Tibetan
ལོ། ། ཞེས་པ་སྟེ། འཇིག་རྟེན་པ་དང་ཐེག་པ་འོག་མའི་སྐྱོན་གྱིས་ཤིན་ཏུ་རྣམ་པར་དག་པ། སྡོམ་པ་གསུམ་གྱི་ཚུལ་ཁྲིམས་ཀྱི་ཕུང་པོ་ནི་གསེར་གྱི་ས་གཞི་དང་ཆོས་མཚུངས་པར་ཡོན་ཏན་ཀུན་གྱི་གཞི་མར་(༥ན)བརྟན་ཅིང༌། སྲིད་རྩེ་མན་ཆད་ཀྱི་སེམས་ལས་འདས་པ་དཔའ་བར་འགྲོ་བ་ལ་སོགས་པ་ཏིང་ངེ་འཛིན་གྱི་ཕུང་པོ་དཔག་ཏུ་མེད་པ་ནི་རི་རབ་གླིང་བཞི་གླིང་ཕྲན་དང་བཅས་པའི་བཀོད་པ་བཞིན་དུ་མ་འདྲེས་པས་མཛེས་བྱེད་ཀྱི་ཆོས་སུ་བརྒྱན་ལ། སྤྱི་དང་རང་གི་མཚན་ཉིད་མ་ནོར་བར་རྟོགས་ཤིང་བདག་མེད་པ་གཉིས་མཁས་པར་ཁོང་དུ་ཆུད་པའི་ཤེས་རབ་ཀྱི་ཕུང་པོ་ནི་ཉི་ཟླའི་སྣང་བས་འཇིག་རྟེན་གསལ་བ་བཞིན་དུ་ཇི་ལྟ་བ་དང་ཇི་སྙེད་པའི་ཆོས་ཀུན་གསལ་བར་མཛད་པ། སེར་སྐྱ་སོགས་འཇིག་རྟེན་ན་ཐུབ་པར་གྲགས་པ་སུས་ཀྱང་ཆ་ལའང་མི་བསྒྲུན་པ་ལྷག་མ་མེད་པར་མྱ་ངན་ལས་འདས་པས་རྣམ་པར་གྲོལ་བའི་ཕུང་པོ་དང་ལྡན་པའི་མཆོག །ཡེ་ཤེས་བཞིའི་མཐར་ཕྱིན་ཏེ་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོས་རྩོད་དུས་ཀྱི་གདུལ་བྱ་རྣམས་ལ་སངས་རྒྱས་ཀྱི་དོན་ཐམས་ཅད་དེ་ཀུན་གྲུབ་པར་མཛད་པ་དེ་ལ་བཀའ་དྲིན་དྲན་པའི་གུས་པ་ཆེན་པོས་ཕྱག་འཚལ་བར་བགྱིའོ། །ཞེས་སོ། ། འདིས་ནི་རྒྱལ་བའི་ཡོན་ཏན་གྱི་གཙོ་བོ་བསླབ་པ་གསུམ་དངོས་སུ་སྟོན་ཅིང་རྣམ་པར་དག་པའི་ཕུང་པོ་ལྔ་ཞར་ལས་སྟོན་པ་དང༌། བསྟན་བཅོས་འདིའི་བརྗོད་བྱའི་ལུས་མདོར་བསྡུས་ཏེ་བསྟན་པ་ཡིན་ནོ། ། འདིར་བསླབ་གསུམ་ནི་ཐེག་པ་གསུམ་གའི་ཐུན་མོང་བ་ཡིན་པས་འཇིག་རྟེན་པའི་མཐུན་སྣང་དུ་གྲུབ་པ་ཉན་ཐོས་ཐེག་པའི་ལུགས་སུ་བྱས་ཏེ་བཀྲལ་ནའང་གོ་རིམ་གྱི་དངོས་བསྟན་ཡིན་པས་རུང་མོད། འདིར་སངས་རྒྱས་ཀྱི་ཐེག་པའི་དབང་དུ་བྱས་པའོ། ། ག༣ གསུམ་པ་[སྨྲ་བའི་སེང་གེ་ལ་ཕ་རོལ་ཏུ་ཕྱིན་པའི་ལམ་དང་མཐུན་པར་བསྟོད་ཅིང་འདོད་དོན་གསོལ་བ་]ནི། འགྲོ་ཁམས་ཇི་སྲིད་བཟུང་བའི་དཔའ་ཆེན་བློས། ། བཟང་པོ་སྤྱོད་པས་ཆོས་ཀྱི་དབྱིངས་ཀུན་གཏམས། ། རྒྱལ་བའི་ཡབ་ཏུ་གྱུར་ཀྱང་རྒྱལ་སྲས་ཚུལ། ། སྨྲ་བའི་སེང་གེས་དྲི་མེད་བློ་གྲོས་སྩོལ། ། ཞེས