Tibetan
ཆོས་རྣམས་འབྱུང་བ་ཡིན། ། བྱེད་པོ་ལས་དང་འབྲས་མྱོང་བ། ། ཀུན་རྫོབ་ཏུ་ནི་རྒྱལ་བས་བསྟན། ། ཅེས་དང༌། ཀུན་རྫོབ་ཉོན་མོངས་ལས་ཀྱིས་བསྐྱེད། ། ལས་ནི་སེམས་ལས་བྱུང་བ་ཡིན། ། སེམས་ནི་བག་ཆགས་དག་གིས་བསགས། ། བག་ཆགས་བྲལ་བ་བདེ་བ་སྟེ། ། བདེ་བའི་སེམས་ནི་ཞི་བ་ཉིད། ། སེམས་ཞི་བས་ནི་རྨོངས་མི་འགྱུར། ། མ་རྨོངས་པས་ནི་དེ་ཉིད་རིག ། དེ་ཉིད་རིག་པའང་ཐར་པ་ཐོབ། ། ཅེས་གསུངས་སོ། ། སྤྱིར་འཁོར་ལོ་དང་པོ་ལས་འཁོར་བའི་རྩ་བ་བདག་ཏུ་འཛིན་པ་དང་སྡུག་ཀུན་གྱི་རྒྱུ་སྲེད་པར་ཡང་གསུངས་ཤིང༌། བར་པར་གཟུང་འཛིན་ལ་མངོན་པར་ཞེན་པའི་མཚན་འཛིན་གྱི་སྤྲོས་པ་དང༌། ཐ་མར་ཀུན་གཞི་ཉིད་འཁོར་བའི་རྩ་བར་གསུངས་ལ། སྔགས་བླ་མེད་ཕ་རྒྱུད་ལས། སྟོང་བཞི་འབྱུང་བཞི་ཚོགས་པ་འགྲོ་བ་སྐྱེད་པའི་རྩ་བ་དང༌། མ་རྒྱུད་དུ་འཇིག་རྟེན་པའི་ལྷན་སྐྱེས་སམ་མི་ཤིགས་པའི་ཐིག་ལེ་ལས་འཁོར་བ་འབྱུང་བར་བཞེད་ཅིང་། དེ་དག་གི་དོན་ཞིབ་པར་རིམ་གྱིས་འཆད་པར་འགྱུར་རོ། ། ཐ༢ གཉིས་པ་རྣམ་ཤེས་ཚོགས་བརྒྱད་དང་སྦྱར་བ་ནི། སྟོང་གསལ་མ་འགག་སེམས་ཉིད་ཐོག་མེད་ནི། ། རང་གིས་རང་ངོ་མ་རིག་འདུ་བྱེད་ཡིད། ། གཡོས་པས་གཟུང་འཛིན་གཉིས་སྣང་རྣམ་པར་ཤེས། ། བླང་དོར་ཚོར་བ་མཚན་འཛིན་འདུ་ཤེས་ཏེ། ། སེམས་བྱུང་འདུ་བྱེད་ཞེན་པས་གཟུགས་ཕུང་གྲུབ། ། སྲེད་ལེན་མཚམས་སྦྱར་སྲིད་པའི་འཁོར་ལོར་འཁོར། ། འདི་ལ་སྤྲོས་ན་ཤིན་ཏུ་རྒྱ་ཆེ་བས་རྟོགས་པར་འདོད་ན་ཟབ་མོ་ནང་དོན་གྱི་འགྲེལ་པ་ཟབ་དོན་སྣང་བྱེད་དང༌། སྙིང་པོ་བསྟན་པའི་འགྲེལ་པ་རང་བྱུང་དགོངས་གསལ་སོགས་སུ་གསལ་བར་བཤད་ཡོད་པ་ལས་ཤེས་པར་བྱ་ཞིང་། འདིར་ཚིག་དོན་ཙམ་ནི། ཆོས་མངོན་པའི་མདོ་ལས། (༤༩ན) ཐོག་མ་མེད་དུས་ཅན་གྱི་དབྱིངས། ། ཆོས་རྣམས་ཀུན་གྱི་གནས་ཡིན་ཏེ། ། འདི་ཡོད་པས་ནི་འཁོར་བ་དང༌། ། མྱ་ངན་འདས་པའང་ཐོབ་པ་ཡིན། ། ཅེས་འབྱུང་བ་ལྟར། ངོ་བོ་སྤྲོས་པ་དང་བྲལ་བས་སྟོང་པ། རང་བཞིན་མ་བསྒྲིབས་པར་གསལ་བ། རྣམ་པ་གང་དུའང་འགག་པ་མེད་པར་འཆར་བ། རང་བཞིན་གྱིས་དག་པའི་སེམས་ཉིད་ཐོག་མ་མེད་པའི་དུས་