Tibetan
ཆར་པའི་ཆུས། ། བསམ་གཏན་གཉིས་པ་མན་ཆད་འཇིག་པར་བྱེད། ། ཆགས་འཇིག་དེ་འདྲ་བ་ལན་བདུན་སོང་ནས་བརྒྱད་པ་ནི་འོད་གསལ་གྱི་གནས་སུ་སྤྲིན་ཆེན་པོ་འདུས་པ་ལས་ཆར་བབས་ནས་སྣོད་འདི་ལན་ཚྭ་ཆུར་ཞུ་བ་ལྟར་བྱས་ནས་དེ་ཉིད་ཀྱང་བསྐམས་ཏེ་བསམ་གཏན་གཉིས་པ་མན་ཆད་འཇིག་པར་འགྱུར་རོ། ། མེ་བདུན་ཆུ་གཅིག་སྤེལ་བ་ལན་བདུན་མཐར། ། སླར་ཡང་མེ་བདུན་ཀུན་གྱི་ཐ་མར་ནི། ། རླུང་གཡོས་བསམ་གཏན་གསུམ་པ་མན་ཆད་འཇིག ། དེ་ལྟར་མེས་འཇིག་པ་བདུན་དང་ཆུས་འཇིག་པ་གཅིག་སྤེལ་བ་ལན་བདུན་སོང་བའི་མཐར་སླར་མེས་ལན་བདུན་འཇིག་གོ། ། དེ་དག་ཀུན་རྫོགས་པའི་ཐ་མར་རིའི་རྒྱལ་པོ་རི་རབ་ཀྱང་ཕྱེ་མར་འཐག་པར་བྱེད་པའི་རླུང་ལངས་ནས་བསམ་གཏན་གསུམ་པ་མན་ཆད་འཇིག་པར་འགྱུར་རོ། ། དེ་གསུམ་ཏིང་འཛིན་སྐྱོན་དང་བཅས་པས་ཏེ། ། བཞི་པར་དེ་མེད་འབྱུང་བས་འཇིག་མི་འགྱུར། ། བསམ་གཏན་གསུམ་པོ་དེ་མེ་ཆུ་རླུང་གིས་འཇིགས་པའི་རྒྱུ་ནི་ཏིང་ངེ་འཛིན་སྐྱོན་དང་བཅས་པས་ཏེ། དེའང་བསམ་གཏན་དང་པོ་ན་རྟོག་དཔྱོད་མེ་ལྟ་བུ་དང༌། གཉིས་པ་ན་དགའ་བདེ་ཆུ་ལྟ་བུ་དང༌། གསུམ་པ་ན་ཏིང་ངེ་འཛིན་གྱི་སྐྱོན་(༢༧ན)དབུགས་དབྱུང་རྔུབ་རླུང་ལྟ་བུ་ཡོད་པའི་དབང་གིས་དེ་དང་དེས་འཇིག་པ་ཡིན་ལ། བཞི་པ་ན་སྐྱོན་དེ་དག་མེད་པས་ཕྱི་རོལ་འབྱུང་བའི་རྐྱེན་གྱིས་འཇིག་པར་བྱེད་པ་མེད་ཀྱང༌། སེམས་ཅན་རང་གི་ཡིད་ལས་གྲུབ་པའི་གཞལ་ཡས་ཁང་དང་བཅས་པ་མཉམ་དུ་སྐྱེ་འཇིག་བྱེད་པར་འདོད་དོ། ། སས་འཇིག་པའི་རྐྱེན་མི་བྱེད་པ་ནི་སྣོད་ཀྱི་འཇིག་རྟེན་ཉིད་ས་ཁམས་གཙོ་བོར་ཡིན་པའི་དོན་གྱིས་སོ། ། ཇ༢ གཉིས་པ་[ཞར་བྱུང་]ལ་གསུམ། ཉ༡ བསྐལ་པའི་གྲངས། ཉ༢ འཇིག་ཚུལ་གཞན། ཉ༣ མི་འཇིག་པའི་གནས་བཤད་པའོ། ། ཉ༡ དང་པོ་ནི། བསྡོམས་པས་བསྐལ་ཆེན་དྲུག་ཅུ་རྩ་བཞི་འབྱུང༌། ། དེ་དག་དྲིལ་ཞིང་བསྡམས་པས་འཇིག་ཆགས་ཀྱི་བསྐལ་པ་ཆེན་པོ་དྲུག་ཅུ་རྩ་བཞི་བརྒྱུད་མར་འབྱུང་སྟེ། དགེ་རྒྱས་པ་རྣམས་ཀྱི་ཚེ་ཚད་དང་མཉམ་པའོ། ། ཆགས་གནས་འཇིག་སྟོང་རེ་རེར་བར་བསྐལ་ནི། ། ཉི་ཤུ་རེ་ཡོད་བསྡོམས་པས་བསྐལ་ཆེན་གཅིག ། ཐོག་མར་རླུང་དཀྱིལ་འགོ་བརྩམས་པ་ནས་དམྱལ་བའི་ཁམས་ཆགས་པའི་བར་དང༌། ཛམྦུའི་གླིང་དུ་ཚེ་ལོ་དཔག་མེད་ནས་བརྒྱད་ཁྲིའི་བར་དུ་འགྲིབ་པ་དུས་མཚུངས་པས་དེ་ཡན་ཆད་ཆགས་པའི་བསྐལ་པ་སྟེ། སྣོད་ཆགས་པ་ལ་བར་བསྐལ་གཅིག །བཅུད་ལ་བཅུ་དགུ་སྟེ་ཉི་ཤུ་ཐོགས། བརྒྱད་ཁྲི་ནས་ཚེ་ལོ་བཅུ་པའི་བར་ལ་བར་བསྐལ་དང་པོ། དེ་ནས་བརྒྱད་ཁྲིའི་བར་འཕེལ་ཞིང་སླར་བཅུ་པར་འགྲིབ་པ་གཉིས་བསྡམས་པས་བར་གྱི་ཁུག་པ་གཅིག་སྟེ། དེ་འདྲ་ལན་བཅོ་བརྒྱད་འབྱུང་བ་ལ་བར་ཁུག་བཅོ་བརྒྱད་ཟེར། སླར་བཅུ་པ་ནས་བརྒྱད་ཁྲིའམ་དཔག་མེད་བར་འཕེལ་བ་བར་བསྐལ་ཐ་མ་སྟེ་བསྡམས་པས་གནས་པའི་ཡུན་ལ་བར་བསྐལ་ཉི་ཤུ། བཅུད་འཇིག་པ་ལ་བར་བསྐལ་བཅུ་དགུ། སྣོད་འཇིག་པ་ལ་གཅིག་སྟེ་འཇིག་པ་ལ་བར་བསྐལ་ཉི་ཤུ། འཇིག་རྟེན་སྔ་མ་ཞིག་ཕྱི་མ་མ་ཆགས་པ་མུན་པར་འདུག་པའི་བར་སྟོང་ལ་བར་བསྐལ་ཉི་ཤུའི་ཡུན་དུ་གནས་ཏེ། མདོར་ན། ཆགས་གནས་འཇིག་སྟོངས་བཞི་པོ་རེ་(༢༧བ)རེ་ལའང་བར་བསྐལ་ཉི་ཤུ་རེ་ཡོད་པ་བསྡམས་པས་བར་གྱི་བསྐལ་པ་བརྒྱད་ཅུ་ན་བསྐལ་པ་ཆེན་པོ་གཅིག་ཡིན་ནོ། ། དེ་དག་མི་མཇེད་འདིའི་དབང་དུ་བྱས་ཀྱི། སྤྱིར་ཞག་དང་བསྐལ་པའི་ཚད་ཀྱང་མཐའ་གཅིག་ཏུ་མ་ངེས་ཏེ། བསམ་གྱིས་མི་ཁྱབ་པ་རྒྱལ་པོའི་མདོ་ལས། ཤཱཀྱ་ཐུབ་པ། ཚེ་དཔག་མེད། རྡོ་རྗེ་རབ་འཇོམས། འོད་ཟེར་ཤིན་ཏུ་སྟུག་པོ་པདྨ་རབ་ཏུ་རྒྱས་པའི་སྐུ། ཆོས་ཀྱི་རྒྱལ་མཚན། སེང་གེ། རྣམ་པར་སྣང་མཛད། ཆོས་ཀྱི་འོད་ཟེར་མེ་ཏོག་རབ་ཏུ་རྒྱས་པའི་སྐུ། ཡེ་ཤེས་འོད་ཟེར་རྒྱལ་པོ། ཟླ་བའི་བློ་གྲོས། བཟང་པོའི་དཔལ། དེ་རྣམས་སྔ་མ་སྔ་མའི་བསྐལ་པ་རེ་ལ་ཕྱི་མ་ཕྱི་མའི་ཉིན་ཞག་རེར་བཤད་པ་ལྟར་རོ། ། ཉ༢ གཉིས་པ་[འཇིག་ཚུལ་གཞན་བཤད་པ་]ནི། བསྐལ་པ་གཅིག་ལའང་བསམ་གཏན་གསུམ་པ་མན། ། འཇིག་པའི་མེ་བདུན་ཆུ་གཅིག་རླུང་འབྱུང་བར། ། བཞེད་པ་ཐེག་པ་སོ་སོའི་དགོས་པ་ཡིན། ། བསྐལ་པ་ཆེན་པོ་གཅིག་ཁོ་ན་ལའང་འཇིག་པའི་ཚེ་བསམ་གཏན་གསུམ་པ་མན་ཆད་འཇིག་པར་བྱེད་པའི་མེ་བདུན་དང༌། ཆུ་གཅིག །མཐར་རླུང་རྣམས་ཀྱིས་འཇིག་ཚུལ་གོང་སྨོས་ཀྱི་རིམ་པ་ལྟར་འཇིག་པར་ཀུན་མཁྱེན་དྲི་མེད་འོད་ཟེར་སོགས་ཀྱིས་བཤད་ཅིང་བཞེད་པ་ནི་ཐེག་པ་ཐ་དད་སོ་སོའི་དགོངས་པ་ཡིན་པས་མངོན་པ་འོག་མ་དང་མ་མཐུན་ཀྱང་སྐྱོན་དུ་བཟུང་བར་མི་བྱའོ། ། སྤྱིར་སྟོང་གསུམ་འདི་ཆགས་འཇིག་དུས་མཉམ་པ་བཞིན་དུ་ཕྱོགས་གཞན་ན་ཡང་དེ་ལྟ་བུ་ཚད་མེད་པ་གནས་ཏེ། ད་ལྟ་ཉིད་ལའང་ཕྱོགས་བཅུའི་འཇིག་རྟེན་གྱི་ཁམས་འཇིག་པ་དང་སྟོངས་པ་དང་ཆགས་པ་དང་གནས་པ་རྣམས་བར་མཚམས་མེད་པར་ཚད་བཟུང་དང་བྲལ་བ་མཐའ་ཡས་པ་དང་ཆགས་འཇིག་གི་ཚུལ་ཡང་མི་འདྲ་བ་མང་ངོ༌། ། ཉ༣ གསུམ་པ་[མི་འཇིག་པའི་གནས་བཤད་པ་]ནི། དག་པའི་ཞིང་དང་རྡོ་རྗེ་གདན་ལ་སོགས། ། མི་འཇིག་ཀུན་འབྱུང་འབྲས་བུ་མིན་ཕྱིར་རོ། ། ཆགས་འཇིག་མི་བྱེད་པའི་འཇིག་རྟེན་གྱི་ཁམས་ཡོད་དམ་སྙམ་ན། འཕགས་པ་རྣམས་ཀྱི་ཡེ་ཤེས་ཀྱི་རང་སྣང་ལས་གྲུབ་པའི་ལོངས་(༢༨ན)སྐུའི་ཞིང་དང༌། བྱང་ཆུབ་སེམས་དཔའ་རྣམས་ཀྱི་ཞིང་ཡོངས་སུ་སྦྱོང་བའི་སྨོན་ལམ་དང་བསམ་གྱིས་མི་ཁྱབ་པའི་དགེ་བའི་རྩ་བའི་སྟོབས་ལས་བྱུང་བ་མངོན་པར་དགའ་བ་དང༌། བདེ་བ་ཅན་སོགས་དག་པའི་ཞིང་ཁམས་རྣམས་ནི་སངས་རྒྱས་ཀྱི་ཕྲིན་ལས་མ་རྫོགས་ཀྱི་བར་དུ་ཆགས་འཇིག་བྱེད་པ་མ་ཡིན་ཅིང༌། རྡོ་རྗེ་གདན་དང་བྱ་རྒོད་ཕུང་པོའི་རི་ལ་སོགས་པའང་འཇིག་རྟེན་འདི་དང་མཉམ་དུ་མི་འཇིག་སྟེ་སྣོད་བཅུད་ཡིན་ཀྱང་ཀུན་འབྱུང་གི་འབྲས་བུ་མ་ཡིན་པའི་ཕྱིར་རོ། ། འཇིག་རྟེན་བྱེ་བྲག་ཏུ་བསྟན་པ་ཐེག་པ་དམན་པ་དང་ཐུན་མོང་དུ་བརྗོད་པའི་སྐབས་སོ། ། འཇིག་རྟེན་བྱེ་བྲག་ཏུ་བསྟན་པ་ཐེག་པ་དམན་པ་དང་ཐུན་མོང་དུ་བརྗོད་པ་སྐབས་གཉིས་པའི་འགྲེལ་པའོ།། །། གསུམ་པ། དུས་ཀྱི་འཁོར་ལོའི་ལུགས་དམིགས་སུ་བསལ་བ་དང་འཇལ་བྱེད་ཚད་བརྗོད་པའི་སྐབས། ང༣ སྐབས་གསུམ་པ་འཇིག་རྟེན་གྱི་རྣམ་གཞག་དུས་ཀྱི་འཁོར་ལོའི་དགོངས་པ་དམིགས་སུ་བཤད་པ་ལ་གཉིས། ཅ༡ དངོས་དང༌། ཅ༢ ཞར་བྱུང་འཇལ་བྱེད་ཀྱི་ཚད་བཤད་པའོ། ། ཅ༡ དང་པོ་ལ་གསུམ། ཆ༡ ཡུལ་གྱི་རྣམ་པར་གཞག་པ་དང༌། ཆ༢ དུས་ཀྱི་རྣམ་པར་གཞག་པ། ཆ༣ དེ་དག་གི་མཇུག་བསྡུ་བའོ། ། ཆ༡ དེའི་དང་པོ་ལ་བདུན། ཇ༡ ཁུངས་དང་རྒྱུ་མཚན་སྨོས་པ། ཇ༢ དཀྱིལ་འཁོར་རི་རབ་དང་བཅས་པ་བཤད་པ། ཇ༣ རི་གླིང་སྤྱིར་བཤད་པ། ཇ༤ ལས་ས་དུམ་བུ་བཅུ་གཉིས་བཤད་པ། ཇ༥ འཛམ་གླིང་ཆུང་ངུ་ཡུལ་དྲུག་བཅས་བཤད་པ། ཇ༦ འགྲོ་བ་གནས་ཚུལ་བཤད་པ། ཇ༧ གོ་ལ་དུས་སྦྱོར་བཅས་བཤད་པའོ། ། ཇ༡ དང་པོ་ནི། དང་པོའི་སངས་རྒྱས་རྒྱུད་ཀྱི་རྒྱལ་པོ་ལས། ། འཁྲུལ་པའི་ལུགས་རྣམས་བཀག་ནས་ཕྱི་ནང་གཞན། ། གཅིག་སྦྱོར་དབང་གིས། ཞེས་པ་སྟེ། སངས་རྒྱས་པའི་ཐེག་པ་ཐམས་ཅད་ཀྱི་རྩེ་མོར་ཕྱིན་པ་དཔལ་དུས་ཀྱི་འཁོར་ལོ་དམ་པ་དང་པོའི་སངས་རྒྱས་རྒྱུད་ཀྱི་རྒྱལ་པོ་ཆེན་པོ་ལས། མུ་སྟེགས་བྱེད་དང༌། ཉན་རང་སོགས་ཐེག་པ་ཐུན་མོང་བའི་འདོད་པ་ཕྱོགས་རེར་ཞེན་ཅིང་འཁྲུལ་པའི་ལུགས་ཐམས་ཅད་བཀག་ནས། ཕྱི་འཇིག་རྟེན་གྱི་ཁམས་དཔངས་སུ་དཔག་ཚད་འབུམ་ཕྲག་བཞི། ནང་རྡོ་རྗེའི་ལུས་རང་ཁྲུ་བཞི་པ། གཞན་(༢༨བ)དཀྱིལ་འཁོར་གྱི་འཁོར་ལོ་བཞི་ཆའི་ཚད་དུ་མཉམ་ཞིང༌། དེ་ཁོ་ན་ཉིད་བསྙེན་སྒྲུབ་ཡན་ལག་བཞིའམ་རྡོ་རྗེ་བཞིའི་གནད་བཅིངས་པས། སྦྱང་བྱ་གནས་སྐབས་བཞིའི་དྲི་མ་སེལ་བས། སྦྱངས་འབྲས་དྲི་བྲལ་གྱི་སྐུ་བཞི་མངོན་དུ་བྱེད་པའི་རྒྱུ་མཚན་ལས། དེ་དག་གི་དག་པ་གཅིག་ཏུ་སྦྱོར་བའི་དབང་གིས་ཡུལ་དུས་ཀྱི་རྣམ་གཞག་འདི་ལྟར་དུ་འབྱུང་ངོ༌། ། ཇ༢ གཉིས་པ་[དཀྱིལ་འཁོར་རི་རབ་དང་བཅས་པ་བཤད་པ་]ནི། མཁའ་དབུས་རླུང་མེ་ཆུ། ། ས་དཀྱིལ་ཟླུམ་པོ་རྐང་མཐིལ་རྐེད་པའི་བར། ། ལྷུན་པོ་མགྲིན་པ་གདོང་དང་གཙུག་ཏོར་བཅས། ། རྐེད་པ་ནས་ནི་སྤྱི་གཙུག་བར་དུའོ། ། ནམ་མཁའི་ཁམས་ཀྱི་དབུས་སུ་རླུང་དཀྱིལ་མུན་པ་ཅན་རྔམས་སུ་དཔག་ཚད་སྟོང་ཕྲག་ལྔ་བཅུ་ཐམ་པ། དེའི་སྟེང་ནས་རིམ་བཞིན་མེ་ཆུ་སའི་དཀྱིལ་འཁོར་རྣམས་ཀྱང་དབྱིབས་ཀུན་ནས་ཟླུམ་པོ་ཚད་མཉམ་པ་སྟེ་ལུས་ཀྱི་རྐང་མཐིལ་ནས་རྐེད་པའི་བར་དུ་ཁྲུ་དོ་ཡོད་པའི་མཐོ་རེ་ལ་དཀྱིལ་འཁོར་རེའི་དབང་དུ་བྱས་པའོ། ། དེ་དག་གི་ཤར་ནུབ་ལྷོ་བྱང་གི་ཐད་ཀའི་སོ་སོའི་རྒྱར་ནི་རླུང་དཀྱིལ་དཔག་ཚད་བཞི་འབུམ། མེ་དཀྱིལ་སུམ་འབུམ་ཆུ་དཀྱིལ་ཉིས་འབུམ་ས་དཀྱིལ་ཆིག་འབུམ་ཐམས་ཅད་ཀྱང་ཀུན་ནས་ཟླུམ་པོའི་མཐའ་བསྐོར་དུ་སོ་སོའི་རྒྱ་ཚད་སུམ་འགྱུར་རོ། ། དེའི་སྟེང་དུ་ལྷུན་པོ་འཕང་དུ་དཔག་ཚད་འབུམ་ཕྲག་གཅིག་ནི་རྐེད་པ་ནས་མགྲིན་པའི་འོག་གི་བར་གྱི་ཁྲུ་གང་པ་སྟེ། དེ་གོ་ལའི་གཞི་འཁོར་བའི་གནས་སོ། ། དེའི་སྟེང་རིམ་བཞིན་ལྷུན་པོའི་མགྲིན་པ་སྟོང་ཕྲག་ཉེར་ལྔ། ལྷུན་པོའི་གདོང་སྟོང་ཕྲག་ལྔ་བཅུ། གཙུག་ཏོར་སྟོང་ཕྲག་ཉེར་ལྔ་སྟེ་བསྡམས་པས་འབུམ་དུ་ལོངས་པ་ནི་གཟུགས་ཅན་མིན་ཀྱང་ཡིད་གཟུགས་ལ་མགྲིན་པ་སོགས་ཐ་སྙད་སྦྱར་བ་སྟེ་རྒྱུའི་ཁམས་ཇེ་ཕྲར་གྱུར་པས་ས་ཆུ་མེ་རླུང་ནམ་མཁའ་ཚང་བ་དང་རིམ་པར་སྤངས་པའི་ཁམས་ལྔ་ལྡན་ནས་ཉིས་ལྡན་གྱི་བར་ཏེ་ལུས་དང་སྦྱར་ན་མགྲིན་པ་སོར་དྲུག །གདོང་པ་མཐོ་གང༌། སྐྲ་མཚམས་ནས་སྤྱི་གཙུག་(༢༩ན)གི་བར་སོར་དྲུག་སྟེ་ཀུན་དྲིལ་ཁྲུ་གང་བསྡམས་པས་ཁྲུ་དོ་ནི་རྐེད་པ་ནས་སྤྱི་གཙུག་གི་བར་དུའོ། ། དབུས་ལྗང་ཤར་སྔོ་བྱང་དཀར་ལྷོ་དམར་པོ། ། ནུབ་སེར་ཀུན་ཀྱང་རིན་ཆེན་རང་བཞིན་ཉིད། ། ལྷུན་པོའི་དབུས་ཀྱི་ཁ་དོག་ལྗང་གུ། ཤར་སྔོན་པོ། བྱང་དཀར་པོ། ལྷོ་དམར་པོ། ནུབ་སེར་པོ་སྟེ། དེ་དག་ཀུན་ཀྱང་། རིན་པོ་ཆེ་མརྒད། བཻ་ཌཱུཪྱ། ཆུ་ཤེལ། པདྨ་རཱ་ག །ཀརྐེ་ཏའི་རང་བཞིན། མཁའ། རླུང་། མེ། ས། ཆུ་དང་། ཀུན་ཁྱབ་ཡེ་ཤེས་ཀྱི་ཁམས་དང་དྲུག་འདུས་པའི་ཁམས་རགས་པའོ། ། ཁ་ཁྱེར་གཡེལ་ལས་རྡོ་རྗེའི་རྭ་ལྔ་ནི། ། ཕྱི་རིམ་རིང་བ་བཟླུམ་པོར་འཁོར་ཞིང་འཕྱང༌། ། ལྷུན་པོའི་སྟེང་གི་རྒྱར་སྟོང་ཕྲག་ལྔ་བཅུ། ས་དཀྱིལ་དང་ཕྲད་མཚམས་ཀྱི་རྩ་བའི་རྒྱར་སྟོང་ཕྲག་བཅུ་དྲུག་ཡོད་པས་དཀར་ཡོལ་བསླང་བ་ལྟར་སྟེང་གཡེལ་བའི་ཁ་མཚམས་ནས་ཤམ་བུ་བཏགས་པ་ལྟར་ཕྱི་ནང་དུ་ཡོད་པའི་རྭ་ལྔ་ཟླུམ་པོར་ཕྱོགས་ཐམས་ཅད་དུ་བསྐོར་ཞིང་འཕྱང་བ། ནང་མ་ལས་རིམ་བཞིན་ཕྱི་མ་རིང་བའི་རྭ་ཕྱི་མ་དང་བསིལ་རིའི་རྩེ་མཉམ་པས་འཆད་འགྱུར་གྱི་གླིང་ནང་མ་རྣམས་ལ་ཉི་ཟླའི་འོད་མི་ཕོག་ཀྱང༌། དེར་གནས་ཀྱི་མི་རྣམས་རང་འོད་ཀྱིས་འཚོ་བའོ། ། དཔལ་གཙུག་ལག་ཕྲེང་བས། ལྷུན་པོའི་རྭ་ལྔའི་དབུས་མ་སྲོག་ཤིང་གི་ཚུལ་དང༌། བཞི་པོ་ཐུར་དུ་འཕྱང་བ་རྡོ་རྗེ་རྩེ་ལྔ་པའི་རྣམ་པར་གསུངས་ཤིང་། འཇིག་རྟེན་གྱི་ཚད་གཞལ་ཚུལ་ལའང་བཞེད་པའི་ཁྱད་པར་མང་དུ་སྣང་ཡང་། འདིར་གྲགས་ཆེ་བ་དང་བསྟུན་ནས་བཤད་པའོ། ། རྩ་བར་སྟེགས་བུ་རྡོ་རྗེའི་ཁོར་ཡུག་ལ། ། ལྷུན་པོའི་རྩ་བའི་ཕྱི་མཐར་དཔག་ཚད་སྟོང་ཕྲག་གཅིག་གི་རྒྱ་ཁྱོན་ཅན་གྱི་སྟེགས་བུ་རྡོ་རྗེའི་ཁོར་ཡུག་གིས་བསྐོར་ཞིང༌། དེ་ནས་ལྷུན་པོའི་ཁ་ཁྱེར་ཟད་མཚམས་ཀྱི་བར་དཔག་ཚད་སྟོང་ཕྲག་བཅུ་དྲུག་གི་ཆ་ལ་གླིང་མཚོ་རི་གསུམ་སྤེལ་མར་གནས་པའོ། ། ཇ༣ གསུམ་པ་[རི་གླིང་སྤྱིར་བཤད་པ་]ནི། ཟླ་བ་དཀར་པོ་རབ་མཆོག་ཀུ་ཤ་དང༌། །(༢༩བ) མིའམ་ཅི་དང་ཁྲུང་ཁྲུང་གླིང་དྲུག་གི ། བར་དུ་སྦྲང་རྩི་མར་ཞོ་འོ་མ་དང༌། ། ཆུ་ཆང་མཚོ་མཐའ་འོད་སྔོན་མནྡཱ་ར། ། མཚན་མོ་ནོར་འོད་གྲེའོ་བསིལ་རིས་བསྐོར། ། ལྷུན་པོའི་ཕྱི་རོལ་རྭ་ལྔའི་འོག་ཏུ་ཆུད་པར་ནང་ནས་ཕྱི་རིམ་བཞིན། ཟླ་བ། དཀར་པོ། རབ་མཆོག །ཀུ་ཤ། མིའམ་ཅི། ཁྲུང་ཁྲུང་ཞེས་བྱ་བའི་གླིང་དྲུག་ཡོད་ཅིང༌། དེ་དག་གི་བར་དུ་ནང་ནས་རིམ་བཞིན། སྦྲང་རྩི། མར། ཞོ། འོ་མ། ཆུ། ཆང་རྣམས་ཀྱི་རྒྱ་མཚོས་བསྐོར་བ། དེ་རེ་རེའི་མཐར་འཆིང་བྱེད་ཀྱི་རི། འོད་སྔོན། མནྡཱ་ར། མཚན་མོ། ནོར་བུའི་འོད། བྲེའོ། བསིལ་རི་སྟེ། རི་དྲུག་གིས་བསྐོར་བ། རི་གླིང་རྒྱ་མཚོ་སོ་སོའི་རྒྱ་ཚད་ནི། མཉམ་པར་དཔག་ཚད་བརྒྱད་བརྒྱ་བརྒྱད་ཅུ་རྩ་བརྒྱད་དང་། རྒྱང་གྲགས་གསུམ། གཞུ་འདོམ་ཆིག་སྟོང་བརྒྱ་བཅུ་གཅིག །སོར་མོ་བཅུ། ནས་ལྔ་དང༌། ནས་ཀྱི་སུམ་ཆ་གཅིག་རྣམས་ཡོད་དོ། ། དེ་དག་ལོངས་སྤྱོད་ས་ཡིན་བསིལ་རི་ནས། ། ལན་ཚྭའི་རྒྱ་མཚོའི་མཐར་ཐུག་གླིང་བདུན་པ། ། འཛམ་གླིང་ཆེན་པོ་ལས་ཀྱི་ས་པར་གསུངས། ། རི་བདུན་པ་ནི་རྡོ་རྗེའི་ཁོར་ཡུག་ལ། ། དཀྱིལ་འཁོར་ལྷག་མའི་མེ་དང་རླུང་གིས་བསྐོར། ། དེ་རྒྱབ་སྟོང་པ་ཡོན་ཏན་མེད་པའོ། ། དེ་ལྟར་བསིལ་རི་ཕན་ཆད་ནི་ལོངས་སྤྱོད་ཀྱི་ས་པ་ཞེས་བྱ་ཞིང༌། བསིལ་རིའི་ཕྱི་མཚམས་ནས་ལན་ཚྭའི་རྒྱ་མཚོ་ལ་ཐུག་གི་བར་གྱི་ས་ནི་གླིང་བདུན་པ་ཛམ་གླིང་ཆེན་པོ་ལས་ཀྱི་སར་གྲགས་པ་སྟེ། ཞེང་དུ་དཔག་ཚད་ཉི་ཁྲི་ལྔ་སྟོང་ཡོད་ཅིང་། ཕྱོགས་མཚམས་སུ་མཉམ་པར་དུམ་བུ་བཅུ་གཉིས་སུ་གནས་པས་ཀུན་ནས་ཟླུམ་པོར་གྱུར