Tibetan
མེད་པར་ལྟ་བ་སོགས་ལོག་ལྟའི་གཉེན་པོ་འཇིག་རྟེན་པའི་ཡང་དག་པའི་ལྟ་བས་ཟིན་པ་གལ་ཆེ་སྟེ། བཤེས་སྤྲིང་ལས། གལ་ཏེ་མཐོ་རིས་ཐར་པ་མངོན་བཞེད་ན། ། ཡང་དག་ལྟ་ལ་གོམས་པ་ཉིད་དུ་མཛོད། ། གང་ཟག་ལོག་པར་ལྟ་བས་ལེགས་སྤྱད་ཀྱང༌། ། ཐམས་ཅད་རྣམ་པར་སྨིན་པ་མི་བཟད་ལྡན། ། ཞེས་གསུངས་པའི་ཕྱིར་རོ། ། དེ་རྗེས་བླང་དོར་གྱི་གནས་མ་འཛོལ་བའི་ཚུལ་ཁྲིམས་ལ་གནས་པ་གལ་ཆེ་སྟེ། རྩ་ཤེ་ལས། ཚུལ་ཁྲིམས་ཀྱིས་ནི་བདེ་འགྲོ་ཐོབ། ། ཅེས་དང༌། འཇུག་པ་ལས། མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། ། ཅེས་གསུངས་པས་སོ། ། ཐེག་པ་འདིའི་ཚུལ་ཁྲིམས་ལ་ཅུང་ཟད་དབྱེ་ན། སྤྱིར་ངོ་ཚ་ཁྲེལ་ཡོད་ཀྱིས་ཀུན་ནས་བསླངས་ཏེ་ལུས་ངག་གི་བྱ་བ་ཡ་རབས་ཀྱི་ཚུལ་དང་མཐུན་པའི་སྤྱོད་པ་གསུམ་ལ་བསླབ་དགོས་ཏེ། དམ་པའི་རྒྱན་ལས། བཀུར་བར་འོས་པ་ལེགས་ཁུར་ཞིང༌། ། མགོན་མེད་རྣམས་ལ་ལྷག་པར་བྱམས། ། བྱས་ལ་དྲིན་ལན་མི་བརྗེད་པ། ། དམ་པ་རྣམས་ཀྱི་མཛད་སྤྱོད་ཡིན། ། ཞེས་གསུངས་པ་ལྟར་རོ། ། བྱེ་བྲག་མི་ཆོས་བཅུ་དྲུག་ལ་བསླབ་སྟེ། འབྱེད་པ་ལེ་ཆུང་ལས། དཀོན་མཆོག་གསུམ་ལ་དད་པ་སྐྱོ་ངལ་མེད་པར་བྱེད་པ་དང༌། དོན་དམ་པར་དམ་པའི་ཆོས་བཙལ་བ་དང༌། གཙུག་ལག་བཟང་པོ་ལ་མཁས་པར་སློབ་པ་དང༌། ཅི་ལའང་རན་ཅིང་ཚོད་ཟིན་པའི་བྱ་བ་དང༌། མ་བཅོལ་བའི་ལས་ལ་གཏོགས་འདོད་མི་བྱེད་པ་དང༌། མིག་མཐོ་སར་བལྟ་ཞིང་གོང་མ་རྣམས་ཀྱི་རྗེས་སྙེག་པ་དང༌། དུས་གསུམ་གྱི་ཕ་མ་ལ་དྲིན་ལན་བསླན་པ་དང༌། ཕུ་ནུ་དང་ཕ་ཚན་ནང་དུ་ཤོངས་ཡངས་ཆེ་བ་དང༌། རིམ་པས་རྒན་པ་ལ་བཀུར་སྟི་བྱ་བ་དང༌། ཁྱིམ་མཚེས་ལ་བྱམས་པར་བྱ་བ་དང༌། གཉེན་གྲོགས་ཀྱི་དགེ་བཤེས་ལ་དཀའ་ལས་ཀྱིས་ཕན་འདོགས་པ་དང༌། སྲིད་ཀྱིས་འབྲེལ་བའི་(༡༧༧ན)ཉེ་རིང་ལ་ཆབ་གང་མཐར་དབྱུང་བ་དང༌། རིག་བྱེད་འབྲེལ་མཁས་པས་གཞན་ལ་ཕན་པ་དང༌། ལྟོས་པའི་མི་དྲིན་གྱིས་སྐྱབས་འོག་ཏུ་གཞུག་པ་དང༌། ངན་བྱེད་ཀྱི་གྲོས་བཀག་ནས་རྒྱལ་ཁམས་བདེ་ཡངས་ཀྱི་གྲོས་གཞི་འདིང་བ་དང༌། ལས་མཐའ་ཆོས