Tibetan
གདངས། ཐུགས་རྗེའི་སྣང་བ་སྤྲིན་མེད་པའི་ནམ་མཁའ་ལྟ་བུས་གོ་ཕྱེ་བའི་ཆ་ལས་རང་སྣང་བའོ། ། ཤར་ལུགས་ཀྱི་སྒོ་བརྒྱད། བཀྲ་ཤིས་མཛེས་ལྡན་ཆེན་པོའི་རྒྱུད་ལས། ཐུགས་རྗེ་ལྟར་འཆར་བའི་གོ་མ་འགགས་པ། (༥༣ན)འོད་ལྟར་འཆར་བའི་སྣང་བ་མ་འགགས་པ། ཡེ་ཤེས་ལྟར་འཆར་བའི་ལོངས་སྤྱོད་མ་འགགས་པ། སྐུ་ལྟར་འཆར་བའི་ངོ་བོ་མ་འགགས་པ། གཉིས་མེད་ལྟར་འཆར་བའི་ལྟ་བ་མ་འགགས་པ། མཐའ་གྲོལ་ལྟར་འཆར་བའི་ཐབས་མ་འགགས་པ། དག་པ་ཡེ་ཤེས་ཀྱི་འཇུག་སྒོ་མཐར་ཕྱིན་པ། མ་དག་པའི་ཐུགས་རྗེ་མ་འགགས་པ། འདོད་ཡོན་གྱི་ནོར་བུ་རིན་ཆེན་ལྟ་བུའོ། །ཞེས་པ་ལྟར་རོ། ། དེའང་། ངོ་བོའི་རྩལ་ལས་ལོངས་སྐུའི་སྣང་བ་དང༌། ཡོན་ཏན་གྱི་རྩལ་ལས་རང་བཞིན་སྤྲུལ་སྐུའི་ཞིང་སྣང་དང༌། ཐུགས་རྗེའི་རྩལ་ལས་འཁོར་བའི་སྒོ་རང་སྣང་དུ་རྨི་ལམ་ལྟར་ཤར་བ་སྟེ། གཞི་སྣང་དེའི་རང་ངོ་ལ་སྣང་ཚུལ་དེ་ལྟར་སྣང་ཡང་འཁྲུལ་མ་འཁྲུལ་གང་དུའང་མ་གྲུབ་ཅིང༌། གཞི་སྣང་ལ་ལྷུན་གྲུབ་ཀྱི་སྒོ་ཡོད་པས་དག་པའི་ཞིང་དང་མ་དག་པའི་འཁྲུལ་སྣང་མཐོང་བའི་གནད་ཀྱང་འདི་ལ་ཐུག་པའོ། ། འདི་ཉིད་གྲོལ་གཞི་ཡིན་ལ། ཀ་དག་ནི་གྲོལ་ས་ཡིན་པས་ཁྱད་པར་ཕྱེད་པ་གལ་ཆེ་ཞིང༌། དེའང་གཞི་སྣང་ཉིད་རང་ངོ་ཤེས་ན་གྲོལ་རྐྱེན་བྱེད་པའི་ཆ་ནས་གྲོལ་གཞི་དང༌། མ་ཤེས་ན་འཁྲུལ་རྐྱེན་བྱེད་པའི་ཆ་ནས་འཁྲུལ་གཞིར་བཏགས་པ་ནི། དུང་དཀར་པོ་ལ་སེར་པོར་འཁྲུལ་རྐྱེན་བྱས་པ་ལྟ་བུ་སྟེ། འཁྲུལ་པ་དངོས་མ་ཡིན་ཡང་རྐྱེན་བྱས་དུས་བཏགས་པའོ། ། ཀུན་ཏུ་བཟང་པོའི་གྲོལ་ལུགས་ནི། གཞི་སྣང་ཤར་བའི་སྐད་ཅིག་ལ་གཞན་དུ་མ་བཟུང་བར་རང་སྣང་དུ་ངོ་ཤེས་པས་འགྱུ་བ་རང་ཐོག་ཏུ་ཆོད་དེ་སྐད་ཅིག་དང་པོ་ལ་རང་སྣང་དུ་ཤར་བར་རང་ངོ་ཤེས་པས་རྟོགས་པ་སྐྱེས་ཏེ་བྱེ་བྲག་ཕྱེད། གཉིས་པ་ལ་འཁྲུལ་པ་སངས་ཤིང་ཡེ་ཤེས་རྒྱས་པས་གཞི་འབྲས་བུར་སྨིན་ཏེ་ངོ་བོ་ཡེ་སངས་རྒྱས་པ་ལ་རྟོགས་པས་ཡང་སངས་རྒྱས་པ་ཞེས་བྱ། རང་སྣང་ཀ་དག་ཏུ་ཐིམ་ནས་གཞི་ཐོག་ཏུ་ཀུན་གྱི་སྔོན་རོལ་ཏུ་སངས་རྒྱས་པའི་སྟོན་པ་ཀུན་ཏུ་བཟང་པོ་ཞེས་བྱའོ། ། ད༢ གཉིས་པ་དེ་ལས་སེམས་ཅན་གྱི་འཁྲུལ་ཚུལ་བཤད་པ་ལ་གཉིས།(༥༣བ) ན༡ འཁྲུལ་པའི་ཚུལ་སྤྱིར་བསྟན། ན༢ ལུས་འགྲུབ་ཚུལ་བྱེ་བྲག་ཏུ་དབྱེ་བའོ། ། ན༡ དང་པོ་ནི། རྒྱུ་གསུམ་རྐྱེན་བཞིས་ཡིད་དྲུག་གཡོས་པ་ལས། ། འཆར་གཞིའི་རང་ངོ་མ་ཤེས་ལྔ་ཚན་གྱི། ། ཆོས་རྣམས་བཟུང་འཛིན་རྟེན་འབྲེལ་ཚུལ་གྱིས་འཁོར། ། འཁྲུལ་པ་ཇི་ལྟར་བྱུང་ན། རྒྱུ་མ་རིག་པ་གསུམ་དང་རྐྱེན་བཞི་དམིགས་པ་མ་དག་པའི་ཆ་ལས་སྣང་བ་ལ་ཤེས་པ་གཟུང་འཛིན་དུ་འཁྲུལ་དུས་ཡིད་དྲུག་འཛིན་པ་མ་འགགས་པར་གཡོས་པ་ལས་ཉོན་མོངས་པ་དྲུག་བག་ལ་ཉལ་གྱི་ཆར་ཤར་བས་རིག་པ་བཅིངས་ཏེ་ཡུལ་དྲུག་གི་སྣང་བ་ལ་འཁྲུལ་པ་ནི། འཆར་གཞི་སྣང་བ་རང་ངོ་མ་ཤེས་པའི་དབང་གིས་ཏེ། རིམ་གྱིས་བག་ཆགས་མཐུ་བརྟས་པས་ཕུང་པོ་དང་དབང་ཡུལ་སོགས་ལྔ་ཚན་གྱི་ཆོས་རྣམས་གཟུང་འཛིན་གྱི་ཆ་ལས་བྱུང་ཞིང་རྟེན་འབྲེལ་བཅུ་གཉིས་ལུགས་འབྱུང་ཚུལ་གྱིས་འཁོར་བའི་འཁོར་ལོ་རྨི་ལམ་ལྟར་འཁོར་བའོ། ། དེའང་ཞིབ་མོར་བཤད་ན། གཞི་ལས་གཞི་སྣང་ཤར་དུས་ཐུགས་རྗེའི་རྩལ་ཤེས་པ་གསལ་རིག་ཡུལ་དཔྱོད་ནུས་སུ་རང་ཤར་བ་དེ་རང་ངོ་མ་ཤེས་པ་ལ་ལྟོས་ནས་མ་རིག་པ་གསུམ་དང་མཚུངས་ལྡན་དུ་ཤར་ཏེ། རྒྱུ་བདག་ཉིད་གཅིག་པའི་མ་རིག་པ་ཤེས་པར་སྐྱེས་པ་དེ་ཉིད་དུ་མ་ཤེས་པ་དང༌། ལྷན་ཅིག་སྐྱེས་པའི་མ་རིག་པ་རང་ངོ་མ་ཤེས་པ་དེ་དང་ཤེས་པ་དེ་གཉིས་ལྷན་ཅིག་སྐྱེས་པ་དང༌། ཀུན་བརྟགས་པའི་མ་རིག་པ་རང་སྣང་ལ་གཞན་དུ་དཔྱོད་པའི་ཆ་དང་གསུམ་མོ། ། གཞི་སྣང་དེ་རང་ལས་བྱུང་བར་མ་ཤེས་པས་རྒྱུའི་རྐྱེན། དེ་ཉིད་ཡུལ་དུ་ཤར་བས་དམིགས་པའི་རྐྱེན། བདག་དང་བདག་གིར་བཟུང་བས་བདག་པོའི་རྐྱེན། དེ་གསུམ་དུས་མཚུངས་པས་དེ་མ་ཐག་པའི་རྐྱེན་བཞིར་འཁྲུལ་པ་སྟེ། མདོར་ན། འཁྲུལ་པའི་རྒྱུ་མ་རིག་པ། རྐྱེན་ཤེས་པ་ལ་ཡུལ་སྣང་བའོ། ། མ་རིག་པ་ལ་ངོ་བོའི་ཆ་ལས་རྨོངས་པ་དྲུག་ཏུ་བྱུང་སྟེ། རང་ཤར་ལས། རྩ་བ་སེམས་ཀྱི་མ་རིག་པ་དང༌། (༥༤ན)འཁྲུལ་པ་ཡུལ་གྱི་མ་རིག་པ་དང༌། འཁྲུལ་གཞི་གཞིའི་མ་རིག་པ་དང༌། འཛིན་པ་རྟོག་པའི་མ་རིག་པ་དང༌། བཅོས་པ་ལམ་གྱི་མ་རིག་པ་དང༌། མ་ཤེས་པ་རྨོངས་པའི་མ་རིག་པ་དང༌། དེ་ལྟར་མ་རིག་པ་རྣམ་པ་དྲུག་བྱུང་སྟེ་རང་གི་སྣང