Tibetan
བརྩམས་པ་དེ་ལ་མ་ཧཱ་བྷཱ་ཥ་ཞེས་གྲགས་ཏེ། དེ་དག་གཞུང་འགྲེལ་པ་དང་བཅས་པ་ད་ལྟའི་བར་དུ་འཕགས་ཡུལ་ན་འཆད་ཉན་མ་ནུབ་པར་ཡོད། ཡང་སྐྱེས་བུ་མཆོག་གིས་བྱས་པའི་བྷཱ་ཥ་ཞེས་པ་རྩ་བ་ཤློ་ཀ་དགུ་བརྒྱའི་ཚད་ཙམ་རང་འགྲེལ་དང་བཅས་པ། རཱ་མ་ཙནྡྲས་བྱས་པའི་རབ་བྱེད་ཟླ་ཟེར། དཔལ་ཆོས་ཀྱི་གྲགས་པས་མཛད་པའི་པཱ་ཎི་པའི་དོན་འགྲེལ་གཟུགས་ཀྱི་འཇུག་པ། པཱ་ཎི་པའི་ཆར་གཏོགས་པའི་གཞུང་ཤཱ་ཀ་ཊཱ་ཡ་ན་དང་ཀ་ཏིའི་བུས་བྱས་པ་སོགས་སློབ་དཔོན་དེའི་རྗེས་སུ་འབྲངས་ཞིང་། པཱ་ཎི་ནཱིའི་གཞུང་རྩ་བ་ཙམ་ཕྱིས་སུ་འདར་པ་ལོ་ཙཱས་བསྒྱུར་བར་བསྒྲགས་མོད། ཇི་བཞིན་མ་འགྱུར་རོ། ། ཏ༢ གཉིས་པ་[ཙནྡྲ་པ་]ནི། ལེགས་བསྡུས་ཉུང་གསལ་ཀུན་རྫོགས་ཙནྡྲའི་མདོ། ། འགྲེལ་དང་ཡན་ལག་རང་གཞན་གཞུང་མང་ལས། ། རྩ་བ་ཐོག་མར་ཤོང་ལོས་བསྒྱུར་ཏེ་འཆད། ། དུས་ཀྱི་འཁོར་ལོའི་རྒྱུད་ཕྱི་མ་ནས་ལུང་བསྟན་ཅིང་། རྒྱ་གར་ཤར་ཕྱོགས་བ་རེནྡྲ་ཞེས་པར་སྐུ་འཁྲུངས་པའི་སློབ་དཔོན་ཙནྡྲ་གོ་མཱི་ཞེས་བྱ་བ་སྒྲ་དང་རྟོག་གེ་ལ་སོགས་པ་ཐུན་མོང་གི་རིག་གནས་ཐམས་ཅད་མ་བསླབས་པར་མཁྱེན་པས་ལོ་བདུན་གྱི་སྟེང་ནས་མུ་སྟེགས་ཀྱི་རྒོལ་བ་ཚར་གཅོད་ནུས་པ་དེས། (༢༠༠ན)སློབ་དཔོན་མྱ་ངན་མེད་པ་ལས་ལུང་མནོས་ཏེ། སྤྱན་རས་གཟིགས་དང་སྒྲོལ་མའི་རིགས་སྔགས་བསྒྲུབས་པས་གྲུབ་ཅིང་མཁས་པ་ཆེན་པོར་གྱུར། འཕགས་པ་སྤྱན་རས་གཟིགས་ཀྱིས་བསྐུལ་ནས་གོ་མཱི་དགེ་བསྙེན་གྱི་བརྟུལ་ཞུགས་མཛད། ངོ་མཚར་བའི་རྣམ་ཐར་བསམ་གྱིས་མི་ཁྱབ་པ་དང་ལྡན་ཅིང་ད་ལྟའང་པོ་ཊ་ལ་ན་སྐུ་དངོས་སུ་བཞུགས་པ་དེས་བསྟོད་པ། ནང་རིག་པའི་བསྟན་བཅོས། ཕྱི་རོལ་གྱི་བསྟན་བཅོས། བཟོ་གནས་ཀྱི་བསྟན་བཅོས་རྣམས་བརྒྱ་རྩ་བརྒྱད་རེ། བསྟན་བཅོས་ཐོར་བུ་པ་སྣ་ཚོགས་བཞི་བརྒྱ་དང་སུམ་ཅུ་རྩ་གཉིས་མཛད། ལྷོ་ཕྱོགས་ཀྱི་རྒྱུད་དུ་ལྷག་མ་ཅན་གྱིས་བྱས་པའི་འགྲེལ་པ་མ་ཧཱ་བྷཱ་ཥ་གཟིགས་པས། འགྲེལ་པ་ཞེས་བྱ་བ་ཚིག་ཉུང་བ། དོན་མང་བ། མ་ཟློས་པ། ཚང་བ་ཞིག་དགོས་པ་ལ། ཀླུ་ནི་རྨོངས་པ་ཤས་ཆེ་བས། ཚིག་མང་བ། དོན་ཉུང་བ། ཟློས་པ། མ་ཚང་བའོ། །ཞེས་སྨད་ནས། པཱ་ཎི་པའི་དོན་འགྲེལ་ལེགས་བསྡུས་ཀྱི་ཚུལ་དུ་ཉུང་ངུ་རྣམ་གསལ་ཡང་དག་པར་ཀུན་རྫོགས་པའི་མཚན་ཉིད་ཅན་ཙཱནྡྲ་བྱཱ་ཀ་ར་ཎ། ཞེས་པ་ཤློཀ་བདུན་བརྒྱ། ལེའུ་ཉི་ཤུ་རྩ་བཞིའི་བདག་ཉིད་ཅན་དང༌། དེའི་ཡན་ལག་ཏུ་ཡི་གེའི་མདོ་ལ་སོགས་པ་མཛད་པ་ལས། ནཱ་ལནྡར་ཟླ་གྲགས་ཀྱིས་མཛད་པའི་ཀུན་བཟང་སྒྲ་མདོ་གཟིགས་པས་དེ་ནི་ཚིག་གི་སྦྱོར་བ་ཤིན་ཏུ་ལེགས་ཤིང༌། རང་གི་དེ་དེ་ཙམ་དུ་མི་ལེགས་པར་མཁྱེན་ཏེ་འགྲོ་དོན་མི་འབྱུང་བར་དགོངས་ནས་ཙཱནྡྲའི་གླེགས་བམ་ཁྲོན་པར་བསྐྱུར་བ་ན། རྗེ་བཙུན་མ་སྒྲོལ་མས། ཁྱོད་ཀྱི་གཞན་ཕན་གྱི་བསམ་པ་བཟང་པོས་བྱས་པས་མ་འོངས་པ་ན་སེམས་ཅན་ལ་ཤིན་ཏུ་ཕན་པར་འགྱུར་ལ། ཟླ་གྲགས་ཀྱིས་ནི་མཁས་པའི་ང་རྒྱལ་གྱིས་བརྩམས་པས་གཞན་ལ་ཕན་ཐོགས་ཆུང་ངུར་འགྱུར་རོ། །དེའི་ཕྱིར་གླེགས་བམ་ཁྲོན་པ་ནས་ཕྱུངས་ཤིག །ཅེས་ལུང་བསྟན་པ་ལྟར་བླངས་པས། ཁྲོན་པ་དེའི་ཆུ་འཐུངས་པ་ཙམ་གྱིས་ཤེས་རབ་ཆེན་པོར་འགྱུར་བ་བྱུང་(༢༠༠བ)ཞེས་གྲགས་པའི་གཞུང་ཁྱད་པར་འཕགས་པ་དེ་ལ། རང་གི་ཞང་པོ་དྷརྨ་དཱ་པས་འགྲེལ་པ་མཛད། དེ་ལ་རཏྣ་མ་ཏིས་འགྲེལ་བཤད། དེའིའང་འགྲེལ་བཤད་ཀྱི་བཤད་པ་པཱུརྞ་ཙནྡྲས་མཛད་པ་རྣམས་དང༌། ཡན་ལག་གཞན་ཡང་ཨུཎྜ་སོགས་ཀྱི་མདོ་རང་འགྲེལ་དང་བཅས་པ། བྱིངས་མདོ་སོགས་སློབ་དཔོན་ཉིད་ཀྱིས་མཛད་པའི་རང་གཞུང་དང་གཞན་གྱིས་སྦྱར་བ་མང་དུ་ཡོད་པ་ལས། གཞུང་རྩ་བ་ཤོང་ལོ་རྡོ་རྗེ་རྒྱལ་མཚན་གྱིས་བསྒྱུར་བ་ཚུན་ཆད་བོད་ཡུལ་དུའང་འཆད་ཉན་མ་ཆད་པར་བྱུང་ལ། བོད་འགྲེལ་ཡང་ལོ་ཆེན་ཐུགས་རྗེ་དཔལ་དང་ཞ་ལུ་ཆོས་སྐྱོང་བཟང་པོས་མཛད་པ་སོགས་འགའ་ཞིག་མཆིས་པ་ལས་ཕྱིས་ཀུན་མཁྱེན་དྷརྨ་ཀ་རས་མཛད་པའི་འགྲེལ་ཆེན་ཉིད་རྒྱ་གཞུང་དང་ཁྱད་པར་མེད་པ་ནོར་འཁྲུལ་དང་བྲལ་བའི་ལེགས་བཤད་ཀྱི་གཏེར་ཆེན་པོའོ། ། ཏ༣ གསུམ་པ་[ཀ་ལཱ་པ་]ནི། ལྷ་ཡི་དབང་པོས་ཨིནྡྲ་དྷྲུ་བ་ལ། ། བཤད་པའི་བརྡ་སྤྲོད་ཤེས་ཕྱིར་བདེ་སྤྱོད་ཀྱི། ། བཀའ་ལྟར་སཔྟ་ཝརྨས་གདོང་དྲུག་བསྒྲུབས། ། ཀ་ལཱ་པ་བསྟན་ཤོང་དཔང་དྲིན་ལས་བྱུང༌། ། གཞན་ཡང་། རྒྱལ་པོ་ཙནྡན་སྐྱོང་གི་དུས་སུ་ལྷའི་དབང་པོས་བྲམ་ཟེ་ཨིནྡྲ་དྷྲུ་བ་ལ་སྒྲའི་ངེས་གནས་བཤད