Tibetan
འདི་ལ་ཀུན་ཏུ་བཟང་པོ་ཀློང་ཆེན་རབ་འབྱམས་ཀྱིས། སངས་རྒྱས་ཀྱི་སྙིང་པོ་སྟོབས་དང་མཚན་དཔེ་སོགས་ཀྱི་ཆོས་ཅན་དུ་ཡོད་པ་དང༌། སྙིང་པོ་བསྟན་པའི་མདོ་རྣམས་དྲང་དོན་དུ་སྨྲ་བ་ལ་ལུང་དང་རིགས་པས་རྩོད་པ་སྤོང་བ། ཡང་དག་པའི་དགེ་བའི་བཤེས་གཉེན་གྱིས་མ་བསྟན་ན་མཐོང་དུ་མི་རུང་བའི་དོན་བླ་མ་དམ་པ་ལས་རྙེད་པས་ཀྱང་སྤྲོ་བར་རིགས་པ། ས་ལ་གནས་པའི་བྱང་ཆུབ་སེམས་(༥༧བ)དཔས་ཀྱང་རྟོགས་དཀའ་བའི་གནས་སུ་འགྱུར་ན་ཚུ་རོལ་མཐོང་བས་ལྟ་སྨོས་ཀྱང་ཅི་དགོས་ཞེས་སངས་རྒྱས་ཁོ་ནའི་གསང་བ་རྡོ་རྗེའི་གནས་ཡིན་པས་ཀྱང་སྤྲོ་དགའ་སྐྱེད་པ། ཡང་དག་པའི་བླ་མས་བསྟན་ན་དངོས་སུ་མཐོང་ལ་རང་བཞིན་དུ་བར་དོར་རང་སྣང་མངོན་དུ་འཆར་བས་ཀྱང་སྤྲོ་དགའ་སྐྱེད་པར་རིགས་པ་སོགས་ཀྱིས་གསང་བ་ཟབ་མོའི་གནས་རྒྱ་ཆེར་གདམས་པར་མཛད་པ་ནི་དེ་ཉིད་ཀྱི་གསུང་རབ་ལས་རྟོགས་པར་བྱ་སྟེ། དེ་དག་ནི་ཁྱབ་ཚུལ་སྤྱིར་བསྟན་པའོ། ། དེའི་ཁྱབ་ཆོས་བྱེ་བྲག་ཏུ་བཤད་ན། སྣང་ལུགས་དང་འཆར་ལུགས་ལྔ་ཕྲག་དྲུག་གིས་མཚོན་པར་གསུངས་ཏེ། དེའང་སྙིང་པོའི་ཡེ་ཤེས་དེ་ཉིད་ལ། སྐུ་ལྔ་དང༌། ཡེ་ཤེས་ལྔ་དང༌། འོད་ལྔ་དང༌། རིགས་ཀྱི་ཆོས་ལྔ་དང༌། ཡེ་ཤེས་ཀྱི་རླུང་ལྔ་དང༌། ངོ་བོ་རང་བཞིན་ཐུགས་རྗེའི་ཆོས་ལྔ་ཡེ་ནས་གནས་པའི་རྟགས་སུ་མ་དག་པའི་སྣང་བ་ལ། ཉོན་མོངས་པ་ལྔ་དང༌། ཕུང་པོ་ལྔ་དང༌། འབྱུང་བ་ལྔ་དང༌། དབང་པོ་ལྔ་དང༌། འདོད་ཡོན་ལྔ་དང༌། སྒོ་གསུམ་རང་བཞིན་གྱི་ཆོས་ལྔར་གནས་ཏེ། མུ་ཏིག་ཕྲེང་བ་ལས། དེ་ལྟར་སྙིང་པོ་དེ་ཉིད་ལ། ། སྐུ་ལྔ་ཡེ་ཤེས་ལྔ་དང་ནི། ། འོད་ལྔ་ཁ་དོག་རྣམ་པ་ལྔ། ། ཆོས་ལྔ་ཡེ་ཤེས་རླུང་ལྔ་ཉིད། ། ངོ་བོ་ལྔ་དང་རང་བཞིན་ལྔ། ། ཐུགས་རྗེ་ལྔ་ཡིས་ཀུན་ལ་ཁྱབ། ། ཅེས་སོ། ། དེའང་རིག་པའི་ཡེ་ཤེས་སྐུ་ལྔར་ཡེ་ནས་གནས་པས་ད་ལྟ་ཕུང་པོ་ལྔར་ཤར་བ་སྟེ། རིག་པའི་ངོ་བོ་དང་དབྱིངས་ལྷུན་གྱིས་གྲུབ་པའི་རྣམ་པར་སྣང་བས་རྣམ་པར་སྣང་མཛད། དེ་ཉིད་འཕོ་འགྱུར་མེད་པས་མི་བསྐྱོད་པ་དང༌། ཡོན་ཏན་རིན་པོ་ཆེའི་ཚོགས་ཀྱི་གཏེར་དུ་གྱུར་པས་རིན་ཆེན་འབྱུང་ལྡན་དང༌། འོད་ཟེར་ཚད་མེད་པས་