Tibetan
སྙན་ཏེ། གླིང་ཆེན་བཞི། ཤར་དུ་ལུས་དང་ལུས་འཕགས། ལྷོར་རྔ་ཡབ་དང་རྔ་ཡབ་གཞན། ནུབ་ཏུ་གཡོ་ལྡན་དང་ལམ་མཆོག་འགྲོ། བྱང་དུ་སྒྲ་མི་སྙན་དང་སྒྲ་མི་སྙན་གྱི་ཟླར་གྲགས་པ་གླིང་ཕྲན་བརྒྱད་དང་བཅས་པ་དེ་དག་གི་དབྱིབས་ནི་རིམ་པ་བཞིན། ཟླ་གམ། (༡༣བ)སོག་ཁ། ཟླུམ་པོ། གྲུ་བཞིའི་རྣམ་པར་གླིང་ཆེན་བཞི་དངོས་སུ་ཡོད་ཅིང༌། གླིང་ཕྲན་བརྒྱད་ཀྱང་ཕྱོགས་མཚུངས་སུ་ཡོད་དོ། ། མ་ངེས་གླིང་ཕྲན་དག་ནི་ཤིན་ཏུ་མང༌། ། མདོ་སྡེ་རྣམས་ལས་བཅུ་གཉིས་པོ་ཁོ་ན་གཙོ་ཆེ་བའི་དབང་གིས་བསྟན་པར་མཛད་ཀྱི། གཞན་ཡང་། སིངྒ་ལ། གསེར་གླིང༌། ཟངས་གླིང༌། ཐོ་དཀར་གླིང༌། ཀི་པོ་ཛ་ལ་སོགས་པ་ཛམྦུའི་གླིང་ཁོ་ནའི་འཁོར་དུ་ཡུལ་ཆེན་བཅུ་དྲུག་ཡོད་པ་གནས་འཇོག་གི་མདོ་ལས་གསུངས་ཤིང༌། གསང་བ་བསམ་གྱིས་མི་ཁྱབ་པའི་མདོ་ལས་ཡུལ་ཕྲན་སྟོང་ཡོད་པར་བཤད་པ་སོགས་གླིང་བཞི་སོ་སོར་མིང་དང་ཚད་དབྱིབས་མ་ངེས་པའི་གླིང་ཕྲན་དག་ནི་ཤིན་ཏུ་མང་བས་ཚད་བཟུང་གིས་མི་ལང་ངོ༌། ། ཁོར་ཡུག་རི་བོ་ལྕགས་ལས་གྲུབ་པ་སྟེ། ། དེ་དག་བར་དུ་བ་ཚྭའི་རྒྱ་མཚོས་གང༌། ། གླིང་དེ་རྣམས་ཀྱི་མཐའ་བསྐོར་ཁོར་ཡུག་ཏུ་བསྐོར་བའི་རི་བོ་ཕྱིའི་ལྕགས་རི་ཞེས་བྱ་བ་ནི་ལྕགས་ལས་གྲུབ་པ་རྡོ་སོལ་གྱི་རང་བཞིན་ཅན་ཏེ། གསེར་རི་རྣམས་ཀྱི་ཕྱི་ནས་ཁོར་ཡུག་ལ་ཐུག་པ་དེ་དག་གི་བར། གླིང་རྣམས་མ་གཏོགས་པ་བ་ཚྭ་ཅན་གྱི་ཆུས་གང་བ་ནི་བ་ཚྭ་ཅན་གྱི་རྒྱ་མཚོར་གྲགས་ལ། དེ་དང་རྟ་གདོང་གི་རི་བོ་ཕྲད་པས་རྡོ་སོལ་ལས་འབར་བའི་མེས་ཆུ་རྣམས་མཚམས་ལས་མི་འདའ་བར་སྐེམ་པར་བྱེད་པའང་བཤད་དོ། ། ཐ༣ གསུམ་པ་[གླིང་བཞིའི་ངེས་ཚིག་]ནི། འཕགས་ཡུལ་དབུས་ནས་བྱང་དུ་རི་ནག་དགུ། ། འདས་པའི་གངས་རིའི་བྱང་ན་སྤོས་ངད་ལྡངས། ། བར་དུ་མ་དྲོས་མཚོ་ཡི་ཕྱོགས་བཞི་ནས། ། ཁ་འབབ་ཆུ་བཞི་ཕྱོགས་བཞིའི་རྒྱ་མཚོར་འགྲོ། ། མཚོ་འགྲམ་ཛམྦུ་བྲིཀྵའི་སྡོང་པོས་བརྒྱན། ། དེ་ཕྱིར་ཛམྦུས་མཚན་པའི་གླིང་དུ་གྲགས། ། དེ་ལ་ཛམྦུ་གླིང་ཞེས་པའི་རྒྱུ་མཚན་གང་ཞེ་ན། འཕགས་པའི་ཡུལ་གྱི་དབུས་ནས་བྱང་དུ་རི་ནག་པོ་དགུ་འདས་པའི་མཚམས་སུ་གངས་རི