Tibetan
གི་ཚད་དབྱིབས་ཞིབ་པར་མངོན་པ་སོགས་ལས་འབྱུང་ཞིང་རགས་པར་ལྷ་གནས་དེ་དག་གོང་ནས་གོང་དུ་ཉིས་འགྱུར་གྱིས་རྒྱ་ཆེ་ཞིང་ལོངས་སྤྱོད་དང་དབང་ཕྱུག་གིས་འཕགས་པར་འདོད་དོ། ། ལྷ་ཞེས་པའང་ལེགས་སྦྱར་སྐད་དུ། དེ་བཽ་ཀསྲ་ཏེ་འདི་རྣམས་ཀྱི་ཁྱིམ་མཐོ་རིས་སུ་ཡོད་པས་མཐོ་རིས་གནས་བྱེད་དམ་མཁའ་ཁྱིམ་པ་ཞེས་བྱའོ། ། ཡང་ན། དེ་ཝ་སྟེ། རྩེ་ཞིང་རོལ་བར་བྱེད་པས་ལྷའོ། ། ཏ༢ གཉིས་པ་ཞར་བྱུང་[ཉན་རང་གི་འདོད་ཚུལ་]ནི། སྟོང་གསུམ་གཅིག་ནི་ཉན་རང་གཟིགས་པར་འཇུག ། དེ་དག་ཆ་མེད་རྡུལ་ལས་གྲུབ་པར་འདོད། ། དེ་ལྟར་བཤད་པའི་སྟོང་གཉིས་སམ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ཙམ་གྱི་བཀོད་པ་ཇི་ལྟ་བ་ནི་ཉན་རང་འཕགས་པ་རྣམས་ཀྱི་ཡེ་ཤེས་དག་པའི་གཟིགས་པར་ཡང་རྟོགས་ཤིང་འཇུག་ལ། དེ་ལས་གཞན་པའི་ཞིང་(༡༨ན)ཁམས་རབ་འབྱམས་རྒྱ་མཚོའི་བཀོད་པའི་ཚུལ་ནི་སངས་རྒྱས་དང་བྱང་སེམས་དག་པའི་ས་ལ་བཞུགས་པ་ཁོ་ནའི་སྤྱོད་ཡུལ་ཡིན་ཏེ། དགྲ་བཅོམ་བསེ་རུ་སྟོན་རྣམས་ཀྱིས། ། སྟོང་གཉིས་གསུམ་དང་གྲངས་མེད་མཐོང༌། ། ཞེས་འབྱུང་བས་སོ། ། ཉན་རང་དེ་དག་རྣམས་ཀྱིས་སྣོད་ཀྱི་འཇིག་རྟེན་རགས་པ་རྩོམ་བྱེད་ནི་ཕྱོགས་ཀྱི་ཆ་མེད་ཀྱི་རྡུལ་ཕྲ་རབ་ས་ཆུ་མེ་རླུང་བཞི་དང་། དྲི་རོ་རེག་གཟུགས་ཏེ། རྡུལ་རྫས་བརྒྱད་འདུས་ཀྱི་གོང་བུ་འདུས་པ་ལས་གྲུབ་པར་འདོད་ཅིང༌། དེའང་མུ་སྟེགས་བྱེད་ལྟར། བསྐལ་པ་སྔ་མ་འཇིག་པའི་ཤུལ་དུ་རྡུལ་ཕྲན་ཆ་མེད་སིལ་བུར་གནས་པ་ནི་བཞེད་པ་མ་ཡིན་གྱི། གནས་འདིར་སྐྱེ་འགྱུར་སེམས་ཅན་སྤྱི་མཐུན་ལས་ཀྱི་བྱེད་པས་འབྲས་བུ་རགས་པ་སྣ་ཚོགས་སྐྱེད་ནུས་ཀྱི་རླུང་ཉིད་ཐོག་མའི་ས་བོན་ཡིན་པར་བཞེད་པ་སོགས་ཞིབ་པར་འོག་ཏུ་འབྱུང་ངོ༌། ། ཉ༢ གཉིས་པ་བཅུད་ཀྱི་སེམས་ཅན་བཤད་པ་ལ་བཞི། ཏ༡ ངོ་བོ། ཏ༢ མཆེད་ཚུལ། ཏ༣ བདེ་སྡུག ། ཏ༤ སྡུད་ཚུལ་ལོ། ། ཏ༡ དང་པོ་ནི། འགྲོ་བའི་ངོ་བོ་མ་བསྒྲིབས་ལུང་མ་བསྟན། ། དེ་ལྟར་རྟེན་སྣོད་ཀྱི་འཇིག་རྟེན་བཤད་ཟིན་ནས། དེ་ལ་བརྟེན་པ་བཅུད་ཀྱི་སེམས་ཅན་འགྲོ་བ་རྣམས་ཀྱི་ངོ་བོ་ནི། ལས་དང་ཉོན་མོངས་པས་མ་བསྒྲིབས་ཤིང༌། དགེ་སྡིག་གང་དུའང་ལུང་དུ་མ་བསྟན་པ་ཞིག་སྟེ། ཐེག་ཆེན་པ་རྣམས་ཀྱིས་ཀུན་གཞི་དང་འོད་གསལ་སོགས་ཐུན་མོང་མིན་པའི་བཤད་ཚུལ་རྣམས་འོག་ཏུ་འབྱུང་ངོ༌། ། ཏ༢ གཉིས་པ་[མཆེད་ཚུལ་]ལ། ཐ༡ བསྟན། ཐ༢ བཤད་གཉིས་ལས། ཐ༡ དང་པོ་མདོར་བསྟན་པ་ནི། སྐྱེ་མཆེད་བཞི་སོགས་རིམ་གྱིས་གྲུབ་པར་བཞེད། ། ཡས་རིམ་མཆེད་ནས་དམྱལ་བའི་བར་དུ་ཆགས། ། འགྲོ་བ་རྣམས་ཐོག་མར་འཁྲུལ་པ་ན་རང་གི་ངོ་བོ་དེ་ལ་ལྷན་ཅིག་སྐྱེས་པའི་མ་རིག་པས་མཚུངས་ལྡན་གྱི་རྒྱུ་བྱས། གཟུང་འཛིན་བག་ལ་ཉལ་ལངས་ཏེ་ཁམས་གསུམ་དུ་ཟག་པའི་ཐོག་མར་ཡོད་མིན་མེད་མིན་སོགས་གཟུགས་མེད་སྐྱེ་མཆེད་མུ་བཞི་དང༌། དེ་ནས་གཟུགས་ཁམས་དང་འདོད་ཁམས་སོགས་རིམ་(༡༨བ)གྱིས་གྲུབ་པར་བཞེད་ཅིང༌། མདོར་ན། འགྲོ་བ་རྣམས་ནི་གོང་ནས་འོག་ཏུ་ཡས་རིམ་གྱིས་མཆེད་ནས་མཐར་དམྱལ་བའི་འཇིག་རྟེན་གྱི་བར་དུ་ཆགས་སོ། ། ཐ༢ གཉིས་པ་རྒྱས་པར་བཤད་པ་ནི། དེ་ཡང་གཟུགས་མེད་སྐྱེ་མཆེད་མུ་བཞི་སྟེ། ། ཏིང་འཛིན་བྱེ་བྲག་ཙམ་ཡིན་གནས་ལུས་མེད། ། དེའང་གཟུགས་མེད་པའི་ཁམས་ལ་སྐྱེ་མཆེད་མུ་བཞིར་གྲགས་ཏེ། འཁོར་བར་སྐྱེ་ཚུལ་དང་བསྟུན་ནས་དམ་པ་འགའ་ཞིག་མས་རིམ་གྱིས་འཆད་པ་ལྟར་ལེགས་ཀྱང༌། འདིར་གོ་བདེ་བའི་སླད་དུ་ཡས་རིམ་གྱིས་བཤད་ན། ཐོག་མར་ཏིང་ངེ་འཛིན་སྙོམས་འཇུག་གི་སྦྱོར་བའི་དུས་སུ་ནམ་མཁའ་ལྟར་མཐའ་ཡས་སོ་སྙམ་པའི་རྣམ་པར་བྱེད་ཅིང་ལམ་དེ་ཉིད་སྐྱེ་ཞིང་མཆེད་པ་ལས་བྱུང་བས་འབྲས་བུ་སྐྱེ་བ་ལའང་དེ་ཡི་མིང་གིས་བཏགས་པའི་ནམ་མཁའ་མཐའ་ཡས་སྐྱེ་མཆེད། དེ་བཞིན་དུ་སྦྱར་ཏེ། རྣམ་ཤེས་མཐའ་ཡས་སོ་སྙམ་པའི་རྣམ་པར་བྱེད་པའི་རྣམ་ཤེས་མཐའ་ཡས་སྐྱེ་མཆེད། ཅི་ཡང་མེད་དོ་སྙམ་པའི་རྣམ་པར་བྱེད་པའི་ཅི་ཡང་མེད་པའི་སྐྱེ་མཆེད། འདུ་ཤེས་ནི་ནད་དང་འབྲས་དང་ཟུག་རྔུ་དང་འདྲ་ཞིང་། འདུ་ཤེས་མེད་པ་ནི་ཀུན་ཏུ་རྨོངས་པའོ་སྙམ་པའི་རྣམ་པར་བྱེད་ཅིང་འདུ་ཤེས་ཀྱི་རྒྱུ་བ་གཞན་པ་འབྱུང་བའི་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དེ་བཞིའོ། ། དེ་དག་ཀྱང་ཐོག་མར་འཁྲུལ་དུས་གོང་ནས་འོག་ཏུ་མཆེད་ལ། ཕན་ཚུན་འཁོར་དུས་སྔར་གྱི་རྟེན་ལ་སྐྱེ་མཆེད་པའི་སེམས་བཞི་གང་གྲུབ་པ་དེར་སྐྱེས་ནས། ཁ་ཅིག་གོང་མ་ཐོབ་པ་ལས་འོག་ནས་འོག་ཏུ་རིམ་གྱིས་ལྟུང་བའང་ཡོད་ལ། ཁ་ཅིག་གང་ཐོབ་པ་དེ་ནས་སྲིད་པ་གཞན་དུའང་འཕོ་བས་མ་ངེས་སོ། ། འོན་ཀྱང་ཕལ་ཆེར་གཟུགས་མེད་འདི་བཞི་པོ་ཐོབ་ནས་འོག་མ་འོག་མར་རིམ་པར་ལྟུང་བ་ཤས་ཆེ་སྟེ། འཆི་ཀར་ཡོད་མིན་མེད་མིན་གྱི་ཏིང་ངེ་འཛིན་གྱི་སྲིད་རྩེ་ཞིག་ནས། ཅི་ཡང་མེད་པའི་འདུ་ཤེས་ཙམ་དུ་ཤར་བས་ཅུང་ཟད་སྔར་ལས་རགས་པར་སོང་ལ། དེ་ཉིད་ཚོར་བ་བདེ་བས་དེའི་ངང་ལ་ཆགས་(༡༩ན)པས་དེར་ལྟུང་ལ། དེ་བཞིན་དུ། རྣམ་ཤེས་ཀྱི་འཆི་ཁར་ནམ་མཁའ་མཐའ་ཡས་ཀྱི་སེམས་ཤར་ནས་དེར་རོ་མྱོང་བས་མཚུངས་ལྡན་གྱིས་སྐྱེ་བ་ཡིན་ཏེ། སྔར་ནས་ཏིང་ངེ་འཛིན་གྱི་ངང་ལ་གནས་ཤིང་རྒྱུན་རིང་བར་གོམས་པས། དེར་ཡང་དེའི་སེམས་འགྲུབ་པར་ཤིན་ཏུ་སླ་བའི་ཕྱིར་རོ། ། དེ་ལྟར་གཟུགས་མེད་པའི་ཁམས་བཞི་ནི་ཏིང་ངེ་འཛིན་གྱི་བྱེ་བྲག་ལ་བཏགས་པ་ཙམ་ལས་གནས་ཀྱི་ངེས་པ་དང་ལུས་ཀྱི་ཚད་མེད་པས་སྟེང་འོག་ཏུ་གདགས་པའང་མེད་དོ། །ཡུལ་གང་དུ་སྙོམས་འཇུག་དེ་ཐོབ་ནས་ཤི་འཕོས་པ་རྣམས་དེ་ཉིད་དུ་དེར་གྲུབ་པའི་ཕྱིར་རོ། ། འདིར་མངོན་པ་བ་ཁ་ཅིག་གིས་གཟུགས་མེད་ཁམས་འོག་མིན་གྱི་སྟེང་ནས་སྟེང་དུ་བརྩེགས་པའི་གནས་དང་གཟུགས་ཀྱང་ཡོད་ལ། གཟུགས་མེད་ཅེས་བརྗོད་པ་ནི་དམན་པ་ལ་དགག་སྒྲ་བྱས་པར་འདོད་པ་དང༌། སངས་རྒྱས་ཕལ་པོ་ཆེ་ལས་ཀྱང༌། ངགཟུགས་མེད་པའི་ཁམས་ཀྱི་ཡུལ་དང་བཅས། གཞི་དང་བཅས། རྟེན་དང་བཅས། དབྱིབས་དང་བཅས། ཞེས་པས་མཚོན། གཟུགས་མེད་ཁམས་ལ་སྣོད་ཀྱི་འཇིག་རྟེན་ཡོད་པའི་ཚིག་ཡང་དང་ཡང་དུ་འབྱུང་བ་དང༌། དེ་བཞིན་དུ། སྔ་འགྱུར་བཀོད་པ་ཆེན་པོ་ཡིད་བཞིན་མཆོག་གི་རྒྱུད་ཀྱི་དགོངས་དོན་དང༌། བི་མ་ལ་དང་པདྨ་སཾ་བྷ་བའི་ཞབས་ཀྱིས་ཀྱང་གཟུགས་ལས་གོང་དུ་འཕགས་པའི་མཁའ་ལ། པདྨ་རྣམ་པར་བརྩེགས་པའི་ནམ་མཁའ་སོགས་བཞི་ལ་ཏིང་ངེ་འཛིན་གྱི་ལུས་ཀྱིས་བརྟེན་པར་བཞེད་དོ། ། གཟུགས་ཁམས་བསམ་གཏན་བཞི་པར་གནས་གཙང་ལྔ། ། སོ་སྐྱེའི་གནས་གསུམ་བསམ་