་བ་མི་མཐོང་ངོ༌། །ཞེས་སོ། ། དེ་ལས་འཛིན་པའི་ཡིད་དྲུག་གཡོས་པ་ནི། ཡིད་འགྱུ་བ་དང་བཅས་པ་དང༌། ཤེས་པས་རང་རིག་པ་དང༌། ཡུལ་འཛིན་པ་དང༌། ཡུལ་ངེས་པར་འཛིན་པ་དང༌། ཡུལ་ལ་ཡེངས་པ་དང༌། ཉོན་མོངས་པ་རགས་པ་སྟེ། ནང་དུ་རྩེ་གཅིག་ཏུ་འཛིན་པ་ནི་དྲུག་གི་ཆའི་རྨོངས་པའོ། ། དེས་ན་རྟེན་འབྲེལ་བཅུ་གཉིས་ཀྱི་ཚུལ་གྱིས་འཁྲུལ་ཞིང་འཁོར་ཏེ། ཕྱི་རུ་ལོ་དང་ཟླ་བའི་ཆ་བཅུ་གཉིས། ནང་དུ་ཉོན་མོངས་པ་བཅུ་གཉིས་རྣམས་ཚོགས་པས་སྐྱེ་མཆེད་བཅུ་གཉིས་སུ་སྲིད་པར་བྱས་པ་ནི་རྟེན་འབྲེལ་ལུགས་སུ་འཇུག་པ་བཅུ་གཉིས་མ་དག་པ་ལས་འབྱུང་བས་ཏེ། གཞི་ལས་གཞི་སྣང་དུ་ཤར་དུས་རིག་པའི་རྩལ་ལས་ཡིད་ཀྱི་ཤེས་པ་བྱུང་སྟེ་རང་ངོ་མ་ཤེས་པ་དང་ལྷན་ཅིག་པས་མ་རིག་པའོ། །དེ་ལས་འཁྲུལ་པས་འདུ་བྱེད་དོ། །དེ་ལས་ཡུལ་གྱི་རྣམ་པ་ལ་དཔྱོད་པས་རྣམ་པར་ཤེས་པའོ། །དེ་ལས་འདི་ནི་ཡུལ་ལོ། །སྣང་བའོ། །ཞེས་པ་ལ་སོགས་པའི་མིང་དུ་འབྱེད་པའོ། །དེ་ལས་མིང་ཅན་དོན་གྱི་རང་བཞིན་གཟུགས་སུ་འཛིན་པས་སྲིད་པའི་འཁྲུལ་པ་དང་པོ་མིང་དང་གཟུགས་ཞེས་བྱའོ། །དེ་ལས་ཡུལ་གྱི་རྣམ་པ་དྲུག་ལ་ཤེས་པ་སྐྱེ་ཞིང་མཆེད་པའི་སྐྱེ་མཆེད་དྲུག་ཏུ་བྱུང་ངོ༌། །དེ་ལས་ཡུལ་འཛིན་པའི་རེག་པའོ། །དེ་ལས་ཆགས་སྡང་བར་མའི་ཆའི་ཚོར་བའོ། །དེ་ལས་ཡུལ་ལ་ཞེན་པའི་སྲེད་པའོ། །དེ་ལས་ཕྱིས་ཀྱི་ལེན་པ་པོ་དང་དེ་ལྟར་ཡུལ་དང་དུ་ལེན་པའི་ལེན་པའོ། །དེ་ལས་འཁྲུལ་པ་དུ་མར་སྣང་བ་དང་བྱེད་པ་མྱོང་བའི་ཆ་ཅི་འབྱུང་མ་ངེས་པ་བསྐྱེད་པས་སྲིད་པའོ། །དེ་ལས་གཟུགས་མེད་གཟུགས་དང་འདོད་པར་སྐྱེ་བས་སྐྱེ་བའོ། །(༥༤བ)དེ་ལས་རྒས་པ་དང་ན་བ་དང་ཤི་བའི་བར་དུ་འབྱུང་སྟེ་ཡང་དང་ཡང་དུ་དེ་ལྟར་འཁོར་བས་འཁོར་བའི་རྒྱུ་རྟེན་འབྲེལ་ལུགས་སུ་འཇུག་པ་བཅུ་གཉིས་གཞི་སྣང་ལས་དང་པོར་མཆེད་པའོ། ། དེ་ལས་སྲིད་པ་སོ་སོར་འཁྲུལ་དུས་ཀྱི་རྟེན་འབྲེལ་བཅུ་གཉིས་ཀྱང་ཞར་ལས་ཤེས་པར་བྱ་སྟེ། ཆོས་ཉིད་ནུབ་ནས་རང་མ་རིག་པ་ལས་ཕྱི་མའི་འདུ་བྱེད་དང༌། རྣམ་ཤེས་ཀྱི་ཆས་ལུས་འཚོལ་བ་དང༌། མངལ་དུ་ཚུད་དེ་མེར་མེར་པོ་ལ་སོགས་པ་ནས་མིང་དང་གཟུགས་སུ་གྲུབ་པ་དང༌། དེའི་སྐྱེ་མཆེད་དྲུག་དང༌། རྐྱེན་འདུས་པས་རེག་པ་དང༌། བདེ་སྡུག་གི་ཚོར་བ་དང༌། མྱོང་བ་ལ་སྲེད་པ་དང༌། ཡུལ་དང་ལས་ཀྱི་ལེན་པ་དང༌། ཡང་སྲིད་པའི་ཉེ་བར་ལེན་པ་དང༌། མངལ་ནས་སྐྱེ་བ་དང༌། དར་ལ་བབ་པའི་ཚོགས་པ་གཞན་དུ་འགྱུར་བའི་བརྒྱུད་པ་ནི་རྒས་པ་དང་མཐར་འཆི་བ་སྟེ་འབྲེལ་ཆགས་སུ་འབྱུང་བའོ། ། དེ་ལྟར་འཁོར་བའི་ཚེ་གཟུགས་ལ་སོགས་པའི་ཡུལ་ལྔ་ནི་འོད་ལྔ་རང་སྣང་དུ་མ་ཤེས་པར་གཟུང་བའི་ཆ་ལས་བྱུང་ཞིང༌། ཉོན་མོངས་པ་ལྔ་ནི་ཡེ་ཤེས་ལྔ་རང་ངོ་མ་ཤེས་པའི་ཆ་ལས་བྱུང༌། སྣ་ཚོགས་སྡུད་པའི་ལུས་སེམས་ལ་སོགས་པ་ལྔ་ནི་ཆོས་ཉིད་ཀྱི་རང་གདངས་མ་དག་པ་ལས་བྱུང༌། ཀུན་ནས་འཚོ་བའི་ཡིད་ལ་སོགས་པ་ལྔ་ནི་རླུང་ལྔ་རྣམ་པར་མ་དག་པ་ལས་བྱུང༌། བསམ་པ་དྲན་པས་འཛིན་པའི་བདག་ཏུ་རྟོག་པ་དང༌། ཡུལ་དུ་མ་ལ་བདག་ཏུ་རྟོག་པ་དང༌། འགྱུ་བ་ཐ་དད་པ་ལ་བདག་ཏུ་རྟོག་པ་དང༌། ཤེས་པའི་རྣམ་པ་ཙམ་ལ་བདག་ཏུ་རྟོག་པ་དང༌། ཆོས་རྣམ་པར་སེམས་པ་དང་བཅས་པ་ལ་བདག་ཏུ་རྟོག་པ་དང་ལྔ་ནི་འགྱུ་བ་རང་ཐོག་ཏུ་མ་ཆོད་པ་ལས་བྱུང་བའོ། ། དེ་ལྟར་མ་དག་པ་འཁོར་བའི་ཆོས་རྣམས་རིག་པའི་ངང་ལས་བྱུང་ངང་ལ་གནས་ངང་ལ་རོལ་པ་ཙམ་ལས་གཞན་དུ་གཡོས་པ་ཅུང་ཟད་ཀྱང་མེད་པ་ནི་རྨི་ལམ་གཉིད་ཀྱི་ངང་ལས་མ་གཡོས་པ་ལྟ་བུ་སྟེ། དོན་ལ་སྟོང་གཟུགས་མེད་པ་གསལ་སྣང་གི་ཆོ་འཕྲུལ་ཙམ་དུ་(༥༥ན)བསྟན་པ་ནི་འཁོར་བའི་རྣམ་དག་ཏུ་གསུངས་སོ། ། ན༢ གཉིས་པ་[ལུས་འགྲུབ་ཚུལ་བྱེ་བྲག་ཏུ་དབྱེ་བ་]ལ་བཞི། པ༡ ཁམས་གསུམ་གྱི་ལུས་འགྲུབ་ཚུལ་སྤྱིར་བསྟན། པ༢ མངལ་སྐྱེས་ཀྱི་རྟེན་བྱེ་བྲག་ཏུ་དབྱེ། པ༣ ཀུན་རྫོབ་དོན་དམ་གྱི་འབྲེལ་པ་དགོད། པ༤ ཁྱབ་བྱེད་འབྱུང་བའི་ཚང་ཚུལ་སྨོས་པའོ། ། པ༡ དང་པོ་ནི། འཁྲུལ་གཞི་གསུམ་ལས་ཡུལ་དང་ལུས་སེམས་བྱུང༌། ། ཁམས་གསུམ་ཡིད་སྣང་གདོས་བཅས་ལུས་སུ་གྲུབ། ། གཞི་ལས་རང་སྣང་དུ་ཤར་བ་རང་ངོ་མ་ཤེས་པ་ལྷན་ཅིག་སྐྱེས་པའི་མ་རིག་པས་རྒྱུ་བྱས། རང་ལ་སྣང་ཡང་གཞན་དུ་བཟུང་བ་ཀུན་ཏུ་བརྟགས་པའི་མ་རིག་པས་རྐྱེན་བྱས། རང་སྣང་འོད་གསལ་གྱི་སྣང་བས་འཁྲུལ་གཞི་བྱས་ཏེ། དེའང་ཆ་གསུམ་ལས། ངོ་བོ་སྟོང་པས་གོ་ཕྱེ་བ་ནི་ཆོས་ཉིད་ཡུལ་གྱི་འཁྲུལ་གཞི། རང་བཞིན་འོད་ལྔ་སྣང་བའི་ཡུལ་ཕྱི་རོལ་སྣོད་དང་གདོས་བཅས་ལུས་ཀྱི་འཁྲུལ་གཞི། ཐུགས་རྗེའི་གདངས་རྩལ་རིག་པ་སེམས་ཀྱི་འཁྲུལ་གཞིར་གྱུར་ཏེ་ཁམས་གསུམ་དུ་འཁྲུལ་པའི་ཐོག་མར་གཟུགས་མེད་ཏིང་ངེ་འཛིན་ཡིད་ཀྱི་ལུས་ཅན་མིང་གཞིའི་ཕུང་པོ་ལ་སེམས་ཀྱི་རྒྱུད་བརྟེན་པ། དེ་ནས་གཟུགས་ཁམས་པ་འོད་ལྔ་སྣང་བའི་ལུས་ཅན་ལ་སེམས་ཀྱི་རྒྱུད་བརྟེན་པ། འདོད་ཁམས་པ་གདོས་བཅས་ཤ་ཁྲག་ལུས་ལ་སེམས་ཀྱི་རྒྱུད་བརྟེན་པ་རྣམས་སུ་གྲུབ་བོ། ། པ༢ གཉིས་པ་[མངལ་སྐྱེས་ཀྱི་རྟེན་བྱེ་བྲག་ཏུ་དབྱེ་བ་]ནི། མངལ་སྐྱེས་འབྱུང་བ་ཟུག་བྱེར་སྙོམས་པ་ལས། ། རྩ་ཡིག་རླུང་ཐིག་ཀུན་རྫོབ་དོན་དམ་སྨིན། ། དེ་ལས་རྡོ་རྗེའི་ལུས་མངལ་སྐྱེས་རྣམས་ནི་རྒྱུ་ཉོན་མོངས་པས་བསྐྱེད་པའི་འབྱུང་བ་ས་ཆུ་མེ་རླུང་བཞི་པོ་ཟུག་པ་དང༌། བྱེར་བ་དང༌། སྙོམས་པ་གསུམ་གྱིས་སྡུད་པ་དང༌། བཤིགས་པ་དང༌། བསྲེ་ཞིང་སྨིན་པའི་ལས་བྱས་ཏེ་ཐོག་མར་མེར་མེར་པོའི་དུས་སུ་ཕྱོགས་བཞིར་འབྱུང་བཞིའི་རྩ་ཕྲ་མོ་ས་བོན་གྱི་ཡི་གེ་བཞི་དང་བཅས་པ། དེ་ནས་ནུར་ནུར་པོའི་དུས་ལ་སོགས་པར་ལྟེ་བའི་(༥༥བ)རྩ་མདུད་ལ་སྒྲོན་མའི་སྤྱན་དང་འབྱུང་བའི་སྤྱན་གྱི་མིག་ཆུང་གཉིས། སྙིང་གའི་རྩ་བཞིར་ཤ་ཁྲག་དྲོད་དབུགས་ཀྱི་དྭངས་མ་ཆགས་ཤིང་ཚོགས་བརྒྱད་ཀྱི་རྟེན་གསལ་བར་བྱས། རིམ་པས་འཁོར་ལོ་བཞི་སྤྱན་གཉིས་གཉིས་དང་བཅས་པ། དབང་པོ་ལྔའི་རྟེན་གྱི་རྩ་གཙོ་མོ་གསུམ་ལ་མ་དག་པའི་དུས་སུ་སྒོ་གསུམ་དང་དུག་གསུམ། དག་པའི་དུས་སྐུ་གསུམ་གྱི་རྟེན་བྱེད་པའི་ཡི་གེ་འབྲུ་གསུམ། འཁོར་ལོ་ལྔ་ལ་དཔའ་བོ་འབྲུ་ལྔ། དེ་ལས་གྱེས་པའི་རྩ་ཕྲན་བཞི་བརྒྱ་བདུན་ཅུ་རྩ་གཉིས། རྩ་བ་ཡན་ལག་ལས་བྱེད་པའི་རླུང་ལྔ་ཕྲག་གསུམ་ལ་སོགས་པ་ལས་དང་ཡེ་ཤེས་ཀྱིས་བསྡུས་པའི་རླུང༌། ཀུན་རྫོབ་ཀྱི་ཐིག་ལེ་གཡས། དོན་དམ་གྱི་ཐིག་ལེ་གཡོན། རང་བཞིན་གྱི་ཐིག་ལེ་དབུས་ཀྱི་ཆར་གནས་ཏེ་ལུས་ཡོངས་སུ་རྫོགས་པ་ཀུན་རྫོབ་དང་དོན་དམ་གྱི་འབྱུང་བ་བཞིའི་སྨིན་སོས་ཆགས་ཤིང་གྲུབ་པའོ། ། པ༣ གསུམ་པ་[ཀུན་རྫོབ་དོན་དམ་གྱི་འབྲེལ་པ་དགོད་པ་]ནི། སྔ་མ་ལ་བརྟེན་ཕུང་སོགས་མཆེད་པ་དང༌། ། ཕྱི་མས་སྒྲོན་བཞིའི་རྒྱུ་བྱས་སྣང་བཞི་མཐོང༌། ། སྔ་མ་ཞེས་པ་རྟེན་ཀུན་རྫོབ་འབྱུང་བ་བཞི་ལ་བརྟེན་ནས་ཕུང་པོ་ལྔ་དང༌། སོགས་ཁོངས་ནས་ཡེ་ཤེས་ཀྱི་རྟེན་དུ་གྱུར་པས་དེ་དག་མཆེད་པ་དང་བསྐྱེད་པའི་ཚུལ་ཡང་ཤ་ལ་བརྟེན་ནས་གཟུགས་ཀྱི་ཕུང་པོར་མཆེད། ཁྲག་ལ་བརྟེན་ནས་འདུ་ཤེས། དྲོད་ལ་བརྟེན་ནས་རྣམ་ཤེས། དབུགས་ནང་དུ་རྔུབ་པ་ལ་བརྟེན་ནས་འདུ་བྱེད། རླུང་ཕྱིར་འགྲོ་བ་ལ་བརྟེན་ནས་ཚོར་བའི་ཕུང་པོར་མཆེད་དོ། ། ཡང་ཤ་ལ་བརྟེན་ནས་རྩ་བསྐྱེད། རྩས་རླུང་བསྐྱེད། རླུང་གིས་ལས་དང་ཡེ་ཤེས་ཀྱི་རླུང་གཉིས་ཀ་བསྐྱེད། ལས་རླུང་གིས་འཁོར་བ་སྡུད། ཡེ་ཤེས་ཀྱིས་འདས་པ་སྡུད་དོ། ། ཡང་ཁྲག་ལ་བརྟེན་ནས་ཆུ་སེར་བསྐྱེད། དེས་ཐིག་ལེ་བསྐྱེད། ཐིག་ལེ་ལ་བརྟེན་ནས་ཀུན་རྫོབ་ཀྱི་སྨིན་སོ་དབང་པོ་ལྔ་འབྱུང༌། དབང་པོའི་རྒྱུ་ཉོན་མོངས་པ་ལྔ། འདས་པ་དང་མ་འོངས་པ་དང་ད་ལྟའི་རྟོག་ཚོགས་འདུས་པ་ལས་འཁོར་འདས་ཀྱི་རྒྱུར་འབྱུང་བའོ། །དེ་དག་ནི་(༥༦ན)ཀུན་རྫོབ་ཀྱི་འབྱུང་བཞིའི་འཕེལ་བརྩིས་པའོ། །ཕྱི་མ་ཞེས་པ་དེ་ལ་བརྟེན་པ་དོན་དམ་པའི་འབྱུང་བཞིས་སྒྲོན་མ་བཞིའི་རྒྱུ་བྱས་ཤིང༌། དེ་ལས་སྣང་བཞིའི་ཡེ་ཤེས་འཆར་ཞིང་མཐོང་བ་སྟེ། དེའང་ཁ་དོག་དཀར་པོ་རབ་ཏུ་མཆེད་པ་ལས་རྒྱང་ཞགས་ཆུའི་སྒྲོན་མའི་རྒྱུ་བྱས། ཆུའི་རླུང་གི་རྩ་ལས་བྱུང༌། དམར་པོ་རབ་ཏུ་དམར་བ་ལས་ཐིག་ལེ་སྟོང་པའི་སྒྲོན་མའི་རྒྱུ་བྱས། མེའི་རྩ་ལས་བྱུང༌། སེར་བ་རབ་ཏུ་སེར་བ་ལས་དབྱིངས་རྣམ་པར་དག་པའི་སྒྲོན་མའི་རྒྱུ་བྱས། སའི་རྩ་ལས་བྱུང༌། ཁ་དོག་རབ་ཏུ་ལྗང་བ་ལས་ཤེས་རབ་རང་བྱུང་གི་སྒྲོན་མའི་རྒྱུ་བྱས། ལམ་རླུང་གི་རྩ་ནས་འབྱུང་ངོ༌། ། དེ་ཡང་ཤེས་རབ་རང་བྱུང་གིས་རིག་པ་བསྐྱེད། རྒྱང་ཞགས་ཀྱིས་འོད་བསྐྱེད། ཐིག་ལེས་སྐུ་བསྐྱེད། དབྱིངས་ཀྱིས་ཡེ་ཤེས་བསྐྱེད་དོ། །རྒྱང་ཞགས་ཆུའི་སྒྲོན་མས་ནི་ཆོས་ཉིད་མངོན་སུམ་གྱི་སྣང་བ་མཐོང་ལ། ཐིག་ལེ་སྟོང་པའི་སྒྲོན་མས་ཉམས་གོང་འཕེལ་གྱི་སྣང་བ་མཐོང༌། དབྱིངས་རྣམ་པར་དག་པའི་སྒྲོན་མས་རིག་པ་ཚད་ཕེབས་ཀྱི་སྣང་བ་མཐོང༌། ཤེས་རབ་རང་བྱུང་གི་སྒྲོན་མས་ཆོས་ཉིད་ཟད་པའི་སྣང་བ་མཐོང་བའི་རྟེན་བྱེད་དོ། །དེའང་ཀུན་རྫོབ་ཀྱི་རྩ་དང་ཐིག་ལེ། ལས་ཀྱི་རླུང་རྣམས་ཀྱིས་ལས་དང་ཉོན་མོངས་པ་འབྱུང་བཞིའི་དར་གུད་སྐྱེད་པར་བྱེད་ལ། དོན་དམ་གྱི་རྩ་ཐིག །ཡེ་ཤེས་ཀྱི་རླུང་རྣམས་ཀྱིས་རྒྱུ་ཡེ་ཤེས། རྐྱེན་འོད་དང་ཁ་དོག །བྱེད་ལས་སྐུ་དང་ཡེ་ཤེས་སུ་སྨིན་པའི་ལས་བྱེད་པ་ཡིན་ནོ། ། པ༤ བཞི་པ་[ཁྱབ་བྱེད་འབྱུང་བའི་ཚང་ཚུལ་སྨོས་པ་]ནི། འབྱུང་བ་ཉེར་ལྔས་ཡེ་ཤེས་གདངས་རྩལ་བྱེད། ། དེ་དག་ལ་ཁྱབ་བྱེད་འབྱུང་བ་ལྔ་ཕྲག་ལྔ་སྟེ་ཉི་ཤུ་རྩ་ལྔ་རང་གི་ལུས་ལ་རང་བཞིན་གྱིས་ཚང་བས་ཡེ་ཤེས་ཀྱི་གདངས་དང་རྩལ་ལ་སོགས་པ་བྱེད་པ་སྟེ། རང་ཤར་ལས། འབྱུང་བ་ཆེན་པོ་ལྔ་ནི་རང་གི་ལུས་ལ་ཚང་ངོ༌། ། དེ་ཡང་རླུང་རྣམ་པ་ལྔས་ཡེ་ཤེས་ཀྱི་གདངས་བྱེད་དོ། ། མེ་རྣམ་པ་ལྔས་ཡེ་ཤེས་ཀྱི་རྩལ་བྱེད་དོ། ། ས་རྣམ་པ་ལྔས་ཡེ་ཤེས་ཀྱི་ངོ་བོ་བྱེད་དོ། ། (༥༦བ)ཆུ་རྣམ་པ་ལྔས་ཡེ་ཤེས་ཀྱི་ཡུལ་བྱེད་དོ། ། ནམ་མཁའ་རྣམ་པ་ལྔས་ཡེ་ཤེས་ཀྱི་གནས་བྱེད་དོ། ། ཞེས་སོགས་རྒྱས་པར་གསུངས་སོ། ། དེ་ལ་ས་ལྔའི་གནས་ཚུལ་ནི། ཀུན་ཏུ་སྣང་བའི་ས་རིག་པ་དང་ལྷན་ཅིག་ཏུ་གནས། མི་འགྱུར་བ་རྡོ་རྗེའི་ས་སྒྲོན་མ་དང་ལྷན་ཅིག་ཏུ་གནས། ཐམས་ཅད་འབྱུང་བ་རིན་པོ་ཆེའི་ས་ཐིག་ལེ་དང་ལྷན་ཅིག་ཏུ་གནས། སྣང་བ་སྟོན་པ་ཀུན་ཏུ་མཐའ་ཡས་པའི་ས་དབྱིངས་ཡེ་ཤེས་གཉིས་དང་ལྷན་ཅིག་ཏུ་གནས། སྒྲུབ་པ་མཐར་ཕྱིན་པའི་ས་ཤེས་རབ་དང་ལྷན་ཅིག་ཏུ་གནས་སོ། ། ཆུ་ལྔ་ལས། འགྱུར་བ་མེད་པའི་ཆུ་རྩ་ཐམས་ཅད་ལ་གནས། ཞི་བ་གསལ་དག་གི་ཆུ་རུས་པ་ཐམས་ཅད་ལ་གནས། ཡོན་ཏན་རྒྱས་པའི་ཆུ་ཁྲག་ཐམས་ཅད་ལ་གནས། ཆགས་པ་མེད་པའི་ཆུ་ཆུ་སེར་ཐམས་ཅད་ལ་གནས། འཛིན་མེད་རྫོགས་པའི་ཆུ་མིག་གི་ནང་ན་གནས་སོ། ། མེ་ལྔ་ལས། ཕྱི་ནང་ཀུན་ཏུ་ཁྱབ་བྱེད་ཀྱི་མེ་གློ་བ་ན་གནས། ཕྱི་ནང་ཀུན་གསལ་གྱི་མེ་མིག་གཉིས་དང་ཡན་ལག་ལ་གནས། ཕྱི་ནང་ཀུན་ཏུ་མཉམ་པའི་མེ་ཤ་པགས་བར་ན་གནས། ཕྱི་ནང་གི་བྱ་བ་རྟོག་པའི་མེ་རྐང་མཐིལ་གཉིས་ན་གནས། ཕྱི་ནང་གི་བྱ་བ་སྒྲུབ་པའི་མེ་ལག་མཐིལ་གཉིས་ན་གནས