Tibetan
བརྒྱུད་ད་ལྟའི་བར་འཆད་སྲོལ་མ་ཉམས་ཤིང་རིགས་ལམ་སེང་གེའི་ང་རོ་སྒྲོག་བཞིན་པའོ། ། ལྷག་པར་འཇིག་རྟེན་དབང༌། ། རྒྱལ་མཆོག་བདུན་པས་རིག་གཞུང་རྒྱ་མཚོ་བསྐྱིལ། ། ཆོས་གྲགས་དགོངས་པའི་ཆུ་བོ་ཀུན་འདུས་སོ། ། དེ་ལྟར་མཁས་པ་དུ་མས་རིག་པའི་ལམ་མ་འཁྲུལ་བར་གསལ་བར་མཛད་ཀྱང་ཕྱིས་ནས་རིམ་གྱིས་བསོད་ནམས་དང་བློ་གྲོས་དམན་པས་རྣམ་པར་དཔྱོད་པ་ལྟར་སྣང་བས་རིག་པའི་དབང་ཕྱུག་གི་གཞུང་ལུགས་ཆུད་གསན་པ་ན། དེའི་ཚུལ་མ་ནོར་བར་ལྷག་པར་གསལ་བར་མཛད་པ་འཇིག་རྟེན་དབང་ཕྱུག་སྤྱན་རས་གཟིགས་རྒྱལ་མཆོག་ཐམས་ཅད་མཁྱེན་པ་བདུན་པ་ཆོས་གྲགས་རྒྱ་མཚོས་སྔོན་ཆོས་ཀྱི་གྲགས་པར་སྐྱེ་བ་བཞེས་པའི་བག་ཆགས་སད་དེ་ཐུགས་ནས་ཤར་གྱིས་གསུང་བ་ཉིད་ཡི་གེ་པས་འབྲི་བ་ཁོ་ན་ལས་རྩོམ་གཞི་དང་ཕྱག་དཔེ་གཟིགས་རྟོག་གི་རྩོལ་བ་གང་ཡང་མ་མཛད་པ་སོགས་ཁྱད་འཕགས་ངོ་མཚར་དུ་མ་དང་ལྡན་པའི་ཚད་མ་རིག་གཞུང་རྒྱ་མཚོ་ཞེས་གྲགས་པ་བློ་ལྡན་རྣམས་ཀྱི་ཉེར་འཚོ་བསྐྱིལ་བར་མཛད་དེ། ཆོས་གྲགས་དགོངས་པའི་ཆུ་བོ་མ་ལུས་ཤིང་ལུས་པ་མེད་པ་ཀུན་འདུས་པའི་འཇུག་ངོགས་ཆེན་པོར་གྱུར་ཏོ། ། ཏ༣ གསུམ་པ་[ཞར་བྱུང་གྲུབ་མཐའ་གང་དང་མཚུངས་པར་བཤད་པ་]ནི། རྔོག་ལོས་ངོ་བོ་ཉིད་མེད་ས་ལུགས་པས། ། རྣལ་འབྱོར་སྤྱོད་དང་གཞན་དག་གྲགས་སྡེ་པའི། ། དབུ་མར་བཀྲལ་ཏེ་བོད་ཀྱི་འགྲེལ་ཚུལ་གསུམ། ། ཚད་མའི་གཞུང་འདི་རྗེ་(༢༠༤བ)ཙོང་ཁ་པ་སོགས་ཀྱིས་ལྟ་བ་ངན་པ་སུན་ཕྱུང་སྟེ་བདེན་བཞིའི་རྣམ་གཞག་མ་འཁྲུལ་བར་སྟོན་པའི་བསྟན་བཅོས་སུ་བཞེད། མཁས་མཆོག་ངག་དབང་ཆོས་གྲགས་ཀྱིས་འདི་ལ་ནང་དོན་རིག་པ་ཚང་བའི་བསྟན་བཅོས་ཞེས་བྱ་དགོས་ཀྱི། བསྟན་བཅོས་ངོ་བོ་ནི་ཕྱི་རིག་པར་འཇོག་སྟེ་ཚད་མ་རིག་པའི་བསྟན་བཅོས་ཡིན་པའི་ཕྱིར་གསུངས། བརྗོད་བྱ་གཏན་ལ་ཕབ་པའི་དོན་ལ་དགོངས་ནས་རྔོག་ལོ་ཆེན་པོས་ངོ་བོ་ཉིད་མེད་པར་སྨྲ་བའི་དབུ་མ། ས་ལུགས་པ་རྣམས་ཀྱིས་རྣལ་འབྱོར་སྤྱོད་པའི་དབུ་མ། གཞན་དག་ཕལ་མོ་ཆེ་འཇིག་རྟེན་གྲགས་སྡེ་སྤྱོད་པའི་དབུ་མར་བཀྲལ་ཏེ་བོད་ཀྱི་འགྲེལ་ཚུལ་གསུམ་མོ། ། ཡང་ཀུན་མཁྱེན་བསོད་ནམས་སེང་གེས། རིགས་པའི་གཙུག