ཅན་ཆོས་ཀྱི་དབྱིངས་དེ་བཞིན་ཉིད་རང་གི་ངོ་བོ་ཅིར་ཡང་མ་གྲུབ་པའི་གཤིས་སྐྱེ་མེད་ལ་བདག་དང༌། གདངས་འགག་པ་མེད་པ་ལ་གཞན་དུ་རྟོག་པས། ཡུལ་ཡུལ་ཅན་ལྟར་སྣང་བའི་འགག་པ་མེད་པའི་རྩལ་གྱིས་ངོ་བོ་མ་རིག་པ་སྟེ། སེམས་ཡུལ་ལ་འདུ་བྱེད་པའི་ཡིད་ཀྱིས་ཀུན་གཞི་ཆུ་དང་རླབས་ལྟར་གཡོས་ཤིང་བསྐྱོད་པས། གཟུང་བྱའི་དོན་དང་འཛིན་བྱེད་ཀྱི་ཤེས་པ་གཉིས་ཐ་དད་པ་མེད་བཞིན་དུ་གཉིས་སུ་སྣང་བས་བདག་གཞན་དུ་བཟུང༌། དེ་ལས་ཡུལ་ལ་དོན་དུ་བཟུང་བའི་རྣམ་ཤེས་ཚོགས་དྲུག་པོ་བྱུང་སྟེ་བག་ཆགས་ཀྱི་སྣང་བ་བརྟས་པ་ལས་འཁྲུལ་སྣང་རགས་པ་གྲུབ། རྣམ་ཤེས་དེ་ལ་ཡུལ་ཡིད་དུ་འོང་མི་འོང་བར་མར་སྣང་བའི་དབང་གིས་དེ་གསུམ་ལ་བླང་དོར་དང་བཏང་སྙོམས་སུ་རྟོག་པར་བྱེད་པས་ཚོར་བའི་ཕུང་པོ་སྐྱེ། ཡུལ་དེ་ལ་མཚན་མར་འཛིན་པ་རྒྱ་ཆེ་ཆུང་གི་བྱེད་པས་འདུ་ཤེས་དང༌། ཡུལ་ལ་སྤུ་རིས་སོ་སོར་ཕྱེས་ནས་སྣང་བ་སྣ་ཚོགས་ལ་མངོན་པར་འདུ་བྱས་པས་སེམས་བྱུང་གི་ཚོགས་རྣམས་གྲུབ་པའི་འདུ་བྱེད། དེས་བག་ཆགས་བརྟན་པར་བྱས་ནས་གཟུགས་ཀྱི་ངོ་བོ་དང་མཚན་མ་ལ་སོགས་པ་ལ་མངོན་པར་ཞེན་པས་གཟུགས་ཀྱི་ཕུང་པོ་གྲུབ་བོ། ། འདི་ནི་སྐྱེ་བའི་རིམ་པ་སྟེ་རྒྱུ་འབྲས་དོན་གྱི་གོ་རིམ་དུ་བསྟན་པ་ཡིན་ལ། མཛོད་ལས། རིམ་ནི་རགས་དང་ཀུན་ཉོན་མོངས། ། ཞེས་རགས་ཕྲ་དང་ཀུན་ནས་ཉོན་མོངས་པར་བྱེད་པའི་རིམ་པས་གཟུགས་དང་པོར་གསུངས་པ་དང་འགལ་བ་མ་ཡིན་ནོ། ། དེ་ནས་ཡུལ་ལ་ཆགས་ཤིང་(༤༩བ)ཕྲེང་བ་དང་ཆགས་ཡུལ་དོན་དུ་གཉེར་བའི་ལེན་པ་དག་གིས་འཚམས་སྦྱར་བས་སྲིད་པ་འགྲུབ་བྱེད་ཀྱི་ལས་མཐུ་ཅན་དུ་གྱུར་ནས་ཡང་སྲིད་ཕྱི་མའི་སྐྱེ་བ་ལ་ཉིང་མཚམས་སྦྱོར་བ་སོགས་འཁོར་བར་འཁྲུལ་པའི་འཁོར་ལོ་བར་མེད་དུ་འཁོར་བ་ནི་རང་ངོ་མ་ཤེས་པས་བྱས་པ་སྟེ། ཇི་ལྟར་སྒྱུ་མ་ལ་སྒྱུ་མ་དང༌། རྨི་ལམ་ལ་རྨི་ལམ་དུ་མ་ཤེས་པས་འཁྲུལ་པ་བཞིན་ནོ། ། རྟེན་འབྲེལ་བཅུ་གཉིས་ཀྱི་དོན་རྒྱས་པར་ནི་ཕྱི་ནས་འཆད་པར་འགྱུར་རོ། ། ཐ༣ གསུམ་པ་བག་ཆགས་གསུམ་གྱིས་འཁོར་ཚུལ་ནི། མདོར་ན་ཀུན་གཞིར་བག་ཆགས་གསུམ་བཞག་པས། ། འཁྲུལ་སྣང་རྣམ་གསུམ་བྱུང་སྟེ་ཡུལ་དོན་ལུས། ། གོང་དུ་སྨོས་པ་དེ་དག་གི་དོན་མདོར་བསྡུ་ན། ཀུན་གཞིའི་སྟེང་དུ་སེམས་ཀྱི་བག་ཆགས་མི་འདྲ་བ་རྣམ་པ་གསུམ་བཞག་པས་འཁྲུལ་སྣང་མི་འདྲ་བ་རྣམ་པ་གསུམ་བྱུང་སྟེ། གཟུགས་ལ་སོགས་པའི་ཡུལ་དང༌། དེ་དག་འཛིན་པའི་རྣམ་ཤེས་ཀྱི་ཚོགས་ཏེ་དོན་དང༌། རང་གི་ལུས་སུ་མེད་བཞིན་སྣང་བའི་བག་ཆགས་པས་མེ་ལོང་ལ་རྡུལ་ཆགས་པ་ལྟར་སེམས་ཀྱི་འོད་གསལ་བསྒྲིབས་ཏེ་འཁོར་བར་འཁྱམས་པ་སྟེ། མདོ་སྡེ་རྒྱན་ལས། རྣམ་གསུམ་རྣམ་གསུམ་སྣང་བ་ཅན། ། ཅེས་གསུངས་པའི་དོན་ཀུན་ཏུ་བཟང་པོ་དྲི་མེད་འོད་ཟེར་གྱིས་གསལ་བར་མཛད་པ་ལྟར་རོ། ། སྣོད་ཀྱི་འཇིག་རྟེན་གཟུགས་སོགས་ཡུལ་ལྔ་དང༌། ། རྣམ་ཤེས་ཚོགས་བརྒྱད་དགེ་དང་སྡིག་པའི་ལས། ། འགྲོ་དྲུག་གཟུགས་དང་དེ་ཡི་བྱ་བྱེད་ལས། ། དེ་ལས་གཟུང་འཛིན་དེ་ལས་ཉོན་མོངས་སྐྱེ། ། དེ་ལས་ཐོག་མཐའ་མེད་པའི་འཁོར་བ་གྲུབ། ། དེའང་སྤྲོས་ཏེ་བཤད་ན། ཡུལ་གྱི་བག་ཆགས་ཀྱི་མཐུ་ལས་ཕྱི་རོལ་སྣོད་ཀྱི་འཇིག་རྟེན་དང༌། དེ་ལ་བརྟེན་པའི་གཟུགས་སྒྲ་དྲི་རོ་རེག་བྱ་སྟེ། ཡུལ་ལྔ་པོ་ཕྱི་ནང་གང་ནའང་མེད་ཀྱང་ཕྱི་རོལ་ན་ཡོད་པ་ལྟར་སྣང་བ་སེམས་ལ་ཤར་ནས་དེ་དག་ལ་དོན་དུ་མངོན་པར་ཞེན་ནས་དགག་སྒྲུབ་ཏུ་འཛིན་པའི་ཡུལ་བྱེད་དོ། །(༥༠ན) ཞེན་ཡུལ་ལ་འདི་ནི་གཟུགས་སོ་ཞེས་ཕྱི་རོལ་དུ་རྟོག་པ་ནི་གཟུང་རྟོག་གོ། ། ཀུན་གཞིའི་རྣམ་ཤེས་ཉོན་ཡིད་ཚོགས་དྲུག་དང་བཅས་པ་ནི་རྣམ་པར་ཤེས་པའི་ཚོགས་བརྒྱད་དོ། ། དེས་ཀུན་ནས་བསླངས་ཏེ་བསོད་ནམས་ཆ་མཐུན་གྱི་དགེ་བ་དང་མི་དགེ་བ་སྡིག་པའི་ལས་བསགས་པས་སེམས་ལ་བག་ཆགས་གསེར་དང་གཡའ་བཞིན་དུ་གནས་པ་ནི་དོན་གྱི་བག་ཆགས་ཀྱི་མཐུ་བརྟས་པ་སྟེ། ཚོགས་བརྒྱད་པོས་རང་རང་གི་ཡུལ་རྟོག་བཅས་དང་རྟོག་མེད་ཀྱིས་འཛིན་པས་ན་འཛིན་རྟོག་གོ། ། ལུས་ཀྱི་བག་ཆགས་ཀྱི་མཐུ་ལས། གཟུང་འཛིན་དེ་དག་སྐྱེ་བའི་རྟེན་འགྲོ་བ་རིགས་དྲུག་སོ་སོའི་གཟུགས་དང་དེའི་བྱ་བྱེད་ལས་དང་བཅས་པ་ཐ་ན་རྨི་ལམ་དུའང་བདག་གི་ལུས་ཞེས་མངོན་པར་ཞེན་ཏེ་བདེ་སྡུག་ལ་སྤྱོད་པ་སྟེ། བག་ཆགས་རྣམ་པ་གསུམ་གྱི་མཐུ་བརྟས་པ་ལས་གཟུང