Tibetan
ནས་མཁའ་འགྲོའི་གཙོ་མོ་དཔལ་ལྡན་གྲེང་བས་ཡན་ལག་བརྒྱད་པ་དང་ལྕང་ལོ་ནག་པོའི་རྒྱུད་སོགས་གདམས་པའི་གསང་མཛོད་གཏད། གཞན་ཡང་ལྷ་དང་མིའི་དྲང་སྲོང་ཆེན་པོ་རྣམས་དངོས་སུ་མཇལ་ནས་གསོ་དཔྱད་ཀྱི་གདམས་པ་སྩལ། ཛམ་གླིང་དང་སིངྒ་ལ་སོགས་གླིང་ཕྲན་དང་བཅས་པའི་ཡུལ་ཀུན་གྱི་མན་ངག་དང་མཁས་གྲུབ་རྣམས་ཀྱི་གདམས་པའི་བཅུད་བླངས་ནས། སྐུ་ཚེའི་སྟོད་ལ་ཡན་ལག་བརྒྱད་པའི་སྙིང་པོ་བསྡུས་པ་ལེའུ་དང་པའི་འགྲེལ་པ་སོགས་མཛད། སྐུ་ཚེའི་སྨད་ལ་རྫུ་འཕྲུལ་གྱི་བཀོད་པ་བསམ་གྱིས་མི་ཁྱབ་པ་དང་བཅས་ཆོས་ཀྱི་འཁོར་ལོ་བསྐོར་བ་ལས། གཞུང་ཐམས་ཅད་ཀྱི་དོན་བསྡུས་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཆེན་བཞི། རྒྱུད་ཆུང་བདུད་རྩི་བུམ་པ། ཆ་ལག་འགའ་ཞིག་བཅས་མཛད། ཐུན་མོང་གསོ་དཔྱད་དང༌། ཁྱད་པར་སྐལ་བ་མཆོག་དང་ལྡན་པའི་སློབ་མ་སུམ་སྟོན་ཡེ་ཤེས་གཟུངས་ལ་གསང་བ་སྙིང་ཐིག་གི་ཆོས་འཁོར་བསྐོར་ཏེ་རྒྱུད་བཞི་སྙིང་ཏིག་དང་བཅས་པ་ལོ་བཅུ་གཉིས་སུ་བཀའ་རྒྱས་བཏབ་ནས་སྩལ། མཐར་སྐུ་ལུས་མ་སྤངས་པར་སྨན་པའི་རྒྱལ་པོའི་ཞིང་དུ་(༢༡༧བ)གཤེགས་སོ། ། དེ་ལྟར་རྒྱུད་བཞི་ལ་བཀའ་དང་བསྟན་བཅོས་གང་རུང་དུ་འདོད་པ། གཉིས་ཀར་འདོད་པ། བསྟན་བཅོས་ལའང་འདོད་ལུགས་མི་གཅིག་པ་དུ་མར་བྱུང་ཡང༌། ཕྱི་ལྟར་ན་རྒྱལ་བའི་བཀའ། ནང་ལྟར་ན་གཏེར་མའི་རྒྱུན། གསང་བ་ལྟར་ན་གཡུ་ཐོག་པ་ཉིད་ཀྱི་གསུང་དུ་འདོད་པ་ཉིད་ལེགས་པའི་ཕྱོགས་སུ་རྗེ་བསྟན་པའི་ཉིན་བྱེད་ཡབ་སྲས་སོགས་ཀྱིས་བཞེད་པ་ཡིན་ཏེ། དང་པོ་ནི། སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་སོགས་དང༌། རྒྱུད་བླར། གང་ཞིག་རྒྱལ་བའི་བསྟན་པ་འབའ་ཞིག་སོགས་ཀྱི་ལུང་གིས་གྲུབ་ཅིང༌། གང་ཟག་མཆོག་དམན་མེད་པར་ཕན་ཐོགས་ཤིང་རང་རྐྱ་ཐུབ་པའི་གཞུང་ལུགས་དཔལ་ལྡན་རྒྱུད་བཞི་དང་མཚུངས་པ་གངས་ཅན་གྱི་ལྗོངས་སུ་མ་བྱུང་བའི་ཕྱིར་དང༌། གཉིས་པའང་། བཻ་རོས་སྦས་པའི་གཏེར་གྲྭ་པ་མངོན་ཤེས་ཀྱིས་རྩ་བ་ཙམ་ཕྱུང་ནས་གཡུ་ཐོག་པ་ལ་གཏད་པ་རང་མི་འགལ་ཏེ་འབྲེལ་ཆགས་པའི་ཕྱིར་དང༌། གསུམ་པ་ནི། སྙིང་ཐིག་གི་ལོ་རྒྱུས་ངེས་ཤེས་འདྲེན་བྱེད་ལས་དངོས་