་སྟེ་རི་བོ་གངས་ཅན་ཞེས་བྱ་བ་ཡོད་ཅིང༌། དེའི་བྱང་ན་རི་བོ་སྤོས་ངད་ལྡན་པ་ཡོད་ལ། དེ་གཉིས་ཀྱི་བར་དུ་སྔོན་བྲམ་ཟེ་དུས་དབོག་ཅེས་བྱ་བས་ལྷ་དང་(༡༤ན)འཁོར་ལོས་སྒྱུར་བ་ཐོབ་བྱེད་ཀྱི་མཆོད་སྦྱིན་བྱས་པའི་འབྲས་ཁུ་དྲོན་མོ་ཕོ་བ་མ་དྲོས་པ་ལྟར་གྱུར་པ་ལ་མ་དྲོས་པ་ཞེས་གྲགས་པའི་ཀླུའི་རྒྱལ་པོ་མ་དྲོས་པ་གནས་པའི་མཚོ། སྨན་དང་རིན་པོ་ཆེ་དང་ནགས་ཚལ་དང་ཆུ་ཀླུང་ཐམས་ཅད་ཀྱི་འབྱུང་གནས་སུ་གྱུར་པ་ཆུ་ཞེང་དུ་དཔག་ཚད་ལྔ་བཅུར་མཉམ་པ་ཡོད་དོ། ། དེའི་ཕྱོགས་བཞི་ནས་ཁ་འབབ་ཀྱི་ཆུ་བཞིར་གྲགས་པ་ཤར་ཕྱོགས་ན་བྲག་གླང་པོ་ཆེའི་གདོང་འདྲ་བ་ནས་ཆུ་ཀླུང་གངྒཱ་དངུལ་གྱི་བྱེ་མ་འདྲེན་ཞིང་འབབ་པ། ལྷོ་ཕྱོགས་ན་བྲག་ཁྱུ་མཆོག་གི་གདོང་འདྲ་བ་ནས་ཆུ་ཀླུང་སིནྡྷུ་བཻ་ཌཱུཪྱའི་བྱེ་མ་འདྲེན་ཅིང་འབབ་པ། ནུབ་ཕྱོགས་ན་བྲག་རྟའི་གདོང་འདྲ་བ་ནས་ཆུ་ཀླུང་པཀྵུ་ཤེལ་གྱི་བྱེ་མ་འདྲེན་ཅིང་འབབ་པ། བྱང་ཕྱོགས་ན་བྲག་སེང་གེའི་གདོང་འདྲ་བ་ནས་ཆུ་ཀླུང་སི་ཏཱ་གསེར་གྱི་བྱེ་མ་འདྲེན་ཅིང་འབབ་པ། དེའང་ཆུ་བྲན་ལྔ་བརྒྱ་ལྔ་བརྒྱ་དང་བཅས་ཏེ་མཚོ་མ་དྲོས་ལ་ལན་བདུན་བདུན་གཡས་སུ་བསྐོར་ནས་ཕྱོགས་བཞིའི་རྒྱ་མཚོ་ཆེན་པོར་འགྲོའོ། ། མཚོ་འགྲམ་དུ་ཛམྦུ་བྲྀཀྵ་ཞེས་བྱ་བའི་ཤིང་སྡོང་འབྲས་བུ་མངར་བ་རྫ་ཙམ་ཡོད་པ་དེ་སྨིན་ནས་ཆུར་ལྷུང་བའི་སྒྲ་ལས་ཛམྦུ་ཞེས་བྱ་བ་འབྱུང་ཞིང༌། ཤིང་དེས་ཉེ་བར་མཚོན་པའི་གླིང་ཡིན་པས་ན་ཛམྦུའི་གླིང་ཞེས་གྲགས་ལ། འབྲས་བུ་དེ་ཀླུའི་རྒྱལ་པོ་རྣམས་ཀྱིས་ཉར་སྤྲུལ་ནས་ཟ་བར་བྱེད་ཅིང༌། མ་ཟོས་པ་རྣམས་ཛམྦུ་ཆུ་བོའི་གསེར་དུ་འགྱུར་བར་བཤད་དོ། ། ལུས་འཕགས་པོ་སོགས་མིང་གིས་ཁྱད་པར་སྟོན། ། གླིང་གཞན་གསུམ་ནི་ལུས་འཕགས་པོ་སོགས་རང་རང་གི་མིང་གིས་ཁྱད་པར་སྟོན་པ་སྟེ། ལུས་ཆེས་ཁྱད་པར་དུ་འཕགས་པ་དང༌། འདོད་འཇོའི་བ་ལས་ལོངས་སྤྱོད་ཀྱི་ཁྱད་པར་འབྱུང་བ་དང༌། གླིང་དེར་ཀླུ་མ་རུངས་པ་རྣམས་ཀྱིས་གཙོས་པའི་སྐྱོན་གྱིས་བར་བར་དུ་ཉི་མ་སྤྲིན་གྱིས་གཡོགས་པ་འབྱུང་ཞིང༌། དེར་པི་ཝང་དང་རྫ་རྔ་ལ་སོགས་སྐད་མི་སྙན་པ་འགྱུར་བ་ཙམ་ཞིག་གིས་འདོད་པའི་ཡོན་ཏན་ལས་སྐྱོན་དུ་བགྲང་བ་ཡོད་པའི་ཕྱིར་དེ་སྐད་དུ་གྲགས་སོ། ། རྔ་ཡབ་(༡༤བ)སྲིན་པོ་གཞན་རྣམས་མི་ཡི་གནས། ། གླིང་བཅུ་གཉིས་པོ་དེ་དག་གི་ནང་ནས་ཛམ་གླིང་གི་གླིང་ཕྲན་དུ་གཏོགས་པ་རྔ་ཡབ་གླིང་དུ་སྲིན་པོ་ཁོ་ན་གནས་ཤིང༌། གཞན་པ་རྣམས་ལ་མིའི་འགྲོ་བ་གནས་པ་དང༌། གླིང་ཕྲན་རྣམས་ནའང་གཙོ་བོའི་གླིང་ན་ཡོད་པ་རྣམས་དང་ཕྱོགས་མཚུངས་ཙམ་ཡོད་པར་བཞེད་དོ། ། དེ་ལ་མི་ཞེས་བྱ་བ་ནི། ཡིད་དམ་ཤེད་ཅན་ལ་འཇུག་པའི། མ་ནུཥྱའི་སྒྲ་ལས། ཤེད་བུའམ་ཡིད་རྟོག་དཔྱོད་ཀྱི་འཇུག་པ་ཤས་ཆེ་བས་མི་ཞེས་གྲགས་པར་བཤད་དོ། ། ཐ༤ བཞི་པ་[ངན་སོང་གསུམ་དང་ལྷ་མིན་]ནི། དམྱལ་བ་ཡི་དྭགས་གནས་ནི་ས་ཡི་འོག ། དུད་འགྲོ་བྱིངས་གནས་རྒྱ་མཚོ་ཆེན་པོར་ཏེ། ། ལྷ་མིན་རི་རབ་ཁོང་གསེང་ཆུ་མཚམས་མན། ། དེ་ལྟར་འགྲོ་བ་དྲུག་ལས་མི་བཤད་ཟིན་ནས། ངན་སོང་གི་འགྲོ་བ་གསུམ་གྱི་ནང་གསེས་དམྱལ་བ་དང་ཡི་དྭགས་རྩ་བའི་གནས་ནི་ས་ཡི་འོག་སྟེ། དེ་ལ་དམྱལ་བའི་འགྲོ་བ་ནི། ཛམ་གླིང་འདིའི་འོག་དཔག་ཚད་སྟོང་ཕྲག་ཉི་ཤུ་མནར་མེད་པའི་དམྱལ་བ་ཆེན་པོ། དེའི་སྟེང་རིམ་བཞིན། རབ་ཏུ་ཚ་བ། ཚ་བ། ངུ་འབོད་ཆེན་པོ། ངུ་འབོད། བསྡུས་འཇོམས། ཐིག་ནག །ཡང་སོས་ཏེ། ཚ་བའི་དམྱལ་བ་བརྒྱད་དང༌། དེ་དག་སོ་སོར་ངོས་བཞི་རེ་ཡོད་པའི་ངོས་རེ་རེ་ན། ཉེ་འཁོར་བའི་དམྱལ་བ། མེ་མ་མུར། རོ་མྱག་འདམ། སྤུ་གྲིའི་ལམ་དང༌། རལ་གྲིའི་ལོ་མ་དང༌། ཤལ་མ་ལིའི་ནགས། ཆུ་བོ་རབ་མེད་དེ་བཞི་བཞི་ཡོད་པ། དེ་རྣམས་ཀྱི་མཐའ་ལོགས་སུ། ཆུ་བུར་ཅན། ཆུ་བུར་རྡོལ་བ་ཅན། སོ་ཐམ་ཐམ་པ། ཨ་ཆུ་ཟེར་བ། ཀྱི་ཧུད་ཟེར་བ། ཨུཏྤལ་ལྟར་གས་པ། པདྨ་ལྟར་གས་པ། པདྨ་ལྟར་ཆེར་གས་པ་རྣམས་ཏེ། གྲངས་དམྱལ་བརྒྱད་ཡོད་ཅིང༌། དེའང་གླིང་རྣམས་འབྲུའི་ཕུང་པོ་བཞིན་དུ་གཤམ་རྒྱ་ཆེ་བར་ཡོད་པའི་ཕྱིར་ཏེ་ཆུད་པ་མི་འགལ་ཞིང༌། ཐེག་ཆེན་ལྟར་ན་དམྱལ་བ་རང་སྣང་དུ་འདོད་དགོས་པས་ཆགས་ཚད་ལས་ངེས་བཟུང་མཐའ་གཅིག་ཏུ་མི་དགོས་སོ།། ཉི་ཚེའི་དམྱལ་བ་དག་ནི། རེ་རེའམ་དུ་མ་དག་ཀྱང་རུང་སྟེ། སོ་སོའི་(༡༥ན)ལས་ལས་གྲུབ་པའི་རྣམ་པའི་བྱེ་བྲག་མང་