Tibetan
འབྲུག་གི་རྟེན་གཙོ་རྣམས་རང་བྱོན་ཁོ་ནར་(༢༠༨བ)གྲགས་པ་དང༌། ར་སའི་རང་བྱུང་ཐུགས་རྗེ་ཆེན་པོ་སོགས་དང༌། ཁྲི་སྲོང་གི་དུས་བསམ་ཡས་བྱང་ཆུབ་ཆེན་པོ་གཙོ་བོར་གྱུར་པའི་ཆོས་འཁོར་རྣམ་གསུམ་གྱིས་སྐུ་བརྙན་བྲིས་འབུར་རྣམས་བྱུང་བར་སྔ་ལ། དེའང་སྐུ་བརྙན་བྲིས་དཔེ་སྔ་ཤོས་ཐུབ་པ་ཆུ་ལོན་མ་ནི་སྟག་ཚང་ལོ་ཙཱས་རྡོ་རྗེ་གདན་གྱི་བྱང་ཆུབ་ཆེན་པོ་ལ་དྲི་བཟང་གི་ཆུས་བྱུགས་པར་རས་གཙང་གཤེར་བ་བཀབས་ཏེ་བླངས་པས་བྱིན་རླབས་ཀྱིས་ཕྱག་གཉིས་ཐད་ཀར་བྱོན་པ་དེ་ལ་དཔེ་བགྱིས་ཏེ་བྲིས་རྒྱུན་སྤེལ་བ་ཡིན་ཅེས་གསུངས། གཞན་དག་གོང་སྨོས་ལ་བཞེད་ཀྱང༌། འདི་ལ་མགུལ་ཐུང་ཞེང་དུ་རྒྱས་པ་སོགས་ལ་བརྟགས་ན་ཕྱི་མ་འདི་འཐད་དམ་སྙམ་ལ། དེའི་ཕྱིར་ཆ་ཚད་དང་སྦྱར་དུ་མེད་ཅིང༌། ལྟར་སྣང་ཅུང་ཟད་མི་མཛེས་ཀྱང་ཡོངས་གྲགས་བྲི་རྒྱུན་ཀུན་གྱི་ཚད་མའི་གནས་ཡིན་ནོ། ། རི་མོ་བལ་རིས་རྒྱུན་ལ་སྨན་མཁྱེན་གཉིས། ། བྱི་འུ་ལུགས་གསུམ་བཀྲ་ཤིས་རྣམ་གསུམ་ནས། ། སྒར་བྲིས་སྲོལ་དོད་འབུར་བཟོའང་རིམ་མཁས་གྱུར། ། རི་མོ་ནི་ཐོག་མར་བལ་རིས་ཁོ་ན་དར་སྲོལ་ཆེ་བ་ལས། ཇི་ཞིག་ན་འཇམ་པའི་དབྱངས་མི་ཡི་ཚུལ་ཅན་སྨན་བླ་དོན་གྲུབ་ཞབས་ལྷོ་བྲག་སྨན་ཐང་དུ་སྐུ་འཁྲུངས་པ་དང༌། ཡུལ་དེའི་མཚལ་ཁ་ཡང་བྱེ། ཆུང་མའི་རྐྱེན་གྱིས་ཡུལ་འཁྱར་ཏེ་གཙང་དུ་བྱོན་ནས་རྡོ་པ་བཀྲ་ཤིས་རྒྱལ་པོ་ལས་རི་མོ་གསན། སྐུ་སྐྱེ་བ་སྔ་མ་རྒྱ་ནག་ཏུ་འཁྲུངས་དུས་ཀྱི་རི་མོ་སི་ཐང་གཟིགས་པས་སྔོན་གནས་དྲན་ཏེ་སྨན་ཐང་ཆེན་མོར་གྲགས་པ་སོགས་ཕུལ་དུ་བྱུང་བའི་རི་མོའི་རྒྱུན་མཛད་ཅིང་སྲས་བརྒྱུད་དང་སློབ་བརྒྱུད་གཉིས་ཀྱི་རྒྱུན་བྱུང༌། ཡང་མཁྱེན་བརྩེ་ཆེན་མོ་ཞེས་གོང་དཀར་སྒང་སྟོད་དུ་བྱུང་བ་དེས་ཀྱང་སྔ་མ་ལས་ཟུར་དུ་བཟོ་རྒྱུན་མཛད་དེ་སྨན་མཁྱེན་གཉིས་ཞེས་གངས་ཅན་དུ་ཉི་ཟླ་ལྟར་གྲགས་པའི་ཤིང་རྟའི་སྲོལ་སོ་སོ་བར་གྱུར། གཞན་ཡང་བཟོ་གནས་འདིའི་ཆེད་དུ་ངལ་བ་མེད་པར་ཉུལ་བས་སྤྲུལ་སྐུ་བྱི་འུར་གྲགས་པ་རིག་རྩལ་བླ་ན་མེད་པས་བཟོ་རྒྱུན་སྔ་མ་གཉིས་ཀ་དང་མི་གཅིག་པ་(༢༠༩ན)ཚོན་མདངས་ནི་གཞན་ལས་ཀྱང་ཁྱད་པར་འཕགས་པ་ཞིག་བྱུང༌། ཕྱིས་