Tibetan
གནས་སྐབས་ལ་བཏགས་པའི་བཏགས་ཡོད་ཡིན་ལ། ཉན་ཐོས་སྡེ་གཉིས་རྫས་ཡོད་དུ་འདོད་དེ་བཞིའོ། ། ཡང་ན། བཟང་པོ། ངན་པ། བར་མ། ཁ་དོག་དང་འདྲ་བ་བཞི་ལ་འདུས་སོ། ། སྒྲ་ནི་བཅུ་གཅིག་ཚན་བཞི་ཕྱེ་བས་ལྔ། ། དྲི་དྲུག་རོ་ལ་བཅུ་གཉིས་རེག་ཉེར་(༡༨༥ན)གཉིས། ། གཉིས་པ་སྒྲའི་དབྱེ་བ་ནི། ཡིད་འོང་མི་འོང་གཉིས་ཀ་མ་ཡིན་གསུམ། ། ཟིན་དང་མ་ཟིན་འབྱུང་ཆེན་རྒྱུ་ལས་བྱུང༌། ། གཉིས་ཀ་ཡིན་གསུམ་འཇིག་རྟེན་གྲགས་པ་དང༌། ། གྲུབ་པས་བསྟན་དང་ཀུན་ཏུ་བརྟགས་པ་གསུམ། ། འཕགས་དང་འཕགས་མིན་ཐ་སྙད་བཏགས་པ་གཉིས། ། ཞེས་རེ་རེ་བ་བཅུ་གཅིག །ཕན་གནོད་ཀྱིས་ཕྱེ་བ་སོགས་སྡེ་ཚན་བཞིར་ཡང་བཤད་ལ། མདོར་བསྡུ་ན། ཚོར་བ་འདྲེན་ཚུལ་གྱིས་ཕྱེ་བ་ཡིད་དུ་འོང་། མི་འོང་། བར་མ་གསུམ། སེམས་ཀྱིས་ཟིན་མ་ཟིན་གྱིས་ཕྱེ་བ་[ལས།] ཟིན་པ་གླུ་དབྱངས་སོགས། མ་ཟིན་པ་ཆུའི་སྒྲ་སོགས། གཉིས་ཀ[ས་ཕྱེ་བ་]སྐྱེས་བུས་རྔ་བརྡུང་བའི་སྒྲ་ལྟ་བུ་སོགས་གསུམ། བརྡ་དང་ཐ་སྙད་བཏགས་ཚུལ་གྱིས་ཕྱེ་བ་བུམ་སྣམ་སོགས་འཇིག་རྟེན་གྱིས་བཏགས་པ། སྟོང་པ་ཉིད་དང་བདག་མེད་སོགས་གྲུབ་པས་བརྗོད་པ། བྱེད་པོ་དང་ཟ་པོ་སོགས་མུ་སྟེགས་སོགས་ཀྱིས་ཀུན་བརྟགས་པ། རྣམ་བྱང་གི་སྒྲ་འཕགས་པས་བཏགས་པ། འཇིག་རྟེན་པའི་ཐ་སྙད་འཕགས་པ་མ་ཡིན་པས་བཏགས་པ་སྟེ་ལྔའོ། ། གསུམ་པ་དྲིའི་དབྱེ་བ་ནི། ཚོར་བ་འདྲེན་ཚུལ་གྱིས་ཕྱེ་བ་དྲི་ཞིམ་པ། ང་བ། བར་མ་གསུམ་དང༌། གནས་སྐབས་ཀྱིས་ཕྱེ་བ་ལྷན་ཅིག་སྐྱེས་པ་དང་། སྦྱར་བ་ལས་བྱུང་བ་དང་། ཡོངས་སུ་གྱུར་པ་དང་གསུམ་སྟེ་དྲུག་གོ། ། བཞི་པ་རོའི་དབྱེ་བ་ནི། ངོ་བོས་ཕྱེ་བ་མངར། སྐ། ཁ་བ་[སྟེ་]རོ་བཟང་བ་གསུམ་དང༌། སྐྱུར། ཚ། ལན་ཚ་བ་[སྟེ་]ངན་པ་གསུམ་སྟེ་དྲུག ། ཕན་གནོད་ཀྱིས་ཕྱེ་བ་ཡིད་དུ་འོང་། མི་འོང་། བར་མ་གསུམ། གནས་སྐབས་ཀྱིས་ཕྱེ་བ་ལྷན་སྐྱེས། སྦྱར་དང་། གྱུར་པ་ལས་བྱུང་བ་སྟེ་བཅུ་གཉིས་སོ། ། ལྔ་པ་རེག་བྱ་ནི། འཇམ་རྩུབ་ཡང་ལྕི་མཉེན་ལྷོད་ལྷོད་པ་མིན། ། གྲང་བཀྲེས་སྐོམ་ཚིམས་ཉམས་ལྡན་ཉམས་ཆུང་བ། ། བརྒྱལ་གཡའ་འདྲད་དང་ན་རྒ་འཆི་ངལ་བ། ། ངལ་གསོས་སྤུངས་ཆེ་བ་སྟེ་ཉེར་གཉིས་སོ། ། ཡང་ཀུན་ཏུ་བརྣབས་པས་བཞག་པ་སོགས་སྡེ་ཚན་དྲུག་ཏུའང་བཤད་ལ། (༡༨༥བ) བསྡུ་ན། ཕན་ཚུན་ཕྲད་པ་ལ་ལྟོས་ཏེ་ཕྱེ་བ་རེག་བྱ་འཇམ་རྩུབ་སོགས། ཕྱི་ནང་གི་འབྱུང་བ་ཆ་སྙོམས་མ་སྙོམས་ལ་ལྟོས་ཏེ་ཕྱེ་བ་ཚ་གྲང་བཀྲེས་སྐོམ་སོགས། གནས་སྐབས་ཀྱིས་ཕྱེ་བ་བརྒྱལ་བ་དང་གཡའ་བ་སོགས་གསུམ་མོ། ། ཕ༣ གསུམ་པ་ཆོས་ཀྱི་སྐྱེ་མཆེད་པའི་གཟུགས་བཤད་པ་ལ་གཉིས། བ༡ ངོ་བོ། བ༢ དབྱེ་བའོ། ། བ༡ དང་པོ་ནི། བསྟན་མེད་ཐོགས་མེད་ཆོས་ཀྱི་སྐྱེ་མཆེད་པའི། ། གཟུགས་ནི། ཞེས་པ་སྟེ། གང་ཞིག་ཡིད་ཀྱི་དབང་པོའི་སྤྱོད་ཡུལ་འབའ་ཞིག་ཏུ་གཟུགས་ཀྱི་རྣམ་པར་སྣང་ཞིང༌། མིག་ཤེས་ལ་བསྟན་དུ་མེད་ཅིང་རེག་པས་ཐོགས་པ་མེད་པར་གྱུར་པ་གང་ཡིན་པ་དེ་ནི་ཆོས་ཀྱི་སྐྱེ་མཆེད་པའི་གཟུགས་ཞེས་བྱའོ། ། བ༢ གཉིས་པ་[དབྱེ་བ་]ནི། བསྡུས་པ་དག་ལས་གྱུར་སོགས་ལྔ། ། ཞེས་པ་སྟེ། དེའི་དབྱེ་བ་བསྡུས་པ་ལས་གྱུར་པ་སོགས་ལྔ་ལས། དང་པོ་ནི། བསྡུས་པ་ལས་གྱུར་པའི་གཟུགས་ཡིད་ཤེས་ཀྱི་ཡུལ་དུ་རྡུལ་ཕྲ་རབ་ཏུ་སྣང་བ། གཉིས་པ་ནི། མངོན་པར་སྐབས་ཡོད་པའི་གཟུགས་ཡིད་ཤེས་ལ་བར་སྣང་དུ་སྣང་བ། གསུམ་པ་ནི། ཡང་དག་པར་བླངས་པ་ལས་བྱུང་བ་སྡོམ་པ་ཡང་དག་པར་བླངས་པའི་སྤོང་སེམས་གཏན་དུ་བའི་གཟུགས་ཏེ། འདི་ལ་ཀུན་སློང་གཞན་གྱིས་རིག་པར་བྱར་མེད་པས་རྣམ་པར་རིག་བྱེད་མ་ཡིན་པའི་གཟུགས་ཟེར། བཞི་པ་ནི། ཀུན་བརྟགས་པའི་གཟུགས་མི་གཙང་བའི་ཏིང་ངེ་འཛིན་གྱི་ཀེང་རུས་ལྟ་བུ། ལྔ་པ་ནི། དབང་འབྱོར་བའི་གཟུགས་ཟད་པར་ས་སོགས་ཀྱི་ཏིང་ངེ་འཛིན་ལས་བྱུང་བའི་ས་སོགས་ལྟ་བུ་སྟེ། འདི་ལ་ཏིང་ངེ་འཛིན་གྱི་སྤྱོད་ཡུལ་གཟུགས་བརྙན་ཟེར་ཏེ་ལྔའོ། ། དབྱེ་སྒོ་གཞན་ཡང༌། བསྟན་ཡོད་ཐོགས་བཅས་དང༌། བསྟན་མེད་ཐོགས་བཅས་དང༌། བསྟན་མེད་ཐོགས་མེད་གསུམ་དུ་དབྱེ་བ་དང༌། ཟིན་པས་བསྡུས་པ་དང༌། ཟིན་པ་མ་ཡིན་པས་བསྡུས་པ་གཉིས་སུ་དབྱེ་བ་དང༌། རྟེན་མཚུངས་དང༌། དེ་མཚུངས་ཀྱི་གཟུགས་(༡༨༦ན)གཉིས་སུ་དབྱེ་བ་སོགས་སོ། ། ན༢ གཉིས་པ་ཚོར་བའི་ཕུང་པོ་ལ་གཉིས་ཏེ། པ༡ ངོ་བོ་དང༌། པ༢ དེའི་དབྱེ་བའོ། ། པ༡ དང་པོ་ནི། རེག་པས་ཡུལ་སྤྱོད་སིམ་གདུང་བར་མ་ཅན། ། རེག་པས་ཡུལ་ཡོངས་སུ་སྤྱད་པའི་རྣམ་པར་སྨིན་པ་ས་མང་དང་གདུང་བ་དང་བར་མ་གང་རུང་ཉམས་སུ་མྱོང་བའི་བདག་ཉིད་ཅན་གྱི་སེམས་པ་སྟེ་དེའི་རིགས་མཐུན་དུ་མ་སྤུངས་པ་ལ་ཕུང་པོ་ཞེས་བྱའོ། ། པ༢ གཉིས་པ་ལ་གཉིས། ཕ༡ ངོ་བོའི་སྒོ་ནས་དབྱེ་བ། ཕ༢ མཚུངས་ལྡན་གྱི་སྒོ་ནས་དབྱེ་བའོ། ། ཕ༡ དང་པོ་ནི། འདུས་ཏེ་རེག་པའི་རྐྱེན་གྱིས་ཚོར་བ་དྲུག ། མིག་གི་འདུས་ཏེ་རེག་པའི་རྐྱེན་གྱིས་ཚོར་བ་ནས། ཡིད་ཀྱི་འདུས་ཏེ་རེག་པའི་རྐྱེན་གྱིས་ཚོར་བའི་བར་ཏེ་དྲུག་གོ། ། ཕ༢ གཉིས་པ་[མཚུངས་ལྡན་གྱི་སྒོ་ནས་དབྱེ་བ་]ནི། མཚུངས་ལྡན་སྒོ་ནས་དབྱེ་ཚུལ་རྣམ་པ་གཉིས། ། མཚུངས་ལྡན་གྱི་སྒོ་ནས་དྲུག་ཏུ་དབྱེ་བ་དང་ལྔར་དབྱེ་བ་གཉིས་སུ་ཡོད་དེ། དང་པོ་ནི། ལུས་ཚོར་དབང་ཤེས་ལྔ་དང་མཚུངས་ལྡན་དུ་བྱུང་བའི་སེམས་པ་སྟེ། རེ་རེ་ལའང་ཚོར་བ་བདེ་སྡུག་བར་མ་གསུམ་གསུམ། སེམས་ཚོར་ཡིད་ཤེས་དང་མཚུངས་ལྡན་དུ་བྱུང་བའི་ཚོར་བ། ཟང་ཟིང་དང་བཅས་པའི་ཚོར་བ་ཉེར་ལེན་གྱི་ཕུང་པོ་ལྔ་ལ་དམིགས་ནས་བདག་ཏུ་སྲེད་པ་དང་མཚུངས་ལྡན་དུ་བྱུང་བའི་སེམས་པ། ཟང་ཟིང་མེད་པའི་ཚོར་བ་དེའི་དངོས་གཉེན་དུ་གྱུར་བའི་སེམས་པ། ཞེན་པ་རྟེན་གྱི་ཚོར་བ་འདོད་ཡོན་ལྔ་ལ་སྲེད་པ་དང་མཚུངས་ལྡན་དུ་བྱུང་བའི་སེམས་པ། མངོན་པར་འབྱུང་བ་བརྟེན་པའི་ཚོར་བ་དེའི་དངོས་གཉེན་དུ་གྱུར་པའི་སེམས་པ་སྟེ་དྲུག་གོ། ། གཉིས་པ་ནི། རྣམ་ཤེས་ལྔ་དང་མཚུངས་ལྡན་གྱི་སིམ་པ་བདེ་བ། ཡིད་ཤེས་དང་མཚུངས་ལྡན་གྱི་སིམ་པ་ཡིད་བདེ། རྣམ་ཤེས་དང་མཚུངས་ལྡན་གྱི་གདུང་བ་སྡུག་བསྔལ། ཡིད་ཤེས་དང་མཚུངས་ལྡན་གྱི་གདུང་བ་ཡིད་མི་བདེ། སིམ་གདུང་གཉིས་ཀ་མེད་པ་བཏང་སྙོམས་ཏེ་ལྔའོ། ། ན༣ གསུམ་པ་འདུ་ཤེས་ཀྱི་ཕུང་པོ་ལ་གཉིས་ཏེ། པ༡ ངོ་བོ་དང༌། པ༢ དེའི་དབྱེ་བའོ། ། པ༡ དང་པོ་ནི། འདུས་ཏེ་ཤེས་པས། (༡༨༦བ) ཞེས་པ་སྟེ། རྐྱེན་གསུམ་མམ་བཞི་རྣམས་འདུས་ཏེ་ཤེས་པར་བྱེད་པས་ཡུལ་གྱི་ཁྱད་པར་རམ། སྤུ་རིས་སམ། མཚན་མ་མ་འདྲེས་པར་སོ་སོར་འཛིན་པའི་བདག་ཉིད་ཅན་གྱི་སེམས་པའོ། ། པ༢ གཉིས་པ་[དབྱེ་བ་]ལ་གཉིས། ཕ༡ ངོ་བོའི་སྒོ་ནས་དབྱེ་བ། ཕ༢ གནས་སྐབས་སམ་དམིགས་པའི་སྒོ་ནས་དབྱེ་བའོ། ། ཕ༡ དང་པོ་ནི། ངོ་བོའི་འདུ་ཤེས་དང༌། ། ཞེས་པ་སྟེ། མིག་གི་འདུས་ཏེ་རེག་པའི་འདུ་ཤེས་ནས་རྣ་བའི་འདུས་ཏེ་རེག་པའི་འདུ་ཤེས་ཀྱི་བར་དྲུག་གོ།། ཕ༢ གཉིས་པ་[གནས་སྐབས་སམ་དམིགས་པའི་སྒོ་ནས་དབྱེ་བ་]ནི། མཚན་མ་མེད་སོགས་ས་ཡིས་བསྡུས་པ་དྲུག ། དེ་ལ་མཚན་མ་མེད་པའི་འདུ་ཤེས་ནི། ཐ་སྙད་ལ་མི་མཁས་པ་དེ་བཞིན་ཉིད་ལ་སྙོམས་པར་ཞུགས་དུས་ཀྱི་འདུ་ཤེས་དང༌། སྲིད་རྩེའི་སྙོམས་འཇུག་གི་སས་བསྡུས་པའི་འདུ་ཤེས་ནི། མཚན་མ་དང་བཅས་པའི་འདུ་ཤེས། དེ་ལས་གཞན་པའི་ཁམས་གསུམ་གྱི་སས་བསྡུས་པའི་འདུ་ཤེས་ཐམས་ཅད། ཆུང་ངུའི་འདུ་ཤེས་ནི། འདོད་པའི་སས་བསྡུས་པའི་འདུ་ཤེས། ཆེན་པོའི་འདུ་ཤེས་ནི། གཟུགས་ཁམས་ཀྱི་སས་བསྡུས་པའི་འདུ་ཤེས། ཚད་མེད་པའི་འདུ་ཤེས་ནི། ནམ་མཁའ་མཐའ་ཡས་དང་རྣམ་ཤེས་མཐའ་ཡས་སྐྱེ་མཆེད་ཀྱིས་བསྡུས་པའི་འདུ་ཤེས། ཅི་ཡང་མེད་པའི་འདུ་ཤེས་ནི། ཅི་ཡང་མེད་པའི་སས་བསྡུས་པའི་འདུ་ཤེས་ཏེ་དྲུག་གོ། ། ན༤ བཞི་པ་འདུ་བྱེད་ཀྱི་ཕུང་པོ་ལ་གཉིས་ཏེ། པ༡ ངོ་བོ་དང༌། པ༢ དེའི་དབྱེ་བའོ། ། པ༡ དང་པོ་ནི། དམིགས་པར་འདུ་བྱེད། ཅེས་པ་སྟེ། རྐྱེན་རྣམས་ཚོགས་ཤིང་འདུས་པས་སེམས་ཡུལ་ལ་མ་དམིགས་པ་ལ་མངོན་པར་འདུ་བྱེད་པ་དང་ཡུལ་སྣ་ཚོགས་ལ་གཡོ་ཞིང་སྒུལ་བར་བྱེད་པའི་བདག་ཉིད་ཅན་གྱི་སེམས་པའོ། ། པ༢ གཉིས་པ་[དབྱེ་བ་]ལ་གཉིས། ཕ༡ ངོ་བོ་དང༌། ཕ༢ གནས་སྐབས་ཀྱི་སྒོ་ནས་དབྱེ་བའོ། ། ཕ༡ དང་པོ་ནི། ངོ་བོ་དྲུག་ཡིན་ལ། ། ཞེས་པ་སྟེ། མིག་གི་འདུས་ཏེ་རེག་པ་ལས་བྱུང་བའི་སེམས་དམིགས་པ་ལ་མངོན་པར་འདུ་བྱེད་པ་ནས་ཡིད་ཀྱི་འདུས་ཏེ་རེག་པ་ལས་བྱུང་བའི་སེམས་དམིགས་པ་ལ་(༡༨༧ན)མངོན་པར་འདུ་བྱེད་པའི་བར་རོ། ། འདི་ལ་མཁས་པ་དག་སེམས་བྱུང་སེམས་པ་ཞེས་ཐ་སྙད་བྱེད་དོ། ། ཕ༢ གཉིས་པ་[གནས་སྐབས་ཀྱི་སྒོ་ནས་དབྱེ་བ་]ལ་གཉིས། བ༡ མདོར་བསྟན། བ༢ རྒྱས་བཤད་དོ། ། བ༡ དང་པོ་ནི། གནས་སྐབས་སེམས་དང་མཚུངས་ལྡན་མི་ལྡན་གཉིས། ། གནས་སྐབས་ཀྱི་སྒོ་ནས་དབྱེ་བ་ལ། སེམས་དང་མཚུངས་ལྡན་གྱི་འདུ་བྱེད་དང༌། མཚུངས་པར་ལྡན་པ་མ་ཡིན་པའི་འདུ་བྱེད་རྣམ་པ་གཉིས་སུ་ཡོད་དོ། ། བ༢ གཉིས་པ་རྒྱས་བཤད་ལ་གཉིས། མ༡ མཚུངས་ལྡན་དང༌། མ༢ མཚུངས་ལྡན་མ་ཡིན་པའི་འདུ་བྱེད་དོ། ། མ༡ དང་པོ་ལ་གཉིས། ཙ༡ སེམས་སེམས་བྱུང་ཐུན་མོང་དུ་བསྟན་པ། ཙ༢ སེམས་ལས་བྱུང་བ་ཁྱད་པར་དུ་བཤད་པའོ། ། ཙ༡ དང་པོ་ལ་གསུམ། ཚ༡ རང་གི་ངོ་བོ་ངོས་བཟུང༌། ཚ༢ གཅིག་དང་ཐ་དད་བརྟག་པ། ཚ༣ གཙོ་འཁོར་ངེས་པར་བྱ་བའོ། ། ཚ༡ དང་པོ་ལ་གཉིས། ཛ༡ མཚན་ཉིད་ཀྱི་ཁྱད་པར། ཛ༢ མཚུངས་ལྡན་གྱིས་བསྟན་པའོ། ། དང་པོ་ནི། དེ་ཡང་སེམས་ནི་དོན་གྱི་ངོ་བོ་དང༌། ། སེམས་བྱུང་དོན་གྱི་ཁྱད་པར་རིག་པ་སྟེ། ། སྤྱིར་སེམས་དང་སེམས་བྱུང་ཞེས་བྱ་བའི་མཚན་ཉིད་གང་ཞེ་ན། དེའང་གཟུགས་སྒྲ་སོགས་ཆོས་ཅན་རྟེན་ལྟ་བུར་སྣང་བ་ནི་དོན་གྱི་ངོ་བོ་ཡིན་ལ། དེ་རྣམས་དམིགས་པར་བྱེད་པ་རྣམ་པར་ཤེས་པའི་ཚོགས་བརྒྱད་ནི་སེམས་ཡིན་ཞིང༌། བདེ་སྡུག་གི་གནས་ཡིད་དུ་འོང་མི་འོང་སོགས་དངོས་པོ་དེའི་ཆོས་བརྟེན་པ་ལྟ་བུར་སྣང་བ་ནི་དོན་གྱི་ཁྱད་པར་ཡིན་ལ། དེ་རྣམས་དམིགས་པར་བྱེད་པ་ཚོར་བ་སོགས་ལྔ་བཅུ་རྩ་གཅིག་ནི་སེམས་ལས་བྱུང་བ་ཡིན་ནོ། ། དེས་ན་སེམས་ནི་དོན་གྱི་ངོ་བོ་རིག་པར་བྱེད་པ་ཡིན་ལ། སེམས་བྱུང་ནི་དོན་གྱི་ཁྱད་པར་རིག་པར་བྱེད་པ་དབུས་མཐའ་ལས་གསུངས་སོ། ། གཉིས་པ་[མཚུངས་ལྡན་གྱིས་བསྟན་པ་]ནི། གནས་སོགས་མཚུངས་ལྔས་སེམས་ཀྱི་རྗེས་སུ་འབྲངས། ། གཙོ་བོ་སེམས་དང་འཁོར་སེམས་བྱུང་གཉིས་ཕན་ཚུན་མི་བྲལ་བ་དོན་རྣམ་པ་ལྔས་ལྷན་ཅིག་མཚུངས་པར་ལྡན་པ་ཕུང་པོ་ལྔ་པོ་དང་བློ་(༡༨༧བ)བརྟན་གྱི་འགྲེལ་པ་ལས་བཤད་དེ། དེའང་། གནས་སམ་རྟེན་དང༌། སོགས་ཁོངས་ནས། དམིགས་པ་དང་། རྣམ་པ་དང་། དུས་དང་། རྫས་མཚུངས་པ་རྣམ་པ་ལྔས་སེམས་བྱུང་རྣམས་སེམས་ཀྱི་རྗེས་སུ་འབྲང་བའོ། ། དེ་ལ་དང་པོ་རྟེན་མཚུངས་ནི། གཙོ་འཁོར་གཉིས་ཀ་དབང་པོ་གཅིག་ལ་བརྟེན་པ་སྟེ། མིག་ཤེས་མིག་དབང་ལ་བརྟེན་པ་ན་དེའི་འཁོར་ཚོར་བ་ཡང་དེ་ལ་བརྟེན་པ་ལྟ་བུའོ། ། གཉིས་པ་དམིགས་མཚུངས་ནི། ཡུལ་གཅིག་ལ་དམིགས་པ་སྟེ། མིག་ཤེས་གཟུགས་ལ་དམིགས་པ་ན་ཚོར་བའང་དེ་ལ་དམིགས་པ་ལྟ་བུའོ། ། གསུམ་པ་རྣམ་མཚུངས་ནི། འཛིན་སྟངས་ཀྱི་གཟུང་ཆ་གཅིག་པ་སྟེ། མིག་ཤེས་སྔོན་པོའི་རྣམ་པ་ཅན་དུ་སྐྱེས་པ་ན་ཚོར་བའང་དེར་སྐྱེས་པ་ལྟ་བུའོ། ། བཞི་པ་དུས་མཚུངས་ནི། དུས་ཅིག་ཅར་འབྱུང་བ་སྟེ། མིག་ཤེས་ནམ་བྱུང་བ་ན་ཚོར་བའང་འབྱུང་བ་ལྟ་བུའོ། ། ལྔ་པ་རྫས་མཚུངས་ནི། རིགས་འདྲ་གྲངས་མཉམ་པ་སྟེ། མིག་ཤེས་རྫས་གཅིག་ཡིན་པ་ན་དེའི་འཁོར་ཚོར་བའང་རྫས་གཅིག་ཁོ་ན་ཡིན་པ་ལྟ་བུའོ། ། འདིར་རྣམ་པ་དང་དུས་མཚུངས་འགལ་བ་སོགས་ཀྱི་དོགས་སྤོང་ནི་མ་སྨོས་པས་གཞུང་རྣམས་ལས་ཤེས་པར་བྱའོ། ། ཚ༢ གཉིས་པ་གཅིག་དང་ཐ་དད་བརྟགས་པ་ནི། གཅིག་ཏུའང་བཞེད་རུང་ལུགས་འདིར་ཐ་དད་དོ། ། སེམས་སེམས་བྱུང་རྫས་གཅིག་གམ་ཐ་དད་ཅེ་ན། བྱང་ཆུབ་སེམས་དཔའ་གཅིག་པུར་སྨྲ་བ་སོགས་དང༌། དཔལ་ཆོས་ཀྱི་གྲགས་པས་ནི་དེ་གཉིས་རྫས་གཅིག་ཏུ་བཞེད། སློབ་དཔོན་ཟླ་བ་གྲགས་པས་ཐ་དད་དུ་བཤད་པ་སོགས་མཆིས་རུང༌། ལུགས་འདིར་འཕགས་པ་ཐོགས་མེད་ཀྱིས་སེམས་དང་སེམས་བྱུང་རྫས་ཐ་དད་པར་མེད་ན་ཕུང་པོ་ལྔའི་རྣམ་བཞག་མི་འཐད་པ་སོགས་སྐྱོན་དྲུག་ཡོད་པར་གསུངས་པ་ལྟར་དེའི་རྗེས་སུ་འབྲང་དགོས་ལ། དེ་ལྟར་ཐ་དད་ཀྱང་གཟུགས་ཅན་གྱི་དངོས་པོ་ལྟར་འདིའོ། །ཞེས་ལོགས་སུ་བསྟན་དུ་མེད་པས་ཁྱད་པར་དཔྱད་དཀའ་ཡང་དབང་པོ་གཟུགས་དང་(༡༨༨ན)བ་ལ་འཇོག་པ་ལྟར་ཡིད་ཆེས་པའི་ལུང་རིགས་ལ་བརྟེན་ནས་ཤེས་པར་བྱའོ། ། ཚ༣ གསུམ་པ་གཙོ་འཁོར་ངེས་པར་བྱ་བ་ནི། ཀུན་གཞི་ཀུན་འགྲོ་ཉོན་ཡིད་དེ་ལྔ་དང༌། ། རྩ་ཉོན་བཞི་དང་ཉེ་བའི་ཉོན་མོངས་དྲུག ། འཇུག་པའི་རྣམ་ཤེས་འཁོར་དུ་ཀུན་ཀྱང་འབྱུང༌། ། འདི་ནི་གཙོ་བོ་རྣམ་ཤེས་ཚོགས་བརྒྱད་སྡེ་ཚན་གསུམ་དུ་བྱས་པའི་ཁོངས་སུ་སེམས་བྱུང་ལྔ་བཅུ་རྩ་གཅིག་པོ་གང་དང་གང་འབྱུང་ཚུལ་བརྩི་བ་ཡིན་ལ། དེའང་ཀུན་གཞིའི་འཁོར་དུ་ཀུན་འགྲོ་ལྔ། ཉོན་ཡིད་ཀྱི་འཁོར་དུ་དེ་ལྔ་དང་། རྩ་ཉོན་དྲུག་གི་ནང་ནས། འདོད་ཆགས། ང་རྒྱལ། མ་རིག་པ། འཇིགས་ཚོགས་ལ་ལྟ་བ་བཞི། ཉེ་བའི་ཉོན་མོངས་པ[འི་ནང་ནས།] གཡེང་བ། བག་མེད། རྒོད་པ། མ་དད་པ། ལེ་ལོ། རྨུགས་པ་དྲུག་འབྱུང་ལ། གཞན་རྣམས་མི་འབྱུང་བ་ནི་ངོ་བོ་དང་དམིགས་རྣམ་སོགས་མི་མཚུངས་པའི་ཕྱིར་རོ། ། འཇུག་པའི་རྣམ་ཤེས་ལ་ལྟ་འདོད་མེད་པར་གཟུགས་མཐོང་བ་ལྟ་བུ་རྐྱེན་ཉེར་གནས་དང༌། ལྟ་འདོད་ཡོད་པས་མཐོང་བ་ལྟ་བུ་ཡིད་སྔོན་སོང་གཉིས་ལས། དང་པོའི་འཁོར་དུ་ཀུན་འགྲོ་ལྔ་ལས་མི་འབྱུང་སྟེ། གཞན་འབྱུང་ལོང་མེད་པའི་ཕྱིར་རོ། ། གཉིས་པ་ལ་སྒོ་ལྔ་དགེ་བའི་འཁོར་དུ་དང་པོ་ཉེར་གཅིག །རྟོག་དཔྱོད་གཉིས་ཏེ་ཉེར་གསུམ། དེ་ཉོན་མོངས་ཅན་གྱི་འཁོར་དུ་དང་པོ་བཅུ་དང་། རྩ་ཉོན་གྱི་དུག་གསུམ་དང་། ཉེ་ཉོན་གྱི་བཅུ་ཚན་ཕྱི་མ་དང་། རྟོག་དཔྱོད་གཉིས་ཏེ། ཉེར་ལྔ་འབྱུང་ངོ༌། ། དེ་ལུང་མ་བསྟན་གྱི་འཁོར་དུ་དང་པོ་བཅུ་དང་རྟོག་དཔྱོད་དེ་བཅུ་གཉིས་འབྱུང་ངོ༌། ། ཡིད་ཤེས་དགེ་བའི་འཁོར་དུ་འདོད་ཁམས་སུ་དང་པོ་ཉེར་གཅིག་དང་གཞན་འགྱུར་བཞི་སྟེ་ཉེར་ལྔ་འབྱུང༌། དེ་ཉོན་མོངས་ཅན་གྱི་འཁོར་དུ་དགེ་བ་བཅུ་གཅིག་མ་གཏོགས་ཐམས་ཅད་འབྱུང༌། དེ་ལུང་མ་བསྟན་གྱི་འཁོར་དུ་དང་པོ་བཅུ་དང་ཕྱི་མ་བཞི་འབྱུང་སྟེ། མདོར་ན། སེམས་བྱུང་ཀུན་ཀྱང་གནས་སྐབས་ལ་ལྟོས་ནས་འབྱུང་བ་ཡིན་ནོ། ། དེ་རྣམས་ཀྱི་རྒྱུ་མཚན་ནི་རང་རང་གི་མཚན་ཉིད་ལས་བརྩམས་ཏེ་དཔྱད་(༡༨༨བ)པས་ཤེས་སོ། ། ཙ༢ གཉིས་པ་སེམས་ལས་བྱུང་བ་ཁྱད་པར་དུ་བཤད་པ་ལ་གཉིས། ཚ༡ རྫས་དང་བཏགས་པའི་ཁྱད་པར། ཚ༢ སོ་སོའི་དབྱེ་བ་བཤད་པའོ། ། ཚ༡ དང་པོ་ནི། རྫས་ཡོད་ཉེར་གཉིས་བཏགས་ཡོད་ཉི་ཤུ་དགུ། ། དེ་དག་བཞི་ལས་རང་རྐྱ་ཐུབ་དང་ཆ། ། སེམས་བྱུང༌། ཞེས་པ་སྟེ། སྤྱིར་རྫས་ཡོད་དང་བཏགས་ཡོད་ཀྱི་འཇོག་ཚུལ་ལ་གསུང་རབ་རྣམས་ནས། དོན་བྱེད་ནུས་པ་དང༌། རིགས་པས་གྲུབ་པ་དང༌། རྒྱུན་བརྟན་པ་དང༌། རང་རྐྱ་ཐུབ་པ་ལ་རྫས་ཡོད་དུ་བྱས་པ་སྟེ་བཞི་ཡོད་པ་ལས། འདིར་ནི་ཕྱི་མ་ཁོ་ན་རྫས་ཡོད་དུ་འཇོག་སྟེ། རང་རྐྱ་ཐུབ་པའི་དོན་ཁོའི་དོན་སྤྱི་འཆར་བ་གཞན་གྱི་དོན་སྤྱི་འཆར་བ་ལ་མ་ལྟོས་པ་ཞིག་ཡིན་པ་ལྟར་རོ། ། གཞན་དུ་ན། ཐམས་ཅད་ཀྱང་དོན་བྱེད་ནུས་པ་དང་རིགས་པས་གྲུབ་པའི་ཕྱིར་རྫས་ཡོད་དུ་ཐལ་ཞིང༌། འཇིགས་ལྟའང་རྒྱུན་བརྟན་པའི་ཕྱིར་དེར་ཐལ་བར་འགྱུར་རོ། ། དེ་བཞིན་དུ་བཏགས་ཡོད་ཀྱང་བཞི་ལས། གནས་སྐབས་ལ་བཏགས་པ་ལྡན་མིན་འདུ་བྱེད་ལྟ་བུ་དང༌། མེད་བཞིན་དུ་སྒྲོ་བཏགས་པ་བདག་དང་རི་རྭ་ལྟ་བུ་དང༌། དེ་ལས་གཞན་ལ་བཏགས་པ་བུམ་པ་ལྟ་བུ། ཆ་ལ་བཏགས་པ་གདགས་གཞིའི་ཆོས་ཀྱི་དུམ་བུ་མ་དོར་བ་སྟེ། སློབ་དཔོན་བློ་བརྟན་གྱིས་གང་ཞིག་རང་གི་རྒྱུད་ལོགས་སུ་གྲུབ་པ་རྫས་ཡོད་དང་དེར་མ་གྲུབ་པ་བཏགས་ཡོད་དུ་བཤད་པ་ལྟར་རོ། ། དེ་ལ་རྫས་ཡོད་ནི། ལྔ་ཚན་དང་པོ་གཉིས་དང༌། གཏི་མུག་མེད་པ་དང་བག་ཡོད་དང་བཏང་སྙོམས་དང་རྣམ་པར་མི་འཚེ་བ་མ་གཏོགས་པའི་དགེ་བ་བདུན་དང༌། ལྟ་བ་མ་གཏོགས་ཉོན་མོངས་ལྔ་དང་ཉེར་གཉིས་ཏེ། གཞན་ལ་མ་ལྟོས་པར་རང་རྐྱ་ཐུབ་པའི་ཕྱིར་རོ། ། བཏགས་ཡོད་ནི། དག་པ་ལྷག་བཞི་དང་ལྟ་བ་དང་ཉེ་ཉོན་ཉི་ཤུ་དང་གཞན་འགྱུར་བཞི་དང་ཉེར་དགུ་སྟེ། རང་གི་ངོ་བོ་བློ་ཡུལ་དུ་འགྱུར་བ་གདགས་གཞིའི་ཆོས་ངེས་པ་ལ་ལྟོས་པའི་ཕྱིར་རོ། ། མདོར་ན། རྫས་བཏགས་དེ་དག་གོང་སྨོས་ལྟར་བཞི་(༡༨༩ན)བཞིར་ཡོད་པ་ལས། འདིར་ནི་རང་རྐྱ་ཐུབ་པའི་རྫས་ཡོད་དང་ཆ་ལས་བཏགས་པའི་བཏགས་ཡོད་གཉིས་ལ་བཟུང་ངོ༌། ། འདིར་གྲངས་ངེས་དང་གོ་རིམ་ནི་བརྗོད་འདོད་ཀྱི་དབང་གིས་བཞག་པ་ཡིན་གྱི། ངེས་པ་མེད་དེ། ལུང་ཕྲན་ཚེགས་ལས་སེམས་བྱུང་ལྔ་བཅུ་རྩ་བདུན་དང༌། སྔགས་གཞུང་དུ་རང་བཞིན་བརྒྱད་ཅུས་མཚོན། གཞན་ལས་གཞན་དག་འབྱུང་བའི་ཕྱིར་རོ། ། དེ་དག་ཀྱང་སེམས་ལ་རགས་ལས་ཤིང་སེམས་ལས་སྐྱེས་པའམ། སེམས་ལས་འཐོན་ཅིང་སེམས་ལ་བརྟེན་ནས་བྱུང་བས་སམ། ཡང་ན། ཆུ་བོའི་རླབས་ཆུ་བོའི་རྣམ་