Tibetan
རིག་བྱེད་རྣམས་དང་གོ་བསྟུན་ནས་གསུངས་པ་ཡིན་ལ། གཞན་ཡང་གཤིན་རྗེ་གཤེད་དམར་པོའི་རྒྱུད་སོགས་ནས་ཀྱང་ཕྲན་ཚེགས་ཀྱི་ནད་གསོ་བ་དང༌། བཅུད་ལེན་གྱིས་མཚོན་ཐོར་བུར་གསུངས་པ་མང་ངོ༌། ། སྟོན་པ་ཞལ་བཞུགས་པ་དེའི་ཚེ་རྡོ་འཇོག་གི་རྒྱལ་པོ་པདྨའི་སྙིང་པོའི་བླ་སྨན་པ་རྒྱུན་ཤེས་ཀྱི་བུ་དང༌། དེའི་སློབ་མ་འཚོ་བྱེད་ཆེན་པོ་གཞོན་ནུས་གསོས་ཞེས་མི་ལས་འདས་པའི་སྨན་པ་ཆེན་པོ་དེ་ལ་སོགས་པའང་བྱུང་ཡང་གཞུང་བརྩམ་པར་ནི་མ་གྲགས་སོ། ། ཡང་བྱེ་བྲག་ཏུ་བཤད་པ་ལས། (༢༡༣ན) སྨན་གྱི་ནགས་སུ་ལོ་བཞི་སྟེ། ། ཞེས་འབྱུང་བས་དེར་བཞུགས་པའི་ཚེ་དཔལ་ལྡན་རྒྱུད་བཞི་སོགས་བསྟན་ཏོ་ཞེས་ཁ་ཅིག་གིས་འདོད་པའང་སྣང་ངོ༌། ། རིན་ཆེན་སྤུངས་པའི་འཁྲུལ་ངག་ལ་བརྟེན་ནས། ། གླེང་གཞི་འདི་ལ་ཅལ་ཅོལ་མང་སྨྲ་ཡང༌། ། ཟུར་མཁར་ཕྱི་མའི་གསུངས་ཉིད་ལེགས་བཤད་དོ། ། ཚན་པ་ཤི་ལ་ཧ་སོགས་སྲས་གསུམ་གྱིས་བྱས་པར་དངོས་སུ་བཤད་པའི་རིན་ཆེན་སྤུངས་པའི་གཞུང་ཉིད་འགའ་ཞིག་གིས་བཀའ་རུ་འདོད་ཅིང་དེའི་འཁྲུལ་པའི་ངག་ཕལ་ཆེར་ལ་བརྟེན་ནས་གླེང་གཞི་འདི་རིགས་ལ་བོད་ཀྱི་མཁས་པར་གྲགས་པ་འགའ་ཞིག་ཅལ་ཅོལ་མང་དུ་སྨྲ་ཡང༌། ཟུར་མཁར་ཕྱི་མ་ལེགས་བཤད་འཚོལ་གྱི་གསུང་སྨན་གྱི་ཁོག་དབུབ་ལ་སོགས་པ་དགག་སྒྲུབ་རྒྱས་པར་མཛད་པ་ཉིད་དོན་ལ་གནས་པའི་ལེགས་བཤད་དུ་རྗེ་བསྟན་པའི་ཉིན་བྱེད་ཡབ་སྲས་རྣམས་བཞེད་དོ། ། ཉ༣ གསུམ་པ་[ཐ་མར་རྒྱ་བོད་དུ་ཇི་ལྟར་དར་བ་སྨོས་པ་]ལ་གསུམ། ཏ༡ འཕགས་ཡུལ་དང༌། ཏ༢ རྒྱ་ནག་དང༌། ཏ༣ བོད་དུ་དར་ཚུལ་ལོ། ། ཏ༡ དང་པོ་ནི། དེ་རྗེས་ཉི་མ་སྲུང་བས་གཅེས་གྲུབ་དང༌། ། འཕགས་པས་སྦྱོར་བ་བརྒྱ་པ་ལ་སོགས་མཛད། ། རྒྱལ་བ་འཇིག་རྟེན་དུ་བྱོན་པ་དེའི་རྗེས་སུ་འཕགས་ཡུལ་ནུབ་ཕྱོགས་རྟ་མཁན་གྱི་རིགས་ལས་བྱུང་བའི་སྨན་པ་ཉི་མ་སྲུང་བས་གཅེས་པར་གྲུབ་པའི་གཞུང་བྱས་ཀྱང་ཡན་ལག་བརྒྱད་ཇི་བཞིན་མ་ཚང་བས་འདི་ཤེས་པ་ལ་སྨན་པ་དང༌། ཀ་ལཱ་པ་ཤེས་པ་ལ་སྒྲ་མཁན་དུ་མི་བརྩི་སྟེ། ཚིགས་སུ་བཅད་པའི་མཛོད་ལས། རྒྱུད་ཉུང་ཤེས་པའི་སྒྲ་མཁན་དང༌། ། གཅེས་གྲུབ་ཤེས་པའི་སྨན་པ་དང༌། ། དབྱིག་པ་ཐོགས་པའི་རལ་སྐོར་མཁན། ། འདི་གསུམ་འཇིག་རྟེན་བཞད་གད་གནས། ། ཞེས་བཤད་དོ། ། འཕགས་པ་ཀླུ་སྒྲུབ་ཞབས་ཀྱིས་དྲང་སྲོང་གི་གཞུང་རྣམས་ལ་བརྟེན་ནས་སྦྱོར་བ་བརྒྱ་པ། སོགས་ཁོངས་ནས་འཚོ་བའི་མདོ་ཚིགས་སུ་བཅད་པ། རྩ་ཨ་ཝའི་ཆོ་ག །སྨན་(༢༡༣བ)ཆེན་པོའི་རིམ་པ། དངུལ་ཆུའི་སྦྱོར་བ་རིན་ཆེན་ཕྲེང་བ། གསེར་འགྱུར་དང་དྲིའི་སྦྱོར་བ་རྣམས་མཛད་དོ། ། རྒྭ་ལོ་ལུགས་ཀྱི་ཕྱག་བཞི་པའི་ལོ་རྒྱུས་རྣམས་སུ། ཤར་ཕྱོགས་མྱ་ངན་མེད་པའི་ཡུལ། ཆོས་བཟང་སྤྲིན་གྱི་ཡང་རྫོང་རང་བྱུང་གི་མཆོད་རྟེན་ནས་ནག་པོའི་རྒྱུད་དང་ལྷན་ཅིག་གསོ་བ་རིག་པའི་རྒྱུད་སོགས་འཕགས་པས་སྤྱན་དྲངས་པར་ཡང་བཤད་དོ། ། ཁྱད་པར་བསྟན་བཅོས་སྙིང་པོ་ལེགས་བསྡུས་པ། ། ས་གསུམ་དགེ་བའི་མཚན་ལྟས་བཅོ་བརྒྱད་ཅན། ། ཡན་ལག་བརྒྱད་པ་ཕ་ཁོལ་མཛད་པ་ལ། ། ཟླ་བ་མངོན་དགས་འགྲེལ་པ་ཟླ་ཟེར་བྱས། ། གསོ་དཔྱད་ཀྱི་གཞུང་ཐམས་ཅད་ལས་ཁྱད་པར་དུ་གྱུར་ཅིང་ཚངས་པ་དང་དྲང་སྲོང་མང་པོའི་བསྟན་བཅོས་རྣམས་ཀྱི་ལེགས་པའི་ཆ་སྙིང་པོར་བསྡུས་པ། རྩོམ་པའི་ཚེ་འོག་ཀླུ་དང་སྟེང་ལྷའི་ཡུལ་དུ་ངོ་མཚར་གྱི་ལྟས་གསུམ་གསུམ། བར་མིའི་ཡུལ་དུ་ལྟས་བཅུ་གཉིས་ཏེ་ས་གསུམ་དུ་དགེ་ཞིང་ལེགས་པའི་ལྟས་རྣམ་པར་འཕྲུལ་པ་བཅོ་བརྒྱད་དང་ལྡན་པ་ཡན་ལག་བརྒྱད་པ་ཞེས་བྱ་བའི་བསྟན་བཅོས་ལེའུ་བརྒྱ་དང་ཉི་ཤུ་ཡོད་པ་འདི་སྨན་པ་དགེ་འདུན་གསང་བའི་བུ་སྨན་གྱི་བུམ་པའམ། ཕ་ལ་གུས་པས་ཕ་ཁོལ་སོགས་མཚན་གྱི་རྣམ་གྲངས་དང་ལྡན་པ་དེས་མཛད། འདི་སློབ་དཔོན་དཔའ་བོ་དང་གཅིག་མི་གཅིག་མཁས་པ་རྣམས་ཀྱིས་ཀྱང་དཔྱད་གཞིར་མཛད། གང་ལྟར། དེད་དཔོན་ཀུན་སྐྱོང་ནོར་གྱི་བདག ། ཀ་ནིཥྐ་ནི་དམག་གི་བདག ། མཛེས་མ་འོད་ལྡན་ཚལ་གྱི་བདག ། དཔལ་ལྡན་ཕ་ཁོལ་སྨན་གྱི་བདག ། ཅེས་གྲགས་པ་དེ་ཉིད་ཀྱི་རང་གཞུང་ལ་དཀའ་འགྲེལ་དང་ལྷན་ཐབས་གཉིས་ཀྱང་མཛད། དེའི་སློབ་མ་ཁ་ཆེའི་ཡུལ་དུ་བྱུང་བ་དཔལ་ཆེན་དགེ་བའི་བུ་བརྒྱུད་དོན་དམ་སྨན་པཥྤུ་མ། ཟླ་བ་ལ་མངོན་པར་དགའ་བས་རྒྱས་འགྲེལ་ཚིག་དོན་ཟླ་ཟེར། སྨན་མིང་ཟུར་བཀོལ་སྒྲ་སྦྱོར་ངེས་པ་བཅས་མཛད། དེ་ནས་བརྒྱུད་དེ་བྲང་ཏི་