འོད་དཔག་མེད་དང༌། ཡེ་ནས་སངས་རྒྱས་སུ་གྲུབ་པས་དོན་ཡོད་གྲུབ་པའི་སྐུ་རྣམས་སུ་གནས་སོ། ། དེ་བཞིན་དུ། ཡེ་ཤེས་ལྔ་གདོད་ནས་གནས་པས་ད་ལྟ་ཉོན་མོངས་པ་ལྔ་རུ་ཤར་བ་སྟེ། རིག་པའི་ངང་དུ་སྐུ་དང་ཞིང་ཁམས་ལ་སོགས་པ་རང་གསལ་བས་མེ་ལོང་ཡེ་(༥༨ན)ཤེས་སོ། །དེ་ཐམས་ཅད་རིག་པར་མཉམ་པས་མཉམ་པ་ཉིད་ཀྱི་ཡེ་ཤེས་སོ། །མ་འདྲེས་པར་སྣང་བས་སོར་རྟོག་ཡེ་ཤེས་སོ། །ཡེ་ནས་ལྷུན་གྱིས་གྲུབ་པས་བྱ་གྲུབ་ཡེ་ཤེས་སོ། །དེ་ཐམས་ཅད་ཆོས་ཉིད་དུ་རོ་གཅིག་པས་ཆོས་དབྱིངས་ཡེ་ཤེས་སོ། ། འོད་ལྔ་ལས་འབྱུང་བ་ལྔར་བྱུང་སྟེ། རིག་པ་ལ་དྲི་མ་མེད་པས་འོད་དཀར་པོའོ། །ཡོན་ཏན་རྫོགས་པས་སེར་པོའོ། །རིག་པར་འདུས་པས་དམར་པོའོ། །མ་བཙལ་རྫོགས་པས་ལྗང་ཁུའོ། །འགྱུར་བ་མེད་པས་མཐིང་ག་སྟེ། དེ་དག་ཀྱང་ཡུམ་ལྔའི་དག་པའོ། ། རིགས་ལྔ་ཡོད་པས་མཚོན་བྱེད་དབང་པོ་ལྔར་ཤར་བ་སྟེ། དབྱིངས་དེ་བཞིན་ཉིད་ཀྱི་ངོ་བོར་ཡེ་ཤེས་བསམ་གྱིས་མི་ཁྱབ་པར་གཤེགས་པ་སྟེ། ངོ་བོ་དབྱེར་མེད་པས་དེ་བཞིན་གཤེགས་པའི་རིགས་དང༌། མི་འགྱུར་བས་རྡོ་རྗེ་དང༌། ཡོན་ཏན་རྫོགས་པས་རིན་པོ་ཆེ་དང༌། ལས་དང་ཉོན་མོངས་པས་མ་གོས་པས་པདྨ་དང༌། རིག་པའི་ལས་སམ་ཆོ་འཕྲུལ་དུ་རྫོགས་པས་ལས་ཀྱི་རིགས་སོ། ། རླུང་ལྔ་ཡོད་པས་ཡུལ་ཉེ་བར་སྤྱོད་པ་འདོད་ཡོན་ལྔར་སྦྱོར་བ་སྟེ། ཡེ་ཤེས་ཀྱི་དྲོད་ཕེབས་པས་མེ་མཉམ་གྱི་རླུང་ངོ༌། །འཁོར་འདས་ཀྱི་འཆར་གཞིར་བྱེད་པས་སྲོག་འཛིན་གྱི་རླུང་ངོ༌། །སྣང་བ་དུ་མར་བྱེད་པས་དྭངས་སྙིགས་འབྱེད་པའི་རླུང་ངོ༌། །འཁོར་འདས་གང་ལའང་ཁྱབ་པས་ཁྱབ་བྱེད་ཀྱི་རླུང་ངོ༌། །རིག་དུས་འཁོར་བ་མྱང་འདས་སུ་གྲོལ་བའི་གཞི་བྱེད་པས་སྙིང་རྗེ་མེད་པ་ལས་ཀྱི་རླུང་ངོ༌། །འདི་དག་འགྱུ་བའི་རླུང་མ་ཡིན་གྱིས་ཆ་ལ་བཏགས་པས་རིག་པ་ཡེ་ཤེས་ཀྱི་རླུང་ངོ༌། ། ཆོས་ལྔའམ་ཤེས་རབ་ལྔ་ཡོད་པས་སྒོ་གསུམ་རང་བཞིན་གྱི་ཆོས་ལྔ་ཚན་རྣམས་སུ་འཆར་ཏེ། འཁོར་འདས་ཀྱི་འཆར་གཞི་སོ་སོར་འབྱེད་པའི་ཤེས་རབ་བོ། །རིག་པའི་ངང་དུ་གཅིག་པས་སྡུད་པའི་ཤེས་རབ་བོ། །རིག་པ་ལས་མ་འདས་པས་ཁྱབ་བྱེད་ཀྱི་ཤེས་རབ་བོ། །རིག་དུས་འདི་