Tibetan
འདུས་བྱས་དང་འདུས་མ་བྱས་རྣམ་པར་ངེས་པའི་བསྟན་བཅོས་སུ་བཀོད་པར། བཅོམ་ལྡན་འདས་ལྷག་པའི་ལྷ་ཞེས་བྱ་བ་འཁོར་ལོས་སྒྱུར་བ་མིའི་བདག་པོར་གྱུར་པས། ཐོག་མ་མེད་པའི་འཁོར་བ་རུ་སྔོན་མ་མཐོང་བ་སངས་རྒྱས་ཚངས་པའི་ལྷ་མཐོང་བས་རྣམ་པ་འདི་ལྟ་བུར་བདག་སངས་རྒྱས་ཉིད་དུ་གྱུར་ཅིག་ཅེས་བསམ་པ་ཙམ་གྱི་མངོན་པར་འདོད་དོ། །ཞེས་བཤད་དེ། གང་ལྟར་རྒྱལ་བ་དེ་དག་མཐོང་ནས་ཐུགས་བསྐྱེད་དེ་གྲངས་མེད་གསུམ་གྱི་དང་པོའི་མགོ་བརྩམ་པར་འདོད་དོ། ། ཆ༢ གཉིས་པ་[ཐེག་ཆེན་གྱི་ལུགས་]ནི། ཐེག་ཆེན་ལུགས་སུ་བྲམ་ཟེ་རྒྱ་མཚོའི་རྡུལ། ། རང་སྲས་རྒྱལ་བ་རིན་ཆེན་སྙིང་པོ་ལ། ། སྲོག་ཆགས་བྱེ་བ་ཁྲག་ཁྲིག་འབུམ་ཕྲག་འབུམ། ། བྱང་ཆུབ་འཛིན་དུ་བཅུག་མཐར་རང་ཉིད་ཀྱིས། ། རྩོད་པའི་དུས་བཟུང་སྨོན་ལམ་ལྔ་བརྒྱ་བཏབ། ། ལུང་བསྟན་ཐོབ་ཅིང་གཞན་ཡང་དམྱལ་མེའི་གྱད། ། དོན་ཡོད་མཐོང་ལ་བསྐྱེད་སོགས་དུ་མར་གསུངས། ། ཐེག་པ་ཆེན་པོའི་སྡེ་སྣོད་རྣམས་ལས་འབྱུང་བའི་ལུགས་སུ་བཤད་ན། སྙིང་རྗེ་པད་དཀར་ལས། སྔོན་བྱུང་བ་བསྐལ་པ་གྲངས་མེད་པ་གདྒཱའི་བྱེ་མ་སྙེད་འདས་པ་ན་སངས་རྒྱས་ཀྱི་ཞིང་འདིར་བསྐལ་པ་ཆེན་པོ་འཛིན་པ་ཞེས་བྱ་བ་ཞིག་བྱུང་སྟེ། བསྐལ་པ་ཆེན་པོ་དེ་ལ་གླིང་བཞི་པའི་སངས་རྒྱས་ཀྱི་ཞིང་འདིར་གླིང་བཞི་པའི་འཁོར་ལོས་སྒྱུར་བའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་ཞིག་བྱུང་ངོ༌། །དེའི་མདུན་ན་འདོན་གྱི་(༦༣ན)གཙོ་བོ་བྲམ་ཟེ་རྒྱ་མཚོའི་རྡུལ་ཞེས་བྱ་བའི་སྲས་རྒྱ་མཚོའི་སྙིང་པོ་མངོན་པ་སངས་རྒྱས་ནས་མཚན་རིན་ཆེན་སྙིང་པོར་གྱུར་པ་དེ་རྩིབས་ཀྱི་མུ་ཁྱུད་སྲས་སྟོང་དང་བཅས་པའི་འབྱོར་པ་བླ་ན་མེད་པས་མངོན་པར་མཆོད་ཅིང༌། མཐར་བྲམ་ཟེ་ཆེན་པོས་ཀྱང་དེ་བཞིན་དུ་མཆོད་དོ། ། དེ་ནས་དུས་གཞན་ཞིག་ན་བྲམ་ཟེ་དེས་ཛམྦུའི་གླིང་པའི་མི་རྣམས་བསླབ་པའི་གཞི་ལྔ་དང་བྱང་ཆུབ་ཀྱི་སེམས་ལ་བཀོད་ཅིང༌། རྒྱལ་པོ་རྩིབས་ཀྱི་མུ་ཁྱུད་དང་མིག་མི་འཛུམ་སོགས་སྲས་སྟོང་དང་བཅས་པ་བྱང་ཆུབ་ཏུ་སེམས་ཡང་དག་པར་བསྐྱེད་དུ་བཅུག་གོ། ། དེ་ནས་དེ་དག་གིས་ལོ་བདུན་དུ་སོ་སོའི་ཞིང་གི་ཡོན་ཏན་དག་བསམས་ནས་བཅོམ་ལྡན་འདས་ཀྱི་སྤྱན་སྔར་སེམས་བསྐྱེད་ཅིང་ཞིང་བཟུང་ནས་སྨོན་ལམ་བཏབ་པས། དེ་བཞིན་གཤེགས་པ་རིན་ཆེན་སྙིང་པོ་རྩིབས་ཀྱི་མུ་ཁྱུད་ནི་བདེ་བ་ཅན་གྱི་ཞིང་དུ་ཚེ་དཔག་མེད་དུ་འཚང་རྒྱ་བར་ལུང་བསྟན། དེ་བཞིན་དུ། སྲས་ཐུ་བོ་མིག་མི་འཛུམ་ནི་སྤྱན་རས་གཟིགས་སུ་མིང་བཏགས་ནས་ཚེ་དཔག་མེད་སྲོད་ལ་མྱ་ངན་ལས་འདས་པའི་ཐོ་རངས་སུ་འོད་ཟེར་ཀུན་འཕགས་དཔལ་བརྩེགས་རྒྱལ་པོར་འཚང་རྒྱ་བ་དང༌། གཉིས་པ་ནི་མཐུ་ཆེན་ཐོབ་སྟེ། རབ་ཏུ་བརྟན་པ་ནོར་བུ་བརྩེགས་པའི་རྒྱལ་པོར། གསུམ་པ་ནི་དབང་པོའི་ཚོགས་འཇམ་དཔལ་ཏེ། ཀུན་ཏུ་གཟིགས་ནས། རྒྱལ་སྲས་དགུ་པ་སྡིག་མེད་ནི་མི་འཁྲུགས་པ་སྟེ། མངོན་དགའི་ཞིང་དུ་མི་འཁྲུགས་པར་འགྱུར་བ་སོགས་སྟོང་ཚང་བར་ལུང་བསྟན་ཏོ། ། དེ་ནས་ཁམས་ཀྱི་རྒྱལ་ཕྲན་དང་རྒྱ་མཚོའི་རྡུལ་གྱི་སྲས་དང་སློབ་མའི་ཚོགས་ལ་སོགས་པ་སྲོག་ཆགས་བྱེ་བ་དུང་ཕྱུར་མང་པོ་ལུང་བསྟན་ཅིང༌། འཇིག་རྟེན་གྱི་ཁམས་མི་མཇེད་དུ་བསྐལ་པ་བཟང་པོ་འདི་ཉིད་ལ། སྐར་མ་སྐྱོང་འཁོར་བ་འཇིག་ནས། སྟོབས་ཆེན་ཤུགས་འཆང་མོས་པའི་བར་དུ་ལུང་བསྟན་ཀྱང་ཁྱབ་འཇུག་རླུང་མ་གཏོགས་པ་གཞན་གྱིས་རྩོད་པའི་དུས་སྤངས་པས། རང་ཉིད་ཀྱིས་ལྷག་པར་རྩོད་པའི་དུས་བཟུང་ནས་སྨོན་ལམ་བྱ་བར་(༦༢བ)བརྩམས་པ་ན་འཇིག་རྟེན་གྱི་ཁམས་རབ་ཏུ་གཡོས་ཤིང་ངོ་མཚར་གྱི་སྣང་བ་དུ་མས་ཁྱབ་པར་གྱུར་ཅིང༌། རང་རེ་སྙིགས་མ་ལྔ་བདོ་བའི་འགྲོ་བ་རྣམས་སྒྲོལ་བར་མཛད་པའི་སླད་དུ་སྙིང་སྟོབས་ཟླ་མེད་པའི་ཤུགས་བསྐྱེད་ནས་སྨོན་ལམ་ཆེན་པོ་ལྔ་བརྒྱ་བཏབ་བོ། ། དེའི་ཚེ་རྒྱལ་བ་རིན་ཆེན་སྙིང་པོས་བརྩོན་འགྲུས་སོགས་ཡོན་ཏན་དཔག་ཏུ་མེད་པའི་སྒོ་ནས་བསྔགས་པ་ཆེར་མཛད་ཅིང་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཀྱང་བསྔགས་ཤིང་ཆེད་དུ་བརྗོད་ནས། འཇིག་རྟེན་གྱི་ཁམས་མི་མཇེད་དུ་བསྐལ་པ་བཟང་པོ་ལ་སྐྱེ་དགུའི་ཚེ་ལོ་བརྒྱ་ཉི་ཤུ་ཐུབ་པའི་ཚེ། དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