Tibetan
བསམ་པ། སྦྱོར་བ། དུས། ཉེས་པ། ལན་གྲངས་ཀྱི་བྱེ་བྲག་སྟེ་སྒོ་དྲུག་གི་དབྱེ་བས་བརྒྱད་བཅུ་རྩ་བཞི། དེའང་ལྕི་བ་དང༌། འབྲིང་དང༌། ཡང་བ་གསུམ་གྱིས་བསྒྱུར་བས་རིག་པ་འཛིན་པའི་ཁྲིམས་ཉིས་བརྒྱ་ལྔ་བཅུ་རྩ་གཉིས་སུ་འགྱུར་བ་སློབ་དཔོན་འཇམ་དཔལ་གྲགས་པས་བཤད་དོ། ། བ༢ གཉིས་པ་[ཡན་ལག་གི་ལྟུང་བ་]ནི། ཡན་ལག་བརྒྱད་ནི་དམ་མེད་རིག་མ་བསྟེན། ། ཚོགས་ལ་རྩོད་ཅིང་ཡུལ་མིན་བདུད་རྩི་ལེན། ། དུས་ལ་མི་བཤད་དྲིས་ལན་བྲེ་མོས་གདབ། ། ཉན་ཐོས་ནང་འདུག་མི་ཤེས་སྔགས་པར་རློམས། ། སྣོད་མིན་གསང་བསྒྲགས་རྣམས་ཏེ་འདྲེན་ཚུལ་མང༌། ། རྩ་བ་བཅུ་བཞི་དང་རྗེས་སུ་མཐུན་པའི་ཡན་ལག་བརྒྱད་ནི། དབང་མ་ཐོབ་ཅིང་ཐོབ་ཀྱང་ཉམས་པས་དམ་ཚིག་མེད་པ། གསང་མི་ཐུབ་པ། རང་ཉིད་ལ་མི་དད་ཅིང་མཚན་ཉིད་མི་ལྡན་པའི་རིག་མ་བསྟེན་པ་དང་པོ་འདི་ནི་གཙོ་བོར་ཁྱིམ་པ་རྡོ་རྗེ་འཛིན་པའི་དབང་དུ་བྱས་པའོ། ། ཚོགས་འཁོར་གྱི་སྐབས་སུ་གྲལ་དང་བཟའ་བཏུང་ལ་རྩོད་པས་མཚོན་དཀྱིལ་འཁོར་སྒྲུབ་མཆོད་སྦྱིན་སྲེག་རབ་གནས་སོགས་སྔགས་ཀྱི་སྤྱོད་པའི་དུས་སུ་འཁྲུག་ལོང་བསྐྱེད་པ་གཉིས་པ། རྒྱུད་ནས་མ་གསུངས་ཤིང་སྨད་པའི་རིག་མ་ལས་ཕྱི་ནང་གི་དམ་ཚིག་བདུད་རྩི་བླངས་ན་གསུམ་པ། དད་པ་དང་ལྡན་པས་གདམས་ངག་ཞུས་པའི་དུས་ལ་ལོངས་སྤྱོད་མེད་པའམ། དཔེ་མཁྱུད་ཀྱིས་མི་སྟོན་པ་བཞི་པ། གཞན་གྱིས་ཆོས་ཀྱི་དྲི་བ་དྲིས་པ་ལ་དེའི་ལན་མི་ལྡོན་པར་ཀུ་རེ་བྲེ་མོའི་གཏམ་སྨྲ་བའམ། (༨༧ན)སྔགས་དྲིས་པ་ལ་མདོ་ཆོས་བཤད་པ་ལྟ་བུ་ལྔ་པ། ཐེག་ཆེན་ལ་མི་དད་པའི་ཉན་ཐོས་ཀྱི་སྡེའི་ནང་དུ་ཞག་བདུན་འདས་པར་འདུག་པ་དྲུག་པ། གསང་སྔགས་ཀྱི་ཚུལ་ཕྱི་ནང་གཞན་གསུམ་དང་ཟུང་འཇུག་གི་རྣལ་འབྱོར་མི་ཤེས་ཀྱང་ཕྱིའི་བྱ་བ་དང་བསྐྱེད་རིམ་ཙམ་ཤེས་པས་ང་ནི་སྔགས་འཆང་རྡོ་རྗེ་འཛིན་པའོ་ཞེས་མངོན་པའི་ང་རྒྱལ་གྱིས་རློམས་པ་བདུན་པ། སློབ་མ་རིན་པོ་ཆེ་ལྟ་བུ་ལ་སློབ་བཤད། ཙནྡན་ལྟ་བུ་སོགས་ལ་ཚོགས་བཤད། སྣོད་དང་མི་ལྡན་པ་ལ་ཐུན་མོང་ཙམ་འཆད་དགོས་པ་ལ་དེ་ལས་ལྡོག་སྟེ་གསང་བ་སྒྲག་པ་རྣམས་ནི་བརྒྱད་པ་སྟེ། རྡོ་རྗེ་སྙིང་པོ་རྒྱན་གྱི་རྒྱུད་ལས། དང་པོ། གཉིས་པ། ལྔ་པ། དྲུག་པ། བརྒྱད་པ། གསང་བ་སྟོན་པ་བཅས་དྲུག་གསུངས་ཤིང༌། གཞན་ཡང་། རྒྱུད་སྡེ་རྣམས་ལས་ཐོར་བུ་ཅི་རིགས་གསུངས་པས་མཐའ་གཅིག་ཏུ་གྲངས་ངེས་དཀའ་ཞིང་སློབ་དཔོན་རྣམས་ཀྱིས་འདྲེན་ཚུལ་ཡང་མང་བ་ལས་འདིར་བཤད་པ་ནི་འཇམ་དཔལ་གྲགས་པའི་གཞུང་བཞིན་དམ་ཚིག་རྒྱ་མཚོ་ལས་བྱུང་བ་ཉིད་ཡིན་ལ། སྙིང་པོའི་ཞབས་ཀྱི་གཞུང་ལས། དམ་ཚིག་དང་ནི་མི་ལྡན་པའི། ། རིག་མ་བསྟེན་པར་དགའ་བ་དང༌། ། ཚོགས་ཀྱི་འཁོར་ལོར་རྩོད་པ་དང༌། ། སེམས་ཅན་དད་དང་ལྡན་པ་ལ། ། དམ་ཆོས་གཞན་དུ་སྟོན་པ་དང༌། ། ཉན་ཐོས་དག་ཏུ་རློམ་བྱེད་པའི། ། ནང་དུ་ཞག་བདུན་འདས་པ་དང༌། ། སྤྱོད་པ་ལེགས་པར་མ་བྱས་པའི། ། སྐལ་མིན་གསང་བ་བསྟན་པ་དང༌། ། གང་ཞིག་ཕྱག་རྒྱ་མི་མཁས་ལ། ། ལུས་ཀྱི་ཕྱག་རྒྱ་བསྟན་པ་དང༌། ། བསྙེན་སོགས་དག་པར་མ་བྱས་པར། ། དཀྱིལ་འཁོར་ལས་ལ་འཇུག་པ་དང༌། ། སྡོམ་པ་གཉིས་ཀྱི་བཅས་པ་ལས། ། དགོས་པ་མེད་པར་འདའ་བ་དང༌། ། ཞེས་བརྒྱད་དུ་གསུངས་པ་ལྟར། འཁྲུལ་སྤང་དང་ཇོ་ནང་རྗེ་བཙུན་ཆེན་པོས་ཀྱང་དེ་བཞིན་དུ་འཆད་པར་མཛད་དོ། ། འགའ་ཞིག་གིས། དེའི་སྟེང་དུ་དགོས་པ་མེད་པར་བརྡའི་སྐད་བསྟན་པ་བསྣན་ནས་དགུར་བཤད་དོ། ། བ༣ གསུམ་པ་[ཕྲ་མོ་ཉེར་བརྒྱད་]ནི། (༨༧བ) ཕྲིན་ལས་བཅོ་ལྔ་དེ་ཡི་ཡན་ལག་བདུན། ། ཕྲིན་ལས་སྒྲུབ་པ་ལ་བརྟེན་པའི་ལྟུང་བ་བཅོ་ལྔ་པ་ཞེས་སློབ་དཔོན་དཔའ་བོས་ཕྱུང་བ་ནི། མེ་ཏོག་ཕོག་པའི་ལྷ་ངོར་གཞན་བཟང་རྟོག ། རང་ལྷའི་བསྐྱེད་རྫོགས་ཉིན་མཚན་དུས་ལས་ཡོལ། ། ཕྱི་རོལ་ལྷར་དགའ་བསྐྱེད་རིམ་དངོས་པོར་ཞེན། ། རང་གིས་དབང་མ་རྫོགས་པར་གཞན་ལ་བསྐུར། ། ཚེ་འདིའི་ཆེད་དུ་ཟབ་མོའི་དོན་རྣམས་སྟོན། ། བསླབ་པ་འོག་མར་བརྙས་དང་ཚུལ་འཆོས་བྱེད། ། ནུས་མེད་ལས་སྦྱོར་དོན་མེད་གཡེང་བས་འདའ། ། སྐྱབས་ནུས་མི་སྐྱོབ་འོག་མའི་སྤྱོད་ལ་དགའ། ། ཟང་ཟིང་ལ་ཆགས་དམ་ཉམས་འདུལ་མི་བྱེད། ། སྤྱོད་པའི་དུས་སྐབས་མི་འབྲེལ་སྤྱད་བཅོ་ལྔ། ། དམ་པ་བསྟེན་ཞིང་སྣོད་ཀྱི་སྤང་བླང་བརྟག ། རང་འདོད་ཕྱིར་དུ་སྲོག་ཆགས་གཞན་གནོད་མིན། ། དཀོན་མཆོག་དཀོར་ལ་མི་སྤྱོད་གཞན་དོན་བྱ། ། བསྔོ་བས་རྒྱས་འདེབས་འཕོ་བའི་དེ་ཉིད་མཁས། ། ཡན་ལག་བདུན་ནོ་སྔགས་ལ་ཐེ་ཚོམ་ཟ། ། ཐེག་གསུམ་རིམ་པར་མི་བསྟན་གཅིག་ཏུ་སྦྱོར། ། དེ་ཉིད་བཅུ་དང་མི་ལྡན་སློབ་དཔོན་བྱེད། ། བདུད་བརྟག་མི་མཁས་དམ་ཚིག་བརྟག་མི་བྱེད། ། ཕྲ་མོའི་ཉེས་བྱས་མི་བཤགས་ཉེས་པ་དྲུག ། ཅེས་པ་རྣམས་བསྡོམས་པས་ཕྲ་མོ་ཉེར་བརྒྱད་དུ་འགྱུར་རོ། ། གཞན་ཡང་གཤེད་དམར་ནག་གི་རྒྱུད་ལས། རྣལ་འབྱོར་སློང་མོས་མི་རྒྱུ་ཞིང༌། ། རྣལ་འབྱོར་སྤང་བར་མི་བྱ་སྟེ། ། རྟག་པར་རྒྱུན་དུ་གསང་སྔགས་ཟླ། ། རྟག་ཏུ་དམ་ཚིག་ལ་སོགས་བསྟེན། ། ཞེས་ཡན་ལག་གི་ལྟུང་བ་བཞིའང་བཤད་དོ། ། བ༤ བཞི་པ་[ཞར་བྱུང་དབང་བཞིའི་དམ་ཚིག་བཤད་པ་]ནི། དབང་བཞིའི་དམ་ཚིག་ལ་སོགས་རབ་དབྱེ་མང༌། ། སྤྱིར་བདེ་མཆོག་རྩ་བཤད་ཀྱི་དཀྱིལ་འཁོར་ཕལ་ཆེར་དུ་དབང་བཞིའི་དམ་ཚིག་སོ་སོར་བསྒྲགས་པས་མཚོན་རྒྱུད་སྡེ་རྣམས་སུ་རབ་ཏུ་དབྱེ་བའི་ཚུལ་ཅི་རིགས་པར་འབྱུང་ལ། ཁྱད་པར་ལམ་འབྲས་བུ་དང་བཅས་པའི་གདམ་ངག་ལས་དབང་བཞིའི་དམ་ཚིག་སོ་སོ་དང༌། དེ་རེ་རེ་ལའང་ལྔ་ལྔར་གསུངས་ཏེ། (༨༨ན)བུམ་དབང་མཉམ་གཞག་གི་དམ་ཚིག་བསྐྱེད་རིམ། རྗེས་སྤྱོད་ཀྱི་དམ་ཚིག་ངོ་བོ་ཉིད་གསུམ། བཟའ་བའི་དམ་ཚིག་བདུད་རྩི་ལྔ་དང་ཤ་ལྔའི་རིལ་བུ། བསྲུང་བ་རྩ་བ་དང་ཡན་ལག་གི་དམ་ཚིག་ཉི་ཤུ་རྩ་གཉིས། མི་འབྲལ་བ་རྡོ་རྗེ་དྲིལ་བུའོ། ། གསང་དབང་མཉམ་བཞག་གི་དམ་ཚིག་རྩ་རླུང༌། རྗེས་སྤྱོད་ཀྱི་དམ་ཚིག་རང་བྱུང་གི་ཡེ་ཤེས། བཟའ་བའི་དམ་ཚིག་སྟོང་གསལ། བསྲུང་བ་རང་བྱུང་དང་རླུང་དང་འགལ་བ་མཐའ་དག་མི་འབྲལ་བ་རླུང་ཞི་དྲག་གང་རུང་ངོ༌། ། ཤེས་རབ་ཡེ་ཤེས་ཀྱི་མཉམ་བཞག་གི་དམ་ཚིག་དཀྱིལ་འཁོར་འཁོར་ལོ། རྗེས་སྤྱོད་ལྷན་སྐྱེས། བཟའ་བ་བདེ་བ། བསྲུང་བ་ཐིག་ལེ་འཛག་པ་དྲུག །མི་འབྲལ་བ་དངོས་སམ་ཡེ་ཤེས་ཀྱི་ཕྱག་རྒྱའོ། ། དབང་བཞི་པའི་མཉམ་བཞག་རྦ་རླབས་གསུམ། རྗེས་སྤྱོད་ཤིན་ཏུ་རྣམ་པར་དག་པའི་དེ་ཁོ་ན་ཉིད། བཟའ་བ་བདེ་ཆེན་བདེ་སྟོང༌། བསྲུང་བ་སྒྲིབ་པ་གཉིས་ལས་ཀྱང་ཤེས་བྱའི་སྒྲིབ་པ། མི་འབྲལ་བ་པད་ཅན་མ་དངོས་སམ་ཡེ་ཤེས་ཀྱི་ཕྱག་རྒྱའོ། ། དེ་དག་སྲུང་བའི་ཚུལ་ཡང་ཚུལ་ཇི་ལྟ་བར་རྒྱུད་ལ་སྐྱེས་པས་དང༌། རྣམ་གྲངས་རྗེས་སུ་དྲན་པས་དང༌། ཉམས་སུ་མྱོང་བ་གཅིག་སྐྱེས་པས་དང༌། བླ་མ་ལ་གུས་པ་ཁྱད་པར་ཅན་སྐྱེས་པ་བཞིས་སྲུང་ཞིང༌། སྔ་མ་ཉམས་ན་སྲིད་པའི་སྡུག་བསྔལ་ལས་འདྲེན་པའི་དམ་ཚིག་ཉམས་པ་དང༌། ཕྱི་མ་གསུམ་ཉམས་ན་ལམ་བགྲོད་པ་ལས་རིང་དུ་འགོར་བའི་དམ་ཚིག་ཉམས་པར་བཤད་དོ། ། སོགས་ཁོངས་ནས་སཾ་བུ་ཊི་ལས། བུད་མེད་དང་ནི་སྐྱེས་པའི་ལུས། ། ལས་ནི་དུ་མ་སྐྱེས་པ་སྟོན། ། མི་ཤེས་པས་ཀྱང་མི་བྱ་སྟེ། ། སྐུ་ཡི་རྡོ་རྗེའི་དམ་ཚིག་གོ། ། སེམས་ཅན་སྣ་ཚོགས་གདུང་བ་དང༌། ། ཀུན་རྟོག་དྲྭ་བའི་རྣམ་རྟོག་གིས། ། སེམས་ལ་རབ་སྨད་མི་བྱ་སྟེ། ། ཐུགས་ཀྱི་རྡོ་རྗེའི་དམ་ཚིག་གོ། ། ཕྲག་དོག་གཉིས་ཀྱིས་མ་རངས་པས། ། ཚིག་རྩུབ་ལ་སོགས་སྨྲ་མི་བྱ། ། རྣ་བར་བདེ་བར་བྱེད་པ་ཉིད། ། གསུང་གི་རྡོ་རྗེའི་དམ་ཚིག་གོ། །(༨༨བ) ཞེས་གསུངས་ཏེ། དེའང་སེམས་ཅན་ཐམས་ཅད་སྐུ་གསུང་ཐུགས་རྡོ་རྗེའི་རང་བཞིན་ཅན་ཡིན་པས་རིགས་དྲུག་ཏུ་གཏོགས་པའི་སྐྱེས་པ་དང་བུད་མེད་ཀྱི་ལུས་གང་ལའང་མི་བརྙས་པ་ནི་སྐུ་རྡོ་རྗེའི་དམ་ཚིག ། རང་གཞན་གྱི་སེམས་འགྱོད་པ་ལ་སོགས་པའི་ཀུན་ཏུ་རྟོག་པས་སུན་ཕྱུང་ནས་ཟུག་རྔུ་སྐྱེད་པ་སོགས་མི་བྱེད་པ་ཐུགས་ཀྱི་རྡོ་རྗེའི་དམ་ཚིག ། ཚིག་རྩུབ་སྤང་ཞིང་དགའ་བའི་གཏམ་གྱིས་ཡིད་གཞན་དུ་མ་གྱུར་པར་རྣ་བ་བདེ་བར་བྱེད་པ་གསུང་རྡོ་རྗེའི་དམ་ཚིག་སྟེ། འདི་ནི་རྡོ་རྗེ་སྙིང་རྒྱན་སོགས་རྒྱུད་སྡེ་མང་པོར་མགྲིན་གཅིག་ཏུ་གསུངས་སོ། ། ཡང་བདེ་མཆོག་རྩ་བའི་རྒྱུད་ལས་ཁྱད་པར་གྱི་དམ་ཚིག་བརྒྱད་གསུངས་པ་ནི། འདོད་སྤྱོད་ལས་རྒྱ། གཟུགས་སྤྱོད་ཡེ་རྒྱ། ཕྱག་རྒྱ་ཆེན་པོ་སངས་རྒྱས་ཀྱི་འབྲས་བུ་ཐོབ་པའི་རྒྱུ་བྱང་ཆུབ་ཀྱི་སེམས་འཕོ་བ་མེད་པ་ནི་དངོས་གྲུབ་ཀྱི་རྒྱུ་སྟེ་དང་པོའོ། ། ཤེས་རབ་ཀྱི་ཆགས་པས་མགྲིན་སྙིང་ལྟེ་གསང་གི་གནས་སུ་དགའ་བ་བཅུ་དྲུག་གི་རིམ་པ་བསྐྱེད་པ་ནི་དམ་ཚིག་བསྐྱང་བ་ཞེས་གཉིས་པ། རིགས་ལྡན་མ་བོར་ནས་རིགས་གཞན་གྱི་ཕོ་ཉ་མོར་ཕྱི་རོལ་གྱི་དངོས་གྲུབ་ཙམ་ལ་འདོད་པས་མི་བསྒྲོད་པ་གསུམ་པ། གནས་བཞིར་ཐིག་ལེ་བཞིའི་དམ་ཚིག་རྣམས་ལྷན་སྐྱེས་དགའ་བ་དང་སྟོང་པ་དབྱེར་མེད་དུ་རྫོགས་པས་ཉའི་མཐར་གཉིས་སུ་མེད་པར་བྱེད་པ་ཞེས་བཞི་པ། དགའ་བ་བཅུ་དྲུག་གི་རང་བཞིན་འཛག་བདེའི་རྐྱེན་གྱིས་མ་ཉམས་པས་ཐོགས་པ་མེད་པ་ནག་པོའི་ཕྱོགས་ལ་མ་ཞུགས་པ་སྟེ་ལྔ་པ། ཀུན་ཏུ་བཟང་པོ་ཕ་རོལ་ཏུ་ཕྱིན་པའི་སྤྱོད་པ་སེམས་ཅན་གྱི་དོན་རྣམ་པ་དུ་མ་ལ་བདེ་བའི་སེམས་ཀྱིས་རྟག་ཏུ་སྤྱོད་པ་ནི་མི་མོའི་སྤྱོད་པ་ལེགས་པར་སྲུང་བ་སྟེ་དྲུག་པ། རྟག་ཏུ་འཕོ་བ་མེད་པའི་ཚུལ་ཁྲིམས་ལ་གནས་པ་ནི་ཚངས་པར་སྤྱོད་པ་རྡོ་རྗེའི་ཞལ་ཏེ་བདུན་པ། གསང་བའི་སྣ་རྩེར་སོན་པའི་ཐིག་ལེ་རྣམས་ཡས་བརྟན་ལུགས་ལྡོག་གི་དགའ་བ་བསྐྱེད་དེ་གཙུག་ཏོར་གྱི་མཐར་ཐུག་ཏུ་དྲངས་ཤིང་བརྟན་པ་ནི་འདྲེན་པ་རྩ་ཡི་ཀུན་སྤྱོད་(༨༩ན)ཅེས་བྱ་བ་སྟེ་བརྒྱད་པའོ། ། དེ་ལྟར་ཡང་སྟོད་འགྲེལ་ལས། དེ་ལྟར་དམ་ཚིག་བརྒྱད་པོ་འདི་རྣམས་གང་ཞིག་ངེས་པར་དུས་ཐམས་ཅད་དུ་སྐྱོང་བར་བྱེད་པ་དེ་མྱུར་དུ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། ། ཞེས་ཕན་ཡོན་དང་བཅས་ཏེ་རྒྱས་པར་གསུངས་སོ། ། གཞན་ཡང་། རྒྱུད་སྡེ་རྣམས་ལས་ཕྲན་ཚེགས་སོ་སོར་གསུངས་པའི་རབ་ཏུ་དབྱེ་བ་མང་ཡང་གཙོ་བོར་སྔར་བཤད་པ་དེ་དག་ཏུ་འདུའོ། ། ན༢ གཉིས་པ་དབྱེ་བསྡུའི་རྣམ་གྲངས་གཞན་བསྟན་པ་ནི། བསྲུང་དང་བཟའ་སྤྱད་མི་འབྲལ་དམ་ཚིག་བཞི། ། དབང་བཞིར་འབྲེལ་ཞེས་མི་བསྐྱོད་དགའ་བས་བཞེད། ། བླ་མེད་ཀྱི་དམ་ཚིག་ཐམས་ཅད་དབང་བཞིའི་དམ་ཚིག་ཏུ་འདུ་སྟེ། དེའང་བུམ་དབང་གི་སྡོམ་པས་ཐོབ་པ་ནི། བསྲུང་བའི་དམ་ཚིག་སྟེ། རིགས་ལྔ་སྤྱི་དང་སོ་སོའི་དམ་ཚིག་དང༌། རྩ་ལྟུང་བཅུ་བཞི་དང༌། ཡན་ལག་བརྒྱད་རྣམས་བསྲུང༌། གསང་དབང་གི་སྡོམ་པས་ཐོབ་པ་ནི་བཟའ་བའི་དམ་ཚིག་སྟེ། ཤ་ལྔ་བདུད་རྩི་ལྔ་བསྟེན་པའོ། ། ཤེར་དབང་གིས་ཐོབ་པ་ནི་སྤྱད་པའི་དམ་ཚིག་སྟེ། སྲོག་ཆགས་བསད་པ་སོགས་ཁྱད་པར་གྱི་དམ་ཚིག་རྣམས་སོ། ། དབང་བཞི་པའི་སྡོམ་པས་ཐོབ་པ་ནི་མི་འབྲལ་བའི་དམ་ཚིག་སྟེ། ཧེ་རུ་ཀའི་ཆ་ལུགས་དང་ཤེས་རབ་མ་བསྟེན། དེ་ལྟར་དམ་ཚིག་བཞི་པོ་དང་དབང་བཞིར་འབྲེལ་བས་སྡོམ་པ་མཐའ་དག་བསྡུས་པ་ཐམས་ཅད་མཁྱེན་པ་མི་བསྐྱོད་དགའ་བས་བཞེད་པའི་རྣམ་གྲངས་ཟུར་ཙམ་སྨོས་པའོ། ། བསྲུང་བྱ་རྩ་ལྟུང་བསྒྲུབ་བྱ་རིགས་དྲུག་སྟེ། ། ཉམས་ལེན་འབྲེལ་ལ་ཡོ་བྱད་ལོངས་སུ་སྤྱོད། ། མཉམ་རྗེས་རྣམས་སུ་པདྨ་དཀར་པོས་བསྡུས། ། བསྲུང་བྱ་རྩ་ལྟུང་བཅུ་བཞི་ཡན་ལག་དང་བཅས་པ། བསྒྲུབ་བྱ་རིགས་དྲུག་གི་དམ་ཚིག་ཐུན་མོང་དང་ཐུན་མོང་མིན་པ་ཉམས་སུ་ལེན་པ་དང་འབྲེལ་བའི་དམ་ཚིག་དེ་ལ་ནང་གསེས་སུ། ཡོ་བྱད་ཀྱི་དམ་ཚིག་བྲིས་སྐུ་གླེགས་བམ་ཕྱག་རྒྱ་ལ་སོགས་པ། ལོངས་སྤྱོད་ཀྱི་དམ་ཚིག་ཤ་ལྔ་བདུད་རྩི་ལྔ་བཏུང་བ་ལྔ་རིག་མ་ལྔ་ལ་སོགས་པ། མཉམ་གཞག་གི་དམ་ཚིག་(༨༩བ)དགོངས་ཏེ་གསུངས་པ་བཞི། རྗེས་སྤྱོད་ཀྱི་དམ་ཚིག་བརྟུལ་ཞུགས་ཉེར་ལྔ་གུར་གྱི་བཅུ་བཞི་ལ་སོགས་པ་སྟེ། དེ་ལྟར་དམ་ཚིག་གི་རྣམ་གྲངས་གསུམ་དུ་ཀུན་མཁྱེན་པདྨ་དཀར་པོས་བསྡུས་སོ། ། རང་བྱུང་རྒྱལ་བས་བསྡུས་པ་བཞི་རུ་གསུངས། ། ཀུན་མཁྱེན་རང་བྱུང་རྒྱལ་བས་དམ་ཚིག་རྒྱ་མཚོར། དཀོན་མཆོག་ཕྱི་ནང་བྱང་ཆུབ་སེམས། ། ཡུལ་དང་ཡུལ་ཅན་ཕྱི་ནང་རྐྱེན། ། ཚར་གཅོད་རྗེས་བཟུང་ཕྲིན་ལས་སུ། ། དམ་ཚིག་ཐམས་ཅད་བསྡུས་པའོ། ། ཞེས་དཀོན་མཆོག་གསུམ་དང་ཕྱི་ནང་ཀུན་རྫོབ་དོན་དམ་གྱི་བྱང་སེམས་མི་སློང་བ་དང༌། ཡུལ་དང་ཡུལ་ཅན་གྱི་དག་པ་ལ་ཐེ་ཚོམ་མི་ཟ་བ་དང༌། ཕྱི་ནང་གི་མཐུན་པའི་རྐྱེན་ཉེ་བར་བསྟེན་པ་དང༌། ཚར་གཅོད་རྗེས་བཟུང་གི་ཕྲིན་ལས་དུས་ལས་མི་འདའ་བ་རྣམས་ཀྱིས་དམ་ཚིག་ཐམས་ཅད་བསྡུས་པ་སྟེ། དེ་ལྟར་ན། བསྡུས་པ་བཞི་རུ་གསུངས་སོ། ། མདོར་ན་བསྲུང་བྱ་བསྒྲུབ་བྱ་གཉིས་སུ་འདུ། ། ཇི་སྐད་བཤད་པའི་དམ་ཚིག་དེ་དག་ཐམས་ཅད་ཀྱང་། མདོར་བསྡུ་ན། བསྲུང་བྱ་དང་