Tibetan
ཏུ་འབྱོར། སུ་བྷུ་ཏིས་མཛད་པའི་འགྲེལ་པ་འདོད་འཇོ་ནི་ཙནྡྲ་པའི་ལུགས་ཀྱི་སྒྲ་སྒྲུབ་སྦྱར་བ་ཡིན། དེ་སོགས་འགའ་ཞིག་མཆིས་པའི་ནང་ནས་ཕྱི་མ་འདོད་འཇོ་ནི་ཡང་ལོ་དང་ཞ་ལུ་སོགས་ཀྱིས་ཇི་བཞིན་མ་འགྱུར་བས་ཀུན་མཁྱེན་རྗེས་རྩ་བ་ལ་འགྱུར་བཅོས། འགྲེལ་པ་རྫོགས་པར་གསར་འགྱུར་དུ་མཛད་ཅིང༌། དེའི་མིང་དོན་ཉེ་བར་བསྡུས་པ་མཛོད་འགྲེལ་སྒོ་བརྒྱ་འབྱེད་པའི་ལྡེའུ་མིག་ཅེས་བྱ་བའང་མཛད་པ་ཡིན་ཏེ་དེ་དག་གིས་རིག་གནས་ཆུང་བ་བཞིའི་གཞུང་ཚང་ལ། ཟློས་གར་ནི་བོད་དུ་ཉེ་བར་མི་མཁོ་བས་དེའི་བསྟན་བཅོས་དངོས་མ་འགྱུར། བོད་སྔ་མ་རྣམས་ཀྱིས་སློབ་དཔོན་ཙནྡྲ་གོ་མཱིའི་འཇིག་རྟེན་ཀུན་ཏུ་དགའ་བའི་ཟློས་གར་དང༌། དཔལ་དགའ་བའི་ལྷའི་ཀུན་ཏུ་དགའ་བའི་ཟློས་གར་དག་དེའི་ཕྱོགས་སུ་འདྲེན་ནོ། ། ཆ༣ གསུམ་པ་འཕྲོས་དོན་སྨོས་པ་ལའང་གཉིས། ཇ༡ རིག་གནས་ཆུང་བ་རྣམས་ལས་འཕྲོས་པ་དང༌། ཇ༢ སྤྱི་ལས་འཕྲོས་པའོ། ། ཇ༡ དང་པོ་ནི། ཕྱི་མ་རྣམས་ནི་ས་པཎ་ཡན་ལ་མེད། ། གང་དེས་དོན་བསྡུས་བསྟན་བཅོས་རྣམ་གསུམ་མཛད། ། དེ་དག་ཤོང་དཔང་འཕགས་པའི་དྲིན་ལས་བྱུང༌། ། ཡོངས་རྫོགས་གསལ་མཛད་བསྟན་པའི་ཉིན་བྱེད་དོ། ། རིག་གནས་སྙན་དངགས་ལ་སོགས་པ་ནི་ས་སྐྱ་པཎ་ཆེན་ཡན་ཆད་ལ་མེད་ཅིང༌། གང་དེས་ཀྱང་གཞུང་ཚང་མ་བོད་ཀྱིས་རྟོགས་དཀའ་བར་དགོངས་ནས་སྙན་དངགས་ལ་མཁས་པ་འཇུག་པའི་སྒོ། (༢༢༢ན)སྡེབ་སྦྱོར་ལ་མེ་ཏོག་ཆུན་པོ། མངོན་བརྗོད་ལ་ཚིག་གཏེར་ཏེ་རྒྱ་གཞུང་གི་དོན་བསྡུས་པའི་བསྟན་བཅོས་རྣམ་པ་གསུམ་མཛད་དོ། ། སྙན་དངགས་ལ་སོགས་པའི་གཞུང་དེ་དག་ནི་ཤོང་ལོ་དང་དཔང་ལོས་ཐོག་མར་བསྒྱུར། དེའང་འགྲོ་མགོན་ཆོས་རྒྱལ་འཕགས་པས་པནྜི་ཏ་ལཀྵྨཱི་ཀ་ར་དང་ཤོང་ལོ་ལ་བཀའ་བསྒོས་ཤིང་མཐུན་རྐྱེན་སྦྱར་བའི་བཀའ་དྲིན་ལས་བྱུང་ཞིང༌། ཕྱིས་བཤད་རྒྱུན་རིམ་གྱིས་ཉམས་ཤིང་བློ་དང་བརྩོན་འགྲུས་ཞན་པས་ཇི་བཞིན་ཤེས་པ་ཤིན་ཏུ་དཀོན་པར་གྱུར་པ་ན། བརྡ་སྤྲོད་པ་དང་གསོ་རིག་གཙོ་བོར་གྱུར་པའི་རིག་གནས་བཅུ་ཕྲག་ཡོངས་སུ་རྫོགས་པ་དངོས་དང་བརྒྱུད་ནས་ཆེས་གསལ་བར་མཛད་པ་ནི་ཀུན་མཁྱེན་བསྟན་པའི་ཉིན་བྱེད་ཁོ་ན་ཡིན་ནོ། ། ཇ༢ གཉིས་པ་[སྤྱི་ལས་འཕྲོས་པ་]ནི། འཇིག་རྟེན་བསྟན་བཅོས་གཙོ་བོར་མི་མཛད་པས། ། དེ་གཞུང་རྐང་ཚུགས་རྒྱལ་བས་གསུངས་པ་མེད། ། ཡན་ལག་ཕྱིར་དུ་མཁས་རྣམས་རྒྱས་པར་མཛད། ། དེ་ལ་རིག་པའི་གནས་འདི་རྣམས་ཆོས་འཁོར་གསུམ་ལ་དངོས་སུ་མི་གཏོགས་ཏེ། སངས་རྒྱས་རྣམས་ནི་གདུལ་བྱ་ཐར་པ་དང་ཐམས་ཅད་མཁྱེན་པ་ལ་འགོད་པའི་ཕྲིན་ལས་ཀྱི་གཙོ་བོ་ཐེག་པ་གསུམ་དང་རྒྱུད་སྡེ་བཞིའི་རིམ་པ་བསྟན་ནས་འཇིག་རྟེན་པ་དང་མི་མཐུན་པའི་ངོ་མཚར་རྨད་དུ་བྱུང་བའི་འཁོར་ལོ་བསྐོར་གྱི་འཇིག་རྟེན་པའི་བསྟན་བཅོས་གཙོ་བོར་བསྟན་པར་མི་མཛད་པས་རིག་པའི་གནས་དེ་དག་གི་གཞུང་ལུགས་རྐང་ཚུགས་པར་རྒྱལ་བས་གསུངས་པ་ནི་མེད་དོ། ། འོན་ཀྱང་སངས་རྒྱས་རྣམས་ཀྱིས་ནི་མི་མཁྱེན་པའམ་མི་གཟིགས་པ་ཅུང་ཟད་ཀྱང་མེད་པའི་ཕྱིར་ན། དེ་དང་དེས་གདུལ་བར་བྱ་བའི་སྐབས་སུ་བབ་པ་ན་རྒྱུ་དང་དཔེ་དང་ངོ་བོ་ངེས་ཚིག་སུས་ཀྱང་ཤེས་པར་མི་ནུས་པའི་དོན་བཀའ་སྩལ་ཏེ་འདུལ་བར་མཛད་པ་ནི་སངས་རྒྱས་ཀྱི་ཁྱད་ཆོས་ཡིན་ལ། གསུང་རབ་ཕལ་ཆེར་ལེགས་སྦྱར་གྱི་སྐད་དུ་གནས་པས་དེའི་དོན་ཕྱིན་ཅི་མ་ལོག་པར་ཤེས་པར་བྱེད་པ་ལ་སྒྲ་ལེགས་པར་ཤེས་དགོས་པས་མཚོན། འདི་(༢༢༢བ)དག་ཀྱང་ཤེས་བྱའི་ཡན་ལག་མི་ཤེས་སུ་མི་རུང་བ་ཡིན་པས་མཁས་པ་རྣམས་ཀྱིས་ཤིན་ཏུ་རྒྱས་པར་མཛད་དོ། ། ཅ༣ གསུམ་པ་ཞར་བྱུང་ཡུལ་གཞན་དུ་དམ་ཆོས་ཀྱི་བྱུང་བ་བརྗོད་པ་ལ་ལྔ། ཆ༡ ཤམྦྷ་ལ། ཆ༢ རྒྱ་ཡུལ། ཆ༣ ལི་ཡུལ། ཆ༤ འགྲོ་ལྡིང༌། ཆ༥ གླིང་ཕྲན་གཞན་དག་ཏུ་བྱུང་ཚུལ་ལོ། ། ཆ༡ དང་པོ་ནི། ཤམྦྷ་ལ་རུ་ཆོས་རྒྱལ་རིགས་ལྡན་གྱིས། ། བླ་མེད་ཆོས་ཀྱི་འཁོར་ལོ་རྟག་ཏུ་བསྐོར། ། ཡུལ་ཆེན་གོ་དྲུག་ཐེག་ཆེན་གསང་སྔགས་སྤྱོད། ། ཡུལ་ཆེན་ལྔ་པ་བྱང་ཕྱོགས་ཤམྦྷ་ལ་ན་གསང་བའི་བདག་པོ་ཟླ་བ་བཟང་པོས་སྤྱིར་རྒྱུད་ཐམས་ཅད་ཉེ་བར་བསྡུས་ཤིང་ཁྱད་པར་དུས་ཀྱི་འཁོར་ལོའི་རྩ་རྒྱུད་ཀྱི་འགྲེལ་ཆེན་སྟོང་ཕྲག་དྲུག་ཅུ་པ་མཛད། གྲོང་བྱེ་བ་ཕྲག་དགུ་བཅུ་རྩ་དྲུག་གི་སྐྱེ་བོ་སྐལ་ལྡན་རྣམས་ལ་དབང་བསྐུར་ཞིང་རྒྱུད་བཤད། ཀ་ལཱ་པའི་གྲོང་གི་ལྷོ་ཕྱོགས་མ་ལ་ཡའི་སྐྱེད་མོས་ཚལ་དུ་དུས་ཀྱི་འཁོར་ལོའི་སྐུ་གསུང་ཐུགས་ཡོངས་སུ་རྫོགས་པའི་དཀྱིལ་འཁོར་ཆེན་པོ་བཞེངས། སྲས་ལྷ་དབང་སེང་གེའི་ཁྲི་ལ་ཆོས་སྟོན་པར་དབང་བསྐུར། བྱང་ཆུབ་སེམས་དཔའ་རྡོ་རྗེ་སྙིང་པོས་དགྱེས་པ་རྡོ་རྗེའི་འགྲེལ་པ་མཛད་དེ་རྒྱལ་བའི་སྲས་པོ་རྣམས་ལ་བསྟན། ལྷ་དབང་གིས་ལོ་བརྒྱར་རྩ་རྒྱུད་བསྟན་ནས་གཟི་བརྗིད་ཅན་དབང་བསྐུར་བ་སོགས་རིམ་བཞིན་ཆོས་རྒྱལ་བདུན་བྱོན་པའི་མཐར་འཇམ་དཔལ་གྱི་སྤྲུལ་པའི་སྐུ་གྲགས་པས་རིགས་བཞི་གསང་བ་མཆོག་ཏུ་ངེས་པའི་ཇོ་རྗེའི་རིགས་གཅིག་ཏུ་བྱས་ཏེ་དྲང་སྲོང་ཉི་མའི་ཤིང་རྟ་ལ་སོགས་པ་ཚངས་པའི་དྲང་སྲོང་བྱེ་བ་ཕྲག་ཕྱེད་དང་བཞི་སོགས་ཤམྦྷ་ལའི་སྐྱེ་བོ་ཐམས་ཅད་ལ་དཀྱིལ་འཁོར་གཅིག་ཏུ་དབང་བསྐུར་ཞིང་རྒྱུད་བསྟན་པས་འདི་ཕྱིན་རིགས་ལྡན་དུ་གྲགས། ཉི་མའི་ཤིང་རྟས་ཞུས་པའི་ངོར་རྩ་རྒྱུད་ལས་བསྡུས་རྒྱུད་བཏུས། དེ་རྗེས་རིགས་ལྡན་པདྨ་དཀར་པོས་བསྡུས་བརྒྱུད་ཀྱི་རྒྱས་འགྲེལ་དྲི་མེད་འོད་དང༌། དོན་དམ་བསྙེན་པ་སོགས་མཛད་དེ་རིམ་བཞིན་རིགས་ལྡན་རྣམས་བྱོན་ཟིན་པ་དང་འབྱོན་པར་འགྱུར་བ་རྣམས་ལོ་བརྒྱ་(༢༢༣ན)བརྒྱར་རྡོ་རྗེའི་ཁྲི་ལ་ངེས་པ་ཅན་དུ་འཁོད་ནས་དཔལ་དུས་ཀྱི་འཁོར་ལོའི་ངེས་གསང་ལས་བརྩམས་ཐེག་པ་བླ་ན་མེད་པའི་ཆོས་ཀྱི་འཁོར་ལོ་རྟག་ཏུ་བསྐོར། དེའི་མཐུས་ཡུལ་ཆེན་དགུ་བཅུ་གོ་དྲུག་གི་མི་བདག་གསེར་གྱི་ཐོད་ལྡན་སྐྱེ་བོའི་ཚོགས་དང་བཅས་པའང་ཐེག་པ་ཆེན་པོ་གསང་སྔགས་ཀྱི་ཆོས་ལ་ལོངས་སྤྱོད་པའི་སྐལ་བཟང་དང་ལྡན་པ་ཡིན་ནོ། ། འབྱུང་འགྱུར་ལས་ས་དུམ་བུ་བཅུ་གཉིས་སུ། ། རིགས་ལྡན་རྒྱལ་པོས་རྫོགས་ལྡན་རིམ་གྱིས་འདྲེན། ། མ་འོངས་འབྱུང་འགྱུར་ཀླ་ཀློ་རྣམས་འཕེལ་བས་འཛམ་གླིང་ཆུང་ངུ་འདི་ཕལ་ཆེར་དབང་བསྒྱུར་བའི་ཚེ་རིགས་ལྡན་དྲག་པོ་འཁོར་ལོས་སྤྲུལ་པའི་དམག་གིས་བཏུལ་ཏེ་ལས་ས་དུམ་བུ་བཅུ་གཉིས་སུ་རིགས་ལྡན་ཆོས་ཀྱི་རྒྱལ་པོ་དེ་ཉིད་ཀྱིས་གསང་ཆེན་རྡོ་རྗེ་ཐེག་པའི་བསྟན་པ་འཇོག །རང་སྲས་ཚངས་པ་ལྷ་དབང་རིགས་བརྒྱུད་དང་བཅས་པས་རྫོགས་ལྡན་གཡས་སྐོར་དུ་རིམ་གྱིས་འདྲེན་ཅིང་ཆོས་ཀྱི་རྒྱལ་སྲིད་བསྐྱང་བར་འགྱུར་རོ།། ཆ༢ གཉིས་པ་[རྒྱ་ཡུལ་དུ་བྱུང་ཚུལ་]ནི། རྒྱ་ཡུལ་སྟོན་པ་འདས་ནས་བརྒྱ་དང་བཅུར། ། ཧན་རྒྱལ་མིན་ཏིའི་རིང་ལ་བསྟན་དབུ་བརྙེས། ། དགྲ་བཅོམ་པ་དང་ལོ་ཙཱ་མང་དུ་བྱོན། ། མདོ་འདུལ་གཙོར་སྤྱོད་ས་ཀར་དགེ་གསུམ་བཀུར། ། མ་ཧཱ་ཙི་ན་སྟེ་རྒྱ་ནག་གི་གཡུལ་དུ་སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་ལོན་པ་ན། ཧན་གྱི་བརྒྱུད་ལས། ཧན་མིང་ཏི་ཞེས་བྱ་བའི་རྒྱལ་པོའི་ཚེ་སྔོན་ཅི་འུའི་རྒྱུད་ལས། ཅིའུ་ཇིའུ་ཝང་ཞེས་པའི་རྒྱལ་པོའི་རྨི་ལམ་གྱི་ལྟས་རྡོ་རིང་ལ་བྲིས་པ་དང་མཐུན་པར། འཕགས་ཡུལ་ནས་པཎྜི་ཏ་གྲོལ་བ་དང་འབར་བ་ཟེར་བ་བདེན་པ་མཐོང་བ་གཉིས་ཤིག་གིས་ཐེག་པ་ཆུང་ངུའི་སྡེ་སྣོད་ཆོས་ཀྱི་རྣམ་གྲངས་ལྔ་བཅུ་རྩ་གཉིས། ཨུ་ད་ཡ་ནས་བཞེངས་པའི་ཐུབ་པའི་བྲིས་སྐུ་རྟ་དཀར་པོ་ཞིག་ལ་བཀལ་ནས་འོངས་པའི་བསྟན་པའི་དབུ་བརྙེས། སའི་བའི་གསི་ཞེས་པའི་གཙུག་ལག་ཁང་ཐོག་མར་བཞེངས། པཎྜི་ཏ་གཉིས་ཀྱིས་ཀྱང་དགྲ་བཅོམ་ཐོབ། ཟིན་ཤིང་རྣམས་བཏུལ། དད་(༢༢༣བ)པས་རབ་ཏུ་བྱུང་བ་མང་པོ་བྱུང་སྟེ། དགེ་འདུན་གྱི་སྡེ་ཤིན་ཏུ་འཕེལ་བར་གྱུར། ཡང་ཕྱི་ཞིག་ན་པཎྜི་ཏ་ཀུ་མཱ་ར་སྤྱན་དྲངས་ནས་དེས་ཀྱང་བསྟན་པ་སྤེལ། ཐང་གི་རྒྱུད་པའི་རིང་ལ་ཐང་ཛང་ཛང་ཞེས་པ་སློབ་དཔོན་དབྱིག་གཉེན་གྱི་སློབ་མར་གྱུར་ནས་ཐེག་པ་ཆེ་ཆུང་གི་ཆོས་དཔག་ཏུ་མེད་པ་བསྒྱུར། འདིའི་གོང་དུ་ཆོས་བསྒྱུར་ནུས་པའི་རྒྱའི་ལོ་ཙཱ་བ་ཉིས་བརྒྱ་ཙམ་བྱུང་ཞེས་གྲགས་ཤིང༌། དེ་དག་གིས་ཀྱང་ཆོས་མང་དུ་བསྒྱུར་བ་ཡོད་པས་བསྟན་པ་ཤིན་ཏུ་དར་ཞིང་དགྲ་བཅོམ་པའང་མང་དུ་བྱོན། དེ་ནས་མེ་ཉག་དང་ཧོར་གྱི་རྒྱལ་པོ་བྱུང་གི་བར་དུ་རྒྱ་ནག་གི་རྒྱལ་རབས་མང་པོའི་ཚེ་དང༌། དེ་ནས་ཀྱང་ད་ལྟའི་བར་བསྟན་པ་གནས་བཞིན་པ་ལ། མེ་ཉག་གི་རྒྱལ་པོ་ཐའི་ཧུས་ཆོས་རྗེ་དུས་གསུམ་མཁྱེན་པ་སྤྱན་དྲངས་ཀྱང་མ་བྱོན་པར་གཙང་པོ་པ་བཏང་བ་ལ་ཆོས་ཉན་པ་དང༌། ཧོར་ཡུལ་དུ་ཧོན་གྱི་རྒྱལ་པོ་ཇིང་གི་སྑཱན་གྱི་ཚེ་ཞང་ཚལ་བའི་སློབ་མ་གཙང་པ་དུང་ཁུར་བས་ཧོར་ཡུལ་དུ་བྱོན་ནས་གནམ་མཆོད་པ་ལ་དད་པ་བསྐྱེད་པ་ཙམ་མཛད། རྗེས་ནས་མེ་ཉག་ཀྱང་ཧོར་གྱིས་དབང་དུ་བསྡུས། ཕྱི་ཞིག་ན་རྒྱལ་པོ་གོ་དན་གྱིས་ས་སྐྱ་པཎྜི་ཏ་སྤྱན་དྲངས། དེའི་རྗེས་སུ་ཆོས་རྗེ་རིན་པོ་ཆེ་འཕགས་པས་ཀྱང་རྒྱལ་བུ་གོ་བེལ་ལ་དབང་བསྐུར་བ་སོགས་ཀྱིས་བསྟན་པ་གསལ་བར་མཛད། མོ་གོར་གན་གྱིས་ཀརྨ་པཀྴི་སྤྱན་དྲངས་པ་ལ་སོགས་བོད་ཡུལ་གྱི་བསྟན་པའང་ཅི་རིགས་པར་མཆོད་པ་བྱུང༌། རྒྱ་ནག་ཕྱི་མ་ལ་མིན་གྱི་ཐའི་ཛུ་རྒྱལ་པོས་བི་རཱུ་པ་དང༌། གནས་བརྟན་བཅུ་དྲུག་སྤྱན་དྲངས་པ་དང༌། ཏཱ་མིང་གཡུང་ལོས་ཆོས་རྗེ་དེ་བཞིན་གཤེགས་པ་སྤྱན་དྲངས་པ་སོགས་བསྟན་པ་ལ་གུས་པས་མཆོད་པའི་རྒྱལ་པོ་ཁོ་ན་བྱུང་ཞིང༌། ད་ལྟ་ཚིན་གྱི་བརྒྱུད་པ་འདིར་ཡང་ཤུན་ཙི་རྒྱལ་པོས་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོ་སྤྱན་དྲངས་པ་སོགས་ནས་ད་ལྟའི་བར་བསྟན་པ་ལ་གུས་པས་མཆོད་བཞིན་པའོ། ། འོན་ཀྱང་རྒྱ་ཡུལ་དུ་ཆོས་རྒྱལ་འཕགས་པས་སེ་ཆེན་རྒྱལ་པོར་དགྱེས་(༢༢༤ན)པ་རྡོ་རྗེའི་དཀྱིལ་འཁོར་དུ་དབང་བསྐུར་བ་དང༌། དེ་བཞིན་གཤེགས་པའི་ཏཱ་མིང་རྒྱལ་པོར་ཐུགས་རྗེ་ཆེན་པོ་རྒྱལ་བ་རྒྱ་མཚོའི་དབང་བསྐུར་ཞིང་ཁྲིད་བཏབ་པ་སོགས་སྐལ་ལྡན་རེ་གཉིས་ཀྱིས་གསང་སྔགས་སྤྱོད་པ་སྲིད་མོད། བོད་ལྟ་བུར་ཐུན་མོང་དུ་གསང་སྔགས་ཀྱི་བསྟན་པ་དར་བ་ནི་མ་བྱུང་བར་སྣང་ཞིང༌། དེ་མཐུན་རྒྱ་ཡུལ་གྱི་གསུང་རབ་རྣམས་སུ་ཡང་བྱ་རྒྱུད་ཀྱི་གཟུགས་ཕྲན་འགའ་ཞིག་ལས་སྔགས་རྒྱུད་དངོས་གཞི་མི་བཞུགས་སོ། ། དེས་ན་མདོ་ཕྱོགས་ལས་ཐེག་ཆེན། དེ་ལས་ཀྱང་འཁོར་ལོ་ཐ་མའི་མདོ་རྣམས་གཙོ་བོར་དར་ཞིང༌། འདུལ་བའང་འཕགས་པ་འོད་སྲུངས་ལས་བརྒྱུད་པ་ཕལ་ཆེན་སྡེ་པའི་ལུགས་གཙོ་བོར་སྤྱོད་པར་གྲགས། བོད་ཀྱི་ཆོས་ལུགས་ཀྱང་ཅི་རིགས་པར་དར་བ་ལས་གཙོ་བོར། ཧོར་དུས་སུ་ས་སྐྱ། ཧོར་དང་ལ་མི་ན་ཏཱ་མིང་རྣམས་ཀྱིས་ཀརྨ་པ། ཏཱ་ཚིན་གྱི་དུས་ནས་དགེ་ལུགས་པ་འབའ་ཞིག་བཀུར་བར་མཛད་དོ། ། ཆ༣ གསུམ་པ་[ལི་ཡུལ་དུ་བྱུང་ཚུལ་]ནི། ལི་ཡུལ་དགྲ་བཅོམ་བྱང་སེམས་མང་པོས་བཏུལ། ། ཐེག་པ་ཆེ་ཆུང་གཉིས་ཀའི་བསྟན་པ་དར། ། ལི་ཡུལ་ནི་ཡུལ་དྲུག་ནང་ཚན་བོད་དང་རྒྱའི་མཚམས་སུ་ཡོད་པ་སྟེ། དེར་ཆོས་རྒྱལ་མྱ་ངན་མེད་ཀྱི་བཙུན་མོ་ལ་སྲས་བྱུང་བ་ས་ནུར་གྲགས། དེས་ཡུལ་དེ་བཟུང་ནས་ཡུན་རིང་ལོན་པ་རྒྱལ་པོ་བི་ཛ་ཡ་སམྦྷ་ཝའི་རིང་ལ། དགེ་སློང་བཻ་རོ་ཙ་ན་སོགས་ཀྱིས་བསྟན་པ་སྤེལ་ཏེ། གཙུག་ལག་ཁང་དང་མཆོད་རྟེན་བཞེངས་པ་མང་དུ་བྱུང༌། དེའི་རྗེས་སུ་རྒྱལ་པོ་བི་ཛ་ཡ་བཱི་རཱ་ཡའི་ཚེ་འཕགས་ཡུལ་ནས་དགྲ་བཅོམ་པ་བཞི་ཕེབས། སངས་རྒྱས་འོད་སྲུངས་ཀྱི་མཆོད་རྟེན་ལ་དགྲ་བཅོམ་པ་རྣམས་ཀྱིས་ངོ་སྤྲད། གྷེའུ་དོ་ཧན་གྱི་གཙུག་ལག་ཁང་བརྩིགས། དེ་བཞིན་དུ་ཉན་ཐོས་དགྲ་བཅོམ་པ་དང༌། བྱང་ཆུབ་སེམས་དཔའ་མང་པོ་གཤེགས་ཏེ་གདུལ་བྱ་བཏུལ་ནས་ཐེག་པ་ཆེ་ཆུང་གཉིས་ཀའི་བསྟན་པ་སྤེལ་བར་མཛད་དེ། གཙུག་ལག་ཁང་དང༌། (༢༢༤བ)དགེ་འདུན་གྱི་སྡེས་ཁྱབ་པར་གྱུར་མོད། ད་ལྟ་ནི་གཟུགས་བརྙན་ཙམ་ལས་བསྟན་པ་རྣལ་མ་མི་བཞུགས་པར་བཤད་ལ། ཡུལ་འདི་འཇང་ཡུལ་ཡིན་པར་ཡང་བཞེད་དོ། ། ཆ༤ བཞི་པ་[འགྲོ་ལྡིང་ཡུལ་དུ་བྱུང་ཚུལ་]ནི། འགྲོ་ལྡིང་སློབ་དཔོན་པདྨས་བཏུལ་བ་ནས། ། རྡོར་འཛིན་མང་བྱོན་སྔགས་བསྟན་རྣལ་མ་རྒྱས། ། རྒྱ་གར་ནས་ལྷོ་ཕྱོགས་དྲང་ཐད་ཀྱི་རྒྱ་མཚོ་བརྒལ་བའི་གླིང་ཕྲན་འགྲོ་ལྡིང་ཞེས་བྱ་བའི་གླིང་ན་སློབ་དཔོན་ཆེན་པོ་པདྨཱ་ཀ་རས་ཕེབ་སྟེ་གདུག་པའི་ཕྲ་མེན་མ་རྣམས་བཏུལ་ཞིང་དམ་བཞག་ལན་གསུམ་མཛད། མཐར་མི་རྣམས་ཀྱང་བཏུལ་ནས། བི་དྷ། ཨརྡྷ། སུ་དྷཱ་ཞེས་བྱ་བའི་གཙུག་ལག་ཁང་གསུམ་བཞེངས། འཕགས་ཡུལ་ནས་སྡེ་སྣོད་འཛིན་པ་འགའ་ཞིག་སྤྱན་དྲངས། སློབ་དཔོན་ཉིད་ཀྱིས་སྐལ་བ་དང་ལྡན་པ་དྲུག་ལ་རྒྱུད་བཤད་པས་དྲུག་པོས་གྲུབ་པ་ཆེན་པོ་ཐོབ། སློབ་དཔོན་ཉིད་ལོ་བཅུ་གཉིས་སུ་བཞུགས་ནས་མཐར་སྲིན་པོའི་གླིང་དུ་བཞུད་པར་གྲགས། དེ་རྗེས་མར་མེ་མཛད་བཟང་པོས་ཀྱང་བྱོན། དེ་ནས་བརྩམས་ཏེ་ལོ་བརྒྱ་ཙམ་གྱི་བར་དུ། མ་ག་དྷཱ་དང༌། ཨོ་རྒྱན་དང༌། ཁ་ཆེ་ལ་སོགས་པའི་རྡོ་རྗེ་འཛིན་པ་ཤིན་ཏུ་མང་པོ་བྱོན་ཏེ། སྔགས་ཀྱི་ཐེག་པ་ལྷག་པར་རྒྱས་པར་མཛད། སྔོན་རྒྱལ་པོ་དྷརྨཱ་པཱ་ལའི་སྐབས་སུ་སྦས་ཏེ་རྒྱ་གར་དུ་ནུབ་པའི་རྒྱུད་ཀྱི་རིགས་དང༌། ཨོ་ཌཱི་ཡ་ན་ནས་སྤྱན་དྲངས་པའི་རྒྱུད་ཀྱི་རིགས་རྒྱ་གར་ན་མེད་པའང་མང་དུ་ཡོད་དེ། ད་ལྟ་ཡང་གསང་སྔགས་རྒྱུད་སྡེ་བཞིའི་བསྟན་པ་རྣལ་མ་སྔོན་དུས་བཞིན་དར་བར་ཡོད་ལ། འདུལ་བ། མངོན་པ། ཕ་རོལ་ཏུ་ཕྱིན་པའི་གཞུང་ལུགས་རྣམས་ཀྱང་ཅུང་ཟད་ཡོད་པར་གསུངས་སོ། ། ཆ༥ ལྔ་པ་[གླིང་ཕྲན་གཞན་དག་ཏུ་བྱུང་ཚུལ་]ནི། སིངྒ་ལ་དང་དྷ་ན་པ་ཡི་གུ། ། ཟངས་ནས་གླིང་སོགས་ཐེག་ཆེན་ཅུང་ཟད་དང༌། ། ཐེག་དམན་ཆེར་དར་ད་ལྟའང་མ་ནུབ་བཞུགས། ། གཞན་ཡང་། སིངྒ་ལའི་གླིང་དང༌། དྷ་ན་ཤྲཱིའི་གླིང༌། པ་ཡི་གུའི་གླིང༌། ཟངས་གླིང༌། (༢༢༥ན)ནས་གླིང༌། སོགས་ཁོངས་ནས་གསེར་གླིང་སྟེ། གླིང་ཕྲན་དེ་དག་ཏུ་སྔོན་སྔ་བ་ཞིག་ནས་རྒྱལ་བའི་བསྟན་པ་བྱུང་སྟེ། དེའང་སིངྒ་ལའི་གླིང་ན་ཐེག་ཆེན་པ་ཅི་རིགས། ཕལ་ཆེར་ཉན་ཐོས་པ་ཡིན་ལ། དྷ་ན་ཤྲཱི་དང་པ་ཡི་གུ་གཉིས་ལའང་ཐེག་ཆེན་པ་ཅུང་ཟད་ཡོད་ལ། གཞན་ཐམས་ཅད་ནི་ཐེག་དམན་ཉན་ཐོས་པ་ཁོ་ན་ཆེར་དར་ཞིང་ད་ལྟའང་མ་ནུབ་པར་བཞུགས་པ་ཡིན་ནོ། ། རིག་གནས་ཞར་བྱུང་དང་བཅས་པའི་བྱུང་བ་བརྗོད་པའི་སྐབས་སོ། ། རིག་གནས་ཞར་བྱུང་དང་བཅས་པའི་བྱུང་བ་བརྗོད་པ་སྐབས་བཞི་པའི་འགྲེལ་པའོ། ། ཐེག་པའི་སྒོ་ཀུན་ལས་བཏུས་པ་གསུང་རབ་རིན་པོ་ཆེའི་མཛོད་བསླབ་པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ་ཅེས་བྱ་བ་ལས། རྒྱལ་བསྟན་ཛམྦུའི་གླིང་དུ་ཇི་ལྟར་དར་བའི་རིམ་པར་ཕྱེ་བ་སྟེ། གནས་བཞི་པའི་འགྲེལ་པ་གྲུབ་བོ།། །། ས་བཅད། ༄༅། །ས་བཅད་འདི་བསྒྲིགས་སྐབས་སོ་སོའི་དབྱེ་གཞི་ལ་ནང་གསེས་དུ་ཡོད་གྲངས་སྨོས་པ་དང་། ནང་གསེས་ཀྱི་རིམ་པར་ཀ་ཁ་སོགས་ལ་ཨང་གྲངས་ཀྱི་རྟགས་བཀོད་ཡོད། དེའང་ཐོག་མར་གཞུང་འདིའི་དབྱེ་གཞིའི་ས་བཅད་ལ། (ཀ༡) ཀ་དང་པོ། (ཀ༢) ཀ་གཉིས་པ། སོགས་ཀ་ལ་ཨང་གྲངས་བཀོད་ནས་གོ་རིམ་མཚོན་པར་བྱས་པ་དང་། དེ་ནས། (ཀ༡) ཀ་དང་པོའི་ནང་གསེས་ཀྱི་དབྱེ་བ་ལ། (ཁ༡) ཁ་དང་པོ། (ཁ༢) ཁ་གཉིས་པ། སོགས་དང་། (ཁ༡) ཁ་དང་པོའི་ནང་གསེས་ལ། (ག༡) ག་དང་པོ། (ག༢) ག་གཉིས་པ། སོགས་དང་། (ག༡) ག་དང་པོའི་ནང་གསེས་ལ། (ང༡) ང་དང་པོ། (ང༢) ང་གཉིས་པ། (ང༣) ང་གསུམ་པ། སོགས་ཀྱིས་མཚོན་པར་བྱས་ཡོད། དེ་བཞིན་དུ། (ཀ༢) ཀ་གཉིས་པ། (ཀ༣) ཀ་གསུམ་པ། སོགས་ཀྱི་ནང་གསེས་ལའང་། (ཁ༡) ཁ་དང་པོ། (ཁ༢) ཁ་གཉིས་པ། (ཁ༣) ཁ་གསུམ་པ། སོགས་ཀྱི་གོ་རིམ། (ཀ༡) ཀ་དང་པོའི་ནང་གསེས་དབྱེ་ཚུལ་དང་མཚུངས་པས། ས་བཅད་དེ་དག་གི་ནང་གསེས་ཇི་ཙམ་ཡོད་ཀྱང་རྟགས་འདྲ་མིན་སྣ་ཚོགས་བཀོད་མི་དགོས་པར་བོད་ཡིག་གི་གསལ་བྱེད་དང་ཨང་རྟགས་ཁོ་ནས་ཐམས་ཅད་གོ་རིམ་མ་འདྲེས་པ་གསལ་པོར་གོ་ཐུབ་པའི་ཁྱད་ཆོས་ཀྱང་ལྡན་ཡོད་དོ། ། ཤེས་བྱ་ཀུན་ཁྱབ་མཛོད། ས་བཅད་རྒྱས་པ། དེབ་དང་པོ། གསུང་འབུམ། པོད། ཨེ འགྲེལ་པའི་མཆོད་བརྗོད་དང་བརྩམ་པར་དམ་བཅའ་བ། (༢ན) ཀ༡ ཐོག་མར་དགེ་ཞིང་མངོན་པར་མཐོ་བ་ཀླད་ཀྱི་དོན་ལ་གསུམ། (༢བ) ཁ༡ གཞུང་གི་ལུས་རྣམ་པར་གཞག་པའམ་ཐ་སྙད་རྟོགས་པའི་ཕྱིར་མིང་བསྟན་པ། (༢བ) ཁ༢ མཆོད་པར་བརྗོད་པ་ལ་བཞི། (༤ན) ག༡ དཔལ་ལྡན་བླ་མ་ལ་ལེགས་སྦྱར་སྐད་དུ་ཕྱག་བྱ་བ། (༤ན) ག༢ ཐུབ་པའི་དབང་པོ་ལ་བསླབ་གསུམ་དང་མཐུན་པར་ཕྱག་བྱ་བ། (༤བ) ག༣ སྨྲ་བའི་སེང་གེ་ལ་ཕ་རོལ་ཏུ་ཕྱིན་པའི་ལམ་དང་མཐུན་པར་བསྟོད་ཅིང་འདོད་དོན་གསོལ་བ། (༥ན) ག༤ བླ་མ་བརྒྱུད་པ་དང་བཅས་པ་ལ་གསང་སྔགས་ཀྱི་ལམ་རིམ་དང་མཐུན་པར་གུས་པས་འདུད་པ།(༥བ) ཁ༣ བརྩམ་པ་མཐར་ཕྱིན་ཅིང་དགོས་པ་མཐོང་བའི་དོན་དུ་དམ་བཅའ་བ། (༦ན) ཀ༢ བར་དུ་དགེ་ཞིང་ངེས་པར་ལེགས་པ་གཞུང་གི་དོན་ལ་གཉིས། (༦བ) ཁ༡ མདོར་བསྟན་པ། (༦བ) ག༡ གནས་དང་པོ། གདུལ་ཞིང་སྣོད་བཅུད་ཀྱི་འཇིག་རྟེན་རིམ་པར་ཕྱེ་བ། ང༡ དང་པོ། ཞིང་ཁམས་སྤྱིར་བསྟན་པ་ཐེག་ཆེན་པའི་ལུགས་ལྟར་བརྗོད་པའི་སྐབས། ཁ༢ རྒྱས་པར་བཤད་པ་ལ་གནས་སྐབས་བཅུ། (༧ན) ག༡ ཐོག་མར་འདུལ་ཞིང་འཇིག་རྟེན་ཇི་ལྟར་སྣང་བའི་རིམ་པར་ཕྱེ་བ་ལ་བཞི། (༧བ) ང༡ ཞིང་ཁམས་སྤྱིར་བསྟན་པ་ཐེག་ཆེན་པའི་ལུགས་ལྟར་བརྗོད་པ་ལ་གཉིས། (༧བ) ཅ༡ རྒྱུ་རྐྱེན་གང་ལས་བྱུང་བ་ལ་གཉིས། (༧བ) ཆ༡ མདོར་བསྟན་པ། (༧བ) ཆ༢ རྒྱས་བཤད་པ་ལ་གཉིས། (༧བ) ཇ༡ གདུལ་བྱ་འདུལ་བྱེད་ཀྱི་རྟེན་འབྲེལ་སྤྱིར་བསྟན་པ། (༧བ) ཇ༢ ཞིང་གི་རྒྱུ་རྐྱེན་བྱེ་བྲག་ཏུ་སྨོས་པ། (༨ན) ཅ༢ ཞིང་གི་བཀོད་པ་དངོས་བསྟན་པ་ལ་གསུམ། (༨བ) ཆ༡ སྟུག་པོ་བཀོད་པའི་ཞིང་ཁམས་སྤྱིར་བསྟན་པ་ལ་གཉིས། (༨བ) ཇ༡ ཞིང་ཁམས་སྤྱིར་བསྟན་པ། (༨བ)