Tibetan
འཁོར་བཞིའི་མཐུག་རྔམས་ལ་ཕྱེད་ཕྱེད་དུ་བགོས་པའི་ས་དཀྱིལ་གྱི་ཕྱེད་མན་ཆད་ཆ་བདུན་ལ་སྟེང་ནས་རིམ་པར། སེག་མ་བྱེ་མ་འདམ་ཆུ་དང༌། ། དུ་བ་མེ་དང་མུན་པ་ཆེ། ། ངུ་འབོད་ཆེ་སྟེ་རྣམ་བདུན་ནོ། ། བརྒྱད་པ་རྡོ་རྗེ་མེ་ལྕེ་དང་བཅས་པའི་དམྱལ་བ་ནི་བདུན་པ་ལས་གཞན་ལོགས་ན་མེད་ཀྱང༌། སྡུག་བསྔལ་གྱི་ཚོར་བ་ཐ་དད་པས་དེར་བཞག་གོ། ། ས་དཀྱིལ་གྱི་ཕྱེད་གོང་མ་ལའང་ཆ་གཉིས་སུ་བྱས་པའི། སྟེང་མར་ལྷ་མིན་དང༌། འོག་མར་ཀླུ། ལོངས་སྤྱོད་དང་ལས་སའི་གླིང་རྣམས་ལ་མི་རྣམས་ཏེ། ཡི་དྭགས་དང་དུད་འགྲོ་ལ་འདིར་གནས་ལོགས་སུ་མ་བཤད་དོ། ། འདོད་ལྷ་དྲུག་ནི། རི་རབ་ཀྱི་དཔུང་པ་ནས་ས་མཚམས་ཀྱི་བར་རྒྱལ་ཆེན་བཞི་དང་། རི་རབ་ཀྱི་སྟེང་ན་སུམ་ཅུ་རྩ་གསུམ། དེའི་སྟེང་མགྲིན་པ་སུམ་ཆར་བཅད་པའི་འོག་མ་ཆ་བཞིར་ཕྱེ་བ་ལ། འཐབ་བྲལ། དགའ་ལྡན། འཕྲུལ་དགའ། གཞན་འཕྲུལ་དབང་བྱེད་རྣམས་སོ། ། གཉིས་པ་གཟུགས་ཁམས་ན་བཅུ་དྲུག་སྟེ། རི་རབ་ཀྱི་དཔྲལ་བའི་ཆ་བཞི་ལ། འོག་མིན། ཤིན་ཏུ་མཐོང༌། མི་གདུང༌། མི་ཆེ་བ་སྟེ། རླུང་བཞི། སྣ་ལ་འབྲས་བུ་ཆེ་བ། བསོད་ནམས་སྐྱེས། སྤྲིན་མེད། དགེ་རྒྱས་ཏེ། མེ་བཞི། ཀོ་ས་ཀོ་ལ། ཚད་མེད་དགེ། དགེ་ཆུང༌། འོད་གསལ། ཚད་མེད་འོད་དེ། ཆུ་བཞི། མགྲིན་པའི་སུམ་གཉིས་ཀྱི་ཆར། འོད་ཆུང༌། ཚངས་ཆེན། མདུན་ན་འདོན། ཚངས་རིས་ཏེ། ས་བཞི་རྣམས་གནས་སོ། ། གསུམ་པ་གཟུགས་མེད་ལ་བཞི་སྟེ། རི་རབ་ཀྱི་གཙུག་ཏོར་ནས་སྐྲ་མཚམས་ཡན་ཆད་དུ་རིམ་པར་ནམ་མཁའ་མཐའ་ཡས། རྣམ་ཤེས་མཐའ་ཡས། ཅི་ཡང་མེད། འདུ་ཤེས་མེད་མིན་གྱི་སྐྱེ་མཆེད་བཞིས་བསྡུས་པའི་སེམས་ཅན་རྣམས་གནས་པར་གསུངས་སོ། ། དེ་ལྟ་བུའི་འཇིག་རྟེན་གྱི་ཁམས་སྲིད་པ་སུམ་ཅུ་རྩ་གཅིག །(༣༡བ)ཁམས་གསུམ་གྱིས་བསྡུས་པ་དེ་དག་ཆགས་པ་སྔ་ཕྱིའི་རིམ་པ་ཡང༌། ཁམས་གསུམ་ནི་ཐུགས་གསུང་སྐུའི་ཆོས་ཅན་ཡིན་ལ། དེ་ཉིད་སྐྱེ་བའི་རིམ་པས་ཐོག་མར་གཟུགས་མེད། དེ་ནས་གཟུགས་ཁམས། དེ་ནས་འདོད་ཁམས་རྣམས་ཆགས་ཤིང༌། འདོད་ཁམས་ཀྱང་རིམ་པ་དེ་ལྟ་བུས་ས་འོག །ས་སྟེང༌། ས་བླ་རྣམས་རིམ་གྱིས་ཆགས་པ་ཡིན་ནོ། ། ཇ༧ བདུན་པ་[གོ་ལ་དུས་སྦྱོར་བཅས་བཤད་པ་]ནི། ལྷུན་པོ་མེ་རིའི་བར་དུ་གོ་ལ་ཞེས། ། རླུང་གི་འཁོར་ལོ་བཅུ་གཉིས་ཁྱིམ་རྣམས་དང༌། ། རྒྱུ་སྐར་ཉི་ཤུ་བརྒྱད་སོགས་ཐོག་མར་ཆགས། ། ལྷུན་པོའི་རྭ་དང་བསིལ་རི་ཕྲད་པའི་ཕྱི་མཐའ་ནས། མེ་རིའི་ནང་མཐའི་བར་གྱི་ནམ་མཁའ་ལ་ཁྱབ་པའི་གོ་ལ་ཞེས་བྱ་བ་ལྷའི་གཞལ་མེད་ཁང་རྣམས་འདེགས་པར་བྱེད་པའི་རླུང་གི་ཆོས་ཅན་གྱི་འཁོར་ལོ་རི་རབ་ལ་ཉེ་བ་ཅུང་ཟད་མཐོ་བས་སྒུར་པོ་གཞུའི་དབྱིབས། མེ་རི་ལ་ཉེ་བ་ཅུང་ཟད་དམའ་བ་པད་འདབ་ཀྱི་རྣམ་པ་ཕྱོགས་ཀུན་ཏུ་ཟླུམ་པོར་གནས་པ་ཞིག་ཡོད་ལ། སྒྲ་དོན་ནི། གོ་ལ་ཞེས་པ་སྦུབ་ཁུང་སྒང་ཤོང་ཟླུམ། ། ལྕི་ཡང་སོགས་སུ་བསྒྱུར་དུ་རུང་བའི་སྒྲ། ། ལེགས་པར་བསྒྱུར་ན་མཐོ་རིས་འཛིན་དུ་འགྱུར། ། ཞེས་པ་ལྟར་རོ། ། འདིའི་ཆགས་ཚུལ་འཁོར་ལོའི་རྩིབས་ལྟ་བུ་དང་སྟེང་བསྐྱེད་ཕྱིར་བསྐྱེད་རྨོག་བརྩེགས་ལྕགས་སྒྲོགས་ཕུབ་དབྱིབས་སོགས་མཁས་པ་སོ་སོས་བཤད་ཅིང་ལུང་རིགས་ཀྱིས་བསྒྲུབས་པ་ལས། ཕྱིས་སུ་གྲུ་འཛིངས་མ་ཉིད་ཡོངས་སུ་གྲགས་ཤིང་། རྗེ་བརྒྱད་པ་མི་བསྐྱོད་ཞབས་ཀྱིས་ཡིད་མཚོར་བཞད་གད་དུ་ཆེས་གསལ་བར་མཛད་དོ། ། ཁྱིམ་ནི་རཱ་ཤིའི་སྒྲ་ལས་ཚོགས་པའམ་ཕུང་པོའི་དོན་ཅན་ཡིན་པའི་ཕྱིར། འཇམ་དཔལ་རྩ་རྒྱུད་ལས་ཁྱིམ་སོ་དྲུག་ཏུ་བཤད་པ་སོགས་གོ་ལའི་ངོས་སུ་ཇི་སྙེད་ཅིག་ཆགས་ཀྱང༌། གཙོ་བོར་འཇིག་རྟེན་དུ་ཕན་གནོད་དངོས་སུ་སྟོན་པའི་ཁྱིམ་ནི་བཅུ་གཉིས་ཏེ། ལུག་གླང་འཁྲིག་པ་ཀརྐ་ཊ། ། སེང་གེ་བུ་མོ་སྲང་སྡིག་གཞུ། ། ཆུ་སྲིན་བུམ་པཉ་རྣམས་སོ། །(༣༢ན) ཞེས་པ་ལྟར་རོ། ། དེ་ལྟར་འཁོར་གཞི་ཁྱིམ་ལ་བརྟེན་པའི་སྐར་མའི་ཕུང་པོ་ནི་མཐའ་ཡས་ཏེ། དུང་གཉིས་བྱེ་བརྒྱད་ས་ཡ་ལྔ། ། སྐར་མའི་གྲངས་སུ་ཤེས་པར་བྱ། ། ཞེས་དྲང་སྲོང་སྐར་མ་ལ་དགའ་བས་བཤད་པ་དང༌། མངོན་པའི་བཤད་སྒྲོས་འགའ་ཞིག་ཏུ། སྟོང་པ་དྲུག་གི་ནམ་མཁའ་ལ། ། གདེངས་ཅན་མིག་གི་སྐར་གྲངས་མཐོང༌། ། ཞེས་བྱེ་བ་ཕྲག་གཉིས་དང་ས་ཡ་བརྒྱད་དུ་འདོད་པ་སོགས་ཡོད་པ་ལས་ཐམས་ཅད་ཀྱི་དབུས་ན་རྒྱུ་སྐར་བརྟན་པ་ཏོག་དང་རི་བྱི་ཤམ་བུའི་ཚུལ་དུ་གནས་པ། དེ་དག་ལས་བླང་དོར་གྱི་འབྲས་བུ་ལུང་སྟོན