Tibetan
ལ་སོགས་གཞུང་དུ་ཤེས། ། ཆོས་གང་ཞིག་ལ་རྐྱེན་གང་དང་དེའི་གྲངས་དུ་ལས་སྐྱེ་བ་དང༌། རྐྱེན་གང་གིས་དུས་གང་ལ་བྱ་བ་བྱེད་པའི་ཚུལ་དང༌། འབྱུང་བ་དང་འབྱུང་གྱུར་གྱི་རྐྱེན་བྱེད་པའི་ཚུལ་སོགས་ཞིབ་མོར་སྤྲོས་ན་མཐའ་ཡས་པས། རྟོགས་པར་འདོད་ན་མངོན་པ་མཛོད་ཀྱི་གཞུང་དུ་ཤེས་པར་བྱ་དགོས་ཤིང༌། འདིར་རྒྱུ་རྐྱེན་གྱི་རྣམ་གྲངས་དང་ངོ་བོ་ཙམ་ཞིག་མི་ཤེས་སུ་རུང་བས་སྨོས་པ་ཡིན་ནོ། ། ཏ༢ གཉིས་པ་མངོན་པ་གོང་མའི་ལུགས་ལྟར་བཤད་པ་ལ་གསུམ། ཐ༡ རྒྱུ། ཐ༢ རྐྱེན། ཐ༣ འབྲས་བུ་བཤད་པའོ། ། ཐ༡ དང་པོ་ནི། སྐྱེད་བྱེད་བྱེད་རྒྱུ་ཕན་འདོགས་ལྷན་ཅིག་འབྱུང༌། ། རྒྱས་པ་སྐལ་མཉམ་མཚུངས་རྒྱུ་བཞི་དང་ལྡན། ། ཉོན་མོངས་ཀུན་འགྲོ་རྣམ་སྨིན་ལུས་ཀྱི་རྒྱུ། ། བསྡུ་ན་བྱེད་པའི་རྒྱུར་འདུས་དེའི་དབྱེ་བ། ། ཉི་ཤུ་མངོན་པ་ཀུན་ལས་བཏུས་པར་བཤད། ། ཐེག་ཆེན་གྱི་ལུགས་སུ་རྒྱུ་རྐྱེན་འབྲས་བུ་དེ་དག་མིང་འདྲ་ཡང་བཞེད་ཚུལ་ཅུང་ཟད་མི་འདྲ་བས་ཟུར་དུ་བཤད་པར་བྱ་སྟེ། འབྲས་བུ་གང་སྐྱེད་པར་བྱེད་པའི་རྒྱུ་དེ་ནི། རྒྱུ་ཡིན་ངེས་པས་ན་བྱེད་པའི་རྒྱུའམ་ངོ་བོ་ཉིད་ཀྱི་རྒྱུ་ཞེས་བྱ། སྤུན་གཉིས་དང་པོར་མ་གཅིག་གིས་བསྐྱེད། བར་དུ་ཕན་ཚུན་མི་འབྲལ་བར་ཕན་འདོགས་པར་གནས་པ་ལྟ་བུ། དང་པོ་གཅིག་ལས་བྱུང་ཞིང་བར་དུའང་མི་(༤༤བ)འབྲལ་བར་ཕན་ཚུན་ཕན་འདོགས་པའི་ཚུལ་གྱིས་གནས་པ་ནི་ལྷན་ཅིག་འབྱུང་བའི་རྒྱུའམ་གྲོགས་ཀྱི་རྒྱུ་ཞེས་བྱ། འདི་ལ། ཕྱི་དང་། ནང་དང་། གཉིས་ཀའི་རྒྱུ་གསུམ་ལས། དང་པོ་ནི། འབྱུང་བ་བཞི་དང་འབྱུང་གྱུར་རྣམས་ཏེ། འབྱུང་བཞི་རྣམས་ཀྱི་རྡུལ་རེ་རེ་བཞིན་རྡུལ་རྫས་བརྒྱད་དང་ལྡན་པས། ས་རྡུལ་སྐད་ཅིག་མ་དང་པོ་འགག་བཞིན་པ་ལས་ཆུ་རྡུལ་སྐད་ཅིག་མ་གཉིས་པ་སྐྱེ་བཞིན་པས་དུས་མཉམ་པའང་ཡིན་ལ། སྔ་ཕྱིའི་རྒྱུ་འབྲས་ཅུང་ཟད་ཀྱང་ཡོད་པ་དེ་དག་སྐྱེད་བྱེད་རྒྱུ་གཅིག་ལས་བྱུང་ཞིང་ཚོགས་པ་གཅིག་ཏུ་གནས་པ་དང༌། འབྱུང་གྱུར་ནི་བུ་རམ་གྱི་རོ་དང་གཟུགས་ལྟ་བུའོ། ། གཉིས་པ་ནི། སེམས་དང་སེམས་ལས་བྱུང་བ་ཕན་ཚུན་རྒྱུ་འབྲས་སུ་གྱུར་པ་དང་དེ་དག་རྒྱུ་གཅིག་ལས་སྐྱེས་ཤིང་