Tibetan
ཐུན་མོང་མ་ཡིན་པའི་ཟབ་ལམ་གྱི་ཉེ་རྒྱུ་ལ་བརྟེན་ནས་མངོན་པར་བྱང་ཆུབ་པ་ལྔ་ལ་སོགས་པས་རྡོ་རྗེ་འཆང་ཉིད་དུ་སངས་རྒྱས་པར་གྱུར་ཅིང༌། སླར་སྤྲུལ་པའི་སྐུ་འཛམ་གླིང་མ་ག་དྷཱར་སངས་རྒྱས་པའི་ཚུལ་བསྟན་པའི་ཚེ་ནའང་བཙུན་མོའི་འཁོར་ལ་ལོངས་སྤྱོད་པ་སོགས་ཉེ་རྒྱུས་ལམ་བགྲོད་ཅིང་སྤངས་རྟོགས་མཐར་ཕྱིན་པར་གསུངས་ཏེ། དུས་འཁོར་བསྡུས་རྒྱུད་ལས། མི་རྣམས་དགྲོལ་བའི་དོན་ནུ་སྲས་དང་བཅས་པ་རྒྱལ་བའི་བདག་པོ་ལས་ཀྱི་སར་ནི་རབ་བཞུགས་ཏེ། ། མངལ་ནི་རབ་ཏུ་བཟུང་བར་མཛད་ཅིང་མཆོག་གི་ཐུགས་རྗེ་དག་གིས་བྱང་ཆུབ་བསྐྱེད་པར་མཛད་ནས་ནི། ། ཉོན་མོངས་དང་ནི་བདུད་རྣམས་བཅོམ་ནས་ས་ཡི་སྟེང་གི་གནས་སུ་ཆོས་ཀྱི་འཁོར་ལོ་རབ་བསྐོར་ཏེ། ། སྤྲུལ་པ་སྒྱུ་མ་མཛད་ནས་སླར་ཡང་བཅོམ་ལྡན་འདས་ནི་དག་པའི་སྐུ་ཅན་དེ་ཉིད་ཁོ་ནའོ། ། ཞེས་དང༌། འགྲེལ་ཆེན་ལས། སངས་རྒྱས་བཅོམ་ལྡན་འདས་སྔར་ས་བཅུ་གཉིས་ཀྱི་དབང་ཕྱུག་ཏུ་གྱུར་པ། མཁས་པ་སྒྱུ་འཕྲུལ་ཆེན་པོ་འཆང་བ་སྒྱུ་འཕྲུལ་(༧༠བ)ཆེན་པོའི་མིག་འཕྲུལ་དང་ལྡན་པ། འཕགས་པའི་ཡུལ་དུ་ལུམ་བི་ནཱིར་ཤཱཀྱའི་རིགས་མིའི་དབང་པོ་ཟས་གཙང་མའི་ལྷ་མོ་སྒྱུ་འཕྲུལ་ཆེན་མོའི་ལྷུམས་ནས་བལྟམས་པ་ནི་གཞོན་ནུ་དོན་ཀུན་གྲུབ་པ་ཡིན་ལ། ཞེས་དང༌། རྒྱུད་གཞན་ལས་ཀྱང་གསལ་བར་འབྱུང་ངོ༌། ། ཇ༤ བཞི་པ་[ཞར་བྱུང་འོག་མིན་གྱི་རྣམ་གྲངས་བཤད་པ་]ནི། འོག་མིན་ལ་ཡང་དོན་རྟགས་རིག་གསར་རྟོག ། འཇིག་རྟེན་དྲུག་ཏུ་སངས་རྒྱས་གསང་བས་བཤད། ། འཚང་རྒྱ་བའི་གནས་འོག་མིན་ཅེས་པ་ལའང་མཐའ་དཔྱད་ན། མདོ་རྒྱུད་རྣམས་ལས་རྒྱ་ཆེ་ཆུང་འགའ་ཞིག་ཏུ་བཤད་ཅིང༌། གྲུབ་པའི་སློབ་དཔོན་སངས་རྒྱས་གསང་བས་མཛད་པའི་སྤྱན་འགྲེལ་ལས། དོན་གྱི་འོག་མིན་ནི། ཆོས་ཀྱི་དབྱིངས་ཏེ། སངས་རྒྱས་བཞུགས་གནས་ཡིན་ཞིང་། དེའི་གོང་ན་གཞན་མེད་པའི་ཕྱིར་རོ། ། རྟགས་ཀྱི་འོག་མིན་ནི། དབྱིངས་དང་ཡེ་ཤེས་དབྱེར་མེད་ཀྱི་རྟགས་སུ་གཞལ་ཡས་ཁང་གི་དབྱིབས་དང་ཁ་དོག་ཏུ་སྣང་བ་སྟེ། ལོངས་སྤྱོད་རྫོགས་སྐུའི་བཞུགས་གནས་ཡིན་ཞིང་། ཆོས་ཀྱི་དབྱིངས་མཚོན་བྱེད་ཀྱི་རྟགས