Tibetan
མ་ཐོག་ཡ་ཐོག་རིང་མོ་གཉིས། བར་གྱི་ཁུག་པ་བཅོ་བརྒྱད་དང་བཅས་པ་ལ་འགྲོ་བ་རྣམས་ཀྱི་ཚེ་དང་ལུས་ལོངས་སྤྱོད་འཕེལ་འགྲིབ་སྣ་ཚོགས་སུ་འགྱུར་རོ། ། འོ་ན་གླིང་འདི་གཞན་ལས་དམན་པ་ཡིན་ནམ་སྙམ་ན། མ་ཡིན་ཏེ། གླིང་གཞན་གསུམ་པོ་ནི་སྔོན་གྱི་འབྲས་བུ་ལ་ལོངས་སྤྱོད་པའི་ས་ཡིན་པས་ལས་གསར་པ་བསགས་མི་ནུས་པའི་ཕྱིར་དམན་ལ། ཛམ་གླིང་ནི་ལས་ཀྱི་ས་ཡིན་པས་གླིང་འདིར་སྐྱེས་པ་རྣམས་ལས་གང་བགྱིད་ཀྱང་སྟོབས་ཆེ་ཞིང་མི་རྟག་པ་ལ་སོགས་པའི་གཏམ་གྱིས་ཀྱང་སྐྱོ་བ་བསྐྱེད་ཅིང་གདུལ་བར་སླ་བའི་ཕྱིར། བདག་ཅག་གི་སྟོན་པ་ལ་སོགས་པ་འདྲེན་པ་རྣམས་ཀྱི་མཆོག་གི་སྤྲུལ་པའི་སྐུའང་འདིར་འཚང་རྒྱ་བའི་ཚུལ་བསྟན་ཅིང་སྟོན་པར་འགྱུར་བའི་རྒྱུ་མཚན་གྱིས་ཛམྦུའི་གླིང་ནི་གླིང་གཞན་ལས་ཁྱད་པར་དུ་འཕགས་ཏེ། དྲན་ཉེ་ལས། གླིང་གསུམ་གྱི་ནང་ནས་འདི་ནི་ལས་ཀྱི་ས་ཡིན་ནོ། །འདི་ནི་དགེ་བ་བཅུའི་ལས་ཀྱི་ལམ་དག་སེམས་པ་ཡིན་ཞིང༌། འདིར་ནི་སངས་རྒྱས་འབྱུང་བ་ཡིན་ལ། འདིར་ནི་མིའི་གནས་བཞི་དག་གི་རགས་ལས་པ་ཡིན་ཏེ། (༢༢བ)འདིར་ནི་དགེ་བ་བཅུའི་ལས་ཀྱི་ལམ་དག་ངེས་པར་སེམས་ཤིང་རྣམ་པར་དཔྱོད་པ་ཡིན། འདིར་ནི་ཚངས་པར་སྤྱོད་པའི་གནས་ཡིན། འདིར་ནི་འཆི་བ་དང་སྐྱེ་བའི་སེམས་པ་ཡིན། འདིར་ནི་རྡོ་རྗེ་ལས་བྱས་པའི་རྡོ་རྗེའི་གདན་ཡོད་དེ། ཞེས་དང༌། མིའི་གནས་བཞི་ལས་ཀུན་གྱི་གཙོ་བོ་ནི་ཛམྦུའི་གླིང་འདི་ཡིན་ཞེས་འབྱུང་ངོ༌། ། འདི་ཡི་འགྲོ་བ་འོད་གསལ་ལྷ་ལས་མཆེད། ། སྲེད་པས་བསམ་གཏན་ཟས་སོགས་རིམ་ཉམས་ཏེ། ། ཉི་ཟླ་སྣང་ཞིང་མང་བཀུར་རྒྱལ་པོ་བྱུང༌། ། དུས་བཞི་རིམ་དང་རིགས་བཞི་ཐ་དད་གྱུར། ། གླིང་འདིའི་མིའི་འགྲོ་བ་ནི། ཐོག་མར་འོད་གསལ་ནས་ལྷ་ཞིག་ཤི་འཕོས་ཏེ། འདིར་རྫུས་སྐྱེས་སུ་བྱུང་ཞིང༌། དེ་ནས་རིམ་གྱིས་མཆེད་དེ་གཉིས་པ་དང་གསུམ་པ་ལ་སོགས་པ་ནས་ཤིན་ཏུ་མང་བའི་བར་རྫུས་སྐྱེས་ཤ་སྟག་སྔ་མ་བཞིན་བྱུང་བ་རྣམས། ནམ་མཁའ་ལ་འགྲོ་ཞིང་ལུས་འོད་གསལ་བ། བསམ་གཏན་གྱི་ཟས་ཀྱིས་འཚོ་བ་གཟུགས་ཁམས་པ་ལྟ་བུ་ལ། ཕྱི་ནས་ས་བཅུད་དཀར་པོ་སྦྲང་རྩི་ལྟ་བུའི་རོ་ཡོད་པ་བྱུང་བས་དེ་མང་དུ་ཟོས་ཤིང་དེ་ལ་སྲེད་པའི་རྐྱེན་གྱིས་བསམ་གཏན་གྱི་ཟས་དང་། སོགས་ཁོངས་ནས་རྫུ་འཕྲུལ་རྣམས་ནུབ་ཅིང་ས་བཅུད་དེའང་ནུབ་པ་ལས། སླར་ས་ཞག་ཁ་དོག་དམར་སེར་བྱུང་བ་ཟོས་ཤིང་སྲེད་པས། དེ་དང་ལུས་ཀྱི་འོད་ཀྱང་རིམ་པར་ཉམས་པ་དང༌། དེའི་ཚེ་སྤྱི་མཐུན་གྱི་ལས་དང་སྲིད་པའི་ཆོས་ཉིད་ཀྱིས་ཉི་ཟླའང་འཇིག་རྟེན་ན་སྣང་བར་གྱུར་ཅིང༌། དེ་བཞིན་དུ། ས་བཅུད་གཞན་དང་མྱུ་གུའི་ཚལ་བྱུང་བའང་ནུབ་ནས། འབྲས་སཱ་ལུའི་ཚལ་སྦུན་མ་མེད་པ། ནང་བརྔས་ན་ནུབ་སྐྱེ་བ་དག་ཀྱང་བྱུང་སྟེ། དེ་ཟོས་པས་སྙིགས་མ་གཤང་གཅི་སོགས་ཀྱང་བྱུང་ངོ༌། ། ཁམ་གྱི་ཟས་རགས་པ་དེ་དག་གི་རྐྱེན་གྱིས་ཕོ་མོའི་དབང་པོ་སོ་སོར་སྣང་བ་དང༌། རིམ་གྱིས་གཅིག་ལ་གཅིག་ཆགས་པར་གྱུར་ཅིང་ལོག་པར་སྤྱད་པས། གཞན་དག་གིས་དེ་ལ་བོང་བ་སོགས་གཏོར་ཞིང་སྤྱོད་པས། དེ་དག་ངོ་ཚ་ཞིང་མི་རུང་བར་མཐོང་ནས། ཞག་བདུན་ལ་(༢༣ན)སོགས་ཀྱི་བར་དུ་ལོག་སྤྱོད་སྤོང་བར་བྱེད་པ་དང༌། སྡིག་པ་ཤས་ཆེ་བ་འགའ་ཞིག་ངོ་ཚ་བ་བསྐྱབ་པའི་ཕྱིར་ཁང་པ་བརྩིགས་པའང་འབྱུང་ངོ༌། ། དེ་ནས་གསོག་འཇོག་བྱས་པའི་རྒྱུས་མ་རྨོས་པའི་སཱ་ལུའང་ནུབ་ནས་འབྲས་སྦུན་མ་དང་བཅས་པ་བྱུང་ཞིང་བརྔས་པར་ཡང་མངོན་པས་མུ་ཐུག་བྲེས་ཏེ་ཞིང་རྨོད་པ་ལས། ཕྱི་ནས་དེ་ལ་རྐུ་བའང་བྱུང་ཞིང་དེས་རྩོད་པར་གྱུར་པས་མི་དེ་རྣམས་ཀྱི་ནང་ན་གཟུགས་བཟང་ཞིང་བསོད་ནམས་ཆེ་བར་གྲགས་པ་ཞིག་ཞིང་དཔོན་དུ་བསྐོས་ནས། ཐམས་ཅད་ཀྱིས་བཀུར་ཞིང་ཐོག་ཤས་དབུལ་བར་བྱེད་པས་མང་བཀུར་རྒྱལ་པོ་སྟེ། རྒྱལ་པོའི་ཐོག་མ་བྱུང་བས་དེ་ནས་བརྩམས་ཏེ་རིགས་དེ་ལ་ཞིང་གི་བདག་པོ་ཡིན་པས་སམ། ཉམས་པ་ལས་སྐྱོབ་པའི་ཕྱིར་ཀྵ་ཏྲི་ཡ་ཞེས་བྱ་ཞིང༌། དེ་ནས་རིམ་གྱིས་མི་རྣམས་སྡིག་པ་ཤས་ཆེ་བར་གྱུར་པས་རྒྱལ་པོའི་བསྒོ་བ་ལས་ཉམས་པ་ན། ནན་ཏུར་གྱི་ལས་བྱས་ཀྱང་མ་ཉན་པས་སྲོག་གཅོད་པ་བྱུང་བ་དང༌། དེ་ལ་སྐྲག་པ་རྫུན་སྨྲ་བ་བྱུང་བ་སོགས་རིམ་གྱིས་སྙིགས་མ་ལྔ་བདོ་བའི་མཐར་ནད་མཚོན་མུ་གེའི་བསྐལ་པ་བྱུང་ཞིང་དུས་བཞིའི་རིམ་པར་དབྱེ་བ་བྱུང་ངོ༌། ། དེ་ལ་ཐོག་མར་དུས་ནི་རྫོགས་ལྡན་གྱི་བསྐལ་པ་ཞེས