ལྷན་ཅིག་ཏུ་གནས་པའི་ཕྱིར། གསུམ་པ་ནི། མཚན་ཉིད་ལ་ལྟོས་ནས་མཚན་གཞི་རྣམ་པར་གཞག་པ་ལྟ་བུ་ཕན་ཚུན་རྒྱུ་འབྲས་སུ་གྱུར་པ་སྟེ། འདི་ནི་བཏགས་པའི་རྒྱུ་འབྲས་སོ། ། རྒྱས་པའི་རྒྱུའམ་སྐལ་མཉམ་གྱི་རྒྱུ་ནི། རྒྱུ་དགེ་བ་ལས་འབྲས་བུ་དགེ་བ། མི་དགེ་བ་ལས་མི་དགེ་བ། ལུང་མ་བསྟན་ལས་ལུང་མ་བསྟན་སྐྱེ་བ་ལྟ་བུ་རྒྱས་པའམ་འཕེལ་བའི་དོན་ཡིན་པས་མཐུན་པའི་རྒྱུ་ཞེས་ཀྱང་བྱ། དེའང་ས་མཚུངས་པ་དང་ངོ་བོ་མཚུངས་པ་དགོས་པ་ཡིན་ཏེ། དཔེར་ན། འདོད་ཁམས་ཀྱི་ཉོན་མོངས་པ་འདོད་ཆགས་ལས། ཁམས་གོང་མ་གཉིས་ཀྱི་ཉོན་མོངས་པ་བསྐྱེད་པ་ལྟ་བུ་མ་ཡིན་པར། དེ་ལས་འདོད་པའི་ཁམས་ཀྱི་ཉོན་མོངས་པ་བསྐྱེད་དགོས་པས་ན་ས་མཚུངས་པ་དང༌། ཉོན་མོངས་པ་ཡང་རིགས་མི་འདྲ་བ་མ་ཡིན་གྱི། རྒྱུ་འདོད་ཆགས་ལས་འབྲས་བུ་འདོད་ཆགས་བསྐྱེད་པ་ལྟ་བུ་རིགས་འདྲ་དགོས་པ་ཡིན་ནོ། ། མཐུན་པར་རྟོགས་པའི་རྒྱུའམ་མཚུངས་པའི་རྒྱུ་བཞིས་མཚུངས་པས་མཚུངས་ལྡན་གྱི་རྒྱུར་གྲགས་པ་ནི། གཙོ་བོ་སེམས་དང༌། འཁོར་སེམས་བྱུང་གཉིས་སྐྱེད་བྱེད་ཀྱི་རྒྱུ་མཚུངས་པ་དང༌། དམིགས་པའི་ཡུལ་མཚུངས་པ་དང༌། ཡུལ་(༤༥ན)དེ་རྒྱུད་མཚུངས་པ་དང༌། རྣམ་པ་འཛིན་སྟངས་གཅིག་པའམ་མཚུངས་པར་གྱུར་པ་སྟེ། དཔེར་ན། མིག་གི་རྣམ་པར་ཤེས་པ་ཉེར་ལེན་གྱི་རྒྱུ་ཀུན་གཞིའི་བག་ཆགས་སད་པའི་མཐུ་ལས་བྱུང་བའམ། རྣམ་ཤེས་རིགས་འདྲ་སྐད་ཅིག་མ་དང་པོ་ལས་བྱུང་བ་བཞིན་དུ། དེའི་འཁོར་དུ་གྱུར་པའི་སེམས་བྱུང་ཚོར་བ་ལྟ་བུ་ཞིག་ཀྱང་རྒྱུ་དེ་ལས་བྱུང་བ་དང༌། མིག་གི་རྣམ་ཤེས་དམིགས་རྐྱེན་གཟུགས་ལ་དམིགས་པ་ལྟར། སེམས་བྱུང་ཚོར་བ་ཡང་དེ་ལ་དམིགས་པ་དང༌། མིག་གི་རྣམ་ཤེས་སྤྱོད་ཡུལ་གང་ཟག་དེའི་རྒྱུད་ཀྱིས་བསྡུས་པ་ལྟར། སེམས་བྱུང་ཚོར་བ་ཡང་དེས་བསྡུས་པ་དང༌། མིག་གི་རྣམ་ཤེས་གཟུགས་ཀྱི་རྣམ་པར་ཡང་འཛིན་པའི་འཛིན་སྟངས་ཅན་ཡིན་པ་བཞིན་དུ་སེམས་བྱུང་ཚོར་བ་ཡང་གཟུགས་འཛིན་པའི་འཛིན་སྟངས་ཅན་ཡིན་པས་ན། སེམས་དང་སེམས་ལས་བྱུང་བ་གཉིས་མཚུངས་པ་རྣམ་པ་བཞིས་སྒོ་ནས་མཚུངས་པ་ཡིན་ནོ། ། ཉོན་མོངས་པ་ལས་ཉོན་མོངས་པ་སྐྱེད་པར་བྱེད་པ་ནི། ཀུན་འགྲོའི་རྒྱུ་