སུ་གཙང་པ་ཆོས་དབྱིངས་རྒྱ་མཚོས་སྨན་གསར་གྱི་སྲོལ་བཏོད། དེ་སོགས་བཟོ་རྒྱུན་གཞན་དུ་མ་བྱུང་ཡང་གཙོ་ཆེར་སྔ་མ་དེ་དག་གི་ཁོངས་སུ་གཏོགས། ཡང་ཡར་སྟོད་དུ་སྤྲུལ་སྐུ་ནམ་མཁའ་བཀྲ་ཤིས་ཞེས་གྲགས་པ་བྱུང༌། རྗེ་མི་བསྐྱོད་ཞབས་ཀྱིས་ཉིད་ཀྱི་སྤྲུལ་པ་སྐུ་གཟུགས་ཀྱི་ཕྲིན་ལས་སྤེལ་བ་པོར་ལུང་བསྟན། ཞྭ་དམར་དཀོན་མཆོག་ཡན་ལག་དང་རྒྱལ་ཚབ་གྲགས་པ་དོན་གྲུབ་ཀྱིས་ཞལ་བཀོད་མཛད་དེ། ཨེ་ནས་སྐལ་ལྡན་ཤར་ཕྱོགས་པ་དཀོན་མཆོག་ཕན་བདེ་བྱ་བ་རྒྱ་མོ་བཟའ་ཀོང་ཇོའི་སྤྲུལ་པར་གྲགས་པ་དེ་ལས་སྨན་རིས་ཀྱི་རྒྱུན་བསླབས། རུས་ཚུགས་རྒྱ་གར་ལི་མ་དང་སྨན་ཐང་ལུགས་གཞིར་བཞག་པ་ལ་ཏཱ་མིང་དུས་ཀྱི་སི་ཐང་བཞིན་ཡུལ་ལྗོངས་བཀོད་པ་སོགས་དང་ཚོན་མདངས་མཛད་པ་ལ་སྒར་བྲིས་སུ་གྲགས་པའི་བྲི་རྒྱུན་འདི་བྱུང༌། དེ་རྗེས་ཆོས་བཀྲ་ཤིས་བྱ་བ་ཞིག་བྱུང་བར་གྲགས་ཤིང༌། ཕྱིས་སུ་ཀར་ཤོང་ཀརྨ་བཀྲ་ཤིས་ཞེས་རི་མོའི་ལམ་སྲོལ་ལ་འགྲན་ཟླ་བྲལ་བའི་རྒྱུན་ད་ལྟའང་གནས་པ་བཅས་མདོར་ན་བཀྲ་ཤིས་རྣམ་པ་གསུམ་གྱིས་སྒར་བྲིས་སྲོལ་རྒྱ་ཆེན་བཏོད། དེ་བཞིན་དུ་འབུར་ལ་ཕུལ་དུ་བྱུང་བ་ནི། སྤྲུལ་སྐུ་སླེའུ་ཆུང་པ་དང༌། པདྨ་མཁར་པ་གཉིས་ཡིན་ལ། ཕྱིས་སུ་སྒར་ལུགས་ལ་མཁས་པ་དྭགས་པོ་སྒོ་པའི་ཞལ་ངོ་སྐུ་མདུན་ཀརྨ་སྲིད་བྲལ་ལམ་སྒོ་སྨྱོན་ཞེས་མཚུངས་པ་མེད་པའི་བློ་གྲོས་ཅན་རྗེ་བརྒྱད་པའི་སྐུའི་སྤྲུལ་པར་གྲགས་པ་དེ་དང༌། ཀརྨ་རིན་ཆེན་སོགས་དུ་མ་བྱུང་བའི་རྒྱུན་དེ་དག་ནི་ད་ལྟ་མི་སྣང་ལ། གོང་ས་ལྔ་པ་ཆེན་པོའི་དུས་སུ་བྱུང་བའི་ཨེ་པ་ལྐུགས་པའམ་ཧོར་དར་ཅེས་པ་དང༌། སྤྲུལ་སྐུ་བབ་ཕྲོ་ཞེས་སྤྲུལ་པའི་བཟོ་བོར་གྲགས་པ་དེ་དག་གི་རྒྱུན་ལས་ཕྱིས་སུ་འབུར་ལ་ཁྱད་པར་འཕགས་པ་འདོད་དཔལ་གྱི་བཟོ་རྒྱུན་སོགས་བྱུང་བར་ངེས་སོ། །(༢༠༩བ) ཁྱད་པར་བཟོ་སྦྱོང་འཇིག་རྟེན་དབང་ཕྱུག་མཆོག ། གཙུག་ལག་ཆོས་ཀྱི་སྣང་བའི་རྣམ་དཔྱོད་ནི། ། ཚུར་མཐོང་བློ་འདས་མིག་གི་བདུད་རྩིར་གྱུར། ། དེ་དག་ཐམས་ཅད་ལས་ཁྱད་པར་དུ་འཕགས་པ་བཟོ་སྦྱོང་འཇིག་རྟེན་དབང་ཕྱུག་དཔལ་ཀརྨ་པ་ཆོས་དབྱིངས་རྡོ་རྗེའི་ཞལ་སྔ་ནས་སྨན་ལུགས་པ་ལྷོ་བྲག་ཆུས་ཁྱེར་སྤྲུལ་སྐུ་ཚེ་རིང་ལས་རི་མོ་གསན་ཏེ་སྐུ་ཚེའི་སྟོད་དུ་སྨན་ལུགས་སོར་བཞག་དང༌། སྨད་ནས་སི་ཐང་དང་ཁ་ཆེའི་བཟོ་རྒྱུན་བཞིན་མཛད་དེ་བྲིས་འབུར་གཉིས། སི་ཐང་ཕྱག་དྲུབས་དང་བཅས་པ་ད་ལྟ་མངོན་དུ་མཇལ་བ་འདི་རྣམས་དང༌། ཕྱིས་སུ་ཐམས་ཅད་མཁྱེན་པ་གཙུག་ལག་ཆོས་ཀྱི་སྣང་བའི་རྣམ་དཔྱོད་ལས་འཁྲུངས་པའི་བྲིས་འབུར་རྣམས་ནི་ཚུར་མཐོང་གི་བློ་ཡི་ར་བ་ལས་འདས་ཤིང་རྫུ་འཕྲུལ་ཆེན་པོའི་བཀོད་པ་ད་ལྟ་ཐ་མལ་པ་རྣམས་ཀྱིའང་མིག་གི་བདུད་རྩིར་མངོན་སུམ་གྱུར་པ་སྟེ། དེ་ལྟར་ཁྱད་པར་དུ་འཕགས་པའི་ཚུལ་སྐྱེས་རབས་དཔག་བསམ་འཁྲི་ཤིང་གི་ཞལ་ཐང་རྟོགས་བརྗོད་ཀུན་མཁྱེན་བླ་མ་ཉིད་ཀྱི་གསུང་ལས་གསལ་ལོ། ། ཏ༣ གསུམ་པ་[ཞར་བྱུང་གཞུང་གི་ཁུངས་སྨོས་པ་]ནི། དུས་འཁོར་སྡོམ་འབྱུང་ཤཱ་རིའི་བུས་ཞུས་མདོ། ། རྒྱ་བོད་གཞུང་ལུགས་ཆགས་ཚད་སྟོན་པ་མང༌། ། དེ་དག་གི་ཁུངས་དང་རྣམ་གཞག་གང་ནས་བྱུང་ཞེ་ན། དཔལ་དུས་ཀྱི་འཁོར་ལོ་རྩ་འགྲེལ། སྡོམ་བྱུང་རྩ་འགྲེལ། ཤཱ་རིའི་བུས་ཞུས་པའི་མདོ་རྣམས་དང༌། ཀྲི་ཡ་ས་མུཙྪ། མཆོད་རྟེན་གྱི་ཆ་དབྱེ་བ། བརྒྱད་སྟོང་འགྲེལ་ཆེན། ཀོ་ས་ལའི་རྒྱན་ལ་སོགས་པ་རྒྱ་གཞུང་དང༌། སྨན་མཁྱེན་རྣམ་གཉིས། བུ་སྟོན་དང་རྗེ་མི་བསྐྱོད་ཞབས་ཀྱི་ཉི་མ་ཆེན་པོའི་མེ་ལོང༌། ཕྱིས་སུ་རྒྱུགས་ཆེ་བའི་སྡེ་སྲིད་སངས་རྒྱས་རྒྱ་མཚོའི་གཡའ་སེལ་སོགས་བོད་ཀྱི་གཞུང་ལུགས་ཆགས་ཚད་སྟོན་པའི་ཡི་གེ་ཤིན་ཏུ་མང་ངོ༌། ། ཉ༣ གསུམ་པ་གསུང་རྟེན་ཡི་གེའི་བྱུང་ཚུལ་ནི། ཡིག་རིགས་དུ་མ་སོ་སོའི་ཡུལ་ནས་བྱུང༌། ། ཡི་གེ་ནི་སྒྲ་དང་སྐད་ཀྱི་རྗེས་སུ་འགྲོ་བས་ཡུལ་ཁམས་རེ་རེ་ལའང་སྒྲ་དང་ཡིག་རིགས་ཅུང་ཟད་ཅུང་ཟད་མི་འདྲ་བ་དུ་མ་འབྱུང་བས་མཐའ་གཅིག་ཏུ་རྣམ་པར་བཞག་པར་བྱར་མ་(༢༡༠ན)མཆིས་ཤིང༌། ཕྱི་རོལ་པ་རྣམས་ཀྱིས་བྱེད་པོ་ཉེར་བཞིར་འདོད་པའི་ནང་ཚན་ཡི་གེ་བྱེད་པོ་ལྷ་རྟག་ཏུ་ཞི་བ་སྟེ་དབང་ཕྱུག་ཆེན་པོས་བྱས་པར་འདོད། དེའང་རྒྱ་གར་ནས་རྒྱ་གར་གྱི་ཡིག་རིགས་སོགས་སོ་སོའི་ཡུལ་ནས་འབྱུང་བ་དང་། དེའང་སྔ་མ་ནུབ་ཅིང་གསར་པ་དར་བ་སོགས་མང་སྟེ། རྒྱ་གར་དུ་བསྟན་པ་གནས་པའི་ཚེ་ལཉྩ་ན་དང་ཝརྟུ་ལ་ན་ག་ར