་ལ་གཏད་དེ་ཕྱི་མར་བུ་སྨད་ཀྱིས་བྱང་ཆུབ་ཀྱི་གཞི་ཐོབ་པར་བྱའོ། །ཞེས་བཤད་པ་ལྟར་མིའི་ཆོས་ལུགས་གཙང་མ་ལ་བསླབ་བོ། ། ཁྱད་པར་གོང་དུ་སྨོས་པ་ལྟར། སྲོག་གཅོད་པ་སོགས་མི་དགེ་བ་བཅུ་དངོས་དང་བརྒྱུད་ནས་སྤོང་ཞིང་སྲོག་སྦྱིན་སྩལ་བ་སོགས་དགེ་བ་བཅུ་ཅི་ནུས་སུ་བསྒྲུབ་པ་སྟེ། ལྟ་སྒོམ་སྤྱོད་པ་དེ་དག་ཀྱང་ལས་འདྲེས་མ་དང་འཕེན་རྫོགས་མུ་མི་མཐུན་པ་ནི་དམན་པ། དགེ་བའི་ལས་ལམ་རྫོགས་པ་འབྲིང༌། དགེ་བཅུའི་ལས་འཁོར་བཅས་སྡོམ་པའི་ངོ་བོ་ཉིད་དུ་བསྡོམས་པ་མཆོག་སྟེ། རིམ་པ་བཞིན་མཐོ་རིས་རྣམས་སུ་སྐྱེས་པ་ན། རྣམ་སྨིན། རྒྱུ་མཐུན། བདག་པོ་རྣམས་ཀྱི་སྒོ་ནས་མཆོག་དམན་བར་མ་གསུམ་གྱི་འབྲས་བུ་བཟང་པོ་འཐོབ་པར་འགྱུར་རོ། ། ཐ༣ གསུམ་པ་[ཚངས་པའི་ཐེག་པ་སོ་སོར་བཤད་པ་]ལ་གཉིས། ད༡ ཐེག་པ་ངོས་བཟུང་བ། ད༢ ལམ་དངོས་བཤད་པའོ། ། ད༡ དང་པོ་ནི། (༡༧༧བ) གོང་མའི་ཁམས་ལ་བགྲོད་བྱེད་ཚངས་པའི་ཐེག ། འདི་ལ་ཅིའི་ཕྱིར་ཚངས་པའི་ཐེག་པ་ཞེས་བྱ་ཞེ་ན། འདོད་པའི་ཉོན་མོངས་པས་གཙང་བའམ་དག་ཅིང་ཚངས་པས་ན་ཚངས་པ་དང་དེར་བགྲོད་པའི་དབང་གིས་ཐེག་པ་ཞེས་བརྗོད་ལ། དེའི་ཕྱིར་སྒྲ་ཡངས་པའི་དབང་དུ་བྱས་ན་འཕགས་པ་རྣམ་གྲོལ་སྡེས་བཤད་པ་ལྟར་ཁམས་གོང་མ་གཉིས་ཀྱི་སས་བསྡུས་པ་ཐམས་ཅད་ལ་ཚངས་པའི་སྒྲས་བརྗོད་ཅིང་། དེར་བགྲོད་པར་བྱེད་པའི་ལམ་འཁོར་བཅས་ལ་ཚངས་པའི་ཐེག་པ་ཞེས་བྱའོ། ། ད༢ གཉིས་པ་ལམ་དངོས་ལ་གཉིས་ཏེ། ན༡ གཟུགས་ཁམས་ཀྱི་བསམ་གཏན་བཞི་བཤད་པ་དང༌། ན༢ གཟུགས་མེད་ཁམས་ཀྱི་སྙོམས་འཇུག་བཞི་བཤད་པའོ། ། ན༡ དང་པོ་ལ་གཉིས། པ༡ མདོར་བསྟན། པ༢ རྒྱས་བཤད་དོ། ། པ༡ དང་པོ་ནི། གཟུགས་ཁམས་བསམ་གཏན་བཞི་སྟེ་རྒྱུ་འབྲས་གཉིས། ། གཟུགས་ཁམས་བསམ་གཏན་དང་པོ། གཉིས་པ། གསུམ་པ། བཞི་པ་རྣམས་སུ་ཡོད་དེ། དེ་རེ་རེ་ལའང་རྒྱུ་དང་འབྲས་བུ་གཉིས་ཟུང་རེའི་ཚུལ་དུ་ཡོད་དོ། ། པ༢ གཉིས་པ་[རྒྱས་བཤད་]ལ་གཉིས། ཕ༡ རྒྱུ་སྙོམས་འཇུག་གི་བསམ་གཏན་དང༌། ཕ༢ འབྲས་བུ་སྐྱེ་བའི་བསམ་གཏན་ནོ། ། ཕ༡ དང་པོ་ལ། བ༡ བསམ་གཏན་དང་པོ་ནས་བཞི་པའི་བར་རོ། ། བ༡ དང་པོ་ལ་གཉིས། མ༡ ཉེར་བསྡོགས་དང༌། མ༢ དངོས་གཞིའོ། ། མ༡ ཉེར་བསྡོགས་ལའང་གཉིས། ཙ༡ ཞི་གནས་དང༌། ཙ༢ ལྷག་མཐོང་ངོ༌། ། ཙ༡ དང་པོ་ནི། རྒྱུ་ལ་ཉེར་བསྡོགས་ཞི་གནས་ཏིང་ངེ་འཛིན། ། འཇོག་དང་རྒྱུན་འཇོག་བསླན་འཇོག་ཉེ་བར་འཇོག ། འདུལ་དང་ཞི་དང་རྣམ་ཞི་རྩེ་གཅིག་བྱེད། ། མཉམ་འཇོག་མཐའ་དགུས་ལུས་སེམས་ཤིན་ཏུ་སྦྱངས། ། བསམ་གཏན་རང་སའི་འབྲས་བུ་ཐོབ་བྱེད་དངོས་གཞིར་སྙོམས་པར་འཇུག་ནུས་པའི་ཐབས་སུ་ཐོག་མར་རྒྱུ་བསྒྲུབ་པ་ལ་ཉེར་བསྡོགས་སེམས་ཞི་བར་གནས་པའི་ཐབས་དགུས་ཏིང་ངེ་འཛིན་སྒྲུབ་པར་གསུངས་ཏེ། དེ་ལ་ནང་ཉིད་དུ་སེམས་འཇོག་པ་ཞེས་པ་ནི། སེམས་ཕྱི་རོལ་དུ་གཡེང་བ་མིན་པར་གསེར་ལྟར་དང་བའི་སྐུར་སྣང་བ་སོགས་ཏིང་ངེ་འཛིན་གྱི་སྤྱོད་ཡུལ་གྱི་གཟུགས་བརྙན་དམིགས་པ་ལ་ཡིད་གཏད་དེ་འཇོག་པ་དང༌། རྒྱུན་དུ་འཇོག་པ་ཞེས་པ་ནི། དམིགས་པ་ལ་སེམས་འཇོག་པ་ཙམ་དུ་མ་ཟད་རྒྱུན་བསྲིང་སྟེ་སྐད་ཅིག་མ་སྔ་ཕྱི་བར་མ་ཆད་པར་འཇོག་པ་དང༌། བསླན་ཏེ་འཇོག་པ་ཞེས་པ་ནི། བརྗེད་དེ་དམིགས་པ་ལས་སེམས་གཞན་དུ་འཕྲོ་ནའང་དེ་མ་ཐག་ཏུ་སླར་ནང་དུ་བཀུག་ནས་དམིགས་པ་ལ་བསླན་ཏེ་འཇོག་པ་དང༌། ཉེ་བར་འཇོག་པ་ཞེས་པ་ནི། སེམས་ཕྱིར་འཕྲོས་པ་དེ་རིང་དུ་མི་འཇོག་པར་ཉེ་བར་ནང་དུ་དམིགས་པ་ལ་འཇོག་པ་དང༌། འདུལ་བར་བྱེད་པ་ཞེས་པ་ནི། བརྣབ་སེམས་ལ་སོགས་པའི་ཉོན་མོངས་པས་སེམས་རྒྱུད་རབ་ཏུ་མ་ཞི་བ་ལས་དུལ་བར་བྱེད་པ་དང༌། ཞི་བར་བྱེད་པ་ཞེས་པ་ནི། རྣམ་པར་མི་རྟོག་པའི་རྦ་རླབས་ཞི་བར་བྱེད་(༡༧༨ན)པ་དང༌། རྣམ་པར་ཞི་བར་བྱེད་པ་ཞེས་པ་ནི། རྣམ་པར་རྟོག་པ་ཕྲ་མོ་ཙམ་ཡང་ཞི་བར་བྱེད་པ་དང༌། རྩེ་གཅིག་ཏུ་བྱེད་པ་ཞེས་པ་ནི། རྩོལ་བ་ཆུང་ངུས་སེམས་དང་དམིགས་པ་ཐ་དད་མེད་པར་རྩེ་གཅིག་ཏུ་བྱེད་པ་དང༌། མཉམ་པར་འཇོག་པ་ཞེས་པ་ནི། བྱིང་རྒོད་བསལ་ནས་རྩོལ་བ་མེད་པར་ལྷུན་གྱིས་གྲུབ་པའི་ངང་དུ་མཉམ་པར་འཇོག་པ་དགུས་ཏིང་ངེ་འཛིན་གྲུབ་པ་ན་ལུས་སེམས་ཤིན་ཏུ་སྦྱངས་པའི་བདེ་བ་འདྲེན་པས་ཁྱབ་ཅིང༌། ཤིན་སྦྱངས་དང་ལྡན་པའི་ཏིང་ངེ་འཛིན་སྐྱེས་པ་ནི་འཇིག་རྟེན་པའི་ཞི་གནས་མཚན་ཉིད་པར་འཇོག་ལ། དེ་དང་མི་ལྡན་པ་ནི་ཞི་གནས་རྗེས་མཐུན་པའི་མོས་པས་སྤྱོད་པའི་ས་ཞེས་བྱའོ། ། ཙ༢ གཉིས་པ་[ལྷག་མཐོང་]ནི། གྲུབ་ནས་མཚན་ཉིད་མོས་དང་དབེན་ལས་སྐྱེས། ། དགའ་དཔྱོད་སྦྱོར་མཐའ་ཡིད་ལ་བྱེད་དྲུག་གིས། ། སྦྱོར་མཐའི་འབྲས་བུ་ཡིད་བྱེད་ལྷག་མཐོང་འགྲུབ། ། ཞི་རགས་རྣམ་པ་འཇིག་རྟེན་ཐུན་མོང་ལམ། ། ཞི་གནས་མཚན་ཉིད་པ་གྲུབ་ནས་མཚན་ཉིད་རབ་ཏུ་རིག་པ་ཡིད་ལ་བྱེད་པ་ཞེས། འདོད་པ་སྐྱོན་ཅན་དང་བསམ་གཏན་དང་པོ་ཡོན་ཏན་ཅན་དུ་ཐོས་བསམ་འདྲེས་མའི་སྒོ་ནས་རྩིང་པོར་རྟོག་ཅིང་ཞིབ་མོར་དཔྱོད་པ་དང༌། མོས་པ་ལས་བྱུང་བ་ཡིད་ལ་བྱེད་པ་ཞེས་པ་དེ་ཉིད་སྒོམ་བྱུང་གི་ངོ་བོར་སྐྱེས་པ་དང༌། དབེན་པ་ལས་སྐྱེས་པའི་ཡིད་ལ་བྱེད་པ་ཞེས་པ་འདོད་ཉོན་མངོན་གྱུར་བ་ཆེན་པོ་གསུམ་གྱིས་དབེན་པ་དང༌། དགའ་བ་སྡུད་པ་ཡིད་ལ་བྱེད་པ་ཞེས་པ་འདོད་ཉོན་མངོན་གྱུར་བ་འབྲིང་གསུམ་གྱིས་ཀྱང་སྤངས་པ་དང༌། དཔྱོད་པ་ཡིད་ལ་བྱེད་པ་ཞེས་པ་འདོད་ཉོན་ཕྲ་མོ་གསུམ་གྱིས་ཀྱང་རྒྱུད་ལ་གོས་མ་གོས་རྟོག་ཅིང་དཔྱོད་པ་དང༌། སྦྱོར་བའི་མཐའ་ཡིད་ལ་བྱེད་པ་ཞེས་པ་དེ་ལྟར་བྱེད་པ་ལས་འདོད་ཉོན་ཕྲ་ཞིང་ཕྲ་བ་ཡང་གཉེན་པོའི་སྟོབས་ཀྱིས་སྤངས་པ་སྟེ། དེ་ལྟར་ཡིད་ལ་བྱེད་པ་དྲུག་གིས་སྦྱོར་བའི་མཐའི་འབྲས་བུ་ཡིད་ལ་བྱེད་པ་ཞེས་འཇིག་རྟེན་པའི་ལྷག་མཐོང་མཐར་ཐུག་འགྲུབ་སྟེ། དེ་དག་ནི་འོག་སའི་ཏིང་འཛིན་སྐྱོན་ཅན་(༡༧༨བ)རགས་པར་ལྟ་ཞིང༌། ས་གོང་མ་སྐྱོན་མེད་ཞི་བར་ལྟ་བ་ཞི་རགས་རྣམ་པ་ཅན་ཉན་རང་དང་འཇིག་རྟེན་པའི་ཐེག་པ་ཐུན་མོང་བའི་ལམ་གྱི་མངོན་རྟོགས་སོ། ། མ༢ གཉིས་པ་དངོས་གཞི་བཤད་པ་ནི། དངོས་གཞི་རྟོག་དཔྱོད་དགའ་བདེ་རྩེ་གཅིག་པའི། ། ཡན་ལག་ལྔ་ལྡན་བསམ་གཏན་དང་པོའོ། ། ཉེར་བསྡོགས་དེ་དག་གིས་བསམ་གཏན་དངོས་གཞི་འགྲུབ་ལ། དེའང་རྟོགས་དཔྱོད་གཉིས་གཉེན་པོའི་ཡན་ལག །དགའ་བདེ་གཉིས་ཕན་ཡོན་གྱི་ཡན་ལག །སེམས་རྩེ་གཅིག་པ་གནས་ཀྱི་ཡན་ལག་སྟེ། ཡན་ལག་ལྔ་དང་ལྡན་པ་ནི་བསམ་གཏན་དང་པོའི་མཚན་ཉིད་དོ། ། དེ་ལ་རྟོག་དཔྱོད་གཉིས་ཀ་དང་ལྡན་པ་དངོས་གཞི་ཙམ་པོ་དང༌། རྟོག་པ་མེད་ཅིང་དཔྱོད་པ་དང་བཅས་པ་དངོས་གཞི་ཁྱད་པར་ཅན་ནོ། ། བ༢ གཉིས་པ་བསམ་གཏན་གཉིས་པ་ལ་གཉིས་ཏེ། མ༡ ཉེར་བསྡོགས་དང༌། མ༢ དེའི་དངོས་གཞིའོ། ། མ༡ དང་པོ་ནི། དེ་ཉིད་སྐྱོན་ཅན་གཉིས་པ་སྐྱོན་མེད་ཀྱི། ། མཚན་ཉིད་རིག་པ་ཡིད་བྱེད་ཉེར་བསྡོགས་ཁྱད། ། བསམ་གཏན་དང་པོའི་དངོས་གཞི་ཁྱད་པར་ཅན་གཞིར་བཞག །དང་པོ་དེ་ཉིད་སྐྱོན་ཅན་དང་གཉིས་པ་སྐྱོན་མེད་ཡོན་ཏན་ཅན་དུ་མཚན་ཉིད་རབ་ཏུ་རིག་པ་ཡིད་ལ་བྱེད་པ་སོགས་ཡིད་བྱེད་དྲུག་གིས་དཔྱོད་པའི་ལྷག་མཐོང་དང་སྦྱར་ཏེ་བསྒོམས་པས་ཞི་ལྷག་ཟུང་འབྲེལ་དུ་སྐྱེས་པ་ན་བསམ་གཏན་གཉིས་པའི་དངོས་གཞི་ཐོབ་པ་ནི་ཉེར་བསྡོགས་ཀྱི་ཁྱད་པར་རོ། ། མ༢ གཉིས་པ་[བསམ་གཏན་གཉིས་པའི་དངོས་གཞི་བཤད་པ་]ནི། དངོས་གཞི་རབ་ཏུ་དང་སོགས་ཡན་ལག་བཞི། ། གཉིས་པ་དངོས་གཞི་ནི་རབ་ཏུ་དང་བ་སོགས་ཡན་ལག་བཞི་དང་ལྡན་པ་སྟེ། དེའང་ནང་རབ་ཏུ་དང་བ་གཉེན་པོའི་ཡན་ལག །ཏིང་ངེ་འཛིན་ལས་སྐྱེས་པའི་དགའ་བདེ་གཉིས་ཕན་ཡོན་གྱི་ཡན་ལག །ཏིང་ངེ་འཛིན་གནས་ཀྱི་ཡན་ལག་གོ། ། འདིའི་ནང་རབ་ཏུ་དང་བ་ནི་རང་སའི་དྲན་པ་ཤེས་བཞིན་བཏང་སྙོམས་གསུམ་ལ་བྱེད། དེ་ཡང་ནང་གི་རྟོག་པ་རབ་ཏུ་སྤངས་པས་ནང་རབ་ཏུ་དང་བ་ཞེས་བྱའོ། ། བ༣ གསུམ་པ་བསམ་གཏན་གསུམ་པ་ལ་གཉིས་ཏེ། མ༡ ཉེར་བསྡོགས་དང༌། མ༢ དེའི་དངོས་གཞིའོ། མ༡ དང་པོ་ནི། (༡༧༩ན) དེ་བཞིན་ཉེར་བསྡོགས་ཡིད་བྱེད་ལྷག་མཐོང་གིས། ། རིམ་དཔྱོད། ཅེས་པ་སྟེ། དེ་བཞིན་ཉེར་བསྡོགས་སེམས་གནས་དང་ཡིད་བྱེད་དཔྱོད་པའི་ལྷག་མཐོང་གིས་རིམ་པར་དཔྱོད་ཚུལ་ཁྱད་པར་དུ་འཕགས་པས་གསུམ་པ་དང་བཞི་པའི་བསམ་གཏན་འགྲུབ་བོ་ཞེས་རྩ་ཚིག་གསུམ་པ་དང་བཞི་པ་ཕྱོགས་སུ་བསྡུས་ནས་བཤད་པ་སྟེ། འདིར་གོ་བདེ་བའི་སླད་སོ་སོར་སྨོས་ན། བསམ་གཏན་གཉིས་པའི་ཞི་གནས་ཁྱད་པར་ཅན་དང༌། བསམ་གཏན་གཉིས་པ་སྐྱོན་ཅན་དང་། གསུམ་པ་ཡོན་ཏན་ཅན་དུ་ཡིད་བྱེད་དྲུག་གིས་དཔྱོད་པའི་ལྷག་མཐོང་དང་སྦྱར་ཏེ་བསྒོམས་པས་ཞི་ལྷག་ཟུང་འབྲེལ་དུ་སྐྱེས་པ་ན་བསམ་གཏན་གསུམ་པའི་དངོས་གཞི་འཐོབ་བོ། ། མ༢ གཉིས་པ་[བསམ་གཏན་གསུམ་པའི་དངོས་གཞི་བཤད་པ་]ནི། གསུམ་པར་དྲན་སོགས་ཡན་ལག་ལྔ། ། བསམ་གཏན་གསུམ་པའི་དངོས་གཞི་ཡན་ལག་ལྔ་ལྡན་ཏེ། དྲན་པ་ཤེས་བཞིན་བཏང་སྙོམས་གསུམ་གཉེན་པོའི་ཡན་ལག །དགའ་བ་སྤངས་པའི་བདེ་བ་ཕན་ཡོན་གྱི་ཡན་ལག །ཏིང་ངེ་འཛིན་གནས་ཀྱི་ཡན་ལག་གོ། ། བ༤ བཞི་པ་བསམ་གཏན་བཞི་པ་ལ་གཉིས་ཏེ། མ༡ ཉེར་བསྡོགས་དང༌། མ༢ དེའི་དངོས་གཞིའོ། ། མ༡ དང་པོ་ནི། བསམ་གཏན་གསུམ་པའི་ཞི་གནས་ཁྱད་པར་ཅན་དང༌། བསམ་གཏན་གསུམ་པ་སྐྱོན་ཅན་དང་། བཞི་པ་ཡོན་ཏན་ཅན་དུ་ཡིད་བྱེད་དྲུག་གིས་དཔྱོད་པའི་ལྷག་མཐོང་དང་སྦྱར་ཏེ་བསྒོམས་པས་ཞི་ལྷག་ཟུང་འབྲེལ་དུ་སྐྱེས་པ་ན་བསམ་གཏན་བཞི་པའི་དངོས་གཞི་འཐོབ་བོ། ། མ༢ གཉིས་པ་དེའི་དངོས་གཞི་ནི། བཞི་པར་ཡན་ལག་བཞི་ལྡན་སྐྱོན་བརྒྱད་དག ། བསམ་གཏན་བཞི་པའི་དངོས་གཞི་ཡན་ལག་བཞི་དང་ལྡན་པ་སྟེ། དྲན་པ་ཡང་དག་དང་བཏང་སྙོམས་ཡང་དག་གཉིས་གཉེན་པོའི་ཡན་ལག །ཚོར་བ་བཏང་སྙོམས་ཕན་ཡོན་གྱི་ཡན་ལག །ཏིང་ངེ་འཛིན་གནས་ཀྱི་ཡན་ལག་གོ། ། འདིར་དྲན་པ་ཡང་དག་ཅེས་པ་ནི། བསམ་གཏན་གྱི་སྐྱོན་བརྒྱད་ཀྱིས་ཡོངས་སུ་དག་པ་ཡིན་ཏེ།(༡༧༩བ) དེའང་བསམ་གཏན་དང་པོ་ལ་ལྟོས་པའི་རྟོག་དཔྱོད་མེ་ལྟ་བུ་གཉིས། གཉིས་པ་ལ་ལྟོས་པའི་དབང་ཤེས་ཀྱི་འཁོར་དུ་བྱུང་བའི་ཚོར་བ་བདེ་སྡུག་གཉིས། གསུམ་པ་ལ་ལྟོས་པའི་ཡིད་ཤེས་ཀྱི་འཁོར་དུ་བྱུང་བའི་ཡིད་བདེ་མི་བདེ་གཉིས། བཞི་པ་ལ་ལྟོས་པའི་དབུགས་དབྱུང་རྔུབ་གཉིས་ཏེ། དེ་བརྒྱད་ཀྱིས་ཡོངས་སུ་དག་པའོ། ། ཕ༢ གཉིས་པ་འབྲས་བུ་སྐྱེ་བའི་བསམ་གཏན་བཤད་པ་ནི། འབྲས་བུ་སོ་སོའི་དངོས་གཞི་ཆུང་འབྲིང་ཆེས། ། སོ་སོའི་གནས་ལ་རྣམ་སྨིན་འབྲས་སོགས་མྱོང༌། ། སྙོམས་འཇུག་དེ་དག་གི་འབྲས་བུ་ནི་བསམ་གཏན་དང་པོའི་དངོས་གཞི་ཆུང་འབྲིང་ཆེ་གསུམ་བསྒོམས་པ་ལས་བསམ་གཏན་དང་པོའི་གནས་གཞན་ཚངས་རིས་སོགས