Tibetan
མི་གཡོ་བ་ནས་བཅུ་གཅིག་ཀུན་ཏུ་འོད་ཀྱི་བར་བགྲོད་ཅིང༌། དེ་དག་ལས་ཚོགས་སྦྱོར་ནི་སོ་སོའི་སྐྱེ་བོའི་ས་དང་ས་དང་པོ་ཡན་ཆད་འཕགས་པ་སློབ་ལམ་པའི་རྒྱུད་ཀྱིས་བསྡུས་ཤིང་བསོད་ནམས་དང་ཡེ་ཤེས་ཀྱི་ཚོགས་གཉིས་བསྒྲུབས་པར་མཛད་དོ། ། འགའ་ཞིག་དབང་རྟུལ་དད་ཅན་བཅུ་དྲུག་སྟེ། ། བརྩོན་འགྲུས་འབྲིང་པོ་འབུམ་ལྷག་གྲངས་མེད་བརྒྱད། ། དབང་རྣོན་ཤེས་རབ་ཅན་ནི་གྲངས་མེད་བཞིས། ། བགྲོད་ཅིང་སྟོན་པ་ཉིད་ནི་ཕྱི་མ་དང༌། ། དེ་ཡང་བརྩོན་འགྲུས་དྲག་པོས་མྱུར་བར་བཤད། ། སྤྱིར་བྱང་སེམས་རྣམས་ཀྱིས་ལམ་བགྲོད་པའི་ཡུན་ལ་མཁས་པ་འགའ་ཞིག་གང་ཟག་གི་དབང་གིས་དབང་རྟུལ་དད་པ་ཅན་གྲངས་མེད་བཅུ་དྲུག །འབྲིང་བརྩོན་འགྲུས་ཅན་འབུམ་ལྷག་པའི་གྲངས་མེད་བརྒྱད། དབང་རྣོན་ཤེས་རབ་ཅན་གྲངས་མེད་བཞི་རྣམས་ཀྱིས་བགྲོད་ཅིང༌། བདག་ཅག་གི་སྟོན་པ་ནི་ཕྱི་མ་དང༌། དེ་ལའང་བརྩོན་འགྲུས་དྲག་པོའི་ཁྱད་པར་གྱིས་གྲངས་མེད་གསུམ་ལྷག་ཙམ་ཞིག་གིས་ལམ་རྫོགས་པར་འཆད་པའང་ཡོད་དོ། ། ཇ༣ གསུམ་པ་[སྤྱད་བྱའི་ཆོས་བཤད་པ་]ནི། འགྲོ་སྨིན་ཞིང་སྦྱོང་ཕར་ཕྱིན་དྲུག་གིས་བགྲོད། ། ཡང་ན་ཐེག་པ་མཆོག་དམན་གཉིས་ཀ་ལ། ། མོས་རྣམས་འདུན་དང་འདུལ་ཕྱིར་སྤྱོད་པ་བཞི། ། མི་ཟད་བརྒྱད་ཅུ་ལ་སོགས་མཐར་ཕྱིན་མཛད། ། འོ་ན་བསྐལ་པ་བགྲང་བ་ལས་འདས་པར་བྱང་ཆུབ་སེམས་དཔས་སྤྱད་པར་བྱ་བའི་ཆོས་དེ་གང་ཞེ་ན། སྡུས་པ་ལས། བདག་ཉིད་ཆེན་པོ་སེམས་ཅན་ཡོངས་སུ་སྨིན་བྱ་དང༌། ། ཞིང་སྦྱོང་ཕ་རོལ་ཕྱིན་རྫོགས་དོན་བྱེད་ཁོ་ནར་ཟད། ། ཅེས་གསུངས་པ་ལྟར། སེམས་ཅན་ཡོངས་སུ་སྨིན་པར་མཛད་པ་དང༌། སངས་རྒྱས་ཀྱི་ཞིང་སྦྱོང་བ་དང༌། ཕ་རོལ་ཏུ་ཕྱིན་པ་དྲུག་རྫོགས་པར་མཛད་པ་སྟེ་རྣམ་པ་གསུམ་མམ། ཡང་ན། མདོ་སྡེ་རྒྱན་ལས། (༦༦བ) ལུས་ཅན་ཐེག་པ་ཆེན་པོ་དང༌། ། ཐེག་པ་དམན་ལ་མོས་པ་དང༌། ། གཉིས་པོ་འདུན་པར་བྱ་བ་དང༌། ། གདུལ་བའི་ཞིང་ན་བརྟན་རྣམས་ཀྱི། ། སྤྱོད་པ་བཞི་པོ། ཞེས་བཤད་པ་ལྟར། ཐེག་ཆེན་ལ་མོས་པ་རྣམས་ཀྱི་ཕྱིར་ཕ་རོལ་ཏུ་ཕྱིན་པ་བཅུའི་སྤྱོད་པ། ཐེག་