་པའི་ཨིནྡྲ་བྱཱ་ཀ་ར་ཎ་སྟེ། དབང་པོའི་བརྡ་སྤྲོད་པ་ཞེས་ཤློ་ཀ་ཉི་ཁྲི་ལྔ་སྟོང་པའི་ཚད་ཅན་ཞིག་བྱུང༌། མི་རིང་བར་བརྡ་སྤྲོད་དེ་ཤེས་པའི་ཕྱིར་དུ་རྒྱལ་པོ་བདེ་སྤྱོད་ཀྱི་བཀའ་ལྟར་བྲམ་ཟེ་སཔྟ་ཝརྨས་གཞོན་ནུ་གདོང་དྲུག་བསྒྲུབས་ནས་གྲུབ་པའི་ཚེ་ཁྱོད་ཅི་འདོད་ཟེར་བ་ལ། ཨིནྡྲ་བྱཱ་ཀ་ར་ཎ་ཤེས་པར་འཚལ་བྱས་པས། སིདྡྷོ་ཝརྞ་ས་མ་ནཱཡཿཞེས་གསུངས་པ་ཙམ་གྱིས་སྒྲའི་དོན་མཐའ་དག་ཤེས་པར་གྱུར་ནས། དེ་ཉིད་ཀྱིས་ཀ་ལཱ་པ་བྱཱ་ཀ་ར་ཎ་བརྩམས། དེ་ནི་ཨིནྡྲ་བྱཱ་ཀ་ར་ཎའི་ལུགས་ཡིན་ཞིང་ཕྱི་ནང་གི་འགྲེལ་བྱེད་ཀྱང་མང་དུ་བྱུང༌། བོད་ཡུལ་དུའང་འདི་ཉིད་ལ་སློབ་པ་མང་བས་གཞུང་ཐོག་མར་ཤོང་ལོས་བསྒྱུར། དེ་ནས་དཔང་ལོ་སོགས་ཀྱིས་འགྲེལ་པ་དུར་སིང་སི་སོགས་དང་ཏི་སོགས་ཀྱི་བྱ་བ་ལ་སོགས་པ་རིམ་(༢༠༡ན)པར་བསྒྱུར་ཅིང་བོད་འགྲེལ་ཡང་བཟང་ངན་དུ་མ་བྱུང་ངོ༌། ། ཏ༤ བཞི་པ་[དབྱངས་ཅན་བརྡ་སྤྲོད་ཞར་བྱུང་བཅས་སྨོས་པ་]ནི། དབྱངས་ཅན་འཕགས་མས་ཨ་ནུ་བྷཱུ་ཏི་ལ། ། སྩལ་བའི་བརྡ་སྤྲོད་ཇོ་ནང་རྗེ་བཙུན་དང༌། ། ཆོས་ཀྱི་སྣང་བས་རྩ་འགྲེལ་བསྒྱུར་ཅིང་བཤད། ། ཡང་མཁས་པ་སྒོ་དྲུག་ཙམ་གྱི་དུས་སུ་ལྷོ་ཕྱོགས་མ་ཧཱ་རཥྚཱར་བྱུང་བའི་བྲམ་ཟེའི་རིགས་ཀྱི་སློབ་དཔོན་ཨ་ནུ་བྷུ་ཏི་ལ་འཕགས་མ་དབྱངས་ཅན་མས་དངོས་སུ་སྩལ་བའི། ས་ར་སྭ་ཏཱི་བྱཱ་ཀ་ཎ་ཞེས་པའང་འཕགས་ཡུལ་དུ་དར་ཆེ་ཞིང༌། བོད་ཡུལ་དུ་ཇོ་ནང་རྗེ་བཙུན་སྒྲོལ་བའི་མགོན་པོས་པཎྜི་ཏ་ཀྲྀཥྞ་དང་པ་ལ་བྷ་དྲ་ལ་བརྟེན་ནས་གཞུང་འགྲེལ་ཐོག་མར་བསྒྱུར། འགྲེལ་པའང་མཛད། འདར་ལོས་ཀྱང་གཞུང་ལ་འགྱུར་བཅོས་དང༌། འགྲེལ་པ་གཞི་འགྱུར་གྱི་རྩིས་སུ་བྱས་ཀྱང་གཞུང་གི་འགྱུར་ལ་སྐབས་ཁ་ཅིག་ཏུ་ལེགས་པར་སོང་སྲིད། འགྲེལ་པར་ནི་རྒྱ་དཔེ་དང་བོད་དཔེ་གཉིས་བསྡུར་བའི་ཚེ་མི་འགྲིགས་པ་ཤས་ཆེ་བས་བརྩམས་པ་ལས་བསྒྱུར་བའི་ཐ་སྙད་རང་མེད་འདྲ་ནའང༌། དེ་ལ་བརྟེན་པའི་འཆད་ཉན་གྱི་རྒྱུན་དར་བ་བྱུང་ཞིང༌། ཀུན་མཁྱེན་ཆོས་ཀྱི་སྣང་བས་བལ་ཡུལ་དུ་བྲམ་ཟེ་བིཥྞུ་པ་ཏི་ལ་འདྲི་མོལ་མཛད་ཅིང་དཀའ་བའི་གནས་ལེགས་པར་མཁྱེན་པས། སློབ་དཔོན་གྱི་རང་འགྲེལ་རབ་བྱེད་གསལ་ལྡན་གཞི་འགྱུར་མཛད་ཅིང་འཕགས་ཡུལ་དུ་འགྲེལ་ཆེན་པུཉྫ་རཱ་ཛ་སོགས་ཕྱི་ནང་གི་པཎྜི་ཏ་རྣམས་ཀྱིས་བརྩམས་པའི་འགྲེལ་པ་མང་དུ་ཡོད་པར་སྣང་ངོ༌།། འཇམ་དཔལ་བརྡ་སྤྲོད་ཞྭ་ལུ་ལོ་ཙཱས་བསྒྱུར། ། འཇམ་དཔལ་གྲགས་པས་མཛད་པར་གྲགས་པའི་བརྡ་སྤྲོད་པའི་གཞུང་དང༌། སྐབས་ལྔ་པའི་རྐང་པ་གཉིས་པའི་འགྲེལ་པ་ཙམ་ཞྭ་ལུ་ལོ་ཙཱ་བ་ཆོས་སྐྱོང་བཟང་པོས་བསྒྱུར་ཡང་འཆད་ཉན་གྱི་རྒྱུན་ནི་མ་བྱུང་ངོ༌། ། རྒྱ་བོད་སྒྲ་འགྲེལ་བཟང་ངན་མཐའ་ཡས་སོ། ། བོད་དུ་འགྱུར་བའི་བརྡ་སྤྲོད་པའི་བསྟན་བཅོས་ཀྱི་གཞུང་ཆེན་པོ་བཞི་པོ་དེ་དག་ལ་རྒྱ་གར་དང་བོད་ཀྱི་མཁས་པས་བརྩམས་པའི་(༢༠༡བ)དཀའ་འགྲེལ། འགྲེལ་བཤད། རྒྱས་འགྲེལ། ཡན་ལག་ཏུ་ཨུཎ་སོགས་དང༌། ཏིད྄་སུ་པྲ་དང༌། ཚིག་སྡུད་དང༌། རྟགས་བསྡུ། བྱིངས་འགྲེལ་སོགས་བསྟན་བཅོས་ཚད་མར་གྱུར་པའི་བཟང་པོ་དང༌། བློ་གྲོས་རྨོངས་པ་དང་མང་དུ་མ་ཐོས་པས་བྱས་པའི་ངན་པ་མཐའ་ཡས་པ་བྱུང་ངོ༌། ། ཇ༢ གཉིས་པ་ཚད་མ་རིག་པའི་བྱུང་བ་འཆད་པ་ལ་གཉིས། ཉ༡ ཕྱི་པ་དང༌། ཉ༢ ནང་པའོ། ། ཉ༡ དང་པོ་ནི། ཕྱི་པའི་རྟོག་གེ་སྔ་ཡང་སྐྱོན་བཅས་ཉིད། ། ཕྱི་རོལ་པའི་སྟོན་པ་དྲང་སྲོང་གླིང་སྐྱེས་ཀྱིས་བྱས་པའི་རྟོག་གེའི་བསྟན་བཅོས་དང༌། བྲམ་ཟེ་རྐང་མིག་གིས་བྱས་པའི་རྟོག་གེའི་ཚིག་དོན་བརྒྱད་སྟོན་པའི་བསྟན་བཅོས་ལྟ་བུ་མང་དུ་བྱུང་ཞིང་ནང་པའི་གཞུང་ལས་འབྱུང་བ་སྔ་ཡང་རྩོད་པ་ལྷུར་ལེན་པའི་བསྟན་བཅོས་ལྟར་སྣང་བ་སྐྱོན་དང་བཅས་པ་ཉིད་ཡིན་པས། འདིར་མི་བཟུང་ངོ༌། ། དེས་ན་ཚད་མ་ལ་ཐུན་མོང་གི་རིག་པར་གྲགས་པའང་རྩོད་ངག་ཙམ་ལ་དགོངས་ཀྱི། དོན་གྱི་ཁས་ལེན་མི་མཚུངས་པས་ཁྱད་པར་ཆེའོ། ། ཉ༢ གཉིས་པ་[ནང་པ་]ལ་གསུམ། ཏ༡ འཕགས་ཡུལ་དུ་བྱུང་ཚུལ། ཏ༢ བོད་དུ་བྱུང་ཚུལ། ཏ༣ ཞར་བྱུང་གྲུབ་མཐའ་གང་དང་མཚུངས་པར་བཤད་པའོ། ། ཏ༡ དང་པོ་ནི། ནང་པའི་ཚད་གཞུང་ཐོག་མར་རྩོད་གྲུབ་སྟེ། ། རྒྱལ་བའི་གསུང་རབ་ལས་མངོན་སུམ་ཚད་མ་གསལ་བར་བསྟན་ཅིང་། རྗེས་དཔག་ཚད་མའང་མ་བཀག་པ་དང་གཏན་ཚིགས་རྣམས་ཀྱིས་ཤུགས་ལས་ཤེས་པ་དང༌། དགོངས་པ་ངེས་འགྲེལ་ལས། ཆོས་ཉིད་ལྟོས་དང་བྱ་བ་བྱེད། ། འཐད་པར་སྒྲུབ་པའི་རིགས་པ་བཞི། ། ཞེས་རིགས་པའི་རྣམ་བཞག་བཞི་གསུངས་ལ། སྔོན་ཚེ་ལོ་ཉི་ཁྲི་པར་སངས་རྒྱས་འོད་སྲུངས་ཀྱི་བསྟན་པ་ལའང་བྱུང་བར་བཤད། སྟོན་པ་འདིའི་བསྟན་པ་ལ་ནང་པའི་ཚད་གཞུང་རྣམས་ཀྱི་ཐོག་མ་ནི་རྩོད་པ་གྲུབ་པ་སྟེ། དེ་མཛད་པ་པོ་ཁ་ཅིག་གིས་སློབ་དཔོན་དབྱིག་གཉེན་གྱིས་མཛད་ཟེར་ཡང༌། ཚད་མ་ཀུན་བཏུས་ཀྱི་རང་འགྲེལ་དུ་དགག་པ་རྒྱ་ཆེར་མཛད་པས་གཅུང་དབྱིག་གཉེན་གྱིས་མ་མཛད་པར་གསལ་ཞིང༌། བཙུན་པ་(༢༠༢ན)དབྱིག་བཤེས་སོགས་དབྱིག་གཉེན་དང་མཚན་གཅིག་པ་ཞིག་གིས་མཛད་པར་བོད་སྔ་མ་རྣམས་བཞེད་དོ། ། ཕྱོགས་ཀྱི་གླང་པོས་མངོན་སུམ་རྗེས་དཔག་གཉིས། ། གཞན་སེལ་དཔེ་དང་ལྟག་ཆོད་དྲུག་ལྡན་མདོ། ། ཀུན་ལས་བཏུས་མཛད། སློབ་དཔོན་ཆེན་པོ་ཕྱོགས་ཀྱི་གླང་པོས་དམིགས་པ་བརྟག་པ་དང༌། སེལ་བ་བརྟག་པ་སོགས་ཚད་མའི་བསྟན་བཅོས་ཐོར་བུ་བརྒྱ་རྩ་བརྒྱད་མཛད་པ་དེ་དག་ལུས་ཡོངས་སུ་མ་རྫོགས་པར་གཟིགས་ནས་ཕྱིས་ཕྱོགས་གཅིག་ཏུ་བསྡུས་ཏེ་མངོན་སུམ་རྗེས་དཔག་གཉིས། གཞན་སེལ་དང༌། དཔེ་དང༌། ལྟག་ཆོད་ཀྱི་རིག་པ་སྟོན་པ་ལེའུ་དྲུག་ལྡན་ཚད་མའི་མདོ་ཀུན་ལས་བཏུས་པ་ཞེས་བྱ་བ་མཛད་ཅིང་སློབ་དཔོན་དབང་ཕྱུག་སྡེ་སོགས་ཀྱིས་བཤད་དོ། ། དེ་ཡི་དགོངས་འགྲེལ་དུ། ། ཆོས་ཀྱི་གྲགས་པས་རྩ་བ་རྒྱས་འབྲིང་བསྡུས། ། ཡན་ལག་བཞི་བཅས་སྡེ་བདུན་ལམ་སྲོལ་ཕྱེས། ། གཞུང་དེའི་དགོངས་འགྲེལ་དུ་སྨྲ་བའི་ཉི་མ་ཆོས་ཀྱི་གྲགས་པས་རྩ་བ་ལུས་ལྟ་བུའི་བསྟན་བཅོས་རྒྱས་པ་རྣམ་འགྲེལ། འབྲིང་པོ་རྣམ་ངེས། བསྡུས་པ་རིགས་པའི་ཐིགས་པ་གསུམ། འཕྲོས་པ་ཡན་ལག་ལྟ་བུའི་བསྟན་བཅོས་འབྲེལ་པ་བརྟག་པ། གཏན་ཚིག་ཐིགས་པ། རྩོད་པའི་རིག་པ། རྒྱུད་གཞན་གྲུབ་པ་བཞི་སྟེ་ཚད་མ་སྡེ་བདུན་དུ་གྲགས་པའི་ལམ་སྲོལ་ཆེན་པོ་ཕྱེས་སོ། ། ལྷ་ཤཱཀ་དུལ་རྒྱན་བདེ་བྱེད་སོགས་ཀྱིས་བཀྲལ། ། རྒྱལ་ཅན་ཡ་མཱ་ཉི་སྦས་རྒྱན་རྗེས་འབྲངས། ། སློབ་མའི་གཙོ་བོ་ལྷ་དབང་བློ་ལ་རྣམ་ངེས་ཀྱི་འགྲེལ་པ་བྱེད་པར་བཀས་གནང་བ་ན་ལེའུ་དང་པོ་རང་འགྲེལ་གྱི་གཤམ་མཐུད་ནས་དེས་ཀྱང་འགྲེལ་པ་མཛད། འདི་ལ་ལོ་རྒྱུས་རྙིང་པ་རྣམས་སུ་ལྷ་དབང་བློས་ལན་