་བ། དེའི་མཐར་ལན་ཚྭའི་རྒྱ་མཚོ་རྒྱ་ཚད་འབུམ་ཕྲག་ཕྱེད་དང་ལྡན་པས་བསྐོར་བའི་མཐར་རི་བདུན་པ་རྡོ་རྗེའི་ཁོར་ཡུག་ཆེན་པོ་སྟེ། མེ་དཀྱིལ་གྱི་ལྷག་མས་བསྐོར་བ་ལ་རྟ་གདོང་གི་མེ་ཞེས་བཏགས་ཤིང་དེའི་མཐར་རླུང་དཀྱིལ་གྱི་ལྷག་མས་བསྐོར་བ། དེ་གཉིས་ཀྱི་རྒྱ་ཚད་ཀྱང་འབུམ་ཕྲག་ཕྱེད་པར་མཉམ་(༣༠ན)པ་སྟེ། རླུང་མེ་ཆུ་སའི་དཀྱིལ་འཁོར་བཞི་གཅིག་གི་ནང་དུ་གཅིག་ཆུད་པའི་སོ་སོའི་མཐའ་ཁྱུད་གྱེན་དུ་ལངས་པ། སྟེང་ནས་ཐམས་ཅད་ཀྱི་ཁ་མཚམས་ངོས་མཉམ་པར་གྱུར་པ་ཡིན་ཞིང༌། དེ་ལྟར་སྲིད་རྩེ་ནས་རླུང་དཀྱིལ་བར་དུ་ཆུ་ཞེང་གབ་པར་གནས་པའི་ཕྱི་རོལ་དུ་སྟོང་པ་གཅིག་པུ་རྡུལ་མུན་སྙིང་སྟོབས་ཀྱི་ཡོན་ཏན་མེད་པའོ། ། ཇ༤ བཞི་པ་[ལས་ས་དུམ་བུ་བཅུ་གཉིས་བཤད་པ་]ནི། ལས་ས་དུམ་བུ་བཅུ་གཉིས་ཕྱོགས་བཞིའི་དབུས། ། རླུང་མེ་ཆུ་སའི་རང་བཞིན་ཟླ་གམ་དང༌། ། ཟུར་གསུམ་ཟླུམ་པོ་གྲུ་བཞིའི་གླིང་ཆེན་ལ། ། གླིང་ཕྲན་གྱིས་བསྐོར་པད་འདབ་རྣམ་པར་གནས། ། གླིང་བདུན་པ་ཛམ་གླིང་ཆེན་པོ་ལས་ཀྱི་ས་ལ་དུམ་བུ་བཅུ་གཉིས་སུ་བཅད་པའི་དུམ་བུ་སོ་སོར་རྒྱ་མཚོ་དང་འབྲེལ་བའི་ཆུ་བོ་ཆེན་པོ་རྣམས་ཀྱིས་བསྐོར་བའི་ཕྱོགས་བཞིའི་དབུས་སུ་ཤར་དུ་རླུང་གི་རང་བཞིན་གྱི་གླིང་ཟླ་གམ། ལྷོར་མེ་ཟུར་གསུམ། བྱང་དུ་ཆུ་ཟླུམ་པོ། ནུབ་ཏུ་ས་གྲུ་བཞི་རྣམས་རྒྱ་ཚད་རིམ་བཞིན་དཔག་ཚད་བདུན་སྟོང༌། བརྒྱད་སྟོང༌། དགུ་སྟོང༌། ཁྲི་ཕྲག་རྣམས་ཡོད་པའི་གླིང་ཆེན་པོ་རེ་རེ་ལ་གླིང་ཕྲན་གཉིས་རེས་བསྐོར་ནས་ཟླུམ་པོ་པདྨའི་འདབ་མའི་རྣམ་པར་གནས་སོ། ། དེས་ན། ལྷོ་གླིང་གསུམ། ནུབ་གླིང་གསུམ། བྱང་གླིང་གསུམ། ཤར་གླིང་གསུམ་རྣམས་སུ་འགྱུར་བའི་ཚེ། དེ་རྣམས་ཀྱི་མིང་ཡང༌། ལྷོ་གླིང་ཤར་མ་དང༌། དབུས་མ་དང༌། ནུབ་མ་ཞེས་འདོགས་ཀྱི། མངོན་པ་ལྟར་རྔ་ཡབ་ལ་སོགས་པའི་མིང་འདོགས་དང༌། གླིང་གཡོག་ཆུང་བ་སོགས་འདིར་མི་བཞེད་དོ། ། ཇ༥ ལྔ་པ་[འཛམ་གླིང་ཆུང་ངུ་ཡུལ་དྲུག་བཅས་བཤད་པ་]ནི། འཛམ་གླིང་ཆུང་ངུའི་ལྷོ་ཕྱོགས་འཕགས་པའི་ཡུལ། ། དེ་ནས་བྱང་དུ་རིམ་བཞིན་བོད་དང་ལི། ། རྒྱ་དང་ཤམྦྷ་ལ་དང་གངས་ལྡན་གནས། ། གླིང་ལྷོ་མ་གསུམ་ལ་ཛམ་གླིང་ཆུང་ངུ་ཞེས་བཤད་པའི་ལས་ས་དུམ་བུ་གསུམ་གྱི་ལྷོ་གླིང་དབུས་མ་འདི་(༣༠བ)ལ་ཡུལ་དྲུག་ཡོད་པའི། དང་པོ་བྱང་ཆུབ་སེམས་དཔའ་རྣམས་ཀྱིས་རྟེན་གང་ལ་རྡོ་རྗེ་ལྟ་བུའི་ཏིང་ངེ་འཛིན་སྐྱེད་པར་མཛད་པའི་རྡོ་རྗེའི་གདན་དང་བཅས་པའི་མ་ག་དྷཱ། ཡངས་པ་ཅན། མཉན་ཡོད། འཁོར་མོ་འཇིག །གནས་བཅས། ཙམ་པ་ཀ་སྟེ། གྲོང་ཁྱེར་དྲུག་དང༌། བྷངྒ་ལ། ཀོ་ཤམྦཱི། ཀསྨཱི་ར་ལ་སོགས་པའི་ཡུལ་འཁོར་མང་པོས་གང་བ་འཕགས་པའི་ཡུལ་དང༌། དེ་ནས་བྱང་དུ་རིམ་བཞིན་ཡུལ་གཞན་རྣམས་ཆགས་པའི། གཉིས་པ་བྱང་ཆུབ་སེམས་དཔའ་འཇིག་རྟེན་དབང་ཕྱུག་གིས་བདག་གིར་མཛད་པའི་ཡུལ་བོད་དང༌། གསུམ་པ་འཕགས་པ་ཤཱ་རིའི་བུ་དང༌། རྣམ་སྲས་ཀྱི་མཚོ་དྲལ་ནས་ཡུལ་དུ་གྱུར་ཅིང༌། མཆོད་རྟེན་གོ་མ་ས་ལ་གནྡྷ་བཞུགས་པའི་ལི་ཡུལ་དང༌། བཞི་པ་རི་རྩེ་ལྔ་ལ་སོགས་པ་རི་བོ་ཆེན་པོ་བཞིས་བརྒྱན་ཅིང་འཕགས་པ་འཇམ་དཔལ་བྱིས་པ་གཞོན་ནུའི་ཚུལ་གྱིས་བཞུགས་པའི་ཡུལ་རྒྱ་དང༌། ལྔ་པ་བྱང་ཆུབ་སེམས་དཔའ་དང་ཁྲོ་བོའི་དབང་པོ་རྣམས་ཀྱི་སྤྲུལ་པ་ཆོས་རྒྱལ་རིགས་ལྡན་སུམ་ཅུ་རྩ་གཉིས་ཀྱིས་བསྐྱངས་ཤིང་ཀ་ལཱ་པ་གཙོ་བོར་གྱུར་པའི་གྲོང་ཁྱེར་བྱེ་བ་ཕྲག་དགུ་བཅུ་རྩ་བདུན་དང་ལྡན་པའི་ཡུལ་ཤམྦྷ་ལ་དང༌། དྲུག་པ་ཤམྦྷ་ལའི་བྱང་གི་གངས་དང་འབྲེལ་བའི་ཛམ་གླིང་འདིའི་བྱང་ཟུར་དུ་ཡོད་པའི་གངས་རི་ཆེན་པོ་སྟེ་གངས་ལྡན་རྣམས་གནས་སོ། ། ཇ༦ དྲུག་པ་[འགྲོ་བ་གནས་ཚུལ་བཤད་པ་]ནི། འདོད་པ་བཅུ་གཅིག་གཟུགས་ན་བཅུ་དྲུག་བཞི། ། སྲིད་པ་སུམ་ཅུ་རྩ་གཅིག་དེ་ལ་བརྟེན། ། རྒྱུད་འདིར་བཅུད་ཀྱི་སེམས་ཅན་བགྲང་ཚུལ་ཡང་ཐུན་མོང་དང་མི་མཚུངས་ཏེ། འདོད་ཁམས་ན་བཅུ་གཅིག །གཟུགས་ཁམས་ན་བཅུ་དྲུག །གཟུགས་མེད་ཀྱི་ཁམས་ན་བཞི་སྟེ། སྲིད་པ་སུམ་ཅུ་རྩ་གཅིག་པོ་སྔར་བཤད་པའི་ལྷུན་པོ་ལ་སོགས་པ་དེ་དག་ལ་བརྟེན་པར་གསུངས་སོ། ། དེ་ཡང་དང་པོ་འདོད་ཁམས་ན་བཅུ་གཅིག་ཡོད་དེ། དེའི་སྡོམ་ནི། དམྱལ་བ་ཡི་དྭགས་དུད་འགྲོ་དང༌། ། མི་དང་ལྷམིན་འདོད་ལྷ་དྲུག ། ཅེས་སོ། །(༣༡ན) དེ་དག་གི་གནས་ཚུལ་ནི། འོག་གཞིའི་དཀྱིལ་