Tibetan
བྱེད་སྡོམ་པའི་ཚུལ་ཁྲིམས་དང༌། རྣམ་མཁྱེན་གྱི་ཆོས་ལ་མོས་ཤིང་བཟོད་པ་དང༌། དེ་ཉིད་གོང་འཕེལ་གྱི་ཕྱིར་འདུན་པ་བསྐྱེད་པའི་བརྩོན་འགྲུས་དང༌། ཐེག་དམན་དང་མ་འདྲེས་པའི་སེམས་རྩེ་གཅིག་པའི་བསམ་གཏན་དང༌། སྦྱིན་བྱ་སྦྱིན་བྱེད་སྦྱིན་པོ་རྣམས་སྒྱུ་མ་ལྟར་ཤེས་པའི་ཤེས་རབ་སྟེ་དྲུག་ཚན་ཚང་བར་བྱེད་པའོ། ། དགུ་པ་འབྲས་བུ་ལ་གནས་སྐབས་སུ། རིན་ཆེན་ཕྲེང་བ་ལས། སྦྱིན་པས་ལོངས་སྤྱོད་ཁྲིམས་ཀྱིས་བདེ། ། བཟོད་པས་གཟུགས་བཟང་བརྩོན་པས་བརྗིད། ། བསམ་གཏན་གྱིས་ཞི་བློ་ཡིས་གྲོལ། ། ཞེས་གསུངས་པ་ལྟར་རོ། ། མཐར་ཐུག་བསོད་ནམས་ཀྱི་ཚོགས་སངས་རྒྱས་ཀྱི་གཟུགས་སྐུའི་དངོས་རྒྱུ་དང༌། ཡེ་ཤེས་ཀྱི་ཚོགས་ཆོས་སྐུའི་དངོས་རྒྱུ་དང༌། བརྩོན་འགྲུས་ནི་གཉིས་ཀའི་གྲོགས་སུ་འགྱུར་ཏེ་སྐུ་གཉིས་ཐོབ་པར་བྱེད་པའོ། ། བཅུ་པ་གྲངས་ངེས་ནི། ཕར་ཕྱིན་དྲུག་ཏུ་ངེས་པ་ནི་བྱང་ཆུབ་སེམས་དཔའི་སྒྲུབ་པའི་ཆོས་ཐམས་ཅད་(༢༥༡ན)མདོར་བསྡུ་ན། བསླབ་པ་གསུམ་དུ་འདུས་པའི་ངེས་པ་ལས་ཡིན་ཏེ། རྒྱན་ལས། བསླབ་གསུམ་དབང་དུ་མཛད་ནས་ནི། ། རྒྱལ་བས་ཕ་རོལ་ཕྱིན་པ་དྲུག ། ཡང་དག་བཤད་དེ་དང་པོ་གསུམ། ། ཐ་མ་གཉིས་ཀྱིས་རྣམ་པ་གཉིས། ། གཅིག་ནི་གསུམ་ཆར་ལ་ཡང་གཏོགས། ། ཞེས་གསུངས་སོ། ། ཡང་ན། མངོན་མཐོ་དང་ངེས་ལེགས་ཀྱི་དབང་དུ་བྱས་པ་སྟེ། དེ་ལ་མངོན་མཐོའི་དོན་དུ་གསུམ་ནི། ལོངས་སྤྱོད་ཀྱི་དོན་དུ་སྦྱིན་པ། ལུས་ཀྱི་དོན་དུ་ཚུལ་ཁྲིམས། འཁོར་གྱི་དོན་དུ་བཟོད་པའོ། ། ངེས་ལེགས་ཀྱི་གསུམ་ནི། ཞི་གནས་ཀྱི་དོན་དུ་བསམ་གཏན། ལྷག་མཐོང་གི་དོན་དུ་ཤེས་རབ། ཡོན་ཏན་འཕེལ་བའི་དོན་དུ་བརྩོན་འགྲུས་སོ། ། བཅུ་གཅིག་པ་གོ་རིམ་ནི། དེ་ཉིད་ལས། སྔ་མ་ལ་བརྟེན་ཕྱི་མ་སྐྱེ། ། དམན་དང་མཆོག་ཏུ་གནས་ཕྱིར་དང༌། ། རགས་པ་དང་ནི་ཕྲ་བའི་ཕྱིར། ། དེ་དག་རིམ་པས་བསྟན་པ་ཡིན། ། ཞེས་པ་ལྟར་རྒྱུ་མཚན་གསུམ་གྱིས་སྦྱིན་པ་སོགས་དེ་དག་རིམ་པར་བསྟན་པ་ཡིན་ནོ། ། ཐ༣ གསུམ་པ་དངོས་གཞི་ཞི་ལྷག་བཤད་པ་ནི། དངོས་གཞི་ཞི་གནས་རྩེ་གཅིག་སེམས་དང་ནི། ། ཆོས་རབ་རྣམ་འབྱེད་ལྷག་མཐོང་རིམ་བཞིན་བསྒོམ། ། ལམ་གྱི་དངོས་གཞིར། མདོ་རྒྱན་ལས། ཡང་དག་དམིགས་པ་ལ་བརྟེན་ནས། ། སེམས་ལ་སེམས་ནི་འཇོག་ཕྱིར་དང༌། ། ཆོས་རབ་རྣམ་པར་འབྱེད་པའི་ཕྱིར། ། ཞི་གནས་དང་ནི་ལྷག་མཐོང་ཡིན། ། ཞེས་གསུངས་པ་ལྟར། ཞི་གནས་ཀྱི་ཏིང་འཛིན་སེམས་རྩེ་གཅིག་པ་དང༌། ཆོས་རབ་རྣམ་འབྱེད་སོ་སོར་རྟོག་པའི་ཤེས་རབ་ཀྱི་ལྷག་མཐོང་ཐོག་མར་གོ་རིམ་བཞིན་བསྒོམ། མཐར་རང་གི་ངང་གིས་མཉམ་དུ་འཇུག་པའི་ཞི་ལྷག་ཟུང་འབྲེལ་གྱི་ཏིང་ངེ་འཛིན་བསྒོམས་པས་སྲིད་ཞིའི་འཆིང་བ་ལས་གྲོལ་བ་མི་གནས་པའི་མྱང་འདས་ཐོབ་པར་འགྱུར་ཏེ། དགོངས་འགྲེལ་ལས། (༢༥༡བ) སྐྱེ་བ་པོ་ཡིས་ལྷག་མཐོང་དང༌། ། ཞི་གནས་གོམས་པར་བྱས་ན་ནི། ། གནས་ངན་ལེན་གྱི་འཆིང་བ་དང༌། ། མཚན་མའི་འཆིང་བ་ལས་གྲོལ་འགྱུར། ། ཞེས་གསུངས་སོ། ། འདི་དག་གི་རྣམ་གཞག་རྒྱས་པ་སྒོམ་རིམ་སྐབས་སུ་འབྱུང་ངོ༌། ། ཏ༢ གཉིས་པ་གྲུབ་མཐའི་དབྱེ་བ་བྱེ་བྲག་ཏུ་བཤད་པ་ལ་གཉིས། ཐ༡ མིང་མདོར་བསྟན། ཐ༢ མཚན་ཉིད་རྒྱས་པར་བཤད་པའོ། ། ཐ༡ དང་པོ་ནི། གྲུབ་མཐའ་སེམས་ཙམ་དབུ་མ་གཉིས་སུ་གནས། ། རྒྱུ་མཚན་ཉིད་ཀྱི་ཐེག་པ་དེ་ལ། གྲུབ་མཐའ་རྣམ་པར་རིག་པ་སྨྲ་བ་སེམས་ཙམ་པ་དང༌། ངོ་བོ་ཉིད་མེད་པར་སྨྲ་བ་དབུ་མ་པ་གཉིས་སུ་གནས་སོ། ། ཐ༢ གཉིས་པ་ལ་གཉིས། ད༡ སེམས་ཙམ་པ་དང༌། ད༢ དབུ་མའི་ལུགས་བཤད་པའོ། ། ད༡ དང་པོ་ལ་གསུམ། ན༡ སྒྲ་དོན་ངེས་ཚིག ། ན༢ གཞི་བདུན་དུ་བསྡུ་བ། ན༣ རབ་ཏུ་དབྱེ་བ་བཤད་པའོ། ། པ༡ དང་པོ་ནི། རྣམ་ཤེས་བདེན་གྲུབ་སྨྲ་བའི་སེམས་ཙམ་པས། ། ཞེས་སེམས་ལས་གཞན་པའི་དངོས་པོ་ནི་གང་ཡང་མེད་ལ། སེམས་རྣམ་རིག་ཙམ་ནི་བདེན་པའི་དངོས་པོར་གྲུབ་པར་འདོད་པས། སེམས་ཙམ་པའམ་རྣམ་རིག་པ་སྟེ། བརྒྱད་སྟོང་པ་ལས། ཀྱེ་རྒྱལ་བའི་སྲས་དག །ཁམས་གསུམ་པོ་འདི་དག་ནི་སེམས་ཙམ་སྟེ། ཞེས་པའི་ལུང་གི་དོན་དངོས་པོ་དང་མཐུན་པ་ལྟར་ཚུལ་བཞིན་ཡིད་ལ་བྱེད་པས་སྤྱོད་པས་ན་རྣལ་འབྱོར་སྤྱོད་པ་ཞེས་ཀྱང་གྲགས་སོ། ། ན༢ གཉིས་པ་[གཞི་བདུན་དུ་བསྡུ་བ་]ལ་གཉིས། པ༡ མདོར་བསྟན། པ༢ རྒྱས་བཤད་དོ། ། པ༡ དང་པོ་ནི། ཐེག་ཆེན་ལམ་ཀུན་གཞི་བདུན་དག་ཏུ་སྡུད། ། སེམས་ཙམ་པས་ཐེག་པ་ཆེན་པོའི་ལམ་མཐའ་དག་གཞི་བདུན་དུ་སྡུད་དེ། ཤེས་བྱའི་གནས་དང་མཚན་ཉིད་དེར་འཇུག་དང༌། ། དེ་ཡི་རྒྱུ་འབྲས་དེ་རབ་དབྱེ་བ་དང༌། ། བསླབ་པ་གསུམ་དང་དེ་འབྲས་སྤངས་པ་དང༌། ། ཡེ་ཤེས་ཐེག་པ་མཆོག་གྱུར་ཁྱད་པར་འཕགས། ། ཞེས་ཆོས་མངོན་པའི་མདོ་ལས་གསུངས་པ་ལྟ་བུའོ། ། པ༢ གཉིས་པ་རྒྱས་(༢༥༢ན)པར་བཤད་པ་ལ་བདུན། ཕ༡ ཤེས་བྱའི་གནས། ཕ༢ དེའི་མཚན་ཉིད། ཕ༣ དེའི་དོན་ལ་འཇུག་པ། ཕ༤ དེའི་རྒྱུ་འབྲས། ཕ༥ དེའི་རབ་དབྱེ། ཕ༦ བསླབ་པ་གསུམ། ཕ༧ སྦྱངས་པའི་འབྲས་བུའོ། ། བ༡ དང་པོ་ནི། ཤེས་བྱའི་གནས་ནི་ཀུན་གཞིའི་རྣམ་པར་ཤེས། ། དེ་ལ་ཤེས་བྱའི་གནས་ནི། ཀུན་གཞིའི་རྣམ་པར་ཤེས་པ་སྟོན་ཏེ། ཆོས་ཐམས་ཅད་ཀྱི་རྒྱུ་རྟེན་ཅིང་འབྲེལ་བར་འབྱུང་བ་ལ་མཁས་པར་བྱ་བའི་ཕྱིར་རོ། ། དེ་གཏན་ལ་དབབ་པ་ལ་བཞི། དང་པོ་ཀུན་གཞི་ཡོད་པའི་རྒྱུ་མཚན་ནི། མདོ་དགོངས་པ་ངེས་པར་འགྲེལ་བ་ལས། ལེན་པའི་རྣམ་པར་ཤེས་པ་ཟབ་ཅིང་ཕྲ། ། ས་བོན་ཐམས་ཅད་ཆུ་ཡི་ཀླུང་བཞིན་འབབ། ། བདག་ཏུ་རྟོག་པར་འགྱུར་ན་མི་རུང་ཞེས། ། འདི་ནི་བྱིས་པ་རྣམས་ལ་ངས་མ་བསྟན། ། ཞེས་སོ། ། གཉིས་པ་མཚན་ཉིད་ནི། ཆོས་མངོན་པའི་མདོ་ལས། ཐོག་མ་མེད་པའི་དུས་ཀྱི་དབྱིངས། ། ཆོས་རྣམས་ཀྱི་ནི་གནས་ཡིན་ཏེ། ། དེ་ཡོད་པས་ན་འགྲོ་ཀུན་དང༌། ། མྱ་ངན་འདས་པ་འཐོབ་པར་འགྱུར། ། ཞེས་གསུངས་པ་ལྟར། ཀུན་ནས་ཉོན་མོངས་པའི་ཆོས་ཐམས་ཅད་ཀྱི་བག་ཆགས་ལ་བརྟེན་ནས། ས་བོན་ཡོངས་སུ་འཛིན་པ་དང་ལྡན་པས་ཀུན་ནས་ཉོན་མོངས་པའི་ཆོས་ཐམས་ཅད་སྐྱེ་བའི་རྒྱུར་གྱུར་པའོ། །ཐམས་ཅད་དུ་འགྱུར་བས་མ་བསྒྲིབས་པའང་ཡིན་ལ། དགེ་བ་དང་མི་དགེ་བ་གང་དུའང་མ་གྲུབ་པ་ཡིན་པས་ལུང་དུ་མ་བསྟན་པའང་ཡིན་ནོ། ། གསུམ་པ་ནམ་ལྡོག་ན། འཁོར་བར་གནས་ཀྱི་བར་དུ་འཇུག་ལ། དགྲ་བཅོམ་ཐོབ་ན་ལྡོག་སྟེ། དེ་ནི་རྒྱུན་འབབ་ཆུ་བོ་བཞིན། ། དགྲ་བཅོམ་ཉིད་ན་དེ་ལྡོག་གོ། ། ཞེས་བཤད་པ་ལྟ་བུའོ། ། ཡང་སངས་རྒྱས་པ་ན་གནས་འགྱུར་བའི་ཚུལ་གྱིས་ལྡོག་སྟེ། ཇི་སྐད་དུ། ཀུན་གཞིའི་རྣམ་ཤེས་གང་ཡིན་པ། ། དེ་ནི་མེ་ལོང་ཡེ་ཤེས་གྱུར། ། ཞེས་གསུངས་སོ། །(༢༥༢བ) བཞི་པ་བྱེད་པོ་དབང་ཕྱུག་སོགས་དང་མི་འདྲ་བའི་ཁྱད་པར་ནི། དབང་ཕྱུག་ལ་སོགས་པ་ནི་ཐམས་ཅད་ཀྱི་བྱེད་པ་པོ་གཅིག་པུ། བདག་རྟག་པ་ལ་སོགས་པ་འདོད་ལ། ཀུན་གཞི་ནི་སེམས་ཅན་རེ་རེ་བཞིན་ཡོད་པ་དང༌། ངོ་བོ་ཉིད་རྣམ་པར་འབྱེད་པའི་རྟེན་ཅིང་འབྲེལ་འབྱུང་སྐད་ཅིག་མའི་རང་བཞིན་དུ་འདོད་པས་ཁྱད་པར་འཕགས་སོ། ། ཕ༢ གཉིས་པ་དེའི་མཚན་ཉིད་ལ་གསུམ། བ༡ གདགས་གཞི་གཞན་དབང༌། བ༢ གདགས་བྱ་ཀུན་བརྟགས། བ༣ ཁྱབ་བྱེད་ཡོངས་གྲུབ་བོ། ། མ༡ དང་པོ་ནི། མཚན་ཉིད་གསུམ་ལས་དེ་བྱུང་གཞན་གྱི་དབང༌། ། ཡང་དག་མིན་རྟོག་བག་ཆགས་དབང་ལས་སྐྱེས། ། སྐད་ཅིག་མི་སྡོད་སྔ་མས་དབང་དུ་སྒྱུར། ། མཚན་ཉིད་གསུམ་དུ་དབྱེར་ཡོད་པ་ལས། དང་པོ་ཀུན་གཞིའི་རྣམ་པར་ཤེས་པ་དེ་ཉིད་ལས་བྱུང་བའི་གཞན་དབང་ནི། ཕུང་ཁམས་སྐྱེ་མཆེད་ཀྱི་ཆོས་སུ་སྣང་བའི་གཟུང་ཆའི་རྣམ་པ་དང༌། འཛིན་ཆའི་རྣམ་པར་སྣང་བ་ཡང་དག་པ་མ་ཡིན་པའི་ཀུན་ཏུ་རྟོག་པ་ཞེས་བྱ་སྟེ། རང་གི་བག་ཆགས་ས་བོན་གྱི་རིགས་འདྲ་སྔ་མའི་དབང་ལས་སྐྱེས་པའི་ཕྱིར་རྒྱུ་དང༌། རང་གི་ངོ་བོ་གྲུབ་དུས་ཀྱི་སྐད་ཅིག་གཉིས་པར་མི་སྡོད་པའི་ཕྱིར་ངོ་བོ་དང༌། རང་གི་རིགས་འདྲ་ཕྱི་མ་སྐྱེད་ཅིང་ཕྱི་མའང་སྔ་མས་དབང་དུ་སྒྱུར་བའི་ཕྱིར་འབྲས་བུ་བཅས་གསུམ་ཀ་གཞན་དབང་ཡིན་ནོ། ། མདོར་ན། ཀུན་བརྟགས་ཀྱི་གདགས་གཞིར་གྱུར་ཅིང་ཀུན་གཞིའི་ཆ་ཡིན་པ། ཡང་དག་མ་ཡིན་པའི་ཀུན་རྟོག་ཁམས་གསུམ་པའི་མཚན་ཉིད་ཅན་གྱི་རྣམ་པར་རིག་པ་ཙམ་པ་ངོ་བོ་རྫས་སུ་གྲུབ་ཅིང་འཁྲུལ་ངོར་རྒྱུ་དང་རྐྱེན་ལས་བྱུང་བའོ། ། བ༢ གཉིས་པ་[གདགས་བྱ་ཀུན་བཏགས་བཤད་པ་]ནི། གདགས་གཞི་རྫས་ཡོད་དེ་སྟེང་ཕྱིན་ཅི་ལོག ། བདག་དང་བདག་གིར་བ་སོགས་ཀུན་ཏུ་བརྟགས། ། ཀུན་བརྟགས་ནི། བཤད་མ་ཐག་པ་ལྟར། གདགས་གཞི་གཞན་དབང་རྫས་ཡོད་དེ་སྟེང་ཡིད་ཀྱི་རྣམ་པར་ཤེས་པ་ཀུན་ཏུ་རྟོག་པ་དེས་གང་ཟག་དང་(༢༥༣ན)ཆོས་ཕྱིན་ཅི་ལོག་ཏུ་སྒྲོ་བཏགས་ནས་བདག་དང་བདག་གི་བ་དང་མིང་དང་རྒྱུ་མཚན་ལ་སོགས་པ་ཀུན་ཏུ་བརྟགས་པ་སྟེ། དོན་དམ་པར་རྫས་གང་དུའང་མེད་བཞིན་དུ་སྣང་བ་སྐྲ་ཤད་ལྟར་བློ་འཁྲུལ་བའི་གཟུང་བྱ་འབའ་ཞིག་པ། གང་ལ་དམིགས་ན་ཐར་པའི་མི་མཐུན་ཕྱོགས་སུ་གྱུར་ཅིང་བརྟགས་པའི་ཆ་ཅི་ཡང་མེད་པ་རི་བོང་གི་རྭ་ལྟ་བུའོ། ། བ༣ གསུམ་པ་[ཁྱབ་བྱེད་ཡོངས་གྲུབ་བཤད་པ་]ནི། བཏགས་ཡོད་དགག་བྱས་སྟོང་པའི་འདུས་མ་བྱས། ། གཉིས་སྟོང་ཤེས་པ་མི་རྟོག་དོན་དམ་ཡོད། ། ཡོངས་གྲུབ་ནི། བཏགས་ཡོད་ཀྱི་དགག་བྱ་ཀུན་བརྟགས་ཀྱིས་སྟོང་པའི་འདུས་མ་བྱས། གཟུང་འཛིན་གཉིས་སྟོང་གི་ཤེས་པ་རྣམ་པར་མི་རྟོག་པ་རྣམ་པར་དག་པའི་དམིགས་པ་དེ་ལས་གཞན་དུ་མེད་པར་ཡོངས་སུ་གྲུབ་པ་སྟེ། དེའང་ཀུན་བརྟགས་ནི། བཏགས་པ་ཙམ་དུ་ཡོད་པ་སྟེ། དངོས་པོར་མ་གྲུབ་པའི་ཕྱིར་རོ། ། གཞན་དབང་ནི། རྫས་སུ་ཡོད་པ་སྟེ། དོན་བྱེད་ནུས་པའི་ཕྱིར་རོ། ། ཡོངས་གྲུབ་ནི། དོན་དམ་པར་ཡོད་པ་སྟེ། རྣམ་པར་མི་རྟོག་པའི་ཡུལ་ཡིན་པའི་ཕྱིར་རོ། ། དེས་ན་མདོ་ལས་མེད་པའི་རྣམ་གྲངས་བསྟན་པ་རྣམས་ཀྱིས་ཀུན་བརྟགས་བསྟན་པའོ། ། སྒྱུ་མ་རྨི་ལམ་སྨིག་རྒྱུ་ལ་སོགས་པར་བསྟན་པ་རྣམས་ཀྱིས་གཞན་དབང་ངོ༌། ། རྣམ་པར་མི་རྟོག་པ་དང་འདུས་མ་བྱས་བསྟན་པ་རྣམས་ཀྱིས་ཡོངས་གྲུབ་བོ། ། དེ་དག་ལ་སློབ་དཔོན་རྣམས་ཀྱིས་དབྱེ་བསྡུ་སྣ་ཚོགས་གསུངས་ཀྱང་། བོད་ཕལ་ཆེར་ལ་གྲགས་ཆེ་བ། ཀུན་བརྟགས་ལ། མཚན་ཉིད་ཆད་པའི་ཀུན་བརྟགས་ནི། དོན་ལ་མ་གྲུབ་ཀྱང་རྟོག་པས་བཏགས་པ་བདག་ལྟ་དང་རྫས་གྲུབ་ལྟ་བུ། རྣམ་གྲངས་པའི་ཀུན་བརྟགས་ནི། རྟོག་པ་ལ་སྣང་བའི་དོན་སྤྱི་རྣམས་དང་རྟོག་མེད་དབང་ཤེས་ལ་གཟུང་འཛིན་གཉིས་སྣང་ལྟ་བུ། གཞན་དབང་ལ། མ་དག་གཞན་དབང་ནི། བག་ཆགས་ཀྱི་དབང་གིས་ཁམས་གསུམ་པའི་སེམས་དང་(༢༥༣བ)སེམས་བྱུང་གཉིས་མེད་གཉིས་སུ་སྣང་བ། དག་པའི་གཞན་དབང་ནི། མྱོང་བ་གཉིས་མེད་ཀྱི་ཤེས་རིག་དང