་གསུམ་ཐོབ་པ་ནས། བསམ་གཏན་བཞི་པའི་དངོས་གཞི་ཆུང་འབྲིང་ཆེ་གསུམ་བསྒོམས་པ་ལས་བསམ་གཏན་བཞི་པའི་གནས་གཞན་སྤྲིན་མེད་སོགས་གསུམ་ཐོབ་པའི་བར་སོ་སོའི་དངོས་གཞི་ཆུང་འབྲིང་ཆེན་པོ་མཐར་ཕྱིན་པ་ལས། སོ་སོའི་གནས་ལ་རྣམ་སྨིན་གྱི་འབྲས་བུ་སོགས་མྱོང་སྟེ། དེའང་གནས་གཞན་དེ་དང་དེར་སྐྱེས་པའི་གཟུགས་སུ་སྣང་བ་ནི་རྣམ་སྨིན་གྱི་འབྲས་བུ། སྙོམས་འཇུག་གི་སེམས་རྣམས་རྒྱུ་མཐུན་གྱི་འབྲས་བུ། ཡུལ་གྱི་ལོངས་སྤྱོད་དུ་སྣང་བ་ནི་བདག་པོའི་འབྲས་བུའོ། ། ན༢ གཉིས་པ་གཟུགས་མེད་ཁམས་ཀྱི་སྙོམས་འཇུག་བཞི་བཤད་པ་ལ་གཉིས། པ༡ མདོར་བསྟན། པ༢ རྒྱས་བཤད་དོ། ། པ༡ དང་པོ་ནི། གཟུགས་མེད་སྙོམས་འཇུག་བཞིར་ཡང་རྒྱུ་འབྲས་གཉིས། ། ཞེས་སོ། ། པ༢ གཉིས་པ་ལ་གཉིས། ཕ༡ རྒྱུ་སྙོམས་འཇུག་དང་། ཕ༢ འབྲས་བུ་སྐྱེ་བའོ། ། ཕ༡ དང་པོ་ནི། བསམ་གཏན་བཞི་སེམས་ཐོབ་ལ་མ་ཉམས་པས། ། གཟུགས་རེག་མཐོང་སྣང་བཀག་ནས་ནམ་མཁའ་དང༌། ། རྣམ་ཤེས་མཐའ་ཡས་ཅི་ཡང་བཟུང་བྱར་མེད། ། འདུ་ཤེས་རགས་པ་ཡོད་མིན་ཕྲ་མེད་མིན། ། གོམས་པའི་སྙོམས་འཇུག་སྲིད་རྩེའི་མཐར་ཐུག་སྟེ། ། དེ་ལ་གཟུགས་མེད་སྐྱེ་མཆེད་མུ་བཞིར་(༡༨༠ན)གྲགས་པ་ལས། དང་པོ་ནི། བསམ་གཏན་བཞི་པའི་སེམས་ཐོབ་ལ་མ་ཉམས་པའི་སྟེང་དུ་གཟུགས་དང་རེག་མཐོང་སྣང་གསུམ་བཀག་སྟེ། ཆོས་ཐམས་ཅད་ནམ་མཁའ་ལྟར་མཐའ་ཡས་སོ་སྙམ་དུ་སྒོམ་པ་ཡོངས་སུ་རྫོགས་པ་ནམ་མཁའ་མཐའ་ཡས་སྐྱེ་མཆེད་ཀྱི་སྙོམས་འཇུག་གོ། ། གཉིས་པ་ནི། དེའི་སྟེང་དུ་ནམ་མཁའ་མཐའ་ཡས་པ་དེ་ལྟར་དུ་རྣམ་པར་ཤེས་པ་ཡང་མཐའ་ཡས་སོ་སྙམ་དུ་སྒོམ་པ་ཡོངས་སུ་རྫོགས་པ་རྣམ་ཤེས་མཐའ་ཡས་སྐྱེ་མཆེད་ཀྱི་སྙོམས་འཇུག་གོ། ། གསུམ་པ་ནི། དེ་གཉིས་ཀའང་མཚན་མ་དང་བཅས་པར་མཐོང་ནས་གཟུང་བར་བྱ་བ་ཅི་ཡང་མེད་དོ་སྙམ་དུ་སྒོམ་པ་ཡོངས་སུ་རྫོགས་པ་ཅི་ཡང་མེད་པའི་སྐྱེ་མཆེད་ཀྱི་སྙོམས་འཇུག་གོ། ། བཞི་པ་ནི། དེ་གསུམ་ཀའང་མཚན་མ་དང་བཅས་པར་མཐོང་ནས་འདུ་ཤེས་རགས་པ་མེད་ཅིང་ཕྲ་བ་མེད་པ་མིན་ནོ་སྙམ་དུ་སྒོམ་པ་ཡོངས་སུ་རྫོགས་པ་འདུ་ཤེས་མེད་འདུ་ཤེས་མེད་མིན་གྱི་སྙོམས་འཇུག་གོ། ། འདི་ནི་སྲིད་པའི་རྩེ་མོའི་ལམ་མཐར་ཐུག་པའོ། ། ཕ༢ གཉིས་པ་འབྲས་བུ་སྐྱེ་བ་ནི། འབྲས་བུ་ཏིང་འཛིན་ཚེ་སོགས་ཁྱད་པར་འཕགས། ། སྙོམས་འཇུག་དེ་དག་གི་འབྲས་བུ་ནི། གཟུགས་མེད་ཁམས་ལ་གཟུགས་རགས་པས་ཕྱེ་བའི་གནས་གཞན་ཐ་དད་པ་མེད་ཀྱང་། མཆོག་དམན་དང་། ཚེ་རིང་ཐུང་དང་། གོང་འོག་ལ་སོགས་པའི་སྒོ་ནས་ཐ་དད་དུ་ཡོད་ལ། ཕལ་ཆེར་ལས་གནས་སོགས་ཀྱང་ཐ་དད་དུ་བཤད་ཅིང༌། གང་ལྟར་གོང་ནས་གོང་དུ་ཏིང་ངེ་འཛིན་རྒྱ་ཆེ་ཞིང་ཇེ་བརྟན་དུ་གྱུར་པ་དང༌། ཚེ་རིང་བ་སོགས་ཀྱི་སྒོ་ནས་མངོན་མཐོའི་བདེ་འབྲས་ཁྱད་པར་དུ་འཕགས་པ་ཡིན་ནོ། ། ཏ༣ རྩ་བའི་གསུམ་པ་དོན་བསྡུ་བ་ནི། ཚད་མེད་མངོན་པར་ཤེས་སོགས་ཡོན་ཏན་བཞི། ། ཕྱི་རོལ་ཐེག་དམན་དོན་དུ་གཉེར་བྱའི་མཆོག ། རྒྱལ་བའི་ཐེག་པར་རིམ་འཇུག་སྔོན་འགྲོའོ། ། བསམ་གཏན་བཞིའི་དངོས་གཞི་རྣམས་ལ་བརྟེན་ནས་བྱམས་སོགས་ཚད་མེད་བཞི་དང་འཇིག་(༡༨༠བ)རྟེན་པའི་མངོན་པར་ཤེས་པ་ལྷའི་མིག་དང་ལྷའི་རྣ་བ་དང་གཞན་གྱི་སེམས་ཤེས་པ་དང་སྔོན་གནས་རྗེས་སུ་དྲན་པ་དང་འཆི་འཕོ་སྐྱེ་བ་ཤེས་པ་སྟེ་ལྔ་ནི་ཁམས་གོང་མ་གཉིས་ཀྱི་ཡོན་ཏན་གྱི་ཁྱད་པར་རབ་ཏུ་གྲགས་པ་ཡིན་ལ། ཐེག་པ་ལ་ཞུགས་པ་རྣམས་ཀྱང་ཐོག་མར་ཏིང་ངེ་འཛིན་དེ་དག་དང་ཡོན་ཏན་དེ་དག་བསྐྱེད་ནས། སླར་གོང་མའི་ཁྱད་པར་བསྒྲུབ་དགོས་པས་མངོན་ཤེས་ལ་སོགས་པ་ཡོན་ཏན་ཀུན་གྱི་གཞིར་གྱུར་པ་དང༌། ཁྱད་པར་བསམ་གཏན་བཞི་པའི་དངོས་གཞི་སེམས་ལ་བརྟེན་ནས་འདུ་ཤེས་མེད་པའི་སྙོམས་འཇུག་དང༌། སྲིད་རྩེའི་དངོས་གཞིའི་སེམས་ལ་བརྟེན་ནས་འགོག་པའི་སྙོམས་འཇུག་སོགས་ཐོབ་པས། ཕྱི་རོལ་གྱི་དྲང་སྲོང་དང་མུ་སྟེགས་བྱེད། ནང་པའི་ཐེག་དམན་ཉན་ཐོས་དང་རང་རྒྱལ་རྣམས་ཀྱིས་ཀྱང་དོན་དུ་གཉེར་བྱ་དང་བསྒྲུབ་བྱའི་མཆོག་ཡིན་ལ། རྒྱལ་བའི་བསྟན་པ་ལ་རིམ་པར་འཇུག་པ་རྣམས་ཀྱི་སྔོན་འགྲོའི་ཆོས་ཀྱང་ཡིན་པས་ཤེས་ནས་གོམས་པའི་སྦྱོར་བ་ལ་བསླབ་བོ། ། ཐུན་མོང་རིག་པའི་གནས་རྣམས་དང་འཇིག་རྟེན་པའི་ལམ་