སུ་གསུངས་པར་མ་ཟད་རྒྱུད་རང་ལ་བརྟག་ན་དེ་ལྟར་འཐད་པར་གྲུབ་པའི་ཕྱིར་རོ། ། ལས་ཞེས་པ་ཕྱི་མ་འབྱུང་ཁུངས་ཀྱི་སྒྲའོ། ། སྨན་པའི་ཚང་བརྡོལ་བརྒྱུད་འཛིན་ཚད་མེད་ཀྱང༌། ། བྱང་པ་ཡབ་སྲས་ཟུར་མཁར་ཁུ་དབོན་སྲོལ། ། ཕྱིས་ནས་གྲགས་ཆེ་སངས་རྒྱས་ཆོས་འབྱུང་གིས། ། དེ་བསྟན་གསལ་བས་བོད་ཁམས་ཉེར་འཚོར་མཛད། ། གཡུ་ཐོག་པ་ལ་སྐུ་ཚེའི་སྟོད་སྨད་བར་གསུམ་དུ་སློབ་མ་གནམ་གྱི་སྐར་མ་དང་སའི་དྲེགས་པ་ལྟར་བྱུང་བས་སྨན་པའི་ཚང་བརྡོལ་ཏེ་བརྒྱུད་འཛིན་གྲངས་དང་ཚད་མེད་ཀྱང་གཙོ་བོ་རྫ་སྨན་ལེབ་པོ། བྱང་སྨན་དཔལ་ལེ་སོགས་གྲགས་ཆེ་བ་བཅུ་གཅིག་གི་ནང་ནས་གདམས་པ་ཡོངས་སུ་རྫོགས་པ་སུམ་སྟོན་ཡེ་ཤེས་གཟུངས་ལ་རྒྱུད་བཞི་སྙིང་ཐིག་ཆ་ལག་དང་བཅས་པའི་བཀའ་བབས། གཡུ་ཐོག་འབུམ་སེང༌། བི་ཇི་ལེགས་ལྡན་མགོན་པོ། བྲང་ཏི་དཔལ་ལྡན་མཚོ་བྱེད་སོགས་སྔ་ཕྱིར་རྒྱུད་ལ་(༢༡༨ན)འགྲེལ་པ་བྱེད་པ་དུ་མ་བྱུང༌། ཁྱད་པར་ཕྱིས་སུ་བྱང་པ་ཡབ་རིགས་ལྡན་ཆེན་པོ་རྣམ་རྒྱལ་གྲགས་བཟང༌། སྲས་མིའི་ཉི་མ། ལྷ་བཙུན་བཀྲ་ཤིས་དཔལ་བཟང༌། བསོད་ནམས་ཡེ་ཤེས་རྒྱལ་མཚན་རྣམས་ཀྱིས་བརྒྱུད་འགྲེལ་ཁོག་དབུབ་ལྷན་ཐབས་དུ་མ་མཛད་དེ་བྱང་ལུགས་ཞེས་པའི་སྲོལ་གཏོད། ཡང་ཟུར་མཁར་ཁུ་བོ་མཉམ་ཉིད་རྡོ་རྗེ་ལ་གཡུ་ཐོག་པས་དངོས་སུ་རྗེས་སུ་གནང་བ་ལྟར་རྒྱུད་བཞི་དག་ཐེར། བླ་སྒྲུབ་ཁ་སྐོང༌། བྱེ་བ་རིང་བསྲེལ་སོགས་སྨན་གཞུང་མང་པོ་མཛད། སློབ་མ་བྱིན་རླབས་ཞུགས་པ་བརྒྱད་སོགས་དུ་མའི་ནང་ནས། གསོ་རིག་ལ་མན་ངག །ཕྲིན་ལས། ལག་ལེན། བཤད་པ་མཐར་ཕྱིན་བཞི་བྱུང་བའི་རྒྱུན་ལས། ཀོང་སྨན་རྐྱེན་པ་བླ་རྟ་ཚེ་དབང༌། མཚོ་སྨད་མཁན་ཆེན། བྱར་པོ་པཎ་ཆེན་སོགས་མཁས་པ་མང་པོས་ཡིག་ཆ་རྒྱ་ཆེར་མཛད། ཁྱད་པར་ཨ་བོ་ཆོས་རྗེའི་དབོན་ཟུར་མཁར་བློ་གྲོས་རྒྱལ་པོའམ་ཀརྨ་ལེགས་བཤད་འཚོལ་ལ་རྗེ་མི་བསྐྱོད་རྡོ་རྗེས་ལུང་བསྟན་པ་ལྟར་ཐུགས་བརྩོན་ཆེན་པོས་གསོ་རིག་གི་གཞུང་ལུགས་འཆད་སྤེལ་དང༌། མེས་པོའི་ཞལ་ལུང་སོགས་ཡིག་ཆ་མང་པོ་མཛད། དེ་དག་གི་རྒྱུན་ལ་ཟུར་ལུགས་ཞེས་གྲགས། བྱང་ཟུར་གྱི་རིང་སྲོལ་འཛིན་པ་བར་མ་ཆད་དུ་བྱུང་བའི་ནང༌། ཕྱིས་ཀྱི་དུས་སུ་གྲགས་ཆེ་བ་སྡེ་