་རྒྱན་གཉིས་ཀྱི་གཞུང་ལུགས་ལ། ། སྡེ་བདུན་གོང་འོག་བསྡེབས་ནས་འཆད་པ་དང༌། ། རྒྱ་འགྲེལ་ལེགས་ཆ་བཏུས་ནས་འཆད་པ་དང༌། ། རང་གི་རྣམ་རྟོག་ཉིད་ཀྱིས་འཆད་པ་སྟེ། ། གངས་རིའི་ཁྲོད་འདིར་འཆད་ཚུལ་རྣམ་གསུམ་ལས། ། སྐྱེ་བ་དུ་མར་རིག་ལམ་གོམས་བྱས་ནས། ། སྐྱོན་མེད་བརྒྱུད་པའི་མན་ངག་དང་ལྡན་ཅིང༌། ། འཇམ་དབྱངས་ཐུགས་ཀྱི་མཁྱེན་པ་མངའ་བ་ཡི། ། ས་སྐྱ་པ་ནི་འཆད་ཚུལ་དང་པོ་བཞེད། ། ཅེས་གསུངས་པ་ལྟར། ས་པཎ་ནི་ཚད་མ་མདོ་དང༌། ཆོས་གྲགས་ཀྱི་སྡེ་བདུན། ལེའུ་དང་པོའི་རང་འགྲེལ་རྣམས་ཀྱི་བརྗོད་བྱ་གཞུང་གོང་འོག་སྣ་ཚོགས་སུ་སིལ་བུར་ཡོད་པ་རྣམས་རིགས་མཐུན་ཕྱོགས་གཅིག་ཏུ་བསྡེབས་ནས་འཆད། བོད་སྟོན་གཞན་ཕལ་མོ་ཆེས་ལྷ་ཤཱཀ་རྒྱན་མཆོག་རྣམས་ཀྱི་འགྲེལ་པའི་ལེགས་ཆ་བཏུས་ནས་འཆད། རྒྱལ་ཚབ་རྗེ་དང་མཁས་གྲུབ་རྗེ་གཉིས་ནི་རང་གི་རིག་པའི་སྒོས་འཆད་པ་སྟེ་འཆད་ཚུལ་གསུམ་དུ་བཞེད་དོ། ། ཇ༣ གསུམ་པ་བཟོ་རིག་པའི་བྱུང་བ་བཤད་པ་ལ་གསུམ། ཉ༡ ཐུགས་རྟེན། ཉ༢ སྐུ་རྟེན། ཉ༣ གསུང་རྟེན་ནོ། ། ཉ༡ དང་པོ་ནི། བཟོ་རིག་མཆོག་རྒྱུར་དཀོན་མཆོག་གསུམ་གྱི་རྟེན། ། ཀུན་གྱི་ཐོག་མར་པད་སྤུངས་མཆོད་རྟེན་བྱུང༌། །(༢༠༥ན) གཞན་དག་དད་ལྡན་རྣམས་ཀྱིས་རིམ་པར་བརྩིགས། ། བཟོ་གནས་ཐམས་ཅད་ལུས་ངག་ཡིད་གསུམ་དུ་འདུ་ཞིང་འདིར་བྱུང་བ་བརྗོད་པ་ནི་གཙོ་བོར་ལུས་ཀྱི་ལས་དང༌། དེའང་བཟོ་རིག་པ་ཐམས་ཅད་ཀྱི་ནང་ནས་འཕྲལ་ཡུན་གཉིས་ཀར་ཕན་བདེ་ཟད་མི་ཤེས་པ་འཇོ་བ་ནི་དཀོན་མཆོག་གསུམ་དང་འབྲེལ་བའི་སྐུ་གསུང་ཐུགས་རྟེན་རྣམས་ཡིན་ཅིང༌། དེའང་བསྟན་པ་འདི་ལ་རྟེན་གསུམ་ཀུན་གྱི་ཐོག་མར་ཐུགས་ཆོས་སྐུའི་རྟེན་ཉིད་བྱུང་སྟེ། སྟོན་པ་ལུམྦི་ནཱིའི་ཚལ་དུ་བལྟམས་པའི་ཚེ་རྒྱལ་པོ་ཟས་གཙང་མ་སོགས་ཀྱིས་པདྨ་སྤུངས་པའི་མཆོད་རྟེན་བརྩིགས། དེ་ནས་གཉིས་པ་བྱང་ཆུབ་མཆོད་རྟེན་སོགས་ཆ་བརྒྱད་མཆོད་རྟེན་དུ་གྲགས་པ་རྣམས་དང༌། གཞན་དག་དབུ་སྐྲ་དང་སེན་མོའི་མཆོད་རྟེན་གྱིས་མཚོན་སངས་རྒྱས་ཀྱི་རྟེན་དང་ཉན་ཐོས་དགྲ་བཅོམ་པའི་མཆོད་རྟེན་མང་པོ་གཟུགས་ཅན་སྙིང་པོ་སོགས་དད་ལྡན་རྣམས་ཀྱིས་རིམ་པར་བརྩིགས་པར་བཤད་པའི་ཕྱིར་རོ། ། ཉ༢ གཉིས་པ་སྐུ་རྟེན་བྱུང་ཚུལ་བཤད་པ་ལ་གསུམ། ཏ༡ འཕགས་ཡུལ་དང༌། ཏ༢ བོད་དུ་བྱུང་ཚུལ། ཏ༣ ཞར་བྱུང་གཞུང་གི་ཁུངས་སྨོས་པའོ། ། ཏ༡ དང་པོ་ལ་གཉིས། ཐ༡ བྲིས་སྐུ་བྱུང་ཚུལ། ཐ༢ འབུར་སྐུ་བྱུང་ཚུལ་ལོ། ། ཐ༡ དང་པོ་ནི། རི་མོ་ཚེ་ལོ་འབུམ་པར་འཇིགས་ཐུལ་ལ། ། ཚངས་དང་བི་ཤྭས་བསླབས་ཤིང་དེ་ནས་བརྩམས། ། ཐུབ་དབང་གཤེགས་པར་དངོས་སུ་འཁྲུལ་ནུས་བྱུང༌། ། བྲིས་འབུར་གཉིས་ལས་རི་མོ་སྔ་བ་སྟེ་དྲང་སྲོང་ཨ་ཏྲེའི་བུས་སྦྱར་བའི་རི་མོའི་མཚན་ཉིད་ཚངས་པའི་ཚད་ཡིག་ཅེས་བྱ་བ་ལས། སྔོན་བསྐལ་པ་དང་པོའི་མི་རྣམས་ཚེ་ལོ་འབུམ་ནས་བྲི་བའི་དུས་མིའི་བདག་པོ་འཇིགས་ཐུལ་བྱ་བ་བྱུང༌། དེས་ས་འདི་ཆོས་བཞིན་དུ་བསྐྱངས་པས་ཚེ་ལོ་ཡང་འབུམ་དུ་འཕེལ་ཏེ་ཤིན་ཏུ་བདེ་བར་གྱུར། རྒྱལ་པོས་དཀའ་ཐུབ་ཀྱི་བརྟུལ་ཞུགས་སྤྱད་པས་དབང་ཕྱུག་གི་ཡོན་ཏན་བརྒྱད་ཐོབ། དེ་ལ་ཚངས་པས་བསྟན་བཅོས་ཐམས་ཅད་ཤེས་པ་དང༌། ལྷའི་དམག་དང་མཚོན་ཆས་ཀྱང་མི་ཡུལ་དུ་(༢༠༥བ)མི་ཕེབས་པའི་མཆོག་བྱིན་ཏོ། ། དེའི་ཚེ་ནམ་ཞིག་བྲམ་ཟེའི་བུ་གཞོན་ནུ་གཅེས་པ་ཞིག་གློ་བུར་དུ་ཤི་བ་ལ། བྲམ་ཟེས་རྒྱལ་པོ་ལ་ཁྱོད་ཀྱིས་རྒྱལ་སྲིད་ཆོས་བཞིན་མ་བསྐྱངས་པས་འབངས་ལ་དུས་མིན་འཆི་བ་བྱུང་སྟེ་བདག་གི་བུ་ཤིའོ། །གལ་ཏེ་བུ་སླང་མ་སྩལ་ན་བདག་འདིར་ལྕེབ་བོ། །ཟེར་བ་ལ་རྒྱལ་པོས་བྲམ་ཟེ་ཁྲིད་ནས་གཤིན་རྗེའི་རྒྱལ་པོ་ཉི་མ་ལྟར་གཟི་བརྗིད་འབར་བའི་དྲུང་དུ་ཕྱིན་ཏེ་ཕྱག་འཚལ་ནས་བྲམ་ཟེའི་བུ་སྩལ་དུ་གསོལ་བྱས་པས། བདག་གིས་མ་ལན་རང་རང་གི་ལས་སུ་ཟད་དོ། །རྒྱལ་པོས་བྱིན་ཅིག་དང༌། གཤིན་རྗེས་མི་རུང་ངོ་ཡང་ཡང་སྨྲས་ཏེ། མཐར་གཡུལ་བཤམས་ཏེ་ཕན་ཚུན་མཚོན་ཆའི་ཆར་ཕབ། རྒྱལ་པོས་ལྷའི་མཚོན་ཆའི་ཆར་གྱིས་གཤིན་རྗེའི་འཁོར་ཐམས་ཅད་ཕམ་པར་བྱས་པས་གཤིན་རྗེས་ཀྱང་དབྱུག་པ་ཐོགས། རྒྱལ་པོས་ཀྱང་དབྱུག་པ་ཚངས་མགོ་ཅན་ཐོགས་ཏེ་འཇིག་རྟེན་ཐམས་ཅད་དངངས་པ་ན། ལྷ་ཚངས་པ་བྱོན་ཏེ། སོ་སོའི་ལས་སུ་ཟད་ཀྱི། གཤིན་རྗེས་མ་ཉེས་སོ། །འོན་ཀྱང་བྲམ་ཟེའི་བུ་རི་མོར་བྲིས་ཤིག་ཅེས་པ་ལྟར། རྒྱལ་པོས་བྲིས། ཚངས་པས་གསོན་པོར་བསླངས་ཏེ་བྲམ་ཟེ་ལ་གཏད། ཡི་དྭགས་ལ་གཅེར་བུ་ཟེར་བས་དེ་ཐུལ་བ་ལེགས་སོ་ཞེས་རྒྱལ་པོ་ལ་གཅེར་ཐུལ་དང༌། དང་པོར་རི་མོ་བྲི་བ་པོ་ཡིན་པས་དང་པོར་བྲི་བ་ཞེས་བཏགས། ཚངས་པས་བསྒོས་ཏེ་རྒྱལ་པོས་ཀྱང་གཤིན་རྗེ་ལ་ཕྱག་དང་མཆོད་པ་བྱས་ཏེ་ཀུན་དགའ་བར་གྱུར། སླར་རྒྱལ་པོས་ཚངས་པའི་འཇིག་རྟེན་དུ་སོང་སྟེ་རི་མོ་བྲི་ཚུལ་ཞུས་པས། རི་ཡི་མཆོག་ནི་རི་རབ་ཡིན། ། སྒོ་ང་ལས་སྐྱེས་རྣམས་ཀྱི་ནི། ། གཙོ་བོ་ནམ་མཁའ་ལྡིང་ཡིན་ནོ། ། མི་ཡི་གཙོ་བོ་ས་བདག་སྟེ། ། དེ་བཞིན་རི་མོ་སྒྱུ་རྩལ་གཙོ། ། སོགས་དང༌། རྒྱལ་པོ་དེ་བཞིན་སྒྱུ་རྩལ་ཀུན། ། རི་མོའི་ལས་ལ་ཡང་དག་བརྟེན། ། ཞེས་སོགས་ཀྱིས་བསྔགས་ནས་བི་ཤྭ་ཀརྨས་སྟོན་པར་ལུང་བསྟན་པ་བཞིན་དེས་འཁོར་ལོས་སྒྱུར་བའི་ཚད་གཙོ་བོར་བྱས་ཏེ་ཚད་དང་མི་ལྡན་པའི་ཉེས་པ། ལྡན་པའི་ཕན་(༢༠༦ན)ཡོན་སོགས་དང༌། ལུས་ལ་མཛེས་པ་མ་ཚང་ན། ། ཚད་དག་གིས་ནི་ཅི་ཞིག་བྱ། ། ཞེས་མཛེས་དགོས་པའང་བསྟན། དེ་ནས་བརྩམས་མིའི་བཟོ་བོ་ལས་ཀྱི་འཕྲུལ་དང་ལྡན་པ་དག་གིས་བཟོའི་གནས་ངོ་མཚར་བ་བྱེད་པ་རྟག་ཏུ་བྱུང་ཞིང༌། ཐུབ་དབང་གཤེགས་ཀྱི་བར་ཡང་གཟུགས་རི་མོར་བྲིས་པས་དངོས་སུ་འཕྲུལ་པ་སྐྱེད་ནུས་པ་བྱུང་བ་འདུལ་བ་ལུང་ལས་གསལ། སྟོན་པ་མྱ་ངན་ལས་འདས་ནས་ཀྱང་ལོ་བརྒྱ་ཙམ་གྱི་བར་དེ་འདྲ་ཤིན་ཏུ་མང་ངོ༌། ། ཨུ་དྲ་ཡ་ན་མུ་ཏིག་འཁྲི་ཤིང་ལ། ། བསྐུར་བའི་བྲིས་སྐུ་ཆུ་ལོན་འོད་ཟེར་མ། ། བསྟན་འདིར་སྐུ་ཡི་རྟེན་ལ་སྔ་བར་གྲགས། ། ཨུ་དྲ་ཡ་ན་དང་མུ་ཏིག་འཁྲི་ཤིང་ཅན་གཉིས་ལ་བསྐུར་བའི་བྲིས་སྐུ་ཆུ་ལོན་མ་དང་འོད་ཟེར་མར་གྲགས་པ་ནི་བསྟན་པ་འདི་ལ་སྐུའི་རྟེན་རྣམས་ཀྱི་ནང་ནས་སྔ་བར་གྲགས་སོ། ། དེའང་མ་ག་དྷཱའི་རྒྱལ་པོ་གཟུགས་ཅན་སྙིང་པོ་དང་སྒྲ་སྒྲོག་རྒྱལ་པོ་ཨུ་དྲ་ཡ་ན་གཉིས་མ་མཐོང་མཛའ་བོར་གྱུར་ཏེ་སྐྱེས་ཀྱིས་འགྲུལ་བ་ལས། སྒྲ་སྒྲོག་ནས་རིན་ཐང་མེད་པའི་ནོར་བུའི་ཁྲབ་བསྐུར་བའི་སྐྱེས་ལན་དུ་གཟུགས་ཅན་སྙིང་པོས་སྟོན་པའི་སྐུ་རས་ལ་བྲིས་ཏེ་བསྐུར་བར་བརྩམས་པ་ན། སྟོན་པའི་གཟི་བྱིན་མ་བཟོད་པས་བཟོ་བོས་བྲི་བར་མ་ནུས་པ་ལ་ཁྲུས་རྫིང་གི་འགྲམ་དུ་སྟོན་པ་བཞུགས་ཏེ་ཆུ་ནང་དུ་ཤར་བ་བཞིན་རས་ལ་བྲིས། སྟེང་འོག་ཏུ་རྟེན་འབྲེལ་ལུགས་འབྱུང་ལྡོག་སྐྱབས་འགྲོ་བསླབ་པའི་གཞི་ལྔ་ཕན་ཡོན་བཅས་བྲིས་ཏེ་བསྐུར་བས་ཨུ་དྲ་ཡ་ནས་བདེན་པ་མཐོང་། འདི་ལ་ཐུབ་པ་ཆུ་ལོན་མར་གྲགས་ཟེར། ཡང་བཅོམ་ལྡན་འདས་སེན་སྐྱར་ཆོས་གསུངས་པའི་ཚེ། མིང་ཆེན་གྱི་ཆུང་མས་འབངས་མོ་རོ་ཧི་ཏ་དོ་ཤལ་ལེན་དུ་བཏང་བ་ལམ་དུ་བ་དྲུས་མས་བརྡུངས་ཏེ་ཤི། དེ་སངས་རྒྱས་ལ་དད་པའི་རྒྱུས་དེ་མ་ཐག་སིངྒ་ལར་རྒྱལ་པོའི་བཙུན་མོའི་མངལ་དུ་ཞུགས། བཙས་པ་ན་མུ་ཏིག་གི་ཆར་བབས་པས་མིང་མུ་ཏིག་ཅན་ནམ་མུ་ཐིག་འཁྲི་ཤིང་དུ་བཏགས། (༢༠༦བ)དེས་ཡུལ་དབུས་ཀྱི་ཚོང་པ་ལས་སངས་རྒྱས་ཀྱི་གཏམ་ཐོས་པས་དད་དེ་ཕྲིན་ཡིག་བསྐུར་བ་ལ། སྟོན་པས་རས་ཀྱི་ངོས་ལ་འོད་ཟེར་བཀྱེ་བ་བཞིན་རི་མོ་བས་བྲིས། བཀའི་ཚིགས་བཅད་བཅས་སྐྱེས་ལན་དུ་བསྐུར་བ་མཐོང་བས་བུ་མོས་བདེན་པ་མཐོང༌། འདི་ལ་ཐུབ་པ་འོད་ཟེར་མར་གྲགས་ཏེ་སྐྱེ་མཆེད་གཙང་ཞིང་ཡུལ་དབུས་དང་ཤར་གྱི་ལྷ་རིགས་རྣམས་འདི་ལས་མཆེད་པ་ཡིན་ནོ། ། ཐ༢ གཉིས་པ་[འབུར་སྐུ་བྱུང་ཚུལ་]ནི། གདུགས་ཚོད་གྲལ་གོང་མགོན་མེད་ཟས་སྦྱིན་ངོར། ། བཀས་གནང་རིན་ཆེན་འབུར་སྐུ་མང་དག་དང༌། ། ལྷར་གཤེགས་ཚེ་ན་གསལ་ལྡན་རྒྱལ་པོ་ཡིས། ། ཙནྡན་སྐུ་བཞེངས་ད་ལྟ་རྒྱ་ནག་བཞུགས། ། ཁྱིམ་བདག་དད་སྦྱིན་གྱིས་གདུགས་ཚོད་ལ་དགེ་འདུན་སྤྱན་དྲངས་པར་སྟོན་པ་མ་གཤེགས་པའི་ཚེ་གྲལ་གྱི་ཐོག་མ་མི་བརྗིད་པར་མཐོང་ནས། སྟོན་པས་གནང་ན་སྐུ་བགྱིད་དེ་བཞུགས་པར་གསོལ་ཞེས་མགོན་མེད་ཟས་སྦྱིན་གྱིས་ཞུས་པའི་ངོར་བཀས་གནང་སྟེ་རིན་པོ་ཆེ་ལས་བྱས་པའི་སྐུ་གཟུགས་མང་དུ་བྱུང་བ་དང༌། བཅོམ་ལྡན་འདས་ལྷ་ཡུལ་དུ་གཤེགས་ཤུལ་གསལ་ལྡན་གྱི་རྒྱལ་པོས་མཆོད་ཡུལ་དུ་ཙནྡན་གྱི་སྐུ་འདྲ་བཞེངས། སླར་སྟོན་པ་ལྷ་ལས་བབས་པ་ན་སྐུ་དེས་གོམ་པ་དྲུག་ཅུ་བསུས། རྒྱ་ནག་གི་ཡུལ་དགེ་ཕྱིར་བཞུད་ཅེས་བཅོམ་ལྡན་འདས་ཀྱིས་བསྐུལ་བས་མཁའ་ལས་གཤེགས་ཏེ་ད་ལྟའང་རྒྱ་ནག་ཏུ་བཞུགས་པ་ཙནྡན་ཇོ་བོ་ཞེས་འདྲ་བཤུས་ཀྱི་སི་ཐང་ཡང་མང་དུ་འབྱུང་བ་སྟེ། འབུར་སྐུའི་ཐོག་མ་ནི་འདི་དག་གོ། ། དེ་རྗེས་ཀླུ་ཡི་ནོར་བུར་རཱ་ཧུ་ལས། ། གངས་ཆེན་མཚོ་བཞེངས་ཕྱི་ཡི་རྒྱ་མཚོར་བཞུགས། ། དེའི་རྗེས་སུ་སྟོན་པ་མྱ་ངན་ལས་འདའ་ཁར་བསྟན་པ་གནས་ཤིང་མུ་སྟེགས་འདུལ་ཕྱིར་ངའི་སྐུ་ཚབ་བཞེངས་ཤིག་པར་བཀའ་སྩལ་བ་ལྟར། ཀླུའི་ནོར་བུ་དུ་མར་རྒྱུ་དང་རཱ་ཧུ་ལས་བཟོ་བྱས་ཏེ་ལོངས་སྐུ་རྣམ་སྣང་གང་ཆེན་མཚོ་ཆུ་ཞེང་དཔག་ཚད་བརྒྱད་ཅུ་པ་བཞེངས་ནས་ཕྱིའི་རྒྱ་མཚོའི་ནང་དུ་བཞུགས་སོ། ། དབང་པོས་ནོར་བུ་དུ་མར་བརྒྱད་བཅུ་གཉིས། ། ཉེར་ལྔའི་(༢༠༧ན)སྐུ་ཚབ་ལས་སྣ་ཚོགས་པས་འཕྲུལ། ། ཕྱི་མ་ལྷ་དང་གཞན་གཉིས་བོད་ན་བཞུགས། ། དངོས་ཀྱིས་བྱིན་བརླབས་སྟོན་པ་ཉིད་དང་མཚུངས། ། དབང་པོ་བརྒྱ་བྱིན་གྱིས་ལྷ་དང་མིའི་ནོར་བུ་རིགས་ལྔ་དང༌། འཆིང་བུ་ལྔ་བརྒྱ་རྩ་གཅིག་སྟེ་ནོར་བུ་དུ་མ་ལས་སྟོན་པའི་སྐུ་བཞེངས་པར་བརྩམས་ཏེ། བི་ཤྭ་ཀརྨས་སྟོན་པའི་ཞབས་ཀྱི་མཐེའུ་ཆུང་ལ་ཐིག་སྐུ་བཏགས་ནས་ཚད་གཞལ་བར་བརྩམས་པས་མ་ལོན་ཏེ་འོད་མདངས་དགའ་བའི་འཇིག་རྟེན་དུ་སངས་རྒྱས་དགའ་བའི་དཔལ་གྱི་དྲུང་ན་སླེབ། དེས་སྐུའི་ཚད་ལ་རྟོག་པ་ཞོག་ལ་རང་གི་སྟོན་པ་ཡིད་ལ་བྱོས་ཤིག་གསུངས་པས་དེ་མ་ཐག་སྟོན་པའི་སྤྱན་སྔར་སླེབ། དགུང་ལོ་བརྒྱད་དང་བཅུ་གཉིས་ཀྱི་སྐུ་ཚད་སྔོན་གྱི་མ་མའི་ངག་བཞིན་དང༌། ཉེར་ལྔ་པ་ཐུན་མོང་སྣང་བའི་སྐུ་ཚད་དངོས་དང་མཚུངས་པ་ལས་སྣ་ཚོགས་པའི་འཕྲུལ་གྱིས་བསྐྲུན། སྟོན་པས་ཞལ་གྱི་འོད་ཟེར་སྤྲོ་བསྡུས་བྱིན་གྱིས་བརླབས་ཏེ་ཕྱི་མ་ཉེར་ལྔ་པའི་སྐུ་ཚད་བརྒྱ་བྱིན་གྱིས་ལྷ་ཡུལ་དུ་སྤྱན་དྲངས། གཞན་གཉིས་ལྷ་ཡུལ་ཨོ་རྒྱན་ཀླུ་ཡུལ་རྡོ་རྗེ་གདན་རྣམས་སུ་ལོ་གྲངས་མང་པོ་དང༌། དེ་ནས་རྒྱལ་པོ་དེ་བ་པཱ་ལའི་དུས་བཅུ་གཉིས་པ་རྒྱ་ནག་དང༌། བརྒྱད་པ་བལ་པོར་གདན་དྲངས། རིམ་གྱིས་བོད་དུ་བྱོན་ཏེ་འཕྲུལ་སྣང་དང་ར་མོ་ཆེར་བཞུགས་པ་འདི་དག་ཡིན་ཏེ་སངས་རྒྱས་དངོས་ཀྱིས་བྱིན་གྱིས་བརླབས་པའི་ཕྱིར་སྟོན་པ་ཉིད་དང་བྱིན་རླབས་མཚུངས་པ་ཡིན་ནོ། ། མྱ་ངན་འདས་འོག་ལྷ་བཟོ་མིར་སྤྲུལ་པས། ། བྲམ་ཟེ་སྤུན་གསུམ་སྐུ་དང་མ་ག་དྷཱའི། ། ངོ་མཚར་ཅན་བརྒྱད་ལ་སོགས་མང་དུ་བཞེངས། ། སྟོན་པ་མྱ་ངན་ལས་འདས་པའི་འོག་ཏུ་མིའི་བཟོ་བོ་འཕྲུལ་དང་ལྡན་པ་ཆེར་མེད་པ་ན་ལྷའི་བཟོ་བོ་མང་པོ་མིར་སྤྲུལ་ནས་རྟེན་ཁྱད་པར་འཕགས་པ་རྣམས་བཞེངས་པའི་གྲོགས་བྱས་ཏེ། དེའང་སྟོན་པ་གཤེགས་ནས་ལོ་བརྒྱད་ཅུར་ཉེ་བར་འཕགས་པ་ཉེ་སྦས་ཀྱི་བུས་མ་ག་དྷཱར་བྲམ་ཟེ་སྤུན་གསུམ་བྱུང་བའི་ཆེ་བས་ཝ་ར་ཎཱ་སིར་རིན་ཆེན་རིགས་ཀྱི་རྡོ་ལས་བྱས་པའི་(༢༠༧བ)སྐུ་གཟུགས་དང་ལྷ་ཁང༌། འབྲིང་པོས་རྒྱལ་པོའི་ཁབ་ཏུ་ལྷ་ཁང་བརྩིགས་གནས་ཆེན་བརྒྱད་ཀྱི་ས་ལས་སྐུ་གཟུགས་བྱས། ཆུང་བས་རྡོ་རྗེ་གདན་དུ་ཕྱི་དབྱིབས་མཆོད་རྟེན་ལ་ནང་གནྡྷོ་ལའི་རྣམ་པའི་ཁང་བཟང་དུ་ཙནྡན་གཽ་ཤྲཱི་དང་རིན་པོ་ཆེའི་ཕྱེ་མ་བསྲེས་པ་ལ་སྟོན་པ་དགུང་ལོ་སོ་ལྔ་པའི་ཚད་རིན་པོ་ཆེ་མརྐ་ཏའི་སྤྱན་འབྲས་ཅན་མཚན་དཔེས་བརྒྱན་པ་བཞེངས། ལྗགས་ཀྱིས་གདོང་ཁེབས་པ། ན་བཟའ་སྐུ་ལ་སོར་བཞི་མ་རེག་པ། འོད་འདོམ་གང༌། སྤྱོད་ལམ་རྣམ་གསུམ་རྣམས་འདི་ལ་མེད་ཅིང༌། དབུ་སྐྲ་སྔོ་བ་དང༌། མཛོད་སྤུ་མི་གསལ་བ་སོགས་ཁྱད་པར་བརྒྱད་མ་གཏོགས་སྟོན་པ་དངོས་དང་མཚུངས་པར་གྲགས་པའི་མ་ཧཱ་བོདྷི་བྱུང༌། དེ་ནས་སྦྱིན་བདག་ཅི་རིགས་པས་རིམ་གྱིས་འཇམ་དཔལ་རྔ་སྒྲ་སོགས་མ་ག་དྷཱའི་རྟེན་ངོ་མཚར་ཅན་བརྒྱད་ལ་སོགས་པ་མང་དུ་བཞེངས་སོ། ། མྱ་ངན་མེད་དུས་གནས་བརྒྱད་མཆོད་རྟེན་བརྒྱད། ། རྡོར་གདན་ནང་སྐོར་གནོད་སྦྱིན་བཟོ་བོས་བཞེངས། ། ཀླུ་སྒྲུབ་དུས་སུ་ཀླུ་ཡིས་བཅོས་པ་མང༌། ། རྒྱལ་པོ་མྱ་ངན་མེད་ཀྱི་དུས་གནས་ཆེན་པོ་བརྒྱད་ཀྱི་མཆོད་རྟེན་དང༌། རྡོ་རྗེ་གདན་གྱི་ནང་སྐོར་སོགས་གནོད་སྦྱིན་གྱི་བཟོ་བོས་བཞེངས། ཀླུ་སྒྲུབ་ཀྱི་དུས་ཀླུའི་བཟོ་བོས་བཅོས་པའང་མང་དུ་བྱུང་ངོ༌། ། དེ་ལྟར་ཀླུ་དང་གནོད་བྱིན་གྱིས་བཅོས་པ་དེ་རྣམས་ནི་བཞེངས་ནས་ལོ་མང་པོར་དངོས་སུ་འཁྲུལ་པ་བསྐྱེད་ནུས་པ་ཡོད་ལ། ཕྱིས་དུས་ཀྱི་དབང་གིས་དེ་ལྟར་མེད་ནའང༌། བཟོ་ཁྱད་ནི་གཞན་སུས་ཀྱང་མི་ཤེས་པ་ལྟ་བུར་ཡོད། དེ་ནས་ཀྱང་ཡུན་རིང་པོར་བློ་གྲོས་ཀྱི་རྩལ་སྣ་ཚོགས་པས་བཞེངས་པའི་བཟོ་བརྒྱུད་མི་འདྲ་བ་མང་པོ་ཁོ་ན་བྱུང་གི། གཅིག་གི་རྗེས་སུ་འབྲང་བའི་སྲོལ་བཙུགས་པ་མེད་དོ། ། ལྷ་དང་གནོད་སྦྱིན་ཀླུ་ཡི་བཟོར་མཐུན་པ། ། བིམྦ་