་ཡིག་སོགས་གཙོ་བོར་དར་ལ་བསྟན་པ་ནུབ་ནས་ཀླ་ཀློའི་ཡི་གེ་ཁོ་ན་དར་བ་དང༌། རྒྱ་ནག་ཏུ་དྷཱི་ལྔ་ལ་སོགས་པའི་དུས་སུ་བརྐོས་ཡིག་དང་འཕྲུལ་ཡིག་སོགས་བྱུང་ལ། ཕྱིས་སུ་བློན་ཆེན་ལི་ཙིས་དམག་ལ་སྡོད་པའི་སྐབས་རི་བོང་གི་མཇུག་མ་ལ་པིར། སྒྲོན་ཤིང་གི་དུ་བས་སྣག་ཚ་བྱས་ཏེ་བྲིས་ཡིག་བརྩམས་པར་བཤད་པ་སོགས་ཆེས་མང་ངོ༌། ། གསུང་རྟེན་གླེགས་བམ་གྱི་ཐོག་མ་ནི། འཁོར་ལོ་བར་པ་བརྒྱ་བྱིན་གྱིས་གསེར་གྱི་གླེགས་བུ་ལ་བཻ་ཌཱུཪྱའི་ཞུན་མས་བྲིས་པ་དང༌། རྒྱལ་མཚན་རྩེ་མོའི་དཔུང་རྒྱན་གླེགས་བམ་ལ་བྲིས་ཏེ་རྒྱལ་མཚན་གྱི་རྩེ་མོར་བཏགས་པས་ལྷ་མིན་གྱི་གཡུལ་ཟློག་པ་དང༌། སྟོན་པའི་བཀའི་གླེགས་བམ་འཚོང་དུ་མ་གནང་ཞིང༌། མུ་སྟེགས་ཀྱི་གཞུང་གནང་བར་འདུལ་བ་ལུང་ལས་བཤད་པས་དེ་དག་བྱུང་བར་གྲུབ་ཅིང༌། བཀའ་བསྡུའི་ཚེ་སྡུད་པ་པོ་རྣམས་ཀྱིས་རང་རང་གི་ཡུལ་དུ་སོ་སོའི་སྐད་ཀྱིས་བྲིས་པ་ལས་རིམ་པར་འཕེལ་བར་འགྱུར་ཏོ། ། བོད་དུ་ཐོན་མིས་འཕགས་ཡུལ་མཁས་པ་ལས། ། སྒྲ་ཡིག་བསླབས་ལ་དཔེར་བྱས་ཡི་གེའི་གཟུགས། ། བོད་ལ་ཉེར་མཁོའི་འཕྲི་བསྣན་བཅས་པ་དང༌། ། སུམ་རྟགས་ལ་སོགས་བརྡ་དག་གཞུང་བརྒྱད་མཛད། ། གཡུ་ཁྲི་སུམ་པ་སོགས་ཀྱིས་དར་རྒྱས་སྤེལ། ། དེའང་དྲི་མེད་འོད་ལས། བོད་ཀྱི་ཡུལ་དུ་ཐེག་པ་གསུམ་བོད་ཀྱི་སྐད་ཀྱིས་བྲིས་ཏེ་ཞེས་སོགས་གསུངས་པ་ལྟར། བོད་ཡུལ་ན་ཐོག་མར་ཡི་གེ་དང་བརྡ་ལེགས་པར་སྦྱོར་བ་མེད་པ་ལ། ཆོས་རྒྱལ་སྲོང་བཙན་སྒམ་པོའི་བློན་ཆེན་འཇམ་དབྱངས་རྣམ་འཕྲུལ་ཐུ་མི་སཾ་བྷོ་ཊ་ལ་ཆོས་ཀྱི་རྒྱལ་པོ་(༢༡༠བ)བྱང་ཆུབ་སེམས་དཔའི་བཀས་བསྐུལ་བ་དང་རང་ཉིད་བྱང་ཆུབ་སྤྱོད་པའི་སྨོན་ལམ་ཁྱད་པར་ཅན་དུས་སུ་སད་པའི་མཐུས་འཁོར་བཅུ་དྲུག་དང་བཅས་འཕགས་ཡུལ་དུ་ཕྱིན་ཏེ་པཎྜི་ཏ་ལྷ་རིག་པའི་སེང་གེ་དང༌། བྲམ་ཟེ་ལི་བི་ཀ་ར་སོགས་མཁས་པ་རྣམས་ལས་སྒྲ་དང༌། ཡི་གེ་ཕུལ་དུ་ཕྱིན་པ་བསླབས་ནས་བོད་དུ་བྱོན། རྒྱལ་པོར་བྱ་དཀའི་ལམ་ནས་དྲངས་པའི་བསྟོད་པས་ཆེད་དུ་བརྗོད་པས་དགྱེས། སྐུ་མཁར་མ་རུར་ན་ག་ར་ཡིག་ལ་དཔེར་བྱས་ནས་བོད་ཡིག་གི་གཟུགས་གསར་དུ་མཛད་དེ་དེའང་བོད་སྐད་ལ་མི་མཁོ་བའི་དབྱངས་གསལ་རྣམས་དོར། ཉེ་བར་མཁོ་བའི་ཡི་གེ་དྲུག་བསྣན་ཏེ་མ་ཡིག་སུམ་ཅུ་བུ་དྲུག་ཏུ་གྲགས་པ་དང་བཅས་ཡི་གེའི་སྲོལ་བཏོད་པ་དང༌། སུམ་ཅུ་པ་དང་རྟགས་ཀྱི་འཇུག་པ་སོགས་བརྡ་སྤྲོད་པའི་གཞུང་ལུགས་བརྒྱད་མཛད་པར་གྲགས་པ་ལས་སུམ་རྟགས་མ་གཏོགས་པའི་འཕྲོས་དྲུག་པོ་གླང་དར་སྐབས་སུ་ནུབ་པར་བཤད། དེའི་ཡིག་རྒྱུན་རིམ་གྱིས་བརྒྱུད་དེ་ཁྱུང་པོ་གཡུ་ཁྲི་དང་སུམ་པ་གནོད་སྦྱིན་སོགས་ཀྱིས་ལེགས་པར་གཏན་ལ་ཕབས་ཏེ་དར་རྒྱས་སུ་སྤེལ་བ་ཡིན་ནོ། ། བཟོ་གནས་བྱུང་བ་ཕྲན་ཚེགས་སྨོས་མི་ལངས། ། བཟོ་གནས་བཅོ་བརྒྱད་དུ་གྲགས་པ་སོགས་ལུས་ངག་ཡིད་གསུམ་གྱི་བྱ་བ་ཕལ་ཆེར་བཟོ་རིག་གི་ནང་དུ་འདུ་བར་བཤད་པས་དེ་དག་གི་བྱུང་བ་ཕྲན་ཚེགས་ནི་ཁུངས་ཆོད་པར་དཀའ་ཞིང་སྨོས་ཀྱིས་མི་ལངས་པ་དང་དགོས་པའང་མ་མཆིས་སོ། ། ཇ༤ བཞི་པ་གསོ་རིག་གི་བྱུང་བ་འཆད་པ་ལ་གསུམ། ཉ༡ ཐོག་མར་སུ་ཞིག་གིས་དྲན་ཅིང་གང་ལས་བརྒྱུད་པ། ཉ༢ བར་དུ་སྟོན་པས་ཇི་ལྟར་གསུངས་ཚུལ། ཉ༣ ཐ་མར་རྒྱ་བོད་དུ་ཇི་ལྟར་དར་བ་སྨོས་པའོ། ། ཉ༡ དང་པོ་ནི། ཚངས་པས་ཐོག་མར་ཚེ་ཡི་རིག་བྱེད་དྲན། ། བདུད་རྩི་བཙལ་ཞིང་གསོ་དཔྱད་འབུམ་པ་མཛད། ། དབང་པོར་རིམ་བརྒྱུད་དེ་སློབ་རྒྱུན་ཤེས་བུས། ། ཚངས་བཤད་བསྡུས་པ་ཞེས་བྱའི་གཞུང་ཆེན་བརྩམས། ། དེ་ལ་ཡང་དག་པར་ནི་རིག་བྱེད་རྟག་པ་ཚད་མའི་ལོ་རྒྱུས་དང་བཅས་པ་ནང་པའི་རྒྱུད་གཞུང་(༢༡༡ན)རྣམས་ལས་རྒྱ་ཆེར་བཀག་ཀྱང༌། རིག་ལམ་ཐུན་མོང་བའི་སྐབས་འདིར་རིག་བྱེད་ཀྱི་གཞུང་དུ་གྲགས་པ་སོར་བཞག་པ་སློབ་དཔོན་དཔའ་བོ་སོགས་ཀྱི་དགོངས་པ་ལ་གནས་པའི་དབང་དུ་བྱས་ནས། སྔོན་རྫོགས་ལྡན་ཆེན་པོའི་སྐབས་ཚེ་ལོ་དཔག་མེད་ནས་ཅུང་ཟད་འགྲིབས་ཏེ་ལྷ་མི་རྣམས་ལ་འཆི་བ་ཡོད་པའི་སྐབས་ཤིག་ལྷ་རྣམས་ཀྱིས་མི་འཆི་བའི་ཐབས་བགྲོས་པ་ན། ཚངས་པའི་འཁུར་ཚོས་ལས་བྱ་རྩོལ་མ་བྱས་པར་རང་བྱུང་གི་སྒྲ་ཨོཾ་ཨ་ཐ། ཞེས་བྱ་བ་བྱུང་བ་ཟླ་ཟེར་ལས་བཤད། རིག་བྱེད་ཀྱི་གཞུང་འགའ་ཞིག་ཏུ་ཞལ་ནས་རང་བྱུང་དུ་བྱུང་བར་བཤད་ཅིང༌། གང་ལྟར་དེའི་རྗེས་ཐོག་ཏུ་ཞལ་བཞི་ལས་རིག་བྱེད་བཞི་བྱུང་བར་བཤད་དེ། ཇི་སྐད་དུ། གང་ཕྱིར་ཚངས་པ་ཡི་ནི་ཞལ། ། དབུས