Tibetan
དེབ་འདིའི་བཀོད་སྒྲིག་ཇི་ལྟར་བྱས་ཚུལ། འཇམ་མགོན་བློ་གྲོས་མཐའ་ཡས་ཀྱིས་མཛད་པའི་ཐེག་པའི་སྒོ་ཀུན་ལས་བཏུས་པ་གསུང་རབ་རིན་པོ་ཆེའི་མཛོད་བསླབ་པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ་ཅེས་བྱ་བ་འདི་ཉིད་གནས་བཅུའི་སྒོ་ནས་འཆད་པར་བྱ་བ་ལ། གསུང་འབུམ། པོད། ཨེ། ཝཾ། མཱ། ཡཱ། ཞེས་བཞི་ཡོད་པ་ལས། པོད། ཨེ༽ གནས་དང་པོ་དང་། གནས་གཉིས་པ་དང་། གནས་གསུམ་པ་དང་། གནས་བཞི་པའི་འགྲེལ་པ་འདིའི་མ་ཕྱི་ནི་དཔལ་སྤུང་དགོན་པའི་པར་མ་གཞིར་བཟུང་སྟེ་ནི་ཏཱརྠ་ནས་ཁཾ་ཕིའུ་ཊར་གྱིས་པར་གཞི་བསྒྲིགས་ཏེ་འདིར་པར་སྐྲུན་ཞུས་པ་ལགས། ཐོག་མར་ལེའུ་དང་ནང་གསེས་ས་བཅད་བཅས་ལ་རགས་བསྡུས་ཀྱི་དཀར་ཆག་བཀོད་ཡོད། གཞུང་འགྲེལ་གྱི་ས་བཅད་ཆ་ཚང་ཟུར་དུ་བཏོན་ཏེ་དེབ་འདིའི་མཇུག་ཏུ་བསྒྲིགས་ཡོད། འགྲེལ་པའི་རྩ་བའི་ས་བཅད་ཀྱི་མཚམས་ཐིག་ཕྲེང་ཕྱེས་ནས་གཞུང་གི་རྩ་བའི་ཚིག་རྣམས་མངོན་པར་གསལ་བའི་མཚོན་བྱེད་དུ་ཡིག་གེའི་མདོག་སྔོན་པོའི་གཟུགས་སུ་བསྒྱུར་ནས་བཞག་ཡོད། གཟིགས་ཀློག་བདེ་བའི་ཕྱིར་གནས་རེ་རེའི་མཚམས་ནས་ལྡེབ་ངོས་གསར་དུ་བཟུང་ཞིང་། རྩ་བ་དང་། ལུང་འདྲེན། ས་བཅད། གཞུང་དོན་སོ་སོའི་བརྗོད་མཚམས་བཅས་ལ་ཐིག་ཕྲེང་ཕྱེས་ཡོད། མ་ཕྱིའི་ཕྱག་དཔེ་གློག་གིས་སྐྱར་པར་བྱེད་སྐབས་ཞུས་ནོར་སོང་བའམ་ཆད་ལྷག་ཡོད་པའི་དྭོགས་གཞི་ཅན་ལ་ནོར་བཅོས་དང་ཁ་སྐོང་གང་ཞུས་པ་རྣམས་གུག་རྟགས་འདི་ལྟ་བུའི་[ ]ནང་བཞག་ཡོད། དམིགས་བསལ་སྔ་རབས་ཀྱི་གསུང་རབ་འགའ་ཞིག་ལ་དེང་སང་ཡོངས་གྲགས་ཀྱི་བོད་ཀྱི་བརྡ་སྤྲོད་ཀྱི་གཞུང་དང་མི་མཐུན་པ་མང་དུ་མཆིས་པ་རྣམས་ལ། རྩོམ་པ་པོའི་བརྡ་སྤྲོད་འགྲེལ་ཚུལ་གྱི་དགོངས་པ་དང་དུས་རབས་སོ་སོ་སྟོན་པའི་ཕྱིར། མ་ཕྱིར་གང་ཡང་མ་བཅོས་པར་སོར་བཞག་ཞུས་ཡོད། མདོར་ན། ཚད་ལྡན་གྱི་མཁས་དབང་དམ་པ་རྣམས་ལ་དྭོགས་གཅོད་གང་ལྕོག་ཞུས་ནས་མ་དཔེ་ལ་བསྒྱུར་བཅོས་གང་ཡང་མ་བྱས་པར་ང་ཚོས་དག་བཅོས་སོགས་གང་བྱས་པ་ཐམས་ཅད་ཟུར་མཆན་དང་གུག་རྟགས་འདི་[ ]ནང་བཀོ་དེ། དེབ་ཀྱི་དབྱིབས་བཀོད་སོགས་ལེགས་པར་བསྒྲིགས་ནས་དེང་དུས་ཀྱི་སྤུས་ཚད་དང་ལྡན་པའི་དཔེ་དེབ་གསར་བསྐྲུན་ཞུས་པ་ལགས། འོན་ཀྱང་བདག་ཅག་ལ་དཔེ་ཚོགས་འདི་ལྟ་བུའི་ཕྱོགས་བསྒྲིགས་ལ་གོམས་ཆ་ཆུང་བའི་ཁར། མ་ཕྱིའི་ཕྱག་དཔེར་ཡིག་སྐྱོན་ཡང་མི་ཉུང་བ་མཆིས་པས། ཞུ་དག་དང་ལེགས་བཅོས་སོགས་སོ་སོའི་བློའི་ནུས་པ་གང་ཐོན་ཞུས་ཁུལ་བྱས་ཀྱང་ད་དུང་ཐེ་ཚོམ་གྱི་གཞིར་གྱུར་པ་མང་བའི་རྐྱེན་གྱིས། ཆད་ལྷག་འཛོལ་སོགས་ཀྱི་སྐྱོན་ཅི་མཆིས་པ་གཟུར་གནས་ཀྱི་དཔྱོད་ལྡན་མཁས་དབང་རྣམས་ལ་བཟོད་གསོལ་དང་། དེ་བཞིན་སྐྱོན་བསངས་དགེ་སྤེལ་ལ་སྨིན་པའི་དགོངས་འཆར་གང་ཡོད་ངེས་པར་སྩོལ་གནང་ཡོང་བ་ཞུ་ཞེས་ཞུ། ༢༠༢༣ ཟླ་བ། ༡༠ ཚེས། ༡༨ ལ། དཀར་ཆག འགྲེལ་པའི་མཆོད་བརྗོད་དང་བརྩམ་པར་དམ་བཅའ་བ། (༢བ) ཐོག་མར་དགེ་ཞིང་མངོན་པར་མཐོ་བ་ཀླད་ཀྱི་དོན། (༢བ) བར་དུ་དགེ་ཞིང་ངེས་པར་ལེགས་པ་གཞུང་གི་དོན། (༧ན) ག༡ གནས་དང་པོ། འདུལ་ཞིང་སྣོད་བཅུད་ཀྱི་འཇིག་རྟེན་རིམ་པར་ཕྱེ་བ། (༧བ) ང༡ དང་པོ། ཞིང་ཁམས་སྤྱིར་བསྟན་པ་ཐེག་ཆེན་པའི་ལུགས་ལྟར་བརྗོད་པའི་སྐབས། (༧བ) ང༢ གཉིས་པ། འཇིག་རྟེན་བྱེ་བྲག་ཏུ་བསྟན་པ་ཐེག་དམན་པ་དང་ཐུན་མོང་དུ་བརྗོད་པའི་སྐབས། (༡༢ན) ང༣ གསུམ་པ། དུས་ཀྱི་འཁོར་ལོའི་ལུགས་དམིགས་སུ་བསལ་བ་དང་འཇལ་བྱེད་ཚད་བརྗོད་པའི་སྐབས། (༢༨ན) ང༤ བཞི་པ། འཁོར་བ་འགྲུབ་བྱེད་རྒྱུ་རྐྱེན་བསྟན་པའི་སྐབས། (༣༧ན) ག༢ གནས་གཉིས་པ། འདུལ་བྱེད་ཀྱི་སྟོན་པ་བྱོན་ཚུལ་རིམ་པར་ཕྱེ་བ། (༥༩བ) ང༡ དང་པོ། སྟོན་པ་ཉིད་སྔོན་བྱང་ཆུབ་ཀྱི་ལམ་དུ་ཇི་ལྟར་གཤེགས་པའི་སྐབས། (༥༩བ) ང༢ གཉིས་པ། སྟོན་པ་མངོན་པར་རྫོགས་པར་འཚང་རྒྱ་བའི་བཞེད་པ་ཐ་དད་པའི་སྐབས། (༦༧ན) ང༣ གསུམ་པ། སྤྲུལ་པའི་སྐུས་ཞིང་འདིར་མཛད་པ་བཅུ་གཉིས་བསྟན་པའི་སྐབས། (༧༢ན) ང༤ བཞི་པ། འོད་གསལ་རྡོ་རྗེ་རྩེ་མོའི་ལུགས་ཀྱི་སྐུ་དང་ཞིང་ཁམས་ཁྱད་པར་དུ་ཕྱེ་བའི་སྐབས། (༨༠ན) ག༣ གནས་གསུམ་པ། བསྟན་པ་དང་དམ་པའི་ཆོས་ཀྱི་རིམ་པར་ཕྱེ་བ། (༨༨ན) ང༡ དང་པོ། བསྟན་པ་དམ་པའི་ཆོས་ངོས་བཟུང་བའི་སྐབས། (༨༨ན) ང༢ གཉིས་པ། ལུང་གི་ཆོས་འཁོར་བྱེ་བྲག་ཏུ་ཕྱེ་བའི་སྐབས། (༩༩ན) ང༣ གསུམ་པ། བཀའ་ཡི་བསྡུ་བ་རྣམས་བཤད་པའི་སྐབས། (༡༠༧ན) ང༤ བཞི་པ། སྔ་འགྱུར་རྙིང་མའི་བབ་ལུགས་བཤད་པའི་སྐབས། (༡༡༣བ) ག༤ གནས་བཞི་པ། རྒྱལ་བསྟན་འཛམ་བུའི་གླིང་དུ་ཇི་ལྟར་དར་བའི་རིམ་པར་ཕྱེ་བ། (༡༡༩ན) ང༡ དང་པོ། རྒྱལ་བསྟན་འཕགས་པའི་ཡུལ་དུ་ཇི་ལྟར་དར་བའི་སྐབས། (༡༡༩ན) ང༢ གཉིས་པ། གངས་ཅན་ལྗོངས་སུ་བསྟན་རྩ་འདུལ་བ་དང་བཤད་རྒྱུད་གྱི་བྱུང་བ་བརྗོད་པའི་སྐབས། (༡༣༥བ) ང༣ གསུམ་པ། སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་བྱུང་བ་བརྗོད་པའི་སྐབས། (༡༧༥ན) ང༤ བཞི་པ། རིག་གནས་ཞར་བྱུང་དང་བཅས་པའི་བྱུང་བ་བརྗོད་པའི་སྐབས། (༡༩༨ན) ས་བཅད། སུབྷཱཥིཏཔརིསམཱུརཛྙེཡཱནྟཱནཱཾསམུདྲནཱམསརྦཛྙེཡསྥརཎནྠནཱཡསྟོཀོཀྟིབྷིཿབིགྷཊྚིཏཔུསྟཀཾཔྲཐམབིཛཧཱརཾ། ༄༅། །ཤེས་བྱ་ཀུན་ལ་ཁྱབ་པའི་གཞུང་ལུགས་ཉུང་ངུའི་ཚིག་གིས་རྣམ་པར་འགྲོལ་བ་ལེགས་བཤད་ཡོངས་འདུ་ཤེས་བྱ་མཐའ་ཡས་པའི་རྒྱ་མཚོ་ཞེས་བྱ་བ་ལས། གླེགས་བམ་དང་པོ་བཞུགས་སོ། ། ནམཿཤྲཱིམཱཾ་གུརུ་མཉྫུ་ཤྲཱི་ནཱཐཱཡ། ཟབ་ཅིང་རྒྱ་ཆེའི་སྐུ་མངའ་རང་དང་གཞན་ལ་ཕན་པ་ཕུན་སུམ་ཚོགས་པའི་གཏེར། ། དམ་པའི་ཆོས་རྔ་མཁའ་དང་མཉམ་པར་རབ་བསྒྲོགས་བདེ་སྟོང་ཐུགས་ནི་བརྟན་གཡོ་ཁྱབ། ། བསམ་ཡས་ཡོན་ཏན་རྒྱ་མཚོའི་འབྱུང་གནས་རྒྱུན་གྱི་ཕྲིན་ལས་རྩོལ་མེད་ལྷུན་གྱིས་གྲུབ། ། རིགས་བརྒྱའི་ཁྱབ་བདག་དཔལ་ལྡན་བླ་མའི་ཞབས་པད་མི་འབྲལ་ཚངས་པའི་རྒྱན་དུ་བཞུགས། ། ཆེན་པོ་གསུམ་གྱི་མཐར་སོན་རྒྱལ་བ་ཉི་མ་མཛད་པའི་རོལ་མོ་ཡིས། ། འཇིག་རྟེན་གསུམ་གྱི་མུན་པ་རྣམ་སེལ་ངེས་ལེགས་ལམ་གྱི་སྣང་བ་སྟོན། ། ཤེས་བྱའི་ཁོངས་ན་ཁྱོད་མཚུངས་གཞན་མེད་ཆོས་ཀྱི་དབང་ཕྱུག་ཆོས་ཀྱི་རྒྱལ། ། དོན་ཀུན་གྲུབ་པ་ཐུགས་རྗེ་ཅན་ལ་སྒོ་གསུམ་གུས་པ་ཆེན་པོས་འདུད། ། དཔལ་ལྡན་སངས་རྒྱས་པདྨ་ལས་འཁྲུངས་སངས་རྒྱས་ཀུན་གྱི་སྒྱུ་འཕྲུལ་འཆང༌། ། ནམ་མཁའ་ཇི་སྲིད་འཆི་མེད་ལུས་ཀྱིས་རྟག་ཏུ་དོན་མཛད་