ཉིད་དུ་ཡོད་པས་ཡོད་པའི་ཤེས་རབ་བམ། ཡང་ན། (༥༨བ)འཁོར་འདས་གཉིས་ཀའི་སྲོག་གཅོད་པས་སྒྲོལ་བྱེད་ཀྱི་ཤེས་རབ་བོ། །རིག་པ་ལས་གཞན་མེད་པས་རང་བྱུང་གི་ཡེ་ཤེས་ཞེས་བྱ་སྟེ། འདི་དག་རྟོག་དཔྱོད་ཀྱི་ཤེས་རབ་མ་ཡིན་གྱི་རིག་པ་ཡེ་ཤེས་ཀྱི་ཆ་ལ་བཏགས་པའོ། ། དེ་དག་ཀྱང་གཞི་རིག་པ་ཉིད་ལ་མ་ཚང་ན་ཉེར་ལེན་ལུས་སེམས་ལ་མི་ཚང༌། དེ་ལ་མ་ཚང་ན་སེམས་ལ་སྣང་བའི་ཕྱི་ཡུལ་ལ་མི་ཚང་སྟེ། མོ་གཤམ་ལ་བུ་མེད་པས་བཞིན་མེད་ལ། བཞིན་མེད་པས་མེ་ལོང་དུ་མི་སྣང་བ་བཞིན་ནོ། ། སྣང་བ་ལ་སྣང་བ་ལུས་སེམས་ལ་ཚང་བ་ལས་བྱུང་ལ། དེ་རིག་པ་ལ་ཚང་བས་བྱུང་སྟེ། ལྷས་བྱིན་ལ་མགོ་ཡོད་པས་བཞིན་ཡོད་ལ། དེ་ཡོད་པས་མེ་ལོང་ནང་དུ་གཟུགས་བརྙན་འཆར་བ་བཞིན་ནོ། ། དེ་དག་ཀྱང་ཀུན་བྱེད་ལས། ཇི་ལྟར་སྣང་བ་ང་ཡི་ངོ་བོ་ཉིད། ། ཇི་ལྟར་ཤར་བ་ང་ཡི་ངོ་བོ་ཡིན། ། ང་ལས་མ་གཏོགས་པ་ཡི་ཆོས་རྣམས་ནི། ། སྣང་ཞིང་སྲིད་པས་བསྡུས་པ་འདི་ན་མེད། ། ཅེས་པ་དང༌། ནོར་བུ་ཕྲ་བཀོད་ལས། དཔེར་ན་བཞིན་དང་མེ་ལོང་བཞིན། ། གང་སྣང་དེ་ལ་དེ་ལྟར་སྣང༌། ། ཞེས་སོ། ། ད༤ བཞི་པ་ཞར་བྱུང་ཡེ་ཤེས་ཀྱི་གནས་ཡུལ་འཁྲུལ་པ་ལྡོག་ཚུལ་དང་བཅས་བཤད་པ་ནི། རིག་པ་སྙིང་དབུས་གཞལ་ཡས་གསུམ་ལ་བརྟེན། ། འོད་གསལ་སྒོ་བཞིར་ཐིག་ལེ་བཟང་པོ་ལས། ། ཕྱིར་གསལ་འཆར་བའི་སྒོ་ནི་མིག་གཉིས་ཏེ། ། ཡུལ་དང་གནད་བལྟེམས་འཁྲུལ་པ་རུ་ལྡོག་ནས། ། གདོད་མའི་གྲོལ་སར་འབད་མེད་སྙོགས་པའོ། ། སངས་རྒྱས་ཀྱི་སྙིང་པོའམ་རིག་པ་ཡེ་ཤེས་དེ་ཉིད་འཁྲུལ་སྣང་གདོས་བཅས་ཀྱི་ལུས་དང་འབྲེལ་བར་གནས་པའི་བྱིན་རླབས་ཀྱིས་ཡེ་ཤེས་ཀྱི་སྣང་བ་འཆར་བའི་ཚུལ་ཡང༌། བཞུགས་གནས་དངོས་ནི་སྙིང་རིན་པོ་ཆེ་དཔལ་གྱི་བེའུའི་དབུས་སུ་གནས་ལ། དེའི་གདངས་ནི་དུང་ཁང་བྷཉྫ་འབར་བའི་གཞལ་ཡས་དང༌། ལྟ་བྱེད་མིག་གི་གཞལ་ཡས་དང༌། འགྱུ་བྱེད་རྩའི་གཞལ་ཡས་ན་གནས་ཏེ། ཐལ་འགྱུར་ལས། (༥༩ན) ཙིཏྟ་རིན་ཆེན་གཞལ་ཡས་སུ། ། རིན་ཆེན་འདུས་པ་ཟུར་བརྒྱད་སྒོ། ། ཡེ་ཤེས་ལྔ་དང་སྐུ་ལྔ་སྟེ། ། རླུང་དང་ཤེས་པའི་རྩལ་ཡང་ལྔ། ། ཐམས་ཅད་ལྔ་ལྔའི་རང་བཞིན་ནོ། ། ཞེས་པ་དང༌། སྤྱི