སཱ་ར་ཕྲེང་འཛིན་དྷཱི་མཱནྲ་ལུགས། ། དབུས་དང་ནུབ་རྙིང་ཤར་གྱི་བཟོ་ཞེས་གྲགས། ། དེའི་ཕྱིས་ནས་རིམ་པ་བཞིན་ལྷ་དང་གནོད་སྦྱིན་དང་ཀླུའི་བཟོ་དང་མཐུན་པ། རྒྱལ་པོ་སངས་རྒྱས་ཕྱོགས་ཀྱི་དུས་(༢༠༨ན)བིམྦ་སཱ་ར་ཞེས་པ་མ་ག་དྷཱར་བྱུང༌། རྒྱལ་པོ་ངང་ཚུལ་གྱི་དུས་ཡུལ་མ་རུར་སྲྀག་དྷ་རི་སྟེ་ཕྲེང་འཛིན་ཅེས་པ་བྱུང༌། དེ་བ་པཱ་ལའི་དུས་ཝ་རེནྡྲར་དྷཱི་མཱན྄་ཅེས་པ་དང༌། དེའི་བུ་བིཏྤ་ལོ་ཟེར་བ་བྱུང་བ་བྷངྒ་ལར་བསྡད། དེ་དག་ནི་བྲིས་འབུར་ལུགས་བརྐོས་ལ་ཤིན་ཏུ་མཁས་ཤིང་དེའི་རྒྱུན་སྲོལ་འཛིན་པ་རྣམས་རིམ་བཞིན་དབུས་བཟོ་དང༌། ནུབ་རྙིང་གི་ལུགས། ཤར་གྱི་བཟོ་ཞེས་ཟེར། ཤར་གྱི་ལྷའང་ཕའི་རྗེས་འབྲངས་ཤར་རིས་དང༌། བུའི་རྗེས་འབྲངས་མ་ག་དྷཱར་དར་བས་དབུས་ཀྱི་རི་མོར་ངོས་འཛིན་ནོ། ། བལ་པོ་སྔོན་བར་ནུབ་རྙིང་ཤར་དང་མཐུན། ། ཁ་ཆེར་དབུས་དང་ནུབ་རྙིང་རང་སྲོལ་གསུམ། ། བལ་པོའི་ཡུལ་དུའང་སྔོན་གྱི་བཟོ་རྒྱུན་ནུབ་རྙིང་དང་འདྲ། བར་སྐབས་ཀྱི་བྲིས་དང་ལི་མ་ནི་ཤར་དང་མཐུན་ཤས་ཆེ་བའི་བལ་ཡུལ་རང་ལུགས་ཡིན་ལ་ཕྱིས་ནི་ངེས་པ་མེད། ཁ་ཆེར་ཡང་སྔོན་དབུས་དང་ནུབ་རྙིང་གི་རྗེས་སུ་འབྲང༌། ཕྱིས་ཧ་སུ་རཱ་ཛ་ཟེར་བ་ཞིག་གིས་བྲིས་འབུར་གཉིས་ཀའི་སྲོལ་གསར་པ་བཏོད་པའི་ལུགས་ལ་དེང་སང་ཁ་ཆེ་མ་ཟེར། གང་ན་སངས་རྒྱས་ཀྱི་བསྟན་པ་ཡོད་པ་ན་ལྷ་བཟོ་ཡང་མཁས་པ་དང༌། གང་ན་ཀླ་ཀློས་དབང་བྱེད་སར་ལྷ་བཟོ་ནུབ། གང་མུ་སྟེགས་དར་སར་ལྷ་བཟོ་ཡང་མི་མཁས་པ་དག་དར་བའི་ཕྱིར། ཡུལ་དེ་རྣམས་སུ་གོང་དུ་སྨོས་པ་དེ་དག་གི་སྲོལ་དེང་སང་ཆེར་མེད། པུཀྐཾ་དང་ལྷོ་ཕྱོགས་ཀྱི་རྒྱུད་དུ་ཕྱིས་སུའང་སྐུ་གཟུགས་བཞེངས་པ་དར་པོ་ཡོད་ལ། དེ་དག་གི་བཟོ་རྒྱུན་བོད་དུ་སྔར་མ་བྱུང་བར་མངོན། ཡུལ་དེར་ནི། ཛ་ཡ་ཞེས་པ་དང༌། པཱ་ར་ཛ་ཡ་དང༌། བི་ཛ་ཡ་ཞེས་པ། རྒྱལ་བ་དང༌། གཞན་ལས་རྒྱལ་བ་དང༌། རྣམ་པར་རྒྱལ་བ་ཞེས་པ་གསུམ་གྱི་རྗེས་སུ་འབྲང་བ་ཤིན་ཏུ་མང་བ་ཡོད་པར་བཤད་དོ། ། ཏ༢ གཉིས་པ་བོད་དུ་བྱུང་ཚུལ་ནི། བོད་དུ་ཆོས་འཁོར་རྣམ་གསུམ་སྐུ་རྣམས་སྔ། ། བོད་ཡུལ་དུ་སྤྲུལ་པའི་རྒྱལ་པོ་སྲོང་བཙན་སྒམ་པོའི་དུས་ཁྲ་