ཡེ་ཤེས་སྐུ། །(༢ན) བདེ་བ་ཆེན་པོ་གསུང་གི་རྡོ་རྗེ་པདྨ་ཀ་ར་ཡབ་ཡུམ་ཞབས། ། སྙིང་གི་ཆུ་སྐྱེས་མཛེས་པའི་ཟེའུ་འབྲུར་བྱང་ཆུབ་ཐོབ་ཀྱང་བརྟན་པར་བཞུགས། ། གང་ཞིག་ཁྱོད་མཚན་རྣ་བར་ལྷུངས་པས་བདུད་སྡེ་བྱེ་བའི་རུ་མཚོན་བསྙོལ། ། ཡེ་ཤེས་རལ་གྲི་གཟི་འོད་འཕྲོ་བས་ཀུན་རྨོངས་དྲྭ་བ་ཅིག་ཅར་གཅོད། ། མཁྱེན་གཉིས་སྣང་བ་བདེ་བླག་སྦྱིན་པས་ངེས་ལེགས་རིན་ཆེན་སྒོ་འབྱེད་པ། ། འཇམ་དཔལ་ཡབ་ཡུམ་ཞབས་ལ་འདུད་དོ་དྲི་མེད་བློ་གྲོས་མཆོག་སྦྱིན་མཛོད། ། འཕགས་བོད་ཐུབ་བསྟན་གསལ་བའི་ཤིང་རྟ་ཆེ། ། དུས་གསུམ་བྱོན་དང་དེ་ཡི་བཀའ་བརྒྱུད་འཛིན། ། རིས་མེད་ཀུན་ལ་ཟོལ་སྦྱོར་སྤངས་པ་ཡི། ། གུས་པ་ཆེན་པོས་སྙིང་ནས་ལན་བརྒྱར་འདུད། ། བདག་བློ་ཁབ་ཀྱི་མིག་བཞིན་ཁྱོན་དོགས་པས། ། ཤེས་བྱ་ནམ་མཁའི་མཐའ་གཞལ་ནུས་མིན་ཀྱང༌། ། རང་འདྲའི་སྐལ་མཉམ་རྣམས་ལ་གོ་བདེའི་སླད། ། གཅེས་པར་བསྡུས་(༢བ)པའི་གཞུང་འདི་བཀྲོལ་བར་བྱ། ། མཁའ་དང་ཤེས་བྱའི་ཕ་མཐའ་མཐའ་ཡས་མ་ལུས་སུ་ཡིས་འཇལ་བར་ནུས། ། འོན་ཀྱང་མཚན་ཉིད་ཕྱོགས་མཚོན་ཙམ་གྱིས་མཚོན་བྱ་ཀུན་གྱི་དེ་ཉིད་རྟོགས། ། དེ་ཕྱིར་བློ་གྲོས་བུམ་པར་བཟུང་བའི་ཆུ་ཐིགས་ཙམ་གྱི་རོ་ཡིས་ཀྱང༌། ། ཤེས་བྱ་རྒྱ་མཚོ་ཆེན་པོའི་རོ་མཆོག་བློ་ལྡན་རྣམས་ཀྱིས་མྱང་བ་ཡིན། ། ལུང་དང་རིགས་པའི་མཐའ་གཅོད་ཇི་སྙེད་པ། ། དམ་པ་རྣམས་ཀྱི་རབ་ཏུ་བསྟན་པ་དང༌། ། བློ་དམན་དག་གིས་རྟོགས་པར་དཀའ་བས་ན། ། ཚིག་ཙམ་དཀྲོལ་བས་གཞུང་དོན་གསལ་བར་བགྱི། ། དེ་ཡང་ཐར་པ་དང་ཐམས་ཅད་མཁྱེན་པའི་གོ་འཕང་སྒྲུབ་པ་ལ་ཐོག་མར་ཐོས་པ་རྒྱ་མཚོའི་ཕ་རོལ་ཏུ་སོན་པར་བྱ་ཞིང༌། དེ་ནས་བསམ་པ་དང་སྒོམ་བྱུང་གི་ཤེས་རབ་ལ་བརྟེན་ནས་རིམ་གྱིས་བླ་ན་མེད་པའི་བྱང་ཆུབ་བདེ་བླག་ཏུ་འཐོབ་པར་འགྱུར་བ་འདི་ནི་རྒྱལ་བ་སྲས་དང་བཅས་པས་ལེགས་པར་གདམས་པའི་ལམ་མ་ནོར་བ་ཡིན་ཅིང༌། དེ་ལྟ་བུའི་ལམ་གྱི་འཇུག་སྒོ་ཙམ་ཞིག་རང་འདྲའི་བློ་གྲོས་དམན་པ་རྣམས་ཀྱི་བློ་ལ་འཆར་བདེ་བའི་སླད་དུ་བསྟན་བཅོས་འདི་འཆད་པ་ལ་དོན་གསུམ། ཀ༡ ཐོག་མར་དགེ་ཞིང་མངོན་པར་མཐོ་བ་ཀླད་ཀྱི་དོན། ཀ༢ བར་དུ་དགེ་ཞིང་ངེས་པར་ལེགས་པ་གཞུང་གི་དོན། ཀ༣ ཐ་མར་དགེ་ཞིང་དོན་གཉིས་གྲུབ་པ་མཇུག་གི་དོན་ནོ། ། ཀ༡ དང་པོ་ཀླད་ཀྱི་དོན་ལ་གསུམ། ཁ༡ གཞུང་གི་ལུས་རྣམ་པར་གཞག་པའམ་ཐ་སྙད་རྟོགས་པའི་ཕྱིར་མིང་བསྟན་པ། ཁ༢ བརྩམ་པ་ལ་བར་ཆད་མི་འབྱུང་ཞིང་དམ་པའི་རྗེས་འཇུག་ཏུ་ཤེས་པའི་ཆེད་དུ་མཆོད་པར་བརྗོད་པ། ཁ༣ བརྩམ་པ་མཐར་ཕྱིན་ཅིང་དགོས་པ་མཐོང་བའི་དོན་དུ་དམ་བཅའ་བའོ། ། ཁ༡ དང་པོ་མིང་བསྟན་པ་ལ་གསུམ། མིང་དངོས་སྐད་གཉིས་ཤན་སྦྱར་དུ་བསྟན་པ། དེའི་དོན་བཤད་པ། དེ་ལ་ལོག་རྟོག་བསལ་བའོ། ། དང་པོ་ནི། (༣ན) རྒྱ་གར་སྐད་དུ། ཡཱན་སརྦ་མུ་ཁེ་བྷྱཿས་མུཙྪ་ཡ་པྲ་བ་ཙ་ནཾ་རཏྣ་ཀོཥ་ཏྲི་ཤིཀྵ་སུ་དེ་ཤི་ཀཱ་ཤཱསྟྲཾ་སརྦ་ཛྙེ་ཡ་སྥ་ར་ཎ་ནཱ་མ། ཞེས་པ་སྟེ། ཡུལ་རྒྱ་ཆེ་ཞིང་ཆས་གོས་ཀྱི་གཙོ་བོ་ཁ་དོག་དཀར་པོ་ལ་བྱེད་པས་རྒྱ་གར་རམ་སངས་རྒྱས་འཕགས་པ་བྱོན་པའི་ཡུལ་འཕགས་ཡུལ་དུ་གྲགས་པར། ལེགས་སྦྱར། རང་བཞིན། ཟུར་ཆག །ཤ་ཟ་སྟེ། སྐད་རིགས་ཆེན་པོ་བཞི་ཡོད་པའི་གཙོ་བོ། བོད་སྐད་དུ། ཐེག་པ་ཆེན་པོའི་སྒོ་ཀུན་ལས་བཏུས་པ་གསུང་རབ་རིན་པོ་ཆེའི་མཛོད་བསླབ་པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ་ཅེས་བྱ་བ། སཾསྐྲྀཏ་ལྷའི་སྐད་དུ་བརྗོད་པ་དེ་བོད་སྐད་དུ་བསྒྱུར་ན། ཡཱ་ན། ཐེག་པ། སརྦ་མུ་ཁེ་བྷྱཿ། སྒོ་ཐམས་ཅད་ལས། ས་མུཙྪ་ཡ། ཀུན་ཏུ་བཏུས་པ། པྲ་བ་ཙ་ནཾ། གསུང་རབ། རཏྣ་ཀོ་ཥ། རིན་པོ་ཆེའི་མཛོད། ཏྲི་ཤིཀྵ། བསླབ་པ་གསུམ། སུ་དེ་ཤི་ཀཱ། ལེགས་པར་སྟོན་པ། ཤཱསྟྲཾ། བསྟན་བཅོས། སརྦ་ཛྙེ་ཡ། ཤེས་བྱ་ཀུན་ནམ་ཐམས་ཅད། སྥ་ར་ཎ། ཁྱབ་པའམ་འཕྲོ་བའི་དོན་ཅན། ནཱ་མ། ཞེས་བྱ་བའོ། ། འདིར་དྲུག་སྒྲ་གསུམ་མི་འབྱུང་བ་ནི་ལེགས་སྦྱར་ལ་ཚིག་སྡུད་ཀྱི་དབང་དུ་བྱས་པའོ། ། གཉིས་པ་ལ་གསུམ། དོན་ཐད་ཀར་བཤད་པ། དེ་ཉིད་རྩིས་འགོ་ལྔ་དང་སྦྱར་བ། འགྲེལ་ཚུལ་ངོས་བཟུང་བའོ། ། དང་པོ་ནི། རྣམ་པའི་དབང་དུ་བྱས་ན། སོར་བཞག་ལྷ་མིའི་ཐེག་པ་དང༌། སངས་རྒྱས་པའི་ཐེག་པ་གསུམ་མམ་ཐེག་རིམ་དགུའི་རྣམ་གྲངས་སྟོན་པའི་གཞུང་ལུགས་ཀུན་ལས་གཅེས་པར་བཏུས་པ་སྟེ། སྐབས་འདིའི་སྒོ་མོ་ནི་རྣམ་གྲངས་ཀྱི་དོན་ཏོ། ། ངོ་བོའི་དབང་དུ་བྱས་ན། དེ་བཞིན་གཤེགས་པའི་གསུང་རབ་དངོས་དང་དེའི་རྗེས་སུ་འབྲེལ་བའི་གཞུང་ལུགས་རྣམས་ཀྱི་བཤད་ཚུལ་གཙོ་ཆེ་བ་རྣམས་ཉེ་བར་འདུས་པས། བསྟན་བྱའི་རིན་པོ་ཆེ་དེ་དག་འདི་ལ་ཆུད་པའམ། འདི་དེ་དག་ལ་ཡོད་པས་མཛོད་ཀྱི་ཐ་སྙད་སྦྱར་ཞིང༌། རང་བཞིན་ནི། ལྷག་པ་ཚུལ་ཁྲིམས་དང་། སེམས་དང་། ཤེས་རབ་ཀྱི་བསླབ་པ་གསུམ་པོ་གསལ་ལ་མ་ཚང་བ་མེད་པ་ལེགས་པར་སྟོན་ཅིང༌། ཉོན་མོངས་པའི་དགྲ་ལས་འཆོས་ཤིང་ངན་འགྲོའི་སྲིད་པ་ལས་སྐྱོབ་པའི་ཡོན་ཏན་དང་ལྡན་པ་དྲུག་བྲལ་སུམ་ལྡན་གྱི་བསྟན་(༣བ)བཅོས་ཏེ། མིང་དེ་གསུམ་ནི་བརྗོད་བྱ་གཙོ་བོ་བྱས་པ་ཡིན་ལ། ནམ་མཁས་དངོས་པོ་སོ་སོར་རྟོག་པའི་གོ་འབྱེད་པ་བཞིན་དུ་གཞུང་འདིས་ཀྱང་ཤེས་བྱ་ཇི་སྙེད་པ་སོ་སོར་རྟོག་པའི་བློ་གྲོས་ཀྱི་གོ་འབྱེད་པས་ཀུན་ལ་ཁྱབ་པའམ། དེ་ལས་སྣོད་བཅུད་འཕྲོ་གཞིར་གྱུར་པ་བཞིན་འདི་ལས་ཀྱང་ཤེས་རབ་རྣམ་པ་གསུམ་འཕྲོར་རུང་བ་སྟེ། འདི་ནི་བརྗོད་བྱེད་གཙོ་བོར་བྱས་པའོ། ། གཉིས་པ་ནི། བི་ཀྲ་མ་ཤཱི་ལའི་གཙུག་ལག་ཁང་ན་བཞུགས་པའི་མཁས་པ་རྣམས་ཀྱིས་བསྟན་བཅོས་ཐམས་ཅད་རྩིས་འགོ་ཡན་ལག་ལྔ་ཡིས་འཆད་པར་བྱེད་དེ། ཇི་སྐད་དུ། འདི་ཡི་མཛད་པ་པོ་ནི་སུ། ལུང་ནི་གར་བཏུས། ཕྱོགས་གར་གཏོགས། སུ་ཡི་དོན་དུ་འདི་ཉིད་མཛད། དབུ་ཞབས་བསྡུས་པའི་དོན་ནི་ཅི། ཞེས་པ་ལྟར་ལྔ་ལས། དང་པོ་ནི། བྱ་བ་འདི་དག་གི་ཤུགས་ལས་བྱེད་པ་པོ་ཐོན་པ་སྟེ། མིང་གི་རྣམ་གྲངས་ནི་གཤམ་དུ་འཆད་པར་འགྱུར་རོ། ། གཉིས་པ་ནི། ཐེག་པའི་སྒོ་ཀུན་ལས་བཏུས་པ་ཞེས་པས་འཆད། གསུམ་པ་ནི། གསུང་རབ་རིན་པོ་ཆེའི་མཛོད་ཅེས་པས་བསྟན། བཞི་པ་ལ། རང་དོན། གཞན་དོན་གཉིས་ལས། གཞན་སྐུལ་བ་པོ་སོགས་ཀྱི་དོན་དུ་མ་ཡིན་པར་རང་ཉིད་ཤེས་བྱ་ཀུན་ལ་བློ་གྲོས་སྦྱོང་བ་དང་ལྷག་པའི་བསམ་པས་ཀུན་ནས་བསླངས་པའི་ཕྱིར་ཤེས་བྱ་ཀུན་ཁྱབ་ཅེས་པས་བསྟན། ལྔ་པ་ནི། བསླབ་པ་གསུམ་ལེགས་པར་སྟོན་པའི་བསྟན་བཅོས་ཞེས་པས་དོན་བསྡུས་པའོ། ། གསུམ་པ་ནི། བསྟན་བཅོས་ལ། བཀའ་སྤྱི་དང་། བྱེ་བྲག་གི་དགོངས་འགྲེལ་གཉིས་སུ་གྲགས་པ་ལས། འདི་ནི་ཤེས་བྱའི་གནས་ཐམས་ཅད་ལ་ཁྱབ་པའི་ཕྱིར་སྤྱིའི་དགོངས་འགྲེལ་དུ་བཟུང་བར་བྱའོ། ། གསུམ་པ་ལོག་རྟོག་བསལ་བ་ནི། བོད་ཀྱི་བསྟན་བཅོས་ཆོས་ཅན། རྒྱ་གར་གྱི་སྐད་དུ་སྨོས་མི་རིགས་ཏེ། དེ་ནས་མ་བསྒྱུར་བའི་ཕྱིར་ཞེ་ན། དེ་ཆོས་ཅན། དེ་ལ་དེའི་སྐྱོན་མེད་དེ། འཕགས་ཡུལ་ནས་བྱུང་བའི་གསུང་(༤ན)རབ་དགོངས་འགྲེལ་དང་བཅས་པ་ལ་བརྟེན་ནས་འདི་ཉིད་བྱུང་བས། དེ་ལྟར་བརྗོད་པ་ཉིད་རིགས་བརྗོད་པའི་དོན་ཅན་དུ་འགྱུར་བའི་ཕྱིར། དཔེར་ན། བོད་དུ་སྐྱེས་པའི་རྒྱ་གར་གྱི་མི་རིགས་ལ་རྒྱ་གར་པ་ཞེས་བརྗོད་པ་བཞིན་ནོ། ། དེས་ན་བོད་ཀྱི་མཁན་པོ་ཐུ་མིའི་གཞུང་དང༌། ཀུན་མཁྱེན་ཀློང་ཆེན་པའི་གསུང་རབ་སོགས་ལས་ཀྱང་ཅི་རིགས་པ་འབྱུང་བ་བཞིན། འདིར་དེ་དག་གི་ལད་མོ་ཟློ་བ་ལ་མེ་ཁྱེར་དང་ཉི་མའི་དཔེ་བཞིན་གྱུར་ཀྱང་། དང་བའི་སེམས་ཀྱིས་རྗེས་སུ་སློབ་པར་འདོད་པས་འགལ་བ་མ་མཆིས་སོ། ། ཁ༢ གཉིས་པ་མཆོད་པར་བརྗོད་པ་ལ་བཞི། ག༡ དཔལ་ལྡན་བླ་མ་ལ་ལེགས་སྦྱར་སྐད་དུ་ཕྱག་བྱ་བ། ག༢ ཐུབ་པའི་དབང་པོ་ལ་བསླབ་གསུམ་དང་མཐུན་པར་ཕྱག་བྱ་བ། ག༣ སྨྲ་བའི་སེང་གེ་ལ་ཕ་རོལ་ཏུ་ཕྱིན་པའི་ལམ་དང་མཐུན་པར་བསྟོད་ཅིང་འདོད་དོན་གསོལ་བ། ག༤ བླ་མ་བརྒྱུད་པ་དང་བཅས་པ་ལ་གསང་སྔགས་ཀྱི་ལམ་རིམ་དང་མཐུན་པར་གུས་པས་འདུད་པའོ། ། ག༡ དང་པོ་ནི། ནམཿཤྲཱི་མཱཾ་སད་གུ་རུ་པཱ་དཱ་ཡ། ཞེས་པ་དེ་བོད་སྐད་དུ་བསྒྱུར་ན། དཔལ་ལྡན་བླ་མ་དམ་པའི་ཞབས་ལ་ཕྱག་འཚལ་ལོ། ། ཞེས་པ་སྟེ། འདི་ལའང་གཉིས། མཚམས་སྦྱར་བ་དང༌། དོན་བཤད་པའོ། ། དང་པོ་ལའང༌། དགོས་པ། རྒྱུ་མཚན། བརྒལ་ལན། དྲིས་ལན་གྱི་སྒོ་ནས་མཚམས་སྦྱར་བ་སོགས་ཡོད་པ་ལས། འདིར་དགོས་པའི་སྒོ་ནས་མཚམས་སྦྱར་ན། ཕྱག་འཚལ་ལོ་ཞེས་པ་བཤད་པའི་གཞིར་བཞག ། གང་ལ་འཚལ་ན། སྐྱབས་ཐམས་ཅད་ཀྱི་ཕུལ་དུ་གྱུར་པའི་དཔལ་ལྡན་བླ་མ་དམ་པ་དེ་ལ། གང་གིས་འཚལ་ན། བསྟན་བཅོས་རྩོམ་པ་པོས་སྒོ་གསུམ་གུས་པ་ཆེན་པོས་འཚལ། དགོས་པ་ཅིའི་ཕྱིར་འཚལ་ན། གཙོ་བོར་ཡུལ་ཁྱད་པར་ཅན་ལ་བསྟོད་པས་དེ་ལ་གདུལ་བྱ་རྣམས་དད་པར་འགྱུར་བ་དང༌། རང་ཉིད་དམ་པའི་རྗེས་སུ་ཞུགས་པས་བློ་ལྡན་རྣམས་ཐོག་མར་སྤྱོད་པ་དེ་ལྡན་གྱི་གང་ཟག་(༤བ)ལ་དང་བ་སྐྱེ་ཞིང༌། སླར་དེས་བཤད་པའི་བསྟན་བཅོས་ཀྱང་བླང་བར་འོས་པར་བསམ་སྟེ་འཇུག་པར་འགྱུར་བ་དང༌། ཞར་བྱུང་ཚོགས་རྫོགས་ཤིང་བར་ཆད་མེད་པའི་ཆེད་དུའོ། ། དུས་ནམ་གྱི་ཚེ་འཚལ་ན། བསྟན་བཅོས་རྩོམ་པའི་ཐོག་མར། ཚུལ་ཇི་ལྟར་འཚལ་ན། སྒོ་གསུམ་གུས་པ་ཆེན་པོས་སོ། ། གཉིས་པ་ནི། ཤྲཱིའི་སྒྲ་ལས། དཔལ་ནི། གཉིས་སུ་མེད་པའི་ཡེ་ཤེས་དང་བསྟེན་པར་བྱ་བའི་དོན་མཚོན་པས། གཞི་སྣང་སྟོང་ལ། ལམ་ཐབས་ཤེས་ཀྱིས་བགྲོད་ནས། འབྲས་བུ་སྐུ་ཡེ་གཉིས་སུ་མེད་པའི་ཟུང་འཇུག་དང་རང་ཉིད་ལྡན་ལ། གདུལ་བྱ་དེ་དང་ལྡན་པར་མཛད་པ། བླ་མ་ནི། གུ་རུའི་སྒྲ་ལས་ཡོན་ཏན་གྱིས་ལྕི་བ་དང་། ཨུཏྟ་རའི་སྒྲ་ལས་གོང་མར་གྱུར་པ། སཏྲ་ཀྱི་སྒྲ་དོན་མང་པོ་ཅན་ལས། སྐབས་འདིར་དམ་པ་སྟེ། ཕུལ་དུ་བྱུང་བའི་དོན་ཅན་ཡིན་པས་བླ་མའི་ཡང་བླ་མར་གྱུར་པ་སྟེ། རྒྱུད་ཀྱི་རྒྱལ་པོ་ལས། སངས་རྒྱས་ཞལ་འདི་གང་གི་ཐུགས་དང་ཞལ་ལ་གནས་པར་གྱུར་པ་དེ་ནི་དཔལ་ལྡན་བླ་མའོ། །ཞེས་འབྱུང་བས། སངས་རྒྱས་ཏེ་དུས་ཀྱི་འཁོར་ལོའི་ཞལ་བཞིས་མཚོན་པར་དབང་བཞིའི་རིམ་པ་ལས་བཞི་པ་ལྷན་ཅིག་སྐྱེས་པའི་ཡེ་ཤེས་ཐུགས་སུ་ཆུད་དེ། ཞལ་གྱི་སྒོ་ནས་གདུལ་བྱ་ལ་ཉེ་བར་སྟོན་པས་གནས་པ་ཉིད་ལ་དཔལ་ལྡན་བླ་མར་གྲགས་པའི་ཕྱིར། སྐབས་འདིར། དེ་ལྟ་བུའི་བཀའ་དྲིན་གྱི་ཆ་ཤས་ཐོབ་པའི་རྩ་བའི་བླ་མ་ཉིད་དམིགས་སུ་བཟུང་ནས། ཞབས་ལ་ཞེས་པའི་ཤུགས་ཀྱིས་ཤིན་ཏུ་གུས་པ་ཆེན་པོས་འདུད་ཅིང་ཕྱག་འཚལ་བར་མཚོན་པའོ། ། ག༢ གཉིས་པ་[ཐུབ་པའི་དབང་པོ་ལ་བསླབ་གསུམ་དང་མཐུན་པར་ཕྱག་བྱ་བ་]ནི། རྣམ་དག་ཚུལ་ཁྲིམས་གསེར་གྱི་ས་གཞི་བརྟན། ། ཏིང་འཛིན་དཔག་མེད་རི་གླིང་བཀོད་པས་མཛེས། ། ཤེས་རབ་ཉི་ཟླའི་སྣང་བས་ཆོས་ཀུན་གསལ། ། ཐུབ་མཆོག་དོན་ཀུན་གྲུབ་ལ་ཕྱག་འཚལ་