་དང་ཙིཏྟ་རྩ་ནང་ན། ། མ་བཅོས་དག་པའི་ཆོས་ཉིད་གནས། ། ཞེས་སོགས་རྒྱ་ཆེར་གསུངས་སོ། ། དེའང་ངོ་བོ་སྐུར་གནས་པ་བུམ་པའི་སྐུ་ལྟ་བུ། རང་བཞིན་འོད་དུ་གནས་པ་བུམ་ནང་གི་མར་མེ་ལྟ་བུ། ཐུགས་རྗེ་འོད་ཟེར་དུ་གནས་པ་ཉི་མའི་འོད་ཟེར་ལྟ་བུའོ། ། སྙིང་གའི་འོད་གསལ་ལས་སྒོ་བཞིར་གྱེས་པས་རྩ་བཞི་སྟེ། ཀ་ཏི་གསེར་གྱི་རྩ་ཆེན་ནས་འོད་གསལ་གྱི་སྣང་བ་འབྱུང་བའི་རྟེན་བྱེད། དར་དཀར་སྣལ་མ་ནས་ཕྱི་ཡུལ་ལ་འཇུག་པའི་རྟེན་བྱེད། ཕྲ་ལ་འཁྲིལ་ནས་རང་འཆར་བའི་རྟེན་བྱེད། ཤེལ་སྦུག་ཅན་ནས་རང་སྣང་བའི་རྟེན་བྱེད་དོ། ། སྟོང་པ་རང་གྲོལ་ནི། ཚངས་བུག་ལ་ཟུག་པ་སྟེ། ལུ་གུ་རྒྱུད་སྐུའི་རྟེན་བྱེད་པ་དང་བསྡོམས་ན་ནང་རྩ་ལྔ་སྟེ་ཡེ་ཤེས་ལྔའི་འོད་ཡིན་ལ། རང་བཞིན་དུ་གཞིར་བྱེད་པས་སྒྲོན་མ་བཞིའི་འཕེལ་སྟོན། འོད་ཀྱི་རྩ་བཞིའི་ནས་འོད་གསལ་དག་པའི་ཐིག་ལེ་རྒྱུ་བས་དེ་ལ་བརྟེན་ནས་འོད་གསལ་བསྒོམ་པ་སྟེ། དེའང་ཀ་ཏི་གསེར་གྱི་རྩ་ཆེན་ན་གཞིའི་ཐིག་ལེ་བཟང་པོ་ངོ་བོར་རང་བཞིན་ཐུགས་རྗེ་གསུམ་གྱི་བདག་ཉིད་སྙིང་ག་ལ་བརྟེན་ནས་གནས་སོ། །དར་དཀར་སྣལ་མ་ན་ལམ་གྱི་ཐིག་ལེ་བཟང་པོ་སྒྲོན་མ་བཞི་དང་བཅས་པ་ཆུའི་སྒྲོན་མ་སྟེ་གཡས་ནའོ། །ཕྲ་ལ་འཁྲིལ་ན་བཟང་པོའི་རྩེ་མོའི་ཐིག་ལེ་ཉམས་གོང་འཕེལ་གྱི་སྣང་བ་སྣ་ཚོགས་པ་གཡོན་ནའོ། །ཤེལ་སྦུག་ཅན་ན་ཚད་ཕེབས་ཀྱི་སྣང་བའི་རྟེན་ནང་གསལ་ཡེ་ཤེས་ཀྱི་འཆར་གཞིར་གནས་སོ། །སྟོང་པ་རང་གྲོལ་ན་རྡོ་རྗེ་ལུ་གུ་རྒྱུད་ཀྱི་སྐུ་གནས་པའོ། ། ཡེ་ཤེས་ཀྱི་སྣང་བ་ཕྱིར་གསལ་དུ་འཆར་བའི་སྒོ་ནི་མིག་གཉིས་ཡིན་ལ། དེའང་མིག་གཡས་ནས་རྒྱང་ཞགས་མེའི་སྒྲོན་མ་དང་ཤེས་རབ་རང་བྱུང་གི་སྒྲོན་མ་གཉིས་ཏེ་ཇི་སྙེད་མཁྱེན་པའི་ཡེ་ཤེས་ཐབས་སྣང་བའི་རང་བཞིན་དུ་འཆར་ལ། མིག་གཡོན་(༥༩བ)ནས་ཐིག་ལེ་སྟོང་པའི་སྒྲོན་མ་དང་དབྱིངས་རྣམ་དག་གི་སྒྲོན་མ་གཉིས་ཇི་ལྟ་བ་མཁྱེན་པའི་ཡེ་ཤེས་ཤེས་རབ་སྟོང་པའི་རང་བཞིན་དུ་འཆར་ཞིང༌། དེའི་དབུས་ཚངས་པའི་བུ་ག་ནས་རིག་པ་རྟོག་མེད་ཀྱི་སྐུ་ལུ་གུ་རྒྱུད་ཐིག་ལེ་བརྩེགས་མར་སྣང་བའོ། ། རྒྱུ་མཚན་དེ་ལྟ་བས་ན། ཕྱི