་འཕགས་པ་རྣམས་ཀྱི་རྗེས་ཤེས་སྣང་ལ་མ་ཞེན་པ། ཡོངས་གྲུབ་ལ། འགྱུར་མེད་ཡོངས་གྲུབ་ནི། འཁྲུལ་གཞི་གཞན་དབང་དང་འཁྲུལ་པ་ཀུན་བརྟགས་གཉིས་ཀས་སྟོང་པའི་ཆོས་ཉིད་མེད་དགག་དེ་བཞིན་ཉིད་འདུས་མ་བྱས། ཕྱིན་ཅི་མ་ལོག་པའི་ཡོངས་གྲུབ་ནི། གཟུང་འཛིན་གཉིས་ཀྱིས་སྟོང་པའི་ཤུལ་ན་གཉིས་མེད་ཀྱི་ཤེས་པ་རང་རིག་བདེན་པ་རྫས་སུ་གྲུབ་པ་ཞིག་གོ། ། འཁོར་དང་བཅས་པའི་དབང་དུ་ན། ལམ་དང་ལམ་གྱི་དམིགས་པ་ཐམས་ཅད་འདིའི་ཁོངས་སུ་འདུའོ། ། དེ་དག་ཐ་སྙད་ཀྱི་དབང་དུ་བྱས་ན། ཀུན་བརྟགས་ནི་ཐ་སྙད་དངོས་དང༌། གཞན་དབང་ནི་ཐ་སྙད་ཀྱི་གཞི་དང༌། ཡོངས་གྲུབ་ནི་ཐ་སྙད་དང་བྲལ་བ་ཉིད་དོ། ། ཐ་སྙད་ལ་འཇུག་པའི་དབང་དུ་བྱས་ན། ཀུན་བརྟགས་ནི་གཉིས་སྣང་འཁྲུལ་པར་འཇུག་པ་དང༌། གཞན་དབང་ནི་དེ་དང་བྲལ་བའི་དོན་ཅན་དུ་འཇུག་པ་དང༌། ཡོངས་གྲུབ་ནི་དེ་བཞིན་ཉིད་དུ་འཇུག་པའོ། ། དེ་དག་གི་དཔེ་ནི། སྒྱུ་མ་ལྟ་བུ་སྟེ། སྤྲུལ་བྱེད་སྔགས་དང་སྤྲུལ་གཞི་ཤིང་བུ་ལྟ་བུ་ནི་རྩ་བའི་སེམས་དང་དེ་བཞིན་ཉིད་དེ། དེ་ལས་གླང་པོར་སྣང་བའི་རྣམ་པ་ནི་གཞན་དབང་དང༌། གླང་པོ་ནི་ཀུན་བརྟགས་དང༌། དེ་ལ་དེ་མེད་པ་ནི་ཡོངས་གྲུབ་ཏུ་གསལ་བར་གསུངས་སོ། ། ཕ༣ གསུམ་པ་འཇུག་པ་ནི། དེར་འཇུག་མ་ཞུམ་གསུམ་དང་སྤོང་བ་བཞི། ། གུས་པ་དག་གིས་དམིགས་པ་མེད་ཤེས་དང༌། ། ཀུན་རྟོག་སྤོང་ཞིང་ཡང་དག་མཐོང་བ་ཡིས། ། མོས་སྤྱོད་མཐོང་སྒོམ་མཐར་ཕྱིན་པ་ལ་འཇུག ། མཚན་ཉིད་དེར་དོན་རྟོགས་པའི་ཕྱིར་འཇུག་པ་ལ་བཞི། གང་ཟག་གང་འཇུག་ན། ཐེག་པ་ཆེན་པོ་ལ་ཚོགས་གཉིས་བསགས་པ་ཅན་འཇུག ། རྒྱུ་གང་གིས་འཇུག་ན། དགེ་བའི་རྩ་བ་སྟོབས་བསྐྱེད་པ་སེམས་ཅན་ཐམས་(༢༥༤ན)ཅད་སངས་རྒྱས་ཐོབ་པར་བྱ་བའི་སེམས་དང༌། ཕ་རོལ་ཏུ་ཕྱིན་པ་ལ་འཇུག་པའི་སེམས་དང༌། བདག་གིས་གང་ལའང་ཐོགས་པ་མེད་དོ་ཞེས་མ་ཞུམ་པའི་སེམས་གསུམ་དང༌། ཉན་ཐོས་དང་རང་རྒྱལ་ཡིད་ལ་བྱེད་པ་སྤངས་པ་དང༌། ཐེག་པ་ཆེན་པོ་ལ་སོམ་ཉི་སྤངས་པ་དང༌། ཆོས་ལ་ཕྱོགས་འཛིན་སྤངས་པ་དང༌། རྣམ་པར་རྟོག་པ་སྤངས་པ་སྟེ་