Tibetan
མཚོར་སྤྱོད་ཅིང་རབ་ཏུ་འཇུག ། ཅེས་གསུངས་པས་སོ། ། ཇ༢ གཉིས་པ་[ཁྱད་པར་བྱེ་བྲག་ཏུ་སྨོས་པ་]ནི། གནས་དབྱིབས་རྒྱ་ཚད་བཀོད་པ་བསམ་མི་ཁྱབ། ། ཅེས་པ་སྟེ། དེ་ལ་དང་པོ་གནས་ཀྱི་ཁྱད་པར་ནི། ཕལ་ཆེན་ལས། ཞིང་རྣམས་རྒྱ་མཚོ་ལ་ལ་དྲི་མེད་འོད་ཅེས་ནམ་མཁའི་དབྱིངས་ལ་གནས། ། སྣང་བའི་སྙིང་པོ་འོད་ཅན་ནོར་བུའི་རྒྱ་མཚོ་དག་ལ་ལེགས་པར་གནས། ། ཞིང་རྣམས་རྒྱ་མཚོ་མཐའ་དང་དབུས་མེད་རྒྱ་ཆེན་པདྨའི་རྒྱ་མཚོ་དག་ལ་གནས། ། ཞིང་ཁམས་རྒྱ་མཚོའི་དབྱིངས་རྣམས་ལ་ལ་སངས་རྒྱས་བྱིན་ལ་གནས། ། ཞེས་པ་ལྟར། འབྱུང་བ་བཞི། སེམས་ཅན་གྱི་ལས། སངས་རྒྱས་ཀྱི་བྱིན་རླབས་སོགས་ལ་བརྟེན་ཅིང༌། གནས་ལུགས་ཀྱང་། སྣྲེལ་ཞི། སྤྱིའུ་ཚུགས། རྣལ་མ་སོགས་ཅི་རིགས་ཡོད་དོ། ། གཉིས་པ་དབྱིབས་ཀྱི་ཁྱད་པར་ནི། ལ་ལ་ཟླུམ་པོ་ལ་ལ་ཟུར་གསུམ་སྟེ། ། དེ་དག་ལ་ལ་ཕྱོགས་ནི་གྲུ་བཞིར་གནས། ། ནོར་བུ་པདྨ་འཁོར་ལོ་ཡན་ལག་བརྒྱད། ། ཀུན་ཀྱང་ལས་རྣམས་རྒྱ་མཚོས་རྣམ་པར་བྲིས། ། ཞེས་སོ། ། གསུམ་པ་རྒྱ་ནི། ངུར་སྨྲིག་གི་རྒྱལ་མཚན་གྱི་འཇིག་རྟེན། ནས། པདྨོའི་དཔལ་གྱི་བར། འཇིག་རྟེན་བཅུ་པོ་གོང་ནས་གོང་དུ་བཅུ་འགྱུར་གྱིས་ཆེ་(༩བ)ལ་ཡོན་ཏན་མང་བ་དང༌། ད་ལྟ་མངོན་དགའ་དང་བདེ་བ་ཅན་སོགས་རྒྱ་ཆེ་ལ་མི་མཇེད་ཀྱི་ཞིང་འདི་དང༌། དེ་ལས་ཀྱང་སངས་རྒྱས་སྐར་མ་ལ་དགའ་བའི་ཞིང་མཐེ་བོ་ཅན་སོགས་ཤིན་ཏུ་ཁྱོན་ཆུང་བ་དང༌། མ་འོངས་མགོན་པོ་ཀུན་ཏུ་གཟིགས་ཀྱི་ཞིང་ཁམས་རྡུལ་བྲལ་ཡང་དག་བསགས་ལ་ཚད་མེད་པར་བསྟན་པ་སོགས་མང་ངོ༌། ། བཞི་པ་ཡུན་ཚད་ནི། ཞིང་རྣམས་ལ་ལ་བསྐལ་པ་ཙམ། ། ལ་ལ་བསྐལ་པ་བཅུ་པ་སྟེ། ། ཞིང་རྣམས་ལ་ལ་རྡུལ་མཉམ་པའི། ། བསྐལ་པ་བྱེ་བར་བརྗོད་པ་ཡིན། ། ཞེས་པ་ལྟར་རོ། ། ལྔ་པ་རྒྱན་དང་བཀོད་པའི་ཁྱད་པར་ནི། ཞིང་གི་རྒྱན་མང་བྱེ་བ་ཡིས། ། ཞིང་རྣམས་ལ་ལ་རྣམ་པར་བྲེས། ། རྒྱན་དང་ཚུལ་རྣམས་ཐ་དད་པར། ། སྣ་ཚོགས་མིག་ཡོར་ལྟ་བུར་སྣང༌། ། ཞེས་སོགས་འབྱུང་ལ། གཞན་ཡང༌། ཞིང་རྣམས་ལ་ལར་སངས་རྒྱས་མེད། ། ཞིང་རྣམས་ལ་ལར་སངས་རྒྱས་བཅས། ། ལ་ལའི་ཞིང་ན་སངས་རྒྱས་གཅིག ། ལ་ལར་སངས་རྒྱས་མང་པོའོ། ། ཞེས་སངས་རྒྱས་ཀྱི་ཁྱད་པར་དང༌། ཞིང་རྣམས་ལ་ལར་འོད་མེད་དེ། ། ཞེས་མུན་པའི་འཇིགས་པས་སྐྱི་གཡའ་བ་ནས། ལ་ལར་ལྷའི་འོད། དེ་བཞིན་དུ། ཁྱིམ་གྱི་འོད། ཉི་ཟླའི་འོད། རང་གི་འོད། ཤིང་གི་འོད། རིའི་འོད། ནོར་བུའི་འོད། མར་མེའི་འོད། སངས་རྒྱས་ཀྱི་འོད་རྣམས་དང༌། ཞིང་རྣམས་ལ་ལར་པདྨའི་འོད། ། སྤོས་ཆུའི་འོད་དང་ལྡན་པའང་ཡོད། ། སྨོན་ལམ་དབང་གིས་རྣམ་པར་སྦྱངས། ། ཞེས་འོད་ཀྱི་ཁྱད་པར་དང༌། སྟོང་གསུམ་འདི་གླིང་བཞི་པ་དུ་མར་བཅད་ལ་བདེ་བ་ཅན་སོགས་ལག་མཐིལ་ལྟར་ཀུན་ཏུ་མཉམ་པས་གླིང་བཞིར་བཅད་མ་བཅད་ཀྱི་ཁྱད་པར་དང༌། བཅད་པ་ལའང་ཚད་ཆེ་ཆུང་མི་འདྲ་བ་དུ་མ་དང༌། མངོན་པར་དགའ་བའི་ཞིང་ན་ལྷ་རྣམས་མི་ལ་སྨོན་པ་སོགས་ལོངས་སྤྱོད་ཀྱི་ཁྱད་པར་དང༌། ལྷུན་པོའི་བྱེ་བྲག་རྣམས་དང༌། སེམས་ཅན་ཁ་ཅིག་ཉོན་མོངས་པ་(༡༠ན)དང་ལྡན་ལ། ཁ་ཅིག་ཏུ་རྣམ་པར་དག་པའི་ལུས་ཅན་སོགས་བརྟེན་པའི་ཁྱད་པར་ཏེ། གཞན་ཡང་བསམ་གྱིས་མི་ཁྱབ་པའི་ཚུལ་དུ་གནས་སོ། ། ཆ༢ གཉིས་པ་[གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་]བྱེ་བྲག་ཏུ་བཤད་པ་ལ་གཉིས། ཇ༡ རགས་པ་བཤད་པ་དང༌། ཇ༢ ཞིབ་ཏུ་བསྟན་པའོ། ། ཇ༡ དང་པོ་ནི། ཕྱག་མཐིལ་རྡུལ་ཕྲན་གཅིག་ནང་འཇིག་རྟེན་ཁམས། ། རྒྱ་མཚོའི་ནང་ཆུད་འཇིག་རྟེན་ཁམས་མང་དབུས། ། གཞི་དང་སྙིང་པོ་མེ་ཏོག་བརྒྱན་ཞིང་གནས། ། ཞེས་པ་སྟེ། ཡེ་ཤེས་གང་ཆེན་མཚོ་རྣམ་པར་སྣང་མཛད་དེའི་ཕྱག་མཐིལ་གྱི་རྡུལ་ཕྲན་གཅིག་གི་ནང་དུ་འཇིག་རྟེན་ཁམས་རྒྱ་མཚོ་དེ་བཞིན་གཤེགས་པའི་ཕྱག་གི་མཐིལ་གྱི་སྙིང་པོ་རབ་ཏུ་གནས་པ་ཞེས་བྱ་བར། སྟོན་པའང་ཡེ་ཤེས་གང་ཆེན་མཚོ་ཉིད་དུ་བསྟན་ཏེ་རྣམ་པར་རོལ་པ་བསམ་གྱིས་མི་ཁྱབ་པའི་གནས་འདི་ལྟ་བུ་ནི་ས་ཆེན་པོ་ལ་གནས་པའི་བྱང་ཆུབ་སེམས་དཔའ་དང་སངས་རྒྱས་ཉག་གཅིག་གི་སྤྱོད་ཡུལ་ལོ། ། འཇིག་རྟེན་གྱི་ཁམས་རྒྱ་མཚོ་དེའི་ནང་དུ་ཆུད་པའི་འཇིག་རྟེན་གྱི་ཁམས་ཤིན་ཏུ་མང་པོའི་དབུས་སུ་སངས་རྒྱས་རྣམ་པར་སྣང་མཛད་སྤྲུལ་སྐུ་ཞིང་ཁམས་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་འདི་གནས་པར་གསུངས་སོ། ། ཇ༢ གཉིས་པ་[ཞིབ་ཏུ་བསྟན་པ་]ནི། དེ་ཡང་འོག་མིན་བར་གྱི་གླིང་བཞི་པའི། ། འཇིག་རྟེན་བྱེ་བ་ཕྲག་བརྒྱ་སྟོང་གསུམ་ཆེ། ། དེ་ནས་གོང་དུ་དུང་ཕྱུར་ཕྲག་བཅུ་བཅུར། ། བསྒྲེས་པས་རབ་འབྱམས་མཚམས་སྦྱོར་རྒྱུད་རྒྱ་མཚོ། ། སྙིང་པོ་མེ་ཏོག་བརྒྱན་ཞིང་སོ་སོ་ཡང༌། ། རྒྱ་མཚོ་ལ་བརྟེན་ཁོར་ཡུག་བཅས་པ་སྟེ། ། མཆོག་གི་སྤྲུལ་སྐུ་གཅིག་གི་འདུལ་ཞིང་ཡིན། ། གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་དེ་ལ་ཇི་ཙམ་ཞིག་ཡོད་ཅེ་ན། དེའང་གླིང་བཞི་རི་རབ་ཁོར་ཡུག་དང་བཅས་པ་རླུང་དཀྱིལ་ནས་སྲིད་རྩེའི་འོག་མིན་ལ་ཐུག་གི་བར་གྱི་གནས་དེ་ལ་གླིང་བཞི་པའི་འཇིག་རྟེན་གྱི་ཁམས་ཞེས་བྱ། དེ་ནས་དེ་ཙམ་གྱི་བར་སྟོང་གི་ནམ་མཁའ་འདས་པ་ན་དེ་དང་འདྲ་བའི་འཇིག་རྟེན་གྱི་ཁམས་(༡༠བ)གཅིག་གནས་པ་ལ་གཅིག་ནས་གཉིས་སུ་བགྲངས་པའི་སྟོང་དུ་ལངས་པ་ན་ཁོར་ཡུག་གཅིག་གིས་བསྐོར་བ་སྟོང་དང་པོ། དེ་དག་བསྡམས་པ་གཅིག་ཏུ་བརྩིས་པ་སྟོང་ལ་མུ་ཁྱུད་གཅིག་གིས་བསྐོར་བ་སྟོང་གཉིས་པ། དེ་སྟོང་ལ་ཁོར་ཡུག་ཆེན་པོས་བསྐོར་བ་སྟོང་གསུམ་པ་སྟེ། གླིང་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ཅེས་བྱའོ། ། འདིར་མངོན་པ་བ་རྣམས་ཀྱིས་ཚངས་པའི་འཇིག་རྟེན་མན་ཆད་བགྲང་ཡང༌། འདིར་ནི་རྒྱ་རོལ་དང་གསེར་འོད་དམ་པ་སོགས་ཀྱི་ལུང་གི་རྗེས་སུ་འབྲང་བའོ། ། དེ་ནས་རིམ་པར་གོང་ནས་གོང་དུ་དུང་ཕྱུར་ཕྲག་བཅུ་བཅུར་བསྒྲེས་པས་འཇིག་རྟེན་གྱི་གྲངས་རྟོགས་པར་འགྱུར་ཏེ། དེའང་སྟོང་ཆེན་པོ་བྱེ་བ་ཕྲག་བརྒྱ་རབ་འབྱམས་མཚམས་སྦྱོར་གྱི་འཇིག་རྟེན། དེ་བྱེ་བ་ཕྲག་བརྒྱ་རབ་འབྱམས་རྒྱུད་ཀྱི་འཇིག་རྟེན། དེ་བྱེ་བ་ཕྲག་བརྒྱ་རབ་འབྱམས་རྒྱ་མཚོའི་འཇིག་རྟེན། དེ་ལྟ་བུ་དུང་ཕྱུར་ཕྲག་བཅུར་ལངས་བ་ན་གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་གཅིག་ཡིན་ལ། དེ་རྣམས་ཀྱང་སོ་སོར་རྒྱ་མཚོ་ཆེན་པོ་ལ་བརྟེན་ཅིང༌། ཁོར་ཡུག་རེ་རེས་བསྐོར་བ་དང༌། ཐམས་ཅད་ཀྱི་མཐར་ཁོར་ཡུག་ཆེན་པོས་བསྐོར་བ་དང་བཅས་པ་སྟེ། དེ་ཙམ་ཞིག་ནི་མཆོག་གི་སྤྲུལ་པའི་སྐུ་གཅིག་གི་འདུལ་ཞིང་ཡིན་ལ། དབང་པོ་དམན་པའི་ངོར་སྟོང་གསུམ་ཙམ་ཞིག་ཏུ་གསུངས་སོ། ། ཆ༣ གསུམ་པ་[དེ་ལས་མི་མཇེད་ཀྱི་འཇིག་རྟེན་]ཁྱད་པར་དུ་དབྱེ་བ་ལ་གཉིས། ཇ༡ མི་མཇེད་ངོས་བཟུང༌། ཇ༢ དེ་ལས་འཕྲོས་པའི་དོན་བཤད་པའོ། ། ཇ༡ དང་པོ་ནི། དེ་ཡི་ཁོར་ཡུག་ཆེ་ནང་སྤོས་ཆུ་མཚོར། ། ནོར་བུའི་པདྨ་བཞིས་བརྟེན་འཇིག་རྟེན་ཁམས། ། ཉེར་ལྔ་བརྩེགས་མར་གནས་པའི་བཅུ་གསུམ་པ། ། མི་མཇེད་ཅེས་གྲགས། ཞེས་པ་སྟེ། གཞི་སྙིང་མེ་ཏོག་གིས་བརྒྱན་པ་དེའི་ཁོར་ཡུག་ཆེན་པོའི་ནང་དུ་གང་ཆེན་མཚོའི་དབྱིངས་ཀྱི་སྤོས་ཆུའི་རྒྱ་མཚོ་བརྗོད་དུ་མེད་པའི་སངས་རྒྱས་ཀྱི་ཞིང་གི་རྡུལ་སྙེད་ཀྱི་དབུས་སུ་སྤོས་ཆུ་རྒྱ་མཚོ་ཟེར་བ་ཡིད་འོང་ལ་གནས་པའི་ནོར་བུའི་པདྨ་(༡༡ན)ཆེན་པོ་བཞིས་བརྟེན་པའི་འཇིག་རྟེན་གྱི་ཁམས་ཀྱི་རྒྱུད་ཉི་ཤུ་རྩ་ལྔ་བརྩེགས་མར་གནས་པ། སོ་སོའི་བར་བར་དུ་ཞིང་གི་རྡུལ་ཕྲ་རབ་ཀྱི་འཇིག་རྟེན་བརྩེགས་མར་གནས་པས་མཚམས་ཆོད་པ། དེའི་བཅུ་གསུམ་པ་མི་མཇེད་ཅེས་གྲགས་པའི་སྟོང་གསུམ་གྱི་འཇིག་རྟེན་འདི་ཡིན་ཏེ། མི་མཇེད་ཀྱི་སྐད་དོད། སཱ་ཧ་ཞེས་པ། ལྡན་པ། བཟོད་པ། ནུས་པ་རྣམས་ལ་འཇུག་པས། ཞིང་འདིར་སྐྱེས་པའི་སེམས་ཅན་རྣམས་ཉོན་མོངས་པ་དང་སྡུག་བསྔལ་ལ་མི་མཇེད་པའམ་དེ་དག་དང་ཤིན་ཏུ་ལྡན་པ་སྟེ། མི་མཇེད་པ་ནི་སྲན་བཟོད་པའི་དོན་ཡིན་ལ། ཞིང་འདིའི་བྱང་ཆུབ་སེམས་དཔའ་རྣམས་ཀྱང་སྙིང་སྟོབས་ལྷག་པར་བཟོད་ཅིང་དཔའ་བས་ཕུལ་དུ་བྱུང་བས་དེ་ལྟར་དུ་གྲགས་སོ། ། ཇ༢ གཉིས་པ་[དེ་ལས་འཕྲོས་པའི་དོན་བཤད་པ་]ནི། སྟོང་གསུམ་འདི་ལ་ཡང༌། ། ཁེབས་ལྡན་ལྷག་པ་རྡུལ་བསལ་རྣམ་འབྱུང་སོགས། ། ཞིང་རྡུལ་བཅུ་གསུམ་སྙེད་ཀྱི་འཇིག་རྟེན་གྱིས། ། རབ་བསྐོར་དབྱིབས་ཟླུམ་རྡོ་རྗེ་བཞི་ཡིས་མཚན། ། སྣ་ཚོགས་རླུང་དཀྱིལ་པདྨོའི་དྲྭ་བར་གནས། ། མི་མཇེད་སྟོང་གསུམ་པའི་འཇིག་རྟེན་འདི་ཁོ་ན་ལའང༌། ཤར་ན་ཁེབས་ལྡན། ལྷོར་ལྷག་པ། ནུབ་ན་རྡུལ་བསལ། བྱང་དུ་རྣམ་འབྱུང༌། མཚམས་རྣམས་སུ། ཕན་བྱེད། ཀུན་སོང༌། ཡོངས་སུ་དགའ་བ། འཕོ་བྱེད། སྟེང་འོག་ཏུ་དབྱངས་སྒྲོགས་དང་མི་ཆེ་བ་ཞེས་བྱ་བ་ལ་སོགས་པ་སངས་རྒྱས་ཀྱི་ཞིང་རྡུལ་བཅུ་གསུམ་གྲངས་སྙེད་ཀྱིས་ཀུན་ནས་རབ་ཏུ་བསྐོར་ཞིང་། དབྱིབས་ཟླུམ་པོ་རྡོ་རྗེ་བཞིའི་ས་མཚམས་ཅན། ཁ་དོག་སྣ་ཚོགས་པའི་རླུང་གི་དཀྱིལ་འཁོར་གྱིས་བཟུང་བ་པདྨོའི་དྲྭ་བ་ལ་གནས་སོ། ། འདི་ཡི་སྟོན་པའང་རྣམ་པར་སྣང་མཛད་དེ། ། གཙང་གནས་འོག་མིན་དག་ཏུ་ཁྱབ་པར་བཞུགས། ། སྟོང་གསུམ་འདིའི་སྟོན་པའང་ལོངས་སྐུ་རྣམ་པར་སྣང་མཛད་ཆེན་པོ་ལས་སྤྲུལ་པ། གཙང་མའི་གནས་ཀྱི་འོག་མིན་དག་ཏུ་ཁྱབ་པར་བཞུགས་ཤིང་དབང་ཕྱུག་ཆེན་པོ་རྣམས་ཀྱི་དབུས་སུ་ཆོས་སྟོན་པར་(༡༡བ)མཛད་པའི་སྤྲུལ་པ་རྒྱ་ཆེན་པོའི་སྐུ་ཞིག་སྟེ། དབུ་མ་ཆོས་བཤེས་ཀྱིས། སྐུ་འདིའང་སྨོན་ལམ་མམ་ཚོགས་ཀྱི་འཕེན་པའམ་བཞེད་པ་ཙམ་གྱིས་ཕྱེ་བའི་འོག་མིན་གྱི་གནས་གཅིག་ཁོ་ནར་མངོན་པར་རྫོགས་པར་འཚང་རྒྱ་བའི་ཕྱིར་རྣམ་པ་རབ་ཏུ་མང་པོའི་ལོངས་སྤྱོད་རྫོགས་སྐུ་འོག་མིན་རྣམས་ན་གནས་པ་ནི་སྤྲུལ་པའི་སྐུ་འབའ་ཞིག་རྒྱ་ཆེན་པོར་སྣང་བར་ཟད་དོ། །ཞེས་བཤད་དོ། ། གླིང་བཞི་འདི་ནི་བཅོམ་པ་དང་ལྡན་ཞེས། ། འདི་ལའང་གླིང་བཞི་གཞན་པ་བཅུ་ཡིས་བསྐོར། ། མི་མཇེད་དེའི་དབུས་སུ་ཚུད་པའི་གླིང་བཞི་པའི་འཇིག་རྟེན་འདི་ནི་བཅོམ་པ་དང་ལྡན་པ་ཞེས་གྲགས་ལ། འདི་ཁོ་ན་ལའང་འདབ་ཆགས་སུ་ཤར་ནས་འོག་གི་བང་རིམ་བཞིན་གླིང་བཞི་གཞན་པ། ཤིན་ཏུ་སྲུང༌། དགའ་བ། བཟོད་དཀའ། སྙིང་པོ་དམ་པ། གཉེན་ལྡན། ས་བཟང༌། སེང་གེ་ཡོད་པ། རྣམ་བསགས། ནོར་འཛིན། འོད་འཕྲོ་ལྡན་ཞེས་པ་བཅུ་ཡིས་བསྐོར་བར་གསུངས་སོ། ། དེ་དག་ཆགས་འཇིག་དུས་མཉམ་བྱེད་པར་གསུངས། ། ས་བཅུའི་དབང་ཕྱུག་ཁོ་ནའི་སྤྱོད་ཡུལ་ལོ། ། ཐེག་པ་ཐུན་མོང་དུ་ཡོངས་སུ་གྲགས་པ་ནི་སྟོང་གསུམ་པའི་འཇིག་རྟེན་ཙམ་ཞིག་ཆགས་འཇིག་མཉམ་དུ་བྱེད་པར་བསྟན་ཅིང་། གཞན་དུ་གཞི་སྙིང་མེ་ཏོག་གིས་བརྒྱན་པའི་ཞིང་ལ་གནས་པའི་ཞིང་རྒྱ་མཚོ་ལྟ་བུ་མཆོག་གི་སྤྲུལ་པའི་སྐུ་གཅིག་གིས་རྣམ་པར་རོལ་པའི་ཞིང་དེ་དག་ཆགས་འཇིག་དུས་མཉམ་བྱེད་པར་གསུངས་ཤིང༌། འདི་ལྟ་བུའི་གནས་ལུགས་རྒྱ་ཆེ་བ་ནི་ས་བཅུའི་དབང་ཕྱུག་རྣམས་ཁོ་ནའི་སྤྱོད་ཡུལ་ལས་ཉན་ཐོས་སོགས་ཀྱི་བློར་མི་ཤོང་ངོ༌། ། ཞིང་ཁམས་སྤྱིར་བསྟན་པ་ཐེག་པ་ཆེན་པོའི་ལུགས་ལྟར་བརྗོད་པའི་སྐབས་སོ། ། ཞིང་ཁམས་སྤྱིར་བསྟན་པ་ཐེག་པ་ཆེན་པོའི་ལུགས་ལྟར་བརྗོད་པ་སྐབས་དང་པོའི་འགྲེལ་པའོ།། །། གཉིས་པ། འཇིག་རྟེན་བྱེ་བྲག་ཏུ་བསྟན་པ་ཐེག་དམན་པ་དང་ཐུན་མོང་དུ་བརྗོད་པའི་སྐབས། ང༢ སྐབས་གཉིས་པ་མི་མཇེད་ཀྱི་འཇིག་རྟེན་བྱེ་བྲག་ཏུ་བཤད་པ་ལ་གཉིས། ཅ༡ མདོར་བསྟན་པ་དང༌། ཅ༢ རྒྱས་པར་བཤད་པའོ། ། ཅ༡ དང་པོ་ནི། འཇིག་རྟེན་འདི་ལ་ཆགས་གནས་འཇིག་སྟོང་བཞི། ། ཞེས་པ་(༡༢ན)སྟེ། བྱེ་བྲག་གླིང་བཞི་པའི་འཇིག་རྟེན་གྱི་ཁམས་འདི་ལའང་། ཆགས་པའི་བསྐལ་པ། གནས་པའི་བསྐལ་པ། འཇིག་པའི་བསྐལ་པ། སྟོང་པའི་བསྐལ་པ་སྟེ། བསྐལ་པ་ཆེན་པོ་བཞི་ཡོད་དོ། ། ཅ༢ གཉིས་པ་[རྒྱས་པར་བཤད་པ་]ལ་གསུམ། ཆ༡ དང་པོར་ཆགས་པ། ཆ༢ བར་དུ་གནས་པ། ཆ༣ ཐ་མར་འཇིག་སྟོང་གི་ཚུལ་བཤད་པའོ། ། ཆ༡ དང་པོ་ལ་གཉིས། ཇ༡ མཚམས་སྦྱར་དང་། ཇ༢ བཤད་པ་དངོས་སོ། ། ཇ༡ དང་པོ་ནི། བསྣོད་བཅུད་གཉིས་ལས་སྣོད་ཀྱི་འཇིག་རྟེན་ནི། ། ཞེས་བསྐལ་ཆེན་བཞི་གང་དུ་འབྱུང་བའི་ཡུལ་སྣོད་བཅུད་གཉིས་སུ་ཡོད་པ་ལས། ཐོག་མར་སྣོད་ཀྱི་འཇིག་རྟེན་བཤད་པ་ནི། ཞེས་མཚམས་སྦྱར་ནས། ཇ༢ དངོས་ལ་གཉིས། ཉ༡ སྣོད་བཤད་པ་དང༌། ཉ༢ བཅུད་བཤད་པའོ། ། ཉ༡ དང་པོ་ལ་གཉིས། ཏ༡ དངོས་དང༌། ཏ༢ ཞར་བྱུང་ཉན་རང་གི་འདོད་ཚུལ་ལོ། ། ཏ༡ དེའི་དང་པོ་ལ་ལྔ། ཐ༡ བསྐལ་བཟང་བྱུང་ཚུལ། ཐ༢ རི་གླིང་བཀོད་པ། ཐ༣ གླིང་བཞིའི་ངེས་ཚིག ཐ༤ ངན་སོང་གསུམ་དང་ལྷ་མིན། ཐ༥ ལྷ་གནས་བཤད་པའོ། ། ཐ༡ དང་པོ་ནི། བསྐལ་པ་སྔ་མའི་སྟོང་བསྐལ་འདས་པ་ན། ། ཕྱོགས་བཅུར་རླུང་ལངས་དཀྱིལ་འཁོར་རྒྱ་གྲམ་ཆགས། ། སྤྲིན་ལས་ཆར་བབ་ཆུ་ཡི་ཕུང་པོའི་དབུས། ། པདྨོ་སྟོང་མཐོང་བསྐལ་པ་བཟང་པོར་གྲགས། ། བསྐལ་བཟང་འདིའི་བྱང་སེམས་རྣམས་ཀྱིས་ཞིང་ཡོངས་སུ་སྦྱོང་བའི་སྨོན་ལམ་གྱི་མཐུ་དང༌། འགྲོ་བ་རྣམས་ཀྱི་ལས་མཐུན་པ་དག་ལས། བསྐལ་པ་སྔ་མ་རྫོགས་པའི་འོག་ཏུ་སྟོང་བསྐལ་བར་བསྐལ་ཉི་ཤུའི་ཡུན་འདས་ནས། ཕྱོགས་བཅུ་སོ་སོ་ནས་རླུང་ལངས་པ་ཕན་ཚུན་ཤུགས་ཆེན་པོས་བརྡབ་ཅིང་འཕུལ་བ་ལ་བརྟེན་ནས་རྡོ་རྗེས་ཀྱང་གཞིག་པར་མི་ནུས་པར་སྲ་ཞིང་ཤིན་ཏུ་འཐས་པའི་རླུང་དཀྱིལ་རྒྱ་གྲམ་དུ་ཆགས་པའི་སྟེང་དུ་ནམ་མཁར་སྤྲིན་སྟུག་པོ་གསེར་གྱི་གཉའ་ཤིང་ལྟ་བུ་ཆགས་པ་ལས་ཆར་གྱི་རྒྱུན་ཤིང་རྟའི་སྲོག་ཤིང་ཙམ་ནས་ཐིགས་པ་སྦོམ་པོའི་བར་དུས་རིང་བར་བབ་པའི་རྐྱེན་གྱིས་རླུང་གིས་བསྐྱོར་བའི་ཆུའི་ཕུང་པོ་ཆེན་པོར་གནས་པའི་དབུས་ནས་གསེར་གྱི་པདྨོ་སྟོང་ཤར་བ་གནས་གཙང་མའི་(༡༢བ)ལྷ་རྣམས་ཀྱིས་མཐོང་བ་ན་སངས་རྒྱས་སྟོང་འབྱུང་བའི་ལྟས་སུ་ཤེས་ནས། ཨེ་མའོ། འདི་ནི་བསྐལ་པ་བཟང་པོ་ཞིག་གོ། །ཞེས་ཆེད་དུ་བརྗོད་པས་སྐལ་པ་བཟང་པོར་གྲགས་སོ་ཞེས་སྙིང་རྗེ་པདྨ་དཀར་པོའི་མདོ་ལས་གསུངས་ཤིང༌། ཡེ་ཤེས་རྒྱས་པའི་མདོ་ལས་བསྐལ་པ་འདི་ལ་བསྐལ་པ་པདྨ་སྟོང་མཐོང་དུ་གསུངས་པའང་དེ་དང་མཐུན་ནོ། ། ཐ༢ གཉིས་པ་[རི་གླིང་བཀོད་པ་]ནི། རླུང་གིས་ཆུ་བསྲུབས་གསེར་གྱི་དཀྱིལ་འཁོར་ལ། ། ཆར་བབ་མཚོ་ཆེན་རླུང་གིས་བསྲུབས་པའི་ཁམས། ། རབ་འབྲིང་ཐ་མ་རྣམ་པར་འཕེལ་བ་ལས། ། རི་རབ་རི་བདུན་གླིང་བཞི་ཁོར་ཡུག་གྲུབ། ། དེ་ལྟར་ཆུའི་ཕུང་པོ་ཆེན་པོ་དེ་རླུང་གིས་བསྲུབས་པའི་རྐྱེན་གྱིས་དེའི་སྟེང་དུ་གསེར་གྱི་དཀྱིལ་འཁོར་བྱུང་ངོ༌། །དེའི་སྟེང་དུ་སྔར་བཞིན་ཆར་གྱི་རྒྱུན་བབས་པས་ཕྱིའི་རྒྱ་མཚོ་ཆེན་པོར་གྱུར་པ་དེ་ལ་རིམ་བཞིན་མཚམས་མཚམས་སུ་རླུང་ལངས་པས་ཉེ་བར་བསྲུབས་པའི་རྐྱེན་གྱིས་ཁམས་ཀྱི་བྱེ་བྲག་རབ་འབྲིང་ཐ་མ་གསུམ་དུ་རྣམ་པར་འཕེལ་བ་ལས། ཁམས་རབ་ལ་དབུས་སུ་རིན་པོ་ཆེ་བཞིའི་རང་བཞིན་ཅན་གྱི་རི་རབ་ལྷུན་པོ་བྱུང་ཞིང༌། ཁམས་འབྲིང་ལས་གསེར་རི་བདུན། ཁམས་ཐ་མ་ལས་གླིང་ཕྲན་བརྒྱད་དང་གཞན་མང་པོས་བསྐོར་བའི་གླིང་བཞི་དང་ལྕགས་རིའི་ཁོར་ཡུག་རྣམས་གྲུབ་བོ། ། དེ་ལྟར་ཡང༌། སློབ་དཔོན་དབྱིག་གཉེན་གྱིས། ས་བོན་རྣམ་པ་སྣ་ཚོགས་ཁོ་ན་ཡོད་པའི་ཆུ་དེ་དག་མཐུ་རྣམ་པ་དུ་མའི་བྱེ་བྲག་དང་ལྡན་པའི་རླུང་དག་གིས་བཤིག་པ་ན་རིགས་དེ་དང་དེ་དག་ཏུ་འགྱུར་བ་ཡིན་པ་སོགས་རྒྱ་ཆེར་གསུངས་སོ། ། རི་གླིང་ཐམས་ཅད་ཆུ་མཚོར་བརྒྱད་ཁྲིར་ནུབ། ། ལྷུན་པོ་མཚོ་ལས་བརྒྱད་ཁྲིར་འཕགས་པ་སྟེ། ། རི་རབ། རི་བདུན། གླིང་བཞི་ཁོར་ཡུག་དང་བཅས་པའི་རྩ་བ་ཆུ་མཚོར་དཔག་ཚད་བརྒྱད་ཁྲིར་ནུབ་ནས་དབང་ཆེན་ལ་ཐུག་པར་གནས་ཤིང༌། ལྷུན་པོ་མཚོ་སྟེང་ལས་གྱེན་དུ་དཔག་ཚད་བརྒྱད་ཁྲིར་འཕགས་ནས་གནས་སོ། ། སྟེ་ཞེས་པ་ལྷག་བཅས་ཀྱི་(༡༣ན)སྒྲའོ། ། གྲུ་བཞི་ཆུ་ཤེལ་བཻ་ཌཱུར་པད་རཱ་ག་དང༌། ། གསེར་ལས་གྲུབ་ཅིང་ནམ་མཁའ་འང་དེ་མདོག་སྣང༌། ། ཆུ་མཚམས་ནས་བཟུང་ཕྱེད་མན་བང་རིམ་བཞི། ། དེ་ལ་ལྷུན་པོ་ནི། བང་རིམ་བཞི་དང་ལྡན་པ་གྲུ་བཞིར་འདུག་པ་སྟེ། ཤར་ཤེལ། ལྷོ་བཻ་ཌཱུཪྱ། ནུབ་པདྨ་རཱ་ག །བྱང་གསེར་གྱི་རང་བཞིན་ཕྱོགས་སོ་སོའི་མདོག་ལྟར་ནམ་མཁའང་དེའི་ཁ་དོག་གསལ་བར་སྣང་བ། ལྷུན་པོ་ཉིད་ཆུ་ལ་ནུབ་པའི་མཚམས་ནས་བཟུང་བའི་ཕྱེད་མན་ཆད་བང་རིམ་བཞི་བརྩེགས་ཀྱི་རྣམ་པས་བསྐོར་བའོ། ། དེ་མཐར་གཉའ་ཤིང་འཛིན་སོགས་གསེར་རི་བདུན། ། བར་རྣམས་ཡན་ལག་བརྒྱད་ལྡན་རོལ་མཚོས་གཏམས། ། རི་རབ་དེའི་མཐར་དབྱིབས་དེ་དང་མཚུངས་པར་ཡོལ་ཐབས་ཀྱིས་ཀུན་ནས་བསྐོར་བའི་རི་བདུན་ནི། དང་པོ་གཉའ་ཤིང་འཛིན། གཉིས་པ་གཤོལ་མདའ་འཛིན། གསུམ་པ་སེང་ལྡེང་ཅན། བཞི་པ་ལྟ་ན་སྡུག །ལྔ་པ་རྟ་རྣ། དྲུག་པ་རྣམ་འདུད། བདུན་པ་མུ་ཁྱུད་འཛིན་ཏེ། གསེར་གྱི་རི་བདུན། དེ་དག་གི་བར་རྣམས་སུ་ཡན་ལག་བརྒྱད་དང་ལྡན་པའི་ཆུས་གང་བ་ལ་རོལ་པའི་མཚོ་བདུན་དུ་གྲགས་ཤིང་དེ་དག་གིས་གཏམས་པ་སྟེ། ཡན་ལག་བརྒྱད་ནི། བསིལ་བ་དང༌། ཞིམ་པ་དང༌། ཡང་བ་དང༌། འཇམ་པ་དང༌། དྭངས་པ་དང༌། དྲི་ང་བ་མེད་པ་དང༌། འཐུང་ན་མགྲིན་པ་ལ་མི་གནོད་པ་དང༌། ལྟོ་བ་ལ་མི་གནོད་པ་རྣམས་སོ། ། གླིང་བཞི་གླིང་ཕྲན་བརྒྱད་དང་བཅས་པའི་དབྱིབས། ། ཟླ་གམ་སོག་ཁ་ཟླུམ་པོ་གྲུ་བཞིའོ། ། ཤར་ལུས་འཕགས་པོ། ལྷོ་ཛམྦུའི་གླིང༌། ནུབ་བ་ལང་སྤྱོད། བྱང་སྒྲ་མི་