Tibetan
འབྲས་ཕྱིར་འདི་དག་མེད་ཀྱང་ཡོད་དོ་ཞེས། ། འཇིག་རྟེན་ངོར་བྱས་བདག་ནི་སྨྲ་བར་བྱེད། ། ཅེས་གསུངས་པའི་ཕྱིར་རོ། ། གཞན་ཡང་རྩོད་པ་བྱེད་པའི་ཚེ་རང་རྒྱུད་ཀྱི་སློབ་དཔོན་རྣམས་རང་ལུགས་མ་གཞག་པར་གཞན་ལུགས་ཁོ་ན་འགོག་པར་བྱེད་པ་ནི་སུན་འབྱིན་ཕྱིན་ཅི་ལོག་ཏུ་རྒོལ་བ་ཡིན་པས་མི་རིགས་པའི་ཕྱིར་དང༌། རང་གི་འདོད་པ་སྟོང་ཉིད་དང་སྐྱེ་མེད་སོགས་ཚད་མས་མ་གྲུབ་པར་གཞན་གྱི་དངོས་པོ་རྣམས་ལ་སྐྱེ་བ་རང་བཞིན་ཡོད་པར་འདོད་པར་ཐལ་བ་ཙམ་གྱིས་དགག་མི་ནུས་པའི་ཕྱིར། ཐ་སྙད་དུ་སྐྱེ་མེད་རང་ལུགས་ཀྱི་དམ་བཅའ་སྒྲུབ་བྱེད་ཀྱི་གཏན་ཚིག་དང༌། དཔེ་སོགས་ཚད་མས་གྲུབ་པའི་རང་ལུགས་འགའ་ཞིག་འདོད་པར་(༢༦༤བ)བྱ་བ་ཡིན་ཏེ། རང་ལུགས་ཀྱི་དམ་བཅའ་གཞན་གྱིས་འདོད་པའི་རྟགས་ཀྱིས་སྒྲུབ་པར་མི་ནུས་པའི་ཕྱིར་ཞེས་འདོད་དོ། ། ཐལ་འགྱུར་བ་རྣམས་ནི། གལ་ཏེ། རང་གི་དམ་བཅའ་ཡོད་ན་གཞན་གྱི་སྐྱོན་བརྗོད་ཀྱི་དོགས་པས་རང་ལུགས་མི་འཇོག་ཅིང༌། གཞན་ལུགས་ལ་ཞེ་སྡང་བའི་བསམ་པས་ཐལ་བ་ཙམ་གྱིས་འགོག་ན་སུན་འབྱིན་ཕྱིན་ཅི་ལོག་ཏུ་རྒོལ་བའི་གཡོ་སྒྱུ་ཅན་དུ་འགྱུར་ནའང༌། དབུ་མ་ལ་ནི་རང་ལ་བཞག་པར་བྱ་བའི་ཕྱོགས་ཅུང་ཟད་ཀྱང་མེད་ན་དེའི་སྒྲུབ་བྱེད་ཚོལ་བའི་ངལ་བ་འདིས་ཅི་ཞིག་བྱ། ཡང་དག་པར་ནི་གཞན་དགག་པ་ཡང་མིན་ཏེ། དགག་བྱའི་ཆོས་ཅུང་ཟད་ཅིག་དམིགས་ན་དེ་ཉིད་འགོག་པར་ཡང་རིགས་མོད་ཀྱི། དགག་བྱའི་དངོས་པོ་སྐྲ་རྩེ་བརྒྱར་གཤགས་ཀྱི་ཚད་ཙམ་ཡང་མ་དམིགས་ན་དེ་ལ་སུ་ཞིག་དགག་པར་སྨྲ་བར་བྱེད་དེ། ཤེས་རབ་ལ་འཇུག་པ་ལས། དགག་སྒྲུབ་གཉིས་ཀ་དགག་འབའ་ཞིག ། དངོས་ལ་དགག་སྒྲུབ་གང་ཡང་མེད། ། ཅེས་པ་ལྟར་རོ། ། གང་ཡང་བསྟན་བཅོས་རྣམས་སུ་གཞན་གྱི་འདོད་པ་བཀོད་ནས་རིགས་པའི་དཔྱད་པ་དུ་མ་མཛད་པ་དེ་ནི་གཞན་ལུགས་ལ་ཞེ་སྡང་བའམ་རྩོད་པ་ལ་དགའ་བའི་ཕྱིར་མ་ཡིན་གྱི། རྟོག་པའི་དྲྭ་བས་བཅིངས་པའི་སྐྱེ་བོ་འདི་དག་མངོན་ཞེན་ཟློག་པའི་ཕྱིར་གཞན་ངོ་འབའ་ཞིག་ཏུ་མཛད་པ་ཡིན་ཏེ། འཇུག་པ་ལས། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། ། མ་མཛད་རྣམ་གྲོལ་ཕྱིར་ན་དེ་ཉིད་བསྟན། ། གལ་ཏེ་དེ་ཉིད་རྣམ་པར་བཤད་པ་ན། ། གཞན་གཞུང་འཇིག་པར་འགྱུར་ནའང་ཉེས་པ་མེད། ། ཅེས་སོ། ། དེ་བས་ན། དབུ་མའི་བསྟན་བཅོས་རྣམས་ལས་རིགས་པའི་རྣམ་པར་དཔྱད་པ་ཇི་སྙེད་ཅིག་བྱས་པ་དེ་དག་ནི་ཕ་རོལ་གྱི་སྒྲོ་སྐུར་གྱི་རྟོག་པ་ཟློག་པའི་འབྲས་བུ་ཅན་ཁོ་ན་ཡིན་གྱི། སྒྲོ་སྐུར་བསལ་ནས་གནས་ལུགས་ཀྱི་དོན་རྟོགས་པ་འབའ་ཞིག་རྣམ་པར་དཔྱད་(༢༦༥ན)པའི་མཐུ་ལས་སྐྱེ་བ་ནི་མ་ཡིན་ཏེ། གནས་ལུགས་ནི་ཐོས་བསམ་གྱིས་དཔྱད་པའི་ཡུལ་མ་ཡིན་པའི་ཕྱིར། དེ་སྐད་དུ་ཡང༌། དེ་ཉིད་ལས། སོ་སོ་སྐྱེ་བོ་རྣམས་ནི་རྟོག་པས་བཅིངས། ། མི་རྟོག་རྣལ་འབྱོར་པ་ནི་གྲོལ་བར་འགྱུར། ། རྟོག་རྣམས་ལོག་པར་གྱུར་པ་གང་ཡིན་དེ། ། རྣམ་པར་དཔྱོད་པའི་འབྲས་བུར་མཁས་རྣམས་གསུངས། ། ཞེས་སོ། ། ཐལ་འགྱུར་གྱི་ལུགས་འདི་ལ་གཞན་གྱིས་རྒོལ་དུ་མེད་པ་མ་ཟད་འདིས་གཞན་ཕྱོགས་མ་ལུས་པ་སུན་འབྱིན་པར་ནུས་ཏེ། འདིའི་རིགས་པ་ལ་གཞན་གྱིས་སྐྱོན་སྤོང་གི་ལན་གང་དང་གང་བཏབ་པ་དེ་དང་དེ་དག་བསྒྲུབ་བྱ་དང་མཚུངས་པར་ནུས་པ་མེད་པའི་ཕྱིར། མདོར་ན། ཐལ་འགྱུར་པ་རྣམས་ནི་རང་རྒྱུད་ལ་གྲུབ་པའི་དངོས་པོ་སྟོབས་ཞུགས་ཀྱི་གཏན་ཚིགས་མི་འདོད་དེ། སྒྲུབ་པའི་དངོས་པོ་སྟོབས་ཞུགས་ཀྱི་ཚད་མ་མེད་པའི་ཕྱིར་རོ། ། གཞན་ངོར་ཕྱོགས་གཉིས་ཀྱི་དགག་སྒྲུབ་ནི་འཇིག་རྟེན་ལ་གྲགས་པའི་ཚད་མ་བཞི་དང་རྟགས་བཞིས་བྱེད། རང་རྒྱུད་པ་རྣམས་ནི་རང་རྒྱུད་ལ་གྲུབ་པའི་དངོས་པོ་སྟོབས་ཞུགས་ཀྱི་རྟགས་དང་ཚད་མ་ཁས་ལེན་ཏེ། དེས་ན་སྔ་མས་རང་ལ་ཡོངས་གཅོད་ཀྱི་བསྒྲུབ་བྱ་གང་ཡང་མེད་ལ་གཞན་གྱི་ཁས་ལེན་འགེགས་པ་དང༌། རང་རྒྱུད་པ་ནི་ཚུལ་གསུམ་ཚད་མས་གྲུབ་པ་ལས་བྱུང་བའི་སྤྲོས་པ་གཅོད་བྱེད་ཀྱི་རིགས་པ་ལ་བརྟེན་ནས་གཞན་གྱི་ཁས་ལེན་འགེགས་པའོ། ། སོགས་ཁོངས་ནས། གཞན་ཡང་། འདི་གཉིས་ལ་གཞིའི་སྐབས་སུ། ཀུན་རྫོབ་ལ་ཡང་ལོག་གམ་བདེན་རྫུན་གྱི་དབྱེ་བ་མི་འདོད་པ་དང་འདོད་པ། ཡུལ་ཐམས་ཅད་རྫུན་པ་དང་བློ་ཐམས་ཅད་འཁྲུལ་པར་འདོད་པ་དང་མི་འདོད་པ་ལ་སོགས་པ། ལམ་གྱི་སྐབས་སུའང་། ཐོས་བསམ་གྱི་ཚེ་དགག་བྱ་བཀག་ཤུལ་དུ་བསྒྲུབ་བྱ་མི་སྒྲུབ་པ་དང་སྒྲུབ་པ། (༢༦༥བ)ལྟ་བ་ཁས་ལེན་མི་འདོད་པ་དང་འདོད་པ་སོགས་ཕྲན་བུ་དང༌། འབྲས་བུའི་སྐབས་སུ། རང་རྒྱུད་པ་ཁ་ཅིག །དེ་བཞིན་གཤེགས་པ་ལ་གནས་གྱུར་པའི་ཡེ་ཤེས་སྒྱུ་མ་ལྟ་བུ་ཁས་བླངས་ནས་དེ་ལ་ཀུན་རྫོབ་སྒྱུ་མ་ལྟ་བུ་སྣང་ཡང་འཁྲུལ་པར་མི་འགྱུར་ཏེ། བདེན་འཛིན་མེད་པའི་ཕྱིར། སངས་རྒྱས་ལ་མ་དག་ལས་སྣང་ཡོད་པ་དང༌། ཐལ་འགྱུར་བ་དག །སྣང་བ་ནི་ཉོན་མོངས་པ་ཅན་མ་ཡིན་པའི་མ་རིག་པའི་བག་ཆགས་ལས་བྱུང་བས་འཁྲུལ་པ་ཡིན་ལ། དེ་བཞིན་གཤེགས་པས་འཁྲུལ་པ་མ་ལུས་པ་སྤངས་པས་སྣང་བའི་འཇུག་པ་ཉེ་བར་ཞི་བའི་ཕྱིར། ལས་སྣང་གཏན་མེད་པར་འདོད་པ་སོགས་ཁྱད་པར་ཕྲན་བུ་མང་དུ་ཡོད་དོ། ། ཚ༣ གསུམ་པ་དེ་དག་སོ་སོའི་ལུགས་བཤད་པ་ལ་གཉིས། ཛ༡ རང་རྒྱུད་པའི་རྣམ་བཞག ། ཛ༢ ཐལ་འགྱུར་པའི་རྣམ་གཞག་གོ། ། ཛ༡ དང་པོ་ལ་གཉིས། ཝ༡ བྱེ་བྲག་གི་དབྱེ་བ་སྨོས། ཝ༢ རྣམ་གཞག་མདོ་ཙམ་དུ་འཆད་པའོ། ། ཝ༡ དང་པོ་ལ་གཉིས། ཞ༡ མདོ་སྡེ་སྤྱོད་པའི་དབུ་མ་པ་དང༌། ཞ༢ རྣལ་འབྱོར་སྤྱོད་པའི་དབུ་མ་པའི་ལུགས་སོ། ། ཞ༡ དང་པོ་ནི། ཀླུ་སྒྲུབ་དགོངས་འགྲེལ་ལེགས་ལྡན་རྗེས་འབྲང་བཅས། ། རང་གི་འདོད་པ་སྟོང་སོགས་ཁས་བླངས་ནས། ། ཚུལ་གསུམ་དངོས་སྟོབས་གྲུབ་པའི་གཏན་ཚིགས་འགོད། ། ཕྱི་དོན་མདོ་སྡེ་པ་དང་རྗེས་སུ་མཐུན། ། དེ་ལ་སྤྱིར་འཕགས་པ་ཀླུ་སྒྲུབ་ཀྱི་གཞུང་དབུ་མ་རྩ་བ་ཤེས་རབ་ཀྱི་དགོངས་པ་འགྲེལ་བའི་ཚུལ་མང་དུ་བྱུང་ཡང་། གཙོ་བོ་ཐལ་རང་གཉིས་སུ་གྱེས་པ་ཡིན་ཏེ། དེའང་བསྟན་བཅོས་ཀྱི་ཐོག་མར། ཇི་སྐད་དུ། བདག་ལས་མ་ཡིན་གཞན་ལས་མིན། ། གཉིས་ལས་མ་ཡིན་རྒྱུ་མེད་མིན། ། དངོས་པོ་གང་དང་གང་ན་ཡང༌། ། སྐྱེ་བ་ནམ་ཡང་ཡོད་མ་ཡིན། ། ཞེས་པ་འདི་ཡིན་ལ། འདིའི་དོན་འཆད་ཚུལ་ལ། སློབ་དཔོན་སངས་རྒྱས་བསྐྱངས་ཀྱིས་ནི། མཐའ་བཞི་སྐྱེ་མེད་ཀྱི་དམ་བཅའ་བཞིས་(༢༦༦ན)ལོག་ཕྱོགས་ལ་སུན་འབྱིན་པར་མཛད་ཀྱི། དངོས་ཕྱོགས་ལ་སྒྲུབ་བྱེད་དགོད་པར་མི་མཛད། དེའི་རྗེས་སུ་སློབ་དཔོན་ལེགས་ལྡན་འབྱེད་ཀྱིས་ནི། སློབ་དཔོན་སངས་རྒྱས་བསྐྱངས་ཀྱིས་སུན་འབྱིན་བརྗོད་ཚུལ་ལ་སྐྱོན་བརྗོད་པར་མཛད་ཅིང༌། རྩ་བའི་སྦྱོར་བ་རང་རྒྱུད་དུ་འགོད་པ་དང༌། ཕྱོགས་ཆོས་ཀྱང་རང་རྒྱུད་ཀྱི་སྒོ་ནས་སྒྲུབ་པ་མཛད་དོ། ། དེའི་རྗེས་སུ་ཟླ་བའི་ཞབས་ཀྱིས་ནི། ལེགས་ལྡན་འབྱེད་ཀྱིས་སངས་རྒྱས་བསྐྱངས་ལ་སྐྱོན་བརྗོད་པ་རྣམས་མི་འཇུག་པའི་ཚུལ་དང༌། ལེགས་ལྡན་འབྱེད་ཉིད་དོན་དམ་དཔྱོད་བྱེད་ཀྱི་རིགས་པ་འཆད་པའི་སྐབས་སུ་རང་རྒྱུད་ཀྱི་གཏན་ཚིག་ཁས་ལེན་པ་སྐྱོན་དང་བཅས་པར་བཤད་ནས། ཐལ་འགྱུར་གྱི་ཤིང་རྟའི་སྲོལ་རྒྱས་པར་ཕྱེ་བ་ཡིན་ནོ། ། དེ་ལ་རང་རྒྱུད་ལུགས་ཞལ་གྱིས་བཞེས་པའི་སློབ་དཔོན་བྷ་བྱའམ་ལེགས་ལྡན་བྱེད་དང་། དཔལ་སྦས་དང་། ཡེ་ཤེས་སྙིང་པོ་དང་། ཞི་བ་འཚོ་དང་། ཀ་མ་ལ་ཤཱི་ལ་དང་། གྲོལ་སྡེ་དང་། སེང་བཟང་དང་། ཡེ་ཤེས་ཞབས་དང་། མར་མེ་མཛད་བཟང་པོ་དང་། སྨན་ཞབས་དང་། ཐག་ན་སོགས་ཤིན་ཏུ་མང་ཡང༌། རིགས་བསྡུ་ན། མདོ་སྡེ་སྤྱོད་པའི་དབུ་མ་དང་། རྣལ་འབྱོར་སྤྱོད་པའི་དབུ་མ་གཉིས་སུ་ཡོད་དེ། དེ་ལྟར་འབྱེད་པའི་རྒྱུ་མཚན་ཡང་། ལེགས་ལྡན་འབྱེད་ཀྱིས་ཀླུ་སྒྲུབ་ཀྱི་གཞུང་ལ་གཞན་ངོར་ཕྱི་རོལ་གྱི་དོན་ཐ་སྙད་ཙམ་དུ་ཁས་ལེན་པ་རགས་པ་ཕྱིའི་དབུ་མ་པ་དང༌། ཐ་སྙད་དུ་ཤེས་པ་ཙམ་ལས་མ་གཏོགས་པ་ཕྱིའི་དོན་མེད་པར་ཁས་ལེན་པ་ཕྲ་བ་ནང་གི་དབུ་མ་པ་གཉིས་སུ་ཡོད་ཅེས་གསུངས་ལ། མདོ་སྡེ་སྤྱོད་པའི་དབུ་མ་པ་ནི། རགས་པ་ཕྱིའི་དབུ་མ་པ་ཡིན་ཏེ། མཚན་གཞི་ནི། ལེགས་ལྡན་ཞབས་རྗེས་འབྲང་དང་བཅས་པའོ། ། དེ་དག་གིས་རང་གི་འདོད་པ་སྟོང་ཉིད་དང་སྐྱེ་མེད་སོགས་ཚད་མས་བསྒྲུབ་པར་ཁས་བླངས་ནས། དེ་དག་ཚད་མས་བསྒྲུབ་པའི་ཕྱིར་ཚུལ་གསུམ་(༢༦༦བ)དངོས་པོ་སྟོབས་ཞུགས་ཀྱིས་གྲུབ་པའི་སྒྲུབ་བྱེད་ཀྱི་གཏན་ཚིགས་འགོད་པ་དང༌། ཐ་སྙད་ཙམ་དུ་ཕྱིའི་དོན་ཁས་ལེན་ཞིང་དེ་དག་གི་རྣམ་གཞག་ཀྱང་མདོ་སྡེ་པ་དང་རྗེས་སུ་མཐུན་པར་མཛད་དོ། ། ཞ༢ གཉིས་པ་[རྣལ་འབྱོར་སྤྱོད་པའི་དབུ་མ་པའི་ལུགས་]ནི། ཞི་འཚོ་ལ་སོགས་ཤེས་པ་ཙམ་ཞིག་ལས། ། ཕྱི་དོན་མི་བཞེད་རྣམ་གཞག་སེམས་ཙམ་ལྟར། ། གཉིས་པ་རྣལ་འབྱོར་སྤྱོད་པའི་དབུ་མ་པ་ནི་ལེགས་ལྡན་འབྱེད་ཀྱིས་གསུངས་པ་ལྟར་ན། ཕྲ་བ་ནང་གི་དབུ་མ་པ་ཡིན་ཏེ། མཚན་གཞི་ནི། ཞི་བ་འཚོ་ལ་སོགས་པའོ། ། དེ་དག་གིས་རང་རྒྱུད་ཀྱི་དམ་བཅའ་འགོད་ཚུལ་སྔ་མ་དང་ཁྱད་པར་མེད་ལ། ཐ་སྙད་དུ་ཤེས་པ་ཙམ་ཞིག་ཁས་ལེན་ཅིང་། ཕྱི་རོལ་གྱི་དོན་ཁས་མི་ལེན་ལ། དེའི་རྣམ་གཞག་ཀྱང་རྣལ་འབྱོར་སྤྱོད་པ་སེམས་ཙམ་པ་དང་མཐུན་པར་མཛད་དོ། ། ཝ༢ གཉིས་པ་དེ་དག་གི་གྲུབ་མཐའི་རྣམ་གཞག་མདོ་ཙམ་དུ་འཆད་པ་ནི། ཆོས་རྣམས་ཀུན་རྫོབ་འཁྲུལ་བློའི་ཤེས་ངོར་ཡོད། ། དོན་དམ་མ་འཁྲུལ་བློ་ངོར་ཡོད་པ་མིན། ། རིགས་པས་འགོག་ནུས་མི་ནུས་མཚན་ཉིད་ཅན། ། བདེན་གཉིས་ངོ་བོ་གཅིག་ལ་ལྡོག་པ་ནི། ། ཐ་དད་དོན་བྱེད་ནུས་དང་མི་ནུས་ཀྱིས། ། ཡང་དག་ལོག་པའི་ཀུན་རྫོབ་རྣམ་པར་གཞག ། དབུ་མ་པས་ཤེས་བྱའི་ཆོས་རྣམས་བདེན་པ་གཉིས་སུ་སྡུད་ཅིང༌། དེ་ལ་ཤེས་བྱ་ནི་དབྱེ་གཞི། བདེན་པ་གཉིས་ནི་དབྱེ་སྒོ་སྟེ། འདིར་རང་རྒྱུད་པའི་ལུགས་ཀྱིས་ཀུན་རྫོབ་ནི་འཁྲུལ་བཅས་ཀྱི་བློའི་ཤེས་ངོར་ཡོད་པ། དེའི་མཚན་གཞི་བུམ་པ་ལྟ་བུ། དོན་དམ་ནི་མ་འཁྲུལ་བའི་བློ་ངོར་དཔྱད་ན་ཡོད་པ་མ་ཡིན་པ། དེའི་མཚན་གཞི་བུམ་པ་བདེན་པས་སྟོང་པ་ལྟ་བུ། བདེན་པ་ནི་བློ་འཁྲུལ་མ་འཁྲུལ་སོ་སོའི་ཡུལ་དུ་མི་བསླུ་བའི་དོན། ཆོས་གང་ཞིག་རང་བཞིན་མེད་པ་སྟེ། རང་གི་ངོ་བོ་བདེན་པས་སྟོང་པ་ནི་བདེན་པ་ཙམ་གྱི་མཚན་ཉིད། གང་ཞིག་རིགས་པས་དཔྱད་མི་བཟོད་པ་(༢༦༧ན)སྟེ། འགོག་ནུས་པ་ཀུན་བདེན་གྱི་མཚན་ཉིད། རིགས་པས་དཔྱད་བཟོད་པ་སྟེ། འགོག་མི་ནུས་པ་དོན་དམ་བདེན་པའི་མཚན་ཉིད། དེ་ལྟ་བུའི་བདེན་པ་གཉིས་པོ་ལ་སྤྱིར་མཚན་ཉིད་ཀྱི་ལྡོག་པ་ཙམ་ཡང་ཐ་དད་མེད་པ་མིང་གི་རྣམ་གྲངས་དང༌། ངོ་བོ་ཐ་དད་པ་དང༌། དངོས་པོ་གཞན་དང་དེ་ཉིད་དུའང་བརྗོད་དུ་མེད་པ་གཅིག་པ་བཀག་ཙམ་གྱི་ཐ་དད་དང༌། ངོ་བོ་གཅིག་ལ་ལྡོག་པ་ཐ་དད་པར་འདོད་པ་རྣམས་སུ་མཆིས་པ་ལས། ལུགས་འདིར་ཕྱི་མ་བཞེད་མཁན་མང་ཞིང༌། ཀུན་རྫོབ་ལ་དབྱེ་ན། སྣང་ལ་དོན་བྱེད་ནུས་པ་དང༌། སྣང་ལ་དོན་བྱེད་མི་ནུས་པ་གཉིས་ཀྱིས་ཡང་དག་ཀུན་རྫོབ་དང་ལོག་པའི་ཀུན་རྫོབ་ཅེས་རྣམ་པར་བཞག་སྟེ། དེའང་སྣང་བ་དང་མཐུན་པར་དོན་བྱེད་ནུས་པ། རྒྱུ་ལས་སྐྱེས་པ། བརྟགས་པས་དབེན་པ། རང་རང་གི་རིགས་ལ་མཐུན་པར་སྣང་བ་སྟེ། མཚན་ཉིད་བཞི་དང་ལྡན་པའི་གཟུགས་ལ་སོགས་པའི་ཆོས་ནི་ཡང་དག་ཀུན་རྫོབ་སྟེ། སོ་སོའི་དོན་བྱེད་ནུས་པར་ཡོད་ལ། སྣང་ཡང་དོན་བྱེད་མི་ནུས་པ་སྐྲ་ཤད་འབབ་པ་དང་ཟླ་བ་གཉིས་སུ་སྣང་བ་ལ་སོགས་པའི་ལོག་པའི་ཀུན་རྫོབ་ནི་དོན་བྱེད་ནུས་པར་མེད་པས་རབ་ཏུ་དབྱེ་བའོ་ཞེས་འདོད་དོ། ། བདེན་དངོས་བཀག་པའི་རྣམ་གཅོད་མེད་དགག་སྒྲུབ། ། སྐྱེ་སོགས་འགོག་པ་དོན་དམ་རྣམ་གྲངས་པ། ། སྤྲོས་པ་ཉེར་ཞི་མཐར་ཐུག་དོན་དམ་ཉིད། ། ཀུན་གཞི་མི་འདོད་ཤེས་པ་ཚོགས་དྲུག་འདུས། ། འབྲས་བུ་ཡེ་ཤེས་སྣང་བ་སྒྱུ་འདྲར་བཞེད། ། ཤེས་བྱ་དེ་དག་གི་སྟེང་དུ་བདེན་དངོས་ཀྱི་འཛིན་སྟངས་བཀག་པའི་མི་ལྡན་རྣམ་གཅོད་ཀྱི་མེད་དགག་སྒྲུབ་པའི་དོན་དམ་པ་ལའང་ཡང་དག་པ་སྐྱེ་བ་ལ་སོགས་པ་བཀག་ཙམ་ལས་སྐྱེ་མེད་ཀྱི་སྤྲོས་པ་ལས་མ་གྲོལ་བ་རྣམ་གྲངས་པའི་དོན་དམ་དང༌། སྐྱེ་བ་དང་སྐྱེ་མེད་ལ་སོགས་པའི་སྤྲོས་པ་མཐའ་དག་ཉེ་བར་ཞི་བ་མཐར་ཐུག་གི་(༢༦༧བ)དོན་དམ་པ་ཉིད་དེ་གཉིས་སུ་དབྱེ་བ་བདེན་གཉིས་ལས་གསུངས་སོ། ། དེ་དག་གི་སློབ་དཔོན་ཕལ་ཆེ་བ་ནི་ཀུན་གཞི་མི་འདོད་ཅིང་ཤེས་པ་ཚོགས་དྲུག་ཏུ་འདུས་པར་བཞེད་ལ། རྣལ་འབྱོར་སྤྱོད་པའི་དབུ་མ་པ་ཁ་ཅིག་ཀུན་གཞི་སོགས་ཚོགས་བརྒྱད་འདོད་པའང་ཡོད་ལ། ལམ་མཐར་ཕྱིན་པའི་འབྲས་བུ་སྐུ་དང་ཡེ་ཤེས་ཀྱི་སྣང་བ་རང་རྒྱུད་པ་སྒྱུ་མ་དང་འདྲ་བར་ཡོད་པར་བཞེད་པ་ཡིན་ནོ། ། ཛ༢ གཉིས་པ་དབུ་མ་ཐལ་འགྱུར་པའི་རྣམ་གཞག་འཆད་པ་ལ་བཞི། ཝ༡ ཟླ་བའི་བཞེད་སྲོལ་མདོར་སྨོས། ཝ༢ གཞུང་ཕྱི་མོའི་དབུ་མ་འཆད་ཚུལ་སྤྱིར་བསྟན། ཝ༣ གཞི་ལམ་འབྲས་གསུམ་བྱེ་བྲག་ཏུ་དབྱེ། ཞཝ གྲུབ་མཐའི་དོན་གཙོ་བོར་བསྡུ་བའོ། ། ཝ༡ དང་པོ་ནི། ཟླ་གྲགས་ལུགས་སྲོལ་མཚན་མའི་སྤྲོས་གཅོད་ལ། ། ཁྱད་འཕགས་མཆོག་སྟེ་གཏན་ཚིག་རང་རྒྱུད་མེད། ། གཞན་ངོར་ཙམ་ལས་རང་ལུགས་ཁས་ལེན་བྲལ། ། འཕགས་པའི་གཞུང་གི་དགོངས་འགྲེལ་སངས་རྒྱས་བསྐྱངས་ཀྱི་ལུགས་གསལ་བར་མཛད་པ་སློབ་དཔོན་ཟླ་བ་གྲགས་པའི་ལུགས་སྲོལ་ནི་མཚན་མའི་སྤྲོས་པ་གཅོད་པ་ལ་ཁྱད་པར་འཕགས་ཤིང་མཆོག་ཏུ་གྱུར་པ་སྟེ། དབུ་མ་ཐལ་འགྱུར་པའི་མཚན་གཞིའོ། ། སྒྲུབ་བྱེད་ཀྱི་གཏན་ཚིགས་ཚུལ་གསུམ་དངོས་སྟོབས་ཀྱིས་སྒྲུབ་པའི་རང་རྒྱུད་པ་འགོད་པ་མེད་ཅིང༌། སྐྱེ་མེད་དང་སྟོང་ཉིད་སོགས་གཞན་གྱི་ལོག་རྟོག་དགག་པའི་ཕྱིར་གཞན་ངོར་ཁས་ལེན་ཅིང་། དངོས་སྨྲ་བ་ལ་ནང་འགལ་སྟོན་པའི་ཐལ་འགྱུར་ཙམ་ལས་རང་ལུགས་བསྒྲུབ་བྱ་མེད་པས་ཁས་ལེན་དང་བྲལ་བའོ། ། འཇིག་རྟེན་ལ་གྲགས་མངོན་རྗེས་ལུང་ཉེར་འཇལ། ། གཞན་གྲགས་རྗེས་དཔག་འགལ་བརྗོད་ཐལ་འགྱུར་དང༌། ། མཚུངས་པའི་མགོ་སྙོམས་དང་ནི་མ་གྲུབ་པ། ། ཚད་མ་བཞི་དང་རྟགས་བཞིས་དགག་སྒྲུབ་བྱེད། ། དེས་ན་རང་ལུགས་སུ་མེད་པར་དགག་པ་དང་མ་ཡིན་དགག་གཉིས་ཀས་དགག་སྒྲུབ་བྱར་མེད་ཀྱང་། (༢༦༨ན)གཞན་ངོར་འཇིག་རྟེན་ལ་གྲགས་པའི། མངོན་སུམ། རྗེས་དཔག །ལུང༌། ཉེ་བར་འཇལ་བ་བཞི་དང༌། གཞན་ལ་གྲགས་པའི་རྗེས་དཔག །འགལ་བ་བརྗོད་པའི་ཐལ་འགྱུར། རྒྱུ་མཚན་མཚུངས་པའི་མགོ་སྙོམས། སྒྲུབ་བྱེད་བསྒྲུབ་བྱ་དང་མཚུངས་པའི་མ་གྲུབ་པ་བཞི་སྟེ། ཚད་མ་བཞི་དང་རྟགས་བཞིས་དགག་སྒྲུབ་བྱེད་དོ། ། འདིར་ཆོས་རྗེ་གོ་རམ་པས། བདག་སྐྱེ་འགོག་པ་ལ་འགལ་བ་བརྗོད་པ། གཞན་སྐྱེ་འགོག་པ་ལ་རྒྱུ་མཚན་མཚུངས་པ། གཉིས་ཀ་ལས་སྐྱེ་བ་འགོག་པ་ལ་སྒྲུབ་བྱེད་བསྒྲུབ་བྱ་དང་མཚུངས་པ། རྒྱུ་མེད་ལས་སྐྱེ་བ་འགོག་པ་ལ་གཞན་ལ་གྲགས་ཀྱི་རྗེས་དཔག་གོ། །ཞེས་གསུངས་པ་ལ། གསེར་མདོག་པ་དོན་ཡོད་དཔལ་བས། ཀུན་མཁྱེན་ཡིན་ཀྱང་ད་དུང་དབུ་མ་ལ་ཐུགས་སྦྱོང་བྱེད་དགོས་པའི་བརྡ་སྟེ། དེའང་འགལ་བ་བརྗོད་པའི་ཐལ་འགྱུར་གྱིས་ནི། གཞན་གྱི་ཁས་བླངས་ཀྱི་རྟགས་ལ་མི་འདོད་པའི་ཐལ་བ་འཕེན་པ་ཡིན་ལ། རྒྱུ་མཚན་མཚུངས་པའི་མགོ་སྙོམས་ཀྱིས་ནི། ཐལ་འགྱུར་དེའི་ཁྱབ་པ་རྒོལ་བ་གཞན་གྱི་བློ་ངོར་དཔེའི་སྟེང་དུ་ངེས་པར་བྱེད། སྒྲུབ་བྱེད་བསྒྲུབ་བྱ་དང་མཚུངས་པས་ནི། ཐལ་བ་དེ་ལྟར་འཕངས་པ་ལ་གཞན་གྱིས་ཚེར་མ་འབྱིན་མི་ནུས་པར་བསྟན་པ་ཡིན་ནོ། །ཐལ་འགྱུར་གསུམ་པོ་དེས་གཞན་ལ་གྲགས་ཀྱི་ཕྱོགས་ཆོས་དང་ཁྱབ་པ་རྒོལ་བ་ཕ་རོལ་པོའི་བློ་ངོར་བསྒྲུབ་ནས། གཞན་ལ་གྲགས་ཀྱི་གཏན་ཚིགས་ཀྱིས་གཞན་ངོར་རྗེས་དཔག་སྐྱེད་པར་བྱེད་དོ། །ཞེས་འཆད་དོ། ། དེས་ན། ཐལ་འགྱུར་བའི་ཐུན་མོང་མ་ཡིན་པའི་རིགས་པ་བཞི་པོ་འདི་མཐའ་བཞིའི་སྐྱེ་བ་རེ་རེ་འགོག་པ་ལའང་སྦྱར་བར་བཞེད་ཅིང༌། འདི་རིགས་པ་རྣམས་ཀྱི་གཙོ་བོ་ཡིན་པས་ཅུང་ཟད་ཞིབ་པར་བརྗོད་ན། དེའང་ཐོག་མར་གྲངས་ཅན་གྱིས་བདག་ལས་སྐྱེ་བར་ཁས་ལེན་ལ། བདག་ལས་སྐྱེ་བ་ཞེས་པའི་དོན་ནི། དངོས་པོ་(༢༦༨བ)རྣམས་རྒྱུའི་དུས་ན་ཡོད་པ་ཁོ་ན་སྐྱེ་ཡི། མེད་པ་ནི་མི་སྐྱེ་སྟེ། དཔེར་ན། ཏིལ་ལ་ཏིལ་མར་སྔ་ནས་ཡོད་པའི་རྒྱུ་མཚན་གྱིས་ཏིལ་མར་འབྱུང་བ་ཡིན་ལ། བྱེ་མ་ལ་ཏིལ་མར་སྔར་ནས་མེད་པའི་རྒྱུ་མཚན་གྱིས་མི་འབྱུང་བ་བཞིན་ནོ་ཞེས་འདོད། དེ་དགག་པ་ལ་རིགས་པ་བཞི་ལས། དངོས་པོ་རྣམས་ཆོས་ཅན། སྐྱེ་བ་དོན་མེད་དུ་ཐལ། རྒྱུའི་དུས་སུ་གྲུབ་ཟིན་པའི་ཕྱིར། ཞེས་པ་ནི་འགལ་བ་བརྗོད་པའི་ཐལ་འགྱུར་རོ། ། དེ་ལ་ཁྱབ་པ་མ་ངེས་སོ་ཞེ་ན། སྐྱེ་བ་ཐུག་མེད་དུ་ཐལ། གྲུབ་ཟིན་ཀྱང་སྐྱེ་བའི་ཕྱིར་ཞེས་པ་ནི་རྒྱུ་མཚན་མཚུངས་པའི་མགོ་སྙོམས་སོ། ། གལ་ཏེ། དེ་གཉིས་མི་མཚུངས་ཏེ། འཇིམ་གོང་གི་གནས་སྐབས་ཀྱི་བུམ་པ་ནི་སྐྱེ་ལ། མངོན་པར་གསལ་བའི་བུམ་པ་ནི་མི་སྐྱེ་བས། དེ་གཉིས་ལ་མངོན་པར་གསལ་མི་གསལ་གྱི་ཁྱད་པར་ཡོད་པའི་ཕྱིར་ཞེ་ན། འཇིམ་གོང་གི་གནས་སྐབས་ན་མངོན་པར་མི་གསལ་བའི་བུམ་པ་ཡོད་དོ་ཞེས་པ་ནི་རྩ་བའི་བསྒྲུབ་བྱ་དང་མཚུངས་ཞེས་པ་ནི་སྒྲུབ་བྱེད་བསྒྲུབ་བྱ་དང་མཚུངས་པའི་མ་གྲུབ་པའོ། ། དེས་ན། ཕྱི་ནང་གི་དངོས་པོ་རྣམས་ཆོས་ཅན། བདག་ལས་མི་སྐྱེ་སྟེ། ཡོད་པའི་ཕྱིར་ཞེས་པ་ནི་གཞན་ལ་གྲགས་ཀྱི་རྗེས་དཔག་གོ། ། རང་སྡེ་དངོས་པོར་སྨྲ་བ་རྣམས་གཞན་ལས་སྐྱེ་བར་ཁས་ལེན་པ་ལ། ས་སྨྱུག་གཉིས་རང་བཞིན་གྱིས་གཞན་མ་ཡིན་པར་ཐལ། ས་བོན་ལས་མྱུ་གུ་སྐྱེ་བའི་ཕྱིར་ཞེས་པ་ནི་འགལ་བ་བརྗོད་པའི་ཐལ་འགྱུར་རོ། ། དེ་ལ་ཁྱབ་པ་མ་ངེས་སོ་ཞེ་ན། འོ་ན་མེ་ལྕེ་ལས་ཀྱང་མུན་པ་འཐུག་པོ་འབྱུང་བར་ཐལ། རང་བཞིན་གྱིས་གཞན་ཡིན་ཀྱང་སྐྱེ་བའི་