་འཛིན་གྱི་འཁྲུལ་སྣང་ཤར། དེ་ལ་སྤང་བླང་བྱས་པས་ཉོན་མོངས་པའི་སྟོབས་སྐྱེ། དེ་ཡིས་ལས་བསགས་པས་ཐོག་མ་དང་ཐ་མ་མེད་པའི་འཁོར་བ་ལུ་གུ་རྒྱུད་འདི་གྲུབ་སྟེ། ཐོག་མ་མེད་པའི་བག་ཆགས་ཀྱིས་ཚེ་རབས་སྔ་མ་བསྐྱེད། དེའི་རྒྱུན་གོམས་པས་ད་ལྟ། ད་ལྟའི་ཉིན་པར་གྱིས་རྨི་ལམ་ལ་སོགས་པའི་རྒྱུན་གོམས་པས་ཚེ་རབས་ཕྱི་མའི་ཡུལ་དང་དོན་དང་ལུས་ཀྱི་བག་ཆགས་འཆར་བར་འགྱུར་རོ། ། ཐ༤ བཞི་པ་ཞར་བྱུང་འཁོར་བ་ལྡོག་ཚུལ་བཤད་པ་ནི། རྟེན་འབྲེལ་ལུགས་ལྡོག་རྒྱུ་རྐྱེན་ཕུག་རྡིབ་ན། ། འཁྲུལ་ཟད་ཐར་པ་མཆོག་ལ་རབ་ཏུ་སྦྱོར། ། འདི་ལྟར་འཁོར་བའི་སྡུག་བསྔལ་ཐམས་ཅད་ཀྱི་གཙོ་བོ་རྒ་ཤི་གང་ལས་བྱུང་བརྟགས་ན་སྐྱེ་བ་ལས་བྱུང༌། དེ་ལེན་པ་དང་དེ་སྲེད་པ་ལས་བྱུང་བ་སོགས་རིམ་གྱིས་བརྟགས་པས་ཐམས་ཅད་ཀྱི་རྩ་བ་མ་རིག་པ་ཡིན་པར་ཤེས་ནས་དེ་སྤོང་བའི་གཉེན་པོ་ལ་བསླབ་པས་རྟེན་འབྲེལ་ལུགས་ལྡོག་ཏུ་འགག་པའམ། འཁོར་བར་འཁྱམས་བྱེད་ཀྱི་རྒྱུ་བདག་(༥༠བ)ཏུ་འཛིན་པ། རྐྱེན་ལྷན་ཅིག་སྐྱེས་པའི་མ་རིག་པ་དག་སོ་སོར་རྟོག་པའི་ཤེས་རབ་ཀྱིས་གཤིས་ལ་མི་གནས་པར་རྟོགས་ནས་འཁྲུལ་གཞིའི་ཕུག་རྡིབ་ན། འཁྲུལ་སྣང་གི་ཆོས་ཇི་སྙེད་པ་ཆོས་ཉིད་ཀྱི་ངང་དུ་ཟད་ནས་ཐར་པ་བདེ་བ་དམ་པའི་མཆོག་ལ་རབ་ཏུ་སྦྱོར་བར་འགྱུར་རོ། ། ཏ༢ གཉིས་པ་བྱེ་བྲག་འོད་གསལ་རྫོགས་པ་ཆེན་པོའི་ལུགས་ལྟར་བཤད་པ་ལ་གཉིས། ཐ༡ མཚམས་སྦྱར་བ་དང༌། ཐ༢ དོན་དངོས་སོ། ། ཐ༡ དང་པོ་ནི། ཁྱད་པར་ཐེག་རྩེ་ཤིན་ཏུ་རྣལ་འབྱོར་ལུགས། ། འཁྲུལ་གྲོལ་རྒྱུ་རྐྱེན་ཐུན་མོང་ཐེག་པའི་བཤད་ཚུལ་ཀུན་ལས་ཁྱད་པར་དུ་གྱུར་པ། ཐེག་དགུའི་རྩེ་མོ་ཨ་ཏི་ཡོ་ག་སྟེ། ཤིན་ཏུ་རྣལ་འབྱོར་གྱི་ལུགས་ཉིད་མདོ་ཙམ་བརྗོད་པར་བྱ་སྟེ། འཆད་འགྱུར་ལུགས་འདིའི་ལམ་དང་འབྲས་བུའི་གནད་དོན་འདི་ལས་ལོངས་དགོས་པའི་ཕྱིར་རོ། ། ཐ༢ གཉིས་པ་[དོན་དངོས་]ལ་བཞི། ད༡ གཞི་དངོས་པོ་གཤིས་ཀྱི་གནས་ལུགས། ད༢ དེ་ལས་སེམས་ཅན་གྱི་འཁྲུལ་ཚུལ། ད༣ འཁྲུལ་དུས་གཞི་ཡིས་ཁྱབ་ཚུལ། ད༤ ཞར་བྱུང་ཡེ་ཤེས་ཀྱི་གནས་ཡུལ་འཁྲུལ་པ་ལྡོག་ཚུལ་དང་བཅས་པའོ། ། ད༡ དང་པོ་ལ་གསུམ། ན༡ ཤེས་བྱ་ཕྱོགས་འཛིན་གྱི་གཞི་དྲུག་སྐྱོན་ཅན་དུ་བསྟན། ན༢ གནས་ལུགས་ཀ་དག་གི་གཞི་སྐྱོན་མེད་དུ་བཤད། ན༣ དེ་ལས་གཞི་སྣང་གི་ཤར་ལུགས་བརྒྱད་བསྟན་པའོ། ། ན༡ དང་པོ་ནི། ཡེ་ཐོག་གཞི་ཡི་གནས་ལུགས་སྐྱོན་ཅན་དྲུག ། རྟོགས་ཏེ་སངས་རྒྱས་མ་བྱུང༌། མ་རྟོགས་ཏེ་སེམས་ཅན་མ་བྱུང་བའི་སྔོན་རོལ་ན་ཡེ་ཐོག་དང་པོའི་གཞིའི་གནས་ལུགས་ཇི་ལྟར་ན། རྫོགས་ཆེན་པའི་ལུགས་ཀྱིས་འདོད་ལུགས་སྐྱོན་ཅན་དྲུག་གྲུབ་པའི་མཐའ་རྗེས་སུ་འཛིན་པའི་དབང་དུ་བྱས་པ་སྟེ། དེ་ཡང་། གཞི་ལྷུན་གྲུབ་ཏུ་འདོད་པ་དང༌། མ་ངེས་པར་འདོད་པ་དང༌། ངེས་པ་དོན་དུ་འདོད་པ་དང༌། ཅིར་ཡང་བསྒྱུར་དུ་བཏུབ་པར་འདོད་པ་དང༌། གང་དུའང་ཁས་བླང་དུ་རུང་བར་འདོད་པ་དང༌། རྣམ་པ་སྣ་ཚོགས་ཁྲ་བོར་འདོད་པ་སྟེ། དེ་ལྟར་རྣམ་པ་དྲུག་པོ་ལ་ནི་ཕྱོགས་ལྷུང་སྐྱོན་ཅན་གྱི་(༥༡ན)གཞིར་གསུངས་ཏེ། དེའི་རྒྱུ་མཚན་ལྷུན་གྲུབ་ཏུ་འདོད་པ་དེ་ལ་ནི། སྐྱོན་ཡོན་གཉིས་ཀ་ཡེ་ནས་ལྷུན་གྱིས་གྲུབ་པའི་ཆོས་ཡིན་ན། ཀ་དག་དང་འགལ་ཞིང་ལམ་ཉམས་སུ་བླང་དུ་མི་རུང་ལ། བླངས་ཀྱང་གྲོལ་མི་རུང་བའི་སྐྱོན་ཡོད་པར་འགྱུར་བ་དང༌། ངེས་མེད་དུ་འདོད་པ་དེ་ལ་ནི། གཞི་ངེས་པ་མེད་པར་བློས་གང་བཏགས་པ་དེར་འགྱུར་ན། གྲོལ་ཚར་ནས་ཀྱང་འཁྲུལ་པ་འབྱུང་བར་ཐལ་བའི་སྐྱོན་དང༌། ངེས་པ་ཅན་དུ་འདོད་པ་དེ་ལྟར་ན། བསྒྱུར་དུ་མི་བཏུབ་པས་མ་རིག་པའི་དྲི་མ་དག་པར་ཡང་མི་འགྱུར་བའི་སྐྱོན་དང༌། ཅིར་ཡང་བསྒྱུར་དུ་བཏུབ་པར་འདོད་པ་ནི། རྟག་མི་ཐུབ་པའི་ཕྱིར་གྲོལ་བའི་འབྲས་བུ་ཡང་སླར་རྒྱུ་རུ་ལྡོག་པའི་སྐྱོན་དང༌། གང་དུ་ཡང་ཁས་ལེན་བཏུབ་པར་འདོད་པ་ནི། དངོས་པོ་ལ་ཐུག་པ་མེད་ཕྱིར་གཞི་ཡང་ཐུག་མེད་དུ་འགྱུར་ལ། རྟག་ཆད་དུའང་ཁས་ལེན་དགོས་པར་འགྱུར་བའི་སྐྱོན་དང༌། སྣ་ཚོགས་སུ་འདོད་པ་དེ་ཡང་དག་པ་རྣམ་གྲོལ་གྱི་གཞིར་མི་རུང་སྟེ། རྟོག་ཚོགས་དུ་མ་ཅན་དེ་ཉིད་ཀ་དག་གི་གཞི་རུ་མི་རུང་བའི་སྐྱོན་གནས་པའི་ཕྱིར། དེ་ལྟར་གཞི་དྲུག་པོ་དེ་དག་ནི་ཕྱོགས་འཛིན་ཡ་བྲལ་སྐྱོན་ཅན་དུ་འགྱུར་ཕྱིར། འདི་སྐབས་ཀྱི་གཞི་རུ་མི་བཞེད་ཅིང༌། དེ་ཐམས་ཅད་ཀྱིས་གནས་ལུགས་ཕྱོགས་རེ་ལས་མ་རྟོགས་པའི་ཕྱིར་རོ། ། ན༢ གཉིས་པ་[གནས་ལུགས་ཀ་དག་གི་གཞི་སྐྱོན་མེད་དུ་བཤད་པ་]ལ་གཉིས། པ༡ ཀ་དག་གི་ངོ་བོ་ངོས་བཟུང༌། པ༢ དེའི་རང་བཞིན་ཞིབ་ཏུ་བཤད་པའོ། ། པ༡ དང་པོ་ནི། སྐྱོན་མེད་ཀ་དག་གྲོལ་འཁྲུལ་སྤྱི་ཡི་གཞི། ། རྟོག་པས་ཐ་དད་དུ་བརྟགས་པའི་བློ་སྐྱོན་ལས་གྲོལ་བ། སྐྱོན་མེད་ཀ་དག་གི་གཞི་ལམ་རྗེས་སུ་འཛིན་པའི་གང་ཟག་གི་དབང་དུ་བྱས་པ་ནི་ཡེ་ཐོག་གཞིའི་ཀ་དག་ཅེས་བྱ་བ་སྟེ། དེའང་སྨྲ་བསམ་བརྗོད་འདས་ཆེན་པོ་ཡོད་མེད་ཀྱི་མཐའ་ལས་འདས་པ་སྟེ། ངོ་བོ་ཀ་ནས་དག་པས་ཡོད་པ་རྟག་པའི་མཐའ་དང་བྲལ་ཏེ་དངོས་པོ་དང་མཚན་མའི་ཆོས་སུ་མ་གྲུབ། (༥༡བ)རང་བཞིན་ལྷུན་གྱིས་གྲུབ་པས་མེད་པ་ཆད་པའི་མཐའ་ལས་འདས་ཏེ། འོད་གསལ་སྟོང་པའི་ཆོས་ཉིད་རྣམ་དག །རང་བཞིན་གདོད་མའི་སངས་རྒྱས། ཆོས་སྐུ་འགྱུར་མེད་ཀྱི་དགོངས་པ། འཁོར་འདས་གང་དུའང་མ་གྲུབ་ལ། ཡེ་སྟོང་རང་བྱུང་གི་ཡེ་ཤེས་ཆེན་པོ་ཡེ་ཐོག་ཉིད་ནས་ནམ་མཁའ་ལྟར་གནས་སོ། ། ཀ་ནས་དག་ན་སེམས་ཅན་འཁོར་བར་འཁྲུལ་པ་མི་རིགས་སོ་ཞེ་ན། ཡེ་ནས་གྲོལ་ཟིན་པས་དྲི་མ་བསྐྱར་ནས་མཚན་ཉིད་པ་སྦྱང་དུ་མེད་ཅིང་འཁྲུལ་པ་དང་གྲོལ་བ་རང་མཚན་པ་མེད་དེ། རྨི་ལམ་གྱི་གྲོལ་འཁྲུལ་ལྟར་རིག་པའི་རོལ་པ་ཙམ་དུ་སྣང་དུས་ཉིད་ནས་གྲུབ་མ་མྱོང་བས་ཀ་དག་ཡིན་པ་ལ་སྐྱོན་མེད་ཅིང༌། ལྷུན་གྱིས་གྲུབ་ན་འབྲས་བུ་གྲུབ་ཟིན་པས་སེམས་ཅན་རྣམས་འབད་མེད་དུ་གྲོལ་བར་འགྱུར་རོ་ཞེ་ན། ལྷུན་གྲུབ་ཡིན་པས་ཡེ་ནས་དབྱིངས་ཀྱི་སྐུ་དང་ཡེ་ཤེས་རང་བཞིན་རྣམ་དག་ཏུ་རྫོགས་ཀྱང་གཉིད་སད་པ་ལྟར་གློ་བུར་དྲི་བྲལ་གྱི་ཆ་ལས་ཡེ་ཐོག་དེར་མངོན་དུ་གྱུར་པའི་ཆར་ཡོད་པས་སྐྱོན་མེད་དོ། ། དེའི་ངང་ལས་གཞི་སྣང་དུ་ཤར་དུས་གྲོལ་འཁྲུལ་གཉིས་ཀའི་གཞི་བྱེད་པའི་ཆ་ནས་སྤྱི་གཞི་ཟེར་ལ། གྲོལ་གཞི་བྱེད་པས་གྲོལ་བའི་གཞི་དང༌། སེམས་ཅན་གྱི་འཁྲུལ་གཞི་བྱེད་པས་འཁྲུལ་གཞི་ཞེས་གཞི་སྣང་གི་ངོ་བོ་གཅིག་ལ་གྲོལ་འཁྲུལ་གྱི་ཆ་དབྱེ་ན་གསུམ་དུ་གནས་པའོ། ། འདིར་ཀ་ཞེས་པ་ནི་གཞིའམ་རྩ་བའི་སྒྲ་སྟེ། གདོད་མ་དང་ཐོག་མ་དང་ཡེ་ནས་སོགས་དང་དོན་གཅིག་གོ། པ༢ གཉིས་པ་[དེའི་རང་བཞིན་ཞིབ་ཏུ་བཤད་པ་]ནི། ཡེ་ཤེས་གཉིས་སམ་གསུམ་ལྡན་ཉིད་དུ་བཞུགས། ། ཀ་དག་དེའི་རང་བཞིན་ནི་ཡེ་ཤེས་གཉིས་སམ་གསུམ་ལྡན་ཉིད་དུ་བཞུགས་ཏེ། དེའི་དང་པོ་ལྟར་ན། རིག་པ་དངོས་པོ་མེད་པས་རིག་སྟོང་དབྱེར་མེད་ལ་ལྟོས་ནས་ངོ་བོ་ཀ་དག་གི་ཡེ་ཤེས་བསམ་ངོ་དང་བྲལ་བ་དང༌། རང་བཞིན་ལྷུན་གྲུབ་ཀྱི་ཡེ་ཤེས་གཏིང་གསལ་ཡེ་གདངས་སུ་གནས་ཏེ། ཀློང་དྲུག་པ་ལས། ངོ་བོ་ཉིད་ནི་ཀ་དག་ལ། ། རང་བཞིན་དུ་ནི་ལྷུན་གྲུབ་བོ། ། ཞེས་སོ། །(༥༢ན) ངོ་བོའི་ལྡོག་པ་ན་ཡོད་མེད་ཀྱི་མཐའ་ལས་འདས་ལ། རང་བཞིན་གྱི་ལྡོག་པ་ན་འཆར་གཞིའི་ཆ་ཙམ་དུ་གནས་ཏེ། དེ་གཉིས་རང་ངོ་དབྱེར་མེད་མཐའ་གྲོལ་རྫོགས་པ་ཆེན་པོར་བཞུགས་པ་ནི། རིག་པ་རང་གྲོལ་ལས། མཐའ་གཞིའི་དྲི་མ་རང་སངས་ཉིད། ། ཅེས་སོ། ། ཡེ་ཤེས་གསུམ་ལྡན་དུ་བཞུགས་པ་ནི། རྡོ་རྗེ་སེམས་དཔའ་སྙིང་གི་མེ་ལོང་ལས། གཞིའི་ཆོས་ཐམས་ཅད་ངོ་བོར་རང་བཞིན་ཐུགས་རྗེ་གསུམ་དུ་ཤེས་པར་གྱིས་ཤིག །ཅེས་གསུངས་པ་ལྟར། ཆོས་སྐུ་གདོད་ནས་དག་པའི་ངོ་བོ་སྐུར་བཞུགས་པས་སྐུ་གསུམ་འདུ་འབྲལ་མེད་པའི་འཆར་གཞིར་གནས་ཀྱང་མཚན་མ་རིས་ཅན་གྱི་ཞལ་ཕྱག་ཏུ་གྲུབ་པ་ནི་ཅུང་ཟད་ཀྱང་མེད་དོ། ། རང་བཞིན་གསལ་བ་འོད་ལྔར་བཞུགས་པས་གདངས་གསུམ་ཡེ་ནས་རང་གསལ་ཀྱང་ཁ་དོག་རིས་བཅས་སུ་སོ་སོར་གྲུབ་པ་ནི་མེད་དོ། ། ཐུགས་རྗེ་རིག་པའི་ཡེ་ཤེས་སུ་བཞུགས་པས་མཁྱེན་པའི་ཆ་མ་འགགས་པར་སོ་སོར་གསལ་ཀྱང་བྱ་བ་དང་བྱེད་པའི་རྣམ་པ་ཡུལ་ཡུལ་ཅན་དུ་སྣང་བ་ནི་མེད་དོ། ། ཡེ་ཤེས་དེ་དག་ཀ་དག་ཡེ་གཞི་ལ་འཆར་གཞིའི་ཆ་ཙམ་དུ་ཡོད་ལ། རགས་པར་ནི་མེད་པས། སངས་རྒྱས་ཀྱི་དུས་ན་ཡེ་ཤེས་དེ་གཉིས་འབྱུང་བར་འཐད་པ་སྟེ། སྡུད་པ་ལས། ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། ། རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། ། ཞེས་སོ། ། དེ་ལ་རིག་པ་གཞི་གནས་ནང་དབྱིངས་སུ་ཡོད་དུས་ཐོག་མཐའ་གཉིས་ཀྱི་ཚེ་གཏིང་གསལ་ལས་སྐུ་འོད་དངོས་སུ་མེད་ལ། དེ་ནས་འཕགས་དུས་རང་འོད་ཀྱི་གདངས་དང་བཅས་པའོ། ། སྙིང་ནང་དུ་གནས་དུས་གནས་སྐབས་ཀྱི་གཞི་གནས་སུ་བརྗོད་ཀྱང་དབྱིངས་ནས་འཁོར་བར་འཕགས་ཏེ་གྲོལ་སར་མ་ཕྱིན་པས་ད་དུང་གཞི་སྣང་དུ་འདོད་དེ། འདི་ལ་ལྟོས་ནས་རྨ་བྱའི་སྒོ་ང་ལྟར་རང་གདངས་འོད་ལྔའི་ཀློང་ན་རིག་པ་མ་སྨིན་པ་རྨ་བྱའི་ཕྲུག་གུ་ལྟར་གནས་ཤིང་ལམ་སྣང་སྣང་བ་བཞི་ཡི་(༥༢བ)དུས་སུ་བར་སྣང་ལ་འཇའ་ཚོན་ལྟར་གསལ་བ། གདོས་བཅས་དག་དུས་མཐར་སྐྱོལ་བས་རིག་པ་ཉིད་སྐུར་སྨིན་པའི་ཚེ་སྒོ་ང་ནས་འདོན་ཏེ་གནས་པ་ལྟ་བུའོ། ། དེས་ན་དབྱིངས་ཀྱི་གཞི་དང་གནས་སྐབས་ཀྱི་གཞི་གཉིས་འོད་ཀྱི་ཁང་པ་དངོས་ལ་མི་འདུག་པ་དང་འདུག་པའི་ཁྱད་པར་ཡོད་ཅིང༌། དེ་ལྟར་ན། ངོ་བོ་སྟོང་གསལ་དབྱེར་མེད། རང་བཞིན་གསལ་སྟོང་དབྱེར་མེད། ཐུགས་རྗེ་རིག་སྟོང་དབྱེར་མེད་དུ་བཞུགས་ཏེ། དེའང་ངོ་བོ་ཀ་ནས་དག་པའི་ཡེ་ཤེས་ནམ་མཁའ་རྣམ་པར་དག་པ་ལྟ་བུར་བཞུགས། རང་བཞིན་ལྷུན་གྱིས་གྲུབ་པའི་ཡེ་ཤེས་རྒྱ་མཚོ་དྭངས་པ་ལྟ་བུར་བཞུགས། ཐུགས་རྗེ་ཀུན་ལ་ཁྱབ་པའི་ཡེ་ཤེས་ནོར་བུ་དྲི་མ་མེད་པ་ལྟ་བུར་བཞུགས་སོ། ། ན༣ གསུམ་པ་[དེ་ལས་གཞི་སྣང་གི་ཤར་ལུགས་བརྒྱད་བསྟན་པ་]ནི། དེ་ལས་གཞི་སྣང་ལྷུན་གྲུབ་སྒོ་བརྒྱད་ཤར། ། དེ་ལྟར་ན་དབྱིངས་ཀ་དག་གི་ཡེ་གཞི་གཞོན་ནུ་བུམ་པ་སྐུའི་རྒྱ་རལ་ཏེ་ཡེ་ཤེས་ཀྱི་རླུང་གཡོས་པ་ལས། རིག་པ་གཞི་ནས་འཕགས་པའི་རང་སྣང་ལྷུན་གྲུབ་ཀྱི་སྒོ་བརྒྱད་ཤར་དུས་སྟེང་དུ་ཀ་དག་ཆོས་སྐུའི་སྣང་བ་ནམ་མཁའ་སྤྲིན་མེད་ལྟ་བུ། ཐད་ཀར་ལོངས་སྐུ་འོད་གསལ་གྱི་ཞིང་སྣང་ནམ་མཁའི་དབྱིངས་ཁྱབ་པ། དེའི་རྩལ་ལས་འོག་ན་གཞི་སྣང་ཆེན་པོ་དང༌། དེའི་རྩལ་ལས་འོག་ན་ལོངས་སྐུའི་སྣང་བ་དང་ཕྱོགས་མཚམས་ན་རང་བཞིན་སྤྲུལ་སྐུའི་ཞིང་སྣང་དང༌། མར་འོག་ན་འཁོར་བའི་སྒོ་ལས་འགྲོ་དྲུག་རང་སྣང་གི་ཞིང་ཁམས་ཚད་མེད་པ་སྟེ། དེ་ཐམས་ཅད་ལྷུན་གྲུབ་སྒོ་བརྒྱད་ཀྱི་སྣང་བ་ལས་རང་ཤར་བས་འཁོར་འདས་ཀྱི་སྣང་བ་ཆེན་པོ་དུས་གཅིག་ལ་ཤར་བ་ཞེས་བྱ་སྟེ། ནང་གསལ་ལས་ཕྱི་གསལ་དུ་ཤར་དུས་ངོ་བོའི་སྣང་བ་གོ་མ་འགགས་པར་རང་གསལ། རང་བཞིན་གྱི་སྣང་བ་འོད་ལྔར་ཡེ་