Tibetan
སྤྲུལ་སྐུ་ཏྲེ་ཧོ་ན་རིམ་རྣམས་ཀྱིས་འཛིན་སྐྱོང་སྤེལ་གསུམ་མཛད་པ་ཀཾ་ཚང་བཀའ་བརྒྱུད་རྩ་བ་དང༌། གྲུབ་ཆེན་ཏེ་ལོ་པས་བརྒྱུད་པ་བཅུ་གསུམ་དུ་ཆིག་བརྒྱུད་རྡོ་རྗེའི་རྒྱས་བཏབ་ནས། བཅུ་གསུམ་ཚང་ནས་རང་ཉིད་ནོར་བདག་པོའི་ཚུལ་གྱིས་ལོངས་སྤྱད་པར་ལུང་བསྟན་པ་བཞིན། རྗེ་ལྔ་པ་དེ་བཞིན་གཤེགས་པའི་ཐུགས་སྲས་རྨ་སེ་རྟོགས་ལྡན་བློ་གྲོས་རིན་ཆེན་ལ་བདེ་མཆོག་མཁའ་འགྲོ་སྙན་བརྒྱུད་ཀྱི་བཀའ་བབས། སློབ་མ་རྟོགས་ལྡན་ཡ་བརྒྱད། འཇའ་མོ་མི་གསུམ་སོགས་བྱོན་ཅིང༌། དེ་དག་གི་སྤྲུལ་བརྒྱུད་རྣམས་ཀྱིས་ཆོས་བརྒྱུད་གདན་ས་རིམ་པར་འཛིན་པ་ཟུར་མང་བཀའ་བརྒྱུད། རྗེ་བཅུ་པ་ཆོས་དབྱིངས་རྡོ་རྗེ་དང་གར་དབང་དྲུག་པ་ཆོས་ཀྱི་དབང་ཕྱུག་གི་ཞལ་སློབ་ཐུགས་རྗེ་ཆེན་པོའི་རྣམ་འཕྲུལ་གྲུབ་བརྙེས་ཀརྨ་ཆགས་མེད་ཞབས་ཀྱི་བཀའ་སྲོལ་འཛིན་པ་གནས་མདོ་བཀའ་བརྒྱུད་དེ་གསུམ་དུ་བྱུང་ཞིང༌། ཕྱི་མ་གནས་མདོ་ཆགས་མེད་ཞབས་ཐུགས་བསྐྱེད་རྟེན་འབྲེལ་གྱི་ཁྱད་པར་ལས་ཀར་ལུགས་གཙོར་བྱེད་པ་གནས་མདོ་རྩ་བའི་ཆོས་བརྒྱུད་དང༌། རྙིང་ལུགས་གཙོར་བྱེད་པ་དཔལ་ཡུལ་རིག་འཛིན་ཀུན་བཟང་ཤེས་རབ། བི་མའི་རྣམ་འཕྲུལ་ཁམས་པ་རྫོགས་ཆེན་པ་པདྨ་(༡༨༧ན)རིག་འཛིན་སོགས་ཀྱི་ཆོས་བརྒྱུད་འཛིན་པས་མདོ་ཁམས་སྨད་ཀྱི་ལྗོངས་ཕལ་ཆེར་ཁྱབ་པར་གྱུར་ཏོ། ། ཁྱད་པར་སྒྲུབ་བསྟན་ནུབ་རིར་སོན་པའི་ཚེ། ། དགྱེས་མཛད་ལོ་ཙཱ་བསམ་བཞིན་སྤྲུལ་པའི་སྐུ། ། བསྟན་པའི་ཉིན་མོར་བྱེད་པའི་སྣང་བ་བརྡལ། ། སྔོན་དུས་ཛམྦུའི་གླིང་གི་ཁྱོན་དང་གླིང་ཕྲན་ཕལ་ཆེར་དུའང་བཀའ་བརྒྱུད་གྲུབ་པའི་ཚོགས་ཀྱིས་ཁྱབ་ཀྱང་དུས་ཕྱིས་སངས་རྒྱས་ཀྱི་བསྟན་པ་སྤྱིར་གཟུགས་བརྙན་དུ་གྱུར། ཁྱད་པར་སྒྲུབ་བརྒྱུད་རིན་པོ་ཆེའི་བསྟན་པའི་ཉི་མའང་ནུབ་རིར་སོན་པ་ལྟ་བུར་གྱུར་པའི་ཚེ། དགྱེས་མཛད་མར་པ་ལོ་ཙཱ་བསམ་བཞིན་སྤྲུལ་པའི་སྐུར་བཞེངས་པ། ཀརྨ་བསྟན་པའི་ཉིན་བྱེད་གཙུག་ལག་ཆོས་ཀྱིས་སྣང་བའམ། ཡོངས་སུ་གྲགས་པའི་མཚན་ཏཱའི་སི་ཏུ་ཐམས་ཅད་མཁྱེན་པ་ཆོས་ཀྱི་འབྱུང་གནས་ཀྱི་མཁྱེན་བརྩེ་ནུས་པའི་སྣང་བ་ཆེན་པོ་བརྡལ་བས་སྒྲུབ་བརྒྱུད་བསྟན་པའི་སྲོག་རྩ་མཐུད་པར་མཛད་པ་ཡིན་ནོ། ། དྭགས་པོ་བཀའ་བརྒྱུད་གྲུབ་ཐོབ་ས་ཡི་རྡུལ། ། རྒྱལ་བསྟན་ཇི་སྲིད་མི་འཆད་ཀུན་ལས་འཕགས། ། དེ་ལྟར་མཉམ་མེད་དྭགས་པོ་བཀའ་བརྒྱུད་ལ་ས་ཆེན་པོའི་རྡུལ་གྱི་གྲངས་དང་མཉམ་པའི་གྲུབ་ཐོབ་བྱོན་པས་བསྟན་འགྲོའི་དོན་མཛད་པའི་ཆོས་བརྒྱུད་སོགས་ཞིབ་པར་བརྗོད་ནུས་པ་མ་ཡིན་ཅིང༌། ནཱ་རོ་པས། ཆོས་བརྒྱུད་ཆུ་བོའི་གཞུང་བས་རིང༌། ། ཞེས་དང༌། རྒྱལ་བའི་བསྟན་པ་ཇི་སྲིད་ཀྱི་བར་དུ་ཉམས་དང་རྟོགས་པའི་བརྒྱུད་པ་མི་འཆད་པ་རྗེ་མར་པ་ལ་ལུང་བསྟན་པ་བཞིན་རྟོགས་པའི་བསྟན་པ་སྒྲུབ་པས་འཛིན་པ་ལ་བརྒྱུད་པ་འདི་གྲུབ་མཐའ་ཀུན་ལས་ཁྱད་པར་དུ་འཕགས་སོ། ། ཇ༥ ལྔ་པ་ཤངས་པ་བཀའ་བརྒྱུད་ཀྱི་རིང་ལུགས་འཆད་པ་ལ་གཉིས། ཉ༡ བཀའ་སྲོལ་ངོས་བཟུང་བ། ཉ༢ བརྒྱུད་པ་སོ་སོའི་ཚུལ་སྨོས་པའོ། ། ཉ༡ དང་པོ་ནི། ཡེ་ཤེས་ཌཱ་ཀི་པཎ་གྲུབ་བརྒྱ་ལྔ་བཅུའི། ། ཐུགས་མཛོད་མཐར་ཐུག་ལྔ་ལྡན་ཁྱུང་པོས་བླངས། ། བཤད་རྩོད་སྒྲུབ་པའི་ལམ་གསུམ་ཕྱི་མའི་བཅུད། ། གསེར་ཆོས་རྩ་(༡༨༧བ)བར་གྱུར་པའི་ཆོས་སྐོར་ལྔ། ། རྡོ་རྗེ་འཆང་དངོས་ལས་ཆོས་གསན་པའི་ཡེ་ཤེས་ཀྱི་ཌཱ་ཀི་ནི་གུ་མ་དང༌། སུ་ཁ་སིདྡྷི་རྣམ་པ་གཉིས། ཁྱད་འཕགས་ཀྱི་བླ་མ་བཅུ་གསུམ། རྩ་བའི་བླ་མ་རྣམ་བཞི་སོགས་མཁས་གྲུབ་བརྒྱ་དང་ལྔ་བཅུའི་ཐུགས་བཅུད་ཆོས་ཀྱི་མཛོད་མ་ལུས་པ་མཐར་ཐུག་ལྔ་ལྡན་ཁྱུང་པོ་རྣལ་འབྱོར་གྱིས་བླངས། དེའང་མཁས་གྲུབ་ཁྱུང་པོ་རྣལ་འབྱོར་དེ་ཉིད་བོན་དང་རྙིང་མ་ལ་རིམ་གྱིས་མཁས་ཤིང་གྲུབ་པ་ཐོབ་ཀྱང་བྱང་ཆུབ་སྤྱོད་པའི་སྨོན་ལམ་དུས་སུ་སོན་པས་འཕགས་ཡུལ་ནས་མདོ་རྒྱུད་ཀྱི་ཟབ་ཆོས་བཙལ། གཏུམ་མོ་སྟོན་པའི་མཐར་ཐུག་དགྱེས་མཛད། ལས་རྒྱ་མཐར་ཐུག་བདེ་མཆོག །སྒྱུ་ལུས་འོད་གསལ་མཐར་ཐུག་གསང་འདུས། རྨི་ལམ་མཐར་ཐུག་མ་ཧཱ་མཱ་ཡཱ། ཕྲིན་ལས་མཐར་ཐུག་རྡོ་རྗེ་འཇིགས་མཛད་དེ་རྒྱུད་སྡེ་ལྔ་སྐུའི་གནས་ལྔར་དངོས་སུ་གྲུབ་པས་མཚོན་མདའ་བསྣོན་ཞབས་སོགས་ཡེ་ཤེས་ཀྱི་སྐུ་བརྙེས་པ་རྣམས་དང་མི་གཉིས་པའི་གྲུབ་པའི་ས་ལ་བཞུགས་པ་དེས་གཙང་གཡས་རུ་ཤངས་ཀྱི་ཞང་ཞུང་དུ་གདན་ས་མཛད་པས་བླ་མ་ཤངས་པ་དང༌། བརྒྱུད་འཛིན་རྣམས་ལ་ཤངས་པ་བཀའ་བརྒྱུད་དུ་གྲགས། དགུང་ལོ་བརྒྱ་དང་ལྔ་