་དེའི་གོང་ན་གཞན་མེད་པའི་ཕྱིར་རོ། ། རིག་པའི་འོག་མིན་ནི། དངོས་པོའི་གནས་ལུགས་ཇི་ལྟ་བ་བཞིན་རྟོགས་པ་རིག་པའི་ཡེ་ཤེས་ཏེ། དག་པ་གཉིས་ལྡན་གྱི་ཆོས་སྐུའི་བཞུགས་གནས་ཡིན་ཞིང་། དེའི་གོང་ན་རིག་པ་གཞན་མེད་པའི་ཕྱིར་རོ། ། གསང་བའི་འོག་མིན་ནི། ཡུམ་གྱི་མཁའ་སྟེ། གསང་བ་སྐུའི་བཞུགས་གནས་ཡིན་ཞིང༌། གནས་ཀྱི་ཡོན་ཏན་གོང་ན་གཞན་མེད་པའི་ཕྱིར་རོ། ། རྟོག་པའི་འོག་མིན་ནི། ལས་དང་པོ་པས་འོག་མིན་གྱི་གཞལ་ཡས་ཁང་བསྒོམ་པ་སྟེ། ལྷག་པའི་ཏིང་ངེ་འཛིན་གྱི་དཀྱིལ་འཁོར་གྱི་བཞུགས་གནས་ཡིན་ཞིང༌། དོན་སྤྱི་འཛིན་བྱེད་ཀྱི་རྟོག་པ་དེའི་གོང་ན་གཞན་མེད་པའི་ཕྱིར་རོ། ། འཇིག་རྟེན་གནས་ཀྱི་འོག་མིན་ནི། གཙང་མ་རིས་ཀྱི་ལྷ་ལྔའི་ཡང་སྟེང་སྟེ། འཕགས་པ་རྣམས་ཀྱི་བཞུགས་གནས་ཡིན་ཞིང་། གཟུགས་ཁམས་ཀྱི་གནས་དེའི་གོང་ན་གཞན་མེད་པའི་ཕྱིར་རོ་ཞེས་བཤད་དོ། ། གཞན་ཡང༌། (༧༡ན) ཡང་དག་དོན་དང་རང་སྣང་སྟུག་པོ་བཀོད། ། རང་བཞིན་སྤྲུལ་གནས་གཙང་རིས་འོག་མིན་རྣམས། ། སྐུ་གསུམ་ཞིང་དུ་ཀློང་ཆེན་རབ་འབྱམས་བཞེད། ། སྔར་བཤད་པ་དེའང་བསྡུ་ན། འོག་མིན་རིགས་གསུམ་དུ་འདུ་སྟེ། མཐའ་དབུས་ཕྱོགས་ཆ་གང་དུའང་བཞག་ཏུ་མེད་ཅིང་སྤྲོས་པ་ཐམས་ཅད་དང་བྲལ་བའི་ངོ་བོ་སངས་རྒྱས་ཀྱི་ས་མཐར་ཐུག་གམ་བགྲོད་བྱ་དམ་པ་སྟེ། ཡང་དག་དོན་གྱི་འོག་མིན་ཞེས་བྱའོ། ། ཆོས་སྐུའི་དབྱིངས་ལས་ཡེ་ཤེས་ཆེན་པོའི་སྣང་བར་རང་བྱུང་བ་འོད་ཀྱི་གཞལ་ཡས་ཁང་དང་གཙོ་འཁོར་དུ་སྣང་བ་ཡེ་ཤེས་ལྔའི་རིགས་སུ་ལྷུན་གྱིས་གྲུབ་ཅིང་དུས་ཐམས་ཅད་དུ་འཕོ་འགྱུར་མེད་པ་རིགས་ལྔ་སོ་སོའི་དཀྱིལ་འཁོར་གྱི་ཚོམ་བུ་ནམ་མཁའི་དབྱིངས་ཀྱི་མཐའ་ཀླས་པར་རང་སྣང་བ་ནི། འོག་མིན་ཆེན་པོ་སྟུག་པོ་བཀོད་པ་ཞེས་བྱའོ། ། གདུལ་བྱ་ས་ལ་གནས་པ་རྣམས་ཀྱི་དོན་དུ་དབུས་ན་འོག་མིན་ཁང་བུ་བརྩེགས་པ་སོགས་རིགས་ལྔའི་ཞིང་དུ་སྣང་བ་ནི། རང་བཞིན་སྤྲུལ་སྐུའི་ཞིང་གི་འོག་མིན་དང༌། འདྲེས་མའི་དོན་དུ་མི་མཇེད་ལ་སོགས་པ་འགྲོ་བ་སེམས་ཅན་གྱི་སྣང་བ་དང་མཐུན་པའི་གནས་ཀྱི་མཆོག་རང་རང་གི་འཇིག་རྟེན་དེའི་གཟུགས་ཀྱི་ཁམས་བསམ་གཏན་བཞི་པའི་གཙང་མ་རིས་ཀྱི་ལྷ་ལྔའི་གནས་ཀྱི་འོག་མིན་རགས་པའི་དངོས་པོ་མ་ཡིན་པ། དང་བ་འོད་ཀྱི་རང་བཞིན་ལས་གྲུབ་པའི་གནས། གཞལ་ཡས་ཁང་ལ་སོགས་པ་བཀོད་པའི་བྱེ་བྲག་སྣ་ཚོགས་པས་བརྒྱན་པ་ནི་གཙང་གནས་ཀྱི་འོག་མིན་ཡོངས་སུ་གྲགས་པ་སྟེ། སྔ་མ་གཉིས་ཆོས་སྐུ་དང་ལོངས་སྐུའི་ཞིང༌། ཕྱི་མ་གཉིས་ནི་སྤྲུལ་སྐུའི་གནས་ཏེ་སྐུ་གསུམ་གྱི་ཞིང་དུ་ཀུན་མཁྱེན་ཀློང་ཆེན་རབ་འབྱམས་བཟང་པོས་བཞེད་དོ། ། གཞན་ཡང་དངོས་བཏགས་ཁྱད་སོགས་བཤད་ཚུལ་མང༌། ། དེ་དག་ལས་གཞན་ཡང་འོག་མིན་གྱི་གནས་ལ་བོད་ཀྱི་མཁས་པ་རྣམས་ཀྱིས་དངོས་དང་བཏགས་པའི་ཁྱད་པར་སོགས་བཤད་ཚུལ་དང་དགག་(༧༡བ)སྒྲུབ་མང་དུ་སྤྲོས་པར་སྣང་ཡང་འདིར་མ་སྨོས་ལ། སྙིང་པོ་ལྟ་བུ་ཐམས་ཅད་མཁྱེན་པ་སྒྲོལ་བའི་མགོན་པོས། འོག་མིན་སྟུག་པོ་བཀོད་པའི་ཞིང་ལའང་རྗེས་མཐུན་པ་ས་བརྒྱད་དགུ་ལ་སྣང་བ་དང༌། ཅུང་ཟད་བསྒྲིབས་པའི་ཞིང་ཁམས་ས་བཅུ་པ་ལ་སྣང་བ་དང༌། ཤིན་ཏུ་དག་པའི་ཞིང་ཁམས་སངས་རྒྱས་ཁོ་ན་ལ་སྣང་བ་སྟེ། དངོས་བཏགས་ལ་ཕྱེ་ན་གསུམ་ཡོད་ལ། དེ་གསུམ་ལ་རིམ་པར། བཏགས་པ་བ། ཙམ་པོ་དང༌། ཁྱད་པར་ཅན་གསུམ་དུ་བརྡ་སྦྱར་ན་རུང་ངོ༌། ། དེ་ལ་ལོངས་སྐུའི་ཞིང་ཁམས་ཞེས་བྱ་ཞིང༌། ལང་གཤེགས་ལས་གཟུགས་ཁམས་ཡིན་པ་དང་གནས་གཙང་མའི་འོག་མིན་མ་ཡིན་པར་ཡང་བཤད་པ་ནི་ལྷའི་བུ་དབང་ཕྱུག་ཆེན་པོའི་གནས་དེ་ཡིན་ལ། དེར་འཚང་རྒྱ་ཚུལ་བཤད་པ་འདིའང་ལོངས་སྐུ་འཚང་རྒྱ་ཚུལ་མ་ཡིན་ཏེ། མཆོག་གི་སྤྲུལ་སྐུ་སྟོན་ཚུལ་ཞིག་ཡིན་ལ། སྤྲུལ་སྐུ་དེ་ནི་བྱང་སེམས་རྣམས་ལ་སྣང་བས་རྩ་བ་དང་སྟོང་གསུམ་དུ་མཛད་པ་བཅུ་གཉིས་སྟོན་པ་ནི་དེས་སྤྲུལ་པའི་ཡན་ལག་ཉིད་དོ། ། དེ་ལྟ་བུའི་འོག་མིན་དེའང་བྱང་སེམས་མོས་སྤྱོད་ཤས་ཆེ་བ་རྣམས་དང༌། མ་དག་པའི་ས་ལ་གནས་པའི་འཕགས་པ་རྣམས་ཀྱི་ཐུན་མོང་གི་དགེ་བའི་ལས་ཀྱིས་བསྒྲུབས་པ་ཡིན་པས་རྒྱ་ཚད་ངེས་པ་དང༌། རྣམ་པར་སྣང་མཛད་ཀྱིས་གསར་དུ་བསྒྲུབས་པར་བཤད་པས་སྟུག་པོ་བཀོད་པ་ནི་མ་ཡིན་ཏེ། བདེ་བ་ཅན་བཞིན་ནོ། ། དུས་འཁོར་ལས། གཙང་མ་རིས་གནས་ལ་སོགས་པར་བཅོམ་ལྡན་གང་ཞིག་རྣམ་པར་བཞུགས་པ་ཉན་ཐོས་རྣམས་ཀྱི་སླད་དུ་སྟེ། ། ཞེས་གསུངས་པའི་གཙང་གནས་ཀྱང་དེ་དང་དོན་གཅིག་པ་ཡིན་ལ། མདོ་ལས་དེ་གཙང་གནས་མིན་པར་གསུངས་པ་ནི་ཉན་ཐོས་ཀྱི་སྡེ་སྣོད་ལས་གསུངས་པའི་གཙང་མའི་གནས་ལྔ་པོ་དེ་རྣམས་མིན་པ་ལ་དགོངས་པའི་ཕྱིར། སྤྱིར་གཙང་གནས་ཡིན་པ་མི་འགལ་ལོ། ། འདི་བྱང་སེམས་འཕགས་པ་ཁོ་ནའི་སྤྱོད་ཡུལ་ཡིན་པ་དང་ཉན་ཐོས་ཀྱི་དོན་ཅེས་པའང་མི་འགལ་ཏེ། འདི་ནི་(༧༢ན)ཉན་ཐོས་ལ་སོགས་པ་ཐུན་མོང་གི་གདུལ་བྱ་རྣམས་ལ་ཆོས་འཁོར་སྐོར་བའི་མཆོག་གི་སྤྲུལ་སྐུ་རྣམས་སྤྲུལ་པའི་གཞི་ཡིན་པས་དེ་ལྟར་གསུངས་པའི་ཕྱིར་རོ། ། སྤྱིར་ཐེག་ཆེན་ཁོ་ནའི་ཁྱད་ཆོས་དག་པའི་ཞིང་སྤྲུལ་སྐུའི་ཞིང་ཁམས་སུ་གྱུར་པ་ལའང་མཆོག་དམན་གཉིས་ཡོད་དེ། བྱང་སེམས་འཕགས་པ་གཙོ་ཆེ་བའི་དགེ་རྩ་ལས་གྲུབ་པ་བདེ་བ་ཅན་ལ་སོགས་པ་ནི་ཁམས་གསུམ་དུ་མི་གཏོགས་པའི་དག་ཞིང་རང་དབང་ཅན་ཡིན་ལ། འདི་ནི་གཟུགས་ཁམས་སུ་གཏོགས་པར་བཤད་པས་མ་དག་པའི་ཞིང་ལ་བརྟེན་པ་དང༌། ལང་གཤེགས་ལས། ལྷ་ཡི་ཕོ་བྲང་འོག་མིན་པའོ། ། ཞེས་ཀྱང་གསུངས་པས་དབྱེ་བ་ཕྱེད་དགོས་པར་བཞེད་དོ། ། སྟོན་པ་མངོན་པར་རྫོགས་པར་འཚང་རྒྱ་བའི་བཞེད་པ་ཐ་དད་ཀྱི་སྐབས་སོ། ། སྟོན་པ་མངོན་པར་རྫོགས་པར་འཚང་རྒྱ་བའི་བཞེད་པ་ཐ་དད་ཀྱི་སྐབས་གཉིས་པའི་འགྲེལ་པའོ།། །། གསུམ་པ། སྤྲུལ་པའི་སྐུས་ཞིང་འདིར་མཛད་པ་བཅུ་གཉིས་བསྟན་པའི་སྐབས། ང༣ སྐབས་གསུམ་པ་སྤྲུལ་པའི་སྐུའི་མཛད་པ་བཤད་པ་ལ་གསུམ། ཅ༡ མཛད་པའི་ཚུལ་སྤྱིར་བཤད་པ། ཅ༢ མཛད་པ་བཅུ་གཉིས་བྱེ་བྲག་ཏུ་བསྟན་པ། ཅ༣ ཐེག་པ་ཆེ་ཆུང་གི་རྣམ་དབྱེ་འཕྲོས་དོན་དུ་སྨོས་པའོ། ། ཅ༡ དང་པོ་ནི། མཆོག་གི་སྤྲུལ་སྐུའི་མཛད་པ་བརྒྱ་ལ་སོགས། ། ཐུན་མིན་དོན་ཐོབ་དབང་གིས་ཚད་མེད་ཀྱང༌། ། ཐུན་མོང་ལ་གྲགས་མཛད་པ་བཅུ་གཉིས་ཏེ། ། སངས་རྒྱས་ཀྱི་རྣམ་ཐར་དང་ཕྲིན་ལས་ནི་ནམ་མཁའ་ལྟར་རྒྱ་ཆེ་བས་འཕགས་པ་རྣམས་ཀྱི་སྤྱོད་ཡུལ་དུའང་མ་གྱུར་ན་སོ་སྐྱེའི་བློ་ཡིས་ཕྱོགས་ཙམ་ཡང་དཔོག་པ་ལྟ་ཅི་སྨོས། འོན་ཀྱང་སངས་རྒྱས་ཀྱི་ཞིང་འདིར་མཆོག་གི་སྤྲུལ་པའི་སྐུའི་རྣམ་པར་རོལ་པ་གདུལ་བྱ་ཐུན་མོང་དུ་སྣང་བ་ལས་བརྩམས་ཏེ་མཛད་པའི་ཚུལ་འདི་ལྟ་བུའོ་ཞེས་གཏམ་དུ་གླེང་བའི་གཞིར་གྱུར་པ་ཡིན་པས། མདོ་སྡེ་རིན་པོ་ཆེ་རྣམས་ལས་འཕགས་བོད་ཀྱི་མཁས་པ་རྣམས་ཀྱིས་གཙོ་ཆེ་བ་དག་བསྡུས་ཏེ་མཛད་པའི་རྣམ་གྲངས་བརྒྱ་རྩར་བཤད་པ་ལ་སོགས་པ་དང༌། ཐུན་མོང་མ་ཡིན་པ་ཐེག་པ་ཆེན་པོ་དང་སྔགས་ཀྱི་ཚུལ་ལས་འབྱུང་བ་དང༌། རྗེས་དཔག་གི་རིགས་པས་དོན་ཐོབ་ཏུ་འཇོག་པར་འོས་པ་སོགས་ཚད་(༧༢བ)མེད་པས་མཐའ་གཅིག་ཏུ་སངས་རྒྱས་ཀྱི་མཛད་པ་འདི་ཁོ་ནའོ་ཞེས་ཁ་ཚོན་གཅོད་པར་མི་ནུས་ཀྱང༌། ཐེག་པ་ཆེ་ཆུང་གི་གདུལ་བྱ་ཐུན་མོང་ལ་ཡོངས་སུ་གྲགས་པ་ནི་མཆོག་གི་མཛད་པ་བཅུ་གཉིས་ཞེས་བྱ་སྟེ། དེའང་རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། ། འཇིག་རྟེན་ཀུན་ལ་གཟིགས་ནས་ནི། ། སྐྱེ་བ་མངོན་པར་སྐྱེ་བ་དང༌། ། དགའ་ལྡན་གནས་ནས་འཕོ་བ་དང༌། ། ལྷུམས་སུ་འཇུག་དང་བལྟམས་པ་དང༌། ། བཟོ་ཡི་གནས་ལ་མཁས་པ་དང༌། ། བཙུན་མོའི་འཁོར་འགྱེས་རོལ་པ་དང༌། ། ངེས་འབྱུང་དཀའ་བ་སྤྱོད་པ་དང༌། ། བྱང་ཆུབ་སྙིང་པོར་གཤེགས་པ་དང༌། ། བདུད་སྡེ་བཅོམ་དང་རྫོགས་པར་ནི། ། བྱང་ཆུབ་ཆོས་ཀྱི་འཁོར་ལོ་དང༌། ། མྱ་ངན་འདས་པར་གཤེགས་མཛད་རྣམས། ། ཡོངས་སུ་མ་དག་ཞིང་རྣམས་སུ། ། སྲིད་པ་ཇི་སྲིད་གནས་པར་སྟོན། ། ཅེས་གསུངས་པ་ལྟར་རོ། ། ཅ༢ གཉིས་པ་[མཛད་པ་བཅུ་གཉིས་བྱེ་བྲག་ཏུ་བསྟན་པ་]ལ། དགའ་ལྡན་གྱི་གནས་ནས་འཕོ་བ་སོགས་བཅུ་གཉིས་རིམ་པར་འཆད་པའི། ཆ༡ དང་པོ་[དགའ་ལྡན་གྱི་གནས་ནས་འཕོ་བའི་མཛད་པ་]ནི། དགའ་ལྡན་གནས་སུ་དམ་པ་ཏོག་དཀར་པོས། ། ཆོས་སྒོ་བརྒྱ་བསྟན་གཟིགས་པ་རྣམ་ལྔས་འཕོས། ། བདག་ཅག་གི་སྟོན་པ་འདི་སངས་རྒྱས་འོད་སྲུང་གི་སྤྱན་སྔར་བྲམ་ཟེའི་ཁྱེའུ་བླ་མར་གྱུར་ནས་ཚངས་པར་སྤྱོད་པ་སྤྱད་དེ། དགའ་ལྡན་གྱི་གནས་སུ་ལྷའི་བུ་དམ་པ་ཏོག་དཀར་པོ་ཞེས་བྱ་བ་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔར་སྐུ་འཁྲུངས་པ་ཡན་ཆད་སྐྱེ་བ་མངོན་པར་སྐྱེ་བའི་སྤྲུལ་པའི་སྐུས་བྱང་ཆུབ་ཀྱི་སྤྱོད་པ་རྫོགས་ནས། མཆོད་པའི་རོལ་མོ་ལས་གཞན་དོན་དུ་བསྐུལ་བའི་སྒྲ་གསན་པ་ན་ཆོས་ཀྱིས་མཐོ་བ་ཞེས་བྱ་བའི་ཁང་བཟང་དུ་བྱང་ཆུབ་སེམས་དཔའ་རང་དང་སྐལ་བ་མཉམ་པ་རྣམས་དང་བཀའི་བགྲོ་བ་མཛད་ཅིང་ཆོས་སྟོན་པའི་གནས་སུ། དད་པ་ནི་ཆོས་སྣང་བའི་སྒོ་སྟེ། བསམ་པ་མི་ཕྱེད་པར་འགྱུར་རོ་ཞེས་པ་ལ་སོགས་པ་ཆོས་སྣང་བའི་སྒོ་རྒྱ་རྩ་བརྒྱད་བསྟན་ནས། ཐོད་དང་ཅོད་པན་བྱམས་པའི་དབུ་ལ་བཞག་ནས། ཁྱོད་ནི་ངའི་འོག་ཏུ་མངོན་པར་(༧༣ན)རྫོགས་པར་འཚང་རྒྱ་བར་འགྱུར་རོ། །ཞེས་ལུང་བསྟན་ཅིང་། དགའ་ལྡན་དུ་ཆོས་སྟོན་པ་པོའི་རྒྱལ་ཚབ་ཏུ་དབང་བསྐུར་ནས། གཟིགས་པ་རྣམ་པ་བཞིའམ་ལྔ་ཡིས་འཇིག་རྟེན་ལ་གཟིགས་ནས་དཔྱིད་ཟླ་ཐ་ཆུང་སྐར་མ་སོགས་ཉ་བའི་ཚེས་བཅོ་ལྔ་རྒྱུ་སྐར་རྒྱལ་དང་ལྡན་པའི་དུས་སྦྱོར་ལ་དགའ་ལྡན་གྱི་གནས་ནས་འཕོ་བར་མཛད་དོ། ། ཆ༢ གཉིས་པ་[ལྷུམས་སུ་ཞུགས་པའི་མཛད་པ་]ནི། འཛམ་གླིང་ཚེ་ལོ་བརྒྱ་པར་ཡུལ་དབུས་སུ། ། རྒྱལ་རིགས་ཡབ་དང་སྒྱུ་འཕྲུལ་ལྷུམས་སུ་ཞུགས། ། དེའང་མིའི་གླིང་གཞན་གསུམ་ལས་ཁྱད་པར་དུ་འཕགས་པ་ཛམྦུའི་གླིང༌། ཚེ་ལོ་བརྒྱད་ཁྲི་པ་ཡན་ཆད་ལོངས་སྤྱོད་ཀྱི་འབྱོར་པ་ཆེ་བས་ཡིད་འབྱུང་བར་དཀའ་ཞིང༌། ལོ་བརྒྱ་པ་མན་ཆད་ཀྱང་སྙིགས་མ་ལྔ་ཧ་ཅང་བདོ་བས་མི་ཁོམ་པར་སྣང་བས་དེ་དག་གི་སྐྱོན་མེད་པས་སྐྱེ་དགུ་གདུལ་སླ་བར་གྱུར་པའི་དུས་ཚེ་ལོ་བརྒྱ་པ། རྩོད་དུས་ལ་ལྟོས་ཏེ་ཡུལ་གྱི་སྐྱོན་གྱི་ཆ་ནས་སྨད་དུ་མེད་པ་དབུས་འགྱུར་འཆང་གི་ཡུལ། འཇིག་རྟེན་འདིར་རེས་འགའ་རྒྱལ་རིགས་དང་རེས་འགའ་བྲམ་ཟེའི་རིགས་གཙོ་བོར་བཀུར་བ་ལས། ད་ལྟ་རྒྱལ་རིགས་བཀུར་བས་མང་བཀུར་གྱི་རྒྱལ་བརྒྱུད་རིགས་ཕུན་སུམ་ཚོགས་པའི་ཡོན་ཏན་དྲུག་ཅུ་རྩ་བཞིས་བརྒྱན་པ་ཡབ་རྒྱལ་པོ་ཟས་གཙང་མ་དང༌། ཡུམ་ཡང་བུད་མེད་ཀྱི་ཡོན་ཏན་སུམ་ཅུ་རྩ་གཉིས་ཀྱིས་བརྒྱན་པ་ལྷ་མོ་སྒྱུ་འཕྲུལ་ཆེན་མོ་ལ་གཟིགས་ནས། གླང་པོ་ཆེའི་ཕྲུ་གུ་ཐལ་ཀར་མཆེ་བ་དྲུག་པའི་ཚུལ་གྱིས་ཡུམ་གསོ་སྦྱོང་བླངས་པའི་གློ་གཡས་པར་ཞུགས་ནས་ལྷུམས་སུ་ཙནྡན་གྱི་ཁང་བུ་བརྩེགས་པར་བྱིས་པ་ཟླ་དྲུག་ལོན་པའི་ཚད་ཙམ་པ་ན་བཟའ་དང་བཅས་པ་སྐྱིལ་མོ་ཀྲུང་གིས་བཞུགས་ཏེ་སྟོང་