Tibetan
ཀུན་སྤངས་ཆེན་པོར་འདུ། ། ལོ་ཙཱ་བ་ཆེན་པོ་གྱི་ཇོ་ཟླ་བའི་འོད་ཟེར་གྱི་སྦྱོར་དྲུག་གི་མན་ངག །སྦྱོར་དྲུག་གི་སྒོས་ཀྱི་རྒྱུད་ཆུང་འགྲེལ་པ་དང་བཅས་པ་དང༌། ལོ་ཙཱ་བ་རྨ་དགེ་བའི་བློ་གྲོས་ཀྱི་ལུགས་ཀྱི་སྦྱོར་དྲུག་དང༌། ཁྲོམ་ལོ་ཙཱ་བ་པདྨ་འོད་ཟེར་གྱི་སྦྱོར་དྲུག་དང༌། ཇོ་བོ་རྗེ་དཔལ་ལྡན་ཨ་ཏི་ཤས་བླ་མ་ནག་པོ་མངོན་ཤེས་ཅན་ལ་གསན་པའི་སྦྱོར་དྲུག་དང༌། ཁ་ཆེ་པཎ་ཆེན་ཟླ་བ་མགོན་པོ་ནས་བརྒྱུད་པའི་སྦྱོར་དྲུག་ལ་འབྲོ་ལུགས་སུ་གྲགས་(༡༩༥བ)པའི་སྦྱོར་དྲུག་དང༌། རྭ་ལོ་ཙཱ་ཆོས་རབ་ཀྱིས་པཎྜི་ཏ་ས་མནྟ་ཤྲཱི་ལ་གསན་པའི་སྦྱོར་དྲུག་དང༌། ཙ་མི་ལོ་ཙཱ་བ་སངས་རྒྱས་གྲགས་ཀྱིས་མཛད་པའི་སྦྱོར་ཕྲེང་གི་ལུགས། སེ་ལོ་དང་གཉོས་སྟོན་འོད་མ་ནས་བརྒྱུད་པ་འདི་ལ་ཙ་མི་ལུགས་རང་དུ་གྲགས་པ་དང༌། རས་ཆུང་རྡོ་རྗེ་གྲགས་པས་ཨ་མོ་གྷ་བཛྲ་ལ་གསན་པའི་སྦྱོར་དྲུག་དང༌། ཙ་མི་ནས་བརྒྱུད་པ་ཡིན་ཡང་སྦྱོར་ཕྲེང་ལུགས་དང་མི་གཅིག་པ་དཔལ་ཆེན་རྒྭ་ལོ་ནས་བརྒྱུད་པ་ལུགས་གསུམ་སྟེ། རྒྭ་ལོས་དུས་འཁོར་རང་ལུགས་ཀྱི་སྦྱོར་དྲུག་ཞང་ཚལ་པ་སོགས་ལ་གནང་བ་དང༌། མ་རྒྱུད་ཀྱཻའི་རྡོ་རྗེའི་སྦྱོར་དྲུག་བླ་མ་ས་སྐྱ་པ་ཆེན་པོ་ལ་གནང་བ་དང༌། ཕ་རྒྱུད་གསང་བ་འདུས་པའི་སྦྱོར་དྲུག་དགེ་བཤེས་སྐྱུ་ར་ཨ་སྐྱབས་ལ་གནང་བ་དང་གསུམ་མོ། ། རྒྭ་ལོས་ཙ་མི་ལ་གསན་པ་ཡིན་ཡང༌། སྦྱོར་ཕྲེང་གི་ལུགས་དང་རྒྭ་ལོ་ལུགས་གཉིས་གདམས་ངག་སྟོན་ཚུལ་མི་འདྲ་བ་ཆེར་ཡོད་པས་ལུགས་སོ་སོར་བགྲང་ངོ༌། །ཁ་ཆེ་པཎ་ཆེན་ཤཱཀྱ་ཤྲཱིས་དཔྱལ་ལོ་ཆོས་བཟང་ལ་གནང་བ་དགྱེས་རྡོར་ནཱ་རོ་འགྲེལ་ཆེན་གྱི་མན་ངག་ཏུ་མཛད། དཔྱལ་པས་ནཱ་རོ་པའི་སྒྲོམ་ལྡེར་གྲགས་པའི་ཡི་གེ་ཡང་ཡོད་པ་དང༌། པཎ་ཆེན་གྱིས་ཆོས་རྗེ་ས་སྐྱ་པཎ་ཆེན་ལ་གནང་བ་སྙན་བརྒྱུད་རྡོ་རྗེའི་ཚིག་དྲུག་གིས་ཁྱད་པར་དུ་བྱས་པ་སྟེ། ཁ་ཆེ་པཎ་ཆེན་ནས་བརྒྱུད་པ་ལུགས་གཉིས་སོ། ། གྲུབ་ཐོབ་དཔེ་མེད་འཚོའི་ལུགས་ཀྱི་སྦྱོར་དྲུག་སློབ་དཔོན་རཏྣ་རཀྵི་ཏ་ལ་པཎྜི་ཏ་བི་བྷུ་ཏི་ཙནྡྲས་གསན་པ་བི་བྷུ་ཏིའི་རིང་བརྒྱུད་དུ་གྲགས་པ་དང༌། ཕྱིས་བལ་ཡུལ་གྱི་སྠཾ་བི་ཧ་རར་གྲུབ་ཐོབ་ཤ་བ་རིས་ཞལ་མངོན་སུམ་དུ་བསྟན་དུས་གནང་བའི་སྦྱོར་དྲུག་ཉེ་བརྒྱུད་དེ་བི་བྷུ་ཏིའི་ལུགས་གཉིས་སོ། ། ཆག་ལོ་ཙཱ་བ་ཆོས་རྗེ་དཔལ་གྱིས་བླ་མ་བལ་པོའི་པཎ་ཆེན་ཉི་དབང་སྲུང་བ་དང༌། འཕགས་ཡུལ་གྱི་སྐྱེས་མཆོག་རཱ་ཧུ་ལ་ཤྲཱི་བྷ་དྲ་ལ་གསན་པའི་མན་ངག་ཀྱང་ཡོད་ལ། མན་ལུང་གུ་རུར་གྲགས་པ་གྲུབ་ཆེན་པུཎྱ་ཤྲཱིའམ། རྒྱ་གར་གྱི་ཡུལ་དུ་གྲུབ་ཆེན་དཱི་པཾ་ཀ་རར་(༡༩༦ན)གྲགས་པ་འཆི་མེད་རྡོ་རྗེའི་སྐུ་བརྙེས་ཏེ་ད་ལྟ་རི་བོ་ཏ་ལ་ན་བཞུགས་པ་དེས། དང་པོ་འབྲོ་ལུགས་གཙོ་བོར་གྱུར་པ་རྭ་འབྲོ་གཉིས་འདུས་ཀྱི་མན་ངག་བསྒོམ་པར་མཛད་པ་ཡིན་ཡང༌། ཕྱིས་གྲུབ་པ་བརྙེས་པས་བརྒྱུད་པ་གཞན་ལ་མ་ལྟོས་མོད། གང་ལྟར་ཡང་དེས་མཛད་པའི་མཚན་བརྗོད་སྦྱོར་དྲུག་སྟེ། དེ་ལྟར་ན་ལུགས་སྲོལ་བཅུ་བདུན་རིགས་ལྡན་སྤྲུལ་པའི་སྐུ་ཆོས་རྗེ་ཀུན་སྤངས་ཆེན་པོ་ཞང་ཐུགས་རྗེ་བརྩོན་འགྲུས་ཀྱིས་གསན་པས་ལུགས་འདི་ལ་དེ་དག་གི་རྒྱུན་གཅིག་ཏུ་འདུ་ཡང༌། བི་བྷུ་ཏིའི་ཉེ་བརྒྱུད་དངོས་སློབ་བཞིའི་ལུགས་ཀྱང་གསན་པས་དེ་ལྟར་ན་ལུགས་སྲོལ་ཉི་ཤུར་བགྲང་ངོ༌། ། ཏ༤ བཞི་པ་[ལུགས་སྲོལ་གཞན་]ནི། གཞན་ཡང་ཀོ་བྲག་རོང་པ་བོ་དོང་པ། ། ལ་སྟོད་སྲོན་ལུགས་ཆེ་ཕྲ་དུ་མ་བྱུང༌། ། གཞན་ཡང་ཀོ་བྲག་པ་བསོད་ནམས་རྒྱལ་མཚན་གྱིས་བལ་ཡུལ་ནས་བི་བྷུ་ཏི་ཙནྡྲ་ཆེད་དུ་སྤྱན་དྲངས་ནས་སྦྱོར་དྲུག་ཉེ་བརྒྱུད་ཞུས་ཏེ། གྲུབ་ཆེན་གོ་ལུང་པ་གཞོན་ནུ་དཔལ་ནས་བརྒྱུད་པའི་ཀོ་བྲག་ལུགས་དང༌། རོང་པ་རྒ་ལོའི་སྲས་རོང་པ་ཤེས་རབ་སེང་གེ་དང༌། རྡོ་རྗེ་རྒྱལ་མཚན་སོགས་ལས་རོང་ལུགས་ཀྱི་བཀའ་སྲོལ་ཟུར་དུ་བྱུང་པ་རོང་ལུགས་དང༌། གཉལ་ཞིག་བུ་དགུའི་ཡ་གྱལ་བོ་དོང་པ་རིན་ཆེན་རྩེ་མོས་གྲུབ་ཐོབ་སེ་མོ་ཆེ་པ་ལས་རྒྱུད་གདམས་ངག་ཞུས། དེ་ནས་སྟག་སྡེ་བ་སེང་གེ་རྒྱལ་མཚན། ཤོང་ལོ་རྡོ་རྗེ་རྒྱལ་མཚན། དཔང་ལོ་བློ་བརྟན། ལོ་ཆེན་བྱང་རྩེ། ལོ་ཙཱ་བ་གྲགས་པ་རྒྱལ་མཚན། ཀུན་མཁྱེན་འཇིགས་བྲལ་ཆེན་པོའི་བར་དུ་བརྒྱུད་པ་བོ་དོང་ལུགས་ཏེ། དེའི་སློབ་མ་པཎ་ཆེན་བྱམས་པ་གླིང་པ། བྱང་བདག་རྣམ་རྒྱལ་གྲགས་བཟང་སོགས་ལས་ཀྱང་བཤད་སྒྲུབ་ཀྱི་སྲོལ་རྒྱ་ཆེན་བྱུང༌། ཡང་ཀུན་སྤངས་ཆེན་པོའི་ཞལ་སློབ་ཀུན་སྤངས་བུ་བཞིར་གྲགས་པའི་ཡ་གྱལ་ལ་སྟོད་པ་དབང་ཕྱུག་རྒྱལ་མཚན་དང༌། སྲོན་པ་ཀུན་རྒྱལ་བ་གཉིས་ལས་ཀྱང་ལུགས་སྲོལ་ཟུར་དུ་བྱུང་བ་དང༌། འགོས་དཀར་ལུགས། ལྐོག་ལུགས་སོགས་ཆེ་ཕྲ་དུ་མ་བྱུང་ཞིང༌། (༡༩༦བ)ཕྱིས་སུ་རྒྱ་གར་ཤར་ཕྱོགས་ཀྱི་མཁས་པ་ཆེན་པོ་ནགས་ཀྱི་རིན་ཆེན་བོད་དུ་བྱོན་ཏེ། རིང་བརྒྱུད་གྲུབ་ཐོབ་དཔེ་མེད་འཚོའི་གདམས་ངག་ཡོངས་སུ་རྫོགས་པ་དང༌། རི་ཁྲོད་དབང་ཕྱུག་གི་ཉེ་བརྒྱུད་བཅས་འགོས་ལོ་ཙཱ་བ་གཞོན་ནུ་དཔལ་དང༌། སྤྱན་སྔ་ཆོས་ཀྱི་གྲགས་པ་སོགས་ལ་སྩལ་བ་དང༌། དེ་ལས་ཀྱང་ཕྱིས་སུ་གྲུབ་ཆེན་ཞི་བ་སྦས་པའི་སློབ་མ་སངས་རྒྱས་སྦས་པའི་མགོན་པོས་ཞི་སྦས་ཞབས་ཀྱི་ཐུན་མོང་མ་ཡིན་པའི་སྦྱོར་དྲུག་སྙན་བརྒྱུད་ཇོ་ནང་རྗེ་བཙུན་ཆེན་པོ་ལ་གནང་བའི་ལུགས་རྣམས་ཀྱང་བྱུང་ངོ༌། ། ཏ༥ ལྔ་པ་[ཁྱད་པར་ཅན་གྱི་རིང་ལུགས་ངོས་བཟུང་བ་]ནི། ཁྱད་པར་རྟོན་པ་བཞི་ལྡན་ཀུན་མཁྱེན་རྗེ། ། རྩོད་དུས་རྡོ་རྗེ་འཆང་དངོས་སྒྲོལ་བའི་མགོན། ། རིགས་ལྡན་གཉིས་པའི་བཀའ་བརྒྱུད་ཕུལ་དུ་བྱུང༌། ། ལུགས་སྲོལ་དེ་དག་ཐམས་ཅད་ལས་ཁྱད་པར་དུ་འཕགས་པ་རྔ་བོ་ཆེའི་མདོ་སོགས་ནས་ཐུབ་མཚན་འཆང་བའི་དགེ་སློང་དུ་ལུང་བསྟན་པ་རིགས་ལྡན་སྤྲུལ་པའི་སྐུ་དོལ་པོ་པ་ཆེན་པོ་རྒྱལ་བའི་གསུང་རབ་ལ་མཐར་ཐུག་བརྟོན་པ་རྣམ་པ་བཞི་དང་ལྡན་པ་ཀུན་མཁྱེན་ཆོས་ཀྱི་རྗེ་ཤེས་རབ་རྒྱལ་མཚན་དཔལ་བཟང་པོ་དང༌། རྩོད་པའི་དུས་ཀྱི་མཐར་གྲུབ་ཆེན་སྤྱོད་འཆང་དབང་པོ་བསམ་བཞིན་སྐྱེ་བ་བཞེས་པ། གསང་བ་ཟབ་མོའི་གནས་ལ་རྡོ་རྗེ་འཆང་གཉིས་པའི་གོ་འཕང་བརྙེས་པ་རྗེ་བཙུན་སྒྲོལ་བའི་མགོན་པོས་ཤིང་རྟའི་ལམ་སྲོལ་ཕྱེས་པ་དག་ནི་རིགས་ལྡན་གཉིས་པའི་བཀའ་བརྒྱུད་དེ་གཞན་ལས་ཕུལ་དུ་བྱུང་ཞིང་སྒྲུབ་བརྒྱུད་འདིའི་བཀའ་ཆེན་བབས་པ་ཡིན་ནོ། ། ཇ༨ བརྒྱད་པ་རྡོ་རྗེའི་བསྙེན་སྒྲུབ་ཀྱི་ལམ་སྲོལ་བཤད་པ་ལ་གཉིས། ཉ༡ རིང་ལུགས་ངོས་བཟུང༌བ། ཉ༢ བརྒྱུད་སྲོལ་བཤད་པའོ། ། ཉ༡ དང་པོ་ནི། གཞི་ལམ་འབྲས་བུར་མི་ཕྱེད་རྡོ་རྗེ་གསུམ། ། བསྙེན་སྒྲུབ་སྒྲུབ་ཆེན་ཡན་ལག་རྣལ་འབྱོར་མས། ། རིན་ཆེན་དཔལ་ལ་ཐུགས་ཀྱི་ཟུང་སྩལ་བ། ། སྦྱང་གཞི་གཞི་ལམ་འབྲས་བུའི་གནས་སྐབས་གསུམ་དུ་རྒྱུན་ཆགས་པས་དབྱེར་མི་ཕྱེད་པའི་མཚན་ཉིད་ཅན་སྐུ་གསུང་ཐུགས་ཀྱི་རྡོ་རྗེ་གསུམ་པོ། སྦྱང་བྱ་ལུས་ངག་ཡིད་གསུམ་གློ་བུར་འཁྲུལ་(༡༩༧ན)འཛིན་གནས་སྐབས་བཞིའི་བག་ཆགས་དང་བཅས་པས་བསྒྲིབས་པ་དེ་ཉིད། སྦྱོང་བྱེད་སོར་བསམ་བསྙེན་པའི་ཡན་ལག །སྲོག་རྩོལ་སྒྲུབ་པའི་ཡན་ལག །དྲན་ཏིང་སྒྲུབ་པ་ཆེན་པོའི་ཡན་ལག་གསུམ་གྱིས་སྦྱངས་འབྲས་དབང་རྣོན་བརྩོན་འགྲུས་ཅན་ཚེ་གཅིག་ལ་སྐུ་གསུམ་མངོན་དུ་བྱེད་པའི་མན་ངག་རྒྱལ་ཡུམ་རྡོ་རྗེ་རྣལ་འབྱོར་མ་དངོས་ཀྱིས་གྲུབ་ཆེན་ཨོ་རྒྱན་པ་རིན་ཆེན་དཔལ་ལ་ཐུགས་ཀྱི་ཟུང་བཅུད་སྩལ་བ་སྟེ། དེའང་གྲུབ་ཆེན་དེ་ཉིད་མདོ་སྔགས་ཀྱི་སྦྱངས་པ་མཐར་ཕྱིན། རོང་ལུགས་ཀྱི་བརྒྱུད་འཛིན་དུས་འཁོར་བ་སངས་རྒྱས་རྡོ་རྗེ་ལས་དུས་ཀྱི་འཁོར་ལོའི་རྒྱུད་འགྲེལ་མན་ངག་དང་བཅས་པ་གསན་ཏེ་མཁས་པའི་ཕུལ་དུ་གྱུར། རྒྱལ་བ་རྒོད་ཚང་པ་ལས་རྟོགས་པ་མཐར་ཐུག་བརྙེས། ཛཱ་ལནྡྷ་ར་སོགས་གནས་ཡུལ་མང་དུ་བྱོན། ཁྱད་པར་ནུབ་ཕྱོགས་ཨོ་རྒྱན་གྱི་ཡུལ་དུ་ཕེབ། བར་ཆད་དང་འཇིགས་པ་ཆོ་འཕྲུལ་མཐའ་དག་ལྟ་བ་དང་བརྟུལ་ཞུགས་ཀྱི་སྤྱོད་པས་ཟིལ་གྱིས་མནན། ཡུལ་དབུས་དྷུ་མ་ཐ་ལའི་ཕྱོགས་བཞིར་རིགས་བཞི་མཁའ་འགྲོས་བྱིན་གྱིས་བརླབས། སྤྲུལ་པའི་མཛེས་མས་ལུང་བསྟན་པ་བཞིན་ཀ་བོ་ཀ་ཞེས་པའི་གྲོང་དུ་རྡོ་རྗེ་རྣལ་འབྱོར་མ་ཉིད་དང་པོ་སྨད་འཚོང་མའི་གཟུགས་སུ་བསྟན་ནས་བཟའ་བཏུང་དང་རེག་བྱའི་བདེ་བ་སྩལ་བས་རྩ་མདུད་ཐམས་ཅད་གྲོལ། སྒྲ་དང་ས་གཡོས་སོགས་ལྟས་ཆེན་པོ་དང་བཅས་ཏེ་སླར་རྡོ་རྗེ་བཙུན་མོ་དངོས་སུ་སྣང་བས་གདམས་པ་འདི་རྫོགས་པར་གནང༌། སྔར་གྱི་མཁའ་འགྲོ་བཞི་དང་སེང་གེ་གདོང་ཅན་ལྔ་པོས་ཀྱང་གདམས་པ་སྣ་རེ་གནང་བས་གྲུབ་པ་ཆེན་པོའི་ས་ལ་གནས་པར་གྱུར་ཏེ། བོད་དུ་བྱོན་ནས་མཁའ་འགྲོའི་ལུང་བཞིན་ཐོག་མར་གཡའ་བཟང་པ། སྣུབས་འདུལ་བ་འཛིན་པའི་དབོན་པོ་རིན་པོ་ཆེ་མཁར་ཆུ་བས་གསོལ་བ་བཏབ་པའི་ངོར་གཞུང་ཡི་གེར་བཀོད་པར་མཛད་དོ། ། ཉ༢ གཉིས་པ་[བརྒྱུད་སྲོལ་བཤད་པ་]ནི། མཁར་ཆུ་བ་དང་ཟླ་སེང་སྦུ་ཏྲ་བ། ། ཟུར་ཕུག་སྙེ་མདོ་སྐུ་མཆེད་སྲོལ་མང་ལས། ། རྒྱལ་(༡༩༧བ)བ་གཉིས་པ་རང་བྱུང་ཆོས་རྗེ་ཡིས། ། རྡོ་རྗེའི་ཚིག་བཀྲོལ་གདམས་པའི་ལམ་བཟང་གསལ། ། རིན་པོ་ཆེ་མཁར་ཆུ་བས་དམིགས་རྐང་རེ་ལ་གསེར་ཞོ་རེའི་མཎྜལ་ཕུལ་ནས་ཞུས་ཤིང་བརྗེད་ཐོ་བསྡུས་པའང་མཛད། ཁྲིད་གཉེར་བ་རྟོགས་ལྡན་ཟླ་བ་སེང་གེས་མན་ངག་རྣམས་གླེགས་བམ་དུ་བསྡམས། ཕྱིས་ཀྱང་ཁྲིད་ལུགས་འདི་ལ་གཙོར་བྱེད། རྗེ་ཉིད་ལ་གོ་ལུང་བ་གཞོན་ནུ་དཔལ་གྱིས་དྲི་བ་ཞུས་པས་ལན་འདེབས་གནང་བ་ཁོང་གིས་ཡི་གེར་བཏབ་པ་དང༌། སྦུ་ཏྲ་པ་མཁས་བཙུན་བསོད་ནམས་འོད་ཟེར་པ་ལ་ཡིག་ཆ་གསལ་བར་མ་ཐོས་ཤིང༌། ཟུར་ཕུག་པ་རིན་ཆེན་དཔལ་བས་མཛད་པའི་ཊཱིཀ་ཆེན་དང༌། མཁས་པ་ཤངས་སྟོན་དང༌། སྙེ་མདོ་ཀུན་དགའ་དོན་གྲུབ་པས་རྡོ་རྗེའི་ཚིག་རྐང་གི་རྣམ་བཤད་མཛད་པ་བཞི་ལ་འགྲེལ་ཆེན་བཞི་ཟེར་ཞིང༌། བསོད་འོད་ལས་ཆོས་རྗེ་གངས་པ་བརྒྱུད་དཔལ་ལྡན་བླ་མ་གསོད་ནམས་རྒྱལ་མཚན་གྱི་བར་དུ་བྱུང་བ་དང༌། སྙེ་མདོ་སྐུ་མཆེད་ལས་ཀྱང་བརྒྱུད་པ་འཕེལ་བ་སོགས་སྲོལ་མང་དུ་བྱུང་བ་ལས། རྒྱལ་བ་གཉིས་པ་ཀུན་མཁྱེན་རང་བྱུང་ཆོས་རྗེས་གྲུབ་ཆེན་པ་ལས་གདམས་ངག་རྫོགས་པར་གསན་ཏེ། རྡོ་རྗེའི་ཚིག་གི་མདུད་འགྲོལ་དང་གདམས་ངག་གི་གནད་གཞན་ལས་ཁྱད་པར་འཕགས་པའི་ལམ་བཟང་པོ་གསལ་བར་མཛད་ཅིང༌། རྗེ་རོལ་པའི་རྡོ་རྗེ་སོགས་སྐུའི་སྐྱེ་བ་ན་རིམ་སློབ་བརྒྱུད་དང་བཅས་པས་རྒྱ་ཆེར་སྤེལ་བར་མཛད་དོ། ། ཆ༢ གཉིས་པ་ཕྲན་ཚེགས་བྱུང་བ་གཞན་སྨོས་པ་ནི། མི་ཏྲ་དམར་པོ་ཁ་རག་སྐོར་གསུམ་སོགས། ། ཚད་ལྡན་ཕྲན་ཚེགས་བྱུང་བ་མཐའ་ཡས་སོ། ། ངོ་མཚར་བའི་གཏམ་བཅོ་བརྒྱད་དང་ལྡན་པའི་གྲུབ་ཆེན་མི་ཏྲ་ཛོ་ཀི་དེ་ཉིད་ཁྲོ་ཕུ་ལོ་ཙཱ་བ་བྱམས་པའི་དཔལ་གྱིས་སྤྱན་དྲངས། ཟབ་ཆོས་ཞུས་པས་ཤེས་བྱའི་ཡན་ལག་ཏུ་བསྟན་པ་ཐུན་མོང་གི་སྐོར། ནང་སྒྲུབ་ཐབས་སུ་བསྟན་པ་ཉམས་ལེན་བྱེ་བྲག་གི་སྐོར། གསང་བ་བྱིན་རླབས་ཀྱི་འཇུག་པ་སྟོན་པ་ཁྱད་པར་གྱི་སྐོར་གསུམ་གནང་བ་ཁྲོ་ཕུ་པ་(༡༩༨ན)ལས་རིམ་པར་བརྒྱུད་པ་དང༌། ས་ར་ཧས་གནང་བའི་ཕྱག་ཆེན་འཁོར་བ་རྒྱུན་གཅོད་ཀྱི་གདམས་ངག་དོན་མོ་རིར་མཚན་ལྡན་འཁྲུལ་ཞིག་ཆེན་པོ་ལ་གནང༌། དེས་རྟོགས་ལྡན་གྲགས་སེང་ལ་གནང་བ་དང༌། ཡང་བལ་རས་ཞེས་བྱ་བའི་རྣལ་འབྱོར་པར་བརྫུས་ནས