Tibetan
གསུམ་མོ། ། ཚིག་རྩུབ་ཀྱི་ནང་ནས་ཕ་མའམ་འཕགས་པ་ལ་ཚིག་རྩུབ་སྨྲ་བ་སྡིག་ཆེའོ། ། ངག་འཁྱལ་ནི། གཞི་ནི། སྔར་དང་འདྲ། བསམ་པ་ནི། བག་མེད་པས་ཅལ་ཅོལ་མང་པོ་སྨྲ་འདོད་ཀྱི་ཀུན་སློང༌། སྦྱོར་བ་ནི། ཁ་གསག་དང་གླུ་སོགས་ངག་གི་རིག་བྱེད་དུ་ཐོན་པ། ཉོན་མོངས་ནི། དུག་གསུམ་དང་ཁྱད་པར་རྫོགས་བྱེད་གཏི་མུག ། མཐར་ཐུག་ནི། ཕ་རོལ་པོས་ཐོས་པའོ། ། འདི་ལ་དབྱེ་ན། མུ་སྟེགས་པའི་བཟླས་བརྗོད་ལྟ་བུ་ལོག་པའི་ངག་ཀྱལ། བྲེ་མོའི་གཏམ་ལྟ་བུ་འཇིག་རྟེན་པའི་ངག་ཀྱལ། སྣོད་མིན་ལ་ཆོས་འཆད་པ་ལྟ་བུ་བདེན་པའི་ངག་ཀྱལ་ཏེ་གསུམ་མོ། ། ངག་ཀྱལ་གྱི་ནང་ནས་ཆོས་འདོད་པ་གཡེང་བ་སྡིག་ཆེའོ། ། དེ་དག་ནི་ངག་གི་ལས་རྣམ་པ་བཞིའོ། ། བརྣབ་སེམས་ནི། གཞི་ནི། ཕ་རོལ་པོའི་ཕྱི་ནང་གི་རྫས། བསམ་པ་ནི། གཞན་གྱི་ཕུན་ཚོགས་དང་ཡོ་བྱད་ལ་རེ་བ་དང་སྨོན་པའི་ཀུན་སློང༌། སྦྱོར་བ་ནི། དེར་ཡང་ཡང་སེམས་པ། ཉོན་མོངས་ནི། དུག་གསུམ་དང་རྫོགས་བྱེད་འདོད་ཆགས། མཐར་ཐུག་ནི། ལས་དེ་ཡང་དང་ཡང་དུ་བྱེད་ཅིང་ཁྲེལ་དང་ངོ་ཚ་དོར་ནས་གཉེན་པོ་བསྟེན་པ་མེད་པའོ། ། འདི་ལ་དབྱེ་ན། རང་གི་ཆོ་རིགས་ལ་ཞེན་པ་ལྟ་བུ་བདག་གི་ལ་བརྣབ་སེམས་པ། ཕ་རོལ་(༢༢༨བ)པོའི་ཕུན་ཚོགས་ལ་ཆགས་པ་ལྟ་བུ་གཞན་གྱི་ལ་བརྣབ་སེམས་པ། ས་འོག་གི་གཏེར་ལ་སྨོན་པ་ལྟ་བུ་གཉིས་ཀ་མ་ཡིན་པ་ལ་བརྣབ་སེམས་པ་སྟེ་གསུམ་མོ། ། བརྣབ་སེམས་ཀྱི་ནང་ནས་སྤོང་བའི་རྙེད་པ་ལ་བརྣབ་སེམས་པ་སྡིག་ཆེའོ། ། གནོད་སེམས་ནི། གཞི་ནི། སྔར་ལྟར། བསམ་པ་ནི། གསོད་བརྡེག་སོགས་གནོད་པར་བྱེད་འདོད་པའི་ཀུན་སློང༌། སྦྱོར་བ་ནི། དེར་སེམས་བཞིན་པའི་གནས་སྐབས། ཉོན་མོངས་ནི། དུག་གསུམ་དང་རྫོགས་བྱེད་ཞེ་སྡང༌། མཐར་ཐུག་ནི། དེ་ལ་ཡོན་ཏན་དུ་ལྟ་ཞིང་གཉེན་པོ་བསྟེན་འདོད་མེད་པའོ། ། འདི་ལ་དབྱེ་ན། གཡུལ་ངོ་སོགས་སུ་གཞན་བསད་སེམས་ལྟ་བུ་ཞེ་སྡང་གི་ཆ་ལས་བྱུང་བའི་གནོད་སེམས། འགྲན་ཟླ་སོགས་ལ་གནོད་སེམས་ལྟ་བུ་ཕྲག་དོག་གི་ཆ་ལས་བྱུང་བའི་གནོད་སེམས། གནོད་བྱེད་སླར་འདུད་ཀྱང་མནར་སེམས་པ་ལྟ་བུ་ཁོན་འཛིན་གྱི་ཆ་ལས་བྱུང་བའི་གནོད་སེམས་ཏེ་གསུམ་མོ། ། གནོད་སེམས་ཀྱི་ནང་ནས་མཚམས་མེད་པ་བཤམ་པ་སྡིག་ཆེའོ། ། ལོག་ལྟ་ནི། གཞི་ནི། དགེ་མི་དགེའི་ཆོས་རྣམས། བསམ་པ་ནི། དགེ་སྡིག་མེད་པ་དང་རྒྱུ་འབྲས་ཕྱིན་ཅི་ལོག་ཏུ་ལྟ་བ་སོགས་ཀྱི་ཀུན་སློང༌། སྦྱོར་བ་ནི། དེར་ཡང་ཡང་སེམས་པའི་གནས་སྐབས། ཉོན་མོངས་ནི། དུག་གསུམ་ལས་རྫོགས་བྱེད་གཏི་མུག ། མཐར་ཐུག་ནི། ལས་དེ་གྲུབ་ཅིང་གཉེན་པོ་མེད་པའོ། ། འདི་ལ་དབྱེ་ན། དགེ་སྡིག་བདེ་སྡུག་གི་རྒྱུར་མི་འདོད་པ་ལྟ་བུ་ལས་འབྲས་ལ་ལོག་ལྟ། ལམ་བདེན་ཉམས་སུ་བླངས་ཀྱང་འགོག་བདེན་ཐོབ་པར་མི་འདོད་པ་ལྟ་བུ་བདེན་པ་ལ་ལོག་ལྟ། དཀོན་མཆོག་ལ་སྐུར་འདེབས་ལྟ་བུ་དཀོན་མཆོག་ལ་ལོག་ལྟ་སྟེ་གསུམ་མོ། ། ལོག་ལྟའི་ནང་ནས་ལྟ་བ་མཆོག་འཛིན་སྡིག་ཆེའོ། ། དེ་དག་གི་འབྲས་བུ་ལའང་གསུམ་ལས། རྣམ་སྨིན་གྱི་འབྲས་བུ་ནི། རྒྱུ་ཆུང་ངུ་སྤྱད་པ་ལས་འབྲས་བུ་ཆེན་པོ་སྨིན་པ་སྟེ། རྒྱུ་དེས་འབྲས་བུའི་ཆ་ཙམ་ཡང་མཚོན་མི་ནུས་པར་སྨིན་པ་ལས་དེ་སྐད་ཅེས་བྱའོ། ། དེ་ཡང་། (༢༢༩ན)ཀུན་སློང་དྲག་པོས་འཕངས་པའི་ལས་མི་དགེ་བ་དེ་དང་དེ་ཆེན་པོར་སྤྱད་པ་ལས་འབྲས་བུ་དམྱལ་བ། འབྲིང་དུ་སྤྱད་པས་ཡི་དྭགས། ཆུང་ངུར་སྤྱད་པས་དུད་འགྲོར་འཕེན་པར་བྱེད་ལ། རྒྱུ་མཐུན་དང་བདག་པོའི་འབྲས་བུ་ནི་མཐོ་རིས་ཀྱི་རྟེན་ལའང་སྨིན་པར་འགྱུར་བ་ལས། རྒྱུ་མཐུན་ལ། བྱེད་པ་རྒྱུ་མཐུན་དང་། མྱོང་བ་རྒྱུ་མཐུན་གཉིས་ལས། དང་པོ་ནི། སྔོན་ལས་ཀྱིས་འཕངས་པའི་ལས་དེ་དང་དེ་སྐྱེས་ཐོབ་ཀྱིས་བྱེད་པར་སྤྲོ་ཞིང་བྱེད་པའོ། ། གཉིས་པ་ནི། རིན་ཆེན་ཕྲེང་བ་ལས། གསོད་པ་ཡིས་ནི་ཚེ་ཐུང་འགྱུར། ། རྣམ་པར་འཚེ་བས་གནོད་པ་མང༌། ། བརྐུ་བ་ཡིས་ནི་ལོངས་སྤྱོད་ཕོངས། ། བྱི་བོ་བྱེད་པས་དགྲ་ཟླར་བཅས། ། རྫུན་དུ་སྨྲ་བས་སྐུར་པ་སྟེ། ། ཕྲ་མ་ཡིས་ནི་བཤེས་དང་བྱེ། ། རྩུབ་མོ་ཉིད་ཀྱིས་མི་སྙན་ཐོས། ། མ་འབྲེལ་བ་ཡིས་ཚིག་མི་བཙུན། ། བརྣབ་སེམས་ཡིད་ལ་རེ་བ་འཇོམས། ། གནོད་སེམས་