སྤངས་པ་བཞི་དང༌། ཞི་གནས་དང་ལྷག་མཐོང་ལ་གུས་པ་དག་གིས་འཇུག་གོ། ། ཚུལ་ཇི་ལྟར་འཇུག་ན། ཐོས་པའི་བག་ཆགས་ཀྱི་སྒོ་ནས་མིང༌། དངོས་པོ། ངོ་བོ་ཉིད། བྱེ་བྲག་གི་དབྱེ་བ་བཙལ་ཏེ་མཚན་ཉིད་གསུམ་པོ་དམིགས་པ་མེད་པར་ཤེས་པ་སྟེ། དེའང་ཐམས་ཅད་བཏགས་ཡོད་ཙམ་དུ་ཤེས་པ་དང༌། རྣམ་པར་རིག་པ་ཙམ་དུ་ཤེས་པ་དང༌། རྣམ་རིག་ཙམ་གྱི་འདུ་ཤེས་ཀྱང་བཟློག་པས་དེ་གསུམ་ལ་རིམ་བཞིན་འཇུག་སྟེ་མདོར་ན་ཀུན་བརྟགས་པའི་འཁྲུལ་པ་ཡོངས་སུ་ཤེས། གཞན་དབང་གི་ཀུན་རྟོག་སྤོང་ཞིང་ཡོངས་གྲུབ་མངོན་དུ་མཐོང་བས་ལམ་ལ་འཇུག་གོ། ། གནས་སྐབས་སམ་དུས་གང་འཇུག་ན། མོས་སྤྱོད་ཀྱིས་ཚོགས་སྦྱོར་གཉིས། མཐོང་ལམ་སྒོམ་ལམ་མཐར་ཕྱིན་པའི་ལམ་རྣམས་ལ་རིམ་གྱིས་འཇུག་པའོ། ། ཕ༤ བཞི་པ་དེའི་རྒྱུ་འབྲས་ནི། དེ་ཡི་རྒྱུ་འབྲས་ཕྱིན་དྲུག་སྤྱོད་གནས་པས། ། འཇུག་པ་དེའི་ལམ་གྱི་རིམ་པ་ཐོག་མར་སྐྱེ་བའི་རྒྱུ་དང༌། མཐར་ཕྱིན་པའི་འབྲས་བུའི་ཚུལ་དུའང་གྱུར་པ་ཕ་རོལ་ཏུ་ཕྱིན་པ་དྲུག་གི་སྤྱོད་པ་ལ་གནས་པའི་སྒོ་ནས་སོ། ། ཕ༥ ལྔ་པ་རབ་ཏུ་དབྱེ་བ་ནི། རིམ་བགྲོད་ས་བཅུའི་ཚུལ་རྣམས་རབ་ཏུ་དབྱེ། ། ཕ་རོལ་ཏུ་ཕྱིན་པ་དྲུག་གིས་རྣམ་པར་རིག་པ་ལ་འཇུག་པའི་ཚུལ་ལ་རབ་ཏུ་དགའ་བ་ལ་སོགས་པའི་ས་བཅུའི་ཚུལ་རྣམས་རབ་ཏུ་དབྱེ་བ་འབྱུང་སྟེ། དེའང་ཕར་ཕྱིན་གྱིས་ས་བགྲོད་པའི་ཚུལ། ས་རྣམས་ཐོབ་ཚུལ། དུས་ཇི་(༢༥༤བ)སྲིད་ཀྱིས་བགྲོད་པའི་ཚུལ་རྣམས་ཀྱིས་བསྡུས་པའོ། ། ཕ༦ དྲུག་པ་བསླབ་པ་གསུམ་ནི། བསླབ་བྱ་ལྷག་པའི་བསླབ་པ་རྣམ་པ་གསུམ། ། གོང་དུ་སྨོས་པའི་ཕར་ཕྱིན་དྲུག་པོའང་བསླབ་པ་གསུམ་དུ་འདུ་ཞིང་དེ་ཉིད་བྱང་ཆུབ་སེམས་དཔའ་རྣམས་ཀྱིས་བསླབ་བྱའི་གནས་ཡིན་ཏེ། དེ་ལ་ལྷག་པ་ཚུལ་ཁྲིམས་ཀྱི་བསླབ་པ་ནི། སྡོམ་པའི་ཚུལ་ཁྲིམས་སོགས་རྣམ་པ་གསུམ་སྟེ་ཐེག་པ་དམན་པ་ལས་སེམས་བསྐྱེད་སོགས་ཀྱིས་ཁྱད་པར་དུ་གྱུར་པས་ལྷག་པ་ཞེས་པའི་སྒྲ་སྦྱར་བའོ། ། ལྷག་པའི་སེམས་ཀྱི་བསླབ་པ་ནི། ཕ་རོལ་ཏུ་ཕྱིན་པ་བསྒོམ་པ་དང༌། སེམས་ཅན་སྨིན་པར་བྱ་བ་དང༌། སངས་