་གྲགས་པ་སེང་གེ་ལ་མཁའ་སྤྱོད་བསྙེན་སྒྲུབ་གནང་བ་ཕྱི་མ་གཉིས་ལ་རྟོགས་ལྡན་མཁའ་སྤྱོད་དབང་པོ་ཡིག་ཆའང་མཛད་པ་དང༌། ཡང་མི་ཏྲ་ཁྲིད་དྲུག་ཏུ་གྲགས་པ་པཎྜི་ཏ་ཤཱ་རི་པུ་ཏྲ་ལ་གནང༌། དེས་མི་ཉག་གྲགས་རིན་དང་ཀུ་ཅོར་རྟོགས་ལྡན་ལས་བརྒྱུད་པ་དང༌། རྡོ་རྗེ་ཕྲེང་བའི་དབང་བསྐུར་བརྒྱ་རྩ་པཎ་ཆེན་དོན་ཡོད་རྡོ་རྗེ་ལས་བརྒྱུད་པ་སོགས་བྱུང༌། ཡང་སྤྲུལ་སྐུ་ལ་སྟོད་དམར་པོ་ལ་རྡོ་རྗེ་གདན་པ་ཆེ་བས་གནང་བའི་ཐུགས་རྗེ་ཆེན་པོའི་ཆོས་སྐོར་དང་བསིལ་བ་ཚལ་དུ་མཁའ་འགྲོ་སྡེ་ལྔས་གནང་བའི་གདམས་ངག་གི་སྐོར་རྣམས་དང༌། གཙང་ཁ་རག་སྒོམ་ཆུང་བློ་གྲོས་དབང་ཕྱུག་ལ་ཨ་རོ་ནས་བརྒྱུད་པའི་སེམས་ཕྱོགས་དང༌། ཇོ་བོ་ནས་བརྒྱུད་པའི་བློ་སྦྱོང་གི་བཀའ་བབས། གདམས་པ་དེ་གཉིས་བསྲེས་པ་ལ་བྱང་ཆུབ་སེམས་སྦྱོང་ཞེས་བྱ་བའི་གཞུང་མཛད། ཕྱིས་ཁ་རག་སྐོར་གསུམ་དུ་གྲགས་ཏེ་ལྷོ་པ་དྷརྨ་སྐྱབས། བྱང་སྒོམ་མཆེད་གསུམ་སོགས་ནས་རྒྱ་ཆེར་འཕེལ། སོགས་ཁོངས་ནས་སྤྱན་རས་གཟིགས་ཀྱི་དམར་ཁྲིད་རིགས་བཞི། དུས་ཞབས་ཆེ་ཆུང་ནས་བལ་པོ་ཀཱ་ཡ་ཤྲཱི་སོགས་ལ་བརྒྱུད་པའི་ནམ་མཁའ་སྐོར་གསུམ། ཕྱག་རྒྱ་ཆེན་པོ་ཐིག་ལེའི་སྐོར། མན་ལུང་པའི་སྒོམ་རིམ་གཅིག་ཤེས་ཀུན་གྲོལ་སོགས་གདམས་ངག་གི་རིགས་དང༌། ཨ་བྷ་ཡའི་རྡོ་རྗེ་ཕྲེང་བ་དང་སྒྲུབ་ཐབས་བརྒྱ་རྒྱམ། དར་པཎ་ཨཱ་ཨ་ཅར་ཡའི་བྱ་བ་བཏུས་པ་སོགས་དབང་དང་སྒྲུབ་ཐབས་ཀྱི་རིགས་ཚད་དང་ལྡན་ཅིང་སྒྲུབ་བརྒྱུད་ཀྱི་བཀའ་སྲོལ་ཟུང་བ་མེད་པའི་ཕྲན་ཚེགས་ཀྱི་བྱུང་བ་ནི་མཐའ་ཡས་སོ། ། སྒྲུབ་བརྒྱུད་ཤིང་རྟ་རྣམས་ཀྱི་བྱུང་བ་བརྗོད་པའི་སྐབས་སོ། ། སྒྲུབ་བརྒྱུད་ཤིང་རྟ་རྣམས་ཀྱི་བྱུང་བ་བརྗོད་པ་སྐབས་(༡༩༨བ)གསུམ་པའི་འགྲེལ་པའོ།། །། བཞི་པ། རིག་གནས་ཞར་བྱུང་དང་བཅས་པའི་བྱུང་བ་བརྗོད་པའི་སྐབས། ང༤ སྐབས་བཞི་པ་རིག་གནས་ཞར་བྱུང་དང་བཅས་པའི་བྱུང་བ་བརྗོད་པ་ལ་གཉིས། ཅ༡ རིག་པའི་གནས་དངོས། ཅ༢ ཞར་བྱུང་ཡུལ་ཆེན་གཞན་དུ་བསྟན་པ་བྱུང་བའི་ཚུལ་ལོ། ། ཅ༡ དང་པོ་ལ་གསུམ། ཆ༡ རིག་གནས་ཆེ་བ། ཆ༢ ཆུང་བ། ཆ༣ འཕྲོས་དོན་སྨོས་པའོ། ། ཆ༡ དང་པོ་ལ་བཞི། ཇ༡ སྒྲ། ཇ༢ ཚད་མ། ཇ༣ བཟོ། ཇ༤ གསོ་བ་རིག་པའི་བྱུང་ཚུལ་བཤད་པའོ། ། ཇ༡ དང་པོ་ལ་གཉིས། ཉ༡ ལྷ་ཡུལ་དུ་བྱུང་ཚུལ་དང༌། ཉ༢ མི་ཡུལ་དུ་དར་ཚུལ་ལོ། ། ཉ༡ དང་པོ་ནི། རིག་པའི་གནས་ཀྱི་ཐོག་མ་སྒྲ་རིག་གི། ། བསྟན་བཅོས་དབང་པོས་བྱས་པ་ཕུར་བུས་བསླབས། ། མཁས་པའི་ང་རྒྱལ་གཅག་ཕྱིར་དུས་གཉན་སྲུང༌། ། ཕྱི་ནང་གྲུབ་མཐའ་ཐུན་མོང་བ་ཀུན་གྱིས་བསླབ་ཅིང་ཤེས་པར་བྱ་བ་རིག་པའི་གནས་སུ་གྲགས་པ་ལ་ཆེ་ཆུང་གཉིས་སུ་ཡོད་ཅིང༌། སྔ་མ་ལ་ནང་པའི་དབང་དུ་བྱས་ནས་རིག་པའི་གནས་ཆེན་པོ་ལྔར་གྲགས་པའི། ཐོག་མར་སྒྲ་རིག་པ་ནི། སུམ་ཅུ་རྩ་གསུམ་དུ་སརྦ་ཛྙཱ་དེ་བ་ཞེས་བྱ་བ་ཞིག་བྱུང་བས་བརྡ་སྤྲོད་པའི་བསྟན་བཅོས་ཆེན་པོ་ཐོག་མར་བྱས། དེ་ལ་དབང་པོས་བསླབས་ཏེ། དེས་ཀྱང་བསྟན་བཅོས་ཨིནྡྲ་བྱཱ་ཀ་ར་ཎ་བྱས་པར་གྲགས། དེ་ལ་དྲང་སྲོང་ཕུར་བུས་བསླབས་པས་མཁས་པར་གྱུར་ནས་ལྷ་རྣམས་ཀྱི་སློབ་དཔོན་དུ་གྱུར། ལྷའི་བླ་མ་ཞེས་བཀུར་བས་དེ་ང་རྒྱལ་ཆེར་སྐྱེས་པ་ན། དབང་པོས། སྒྲ་ཡི་རིག་པ་མཐའ་ཡས་ཏེ། ། ཡོངས་སུ་རྫོགས་པ་རྒྱ་མཚོ་ཙམ། ། ང་ཡིས་ཤེས་པ་བུམ་པ་གང༌། ། ཁྱོད་ཀྱིས་ཤེས་པ་ཆུ་ཐིག་ཙམ། ། ཞེས་ང་རྒྱལ་གཅགས་པས་དེ་ཡིད་ཞུམ་སྟེ་ཕྱིན་ཆད་སྒྲ་མི་སྨྲ་བར་དམ་བཅས་པ་ན། དབང་པོས་འོན་ཀྱང་རང་གིས་ཇི་ལྟར་ཤེས་པ་སྟོན་ཅིག་པར་བསྒོས་པས་དམ་བཅས་པའི་ཕྱིར་དུས་གཉན་བཞིར་མི་སྨྲ་བར་སྲུང་ཞིང་གཞན་རྣམས་ལ་འཆད་པར་བོད་ཀྱི་ལོ་རྒྱུས་རྙིང་པ་ལས་འབྱུང་ཞིང༌། དུས་གཉན་བཞིའང་འཕགས་ཡུལ་པ་རྣམས་ཀྱིས་སྒྲར་མ་ཟད་ཀློག་པ་སྤྱིའི་དུས་གཉན་དུ་བྱེད་དེ། གསར་འགྱུར་མྱུར་རྟོགས་ལས། (༡༩༩ན) བརྒྱད་པ་ལ་ནི་མཁན་པོ་འཇོམས། ། བཅུ་བཞི་པ་ལ་སློབ་མ་འཇོམས། ། གནམ་སྟོང་ལ་ནི་གཉིས་ཀ་འཇོམས། ། བཅོ་ལྔ་ལ་ནི་ཐམས་ཅད་འཇོམས། ། དཔེར་ན་གཡུལ་ངོར་བརྟན་པའི་དཔུང༌། ། གངྒཱ་སྐྱེས་ཀྱིས་མདའ་ཡིས་བསྣུན། ། ཚེས་གཅིག་ཀློག་པའི་ཚུལ་ཅན་གྱི། ། རིག་པ་ཉིད་ནི་ཆུང་ངུར་འགྱུར། ། ཞེས་དུས་གཉན་ལྔར་ཡང་བཤད་དོ། ། ཉ༢ གཉིས་པ་[མི་ཡུལ་དུ་དར་ཚུལ་]ལ་བཞི། ཏ༡ པཱ་ཎི་པ། ཏ༢ ཙནྡྲ་པ། ཏ༣ ཀ་ལཱ་པ། ཏ༤ དབྱངས་ཅན་བརྡ་སྤྲོད་ཞར་བྱུང་བཅས་སྨོས་པའོ། ། ཏ༡ དང་པོ་ནི། སྒྲ་བྱེད་ལུང་བསྟན་བྲམ་ཟེ་པཱ་ཎི་ནིར། ། འཇིག་རྟེན་དབང་པོས་བྱིན་རླབས་ཕྱི་མོའི་གཞུང༌། ། ལྷག་མ་ཅན་དང་མཆོག་སྲེད་དག་གིས་བཀྲལ། ། བྷཱ་ཥ་རྩ་འགྲེལ་རབ་བྱེད་ཟླ་བའི་ཟེར། ། གཟུགས་ཀྱི་འཇུག་པ་ཤཱ་ཀ་ཊཱ་ཡ་ན། ། ག་ཏིའི་བུ་ཡིས་བྱས་སོགས་དེ་རྗེས་འབྲངས། ། ལངྐར་གཤེགས་པའི་མདོ་ལས། སྒྲ་བྱེད་པ་ནི་པཱ་ཎི་ནཱིའོ། ། ཞེས་དང༌། འཇམ་དཔལ་རྩ་རྒྱུད་ལས་ཀྱང་རྒྱལ་བ་ཉིད་ཀྱིས་ལུང་བསྟན་པའི་བྲམ་ཟེ་པཱ་ཎི་ནཱི་ཞེས་བྱ་བ་འཕགས་ཡུལ་ནུབ་ཕྱོགས་བྷི་རུ་ཀའི་ཚལ་དུ་སྐྱེས་ཏེ། སྒྲ་རིག་པ་ཤེས་སམ་མི་ཤེས་ལག་རིས་མཁན་ལ་བསྟན་པ་ན་མི་ཤེས་པར་ལུང་བསྟན་པས། རང་ཉིད་ཀྱིས་གྲིའུ་ཆུང་གིས་ལག་རིས་བཅོས་ནས་ས་སྟེང་གི་བརྡ་སྤྲོད་པའི་སློབ་དཔོན་མཐའ་དག་བསྟེན། སྒྲ་ལེགས་པར་ཤེས་ཀྱང་ད་དུང་མ་ཚིམ་པར། འཇིག་རྟེན་དབང་ཕྱུག་གི་རིག་སྔགས་བསྒྲུབས་པས་འཕགས་པ་ཞལ་གཟིགས་ཏེ། ཅི་འདོད་གསུངས་པ་ལ་སྒྲ་ཤེས་པར་འཚལ་ཞུས་པས། ཨ་ཨི་ཨུཎ་སོགས་ཡི་གེའི་བསྡུ་བ་གསུངས་པ་ཙམ་གྱིས་འཕགས་པའི་བྱིན་རླབས་ཀྱིས་འཇིག་རྟེན་གསུམ་གྱི་སྒྲའི་གནས་ཐམས་ཅད་ཤེས་ནས། པཱཎི་བྱཱ་ཀ་ར་ཎ་ཤློ་ཀ་སྟོང་དང༌། བྱེ་བྲག་འབྱེད་པའི་མདོ་ཤློཀ་སྟོང་ཡོད་པ་མཛད། (༡༩༩བ) དེ་ཡན་ཆད་དུ་ཕྱི་རོལ་པ་རྣམས་ལ་ཤཱ་རིའི་བུས་དབང་པོའི་བརྡ་སྤྲོད་ལོ་བཅུ་གཉིས་སུ་བཀླགས་པར་བཤད་པ་ལྟ་བུའི་གཞུང་ཅི་རིགས་པ་ལས། ནང་པ་རྣམས་ལ་སྒྲའི་སྦྱོར་བ་མཐའ་དག་ཕྱོགས་གཅིག་ཏུ་བྱས་པའི་བསྟན་བཅོས་མེད་པས། གཞུང་དེ་གཉིས་ནི་སྒྲ་གཞུང་ཐམས་ཅད་ཀྱི་རྩ་བའམ་ཕྱི་མོ་ལྟ་བུ་ཡིན་ཅིང༌། རྒྱལ་པོ་བདེ་བྱེད་ཀྱིས་སྒྲ་བསླབ་པའི་ཕྱིར་བྲམ་ཟེ་མཆོག་སྲེད་ཀྱིས་ཀླུའི་རྒྱལ་པོ་ལྷག་མ་ཅན་རིག་སྔགས་ཀྱི་མཐུས་བཀུག་ནས་པཱ་ཎི་པའི་འགྲེལ་པ་ཤློ་ཀ་འབུམ་གྱིས་འཆད་པར་བྱས་ཏེ། སློབ་དཔོན་དང་ཀླུའི་བར་དུ་ཡོལ་བས་བཅད་ཀླུས་བཤད་ཅིང༌། མཆོག་སྲེད་ཀྱིས་ཡི་གེར་འབྲི་བ་ལས། སྐབས་ཤིག་ན་འདིའི་ལུས་ཅི་འདྲ་ཡོད་སྙམ་ནས་ཡོལ་བ་བཏེགས་པས་སྦྲུལ་ཆེན་པོ་བསྒྱིངས་པ་མཐོང༌། ཀླུའང་ངོ་ཚ་ནས་བྲོས། དེར་འགྲེལ་པ་ཤློ་ཀ་སྟོང་ཕྲག་ཉེར་ལྔ་ལས་མ་ཟིན་པས་ལྷག་མ་མཆོག་སྲེད་ཉིད་ཀྱིས་སྟོང་ཕྲག་བཅུ་གཉིས་ཀྱི་ཚད་དུ་