དམན་ལ་མོས་པ་རྣམས་ཀྱི་ཕྱིར་བྱང་ཕྱོགས་སོ་བདུན་གྱི་སྤྱོད་པ། གཉི་ག་ལ་མོས་པ་རྣམས་མཐུས་འདུན་པར་བྱ་བའི་ཕྱིར་མངོན་པར་ཤེས་པའི་སྤྱོད་པ། ཐམས་ཅད་གདུལ་བའི་ཕྱིར་སེམས་ཅན་སྨིན་པའི་སྤྱོད་པ་སྟེ། རྣམ་པ་བཞིའམ། བློ་གྲོས་མི་ཟད་པས་ཞུས་པའི་མདོ་ལས། བྱང་ཆུབ་སེམས་དཔའ་རྣམས་ཀྱི་མི་ཟད་པ་བརྒྱད་ཅུ་གསུངས་པ་རྣམས་ཏེ། སེམས་བསྐྱེད་པ་མི་ཟད་པ་དང༌། བསམ་པ་དང༌། སྦྱོར་བ་དང༌། ལྷག་པའི་བསམ་པ་དང༌། ཕ་རོལ་ཏུ་ཕྱིན་པ་དྲུག་དང༌། ཚད་མེད་བཞི་དང༌། མངོན་ཤེས་ལྔ་དང༌། བསྡུ་བ་བཞི་དང༌། སོ་སོ་ཡང་དག་པ་རིག་པ་བཞི་དང༌། རྟོན་པ་བཞི་དང༌། ཚོགས་གཉིས་དང༌། བྱང་ཕྱོགས་སོ་བདུན་དང༌། ཞི་ལྷག་གཉིས་དང༌། གཟུངས་སྤོབས་གཉིས་དང༌། ཆོས་ཀྱི་མདོ་བཞི་དང༌། བགྲོད་པ་གཅིག་དང༌། ཐབས་ལ་མཁས་པ་མི་ཟད་པ་རྣམས་དང༌། གཞན་ཡང་བཟང་པོ་སྤྱོད་པ་ཚད་མེད་པས་སངས་རྒྱས་ཀྱི་ཡོན་ཏན་བསམ་བརྗོད་ཀྱི་ཡུལ་ལས་འདས་པ་ཐོབ་ཅིང་མཐར་ཕྱིན་པར་མཛད་དོ། ། ཅ༥ ལྔ་པ་ཞར་བྱུང་[དབང་པོའི་རིམ་པ་བསྟན་པ་]ནི། སེམས་མཆོག་ཐོག་མར་བསྐྱེད་དང་ས་དང་པོ། ། བརྒྱད་པའི་སྐབས་ནས་ཕྱིར་མི་ལྡོག་པ་གསུམ། ། དབང་པོའི་ཁྱད་ཡིན་ཐུབ་མཆོག་དང་པོའོ། ། བྱང་ཆུབ་སེམས་དཔའ་དབང་རྣོན་སེམས་མཆོག་དང་པོར་བསྐྱེད་པ་ཙམ་གྱིས་ཕྱིར་མི་ལྡོག་པ་དང༌། དབང་འབྲིང་ས་དང་པོའི་སྐབས་དང༌། དབང་རྟུལ་ས་བརྒྱད་པའི་སྐབས་ནས་ཕྱིར་མི་ལྡོག་པ་གསུམ། ཤིན་ཏུ་རྟུལ་པོ་ས་དགུ་པའི་སྐབས་སུའང་བཤད་དེ། དེ་དག་ཀྱང་གོང་སྨོས་ལྟར་དབང་པོའི་ཁྱད་པར་ཡིན་ཅིང༌། བདག་ཅག་གི་སྟོན་པ་ཐུབ་མཆོག་དོན་ཀུན་གྲུབ་པ་འདི་ནི་དང་པོ་ཡིན་ཏེ། བྲམ་ཟེ་(༦༧ན)རྒྱ་མཚོ་རྡུལ་གྱི་ཚེ་ཐུགས་དང་པོ་བསྐྱེད་པ་ཉིད་ནས་ཕྱིར་མི་ལྡོག་པའམ། བྱང་ཆུབ་སེམས་དཔའ་སྐྱོན་མེད་པ་ལ་ཞུགས་པར་དབུ་མ་པ་ཆོས་བཤེས་ཀྱི་ཤེར་ཊཱིཀ་ཏུ་གསལ་ལོ། ། སྟོན་པ་ཉིད་སྔོན་བྱང་ཆུབ་ཀྱི་ལམ་དུ་ཇི་ལྟར་གཤེགས་པའི་སྐབས་སོ། ། སྟོན་པ་ཉིད་སྔོན་བྱང་ཆུབ་ཀྱི་ལམ་དུ་ཇི་ལྟར་གཤེགས་པ་སྐབས་དང་པོའི་འགྲེལ་པའོ།། །། གཉིས་པ། སྟོན་པ་མངོན་པར་རྫོགས་པར་འཚང་རྒྱ་བའི་བཞེད་པ་ཐ་དད་པའི་སྐབས། ང༢ སྐབས་གཉིས་པ་དེ་བཞིན་གཤེགས་པ་འཚང་རྒྱ་བའི་ཚུལ་བཤད་པ་ལ་གཉིས། ཅ༡ མདོར་བསྟན། ཅ༢ རྒྱས་བཤད་དོ། ། ཅ༡ དང་པོ་ནི། བདེར་གཤེགས་འཚང་རྒྱའི་ཚུལ་ལ་ལུགས་གསུམ་སྟེ། ། བདག་ཅག་གི་སྟོན་མཆོག་བདེ་བར་གཤེགས་པ་ཉིད་མངོན་པར་རྫོགས་པར་འཚང་རྒྱ་བའི་ཚུལ་ལའང་། ཐེག་དམན་དང་། ཐེག་ཆེན། གསང་སྔགས་ཀྱི་སྡེ་སྣོད་ལས་འབྱུང་བའི་ལུགས་སྲོལ་གསུམ་ཡོད་དོ། ། སྟེ་ཞེས་པ་ལྷག་བཅས་ཀྱི་སྒྲས་མཚན་དཔེའི་སྦྱར་བའོ། ། ཅ༢ གཉིས་པ་ལ་གསུམ། ཆ༡ ཐེག་དམན་ཉན་ཐོས་ཀྱི་འདོད་པ། ཆ༢ ཐེག་པ་ཆེན་པོ་པ་རྣམས་ཀྱི་བཞེད་པ། ཆ༣ གསང་སྔགས་རྡོ་རྗེ་ཐེག་པའི་ཚུལ་ལས་འབྱུང་བའོ། ། ཆ༡ དང་པོ་ནི། ཉན་ཐོས་པ་རྣམས་གྲངས་མེད་གསུམ་གྱི་མཐར། ། བསྐལ་པ་བརྒྱ་ཡིས་མཚན་དཔེའི་རྒྱུ་བསྒྲུབས་ཏེ། ། དགའ་ལྡན་གནས་འཁྲུངས་མཛད་པ་བཅུ་གཉིས་བསྟན། ། ཚོགས་ལམ་ཆེན་པོའི་རྟེན་ལ་རྡོར་གདན་དུ། ། བཞུགས་པ་ཚུན་ཆད་སོ་སྐྱེ་འཆིང་ལྡན་ཏེ། ། སྟན་ཐོག་གཅིག་ལ་ལམ་བཞི་མཐར་ཕྱིན་མཛད། ། ཟད་དང་མི་སྐྱེ་ཤེས་པས་སངས་རྒྱས་འདོད། ། དེ་ལ་ཉན་ཐོས་པ་རྣམས་ཀྱིས་གོང་དུ་སྨོས་པ་ལྟར། གྲངས་མེད་གསུམ་དུ་ཚོགས་བསགས་པའི་མཐར་སངས་རྒྱས་སྐར་རྒྱལ་ལ་ཚིགས་བཅད་གཅིག་གིས་ཞག་བདུན་བར་མ་ཆད་དུ་བསྟོད་པས་བསྐལ་པ་དགུའི་ཚོགས་འདུམས། དེ་ནས་བསྐལ་པ་འདིའི་སངས་རྒྱས་འོད་སྲུང་བསྙེན་བཀུར་བ་ཡན་ཆད་ལ་བསྐལ་པ་དགུ་བཅུ་གོ་གཅིག་སྟེ། བསྐལ་ཆེན་བརྒྱར་མཚན་དཔེའི་རྒྱུ་བསྒྲུབས་ནས་དགའ་ལྡན་གྱི་གནས་སུ་ལྷའི་བུ་དམ་པ་ཏོག་དཀར་པོར་སྐུ་འཁྲུངས་ཤིང༌། (༦༧བ)དེ་ནས་དགའ་ལྡན་གྱི་གནས་ནས་འཕོ་བ་སོགས་མཛད་པ་བཅུ་གཉིས་བསྟན་པ་སྟེ། དེའང་སྲིད་པ་ཐ་མ་པ་རྒྱལ་བུ་དོན་གྲུབ་ཀྱི་དུས་གྲངས་མེད་གསུམ་གྱིས་ཚོགས་རྫོགས་ཀྱང་ཚོགས་ལམ་ཆེན་པོའི་རྟེན་ཙམ་ཡིན་ཅིང༌། དེ་ནས་རྡོ་རྗེའི་གདན་ལ་བཞུགས་པ་ཚུན་ཆད་སོ་སོའི་སྐྱེ་བོ་འཆིང་བ་ཀུན་ལྡན་ཡིན་ལ། བྱང་ཆུབ་ཀྱི་ཤིང་དྲུང་དུ་སྲོད་ལ་བདུད་དཔུང་བྱེ་བ་ཕྲག་སོ་བདུན་བཏུལ། སྟན་ཐོག་གཅིག་དེ་ཁོ་ནར་བདེན་བཞི་མི་རྟག་སོགས་བཅུ་དྲུག་རྟོགས་པའི་ལམ་གྱིས་སྦྱོར་མཐོང་སྒོམ་པ་མི་སློབ་པའི་བར་ལམ་བཞི་མཐར་ཕྱིན་པར་མཛད་ཅིང༌། ཟད་པ་དང་མི་སྐྱེ་བ་ཤེས་པས་སངས་རྒྱས་པ་དང༌། དེའི་སྔོན་དུ་རིང་འཕུར་སྐྱེས་དང་ལྷག་སྤྱོད་ལས་འཇིག་རྟེན་པའི་བསམ་གཏན་གྱི་མན་ངག་བླངས་ཏེ་སྲིད་རྩེའི་སྙོམས་འཇུག་མན་ཆད་ལ་འདོད་ཆགས་དང་བྲལ་ཟིན་པའི་ཆགས་བྲལ་སྔོན་སོང་གི་སངས་རྒྱས་ཡིན་པར་འདོད་དོ། ། ཆ༢ གཉིས་པ་[ཐེག་པ་ཆེན་པོ་པ་རྣམས་ཀྱི་བཞེད་པ་]ནི། ཐེག་ཆེན་ཁ་ཅིག་ཕལ་ཆེར་མཐུན་པར་སྨྲ། ། ཐེག་ཆེན་ཐུན་མོང་བ་ཁ་ཅིག་གིས་ཀྱང་། ས་ལམ་གྱི་ཁྱད་པར་ཅུང་ཟད་མ་གཏོགས་གོང་སྨོས་ཉན་ཐོས་ཀྱི་ལུགས་དེ་དང་ཕལ་ཆེར་མཐུན་པར་སྨྲ་བ་ཡོད་དེ། ཡོན་ཏན་ཡོངས་སུ་བཀོད་པའི་མདོ་ལས། ངས་བླ་ན་མེད་པའི་བྱང་ཆུབ་ཏུ་སེམས་དང་པོ་བསྐྱེད་པ་ནས་བཟུང་སྟེ། བསྐལ་པ་ཆེན་པོ་གྲངས་མེད་པ་གསུམ་དུ་བརྩོན་པ་ཆེན་པོས་ཚོགས་བསགས་ཤིང༌། ཚེ་ལོ་བརྒྱ་པའི་ཚེ་སེམས་ཅན་ལོང་བ་འདྲེན་པ་མེད་པ་རྣམས་ལ་གཟིགས་ཏེ། ཛམྦུའི་གླིང་འདི་ཉིད་དུ་སངས་རྒྱས་ཏེ་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་ཡོངས་སུ་བསྐོར་རོ། །ཞེས་པས་སོ། ། གཞན་དུ་བསྐལ་པ་དཔག་མེད་སྔོན་རོལ་ནས། ། དབང་པོའི་ཏོག་སོགས་རྒྱལ་བར་གྱུར་བར་གསུངས། ། གཞན་དུ་ངེས་པའི་དོན་ཁོ་ནའི་དབང་དུ་བྱས་ན་བསྐལ་པ་དཔག་ཏུ་མེད་པའི་གོང་དུ་མངོན་པར་རྫོགས་པར་སངས་རྒྱས་ཟིན་པ་ཡིན་ཏེ། ཡབ་སྲས་མཇལ་བའི་མདོར། སྔོན་འདས་པའི་དུས་བསྐལ་པ་(༦༨ན)དཔག་ཏུ་མེད་པའི་གོང་རོལ་དུ་འཇིག་རྟེན་ཁམས་གངྒཱའི་ཀླུང་གི་བྱེ་མ་སྙེད་ཀྱི་ཞིང་གཅིག་ཏུ་གྱུར་པ་དེར། དེ་བཞིན་གཤེགས་པ་དབང་པོའི་ཏོག་ཅེས་བྱ་བར་སངས་རྒྱས་ནས་སེམས་ཅན་གྱི་དོན་མཛད་དེ་མྱ་ངན་ལས་འདས་ནས། སླར་ཡང་དེ་འོག་ཏུ་སངས་རྒྱས་པའི་ཚུལ་བསམ་གྱིས་མི་ཁྱབ་པ་བསྐལ་པ་འདིའི་བར་དུ་བསྟན་ཅིང༌། ད་དུང་ཡང་སོ་སོ་སྐྱེ་བོ་སེམས་དང་པོ་བསྐྱེད་པ་ནས་བཟུང་སྟེ། སངས་རྒྱས་པའི་ཚུལ་འཁོར་བ་མ་སྟོངས་བར་དུ་མཛད་