བཅུར་བཞུགས་ཤིང་བསམ་གྱིས་མི་ཁྱབ་པའི་ཆོ་འཕྲུལ་ཆེན་པོས་ཆོས་ཀྱི་འཁོར་ལོ་མཐའ་ཡས་པ་བསྐོར་བའི་ལམ་སྲོལ་དེ་དག་བསྡུ་ན། བཤད་པ། རྩོད་པ། སྒྲུབ་པའི་ལམ་རིམ་གསུམ་དུ་འདུ་བ་སྟེ། བཤད་པའི་ལམ་རིམ་ལ། མདོ་དང་དེའི་བསྟན་བཅོས་རྒྱུད་རྒྱུད་འགྲེལ་དང་བཅས་པ། མཚན་ཉིད་ཐེག་པ་ལ་གྲུབ་མཐའ་ཆེན་པོ་བཞི། རྡོ་རྗེ་ཐེག་པ་ལ་རྒྱུད་སྡེ་ཆེན་པོ་བཞི་ཚུལ་བཞིན་དུ་བཤད་པ་དང༌། རྩོད་པའི་ལམ་རིམ་ལ་ཚད་མ་སྡེ་བདུན་སོགས་རྟོག་གེ་ཕྱི་རབས་པའི་ལུགས་ཀྱང་གསན་མོད། གཙོ་བོར་ཚད་མ་སྔ་རབས་པ་ལ་གྲགས་པ་ལྟར་གཏན་ཚིགས་ཆེན་མོ་བཞིས་མཚན་ཉིད་གསུམ་གཏན་ལ་འབེབས་ཅིང༌། ཚད་མ་ཡང་མངོན་སུམ་རྗེས་དཔག་ཡིད་ཆེས་གསུམ་ཕྱེ་ནས། བརྒལ་ལན་རྣམ་པར་ངེས་པར་བྱེད་པ་དང༌། (༡༨༨ན)སྒྲུབ་པའི་ལམ་རིམ་ལ་རྒྱུ་ཕར་ཕྱིན་ཐེག་པ་དང༌། འབྲས་བུ་རྡོ་རྗེ་ཐེག་པ་གཉིས་ཀྱི་ཉམས་ལེན་མཐའ་དག །བྱང་ཕྱོགས་སོ་བདུན་ཐུན་མོང་དང་ཁྱད་པར་གྱི་གནད་ཀྱིས་ཉམས་སུ་ལེན་ཚུལ་མན་ངག་ཏུ་དྲིལ་ནས་སྟོན་པས། གངས་ཅན་དུ་བྱོན་པའི་སྟོན་པ་ཞིག་ལ་ཆོས་ཀྱི་སྒོ་མཐའ་ཡས་པ་དང༌། འགྲན་ཟླ་མེད་པའི་ཕྲིན་ལས་ཅན་ཡིན་པས་བསམ་གྱིས་མི་ཁྱབ་བོ། །དེ་དག་ཐམས་ཅད་ལས་ཕྱི་མ་སྒྲུབ་པའི་ལམ་རིམ་གྱི་སྙིང་པོའི་བཅུད་ཙམ་ཞིག་དེང་སང་གི་བར་དུ་བཞུགས་པ་སྟེ། དེའང་ནི་དྷི་རྣམ་གཉིས་ཀྱི་གསེར་ཆོས་རྩ་བར་གྱུར་པའི་ཆོས་སྐོར་ལྔར་གྲགས་པ་སྟེ། ནི་གུ། སུ་ཁ། རྡོ་རྗེ་གདན་པ། མཻ་ཏྲི་པ། རཱ་ཧུ་ལའི་སྐོར་ལྔ། མན་ངག་འཐོར་བུ་དང་བཅས་པ་རྣམས་སོ། ། ཉ༢ གཉིས་པ་[བརྒྱུད་པ་སོ་སོའི་ཚུལ་སྨོས་པ་]ལ་བཞི། ཏ༡ རིང་བརྒྱུད། ཏ༢ ཉེ་བརྒྱུད། ཏ༣ ཤིན་ཏུ་ཉེ་བརྒྱུད། ཏ༤ ཁྱད་པར་འཕགས་ཚུལ་བསྟན་པའོ། ། ཏ༡ དང་པོ་ནི། སྔ་ཕྱིའི་བུ་དྲུག་བཤེས་གཉེན་ཁྲི་བཅོ་བརྒྱད། ། སྨིན་ཅིང་གྲོལ་མཛད་ཆིག་བརྒྱུད་རྡོ་རྗེའི་རྒྱ། ། རིན་ཆེན་བདུན་པ་ཆོས་རྗེ་སྟོན་པས་བཀྲོལ། ། མཁས་གྲུབ་རྣམ་གསུམ་གནས་རྙིང་གདན་སློབ་བརྒྱུད། ། གྲུབ་ཆེན་ཁྱུང་པོའི་སྔ་བུ་ལྔ། ཕྱི་བུ་གཅིག་དང་དྲུག་གི་གཙོས་བཤེས་གཉེན་ཁྲི་ཕྲག་བཅོ་བརྒྱད་སོགས་ས་ཆེན་པོའི་རྡུལ་དང་མཉམ་པའི་གདུལ་བྱ་སྨིན་ཅིང་གྲོལ་བར་མཛད་པ་སྟེ། དེ་ལ་སྔ་བུ་ལྔ་ནི། དྲི་མེད་ཤེས་རབ་ཀྱི་སྡོང་པོ་རྨེའུ་སྟོན་པ། ཕན་སེམས་ཡལ་ག་གཡོར་པོ་རྒྱ་མོ་ཆེ། སྙིང་རྗེའི་ལོ་འདབ་དངུལ་སྟོན་རིན་དབང༌། བྱམས་པའི་མེ་ཏོག་ལ་སྟོད་དཀོན་མཆོག་མཁར། འོད་གསལ་སྙིང་པོ་ཞང་སྒོམ་ཆོས་སེང་རྣམས་དང༌། ཕྱི་བུ་གཅིག་ནི་སྒྱུ་ལུས་རྨི་ལམ་གྱི་འབྲས་བུ་སྨིན་པ་རྨོག་ལྕོགས་པ་རིན་ཆེན་བརྩོན་འགྲུས་ཏེ། རྡོ་རྗེ་འཆང་གི་གསང་ཚིག་ཆིག་བརྒྱུད་ཀྱི་བཀའ་ནི་རྨོག་ལྕོགས་པ་ཁོ་ན་ལ་བབས། དེ་ནས་རིམ་བཞིན་དབོན་སྟོན་སྐྱེར་སྒང་པ། སངས་རྒྱས་གཉན་སྟོན། འགྲོ་མགོན་སྟོན་པའི་བར་དུ་བརྒྱུད་དེ་རྡོ་རྗེ་འཆང་དང་ཡེ་ཤེས་ཌཱ་ཀིས་ལུང་བསྟན་(༡༨༨བ)པ་བཞིན་དུ་ཆིག་རྒྱུད་རྡོ་རྗེའི་རྒྱ་རིན་ཆེན་བདུན་པར་གྱུར་པ་འགྲོ་མགོན་ཆོས་རྗེ་སྟོན་པས་བཀྲོལ་ཏེ་ཛམྦུའི་གླིང་དང་གླིང་ཕྲན་ཚུན་ཆད་གྲུབ་ཐོབ་ཀྱི་སློབ་མས་ཁྱབ་པ་ལས། གཙོ་བོ་གཙང་པ་ཤངས་སྟོན། བསམ་ལྡིང་པ་གཞོན་ནུ་གྲུབ། འཇག་ཆེན་རྒྱལ་མཚན་འབུམ་སྟེ་མཁས་གྲུབ་རྣམ་པ་གསུམ་གྱིས་བརྒྱུད་པའི་རྐང་བཟུང་ཞིང་གདམས་ངག་ཡི་གེར་བཀོད། ཤངས་སྟོན་སློབ་མ་ཁྱུང་པོ་ཚུལ་མགོན་སོགས་རིན་ཆེན་རྣམ་བདུན་ཕྱི་མར་གྲགས་པ་ངོ་མཚར་བའི་བརྒྱུད་པ་དང༌། འཇག་བསམ་གཉིས་ཀྱི་གདན་ས་སློབ་བརྒྱུད་མཐའ་ཡས་པ་བྱོན་ཅིང༌། གཞན་ཡང་ཆོས་རྗེ་སྟོན་པའི་དངོས་སློབ་གསེར་གླིང་པ་བཀྲ་ཤིས་དཔལ་ལས་གྱེས་པ་དང༌། ཆེ་བ་བཅུ་དང་ལྡན་པ་ལ་སྟོད་གནས་རྙིང་གི་གདུང་རབས་ལ་སྤྱན་རས་གཟིགས་ཀྱི་རྣམ་འཕྲུལ་བརྒྱད་ཅུ་རྩ་བརྒྱད་བྱོན་ནས་བསྟན་འགྲོའི་དོན་བྱེད་པར་ལུང་བསྟན་པའི་ཐོག་མའི་རབས་སུ་གྱུར་པ་ལ་སྟོད་པ་དཀོན་མཆོག་མཁར་གྱི་གདན་ས་པ་རིམ་བྱོན་དང་སློབ་བརྒྱུད་ལས་གྱེས་པ་སོགས་མཐའ་ཡས་སོ། ། ཏ༢ གཉིས་པ་[ཉེ་བརྒྱུད་]ནི། ཐང་རྒྱལ་ནི་གུའི་བཀའ་བབས་སྔ་ཕྱི་གསུམ། ། ཀུན་མཁྱེན་དོལ་པོ་སངས་རྒྱས་ཀྱི་སྐུའི་སྐྱེ་བ་ཕྱི་མ་གྲུབ་ཆེན་བརྩོན་འགྲུས་བཟང་པོའམ་ཐང་སྟོང་རྒྱལ་པོ་སོགས་སྐུ་གཅིག་ལ་མཚན་ལྔ་ལྡན་པ་དེ་ཉིད་ཀྱིས། རིང་བརྒྱུད་མཁས་གྲུབ་ཤངས་སྟོན་གྱི་སློབ་མ་མུས་ཆེན་རྒྱལ་མཚན་དཔལ་བཟང་ནས་རི་གོང་བསྟོད་བརྒྱུད་དུ་གྲགས་པའི་སྙན་བརྒྱུད་རྣམས་བྱང་སེམས་སྦྱིན་པ་བཟང་པོ་ལས་གསན་ནས་ཐུགས་ཉམས་སུ་བཞེས་པས། ཡེ་ཤེས་མཁའ་འགྲོ་དངོས་ཀྱིས་རྗེས་སུ་བཟུང་བའི་ཉེ་བརྒྱུད་རིམ་པ་གསུམ་བྱུང་སྟེ། དང་པོ་གཙང་གི་རི་བོ་ཆེར་ནི་གུ་མ་དངོས་སུ་བྱོན་ཏེ། ཆོས་དྲུག །ཕྱག་ཆེན། ལམ་ཁྱེར། འཆི་མེད། བླ་མ་མགོན་པོ་དབྱེར་མེད་རྣམས་ཀྱི་ཁྲིད། གཉིས་པ་མདོག་སྨད་སྲིན་རྫོང་ཤུག་སྡོང་གི་རྩ་བར་དེ་དག་སོ་སོའི་དབང༌། གསུམ་པ་མཁའ་སྤྱོད་ཀྱི་གདམས་པ་ཡི་གེ་མེད་པའི་བརྡ་ཐབས་སུ་བྱུང་བ་བཅས་བཀའ་བབས་སྔ་ཕྱི་བར་གསུམ་(༡༨༩ན)མང་མཁར་བ་བློ་གྲོས་རྒྱལ་མཚན་སོགས་ལས་སོ་སོར་བརྒྱུད་དེ་ད་ལྟའི་བར་བཀའ་བརྒྱུད་ཟམ་མ་ཆད་པར་བཞུགས་སོ། ། ཏ༣ གསུམ་པ་[ཤིན་ཏུ་ཉེ་བརྒྱུད་]ནི། ཉེ་རིང་ཉེར་ལྔ་གྲུབ་པའི་དཔའ་བོས་གསན། ། ཌཱ་ཀིས་རྗེས་བཟུང་ངོ་མཚར་ཉེ་བརྒྱུད་བཅས། ། གསང་བདག་སྒྲོལ་མགོན་བཀའ་སྲོལ་ཁྱད་པར་ཅན། ། ཉེ་བརྒྱུད་དག་པའི་སྣང་བར་རྡོ་རྗེ་བཙུན་མོ་ནི་གུཔྟས་ཞལ་དངོས་སུ་བསྟན་ཏེ་གདམས་ངག་ཁྱད་པར་ཅན་ལན་གཉིས་སྩལ་བ་དང༌། རིང་བརྒྱུད་འཇག་བསམ་གཉིས་དང་ཐང་རྒྱལ་སོགས་བརྒྱུད་པའི་རྣམ་གྲངས་ཉེར་བཞི་སྟེ། བརྒྱུད་སྲོལ་ཉེར་ལྔ་ཁྲིད་ཐེང་བརྒྱ་ལྷག་བཅས་འཇམ་མགོན་གྲུབ་པའི་དཔའ་བོ་དཔལ་ལྡན་ཀུན་དགའ་གྲོལ་མཆོག་གིས་གསན། ཁྲིད་ཚུལ་ལན་གྲངས་བརྒྱ་ལྷག་སྩལ་བས་སྐལ་ལྡན་དུ་མ་གྲུབ་པའི་ས་ལ་བཀོད། དེ་ལྟར་རིང་བརྒྱུད། ཉེ་བརྒྱུད་གཉིས། ཡེ་ཤེས་ཌཱ་ཀིས་གྲོལ་མཆོག་ཞབས་རྗེས་སུ་བཟུང་བའི་ངོ་མཚར་ཤིན་ཏུ་ཉེ་བརྒྱུད་བཅས་ཀྱི་བཀའ་བབས་ཤིང༌། རྩ་བ་ཤངས་པའི་སྙན་བརྒྱུད་ཀྱི་གསེར་ཆོས་གཙང་མ་ལ། གདམས་ངག་རྣོ་སོ་ཉེ་བརྒྱུད་མཁའ་འགྲོའི་ཁ་རླངས་ཅན་གྱིས་ཟུར་བརྒྱན་ཟབ་དོན་ཐང་བརྡལ་མ་སོགས་གསང་བདག་སྒྲོལ་བའི་མགོན་པོའི་བཀའ་སྲོལ་ཁྱད་པར་ཅན་འདི་ནི་ད་ལྟའི་སྐབས་ཁྲིད་ཚུལ་གཞན་དག་ལས་རྣམ་པ་དུ་མས་ཁྱད་པར་དུ་འཕགས་པ་ཡིན་ནོ། ། ཏ༤ བཞི་པ་[ཁྱད་པར་འཕགས་ཚུལ་བསྟན་པ་]ནི། སྲིད་མཐའི་བྱང་སེམས་འབའ་ཞིག་ཕྲེང་བར་བརྒྱུད། ། མ་ནོར་མ་བསླད་ཌཱ་ཀིའི་རྡོ་རྗེའི་ཚིག ། དུས་ཀྱི་མཐའ་ཡང་གྲུབ་པའི་འབྲས་བུ་སྨིན། ། བཀའ་བརྒྱུད་འདི་གཞན་ལས་འཕགས་པའི་ཁྱད་ཆོས་གསུམ་དང་ལྡན་པ་ཡིན་ཏེ། བརྒྱུད་འཛིན་ཁྱད་པར་དུ་འཕགས་པ་སྲིད་པ་ཐ་མ་པའི་བྱང་ཆུབ་སེམས་དཔའ་འབའ་ཞིག་ཕྲེང་བར་བརྒྱུད་པ་ལས་གང་ཟག་ཐ་མལ་པས་བར་དུ་མ་ཆོད། གདམས་ངག་ཁྱད་པར་དུ་འཕགས་པ་དོན་མ་ནོར་ཞིང་ཚིག་མ་བསླད་པ་ཡེ་ཤེས་ཌཱ་ཀིས་ཐེམས་སུ་བཏབ་པའི་རྡོ་རྗེའི་ཚིག་རྐང་སོ་སྐྱེའི་བློས་(༡༨༩བ)བརྟགས་ཀྱིས་བཅོས་བསྒྱུར་དང་རྩོམ་པ་མ་ཕོག །བྱིན་རླབས་ཁྱད་པར་དུ་འཕགས་པ་སྙིགས་མའི་དུས་ཀྱི་མཐར་ཐུག་འདིར་ཡང་བརྩོན་འགྲུས་ལྡན་ཅིང་དམ་ཚིག་མ་ཉམས་པ་ལ་གྲུབ་པའི་འབྲས་བུ་སྨིན་པ་མངོན་སུམ་དུ་མཐོང་བས་བཤད་ཚོད་ཙམ་དུ་མ་ལུས་པའོ། ། མྱུར་མཛད་ཕྲིན་ལས་ལ་སོགས་མཐའ་ཡས་སོ། ། མྱུར་མཛད་ཡེ་ཤེས་ཀྱི་མགོན་པོའི་ཆོས་སྐོར་ཁོ་ན་ལ་མཚོན་ན་སྔོན་དུས་སྟོད་ལུགས་པས་ཕལ་ཆེར་ལ་ཁྱབ། ཕྱིས་སུ་སྨད་ལུགས་རི་གོང་བརྒྱུད་པ་ཆེས་འཕེལ་ཏེ་གདན་སའི་བརྒྱུད་པ་ལས་ཕག་གྲུ། ཀཾ་ཚང༌། ཚོགས་སྡེ་བཞི་སོགས་ལ་ཁྱབ་ཅིང༌། བསམ་ལྡིང་པ་ལ་ལྷོ་གཅོད་ཀྱི་བརྒྱུད་པ་སོ་སོར་འཕེལ་བ་དང༌། འཇག་པ་ལས་སྟོད་བརྒྱུད་སྨད་བརྒྱུད་བར་བརྒྱུད་གསུམ་བྱུང་ཞིང་ཁྱད་པར་རྗེ་ཙོང་ཁ་པས་འཇག་ཆེན་བྱམས་པ་དཔལ་བ་དང༌། རིག་པའི་དབང་ཕྱུག་དགེ་ལེགས་དཔལ་བས་མུས་ཆེན་ནམ་མཁའི་རྣལ་འབྱོར་ལས་གསན་ཏེ་དབུས་གཙང་ཁམས་གསུམ་རྒྱ་སོག་ཡན་ཆད་དུ་ཁྱབ། སོགས་ཁོང་ནས་བརྒྱུད་པ་ཕྱི་མ་ལས་འོངས་པ་སྐྱེར་སྒང་ཐུགས་རྗེ་ཆེན་པོ་དང་རྟ་མགྲིན་གསང་སྒྲུབ། གཉན་སྟོན་པའི་འཆི་མེད་འཁྲུལ་འཁོར་སོགས་ཀྱིས་ཀྱང་གྲུབ་མཐའ་ཕལ་མོ་ཆེར་ཁྱབ་པ་སོགས་དཔལ་ལྡན་ཤངས་པ་བཀའ་བརྒྱུད་ཀྱི་ཕྲིན་ལས་ནི་མཐའ་ཡས་སོ། ། ཇ༦ དྲུག་པ་དམ་ཆོས་སྡུག་བསྔལ་ཞི་བྱེད་ཀྱི་རིང་ལུགས་བཤད་པ་ལ་གཉིས། ཉ༡ དངོས་དང༌། ཉ༢ དེའི་ཡན་ལག་བཤད་པའོ། ། ཉ༡ དང་པོ་ལ་གཉིས། ཏ༡ བཀའ་སྲོལ་ངོས་བཟུང་བ། ཏ༢ བརྒྱུད་པ་སོ་སོའི་ཚུལ་སྨོས་པའོ། ། ཏ༡ དང་པོ་ནི། གྲུབ་ཐོབ་ང་བཞི་མཁའ་སྤྱོད་སོ་དྲུག་གི། ། བཅུ་བརྙེད་དམ་པ་བོད་དུ་ལན་ལྔར་ཕེབ། ། རྣམ་ཐར་ཚུལ་མཐུན་འགྲོ་མང་བསྒྲལ་མཛད་པའི། ། དམ་ཆོས་སྡུག་བསྔལ་ཞི་བྱེད་ཅེས་བྱ་བ། ། རྗེ་བཙུན་ཀ་མ་ལ་ཤཱི་ལས་གྲུབ་ཐོབ་ཕོ་མོ་ལྔ་བཅུ་རྩ་བཞི་བརྟེན། བཅུད་ལེན་སོགས་ཐུན་མོང་གི་གྲུབ་པ་བརྒྱད་བརྙེས་པས་དགུང་ལོ་ལྔ་བརྒྱ་དང་བདུན་ཅུ་བཞུགས། ཐུགས་དམ་བདེ་བར་གཤེགས་པ་བཅུ་གཉིས་(༡༩༠ན)སོགས་སངས་རྒྱས་གནམ་གྱི་སྐར་མ་ཙམ་དང་ངོ་མཚར་མཁའ་སྤྱོད་ཀྱི་བླ་མ་སུམ་ཅུ་རྩ་དྲུག་ཞལ་གཟིགས་ཏེ། བྱིན་རླབས་དང་གདམས་པའི་བཅུད་བརྙེས་ནས་མཆོག་གི་དངོས་གྲུབ་ཐོབ། བོད་དང་རྒྱ་ནག་ཏུ་ཕ་དམ་པ་སངས་རྒྱས་ཞེས་མཚན་ཡོངས་སུ་གྲགས་པ་དེ་ཉིད་བོད་དུ་ལན་ལྔར་ཕེབས་ཏེ། དང་པོ་འབྲིང་ཐང་ལས་སྒོ་ནས་ཙཱ་རིར་ཐོན། མདོ་ཁམས་ཀུན་ཞབས་ཀྱིས་བཅགས་ཏེ་བསྟན་པ་དར་བར་ལུང་བསྟན། གཉིས་པར་ཁ་ཆེ་ནས་ཐོན་ཏེ་མངའ་རིས་སུ་བྱོན། ཞང་ཞུང་གླིང་ཁ་བ་དང་བོན་པོ་ཁྲོ་ཚང་འབྲུག་ལྷ་རྗེས་སུ་བཟུང༌། གསུམ་པར་བལ་པོ་ནས་གཙང་དུ་བྱོན། ཡར་ཀླུང་སྨ་ར་སེར་པོ་དང༌། སྐྱོ་སྟོན་བསོད་ནམས་བླ་མ་ལ་གདམས་པ་གནང༌། བཞི་པར་ཤ་འུག་ལྟག་སྒོ་ནས་གཉལ་དུ་བྱོན་ཏེ་ཡུམ་གྱི་སྒྲིབ་པ་སྦྱངས། དབུས་སུ་རྨ་སོ་ཀཾ་གསུམ་གྱི་དོན་མཛད། ལྔ་པ་རྒྱ་ནག་ཏུ་བྱོན། ལོ་བཅུ་གཉིས་བཞུགས་ཏེ་སླར་དིང་རིར་ཕེབས། དེ་དག་གི་སྐབས་སུ་གང་ཟག་སོ་སོའི་ཁམས་དང་དབང་པོ་ཇི་བཞིན་དུ་གཟིགས་པས་དེ་དག་དང་མཐུན་པའི་གདམས་ངག་སྣ་རེས་གྲོལ་བར་མཛད་པས་གཞུང་དང་ལུགས་སྲོལ་མཐའ་གཅིག་ཏུ་རྣམ་པར་བཞག་པ་མེད་ཀྱང་གཙོ་བོར་གཞུང་ཨཱ་ལི་ཀཱ་ལི་ཆུ་ཀླུང་ཆེན་པོའི་རྒྱུད་དང༌། ཕྱག་རྒྱ་ཆེན་པོའི་བརྡའི་རྒྱུད་སོགས་ལ་བརྟེན། ཐབས་ཉིད་ཀྱི་རྣམ་པར་ཐར་པ། རྟེན་སྡོམ་པ་གསུམ་ལྡན། ལམ་དཀའ་ཐུབ་ཀྱི་སྲང༌། འབྲས་བུ་གཞན་དོན་སྤྱོད་པ་གསུམ་དང་ཚུལ་མཐུན་པར་ལས་ཅན་གནམ་གྱི་སྐར་མའི་གྲངས་ལྟ་བུའི་འགྲོ་བ་མང་པོ་སངས་རྒྱས་ཀྱི་ས་ལ་བསྒྲལ་བར་མཛད་པའི་ཆོས་དེ་ལ་སྤྱི་མིང་སྒེར་དུ་ཆགས་ཏེ་དམ་ཆོས་སྡུག་བསྔལ་ཞི་བྱེད་ཅེས་བྱ་བ་ཡོངས་སུ་གྲགས་སོ། །དེའང་ཆོས་གཞན་ནི་རྒྱུ་ཉོན་མོངས་པ་སྔོན་དུ་སྦྱོང༌། སྡུག་བསྔལ་ཤུགས་ལས་ཟློག་པ་ཡིན་ལ། འདིར་ནི་འབྲས་བུ་སྡུག་བསྔལ་དངོས་སུ་སྦྱོང༌། ཤུགས་ལས་ཉོན་མོངས་པ་དྲུངས་འབྱིན་པའི་ཐབས་ཤིན་ཏུ་ཟབ་པ་སྟེ། སྡུག་བསྔལ་ཐམས་ཅད་རབ་ཏུ་ཞི་(༡༩༠བ)བར་བྱེད་པའི་སྔགས། ཞེས་པའི་ལུང་ལ་བརྟེན་ནས་བཏགས་པར་བཞེད་དོ། ། ཏ༢ གཉིས་པ་[བརྒྱུད་པ་སོ་སོའི་ཚུལ་སྨོས་པ་]ལ་བཞི། ཐ༡ བརྒྱུད་པ་དང་པོ། ཐ༢ བར་པ། ཐ༣ ཐ་མ། ཐ༤ འཕྲོས་དོན་བཤད་པའོ། ། ཐ༡ དང་པོ་ནི། སྔ་ཕྱི་བར་གསུམ་བསྟན་པ་ལས་དང་པོ་ནི། ། ཁ་ཆེ་ཨང་ལོ། ཞེས་པ་སྟེ། བཤད་མ་ཐག་པའི་ཞི་བྱེད་ཀྱི་བརྒྱུད་པ་ཡོངས་སུ་གྲགས་པ་ནི་སྔ་ཕྱི་བར་གསུམ་དུ་བསྟན་པར་གྲགས་པ་ལས། དང་པོ་ནི། དམ་པས་ཁ་ཆེ་ཛྙཱ་ན་གུ་ཧྱ་ལ་ཞི་བྱེད་སྒྲོན་མ་སྐོར་གསུམ། གཤིན་རྗེ་གཤེད་ལ་སོགས་པའི་སྒྲུབ་ཐབས་རྣམ་བཤད། དེ་གཉིས་ཀས་ཨང་པོ་ལོ་ཙཱ་བ་ལ་བཤད། ཡང་ཁ་ཆེས་པུ་ཧྲང་ལོ་ཆུང་ལ་བཤད། ཁ་ཆེ་ཨང་ལོ་གཉིས་ཀའི་བརྒྱུད་པ་རོག་ཤེས་རབ་འོད་ལ་བབས་སོ། ཐ༢ གཉིས་པ་[བརྒྱུད་པ་བར་པ་]ནི། བར་པ་རྨ་སོ་ཀཾ ། བརྒྱུད་ཕྲན་ལུགས་གསུམ་འཐོར་བུ་སྣ་ཚོགས་བཅས། ། བརྒྱུད་པ་བར་པ་གཙོ་བོ་རྨ་སོ་ཀཾ་གསུམ་དུ་གྲགས་པ་སྟེ། རྨ་ཆོས་ཀྱི་ཤེས་རབ་ལ་ཚིག་བརྒྱུད་སེམས་བསྐྱེད་གཏང་ཐུན་ཁ་འཐོར་ཁར་ཕོག་སྣར་ཕོག །དོན་བརྒྱུད་ལག་ཁྲིད་བཅུ་དྲུག་རྣམས་གནང༌། སོ་ཆུང་དགེ་འདུན་འབར་ལ་གྲུབ་ཐོབ་ཕོ་མོ་ལྔ་བཅུ་རྩ་བཞིའི་གདམས་པ་སོགས་གནང་བའི་ཆོས་ཀྱི་སྒོ་གྲངས་ཚིག་བརྒྱུད་དོན་བརྒྱུད་གཉིས། ཚིག་བརྒྱུད་ལ་བརྒྱུད་པ་ཆེན་པོ་ལྔ་བཅུ་རྩ་བཞི་པ། བརྒྱུད་ཕྲན་ཆོས་སྡེ་སུམ་ཅུ་རྩ་གཉིས་ལ་གཉིས། དོན་བརྒྱུད་ཕྱོགས་སུ་ལྷུང་བ་དང་མ་ལྷུང་བ་གཉིས་ཀྱི་སྔ་མ་ལ། གྲུབ་ཐོབ་ང་བཞི། བླ་མ་སོ་གཉིས། དམ་པ་བཅུ་བདུན་རྣམས་ལས་དོན་བརྒྱུད་རེ་རེ། ཕྱི་མ་ལ་མིག་འབྱེད་མཁའ་འགྲོའི་སྐོར་གཉིས་ཀྱི་སྔ་མ་ལ་བུ་བཞི་མ་ལྔ། ཕྱི་མ་ལ་སོའི་སྐོར་མགོ་ཆེན་མོ་བཞིར་གྲགས་པ། དེ་རྣམས་ཀྱི་རྩ་བའི་སྙིང་པོ་ལྟ་བུར་གྱུར་པ་ནི་རྒྱུད་སྡེ་དང་ཆོས་སྐད་བསྟུན་པ་སྨྲ་བའི་སེང་གེའི་དོན་བརྒྱུད། ཆོས་སྐད་མ་བསྟུན་པ་བརྒྱུད་པ་བཞི་པ་ཡོངས་སུ་མ་གྲགས་པའི་དོན་བརྒྱུད། མ་ཚང་མདོར་བསྡུས། སོའི་རིག་པ་སྲང་འཇུག་སྙན་བརྒྱུད་བཞི་རྣམས་(༡༩༡ན)བཞུགས་སོ། ། ཀཾ་ཡེ་ཤེས་རྒྱལ་མཚན་ལ་ཤེར་ཕྱིན་གྱི་གདམས་ངག་གནང༌། དེ་ལ། ཡས་བརྒྱུད།་མས་བརྒྱུད་གཉིས་སུ་བྱུང་བའི། སྔ་མ་ལ་གཞུང་སྐབས་དང་པོ། གདམས་ངག་བདེན་པ་བཞི། ལག་ལེན་ཐོར་བུ་བ་དང་བཅས་པ་བཞུགས། ཕྱི་མ་ནི། གང་ཟག་རིམ་དང་