་ནང་གི་ཡུལ་གྱི་འབེན་ལ་བརྟེན། འདུག་སྟངས། གཟིགས་སྟངས། རླུང་གི་གནད་རྣམས་བལྟེམས་ཏེ་འོད་གསལ་གྱི་རྣལ་འབྱོར་ལམ་དུ་བྱས་པས་འཁྲུལ་པའི་སྣང་བ་རུ་ལྡོག་སྟེ། ཀ་དག་གདོད་མའི་གྲོལ་ས་རིན་པོ་ཆེ་གསང་བའི་སྦུབས་སུ་འབད་མེད་དུ་སྙོགས་ཤིང་གྲོལ་བར་འགྱུར་བ་ནི་ཆོས་ཉིད་ཀྱི་རང་བབས་ལས་བྱུང་བའོ། ། འཁོར་བ་འགྲུབ་བྱེད་རྒྱུ་རྐྱེན་བསྟན་པའི་སྐབས་སོ། ། འཁོར་བ་འགྲུབ་བྱེད་རྒྱུ་རྐྱེན་བསྟན་པ་སྐབས་བཞི་པའི་འགྲེལ་པའོ། ། ཐེག་པའི་སྒོ་ཀུན་ལས་བཏུས་པ་གསུང་རབ་རིན་པོ་ཆེའི་མཛོད་བསླབ་པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ་ཅེས་བྱ་བ་ལས། གདུལ་ཞིང་སྣོད་བཅུད་ཀྱི་འཇིག་རྟེན་རིམ་པར་ཕྱེ་བ་སྟེ། གནས་དང་པོའི་འགྲེལ་པ་གྲུབ་བོ།། །། གནས་གཉིས་པ། འདུལ་བྱེད་ཀྱི་སྟོན་པ་བྱོན་ཚུལ་རིམ་པར་ཕྱེ་བ། དང་པོ། སྟོན་པ་ཉིད་སྔོན་བྱང་ཆུབ་ཀྱི་ལམ་དུ་ཇི་ལྟར་གཤེགས་པའི་སྐབས། དེ་ལྟར་གདུལ་ཞིང་སྣོད་བཅུད་ཀྱི་འཇིག་རྟེན་དེའི་རྒྱུ་དང་བཅས་པ་ལེགས་པར་བཤད་ནས། ག༢ དེ་ཉིད་འདུལ་བྱེད་ཀྱི་སྟོན་པ་ཇི་ལྟར་འབྱོན་པའི་རིམ་པར་ཕྱེ་བ་སྟེ་གནས་གཉིས་པ་ལ་སྐབས་བཞི། ང༡ བདག་ཅག་གི་སྟོན་པ་བྱང་ཆུབ་ལམ་དུ་ཇི་ལྟར་གཤེགས་པའི་ཚུལ། ང༢ སངས་རྒྱས་པའི་ཚུལ་ཐེག་པ་སོ་སོའི་བཞེད་པ། ང༣ སྤྲུལ་པའི་སྐུས་ཞིང་འདིར་མཛད་པ་བཅུ་གཉིས་བསྟན་པའི་ཚུལ། ང༤ འོད་གསལ་རྡོ་རྗེ་རྩེ་མོའི་ལུགས་ཀྱི་སྐུ་དང་ཞིང་ཁམས་ཁྱད་པར་དུ་དབྱེ་བའོ། ། ང༡ དང་པོ་ལ་ལྔ། ཅ༡ སངས་རྒྱས་སྤྱི་ལས་བདག་ཅག་གི་སྟོན་པ་ཁྱད་པར་དུ་ཕྱེ་བ། ཅ༢ དེའི་རྣམ་ཐར་སྡོམས་སུ་བསྟན་པ། ཅ༣ དང་པོར་ཐུགས་བསྐྱེད་པའི་ཚུལ། ཅ༤ བར་དུ་བྱང་ཆུབ་སྤྱོད་པ་སྤྱད་ཚུལ། ཅ༥ ཞར་བྱུང་དབང་པོའི་རིམ་པ་བསྟན་པའོ། ། ཅ༡ དང་པོ་ནི། འཇིག་རྟེན་འདྲེན་པའི་རྒྱལ་བ་དཔག་མེད་ལས། ། བསྐལ་བཟང་འདིར་འབྱུང་སངས་རྒྱས་སྟོང་གི་དབུས། ། པད་དཀར་ལྟར་བསྔགས་མཉམ་(༦༠ན)མེད་ཤཱཀྱའི་རྒྱལ། ། ཇི་སྲིད་ནམ་མཁའི་ཁམས་མ་ཟད་པ་དེ་སྲིད་དུ་གདུལ་བྱའི་ཁམས་མི་ཟད་ལ། དེ་སྲིད་སངས་རྒྱས་རྣམས་ཀྱི་ཐུགས་རྗེ་དང་སྨོན་ལམ་ཕྲིན་ལས་ཟད་པ་མི་མངའ་བས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་པ་རྣམས་སུ་ཁ་ལོ་སྒྱུར་བའི་འདྲེན་པ་མི་མཆོག་རྒྱལ་བ་ཞེས་བྱ་བའི་མཚན་གྱིས་བརྗིད་པའི་དེ་བཞིན་གཤེགས་པ་མིའི་ཟླ་བ་དང་རིན་ཆེན་སྙིང་པོ་ལ་སོགས་པ་བརྗོད་ཀྱིས་མི་ལོང་བ་སྔོན་དུ་བྱོན་ཅིང༌། ད་ལྟར་མངོན་པར་དགའ་བའི་འཇིག་རྟེན་ན་མི་འཁྲུགས་པ་དང༌། བདེ་བ་ཅན་གྱི་འཇིག་རྟེན་ན་འོད་དཔག་མེད་དང༌། པདྨོའི་དཔལ་གྱི་འཇིག་རྟེན་ན་སངས་རྒྱས་དཔལ་བཟང་པོ་ལ་སོགས་པ་ཚད་མེད་ཅིང་གྲངས་མེད་པ་རྣམས་འཚོ་ཞེས་ལ། ཆོས་ཀྱང་སྟོན་པར་མཛད་དོ། ། མ་འོངས་པ་ན་འཇིག་རྟེན་གྱི་ཁམས་རྡུལ་བྲལ་ཡང་དག་བསགས་ཞེས་བྱ་བར་ངོ་མཚར་བའི་དེ་བཞིན་གཤེགས་པ་མགོན་པོ་ཀུན་ཏུ་གཟིགས་ལ་སོགས་པ་དཔག་གིས་མི་ལོང་ཞིང་བསམ་ལས་འདས་པའི་འདྲེན་པ་མི་ཡི་སེང་གེ་རིམ་པར་འབྱོན་པར་འགྱུར་བ་ཡིན་ལ། དེ་ལྟར་སངས་རྒྱས་བྱོན་པའི་བསྐལ་པ་རྣམས་ནི་སྒྲོན་བསྐལ་དང༌། མི་བྱོན་པའི་བསྐལ་པ་རྣམས་ནི་མུན་བསྐལ་ཞེས་བྱ་ཞིང་། མུན་བསྐལ་ནི་ཤིན་ཏུ་མང་ལ། སྒྲོན་བསྐལ་དཀོན་པ་སྟེ། བསྐལ་པ་བཟང་པོ་འདི་འདས་པའི་འོག་ཏུ་མུན་བསྐལ་བསྐལ་ཆེན་དྲུག་ཅུ་རྩ་ལྔ་འདས་པ་དང་སྙན་པ་ཆེན་པོ་ཞེས་བྱ་བའི་སྒྲོན་བསྐལ་ལ་སངས་རྒྱས་ཁྲི་བྱོན། དེ་ནས་མུན་བསྐལ་བརྒྱད་ཁྲི་འདས་ནས་སྐར་མ་ལྟ་བུ་ཞེས་བྱ་བའི་སྒྲོན་བསྐལ་ལ་སངས་རྒྱས་བརྒྱད་ཁྲི་འབྱོན། དེ་ནས་མུན་བསྐལ་སུམ་བརྒྱ་འདས་ནས་ཡོན་ཏན་བཀོད་པ་ཞེས་བྱ་བའི་སྒྲོན་བསྐལ་ལ་སངས་རྒྱས་བརྒྱད་ཁྲི་བཞི་སྟོང་འབྱོན་པར་མདོ་སྡེ་བསྐལ་པ་བཟང་པོ་ལས་གསུངས་པས་མཚོན། གསུང་རབ་རྣམས་ལས་མཐའ་ཡས་པ་འབྱུང་བ་ལས། བྱེ་བྲག་པདྨོ་སྟོང་མཐོང་གི་བསྐལ་པ་བཟང་པོ་འདི་ལ་བར་གྱི་སངས་རྒྱས་ཞེས་བྱ་བ་གྲངས་ངེས་མེད་པ་ཁ་ཅིག་ཀྱང་(༦༠བ)འབྱོན་པར་བཞེད་ལ། སངས་རྒྱས་སྟོང་འབྱུང་བའི་གྲངས་ངེས་སུ་མཛད་པ་ནི་ཐེག་པ་ཆེ་ཆུང་ཐུན་མོང་དུ་གྲགས་པ་དང༌། སྔོན་བྱང་ཆུབ་ཀྱི་སྤྱད་པ་སྤྱོད་པའི་ཚེ་ཐུགས་བསྐྱེད་སྨོན་ལམ་ལྷན་ཅིག་ཏུ་ཚོགས་པ་རྣམས་ཡིན་ལ། དེ་ཡང་ཐེག་དམན་པ་དག་འཇིག་རྟེན་འདིའི་མར་འགྲིབ་ཀྱི་ཚེ་ལོ་བརྒྱད་ཁྲི་ནས་བརྒྱའི་བར་ལ་སངས་རྒྱས་བྱོན་ཏེ། དེ་ལས་སྔ་བར་སེམས་ཅན་རྣམས་སྐྱོ་ཤས་ཆུང་ཞིང་ཆོས་དོན་དུ་མི་གཉེར་བས་མི་འབྱོན་ལ། བརྒྱ་ལས་ཕྱི་ནའང་སྙིགས་མ་ཧ་ཅང་ཤས་ཆེ་བས་མི་འབྱོན་ཞིང༌། ཡར་འཕེལ་ལ་མི་དགེ་བ་ངང་གིས་སྤོང་བ་དང་དགེ་བའི་སྟོབས་འཕེལ་བས་འབྱོན་མི་དགོས་ཞེས་འདོད་ཅིང༌། བསྐལ་པ་འདིའི་ཚེ་ལོ་བཞི་ཁྲིའི་དུས་སུ་སངས་རྒྱས་སྟོང་གི་ཐོག་མ་འཁོར་བ་འཇིག །སུམ་ཁྲི་ལ་གསེར་ཐུབ། ཉི་ཁྲི་ལ་འོད་སྲུང༌། བརྒྱ་པ་ལ་ཤཱཀྱ་ཐུབ་པ། བརྒྱད་ཁྲིའི་དུས་སུ་བྱམས་པ་འབྱོན་པ་སོགས། སངས་རྒྱས་རེ་རེའི། ཡུལ་དང་། རིགས་དང་། འོད་དང་། ཡབ་དང་། ཡུམ་དང་། སྲས་དང་། རིམ་གྲོ་པ་དང་། ཤེས་རབ་ཅན་དང་། རྫུ་འཕྲུལ་ཅན་གྱི་མཆོག་དང་། འཁོར་དང་། སྐུ་ཚེ་དང་། བསྟན་པའི་གནས་ཚད་དང་། སྐུ་གདུང་སྟེ། དོན་བཅུ་གསུམ་དང་བཅས་མདོ་སྡེ་བསྐལ་བཟང་ལས་ཞིབ་པར་བསྟན་ཅིང༌། ཀུན་གྱི་ཐ་མར་སངས་རྒྱས་དེ་དག་གི་སྐུ་ཚེ་ཕྲིན་ལས་གཅིག་ཏུ་བསྡམས་པ་དེ་བཞིན་གཤེགས་པ་མོས་པའམ་སྣང་མཛད་ཅེས་བྱ་བའི་འཇིག་རྟེན་འདྲེན་པ་འབྱོན་པར་གསུངས་པ་ལས། དེ་དག་གི་དབུས་ན་སངས་རྒྱས་ཀུན་གྱིས་སྤངས་པའི་རྩོད་དུས་ཀྱི་གདུལ་བྱ་བཟུང་བའི་སྙིང་སྟོབས་ལ་སུས་ཀྱང་འགྲན་ཟླ་མེད་པས། ཨེ་མ་བྱང་ཆུབ་སེམས་དཔའ་འདི་ནི་པདྨ་དཀར་པོ་ལྟ་བུའོ་ཞེས་རྒྱལ་བ་སྲས་དང་བཅས་པས་བསྔགས་ཤིང་ཆེད་དུ་བརྗོད་པ་ནི་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་འདི་ཉིད་ཡིན་ནོ། ། ཅ༢ གཉིས་པ་[དེའི་རྣམ་ཐར་སྡོམས་སུ་བསྟན་པ་]ནི། ཐོག་མར་ཐུགས་བསྐྱེད་བར་དུ་སྤྱོད་པ་སྤྱད། ། ཐ་མར་མངོན་སངས་རྒྱས་ཏེ་འགྲོ་དོན་མཛད། ། སྟོན་པ་ཐུགས་རྗེ་ཅན་འདི་ཉིད་དོན་དམ་པར་ཐོག་མ་མེད་པའི་དུས་(༦༡ན)ནས་མངོན་པར་བྱང་ཆུབ་སྟེ། སངས་རྒྱས་དང་བྱང་ཆུབ་སེམས་དཔའི་རྣམ་པར་འཕྲུལ་པས་འགྲོ་བའི་དོན་དུས་གསུམ་དུ་མཛད་པ་ལས། རྩོད་པའི་དུས་ཀྱི་གདུལ་བྱ་རྣམས་ཀྱི་དོན་དུ་ཐོག་མར་བྱང་ཆུབ་མཆོག་ཏུ་ཐུགས་བསྐྱེད། བར་དུ་གྲངས་མེད་གསུམ་ལ་སོགས་པར་སྤྱོད་པ་སྤྱད། ཐ་མར་མ་ག་དྷ་རྡོ་རྗེའི་གདན་ལ་མངོན་པར་རྫོགས་པར་འཚང་རྒྱ་བའི་ཚུལ་བསྟན་ཏེ། འདུལ་བ་བཞིའི་ཆོ་འཕྲུལ་ཆེན་པོས་འགྲོ་བའི་དོན་རྒྱུན་ཆད་མེད་པར་མཛད་དོ་ཞེས་བྱ་བ་འདི་ནི་རྣམ་པར་ཐར་པའི་མདོར་བསྟན་ནམ་སྡོམ་ཚིག་ཏུ་བཟུང་བར་བྱའོ། ། ཅ༣ གསུམ་པ་[དང་པོར་ཐུགས་བསྐྱེད་པའི་ཚུལ་]ལ་གཉིས། ཆ༡ ཐེག་དམན་པའི་ལུགས། ཆ༢ ཐེག་ཆེན་གྱི་ལུགས་སོ། ། ཆ༡ དང་པོ་ནི། དེ་ཡང་ཐེག་དམན་ལྟར་ན་འོད་ལྡན་རྒྱལ། ། གསུམ་ལ་བརྟེན་ནས་དང་པོར་ཐུགས་མཆོག་བསྐྱེད། ། དེ་ནས་ཤཱཀྱ་ཐུབ་ཆེན་ཚངས་པའི་ལྷ། ། མཐོང་ནས་ཐུགས་བསྐྱེད་གྲངས་མེད་དང་པོ་བརྩམས། ། དེའང་སྟོན་པ་ཉིད་ཀྱིས་ཐུགས་བསྐྱེད་པའི་ཚུལ་ལ། ཐེག་དམན་ཉན་ཐོས་པ་རྣམས་ཀྱི་འདོད་པ་ལྟར་ན། སྔོན་འདས་པའི་དུས་ན་སྟོན་པ་འདི་རྒྱལ་པོ་འོད་ལྡན་དུ་གྱུར་པའི་ཚེ། རྒྱུ་མཚན་གསུམ་ལ་བརྟེན་ནས་སྦྱིན་པ་བྱིན། སྨོན་ལམ་བཏབ་ཅིང་། བླ་ན་མེད་པའི་བྱང་ཆུབ་ཏུ་ཐུགས་མཆོག་བསྐྱེད་པར་གསུངས་ཏེ། འདུལ་བ་ལུང་ལས་ཀུན་དགའ་བོས། འཇིག་རྟེན་གཙོ་བོ་རྣམ་འདྲེན་པ། ། ཐུབ་པ་ཁྱེད་ཀྱིས་བྱང་ཆུབ་ཐུགས། ། ཐོག་མར་གང་དུ་བསྐྱེད་པ་དག ། སྐལ་ལྡན་ཆེན་པོས་བདག་ལ་གསུང༌། ། ཞེས་སོགས་ཞུས་པ་ན། སངས་རྒྱས་འདོད་ཆགས་བྲལ་ཐོས་ཤིང༌། ། གླང་པོ་དྲེགས་པའི་ཤས་ཆེན་དང༌། ། འཇིག་རྟེན་སྡུག་བསྔལ་གྱུར་མཐོང་ནས། ། ངས་ནི་བྱང་ཆུབ་སེམས་བསྐྱེད་དོ། ། ཞེས་སོགས་བཀའ་སྩལ་པར་གསུངས་པས་སོ། ། དེ་ནས་སྟོན་པ་འདི་ཡངས་པའི་གྲོང་ཁྱེར་དུ་རྫ་མཁན་ཡངས་པའི་འོད་ཅེས་བྱ་བར་གྱུར་པའི་ཚེ། བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བ་འཇིག་རྟེན་དུ་བྱུང་བ་དེའི་སྐུ་ལ་མར་དང་(༦༡བ)ཏིལ་མར་གྱིས་བྱུགས་ཤིང་བུར་ཆུའི་བཏུང་བ་སོགས་གསོལ་ཏེ། བདག་ཀྱང་རབ་ཏུ་སྦྱིན་པ་འདི་ཡིས་ཤཱཀྱའི་རིགས་སྐྱེས་པ། ། ཡོན་ཏན་རིགས་དང་རུས་དག་མཉམ་པའི་སངས་རྒྱས་ཉིད་གྱུར་ཅིང༌། ། བདག་གིས་ཚངས་པའི་འཇིག་རྟེན་བར་གྱི་ཉམ་ཐག་འཆིང་བ་ཡི། ། ཕ་རོལ་ཞི་བ་རྒྱ་ཆེན་འཇིགས་པ་མེད་པར་སྒྲོལ་བར་ཤོག ། ཅེས་སྨོན་ལམ་བཏབ་ཅིང་ཐུགས་བསྐྱེད། ཡང་གནས་བརྟན་པ་རྣམས་ཀྱི་འདོད་པ། སྟོབས་བཅུ་དཔལ་བཤེས་གཉེན་གྱིས་