དོ་ཞེས་པ་ནས། དཔའ་བོ་ཆེན་པོ་ཐབས་མཁས་ཏེ། ། སེམས་ཅན་ཡོངས་སུ་སྨིན་མཛད་ཕྱིར། ། བྱེ་བ་ཕྲག་བརྒྱར་རྒྱལ་བ་ཉིད། ། སངས་རྒྱས་ཉིད་དུ་བསྟན་གྱུར་ཀྱང༌། ། ད་དུང་ཡང་ནི་འདྲེན་པ་ཁྱོད། ། སངས་རྒྱས་མང་པོ་སྟོན་པར་མཛད། ། ཅེས་དང༌། པདྨ་དཀར་པོ་ལས། རིགས་ཀྱི་བུ། ང་ནི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོའི་གོང་རོལ་ཏུ་མངོན་པར་རྫོགས་པར་སངས་རྒྱས་སོ། །ཞེས་དང༌། རྒྱུད་དེ་ཉིད་བསྡུས་པ་ལས། བཅོམ་ལྡན་འདས་བསྐལ་པ་བསམ་གྱིས་མི་ཁྱབ་པར་མངོན་པར་རྫོགས་པར་སངས་རྒྱས་ནས་ཤཱཀྱའི་རིགས་སུ་སྐྱེ་བ་སྟོན་པར་མཛད་དོ། །ཞེས་སོགས་འབྱུང་ངོ༌། ། དང་པོར་ཚོགས་སྦྱོར་གཉིས་པར་གཅིག་ནས་བདུན། ། གསུམ་པར་དག་པ་གསུམ་བགྲོད་སྲིད་མཐའ་ལ། ། འོག་མིན་འོད་ཟེར་དབང་ནོད་རྡོར་ཏིང་སྐྱེས། ། ལོངས་སྐུར་འཚང་རྒྱ་སྤྲུལ་པས་དོན་མཛད་མཐུན། ། དེ་ལ་ཐེག་ཆེན་པ་རྣམས་ཀྱི་ལུགས་སུ་གྲངས་མེད་དང་པོ་ཚོགས་ལམ་དང་སྦྱོར་ལམ་ངེས་འབྱེད་ཆ་བཞི་བགྲོད། གཉིས་པར་ས་དང་པོ་ནས་བདུན་པའི་བར་དང༌། གསུམ་པའི་སྐབས་སུ་དག་པ་ས་གསུམ་བགྲོད་ནས་སྲིད་པ་ཐ་མ་པའི་སྐབས་སུ་འོག་མིན་དུ་ཕྱོགས་བཅུའི་རྒྱལ་བ་རྣམས་ལས་འོད་ཟེར་ཆེན་པོའི་དབང་བསྐུར་ནོད་ཅིང་རྡོ་རྗེ་ལྟ་བུའི་ཏིང་ངེ་འཛིན་སྐྱེས་ཏེ། ལོངས་སྤྱོད་རྫོགས་པའི་སྐུར་(༦༨བ)སངས་རྒྱས་ནས་རིང་པོར་མ་ལོན་པར་སྤྲུལ་པའི་གཟུགས་ཀྱིས་རྡོ་རྗེའི་གདན་དུ་འཚང་རྒྱ་བའི་ཚུལ་བསྟན་ཏེ་འགྲོ་བའི་དོན་མཛད་པར་བཞེད་པ་མཐུན་པར་འབྱུང་ངོ༌། ། འོག་མིན་དུ་འཚང་རྒྱ་བའི་ཚུལ་ལ་བཞེད་པ་གཉིས་ཏེ། ཁ་ཅིག་འོག་མིན་སྟུག་པོ་བཀོད་པའི་ཞིང་དུ་སངས་རྒྱས་པའི་རྗེས་ལ་གཙང་གནས་ཀྱི་འོག་མིན་དུ་འཚང་རྒྱ་བའི་ཚུལ་བསྟན་པར་བཞེད་དེ། ལང་ཀར་གཤེགས་པ་ལས། གཙང་མའི་རིས་དག་སྤངས་པ་ཡི། ། འོག་མིན་གནས་མཆོག་ཉམས་དགའ་བར། ། ཡང་དག་སངས་རྒྱས་དེར་སངས་རྒྱས། ། སྤྲུལ་པ་པོ་གཅིག་འདིར་སངས་རྒྱས། ། ཞེས་དང༌། འདོད་པའི་ཁམས་དང་གཟུགས་མེད་དུ། ། སངས་རྒྱས་མངོན་པར་སངས་མི་རྒྱ། ། གཟུགས་ཀྱི