Tibetan
ཅིག་ཆར་གྱི་དབྱེ་བས་སྙིང་པོའི་དོན་དང་མངོན་པར་རྟོགས་པ་གཉིས་སུ་ངོ་སྤྲད་ནས། མདོ་མ་ལུས་པ་རྟེན་འབྲེལ་གྱི་འགྲོས་བཞིས་འཆད་དེ་མས་བརྒྱུད་སྒོམ་ཐོག་ཏུ་སྐོར་བའི་གདམས་པ་ཞེས་གྲགས། བར་དུ་བྱུང་བའི་བརྒྱུད་ཕྲན་ལུགས་གསུམ་ནི། དགེ་བཤེས་གྲྭ་པ་ལ་ཞི་བྱེད་སྒྲོན་མ་དགུ་སྐོར། ལྕེ་ཙནྡྲ་ཀཱིརྟི་ལ་མདོ་སྡུད་པ་དང་མཚན་བརྗོད་སྦྱར་བའི་མདོ་རྒྱུད་ཞལ་སྦྱོར་གྱི་གདམས་པ་དང་གྲུབ་ཐོབ་ལྔ་བཅུ་བརྒྱད་ཀྱི་མན་ངག །ལྗང་བཀའ་གདམས་པ་ལ་ཤེར་ཕྱིན་ཡི་གེ་མེད་པའི་གདམས་པ་གནང་བ་དེ་དག་ཐམས་ཅད་ཀྱང་རོག་ཤེས་རབ་འོད་ལ་བབས་སོ། ། བརྒྱུད་པ་ཐོར་བུ་ནི། འབྲོ་སྒོམ་ལ་མཚན་བརྗོད་གསེར་གྱི་ཐུར་མ། འབུ་སྒོམ་ལ་ལས་རྒྱའི་གདམས་ངག་ནས། ལབ་སྒྲོན་ལ་གཅོད་ཀྱི་གདམས་པའི་བར་གདམས་ཕྲན་སྣ་ཚོགས་པ་བཅོ་ལྔ་ཙམ་གནང་བར་བཤད་དེ་བརྒྱུད་ཕྲན་ཐོར་བུ་དང་བཅས་པ་རྣམས་ཀྱང་བར་མའི་སྐོར་རོ། ། ཐ༣ གསུམ་པ་[བརྒྱུད་པ་ཐ་མ་]ནི། ཕྱི་མ་སྒོ་བའི་རྣལ་འབྱོར་བཞི་ལ་སོགས། ། སྨིན་གྲོལ་གདམས་སྲོལ་ནམ་མཁའི་སྐར་མ་ཙམ། ། བརྒྱུད་པ་ཕྱི་མ་ནི་དམ་པ་རྒྱ་ནག་ནས་བོད་དུ་ཕེབས་ནས་དིང་རིར་བཞུགས་པའི་ཚེ་ཞལ་མཐོང་བ་ལ་སྔ་བ་ཅོག་རོ་སྨྱོན་པ་སོགས་འཁྲུལ་ཞིག་ཉི་ཤུ་རྩ་དྲུག །ཞ་མ་ལྕམ་སྲིང་སོགས་ཁྱད་པར་འཕགས་པའི་བུ་ཆེན་བརྒྱ་རྩ་བརྒྱད། ཇོ་མོ་སངས་རྒྱས་སོགས་མ་ཇོ་ཉི་ཤུ་རྩ་བཞི། གདན་ནོན་གྱི་སློབ་མ་བཅུ་གཉིས་ལ་སོགས་པ་བྱུང་བ་ལས་གཙོ་བོར་གྱུར་པ་སྒོ་བའི་རྣལ་འབྱོར་པ་བཞིར་གྲགས་པ་སྟེ། ཤར་ན་དམ་པ་ཕྱར་ཆེན་གྱིས་བཀའ་མདོ་སྦྱོར་གྱི་སྐོར། ལྷོར་བཛྲ་ཀྲོ་དྷས་རིན་ཆེན་དོན་སྡེབ་ཀྱི་སྐོར། ནུབ་ན་(༡༩༡བ)ཕྱར་ཆུང་གིས་དུམ་དུམ་ཁྲིད་ཀྱི་སྐོར། བྱང་དུ་བྱང་ཆུབ་སེམས་དཔའ་ཀུན་དགས་བཀའ་ཆོ་ལུའི་སྐོར་རྣམས་བཀའ་བསྡུ་མཛད་ཅིང་ཡི་གེར་བཀོད། གཞན་དག་ལ་གནང་བའི་ཞལ་གདམས་སྣ་རེ་ཡི་གེར་འཁོད་པ་ལ་སོགས་པའི་སྨིན་གྲོལ་གདམས་ངག་གི་རྒྱུན་སྲོལ་ནམ་མཁའི་སྐར་མ་ཙམ་དུ་བྱུང་ངོ༌། ། ཐ༤ བཞི་པ་[འཕྲོས་དོན་བཤད་པ་]ནི། བར་པ་ངེས་དོན་ཐ་མ་སྔགས་དང་མཐུན། ། དེ་ལ་བརྒྱུད་པ་བར་མ་ནི་གཙོ་བོར་ངེས་དོན་མདོ་སྡེ་རྣམས་དང་མཐུན་ལ། ཐ་མ་ནི་གཙོ་བོར་སྔགས་ཀྱི་ལམ་དང་མཐུན་ཤས་ཆེ་བ་ཡིན་ནོ། ། ཁྱད་འཕགས་ཉིད་དང་དགོངས་མཉམ་ཀུན་དགའི་ལུགས། ། ལོ་ཆེན་ཆོས་དཔལ་དྲིན་གྱིས་བྲེང་ཙམ་གནས། ། དེ་དག་ཐམས་ཅད་ལས་སྨིན་གྲོལ་ཆ་ལག་དང་བཅས་པའི་ལམ་ཡོངས་སུ་རྫོགས་པས་ཁྱད་པར་འཕགས་པ་ནི། ང་དང་མཉམ་པ་ཀུན་དགའ་ཙམ། ། ཞེས་གསུངས་པ་སྐྱེ་བ་ལྔར་རྗེས་སུ་བཟུང་ཞིང་དམ་པ་ཉིད་དང་དགོངས་པ་མཉམ་པ་བྱང་ཆུབ་སེམས་དཔའ་ཀུན་དགའི་ལུགས་སྲོལ་ཉིད་ཡིན་ཏེ། ཆོས་སྐོར་འདི་ལ། ཐུན་མོང་དང་། ཐུན་མོང་མ་ཡིན་པའི་ཆོས་སྡེ་གཉིས་ལས། ཐུན་མོང་ལ། མདོ་རྒྱུད་ཕྱག་ལེན་དང་བཅས་པ། བཀའ་བབས་སྙན་བརྒྱུད་དང་བཅས་པ། དྲི་མེད་ཕྲ་ཏིག་དང་བཅས་པ། དར་ཚགས་བཤད་འབུམ་དང་བཅས་པ། དེའི་དང་པོ་ལ། སྤྱི་མདོ་ཆུ་ཀླུང་མངོན་པར་རོལ་པའི་མདོ། སྒོས་མདོ་ཤེས་རབ་སྙིང་པོ་སྤྱི་རྒྱུད་སྡེ་སྣོད་གསལ་བྱེད། སྒོས་བརྒྱུད་ཆུ་ཀླུང་ཆེན་པོ། ཕྱག་ལེན་ནི། དབང་འཁོར་ཆེ་འབྲིང་དང་ལམ་རིམ་ཆེ་ཆུང་གསུམ། བཀའ་བབས་སྙན་བརྒྱུད་ནི། བཀའ་བབས་བཞི། དེའི་ལམ་སློང་སྙན་བརྒྱུད་བཞི། དྲི་མེད་ཕྲ་ཏིག་ནི། དྲི་མེད་ལ་ཆོས་ཟུག་པ་རྩ་བའི་སྐོར་ལ་སོགས་པ་དྲུག ། ཕྲ་ཏིག་ནི། པ་ཚབ་ཀྱིས་ཀུན་དགའ་ལ་མ་བདེ་བའི་གེགས་རྣམས་དྲིས་པའི་གདམས་པའོ། ། དར་ཚགས་བཤད་འབུམ་ནི། དར་ཚགས་ཞལ་གདམས་བདུད་རྩིའི་སྐོར་ལ་སོགས་པ་བརྒྱད་ཡོད་དེ་པ་ཚབ་ཀྱི་འཕྲལ་གཏམ་སྟེ། (༡༩༢ན)ནེས་ཡི་གེར་བཏབ་པའོ། ། བཤད་འབུམ་ནི། ཏེ་ནི་དང་ཞིག་པོ་དང་སྙེ་མདོ་བ་ལ་སོགས་པས་མཛད་པའི་བཤད་པ་རྣམས་སོ། ། ཐུན་མོང་མ་ཡིན་པའི་ཆོས་སྡེ་ལ། རྒྱུད་སྟོང་ཐུན་དང་བཅས་པ། དབང་ལམ་ཁྲིད་དང་བཅས་པ། གསང་མཛོད་གསུམ། ལམ་སྐོར་ལྔ། བེའུ་བུམ་བརྒྱད་རྣམས་བཞུགས་སོ། ། དམ་པ་ཀུན་དགས་གདམས་ངག་ཐམས་ཅད་མཁས་བཙུན་པ་ཚབ་སྒོམ་པ། དེས་རྒྱལ་བ་ཏེ་ནེ། དེ་ལ་རོག་བདེ་གཤེགས་ཆེན་པོ་ཤེར་འོད་ཀྱིས་ཞུས་ཤིང་ཞི་བྱེད་ཡོངས་སུ་རྫོགས་པའི་བཀའ་བབས། དེ་ནས་རོག་ཐམས་ཅད་མཁྱེན་པ་སོགས་རིམ་གྱིས་བརྒྱུད་ཅིང་རྒྱ་ཆེར་འཕེལ་བ་ལས་ཕྱི་དུས་ཉག་ཇེ་ཕྲར་གྱུར་པ་ན་རོག་ཐམས་ཅད་མཁྱེན་པའི་བག་ཆགས་སད་པ་སྨིན་གླིང་ལོ་ཆེན་དྷརྨ་ཤྲཱིས་བརྩོན་པ་ཆེན་པོས་སྨིན་གྲོལ་གྱི་རྒྱུན་གསན། དབང་ཁྲིད་ཀྱི་ཡིག་ཆ་བཀླགས་ཆོག་མཛད་ཅིང་འཆད་སྤེལ་གནང་བའི་བཀའ་དྲིན་གྱིས་ད་ལྟའང་བྲེང་མ་ཆད་ཙམ་དུ་གནས་སོ། ། ཉ༢ གཉིས་པ་དེའི་ཡན་ལག་གཅོད་ཡུལ་གྱི་རིང་ལུགས་བཤད་པ་ལ་གཉིས། ཏ༡ བཀའ་སྲོལ་ངོས་བཟུང་བ། ཏ༢ བརྒྱུད་ཚུལ་སོ་སོར་བཤད་པའོ། ། ཏ༡ དང་པོ་ནི། ཡན་ལག་དམ་ཆོས་བདུད་ཀྱི་གཅོད་ཡུལ་ནི། ། སྡུག་བསྔལ་ཞི་བྱེད་ཀྱི་ཡན་ལག་ཏུ་གཏོགས་པ་བྲམ་ཟེ་ཨརྱདེ་བ་དང་མངའ་བདག་མཻ་ཏྲི་པ་སོགས་ཀྱི་དགོངས་པ། ངོ་བོ་ཕ་རོལ་ཏུ་ཕྱིན་པ། སྔགས་དང་རྗེས་སུ་མཐུན་པ་དམ་ཆོས་བདུད་ཀྱི་གཅོད་ཡུལ་ཞེས་བྱ་བ། འཁོར་བར་འཆིང་བྱེད་ཀྱི་བདུད་བཞི་པོ་སེམས་ཀྱི་སྙེམས་རྟོགས་ངར་འཛིན་ཁོ་ནའི་སྟེང་དུ་གཅོད་པར་བྱེད་པ། དེའང་ཤིང་གཅོད་ཡུལ་ས་ལ་ངོས་འཛིན་དགོས་པ་ལྟར་སྙེམས་རྟོགས་ཀྱི་བདུད་གཅོད་ཡུལ་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། དེ་དང་འབྲེལ་བའི་ཟབ་མོའི་གདམས་པའོ། ། ཏ༢ གཉིས་པ་[བརྒྱུད་ཚུལ་སོ་སོར་བཤད་པ་]ལ་གཉིས། ཐ༡ ཕོ་གཅོད། ཐ༢ མོ་གཅོད་དོ། ། ཐ༡ དང་པོ་ནི། དམ་པས་སྐྱོ་དང་སྨ་ར་སེར་པོ་ལ། ། གདམས་ངག་བྲུལ་ཚོ་དྲུག་གནང་ཕོ་གཅོད་དང༌། ། ཕ་དམ་པ་སངས་རྒྱས་(༡༩༢བ)ཀྱིས་སྐྱོ་ཤཱཀྱ་ཡེ་ཤེས་དང་ཡར་ཀླུངས་སྨ་ར་སེར་པོ་ལ་མདོ་ལུགས་རང་རྐང་གི་གཅོད་ཨཱརྱདེ་བའི་གཞུང་ཆུང་ལྔ་བཅུ་པའི་དོན་གདམས་ངག་གྲུལ་ཚོ་དྲུག་པ་ཞེས་བྱ་བ་ལ་གནང༌། སྐྱོས་རང་གི་དབོན་བསོད་ནམས་བླ་མ། དེས་ལབ་སྒྲོན་ལ་བྲུལ་ཚོ་བཞི་གནང་བར་གྲགས། སྨ་ར་སེར་པོས་ཉེ་གནས་སྤྱོན་པ་བེ་རེ་ལ་གནང༌། དེ་ལས་བརྒྱུད་དེ་རོག་ཤེས་རབ་འོད་དང་མཁས་གྲུབ་གཞོན་ནུ་གྲུབ་སོགས་ལས་འཕེལ་བ་ནི་ཕོ་གཅོད་དུ་གྲགས་པའོ། ། ཐ༢ གཉིས་པ་[མོ་གཅོད་]ནི། ཤེར་ཕྱིན་དགོངས་དོན་མ་ཅིག་རྟོགས་པའི་ཆོས། ། ཕོ་གཅོད་ཉིད་དེ་ཕ་མ་གཉིས་མེད་དང༌། ། མཁའ་འགྲོ་ཉམས་ཀྱི་བཀའ་བབས་བུ་བཅུ་དྲུག ། དམ་པ་བོད་དུ་བྱོན་པའི་རྗེས་སུ་མཁའ་འགྲོ་ཆོ་འཕྲུལ་བྱ་ནག་བཞི་འཕུར་ཞིང་འོང་བ་གཟིགས་པ་ལས། གཡེའི་ལབ་སྒྲོན། གཉལ་སྟོད་ཀྱི་མ་ཇོ་བྱང་ཆུབ་གཙང་གི་ཞང་མོ་རྒྱལ་མཐིང༌། ལྷ་སའི་སྨྱོན་མ་སྟེ་མཁའ་འགྲོ་མ་བཞིར་གྱུར་པ་ལས། ལབ་སྒྲོན་ནི་ཤེར་ཕྱིན་བཀླགས་པས་སྟོང་ཉིད་ཀྱི་ལྟ་བ་སྐྱེས། དམ་པས་སྙིང་གཏམ་ཚིག་གཅིག་གསུངས་པས་རྒྱུད་གྲོལ་ཏེ་རང་བཞིན་གྱིས་རྣལ་འབྱོར་མར་གྱུར། ཤེར་ཕྱིན་གྱི་དགོངས་དོན་མ་གཅིག་ཉིད་ཀྱི་དགོངས་ཉམས་ལས་འཁྲུངས་པའི་རྟོགས་ཆོས་གཅོད་ཡུལ་ཞེས་ཡོངས་སུ་གྲགས་པའི་ལམ་སྲོལ་རྒྱ་ཆེན་པོ་ཕྱེས་ཏེ་གཞུང་གདམས་ངག་བསམ་གྱིས་མི་ཁྱབ་པ་མཛད་པ་ལས། བཀའ་ཚོམ་ཆེན་མོ། ཡང་ཚོམ་ལེའུ་ཉེར་ལྔ་པ། ཐུན་མོང་ཐུན་མིན་ཁྱད་པར་གྱི་ལེའུ་ཡན་ལག་བརྒྱད་གསུམ་ཉེར་བཞི་པ་སོགས་ད་ལྟའང་རྒྱུན་བཞུགས་པའི་འདི་ནི་མོ་གཅོད་ཅེས་བྱ་བ་ཡིན་ཏེ། དེ་ལའང་། ཕ་རྒྱུད་ཐབས། མ་རྒྱུད་ཤེས་རབ། གཉིས་མེད་དོན། མཁའ་འགྲོ་ཉམས་ཀྱི་བརྒྱུད་དང་བཀའ་བབས་བཞི་བཞིར་དབྱེ་བའམ། ཡང་ན། དབོན་སྲས་རྒྱལ་བ་དོན་གྲུབ། བརྒྱུད་འཛིན་སྟོང་སྡེའི་ངག་གི་དབང་ཕྱུག །ཐུགས་སྲས་གྲོལ་སྡེ་རྒྱལ་བའི་འབྱུང་གནས། ཁུ་སྒོམ་ཆོས་སེང་སྟེ། ཐུགས་སྲས་བཞི། འབྲོག་ཚ་རྒྱན། (༡༩༣ན)དཔལ་ལྡན་རྒྱན། བསོད་ནམས་རྒྱན། རིན་ཆེན་རྒྱན་ཏེ། སྲས་མོ་བཞི། སྐྱེ་མེད་དགའ་ཡན། ཕོ་སྨྱོན་སེང་གེ །སྨྱོན་པ་རང་སྣང༌། དོལ་པ་ཟང་ཐལ། ཞིག་པོ་ཧུར་ཐོན། སྐལ་ལྡན་སེང་གེ། རྒྱ་སྒོམ་ཧར་ཐོན། རྗེ་བཙུན་ཟིལ་གནོན་ཏེ། རང་དང་མཉམ་པ་བརྒྱད། དེ་དག་བསྡམས་པས་ཞལ་སློབ་བུ་ཆེན་བཅུ་དྲུག་གཙོ་བོར་གྱུར་པའི་གྲུབ་ཐོབ་ཕོ་མོ་བརྒྱ་རྩ་བརྒྱད་ལ་སོགས་པ་སློབ་ཚོགས་མང་པོས་བོད་ཁམས་གང་བར་གྱུར་པ་ལས། མདོའི་བརྒྱུད་འཛིན་སྲས་གླང་ལུང་པ་རྒྱལ་བ་དོན་གྲུབ་ཀྱི་སྲས་ཆེ་བ་ཚེ་དབང་ལ་སྲས་གསུམ་བྱུང་བའི། འབྲིང་པོ་སྔགས་ཀྱི་བརྒྱུད་འཛིན་ཐོན་སྨྱོན་བསམ་འགྲུབ་ཏུ་གྲགས་པ་འགྲན་ཟླ་མེད་པའི་གྲུབ་ཐོབ་དེ་ལ་སློབ་མ་ཕོ་མོ་ཉི་ཤུ་རྩ་གཅིག །སྲས་མོ་གྲུབ་ཐོབ་བཅོ་བརྒྱད་བྱོན་ཅིང༌། འདི་ནས་བརྩམས་ཏེ་གངས་པ་ཞེས་པའི་གཅོད་བརྒྱུད་ཁྱད་པར་ཅན་བྱོན། ཡང་ཟུང་འཇུག་གི་བརྒྱུད་འཛིན་ཁུ་སྒོམ་ཆོས་ཀྱི་སེང་གེ་ལས། འགྲོ་མགོན་སངས་རྒྱས་སྟོན་པ་དང་གཞོན་ནུ་གྲུབ་ཀྱི་བར་གྲུབ་ཐོབ་ཁོ་ནར་བརྒྱུད། དེ་ནས་བརྒྱུད་སྲོལ་མང་དུ་འཕེལ་ཏེ་རྗེ་རང་བྱུང་རྡོ་རྗེས་ཀྱང་གནམ་མཚོ་བ་མི་བསྐྱོད་རྡོ་རྗེ་ལས་གསན་ཅིང་ཡིག་ཆ་མཛད། དེའི་རྒྱུན་ལས་རུ་པའི་གཅོད་བརྒྱུད་རྣམས་དང༌། ཕྱིས་སུ་ཟུར་མང༌། དེ་ལས་ཀྱང་གནས་མདོ་དང་རྗེ་བཙུན་སྐྱ་སེ་རྟོགས་ལྡན་ལས་སྐྱབས་ཆེའི་གཅོད་རྒྱུན་ཟུར་དུ་བྱུང་བའི་མཚོན་བརྒྱུད་པ་སོ་སོ་ལས་མཐའ་ཡས་པ་འཕེལ་ལོ། ། སྲས་མོའི་རིང་བརྒྱུད་རྒྱལ་ཐང་ཉེ་བརྒྱུད་ལུགས། ། ཀུན་སྤངས་བརྩོན་སེང་ལ་འདུས་གཏེར་གཅོད་སོགས། ། ཕྲིན་ལས་ངོ་མཚར་རྒྱ་ཆེ་རྒྱུན་ཆགས་སོ། ། གཞན་ཡང་མ་ཅིག་སྲས་མོ་ལ་ལྕམ་ལས་རིམ་པར་བརྒྱུད་པའི་རིང་བརྒྱུད་དང༌། རྒྱལ་ཐང་པ་བསམ་གཏན་འོད་ཟེར་གྱིས་ཞི་གཅོད་དྲག་གཅོད་ཞི་དྲག་འདྲེས་མའི་རིང་བརྒྱུད་རྣམས་གསན་ཅིང་གཉན་ཁྲོད་བརྒྱ་རྩ་འགྲིམས་པས་གཙང་སྟོད་འོ་ཅོ་ལྷ་རྩེར་མ་(༡༩༣བ)ཅིག་དངོས་དང་མཇལ་ཞིང་བྱིན་གྱིས་བརླབས་པས་ཟབ་དོན་ཐུགས་ཀྱི་སྙིང་པོ་ཡི་གེར་བཀོད་པ་ཉེ་བརྒྱུད་རྒྱལ་ཐང་ལུགས་སུ་གྲགས་པ་དང༌། སློབ་མ་རྣམས་ལ་མ་སྤེལ་བར་ཟབ་ཆོས་དུ་མ་གཏེར་དུ་སྦས་པ་ཕྱིས་ཁུ་སྒོམ་སྐྱེ་བ་ཀུན་སྤངས་བརྩོན་འགྲུས་སེང་གེ་དང༌། མ་ཅིག་ཉིད་ཀྱི་རྣམ་འཕྲུལ་ལ་འདུས་རྡོ་རྗེ་སྒྲོན་མ་དག་གིས་གཏེར་ནས་ཕྱུང་བའི་གཅོད་སྐོར་ཟབ་ཅིང་རྒྱ་ཆེ་བ་ལས། སྔ་མའི་རྒྱུན་རྒྱ་སྟོན་གཅོད་བརྒྱུད་ད་ལྟའང་ཟམ་མ་ཆད་པ་སོགས་གཅོད་ཡུལ་གྱི་ཕྲིན་ལས་ཀྱང་ཐབས་ཟབ་པས་ངོ་མཚར་ལ། གངས་ཅན་ཙམ་ན་ཁྱབ་པར་བརྡལ་བས་རྒྱ་ཆེ་བ་དང༌། ད་ལྟའི་བར་དུ་རིས་མེད་ཀྱི་བཤེས་གཉེན་ཀུན་གྱིས་ཐུགས་ཉམས་སུ་བཞེས་ཤིང༌། ཕྱི་ནང་གི་གདུལ་དཀའ་འདུལ་བ་ལ་མེད་དུ་མི་རུང་བས་རྒྱུན་ཆགས་པའོ། ། སྤྱིར་བཀའ་སྲོལ་འདིའི་རང་སྐད་དུ། ཟུང་བཞི་ཡ་བརྒྱད་ཀྱིས་ཁོག་ཕུབ། མཚོན་པ་དཔེ་དྲུག་གིས་ཆེ་བ་བརྗོད། ཅེས་གསུངས་ཏེ། དང་པོ་ནི། ཞུ་བ་པོའི་གང་ཟག་གིས་དབྱེ་ན། ཕོ་བརྒྱུད། མོ་བརྒྱུད་གཉིས། ངོ་བོས་དབྱེ་ན། གཞུང་ཁྲིགས་ཅན་དང་། ཁ་འཐོར་གཉིས། ཡོངས་ལ་གྲགས་ཚུལ་གྱིས་དབྱེ་ན། སྔ་དར། ཕྱི་དར་གཉིས། བྱོན་ཚུལ་གྱིས་དབྱེ་ན། བཀའ་མ། གཏེར་མ་གཉིས་ཏེ། ཟུང་བཞི་ལ་ཡ་བརྒྱད་དུ་བྱུང་ངོ༌། ། ཁ་ཅིག་གིས། ཟུང་བརྒྱད་ལ་ཡ་བཅུ་དྲུག་ཏུའང་བཤད་དེ། ཕོ་གཅོད་དང་། མོ་གཅོད། བཀའ་མ་དང་། གཏེར་མ། རྒྱ་གཅོད་དང་། བོད་གཅོད། མདོ་ལུགས་དང་། སྔགས་ལུགས། སྲས་བརྒྱུད་དང་། དོན་བརྒྱུད། གནམ་ཆོས་དང་། ས་ཆོས། ཁྲིགས་ཅན་དང་། ཁྲིགས་མེད། ཁ་འཐོར་དང་། ལེ་ལག་གོ། ། དེ་ལ་དང་པོ་ནི། དམ་པ་ནས་བརྒྱུད་པ་བྲུལ་ཚོ་དྲུག་པ། ལ་བཟླ་སྐོར་གསུམ་སོགས། གཉིས་པ་ནི། མ་གཅིག་ནས་བརྒྱུད་པ་ཕག་མོའི་གཅོད་སྐོར། ཊཱིཀ་ཆེ་ཆུང་སོགས། གསུམ་པ་ནི། ཡུམ་ཆེན་མོ་དང་བསྟན་པའི་གཙོ་བོ་ནས་ཟམ་མ་ཆད་པར་བྱོན་པ། བཞི་པ་ནི། དམ་པས་བྱ་རྒོད་ཕུང་པོའི་རི་ནས་སྤྱན་དྲངས་པ་ཨུ་དུམ་ཝ་ར། འབྲས་སྤུངས་མཆོད་རྟེན་ནས་སྤྱན་དྲངས་པ་ཕྱག་རྒྱ་(༡༩༤ན)ཆེ་གཅོད་ལ་སོགས་པ་དང༌། ཁྲོས་མས་སྦས་པ་མ་ཅིག་གིས་བཏོན་པ་དང༌། མ་ཅིག་གིས་སྦས་པ་བརྒྱུད་འཛིན་རྣམས་ཀྱིས་བཏོན་པ། ལྔ་པ་ནི། ཨཱརྱདེ་བའི་རྒྱ་གཞུང་ཆེ་ཆུང༌། ཏེ་ལོ་པའི་རོ་སྙོམས་གཟེར་ལྔ། ནཱ་རོའི་གསང་སྤྱོད་ལ་སོགས་པ། དྲུག་པ་ནི། བོད་དུ་བྱུང་བའི་གཅོད་སྐོར། བདུན་པ་ནི། ཆོས་ཚན་སུམ་ཅུ་ལ་སོགས་པ། བརྒྱད་པ་ནི། སྒྲོལ་མའི་རྒྱུད་བཞི་ལ་བརྟེན་པའི་དབང་དང་བསྐྱེད་རྫོགས་ལ་སོགས་པ། དགུ་པ་ནི། རྒྱལ་བ་དོན་གྲུབ། ཐོད་སྨྱོན། ཁམ་བུ་ཡ་ལེ། རྒྱན་ནེ་བཞི་ལས་བརྒྱུད་པ། བཅུ་པ་ནི། ཁུ་སྒོམ་ལས་བརྒྱུད་པ། བཅུ་གཅིག་པ་ནི། ཐོག་སེར་གཟའ་སྲུང་གི་རིགས། བཅུ་གཉིས་པ་ནི། ས་དཔྱད་ཀླུ་གཉན་ས་བདག་གི་གཅོད། བཅུ་གསུམ་པ་ནི། ཟབ་དོན་ཐུགས་སྙིང་ལྟ་བུ། བཅུ་བཞི་པ་ནི། བརྒྱ་མདུད་མ་དང༌། ཚིག་གསལ་གྱིས་མཚོན་ཁྲིགས་སུ་མ་བསྡེབས་པ། བཅོ་ལྔ་པ་ནི། དམིགས་འབུམ་ཐོར་བུའི་རིགས། བཅུ་དྲུག་པ་ནི། རྩ་བ་གཅིག་ཡན་ལག་གསུམ་ཐུན་མོང་མུན་མིན་ཁྱད་པར་གྱི་ལེ་ལག་ཉམས་ཀྱི་བརྒྱུད་པ་རྣམས་ཏེ། དེ་དག་ནང་ཚན་སོ་སོའི་ཆོས་བཀའ་དང་མན་ངག་གི་མཐའ་ཡས་པ་ཞིག་གོ། ། མཚོན་པ་དཔེ་དྲུག་ནི། གཅོད་འདི་གངས་དཀར་དང་འདྲ་སྟེ། གངས་ལ་ཁ་བ་བབ་ཀྱང་དཀར་ལ་མ་བབས་ཀྱང་དཀར་བ་བཞིན་དུ། གཅོད་མཁན་རྣལ་འབྱོར་པ་ལ་ཐོས་པས