འཇིགས་པ་སྦྱིན་པར་བཤད། ། ལོག་པར་ལྟ་བས་ལྟ་ངན་ཉིད། ། ཅེས་འབྱུང་བ་ལྟར་རོ། ། བདག་པོའི་འབྲས་བུ་ནི། ཕྱིའི་ཡུལ་ལ་སྨིན་པར་འགྱུར་བ་སྟེ། དེ་ཉིད་ལས། ཕྱི་རོལ་གཟི་ཆུང་གནོད་པ་མང༌། ། རྡུལ་འཁྲིགས་དྲི་ང་མཐོ་དམན་ཅན། ། ཚྭ་སྒོ་ཅན་དང་ལོག་པ་དང༌། ། འབྲས་བུ་ཕྲ་ཁ་ཆུང་ངམ་མེད། ། ཅེས་གསུངས་པ་ལྟར་རོ། ། འབྲས་བུ་དེ་རྣམས་སྨིན་པའི་སྔ་ཕྱི་ཡང༌། མཛོད་འགྲེལ་ལས། ལས་ནི་འཁོར་བར་ལྕི་གང་དང༌། ། ཉེ་བ་གང་དང་གོམས་པ་གང༌། ། སྔོན་བྱས་གང་ཡིན་དེ་ལས་ནི། ། སྔ་མ་སྔ་མ་རྣམ་སྨིན་འགྱུར། ། ཞེས་པ་ལྟར་རོ། ། མི་དགེ་བ་བཅུ་པོ་དེ་བདག་ཉིད་ཀྱིས་སྤྱད་པ་ལས་ལས་ལམ་རྫོགས་པར་འགྱུར་བ་མ་ཟད། བསམ་སྦྱོར་མཚུངས་ན་དམག་གི་འདུ་བའི་ནང་དུ་མི་གཅིག་གིས་སྲོག་གཅོད་ཀྱིས་ལས་བྱས་ན་དེར་འདུས་པ་ཐམས་ཅད་ལ་ལས་ལམ་རྫོགས་པར་འགྱུར་ཏེ། མཛོད་ལས། (༢༢༩བ) དམག་ལ་སོགས་པ་དོན་གཅིག་ཕྱིར། ། ཐམས་ཅད་བྱེད་པ་པོ་བཞིན་ལྡན། ། ཞེས་འབྱུང་བའི་ངེས་པ་ལས་ཏེ། མ་བྱིན་པ་ལེན་པའི་ཆེད་དུ་ཇག་ཆོམ་སོགས་ལ་འདུས་པ་རྣམས་ལའང་མཚུངས་པ་དང༌། ཡིད་ཀྱི་གསུམ་མ་གཏོགས་དེ་རྣམས་གཞན་བགྱིད་དུ་སྩལ་བ་ལས་ཀྱང་ལས་ལམ་རྫོགས་པར་འགྱུར་ཞིང༌། གཞན་གྱིས་བགྱིས་པ་ལ་རྗེས་སུ་ཡི་རང་བ་ལས་ཀྱང་ཆ་མཐུན་གྱི་ལས་ཀྱིས་གོས་པར་འགྱུར་ཏེ། ཇི་ལྟར་དགེ་བ་གཞན་གྱིས་སྤྱད་པ་ལ་རྗེས་སུ་ཡི་རང་བསྒོམས་པས་དགེ་རྩ་མཉམ་དུ་ཐོབ་པར་གསུངས་པ་ལྟ་བུའོ། ། ཡང་ལས་དེ་དག་ཉོན་མོངས་པའི་སྒོ་ནས། ཞེ་སྡང༌། འདོད་ཆགས། གཏི་མུག་གིས་སྤྱད་པ་དང༌། གྲངས་ཀྱི་སྒོ་ནས། དཔག་མེད། མང་པོ། ཉུང་ངུར་སྤྱད་པ་དང༌། ཡུལ་གྱི་སྒོ་ནས། མཆོག །འབྲིང༌། ཐ་མ་ལ་བརྟེན་པས་རིམ་བཞིན། དམྱལ་བ། ཡི་དྭགས། དུད་འགྲོར་སྐྱེ་བར་འགྱུར་ཏེ། མདོར་ན། རིན་ཆེན་ཕྲེང་བར། འདོད་ཆགས་ཞེ་སྡང་གཏི་མུག་གསུམ། ། དེས་བསྐྱེད་ལས་ནི་མི་དགེ་བ། ། མི་དགེ་བ་ལས་སྡུག་བསྔལ་ཀུན། ། དེ་བཞིན་ངན་འགྲོ་ཐམས་ཅད་དོ། ། ཞེས་པ་ལྟར་རོ། ། དེ་དག་ས་གང་དུ་ཡོད་ན། དམྱལ་བ་དང་སྒྲ་མི་སྙན་མ་གཏོགས་འདོད་ཁམས་པ་རྣམས་ལ་བཅུ་ག་ཅི་རིགས་སུ་ཚང་བར་ཡོད་ཅིང༌། ཁམས་གོང་མ་རྣམས་ན་མི་དགེ་བ་ཐམས་ཅད་མེད་ལ། མིའི་གླིང་གཞན་རྣམས་ལའང་འཁོར་ལོས་སྒྱུར་བ་རྣམས་བྱོན་དུས་སུ་དེའི་བསོད་ནམས་ཀྱི་ཤུགས་ཀྱིས་མི་དགེ་བཅུ་ག་མངོན་གྱུར་དུ་མེད་དོ། ། གཉིས་པ་བསོད་ནམས་ཀྱི་ལས་ཀྱང་གཙོ་བོར་བསྡུ་ན། དེ་ཉིད་ལས། མི་གསོད་པ་དང་རྐུ་སྤོང་དང༌། ། གཞན་གྱི་ཆུང་མ་སྤོང་བ་དང༌། ། ལོག་དང་ཕྲ་མ་རྩུབ་ཉིད་དང༌། ། མ་འབྲེལ་སྨྲ་བ་ཡང་དག་སྡོམ། ། ཆགས་དང་གནོད་སེམས་མེད་པ་བ། ། ཉིད་ཀྱི་ལྟ་བ་ཡོངས་སྤོང་བ། ། འདི་དག་ལས་ལམ་དཀར་བཅུ་སྟེ། ། ཞེས་པ་ལྟར། སྲོག་གཅོད་སྤོང་བའི་(༢༣༠ན)སེམས་པ་ནས་ལོག་ལྟ་སྤོང་བའི་སེམས་པའི་བར་རོ། ། ཉོན་མོངས་མ་ཟད། གཞི། བསམ། སྦྱོར་བ། མཐར་ཐུག་བཞི་ནི་འདི་རྣམས་ལའང་སྦྱར་དུ་ཡོད་དོ། ། ལས་དེ་ཁྱད་པར་ཅན་དུ་འགྱུར་བ་ནི། སྲོག་གཅོད་སྤངས་པ་ཙམ་ལས་སྡོམ་པས་བསྡམས་པ་དང༌། སྲོག་སྐྱོབ་པ་དང༌། ཚེ་སྤེལ་བའི་ཐབས་སྦྱིན་པ་སོགས་ཀྱིས་དགེ་བའི་ལས་ཁྱད་པར་ཅན་དུ་གྱུར་ཏེ། འོག་མ་རྣམས་ལའང་སྦྱར་རོ། ། དེ་དག་གི་འབྲས་བུའང་། རྣམ་སྨིན་དང་། རྒྱུ་མཐུན་དང་། བདག་འབྲས་རྣམས་མི་དགེ་བ་བཅུའི་འབྲས་བུ་ཡིད་དུ་མི་འོང་བ་ལས་བཟློག་སྟེ། ཡིད་དུ་འོང་བ་ཁོ་ན་འབྱུང་བ་རྣམས་རིམ་པ་བཞིན་ཤེས་པར་བྱའོ། ། འདི་ལའང་ཡུལ་མཆོག་དམན་དང་གྲངས་མང་ཉུང་གི་ཁྱད་པར་ནི་གོང་བཞིན་ནོ། ། མདོར་ན། མ་ཆགས་མི་སྡང་གཏི་མུག་མེད། ། དེས་བསྐྱེད་ལས་ནི་དགེ་བ་ཡིན། ། དགེ་ལས་བདེ་འགྲོ་ཐམས་ཅད་དང༌། ། སྐྱེ་བ་ཀུན་ཏུ་བདེ་བ་དག ། ཅེས་པ་ལྟར་རོ། ། གསུམ་པ་མི་གཡོ་བའི་ལས་ནི། རང་ས་ལས་རྣམ་སྨིན་གཞན་དུ་མི་གཡོ་ཞིང་མཉམ་པར་བཞག་པའི་ས་པ་ཡིན་པ་དང་ས་འོག་མའི་སྐྱོན་གྱིས་མི་གཡོ་བའི་ཕྱིར་མི་གཡོ་བའི་ལས་ཞེས་བྱ་ལ། དེའང༌། དེ་ཉིད་ལས། བསམ་གཏན་ཚད་མེད་གཟུགས་མེད་ཀྱིས། ། ཚངས་སོགས་བདེ་བ་མྱོང་བར་བྱེད། ། ཅེས་པ་ལྟར། བསམ་གཏན་བཞི་དང་གཟུགས་མེད་བཞིའི་སྙོམས་འཇུག་དངོས་གཞི་ཁྱད་པར་ཅན་གྱི་སེམས་པ་ལ་བརྗོད་དེ། གོང་དུ་མངོན་མཐོའི་ལམ་གྱི་སྐབས་སུ་བརྗོད་པ་ལྟར་རོ། ། གཉིས་པ་དབྱེ་ཚུལ་གྱི་སྒོ་གཞན་པ་ནི། འཕེན་རྫོགས་མྱུར་བུལ་བྱས་བསགས་སྟོབས་ཆེ་ཆུང༌། ། སྣང་ཚུལ་མཐུན་མིན་སྒོ་ནས་ཁམས་གསུམ་སྦྱོར། ། བཀའ་དང་བསྟན་བཅོས་རྣམས་ལས་ལས་འབྲས་ཀྱི་རྣམ་པར་གཞག་པ་རྒྱ་ཆེར་གསུངས་པས་དབྱེ་སྒོའི་རྣམ་གྲངས་གཞན་ཡང་མང་བ་ལས། གཙོ་བོར་འཕེན་(༢༣༠བ)རྫོགས་མུ་བཞི་ལས་དབྱེ་བ། རྣམ་སྨིན་མྱུར་བུལ་གྱིས་དབྱེ་བ། བྱས་བསགས་ཡིན་མིན་གྱིས་དབྱེ་བ། ལས་སྟོབས་ཆེ་ཆུང་གིས་དབྱེ་བ། ཇི་ལྟར་སྣང་ཚུལ་གྱིས་དབྱེ་བ། རིགས་མཐུན་མི་མཐུན་གྱིས་དབྱེ་བ་རྣམས་སུ་ཡོད་ཅིང༌། རྒྱུ་ལས་ཀྱི་ཀུན་འབྱུང་དེ་ལ་བརྟེན་ནས་འབྲས་བུ་སྡུག་བསྔལ་ཁམས་གསུམ་དུ་ཉིང་མཚམས་སྦྱོར་རོ། ། དེའང་གོ་བདེ་བར་བརྗོད་ན། དང་པོ་ནི། འཕེན་བྱེད་དགེ་བས་འཕངས་ཀྱང་རྫོགས་བྱེད་སྡིག་པས་རྫོགས་པ། མི་དབུལ་པོ་ལྟ་བུ། འཕེན་བྱེད་སྡིག་པས་འཕངས་ཀྱང་རྫོགས་བྱེད་དགེ་བས་རྫོགས་པ། ཀླུ་འབྱོར་ལྡན་ལྟ་བུ། འཕེན་རྫོགས་གཉིས་ཀ་མི་དགེ་བས་བྱས་པ། དམྱལ་བ་ལྟ་བུ། འཕེན་རྫོགས་གཉིས་ཀ་དགེ་བས་བྱས་པ། འཁོར་ལོས་སྒྱུར་བ་ལྟ་བུ་སྟེ་བཞིའོ། ། གཉིས་པ་ནི། མཐོང་ཆོས་མྱོང་འགྱུར་ཞེས་པ་ཞིང་མཆོག་དང་བསམ་སྦྱོར་དྲག་པོས་འཕངས་པའི་ལས་མཐོང་བའི་ཆོས་འདི་ཉིད་ལ་སྨིན་པ་ལྷས་བྱིན་གྱིས་བཅོམ་ལྡན་འདས་ལ་སེན་མོས་དུག་རྩོམ་པར་གཟས་པ་ལས་དེ་ཉིད་དུ་དམྱལ་བའི་མེ་གྲུབ་པ་ལྟ་བུ། སྐྱེས་ནས་མྱོང་འགྱུར་ཞེས་པ་སྐྱེ་བ་འདིའི་ཕྱི་མར་སྐྱེས་པའི་དེ་མ་ཐག་ཏུ་རྣམ་སྨིན་མྱོང་བར་འགྱུར་བ་མཚམས་མེད་པ་དང་ཉེ་བའི་མཚམས་མེད་པ་ལྔའི་ལས་ལྟ་བུ། ལན་གྲངས་གཞན་ལ་མྱོང་འགྱུར་ཞེས་པ་སྐྱེ་བ་གསུམ་པ་ཕན་ཆད་ནས་བརྒྱ་སྟོང་གི་བར་དུ་རྣམ་སྨིན་མྱོང་བར་འགྱུར་བའི་ལས་ལྟ་བུ་སྟེ་གསུམ་མོ། ། གསུམ་པ་ནི། དེའང་ལས་དཀར་པོ་ལ་མཚོན་ན་བྱས་ལ་བསགས་པ་ཞེས་པ་དད་པས་དཀོན་མཆོག་མཆོད་པ་ལྟ་བུ། མ་བྱས་ལ་བསགས་པ་ཞེས་གཞན་གྱི་དགེ་བ་ལ་རྗེས་སུ་ཡི་རང་བ་ལྟ་བུ། བྱས