གཏན་འོག་གསུམ་གསུམ། ། འདོད་པ་ལ་འདོད་ཆགས་དང་བྲལ། གཟུགས་ལ་མ་བྲལ་བས་གཟུགས་ཀྱི་ཁམས་ཞེས་གྲགས་པ་ལ་ནང་གསེས་སུ་གནས་རིས་བཅུ་བདུན་ཡོད་པ་དེ་དག་སྡེ་ཚན་དུ་བསྡུ་ན་བསམ་གཏན་བཞིར་གྲགས་པ་ལས། བསམ་གཏན་བཞི་པར་འོག་མིན་སོགས་གཙང་མ་རིས་ཀྱི་གནས་ལྔ་(༡༩བ)འབྲས་བུ་ཆེ་བ་སོགས་སོ་སྐྱེའི་གནས་གསུམ། བསམ་གཏན་གསུམ་པར་དགེ་རྒྱས་སོགས། གཉིས་པར་འོད་གསལ་བ་སོགས། དང་པོར་ཚངས་ཆེན་པ་སོགས་ཏེ། འོག་མ་དེ་དག་ལའང་གསུམ་གསུམ་ཡོད་པ་གོང་དུ་སྨོས་པ་ལྟར་ལ། འཇིག་རྟེན་ཆགས་པའི་ཚེ། སྔོན་དུ་མེས་ཞིག་པ་ཡིན་ན། བསམ་གཏན་གཉིས་པའི་ལྷ་ཞིག་ཚེ་འཕོས་ནས་ཚངས་པའི་གཞལ་མེད་ཁང་སྟོང་པར་སྐྱེ་ཞིང༌། དེ་ནས་རིམ་བཞིན་མཆེད་ནས་ཚངས་པ་མདུན་ན་འདོན་དང༌། ཚངས་རིས་སོགས་ནས་དམྱལ་བའི་བར་དུ་ཡས་རིམ་གྱིས་ཆགས་ཤིང༌། སྔ་མ་ཆུས་ཞིག་པའི་ཚེ་ཐོག་མར་བསམ་གཏན་གསུམ་པ་ནས་འོག་ཏུ་སྐྱེ་བ་སོགས་ཤེས་དགོས་སོ། ། འདོད་ཁམས་ལྷ་རིས་དྲུག་དང་གླིང་ཆེན་བཞི། ། གླིང་ཕྲན་བརྒྱད་དང་དུད་འགྲོ་ཡི་དྭགས་གཉིས། ། ཚ་གྲང་དམྱལ་བ་བརྒྱད་བརྒྱད་བཅས་པ་ཡི། ། འདོད་པ་སུམ་ཅུ་རྩ་དྲུག་ཉིད་དུ་བྱུང༌། ། འདོད་པའི་ཡོན་ཏན་འཁྲིག་པ་གཙོ་བོར་བྱེད་ཅིང་ཁམས་ཀྱི་ཟས་ལ་འདོད་ཆགས་དང་ལྡན་པས་འདོད་ཁམས་ཞེས་གྲགས་པ་འདི་ལ་གཞན་འཕྲུལ་དབང་བྱེད་སོགས་འདོད་ལྷ་རིས་དྲུག །སྒྲ་མི་སྙན། བ་ལང་སྤྱོད། ལུས་འཕགས་པོ། ཛམྦུའི་གླིང་སྟེ་གླིང་ཆེན་བཞི། དེ་དག་གི་གླིང་ཕྲན་བརྒྱད། ངན་སོང་གི་འགྲོ་བ་དུད་འགྲོ་དང་ཡི་དྭགས་གཉིས། ཚ་དམྱལ་བརྒྱད། གྲང་དམྱལ་བརྒྱད་བཅས་བསྡམས་པས་འདོད་པ་སུམ་ཅུ་རྩ་དྲུག་ཅེས་བྱ་ཞིང༌། ཐོག་མར་འཇིག་རྟེན་ཆགས་པའི་སྐབས་སུའང་ཇི་སྐད་བཤད་པའི་གོ་རིམ་བཞིན་གོང་ནས་ལྟུང་ཞིང་མཆེད་པས་འགྲོ་བ་དེ་དག་ཉིད་དུ་བྱུང་ངོ༌། ། བདེ་འགྲོ་ངན་འགྲོ་བཅུ་བཅུ་ཉི་ཤུ་དང༌། ། ཉི་ཤུ་རྩ་བརྒྱད་དུ་ཡང་རྣམ་པར་གཞག ། དབྱེ་བསྡུ་གཞན་ཡང་། འདོད་ལྷ་དྲུག་དང་གླིང་བཞིས་བདེ་འགྲོ་བཅུ། དམྱལ་བ་བརྒྱད། དུད་འགྲོ་དང་ཡི་དྭགས་ཏེ་ངན་འགྲོ་བཅུར་བྱས་པས་འདོད་པ་ཉི་ཤུ་ཞེས་གྲགས་པ་དང༌། (༢༠ན)གླིང་ཕྲན་བརྒྱད་སོ་སོར་དབྱེ་བས་འདོད་པ་ཉི་ཤུ་རྩ་བརྒྱད་དུའང་རྣམ་པར་གཞག་གོ། ། ལྷ་མ་ཡིན་དུད་འགྲོར་བསྡུ་བའང་ཡོད་ཀྱང་། གནས་ལུས་ལོངས་སྤྱོད་སོགས་ལྷ་དང་ཆོས་མཚུངས་པས་དེར་བསྡུའོ། ། ཨ་སུ་ར་ཞེས་པའི་དགག་སྒྲ་དམན་པ་ལ་སྦྱར་བ་ཡིན་གྱི། དངོས་པོ་བཟློག་པ་ལ་སྦྱར་བ་མིན་པས་ཏེ། ས་སྡེ་དང་འདོད་འཇོ་སོགས་ལས་ཀྱང་འདི་ལྟར་དུ་བཤད་དོ། ། ཏ༣ གསུམ་པ་[བདེ་སྡུག་]ནི། གཟུགས་ཁམས་ལ་སོགས་བདེ་འགྲོ་ཐམས་ཅད་ཀྱང༌། ། ཚེ་དང་ལོངས་སྤྱོད་འོག་ནས་འོག་ཏུ་དམན། ། ངན་འགྲོའི་སྡུག་བསྔལ་ཕྱི་མ་ཕྱི་མས་ཆེ། ། གཟུགས་ཁམས་གནས་རིས་བཅུ་བདུན། འདོད་ལྷ་རིགས་དྲུག །གླིང་བཞིའི་འགྲོ་བ་རྣམས་སྔར་མཆེད་པའི་སྐབས་སུ་སྨོས་པའི་གོ་རིམ་ལྟར་ཚེ་དང་ལོངས་སྤྱོད་འོག་ནས་འོག་ཏུ་རིམ་པར་དམན་ཞིང་སྔ་མ་སྔ་མ་རྣམས་ཚེ་རིང་ཞིང་ལོངས་སྤྱོད་ཤིན་ཏུ་རྒྱ་ཆེ་བ་ཡིན་ནོ། ། ངན་འགྲོ་རྣམས་ནི་སྡུག་བསྔལ་ཕྱི་མ་ཕྱི་མས་རིམ་གྱིས་ཆེ་བ་ཡིན་ཏེ། དུད་འགྲོ་ལས་ཡི་དྭགས། དེ་ལས་དམྱལ་བ། དེའང་དམྱལ་གནས་གོང་མ་རྣམས་ལས་འོག་མ་སྡུག་བསྔལ་རིམ་པར་ཆེ་ཞིང་ཚེ་ཚད་ཀྱང་རིམ་གྱིས་རིང་བ་ཡིན་ནོ། ། ཏ༤ བཞི་པ་[སྡུད་ཚུལ་]ནི། སྐྱེ་མཆེད་བསམ་གཏན་བཞི་བཞི་འདོད་ཁམས་གཅིག ། ས་དགུས་བསྡུས་ཤིང་རིགས་ལས་འགྲོ་བ་དྲུག ། མི་དང་ལྷ་གནས་ངན་སོང་རྣམ་གསུམ་པོ། ། རྒྱུད་དང་ལམ་གྱི་སྒོ་ནས་ལྔ་རུ་བཞག ། དེ་ལྟར་ཁམས་གསུམ་པོ་དེའང་སེམས་མི་འདྲ་བས་ཕྱེ་ན་དགུར་བཞག་སྟེ། གཟུགས་མེད་ཁམས་སྐྱེ་མཆེད་བཞིས་ཕྱེ་བས་ས་བཞི། གཟུགས་ཁམས་བསམ་གཏན་བཞིས་ཕྱེ་བས་ས་བཞི། འདོད་ཁམས་པ་ལ་ཁྱད་པར་མེད་པས་ས་གཅིག་སྟེ་དགུས་བསྡུས་ཤིང༌། རིགས་ཀྱིས་ཕྱེ་ན་འགྲོ་བ་དྲུག་སྟེ། ཡབ་སྲས་མཇལ་བ་ལས། སེམས་ཅན་ཚོགས་ཀྱི་འགྲོ་དྲུག་གང་བསྟན་པ། ། སེམས་ཅན་དམྱལ་བ་དུད་འགྲོ་ཡི་དྭགས་དང༌། ། ལྷ་མིན་རིས་དང་མི་དང་ལྷ་རྣམས་སུ། ། མི་ཡི་སེང་(༢༠བ)གེས་ཀུན་རྫོབ་བཏགས་པ་མཛད། ། ཅེས་པ་ལྟར་རོ། ། ཡང་རྒྱ་ཆེར་རོལ་པ་ལས། སྲེད་སྲིད་མ་རིག་དབང་གིས་སྐྱེ་བོ་རྣམས། ། མི་དང་ལྷ་གནས་ངན་སོང་རྣམ་གསུམ་པོ། ། འགྲོ་བ་ལྔ་པོ་དག་ཏུ་མི་མཁས་འཁོར། ། དཔེར་ན་རྫ་མཁན་འཁོར་ལོ་འཁོར་བ་བཞིན། ། ཞེས་པ་ལྟར། སྐྱེ་བའི་རྒྱུད་དང་འགྲོ་བའི་ལམ་གྱི་སྒོ་ནས་ལྔ་རུའང་བཞག་གོ། ། ཡང་ན། རྨི་ལམ་གྱི་ལམ། བག་ཆགས་ཀྱི་ལམ། ལས་ཀྱི་མཐའི་ལམ། འཁྲུལ་འཁོར་མ་ངེས་པའི་ལམ། རྒྱུ་དང་འབྲས་བུ་སོ་སོར་མ་ངེས་པའི་ལམ་སྟེ། ལྔ་ལའང་བཤད་པ་ཡོད་དོ། ། དེ་ཀུན་སྐྱེ་གནས་རྣམ་པ་བཞི་དང་ནི། ། ཡང་དག་ལོག་པ་མ་ངེས་ཚོགས་སུ་འདུ། ། འགྲོ་བ་དེ་ཐམས་ཅད་ཀུན་ཀྱང་སྐྱེ་གནས་སུ་བསྡུ་ན། མངལ་སྐྱེས། སྒོང་སྐྱེས། དྲོད་གཤེར་སྐྱེས། རྫུས་སྐྱེས་བཞིར་འདུ་ཞིང༌། དེའང་ལྷ་དང་དམྱལ་བ་དང་སྲིད་པ་བར་མ་རྣམས་རྫུས་སྐྱེས། མི་དང་དུད་འགྲོ་རྣམས་སྐྱེ་གནས་བཞི་ག །ཡི་དྭགས་ལ་མངལ་སྐྱེས་དང་རྫུས་སྐྱེས་གཉིས་ཡོད་པར་བཤད་དོ། ། ཡང་སེམས་ཅན་གྱི་འཇིག་རྟེན་དེ་ལྟ་བུར་སྐྱེ་གནས་འཆི་བ་ཐམས་ཅད་ཡང་དག་པར་ངེས་པའི་ཚོགས་དང༌། ལོག་པར་ངེས་པའི་ཚོགས་དང༌། མ་ངེས་པའི་ཚོགས་གསུམ་དུ་འདུ་སྟེ། དང་པོ་ནི་འཕགས་པ། གཉིས་པ་མཚམས་མེད་བྱེད་པ། གསུམ་པ་ནི་དེ་ལས་གཞན་པ་ཐམས་ཅད་དོ། ། ཆ༢ གཉིས་པ་བར་དུ་གནས་པའི་ཚུལ་བཤད་པ་ལ་བཞི། ཇ༡ འགྲོ་བ་སྤྱིར་བཤད་པ། ཇ༢ འཛམ་གླིང་ཁྱད་པར་དུ་བཤད་པ། ཇ༣ འཁོར་ལོས་བསྒྱུར་བ་འབྱུང་ཚུལ། ཇ༤ ཁ་ཟས་སོགས་ཁྱད་པར་གཞན་བསྟན་པའོ།། ཇ༡ དང་པོ་ནི། གནས་དུས་དུད་འགྲོ་མ་གཏོགས་འགྲོ་བ་གཞན། ། ཕལ་ཆེར་འབྲས་བུ་ལ་སྤྱོད་ངེས་པ་ཅན། ། འཇིག་རྟེན་གྱི་ཁམས་ལེགས་པར་ཆགས་ནས་གནས་པའི་དུས་སུ་དུད་འགྲོ་མ་གཏོགས་པའི་ངན་སོང་གི་འགྲོ་བ་གཞན་དང་མཐོ་རིས་པ་ཕལ་མོ་ཆེ་ཐམས་ཅད་སྔར་བསགས་པའི་ལས་དགེ་སྡིག་གི་འབྲས་བུ་ཁོ་ན་ལ་སྤྱོད་པ་ཡིན་(༢༡ན)པས་ཚེ་དང་ལོངས་སྤྱོད་བདེ་སྡུག་སོགས་ངེས་པ་ཡིན་ཏེ། དུད་འགྲོ་རྣམས་ནི་སྡིག་པའི་ལས་ཀྱི་འབྲས་བུ་ལ་སྤྱོད་པ་ཡིན་ཀྱང་ཚེ་སོགས་མ་ངེས་ཏེ་ཀླུ་ཆེན་སོགས་རིང་མཐའ་བར་བསྐལ་གཅིག་ཏུ་གནས་ཤིང་ཐུང་མཐའ་སྲིན་བུ་སོགས་སྐད་ཅིག་མར་གནས་པ་དང༌། ལུས་ཀྱི་དབྱིབས་དང་རྣམ་པ་མ་ངེས་པ་དཔག་ཏུ་མེད་ཅིང༌། མི་ཡིས་བདག་ཏུ་བཟུང་བའི་གཡུང་དྭགས་སོགས་ཅུང་ཟད་བདེ་ལ། གླིང་བར་གྱི་མུན་པར་སྐྱེས་པ་སོགས་སྡུག་བསྔལ་གྱིས་གོ་མཚམས་མེད་པར་མནར་བ་དང༌། དམྱལ་བ་ཡང་སོས་སོགས་དྲུག་ནས་རིམ་བཞིན་དང༌། འདོད་ལྷ་དྲུག་ཡས་རིམ་གྱིས་སྦྱར་བའི་ལྷའི་ཚེ་ཚད་རྣམས་དམྱལ་བ་པའི་ཞག་ཏུ་བརྩིས་པའི་འདོད་ལྷ་རྣམས་ཀྱི་ལོ་གྲངས་དེ་སྙེད་ཐུབ་སྟེ། དཔེར་ན། ཡང་སོས་པ་རྒྱལ་ཆེན་རིས་བཞི་པའི་ཚེ་ཚད་ཞག་ཏུ་བྱས་པའི་ལོ་ལྔ་བརྒྱ་འཚོ་བ་ལྟ་བུ་དང༌། རབ་ཚ་བར་བསྐལ་ཕྱེད། མནར་མེད་པ་བསྐལ་པ་གཅིག་གི་ཚེར་བཤད་ཅིང༌། གྲང་དམྱལ་རྣམས་ལས་ཆུ་བུར་ཅན་གྱི་ཚེ་མ་ག་དྷཱའི་ཏིལ་སྦྱང་ནས་ལོ་བརྒྱ་རེ་ལ་ཏིལ་རེ་འདོར་བའི་ཏིལ་ཟད་པ་དང་མཉམ་ཞིང༌། གཞན་རྣམས་སོ་སོར་སྔ་མ་སྔ་མ་ལས་ཉི་ཤུ་འགྱུར་རོ། ། ཡི་དྭགས་རྣམས་ཀྱིས་མིའི་ཟླ་བ་རེ་ལ་ཞག་ཏུ་བརྩིས་པའི་ལོ་ལྔ་བརྒྱ་ཐུབ་པ་དང༌། སའི་དངོས་གཞིར་ལྷ་མིན་རྣམས་ཀྱི་ལུས་དང་ཚེའི་ཚད་སུམ་ཅུ་རྩ་གསུམ་དང་མཚུངས་པར་བཤད་ཅིང༌། ངན་འགྲོ་གསུམ་ལ་ལུས་ཚད་ངེས་པ་མེད་པ་དང༌། ལུས་འཕགས་པོའི་མི་རྣམས་ཛམྦུའི་གླིང་པའི་ཁྲུ་བརྒྱད་པར་ཡོད་པ་ནས། རིམ་བཞིན་བ་ལང་སྤྱོད་སྒྲ་མི་སྙན་པ་རྣམས་ཉིས་འགྱུར་དུ་རྟོགས་པར་བྱ་ཞིང༌། འདོད་ལྷ་དྲུག་པོ་ཡས་རིམ་གྱིས་རྒྱང་གྲགས་ཀྱི་བཞི་ཆ་གཅིག་ནས་དྲུག་གི་བར་དང༌། ཚེ་ཚད་ཀྱང་ལུས་འཕགས་པོ་ལོ་ཉིས་བརྒྱ་ལྔ་བཅུ། བ་ལང་སྤྱོད་ལོ་ལྔ་བརྒྱ། སྒྲ་མི་སྙན་པ་སྟོང་ཕྲག་ཏུ་འཚོ་ཞིང༌། རྒྱལ་ཆེན་རིས་བཞི་པ་མི་ལོ་ལྔ་བཅུ་ལ་ཉིན་ཞག་གཅིག་ཏུ་(༢༡བ)བརྩིས་པའི་ལོ་ལྔ་བརྒྱ། སུམ་ཅུ་རྩ་གསུམ་པ་མི་ལོ་བརྒྱ་ལ་ཞག་ཏུ་བརྩིས་པའི་ལོ་སྟོང་སོགས་རིམ་བཞིན་གོང་མ་ཉིས་འགྱུར་གྱིས་གཞན་འཕྲུལ་དབང་བྱེད་པའི་བར་དུ་ཤེས་པར་བྱ་ཞིང༌། གཟུགས་ཁམས་པ་རྣམས་ནི་སོ་སོའི་ལུས་ལ་དཔག་ཚད་གཞལ་བའི་གྲངས་དང་མཉམ་པའི་བསྐལ་པ་རྣམས་སུ་འཚོ་སྟེ། ཚངས་རིས་པ་ཚེ་བསྐལ་པ་ཕྱེད་ནས་འོག་མིན་པ་ཁྲི་དྲུག་སྟོང་འཚོ་བའི་བར་དུ་ཤེས་དགོས་སོ། ། གཟུགས་མེད་བཞི་ནམ་མཁའ་མཐའ་ཡས་སོགས་རིམ་བཞིན་བསྐལ་པ་ཉི་ཁྲི། བཞི་ཁྲི། དྲུག་ཁྲི། བརྒྱད་ཁྲི་རྣམས་སུ་འཚོ་སྟེ། དེ་ལྟར་བགྲང་བའི་བསྐལ་པའང་འོད་ཆུང་ཡན་བསྐལ་ཆེན་དང༌། འོག་མ་རྣམས་བསྐལ་ཆེན་གྱི་ཕྱེད་ལ་བསྐལ་པར་བཞག་པའོ། ། ཇ༢ གཉིས་པ་[འཛམ་གླིང་ཁྱད་པར་དུ་བཤད་པ་]ནི། འདི་ན་མ་ངེས་ཚེ་དང་ལོངས་སྤྱོད་ལུས། ། དཔག་མེད་ནས་ནི་བཅུ་བར་འགྲིབ་པ་དང༌། ། དེ་ནས་བརྒྱད་ཁྲིའི་བར་དུ་འཕེལ་ལ་སོགས། ། ཡ་ཐོག་མ་ཐོག་བར་ཁུག་བཅོ་བརྒྱད་ལ། ། འཕེལ་འགྲིབ་བྱེད་ཅིང་གླིང་གསུམ་ལོངས་སྤྱོད་ས། ། ཛམ་གླིང་ལས་ཀྱི་ས་ཡིན་ཁྱད་པར་འཕགས། ། བྱེ་བྲག་ཛམྦུའི་གླིང་འདི་ན་གཙོ་བོར་རྒྱུ་ལ་ལོངས་སྤྱོད་པ་ཡིན་པའི་ཕྱིར། ཚེ་རིང་ཐུང་། ལོངས་སྤྱོད་དར་རྒུད། ལུས་བོང་ཆེ་ཆུང་སོགས་མཐའ་གཅིག་ཏུ་ངེས་པ་མེད་དེ། ཐོག་མར་ཚེ་ལོ་དཔག་མེད་ཐུབ་པ་ནས་རིམ་པར་གྲངས་ཅན་གྱི་གནས་སུ་གྱུར་ཏེ། མཐར་ཚེ་ལོ་བཅུ་པའི་བར་དུ་འགྲིབ་པའི་བསྐལ་པ་རིང་པོ་དེའི་མཐར་མུ་གེ་ནད་མཚོན་གསུམ་གྱི་བསྐལ་པས་ཚར་ཕྱིན་པར་བྱེད་དེ། དེའང་ཚེ་ལོ་སུམ་ཅུ་པའི་དུས་སུ་མུ་གེའི་བསྐལ་པ་ལོ་བདུན་ཟླ་བ་བདུན་ཞག་བདུན། ཉི་ཤུ་པའི་དུས་སུ་ནད་ཀྱི་སྐལ་པ་ཟླ་བ་བདུན་ཞག་བདུན། བཅུ་པའི་དུས་སུ་མཚོན་གྱི་བསྐལ་པ་ཞག་བདུན་འབྱུང་ངོ༌། །དེ་ཡན་ལ་ཡ་ཐོག་རིང་མོ་ཟེར་རོ། ། དེ་ནས་ཚེ་ལོ་བཅུ་པ་ནས་བརྒྱད་ཁྲིའི་བར་དུ་འཕེལ་ཞིང་། བརྒྱད་ཁྲི་ནས་བཅུ་པའི་བར་འགྲིབ་པའི་འཕེལ་འགྲིབ་ལ་ཁུག་པ་གཅིག་སྟེ། དེ་འདྲ་(༢༢ན)བ་བཅོ་བརྒྱད་ལ་བར་གྱི་ཁུག་པ་བཅོ་བརྒྱད་དེ། དེ་རེ་རེའི་མཐར་ཡང་མུ་གེ་ནད་མཚོན་གསུམ་གྱིས་ཚར་ཕྱིན་པར་བྱེད་ལ། མཐར་བཅུ་པ་ནས་བརྒྱད་ཁྲིའི་བར་འཕེལ་བའི་མ་ཐོག་རིང་མོ་སྟེ། དེ་དག་ལ་ནི་བར་བསྐལ་ཉི་ཤུ་ཞེས་བྱ་ཞིང༌། མཐའི་རྐྱང་པ་གཉིས་འཕེལ་འགྲིབ་བུལ་བས་བར་གྱི་ཁུག་པ་རེ་དང་དུས་མཉམ་པར་འགྲེལ་པ་གང་སྤེལ་སོགས་ལས་བཤད་ལ། སའི་དངོས་གཞིར་མཐའ་གཉིས་ཀྱང་ཁུག་པར་བཤད་དོ། ། ཀུན་མཁྱེན་ཀློང་ཆེན་པས་མ་ཐོག་རིང་མོ་ཚེ་ལོ་དཔག་མེད་དུ་འཕེལ་བའི་གཅིག་འགྲིབ་ནས་གྲངས་ཅན་གྱི་ཐོག་མར་སླེབ་དུས་སངས་རྒྱས་མོས་པ་འབྱོན་པར་གསུངས་པ་འདི་ཉིད་ཐེག་ཆེན་གྱི་རང་ལུགས་འཐད་པའི་ཕྱོགས་སུ་བཟུང་ངོ༌། ། དེ་ལྟར་ན།