་བྱ་ཞིང༌། ཕོ་མོ་འཁྲིག་པ་སྤྱོད་ཅིང་མ་བྱིན་པ་བླངས་པ་ནས་སྣོད་བཅུད་ཀྱི་དཔལ་འབྱོར་ཆ་བཞིར་བགོས་པའི་གཅིག་བྲི་བས་གསུམ་ལྡན། རྫུན་སྨྲས་པས་དཔལ་འབྱོར་ཆ་གཉིས་བྲི་བའི་སྐབས་གཉིས་ལྡན། སྲོག་གཅད་བཅས་མི་དགེ་བའི་ལས་ལམ་ཡོངས་སུ་རྫོགས་པས་ཆ་གཅིག་ཙམ་ཡང་རིམ་པར་བྲི་སྟེ་རྩོད་ལྡན་དུ་གྱུར་པ་ཡིན་ནོ། ། མིའི་འགྲོ་བ་རྣམས་ཀྱང་རིམ་པར་རིགས་བཞིར་གྱེས་ཏེ། དེའང་ཐོག་མར་མང་བཀུར་གྱི་རྒྱུད་ལས་རྒྱལ་རིགས་རྣམས་བྱུང་ཞིང༌། དེ་ནས་ཁྱིམ་གྱི་ཉེས་པས་ཡིད་བྱུང་བ་དག་ལས་བྲམ་(༢༣བ) (ཞང་ཞུང་གི་བརྡ་སྟེ་བོད་སྐད་ངེས་ཆོག་བཤད་པར་དཀའ་བ་འདི་རིགས་ཕལ་ཆེར་རྒྱ་དཀར་ནག་གི་སྐད་ཟུར་ཆག་པ་དང༌། ཡུལ་གཞན་གྱི་བརྡ་དང་འདྲིས་པ་མང་དུ་ཡོད་དོ། །མཆན།) ཟེའི་རིགས་དང༌། རྐུ་བ་སོགས་མི་བྱེད་པ་ལ་རྗེའུ་རིགས་དང༌། དེ་ལྟར་བྱེད་པ་ལ་དམངས་རིགས་ཞེས་བྱ་བ་རིགས་ཐ་དད་དུ་གྱུར་པ་བྱུང་ངོ༌། ། ཇ༣ གསུམ་པ་[འཁོར་ལོས་བསྒྱུར་བ་འབྱུང་ཚུལ་]ནི། གསེར་དངུལ་ཟངས་ལྕགས་འཁོར་ལོས་སྒྱུར་བ་ཡང༌། ། བརྒྱད་ཁྲི་ཡན་ལ་འདིར་འབྱུང་སྟོང་གསུམ་ནི། ། རིལ་པོར་དབང་བྱེད་པ་ཡང་ཡོད་པར་གསུངས། ། གླིང་བཞི་ལ་དབང་བྱེད་པའི། གསེར། དངུལ། ཟངས། ལྕགས་ཀྱི་འཁོར་ལོས་སྒྱུར་བའང༌ཚེ་ལོ་བརྒྱད་ཁྲིའི་སྐབས་ཡན་ཆད་དུ་གླིང་འདིར་འབྱུང་བར་བཤད་དེ། དེའང་ཐོག་མར་མང་པོས་བཀུར་བའི་ཕོ་བྲང་བཏབ་པ་ནི་རྒྱལ་པོའི་ཁབ་ཉིད་ཡིན་པར་བརྒྱད་སྟོང་འགྲེལ་བ་སྙིང་པོ་མཆོག་ལས་གསུངས་ཤིང༌། དེས་བཙུན་མོ་ཆུ་སྟོང་མ་ཞེས་བྱ་བ་བླངས་པ་ལས་བུ་འོད་མཛེས་སོ། །དེའི་བཙུན་མོ་རི་ལས་སྐྱེས་ལས་དགེ་བ། དེའི་བཙུན་མོ་སྤྲིན་མགྲིན་ལས་དགེ་མཆོག །དེའི་བཙུན་མོ་ཏཱ་ལའི་རྗེ་ངར་ལས་གསོ་སྦྱོང་འཕགས་ཏེ། དེ་རྣམས་ལ་བསྐལ་པ་བཟང་པོའི་རྒྱལ་པོ་ལྔ་ཞེས་ཟེར་རོ། ། གསོ་སྦྱོང་འཕགས་ཀྱི་སྤྱི་བོར་ཤ་རྨེན་བྱུང་བ་ལས་ང་ལས་ནུ་བྱུང་སྟེ། དེ་ཉིད་ཁང་སྟེང་ན་ཡོད་པ་ལ་གསེར་གྱི་འཁོར་ལོ་ནམ་མཁའ་ལས་བྱུང་བ་ཤར་ཕྱོགས་ལས་རྒྱལ་བར་གྱུར་ཅིག་ཅེས་འཕངས་པས་འཁོར་དང་བཅས་པ་དེར་ཕྱིན་ཏེ། རིམ་གྱིས་གླིང་བཞི། སུམ་ཅུ་རྩ་གསུམ་དང་བཅས་པས་མདུན་བསུས་ནས་མངའ་དབང་དུ་མཛད་པས་འཁོར་ལོས་སྒྱུར་བ་ཆེན་པོའོ། ། དེའི་གཟུགས་དང་སྤྱོད་པ་ཕལ་ཆེར་བརྒྱ་བྱིན་དང་འདྲ་ཞིང༌། ཚེ་ནི་བརྒྱ་བྱིན་གྱི་ཚེ་ཚད་བརྒྱ་དང་བཞི་བཅུར་ཐུབ་བོ། ། དེའི་བུ་ཉེ་མཛེས་ནི་ཟངས་ཀྱི་འཁོར་ལོ་ཅན་གཡུལ་བཤམས་པ་ཙམ་(༢༤ན)གྱིས་ཤར་ལྷོ་གཉིས་ལ་དབང་བ། དེའི་བུ་ཉེ་མཛེས་ནི་ཟངས་ཀྱི་འཁོར་ལོ་ཅན་གཡུལ་བཤམས་པ་ཙམ་གྱིས་ཤར་ལྷོ་གཉིས་ལ་དབང་བ། དེའི་བུ་མཛེས་ལྡན་ནི་ལྕགས་ཀྱི་འཁོར་ལོ་ཅན་མཚོན་ཆ་གདེངས་པས་ལྷོ་གླིང་ལ་དབང་བ། དེའི་བུ་ཉེ་མཛེས་ལྡན་ཡང་ལྕགས་ཀྱི་འཁོར་ལོ་ཅན་མཚོན་ཆ་གདེངས་པ་ཙམ་གྱིས་ལྷོ་གླིང་ལ་དབང་བྱེད་པ་སྟེ། དེ་ཕྱིན་ཆད་འཁོར་ལོས་སྒྱུར་བ་ཐམས་ཅད་ཀྱང་གླིང་གཅིག་ཁོ་ན་ལ་དབང་སྒྱུར་བ་ཤ་སྟག་ཡིན་ཞིང༌། དུས་གཅིག་ལ་གཉིས་མི་འབྱུང་བ་ནི་སངས་རྒྱས་དང་བརྒྱ་བྱིན་དང་འཁོར་ལོས་སྒྱུར་བ་རྣམས་ཀྱིས་འགྲན་ཟླ་མེད་པའི་ལས་འདུ་བགྱིས་པའི་དབང་གིས་སོ། ། དེ་དག་ལ་མཚན་དཔེ་སངས་རྒྱས་ལྟར་གསལ་རྫོགས་མིན་པའི་རྗེས་མཐུན་ཡོད་ཅིང་ཕལ་ཆེར་འཕགས་པ་ཡིན་ལ། དུས་ཀྱང་ཚེ་ལོ་སྟོང་ཕྲག་བརྒྱད་ཅུ་ཡན། དགེ་བ་བཅུ་ཀ་རྫོགས་པར་སྤྱོད་པ་རྫོགས་ལྡན་གྱི་དུས་སུ་འབྱུང་བ་ཡིན་ཏེ། དེ་ཕྱིན་ཆད་ན་ཕུན་ཚོགས་དང་དབང་ཐང་རྣམས་མི་རྫོགས་པར་བཤད་ལ། རིན་ཆེན་བདུན་སོགས་མེད་ཀྱང་ཛམ་གླིང་ཕལ་ཆེར་ལ་དབང་བ་སྟོབས་ཀྱིས་འཁོར་ལོས་སྒྱུར་བ་ཞེས་བཤད་པ་དག་ནི་ཚེ་ལོ་བརྒྱ་པ་ཡན་ལ་ཅི་རིགས་པར་འབྱུང་བ་ཡོད་དེ། དེ་དག་ཡོ་བྱད་ཀྱང་ཐུན་མོང་མ་ཡིན་པའི་བདུན་ཕྲག་གསུམ་ཡོད་དེ། མཆོག་གི་རིན་ཆེན་བདུན་ནི། དྲན་པ་ཉེར་གཞག་ལས། འཁོར་ལོ་རིན་པོ་ཆེ་ནི། གསེར་ལས་བྱས་ཤིང་དཔག་ཚད་ལྔ་བརྒྱ་པ་རྩིབས་སྟོང་དང་ལྡན་པ། ཉི་མ་གཅིག་ལའང་དཔག་ཚད་སྟོང་དུ་འགྲོ་ཞིང༌། དེའི་མཐུས་སུམ་ཅུ་རྩ་གསུམ་མན་ཆད་དུ་གླང་ཆེན་སོགས་འཁོར་ཐམས་ཅད་ནམ་མཁའ་ལ་འགྲོ་ནུས་པ། རྒྱལ་པོས་མི་ཐོས་པའང་ཐོས་པ་དང༌། དོ་ཟླ་སུ་ཡང་མེད་པར་བྱེད་པ་ཞིག་ནམ་མཁའ་ལས་འབྱུང་བ་དང༌། ནོར་བུ་རིན་པོ་ཆེ་ནི། མི་ཆེན་པོའི་བརླ་ཤ་ཙམ་ཟུར་བརྒྱད་པ། མཚན་མོ་དཔག་ཚད་བརྒྱར་འོད་འབྱུང་ཞིང༌། ཉི་མ་ཚ་བ་ན་བསིལ་བའི་ཆུ་ཡན་ལག་བརྒྱད་ལྡན་འབྱུང་བ། དཔག་ཚད་བརྒྱའི་ཁོར་ཡུག་ཏུ་ནད་མེད་པར་བྱེད་ཅིང་ཇི་ལྟར་འདོད་པའི་ལས་ཐམས་ཅད་གྲུབ་པར་བྱེད་པ་(༢༤བ)ཞིག་བརྒྱ་བྱིན་གྱིས་སྟེར་རོ། ། བཙུན་མོ་རིན་པོ་ཆེ་ནི། ལུས་ལ་ཙནྡན་དང་ཁ་ནས་ཨུཏྤ་ལའི་དྲི་འབྱུང་ཞིང༌། རེག་ན་ཉོན་མོངས་པ་མེད་པས་མི་ཐམས་ཅད་ཀྱིས་མ་དང་སྲིང་མོ་ལྟར་མཐོང་བ། གླིང་དེའི་བཀྲེས་སྐོམ་ཐམས་ཅད་སེལ་བར་བྱེད་ཅིང་བསམ་པ་དང་མཐུན་པ། བུ་མང་པོ་བཙའ་ཞིང་ཁྱིམ་ཐབས་མེད་ཀྱང་འདོད་ཡོན་ལྔའི་དབང་དུ་མི་འགྱུར་བ་ཞིག་བློན་པོས་སྟེར་རོ། ། བློན་པོ་རིན་པོ་ཆེ་ནི། ཉོན་མོངས་པ་མེད་པས་མི་དགེ་བ་སྤངས་ཤིང་བྱ་བ་ཀུན་མ་བསླབས་ཀྱང་ཤེས་བཞིན་བྱེད་པ། སེམས་ཅན་རྣམས་ལ་ཕ་མ་ལྟར་བྱམས་པ་ཞིག་འབྱུང་ངོ༌། ། གླང་པོ་རིན་པོ་ཆེ་ནི། ཅང་ཤེས་ཤིང་བཀའ་ཉན་ལ། ཉིན་གཅིག་ལའང་ཛམ་གླིང་ལན་གསུམ་འཁོར་ཞིང༌། རྒྱལ་པོས་ཞོན་པའི་ཚེ་གང་དུ་འཇུག་སྤྲོ་བ་དེར་བསྐུལ་མི་དགོས་པར་འགྲོ་བ། ཕ་རོལ་ལས་རྒྱལ་བར་བྱེད་པ་དང༌། རྟ་མཆོག་རིན་པོ་ཆེ་ནི། རྨ་བྱའི་མགྲིན་པ་ལྟར་སྔོ་ཞིང་ཡོན་ཏན་གླང་པོ་དང་མཚུངས་པ་སྟེ། དེ་གཉིས་བརྒྱ་བྱིན་གྱིས་སྟེར་རོ། ། དམག་དཔོན་རིན་པོ་ཆེ་ནི། དགྲ་བོ་མ་ལུས་པ་འཇོམས་པར་ནུས་ཀྱང་གཞན་ལ་མི་འཚེ་བ་དང་བདུན་ནམ། ཡང་ན། ཁྱིམ་བདག་རིན་པོ་ཆེ་ནི་རྒྱལ་པོའི་བཀའ་ཉན་ཞིང་བང་མཛོད་ནོར་གྱིས་འགེངས་པ་ཞིག་འབྱུང་བ་སྟེ་བདུན་ནོ། ། འདིར་མཁས་པ་དག །གསེར་འཁོར་ལ་དམག་དཔོན་མེད་དེ། གཡུལ་བཤམ་མི་དགོས་པའི་ཕྱིར། མཛོད་གཉེར་བ་ཁྱིམ་བདག་དང་བདུན་ཡིན་ཅིང༌། གཞན་གསུམ་ལ་གཡུལ་བཤམ་དགོས་པས་དམག་དཔོན་གྲངས་པའི་བདུན་ཡིན་ནོ། །ཞེས་བཤད་དོ། ། ཉེ་བའི་རིན་པོ་ཆེ་བདུན་ནི། རྒྱལ་པོ་དང་འགལ་བར་སྤྱོད་པ་དེར་སོང་བ་ཙམ་གྱིས་ཐམས་ཅད་འདུད་པར་བྱེད་པའི་རལ་གྲི་དང་། ཆུར་དཔག་ཚད་བཅུ་དང་ཞེང་དུ་ལྔ་པ་ཆར་གྱིས་མི་བརླན་ཞིང་རླུང་གིས་མི་བསྐྱོད་པ། གྲང་ན་བསྲོ་ཞིང་ཚ་ན་བསིལ་བར་བྱེད་ལ། གང་དུ་འགྲོ་སར་འཁོར་དང་བཅས་པའི་ཁྱིམ་གྱི་བྱ་བ་བྱེད་པའི་པགས་པ་ཞིག་ཚོང་པས་ཕུལ་བས་རྒྱ་མཚོ་(༢༥ན)ནས་བྱུང་བའི་ཀླུའི་པགས་པ་ཡིན་པར་བཤད་པ་དང༌། ཆུར་དཔག་ཚད་བཅུ་གཉིས་དང་ཞེང་དུ་བདུན་པ། གྲང་ན་དྲོ་ལ། ཚ་ན་བསིལ་ཞིང་། ལྷ་མོ་རྣམས་འོངས་ནས་རོལ་མོ་བྱེད་པ། ཟླ་བ་དང་རྒྱུ་སྐར་དང་རིན་པོ་ཆེ་སོགས་ལྟ་བར་འདོད་ཀྱང་འགྲུབ་པའི་ཁྱིམ་དང༌། འཇམ་ཞིང་དྲི་མ་མི་གོས་པས་གྲང་དྲོ་བཀྲེས་སྐོམ་ངལ་དུབ་ཀྱིས་མི་གནོད་པ་མེ་དང་མཚོན་སོགས་ཀྱིས་མི་ཚུགས་པའི་གོས་དང༌། རྒྱལ་པོ་ཕྱིན་པའི་ཚེ་ལྷའི་བུ་དང་བུ་མོ་དང་བྱ་སོགས་འོངས་ནས་འདོད་ཡོན་ལ་སྤྱོད་པའི་སྐྱེད་ཚལ་དང༌། བསམ་གཏན་བྱེད་ན་རྣམ་པར་གྲོལ་ཞིང་བློ་གསལ་བ། ཀུན་ནས་ཉོན་མོངས་པ་དང་བྲལ་བར་བྱེད་པའི་མལ་ཆ་དང༌། གྱོན་ན་ཆུར་མི་བྱིང་ཞིང་ཡུད་ཙམ་གྱིས་དཔག་ཚད་བརྒྱར་འགྲོ་བ་ལ་ངལ་བ་མེད་པའི་ལྷམ་དང༌། མི་དགེ་བ་བཅུ་སྤངས་པའི་བུ་སྟོང་དང༌། དགྲ་ཟིལ་གྱིས་གནོན་པའི་མདའ་གཞུ་ཡང་འབྱུང་ངོ༌། ། རིན་པོ་ཆེ་སྣ་བདུན་ནི། བརྒྱད་སྟོང་འགྲེལ་པར། མུ་ས་གརྦྷ་བཻ་ཌཱུཪྱ། ། དངུལ་དང་གསེར་དང་ཤེལ་དང་ནི། ། མུ་ཏིག་དམར་བཅས་རྡོ་སྙིང་རྣམས། ། ཀུན་ལ་འཚོ་ཕྱིར་རིན་ཆེན་བདུན། ། ཞེས་པ་ལྟར་རོ། ། གཞན་ཡང་། ནམ་མཁའ་མཛོད་ཀྱིས་ཞུས་པའི་མདོ་ལས། སྟོང་གསུམ་རིལ་པོ་འདི་ལ་དབང་བསྒྱུར་བའི་འཁོར་ལོས་སྒྱུར་རྒྱལ་ཡང་ཡོད་པར་བཤད་ཅིང༌། ཆོས་དང་དོན་རྣམ་པར་འབྱེད་པའི་མདོ་ལས་ཀྱང༌། འཇིག་རྟེན་གྱི་ཁམས་མེ་ཏོག་འབྱུང་གནས་དེ་ན་མིའི་དབང་པོ་འཁོར་ལོས་སྒྱུར་བའི་རྒྱལ་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་ལ་དབང་བྱེད་པ་རྒྱལ་བ་ཐོབ་པ་ཞེས་བྱ་བ་ཞིག་བྱུང་ངོ༌། །ཞེས་གསུངས་སོ། ། ཇ༤ བཞི་པ་[ཁ་ཟས་སོགས་ཁྱད་པར་གཞན་བསྟན་པ་]ནི། ཁ་ཟས་བཀྲེས་སྐོམ་གོས་མདོག་ཉིན་མཚན་སོགས། ། ཐ་དད་འོག་མས་གོང་མ་མཐོང་བ་མིན། ། འགྲོ་བ་དེ་དག་གནས་པའི་ཚེ། མིའི་གླིང་གསུམ་ན་ཁ་ཟས་ཀྱི་རྣམ་གྲངས་མང་ལ། བྱང་གླིང་དུ་མ་རྨོས་པའི་འབྲུ་འབའ་ཞིག་ལ་ལོངས་སྤྱོད་པ་དང༌། འདོད་ལྷ་(༢༥བ)རྣམས་བདུད་རྩི། གཟུགས་ཁམས་པ་བསམ་གཏན་གྱི་ཟས་ཀྱིས་འཚོ་བ་སོགས་ཁ་ཟས་ཀྱི་ཁྱད་པར་དང༌། འདོད་པའི་ཁམས་ན་བཀྲེས་སྐོམ་ཡོད་ལ་ཁམས་