སྟེ། ཁམས་གསུམ་པོ་ཐམས་ཅད་དུ་འགྲོ་བའི་དོན་ཡིན་ལ། གང་ཟག་དེ་རྣམ་པར་གྲོལ་བ་ཐོབ་པ་ལ་གེགས་བྱེད་པས་བར་གཅོད་རྒྱུ་ཞེས་ཀྱང་བྱ། དེའང་རྒྱུ་ཞེ་སྡང་ལས་འབྲས་བུ་འདོད་ཆགས་དང༌། ཞེ་སྡང་ལས་ང་རྒྱལ་སྐྱེ་བ་ལྟ་བུ་དང༌། འདོད་ཁམས་ཀྱི་ཉོན་མོངས་ཀྱི་འབྲས་བུ་ཁམས་གོང་མ་གཉིས་ཀྱི་ཉོན་མོངས་ཀྱི་རྟེན་བྱེད་པ་ལྟ་བུ་ཡོད་པས་རིགས་དང་ས་ལ་སོགས་པ་ནི་མ་ངེས་པའོ། ། རྣམ་སྨིན་ནི། ལུས་ཡིན་ལ། དེ་སྐྱེད་བྱེད་ཀྱི་རྒྱུ་ལ་རྣམ་སྨིན་གྱི་རྒྱུ་དང༌། ལུས་དེ་ཡོངས་སུ་འཛིན་པར་བྱེད་པས་ཡོངས་འཛིན་གྱི་རྒྱུ་ཞེས་ཀྱང་བཤད་དེ། རྒྱུ་དགེ་བ་ཟག་བཅས་དང་མི་དགེ་བ་ལས་འབྲས་བུ་ལུང་མ་བསྟན་སྐྱེ་བའོ། །དེ་ཡང་དཔེར་ན། རྣམ་སྨིན་གྱི་རྒྱུ་མི་དགེ་བ་ལས་དེའི་འབྲས་བུ་དམྱལ་བའི་ཕུང་པོ་གྲུབ་པ་ལྟ་བུ་སྟེ། དམྱལ་བའི་སྡུག་བསྔལ་སྣ་ཚོགས་མྱོང་བ་ནི་མི་དགེ་བས་འཕངས་ཀྱང༌། (༤༥བ)དེའི་ལུས་རྟེན་ཕུང་པོ་ཙམ་ནི་མཐའ་གཅིག་ཏུ་ལུང་མ་བསྟན་ཁོ་ན་ཡིན་ལ། དེ་བཞིན་དུ། རྒྱུ་དགེ་བ་ཟག་བཅས་ཀྱིས་ལྷར་འཕངས་ཀྱང་ལྷའི་རྣམ་སྨིན་གྱི་ཕུང་པོ་དགེ་བ་མ་ཡིན་ཏེ་ལུང་མ་བསྟན་ཁོ་ནའོ། ། སྤྱིར་རྒྱུ་ཐམས་ཅད་བསྡུ་ན། བྱེད་པའི་རྒྱུ་ཁོ་ནར་འདུས་པ་ཡིན་ལ། འབྲས་བུ་ལ་བྱེད་པར་བཅས་པ་ནི་བྱེད་རྒྱུ་ཡིན་པའི་ཕྱིར། བྱེད་རྒྱུ་ནུས་མེད་ནི་སྐབས་འདིར་མི་བཞེད་དོ། ། དེའང་འབྲས་བུ་སྔར་མེད་འབྱུང་བར་བྱེད་པའི་རྒྱུ་དང༌། ཟས་ཟོས་པས་ལུས་འཚོ་བར་བྱེད་པ་དང༌། ཆུ་སྣོད་ཀྱིས་རྟེན་པ་ལྟ་བུ་རྟེན་པའི་བྱེད་རྒྱུ་དང༌། སྔར་ཡོད་པའི་རིགས་ཀུན་གནས་པར་བྱེད་པ་དང༌། ན་ཚོད་གཞོན་ནུ་ལས་དར་བབས་སུ་འགྱུར་བར་བྱེད་པ་ལྟ་བུ་དང༌། སྔར་ལྡན་པ་འབྲལ་བར་བྱེད་པ་དང༌། གསེར་ལས་ལྷ་དང༌། མིའི་གཟུགས་བརྙན་བཟོ་བར་བྱེད་པ་དང༌། སྐྱེ་འགག་གནས་གསུམ་ཅན་ཡིན་པའི་གཏན་ཚིགས་ཅན་གྱིས་འདུས་བྱས་སུ་སྒྲུབ་པར་བྱེད་པ་དང༌། ལམ་སྒོམ་པས་འབྲས་བུ་ཐོབ་པར་བྱེད་པ་དང༌། ཡུལ་དུས་གཞན་དུ་འཕེན་པར་བྱེད་པ་དང༌། འཕྲལ་དུ་སྟོན་པར་འགྲུབ་པར་བྱེད་པ་དང༌། བར་དུ་གཅོད་པར་བྱེད་པ་དང༌། དངོས་པོ་གང་ཞིག་རྒས་ཤིང་རྙིང་བར་བྱེད་པ་དང༌། སྔར་ཡོད་པ་འཇུག་པར་བྱེད་པ་དང༌། དུ་བ་ཡོད་པའི་རྟགས་ཀྱིས་མེ་ཡོད་པ་ངེས་པར་བྱེད་པ་དང༌། དུ་བ་མེད་པའི་རྟགས་ཀྱིས་མེ་ཡོད་པ་མ་ངེས་པར་བྱེད་པ་ལ་སོགས་པ་སྟེ། དེའི་རྣམ་པར་དབྱེ་བ་ཉི་ཤུ་མངོན་པ་ཀུན་ལས་བཏུས་པར་བཤད་དོ། ། ཐ༢ གཉིས་པ་[རྐྱེན་བཤད་པ་]ནི། རྒྱུ་ལྔ་ཀུན་གཞིའི་རྣམ་ཤེས་རྒྱུ་ཡི་རྐྱེན། ། མཐོང་ཡུལ་དམིགས་རྐྱེན་རྟེན་ནི་བདག་པོའི་རྐྱེན། ། དེ་མ་ཐག་རྐྱེན་འདོད་ཚུལ་གསུམ་པ་སྟེ། ། རྐྱེན་བཞི་ཚང་བས་ཤེས་པས་ཤེས་པ་སྐྱེད། ། གཉིས་སམ་གསུམ་གྱི་ཤེས་པས་བེམ་པོ་སྐྱེད། ། གོང་དུ་བཤད་པའི་ལྷན་འབྱུང༌། སྐལ་མཉམ། མཚུངས་ལྡན། ཀུན་འགྲོ། རྣམ་སྨིན་ཏེ། རྒྱུ་ལྔ་པོ་སྐབས་འདིར་རྒྱུའི་རྐྱེན་གྱི་རྣམ་གྲངས་སུ་(༤༦ན)བཞེད་དེ། རྒྱུ་ལྔ་པོ་མཐའ་དག་རྒྱུའི་རྐྱེན་དུ་འགྱུར་བར་མ་ངེས་ཀྱང་། དེ་རྣམས་ཀྱི་ནང་ནས་རྒྱུའི་རྐྱེན་བྱེད་པའང་ཡོད་པས་དེར་བཞག་པ་དང༌། ཐེག་ཆེན་གྱི་སྐབས་འདིར་ཀུན་གཞིའི་རྣམ་པར་ཤེས་པ་ཉིད་ཕྱི་ནང་གི་དངོས་པོ་ཀུན་ཉེ་བར་ལེན་པའི་རྒྱུའི་རྐྱེན་གྱི་གཙོ་བོར་འཆད་དེ། དེའང་ཀུན་གཞིའི་རྣམ་སྨིན་གྱི་ཆ་ལ་ངོས་འཛིན་ནོ། ། རྒྱུའི་རྐྱེན་གཞན་ལྔ་ནི། དོན་ལ་ལྷན་ཅིག་བྱེད་པའི་རྐྱེན་ཡིན་ནོ། ། མཐོང་བ་དང་དམིགས་པའི་ཡུལ་ནི་དམིགས་པའི་རྐྱེན་ཡིན་ཏེ། དབང་ཤེས་རྟོག་མེད་ལྔ་པོས་རང་རང་གི་དམིགས་རྐྱེན་གཟུགས་ཀྱི་རྣམ་པ་སོགས་དངོས་སུ་མཐོང་བས་ན། དེ་ཤེས་པ་དེའི་མཐོང་ཡུལ་དུ་འཇོག་པ་ཡིན་ལ། ཤེས་པ་རྟོག་བཅས་རྣམས་ཀྱིས་ནི། དམིགས་པའི་རྟེན་དེ་ལ་གསལ་སྣང་གི་ཚུལ་ལམ། འཛིན་སྟངས་ཀྱི་གཟུང་ཆར་བྱས་པ་ཙམ་གྱིས་ཡིན་ནོ། ། དཔེར་ན། སྣོད་ཀྱི་ནང་གི་ཆུ་མི་བོ་ཞིང་གནས་པར་བྱེད་པའི་སྣོད་ནི་རྟེན་ཡིན་པ་བཞིན་དུ་དངོས་པོ་ཐམས་ཅད་ཀྱི་རྟེན་བྱེད་པ་ནི་བདག་པོའི་རྐྱེན་ཡིན་ཏེ་ཐུན་མོང་གི་བདག་རྐྱེན་ཀུན་གཞིའི་རྣམ་པར་ཤེས་པ་དང༌། ཐུན་མོང་མ་ཡིན་པའི་བདག་རྐྱེན་དབང་ཤེས་ལྔའི་རྟེན་དབང་པོ་ལྔ་དང༌། ཕྱི་དོན་དུ་སྣང་བ་རྣམས་ལའང་དངོས་པོ་རང་རང་གི་རྟེན་དང་གནས་དང་གཞིར་གྱུར་པ་རྣམས་སོ། ། མངོན་པ་ཀུན་བཏུས་སུ་འདི་ལ་རྣམ་པ་དགུར་གསུངས་པ་ཡིན་ཏེ། རྟེན་དང་འཕེན་པ་ལྷན་འབྱུང་ཡུལ། ། སྐྱེ་གནས་འབྲས་བུ་ཉེ་བར་སྤྱོད། ། འཇིག་རྟེན་པ་དང་འདས་པ་ཡི། ། རྣམ་པར་དག་པར་དབང་བྱེད་པའོ། ། ཞེས་སོ། ། དམིགས་རྐྱེན་དང་བདག་པོའི་རྐྱེན་གཉིས་ཀྱང་བྱེད་རྒྱུའི་ནང་དུ་འདུས་པ་ཡིན་ནོ། ། དེ་མ་ཐག་པའི་རྐྱེན་ལ་འདོད་ཚུལ་གསུམ་ཡོད་པ་སྟེ། དང་པོ་ཆོས་མངོན་པ་བ་རྣམས་ནི། དངོས་པོ་རང་དང་མཚུངས་པ། རྒྱུ་གཅིག་པ། འདས་མ་ཐག་པ་སྟེ། མཚན་ཉིད་གསུམ་དང་ལྡན་པར་འདོད་དང༌། (༤༦བ) ཡང༌། དངོས་པོ་གང་སྐྱེ་བའི་གེགས་མི་བྱེད་པར་གོ་འབྱེད་ཅིང་འབྲས་བུ་ལ་ཕན་འདོགས་པར་བྱེད་པའི་ལས་ཅན་དུ་འདོད་པ་དང༌། ཡང་། ཤེས་པ་ཡུལ་ལ་ཕྱོགས་པར་བྱེད་པ་ཙམ་ཞིག་ལ་འདོད་པ་གསུམ་ལས། ལུགས་འདིར་ཕྱི་མ་ཉིད་བཟུང་བར་བྱའོ། ། དེ་ལྟར་རྐྱེན་བཞི་ཚང་བས་མིག་ཤེས་སྔ་མས་མིག་ཤེས་ཕྱི་མ་བསྐྱེད་པ་ལྟ་བུ་ཤེས་པས་ཤེས་པ་སྐྱེད་པར་བྱེད་ཅིང༌། རྐྱེན་གཉིས་སམ་གསུམ་ཚང་བས་ཤེས་པས་བེམ་སྣང་དང་བེམ་པོས་བེམ་པོ་སྐྱེད་པར་བཞེད་དེ། དེའང་ཤེས་པས་བེམ་སྣང་སྐྱེད་པ་ལ། རྐྱེན་གཉིས་ཚང་བའི་ཚུལ་གྱིས་བསྐྱེད་པ་ཡིན་ཏེ། རྒྱུའི་རྐྱེན་ནི་ཀུན་གཞིའི་བག་ཆགས་དང་ལྷན་ཅིག་འབྱུང་བའི་རྐྱེན། དཔེར་ན། འདུ་བྱེད་ཀྱིས་མ་འོངས་པའི་སྐྱེ་བ་འཕངས་པ་ལྟ་བུའོ། ། བེམ་པོས་བེམ་པོ་བསྐྱེད་པ་ལ་རྐྱེན་གཉིས་ཚང་ཞིང༌། དེ་མ་ཐག་རྐྱེན་རིགས་འདྲ་སྔ་མར་འདོད་པ་རྣམས་ལ་ནི་དེ་ཡང་ཚང་བས་རྐྱེན་གསུམ་ལས་སྐྱེ་བ་ཡིན་ནོ། ། ཐ༣ གསུམ་པ་[འབྲས་བུ་བཤད་པ་]ནི། རྒྱུ་མེད་འགོག་པ་བྲལ་བའི་འབྲས་བུ་སྟེ། ། ཕྱི་རོལ་ཡུལ་གྱིས་བསྡུས་པ་བདག་པོའི་འབྲས། ། སེམས་ཅན་རྒྱུད་ཀྱིས་བསྡུས་པ་རྣམ་སྨིན་འབྲས། ། བྱེད་རྒྱུའི་བྱེད་འབྲས་སྐལ་མཉམ་རྒྱུ་མཐུན་ནོ། ། སྐྱེད་བྱེད་ཀྱི་རྒྱུ་མེད་པའི་འགོག་པ་ནི། བྲལ་བའི་འབྲས་བུ་ཞེས་བྱ་སྟེ། དེའང་སོ་སོར་བརྟགས་པའི་འགོག་པ་ནི། བྲལ་འབྲས་དངོས་ཡིན་ལ། དེའང་ཀུན་རྫོབ་ཀྱི་ཆོས་ཡིན་པས་སོ། ། གནས་ལུགས་དོན་དམ་པའི་འགོག་བདེན་ནི་བྲལ་བའི་དངོས་པོ་ཡིན་ལ། འབྲས་བུ་བཏགས་པ་བ་ཡིན་ཏེ། དོན་དམ་དབྱིངས་དེ་ཉིད་ལ་འབྲས་བུ་བཏགས་པ་བར་འཇོག་