་སྨྲ་བའི་སློབ་དཔོན་རྣམས་ཀྱིས་བཤད་པ་ཡིན་ཏེ། ཇི་སྐད་དུ། རྟེན་ཅིང་འབྲེལ་བར་འབྱུང་བ་གང༌། ། དེ་ནི་སྟོང་པ་ཉིད་དུ་བཤད། ། དེ་ནི་བརྟེན་ནས་བཏགས་པ་སྟེ། ། དེ་ནི་དབུ་མའི་ལམ་ཡིན་ནོ། ། ཞེས་པའི་སྟོང་པ་ཉིད་དེ་དབུ་མ་རང་སྟོང་ལ་འཆད་པའི་ཕྱིར། གཞན་སྟོང་གི་ཚུལ་དེ་དབུ་མའི་ལམ་ཉིད་དུ་(༢༨༢བ)ཐོགས་མེད་སྐུ་མཆེད་ཀྱིས་བཞེད་པ་ཡིན་ཏེ། ཇི་སྐད་དུ། ཡོད་པས་མེད་པས་ཡོད་པས་ན། ། དེ་ནི་དབུ་མའི་ལམ་ཡིན་ནོ། ། ཞེས་པའི་སྐབས་ཀྱི་སྟོང་པ་ཉིད་དེ་གཞན་སྟོང་གི་ཚུལ་ལ་བཞེད་པའི་ཕྱིར། དེ་ལ་གངས་ཅན་པ་དག་འདི་སྙམ་དུ། གྲུབ་མཐའ་བཞིའི་ཡ་གྱལ་དུ་གྱུར་པའི་དབུ་མ་ནི་སྤྱིར་ཐལ་རང་གི་སྲོལ་གཉིས་དང༌། དེ་ལས་ཀྱང་ཆེས་མཆོག་ཏུ་གྱུར་པ་ནི་ཐལ་འགྱུར་བས་ཕྱེ་བའི་ལམ་ཁོ་ན་ཡིན་ཏེ། ཇི་སྐད་དུ། དེ་ཉིད་བཤད་ཟིན་ཟབ་མོ་