་པ་སྟེ། ཐོག་མར་རྒྱུ་ཕུན་སུམ་ཚོགས་པ་བྱང་ཆུབ་མཆོག་ཏུ་ཐུགས་བསྐྱེད་ཚུལ་རྣམ་པ་གསུམ་ལས། དབང་རབ་རྫི་བོ་ལྟ་བུའི་སེམས་བསྐྱེད་ཀྱིས་འགྲོ་ཁམས་ཇི་སྲིད་དེ་(༥བ)སྲིད་དུ་རང་ཉིད་འཚང་མི་རྒྱ་བར་སེམས་ཅན་རྣམས་སྙིང་རྗེས་བཟུང་བ་འགྲན་ཟླ་མེད་པའི་དཔའ་བོ་ཆེན་པོའི་བློ་གྲོས་ཀྱི་སྟོབས་ཀྱིས། ལམ་གྱི་སྐབས་སུ་རྒྱལ་བའི་སྲས་པོ་སུས་ཀྱང་ཆ་ཙམ་མི་བསྒྲུན་པའི་ཕ་རོལ་ཏུ་ཕྱིན་པ་བཅུ་ལ་སོགས་པའི་བཟང་པོ་སྤྱོད་པ་རྒྱ་མཚོས་ཆོས་ཀྱི་དབྱིངས་ཀུན་ཏུ་རྒྱས་པར་གཏམས་ཤིང༌། འབྲས་བུ་གཟོད་མ་ཉིད་ནས་མངོན་པར་བྱང་ཆུབ་པས་རྒྱལ་བ་ཐམས་ཅད་ཀྱི་ཡབ་ཏུ་གྱུར་ཀྱང་ད་དུང་རྒྱལ་སྲས་གཞོན་ནུའི་ཚུལ་གྱིས་འཁོར་བ་མ་སྟོངས་བར་དུ་འགྲོ་བའི་དོན་མཛད་པ་ལ་སྐྱོ་ངལ་མེད་པ། འཇམ་དཔལ་སྨྲ་བའི་སེང་གེས་བདག་དང་འཆད་ཉན་བྱེད་པ་རྣམས་ལ་ཆགས་ཐོགས་ཀྱི་དྲི་མ་མེད་པའི་བློ་གྲོས་དང་གཟུངས་ཀྱི་མཆོག་སྩོལ་ཅིག །ཅེས་སོ། །འདིས་ནི་ཐེག་ཆེན་ཕ་རོལ་ཏུ་ཕྱིན་པའི་ལུས་མདོར་བསྡུས་ཏེ་བསྟན་པའོ། ། ག༤ བཞི་པ་[བླ་མ་བརྒྱུད་པ་དང་བཅས་པ་ལ་གསང་སྔགས་ཀྱི་ལམ་རིམ་དང་མཐུན་པར་གུས་པས་འདུད་པ་]ནི། རིགས་ཁམས་ས་བོན་སྨིན་གྲོལ་གདམས་པས་གསོ། ། རིམ་གཉིས་ལམ་གྱིས་གློ་བུར་དྲི་མ་སྦྱོང༌། ། བདེ་ཆེན་སྐུ་བཞིའི་འབྲས་བུ་སྟེར་མཛད་པ། ། ཡོངས་འཛིན་བླ་མ་བརྒྱུད་པར་བཅས་ལ་འདུད། ། ཅེས་པ་སྟེ། གཞིའི་རྒྱུད་སེམས་ཅན་ཀུན་ལ་རང་བཞིན་གྱིས་འོད་གསལ་བའི་རིགས་སམ་ཁམས་བདེ་བར་གཤེགས་པའི་སྙིང་པོ་ས་བོན་གྱི་ཚུལ་དུ་གནས་པར་གཟིགས་ནས་སྨིན་བྱེད་ཀྱི་དབང་བསྐུར་ཞིང་གྲོལ་བྱེད་ཀྱི་གདམས་པ་འབོགས་པས་ཐར་པའི་གསོས་ཁྱད་པར་ཅན་བཏབ། ལམ་གྱི་རྒྱུད་བསྐྱེད་པ་དང་རྫོགས་པའི་རིམ་པ་གཉིས་ཀྱིས་ལམ་གྱི་མངོན་རྟོགས་རྒྱུད་ལ་བསྐྱེད་ནས་ཉོན་ཤེས་འཕོ་བ་མེད་སྣང་གློ་བུར་བའི་དྲི་མ་ཀུན་སྦྱངས་ནས། བདེ་བ་ཆེན་པོས་ཁྱད་པར་དུ་བྱས་པའི་སྐུ་བཞིའི་འབྲས་བུ་རྒྱུད་ལ་ཚེ་འདི་ཉིད་དུ་སྦྱོར་ཞིང་སྟེར་བར་མཛད་པ། བཀའ་དྲིན་གསུམ་ལྡན་གྱི་རྡོ་རྗེ་སློབ་དཔོན་གཙོ་བོར་གྱུར་པའི་ཡོངས་འཛིན་བླ་མ་དགེ་བའི་བཤེས་གཉེན། སྡོམ་པ་གསུམ་གྱི་བརྒྱུད་པའི་བླ་མའི་ཚོགས་དང་བཅས་པ་ལ་གུས་པ་ཆེན་པོས་འདུད་པར་བགྱིའོ། །ཞེས་སོ། ། འདིས་ནི་རྡོ་རྗེ་ཐེག་པའི་ལམ་རིམ་ཡོངས་(༦ན)སུ་རྫོགས་པར་བསྟན་ཏོ། ། ཁ༣ གསུམ་པ་དམ་བཅའ་བ་ལ་གཉིས། དངོས་དང༌། ཞར་བྱུང་དགོས་སོགས་ཆོས་བཞི་བཤད་པའོ། ། དང་པོ་ནི། ཡང་དག་སྡུད་པའི་བློ་ནུས་ལྡན་མིན་ཀྱང༌། ། གཞུང་ལུགས་རྟོགས་པའི་ཤེར་བརྩོན་དམན་པ་དག ། རིན་ཆེན་གླིང་ནས་སྐལ་བ་མི་འཆད་ཕྱིར། ། ཉུང་ངུ་རྣམ་གསལ་ཡང་དག་རྫོགས་སུ་བརྗོད། ། ཅེས་པ་སྟེ། སྐྱེས་སྦྱོར་ལས་བྱུང་བའི་ཐོས་བསམ་སྒོམ་པའི་ཤེས་རབ་ཀྱིས་དབུལ་བས་ཤེས་བྱ་རྒྱ་ཆེན་པོ་ཡང་དག་པར་སྡུད་པའི་བློ་གྲོས་ཀྱི་ནུས་པ་ཆ་ཕྲ་བ་ཙམ་ཡང་ལྡན་པ་མ་ཡིན་པས། བྱ་བ་འདི་རྩོམ་པའི་འོས་སུ་གྱུར་པ་མ་ཡིན་ཀྱང༌། སྙིགས་དུས་ཀྱིས་བསླད་པའི་གང་ཟག་དཀོན་མཆོག་ལ་བརྟེན་ནས་ལོག་པའི་འཚོ་བ་ལ་གཡེང་བ། ཤེར་བརྩོན་ཤིན་ཏུ་དམན་པས་གསུང་རབ་རྒྱ་ཆེན་པོ་དག་ལྟ་ཅི་སྨོས། གཞུང་ལུགས་ཆུང་ངུ་ཙམ་ཡང་ཇི་བཞིན་རྟོགས་པའི་བློ་གྲོས་ཀྱི་མཐུ་དང་སྐལ་བ་དམན་པ་རང་དང་རང་འདྲ་བ་དག་ལ་ཅུང་ཟད་ཕན་པར་འདོད་པའི་ལྷག་བསམ་གྱིས་ཀུན་ནས་བསླངས་ཏེ། མདོ་རྒྱུད་རིན་པོ་ཆེའི་གླིང་དུ་སྔོན་བསགས་ལས་འཕྲོ་བཟང་པོས་ཕྱིན་པའི་སྐབས་འདིར་གོ་མྱོང་རྟོགས་གསུམ་གྱི་སྐལ་བའི་ཆ་ཙམ་མི་འཆད་པའི་ཕྱིར་དུ། བརྗོད་བྱ་རྒྱ་ཆེན་པོ་ལ་ལྟོས་ནས་རྗོད་བྱེད་ཀྱི་གཞུང་ཉུང་ངུ། ཚིག་དང་དོན་གྱི་ཆ་རྟོགས་སླ་བས་རྣམ་པར་གསལ་བ། ཤེས་བྱ་མ་ལུས་པའི་གནས་ཡང་དག་པར་རྫོགས་པའི་ཚིགས་སུ་བཅད་པ་ཆ་ཤས་ཙམ་བརྗོད་པར་བྱའོ། །ཞེས་སོ། ། གཉིས་པ་ནི། སློབ་དཔོན་དབྱིག་གཉེན་ཞབས་ཀྱིས། དགོས་པ་བསྡུས་པའི་དོན་བཅས་དང༌། ། ཚིག་དོན་བཅས་དང་མཚམས་སྦྱོར་བཅས། ། བརྒལ་ལན་བཅས་ཏེ་བསྙད་པར་བྱ། ། ཞེས་བསྟན་བཅོས་བཤད་ཐབས་ཀྱི་ཡན་ལག་ལྔ་མན་ངག་ཏུ་སྩལ་བ་ལས། ཐོག་མར་བསྟན་པར་བྱ་བ་ནི་དགོས་པའི་དོན་ཡིན་ལ། དེ་ཡིས་གྲུབ་དོན་བསྡུས་དོན་གྱིས་མདོར་བསྟན། (༦བ)དེའི་དོན་ཚིག་དོན་གྱི་ཆ་རྒྱས་པར་བཤད། གོ་རིམ་དང་མི་འགལ་བར་མཚམས་སྦྱོར་དང་། རིགས་པ་དང་མི་འགལ་བར་བརྒལ་ལན་ནི་སྔ་ཕྱི་ཅི་རིགས་སུ་འཆད་པའི་ཐོག་མ་ལ་དགོས་འབྲེལ་བཞི་གསུམ་བཅུ་གཉིས་ཀྱི་རྣམ་གཞག་རྒྱས་པར་བྱར་ཡོད་ཀྱང༌། སྐབས་འདིར་བསྡུ་ན་བཞི་སྟེ། གདུལ་བྱའི་ཞིང་ཁམས་འདུལ་བྱེད་ཀྱི་སྟོན་པ་དང་བསྟན་པ། དེ་ལ་འཇུག་པ་རིམ་པས་ཚུལ་ཁྲིམས་དང་ཐོས་བསམ་སྒོམ་གསུམ་གྱི་གནས། དེ་ལས་ལམ་བགྲོད་ཅིང་འབྲས་བུ་ཡོངས་སུ་རྫོགས་པར་འགྱུར་བ་ཐར་པ་སྒྲུབ་པའི་རྣམ་གཞག་ཤིན་ཏུ་ཆ་ཚང་བ་ནི་བསྟན་བཅོས་འདིའི་བརྗོད་བྱ། དེ་ལ་འཆད་ཉན་གྱིས་བློ་སྦྱངས་པས་སྡེ་སྣོད་དང་ཐེག་པའི་རིམ་པ་ལ་འཇུག་རུང་གི་ཐོས་པ་ལས་བྱུང་བའི་ཤེས་རབ་སྐྱེ་ཞིང་རིམ་གྱིས་བསམ་སྒོམ་གྱི་ཤེས་རབ་ཕྱིན་ཅི་མ་ལོག་པ་སྐྱེ་རུང་དུ་འགྱུར་པ་ནི་དགོས་པ། དེ་ལས་ཐར་པ་དང་ཐམས་ཅད་མཁྱེན་པའི་གོ་འཕང་བདེ་བླག་ཏུ་འགྲུབ་པར་འགྱུར་བ་ནི་ཉིང་དགོས། ཉིང་དགོས་དགོས་པ་དང་འབྲེལ། དགོས་པ་བརྗོད་བྱ་དང་འབྲེལ། བརྗོད་བྱ་སོགས་ཀྱང་ཕྱི་མ་ཕྱི་མར་ལྟོས་པ་ནི་འདིའི་འབྲེལ་བར་གྲུབ་བོ། ། བར་དུ་དགེ་བ་གཞུང་གི་དོན། ཀ༢ རྩ་བའི་གཉིས་པ་བར་དུ་དགེ་བ་གཞུང་གི་དོན་ལ་གཉིས། ཁ༡ མདོར་བསྟན་པ་དང༌། ཁ༢ རྒྱས་པར་བཤད་པའོ། ། ཁ༡ དང་པོ་ནི། སྒྲོན་མེའི་བསྐལ་པ་གང་དུ་སྣང་བའི་ཞིང༌། ། སྟོན་པ་སངས་རྒྱས་བསྟན་པ་ལུང་རྟོགས་གཉིས། ། ཛམྦུའི་གླིང་དུ་གནས་ཤིང་རྒྱས་པ་ན། ། ཚུལ་གནས་ཐོས་བསམ་སྒོམ་ལ་རིམ་སྦྱོར་བས། ། ལམ་བགྲོད་འབྲས་བུའི་མཐར་སོན་བསྟན་བཅོས་ལུས། ། ཕ་རོལ་ཕྱིན་བཅུའི་གྲངས་སུ་རྣམ་པར་གཞག ། ཅེས་པ་སྟེ། ཐོག་མར་དཀོན་མཆོག་རིན་པོ་ཆེ་འབྱུང་བའི་གཞི་སྒྲོན་མེའི་བསྐལ་པ་བཟང་པོ་གང་དུ་སྣང་བའི་ཞིང་བསྟན་པ། ཞིང་ཁམས་དེ་ལ་གདུལ་བྱ་རྣམས་འདུལ་བྱེད་དཀོན་མཆོག་གི་གཙོ་བོ་སྟོན་པ་སངས་རྒྱས་གང་ཞིག་བྱོན་པ། དེའི་བསྟན་པ་ལུང་རྟོགས་(༧ན)གཉིས་ཀྱི་ཆོས་ཀྱི་འཁོར་ལོ་ཇི་ལྟར་བྱུང་བ། དེ་ཉིད་ཛམྦུས་མཚན་པའི་གླིང་མཆོག་འདིར་ཇི་ཙམ་དུ་འཕེལ་ཞིང་རྒྱས་པ། སངས་རྒྱས་ཀྱི་བསྟན་པ་གནས་པ་ན་དེ་ལ་འཇུག་པའི་གོ་རིམ་གྱི་ཐོག་མ་སོ་བྱང་སྔགས་ཀྱི་ཚུལ་ཁྲིམས་ལ་ཇི་ལྟར་བསླབ་ཅིང་གནས་པ། དེ་ལ་བརྟེན་ནས་ཐོས་པས་སྒྲོ་འདོགས་བཅད་པ། བསམ་པས་རྣམ་པར་ངེས་པ། སྒོམ་པས་གཏན་ལ་དབབ་པ་རྣམས་ལ་རིམ་པར་སྦྱོར་བས་ས་དང་ལམ་རྣམས་ལེགས་པར་བགྲོད་ཅིང་ཐར་པ་དང་ཐམས་ཅད་མཁྱེན་པའི་འབྲས་བུའི་མཐར་ཐུག་པར་སོན་པར་འགྱུར་བས། བསྟན་བཅོས་ཀྱི་ལུས་ཡོངས་སུ་རྫོགས་པའི་རིམ་པར་ཕྱེ་བ་ནི་ཕ་རོལ་ཏུ་ཕྱིན་པ་བཅུའི་གྲངས་སུ་རྣམ་པར་གཞག་པའོ། །ཞེས་སོ། ། འདིར་ཅུང་ཟད་དབྱེ་ན། རིམ་པར་དབྱེ་བ་སོ་སོའི་དོན། གྲངས་ངེས། གོ་རིམ། བསྡུས་དོན་དང་བཞི་ལས། དང་པོ་ནི། འོག་ཏུ་རིམ་དབྱེ་སོ་སོའི་སྐབས་སུ་རྒྱས་པར་འཆད་པར་འགྱུར་ལ། གཉིས་པ་ནི། ཐོས་པ་རྒྱ་ཆུང་བའི་བློ་གྲོས་གསར་བུ་བ་དག་གིས་ཤེས་པར་བྱ་བའི་གནས་ནི་རིམ་དབྱེ་བཅུ་ལ་སྐབས་བཞི་བཞིའི་ཡན་ལག་གིས་བརྒྱན་པ་འདིར་གྲངས་ངེས་སུ་བཞག་སྟེ། དེ་ལས་མང་མི་དགོས་ཤིང་། ཉུང་ན་མི་འདུ་བའི་ཕྱིར་རོ། ། གསུམ་པ་ནི། གོ་རིམ་འདི་ལྟར་དུ་ངེས་པའི་གཏན་ཚིགས་ནི་སྨོས་མ་ཐག་པ་ལྟར་རོ། ། བཞི་པ་ནི། སྐབས་བཞི་བཅུ་པོ་དེའང་བསྡུ་ན། བསླབ་པ་གསུམ་གྱི་དོན་བཤད་པར་འདུ་སྟེ། རིམ་པ་ལྔ་པས་ལྷག་པ་ཚུལ་ཁྲིམས་ཀྱི་བསླབ་པ་སྟོན། དྲུག་པ་དང་བདུན་པས་ཤེས་རབ། བརྒྱད་པས་སེམས་སམ་ཏིང་ངེ་འཛིན་གྱི་བསླབ་པ་གཙོ་བོར་སྟོན། དང་པོ་ནས་བཞི་པའི་བར་ཤེས་རབ་ཀྱི་ཡན་ལག ། དགུ་པ་དང་བཅུ་པ་ནི་བརྒྱད་པའི་དོན་མཐར་ཕྱིན་པ་ལས་བྱུང་བས་དེའི་ཡན་ལག་ཏུ་འདུ་སྟེ། དེས་ན་བསླབ་པ་གསུམ་ལེགས་པར་སྟོན་པའི་བསྟན་བཅོས་ཞེས་བྱའོ། ། གནས་དང་པོ། འདུལ་ཞིང་སྣོད་བཅུད་ཀྱི་འཇིག་རྟེན་རིམ་པར་ཕྱེ་བ། དང་པོ། ཞིང་ཁམས་སྤྱིར་བསྟན་པ་ཐེག་ཆེན་པའི་ལུགས་ལྟར་བརྗོད་པའི་སྐབས། ཁ༢ གཉིས་པ་རྒྱས་པར་བཤད་པ་ལ། རིམ་པར་དབྱེ་བ་བཅུ་སོ་(༧བ)སོར་རྒྱས་པར་བཤད་པའི། ག༡ ཐོག་མར་འདུལ་ཞིང་འཇིག་རྟེན་ཇི་ལྟར་སྣང་བའི་རིམ་པར་ཕྱེ་བ་སྟེ། གནས་དང་པོ་ལ་སྐབས་བཞི། ང༡ ཞིང་ཁམས་སྤྱིར་བསྟན་པ་ཐེག་ཆེན་པའི་ལུགས་ལྟར་བརྗོད་པ། ང༢ འཇིག་རྟེན་བྱེ་བྲག་ཏུ་བསྟན་པ་ཐེག་དམན་པ་དང་ཐུན་མོང་དུ་བརྗོད་པ། ང༣ དུས་ཀྱི་འཁོར་ལོའི་ལུགས་དམིགས་སུ་བསལ་བ། ང༤ འཁོར་བ་འགྲུབ་བྱེད་རྒྱུ་རྐྱེན་སྤྱིར་བསྟན་པའོ། ། ང༡ དང་པོ་ལ་གཉིས། ཅ༡ རྒྱུ་རྐྱེན་གང་ལས་བྱུང་བ། ཅ༢ ཞིང་གི་བཀོད་པ་དངོས་བསྟན་པའོ། ། ཅ༡ དང་པོ་ལའང་གཉིས། ཆ༡ མདོར་བསྟན། ཆ༢ རྒྱས་བཤད་དོ། ། ཆ༡ དང་པོ་ནི། ཐོག་མའི་རྒྱུ་རྐྱེན་སྤྱི་དང་བྱེ་བྲག་ནི། ། ཞེས་པ་སྟེ། གདུལ་བྱ་དང་འདུལ་བྱེད་ཀྱི་རྟེན་འབྲེལ་ཚོགས་པ་ལས་བྱུང་བའི་ཞིང་ཁམས་རྒྱ་མཚོ་ཐོག་མར་འབྱུང་བའི་རྒྱུ་དང་རྐྱེན་སྤྱི་དང་བྱེ་བྲག་པ་རྣམས་ཀྱི་ཚུལ་ནི་ཞེས་གླེང་སླང་ནས། ཆ༢ གཉིས་པ་ལ་གཉིས། ཇ༡ གདུལ་བྱ་འདུལ་བྱེད་ཀྱི་རྟེན་འབྲེལ་སྤྱིར་བསྟན། ཇ༢ ཞིང་གི་རྒྱུ་རྐྱེན་བྱེ་བྲག་ཏུ་སྨོས་པའོ། ། ཇ༡ དང་པོ་ནི། ཇི་སྲིད་ནམ་མཁའི་དབྱིངས་དང་སེམས་ཅན་ཁམས། ། དེ་སྲིད་རྒྱལ་བའི་ཐུགས་རྗེ་འགྲོ་བའི་ལས། ། འཛད་པ་མེད་པས་གདུལ་བྱ་འདུལ་བྱེད་ཀྱི། ། རྟེན་འབྲེལ་བསམ་མི་ཁྱབ་པར་སྣང་བ་སྟེ། ། གདུལ་བྱའི་རིགས་ཁམས་ཉེ་བར་སད་པ་ན། ། འདུལ་བྱེད་ཞིང་དང་སྐུ་ཡི་བཀོད་པ་ཤར། ། འདུལ་ཐབས་ཆོ་འཕྲུལ་ཚད་ལས་འདས་པར་སྟོན། ། ཅེས་པ་སྟེ། ཇི་སྲིད་ནམ་མཁའི་དབྱིངས་ལ་མཐར་ཐུག་པ་མེད་པ་དང༌། སེམས་ཅན་གྱི་ཁམས་ཀྱང་དེ་བཞིན་དུ་མཐའ་མི་མངོན་པ་དེ་སྲིད་རྒྱལ་བ་རྣམས་ཀྱི་ཐུགས་རྗེའི་སྟོབས་དང་འགྲོ་བ་རྣམས་ཀྱི་ལས་དང་ཉོན་མོངས་པ་འཛད་པ་མེད་པས། གདུལ་བྱ་འགྲོ་བའི་ཁམས་དང་། འདུལ་བྱེད་སངས་རྒྱས་ཀྱི་ཐུགས་རྗེ་དག །ཆོས་ཉིད་ཀྱི་རྟེན་འབྲེལ་བསམ་གྱིས་མི་ཁྱབ་པའི་མཐུས་ཉེ་བར་སྣང་བ་ཡིན་ཏེ། དེའང་ཆོས་ཀྱི་དབྱིངས་ལས་གདུལ་བྱ་སེམས་ཅན་གྱི་རིགས་སམ་ཁམས་དེ་ལྷན་སྐྱེས་མ་རིག་པས་རྒྱུ་བྱས། ཀུན་བརྟགས་གློ་བུར་བའི་རྐྱེན་གྱིས་མཚམས་(༨ན)སྦྱར་ནས་ཉེ་བར་སད་དེ་ཁམས་གསུམ་དུ་སྲེད་ལེན་གྱིས་སྦྱོར་བ་ན། འདུལ་བྱེད་སངས་རྒྱས་རྣམས་ཀྱི་ཐུགས་རྗེའང་མཚུངས་ལྡན་དུ་སྐྱེས་ཏེ། རྟེན་ཞིང་ཁམས་དང་བརྟེན་པ་སྐུའི་བཀོད་པ་བསམ་གྱིས་མི་ཁྱབ་པ་རྩོལ་མེད་ལྷུན་གྲུབ་ཏུ་ཤར། འདུལ་ཐབས་ཀྱང་ཐུན་མོང་དུ་སྣང་བའི་ཆོ་འཕྲུལ་ཆེན་པོ་བཞི་ལ་སོགས་པ་ཚད་དང་བློ་ལས་འདས་པར་སྟོན་པར་མཛད་དོ། ། ཇ༢ གཉིས་པ་[ཞིང་གི་རྒྱུ་རྐྱེན་བྱེ་བྲག་ཏུ་སྨོས་པ་]ནི། ཆོས་ཀྱི་དབྱིངས་ལས་གཞན་དུ་མི་འགྱུར་ཡང༌། ། བྱིན་རླབས་སྨོན་ལམ་ལས་དང་ཆོས་ཉིད་ཀྱིས། ། ཐོབ་པའི་རྒྱུ་ལས་ཞིང་ཁམས་རྒྱ་མཚོར་སྣང༌། ། ཞེས་པ་སྟེ། བདེ་བར་གཤེགས་པ་རྣམས་ཀྱིས་སོ་སོ་རང་གི་གཟིགས་པའི་ཡུལ་ཆོས་ཐམས་ཅད་ཀྱི་དབྱིངས་བསམ་བརྗོད་ལ་སོགས་པ་མཚན་མའི་ཡུལ་ལས་ཤིན་ཏུ་འདས་པ། རྒྱར་མ་ཆད་ཅིང་ཕྱོགས་སུ་མ་ལྷུང་བ་དེ་ཉིད་ལས་རྣམ་པ་གཞན་དུ་ཅུང་ཟད་ཀྱང་མི་འགྱུར་ཞིང༌། རྫས་གཞན་གྱིས་གོས་པའང་མ་མཆིས་བཞིན་དུ། དེ་བཞིན་གཤེགས་པའི་བྱིན་རླབས་དང༌། བྱང་ཆུབ་སེམས་དཔའ་རྣམས་ཀྱི་ཞིང་སྦྱོང་བའི་སྨོན་ལམ་གྱི་ཁྱད་པར་དང༌། སེམས་ཅན་རྣམས་ཀྱི་ལས་ཀྱི་ཚོགས་མངོན་པར་བསགས་པ་དང༌། ཆོས་ཉིད་ཀྱིས་རབ་ཏུ་ཐོབ་པ་ལ་སོགས་པ་རྒྱུ་དང་རྐྱེན་སྣ་ཚོགས་པས་ཞིང་ཁམས་རྒྱ་མཚོ་འབྱམས་ཀླས་པར་སྣང་སྟེ། སངས་རྒྱས་ཕལ་པོ་ཆེ་ལས། སངས་རྒྱས་ཡེ་ཤེས་ཡུལ་ནི་བསམ་ཡས་པས། ། བྱིན་རླབས་རྣམ་འཕྲུལ་དེ་དག་འདི་ལྟ་བུ། ། ཞིང་རྣམས་རྒྱ་མཚོ་བསྟན་པ་མཐའ་དབུས་མེད། ། རྣམ་པར་སྣང་མཛད་ཆོས་ཀྱི་ཡོངས་སུ་སྦྱངས། ། བྱང་ཆུབ་སེམས་ནི་ཀུན་གྱི་བསམ་པ་བཞིན། ། སྨོན་ལམ་རྒྱ་མཚོ་བསམ་ཡས་རྣམ་སྦྱངས་ཤིང༌། ། སེམས་ཅན་ལས་རྣམས་རྒྱ་མཚོ་བསམ་ཡས་པས། ། ཕྱོགས་ཀུན་ཞིང་རྣམས་རྒྱ་མཚོ་ཐམས་ཅད་འབྱུང༌། ། བྱང་ཆུབ་སེམས་དཔའ་ཀུན་གྱི་རྣམ་འཕྲུལ་དང༌། ། ཐམས་ཅད་མཁྱེན་པ་ཉིད་ལ་འཇུག་པའི་སྒོ། ། སྨོན་ལམ་རྒྱ་མཚོ་ཐམས་ཅད་མངོན་(༨བ)བསྒྲུབས་ཤིང༌། ། ནམ་མཁའི་དབྱིངས་ལ་འབྱམས་ཀླས་ཞིང་འབྱུང་ངོ༌། ། སྤྱོད་པ་རྒྱ་མཚོ་མཐའ་དང་དབུས་མེད་རྣམས། ། སྤྱོད་ཅིང་ཚད་མེད་བདེ་གཤེགས་ཡུལ་ལ་འཇུག ། ཕྱོགས་ཀྱི་ཞིང་རྣམས་རྒྱ་མཚོ་ཀུན་སྦྱོང་ཞིང༌། ། བསྐལ་པ་མཐའ་ཡས་ཞིང་རྣམས་རེ་རེར་སྦྱོང༌། ། སེམས་ཅན་ཁམས་དབྱིངས་བསམ་གྱིས་མི་ཁྱབ་པའི། ། ལས་ཀྱིས་ཞིང་རྣམས་རྒྱ་མཚོ་ཐམས་ཅད་འབྱུང༌། ། ཞེས་པས་བསྟན་ཏོ། ། ཅ༢ གཉིས་པ་ཞིང་བཀོད་དངོས་ལ་གསུམ། ཆ༡ སྟུག་པོ་བཀོད་པའི་ཞིང་ཁམས་སྤྱིར་བསྟན། ཆ༢ གཞི་དང་སྙིང་པོ་མེ་ཏོག་གིས་བརྒྱན་པའི་ཞིང་བྱེ་བྲག་ཏུ་བཤད། ཆ༣ དེ་ལས་མི་མཇེད་ཀྱི་འཇིག་རྟེན་ཁྱད་པར་དུ་དབྱེ་བའོ། ། ཆ༡ དེའི་དང་པོ་ལ་གཉིས། ཇ༡ ཞིང་ཁམས་སྤྱིར་བསྟན། ཇ༢ ཁྱད་པར་བྱེ་བྲག་ཏུ་སྨོས་པའོ། ། ཇ༡ དང་པོ་ནི། གློ་བུར་དྲི་མས་བྲལ་བའི་འོག་མིན་ནི། ། ཁམས་གསུམ་ལས་འདས་ཡེ་ཤེས་རིས་མེད་པ། ། རང་སྣང་ལྷུན་གྲུབ་སྟུག་པོ་བཀོད་པ་རུ། ། རྣམ་པར་སྣང་མཛད་ཡེ་ཤེས་གང་ཆེན་མཚོའི། ། བ་སྤུ་རེ་ལ་བྱེ་བ་ཕྱག་བརྒྱའི་ཞིང༌། ། ཞེས་པ་སྟེ། གང་གི་ཚེ། གློ་བུར་གྱི་དྲི་མས་དབྱིངས་རང་བཞིན་རྣམ་དག་ལ་བྲལ་བ་དེའི་ཚེ་དབྱིངས་དང་ཡེ་ཤེས་དབྱེར་མེད་ཅིང་སངས་རྒྱས་པ་གང་དུ་བརྙེས་པ་དེ་ཉིད་ཀྱི་ས་ལ་འོག་མིན་ཅེས་བརྗོད་པ་དེ་ནི་གནས་ཕྱོགས་གཅིག་ཏུ་འཆད་པ་མེད་དེ། གང་ན་ཉིད་དུ་སོང་བའི་གནས་དེར་རྨི་ལམ་གྱི་སྣང་བ་འབྱུང་བ་བཞིན་ནོ།། དེའང་གདུལ་བྱའི་འཁྲུལ་སྣང་བག་ཆགས་ཀྱིས་མ་བསྡུས་པས་ཁམས་གསུམ་ལས་ཤིན་ཏུ་འདས་པ་རང་སྣང་རྣམ་པར་དག་པའི་ཞིང་ཡེ་ཤེས་ཀྱི་གཞལ་ཡས་ཁང་ཕྱོགས་དང་རིས་སུ་མ་ཆད་ཅིང་བཀོད་པ་ཚད་མེད་པ་དང་ལྡན་པ། རང་གི་ངོ་བོས་སྣང་བའི་ལོངས་སྤྱོད་ཡོངས་སུ་རྫོགས་པའི་རྒྱན་ཡོ་བྱད་མཆོད་སྤྲིན་མཐའ་དག་ལྷུན་གྱིས་གྲུབ་པས་བར་མཚམས་མ་མཆིས་པར་སྟུག་པོ་བཀོད་པའི་གནས་དེ་རུ་སངས་རྒྱས་རྣམས་ཀྱི་ལོངས་སྤྱོད་ལྷུན་གྱིས་རྫོགས་པའི་སྐུ་རྣམ་པར་སྣང་མཛད་(༩ན)ཀུན་ཏུ་ཞལ་ཡས་ཡེ་ཤེས་གང་ཆེན་མཚོའི་སྐུའི་བ་སྤུའི་ཁུང་བུ་རེ་རེ་ལའང་བྱེ་བ་ཕྲག་བརྒྱ་བརྒྱའི་ཞིང་ཁམས་ཀྱི་བཀོད་པ་དང་ལྡན་ན་གཞན་ལྟ་ཅི་སྨོས་ཏེ། ཞིང་ཁམས་རབ་འབྱམས་རྒྱ་མཚོ་སྐུ་གཅིག་ལའང་རྫོགས་པ་དང༌། རྡུལ་གཅིག་གི་སྟེང་ན་ཞིང་རྡུལ་གྲངས་སྙེད་ཀྱི་ཞིང་ཡང་སྣང་ཞིང༌། སྐུ་གཅིག་ལ་སྐུ་རབ་འབྱམས་རྒྱ་མཚོ་འདུ་བ་དང༌། སྐུ་རེ་རེས་ཀྱང་སྐུ་དང་ཞིང་རབ་འབྱམས་རྒྱ་མཚོར་ཁྱབ་པར་སྣང་བ་སོགས་སྤྱོད་ཡུལ་ལས་འདས་པའི་ཆོ་འཕྲུལ་ཆེན་པོས་བཞུགས་ཏེ། ཇི་སྐད་དུ། དེ་ལྟར་མ་ལུས་ཐམས་ཅད་ཕྱོགས་སུ་ཡང༌། ། སྐྲ་ཙམ་ཁྱོན་ལ་དུས་གསུམ་ཚད་སྙེད་ཀྱི། ། སངས་རྒྱས་རྒྱ་མཚོ་ཞིང་རྣམས་རྒྱ་མཚོ་དང༌། ། བསྐལ་པ་རྒྱ་