་ཁམས་ཀྱི་འོག་མིན་དུ། ། འདོད་ཆགས་བྲལ་ཁྱེད་དེར་སངས་རྒྱ། ། ཞེས་པའི་ལུང་སྔ་ཕྱིའི་དགོངས་པ་གུང་སྦྲེལ་བར་འཛད་དོ། ། སློབ་དཔོན་ངག་དབང་གྲགས་པས། དཔལ་ལྡན་སྟུག་པོ་བཀོད་པ་ཉིད་དུ་དོན་དམ་ཐུགས་ཆུད་ཅིང༌། ། དགའ་ལྡན་སྐྱེ་བོའི་དོན་མཛད་ཕྱིར་ནི་དམ་པ་ཏོག་དཀར་གྱུར། ། དེ་ནས་འདིར་ནི་འགྲོ་བའི་དོན་དུ་ཤཱཀྱའི་ཏོག་གྱུར་གང༌། ། འཆི་བདག་ལས་རྒྱལ་སྒྱུ་མ་ཀུན་སྟོན་དེ་ནི་རྒྱལ་གྱུར་ཅིག ། ཅེས་སྟུག་པོ་བཀོད་པར་སངས་རྒྱས་ནས་དགའ་ལྡན་དུ་སྐྱེ་བ་བཞེས་པར་གསུངས་པའང་མི་འགལ་ཏེ། ལོངས་སྐུ་བརྙེས་ཟིན་ནས་གཅིག་དང་དུ་མའི་ཆོ་འཕྲུལ་མཐའ་ཡས་པ་ལ་མངའ་མཛད་པའི་ཕྱིར་རོ། ། འགའ་ཞིག །ལུང་གོང་མའི་ངོས་འཛིན་གཙང་རིས་ལས་གོང་དུ་སྤགས་པའི་འོག་མིན་ལ་ངོས་འཛིན་ཅིང་། ཐོག་མར་དེ་ཉིད་ཁོ་ནར་སངས་རྒྱས་པར་བཞེད་པའང་སྣང་ངོ༌། ། ཆ༣ གསུམ་པ་[གསང་སྔགས་རྡོ་རྗེ་ཐེག་པའི་ཚུལ་ལས་འབྱུང་བ་]ལ་བཞི། ཇ༡ བྱ་སྤྱོད་ཀྱི་ལུགས། ཇ༢ རྣལ་འབྱོར་རྒྱུད་ཀྱི་ལུགས། ཇ༣ རྣལ་འབྱོར་བླ་མེད་ཀྱི་ལུགས། ཇ༤ ཞར་བྱུང་འོག་མིན་གྱི་རྣམ་གྲངས་བཤད་པའོ། ། ཇ༡ དང་པོ་ནི། རྡོ་རྗེ་ཐེག་པ་བྱ་བའི་རྒྱུད་ལས་ནི། ། མེ་ཏོག་ཀུན་ཏུ་སྟོན་ལས་སྔགས་ཐོས་ནས། ། སྤྱོད་པ་སྤྱད་མཐར་དགའ་ལྡན་ནས་སྤྲུལ་སོགས། ། ཐེག་ཆེན་སྤྱི་དང་སྤྱོད་རྒྱུད་ཁྱད་པར་མཐུན། །(༦༩ན) རྒྱལ་བ་འཚང་རྒྱ་བའི་ཚུལ་རྡོ་རྗེ་ཐེག་པའི་བཀའ་སྲོལ་གསར་རྙིང་རྣམས་ལས་མི་འདྲ་བ་མང་དུ་གསུངས་པའི་གཙོ་བོར། བྱ་བའི་རྒྱུད་ལས། དང་པོར་ཐུགས་བསྐྱེད་ནས་དེ་བཞིན་གཤེགས་པ་མེ་ཏོག་ཀུན་ཏུ་སྟོན་པའི་སྤྱན་སྔར་སྔགས་ཐོས་ཏེ་སྔགས་ཀྱི་སྤྱོད་པ་སྤྱད་པའི་སྒོ་ནས་གྲངས་མེད་གསུམ་དུ་ཚོགས་བསགས་ཤིང༌། དམ་པ་ཏོག་དཀར་པོ་ནས་འཕོས་པ་ཟས་གཙང་གི་སྲས་སུ་གྱུར་ནས་སངས་རྒྱས་པ་སོགས་ཐེག་ཆེན་སྤྱི་དང་ཁྱད་པར་བཤད་སྲོལ་རགས་པར་མཐུན་ཞིང༌། སྤྱོད་རྒྱུད་ལས། སེམས་བསྐྱེད་དེ་སྔགས་ཀྱི་སྤྱོད་པ་སྤྱད་ནས་ས་བཅུ་མངོན་དུ་བྱས་ཤིང་། འོག་མིན་དུ་ལོངས་སྐུར་སངས་རྒྱས་པའི་ཚུལ་བསྟན་པར་བཤད་པ་སོགས་ཐེག་ཆེན་སྤྱི་དང་ཁྱད་པར་དུ་མཐུན་ནོ། ། ཇ༢ གཉིས་པ་[རྣལ་འབྱོར་རྒྱུད་ཀྱི་ལུགས་]ལ་གསུམ་གྱི། ཏ༡ དང་པོ་ནི། དེ་ཉིད་བསྡུས་པར་དོན་གྲུབ་སྙིང་པོ་ལ། ། བཞུགས་ཚེ་སངས་རྒྱས་མཐུས་སྐུལ་ཏིང་འཛིན་ལས། ། བཞེངས་ཏེ་དབང་བསྐུར་བརྙེས་ནས་མངོན་བྱང་ཆུབ། ། རྣལ་འབྱོར་རྒྱུད་དེ་ཉིད་བསྡུས་པ་ནས། བྱང་ཆུབ་སེམས་དཔའ་དོན་གྲུབ་བྱང་ཆུབ་ཀྱི་སྙིང་པོར་བཞུགས་པ་ལ་སངས་རྒྱས་རྣམས་ཀྱིས་བསྐུལ་ནས། མི་གཡོ་བའི་ཏིང་ངེ་འཛིན་ལས་བཞེངས་ཏེ་སེམས་བསྐྱེད་ཅིང་། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་ནས་མངོན་པར་རྫོགས་པར་སངས་རྒྱས་པར་བཤད་དོ།། ཏ༢ གཉིས་པ་ནི། ཤཱཀྱ་བཤེས་གཉེན་དཀའ་ཐུབ་མཛད་པའི་ཚེ། ། ཡེ་ཤེས་སྐུ་ལུས་འོག་མིན་གཤེགས་པ་ལ། ། རྒྱལ་བས་དབང་བསྐུར་མངོན་སངས་རྒྱས་པ་དང༌། ། སློབ་དཔོན་ཤཱཀྱ་བཤེས་གཉེན་སོགས་ཀྱིས་ཟས་གཙང་གི་སྲས་ཆུ་བོ་ནཻ་རཉྫ་ནའི་འགྲམ་དུ་དཀའ་ཐུབ་མཛད་པའི་ཚེ་སངས་རྒྱས་རྣམས་ཀྱིས་བསྐུལ་བས། ཡེ་ཤེས་ཀྱི་ལུས་འོག་མིན་དུ་བྱོན་པ་ལ་སངས་རྒྱས་རྣམས་ཀྱིས་དབང་བསྐུར་ཏེ་སངས་རྒྱས་ནས། སླར་རྣམ་སྨིན་གྱི་ལུས་ལ་ཞུགས་ནས་སྤྲུལ་སྐུར་འཚང་རྒྱ་ཚུལ་བསྟན་པར་བཤད་པ་དང་མཐུན་པར། བོད་དུའང་ལོ་ཆེན་(༦༩བ)རིན་བཟང་དང༌། དགྱེས་རྡོར་གྱི་འགྲེལ་བྱེད་ཁ་ཅིག་བཞེད་ལ། དེ་ལྟར་ཡང་སངས་རྒྱས་ཡེ་ཤེས་ཞབས་ཀྱི་གྲོལ་བའི་ཐིག་ལེ་ལས། ཅི་ཕྱིར་ཤཱཀྱ་ཐུབ་པ་ཡིས། ། གྲངས་མེད་གསུམ་དུ་ཚོགས་བསགས་ཀྱང༌། ། འདི་དོན་མ་རྟོགས་ནེ་ར་ཉྫར། ། ཅི་ཡང་མ་ཡིན་ཏིང་འཛིན་གནས། ། དེ་ཚེ་ཕྱོགས་བཅུའི་བདེ་གཤེགས་ཀྱིས། ། ཐལ་བྱུང་བློ་ཅན་དེ་བཟློག་སྟེ། ། ནམ་མཁའི་དབྱིངས་ལྟར་རྣམ་དག་པའི། ། ཟབ་གསལ་གཉིས་མེད་རབ་བསྟན་པས། ། ནམ་ཕྱེད་དུས་ན་རྒྱལ་བ་ལྟར། ། དེ་ཉིད་བསྒོམས་པས་ཐོ་རངས་དུས། ། སྐད་ཅིག་གིས་ནི་ཡང་དག་རྟོགས། ། འགྲོ་བ་འདུལ་བར་བྱ་བའི་ཕྱིར། ། བྱང་ཆུབ་སྙིང་པོར་བཞུགས་ནས་ཀྱང༌། ། དཔུང་ཆེན་བདུད་རྣམས་རབ་བཅོམ་སྟེ། ། སེམས་ཅན་གཟུང་བར་བྱ་དོན་དུ། ། ཆོས་ཀྱི་འཁོར་ལོ་བསྐོར་བའོ། ། ཞེས་དང༌། སྔ་འགྱུར་གྱི་རྒྱུད་སྒྱུ་འཕྲུལ་བླ་མ་ལས་ཀྱང༌། དོན་གྲུབ་དཀའ་ཐུབ་ལུས་ཅན་ལ། ། ཕྱོགས་བཅུའི་རྒྱལ་བ་སྤྲིན་བཞིན་དུ། ། འདུས་པས་ལོངས་སྤྱོད་དོན་གྱི་ཕྱིར། ། སྲོད་དང་ཐོ་རེངས་དུས་ཉིད་དུ། ། ཉི་ཟླ་ཟ་བའི་དབང་བྱིན་ནས། ། རོལ་པའི་ཀ་ར་བསྟན་པ་ཡིས། ། དེ་བཞིན་དེ་བཞིན་གཤེགས་པའོ། ། ཞེས་གསུངས་སོ། ། ཏ༣ གསུམ་པ་ནི། ཀུན་སྙིང་སྲིད་པ་ཐ་མར་རྒྱལ་རྣམས་ལས། ། དབང་ཐོབ་གྲངས་མེད་སྔོན་རོལ་སངས་རྒྱས་ཏེ། ། སླར་ཡང་ཤཱཀྱའི་རིགས་སུ་སྟོན་པར་བཞེད། ། ཡོ་གའི་ཤིང་རྟ་ཆེན་པོ་སློབ་དཔོན་ཀུན་དགའི་སྙིང་པོས། རྒྱལ་བས་སེམས་བསྐྱེད་ནས་གྲངས་མེད་གསུམ་དུ་ཚོགས་བསགས་ཏེ་བསམ་གཏན་དང་གཟུགས་མེད་སོགས་ཀྱི་ཏིང་ངེ་འཛིན་ཐམས་ཅད་བསྐྱེད་ཅིང་སྲིད་པ་ཐ་མ་པར་མཛད། སངས་རྒྱས་རྣམས་ལས་དབང་བསྐུར་བ་ཐོབ་ཅིང་བསྐལ་པ་མང་པོའི་སྔོན་རོལ་ཏུ་སངས་རྒྱས་ནས་སླར་ཤཱཀྱའི་རིགས་སུ་སྐྱེ་བ་བསྟན་པར་བཤད་པ་ལེགས་ཏེ། རྩེ་མོར། བསྐལ་པ་གྲངས་མེད་སྔོན་དུ་ནི། ། བཅོམ་ལྡན་བྱང་ཆུབ་མཛད་པ་གང༌། ། ཞེས་དང༌། རྡོ་རྗེ་སྙིང་པོ་རྒྱན་གྱི་རྒྱུད་ལས། (༧༠ན)དེ་ནས་བཅོམ་ལྡན་འདས་ཤཱཀྱ་ཐུབ་པས་དེ་དག་གིས་གསོལ་བ་བཏབ་པའི་ཚིག་ཉེ་བར་གསན་ནས། འོག་མིན་གྱི་གནས་ནས་བྱོན་ཏེ་དགའ་ལྡན་གྱི་གནས་སུ་བཞུགས་ནས་དགའ་ལྡན་གྱི་རིས་ཀྱི་ལྷའི་བུ་རྣམས་ལ་ཆོས་བསྟན་ནས་ཟས་གཙང་གི་རིགས་ལ་མངོན་པར་གཟིགས་ཏེ་ཞེས་སོ། ། ཇ༣ གསུམ་པ་བླ་མེད་ཀྱི་ལུགས་ལྟར་ན། བླ་མེད་ངེས་དོན་སྲིད་མཐའི་བྱང་སེམས་ཞིག ། འོག་མིན་ཆེན་པོར་ཐུན་མིན་ཟབ་ལམ་གྱི། ། ཉེ་རྒྱུས་རྡོ་རྗེ་འཆང་གྱུར་སྤྲུལ་པའི་སྐུ། ། སངས་རྒྱས་ཚེ་ནའང་ཉེ་རྒྱུས་བགྲོད་པར་གསུངས། ། རྣལ་འབྱོར་བླ་མེད་ཆེན་པོ་ཕ་མ་གཉིས་མེད་ཀྱི་རྒྱུད་རྣམས་ཀྱི་དགོངས་པ་དང་བསྟུན་སློབ་དཔོན་སོ་སོའི་བཤད་ཚུལ་མང་ཡང་སྤྱི་ཙམ་དུ་སྣང་ཚུལ་དང་བསྟུན་པ་ཤཱཀྱ་བཤེས་གཉེན་ལྟར་འཆད་པའང་ཡོད་ཀྱང༌། ངེས་དོན་དུ་སྲིད་པ་ཐ་མའི་བྱང་སེམས་སུ་གྱུར་པ་ཞིག་གནས་འོག་མིན་ཆེན་པོར་ལམ་