གཉིས་བརྩམ་པ་མེ་ཆུར་སྦྱངས། ལན་གསུམ་པ་ལ་དངོས་བསྟན་ཙམ་བྱུང་འདུག་གསུངས་ནས་བཞག་པར་བཤད། རང་འགྲེལ་དང་དེ་གཉིས་བསྡམས་པ་ལ་ཚད་མ་སྟོང་ཕྲག་བཅུ་གཉིས་པར་གྲགས། དེའི་(༢༠༢བ)སློབ་མ་ཤཱཀྱ་བློས་སྟོང་ཕྲག་བཅུ་གཉིས་པ་ལ་འགྲེལ་པ་མཛད། སློབ་དཔོན་དུལ་བའི་ལྷས་སྡེ་བདུན་ཚང་བར་འགྲེལ་པ་མཛད་པར་གྲགས། རྒྱན་མཁན་པོ་ཤེས་རབ་འབྱུང་གནས་ཀྱིས་རྣམ་འགྲེལ་ལ་ཚད་མ་སྟོང་ཕྲག་ཕྱེད་དང་བཞི་པའི་འཕྲོ་མཐུད་ནས་ཚད་གྲུབ་ལེའུ་གསུམ་པ་འགྲེལ་བཤད་རྒྱས་པར་མཛད་དེ་དགོངས་དོན་དབུ་མར་བཀྲལ། ཚད་མ་སྟོང་ཕྲག་བཅོ་བརྒྱད་པར་གྲགས། གཞན་ཡང་བྲམ་ཟེ་བདེ་བྱེད་དགའ་བ་ལ་སོགས་ཀྱི་འགྲེལ་པ་མང་དུ་བྱུང༌། སློབ་དཔོན་རྒྱལ་བ་ཅན་དང༌། ཁ་ཆེ་ཛ་མཱ་རིའམ་རྟོག་གེ་པ་ཡ་མཱ་རིར་གྲགས་པ་དང་ཉི་མ་སྦས་པ་རྣམས་ནི་རྒྱན་མཁན་པོའི་རྗེས་སུ་འབྲངས་ནས་རྒྱ་ཆེར་བཤད་པ་ཡིན་ནོ། ། རྣམ་ངེས་རིག་ཐིགས་རྒྱལ་རྔ་གསུམ་པས་བཀྲལ། ། ཞི་འཚོས་དེ་བསྡུས་ཀཱ་མ་ཤཱི་ལས་བཀྲོལ། ། སློབ་དཔོན་ཆོས་མཆོག་གིས་རྣམ་ངེས་ལ་འགྲེལ་པ་འཐད་ལྡན་ཆེན་མོ་ཞེས་སྟོང་ཕྲག་བཅུ་གཉིས་པ་དང༌། རིག་ཐིགས་ལ་འགྲེལ་པ་སློབ་མ་ལ་ཕན་པ་མཛད། ཕྱི་རོལ་པའི་རྩོད་པ་བཟློག་ནས་རྒྱལ་རྔ་ལན་གསུམ་བརྡུངས་པས་རྒྱལ་རྔ་གསུམ་པར་གྲགས་པ་དེས་ཚད་མའི་གཞུང་ཕྲན་ཀྱང་མང་དུ་མཛད་ནས་ཆོས་ཀྱི་གྲགས་པའི་དགོངས་པ་བཀྲལ། རྒྱན་མཁན་པོ་དང་འདི་གཉིས་ཚད་མ་ལ་རྣམ་དཔྱོད་ཀྱི་རྩལ་ཤིན་ཏུ་ཆེ་བར་གྲགས། སློབ་དཔོན་ཞི་བ་འཚོས་གཞུང་སྔ་མ་རྣམས་ཀྱི་དོན་འདུས་པ་དེ་ཉིད་བསྡུས་པ་ཞེས་བྱ་བའི་གཞུང་མཛད། ཀ་མ་ལ་ཤཱི་ལས་དེའི་དོན་བཀྲོལ་བའི་ཊཱིཀ་ཚད་ཆེན་དུ་གྲགས་པ་མཛད་དོ། ། ཙནྡྲ་གོ་མཱི་ས་མཛད་སོགས་གཞུང་ཕྲན་མང༌། ། གཞན་ཡང་རིག་གྲུབ་སྒྲོན་མ་སོགས་ཙཱནྡྲ་གོ་མཱིས་མཛད་པ་དང༌། ཐམས་ཅད་མཁྱེན་གྲུབ་དང་ཕྱི་རོལ་དོན་གྲུབ་སོགས་དགེ་སྲུང་གིས་མཛད་པ་དང༌། གཏན་ཚིག་གི་དེ་ཉིད་བསྟན་པ་སོགས་ཛེ་ཏཱ་རིས་མཛད་པ་དང༌། རིན་འབྱུང་ཞི་བ། ཤེར་འབྱུང་སྦས་པ། ཛྙཱ་ན་མི་ཏྲ་ལ་སོགས་པས་མཛད་པའི་གཞུང་ཕྲན་ཤིན་ཏུ་མང་བར་(༢༠༣ན)བྱུང་ཞིང་བོད་དུའང་འགའ་ཞིག་འགྱུར་རོ། ། ཏ༢ གཉིས་པ་[བོད་དུ་བྱུང་ཚུལ་]ནི། སྡེ་བདུན་ཕྱི་མ་འགའ་ཞིག་སྔ་འགྱུར་ལ། ། ཕྱི་དར་རྨ་རྔོག་ས་པཎ་རྣམས་ཀྱིས་བསྒྱུར། ། བོད་ཡུལ་དུ་སྡེ་བདུན་ཕྱི་མ་གཏན་ཚིག་ཐིགས་པ་འབྲེལ་བ་བརྟག་པ་རྩ་འགྲེལ་སོགས་འགའ་ཞིག་སྐ་བ་དཔལ་བརྩེགས་དང་དྲན་པ་ནམ་མཁའ་དག་གིས་བསྟན་པ་སྔ་དར་གྱི་དུས་སུ་འགྱུར་ལ། ཕྱི་དར་གྱི་སྐབས་སུ་ཚད་མ་ཀུན་བཏུས་སོགས་ཞ་མ་སེང་རྒྱལ་གྱིས་བསྒྱུར། རྒྱས་པའི་བསྟན་བཅོས་རྣམ་འགྲེལ་དང༌། ཚད་མ་སྟོང་ཕྲག་བཅུ་གཉིས་པ་སོགས་ཐོག་མར་རྨ་དགེ་བའི་བློ་གྲོས་ཀྱིས་བསྒྱུར་ཅིང་ཁྱུང་པོ་གྲགས་སེ་སོགས་ཀྱིས་བཤད་དེ་ཚད་མ་རྙིང་མ་ཞེས་གྲགས་པ་ཅུང་ཟད་དར། རྔོག་ལོ་བློ་ལྡན་ཤེས་རབ་ཀྱིས་དེ་དག་འགྱུར་བཅོས་ཤིང༌། རྣམ་ངེས། རིག་ཐིགས་སོགས་རྫོགས་པར་བསྒྱུར། རྒྱན་དང་ཆོས་མཆོག་ལུགས་གཙོར་བཏོན་ནས་ཚད་མ་གསར་མ་དར། བརྒྱུད་འཛིན་ཕྱྭ་པ་ཆོས་ཀྱི་སེང་གེས་དབུ་མ་སོགས་ལ་བསྡུས་པ་ཆེ་ཆུང་གཉིས་རེ་མཛད། ཁྱད་པར་ཚད་མའི་བསྡུས་པ་ཡིད་ཀྱི་མུན་སེལ་མཛད་ཅིང་འཆད་ཉན་གྱི་གྲྭ་བཙུགས་ནས་བསྡུས་པའི་སྲོལ་བཏོད་དེ། བསྡུས་པའི་དོན་ཀྱང༌། ཇི་སྐད་དུ། རྒྱལ་བའི་བཀའ་དང་དེ་འགྲེལ་བསྟན་བཅོས་ཀྱི། ། དགོངས་དོན་མ་ལུས་ལེགས་པར་བསྡུས་པས་ན། ། བསྡུས་པ་ཞེས་སུ་མཁས་པས་མཚན་དུ་བཏགས། ། ཞེས་སོ། ། ཕྱིས་སུ་ཁ་ཆེ་པཎ་ཆེན་ཤཱཀྱ་ཤྲཱི་དང༌། ས་སྐྱ་པཎ་ཆེན་ཀུན་དགའ་རྒྱལ་མཚན་གྱིས་རྣམ་འགྲེལ་བསྒྱུར་ཞུས་ཀྱིས་གཏན་ལ་ཕབ། གཞན་ཡང་ཚད་མའི་འགྱུར་བྱེད་ལོ་ཙཱ་བ་མང་དུ་བྱུང་ཡང་བཤད་སྲོལ་གྱི་སྒོ་ནས་ས་རྔོག་གཉིས་མཆོག་ཏུ་བཟུང་ངོ༌། ། ཕྱི་མས་རིག་གཏེར་རྩ་འགྲེལ་བཅས་པ་མཛད། ། བཤད་པའི་བརྒྱུད་འཛིན་ཤར་ནུབ་གུང་གསུམ་གྱིས། ། སྤེལ་ལས་ཁང་གཉན་ཞང་དང་ཟུར་ཁང་རྒྱུན། ། ཁྱད་འཕགས་མང་བྱོན། ཞེས་པ་ནི། རྨ་རྔོག་ས་པཎ་གསུམ་དུ་(༢༠༣བ)བཤད་པའི་ཕྱི་མ་འཇམ་པའི་དབྱངས་ས་སྐྱ་པཎ་ཆེན་སྐྱེ་བ་ཉི་ཤུ་རྩ་ལྔར་པཎྜི་ཏ་བརྒྱུད་མར་བཞེས་པའི་སྟོབས་ཀྱིས་བསམ་གྱི་མི་ཁྱབ་པའི་མཁྱེན་རབ་དང་ལྡན་ཅིང་མི་འཇིགས་སྤོབས་པའི་གཏེར་ཆེན་པོ་ཡང་གྲོལ། ལྷག་པར་ཚད་མ་ལ་མཆོག་ཏུ་མཁས་པ་ཆེན་པོར་གྲགས་པ་དེས། སྡེ་བདུན་མདོ་དང་བཅས་པའི་སྙིང་པོ་ཚད་མ་རིག་པའི་གཏེར་རྩ་བ་རང་འགྲེལ་དང་བཅས་པ་མཛད། སློབ་ཚོགས་རྒྱ་བོད་ཀུན་ཏུ་མཐའ་ཡས་པར་བྱུང་བའི། གཙོ་བོ་རྟོགས་པའི་བརྒྱུད་འཛིན་ཚོགས་གྲུབ་དབོན་གསུམ། མན་ངག་གི་བརྒྱུད་འཛིན་ལྷོ་དམར་རྣམ་གཉིས་སོགས་བྱུང་བ་ལས། འདིར་བཤད་པའི་བརྒྱུད་འཛིན་ཤར་པ་ཤེས་རབ་འབྱུང་གནས་དང་། རྡོ་རྗེ་འོད་ཟེར་སྐུ་མཆེད། ནུབ་པ་འུ་ཡུག་པ་རིག་པའི་སེང་གེ། གུང་པ་སྐྱོ་སྟོན་དྲི་མེད་གསུམ་གྱིས་རྒྱ་ཆེར་སྤེལ་བ་ལས། རིག་པའི་དབང་ཕྱུག་ཁྱད་པར་དུ་འཕགས་པ་མང་པོ་བྱོན་ཏེ། འུ་ཡུག་པའི་དབོན་པོ་ཉི་ཐོག་པ་སངས་རྒྱས་ཀུན་སྨོན་ལ་ཀ་ཆེན་ཁང་གཉན་ཞང་གསུམ་ཟུར་ཁང་པ་དང་བཞིར་གྲགས་ཏེ། ཁང་སྟོན་འོད་ཟེར་རྒྱལ་མཚན། གཉན་དར་མ་སེང་གེ། ཞང་མདོ་སྡེ་དཔལ། ཟུར་ཁང་པ་དཀར་ཤཱཀྱ་གྲགས་པ་རྣམས་ལས་ཕྱི་མ་ནི་མཆོག་ཏུ་གྱུར། ཡང་ལྷོ་པ་ཀུན་མཁྱེན་རིན་ཆེན་དཔལ་གྱིས་ཀྱང་ཡིག་ཆ་ཅི་རིགས་མཛད། དེ་དག་དང་འུ་ཡུག་པས་འཆད་ཉན་ཡུན་རིང་མཛད་པའི་གསུང་གི་རྒྱུན་ལ། འཇམ་དབྱངས་སྐྱ་པོ། ལོ་ཆེན་པོ། ཆོས་རྗེ་བླ་མ་དམ་པ། ཉ་དབོན་ཀུན་དགའ་དཔལ་རྣམས་ཀྱང་སྔ་ཕྱི་ཅི་རིགས་བྱུང་ཞིང་ཕྱི་མ་ནི་རིག་པ་འདི་ལ་ཁྱད་པར་དུ་མཁས་པས་ཚད་མ་ཉ་ལ་ཐུག་ཅེས་གཏམ་དུ་གྲགས། ཉ་དབོན་སློབ་མ་གཡག་མི་ཕམ་ཆོས་ཀྱི་བླ་མ། དེ་ནས་རིམ་བཞིན་རོང་སྟོན་ཤེས་བྱ་ཀུན་གཟིགས། བྱམས་ཆེན་རབ་འབྱམས་པ་སངས་རྒྱས་འཕེལ་བ། གོ་རམ་པ་བསོད་ནམས་སེང་གེ་སོགས་སྨྲ་བའི་དབང་པོ་དུ་མ་བྱོན་ཅིང༌། རོང་སྟོན་སློབ་མ་རྗེ་དོན་ཡོད་དཔལ་བ་ལས་པཎ་ཆེན་ཤཱཀྱ་མཆོག་ལྡན་སོགས། མདོར་ན། (༢༠༤ན)སྨྲ་བའི་སེང་གེ་མུ་ཏིག་ཕྲེང་བ་བསྟར་ལ་བརྒྱུས་པ་ལྟ་བུ་བྱོན་ནོ། ། ཡང་དཔལ་ལྡན་བླ་མ་དམ་པའི་སློབ་མ་ལོ་ཆེན་བྱང་རྩེ། དེ་ལས་ལོ་ཆེན་གྲགས་པ། དེ་ལས་བོ་དོང་ཀུན་མཁྱེན་འཇིགས་བྲལ་ཆེན་པོ་བྱོན་ཅིང་ཚད་མ་རིག་སྣང་བྱ་བའི་ལུགས་སྲོལ་ཟུར་དུ་དབྱེ། ཡང་ཞང་མདོ་སྡེ་དཔལ། མཁས་པ་ནོར་བཟང་དཔལ། གཉག་དབོན། རེད་མདའ་བ་གཞོན་ནུ་བློ་གྲོས། རྗེ་ཙོང་ཁ་པ། དེ་ལས་རྒྱལ་ཚབ་དར་མ་རིན་ཆེན་དང་མཁས་གྲུབ་དགེ་ལེགས་དཔལ་བ་སོགས་