བསྒྲུབ་བྱའི་དམ་ཚིག་གཉིས་སུ་འདུ་སྟེ། སྔ་མ་ནི། རྩ་ལྟུང་ཡན་ལག་བརྟུལ་ཞུགས་དང་བཅས་པ་རྣམས་དང༌། ཕྱི་མ་ནི། རིགས་ལྔའི་སྡོམ་པ་དང་དབང་གོང་མའི་དམ་ཚིག་ལ་སོགས་པ་རྣམས་སོ། ། དྲོད་ཐོབ་བརྟུལ་ཞུགས་དྲུག་ཏུ་གུར་ལས་གསུངས། ། ཏིང་ངེ་འཛིན་བརྟན་ཞིང་དྲོད་ཀྱི་ཡེ་ཤེས་ཐོབ་པའི་གང་ཟག་གི་བརྟུལ་ཞུགས་སྤྱོད་པའི་རྣམ་གྲངས་དྲུག་རྡོ་རྗེ་གུར་ལས་གསུངས་ཏེ། ཕྱག་རྒྱ་བཅིངས་པ་རྣམ་པར་སྤང༌། ། མཆོད་རྟེན་ལས་ནི་མི་བྱ་ཞིང༌། ། རྡོ་རྗེ་གསུམ་མཆོག་ཕྱག་མི་འཚལ། ། དཀྱིལ་འཁོར་ལ་སོགས་ལུས་ཀྱི་ལས། ། རྨི་ལམ་དུ་ཡང་མི་བྱའོ། ། བླ་མ་སྤུན་ཟླར་ཕྱག་བྱ་ཡི། ། སློབ་དཔོན་གཞན་ལ་ཕྱག་མི་འཚལ། ། ཞེས་གསུངས་ཏེ། ཕྱི་རོལ་གྱི་ཕྱག་རྒྱ་འཆིང་བ། སཱཙྪ་གདབ་པ། རྡོ་རྗེ་གསུམ་གྱི་གཟུགས་བརྙན་ལ་ཕྱག་བྱ་བ། དཀྱིལ་འཁོར་བྲི་བ་སོགས་ལུས་ཀྱི་ལས་བྱ་བ་རྣམས་སྤང༌། རང་གི་བླ་མ་བརྒྱུད་པར་བཅས་པ་ལ་(༩༠ན)ཕྱག་བྱ་ཞིང༌། སློབ་དཔོན་གཞན་ལ་ཕྱག་མི་འཚལ་བ་རྣམས་སོ། ། ཡེ་ཤེས་ཚད་ཕྱིན་བླང་དོར་ཀུན་ལས་འདས། ། བརྟན་པ་ཆེར་ཐོབ་ཅིང་ཡེ་ཤེས་ཚད་དུ་ཕྱིན་པའི་གང་ཟག་ལ་སྡོམ་པ་དང་སྡོམ་པ་མ་ཡིན་པ་དང༌། བླང་བྱ་དང་དོར་བྱ། སྤྱད་བྱ་དང་སྤྱད་བྱ་མ་ཡིན་པ་ལ་སོགས་པ་གཉིས་རྟོག་གི་སྣང་བ་ཀུན་ལས་འདས་ཏེ་སྲུང་བ་ཆེན་པོའི་དམ་ཚིག་ཏུ་ལྷུན་གྱིས་གྲུབ་པའོ། ། ན༣ གསུམ་པ་ཉམས་པའི་ཚད་དང་ཕྱིར་བཅོས་བཤད་པ་ལ་གཉིས། པ༡ ལྟུང་བའི་ཚད། པ༢ ཕྱིར་བཅོས་སོ། ། པ༡ དང་པོ་ནི། ཀུན་བསླངས་དེར་ཤེས་བརྟན་དང་བར་དུ་བཅད། ། མ་འཁྲུལ་འགྱོད་མེད་ཚད་འདས་ཕམ་པ་སྟེ། ། ཡན་ལག་མ་ཚང་སྦོམ་ལྟུང་ལ་སོགས་དཔག ། རྩ་ལྟུང་རྣམས་ལ་སྦྱོར་བ་བདུན་ཚང་ན་ཕམ་པ་དངོས་གཞིར་གྱུར་ཏེ། སྦྱོར་བདུན་ནི། བསམ་པ་ཉོན་མོངས་པས་ཀུན་ནས་བསླངས་པ། དེ་ལ་དེ་ཡིན་པར་ཤེས་པ། ལུས་ངག་གི་སྦྱོར་བ་གང་གིས་ཉེས་པ་སྐྱེད་པ་དེ་བརྟན་པ། བར་བཅད་ཅེས་པ་ལྟུང་བ་སོ་སོའི་དངོས་གཞི་ལ་ཞུགས་པ་དང༌། འགྱོད་པ་མེད་པ་ཡི་རང་བ་དང༌། སེམས་མ་འཁྲུལ་པ་དང༌། བླ་མ་བཞུགས་ན་ལོ་གཅིག་གམ་གསུམ་ཚུན་དུ་མ་བཤགས་ན་ཚད་ལས་འདས་པ་སྟེ་བདུན་ཚང་ན་ཕམ་པ་དང༌། ཚད་ལས་མ་འདས་པའི་ཡན་ལག་དྲུག་ཚང་ན་ལྟུང་བ་ཞེས་སོ་ཐར་གྱི་ལྷག་མ་དང་འདྲ་བ་དང༌། ཡན་ལག་གཞན་མེད་པའི་དངོས་གཞི་ནི་སྦོམ་པོ་དང༌། དེ་བས་ཀྱང་དམན་ན་ལྟུང་བྱེད་དང༌། ཡན་ལག་གཞན་མེད་པའི་ལུས་ངག་གི་སྦྱོར་བ་གཅིག་ནི་ཉེས་བྱས་དང་འདྲ་ལ་དྲན་པ་ཉམས་ཏེ་བྱས་པའི་དངོས་གཞིའང་ཉེས་བྱས་སོ། །ཡན་ལག་གི་ལྟུང་བ་བརྒྱད་ལའང་སྦྱོར་བདུན་གྱི་དབང་གིས་སྦོམ་ལྟུང་ཉེས་བྱས་དེ་བཞིན་དུ་འགྱུར་རོ། ། གཞན་གྱི་དོན་དུ་འགྱུར་བར་མཐོང་བ་སོགས་དོན་ཆེན་པོ་དང༌། བར་ཆད་དུ་འགྲོ་བ་དང༌། གནང་བ་ཐོབ་པ་དང༌། ན་ཞིང་མི་ནུས་པ་སོགས་ལ་དེ་དག་ལྟུང་བའི་གཟུགས་བརྙན་ཏེ། (༩༠བ)ཉེས་པ་མེད་པ་སྙིང་པོ་རྒྱན་ལས་གསུངས་སོ། ། ཡང་ན་རྟེན་གྱི་ཡན་ལག་དམ་ཚིག་ཐོབ་ལ་མ་ཉམས་པ། ཡུལ་གྱི་ཡན་ལག་བླ་མ་ལ་སོགས་པ་དེ་དང་དེ་ཡིན་པ། བསམ་པའི་ཡན་ལག་སྦྱོར་བ་ངོ་ཚ་མེད་པ། དངོས་གཞིར་གཉེན་པོས་མ་སླེབ་པ། རྗེས་འགྱོད་པ་མེད་ཅིང་དགའ་བར་བྱེད་པ། སྦྱོར་བའི་ཡན་ལག་ལས་དངོས་ལ་ཞུགས་པ། མཐར་ཐུག་ཡན་ལག་དེ་དང་དེ་ཟིན་པ་སྟེ་ཡན་ལག་ལྔ་རུའང་བཤད་དེ་སྔ་མ་དང་དོན་གཅིག་གོ། ། དེ་དག་འབྱུང་བའི་རྒྱུའང་སྡོམ་པའི་རྒྱུད་ལས། མི་ཤེས་པ་དང་བག་མེད་དང༌། ། ཉོན་མོངས་མང་དང་མ་གུས་དང༌། ། བརྗེད་ངེས་དྲན་པ་མི་གསལ་བ། ། འདི་དྲུག་དམ་ཚིག་ཉམས་པའི་རྒྱུ། ། ཞེས་གསུངས་པ་ལྟར། རྒྱུ་སྤོང་བ་ལ་བརྩོན་ན་འབྲས་བུ་ཤུགས་ཀྱིས་ཁེགས་པ་ཡིན་ཞིང༌། སྤྱིར་གསང་སྔགས་ཀྱི་དམ་ཚིག་ནི་ཁེ་ཉེན་ཆེ་ཞིང་ཤིན་ཏུ་གཉན་པ་དང་། རྩ་ལྟུང་དང་པོ་རྡོ་རྗེ་སློབ་དཔོན་གྱི་དམ་ཚིག་དང་འགལ་ན་དམ་ཚིག་གཞན་བསྲུངས་ཀྱང་རྩ་བ་བཅད་པའི་ལྗོན་ཤིང་དང་མཚུངས་པས་བླ་མའི་དམ་ལས་མ་འགལ་བ་ཙམ་ཞིག་མ་བྱུང་བའི་ཐབས་མེད་དོ། ། པ༢ གཉིས་པ་[ཕྱིར་བཅོས་]ནི། ཕྱིར་བཅོས་ཉེར་ལྔ་སྙིང་པོ་རྒྱན་ལས་འབྱུང༌། ། སྤྱིར་ལྟུང་བ་བྱུང་ནས་ཕྱིར་བཅོས་དགོས་ལ། དེའི་ཚུལ་ཡང༌། དབང་དུ་ཙམ་ཐོབ་པས་དཀྱིལ་འཁོར་གྱི་ལྷའི་གྲངས་ཇི་སྙེད་པ་དེ་སྙེད་