དཔལ་ལྡན་འཚོ་བྱེད་ཀྱི་གསུང་ལྟར་ན། དཔའ་བོ་ཟླ་དགའ་དགའ་བྱེད་དམ་པ་དང༌། ། ཡུལ་སྙིང་(༢༡༤ན)ཀུན་འཚོ་རིང་གཞོན་ངེས་པར་རྙེད། ། ཁྲིམས་འཇོམས་གསོད་དགེ་བ་རྒན་འཚོ་བྱེད་གྲུབ། ། མཐུ་ཅན་རྟོག་ལྡན་བྷུཉྫ་ཚེ་བརྟན་ཏེ། ། ཐབས་དགེ་དད་མཆོག་ཛ་ན་དྷ་ན་ནས། ། ལོ་ཆེན་རིན་བཟང་དེ་ནས་རིམ་གྱིས་བརྒྱུད། ། ཅེས་པ་ལྟར་རོ། ། ཞང་སྟོན་ཞིག་པོས། འཚོ་བྱེད་གྲུབ་པས་ཟླ་དགའ་ལ་ཐུག་པ་སོགས་བརྒྱུད་ཚུལ་གཞན་ཡང་བཤད་དོ། ། ཏ༢ གཉིས་པ་[རྒྱ་ནག་ཏུ་དར་ཚུལ་]ནི། རྒྱ་ནག་ཡུལ་དུ་རྫོགས་ལྡན་འཇུག་ནས་བཟུང༌། ། སྤྲུལ་པའི་རྒྱལ་བློན་རྣམས་ཀྱིས་རིམ་པར་བརྩམས། ། རྒྱ་ནག་གི་ཡུལ་དུ་རྫོགས་ལྡན་གྱི་འཇུག་ནས་བཟུང་སྤྲུལ་པའི་རྒྱལ་བློན་རྣམས་ཀྱིས་རིམ་པར་བརྩམས་པའི་ཚུལ་རྒྱ་ཆེར་རྒྱ་ནག་གི་སྨན་པ་མཁས་པས་མཛད་པའི་སྨན་གྱི་གླེང་གཞི་གསར་འགྱུར་ལས་བྱུང་སྟེ། འདིར་མཚོན་ཙམ་སྨོས་ན། རྒྱ་ནག་རྒྱལ་པོ་དྷཱི་ལྔ་ཡི་དང་པོ་སྤ་ཤྷི་དྷཱི་ས་སྤར་ཁ་བརྒྱད་ཀྱི་ཕྱག་རྒྱ་བརྩམས། སྐུད་པའི་མདུད་པ་ལ་ཡི་གེའི་གཟུགས་བྱས་ནས་ཡི་གེ་ཐོག་མར་བྱུང༌། མི་རྣམས་ཀྱིས་མི་ཤེས་པའི་དངོས་པོ་ནད་ཀྱི་རྒྱུ་མཚན་བསླབ། དེ་རྗེས་ཞིང་ཧུང་རྒྱལ་པོས་ཤིང་དང་རྩྭ་ལྡུམ་གྱི་རོ་མྱོང་ནས་སྨན་དཔྱད་ཀྱི་སྲོལ་བཏོད། དེ་རྗེས་ཧང་ཏི་རྒྱལ་པོས་སློབ་དཔོན་ཁྱེ་ཕཱ་ཞེས་རྩ་ལྟ་བ་ལ་མཁས་པ་དེ་གོང་དུ་བཀུར་བས་ལྷ་རྗེ་ཞེས་གྲགས། དེས་རྩ་བ་དྲིས་པའི་མདོ་མཛད། དེ་ནས་གོང་མའི་བཀའ་ལྟར་ཝུའི་ཀུང་སྨན་ལ་མཁས་པར་གྱུར་ནས་མདོ་ལེའུ་བཅུ་གཉིས་པ། ཁྲག་གཏར་བ་དང་མེ་བཙའི་ཡི་གེ་རྒྱས་པར་མཛད། དེ་རྗེས་ལྷ་རྗེ་ཝུའི་ཏི་ཞེས་ཤིན་ཏུ་མཁས་པ་དེ་མདོ་འགྲེལ་ཐེ་ཚོམ་རང་གྲོལ་ལེའུ་རྩ་གཅིག་པ་མཛད། གོང་མ་ཧཱན་ཅེས་བྱ་བའི་རིང་ལ་ཅུང་ཅུང་དང་ཧཱ་ཐོ་ཞེས་བྱ་བའི་སྨན་པ་ཡོངས་གྲགས་གཉིས་སོགས་སྔ་རྗེས་ཀུན་ཏུ་སྨན་པ་མཁས་པ་དང་གཞུང་ཆེ་ཆུང་དུ་མ་བྱོན་ཅིང་ཕྱིས་ཚིན་གྱི་རྒྱལ་རབས་བཞི་པ་གོང་མ་ཁྱེན་ནོང་ནས་སྨན་དཔྱད་ཀྱི་བསྟན་བཅོས་ཆེན་པོ་བརྩམས་པའང་ཀུན་མཁྱེན་ཆེན་པོའི་ཕྱག་ཏུ་བྱུང་བར་སྣང་ངོ༌། །(༢༡༤བ) ཏ༣ གསུམ་པ་[རྒྱ་ནག་ཏུ་དར་ཚུལ་]ལའང་གསུམ། ཐ༡ བསྟན་པ་སྔ་དར་ལ་བྱུང་ཚུལ། ཐ༢ ཕྱི་དར་ལ་བྱུང་ཚུལ། ཐ༣ དཔལ་ལྡན་རྒྱུད་བཞི་ལ་བརྟེན་པའི་ཕྲིན་ལས་བྱུང་ཚུལ་ལོ། ། ཐ༡ དང་པོ་ནི། སྲོང་བཙན་དུས་སུ་ལུགས་ཆེན་གསུམ་གྱི་གཞུང༌། ། ཨག་ཚོམ་རིང་ལ་རྒྱ་བཟའི་ལུགས་རྣམས་དང༌། ། ཧྭ་ཤང་བི་ཇི་སོགས་ཀྱིས་བསྒྱུར་བརྩམས་མང༌། ། མཁས་མང་བགྲོས་པའི་སོ་མ་རཱ་ཛ་བྱུང༌། ། སྲོང་བཙན་སྒམ་པོའི་སྐུ་རིང་ལ་འུན་ཤིང་ཀོང་ཇོས་སྨན་རྩིས་ཀྱི་གཞུང་བསྣམས་པ་ཧྭ་ཤང་མ་ཧཱ་དེ་བ་དང་དྷརྨ་ཀོ་ཥ་གཉིས་ཀྱིས་བསྒྱུར། རྒྱ་གར་ནས་བྷ་ར་དྷྭ་ཛ། རྒྱ་ནག་ནས་ཧཱན་ཝང་ཧྭང༌། ཏ་ཟིག་ནས་ག་ལེ་ནུས་ཞེས་བྱ་བའི་སྨན་པ་གསུམ་སྤྱན་དྲངས། འབུ་ཤག་མ་བུ་ཆེ་ཆུང༌། རྒྱ་དཔྱད་ཐོར་བུ། མགོ་སྔོན་བསྡུས་པ་སོགས་བསྒྱུར། སྨན་པ་གསུམ་བགྲོས་ནས་མི་འཇིགས་པའི་མཚོན་ཆ་ཞེས་བྱ་བ་ལུགས་ཆེན་གསུམ་གྱི་གཞུང་དུ་གྲགས་པ་བྱས། ག་ལེ་ནུས་ལ་འཛོ་རོ་ཞེས་སྨན་པའི་རིགས་བརྒྱུད་བྱུང༌། མེས་ཨག་ཚོམ་གྱི་དུས་རྒྱ་མོ་བཟའ་གྱི་མ་ཤོང་ཀོང་ཇོས་ཁྱེར་བའི་སྨན་རྩིས་ཀྱི་གཞུང་ལུགས་རྣམས། ཧྭ་ཤང་མ་ཧཱ་ཀྱིན་འདའ། ཁྱུང་པོ་ཙི་ཙི་དང་དོ་ཚུགས་རྒྱ་ཕྲུག་གར་མཁན། ཅོག་ལ་སྨོན་འབར་སོགས་ཀྱིས་བསྒྱུར། ཁྲོམ་གྱི་ཡུལ་ནས་བི་ཆེ་ཙན་པ་ཤི་ལ་ཧ་བྱ་བའི་སྨན་པ་མཁས་པ་བཀུག་ནས་ལྷ་རྗེར་བཀུར་ཏེ་མ་གསུམ་བུ་བཅུ་བཞི། ཐུན་མོང་མིན་པའི་གསང་བའི་བུ་བཞི་སྟེ་རྒྱས་པའི་སྐོར་དང༌། བེ་བུམ་སྨུག་པོ་ཏི་ཀ་ཡང་ཏིག་སྟེ་འབྲིང་པོ། བསྡུས་པ་ཡི་གེ་དམར་ཆུང་སོགས་བརྩམས། རྒྱ་ནག་གི་གཞུང་དུ་མ་བསྒྱུར། གཞན་ཡང་རྩོམ་རྒྱུད་སོགས་མང་དུ་བྱུང་བར་གྲགས་ཤིང་དེའི་བུ་བརྒྱུད་ལ་བི་ཇི་ཞེས་པའི་སྨན་པ་རྣམས་བྱུང༌། ཧྭ་ཤང་དང་ཁྱུང་པོ་སོགས་མཁས་པ་མང་པོ་བགྲོས་ནས་གསོ་དཔྱད་གསར་འགྱུར་རྣམས་ཀྱི་དོན་སྙིང་པོར་བླངས་པ་སོ་མ་རཱ་ཛ་ཞེས་བྱ་བའི་གཞུང་ཆེན་བརྩམས། སྔ་ཕྱི་དེ་དག་ཕྱོགས་གཅིག་ཏུ་ཟ་འོག་གི་སྒྲོམ་བུར་བཞུགས་པ་ལ་བླ་དཔྱད་ཀྱི་གཞུང་འཚོ་བའི་མདོ་ཞེས་གྲགས་སོ། །(༢༡༥ན) ཁྲི་སྲོང་དུས་ན་སྤྲུལ་པའི་སྲས་གསུམ་གཞུང༌། ། པུསྟི་ཁ་སེར་རྒྱལ་བློན་དམངས་གསུམ་དང༌། ། རྒྱ་ཞང་ཧོར་བོད་འ་ཞའི་མཁས་གཞུང་བཙུགས། ། ཆོས་རྒྱལ་ཁྲི་སྲོང་ལྡེའུ་བཙན་གྱིས་རྒྱལ་སྲིད་ཐོག་མར་སྐྱོང་བའི་དུས་སུ། རྒྱ་གར་ནས་དྷརྨ་རཱ་ཛ། རྒྱ་ནག་ནས་མ་ཧཱ་ཀྱིན་འདའ། ཏ་ཟིག་གམ་ཁྲོམ་ནས་ཙན་པ་ཤི་ལ་ཧ་སྟེ་སྨན་པ་ཆེན་པོ་གསུམ་ཞལ་འཛོམ་པ་ལ་སྤྲུལ་པའི་སྲས་གསུམ་གྲགས། དེ་གསུམ་བགྲོས་ནས་རྒྱལ་ཁམས་སོ་སོའི་ལུགས་དང་བསྟུན་པའི་སྨན་དཔྱད་ཀྱི་བསྟན་བཅོས་རིན་ཆེན་སྤུངས་པ་ཞེས་བྱ་བ་རྩ་བ་ཉི་ཟླའི་འཁོར་ལོ་འགྲེལ་པ་ཡན་ལག་དང་བཅས་པའི་གཞུང་ཆེན་པོ་བྱས། ཙན་པ་ཤི་ལ་ཧ་རང་ཡུལ་དུ་བྱོན་ཁར་སྲས་ལ་གདམས་པའི་སྐོར་ལ་བི་ཇིའི་པུསྟི་ཁ་སེར་དང༌། དེ་རྒྱལ་པོ་ལ་ཕུལ་བས་རྒྱལ་པོའི་བླ་ཡིག་འོད་འབར་དུ་གྲགས། ཧ་ཤང་མ་ཧཱ་ཅེ་ཏས་རྒྱལ་བློན་དམངས་གསུམ་བསྡམས་པ་རྩ་བ་རིན་པོ་ཆེའི་མཛོད་ལྔ། ཡན་ལག་མཛོད་ཆེ་འབྲིང༌། སྤྱི་དོན་འགྲེལ་པ་ཕྱི་ལྟར་དམངས། ནང་ལྟར་བློན་པོ། གསང་བ་རྒྱལ་པོ་ལ་གདམས་པའི་སྐོར་གེགས་སེལ་དང་བཅས་པ་བསྒྱུར། སྐུ་ཚེའི་སྨད་ལ་མཐའ་བཞིའི་བླ་སྨན་དགུ་བྱོན་པ་སོགས་སྙིང་པོས་དབེན་པའི་བཤད་སྒྲོས་ཡིན་ལ། རྒྱལ་པོའི་ཆིབས་ཤིན་ཏུ་གཅེས་པ་ཞིག་ན་བས་དཔྱད་ལ་སྨན་པ་མཁས་དགུ་ཚོལ་ལ་ཁྲིད་ཤོག་ཅེས་བཀའ་བསྒོས་པས། རྒྱའི་ཕྲུ་གུ་ཟེའུ་ཐོ། ཞང་ཞུང་གི་ཁུ་ལོད་མུ་ཁན། ཧོར་གྱི་མུ་གན་ཁྲི་གཟིགས། བོད་ཀྱི་ཅོག་རོ་མང་པོ་གཟིགས། འ་ཞའི་ཐ་ན་ཆུ་སྐྱེས་ལྔ་བཀུག་སྟེ་ཆིབས་གསོས། རྒྱལ་པོའི་བཀའ་ལྟར་མཁས་པ་ལྔས་རྒྱལ་ཁམས་ལྔའི་མན་ངག་ཆིག་དྲིལ་གྱི་གཞུང་བརྩམས་ཏེ་རྗེ་ལ་ཕུལ་བ་དར་སྲོལ་བཙུགས། ཁྲི་སྲོང་གི་སྐུ་ཚེའི་འཇུག་ཏུ་བསྙུན་གྱིས་ཐེབས་པས་སླར་མཐའ་བཞི་ནས་སྨན་པ་བཀུག་པས་གཞན་མ་བྱོན། རྒྱ་ནག་ནས་སྟོང་གསུམ་གང་བ་བྱོན། ལམ་དུ་གསོ་བ་དཀར་པོ་ལམ་གྱི་སྒྲོན་མ་བྱ་བ་བརྩམས་ནས་རྒྱལ་པོ་ལ་སྐྱེས་སུ་(༢༡༥བ)ཕུལ་ཞིང་བསྙུན་ཀྱང་གསོས། མཐའ་བཞི་ཀའི་གོ་མི་གཅིག་གིས་ཆོད་པས་མཐའ་བཞི་སྟོང་གསུམ་གང་བར་བཏགས། གཡེར་སྟོད་ས་ཆ་བྱ་དགར་གནང་བའི་བརྒྱུད་ལ་མཐའ་བཞིའི་སྨན་པ་རྣམས་བྱུང་ངོ༌། ། བཻ་རོས་རྩིས་སྨན་བསྒྱུར་སོགས་གཏེར་མའི་སྒྲོས། ། འཛོ་རོ་བི་ཇི་མཐའ་བཞི་བླ་སྨན་བརྒྱུད། ། ལོ་ཆེན་བཻ་རོ་ཙ་ནས་ཆོས་བོན་རྩིས་སྨན་འདྲེས་མར་བསྒྱུར་རོ་ཞེས་སོགས་གཏེར་མ་ཁ་ཅིག་གི་ཚིགས་སྒྲོས་ལ་ཁུངས་བཅོལ་ནས། བརྟག་པར་སླ་བའི་བོད་གཞུང་མང་པོ་བཻ་རོས་བསྒྱུར་བའི་རྒྱ་གཞུང་དུ་བཟུང་བ་སོགས་ནི་དཔྱོད་ལྡན་མཁས་པ་རྣམས་ཀྱིས་བཀག་ཟིན་ཅིང༌། དེ་བཞིན་དུ། བོད་སྨན་མཁས་པ་མི་དགུ་ཆོས་རྒྱལ་གྱི་དུས་སུ་བྱུང་བར་འཆད་པའང་ཤིན་ཏུ་ནོར་ཏེ། དེ་དག་ཕལ་ཆེར་བསྟན་པ་ཕྱི་དར་གྱི་སྐབས་སུ་བྱུང་བ་ཡིན་ལ། གོང་སྨོས་འཛོ་རོ། བི་ཇི། མཐའ་བཞི་གསུམ་པོ་ནི་ཆོས་རྒྱལ་བླ་སྨན་གྱི་བརྒྱུད་པ་མ་འཁྲུལ་བ་ཡིན་ནོ།། ཐ༢ གཉིས་པ་[ཕྱི་དར་ལ་བྱུང་ཚུལ་]ནི། ཕྱི་དར་རྒྱ་གཞུང་སྔ་རྗེས་བསྒྱུར་མང་ཡང༌། ། རིན་ཆེན་བཟང་པོས་བརྒྱད་པ་སྤེལ་བ་ལས། ། པུ་ཧྲོང་སྨན་པ་མི་བཞི་ལས་བརྒྱུད་དེ། ། ཞང་ཞིག་དར་མགོན་གཡུ་ཐོག་པ་ལ་སོགས། ། བོད་ཀྱི་གཞན་ཕན་ཅན་རྣམས་ཐོག་མར་གྱེས། ། བསྟན་པ་ཕྱི་དར་ལྷ་བླ་མ་ཡེ་ཤེས་འོད་ཀྱི་སྐུ་ཚེ་སྟོད་ལ་སྙེ་བོར་ལོ་ཙཱ་བ་དབྱིག་གི་རིན་ཆེན་སོགས་ཀྱིས་ཡན་ལག་བརྒྱད་པའི་སྙིང་པོ་བསྡུས་པ་དང་རང་འགྲེལ། གཅེས་གྲུབ་བསྒྱུར་བ་སོགས་རྒྱ་གཞུང་སྔ་རྗེས་སུ་བསྒྱུར་སྤེལ་མཛད་པ་མང་ཡང༌། གཙོ་བོར་སྐྱེས་མཆོག་རིན་ཆེན་བཟང་པོས་ཁ་ཆེའི་པཎྜི་ཏ་ཛ་ནརྡྷ་ན་ལ་གསེར་སྲང་བརྒྱ་ཕུལ་ནས་ཡན་ལག་བརྒྱད་པ་བསླབ། གཞུང་དེ་དང་ཟླ་ཟེར་རྟ་དཔྱད་ཤཱ་ལི་ཧོ་ཏྲ་སོགས་བསྒྱུར་བཤད་ཀྱིས་སྤེལ་བའི་སློབ་མ་མང་དུ་ཡོད་ཀྱང་གཙོ་བོ། མྱང་འདས་སེང་གེ་སྒྲ། ཤག་ཁྲི་ཡེ་ཤེས་འབྱུང་གནས། ཨོང་སྨན་ཨ་ལེ། མང་ཁོ་སྨན་བཙུན་ཏེ་པུ་ཧྲོང་སྨན་པ་མི་བཞི་གྲགས་ནི། དེའི་ནང་ནས་ཀྱང་མང་ལོ་མཁས་ཤིང་ཕྲིན་ལས་ཆེ་བས་(༢༡༦ན)དབུས་གཙང་གི་སྨན་པ་ཕལ་ཆེར་གྱིས་གཏུགས། ཁྱད་པར་ཆེར་རྗེ་ཏི་པ་ལ་གཞུང་འགྲེལ་རྫོགས་པར་གནང༌། སྲས་བརྒྱུད་བཞི་པ་ཆེར་རྗེ་ཞང་སྟོན་ཞིག་པོས་ཁོག་དབུབ་ས་བཅད་བཀའ་ཚོམས་འགྲེལ་པ་ལག་ལེན་སོགས་མཛད། སློབ་མའི་ནང་ནས་གཙང་སྟོད་དར་མ་མགོན་པོས་ཟིན་ཏིག་དང་ཡང་ཏིག་མཛད་དེ་བོ་དོང་ཕྱོགས་སུ་རྒྱུན་འཕེལ། ཡང་ལོ་ཆེན་སློབ་མ་ཞང་ཞུང་པ་ཤེས་རབ་འོད་ཀྱིས་རྒྱ་སྟོན་གྲགས་པ་ཤེས་རབ། དེས་གཡུ་ཐོག་རྒྱ་གར་རྡོ་རྗེ་ལ་བཤད། དེས་ཀྱང་ཡིག་ཆ་གསལ་བར་མཛད་ཅིང་གཡུ་ཐོག་བརྗིད་པོ་དང་ཁྱུང་པོ་ནས་གཡུ་ཐོག་ཡོན་ཏན་མགོན་པོ་ལ་བརྒྱུད། ཡང་ཞང་ཞུང་པས་རྔོག་བྱང་སྨན། གཡུང་དྲུང་འོད། གཡུ་ཐོག་གྲགས་སེ། དེས་ཀྱང་ཡོན་ཏན་མགོན་པོ་ལ་བརྒྱུད་དེ་མདོར་ན་ལོ་ཆེན་རིན་བཟང་གི་བཀའ་དྲིན་ལས་བོད་ཀྱི་སྨན་པ་གཞན་ཕན་ཅན་ཐམས་ཅད་ཐོག་མར་གྱེས་སོ། ། མཁས་པ་མི་དགུར་གྲགས་པའང་དེ་ལ་བརྟེན། ། བོད་ཀྱིས་བརྩམས་པའི་ཡིག་ཆ་མཐའ་ཡས་སོ། ། དུས་དེ་ཙ་ན་དབུས་གཙང་དུ་མཁས་པ་མི་དགུར་གྲགས་པ་བྱུང་སྟེ། སྨད་ཀྱི་མཁས་པ་གཡོ་རུ་གཡའ་གྱོང་པོ། སྟོད་ལུང་གི་ལྷ་རྗེ་སུམ་སྨན། དབུ་རུའི་མཐའ་བཞི། བར་གྱི་མཁས་པ་གཡུ་ཐོག་རྒྱ་གར་རྡོ་རྗེ། མི་ཉག་ཟླ་གྲགས། བྲང་ཏི་རྒྱལ་པོ། སྟོད་ཀྱི་མཁས་པ་བི་ཇི་ལྷུན་ནེ། འོག་པ་ཆོས་སེང༌། ཆེར་རྗེ་སྟག་ལ་དགའ་གསུམ་སྟེ་དེ་དག་ཀྱང་ལོ་ཆེན་གྱི་བཤད་རྒྱུན་ལ་བརྟེན་པ་ཡིན་ཅིང༌། དེ་རྣམས་དང་གཞན་དག་བོད་ཀྱི་མཁས་པས་བརྩམས་པའི་ཡིག་ཆ་སྔ་ཕྱིར་བྱུང་བ་ནི་མཐའ་ཡས་སོ། ། ཞང་སྟོན་སྟོད་སྟོན་གཉིས་ཀྱང་འཕགས་ཡུལ་ཕྱིན། ། བརྒྱད་པ་ལ་མཁས་གཞུང་བརྩམས་ཕྲིན་ལས་རྒྱས། ། ཡར་ཀླུང་གི་ཞང་སྟོན་གཟི་བརྗིད་འབར་དང༌། ཚ་ལུང་པ་སྟོད་སྟོན་དཀོན་མཆོག་སྐྱབས་གཉིས་ཀྱང་བོད་ཀྱི་སྨན་པ་ལ་མ་མགུ་ནས་རྒྱ་གར་དུ་ཕྱིན། སྔ་མས་ནཱ་ལནྡར་དྲང་སྲོང་ཙནྡྲ་སི་བྱ་བ་དང༌། (༢༡༦བ)ཕྱི་མས་ཐམས་ཅད་མཁྱེན་པ་ཤཱནྟི་པ་མཇལ། ཡན་ལག་བརྒྱད་པ་མཁས་པར་བསླབས་ནས། ཞང་གིས་གཞུང་དྲི་མེད་གཟི་བརྗིད་འགྲེལ་པ་ཟླ་བའི་འོད་ཟེར་སོགས་བརྩམས། སློབ་མ་ལྔ་ལས་མཁས་རྒྱུན་མ་ཆད་པར་བྱུང༌། སྟོད་སྟོན་གྱིས་ས་དཔྱད་བསྡུས་དོན་རིན་པོ་ཆེའི་ཕྲེང་བ་དང་གཞུང་མཆན་བཅས་མཛད་ནས་གཡུ་ཐོག་མགོན་པོ་ལ་གནང་སྟེ་ཕྲིན་ལས་རྒྱས་སོ། ། འཁྱུད་དཔྱད་དངུལ་ཆུའི་སྦྱོར་བ་གཉན་བཅོས་སོགས། ། བཀའ་གཏེར་གདམས་པ་ཕྱིས་བྱུང་ཚད་ལྡན་མང༌། ། གཞན་ཡང་གསོ་དཔྱད་ཀྱི་ཕྱོགས་སུ་གཏོགས་པ་ཕ་དམ་པའི་འཁྱུད་དཔྱད་དཀར་ནག་ཁྲ་གསུམ། ཁྲོ་ཕུ་ལོ་ཙཱའི་ཡེ་ཤེས་མཁའ་འགྲོའི་ནད་སེལ་གྱི་གདམས་པ། བལ་པོ་དེ་བ་ཙནྡྲའི་སྙན་བརྒྱུད་བདུད་རྩིའི་ཐིགས་པ། གྲུབ་ཆེན་ཨོ་རྒྱན་པའི་དངུལ་ཆུའི་སྦྱོར་བའི་གཞུང་སྐོར་གསུམ་སོགས་དང༌། གཏེར་མའི་ཕྱོགས་ཤིན་ཏུ་མང་ཡང་ཅུང་ཟད་བསྡམས་ནས། རྡོར་འབུམ་ཆོས་གྲགས་བོན་པོ་དྲག་རྩལ་གྱི། ། བདུད་རྩི་བུམ་ཆེན་ལ་སྟོད་དམར་པོ་དང༌། ། རྒྱ་བན་ཇོར་འོད་བདུད་རྩིའི་བཅུད་ལེན་སྐོར། ། ཀུ་ས་སྨན་པ་བོན་པོ་ལྷ་འབུམ་དང༌། ། ར་མོ་ཤེལ་སྨན་སྨན་རྫས་སྲུང་བའི་རིགས། ། སྣ་ནམ་སོག་སྨན་གཡུ་གཞེར་དུག་རྐེ་རྨ། ། གནུབས་སྟོན་ཞང་ཁྲོམ་བྱ་འདྲེ་ཁྱི་སྨྱོན་བཅོས། ། ཉང་རལ་ལྷ་གསུམ་ལས་ཚོགས་གསོ་དཔྱད་དང༌། ། ཆོས་དབང་དྲང་སྲོང་སྙིང་ཐིག་སྨན་སྒྲུབ་སྐོར། ། རྒོད་ལྡེམ་པད་གླིང་བདུད་རྩི་བུམ་ཆུང་དང༌། ། གསང་གླིང་མིག་སྨན་རིན་གླིང་དངུལ་ཆུའི་སྦྱོར། ། རཏྣའི་གཏེར་བུམ་ཁྱུང་རྒོད་བདུད་རྩི་བུམ། ། རྡོར་གླིང་ཆོས་འབར་པདྨ་གཅེས་ཕྲེང་དང༌། ། ཐང་སྟོང་རྒྱལ་པོའི་རིལ་བུ་དཀར་དམར་དང༌། ། ཐང་སྨན་བདུད་རྩི་འཆི་གསོས་ལས་འཕྲོ་གླིང༌། ། བདུད་རྩི་ཚེ་བུམ་གནམ་ཆོས་སྔགས་སྨན་མང༌། ། དེས་ན་བཀའ་གཏེར་གྱི་གདམས་པ་ཕྱིས་བྱུང་ཚད་ལྡན་ཤིན་ཏུ་མང་བས་འདིར་མཐའ་དག་སྨོས་སུ་མི་ལང་ངོ༌། །(༢༡༧ན) ཐ༣ གསུམ་པ་[དཔལ་ལྡན་རྒྱུད་བཞི་ལ་བརྟེན་པའི་ཕྲིན་ལས་བྱུང་ཚུལ་]ནི། བརྒྱུད་སྲོལ་ཀུན་འདུས་གཡུ་ཐོག་སྨན་གྱི་བླར། ། དཔལ་ལྡན་ཕྲེང་བས་གསང་མཛོད་དངོས་སུ་སྩལ། ། ཡུལ་ཀུན་གདམས་པའི་བཅུད་བླངས་རྒྱུད་ཆེ་ཆུང༌། ། ཐུན་མོང་ཁྱད་པར་ཆོས་འཁོར་བསྐོར་བ་ལས། ། ཡན་ལག་བརྒྱད་པའི་བཤད་རྒྱུན་གྱི་སྲོལ་ཀ་ཡོངས་སུ་རྫོགས་པ་གཡུ་ཐོག་པ་ཡོན་ཏན་མགོན་པོ་ལ་འདུས་ཤིང་བབས། དེའང་ཕྱི་ལྟར་ན། རིག་པའི་གནས་ལྔ་ལ་མཁས་པའི་པཎྜི་ཏ་ཆེན་པོ། ནང་ལྟར་ན། འཕགས་པའི་ས་ལ་བཞུགས་པའི་རྡོ་རྗེ་འཛིན་པ་ཆེན་པོ། གསང་བ་ལྟར་ན། བོད་ཀྱི་གདུལ་བྱ་འདུལ་བའི་དོན་དུ་བཅོམ་ལྡན་འདས་སྨན་གྱི་བླ་མ་ཉིད་སྨན་པའི་གཟུགས་སུ་སྤྲུལ་པ་ཡིན་ལ། སྣང་ཚུལ་ཙམ་དུ་འཛམ་བུའི་གླིང་ཀུན་ཏུ་རྫུ་འཕྲུལ་གྱིས་ཕེབ། ཁྱད་པར་འཕགས་ཡུལ་དུ་ལན་དྲུག་ཕྱིན། ཨོ་རྒྱན་