པོ་ཅན་གནས་ངེས་པ་མེད་པར་བཤད་དོ། ། འདིར་དམྱལ་བ་ཞེས་པ་ལེགས་སྦྱར་སྐད་དུ། ན་རཀ་སྟེ། དེའང་ཡི་གེ་ཕྱིས་བསྣན་གྱི་ངེས་པས་ན་དགག་ཚིག་དང་། རཀ་དགའ་བར་འགྱུར་བས་ཡིད་དུ་འོང་བ་ཅུང་ཟད་ཀྱང་མེད་པས་སམ། རཀ་ལེན་པ་ལ་སྦྱར་ན། བསོད་ནམས་མིན་པར་ཁྲིད་པས་དམྱལ་བའོ། ། ཡི་དྭགས་ནི། ཛམ་གླིང་འདིའི་འོག་དཔག་ཚད་ལྔ་བརྒྱ་ན་ཡི་དྭགས་ཀྱི་རྒྱལ་པོ་གཤིན་རྗེ་གནས་ཤིང༌། དེའི་འཁོར་དུ་དྲན་ཉེ་ལས། ཡི་དྭགས་ལྟོ་གུ་དང༌། ཁ་ཁབ་མིག་ལྟར་ཕྲ་བ་ལ་སོགས་སུམ་ཅུ་རྩ་དྲུག་གསུངས་ཏེ། དེ་ནི་རྩ་བའི་གནས་ཡིན་ཞིང༌། དེ་ལས་འཕྲོས་པ་ནི་མ་ངེས་པ་གཞན་དང་གཞན་དུ་ཡོད་དོ། ། དེ་ལས་ལྷ་མིན་ཡི་དྭགས་ཀྱི་རིས་སུ་གཏོགས་པ་ལ་སོགས་ཡི་དྭགས་རྫུ་འཕྲུལ་ཅན་ཁ་ཅིག་ལྷའི་དཔལ་ལྟ་བུ་ཉམས་སུ་མྱོང་བའང་ཡོད་པར་བཤད་དོ། ། ཡི་དྭགས་ཞེས་པའང་པྲེ་ཏའི་སྒྲ་ལས། རབ་སོང་སྟེ། ཤིན་ཏུ་ཕྱིར་མི་ལྡོག་པར་སོང་བས་སམ་བཀྲེས་སྐོམ་གྱིས་ཤིན་ཏུ་ནོན་པས་ཡི་དྭགས་སོ། ། དུད་འགྲོ་ནི། ཐང་དང་ཆུ་དང་ནམ་མཁའི་སྤྱོད་ཡུལ་བ་ཡིན་ཞིང༌། རྩ་བའི་གནས་ནི་རྒྱ་མཚོ་ཆེན་པོ་སྟེ། དེར་ཀླུ་ལ་སོགས་པ་དུད་འགྲོ་བྱིངས་ན་གནས་པ་རྣམས་ཆང་གི་སྦང་མ་བཞིན་དུ་གནས་པར་བཤད་ཅིང༌། དུད་འགྲོ་ཞེས་པ་དུད་དེ་འགྲོ་བར་བྱེད་པས་དུད་འགྲོར་བཤད་ཀྱང་། ཏི་རསྲའི་སྒྲ་ཐུར་གསེག་གམ། ཐད་ཀའམ། འཁྱོག་པོ་ལ་འཇུག་པས། འགྲོ་ཚུལ་དེ་ལྟར་ཤས་ཆེ་བ་ལས་བཏགས་པར་སྣང༌། ལྷ་མ་ཡིན་ནི། མཛོད་དུ་མི་གསལ་ཡང༌། དྲན་ཉེ་ལས། རི་རབ་ཀྱི་རྩ་བའི་ཁོང་སེང་ཆུ་མཚམས་མན་གྱི་ཆར་རྒྱ་མཚོའི་སྟེང་དུ་ལྷ་མིན་དུད་འགྲོར་གཏོགས་པའི་རིགས་ཀྱི་གནས་ཀྱི་ཁྱད་པར་དང་། སྒྲ་ཅན་དང་མགུལ་ཕྲེང་ལ་སོགས་པའི་གཙོ་བོ་ཆེན་པོ་རྣམས་གནས་པར་གསུངས་སོ། ། ལྷ་མིན་ནི། ཨ་སུ་རཱའི་སྒྲ་ལས། བཅུད་མི་ལྡན་པ་སྟེ། བདུད་རྩིའི་བཅུད་དང་མི་ལྡན་(༡༥བ)པར་གྲགས་པའམ། ཡང་ན། སུ་ར་ལྷ་སྟེ། དམན་པའི་དོན་གྱི་དགག་སྒྲ་སྦྱར་བའོ། ། ཐ༥ ལྔ་པ་[ལྷ་གནས་བཤད་པ་]ནི། རྒྱལ་ཆེན་རིས་བཞི་ལྷུན་པོའི་བང་རིམ་གཙོ། ། ཡན་ལག་ཁ་འཐོར་གནས་ལ་ངེས་པ་མེད། ། ལྷ་རྣམས་ལས་འདོད་ལྷ་རིགས་དྲུག་གི་ཐོག་མ་རྒྱལ་ཆེན་རིས་བཞི་པའི་ལྷ་རྣམས་ནི་ལྷུན་པོའི་བང་རིམ་ལ་གཙོ་བོར་གནས་ཏེ། དེའང་རི་རབ་ཀྱི་བང་རིམ་དང་པོ་ལ་གཞོང་ཐོགས། གཉིས་པར་ཕྲེང་ཐོགས། གསུམ་པར་རྟག་མྱོས། བཞི་པར་ཕྱོགས་བཞིར་དེ་དག་གི་རྒྱལ་པོ་རྒྱལ་ཆེན་བཞི་དང༌། དེ་དག་གི་འཁོར་གྱི་ལྷ་རྣམས་དག་ཕལ་ཆེར་གནས་ཏེ། དེ་རྣམས་གཉའ་ཤིང་འཛིན་སོགས་རི་བདུན་དང་བར་སྣང་ལའང་ཅི་རིགས་པར་གནས་ཤིང༌། མདོར་ན། དམྱལ་བ་ནས་འདིའི་བར་གྱི་འགྲོ་བ་རྣམས་ཀྱི་ཡན་ལག་ཁ་འཐོར་བའི་གནས་ལ་ངེས་པ་མེད་དེ། མི་ཡུལ་གྱི་རི་བྲག་ལྗོན་ཤིང་གཙུག་ལག་ཁང་ཁྱིམ་ལ་སོགས་པ་ལའང་བརྟེན་པ་ཅི་རིགས་ཡོད་པས་ན་དེ་དག་ཀྱང་དེ་རྣམས་ཀྱི་གནས་སམ་རྟེན་དུ་འགྱུར་རོ། ། ལྷུན་པོའི་སྟེང་ན་རྩ་གསུམ་ལྷ་ཡི་གནས། ། རྣམ་རྒྱལ་ཁང་བཟང་གྲོང་ཁྱེར་ལྟ་ན་སྡུག ། སྐྱེད་ཚལ་ས་གཞི་ཡོངས་འདུས་རྡོ་ལེབ་མཆོག ། ཆོས་བཟང་འདུན་ས་གནོད་སྦྱིན་གནས་དང་བཅས། ། རི་རབ་ལྷུན་པོའི་སྟེང་ན་སུམ་ཅུ་རྩ་གསུམ་དུ་གྲགས་པ་ལྷ་རྣམས་ཀྱི་གནས་ཡོད་དེ། དེའང་སུམ་ཅུ་རྩ་གསུམ་དུ་གྲགས་པ་ནི། ནོར་ལྷ་བརྒྱད། ཐ་སྐར་གྱི་བུ་གཉིས། དྲག་པོ་བཅུ་གཅིག །ཉི་མ་བཅུ་གཉིས་སུ་བགྲང་བ་ལྟར་ལས། ཉི་མ་བཅུ་གཉིས་ཀྱི་གྲངས། དབང་པོ་ནི། འདི་དག་གི་གཙོ་བོ་བརྒྱ་བྱིན་ཉིད་དང༌། གཞན་སོ་གཉིས་ལ་ནི་ཉེ་དབང་ཞེས་གྲགས་སོ། ། སུམ་ཅུ་རྩ་གསུམ་གྱི་ལྷའི་གྲངས་འདྲེན་ཚུལ་ནི། དྲན་ཉེ་ལས་འབྱུང་བ་ལྟར་ན། ཆོས་བཟང་མཐོ་བ་རི་རྩེ་ལེགས་མཐོང་གནས། ། ཕྱོགས་གཅིག་ཤིང་གསེབ་ཤིང་རྟ་སྣ་ཚོགས་གནས། ། དགའ་བྱེད་རྣམ་མཛེས་ཡོངས་འདུར་གནས་པ་དང༌། ། འདྲེས་པའི་འགྲམ་དང་ཚང་ཚིང་འགྲམ་ན་གནས། །(༡༦ན) ནོར་བུའི་སྙིང་པོར་གནས་དང་ཀུན་གསལ་སྤྱོད། ། གསེར་ཕུག་ཁང་དང་ཕྲེང་བའི་གྲིབ་མ་དང༌། ། མཐོ་དམར་རྒྱུ་དང་བཀྲ་བ་སྣ་ཚོགས་ཀྱིས། ། སྦྱོར་བར་འཇུག་དང་ཞིབ་ཏུ་སྤྱོད་པ་དང༌། ། གླུ་སྒྲར་ཆགས་དང་གཟི་བརྗིད་འབར་བ་དང༌། ། ཟླ་བའི་གནས་ལྟར་ཉ་དང་ཤིང་སཱ་ལ། ། ཟུང་དང་མིག་ཕྱིར་འགྲོ་དང་བཙུམས་འགྲོས་དང༌། ། ལུས་མདོག་བཟང་ཆེ་ནོར་བུ་འཕྱང་བ་དང༌། ། རིས་མཐུན་ཁོར་གནས་མཐོ་བར་སྤྱོད་པ་དང༌། ། གཟི་མཆོག་གཟི་བྲེང་མ་དྲོས་པ་དག་སྟེ། ། སུམ་ཅུ་རྩ་གསུམ་ལྷ་ཡི་རྣམ་གྲངས་སོ། ། དེའང་དབུས་ན་བརྒྱ་བྱིན་གྱི་ཕོ་བྲང་རྣམ་པར་རྒྱལ་བའི་ཁང་བཟང་གྲུ་བཞི་པའི་ངོས་རེ་ལ་དཔག་ཚད་ལྔ་བཅུ་དང་འཕངས་སུ་དཔག་ཚད་ཕྱེད་དང་ལྔ་པ་རིན་པོ་ཆེའི་བ་གམ་བརྒྱ་རྩ་གཅིག་གིས་བསྐོར་བ། དེའི་ཕྱི་རོལ་དུ་གསེར་གྱི་ལྕགས་རི་ངོས་རེ་ལ་དཔག་ཚད་ཉིས་སྟོང་ལྔ་བརྒྱ་དང་འཕངས་སུ་ཕྱེད་དང་གཉིས་འཕགས་པ། ས་གཞི་གསེར་གྱི་རང་བཞིན་ལ་རིན་པོ་ཆེ་སྣ་ཚོགས་པའི་མདངས་མི་འདྲ་བ་བརྒྱ་རྩ་གཅིག་གིས་བཀྲ་ཞིང་ཤིང་བལ་ལྟར་འཇམ་པ། དེའི་ངོས་གཞི་ནི་རིན་པོ་ཆེའི་ཀ་བ་ཁྲི་དྲུག་སྟོང་གིས་བཏེགས་པའི་གདུང་ཕྱམ་དུ་བྲེས་པའི་རྩིག་སྐྱོབ་ཅན། ཕྱོགས་བཞིའི་སྒོ་ཆེན་པོ་བཞི་ན་ལྷའི་བུ་གོ་ཆ་གྱོན་པ་ལྔ་བརྒྱ་རེས་བསྲུང་ཞིང༌། སྲང་ཆེན་པོ་བཞི་དང་སྲང་ཕྲན་དུ་མ་དང་བཅས་པའི་གྲོང་ཁྱེར་ལྟ་ན་སྡུག །དེའི་ཤར་ཕྱོགས་ན་ཁོར་ཡུག་དཔག་ཚད་སྟོང་ཡོད་པའི་ཤིང་རྟ་སྣ་ཚོགས་པའི་ཚལ་དང༌། ཚད་དེ་དང་འདྲ་བར་ལྷོ་ཕྱོགས་ན་རྩུབ་འགྱུར་གྱི་ཚལ་དང༌། ནུབ་ཕྱོགས་ན་འདྲེས་པའི་ཚལ་དང༌། བྱང་ཕྱོགས་ན་དགའ་བའི་ཚལ་ཏེ་སྐྱེད་ཚལ་གྱི་ས་གཞི་རྣམས་དང༌། ཡང་དེ་དག་གི་ཕྱི་རོལ་ལྟ་ན་སྡུག་གི་བྱང་ཤར་མཚམས་ན་དཔག་བསམ་གྱི་ཤིང་ཡོངས་འདུ་ས་བརྟོལ་ཞེས་བྱ་བ་ཐུར་དུ་དཔག་ཚད་ལྔ་བཅུ་ཟུག་ཅིང་གྱེན་དུ་དཔག་ཚད་བརྒྱ་འཕགས་པ། (༡༦བ)ཡལ་འདབ་ཀྱིས་དཔག་ཚད་ལྔ་བཅུར་ཁྱབ་ཅིང་འདོད་དགུ་ཐམས་ཅད་འབྱུང་བ་དང༌། དེའི་འོག་ན་ལྭ་བ་དཀར་པོ་ལྟ་བུའི་རྡོ་ལེབ་ཨ་མོ་ནི་ཀ་ཞེས་བྱ་བ་ཆུ་ཞེང་དུ་དཔག་ཚད་ལྔ་བཅུ་དང་མཐའ་སྐོར་དུ་དཔག་ཚད་ཉིས་བརྒྱས་འཁོར་བའི་གྲུ་བཞི་པ་དང༌། ལྟ་ན་སྡུག་གི་ལྷོ་ནུབ་མཚམས་ན་ཆོས་བཟང་ལྷའི་འདུན་ས་ཞེས་བྱ་བ་དཔག་ཚད་དགུ་བརྒྱས་འཁོར་བའི་ཟླུམ་པོ། དེའི་དབུས་ན་བརྒྱ་བྱིན་གྱིས་ཆོས་སྟོན་པའི་གསེར་གྱི་ཁྲི་དང༌། ཉེ་དབང་སུམ་ཅུ་རྩ་གཉིས་ཀྱི་གདན་བཤམས་པ་རྣམས་དང༌། གཞན་ཡང་བག་མེད་པ་ལས་བསྐུལ་བའི་ཆོས་ཀྱི་སྡོམ་བཞི་རང་གྲགས་པའི་རྔ་སྒྲ་དང༌། ན་བ་དང་རྒ་བ་དང་དུས་མིན་འཆི་བ་ལས་སྐྱོབ་པའི་བདུད་རྩིའི་བུམ་པ་དང༌། གླང་པོ་ཆེ་རབ་བརྟན་དང་ས་སྲུངས་ཀྱི་བུ་དང༌། རྟ་སྤྲིན་གྱི་ཤུགས་ཅན་འཁོར་གཡོག་བརྒྱ་སྟོང་དང་བཅས་པ་སོགས་བསམ་གྱིས་མི་ཁྱབ་པ་རྣམས་དང༌། ཕྱོགས་གཞིར་གནོད་སྦྱིན་གསང་བ་པ་ལག་ན་རྡོ་རྗེ་ཞེས་བྱ་བ་རྣམས་ཀྱི་གནས་དང་བཅས་པ་ཡོད་དོ། ། དེ་སྟེང་ནམ་མཁར་སྤྲིན་ཆགས་ལྟ་བུ་ལ། ། བརྟེན་པའི་འཐབ་བྲལ་དགའ་ལྡན་འཕྲུལ་དགའ་གཞན། ། རྩ་གསུམ་གྱི་གནས་དེའི་སྟེང་ཕྱོགས་ན་རིམ་པ་བཞིན་གོང་ནས་གོང་དུ་བརྩེགས་པར་ལྷ་སོ་སོའི་རིས་མཐུན་གྱི་ལས་ལས་བྱུང་བའི་གཞལ་ཡས་ཁང་སོགས་ལྷ་རྣམས་ཀྱི་འབྱོར་པ་ཕུལ་དུ་བྱུང་བ་ནམ་མཁར་སྤྲིན་ཆགས་པ་ལྟ་བུ་ལ་བརྟེན་པའི་ལྷ་རྣམས་ཡོད་པ་ལས། དང་པོར་འདོད་པར་གཏོགས་ཀྱང་ལྷ་མིན་གྱི་འཐབ་རྩོད་དང་བྲལ་བའི་འཐབ་བྲལ། འདི་ལ་ལྷ་གཉིས་གཉིས་ལྷན་ཅིག་ཏུ་རྫུས་ཏེ་སྐྱེ་བས་མཚེ་མ་ཞེས་ཀྱང་ཟེར། རྒྱལ་བ་མ་ཕམ་པའི་ཆོས་ཀྱི་དགའ་བ་དང་ལྡན་པའི་དགའ་ལྡན། རང་གིས་འཕྲུལ་པའི་འདོད་ཡོན་ལ་ཅི་དགར་སྤྱོད་པའི་འཕྲུལ་དགའ། གཞན་གྱིས་འཕྲུལ་པའི་ལོངས་སྤྱོད་ལ་དབང་བྱེད་པའི་གཞན་འཕྲུལ་དབང་བྱེད་དེ་འདོད་ལྷ་རིས་དྲུག་གོ། ། ཚངས་རིས་ལ་སོགས་གཟུགས་ཁམས་གནས་བཅུ་དྲུག ། ཀུན་གྱི་གོང་དུ་འོག་མིན་ཆུང་ངུ་སྟེ། །(༡༧ན) དེ་སྟེང་ས་སྡེར་དབང་ཕྱུག་ཆེ་གནས་བཤད། ། དེ་དག་གི་གོང་དུ་ཚངས་རིས་ལ་སོགས་གཟུགས་ཁམས་ཀྱི་གནས་བཅུ་དྲུག་གོང་ནས་གོང་དུ་བརྩེགས་མར་ཆགས་ཤིང༌། དེ་དག་ཀུན་གྱི་གོང་དུ་འོག་མིན་ཆུང་ངུའི་གནས་དང་བཅས་གཟུགས་ཁམས་གནས་རིས་བཅུ་བདུན་དུ་གྲགས་པ་སྟེ། དེའང་ཡས་རིམ་བཞིན་བསམ་གཏན་དང་པོ་ལ། སྡིག་པ་མི་དགེ་བའི་ཆོས་བསལ་བས་ཚངས་པ་སྟེ། དེའི་རིས་སུ་གཏོགས་པའི་ཚངས་རིས། ཚངས་པའི་མདུན་ན་འདུག་སྟེ་ཚིག་འདོན་པས་ཚངས་པའི་མདུན་ན་འདོན། དགེ་རྩ་ཆེན་པོ་ལས་སྐྱེས་ཤིང་ཚེ་ཚད་ལུས་ཚད་སོགས་གཞན་ལས་ཆེ་བ་སྟོང་གསུམ་མི་མཇེད་ཀྱི་བདག་པོ་བྱེད་པའི་ཚངས་ཆེན་ཏེ་གསུམ། བསམ་གཏན་གཉིས་པ་ལ། རང་གི་ས་གོང་མ་ལ་ལྟོས་ཏེ་འོད་ཀྱི་ཁྱོན་དང་གསལ་བ་གཉིས་ཀ་ཆུང་བའི་འོད་ཆུང༌། འོད་ཀྱི་ཁྱོན་འོག་སས་ཚད་བཟུང་མི་ནུས་པའི་ཚད་མེད་འོད། འོད་ཀྱི་ཁྱོན་དང་གསལ་བ་གཉིས་ཀ་ཆེ་ཞིང་གནས་གཞན་མཐའ་དག་སྣང་བར་བྱེད་པའི་འོད་གསལ་ཏེ་གསུམ། བསམ་གཏན་གསུམ་པ་ལ། ཡིད་ཀྱི་ས་པའི་བདེ་བ་ནི་རབ་ཏུ་ཞི་བའི་ཕྱིར་དགེ་བ་ཞེས་བཏགས་ཤིང་དེ་གོང་ས་ལས་ཆུང་བའི་དགེ་ཆུང༌། བདེ་བ་དེ་འོག་སས་ཚད་བཟུང་དུ་མེད་པའི་ཚད་མེད་དགེ། བདེ་བ་དེ་ཆེར་རྒྱས་ཤིང་འཕེལ་བའམ་ལྷ་དེ་དག་གི་དགེ་བ་ལས་ལྷག་པ་ལྷ་རིས་ན་མེད་པའི་དགེ་རྒྱས་ཏེ་གསུམ། བསམ་གཏན་བཞི་པ་ལ། ས་གཞི་སྤྲིན་འཁྲིགས་པ་ལྟར་འདབ་ཆགས་པ་མེད་པའི་སྤྲིན་མེད། མི་གཡོ་བའི་བསོད་ནམས་ལས་སྐྱེས་པའི་བསོད་ནམས་སྐྱེས། གནས་གཞན་དང་འབྲེལ་བའི་སོ་སྐྱེ་ཐམས་ཅད་ལས་འབྲས་བུ་མཆོག་ཏུ་གྱུར་པའི་འབྲས་བུ་ཆེ་སྟེ། སོ་སྐྱེའི་གནས་གསུམ་དང༌། གནས་གཙང་མ་གོང་མ་རྣམས་ལས་ཡོན་ཏན་གྱི་ཁྱད་པར་མི་ཆེ་བའི་མི་ཆེ་བ། ཏིང་ངེ་འཛིན་ཁྱད་པར་ཅན་ཐོབ་པས་འགྱོད་པའམ་ཉོན་མོངས་པའི་གདུང་བ་མེད་པའི་མི་གདུང་བ། རབ་ཏུ་ཞི་ཞིང་མཆོག་ཏུ་མཛེས་(༡༧བ)པར་སྣང་བའི་གྱ་ནོམ་སྣང་བ། མཐོང་བའམ་ལྟ་བ་རྣམ་པར་དག་ཅིང་བཟང་བའི་ཤིན་ཏུ་མཐོང༌། གནས་གཞན་དང་འབྲེལ་བ་ལ་འདི་ལས་ཡོན་ཏན་ལྷག་པ་གོང་ན་མེད་པའི་འོག་མིན། འདི་ལ་རྡུལ་ཕྲ་རབ་བསགས་པའི་གཟུགས་ཀྱི་མཐར་ཐུག་པ་ཡིན་པས་བསགས་མཐའ་པ་ཞེས་ཀྱང་ཟེར་རོ། ། འབྲས་བུ་ཆེ་བའི་ཕྱོགས་གཅིག་ན་འདུ་ཤེས་མེད་པའི་སེམས་ཅན་རྣམས་ཡོད་པར་བཤད་ཅིང༌། བསམ་གཏན་བཞི་པ་འདི་དག་ནི་གནས་གཅིག་ཏུ་ལས་མཐུན་པ་མེད་པས། ལྷ་སོ་སོར་གཞལ་མེད་ཁང་དང་བཅས་ཏེ་སྐྱེ་འཇིག་བྱེད་པའི་ཁྱད་པར་ཡོད་དོ། ། དེ་ལས་མི་ཆེ་བ་ནས་འོག་མིན་གྱི་བར་ནི་འཕགས་པ་རྣམས་ཁོ་ན་དེར་སྐྱབས་གནས་གཙང་མར་གྲགས་ཤིང༌། འོག་མིན་དེ་ལོངས་སྐུའི་གནས་ཡིན་པར་ལང་ཀར་གཤེགས་པ་སོགས་མདོ་དང༌། སྔགས་རྒྱུད་འགའ་ཞིག་ལས་གསུངས་པས་དགོངས་པ་ཕྱོགས་གཅིག་ཏུ་མངོན་ཞིང༌། ས་སྡེ་ལས་དེའི་གོང་དུ་དབང་ཕྱུག་ཆེན་པོའི་གནས་ཞེས་པ་ས་བཅུ་དབང་ཕྱུག་རྣམས་སྐྱེ་བའི་གནས་ཤིག་ཡོད་པར་ཡང་བཤད་དོ། ། གོང་ནས་གོང་དུ་ཉིས་འགྱུར་ཆེ་ཞིང་འཕགས། ། དེ་དག་