པའི་ཤེས་བྱེད་ཀྱང༌། དབྱིངས་དེ་ནི་ངོ་བོ་ཉིད་ཀྱི་སྐུ་དང་རྣམ་དབྱེར་མེད་པའི་ཕྱིར། ངོ་བོ་ཉིད་སྐུ་ལ་འབྲས་བུའི་ཐ་སྙད་འཇུག་པའི་དབང་དུ་མཛད་པའོ། །འབྲས་བུ་དངོས་མ་ཡིན་ཏེ། འདུས་མ་བྱས་ལ་རྒྱུ་འབྲས་དངོས་ཀྱི་རྣམ་གཞག་མི་འཐད་པས་སོ། ། ཕྱི་རོལ་ཡུལ་གྱིས་བསྡུས་པ་ནི། བདག་པོའི་འབྲས་བུ་ཡིན་ཏེ། རེ་ཞིག་མ་དཔྱད་(༤༧ན)པའི་དབང་དུ་བྱས་ཏེ། ཕྱི་དོན་ཁས་ལེན་པའི་གནས་སྐབས་སུ་ནི་སྣོད་ཀྱི་འཇིག་རྟེན་དང་ཉེར་སྤྱོད་ཕྱི་རོལ་གྱི་གཟུགས་སྒྲ་དྲི་རོ་རེག་བྱ་ལ་སོགས་པ་རྣམས་བདག་འབྲས་ཡིན་ཞིང་ཅུང་ཟད་དཔྱད་པའི་དབང་དུ་བྱས་ཏེ། ཕྱི་རོལ་གྱི་དོན་ཁས་མི་ལེན་ཡང་གནས་སུ་སྣང་བའི་རྣམ་རིག་དང༌། དོན་དུ་སྣང་བའི་རྣམ་རིག་ལ་སོགས་པ་རྣམས་བདག་པོའི་འབྲས་བུར་འཇོག་གོ། ། སེམས་ཅན་གྱི་རྒྱུད་ཀྱིས་བསྡུས་པ་ནི། རྣམ་སྨིན་གྱི་འབྲས་བུ་ཡིན་ཏེ། ལུས་ཀྱི་ཆོས་སུ་གཏོགས་པ་རང་ཉིད་ཀྱི་ཉེར་ལེན་གྱི་ཕུང་པོ་ལྔ་དང༌། དེར་སྣང་བའི་རྣམ་རིག་ལ་སོགས་པ་རྣམས་སོ། ། བྱེད་འབྲས་ནི། རྒྱུ་བྱེད་རྒྱུའི་སྒོ་ནས་བྱུང་བ་གང་ཡིན་པ་ཐམས་ཅད་དོ། ། སྐལ་མཉམ་གྱི་རྒྱུ་ལས་བྱུང་བ་རྣམས་ནི་རྒྱུ་མཐུན་གྱི་འབྲས་བུའོ། ། དེ་རྣམས་ཀྱང་གཙོ་ཆེ་བའི་དབང་དུ་བྱས་ནས་བཤད་པ་ཡིན་གྱི། མཐའ་གཅིག་ཏུ་ངེས་པ་ནི་མ་ཡིན་ནོ། ། སྤྱིར་དངོས་པོ་རྣམས་སྐྱེད་པར་བྱེད་པའི་རྒྱུ་ཐམས་ཅད་ནི། ངེས་པར་གཉིས་སུ་འདུ་བ་ཡིན་ཏེ། ཀུན་ནས་ཉོན་མོངས་ཀྱི་རྒྱུ་ཀུན་གཞིའི་རྣམ་པར་ཤེས་པ་འཁོར་བའི་བག་ཆགས་ཀུན་ལྡན་དང༌། རྣམ་པར་བྱང་བའི་རྒྱུ་ཟག་པ་མེད་པའི་ས་བོན་གཉིས་སུ་འདུ་བའི་ཕྱིར། དེའང་དང་པོ་ཀུན་ནས་ཉོན་མོངས་པའི་རྒྱུ་ཀུན་གཞིའི་རྣམ་པར་ཤེས་པ་འཁོར་བའི་ས་བོན་བག་ཆགས་རྣམ་པ་ཐམས་ཅད་པ་དེས། ཁམས་གསུམ་འཁོར་བའི་ཀུན་ནས་ཉོན་མོངས་པ་ཐམས་ཅད་ཀྱི་རྒྱུ་བྱེད་པ་ཡིན་ལ། གཉིས་པ་ཟག་པ་མེད་པའི་ས་བོན་ནི་ཀུན་གཞིའི་རྣམ་ཤེས་ཀྱི་སྟེང་དུ་བཞག་པ་ཡིན་ཅིང༌། འདི་ལ་ཡང་མངོན་པ་ཀུན་བཏུས་སུ། ཐོས་པ་ལས་བྱུང་བའི་ས་བོན་ནོ་ཞེས་བཤད་ལ། དེའི་ངོ་བོ་ནི། སྦྱིན་པ་དང་ཚུལ་ཁྲིམས་སོགས་དགེ་བའི་ལས་ལམ་དཀྱུས་མའི་བག་ཆགས་བཞག་པ་ཙམ་མ་ཡིན་གྱི། སངས་རྒྱས་ཀྱི་སྐུ་གསུང་ཐུགས་ཀྱི་ཡོན་ཏན་མཐོང་བའི་བག་ཆགས་ཀུན་གཞི་ལ་བཞག་པ་ཉིད་ཡིན་པས། འདིར་ཡང་གཙོ་བོར་ནི་སངས་རྒྱས་ཀྱི་ཐུགས་(༤༧བ)ཆོས་ཀྱི་སྐུའི་རྒྱུ་མཐུན་པ་ལེགས་པར་གསུངས་པའི་གསུང་རབ་ཉིད་ཡིན་པའི་ཕྱིར་དེ་ཐོས་ཤིང༌དེ་ལ་བརྟེན་ནས་སངས་རྒྱས་ཀྱི་སྐུ་གསུང་ཐུགས་ཀྱི་གསང་བ་ཟབ་མོའི་རྣམ་པ་གོ་ཞིང་ཤེས་པར་གྱུར་བའི་ས་བོན་ཀུན་གཞི་ལ་གཞག་པ་དེ། ཕྱིས་གང་ཟག་དེ་རྣམ་གྲོལ་ཐོབ་པར་འགྱུར་བའི་རྒྱུར་གྱུར་པས་ན། ཟག་པ་མེད་པའི་ས་བོན་ཅེས་བྱ་སྟེ་ཟག་མེད་ཀྱི་ས་བོན་འདི་སེམས་ཅན་ཐམས་ཅད་ལ་ཡོད་པ་ནི་མ་ངེས་སོ། ། ཡང་ན། སྐྱེས་ཐོབ་ཀྱི་རྒྱུ་དང༌། སྦྱོར་བྱུང་གི་རྒྱུ་ཞེས་གཉིས་སུ་འདུ་བ་ཡིན་ཏེ། དང་པོ་ནི། ཀུན་གཞིའི་རྣམ་སྨིན་གྱི་ཆ་རྣམས་དང༌། གཉིས་པ་ནི། ས་བོན་གྱི་ཆ་སྟེ། དེ་ཡང་དཔེར་ན། སྐྱེ་བ་སྔ་མར་ཐོས་པ་བྱས་པའི་ས་བོན་རྣམ་པར་སྨིན་པའི་མཐུ་ལས། ཚེ་འདིར་རང་སྟོབས་ཀྱི་ཤེས་རབ་ཕུན་སུམ་ཚོགས་པ་ལ་ནི་སྐྱེས་ཐོབ་ཀྱི་ཤེས་རབ་དང༌། ཚེ་འདིར་ཐོས་པ་མང་དུ་བྱས་ཏེ་དེའི་ས་བོན་ཡོངས་སུ་གཞག་ཅིང་གོམས་པ་ལས་ཤེས་རབ་ཕུན་སུམ་ཚོགས་པ་སྐྱེས་པ་ལ། སྦྱོར་བྱུང་གི་ཤེས་རབ་ཅེས་འཇོག་པ་བཞིན་ཏེ་དེ་དག་ནི་ཞར་ལས་འཕྲོས་པའོ། ། ཉ༢ གཉིས་པ་ཐུན་མོང་མ་ཡིན་པའི་ལུགས་བཤད་པ་ལའང་གཉིས། ཏ༡ ངེས་དོན་སྤྱི་དང༌། ཏ༢ བྱེ་བྲག་འོད་གསལ་རྫོགས་པ་ཆེན་པོའི་ལུགས་སོ། ། ཏ༡ དང་པོ་ལ་བཞི། ཐ༡ རྟེན་འབྲེལ་བཅུ་གཉིས་ཀྱིས་འཁྲུལ་ཚུལ། ཐ༢ དེ་ཉིད་རྣམ་ཤེས་ཚོགས་བརྒྱད་དང་སྦྱར་བ། ཐ༣ བག་ཆགས་གསུམ་གྱིས་འཁོར་ཚུལ། ཐ༤ ཞར་བྱུང་[འཁོར་བ་ལྡོག་ཚུལ་]དང་བཅས་པའོ།། ཐ༡ དང་པོ་ལ་གཉིས། ད༡ སྤྱིར་བསྟན་པ་དང༌། ད༢ བྱེ་བྲག་ཕྱེ་ནས་བཤད་པའོ། ། ད༡ དང་པོ་ནི། དོན་དམ་འཁོར་བ་ལས་བཅས་མ་གྲུབ་ཀྱང༌། ། ཀུན་རྫོབ་རྒྱུ་རྐྱེན་རྟེན་ཅིང་འབྲེལ་བར་འབྱུང༌། ། ཡན་ལག་བཅུ་གཉིས་འཁོར་ལོ་བར་མེད་བསྐོར། ། དེ་ལ་ཐེག་པ་ཐུན་མོང་བ་རྣམས་ཀྱིས་བཞེད་པའི་འདུས་བྱས་ཀྱི་ཆོས་འགྲུབ་བྱེད་རྒྱུ་རྐྱེན་རགས་པ་ཙམ་བསྟན་ཟིན་ནས། ད་ནི་ཐུན་མོང་མ་ཡིན་པ་ངེས་དོན་གྱི་ཚུལ་ལས་བརྩམས་ཏེ་འཆད་པར་བྱ་བ་ནི། འཕགས་ཞབས་ཀྱིས་བྱང་ཆུབ་སེམས་འགྲེལ་ལས། (༤༨ན) ཇི་ལྟར་བུ་རམ་མངར་བ་དང༌། ། མེ་ཡི་རང་བཞིན་ཚ་བ་སྟེ། ། དེ་བཞིན་ཆོས་རྣམས་ཐམས་ཅད་ཀྱི། ། རང་བཞིན་སྟོང་པ་ཉིད་དུ་འདོད། ། ཞེས་གསུངས་པ་ལྟར། གནས་ལུགས་དོན་དམ་པར་འཁོར་བ་དང་ལས་དང་ལས་ཀྱི་འབྲས་བུ་དང་བཅས་པ་བདེན་པར་མ་གྲུབ་པ་སྟོང་པ་ཉིད་ཁོ་ན་ཡིན་ཀྱང༌། སྣང་ཚུལ་ཀུན་རྫོབ་ཙམ་དུ་རྒྱུ་རྐྱེན་ཚོགས་པ་ལས་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ཀྱི་འཁོར་ལོ་བར་མེད་དུ་བསྐོར་ནས་སྲིད་པའི་ལམ་དུ་ཡང་ནས་ཡང་དུ་འཁོར་བ་སྟེ། འཕགས་ཞབས་ཀྱིས། མ་རིག་ནས་བཟུང་རྒ་ཤིའི་བར། ། རྟེན་འབྲེལ་ཡན་ལག་བཅུ་གཉིས་ཀྱི། ། བརྟེན་ནས་འབྱུང་བའི་བྱ་བ་ནི། ། ཁོ་བོས་རྨི་ལམ་སྒྱུ་འདྲར་འདོད། ། ཡན་ལག་བཅུ་གཉིས་འཁོར་ལོ་འདི། ། སྲིད་པའི་ལམ་དུ་འཁོར་བ་སྟེ། ། ཞེས་གསུངས་སོ། ། ད༢ གཉིས་པ་[བྱེ་བྲག་ཕྱེ་ནས་བཤད་པ་]ནི། འཁོར་བའི་རྩ་བ་བདག་ཏུ་ཞེན་པ་སྟེ། ། ཉོན་མོངས་པ་ལས་ལས་དང་སྡུག་བསྔལ་འབྱུང༌། ། དེ་ལས་དེ་འབྱུང་གཉིད་ལ་སོགས་བཞིན་སྣང༌། ། དེའང་རྣམ་འགྲེལ་ལས། བདག་ཡོད་ན་ནི་གཞན་དུ་ཤེས། ། བདག་གཞན་ཆ་ལས་འཛིན་དང་སྡང༌། ། འདི་དག་དང་ཡོངས་འབྲེལ་བ་ལས། ། ཉེས་པ་ཐམས་ཅད་འབྱུང་བར་འགྱུར། ། ཞེས་འབྱུང་བ་ལྟར། འཁོར་བ་དང་དེར་འཁོར་བར་འགྱུར་བའི་རྩ་བ་ནི་ང་དང་ང་ཡིར་འཛིན་པའི་བདག་འཛིན་ལྷན་སྐྱེས་ཀྱི་ཞེན་ཡུལ་ངའོ་སྙམ་པ་འདི་ཉིད་ཡིན་ཏེ། དེ་ལ་བརྟེན་ནས་ལྟ་བ་ཉོན་མོངས་ཅན་དང་ཆགས་སོགས་ཉོན་མོངས་པ་ཐམས་ཅད་འབྱུང་ཞིང༌། དེ་ལས་རྣམ་པར་སྨིན་པའི་ལས་འདུ་བྱེད། དེ་ལས་སྲིད་པའི་སྡུག་བསྔལ་ཐམས་ཅད་འབྱུང་ཞིང༌། དེ་ལས་ཀྱང་ལས་དང་ཉོན་མོངས་པ་འདུ་བྱེད་པས་སྡུག་བསྔལ་གྱི་འཁོར་ལོ་དེ་ཉིད་ཡང་དང་ཡང་དུ་འབྱུང་སྟེ། དཔེར་ན། གཉིད་ཀྱིས་བསླད་པའི་རྨི་ལམ་མམ་རབ་རིབ་ཅན་ངོར་སྐྲ་ཤད་ལ་སོགས་པ་བཞིན་མེད་བཞིན་དུ་སྣང་བ་བདེན་བདེན་འདྲ་བ་འདི་(༤༨བ)ནི་བརྟགས་ན་སྟོང་པ་ཉིད་ཀྱི་ཆོ་འཕྲུལ་ཁོ་ན་ཡིན་ཏེ། འཕགས་ཞབས་ཀྱིས། མདོར་ན་སྟོང་པའི་ཆོས་ལས་ནི། ། སྟོང་པའི་