་པའི་རྩིས་ཀྱི་འཇུག་པ་ཡོད་པའི་རྒྱུ་སྐར་ནི་ཉི་ཤུ་རྩ་བདུན་ཏེ། ཐ་སྐར་བྲ་ཉེ་སྨིན་དྲུག་སྣར། ། མགོ་ལག་ནབས་སོ་རྒྱལ་སྐག་མཆུ། ། གྲོ་དབོ་མེ་བཞི་ནག་ས་རི། ། ས་ག་ལྷ་མཚམས་སྣྲོན་དང་སྣུབས། ། ཆུ་སྟོད་ཆུ་སྨད་གྲོ་ཞུན་དང༌། མོན་གྲེ་མོན་གྲུ་ཁྲུམ་སྟོད་སྨད། ། ནམ་གྲུ་རྣམས་ཏེ་ཉེར་བདུན་ནོ། ། དེ་ལས་གྲོ་བཞིན་བྱི་བཞིན་གཉིས་སྐར་ཁོངས་གཅིག་ཡིན་ཀྱང་རྣམ་པ་སོ་སོར་བགྲང་ན་ཉི་ཤུ་རྩ་བརྒྱད་དུ་འགྱུར་ཞིང༌། མདོར་ན། ཁྱིམ་དང་རྒྱུ་སྐར་ཉེར་བརྒྱད་ལ་སོགས་པ་རྣམས་ཐོག་མར་ཆགས་པ་ཡིན་ནོ། ། གཡས་བསྐོར་སྟེང་དུ་ཉི་ཟླ་ལ་སོགས་པའི། ། གཟའ་རྣམས་གཡོན་བགྲོད་སྒྲ་གཅན་གཡས་སུའོ། ། རྒྱུ་སྐར་རེ་རེ་ལ་རྐང་པ་བཞི་བཞི་ཡོད་པའི་རྐང་པ་དགུ་རེ་ཁྱིམ་རེ་རེ་ན་གནས་པ་སྟེ། ཐ་སྐར་བྲ་ཉེ་སྨིན་དྲུག་གི་རྐང་པ་གཅིག་ལུག་ཁྱིམ་ན་གནས་པ་སོགས་རིམ་པར་གཡས་བསྐོར་ཚུལ་དུ་གནས་ཤིང་། ཁྱིམ་རྣམས་ཀྱི་དང་པོ་ནི་ལུག་དང༌། རྒྱུ་སྐར་གྱི་ཐོག་མ་ཐ་སྐར་ནས་བརྩམ་པ་ནི་ཉི་མའི་རྟག་ལོངས་ཐོག་མར་སྤྱོད་པའི་ཕྱིར་རོ། ། དེ་ལྟར་ཁྱིམ་དང་རྒྱུ་སྐར་རྣམས་སྔོན་དུ་གྲུབ་ནས་དེ་རྗེས་ནབས་སོའི་རྐང་པ་ཐ་མ་ལ་ཉི་མ། ཐ་སྐར་གྱི་ཐོག་མ་ལ་ཟླ་བ་སོགས་ཁྱིམ་སོ་སོར་གནས་པའི་སྐར་མ་དེ་དག་གི་སྟེང་དུ་གཟའ་(༣༢བ)རྣམས་སྐྱེས་ནས་ཁྱིམ་དང་རྒྱུ་སྐར་དེ་དག་ལ་བདག་པོར་གྱུར་པའི་ཚུལ་གྱིས་དབང་བྱེད་པ་སྟེ། དེ་ཡང་། ཉི་ཟླ་མིག་དམར་ལྷག་པ་དང༌། ། ཕུར་བུ་པ་སངས་སྤེན་པ་དང༌། ། མཇུག་རིང་སྒྲ་གཅན་དུས་མེ་བཅུ། ། ཞེས་པ་རྣམས་ལས་ཉི་མ་ནས་མཇུག་རིང་གི་བར་བརྒྱད་ནི་རི་རབ་ལ་གཡོན་བསྐོར་དང༌། སྒྲ་གཅན་དང་དུས་མེ་གཉིས་ནི་གཡས་བསྐོར་གྱི་ཚུལ་གྱིས་རང་འགྲོས་རྩོམ་མོ། ། དེ་ལ། ཉི་མ། མིག་དམར། ཕུར་བུ། སྤེན་པ་བཞི་གཡས་ཀྱི་ཡན་ལག་ཏུ་བྱུང་བས་དྲག་གཟའ་དང༌། ཟླ་བ། ལྷག་པ། པ་སངས། མཇུག་རིང་བཞི་གཡོན་གྱི་ཡན་ལག་ཏུ་བྱུང་བས་ཞི་གཟའ་ཞེས་བྱའོ། ། ཆ༢ གཉིས་པ་དུས་ཀྱི་རྣམ་པར་གཞག་པ་ལ་གཉིས། ཇ༡ ཞག་གསུམ་དབྱེ་བ། ཇ༢ དུས་བཞི་སྤྱིའི་འཆད་ཚུལ་ལོ། ། ཇ༡ དང་པོ་ནི། དབུགས་དྲུག་ཆུ་སྲང་དྲུག་ཅུ་ཆུ་ཚོད་གཅིག ། དེ་ལས་ཉིན་ཞག་དེ་ཡང་ཟླ་ཉི་རླུང༌། ། འགྲོ་ཚུལ་ལ་བརྟེན་ཚེས་ཉི་ཁྱིམ་ཞག་བྱུང༌། ། དེ་ལ་སྐྱེས་བུ་ནད་མེད་དར་ལ་བབ་པ་ཞིག་གི་དབུགས་འབྱུང་འཇུག་གནས་གསུམ་གཅིག་ཏུ་བྱས་པའི་དབུགས་དྲུག་ནི་ཆུ་སྲང་གཅིག །ཆུ་སྲང་དྲུག་ཅུ་ནི་ཆུ་ཚོད་གཅིག །ཆུ་ཚོད་དྲུག་ཅུར་ལངས་པ་དེ་ལས་ཉིན་ཞག་གཅིག་ཏུ་འགྱུར་ཞིང་། དེ་ལ་དབུགས་ཉི་ཁྲི་ཆིག་སྟོང་དྲུག་བརྒྱ། འཕོ་བའམ་དུས་སྦྱོར་བཅུ་གཉིས་ཡོད་ཅིང་། དུས་སྦྱོར་རེ་རེ་ལ་དབུགས་སྟོང་བརྒྱད་བརྒྱ། ཆུ་ཚོད་ལྔ་རེ་ཡོད་པ་ནི་དུས་ཀྱི་བརྩི་ཚུལ་ཐམས་ཅད་ཀྱི་གཞི་མའོ། ། ཞག་དེའང་ཞིབ་ཏུ་བྱེད་ན། ཟླ་བ་དང་ཉི་མ་དང་རླུང་གི་འགྲོ་ཚུལ་ལ་བརྟེན་ཏེ། ཚེས་ཞག །ཉིན་ཞག །ཁྱིམ་ཞག་གསུམ་གྱི་དབྱེ་བ་བྱུང་ངོ༌། ། ཟླ་ཚེས་བཅོ་ལྔའི་ཆ་དང་ཉི་མས་གླིང༌། ། འཁོར་དང་ཁྱིམ་བགྲོད་སུམ་ཅུའི་ཆ་རྣམས་ཏེ། ། ཕྱི་རིམ་རིང་ཞིང་ཚེས་ཟླ་ཁྱིམ་ལོ་ལས། ། ནམ་ཟླ་དུས་བཞི་ས་ལ་གཡས་བསྐོར་འགྲོ། ། ཟླ་བ་ཚེས་རིམ་དཀར་ནག་བཅོ་ལྔའི་ཆ་རེ་རེ་ལ་ཚེས་ཞག་ཅེས་བྱ་སྟེ། ཡུན་ཚད་ཆུ་ཚོད་ང་དགུ་རྗེས་འབྲང་དང་(༣༣ན)བཅས་པ། ཉི་མས་གླིང་བཞི་ལན་གཅིག་འཁོར་བ་སྟེ། ད་ནང་སྐྱ་རེངས་ཤར་ནས་སང་གི་སྐྱ་རེངས་འཆར་བའི་བར་རམ། རེས་གཟའི་ཆུ་ཚོད་འཕོ་བའི་ཡུན་གཅིག་ལ་ཉིན་ཞག་ཅེས་བྱ་སྟེ། ཡུན་ཚད་ཆུ་ཚོད་དྲུག་ཅུ། ཉི་མས་ཁྱིམ་གཅིག་བགྲོད་པའི་ཡུན་ཚད་སུམ་ཅུའི་ཆ་གཅིག་ནི་ཁྱིམ་ཞག་སྟེ། ཡུན་ཚད་ཆུ་ཚོད་དྲུག་ཅུ་རྗེས་འབྲང་དང་བཅས་པ་ཡོད་ལ། དེ་རྣམས་ཀྱང་ཚེས་ཞག་ལས་ཉིན་ཞག །དེ་ལས་ཁྱིམ་ཞག་ཕྱི་རིམ་བཞིན་དུ་ཡུན་རིང་བ་ཡིན་ནོ། ། དེ་གསུམ་གྱིས་ཟླ་བ་དང་ལོ་བརྩམས་པའི་ཚེ་ཤུགས་ཆེ་ཆུང་གིས་ཟླ་བར་མ་ལངས་ཀྱི་བར་དུ་ཉིན་ཞག་གཙོ་ཆེ་སྟེ། ཁྱིམ་ཚེས་གཉིས་ཀྱང་ཉིན་ཞག་དང་ལྟོ་བསྟུན་ཏེ་བརྩི་དགོས་པའི་ཕྱིར་རོ། །ཟླ་བར་ལངས་ནས་ཚེས་ཞག་གཙོ་ཆེ་སྟེ། ཚེས་ཞག་སུམ་ཅུར་ལངས་པ་ན་ཉིན་ཞག་སུམ་ཅུར་མ་ལངས་ཀྱང་ཟླ་བ་རྫོགས་པར་འདོད་དགོས་པའི་ཕྱིར་ཏེ། ཚེས་ཞག་སུམ་བརྒྱ་དོན་གཅིག་ལ། ཉིན་ཞག་སུམ་བརྒྱ་རེ་ལྔས་ཕྲི་བས་ལྷག་མ་ཞག་དྲུག་ལུས་པ་དེ་ལོ་གཅིག་གི་ཞག་མི་ཐུབ་ཀྱི་ཆ་ཡིན་པས་འདོར་དགོས་པའི་ཕྱིར་རོ། ། དེ་ལྟར་ཡང་མཛོད་ལས། ཟླ་བ་ཕྱེད་དང་གཉིས་འདས་ཤིང༌། ། ཟླ་བ་ཕྱེད་ནི་ལུས་པ་ན། ། མཁས་པས་ཞག་མི་ཐུབ་པར་འདོར། ། ཞེས་སོ། ། ལོར་ལངས་ནས་ཁྱིམ་ཞག་གཙོ་ཆེ་སྟེ། ལོ་མཚན་ཉིད་པ་ཡིན་ན་བགྲོད་མཉམ་གྱི་དུས་བཞི་ཕྲུགས་གཅིག་རྫོགས་དགོས་པ་གང་ཞིག །དེ་རྫོགས་པ་ལ་ཉི་མས་ཁྱིམ་ཞག་སུམ་ཅུའི་བདག་ཉིད་ཅན་གྱི་ཁྱིམ་ཟླ་བཅུ་གཉིས་པོ་འཁོར་དགོས་པའི་ཕྱིར་ཏེ། རྡོ་རྗེ་མཁའ་འགྲོ་ལས། ཉི་མ་འགྲོ་ལྡོག་གཉིས་ལ་ནི། ། ལོ་གཅིག་ཅེས་ནི་བརྗོད་པ་ཡིན། ། ཞེས་སོ། ། དེས་ན་ལོ་གཅིག་ལ་ཁྱིམ་ཞག་སུམ་བརྒྱ་དྲུག་ཅུ་དང༌། ཁྱིམ་ཟླ་བཅུ་གཉིས་ལས་མི་མང་ཞིང་མི་ཉུང་བའི་ཕྱིར། ཉིན་ཚེས་གཉིས་རང་རང་གི་ཞག་སུམ་ཅུའི་བདག་ཉིད་ཅན་གྱི་(༣༣བ)ཟླ་བ་བཅུ་གཉིས་རེ་རྫོགས་པ་ན་ལོ་མི་འཁོར་ཏེ། དེའི་སྟེང་དུ་ཚེས་ཞག་ལ་ཞག་བཅུ་གཅིག་ལྷག་བཅས་དང༌། ཉིན་ཞག་ལ་ཞག་ལྔ་རྗེས་འབྲང་དང་བཅས་པ་བསྣན་ནས་ཁྱིམ་ལོ་དང་བསྟུན་དགོས་པའི་ཕྱིར་རོ། ། དེའི་དོན་ཀྱང་ཟླ་བའི་དཀར་ཆ་འཕེལ་འགྲིབ་བཅོ་ལྔ་རེ་རྫོགས་པ་ལ་ཟླ་བ་གཅིག་ཏུ་འཇོག་ཅིང་དེ་ལ་ཚེས་ཟླ་ཞེས་གྲགས། དབྱར་དགུན་སྟོན་དཔྱིད་ཆ་ཚང་བ་གཅིག་ལ་ལོ་གཅིག་ཏུ་བརྩི་སྟེ་ཁྱིམ་ལོ་ཞེས་གྲགས་པའོ།། དེ་ལྟར་ལོངས་སྤྱད་བྱའི་ཡུལ་སྐར་ཁྱིམ་རྣམས་ལ་སྤྱོད་བྱེད་གཟའ་དགུས་ལོངས་སྤྱད་པའི་ལག་རྗེས་ས་ལ་དུས་བཞི་གནས་ཚུལ་གཡོན་བསྐོར་དུ་གནས་ཀྱང༌། འཁོར་ཚུལ་གཡས་བསྐོར་དུ་འགྲོ་སྟེ། དཔེར་ན། ལྷོའི་དུམ་བུ་གསུམ་ན་དཔྱིད་ཡོད་པའི་དུས། ཤར་གླིང་ན་དབྱར། བྱང་ན་སྟོན། ནུབ་ན་དགུན་གྱི་དུས་ཡོད་ཀྱང༌། དུམ་བུ་རེ་ལ་ལྟོས་ནས་དཔྱིད་རྗེས་སུ་དབྱར། དབྱར་རྗེས་སྟོན། སྟོན་རྗེས་དགུན། དགུན་རྗེས་དཔྱིད་རིམ་ཅན་དུ་འབྱུང་བའི་ཕྱིར་རོ། ། མཁའ་ལ་དུས་སྦྱོར་བཅུ་གཉིས་སུ་འཆར་ཏེ། དུས་སྦྱོར་ནི་རྒྱུ་སྐར་གྱི་སྐད་པ་དགུ་རེར་གནས་པའི་ཁྱིམ་རེ་ལ་གཟའ་རྣམས་ཀྱིས་ལོངས་སྤྱད་པའི་ཡུན་ལ་དུས་སྦྱོར་གཅིག་ཏུ་བཞག་དགོས་པས་གཟའ་ཐམས་ཅད་ལ་དུས་སྦྱོར་བཅུ་གཉིས་ཚང་ནའང་ལོ་དེར་དུས་སྦྱོར་བཅུ་གཉིས་ཀྱི་ཁྱིམ་སླེབ་གསུངས་པ་དང༌། བྱེ་བྲག་ཞག་རེ་ལ་སྐར་ཁྱིམ་ཚར་རེ་རྫོགས་པར་འཆར་བ་ལ་ལོངས་སྤྱོད་ཚུལ་གྱི་དུས་སྦྱོར་བཅུ་གཉིས་གསུངས་པ་ནི་ཉི་མ་ཁོ་ན་ལ་སྦྱར་བ་ཡིན་ནོ། ། དུས་སྦྱོར་སྟོབས་ཀྱིས་སྣོད་བཅུད་འཕེལ་འགྲིབ་བྱེད། ། ནང་དུ་ཁམས་དྲུག་ལྡན་པའི་སྐྱེས་བུའི་ལུས་ལ་རང་རང་གི་དུས་སྦྱོར་བཅུ་གཉིས་ཀྱི་རླུང་ཚུལ་བཞིན་དུ་རྒྱུ་བ་ལས་བདེ་བར་གནས་པ་དང༌། ཚུལ་མིན་དུ་རྒྱུ་བ་ལས་སྡུག་བསྔལ་བར་འགྱུར་བ་ལྟར། ཕྱི་རོལ་ཏུའང་དུས་སྦྱོར་བཅུ་གཉིས་ཀྱི་རླུང་ཚུལ་བཞིན་དུ་རྒྱུ་བ་ལས། རྒྱུད་ལས། (༣༤ན)འབྲུ་རྣམས་དགོན་པར་སྐྱེ་བ་དང་ནི་ཤིང་རྣམས་འབྲས་བུ་བརྟན་པོས་དུད་པ་དེ་རྣམས་འབྱུང་བར་འགྱུར། ཞེས་གསུངས་པ་ལྟ་བུའི་སྣོད་ཀྱི་ཡོན་ཏན་ཡར་འཕེལ་ཉིད་དུ་འགྱུར་བ་དང༌། མི་རྣམས་ཀྱི་ཚེ་ཡང་ལོ་བརྒྱ་པ་ནས་སྟོང་བརྒྱད་བརྒྱ་པའི་བར་དུ་འཕེལ་བར་འགྱུར་ལ། ཚུལ་མིན་དུ་རྒྱུ་བ་ལས་ནི་སྣོད་བཅུད་ཀྱི་ཡོན་ཏན་འབྲི་བར་འགྱུར་ཞིང༌། ཚེ་ལོ་ཡང་སྟོང་བརྒྱད་བརྒྱ་པ་ནས་བརྒྱ་པའི་བར་དུ་བྲི་བར་འགྱུར་བ་སོགས་དུས་སྤྱི་དང༌། ནམ་ཟླ་དུས་བཞི་སོགས་བྱེ་བྲག་གི་འཕེལ་འགྲིབ་ཇི་སྙེད་པ་བྱེད་པ་ཡིན་ནོ། ། ཇ༢ གཉིས་པ་[དུས་བཞི་སྤྱིའི་འཆད་ཚུལ་]ནི། དེ་ལས་སྤྲོས་ཏེ་བསྟན་དང་འཁོར་ལོ་ཅན། ། འཇིག་རྟེན་སྟོང་འཇུག་དུས་བཞིའི་ཚུལ་ཡང་འཆད། ། དུས་ཀྱི་རྣམ་པར་གཞག་པ་ལས་སྤྲོས་ཏེ། ཆོས་ཀྱི་སྤྱན་རས་ཡངས་པའི་མཁས་པ་དག་གིས་སངས་རྒྱས་བསྟན་པའི་དུས་བཞི། མི་བདག་འཁོར་ལོ་ཅན་གྱི་དུས་བཞི། འཇིག་རྟེན་སྲིད་པའི་དུས་བཞི། གཟའ་རྣམས་སྟོང་པར་འཇུག་པའི་དུས་བཞིའི་ཚུལ་ཡང་འཆད་པར་མཛད་ཅིང་། དེ་དག་ལས་རྒྱ་བོད་ཀྱི་མཁས་པ་དག་གི་བཞེད་པའི་རྣམ་གྲངས་ཤིན་ཏུ་མང་བས་རྒྱས་པར་སྤྲོས་ན་མཐའ་ཡས་ཀྱང༌། རྗེ་བརྒྱད་པ་མི་བསྐྱོད་ཞབས་ཀྱི་བཞེད་པ་ལྟར་ན། དང་པོ་ནི། རྒྱལ་བསྟན་ལྔ་བརྒྱ་ཕྲག་བཅུའི་དབང་དུ་བྱས་པའི་དང་པོ་འབྲས་བུའི་དུས་གསུམ་རྫོགས་ལྡན། གཉིས་པ་སྒྲུབ་པའི་དུས་གསུམ་སུམ་ལྡན། གསུམ་པ་ལུང་གི་དུས་གསུམ་གཉིས་ལྡན། བཞི་པ་རྟགས་ཙམ་འཛིན་པའི་དུས་གཅིག་རྩོད་ལྡན་དུ་བཞེད་དེ། འདུལ་བ་ལ་ཕམ་པ་དང་པོའི་གླེང་གཞི་བྱུང་སྐབས་རྫོགས་ལྡན། དེ་ནས་རིམ་གྱིས་ཕམ་པ་གཉིས་པ་ལ་སོགས་པའི་གླེང་གཞི་བྱུང་ནས་སུམ་ལྡན་སོགས་སུ་འཇོག་པ་འབུམ་ཊཱིཀ྄་མཁན་པོའི་བཞེད་པ་དང་དོན་གྱི་གནད་གཅིག་ཅིང༌། དེ་ལྟར་དབྱེ་བའི་ཁུངས་ཀྱང་། བསྡུས་པའི་རྒྱུད་ལས། ཇི་ལྟར་འཇིག་རྟེན་མགོན་གྱི་དེ་བཞིན་ནོ། །(༣༤བ) ཞེས་པའི་ཤུགས་ལས་བསྟན་པར་བཞེད་དོ། ། གཉིས་པ་ནི། སའི་དུམ་བུ་འདིར་དུས་བཞིའི་ལོ་གྲངས་ཉི་ཁྲི་ཆིག་སྟོང་དྲུག་བརྒྱར་གནས་པའི་རྫོགས་ལྡན་དང་སུམ་ལྡན་དང་ཉིས་ལྡན་གསུམ་རེ་རེའང་ལྔ་སྟོང་བཞི་བརྒྱ་རེ་དང༌། རྩོད་ལྡན་གྱི་སྟེང་ནས་སུམ་སྟོང་དྲུག་བརྒྱ་སྟེ། བསྡམས་པས་ལོ་ཁྲི་དགུ་སྟོང་བརྒྱད་བརྒྱ་ནི་སངས་རྒྱས་ཀྱི་ཆོས་འཇུག་པའི་དུས་དང༌། རྩོད་ལྡན་གྱི་ལྷག་མ་སྟོང་བརྒྱད་བརྒྱ་ནི་ཀླ་ཀློའི་ཆོས་འཇུག་པའི་དུས་ཏེ། དེའང་རིགས་ལྡན་ཁྱབ་འཇུག་སྦས་པ་སེང་ཁྲི་ལ་དབང་བསྐུར་ནས་ལོ་ལྔ་བཅུ་རྩ་གཅིག་འདས་པའི་རྗེས་ལ་ཀླ་ཀློའི་ལོ་སྟོང་བརྒྱད་བརྒྱ་པའི་འགོ་ཟུག་ཅིང༌། དྲག་པོ་སེང་ཁྲི་ལ་དབང་བསྐུར་ནས་ལོ་ལྔ་བཅུ་རྩ་གཅིག་པ་ཡན་གྱིས་རྫོགས་ལ། དེ་ནས་དྲག་པོས་ཡན་ལག་བཞི་པའི་དཔུང་གིས་ཀླ་ཀློའི་དྲེགས་པ་བཅོམ་ནས་སངས་རྒྱས་ཀྱི་ཆོས་ལ་བཀོད། དེའི་རྗེས་ཐོགས་སུ་སླར་ཡང་རྫོགས་ལྡན་གྱི་དུས་འཛུག་ཅིང་མི་རྣམས་ཀྱང་ཚེ་ལོ་སྟོང་བརྒྱད་བརྒྱ་པར་རིམ་གྱིས་འགྱུར་རོ། །རྫོགས་ལྡན་འཇུག་པའི་ལོ་དེ་དང་ལྷོ་གླིང་ནུབ་མར་ཀླ་ཀློའི་ལོ་སྟོང་བརྒྱད་བརྒྱ་པའི་ཐོག་མ་འཇུག་པ་དུས་མཉམ་མོ། །དེའི་ཚེ་དྲག་པོ་ལ་སྲས་ཚངས་པ་དང་ལྷ་དབང་གཉིས་འབྱུང་བའི་ཚངས་པས་སའི་དུམ་བུ་འདི་ཉིད་དུ་དབང་བསྒྱུར་ཞིང༌། ལྷ་དབང་གི་རིགས་ལས་བྱུང་བའི་རྒྱལ་པོ་གཞན་གྱིས་འདིར་རྫོགས་ལྡན་ཞུགས་ནས་ལོ་སྟོང་བརྒྱད་བརྒྱ་པའི་མཐར་ལྷོ་གླིང་ནུབ་མའི་ཀླ་ཀློ་བཅོམ་ནས་དེར་རྫོགས་ལྡན་འཇུག་གོ། །དེའི་ཚེ་ནུབ་གླིང་གཡས་མར་ཀླ་ཀློའི་ལོ་སྟོང་བརྒྱད་བརྒྱ་པ་འཇུག་ཅིང༌། དེའི་མཐར་ལྷ་དབང་གི་རིགས་ལས་བྱུང་བའི་ཆོས་ཀྱི་རྒྱལ་པོས་ཀླ་ཀློ་བཅོམ་ནས་དེར་རྫོགས་ལྡན་འཇུག་ལ་སའི་དུམ་བུ་གཞན་དགུར་ཡང་རིགས་པ་འདིས་ཀླ་ཀློའི་ལོ་སྟོང་བརྒྱད་བརྒྱ་པ་རེ་འཇུག་ཅིང༌། དེ་ཆོས་ཀྱི་རྒྱལ་པོས་བཅོམ་ནས་རྫོགས་ལྡན་འཇུག་པའི་རིམ་པ་ཤེས་པར་བྱ་ཞིང༌། ལྷ་དབང་ནས་བརྩམས་ཏེ། དེའི་རིགས་བརྒྱུད་ལས་(༣༥ན)བྱུང་བ་རྣམས་ཀྱིས་དུམ་བུ་བཅུ་གཉིས་ལ་གཡས་བསྐོར་དུ་ལན་གཅིག་འཁོར་བར་གྱུར་པ་དེའི་ཚེ་ན། སླར་ཡང་དུམ་བུ་འདི་ཉིད་དུ་རིགས་ལྡན་དྲག་པོ་ཞེས་བྱ་བས་ཀླ་ཀློ་བཅོམ་ནས་རྫོགས་ལྡན་འཇུག་པར་བྱེད་དོ། ། མདོར་ན། ཕྱི་རོལ་ཀླ་ཀློ་འདུལ་བྱེད་ཀྱི་རིགས་ལྡན་གང་ན་བཞུགས་པ་དེར་རྫོགས་ལྡན། མདུན་དུ་རྩོད་ལྡན། རྒྱབ་ཏུ་སུམ་ལྡན། དེ་གཉིས་བར་ཉིས་ལྡན་ཏེ་གཡས་སུ་འཁོར་བའོ། ། གསུམ་པ་ནི། གོང་དུ་སྨོས་ཟིན་པས་གོ་བར་ནུས་ལ་བསྐལ་པའི་ལོ་གྲངས་སོགས་འདིར་མ་སྤྲོས་སོ། ། བཞི་པ་ནི། རྒྱུད་ལས། སྟོང་པ་སྟོང་པ་ནམ་མཁའ་ཀླུ་དང་ལག་པ་ཐུབ་པ་རི་བོང་ཅན་རྣམས་རྫོགས་ལྡན་དུས་ཀྱི་ཚད། ། སུམ་ལྡན་ལ་ནི་ནམ་མཁའ་སྟོང་པ་རོ་དང་དགུ་དང་ཉིན་བྱེད་ལོ་ཡི་གྲངས་སུ་རབ་ཏུ་གྲགས། ། སྟོང་པ་མཁའ་དང་རིག་བྱེད་རོ་དང་ལག་འགྲོ་ཞེས་པ་ཉིས་ལྡན་ལོར་ནི་ཡང་དག་སྟེ། ། སྟོང་པ་ནམ་མཁའ་མཁའ་མིག་ཡོན་ཏན་ཆུ་གཏེར་རྣམས་ཀྱིས་ལོ་ཡི་གྲངས་ནི་རྩོད་པའི་དུས་ལ་འགྱུར། ། ལོ་ནི་འདི་དག་རྣམས་ཀྱི་དུས་ཀྱི་མཐའ་རུ་གཟའ་ཚོགས་རྒྱུ་བའི་ཁྱིམ་ནི་སྟོང་པ་དག་ལ་གནས། ། ཞེས་གཟའ་རྣམས་སྟོང་པར་འཇུག་པའི་དུས་བཞིའི་ཚད་ཀྱི་ངེས་པ་དང་འཇུག་ཚུལ་བསྟན་པ་སྟེ། དེའང་ཉི་མ་སོགས་རེས་གཟའ་བདུན་དང་སྒྲ་གཅན་བཅས་པས་རྒྱུ་སྐར་ཉེར་བདུན་རྫོགས་པར་འཁོར་བ་ལ་གཟའ་ཞག་ཆེན་པོ་གཅིག་ཅེས་བྱ་ལ། དེ་ལ་རགས་པར་ན་མི་ལོ་དྲུག་ཅུ་རྩ་བཞི་དང་ཟླ་བ་བདུན་ཡོད་ལ། དེའི་སྟེང་དུ་གཟའ་ཞག་ཕྱེད་བཞག་པས་ལོ་དགུ་བཅུ་རྩ་དྲུག་དང་ཟླ་བ་ཕྱེད་དང་བཅུ་གཅིག །དེ་ལ་དུས་ཀྱི་འཁོར་ལོས་དམན་པའི་ལོ་བརྒྱ་ཞེས་ཐ་སྙད་འདོགས་ཤིང་དུས་ཀྱི་འཁོར་ལོའི་ལོ་ནི་ལོ་བརྒྱ་པོ་དེའི་ཡེ་ཤེས་ཀྱི་ཆ་བསགས་པ་ལ་ལོ་གསུམ་དང་ཕྱོགས་གསུམ་སྟེ། དེའང་ལོ་བརྒྱ་པོའི་ཞག་སྟོང་ཕྲག་སོ་དྲུག་པོ་དེ་སོ་གཉིས་ཀྱི་ཆས་བགོས་པས་ཞག་སྟོང་དང་བརྒྱ་ཉེར་ལྔ་འབྱུང་ལ། དེ་ཟླ་བ་དང་(༣༥བ)ལོར་བསྒྲིལ་བས་ལོ་གསུམ་དང་ཕྱོགས་གསུམ་