་ཤེས་རབ་ཡོད་ཀྱང་ལེགས་ལ་མེད་ཀྱང་ཆོག་པའོ། ། སེང་གེ་དང་འདྲ་སྟེ། དེས་མང་པོ་ཟིལ་གྱིས་གནོན་ལ་གཅིག་པུར་ཉམ་ང་མེད་པ་བཞིན། གཅོད་བྱེད་པ་མང་པོ་དང་འགྲོགས་ཀྱང་ཆོག་ལ་གཅིག་པུར་འགྲིམས་ཀྱང་ཆོག་པའོ། ། རྔ་བོ་ཆེའི་སྐད་དང་འདྲ་སྟེ། རྔ་ཆེན་ལ་རོལ་མོ་གཞན་གྱི་སྒྲ་ཡོད་ཀྱང་ཆོག་ལ་མེད་ཀྱང་ཆོག་པ་བཞིན། འདི་ལ་དགེ་སྦྱོར་གྱི་གྲོགས་གཞན་ཡོད་མེད་ཀྱང་ཁྱད་མེད་པའོ། ། དངོས་གྲུབ་ཀྱི་ཆུ་མིག་དང་འདྲ་སྟེ། གྲུབ་ཆུ་ལ་མི་མང་ཉུང་གི་ཚོད་དང་མཚམས་པར་འབྱུང་བ་བཞིན། ལུགས་འདིར་གང་ཟག་གི་བློ་ཚོད་དང་མཚམས་པར་བསླབ་ཏུ་ཡོད་པའོ། ། གསེར་གཡུ་ཆག་པའི་དུམ་བུ་དང་འདྲ་སྟེ། (༡༩༤བ)ཆེ་ན་རིན་ཐང་ཆེ་ལ་ཆུང་ནའང་དེ་དང་མཚམས་པའི་རིན་ཐང་ཡོད་པ་བཞིན། གཅོད་སྐོར་རྒྱ་ཆེན་ཤེས་ན་ཡོན་ཏན་དཔག་ཏུ་མེད་ལ། ཅུང་ཟད་ཤེས་པས་ཀྱང་རང་གཞན་ལ་ཕན་ཐོགས་པའོ། ། རྟ་བཟང་པོའི་སྤུ་དང་འདྲ་སྟེ། རྟ་མཆོག་གཟུགས་འགྲོས་ལེགས་པ་ལ་སྤུ་མདོག་ཁྱད་པར་མེད་པ་བཞིན། གཅོད་ཡུལ་མཐར་ཕྱིན་པའི་གང་ཟག་དེ་མཆོག་དམན་གང་ཡིན་ཀྱང་གཞན་ལས་བྱིན་རླབས་ཆེ་བར་གསུངས་སོ། ། ཇ༧ བདུན་པ་རྡོ་རྗེའི་རྣལ་འབྱོར་གྱི་བྱུང་བ་འཆད་པ་ལ་གཉིས། ཉ༡ རིང་ལུགས་ངོས་བཟུང༌བ། ཉ༢ བརྒྱུད་ཚུལ་སོ་སོར་སྨོས་པའོ། ། ཉ༡ དང་པོ་ནི། རྩ་བརྒྱུད་རྒྱས་པ་རྣམས་ཀྱིས་བསྟན་པའི་བཅུད། ། རྡོ་རྗེའི་རྣལ་འབྱོར་རྫོགས་རིམ་ཀུན་གྱི་རྩེ། ། དུས་འཁོར་རྩ་བའི་རྒྱུད་སྟོང་ཕྲག་བཅུ་གཉིས་པ། དགྱེས་རྡོར་རྩ་རྒྱུད་འབུམ་ཕྲག་ལྔ་པ། བདེ་མཆོག་མངོན་བརྗོད་འབུམ་པ། གསང་འདུས་རྩ་རྒྱུད་སྟོང་ཕྲག་ཉེར་ལྔ་པ། འཇིགས་བྱེད་རྗེས་སུ་རིག་པ་སྟོང་ཕྲག་སུམ་ཅུ་རྩ་དྲུག་པ། སྒྱུ་འཕྲུལ་དྲ་བ་ཁྲི་དྲུག་སྟོང་པ་ལ་སོགས་པ་རྩ་བརྒྱུད་རྒྱས་པ་རྣམས་ཀྱིས་མགྲིན་གཅིག་ཏུ་གསལ་བར་བསྟན་པའི་རྫོགས་རིམ་ཐམས་ཅད་ཀྱི་བཅུད། རྡོ་རྗེ་གསུམ་གྱི་རྣལ་འབྱོར་དང་འབྲེལ་བའི་སྦྱོར་བ་ཡན་ལག་དྲུག་པ་ཞེས་བྱ་བ་བླ་མེད་ནས་གསུངས་པའི་རིམ་གཉིས་ཐམས་ཅད་ཀྱི་སྐྱེལ་སོ། རྣལ་འབྱོར་ཀུན་གྱི་རྩེ་མོ། འཕགས་བོད་གཉིས་སུ་ཉི་ཟླ་ལྟར་གྲགས་པའོ། ། ཉ༢ གཉིས་པ་[བརྒྱུད་ཚུལ་སོ་སོར་སྨོས་པ་]ལ་ལྔ། ཏ༡ འཕགས་ཡུལ་དུ་བྱོན་ཚུལ། ཏ༢ བོད་དུ་སྤྱིར་གྲགས་ཚུལ། ཏ༣ བྱེ་བྲག་ལུགས་སྲོལ་བཅུ་བདུན། ཏ༤ ལུགས་སྲོལ་གཞན། ཏ༥ ཁྱད་པར་ཅན་གྱི་རིང་ལུགས་ངོས་བཟུང་བའོ། ། ཏ༡ དང་པོ་ནི། ཆོས་རྒྱལ་རིགས་ལྡན་ཞལ་ལས་ལེགས་འོངས་པ། ། དུས་ཞབས་ཆེ་ཆུང་ཤ་བ་རི་པ་དང༌། ། དཔེ་མེད་འཚོ་དང་ཉི་མ་དཔལ་ཡེ་ཤེས། ། ནཱ་རོ་ཁ་ཆེ་ཞི་སྦས་ལུགས་སོགས་ལས། ། ཟླ་བ་བཟང་པོ་སོགས་ཆོས་རྒྱལ་བདུན་དང༌། འཇམ་དཔལ་གྲགས་པ་སོགས་རྡོ་རྗེའི་རིགས་ལྡན་རྣམས་ཀྱི་ཞལ་ནས་ཞལ་དང༌། ཐུགས་ནས་ཐུགས་སུ་ལེགས་པར་འོངས་(༡༩༥ན)པ་འདི་ཉིད་འཕགས་ཡུལ་དུའང་སྔ་རབས་ཞིག་ནས་ཕེབས་ཀྱང༌། སྐྱེ་བོ་ཀུན་ལ་གྲགས་པར་མཛད་པ་ནི་དུས་ཞབས་པ་ཆེན་པོ་ཡིན་པས་དེ་ནི་ལུགས་འདིའི་ཤིང་རྟའི་སྲོལ་འབྱེད་ཡིན་པའི་ཕྱིར་ལུགས་སྲོལ་རྣམས་ཀྱི་ཐོག་མར་བཞག །དེ་ནས་དུས་ཞབས་པ་ཆུང་བ། གྲུབ་ཆེན་ཤ་བ་རི་པས་ཉེ་བརྒྱུད་དུ་སྩལ་བ། དུས་ཀྱི་འཁོར་ལོ་དངོས་ཀྱིས་རྗེས་སུ་བཟུང་བ་གྲུབ་ཆེན་དཔེ་མེད་འཚོ། དེའི་རྗེས་འབྲངས་ཉི་མ་དཔལ་ཡེ་ཤེས། དུས་འཁོར་ཞབས་ཀྱི་སློབ་མ་པཎ་ཆེན་ནཱ་རོ་པ། ཁ་ཆེ་པཎ་ཆེན་ཤཱཀྱ་ཤྲཱི། ཕྱིས་གྲུབ་པའི་དབང་ཕྱུག་ཞི་བ་སྦས་པའི་ལུགས་སྲོལ་སོགས་མང་དུ་བྱོན་པ་ཡིན་ནོ། ། ལས་ཞེས་པ་ཕྱི་མའི་འབྱུང་ཁུངས་ཀྱི་སྒྲའོ། ། ཏ༢ གཉིས་པ་[བོད་དུ་སྤྱིར་གྲགས་ཚུལ་]ནི། བོད་དུ་སྔོན་བྱོན་བཞི་དང་བར་བྱོན་ལྔ། ། ཕྱིས་བྱོན་གཉིས་སུ་གྲགས་ཆེ། ། ཞེས་པ་སྟེ། བོད་ཡུལ་དུའང་སྔ་ཕྱིར་གང་ཟག་མང་པོས་སྤེལ་བར་མཛད་པ་ལས། གྱི་ཇོ། འབྲོ། རྭ། དིང་རི་ཆོས་ཀྱི་གྲགས་པའི་ལུགས་ཏེ་སྔོན་བྱོན་བཞི། ཁ་ཆེ་པཎ་ཆེན། མན་ལུང་པ། བི་བྷཱུ་ཏི། ཐར་ལོ་ཉི་མ་རྒྱལ་མཚན། ཨོ་རྒྱན་པ་སྟེ་བར་བྱོན་ལྔ། པཎ་ཆེན་ནགས་ཀྱི་རིན་ཆེན། སངས་རྒྱས་སྦས་པའི་མགོན་པོ་སྟེ་ཕྱིས་བྱོན་གཉིས་རྣམས་སུ་གྲགས་ཆེའོ། ། ཏ༣ གསུམ་པ་[བྱེ་བྲག་ལུགས་སྲོལ་བཅུ་བདུན་]ནི། གྱི་ཇོ་རྨ། ། ཁྲོམ་ལོ་ཇོ་བོ་འབྲོ་རྭ་ཙ་མི་དང༌། ། རས་ཆུང་རྒ་ལོ་གསུམ་དང་ཁ་ཆེ་གཉིས། ། བི་བྷཱུ་ཏི་གཉིས་ཆག་ལོ་མན་ལུང་སྟེ། ། ལུགས་སྲོལ་བཅུ་བདུན་