གསུམ་གྱི་ཟིལ་དངར་རོ་བཅུད་ཚངས་པ་ཆེན་པོས་ཕུལ་བ་བཞེས་ནས་སྐུ་ལུས་བརྟས་པར་མཛད་དོ། ། དེ་ལ་གཟིགས་པ་བཞི་ནི། གླིང་དང་། དུས་དང་། ཡུལ་དང་། རིགས་ཏེ་གོང་དུ་སྨོས་པ་ལྟར་ལ། གཟིགས་པ་ལྔ་ནི། རྒྱལ་རིགས་དང༌། ཡུལ་དབུས་དང༌། ཚེ་ལོ་བརྒྱ་(༧༣བ)པའི་དུས། ཤཱཀྱའི་རིགས་བརྒྱུད། བྱང་ཆུབ་སེམས་དཔའ་ཟླ་བ་བཅུར་ལྷུམས་སུ་འཛིན་པར་ནུས་པའི་ཡུམ་སྟེ། ལྔ་ལ་གཟིགས་པ་ལུང་དང་མངོན་འབྱུང་ནས་གསུངས་ཤིང༌། སྙིགས་མ་ལྔ་ནི། ཚེ་དང༌། དུས་དང༌། ལྟ་བ་དང༌། སེམས་ཅན་དང༌། ཉོན་མོངས་པའོ། ། དེ་ཡང་། ཚེའི་སྙིགས་མ་དང་དུས་ཀྱི་སྙིགས་མས་སྲོག་དང་ཡོ་བྱད་རྒུད་པར་བྱེད། ཉོན་མོངས་པ་དང་ལྟ་བའི་སྙིགས་མས་དགེ་བའི་ཕྱོགས་རྒུད་པར་བྱེད། སེམས་ཅན་གྱི་སྙིགས་མས་གཟུགས་རྒུད་པར་བྱེད་ཅིང༌། གཞན་ཡང་། ནད་མེད་པ་དང༌། སྟོབས་དང༌། བློ་དང༌། བརྩོན་འགྲུས་དང༌། བསམ་གཏན་ཉམས་པར་བྱེད་པའོ། ། ཆ༣ གསུམ་པ་[སྐུ་བལྟམས་པའི་མཛད་པ་]ནི། ངོ་མཚར་མཚན་མ་བྱེ་བ་སྙེད་དང་བཅས། ། ལུམྦི་ནཱི་ཡི་ཚལ་དུ་དོན་གྲུབ་བལྟམས། ། ལྷུམས་སུ་ཟླ་བ་བཅུ་ཚང་བར་བཞུགས་པའི་ཚེ་ལྷ་མི་ཁྲག་ཁྲིག་སུམ་ཅུ་རྩ་དྲུག་ཐེག་པ་གསུམ་ལ་སྨིན་པར་མཛད་དེ་བལྟམས་པའི་སྔ་ལྟས་སུམ་ཅུ་རྩ་གཉིས་དང༌། གླིང་ཆེན་པོ་བྱེ་བ་ཕྲག་བཞིའི་དབུས་སུ་ཨཤྭཏྠའི་ལྗོན་པ་སྐྱེ་བ་དང༌། གླིང་ཕྲན་རྣམས་སུ་ཙནྡན་གྱི་ཚལ་སྐྱེ་བ་དང༌། སེར་སྐྱའི་གྲོང་གི་ཁོར་ཡུག་ཏུ་བདེ་བའི་འབྱོར་པ་ཚད་མེད་པ་རང་བཞིན་གྱིས་འབྱུང་བ་སོགས་ངོ་མཚར་བའི་མཚན་མ་བྱེ་བ་ཁྲག་ཁྲིག་འབུམ་ཕྲག་སྙེད་ཀྱིས་ཞིང་ཐམས་ཅད་ཡོངས་སུ་གཏམས་པ་དང་བཅས། ལུམྦི་ནཱིའི་སྐྱེད་མོས་ཚལ་དུ་དབོ་ཟླའི་ཚེས་བརྒྱད་རྒྱུ་སྐར་རྒྱལ་དང་ལྡན་པའི་དུས་སུ་ཡུམ་ལ་གནོད་པ་མེད་པར་དཀུ་གཡས་བརྟོལ་ཏེ་མཚན་དཔེའི་དཀྱིལ་འཁོར་གསལ་མ་ཐག་ཚངས་པ་དང་བརྒྱ་བྱིན་ལ་སོགས་པ་ལྷ་ཀླུ་རྣམས་ཀྱིས་མཆོད་ཅིང་བསྙེན་བཀུར། ཕྱོགས་བཞིར་ཞབས་ཀྱིས་གོམས་པ་བདུན་བདུན་བོར་ཏེ་སྟོང་ཆེན་པོའི་སེམས་ཅན་ཐམས་ཅད་དབུགས་དབྱུང་བའི་གསུང་དབྱངས་ཕྱུང༌། ཡབ་རྒྱལ་པོས་བལྟམས་པའི་ངོ་མཚར་ལས་བརྩམས་ཏེ་གཞོན་ནུ་དོན་ཐམས་ཅད་གྲུབ་པ་ཞེས་བྱ་བའི་མཚན་ཕུལ། སེར་སྐྱའི་གཞིར་མ་མ་སུམ་ཅུ་རྩ་གཉིས་ཀྱིས་བསྐྱེད་(༧༤ན)བསྲིངས། ཤཱཀྱ་གཏུམ་པོ་གཟུ་ལུམ་ཅན་རྣམས་ཀྱི་ནང་དུ་ཐུབ་པ་བཞིན་གནས་པས་མཚན་གཉིས་པ་ཤཱཀྱ་ཐུབ་པ་ཞེས་བཏགས། ཤཱཀྱ་རྣམས་ཀྱི་ལྷ་གནོད་སྦྱིན་ཤཱཀྱ་འཕེལ་སོགས་འཇིག་རྟེན་སྐྱོང་བ་ཐམས་ཅད་ཀྱིས་ཞབས་ལ་ཕྱག་བྱས་པས་ཡབ་ཀྱིས་མཚན་གསུམ་པ་ལྷའི་ཡང་ལྷ་ཞེས་པ་བཏགས། དྲང་སྲོང་ནག་པོ་ཉོན་མོངས་མེད་ཀྱིས་སངས་རྒྱས་སུ་འགྱུར་བར་ལུང་བསྟན་ཏོ། ། ཆ༤ བཞི་པ་[བཟོ་ཡི་གནས་ལ་མཁས་པའི་མཛད་པ་]ནི། ཡིག་རྩིས་རི་མོ་འཕོང་སྟོབས་བརྟག་དཔྱད་གཏམ། ། ལུགས་མང་སྒྱུ་རྩལ་བཟོ་ཡི་གནས་ལ་མཁས། ། བྱང་ཆུབ་སེམས་དཔའ་ཤེས་བྱའི་གནས་ཐམས་ཅད་ཀྱི་མཐར་སོན་ཀྱང་གདུལ་བྱ་གྲངས་མེད་པ་སྨིན་པའི་སླད་དུ་ཡི་གེ་སློབ་པའི་གྲྭར་བྱོན་ཏེ་ཡིག་མཁན་ཀུན་གྱི་བཤེས་གཉེན་ལས་སློབ་པ་ལྟར་མཛད་ཅིང་དེས་མིང་ཙམ་ཡང་མ་ཐོས་པ་མང་པོ་བསྟན་པ་དང༌། དགུང་ལོ་བཅུ་དྲུག་རྫོགས་པ་ན་ཤཱཀྱ་ལག་ན་བེ་ཅོན་གྱི་བུ་མོ་ལྷ་མོ་དཔལ་ཆེན་མོའི་སྤྲུལ་པ་ས་འཚོ་མ་རྒྱལ་བའི་རུ་མཚོན་དུ་བཞག་ནས་ཤཱཀྱ་བཞོན་ནུ་ལྔ་བརྒྱ་དང་རྩལ་འགྲན་པའི་ཐོག་མར་རྩིས་པ་ཆེན་པོ་ཤཱཀྱ་སྲིད་སྒྲུབ་དབང་དུ་བཙུགས་ཏེ་གྲངས་ཀྱི་གནས་འགྲན་པ་ལ་དཔང་པོ་དང་བཅས་པ་ཀུན་གྱིས་བྱང་ཆུབ་སེམས་དཔའ་ཆ་ཙམ་ལའང་འགྲན་པར་མ་ནུས་ཤིང༌། དེ་བཞིན་དུ། རི་མོའི་དུ་བྱེད་དང༌། འཕོང་དང་། སྟོབས་དང་། བརྟག་དཔྱད་དང་། གཏམ་དང་། རྐྱལ་དང་། བོང་དང་། འདེགས་མཆོངས་ལ་སོགས་པ་ལུགས་སྲོལ་ཤིན་ཏུ་མང་པོའི་སྒྱུ་རྩལ་དང་བཟོའི་གནས་ཡོད་དོ་ཅོག་ལ་ཤིན་ཏུ་མཁས་པས། སུས་ཀྱང་འགྲན་ཟླ་མེད་པར་འགྱུར་ཏེ། ལྷས་བྱིན་ལ་སོགས་པ་རིགས་དང་སྟོབས་ཀྱི་ང་རྒྱལ་ཅན་རྣམས་ཀྱང་འདུལ་བར་མཛད་དོ། ། ཆ༥ ལྔ་པ་[བཙུན་མོའི་འཁོར་དུ་རོལ་བའི་མཛད་པ་]ནི། ཡོན་ཏན་ཀུན་ཚང་ས་འཚོ་གྲགས་འཛིན་སོགས། ། བཙུན་མོ་དྲུག་ཁྲིའི་འཁོར་རོལ་སྨིན་པར་མཛད། ། གཟུགས་བཟང་དར་བབ་དྲེགས་པ་དང་བྲལ་ཞིང་གཏོང་ལ་དགའ་བ་སོགས་བུད་མེད་རིན་པོ་ཆེའི་ཡོན་ཏན་ཀུན་ཚང་བ་ས་