་མ་ནས་ནི་ཚེའི་རིག་བྱེད། ། སྙན་ཚིག་ངེས་བརྗོད་མཆོད་སྦྱིན་རྣམས། ། ཞལ་གཞན་ནས་ནི་གསུངས་པར་མཛད། ། ཅེས་པ་ལྟར། ཐོག་མར་ཞལ་དབུས་མ་ནས་ཚེ་རིག་སྟེ་གསོ་རིག་རང་བཞིན་གྱིས་དྲན་ནས་བྱུང༌། གཞན་རྣམས་རིམ་བཞིན་བྱུང་སྟེ། དེ་བཞི་ཀའང་སུས་ཀྱང་མ་བྱས་པས་རྟག་པ། བྱ་རྩོལ་གྱིས་མ་བསླད་པས་རང་བྱུང༌། ཐམས་ཅད་བརྗོད་དུ་རུང་བའི་ཚད་མ་སྟེ་ཆོས་གསུམ་ལྡན་དུ་འདོད། དེ་རྗེས་རྒྱ་མཚོ་ལས་བདུད་རྩི་བཙལ་བའང་མནྡཱ་རས་སྲུབ་ཤིང༌། ནོར་རྒྱས་བུས་སྲུབ་ཐག་བྱས་ཏེ། ཚངས་པས་འཇིག་རྟེན་གྱི་སྨན་དང་བཅུད་རྣམས་བཅུག་ནས་ཆེར་བསྲུབས་པ་ན། ཐོག་མར་ནག་པོ་བརྩེགས་པ་དོན་པ་ཚངས་པས་ཧཱུྃ་གིས་བསྡིགས་པས། རྒྱུ་བ་དང་མི་རྒྱུ་བ་ལ་ཐིམ་པ་ནི་དུག་ཅེས་གྲགས། དེ་ནས་དཔལ་མོ་རྟ་མཆོག་གླང་པོ་ཉི་ཟླ་སོགས་རིམ་པར་བྱུང༌། ཆང་ཞེས་བྱ་བ་བྱུང་བའི་ཚེ་ཁ་ཅིག་འཇིགས་ནས་མ་འཐུང་བ་ལ་ལྷ་མ་ཡིན་དང༌། འཐུང་ནུས་པ་རྣམས་ལ་ལྷར་གྲགས། མཐར་བདུད་རྩི་སྣོད་ཆེན་པོ་བརྒྱད་གང་བ་བྱུང་བ་ལྷ་མིན་གྱིས་འཕྲོག །ཁྱབ་འཇུག་དང་བརྒྱ་བྱིན་གྱིས་བརྫུ་བག་ལ་བརྟེན་བརྐུས་ནས་སླར་ཐོབ་པ་ལྷ་རྣམས་ཀྱིས་འཐུངས་པས་ལྷ་ལ་(༢༡༡བ)འཆི་མེད་དུ་གྲགས། དེ་ནས་གསོ་དཔྱད་འབུམ་པ་ཞེས་བྱ་བའི་གཞུང་ཆེན་པོ་བྱུང་བ་ཚངས་པས་རང་གི་བུ་སྐྱེ་དགུའི་བདག་པོ་མྱུར་བ་ལ་བཤད། དེས་ལྷའི་སྨན་པ་ཐ་སྐར་གྱི་བུ་གཉིས། དེས་དབང་པོ་བརྒྱ་བྱིན་ལ་རིམ་པར་བརྒྱུད་ཅིང་བཤད། དེས་རྒྱུན་ཤེས་བུ། ཟང་ལ་འབར། དཀའ་གཉིས་སྤྱོད། མུ་ཁྱུད་འཛིན། འདྲོབས་སྐྱོང་གི་བུ། བཤོལ་འགྲོ་སྐྱེས་རྣམས་ལ་བཤད། སྔ་མས་ཚངས་པའི་བཤད་པ་བསྡུས་པ་ཞེས་བྱ་བའི་གཞུང་ཆེན་པོ་བརྩམས་སོ། ། མེ་བཞིན་འཇུག་སོགས་ལྷ་ལས་མིར་བརྒྱུད་དེ། ། ཧ་རི་ཙནྡྲས་ཙ་ར་ཀ་ལ་སོགས། ། དྲང་སྲོང་མཁས་པས་སྨན་དཔྱད་གཞུང་མང་བརྩམས། ། སྨོས་མ་ཐག་པའི་དྲང་སྲོང་ཆེན་པོ་དེ་དག་གིས་མེ་བཞིན་འཇུག །ལུག་ནག་དང་རྒྱ་སྐྱེག་སྣ། མདའ་མཆོག་དང་ལཉྩའི་ལག་པ་སོགས་ལ་བཤད་ཅིང་དེ་དག་སོ་སོས་གཞུང་རྩིར་ཞིབ་སྣ་ཚོགས་བྱས། ལྷའི་དྲང་སྲོང་དེ་དག་ལས་རིམ་གྱིས་མིར་བརྒྱུད་ནས་བྱུང་སྟེ། དེ་ལྟར་ཡང་གཅེས་གྲུབ་ལས། ཚེ་འཛིན་པའི་རིག་བྱེད་འདི་ནི་ཚངས་པས་མཐོ་རིས་སུ་བཤད་དེ། རིམ་གྱིས་ཡུལ་ཀཱ་ཤིའི་རྒྱལ་པོས་མི་རྣམས་ལ་བཤད་དོ། །ཞེས་འཕགས་ཡུལ་ཀཱ་ཤིའི་ལྗོངས་སུ་གསོ་དཔྱད་ཐོག་མར་བྱུང་བར་བཤད། དེ་ནས་རིམ་གྱིས་འཕེལ་ཏེ་སྨན་དཔྱད་ཀྱི་རིག་བྱེད་རྒྱ་མཚོ་འཛིན་པ་དྲང་སྲོང་གཞུང་ལ་སྐྱེས་ཀྱི་བུ། ཉི་མ་དང༌། ཟླ་བའི་སྙིང་པོ། ཤཱ་ལི་ཧོ་ཏྲ། རི་བྱི་དང༌། གནས་འཇོག་ལ་སོགས་པ་དུ་མ་བྱུང་ནས་གཞུང་མང་པོ་བྱས། ཡང་རྒྱལ་པོ་དྲང་སྲོང་ཆེན་པོ་དཔལ་ལྡན་དགོད་པ་དང་བཅས་པས་མཚན་པ་དང༌། རིག་བྱེད་ཀུན་གྱི་བདག་པོ་དྲང་སྲོང་ཧ་རི་ཙནྡྲའམ། མཐོ་བཙུན་ཙ་ར་ཀ་ཞེས་པ་བྱུང་བ་དེས་སྨན་དཔྱད་ཀྱི་བསྟན་བཅོས་ཙ་ར་ཀ་ཞེས་པ་བརྩམས། དེའི་བུ་བརྒྱུད་ལ་སྨན་པ་ཆེན་པོ་དཔལ་ལྡན་ནག་པོ། རོལ་བས་སྒེག །གདོང་ཅན་ཟླ་བ། རིན་ཆེན་འབྱུང་གནས། འཇུག་པ་བཅས་དཔལ་གྱི་མིང་དང་ལྡན་པ་བྱུང༌། ཡང་དཔལ་ལྡན་ནག་པོའི་བུ་ཚངས་པ། དེའི་བུ་(༢༡༢ན)དབང་ཕྱུག་ཆེན་པོ་ས་སྟེང་ཉི་འོག་གི་མཁས་པ་ཆེན་པོར་གྲགས་པ་དེས་མངོན་བརྗོད་སྣ་ཚོགས་གསལ་བ་མཛད། གཞན་ཡང་དྲང་སྲོང་མཁས་པ་རྣམས་ཀྱིས་སྨན་དཔྱད་ཀྱི་གཞུང་མང་དུ་བརྩམས་ཏེ། རྒྱུན་ཤེས་པས་ཚངས་པས་བསྟན་པ་བསྡུས་པ། ལེགས་ཐོས་ཀྱིས་བྱེ་བྲག་བཅོས། མཐོ་བཙུན་དཔལ་འཕེལ་གྱིས་གཅེས་བཏུས་ལ་སོགས་པ་དུ་མའི་ནང་ནས་གྲགས་ཆེ་བ་བརྒྱད་ཡོད་པར་བཤད་དོ། ། ཉ༢ གཉིས་པ་[བར་དུ་སྟོན་པས་ཇི་ལྟར་གསུངས་ཚུལ་]ནི། སྟོན་པས་འདུལ་མདོ་རྒྱུད་སོགས་ཐོར་བུར་གསུངས། ། དེ་ཚེ་རྒྱུན་ཤེས་གཞོན་ནུས་གསོས་སོགས་བྱུང༌། ། སྨན་གྱི་ནགས་སུ་རྒྱུད་བསྟན་ཁ་ཅིག་འདོད། ། བདག་ཅག་གི་སྟོན་པ་ཤཱཀྱའི་དབང་པོས་བཀའ་འཁོར་ལོ་དང་པོའི་སྐབས་སུ་འདུལ་བ་ལུང་གི་དུམ་བུ་གསུམ་པར་སྨན་ལུང་དུ། སྨན་དང་མས་བཏང་གི་དཔྱད་ལ་སོགས་པ་ཉུང་ཟད་ཙམ་བཤད། གཙོ་བོར་དགེ་སློང་རྣམས་ཀྱི་སྨན་རྣམ་པ་བཞི་པོ་དུས་སུ་རུང་བ་དང༌། ཐུན་ཚོད་དུ་རུང་བ་དང༌། ཞག་བདུན་པ་དང༌། ཇི་སྲིད་འཚོ་བའི་བར་དུ་བཅང་བ་རིམ་པ་ལྟར་ལྡེ་གུ་སོགས་དང༌། ཤིང་ཏོག་ཞོ་ཙམ་གྱི་བཏུང་བ་སོགས་དང༌། བུ་རམ་ཞུན་མར་སོགས་དང༌། རྩ་བའི་སྨན་ལ་སོགས་པ་བཀའ་སྩལ་པ་དང་དེའི་ཞར་དུ་འཚོ་བྱེད་གཞོན་ནུས་གསོས་ཀྱི་གླེང་གཞི་རགས་རིམ་བཅས་བྱུང་བ་ཡིན། དེ་ནས་མདོ་སྡེ་གསེར་འོད་དམ་པ་གསུངས་པའི་ཚེ་སྔོན་བྱུང་བ་འདས་པའི་དུས་ཀྱི་སངས་རྒྱས་རིན་ཆེན་གཙུག་ཏོར་ཅན་གྱི་བསྟན་པ་ལ་སངས་རྒྱས་ཉིད་ཚོང་དཔོན་གྱི་བུ་ཁྱེའུ་ཆུ་འབེབས་སུ་གྱུར་པའི་ཚེ་རང་གི་ཕ་སྨན་པ་ཆེན་པོ་རལ་པ་འཛིན་པ་ལ་ཁམས་ལ་མཁས་པར་བྱ་བ་དྲིས་པ་ལ། ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས། ། ཞེས་བྱ་བ་ལ་སོགས་ཤློཀ་དགུ་དང༌། ཆེ་བ་རྒྱ་ནག་ཏུ་འགྱུར་བ་ལས། ངས་དེང་སྔོན་གྱི་དྲང་སྲོང་གི། ། ནད་ཀྱི་གསོ་དཔྱད་ལ་བསྟེན་ནས། ། ཞེས་སོགས་ཅུང་ཟད་རྒྱས་པ་དག་ཀྱང་སྔོན་ཕ་ཚོང་དཔོན་རལ་པ་འཛིན་གྱིས་དྲང་སྲོང་གི་ལུགས་ལྟར་བཤད་པའི་ཚིག་རྣམས་བསྐྱར་ནས་གསུངས་པ་དང༌། རྒྱུད་(༢༡༢བ)མཁའ་འགྲོ་རྒྱ་མཚོ་ལས། དེས་ན་སེམས་ཅན་ཀུན་ཕན་ཕྱིར། ། ཐམས་ཅད་སྙིང་པོར་བསྡུས་པ་ཡིན། ། ཞེས་སོགས་བཅུད་ལེན་གྱི་ཚུལ་དང༌། འདས་པའི་དུས་སོགས་སྔོན་བྱུང་བའི། ། བདེ་ཆེན་བསྐལ་པ་དང་པོ་རུ། ། ཞེས་སོགས་དངུལ་ཆུའི་བྱུང་ཚུལ་སྦྱར་ཐབས་བཅས་པ་དང༌། རོ་དྲུག་སོ་སོའི་སྡེ་ཚན། སྨན་དང་རིན་ཆེན་སྣ་ཚོགས་ཀྱི་སྐྱེ་ཡུལ་བཟང་ངན་སོགས་རགས་པ་ཙམ་དང༌། ཤིན་ཏུ་འཁྱག་དང་སྤྲིན་འཁྲིགས་རུང༌། ། ཁྱད་པར་དུ་ནི་སོ་གའི་མཐར། ། ཞེས་སོགས་དུས་བཞིར་ནད་གསོག་ལྡང་ཞི་བའི་ཚུལ་རགས་པ་ཙམ་གསུངས་སོ། ། དཔལ་དུས་ཀྱི་འཁོར་ལོ་ལས་ཀྱང༌། ལུས་འདི་ལ་ནི་སེམས་ཀྱི་ཚོགས་རྣམས་མཐའ་དག་རོ་དྲུག་ཟོས་ཤིང་འཐུང་བ་དག་ལས་གྱུར་པ་སྟེ། ། ཞེས་སོགས་ལུས་ཆགས་པའི་ཚུལ་དང༌། རླུང་འཇོམས་ལན་ཚྭ་སྐྱུར་བ་དག་ཏུ་རབ་ཏུ་འགྱུར་ཏེ་མངར་དང་ཁ་བ་དག་ནི་མཁྲིས་པའི་དགྲ། ། ཞེས་སོགས་ཕྱི་ནང་གི་སྨན་བསྟེན་ཚུལ་དང༌། འཆི་བའི་འཇིགས་པ་སྟེར་བར་བྱེད་པའི་ཚེར་མ་ཅན་གྱི་གདོན་ནི་ངེས་འཇོམས་ཏེ། ། ཞེས་སོགས་འབྲུམ་པ་ལ་སོགས་པ་སྲུང་བ་དང༌། གསོ་བའི་ཐབས་དང༌། བཅུད་ལེན་དང༌། སྦྲུམ་མ་བདེ་བར་བཙའ་བའི་འཁྲུལ་འཁོར་སོགས་དང༌། བླ་གནས་ཀྱི་འཕོ་ཚུལ་སོགས་གསུངས་པ་རྣམས་ཀྱང་ཚེའི་རིག་བྱེད་དང༌། འདོད་པའི་བསྟན་བཅོས་སོགས་