Tibetan
འབྱུང་བ་དེའོ། ། དེ་ལྟར་དུས་ཀྱི་འཁོར་ལོའི་ལོ་དང་བཅས་པའི་ལོ་བརྒྱ་པོ་དེ་གཟའི་ཞག་ཕྱེད་པ་གསུམ་ཡིན་པའི་ཕྱེད་པ་དང་པོ་སྙིང་སྟོབས། གཉིས་པ་རྡུལ། གསུམ་པ་མུན་པའི་བདག་ཉིད་ཅན་དུ་གནས་ཏེ། དེ་ཡང་གོ་རིམ་བཞིན་དུ་། ཕྱི་རོལ་གྱི་བད་མཁྲིས་རླུང་གསུམ་གྱི་ཆོས་ཡིན་ལ། ནང་དུ་སྐྱེས་བུའི་བད་མཁྲིས་རླུང་གསུམ་ཆ་མཉམ་པས་ལུས་གནས་ཤིང་མི་མཉམ་པས་ནད་བསྐྱེད་དེ་འཇིག་པ་ལྟར། ཕྱི་རོལ་དུའང་དེ་གསུམ་ཆ་མཉམ་མི་མཉམ་ལས་གནས་འཇིག་བྱེད་ཅིང༌། གང་མི་མཉམ་པའི་རྒྱུ་ཡང་དབུ་མ་ཡེ་ཤེས་ཀྱི་ཆ་དུས་འཁོར་གྱི་ལོས་བྱེད་དོ། ། གཟའ་ཞག་གསུམ་དུས་འཁོར་དང་བཅས་པ་ལོ་ཉིས་བརྒྱ་ཡིན་ལ། དེ་ཟླ་བ་དང་ཞག་ཏུ་གསིལ་བའི་ཞག་རེ་ལ་ཆུ་ཚོད་སུམ་ཅུར་གནས་པ་དྲིལ་བས་ས་ཡ་བཞི་དང་སུམ་འབུམ་ཉི་ཁྲི། དེ་ནང་དུ་སྐྱེས་བུའི་ཞག་ལ་སྦྱར་ན་ཞག་ཉིས་བརྒྱ། དེ་ལ་དབུགས་འབུམ་ཕྲག་ཞེ་གསུམ་དང་ཉི་ཁྲི། དེའི་མཐར་ཐ་མལ་པ་ལའང་རླུང་དབུ་མར་ཅུང་ཟད་རེ་འཇུག་པ་བཞིན་དུ་ཕྱི་རོལ་ཏུའང་དབུགས་དང་ཆུ་ཚོད་ཀྱི་གྲངས་མཚུངས་ལོ་འབུམ་ཕྲག་ཞེ་གསུམ་དང་ཉི་ཁྲིའི་མཐར་གཟའ་ཐམས་ཅད་སྟོང་པར་འཇུག་སྟེ་དུས་བཞི་ཆེན་པོ་གཅིག་རྫོགས་ཤིང༌། སླར་ལོངས་སྤྱོད་ཀྱི་ངེས་པ་ལས་བརྩམས་རྫོགས་ལྡན་གྱི་དུས་སྐྱེ་བ་སོགས་དུས་བཞི་ཡང་དང་ཡང་དུ་འཁོར་བ་ཡིན་ནོ། ། ཆ༣ གསུམ་པ་དེ་དག་གི་མཇུག་བསྡུ་བ་ནི། རྒྱལ་བས་མངོན་པར་ཞེན་པས་མཐའ་གཅིག་ཏུ། ། གསུངས་མིན་གདུལ་བྱ་མོས་པའི་དབང་ལས་སོ། ། དེ་ལྟར་ན། སྣོད་བཅུད་ཀྱི་གནས་ལུགས་མངོན་པ་ནས་བཤད་པ་སོགས་དང་མི་མཐུན་པ་ཅི་སྙམ་ན། རྒྱལ་བ་ཐམས་ཅད་མཁྱེན་པ་དེས་དོན་དམ་པར་སྣོད་བཅུད་ཀྱི་འཇིག་རྟེན་དངོས་པོར་གྲུབ་པ་མ་གཟིགས་པས་ཕྱོགས་གཅིག་ཏུ་མངོན་པར་ཞེན་ནས་མཐའ་(༣༦ན)གཅིག་ཏུ་ལུགས་སྲོལ་འདིའོ་ཞེས་རྣམ་པར་གཞག་སྟེ་གསུངས་པ་མ་ཡིན་གྱི། གདུལ་བྱ་རྣམས་ཀྱི་ཁམས་དང་མོས་པ་དང་དབང་པོའི་བྱེ་བྲག་དམན་མཆོག་གི་ཁྱད་པར་ལས་བརྩམས་ཏེ་གསུངས་པས་ཐམས་ཅད་ཀྱང་བདེན་པ་འབའ་ཞིག་ཡིན་ལ། འོན་ཀྱང་ཕྱི་ནང་གཞན་གསུམ་སྦྱོར་བའི་གནད་ཀྱིས་ལུགས་འདི་ནི་ཕུལ་དུ་གྱུར་པར་ཟུང་ཞིག ། ཅ༢ རྩ་བའི་གཉིས་པ་འཇལ་བྱེད་ཀྱི་ཚད་བཤད་པ་ལ་གཉིས། ཆ༡ མཚམས་སྦྱར། ཆ༢ བཤད་པ་དངོས་སོ། ། ཆ༡ དང་པོ་ནི། དེ་དག་འཇལ་བྱེད་ཚད་ཀྱི་ཁྱད་པར་ཡང༌། ། ཞེས་གླེང་བསླངས་ཏེ། ཆ༢ [གཉིས་པ་]དེ་ལ་གཉིས། ཇ༡ དུས་འཁོར་གྱི་རང་ལུགས། ཇ༢ ཞར་བྱུང་མངོན་པའི་ལུགས་བཤད་པའོ། ཇ༢ དང་པོ་ནི། ཕྲ་རབ་བརྒྱད་ཀྱིས་ཕྲ་མོ་གཅིག་དེ་བཞིན། ། སྐྲ་རྩེ་ཀེ་ཚེ་ཤིག་ནས་སོར་མོ་ནི། ། ཉེར་བཞི་ཁྲུ་གང་ཁྲུ་བཞི་གཞུ་འདོམ་སྟེ། ། ཉིས་སྟོང་རྒྱང་གྲགས་དེ་བཞིས་དཔག་ཚད་འགྱུར། ། དེ་ལ་སྣོད་བཅུད་དེ་དག་འཇལ་བྱེད་ཚད་ཀྱི་རྣམ་པར་གཞག་པ་ནི། རྡུལ་ཕྲ་རབ་བརྒྱད་ཀྱིས་རྡུལ་ཕྲ་མོ་གཅིག་དང༌། དེ་བཞིན་དུ། སྐྲ་རྩེ་དང༌། ཀེ་ཚེ་དང༌། ཤིག་དང༌། ནས་དང༌། སོར་མོ་སྟེ། བདུན་པོ་རྣམས་སྔ་མ་སྔ་མ་བརྒྱད་བརྒྱད་ཕྲེད་དུ་གནས་པ་ཕྱི་མ་ཕྱི་མའི་ཞེང་ཚད་ཡིན་ལ། སོར་མོ་ཉི་ཤུ་རྩ་བཞི་ལ་ཁྲུ་དང༌། ཁྲུ་བཞི་ལ་གཞུ་དང༌། བཞུ་སྟོང་ཕྲག་གཉིས་ལ་རྒྱང་གྲགས་དང༌། རྒྱང་གྲགས་བཞིས་དཔག་ཚད་དུ་འགྱུར་ཏེ། དེས་འཇིག་རྟེན་གྱི་ཁམས་ཀྱི་ཚད་འཇོག་པར་བྱེད་པ་ཡིན་ནོ། ། ཇ༢ གཉིས་པ་ལ་གཉིས། ཉ༡ མདོར་བསྟན། ཉ༢ རྒྱས་བཤད་དོ། ། ཉ༡ དང་པོ་ནི། མངོན་པར་གཟུགས་དུས་མིང་གིས་དབྱེ་བ་སྟེ། ། ཞེས་མངོན་པ་བ་རྣམས་ཀྱིས་ཡུལ་དུས་རྩོམ་བྱེད་དང་འཇལ་བྱེད་གཟུགས་དང་དུས་དང་མིང་གི་མཐའི་དབྱེ་བས་བསྡུས་ཏེ་བསྟན་པས། དེའང་ཞར་བྱུང་དུ་འཆད་པར་བྱའོ། ། ཉ༢ གཉིས་པ་ལ་གསུམ། ཏ༡ དང་པོ་གཟུགས་ཀྱི་མཐའ་ནི། གཟུགས་མཐའ་ཕྲ་རབ་རྡུལ་བདུན་རྡུལ་ཕྲན་གཅིག །(༣༦བ) དེ་བཞིན་ལྕགས་ཆུ་རི་བོང་ལུག་དང་གླང༌། ། ཉི་རྡུལ་སྲོ་མ་ཤིག་ནས་སོར་ཚིགས་སོར། ། ཉི་ཤུ་རྩ་བཞི་ཁྲུ་གང་དེ་བཞི་ལ། ། གཞུ་འདོམ་ཞེས་གྲགས་ལྔ་བརྒྱར་རྒྱང་གྲགས་གཅིག ། དགོན་པའི་ཚད་དེ་དེ་བརྒྱད་དཔག་ཚད་དོ། ། དེ་ཡིས་སྟོང་གསུམ་བར་དུ་རྩོམ་ཞིང་གཞལ། ། ཞེས་པ་སྟེ། གཟུགས་ཀྱི་མཐའ་རྡུལ་ཕྲ་རབ་བདུན་ལ་རྡུལ་ཕྲན་གཅིག །དེ་བདུན་ལ་ལྕགས་རྡུལ་གཅིག །དེ་བདུན་ལ་ཆུ་རྡུལ་གཅིག །དེ་བདུན་ལ་རི་བོང་རྡུལ་གཅིག །དེ་བདུན་ལ་ལུག་རྡུལ་གཅིག །དེ་བདུན་ལ་གླང་རྡུལ་གཅིག །དེ་བདུན་ལ་ཉི་ཟེར་གྱི་རྡུལ་གཅིག །དེ་བདུན་ལ་སྲོ་མ་གཅིག །དེ་བདུན་ལ་ཤིག་གཅིག །དེ་བདུན་ལ་ནས་གཅིག །དེ་བདུན་ལ་སོར་མོ་དབུས་མའི་ཚིགས་གཅིག་གོ། །སོར་མོ་ཉི་ཤུ་རྩ་བཞི་ལ་ཁྲུ་གང་ངོ༌། །ཁྲུ་གཞི་ལ་གཞུ་གང་སྟེ་འདོམ་གང་ངོ༌། །གཞུ་འདོམ་ལྔ་བརྒྱ་ལ་རྒྱང་གྲགས་གཅིག་སྟེ། གྲོང་ལས་དེ་སྲིད་འཕགས་པ་ལ་དགོན་པ་ཞེས་བྱའོ། །དེ་ལས་ཉེ་བ་རྒྱང་གྲགས་ཕྱེད་ལ་བས་མཐའ་ཞེས་བྱའོ། །རྒྱང་གྲགས་བརྒྱད་ལ་དཔག་ཚད་གཅིག་སྟེ་གཞུ་འདོམ་བཞི་སྟོང་ངོ༌། །དེས་ནི་རིའི་རྒྱལ་པོ་རི་རབ་ནས་སྟོང་གསུམ་གྱི་འཇིག་རྟེན་གྱི་བར་དུ་རྩོམ་པ་དང་གཞལ་བར་ནུས་སོ། ། ཏ༢ གཉིས་པ་དུས་ཀྱི་མཐའ་ནི། སེ་གོལ་དྲུག་ཅུ་བཞིར་དབྱེའི་ཆ་གཅིག་ནི། ། དུས་མཐའི་སྐད་ཅིག་མ་སྟེ་བརྒྱ་ཉི་ཤུ། ། དེ་ཡི་སྐད་ཅིག་དྲུག་ཅུ་ཐང་ཅིག་སྟེ། ། སུམ་ཅུ་ཡུད་ཙམ་སུམ་ཅུ་ཉིན་ཞག་གཅིག ། སུམ་ཅུ་ཟླ་བ་བཅུ་གཉིས་ལོ་གཅིག་གིས། ། གྲངས་ཅན་ནས་ནི་གྲངས་མེད་བར་དུ་འགྲུབ། ། སྐྱེས་བུ་སྟོབས་དང་ལྡན་པས་སེ་གོལ་གཏོགས་པ་ལ་སྐད་ཅིག་མ་དྲུག་ཅུ་རྩ་བཞི་འདའ་བས་དེའི་ཆ་གཅིག་ནི་དུས་ཀྱི་མཐའི་སྐད་ཅིག་མ་སྟེ། ཁ་ཅིག་དྲུག་ཅུར་ཡང་འདོད་དོ། ། སྐད་ཅིག་མ་བརྒྱ་ཉི་ཤུ་ལ་དེའི་སྐད་ཅིག །དེའི་སྐད་ཅིག་མ་དྲུག་ཅུ་ལ་ཐང་ཅིག །ཞག་གཅིག་ལ་ཐང་ཅིག་དགུ་བརྒྱ་ཡོད་པས་(༣༧ན)ཞག་གི་དགུ་བརྒྱའི་ཆའོ། །ཐང་ཅིག་སུམ་ཅུ་ལ་ཡུད་ཙམ། ཡུད་ཙམ་སུམ་ཅུ་ལ་ཉིན་ཞག་གཅིག །ཉིན་ཞག་སུམ་ཅུ་ལ་ཟླ་བ་གཅིག །ཟླ་བ་བཅུ་གཉིས་ནི་ལོ་གཅིག་སྟེ། འདི་དག་གླིང་བཞི་གླིང་ཕྲན་བརྒྱད་དེ་བཅུ་གཉིས་སུ་རིམ་པས་འཁོར་བ་ནི་ཕྱི་ནང་སྐྱེ་མཆེད་བཅུ་གཉིས་དང༌། རྟེན་འབྲེལ་བཅུ་གཉིས་ཀྱི་བྱེད་པ་སྟེ། ཁྱིམ་བཅུ་གཉིས་ཞེས་བྱ་བའི་རིམ་པར་ཡང་འགྱུར་རོ། ། དེ་ལྟ་བུའི་གྲངས་གནས་ལ་མཁས་པས་དུས་དང་སྐྱེ་དགུ་རྣམས་ཀྱི་ཚེ་ལ་སོགས་པ་བརྒྱ་སྟོང་ཁྲི་འབུམ་སོགས་གྲངས་ཅན་ནས། གྲངས་ཀྱི་གནས་དྲུག་ཅུ་བརྒལ་བའི་གྲངས་མེད་པའི་བར་དུ་གཞལ་བའི་རིགས་པ་འགྲུབ་པ་ཡིན་ནོ། ། ཏ༣ གསུམ་པ་མིང་མཐའ་ནི། མིང་མཐའ་ཡི་གེ་སིལ་བུ་འདུས་པ་ལས། ། མིང་འབྱུང་དེ་ལས་ཚིག་གི་ཕྲེང་བ་སྟེ། ། བརྟགས་ན་རེག་ལ་མ་འབྱར་རྫུན་པའོ། ། མིང་གི་མཐའ་ནི་ཡི་གེ་སིལ་བུ་བ་དབྱངས་ཨ་དང་བསལ་བྱེད་ཀ་ལ་སོགས་པ་ཡིན་ཅིང༌། དེ་དག་གཉིས་སམ་གསུམ་ལ་སོགས་འདུས་པ་ལས་མིང་འབྱུང་སྟེ། དཔེར་ན། དྷ་དང་ཨཱི་འདུས་པ་དྷཱིཿབློ་གྲོས་ཞེས་པའམ། གསལ་བྱེད་གསུམ་དང་དབྱངས་གཉིས་འདུས་པས། བུདྡྷ་སངས་རྒྱས་ཞེས་པ་ལྟ་བུ། མིང་མང་དུ་འདུས་པ་དེ་ལས་ཚིག་གི་ཕྲེང་བ་འབྱུང་སྟེ། ན་མོ་བུདྡྷ་ཡ། སངས་རྒྱས་ལ་ཕྱག་འཚལ་ལོ། །ཞེས་པ་ལྟ་བུ། དེའང་ཡི་གེ་ནི་མིང་གི་རྩོམ་གཞི་ཡིན་པས་དོན་མི་སྟོན་ལ་མིང་གིས་དོན་དང༌། ཚིག་གིས་དོན་གྱི་ཁྱད་པར་སྟོན་ཅིང༌། དེ་དག་ཀྱང་ལེགས་པར་བརྟགས་ན་མང་པོའམ་ཉུང་ངུ་ཇི་ལྟར་འདུས་ཀྱང་དེའི་རང་བཞིན་རེག་ལ་མ་འབྱར་བ་ཡི་གེ་སིལ་བུ་མ་འདྲེས་པར་གནས་ཏེ། ཐག་པ་རགས་པའི་དུས་ན་སྤུ་ཉག་མ་རེ་རེར་གནས་པ་དང༌། རྔ་མའི་ཆུན་པོ་ཉིད་དུ་སྣང་བ་ན་ཉག་མ་རེ་རེ་བ་དང༌། ནེའུ་གསེང་དུ་སྣང་བ་ན་རྩྭ་ཉག་རེ་རེར་སྣང་བ་(༣༧བ)བཞིན་བདེན་དངོས་སུ་མ་གྲུབ་པ་ཆུ་ཟླ་དང་མིག་ཡོར་ལ་སོགས་པ་བཞིན་དུ་སྣང་དུས་ཉིད་ནས་རྫུན་པའི་རང་བཞིན་དུ་གནས་པའོ། ། དུས་ཀྱི་འཁོར་ལོའི་ལུགས་དམིགས་སུ་བསལ་བ་དང་འཇལ་བྱེད་ཚད་བརྗོད་པའི་སྐབས་སོ། ། དུས་ཀྱི་འཁོར་ལོའི་ལུགས་དམིགས་སུ་བསལ་བ་དང་འཇལ་བྱེད་ཚད་བརྗོད་པ་སྐབས་གསུམ་པའི་འགྲེལ་པའོ།། །། བཞི་པ། འཁོར་བ་འགྲུབ་བྱེད་རྒྱུ་རྐྱེན་བསྟན་པའི་སྐབས། ང༤ སྐབས་བཞི་པ་སྣོད་བཅུད་ཀྱི་རྒྱུ་རྐྱེན་བཤད་པ་ལ་གཉིས། ཅ༡ མཚམས་སྦྱར་བ་དང༌། ཅ༢ བཤད་པ་དངོས་སོ། ། འཇིག་རྟེན་གང་གི་རྒྱུ་ལས་བྱུང་ཞེ་ན། ། ཞེས་གླེང་བསླང་བས་མཚམས་སྦྱར་ནས། ཅ༢ [གཉིས་པ་]དངོས་ལ་གཉིས། ཆ༡ ཕྱི་རོལ་པའི་ལུགས་དགག་པ། ཆ༢ རང་ལུགས་གཞག་པའོ། ། ཆ༡ དང་པོ་ནི། དབང་ཕྱུག་དྲང་སྲོང་བདག་དང་ངོ་བོ་ཉིད། ། བྱུང་ཞེས་ཕྱི་རོལ་པ་རྣམས་ལོག་པར་སྨྲ། ། དབང་ཕྱུག་པ་དག་གི་གཞུང་ལས། དབང་ཕྱུག་རྫ་མཁན་དང་འདྲ་སྣ་ཚོགས་འདི་སྤྲུལ་བྱེད་པོར་མ་གྲུབ་ན། ། ས་གཞི་འདི་མི་འགྲུབ་ཅིང་རི་རབ་འདི་མིན་རྒྱ་མཚོའང་མ་ཡིན་ཏེ། ། ཉི་ཟླ་སྐར་ལྡན་བཀོད་པ་འདི་དག་མིག་ཡུལ་དུ་ནི་མི་འགྱུར་ལ། ། ཡོད་པའི་ཕྱིར་ན་དབང་ཕྱུག་འགྲོ་བའི་བྱེད་པོ་ཡིན་ཞེས་ཁ་ཅིག་སྨྲ། ། ཞེས་སྣོད་དང་བཅུད་ཀྱི་འཇིག་རྟེན་འདི་དག་དབང་ཕྱུག་རྫ་མཁན་ལྟ་བུས་བྱས་པར་འདོད་པ་དང༌། གཞན་ཡང་། རིག་བྱེད་ཀྱི་མཐའ་གསང་བར་སྨྲ་བ་དག་གིས་འཇིག་རྟེན་ཐམས་ཅད་ཀྱི་འོག་ན་སྐྱེས་བུ་དྲང་སྲོང་ཆེན་པོ་ཉི་མའི་མདོག་ཅེས་བྱ་བ་ཡོད་དེ། དེས་འཇིག་རྟེན་ཐམས་ཅད་བྱས་སོ་ཞེས་ཟེར་བ་དང༌། ཞེས་སྣོད་དང་བཅུད་ཀྱི་འཇིག་རྟེན་འདི་དག་དབང་ཕྱུག་རྫ་མཁན་ལྟ་བུས་བྱས་པར་འདོད་པ་དང༌། གཞན་ཡང་། རིག་བྱེད་ཀྱི་མཐའ་གསང་བར་སྨྲ་བ་དག་གིས་འཇིག་རྟེན་ཐམས་ཅད་ཀྱི་འོག་ན་སྐྱེས་བུ་དྲང་སྲོང་ཆེན་པོ་ཉི་མའི་མདོག་ཅེས་བྱ་བ་ཡོད་དེ། དེས་འཇིག་རྟེན་ཐམས་ཅད་བྱས་སོ་ཞེས་ཟེར་བ་དང༌། ཁ་ཅིག་གིས་བདག་གམ་གཙོ་བོ་ལས་ཐམས་ཅད་བྱུང་བར་འདོད་པ་དང༌། ཆད་པར་སྨྲ་བ་རྣམས་སྣོད་བཅུད་ཐམས་ཅད་རྒྱུ་མེད་ངོ་བོ་ཉིད་ཀྱིས་བྱུང་བར་འདོད་དེ། འདི་སྐད་དུ། བཟང་མོ་མང་ཐོས་གང་སྨྲ་བ། ། སླུ་བྱེད་སྤྱང་ཀིའི་རྗེས་དང་མཚུངས། ། པད་མོའི་གེ་སར་སུ་ཡིས་བྱས། ། རྨ་བྱའི་རི་མོ་སུ་ཡིས་བྲིས། ། ཚེར་མ་རྣོན་པོ་སུ་ཡིས་བརྡར། ། ཐམས་ཅད་རྒྱུ་མེད་ངོ་བོས་བྱུང༌། ། ཞེས་པ་ལ་སོགས་པ་ཕྱི་རོལ་རྟག་ཆད་དུ་སྨྲ་བའི་མུ་སྟེགས་བྱེད་རྣམས་ཀྱིས་མུན་པའི་བློས་རྣམ་པར་བརྟགས་ཏེ་(༣༨ན)ལོག་པར་སྨྲ་བའི་ཚུལ་མང་པོ་རྣམས་ནི་དམུས་ལོང་གིས་རྒྱལ་ཁམས་ཀྱི་དབྱིབས་ལ་དཔྱད་པ་བཞིན་དོན་ལ་མི་རེག་སྟེ་རྣམ་པར་འཁྱམས་པའོ། ། ཆ༢ གཉིས་པ་[རང་ལུགས་གཞག་པ་]ལ་གསུམ། ཇ༡ རྒྱུ་སྤྱིར་བསྟན་པ། ཇ༢ སྣོད་ཀྱི་རྒྱུ་བྱེ་བྲག་ཏུ་བཤད་པ། ཇ༣ ཐུན་མོང་གི་འགྲུབ་བྱེད་བསྟན་པའོ། ། ཇ༡ དེའི་དང་པོ་ལ་གཉིས། ཉ༡ ལས་ལས་གྲུབ་ཚུལ། ཉ༢ དེའི་རྟེན་བཤད་པའོ། ། ཉ༡ དང་པོ་ནི། མདོ་ལས་ཕྲ་རྒྱས་དང་བཅས་སྣ་ཚོགས་པའི། ། ལས་ལས་སྣོད་བཅུད་འཇིག་རྟེན་སྐྱེས་པར་གསུངས། ། དེ་བཞིན་གཤེགས་པའི་བསྟན་པ་དམ་པའི་ཚུལ་གྱི་མདོ་སྡེ་རྣམས་ལས་སྣོད་བཅུད་ཀྱི་འཇིག་རྟེན་དེ་དག་སུས་བྱས་ཤེ་ན། དབང་ཕྱུག་སོགས་བྱེད་པ་པོ་སུས་ཀྱང་བློ་སྔོན་དུ་གཏང་ནས་བྱས་པ་མེད་དེ། ལས་ལས་འཇིག་རྟེན་སྣ་ཚོགས་སྐྱེས། ། ཞེས་པ་ལྟར། ཕྲ་རྒྱས་སམ་ཉོན་མོངས་པ་དང་བཅས་པའི་ལས་ཐུན་མོང་དང་ཐུན་མོང་མ་ཡིན་པ་ལས་སྣོད་བཅུད་ཀྱི་འཇིག་རྟེན་ཐམས་ཅད་སྐྱེས་པར་གསུངས་སོ། ། ཉ༢ གཉིས་པ་[ལས་ཀྱི་རྟེན་བཤད་པ་]ནི། ལས་ཀྱི་རྟེན་ནི་ཐོབ་པ་ཆུད་མི་ཟ། ། ཡིད་ཤེས་རྒྱུན་དང་ཀུན་གཞིའི་རྣམ་པར་ཤེས། ། གང་ཟག་ཙམ་དང་འོད་གསལ་སོགས་སུ་བཤད། ། ལས་རྣམས་ནི། བྱས་མ་ཐག་ཏུ་འགགས་ཀྱང་དེ་ཉིད་བསྐལ་པ་བརྒྱར་ཡང་ཆུད་མི་ཟོས་པར་འབྲས་བུ་འབྱིན་པ་དེའི་ཚེ། རྒྱུ་དང་འབྲས་བུར་འབྲེལ་བའི་ལས་འབྲས་ཆུད་མི་འཛའ་བའི་རྟེན་དེ་གང་ཡིན་ཅེས་དཔྱོད་པ་ན། གྲུབ་མཐའ་སྨྲ་བ་ཁ་ཅིག་གིས། ཐོབ་པའམ་ལྡན་པ་དང༌། ཁ་ཅིག་གིས། ཆོས་གཞན་ཆུད་མི་ཟ་བ་ཞིག་གོ་ཞེས་དང༌། དེ་གཉིས་ཀྱང་བྱེ་སྨྲའི་ནང་ཚན་ཁ་ཅིག་གིས། རྫས་ཡོད་དང་གཞན་དག་བཏགས་ཡོད་ལ་འདོད་པ་དང༌། སེམས་ཙམ་པས། ཀུན་གཞིའི་རྣམ་པར་ཤེས་པའི་སྟེང་དུ་ལས་ཀྱི་བག་ཆགས་བསྒོས་པ་ལས་རྣམ་པར་སྨིན་པ་མྱོང་བས་ཀུན་གཞིའི་རྣམ་ཤེས་ཡིན་ཞེས་དང༌། ཀུན་གཞི་ཁས་མི་ལེན་པར་རྣམ་ཤེས་ཚོགས་དྲུག་ཏུ་འདོད་པ་རྣམས་ཀྱིས་ཡིད་ཤེས་ཀྱི་རྒྱུན་བཏགས་པ་ལ་འདོད་(༣༨བ)པ་དང༌། དབུ་མ་པ་འགའ་ཞིག་གིས། ང་ཙམ་དང་གང་ཟག་ཙམ་དུ་བཏགས་པའི་བཏགས་ཡོད་ལ་འདོད་པ་སོགས་ཇི་སྙེད་ཅིག་ཡོད་མོད། དེ་ཐམས་ཅད་ཀྱང་ཕྱོགས་རེ་མཐོང་བ་ལ་སྒྲོ་བཏགས་པར་ཟད་པས་དོན་གྱི་ངོ་བོ་མིན་ཀྱང་། རེ་ཞིག་དགག་སྒྲུབ་བཞག་གོ། ། སྔགས་ཀྱི་ཚུལ་ལས། ལས་གསོག་པ་པོ་འོད་གསལ་བ་མ་དག་པའི་ཁམས་དྲུག་དང་ཚོགས་པ་གཅིག་པའི་མི་ཤིགས་པ་ཕྲ་བའི་བདག་གམ་སྐྱེས་བུ་ཆེན་པོའི་གང་ཟག་དེ་ཉིད་རྣམ་པ་ཐམས་ཅད་དུ་ལས་ཀྱི་རྟེན་ཡིན་ནོ་ཞེས་བཞེད་དོ། ། ལས་དེ་ལ་ཡང་། སྣང་འགྱུར་ཐུན་མོང་བ་དང་། མྱོང་འགྱུར་ཐུན་མོང་མིན་པ་གཉིས་ཀྱི། དང་པོ་ལས་སྣོད་ཀྱི་འཇིག་རྟེན་དང༌། ཕྱི་མ་ལས་བཅུད་ཀྱི་སེམས་ཅན་འགྲུབ་ལ། རྣལ་འབྱོར་ཆེན་པོའི་རྒྱུད་དུ་གཞི་ལམ་འབྲས་གསུམ་དུ་བཞག་པའི། གཞིའི་སྐབས་སུ་སྣོད་ཀྱི་འཇིག་རྟེན་ཕྱི། བཅུད་ཀྱི་སེམས་ཅན་ནང༌། སྣོད་བཅུད་གཉིས་ཀྱི་འཆར་གཞི་ཡེ་ཤེས་དེ་གཉིས་དང་ཆོས་མཐུན་པ་ལ་གཞན་ཞེས་བྱ་སྟེ། ཕྱི་ནང་གཉིས་ལ་ཁྱབ་བྱ་དང་གཞན་དབང་ལ་ཁྱབ་བྱེད་འཇིག་རྟེན་གྱི་ཁམས་ཞེས་བྱ་བར་རྣམ་པར་གཞག་གོ། ། སོགས་ཁོངས་ནས་གཞན་ཡང་འཕགས་བོད་མཁས་པ་རྣམས་ཀྱི་བཤད་སྲོལ་སྐབས་འདིར་རགས་ཞིབ་མང་དུ་འབྱུང་ངོ༌། ། ཇ༢ གཉིས་པ་སྣོད་ཀྱི་རྒྱུ་བྱེ་བྲག་ཏུ་བཤད་པ་ལ་གཉིས། ཉ༡ བྱེ་སྨྲའི་ལུགས། ཉ༢ དུས་འཁོར་སོགས་ཀྱི་དགོངས་པའོ། ། ཉ༡ དང་པོ་ནི། བྱེ་མདོས་འཇིག་རྩེའི་རླུང་ངམ་ཁམས་གཞན་ནས། ། ས་བོན་རྣམ་ལྔ་ཁྱེར་ལས་སྣོད་གྲུབ་སྟེ། ། རྒྱུན་རྣམས་མི་འགྱེས་སྤྱི་མཐུན་ལས་ཀྱིས་བསྡུས། ། གཟུགས་དུས་རིང་གནས་བྱིས་བློའི་འཁྲུལ་སྣང་སྟེ། ། འཕགས་པས་རྡུལ་དང་སྐད་ཅིག་འགག་མཁྱེན་གསུངས། ། དེའང་ལས་རྒྱུར་སྨྲ་བ་གཞིར་བྱས། ཉན་ཐོས་བྱེ་མདོའི་གྲུབ་མཐའ་པ་དག་གིས། བསྐལ་པ་ཆགས་པའི་ཚེ་འདོད་སྤྱོད་ཀྱི་རླུང་སྐད་ཅིག་དང་པོའི་རྒྱུ་ནི་སྔར་འཇིག་པའི་ཚེ་རྩེ་མོའི་གཟུགས་སྤྱོད་ཀྱི་རླུང་མ་ཞིག་པ་དེ་ཡིན་(༣༩ན)ཞིང་། དེ་ལ་ལས་ལས་སྐྱེས་པའི་འབྲས་བུ་རགས་པ་སྣ་ཚོགས་སྐྱེད་པའི་ནུས་པ་ཡོད་པར་བཤད་པ་དང༌། ཡང་སྟོན་པས་མདོ་ལས། རླུང་གིས་འཇིག་རྟེན་གྱི་ཁམས་གཞན་དག་ནས་ས་བོན་དག་ཁྱེར་ཏེ་འོང་ངོ༌། །ཞེས་འབྱུང་བས། རྩ་བའི་ས་བོན། འབྱེད་པའི་ས་བོན། ས་བོན་གྱི་ས་བོན། རྩེ་མོའི་ས་བོན། སྡོང་པོའི་ས་བོན་ཏེ་རྣམ་པ་ལྔ་ལས་སྣོད་གྲུབ་ཅིང༌། དེའང་རྡུལ་ཕྲན་ཆ་མེད་སིལ་བུ་དུ་མ་འདུས་པ་ལས་རགས་པ་བརྩམས་ཤིང་། ད་ལྟ་གནས་པ་ལྟར་སྣང་བའི་རྒྱུན་རྣམས་རླུང་དྲག་པོ་ལ་སོགས་པས་མི་འགྱེས་པར་གནས་པ་ནི་སེམས་ཅན་སྤྱི་མཐུན་གྱི་ལས་ཀྱིས་བསྡུས་པ་ཡིན་ཅིང༌། རྡུལ་ཕྲན་དུ་མ་ལས་རི་ལ་སོགས་པའི་གཟུགས་དང༌། སྐད་ཅིག་མ་མཐུད་པས་ལོ་ལ་སོགས་པ་རིང་དུ་སྣང་བ་བྱིས་པའི་སྐྱེ་བོ་རྣམས་ཀྱི་བློ་རགས་པའི་འཁྲུལ་པ་ལ་སྣང་བ་ཡིན་ནོ། ། འཕགས་པ་རྣམས་ལ་རྡུལ་ཕྲན་དང་སྐད་ཅིག་འགག་པར་མཁྱེན་ཏེ། བཙུན་པ་དཔལ་ལེགས་ཀྱི་རྡུལ་བདུན་ཅུ་པ་ལས། ལག་མཐིལ་སྤུ་ཉག་གཅིག་འདུག་པ། ། མི་རྣམས་ཀྱིས་ནི་མི་རྟོགས་ལ། ། དེ་ཉིད་མིག་ཏུ་སོང་ན་ནི། ། མི་བདེ་བ་དག་སྐྱེད་པ་ལྟར། ། བྱིས་པ་ལག་མཐིལ་འདྲ་བ་ཡིས། ། འདུ་བྱེད་རྡུལ་དུ་མི་རྟོགས་སོ། ། འཕགས་པ་མིག་དང་འདྲ་བ་རྣམས། ། དེ་ཡིས་ཡིད་ཀྱང་ཤིན་ཏུ་འབྱུང༌། ། ཞེས་གསུངས་སོ། ། ཉ༢ གཉིས་པ་[དུས་འཁོར་སོགས་ཀྱི་དགོངས་པ་]ནི། སེམས་ནི་བྱེད་པོ་རྡུལ་ཕྲན་བརྟན་གཡོའི་རླུང༌། ། ལས་དང་བྱེད་པས་འགྲུབ་པ་ཕལ་ཆེར་མཐུན། ། འདིར་རྟོགས་སླ་བའི་ཕྱིར་བྱ་བྱེད་ལས་གསུམ་གྱི་རྣམ་པར་བཞག་པ་དང་སྦྱར་ཏེ་ཞིབ་མོར་བཤད་ན། དཔེར་ན། རྫ་མཁན་གྱིས་བུམ་པ་བྱེད་པ་ན། བུམ་པ་བྱ་བ། རྫ་མཁན་བྱེད་པ་པོ། འཇིམ་པ་ལས། སྲད་བུ་དང་། འཁོར་ལོ་སོགས་སྐྱེད་པའི་ངོ་བོ་ཉིད་ནི་བྱེད་པ་སྟེ། བྱ་བྱེད་རྫས་གཞན་ཡིན་པའི་ཕྱིར། དངོས་པོའི་རྒྱུ་འབྲས་ཀྱི་སྟེང་ནས་གཞག་པའི་བྱ་བྱེད་ལས་གསུམ་མཚན་ཉིད་པ་དང༌། སྔོ་སྣང་དབང་ཤེས་ཀྱིས་སྔོན་པོར་རྟོག་པ་ན། སྔོན་པོར་རྟོག་པ་བྱ་བ། སྔོ་(༣༩བ)སྣང་དབང་ཤེས་བྱེད་པ་པོ། སྔོན་པོ་ལས། སྔོན་པོའི་རྣམ་པ་བྱེད་པ་སྟེ། བྱ་བྱེད་རྫས་གཅིག་ཡིན་པའི་ཕྱིར། ཤེས་པས་ཡུལ་རྟོག་པ་ལ་བཞག་པའི་བྱ་བྱེད་ལས་གསུམ་བཏགས་པ་བ་གཉིས་ཡོད་པ་ལས། སྔ་མ་ཉིད་སྣོད་ཀྱི་ཀྱི་འཇིག་རྟེན་ཆགས་ཚུལ་ལ་སྦྱར་བྱ་ཡིན་པས་དེའི་དབང་དུ་བྱས་ཏེ། ཐོག་མར་རྫ་མཁན་དང་འདྲ་བའི་བྱེད་པ་པོ་གང་ཡིན་ཞེ་ན། དབུ་མ་འཇུག་པ་ལས། སེམས་ཉིད་ཀྱིས་ནི་སེམས་ཅན་འཇིག་རྟེན་དང༌། ། སྣོད་ཀྱི་འཇིག་རྟེན་ཤིན་ཏུ་སྣ་ཚོགས་འགོད། ། འགྲོ་བ་མ་ལུས་ལས་ལས་སྐྱེས་པར་གསུངས། ། སེམས་སྤངས་ནས་ནི་ལས་ཀྱང་ཡོད་མ་ཡིན། ། ཞེས་གསུངས་པ་ལྟར་སྤྱིར་སེམས་ཅན་དང༌། བྱེ་བྲག་ཏུ་འཇིག་རྟེན་གྱི་ཁམས་དེ་ཉིད་དུ་སྐྱེ་བ་སོགས་ཀྱི་ལས་མཐུན་པར་བསགས་པའི་སེམས་ཅན་རྣམས་ཀྱི་སེམས་དང༌། དེའང་གཙོ་བོར་དེ་དག་གི་འོད་གསལ་