གོང་མ་གཉིས་ན་མེད་པ་དང༌། གླིང་གསུམ་ན་གོས་ཁ་དོག་སྣ་ཚོགས་པ། བྱང་ན་དཀར་པོ་གཅིག་པུ། འདོད་ལྷ་དྲུག་ན་དཀར་སེར་སྔོ་དམར། གཟུགས་ཁམས་ན་དཀར་པོ། གླིང་གསུམ་གྱི་གོས་དར་རས་སྣལ་མ་སོགས་ལྗིད་ཆེ་ལ། བྱང་གླིང་དང་འདོད་ལྷ་དཔག་བསམ་གྱི་ཤིང་ཤུན་སྲབ་འཇམ་ཡང་བ་སྟེ། བྱང་གླིང་གི་གོས་སྲང་གཅིག་གི་ལྗིད། འོག་མིན་ལ་གཞན་དུ་མེད་པའི་བར་གྱི་གོས་རྣམས་ཀྱི་ཁྱད་པར་དང༌། གླིང་བཞིར་ཉི་ཟླའི་འོད་ལ་བརྟེན་པས་ཉིན་མཚན་གྱི་དབྱེ་བ་འབྱེད་ལ། གཉའ་ཤིང་འཛིན་ཡན་ཆད་རང་འོད་ལ་བརྟེན་པའི་ཕྱིར་སྣང་མུན་མེད་པས་མེ་ཏོག་འབྱེད་འཛུམ་སོགས་ལས་ཉིན་མཚན་རྟོགས་དགོས་པ་དང༌། སྐྱེ་གནས་གསུམ་ལ་འཆི་དུས་རོ་ཡོད་ལ། རྫུས་སྐྱེས་ལ་མེད་པ་དང༌། གླིང་གསུམ་ན་ཆར་ཆེ་ཆུང་ལོ་ལེགས་ཉེས་མངོན་ཞེན་སོགས་ཡོད་ལ། བྱང་གླིང་དང་ལྷ་ལ་མེད་པ་སོགས་རྣམ་པ་མང་པོའི་ཁྱད་ཆོས་ཐ་དད་དུ་གནས་པ་ཡིན་ནོ། ། རྫུ་འཕྲུལ་ཐོབ་པ་དང་ཁམས་གོང་མའི་ལྷས་ཁྲིད་པ་མ་གཏོགས་འོག་མ་རྣམས་ཀྱིས་གོང་མའི་གནས་རྣམས་སུ་ཕྱིན་པ་དང་མཐོང་བར་ནུས་པ་མ་ཡིན་ལ། གོང་མ་རྣམས་ནི་དེ་ལས་ལྡོག་པ་སྟེ། ཚངས་རིས་ལ་སོགས་པ་གཟུགས་ཀྱི་ལྷ་རྣམས་ཛམྦུའི་གླིང་དུ་འོང་དུས་ལུས་དེ་གནས་དེ་ལས་མ་གཡོས་པར་སྤྲུལ་པ་སྔོན་གྱིས་ཐོབ་པའི་སེམས་ཀྱི་ས་མཚུངས་ཡོད་པའི་རྣམ་པ་ལ་བརྟེན་ནས་འོང་ངོ༌། ། གཞན་འཕྲུལ་མན་ཆད་འདོད་པའི་ས་མཚུངས་པས་དེའི་ལུས་ཀྱིས་འོང་བའོ། ། ཆ༣ གསུམ་པ་འཇིག་སྟོང་བཤད་པ་ལ་གཉིས། ཇ༡ དངོས་དང༌། ཇ༢ ཞར་བྱུང་ངོ༌། ། ཇ༡ དང་པོ་ལ་གཉིས། ཉ༡ བཅུད་བཤད་པ་དང༌། ཉ༢ སྣོད་བཤད་པའོ། ། ཉ༡ དང་པོ་ནི། འཇིག་དུས་དམྱལ་ནས་འགོ་བརྩམས་ངན་འགྲོ་སྟོངས། ། ལྷ་མི་(༢༦ན)བསམ་གཏན་ཐོབ་ནས་གཟུགས་ཁམས་སྐྱེ། ། འོག་མ་གོང་མར་འཕོས་ནས་བཅུད་སྟོངས་ཚེ། ། གནས་པའི་བསྐལ་པ་རྫོགས་ནས་འཇིག་པའི་འགོ་བརྩམ་པའི་དུས་སུ་དམྱལ་བ་ནས་ལས་ཟད་པ་རྣམས་མཐོ་རིས་སུ་འགྲོ། ལས་མ་ཟད་པ་རྣམས་འཇིག་རྟེན་འདི་ཞིག་པའི་ཚེ་དེར་སྡུག་བསྔལ་མྱོང་ཞིང་དེ་ནས་འཕོས་ཏེ་འཇིག་རྟེན་གཞན་གྱི་དམྱལ་བར་སྐྱེ་བས། འཇིག་རྟེན་འདིའི་དམྱལ་གནས་སུ་སེམས་ཅན་གསར་དུ་མི་སྐྱེ་བར་དམྱལ་བའི་གནས་ནས་སྟོངས་པའི་འགོ་བརྩམ། དེ་ནས་ཡི་དྭགས་དང་དུད་འགྲོའི་རྩ་བའི་གནས་སྟོང༌། དེའི་ཚེ་ཛམྦུའི་གླིང་གི་མི་གཅིག་གིས་རང་གི་ཆོས་ཉིད་ཀྱིས་བསམ་གཏན་གཉིས་པའི་བར་དུ་ཐོབ་པར་བྱས་ཏེ་གནས་པ་ལས། དེ་ནས་ལངས་ཏེ་འདི་སྐད་དུ་དབེན་པ་ལས་སྐྱེས་པའི་དགའ་བ་དང་བདེ་བ་ནི་འདི་ཡིན་ནོ་ཞེས་སྨྲས་པའི་སྒྲ་དེས་སྐད་ཅིག་ཡུད་ཙམ་ལ་ཛམྦུའི་གླིང་དུ་ཚེགས་མེད་པར་ཁྱབ་བོ། ། སྒྲ་དེ་ཐོས་མ་ཐག་ཏུ་གཞན་དག་གིས་ཀྱང་དེའི་རྗེས་སུ་བསླབས་པས་བསམ་གཏན་གཉིས་པའི་བར་དུ་རྫོགས་པར་བྱས་ནས་འོད་གསལ་གྱི་ལྷའི་རིས་སུ་སྐྱེ་བར་འགྱུར་ཏེ། གང་གི་ཚེ། ཛམྦུའི་གླིང་ན་སེམས་ཅན་གཅིག་ཀྱང་མ་ལུས་པ་དེའི་ཚེ། ཤར་གྱི་ལུས་འཕགས་གླིང་དང་ནུབ་ཀྱི་བ་ལང་སྤྱོད་ཀྱི་མི་རྣམས་ཀྱང་དེ་བཞིན་དུ་འགྱུར་རོ། ། སྒྲ་མི་སྙན་པ་ནི་སུམ་ཅུ་རྩ་གསུམ་གྱི་གནས་སུ་སྐྱེ་ཞིང་གླིང་ཕྲན་རྣམས་ཀྱང་གཙོ་བོ་དང་འདྲ་བས་མིའི་འཇིག་རྟེན་སྟོང་ངོ༌། ། དེའི་འོག་ཏུ་ལྷ་ཞིག་གིས་བསམ་གཏན་གཉིས་པ་ཐོབ་པའི་ཚུལ་བསྒྲགས་པས་རིམ་བཞིན་ཐམས་ཅད་ཀྱིས་བསམ་གཏན་ཐོབ་ཅིང་གཟུགས་ཁམས་སུ་སྐྱེ། དེ་དག་ཀྱང་འོག་མས་གོང་མའི་བསམ་གཏན་ཐོབ་ནས་དེར་འཕོས་ཏེ་ཚངས་པའི་འཇིག་རྟེན་མན་ཆད་དུ་སེམས་ཅན་གཅིག་ཀྱང་མེད་པའི་ཚེ་བཅུད་ཞིག་པ་ཞེས་བྱའོ། ། ཉ༢ གཉིས་པ་[སྣོད་བཤད་པ་]ནི། བསམ་གཏན་དང་པོའི་གནས་མན་མེ་ཡིས་འཇིག ། སྟོང་པ་ཅང་མེད་(༢༦བ)ནམ་མཁའ་གཅིག་ཏུ་ལུས། ། ཡང་ཆགས་དེ་ཡང་གནས་མཐར་མེ་ཡིས་འཇིག ། བཅུད་སྟོངས་པའི་རྗེས་སུ་ཆར་མི་འབབ་ཅིང་ཉི་མ་བདུན་འཆར་བར་གྱུར་ཏེ། དེས་རིམ་པ་བཞིན་དུ་རྩི་ཤིང་ནགས་ཚལ་ནས་རྒྱ་མཚོ་ཆེན་པོའི་བར་སྐེམ་པར་གྱུར་ནས་མཐར་མེ་ལྕེ་གཅིག་ཏུ་གྱུར་པས་མནར་མེད་པ་ནས་བསམ་གཏན་དང་པོའི་གནས་མན་ཆད་མེ་ཡིས་བསྲེགས་ཤིང་འཇིག་སྟེ། དེ་མན་ཆད་སྟོང་པ་ཅིའང་མེད་པ་ནམ་མཁའ་གཅིག་གི་ངང་དུ་ལུས་པར་འགྱུར་རོ། ། ཡང་སྔ་མ་བཞིན་འཇིག་རྟེན་གྱི་ཁམས་གཅིག་གསར་དུ་ཆགས་པ་དེའང་གནས་པའི་བསྐལ་པ་རྫོགས་པའི་མཐར་སྔ་མ་བཞིན་དུ་མེ་ཡིས་འཇིག་གོ། ། དེ་འདྲ་བདུན་སོང་བརྒྱད་པ་