་སོ། ། རླུང་ལྔ་ལས། སྲོག་འཛིན་པའི་རླུང་སྲོག་རྩ་ན་གནས། བཀྲག་དང་གཟི་མདངས་སྐྱེད་པའི་རླུང་སྨིན་ཕྲག་ན་གནས། མེ་དང་མཉམ་དུ་གནས་པའི་རླུང་ཕོ་བ་ན་གནས། ཀུན་ཏུ་ཁྱབ་བྱེད་ཀྱི་རླུང་ལུས་ཀུན་ལ་ཁྱབ་པར་གནས། སྙིང་རྗེ་མེད་པ་བསྐལ་པ་ལས་ཀྱི་རླུང་སྙིང་དང་སྙིང་ཤུན་གྱི་བར་ན་གནས་སོ། ། ནམ་མཁའ་ལྔ་ལས། ཀུན་ལ་ཁྱབ་པའི་ནམ་མཁའ་རིག་པ་དངོས་དང་དབྱེར་མེད་དུ་གནས། ཡུལ་མེད་གསལ་དྭངས་ཀྱི་ནམ་མཁའ་འོད་ལྔ་དང་དབྱེར་མེད་དུ་གནས། མ་འདྲེས་དག་པའི་ནམ་མཁའ་དབྱིངས་རྣམ་པར་དག་པ་དང་དབྱེར་མེད་དུ་གནས། དོན་མཚོན་བྱེད་ཀྱི་ནམ་མཁའ་རྟགས་ཀྱི་ཡེ་ཤེས་ཐིག་ལེ་སྟོང་པ་དང་དབྱེར་མེད་དུ་གནས། དག་པའི་ཞིང་(༥༧ན)དུ་སྒྲོལ་བྱེད་ཀྱི་ནམ་མཁའ་སྐུ་དང་ཡེ་ཤེས་ཀྱི་སྣང་བ་ཐམས་ཅད་དང་དབྱེར་མེད་དུ་གནས་སོ། ། དེ་ལས་རླུང་ལྔ་ལ་ལྔ་ཚན་དུ་དབྱེ་བའི་བྱེད་ལས་དང་གནས་ཚུལ་རྒྱས་པར་གསུངས་ཀྱང་། འདིར་མ་སྤྲོས་སོ། ། ད༣ གསུམ་པ་འཁྲུལ་དུས་གཞི་ཡིས་ཁྱབ་ཚུལ་ནི། སེམས་ཅན་ཁམས་ཀུན་སངས་རྒྱས་སྙིང་པོས་ཁྱབ། ། སྣང་ལུགས་འཆར་ལུགས་ལྔ་ཕྲག་དྲུག་གིས་མཚོན། ། འདི་ལྟར་འཁྲུལ་པར་སྣང་བའི་སེམས་ཅན་གྱི་ཁམས་ལ་གཞི་སངས་རྒྱས་ཀྱི་སྙིང་པོས་ཇི་ལྟར་ཁྱབ་ཅིང་གནས་ཤེ་ན། རྡོ་རྗེ་སེམས་དཔའ་སྙིང་གི་མེ་ལོང་གི་རྒྱུད་ལས། འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཏིལ་འབྲུ་ལ་མར་གྱིས་ཁྱབ་པ་བཞིན་དུ་གནས་སོ། །ཞེས་པ་དང༌། ནོར་བུ་ཕྲ་བཀོད་ལས། ཏིལ་འབྲུའམ་ནི་ཡུངས་འབྲུ་ལ། ། མར་ཉིད་ཡེ་ནས་ལྷུན་གྲུབ་བཞིན། ། སེམས་ཅན་ལུས་ལྟར་སྣང་བ་ལ། ། དེ་བཞིན་གཤེགས་པའི་ས་བོན་ནི། ། མཐུན་པའི་འོད་དང་བཅས་པར་སྣང༌། ། ཞེས་པ་དང༌། ཐལ་འགྱུར་ལས། རང་རིག་ཡེ་ཤེས་ལུས་ལ་གནས། ། ཏིལ་འབྲུ་ལ་ནི་མར་བཞིན་ནོ། ། ལུས་ཀྱི་བཀྲག་དང་གཟི་མདངས་ནི། ། ཡེ་ཤེས་རླན་གྱིས་ཁྱབ་པར་བྱེད། ། ཅེས་པ་དང༌། རང་ཤར་ལས། ཡང་དག་སངས་རྒྱས་དགོངས་པ་ནི། ། སེམས་ཅན་ཀུན་གྱི་རང་རྒྱུད་ལ། ། སྐུ་དང་ཡེ་ཤེས་ཚུལ་དུ་གནས། ། ཞེས་སོགས་ཐུན་མོང་མདོ་རྒྱུད་ངེས་དོན་དུ་གྱུར་པ་རྣམས་དང་མཐུན་པར་གསུངས་སོ། །