སྲིད་སངས་རྒྱས་རྒྱ་མཚོས་རྒྱུད་འགྲེལ་བཻ་ཌཱུར་སྔོན་པོ། ལྷན་ཐབས་དུས་མིན་འཆི་ཞགས་གཅོད་པའི་རལ་གྲི་སོགས་མཛད་ཅིང་ལུགས་སྲོལ་གཙོ་བོ་བྱང་པའི་རྗེས་སུ་འབྲངས། ད་ལྟའི་བར་དུ་ཡིག་ཆ་དེ་དག་ཕྲིན་ལས་ཆེ། སྨན་གྱི་སློབ་གྲྭའང་བཙུགས། ཡང་ཀུན་གཟིགས་ཆོས་ཀྱི་འབྱུང་གནས་ཉིད་གསོ་བ་རིག་པ་ལ་སྔོན་སྦྱངས་སད་པ་ལྟ་བུས་ཀློང་བརྡོལ་གྱིས་ཁྱད་པར་དུ་མཁས་པར་གྱུར་ཅིང༌། ཟུར་མཁར་ཕྱི་མའི་སློབ་བརྒྱུད་དབོན་ཚང་ཡེ་ཤེས་དང༌། འཕགས་ཡུལ་ནུབ་ཕྱོགས་ཕྲེང་གིའི་སྨན་པ་ཨེ་ཏྲོ་སེ། རྒྱ་ནག་གི་སྨན་པ་མཁས་པ་རྣམས་ལས་བཤད་རྒྱུན་དང་དཀའ་གནད་འདྲི་མོལ་(༢༡༨བ)གྱིས་གཏན་ལ་ཕབ་སྟེ་སྨན་གྱི་བླ་མ་གཉིས་པའི་གོ་འཕང་བརྙེས། སློབ་མ་མཁས་པ་མང་དུ་བྱོན་ཅིང་ད་ལྟའི་བར་དུ་བཤད་པ་དང་ལག་ལེན་གྱི་རྒྱུན་མ་ཉམས་པས་བརྒྱུད་འཛིན་རྣམས་ཀྱང་སྨན་པ་གཞན་ལས་ཁྱད་པར་འཕགས་པ་ཡོངས་སུ་གྲགས་པས་མཚོན། མདོར་ན་དེ་དག་གིས་གསོ་བ་རིག་པའི་བསྟན་པ་གསལ་བས་བོད་ཁམས་ཐམས་ཅད་ཉེར་འཚོར་མཛད་པ་ཡིན་ནོ། ། ཆ༢ གཉིས་པ་རིག་གནས་ཆུང་བ་རྣམས་ཀྱི་བྱུང་བ་སྨོས་པ་ལ་བཞི། ཇ༡ རྩིས། ཇ༢ སྙན་དངགས། ཇ༣ སྡེབ་སྦྱོར། ཇ༤ མངོན་བརྗོད་ཀྱི་ཞར་བྱུང་ཟློས་གར་བཅས་སྨོས་པའོ། ། ཇ༡ དང་པོ་ལ་གསུམ། ཉ༡ སྐར་རྩིས། ཉ༢ གཡུལ་རྒྱལ། ཉ༣ འབྱུང་རྩིས་སོ། ། ཉ༡ དང་པོ་ནི། སྐར་རྩིས་དྲང་སྲོང་རྣམས་ཀྱིས་བྱས་པ་མང༌། ། གཟའ་དང་རྒྱུ་སྐར་གྱི་འགྲོས་ལ་བརྟེན་ནས་དུས་ཀྱི་རྣམ་བཞག་དང་བཟང་ངན་གྱི་འབྲས་བུ་ལུང་སྟོན་པའི་རྩིས་ནི་དྲང་སྲོང་རྔ་བོང་དང་གརྒ་ལ་སོགས་པ་རྣམས་ཀྱིས་བྱས་པའི་རྒྱུན་ཕྱི་རོལ་པ་ལ་དེའི་བསྟན་བཅོས་སྨྲ་བ་མང་ངོ༌། ། འོན་ཀྱང་རིགས་ལྡན་དགུ་པ་རྒྱ་མཚོ་རྣམ་རྒྱལ་སེང་གེའི་ཁྲིར་འཁོད་པ་ན་རྒྱ་གར་ནུབ་ཕྱོགས་མ་ཁའི་ཡུལ་དུ་ཀླ་ཀློའི་སྟོན་པ་བདུན་པ་མུན་ཅན་སྦྲང་རྩིའི་བློ་གྲོས་ཀྱིས་གྲུབ་མཐའི་རྩིས་སྦས་ནས་བྱེད་པའི་རྩིས་བསྟན་པས་གཟའ་སྐར་སོགས་མི་རྟོགས་པར་གྱུར་པ་ན། རིགས་ལྡན་རྒྱལ་དཀས་བསྡུས་རྒྱུད་ཀྱི་དངོས་བསྟན་བྱེད་རྩིས་ཕྱག་བཞེས་སུ་མཛད་ནས་རྩིས་གཞི་ཟུག །དེ་འོག་མེ་ཡོས་ལ་དུས་ཀྱི་འཁོར་ལོ་འཕགས་ཡུལ་ཡོངས་གྲགས་སུ་བྱུང་བས་ཕྱི་རོལ་པའི་བྱེད་གྲུབ་གཉིས་ཀ་ཉམས་པར་ལུང་བསྟན་པའི་དོན་ཐོག་ཏུ་བབས་ནས་རྣམ་པར་དག་པའི་རྩིས་འགོ་ཚུགས། ཀླ་ཀློ་ཞུགས་ནས་འདིའི་བར་བསྡམས་པས་མེ་མཁའ་རྒྱ་མཚོའི་ལོར་གྲགས་ཤིང༌། མེ་ཡོས་དེ་ནི་རབ་བྱུང་རྣམས་ཀྱི་དང་པོ་ཡིན་པའང་ཤེས་པར་བྱའོ། ། སྟོན་པས་མདོ་རྒྱུད་རྣམས་དང་དུས་འཁོར་གྱི། ། འཇིག་རྟེན་ཁམས་ལེར་གསུངས་ལ་བུ་དོལ་དང༌། ། ཁྱད་པར་རང་བྱུང་རྒྱལ་བས་རྩིས་བསྡུས་མཛད། ། བདག་ཅག་(༢༡༩ན)གི་སྟོན་པས་ཕལ་པོ་ཆེར་རྔུལ་རྩིས་སུ་གྲགས་པ་དང༌། རྒྱ་ཆེ་རོལ་པར་རྩིས་ལ་སྦྱངས་པའི་ཚུལ་བསྟན་པ་ལས་བརྩམས་ཏེ་གྲངས་དང་རྩིས་ཀྱི་རིག་པ་གསུངས་པ་སོགས་མདོ་དང༌། རྒྱུད་རྒྱལ་མཁའ་འགྲོ་རྒྱ་མཚོ་གཙོར་གྱུར་གསུང་རབ་ཕལ་ཆེར་རྣམས་དང༌། ཁྱད་པར་དཔལ་དུས་ཀྱི་འཁོར་ལོའི་འཇིག་རྟེན་ཁམས་ལེར་གསལ་བར་གསུངས་པ་ལ་བརྟེན་ནས་མཁས་པ་རྣམས་ཀྱིས་ལག་ལེན་ཅི་རིགས་པ་བཏབ། བོད་དུ་བུ་སྟོན་ཐམས་ཅད་མཁྱེན་པ་དང༌། ཀུན་མཁྱེན་དོལ་པོ་པ་གཉིས་ཀྱིས་ཕྱི་ནང་གཞན་གསུམ་གྱི་དུས་ཀྱི་འཁོར་ལོའི་ཚུལ་རྒྱ་ཆེར་གསལ་བར་མཛད། བུ་སྟོན་གྱིས་རྩིས་ཀྱི་བསྟན་བཅོས་མཁས་པ་དགའ་བྱེད་ཡན་ལག་བཅས་པ། དོལ་པོས་ལྔ་བསྡུས་ཀྱི་ལག་ལེན་མ་བུ་རྣམས་དང༌། ཁྱད་པར་རྒྱལ་བ་གཉིས་པ་རང་བྱུང་ཞབས་ཀྱིས་བསྡུས་རྒྱུད་འཇིག་རྟེན་ཁམས་ལེའི་ཚིག་རྣམས་དོན་ལ་བརྟོན་པས་གོ་བདེ་བའི་སླད་བདུན་ཚིག་ཏུ་བཀྲོལ། རྒྱུད་ལས་མ་བཀག་པའི་རྩིས་ཉེ་བར་མཁོ་བ་འགའ་ཞིག་ཀྱང་བསྣན་ཏེ་རྩིས་ཀུན་བསྡུས་པ་ཞེས་བྱ་བའི་གཞུང་མཛད་དེ་འདི་དག་ནི་བོད་ཀྱི་རྩིས་གཞུང་རྣམས་ཀྱི་ཐོག་མའོ། ། ཕུག་པ་བྱང་བདག་སོགས་ཀྱིས་རང་སྲོལ་བཀྲལ། ། ཕྱིས་ནས་ཕུག་མཚུར་གྲུབ་རྩིས་གཉིས་སུ་གྱེས། ། ཕུག་པ་ལྷུན་གྲུབ་རྒྱ་མཚོས་པད་དཀར་ཞལ་ལུང་མ་བུ་བརྩམས། བསམ་རྒྱལ་བ་སོགས་ཀྱིས་སྤེལ་བ་ལས་ཕུག་ལུགས་སུ་གྲགས། བྱང་པ་རིགས་ལྡན་ཆེན་པོས་ཀྱང་དུས་ཀྱི་འཁོར་ལོའི་ཚུལ་རང་བློའི་རྣམ་དཔྱོད་ཀྱིས་དཔྱད་ནས་སྲོལ་ལེགས་པར་བཀྲལ། མཚུར་ཕུ་འཇམ་དབྱངས་ཆེན་པོ་དོན་གྲུབ་འོད་ཟེར་གྱིས་རང་བྱུང་རྒྱལ་བའི་རྗེས་སུ་འབྲང་སྟེ་རྩིས་ཀྱི་གཞུང་ལུགས་ཆེན་པོ་མཛད་ཅིང་རྩིས་བསྡུས་ལ་ཕྲིན་ལས་པ་ཕྱོགས་ལས་རྣམ་རྒྱལ་དང་དཔལ་གཙུག་ལག་ཕྲེང་བས་འགྲེལ་ཆེན་མཛད་ཅིང་མཚུར་ལུགས་སུ་(༢༡༩བ)གྲགས། དེ་དག་གིས་རྒྱུན་ལས་ཕྱིས་ནས་སྡེ་སྲིད་སངས་རྒྱས་རྒྱ་མཚོས་བཻ་དཀར། སྨིན་གླིང་ལོ་ཆེན་དྷརྨ་ཤྲཱིས་ཉིན་བྱེད་སྣང་བ་མཛད་པ་སོགས་ཀྱི་རྒྱུན་ལ་ཕུག་ལུགས་གྲུབ་རྩིས་དང༌། རྗེ་དབོན་མཁས་པ་ཆེན་པོ་ངེས་ལེགས་བསྟན་འཛིན་གྱིས་ཉེར་མཁོ་བུམ་བཟང་བརྩམས་པ་སོགས་ལས་མཚུར་ལུགས་གྲུབ་རྩིས་ཞེས་ལུགས་སྲོལ་ཐ་དད་པ་གཉིས་སུ་གྱེས་སོ། ། ཉ༢ གཉིས་པ་[གཡུལ་རྒྱལ་]ནི། དབང་ཕྱུག་ཨུ་མའི་ཞུས་ལེན་གཡུལ་རྒྱལ་རྒྱུད། ། གློ་བོས་བསྒྱུར་ཅིང་ཕུག་པ་སོགས་ཀྱིས་འགྲེལ། ། བཅོམ་ལྡན་འདས་འཇིག་རྟེན་དབང་པོ་ཕྱི་པ་ལ་དགའ་བའི་ངོར་ལྷ་ཆེན་པོ་དབང་ཕྱུག་གི་སྐུར་བཞེངས་ནས་དུས་སྔ་མོར་ལྷ་དང་ལྷ་མིན་གཡུལ་འགྱེད་པའི་ཚེ་ལྷའི་དབང་པོས་དྲིས་ནས་བཤད། སླར་ཕྱིས་ཞིག་ཡུམ་ཨུ་མ་དང་ཞུས་ལེན་གྱི་ཚུལ་དུ་གསུངས་པ་དཔལ་གཡུལ་ལས་རྣམ་པར་རྒྱལ་བའི་རྒྱུད་ནི་ཐོག་མར་མི་ཡུལ་དུ་ཀརྨ་སིདྡྷ་ཨུཏྤལ་ལ་ཞེས་པས་སྤེལ་ཞིང༌། བོད་དུ་འཛུམ་ལང་གི་པནྜི་ཏ་ཛ་ཡཱ་ནནྡ་དང༌། གློ་བོ་ལོ་ཙཱ་བ་ཤེས་རབ་རིན་ཆེན་གྱིས་བསྒྱུར། གཞན་ཡང་མན་ངག་སྦས་པ་གསལ་བྱེད། རིན་ཆེན་རྒྱ་མཚོ་སོགས་ཀྱང་བྱུང་ལ། རྒྱུད་འདིའི་བོད་འགྲེལ་ཐོག་མ་ཕུག་པ་བ་ལྷུན་གྲུབ་རྒྱ་མཚོས་མཆོག་དགའ། དེའི་དབོན་བརྒྱུད་དཔལ་མགོན་ཕྲིན་ལས་པའི་སློབ་བུ་དུས་རམ་པ་འཆི་མེད་བདེ་བས་ལག་ལེན་ནོར་འཕྲེང་ངམ་འོད་ཟེར་བརྒྱ་པ། པད་དཀར་ཡིད་བཞིན་དབང་པོས་ངོ་མཚར་རྒྱན་མེ། བོ་དོང་པ་ཡོན་ཏན་བློ་གྲོས་ཀྱིས་སྙིང་པོ་བསྡུས་པ་རྩ་འགྲེལ་མཛད་པ་སོགས་ཡིག་ཆ་མང་དག་བྱུང་ཡང༌། མན་ངག་གི་གནད་རྣམས་ནི་ཐོག་མ་ནས་སྦས་ཆེས་པས་ཕལ་ཆེར་རིག་བཟོའི་ལམ་དུ་འཕྱན་ཞིང་དེང་སང་བོད་དུ་ནི་མིང་ཙམ་དང༌། རྒྱ་བལ་གྱི་ཕྱི་པ་རྣམས་ལ་མན་ངག་བཅས་ཆེས་དར་བར་ཡོད་པར་སྣང་ངོ༌། ། ཉ༣ གསུམ་པ་[འབྱུང་རྩིས་]ནི། འབྱུང་རྩིས་ཧུང་དྷཱི་རྒྱལ་པོས་རུས་སྦལ་ལ། ། བརྟགས་ནས་མཛད་ཅིང་དེར་བརྟེན་ཕྱིས་བྱུང་མང༌། ། ཁམས་ཁྲ་ཟླ་ཁྱུང་སོགས་(༢༢༠ན)ཀྱིས་སྲོལ་གཏོད་ཀྱང༌། ། སྔ་འགྱུར་བསླད་ཆེ་ཕྱིས་སུ་ཀུན་མཁྱེན་རྗེས། ། ཡིད་རྟོན་ཕེར་བའི་རྒྱ་རྩིས་གསར་འགྱུར་མང༌། ། འབྱུང་རྩིས་སམ་ནག་རྩིས་སུ་གྲགས་པ་བྱུང་བའི་ཁུངས་ནི་རྒྱ་ནག་སྟེ། དེའང་གོང་མ་རྣམས་ཀྱི་ཐོག་མ་སྤ་ཧུ་ཧཤི་དྷཱི་རྒྱལ་པོ་ལ་རྒྱ་མཚོའི་མཐའི་འབངས་ཞིག་གིས་རུས་སྦལ་གསེར་གྱི་ཁ་དོག་ཅན་ཕུལ་བ་ལ་གཟིགས་པས་བརྟགས་ནས་སྤར་ཁ་བརྒྱད་ཀྱི་ཕྱག་རྒྱ་ཐོག་མར་ཐུགས་ལ་ཤར། དེ་ལ་བརྟེན་ནས་སྤར་སྨེ་ལོ་སྐོར་གྱི་རྩིས་རྣམས་མཛད། དེ་ལ་བརྟེན་ནས་སྤྲུལ་པའི་རྒྱལ་བློན་མཁས་པ་རྣམས་ཀྱིས་རིམ་པར་མཛད་པ་དང༌། ཁྱད་པར་ཁོང་སྤུ་ཙི་ཞེས་འཇམ་དབྱངས་ཀྱི་སྤྲུལ་པ་བོད་དུ་ཀོང་ཙེ་འཕྲུལ་རྒྱལ་དུ་གྲགས་པ་དེས་ཀྱང་རྩིས་དང་གཏོ་གཞུང་མཐའ་ཡས་པའི་སྲོལ་གཏོད་པ་སོགས་ཕྱིས་བྱུང་གི་གཞུང་ཤིན་ཏུ་མང་ཞིང༌། བོད་འདིར་ཐོག་མར་ཀོང་ཇོ་སྔ་ཕྱིས་རྒྱ་ནག་གི་རྩིས་གཞུང་བསྣམས་ཏེ་སྲོལ་ཕྱེས། ཕྱི་དར་ལ་ལོ་ཙཱ་བ་ཁམས་པ་ཁྲ་མོ་དང༌། པཎྜི་ཏ་ཟླ་བ་ནག་པོ། ཁྱུང་ནག་ཤཱཀྱ་དར་རྒྱས་སོགས་ཀྱིས་གསལ་སྒྲོན་གྱིས་མཚོན་པའི་གཞུང་མང་པོ་བསྒྱུར་བཤད་མཛད། ཁྱུང་ནག་སོགས་ཀྱིས་འབྱུང་རྩིས་གཏེར་མའང་མང་པོ་ཕྱུངས་ནས་ཡོངས་ལ་གྲགས་པའི་སྲོལ་ཆེན་གཏོད་ཀྱང༌། སྔ་འགྱུར་རྣམས་ཀོང་ཇོ་ཕྱི་མས་བསྐོར་མགོ་བསྒྱུར་བ་དང༌། འགའ་ཞིག་བོད་བསོད་ནམས་དམན་ཅིང་རྒྱ་ནག་གི་མི་ཞེ་གནག་པས་གནད་གསང་གི་སྐོར་མགོ་རྣམས་སྦས་པ། མིན་པ་ལ་ཡིན་པར་བཟུང༌། རང་བཟོའི་རིགས་པ་གསེར་དུ་རློམས། སྙིང་པོའི་འབྲས་བུས་སྟོངས་པའི་བཤད་ཡམས་ལོ་མ་མང་པོས་ཤིན་ཏུ་བསླད་ཆེ་བས་རྒྱ་ནག་དངོས་དང་མཐུན་པའི་གཞུང་མ་མཆིས་པ་ལ། ཕྱིས་སུ་ཀུན་མཁྱེན་ཆོས་ཀྱི་རྗེ་དྷརྨཱ་ཀ་རས་སྔོན་གནས་རྗེས་སུ་དྲན་པའི་རྒྱ་དང༌། འཇང་ཡུལ་ཕྱོགས་ཀྱི་མཁས་པ་ཡྭན་ཝན་ལིང་སོགས་རང་ལུགས་ཀྱི་ཆོས་སྡེར་བྱུང་བའི་རྐྱེན་ལ་བརྟེན་ཡིད་བརྟོན་ཕེར་ངེས་པའི་རྒྱ་རྩིས་གསེར་འགྱུར་ལ། ས་དཔྱད། ཚེ་རྩིས། (༢༢༠བ)རོ་བག་ཀེག་གསུམ། ཉེར་མཁོའི་འབྲས་རྩིས་སོགས་སྲིད་པ་འཕྲུལ་གྱི་མེ་ལོང་གི་སྐོར་མང་དུ་བྱུང་བར་སྣང་ངོ༌། ། ཇ༢ གཉིས་པ་[སྙན་དངགས་]ནི། སྙན་དངགས་ཕྱི་པར་གྲགས་ཆེ་བྷ་ར་ཏ། ། ཕོ་ཉ་བརྒྱད་སོགས་ནག་མོའི་ཁོལ་པས་བྱས། ། མེ་ལོང་དཎྜིས་མཛད་ལ་རྒྱ་འགྲེལ་མང༌། ། ཚིག་རྒྱན་གྱི་བསྟན་བཅོས་སྙན་དངགས་ནི་ཕྱི་རོལ་པའི་གྲུབ་མཐའ་སྨྲ་བ་རྣམས་ལ་གྲགས་ཆེ་བས། སྔོན་སྐྱེ་དགུའི་ཚེ་ལོ་ཉི་ཁྲི་ཐུབ་པའི་དུས་དྲང་སྲོང་རྒྱས་པས་བརྩམས་ཏེ་ཚོགས་བདག་གིས་ཡིག་མཁན་བྱས་པར་གྲགས་པའི་བསྟན་བཅོས་བྷ་ར་ཏ་ཤློ་ཀ་འབུམ་ལྷག་ཡོད་པ་དང༌། མེ་བཞིན་འཇུག་པའི་བུ་མོས་བྱས་པའི་སྙན་དངགས་སྒོམ་པའི་ཆོས་དང༌། གྲོགས་མཁར་བས་བྱས་པའི་རཱ་མ་ཎ་ཡ་ན་དང༌། མརྐེཎྜེ་ཡས་བྱས་པའི་ཨཥྚ་ད་ཤ་པུ་རཱ་དང༌། ར་མ་ཤྲ་མས་བྱས་པའི་ར་གྷུ་ཝཾ་ཤ་ལ་སོགས་པ་དྲང་སྲོང་གི་བསྟན་བཅོས་མང་དུ་ཡོད་པར་གྲགས་ཀྱང་བོད་དུ་མ་བྱུང་ལ། ཕྱིས་སུ་གྲགས་ཆེ་བ་སྤྲིན་གྱི་ཕོ་ཉ་ལ་སོགས་པའི་ཕོ་ཉ་བརྒྱད་དང༌། གཞོན་ནུ་འབྱུང་བ་སོགས་ནག་མོའི་ཁོལ་པོས་བྱས་པའི་བསྟན་བཅོས་ཀྱིས་མཚོན་མང་དུ་ཡོད་པ་ལས། སྔ་གཞུང་ཀུན་གྱི་ལེགས་ཆ་བསྡུས་པ་རྒྱན་གྱི་བསྟན་བཅོས་མེ་ལོང་ཞེས་བྱ་བ་དངོས་གནས་ཕྱི་རོལ་པའི་པཎྜི་ཏ་ཕྱི་ནང་གཉིས་ཀའི་གྲུབ་མཐའ་ལ་མཁས་པའི་སློབ་དཔོན་དཎྜི་སྟེ་དབྱུག་པ་ཅན་གྱིས་མཛད་པ་ལ་ཕྱི་ནང་གི་རྒྱ་འགྲེལ་མང་ཞིང༌། ཕྱིས་རཏྣ་ཤྲཱི་དང་ངག་དབང་གྲགས་པའི་ཊཱིཀ་ཆེན་གྱི་རྒྱ་དཔེ་རྗེ་དྷརྨཱ་ཀ་རའི་ཕྱག་ཏུ་བྱོན། བོད་འགྲེལ་དཔང་ལོ་འཇམ་དབྱངས་ཁ་ཆེ། སྒྲ་པ་སངྒྷ་ཤྲཱི། རིན་སྤུངས་པ། བོད་མཁས་པ་མི་ཕམ་རྣམ་རྒྱལ་སོགས་སྔ་ཕྱི་དུ་མར་བྱུང་བའི་ནང་ནས་ཀུན་མཁྱེན་ཆེན་པོའི་གསུང་རྒྱུན་སྐུ་ཞབས་ཁམས་པ་རིན་པོ་ཆེ་བསྟན་འཛིན་ཆོས་ཀྱི་ཉི་མས་མཛད་པའི་ལེགས་བཤད་ངག་གི་རོལ་མཚོ་ཉིད་ཁྱད་པར་དུ་འཕགས་པའོ། ། ཇ༣ གསུམ་པ་[སྡེབ་སྦྱོར་]ནི། སྡེབ་སྦྱོར་གྲོག་མཁར་བས་བཤད་རྒྱལ་བའི་ལྷས། ། དམར་སེར་ཅན་ལུགས་བཀོད་ལས་ངོ་མཚར་བའི། ། སྦྱོར་བ་(༢༢༡ན)དུག་ལྡན་རིན་འབྱུང་ཞི་བས་མཛད། ། ཚིགས་སུ་བཅད་པ་ལེགས་པར་སྦྱར་བའི་ཚུལ་བསྟན་པ་སྡེབ་སྦྱོར་གྱི་ཚུལ་ནི་དྲང་སྲོང་གྲོག་མཁར་བས་ཐོག་མར་བཤད་པར་གྲགས་ཤིང༌། རྒྱ་མཚོའི་འགྲམ་གྱི་བྱེ་མ་ལ་ཀླུ་ཞིག་གིས་པྲསྟཱ་ར་འགོད་པ་ལ་ནམ་མཁའ་ལྡིང་གིས་ཟ་བར་བརྩམས་པས། འདི་མ་ཟིན་བར་དུ་མ་ཟ་ཞིག་སྨྲས་པར་དེས་ཀྱང་དེ་བཞིན་བྱས་ནས་གྲུབ་པ་ནམ་མཁའ་ལྡིང་གིས་ཀྱང་དོན་ཁོང་དུ་ཆུད་དེ་སློབ་དཔོན་དུ་གྱུར་པར་ཤེས་ནས་བཟོད་པར་གསོལ་ཅིང་ཅི་བདེར་གནས་སུ་བཅུག་པ་ནི་ཀླུ་རྒྱལ་ལྷག་མ་ཅན་ནམ། དྲང་སྲོང་དམར་སེར་ཅན་དུ་གྲགས་པ་ཡིན་ཅིང༌། དེའི་གཞུང་ལུགས་ལ་རྒྱལ་བའི་ལྷས་འགྲེལ་པ་བྱས་ཤིང་འཆད་ཉན་དར་ཡང་ཡོན་ཏན་བརྒྱད་ཀྱིས་དབེན་པས། མདོར་བསྡུས་ཚིགས་བཅད་གསལ་བ་དང༌། ། མདོ་ཉིད་དཔེར་བརྗོད་གྱུར་པ་དང༌། ། མ་འདྲེས་རིམ་ཅན་འདོན་སླ་དང༌། ། སྡོད་དང་ཚོགས་དང་ཡོན་ཏན་བརྒྱད། ། ཅེས་པས་ཁྱད་པར་དུ་བྱས་ཤིང་། ངོ་མཚར་བའི་སྦྱོར་བ་དྲུག་དང་ལྡན་པའི་གཞུང་སྡེབ་སྦྱོར་རིན་འབྱུང་རྩ་འགྲེལ་རྩོད་དུས་ཀྱི་ཐམས་ཅད་མཁྱེན་པ་རིན་འབྱུང་ཞི་བས་མཛད། སློབ་དཔོན་དཔལ་ཡེ་ཤེས་ཀྱིས་མཛད་པའི་དཔེར་བརྗོད་དང༌། བོད་དུ་རྗེ་བརྒྱད་པ། སྨིན་གླིང་ལོ་ཆེན་སོགས་ཀྱི་འགྲེལ་པ་དང་དཔེར་བརྗོད་མང་བ་ལས། ཕྱིས་སུ་འཇམ་མགོན་བླ་མ་འགྱུར་མེད་བསྟན་འཛིན་འཕེལ་རྒྱས་ཀྱིས་མཛད་པའི་ཊཱིཀ་ཉིད་ཞལ་གསལ་ལ་ཤིན་ཏུ་ལེགས་སོ། ། གཞན་ཡང་ཐུབ་པ་ཀྲྀཥྞ་མི་ཤྲས་བྱས་པའི་སྡེབ་སྦྱོར་ཐོས་པས་ཆུབ་པ་རྩ་འགྲེལ་ཀུན་མཁྱེན་བསྟན་པའི་ཉིན་བྱེད་ཀྱིས་གསར་འགྱུར་མཛད་དེ་སྔར་མ་གྲགས་པའི་གཞུང་ལུགས་སོ། ། ཇ༤ བཞི་པ་[མངོན་བརྗོད་]ནི། མངོན་བརྗོད་མེ་དཱི་ནི་དང་སྣ་ཚོགས་གསལ། ། ཧཱ་རཱ་བ་ལཱི་དྲག་པོའི་འབངས་སྦྱར་སོགས། ། མང་ཡང་འཆི་མེད་སེང་གེའི་མཛོད་ཉིད་མཆོག ། རྒྱ་འགྲེལ་རྣམ་བཤད་བདུད་རྩི་ཚིག་གི་ཟླ། ། འདོད་འཇོ་སོགས་མཆིས་ཕྱི་མ་གསར་འགྱུར་ཏེ། ། ཟློས་(༢༢༡བ)གར་བསྟན་བཅོས་བོད་དུ་མ་འགྱུར་རོ། ། མིང་གི་མངོན་པར་བརྗོད་པའི་བསྟན་བཅོས་ནི་རྒྱ་གར་དུ་མེ་དཱི་ནི་ཀ་ར་དང༌། པནྜི་ཏ་དཔལ་འཛིན་སྡེས་མཛད་པའི་སྣ་ཚོགས་གསལ་བ་དང༌། ཧཱ་རཱ་བ་ལཱི་དང༌། དྲག་པོའི་འབངས་ཀྱིས་སྦྱར་བ་སོགས་མང་དུ་མཆིས་ཀྱང༌། འཕགས་མས་རྗེས་སུ་བཟུང་བའི་སློབ་དཔོན་ཆེན་པོ་འཆི་མེད་སེང་གེས་མཛད་པའི་འཆི་མེད་མཛོད་ཉིད་མཆོག་ཏུ་གྱུར་པ་ཡིན་ལ། དེའི་རྒྱ་འགྲེལ་རྣམ་བཤད་བདུད་རྩི། ཚིག་གི་ཟླ་བ་གཉིས་ནི་པཱ་ཎི་པའི་ལུགས་ཀྱི་སྒྲ་སྒྲུབ་སྦྱར་བ་ཡིན་ཅིང༌། རྒྱ་དཔེ་ཀུན་མཁྱེན་རྗེའི་ཕྱག་