རྒྱས་ཀྱི་ཆོས་ཐམས་ཅད་བསྒྲུབ་པའི་ཕྱིར་བྱང་ཆུབ་སེམས་དཔའི་ཏིང་ངེ་འཛིན་དཔའ་བར་འགྲོ་བ་ལ་སོགས་པ་ལ་སྤྱོད་པའོ། ། ལྷག་པའི་ཤེས་རབ་ཀྱི་བསླབ་པ་ནི། མཚན་མ་དང་རྣམ་པར་རྟོག་པ་ཐམས་ཅད་སྤངས་ཏེ། རྣམ་པར་རྟོག་པ་མེད་པར་ལྷུན་གྱིས་གྲུབ་པ་དང༌། རྗེས་སྒྱུ་མ་ལྟ་བུར་སྤྱོད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། སྤྱིར་བྱང་ཆུབ་སེམས་དཔའི་བསླབ་བྱ་ཚད་མེད་ཀྱང་བསྡུ་ན་དེ་དག་རྣམས་སུ་འདུའོ། ། ཕ༧ བདུན་པ་སྦྱངས་པའི་འབྲས་བུ་ནི། འབྲས་བུ་སྤངས་དང་ཡེ་ཤེས་ཕུན་ཚོགས་སོ། ། དེ་ལས་བྱུང་བའི་འབྲས་བུ་ནི། སྤངས་པ་ཕུན་སུམ་ཚོགས་པ་ཉོན་མོངས་པ་དང་ཤེས་བྱའི་སྒྲིབ་པ་བཅོམ་པ་དང༌། ཡེ་ཤེས་ཕུན་སུམ་ཚོགས་པ་ངོ་བོ་ཉིད་དང༌། ལོངས་སྤྱོད་རྫོགས་པ། སྤྲུལ་པའི་སྐུ་སྟེ། སྐུ་གསུམ་པོ་དེ་དག་གི་ངོ་བོའམ་མཚན་ཉིད་ཆོས་ཀྱི་སྐུ་དང་བཅས་པ། དེའང་གནས་གྱུར་པ། དཀར་པོའི་ཆོས་ཀྱི་གཞི་ཡིན་པ། གཉིས་སུ་མེད་པ། རྟག་པ། བསམ་གྱིས་མི་ཁྱབ་པ་སྟེ་ཡན་ལག་ལྔ་དང་ལྡན་ཞིང༌། དེ་ལས་སངས་རྒྱས་ཀྱི་ཆོས་ཚད་མེད་བསམ་གྱིས་མི་ཁྱབ་པ་འཕྲོ་བའི་གནས་སུ་གྱུར་པའོ། ། ས་ལམ་སོགས་ཀྱི་དོན་ཁ་ཅིག་འོག་ཏུ་འཆད་པར་འགྱུར་ཞིང་། ཞིབ་ཏུ་(༢༥༥ན)རྟོགས་པར་འདོད་ན་རྗེ་བཙུན་གྲགས་པའི་ལྗོན་ཤིང་སོགས་བོད་གཞུང་སྔ་མ་རྣམས་སུ་རྟོགས་པར་བྱའོ། ། འདི་དག་ཀྱང་བོད་སྔ་མ་རྣམས་ཀྱི་འདོད་པ་གཞིར་བཞག་ཏུ་བཀོད་པ་སྟེ། བྱམས་ཆོས་དང་ཐོགས་མེད་སྐུ་མཆེད་ཀྱི་གཞུང་སེམས་ཙམ་དུ་འདོད་པའི་ལུགས་སོ། ། ན༣ གསུམ་པ་རབ་ཏུ་དབྱེ་བ་བཤད་པ་ལ་གཉིས། པ༡ སྤྱིར་བཤད་པ་དང༌། པ༢ དབྱེ་བ་དངོས་སོ། ། པ༡ དང་པོ་ནི། རང་བཞེད་རྩ་བ་རྣམ་རིག་ལས་གཞན་པའི། ། ཕྱི་དོན་ཅུང་ཟད་མ་གྲུབ་རྨི་ལམ་བཞིན། ། སེམས་ཙམ་པ་སྤྱིའི་རང་བཞེད་ཀྱི་རྩ་བ་རྣམ་པར་རིག་པ་ཙམ་ལས་གཞན་པའི་ཕྱི་རོལ་གྱི་དོན་ཅུང་ཟད་ཙམ་ཡང་གྲུབ་པ་མེད་པ་རྨི་ལམ་གྱི་སྣང་བ་བཞིན་དུ་འདོད་དེ། གཟུགས་ལ་སོགས་པའི་དོན་དང་དེའི་སྐྱེ་འགག་སོགས་ཐམས་ཅད་སྐྲ་ཤད་དང་ཟླ་བ་