བར་ལུང་བསྟན་པར་མཛད་དོ། །ཞེས་བྱུང་ངོ༌། ། གཞན་ཡང་སངས་རྒྱས་ཀྱི་དྲིན་ལན་བསབས་པའི་མདོ་ལས། བྱང་ཆུབ་སེམས་དཔའ་དགའ་བའི་རྒྱལ་པོས། བཅོམ་ལྡན་འདས་ལ་ཐོག་མར་སེམས་གང་དུ་བསྐྱེད་ཞུས་པ་ལ། སྔོན་གྱི་ཚེ་མེའི་ཤིང་རྟའི་དམྱལ་བར་དམྱལ་སྲུང་ཨ་ཝང་སྡོད་པའི་མེའི་ཤིང་རྟ་འདྲེན་མཁན་གྱི་གྱད་དུ་འཁྲུངས་པའི་ཚེ། ཉིད་ཀྱི་གྲོགས་ཤིག་སྟོབས་ཆུང་བས་ཤིང་རྟ་འདྲེན་མི་ནུས་པ་ན། ཨ་ཝང་གིས་ལྕགས་མདུང་རྩེ་གསུམ་པས་བསྣུན་ཅིང༌། ལྕགས་ཐོས་བརྡེགས་ནས་ཁྲག་ཆར་ཕབ་བོ། །དེར་སྙིང་རྗེ་མི་བཟོད་པ་སྐྱེས་པའི་རྐྱེན་གྱིས་བྱང་ཆུབ་ཏུ་ཐུགས་བསྐྱེད་ནས། ཨ་ཝང་ལ་སྙིང་རྗེའི་སེམས་ཅུང་ཟད་སྐྱེད་ཅིག་པར་གསོལ་བས། དེ་ཁྲོས་ཏེ་ལྕགས་ཀྱི་རྩེ་གསུམ་གཉའ་བར་བཙུགས་པས་ཚེ་འཕོས་ཏེ། བསྐལ་པ་བརྒྱད་ཀྱི་སྡིག་བྱང་ནས་དམྱལ་བའི་གནས་དེ་ལས་ཐར་བར་གྱུར་པའི་ཚུལ་རྒྱས་པར་འབྱུང་བ་དང༌། ཕུང་པོ་གསུམ་པའི་མདོ་ལས། ཇི་ལྟར་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ཚོང་དཔོན་གྱི་བུ་མངོན་དགར་གྱུར་པ་ན། བཅོམ་ལྡན་འདས་དེ་བཞིན་གཤེགས་པ་མཛེས་ཆེན་ལ་བརྟེན་ཏེ། དང་པོར་བྱང་ཆུབ་ཏུ་ཐུགས་བསྐྱེད་པ་དེ་བཞིན་དུ། ཞེས་ཀྱང་གསུངས་པ་དང༌། (༦༣ན) རྒྱ་ཆེར་རོལ་པར། ཐོག་མར་ཁྱོད་ཀྱིས་དོན་ཡོད་མཐོང་ལ་སཱ་ལའི་མེ་ཏོག་གིས་ནི་མཆོད། ། ཅེས་དེ་བཞིན་གཤེགས་པ་མངོན་སུམ་དུ་མཛད་ནས་ཐུགས་བསྐྱེད་པའི་ཐོག་མ་དེ་བཞིན་གཤེགས་པ་དོན་ཡོད་མཐོང་གི་དྲུང་དུ་ཡིན་པར་ཡང་གསུངས་སོ། ། དེ་ལྟར་ཐོག་མར་ཐུགས་བསྐྱེད་ཚུལ་ཐེག་པ་ཆེ་ཆུང་གི་ཁྱད་པར་དང༌། ཐེག་ཆེན་ཉིད་ལའང་མདོ་རྣམས་སུ་མི་འདྲ་བ་དུ་མར་འབྱུང་བ་རྣམས་ནི་གདུལ་བྱའི་སྐབས་བསམ་པའི་ཁྱད་པར་དང༌། སྨོན་འཇུག་དོན་དམ་གྱི་ཐུགས་བསྐྱེད་པའི་ཁྱད་པར་སོགས་དགོངས་གཞི་མང་པོས་ཐ་དད་དུ་གསུངས་པར་མངོན་པས། ཐུགས་བསྐྱེད་ཀྱི་ཐོག་མ་འདི་ཁོ་ནའོ་ཞེས་ཕྱོགས་གཅིག་ཏུ་མངོན་པར་ཞེན་ཅིང་གོ་རིམ་དཀྲིགས་ཆར་བསྒྲིགས་པ་ལ་ནི་སྙིང་པོ་མེད་དོ། ། ཅ༤ བཞི་པ་[བར་དུ་བྱང་ཆུབ་སྤྱོད་པ་སྤྱད་ཚུལ་]ལའང་གཉིས། ཆ༡ ཐེག་དམན་གྱི་ལུགས་དང༌། ཆ༢ ཐེག་ཆེན་གྱི་ལུགས་སོ། ། ཆ༡ དང་པོ་ནི། བྱེ་སྨྲས་གྲངས་མེད་གསུམ་གྱིས་མཐར་ཕྱིན་འདོད། ། དེ་ལ་འདུལ་མཛོད་འཇོག་མཚམས་འདྲ་མིན་གཉིས། ། བར་དུ་བྱང་ཆུབ་ཀྱི་སྤྱོད་པ་སྤྱད་པའི་ཚུལ་ནི། འདུལ་བ་ལུང་ལས། སངས་རྒྱས་ཤཱཀྱ་ཐུབ་པ་ནས། ། འདྲེན་པ་ཡུལ་འཁོར་སྐྱོང་གི་བར། ། དེའི་བར་བདུན་ཁྲི་ལྔ་སྟོང་གི། ། སངས་རྒྱས་རྣམས་ནི་ངས་མཆོད་དོ། ། གྲངས་མེད་གཅིག་གི་གནས་པ་ཡིས། ། རྒྱལ་བ་ངས་ནི་མཆོད་བྱས་ཏེ། ། ཞེས་དང༌། སངས་རྒྱས་མར་མེ་མཛད་ནས་ནི། ། དབང་པོའི་རྒྱལ་མཚན་ཐུབ་པའི་བར། ། བདུན་ཁྲི་དྲུག་སྟོང་དག་གི་ནི། ། སངས་རྒྱས་རྣམས་ནི་ང་ཡིས་མཆོད། ། གྲངས་མེད་གཉིས་པོ་ཚང་བར་ནི། ། ཞེས་དང༌། སངས་རྒྱས་ལེགས་མཛད་ནས་བཟུང་སྟེ། ། སངས་རྒྱས་འོད་སྲུང་བར་དག་ཏུ། ། བདུན་ཁྲི་བདུན་སྟོང་ང་ཡིས་མཆོད། ། གྲངས་མེད་གསུམ་པོ་དེ་ལ་ནི། ། ཞེས་གསུངས་པ་དང༌། མཛོད་ལས། རྣམ་གཟིགས་མར་མེ་རིན་ཆེན་གཙུག ། གྲངས་མེད་གསུམ་གྱི་ཐ་མར་བྱུང༌། ། དང་པོ་ཤཱཀྱ་ཐུབ་པ་ཡིན། །(༦༣བ) ཞེས་བཤད་པ་ལས། བྱེ་བྲག་ཏུ་སྨྲ་བ་རྣམས་སྟོན་པས་བསྐལ་པ་གྲངས་མེད་གསུམ་གྱིས་ལམ་བགྲོད་པར་འདོད་ཅིང༌། འདིའི་ལུགས་ཀྱི་གྲངས་མེད་བརྩམ་པའི་ཐོག་མའང༌། ཉིད་ཀྱིས་དེ་བཞིན་གཤེགས་པ་ལ་མངོན་སུམ་དུ་བསྙེན་ཅིང་ཐུགས་བསྐྱེད་པ་ནས་བརྩམ་པར་གསལ་ལོ། ། དེས་ན་གྲངས་མེད་གསུམ་ལ་ཤཱཀྱ་ཐུབ་པ་ནས་བརྩམས་ཏེ་སངས་རྒྱས་འོད་སྲུངས་ཀྱི་བར་དུ། དེ་བཞིན་གཤེགས་པ་འབུམ་ཕྲག་གཉིས་དང་ཁྲི་ཕྲག་གསུམ་ལ་བསྙེན་བཀུར་མཛད་དེ་ཚོགས་བསགས་པ་ཡིན་ཅིང༌། མཛོད་ཀྱི་ལུགས་དེ་ལྟར་ན། ཤཱཀ་ཐུབ་ནས་རིན་ཆེན་གཙུག་ཏོར་གྱི་བར་གྱིས་གྲངས་མེད་དང་པོ། དེ་ནས་མར་མེ་མཛད་ཀྱི་བར་གྲངས་མེད་གཉིས་པ། དེ་ནས་རྣམ་གཟིགས་ཀྱི་བར་གསུམ་པ་འདས་ཤིང༌། ཀུན་ལ་ཐམས་ཅད་སྙིང་རྗེ་ཡིས། ། སྦྱིན་པར་བྱས་པས་སྦྱིན་པ་རྫོགས། ། ཆགས་བཅས་ཡན་ལག་བཅད་ཀྱང་ནི། ། མི་འཁྲུགས་བཟོད་དང་ཚུལ་ཁྲིམས་ཀྱི། ། སྐར་རྒྱལ་བསྟོད་པས་བརྩོན་འགྲུས་ཀྱི། ། ཞེས་པས་དེའི་ཚེ་ཕར་ཕྱིན་དང་པོ་གསུམ་རྫོགས་པར་མཛད་དེ། དེ་ནས་ཕུག་ཅིག་ཏུ་དེ་བཞིན་གཤེགས་པ་སྐར་རྒྱལ་གཟི་བརྗིད་ཀྱི་དབྱིངས་སུ་སྙོམས་པར་ཞུགས་པ་མཐོང་ཞིང༌། ཤིན་ཏུ་དད་པས་རྐང་པ་ཡ་གཅིག་གིས་འགྲེང་བའི་བརྩོན་འགྲུས་ཀྱིས་ཉིན་ཞག་བདུན་དུ། སྐྱེས་བུ་ཁྱུ་མཆོག་ཁྱོད་འདྲའི་དགེ་སྦྱོང་ཆེན་པོ་གཞན་དག་ལྷ་ཡུལ་ས་ལ་མེད། ། འཇིག་རྟེན་འདི་ནའང་ཡོད་པ་མ་ཡིན་རྣམ་ཐོས་བུ་ཡི་གནས་ནའང་ཡོད་མ་ཡིན། ། ལྷ་ཡི་ཕོ་བྲང་གནས་མཆོག་དག་ནའང་ཡོད་མིན་ཕྱོགས་དང་ཕྱོགས་མཚམས་དག་ནའང་མེད། ། རི་དང་ནགས་སུ་བཅས་པའི་ས་སྟེང་རྒྱས་པར་ཀུན་ཏུ་ཡུལ་གཅིག་ག་ལ་ཡོད། ། ཅེས་པའི་ཚིགས་བཅད་ཀྱིས་བསྟོད་པས་བརྩོན་འགྲུས་རྫོགས་ཤིང་ཚོགས་བཟླུམས་ནས་བསྐལ་པ་དགུ་བཅུ་རྩ་གཅིག་ཏུ་མཚན་བཟང་གི་ལས་བསྒྲུབས་ཏེ། (༦༤ན)དགའ་ལྡན་གྱི་གནས་སུ་དེ་ཉིད་ཀྱི་ཚེ་ཚད་དང་མཚུངས་པར་བཞུགས་པ་སོགས་སྒྲ་ཇི་བཞིན་པར་འདོད་ལ། དེ་ལྟར་འདུལ་མཛོད་ཀྱི་འཇོག་མཚམས་ཅུང་ཟད་འདྲ་མིན་གཉིས་སུ་བྱུང་བ་ལས། མཛོད་ལུགས་ནི་གཞི་ཐམས་ཅད་ཡོད་པར་སྨྲ་བ་ལས་ཁ་ཆེ་བྱེ་སྨྲའི་འདོད་པ་དངོས་ཡིན་ལ། ལུང་ལས་བྱུང་བ་ནི། འཕགས་ཡུལ་དུ་སྡེ་པ་རྣམས་འདོན་ཚུལ་ཐ་དད་དུ་ཡོད་པས་སྡེ་པ་གཞན་གྱི་ཀློག་ཚུལ་ཞིག་དང་འདྲེས་པར་མངོན་ནོ། ། གནས་བརྟན་པ་རྣམས་སྨོན་སེམས་གྲངས་མེད་བདུན། ། དེ་ནས་གྲངས་མེད་དགུ་རུ་སྤྱོད་པ་སྤྱད། ། བཞི་ཡིས་སྒོ་གསུམ་སྤྱོད་ལ་འགྲུབ་པར་མཛད། ། འབུམ་གྱིས་ལས་ཕྲན་རྫོགས་ནས་འཚང་རྒྱར་འདོད། ། རྩ་བའི་སྡེ་པ་བཞི་ལས། གནས་བརྟན་པའི་ལུགས་ནི། སངས་རྒྱས་ཚངས་པའི་ལྷ་ལ་ཐོག་མར་ཐུགས་བསྐྱེད་པ་ནས་བརྩམས་ཏེ་བསྐལ་པ་གྲངས་མེད་བདུན་དུ་སངས་རྒྱས་ཆིག་འབུམ་ལྔ་ཁྲི་ལྔ་སྟོང་མཉེས་པར་བྱས་ཤིང་བྱང་ཆུབ་ལ་སྨོན་པ་ཙམ་མཛད་དོ། ། དེ་ནས་བསྐལ་པ་གྲངས་མེད་དགུར་སངས་རྒྱས་སུམ་འབུམ་བརྒྱད་ཁྲི་བདུན་སྟོང་མཆོད་ཅིང་བྱང་ཆུབ་ཀྱི་སྤྱོད་པ་སྤྱད། སེམས་དང་ངག་གིས་སྨོན་ལམ་མཛད་དོ། ། དེ་ནས་གྲངས་མེད་བཞིས་སངས་རྒྱས་བཅུ་གཉིས་མཆོད་ནས་སྒོ་གསུམ་གྱིས་བྱང་ཆུབ་ཀྱི་སྤྱད་པ་ལ་འགྲུས་པར་མཛད་ཅིང༌། དེ་ནས་བསྐལ་པ་འབུམ་ཕྲག་གཅིག་གིས་སངས་རྒྱས་བཅོ་ལྔ་མཉེས་པར་བྱས་ཏེ་སྒོ་གསུམ་གྱིས་བྱང་ཆུབ་སྤྱོད་པའི་ལས་ཕྲན་ཐམས་ཅད་རྫོགས་པར་མཛད་ནས་སངས་རྒྱས་སོ་ཞེས་འདོད་དོ། ། ཕལ་ཆེན་སྡེ་པས་བཅུ་ནས་སུམ་ཅུའི་བར། ། གྲངས་མེད་ཅི་རིགས་ཚོགས་གསོག་དགོས་པར་བཞེད། ། ཕལ་ཆེན་སྡེ་པས་སངས་རྒྱས་རྣམས་གྲངས་མེད་བཅུ་ཡན་སུམ་ཅུ་མན་ལས་གང་ཡང་རུང་བ་ཞིག་གིས་ཚོགས་བསགས་དགོས་པར་འདོད་ཀྱང༌། སྟོན་པ་འདི་ཅི་ཙམ་གྱིས་ལམ་བགྲོད་པ་གསལ་ཀ་(༦༤བ)ཡོད་པའི་གཞུང་མ་མཐོང་ངོ༌། ། ཆ༢ གཉིས་པ་[ཐེག་ཆེན་གྱི་ལུགས་]ལ་གསུམ། ཇ༡ གྲངས་ཀྱི་རྣམ་གྲངས་དང་དེ་དག་གི་དགོངས་གཞི་དང་དགོས་པ་བསྟན་པ། ཇ༢ སྤྱད་པ་སྤྱོད་ཚུལ་དངོས། ཇ༣ སྤྱད་བྱའི་ཆོས་བཤད་པའོ། ། ཇ༡ དང་པོ་ནི། ཐེག་ཆེན་ལ་ཡང་གསུམ་དང་སོ་གསུམ་དང༌། ། དུ་མར་བཞེད་རྣམས་གྲངས་གནས་བགྲང་ཚུལ་དང༌། ། རྩོམ་པའི་ཐོག་མ་སྨོན་སེམས་ཚོགས་ལམ་ཆེ། ། དང་པོའི་ས་ནས་འཛིན་སོགས་དགོངས་པའི་གཞི། ། རྙེད་དཀའ་བསྟན་དང་སྒྱིད་ལུག་སྤོང་བ་དང༌། ། དུས་ཀྱང་བསམ་མི་ཁྱབ་བསྟན་དགོས་པའི་དབང༌། ། ཐེག་པ་ཆེན་པོའི་ལུགས་ལའང་མདོ་རྒྱུད་ཕལ་ཆེ་བ་ཞིག་ལས་གྲངས་མེད་གསུམ་དུ་ཚོགས་བསགས་ཤིང་ལམ་བགྲོད་པར་གསུངས་ཏེ། དེའང་རྗེ་བཙུན་མ་ཕམ་པས། ས་ནི་དང་པོ་ཡིན་པར་འདོད། ། འདི་ནི་བསྐལ་པ་དཔག་མེད་ཀྱིས། ། ཞེས་དང༌། གྲངས་མེད་གཉིས་ནི་རྫོགས་པ་ཡིས། ། སྒོམ་པའི་ལམ་ནི་ཚར་ཕྱིན་ཏེ། ། ཞེས་སོགས་དང༌། དེ་དང་མཐུན་པར་འཇིགས་མེད་ཞབས་ཀྱིས། དེ་ལྟར་བསྐལ་པ་གྲངས་མེད་པ་དང་པོས་ཚོགས་ཀྱི་ས་ནས་བརྩམས་ནས་ས་དང་པོའི་བར་རྫོགས་པར་བྱེད་དོ། །གཉིས་པས་ནི་དྲི་མ་མེད་པ་ལ་སོགས་པ་དྲུག་གོ། །གསུམ་པས་ནི་མི་གཡོ་བའི་ས་ནས་བརྩམས་ཏེ་སངས་རྒྱས་ཀྱི་ས་ཡི་བར་རོ་ཞེས་མདོ་ལས་སོ་ཞེས་བཤད་དོ།། ཚིགས་ལེ་ཉེར་གཉིས་པར། འདི་ན་བཅོམ་ལྡན་འདས་བསྐལ་པ་གྲངས་མེད་པ་གསུམ་མམ་བདུན་དུ་བར་ཆད་མེད་པའི་ཚུལ་གྱིས་བརྩོན་པ། ཞེས་འབྱུང་ཞིང༌། མདོ་རྒྱ་ཆེར་རོལ་པ་ལས་ཀྱང༌། བསྐལ་པ་གྲངས་མེད་པ་བདུན་དུ་དགེ་བའི་རྩ་བ་ཡང་དག་པར་བསྒྲུབས་པ། ཞེས་གསུངས་པ་དང༌། ཨ་བྷྱ་དང་སྟོབས་བཅུ་དཔལ་བཤེས་ཀྱིས། འདི་ལྟར་བྱང་ཆུབ་སེམས་དཔའི་ཚོགས་ཀྱི་ཀུན་ཏུ་རྫོགས་པ་ནི་བསྐལ་པ་གྲངས་མེད་གཅིག་འདའ་བར་འགྱུར་རོ། ། དེའི་རྗེས་སུ་མོས་(༦༥ན)པས་སྤྱོད་པའི་ས་ཡོངས་སུ་རྫོགས་པར་འགྱུར་བ་ནི་བསྐལ་པ་གྲངས་མེད་གཉིས་འདའོ། ། དེའི་རྗེས་སུ་ས་དང་པོ་རབ་ཏུ་དགའ་བ་ནས་བཟུང་སྟེ་ས་བཅུ་པ་ཆོས་ཀྱི་སྤྲིན་གྱིས་ཇི་སྲིད་དུ་སོ་སོར་བསྐལ་པ་གྲངས་མེད་གསུམ་གྱིས་རྫོགས་པར་བྱས་ཏེ། སངས་རྒྱས་ཀྱི་ས་ཀུན་ཏུ་བཟང་པོ་སྒྲུབ་པར་བྱེད་པར་འགྱུར་རོ། ། དེ་ལྟར་བསྐལ་པ་གྲངས་མེད་སུམ་ཅུ་རྩ་གསུམ་གྱིས་སངས་རྒྱས་ཉིད་ཐོབ་བོ་ཞེས་ཟེར་རོ། །ཞེས་ན་ཡམ་ཙམ་དུ་བཀོད་པ་དང༌། དཀོན་མཆོག་སྤྲིན་གྱི་མདོར། དེ་བཞིན་གཤེགས་པ་ནི་བསྐལ་པ་གྲངས་མེད་པ་དུ་མས་ཡང་དག་པར་བསྒྲུབས་པ་ཡིན་ཏེ། རིགས་ཀྱི་བུ། དེ་བཞིན་གཤེགས་པ་ནི་དཔག་པ་དང༌། བསམ་པ་དང༌། བརྟག་པར་མི་ནུས་སོ། །ཞེས་གསུངས་པ་སོགས་བཞེད་པ་མང་པོ་བྱུང་བ་དེ་དག་གི་ཁ་ཅིག་གྲངས་ཀྱི་གནས་བགྲང་ཚུལ་ཐ་དད་པ་ལའང་དགོངས་པ་སྟེ། བྱང་ས་ལས། བསྐལ་ཆེན་རེ་ལ་ལོ་ཟླ་ཞག་དུས་སྐད་ཅིག་སོགས་གྲངས་མེད་པས་གྲངས་མེད་དུ་བཏགས་པའི་ཕྱོགས་གཅིག་དང༌། བསྐལ་ཆེན་ཉིད་བགྲང་བ་ལས་འདས་པ་ལ་གྲངས་མེད་དུ་བཏགས་པའི་ཕྱོགས་གཅིག་སྟེ་རྣམ་གཞག་གཉིས་གསུངས་པ་དང༌། འཕགས་པ་གནས་བརྟན་པ་དག་གིས། གྲངས་ཀྱི་གནས་ལྔ་བཅུ་རྩ་ལྔ་ལ་གྲངས་མེད་ཆུང་ངུ་། དེ་གྲངས་གནས་གཅིག་ཏུ་བརྩིས་པའི་ལྔ་བཅུ་རྩ་ལྔའི་བར་དུ་བསྒྲེས་པ་གྲངས་མེད་ཆེན་པོར་འདོད་པ་དང༌། མཛོད་གཞུང་འགྲེལ་དང་མཐུན་པར་ཨ་བྷ་ཡ་སོགས་མཁས་པ་མང་པོས་གྲངས་ཀྱི་གནས་དྲུག་ཅུ་པའི་གྲངས་མེད་ཉིད་བཤད་ཅིང༌། རྒྱ་རོལ་དང་ཕལ་ཆེན་སོགས་ལས། འཕགས་པ་རྣམས་ཀྱི་སྤྱོད་ཡུལ་དུ་གྱུར་པའི་གྲངས་ཀྱི་རྣམ་གཞག་ཤིན་ཏུ་རྒྱ་ཆེན་པོ་དག་ཀྱང་བསྟན་པས། གྲངས་ཀྱི་ཚུལ་འདི་ལྟ་བུ་མང་པོ་དག་ལ་སོ་སོར་དགོངས་ཏེ་གསུངས་པ་དང༌། གྲངས་མེད་རྩོམ་པའི་ཐོག་མའང་ཐོག་མའི་སྨོན་སེམས་ནས་བགྲང་བར་གསུངས་པ་དང༌། ཐེག་བསྡུས་ལས། (༦༥བ) བཟང་དང་སྨོན་པའི་སྟོབས་ཅན་དང༌། ། སེམས་བརྟན་ཁྱད་པར་འགྲོ་བ་ཡི། ། བྱང་ཆུབ་སེམས་དཔའ་གྲངས་མེད་གསུམ། ། ཀུན་ཏུ་རྩོམ་པར་མཛད་པ་ཡིན། ། ཞེས་ཚོགས་ལམ་ཆེན་པོ་ནས་རྩོམ་པར་གསལ་ཞིང༌། དཀོན་མཆོག་སྤྲིན་ལས། དོན་དམ་བྱང་ཆུབ་ཀྱི་སེམས་ཇི་ལྟ་བ་བཞིན་ཐོག་མར་མངོན་དུ་གསལ་བར་མཛད་པ་ས་དང་པོ་ཐོབ་པ་ནས་བགྲང་བར་གསུངས་པ་སོགས་དགོངས་པའི་གཞི་སྣ་ཚོགས་པ་དང༌། སྐབས་འགར་བསོད་ནམས་དང་ཡེ་ཤེས་ཀྱི་ཚོགས་ཤིན་ཏུ་རྒྱ་ཆེན་པོ་བསྟན་པས་སངས་རྒྱས་འབྱུང་བ་རྙེད་དཀའ་བའི་ཕྱིར་དུས་རིང་པོར་གསུངས་པ་དང༌། འགའ་ཞིག །དེས་སྒྱིད་ལུག་པར་འགྱུར་ཞིང་བྱང་ཆུབ་མཆོག་ལ་མི་འཇུག་པ་དག་ཀྱང་ཡོད་པས་དེ་རྣམས་གཞུག་པའི་ཕྱིར་དུས་ཐུང་ངུར་གསུངས་པ་དང༌། དོན་དམ་པར་གྲངས་དང་བགྲང་བ་སོགས་རང་བཞིན་གྱིས་དབེན་ཞིང་དུས་གཅིག་ལ་དུས་དུ་མ་མི་འགལ་བ་དང༌། དུ་མ་ལའང་གཅིག་ཏུ་སྡུད་པ་སོགས་བསམ་གྱིས་མི་ཁྱབ་པའི་དེ་ཁོ་ན་ཉིད་སྟོན་པའི་ཕྱིར་ཡང་མ་ངེས་པར་གསུངས་པ་སོགས། དགོས་པའི་དབང་དུ་མས་འཐད་པར་གྲུབ་པའི་ཕྱིར། འགལ་འདུར་མི་བཟུང་ངོ༌། ། ཇ༢ གཉིས་པ་[སྤྱད་པ་སྤྱོད་ཚུལ་དངོས་]ནི། ཡོངས་གྲགས་ཚོགས་ཀྱི་ལམ་ནས་དང་པོའི་བར། ། གྲངས་མེད་གཅིག་དང་གཉིས་པས་ས་དྲུག་བགྲོད། ། གསུམ་པས་མི་གཡོ་བ་ནས་བཅུ་གཅིག་བར། ། སོ་སྐྱེ་སློབ་ལམ་གྱིས་བསྡུས་ཚོགས་གཉིས་བསྒྲུབས། ། དེ་ལྟར་གྲངས་མེད་དང་བྱང་ཆུབ་སྤྱོད་པའི་ཚུལ་རྒྱ་ཆེ་ཆུང་ཅི་རིགས་འབྱུང་བ་ལས། ཡོངས་སུ་གྲགས་པའི་དབང་དུ་བྱས་ན། རྒྱལ་པོའི་བུ་གཞོན་ནུ་བརྩོན་འགྲུས་སྤྱོད་དུ་གྱུར་ཅིང་སངས་རྒྱས་ཕུང་པོ་ཆེན་པོ་བསྙེན་བཀུར་བ་ནས་བཟུང་སྟེ་བསྐལ་པ་གྲངས་མེད་གཅིག་ཚོགས་བསགས་པས་ཚོགས་ཀྱི་ལམ་ནས་ས་དང་པོའི་བར་དང༌། དེ་ནས་ཚོང་དཔོན་ཤེས་རབ་བཟང་དུ་གྱུར་ཅིང་སངས་རྒྱས་དཀོན་མཆོག་ཡན་ལག་བསྙེན་བཀུར་བ་ནས་བཟུང་སྟེ་གྲངས་མེད་གཉིས་པས་ས་གཉིས་པ་ནས་བདུན་པའི་བར་གྱི་ས་དྲུག་བགྲོད། དེ་ནས་བྲམ་ཟེའི་ཁྱེའུ་(༦༦ན)ཆོས་ཀྱི་སྤྲིན་དུ་གྱུར་ཅིང་སངས་རྒྱས་མར་མེ་མཛད་བསྙེན་བཀུར་བ་ནས་བཟུང་སྟེ་གྲངས་མེད་གསུམ་པས་ས་བརྒྱད་པ་