་ལ་མ་བསགས་པ་ཞེས་པ་སེམས་གཡེང་བའི་བཟླས་བརྗོད་ལྟ་བུ། གཉིས་ཀ་མིན་པ་ནི་གོ་སླ་སྟེ། ལས་ནག་པོ་ལའང་ཤེས་པར་བྱའོ། ། བཞི་པ་ནི། སྤྱིར་སྤང་བྱས་འབྲས་བུ་འཕངས་ཀྱང་གཉེན་པོས་བསྒྱུར་བར་ནུས་པའི་ཕྱིར་(༢༣༡ན)གཉེན་པོའི་ལས་སྟོབས་ཆེ་བའོ། ། ལྔ་པ་ནི། ལས་མཐུན་སྣང་བ་བསགས་པ་ལས་སྣོད་ཀྱི་འཇིག་རྟེན་གྱི་སྣང་བ་ཞིང་དེའི་འགྲོ་བ་རྣམས་ལ་ཕྱོགས་གཅིག་ཏུ་འཆར་བ་ལྟ་བུ་སྣང་འགྱུར་ཐུན་མོང་བའི་ལས་དང༌། སེམས་ཅན་རང་རང་གི་ལས་སྣང་གིས་བསྒྲུབས་པའི་གནས་ལུས་ལོངས་སྤྱོད་སོ་སོར་ཐ་དད་པར་བདེ་སྡུག་ཉམས་སུ་མྱོང་བ་ལྟ་བུ་མྱོང་འགྱུར་ཐུན་མོང་མིན་པའི་ལས་གཉིས་སོ། ། དྲུག་པ་ནི། གཅིག་ཏུ་དཀར་བ་ཞེས་པ། དད་པས་བླ་མ་མཆོད་པ་ལྟ་བུ། བསམ་པ་དང་སྦྱོར་བ་གཉིས་ཀ་རིགས་མཐུན་གཅིག་ཏུ་དཀར་བས་དགེ་བའི་ལས་ལམ་རྫོགས་པ། གཅིག་ཏུ་གནག་པ་ཞེས་པ། གསོད་སེམས་ཀྱིས་སྲོག་གཅོད་པ་ལྟ་བུ། བསམ་སྦྱོར་གཉིས་ཀ་རིགས་མཐུན་གཅིག་ཏུ་གནག་པས་མི་དགེ་བའི་ལས་ལམ་རྫོགས་པ། འདྲེས་མ་ཞེས་པ། མང་པོ་སྐྱོབ་ཕྱིར་གསོད་པ་ལྟ་བུ། བསམ་པ་དཀར་ལ་སྦྱོར་བ་གནག་པ་དང༌། གསོད་ཕྱིར་སྦྱིན་པ་གཏོང་བ་ལྟ་བུ། བསམ་པ་གནག་ལ་སྦྱོར་བ་དཀར་བ་རྣམས་སོ། ། ན༣ གསུམ་པ་ཐོབ་བྱ་འགོག་པའི་བདེན་པ་བཤད་པ་ལ་གཉིས། པ༡ སྤྱི་དོན་མདོར་བསྟན། པ༢ རང་བཞིན་གཏན་ལ་དབབ་པའོ། ། པ༡ དང་པོ་ནི། ལམ་གྱི་བྲལ་ཐོབ་འགོག་པ་དེ་བཞིན་ཉིད། ། མེད་དགག་རྫས་གྲུབ་མ་གྲུབ་བྱེ་མདོས་འདོད། ། ལམ་བསྒོམས་པ་ལས་དྲི་མ་དང་བྲལ་བ་ཐོབ་པ་ནི་འགོག་པའམ་དེ་བཞིན་ཉིད་ཅེས་བྱ་སྟེ། དེའང་དགག་བྱ་དང་གྲངས་མཉམ་པའི་བཀག་པ་ཙམ་གྱི་མེད་དགག་རྫས་སུ་གྲུབ་པ་དང༌། གཉེན་པོ་བསྒོམས་པས་སྤང་བྱ་ནམ་མཁའ་ལ་འཇའ་ཡལ་བ་ལྟར་གྱུར་པའི་མེད་དགག་རྫས་སུ་མ་གྲུབ་པ་གཉིས་སུ་རིམ་བཞིན་བྱེ་སྨྲ་དང་མདོ་སྡེ་པས་འདོད་དོ། ། གཉིས་པ་[རང་བཞིན་གཏན་ལ་དབབ་པ་]ནི། རང་བཞིན་མཚན་ཉིད་ཟབ་སོགས་བཅུ་གཉིས་སོ། ། རང་བཞིན་ནི། ཆོས་མངོན་པ་ལས། འགོག་པའི་བདེན་པ་གང་ཞེ་ན། མཚན་ཉིད་དང༌། ཟབ་པ་དང༌། བརྡ་དང༌། དོན་(༢༣༡བ)དམ་པ་དང༌། ཡོངས་སུ་མ་རྫོགས་པ་དང༌། ཡོངས་སུ་རྫོགས་པ་དང༌། རྒྱན་མེད་པ་དང༌། རྒྱན་དང་བཅས་པ་དང༌། ལྷག་མ་དང་བཅས་པ་དང༌། ལྷག་མ་མེད་པ་དང༌། ཁྱད་པར་འཕགས་པ་དང༌། རྣམ་གྲངས་ཀྱིས་ཀྱང་འགོག་པའི་བདེན་པ་བསྟན་པར་རིག་པར་བྱའོ། །ཞེས་པ་ལྟར། བཅུ་གཉིས་ཀྱི་སྒོ་ནས་རྒྱས་པར་བཤད་པ་ལྟར་ལས་འདིར་མདོ་ཙམ་བཤད་ན། དེ་ལ་མཚན་ཉིད་ཀྱིས་བསྟན་པ་ཇི་ལྟ་བུ་ཞེ་ན། ཆོས་ཉིད་དེ་བཞིན་ཉིད་ལ་འགོག་པ་དང༌། ལམ་ཟག་མེད་ཀྱིས་འགོག་པ་དང༌། སྤང་བྱ་ཉོན་མོངས་མི་འབྱུང་ཞིང་འགགས་པ་སྟེ། དེའང་གཞི་གང་དུ་འགོག་པ་དང༌། ཐབས་གང་གིས་འགོག་པ་དང༌། དགག་བྱ་གང་འགོག་པ་རྣམས་ཡིན་ལ། མདོར་ན། ཆོས་དབྱིངས་རང་བཞིན་གྱིས་དག་པ་ལ་ལམ་བསྒོམས་པས་གློ་བུར་གྱི་དྲི་མ་འགག་པ་ནི་འགོག་པའི་མཚན་ཉིད་དོ། ། ཟབ་པས་ཇི་ལྟ་བུ་ཞེ་ན། འདུ་བྱེད་ཟག་བཅས་དེ་དག་གི་འཇིག་པ་མ་ཡིན་དགག་དངོས་པོར་གྱུར་པ་ལས་འགོག་པ་དེ་གཞན་ཞེས་ཀྱང་མི་བྱ་སྟེ། གཞན་ཡིན་ན་ཆོས་ཅན་དང་ཆོས་ཉིད་མ་འབྲེལ་བར་འགྱུར་བས་སོ།། གཞན་མ་ཡིན་ཞེས་ཀྱང་མི་བྱ་སྟེ། དེ་དག་མཚན་ཉིད་མི་མཚུངས་ཤིང་མཚུངས་ན་འགོག་པའང་ཀུན་ནས་ཉོན་མོངས་པ་ཅན་དུ་འགྱུར་བས་སོ། ། དེ་གཉིས་ཀ་ཡིན་ཞེས་ཀྱང་མི་བྱ་སྟེ། སྐྱོན་དེ་གཉིས་ཀར་འགྱུར་བས་སོ། ། དེ་གཉིས་ཀ་མ་ཡིན་ཞེས་ཀྱང་མི་བྱ་སྟེ། སོ་སོ་རང་གིས་རིག་པར་བྱ་བ་ཡིན་པས་གཏན་ནས་མེད་པ་མ་ཡིན་པའོ། ། དེ་ལྟར་མི་བྱ་བའི་རྒྱུ་མཚན་ཅིའི་ཕྱིར་ཞེ་ན། འགོག་པའི་བདེན་པ་ནི་མུ་བཞིའི་སྤྲོས་པ་མཐའ་དག་མེད་པའི་དབྱིངས་ཡིན་པའི་ཕྱིར་རོ། །(༢༣༢ན) བརྡས་ཇི་ལྟ་བུ་ཞེ་ན། འཇིག་རྟེན་པའི་ལམ་གྱིས་སྤང་བྱའི་ས་བོན་སྨད་ཅིང་མགོ་མནན་པས་འགོག་པ་གང་ཡིན་པ་སྟེ། དེ་ཙམ་ལའང་འགོག་པར་འདོགས་པ་འགོག་པ་དེའི་རྣམ་གྲངས་སུ་གཏོགས་པ་ལ་དགོངས་ནས། མ་ལུས་པར་འགགས་པ་དེའི་ཡན་ལག་གམ་ཆ་ཤས་ཀྱིས་མྱ་ངན་ལས་འདས་པར་གསུངས་པའོ། ། དོན་དམ་པས་ཇི་ལྟ་བུ་ཞེ་ན། འཇིག་རྟེན་ལས་འདས་པ་འཕགས་པའི་ཤེས་རབ་ཀྱིས་སྤང་བྱའི་ས་བོན་ཀུན་ཏུ་བཅོམ་སྟེ་སླར་མི་སྐྱེ་བའི་ཚུལ་གྱིས་འགོག་པ་གང་ཡིན་པའོ། ། ཡོངས་སུ་མ་རྫོགས་པས་ཇི་ལྟ་བུ་ཞེ་ན། རྒྱུན་དུ་ཞུགས་པའི་འབྲས་བུས་བསྡུས་པའི་མཐོང་སྤང་ཐམས་ཅད་འགགས་པའམ། ལན་གཅིག་ཕྱིར་འོང་བའི་འབྲས་བུས་བསྡུས་པའི་འདོད་ཁམས་ཀྱི་སྒོམ་སྤང་དྲུག་འགགས་པའམ། ཕྱིར་མི་འོང་བའི་འབྲས་བུས་བསྡུས་པའི་འདོད་ཁམས་ཀྱི་སྒོམ་སྤང་ཐམས་ཅད་འགགས་པ་ཡང་རུང་སྟེ་འཕགས་པ་སློབ་པ་རྣམས་ཀྱི་འགོག་པ་གང་ཡིན་པའོ། ། ཡོངས་སུ་རྫོགས་པས་ཇི་ལྟ་བུ་ཞེ་ན། དགྲ་བཅོམ་པའི་འབྲས་བུས་བསྡུས་པ་འཕགས་པ་མི་སློབ་པ་རྣམས་ཀྱི་སྤང་བྱ་མ་ལུས་པ་ཟད་པའི་འགོག་པ་གང་ཡིན་པའོ། ། རྒྱན་མེད་པས་ཇི་ལྟ་བུ་ཞེ་ན། ཤེས་རབ་ཀྱིས་ཉོན་སྒྲིབ་ཙམ་ལས་རྣམ་པར་གྲོལ་བའི་དགྲ་བཅོམ་པ་རྣམས་ཀྱི་འགོག་པ་གང་ཡིན་པ་སྟེ། མངོན་ཤེས་སོགས་ཀྱི་རྒྱན་མེད་པའོ། ། རྒྱན་དང་བཅས་པས་ཇི་ལྟ་བུ་ཞེ་ན། ཉོན་མོངས་པ་དང་སྙོམས་འཇུག་གི་སྒྲིབ་པ་གཉིས་ཀའི་ཆ་ལས་རྣམ་པར་གྲོལ་བ་འཆི་འཕོ་དང་སྐྱེ་བ་རིག་པ་དང་སྔོན་དང་ཕྱི་མཐའ་དང་ཟག་ཟད་ཤེས་པའི་རིག་པ་གསུམ་དང་མངོན་ཤེས་དྲུག་སོགས་ཡོན་ཏན་བརྒྱད་དང་ལྡན་པའི་དགྲ་བཅོམ་པ་རྣམས་ཀྱི་འགོག་པ་གང་ཡིན་པའོ། ། ལྷག་མ་དང་བཅས་པས་ཇི་ལྟ་བུ་ཞེ་ན། ཉོན་མོངས་ཐམས་ཅད་སྤངས་ཀྱང་། ཚེ་མ་འཕོས་པས་སྔར་གྱི་རྣམ་སྨིན་ཕུང་པོ་འདོད་གཟུགས་ན་ལྔ་དང་གཟུགས་མེད་ན་བཞིའི་ལྷག་མ་དང་བཅས་པའི་འགོག་པ་གང་ཡིན་པའོ། ། ལྷག་མ་མེད་པས་ཇི་(༢༣༢བ)ལྟ་བུ་ཞེ་ན། ཉོན་མོངས་ཐམས་ཅད་སྤངས་ཤིང་ཚེ་འཕོས་པས་རྣམ་སྨིན་ཕུང་པོའི་ལྷག་མ་མེད་པའི་འགོག་པ་གང་ཡིན་པའོ། ། ཁྱད་པར་དུ་འཕགས་པས་ཇི་ལྟ་བུ་ཞེ་ན། སངས་རྒྱས་བྱང་སེམས་རྣམས་ཀྱི་ཤེས་རབ་དང་སྙིང་རྗེ་ལ་བརྟེན་ནས་སྲིད་ཞིའི་མཐའ་གཉིས་ལ་མི་གནས་པའི་མྱང་འདས་ཀྱིས་བསྡུས་པའི་འགོག་པ་གང་ཡིན་པ་སྟེ། སེམས་ཅན་ཐམས་ཅད་ལ་མཐར་ཐུག་གི་ཕན་པ་དང་གནས་སྐབས་ཀྱི་བདེ་བའི་རྒྱུར་ཉེ་བར་གནས་པའི་ཕྱིར་རོ། ། རྣམ་གྲངས་ཀྱིས་ཇི་ལྟ་བུ་ཞེ་ན། མ་ལུས་པར་སྤངས་པ་དང༌། ངེས་པར་སྤངས་