Tibetan
བྱོན་པའི་གདུང་རབས་ལས་གསར་མའི་ལོ་ཙཱ་སྐྱེས་མཆོག་ཕལ་མོ་ཆེ་བྱོན་པ་དང༌། གཞན་ཡང་། དེ་དག་གི་ཕྱིས་སུ་ཕྱུས་དཔལ་གྱི་གཞོན་ནུ། རོང་ཟོམ་ཆོས་ཀྱི་བཟང་པོ། ལྷ་རྗེ་ཟུར་པོ་ཆེ་ཤཱཀྱ་འབྱུང་གནས། ཟུར་ཆུང་ཤེས་རབ་གྲགས། གསང་བདག་སྒྲོ་ཕུག་པ་སྟེ་ཟུར་པ་མེས་དབོན་གསུམ་ཞེས་འཇིག་རྟེན་ན་སྙན་པར་གྲགས་པའི་གདུང་བརྒྱུད་སློབ་བརྒྱུད་མཐའ་ཡས་པ། མྱོས་རིགས་ཀྱི་གདུང་ལས་ཕྱིས་སུའང་གཏེར་ཆེན་པདྨ་གླིང་པ་ནས་ཆོས་རྒྱལ་གཏེར་བདག་གླིང་པའི་གདུང་རིགས་དྲི་མ་མེད་པ་ད་ལྟའི་བར་དུ་བྱོན་པ་དང༌། དཔྱལ་འཕགས་པ་དཔལ་དང༌། ཀུན་མཁྱེན་ཆེན་པོ་སྨན་ལུང་གི་བླ་མ་དཔྱལ་བ་རིམ་བྱོན་དང༌། རོག་ཤཱཀྱ་འོད་སོགས་རོག་གི་གདུང་བརྒྱུད་རྣམས་དང༌། མཆིམས་ཤཱཀྱ་པྲ་བྷ་བ་བྱོན་པའི་གདུང་རིགས་ཀྱི་སྐྱེས་བུ་རྣམས་དང༌། སྐྱོ་འོད་འབྱུང༌། གཡུང་སྟོན་རྡོ་རྗེ་དཔལ་བྱོན་པའི་གདུང་རིགས་སོགས་ཡོན་ཏན་བཟང་པོ་ཕུལ་དུ་བྱུང་བས་སྤྲས་ཤིང་བར་མ་ཆད་པའི་གྲུབ་པ་དུ་མ་བྱོན་ནས་བསྟན་པ་བསྐྱངས་སོ། ། ཏ༦ དྲུག་པ་[ཕྱིས་ཀྱི་གཏེར་བྱོན་]ནི། མཆོག་གཉིས་གླིང་བརྒྱད་ནུས་ལྡན་རྣམས་ལ་སོགས། ། དུས་མཐུན་རིམ་བྱོན་སློབ་མར་བཅས་པ་ཡིས། ། དུས་མཐར་སྔགས་བསྟན་མི་ནུབ་རྒྱས་པར་མཛད། ། དེའང་འཕགས་པ་བསོད་ནམས་ཐམས་ཅད་སྡུད་པའི་ཏིང་ངེ་འཛིན་གྱི་མདོ་ལས། དྲི་མ་མེད་པའི་གཟི་བརྗིད་ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར་རི་དང༌། རི་སུལ་དང༌། ཤིང་དག་གི་ནང་དུ་བཅུག་པ་དག་ཡོད་དེ། གཟུངས་དང༌། ཆོས་ཀྱི་སྒོ་མཐའ་ཡས་པ་གླེགས་བམ་དུ་བྱས་པ་དག་ཀྱང་(༡༧༨བ)ལག་ཏུ་འོངས་པར་འགྱུར་རོ། །ཞེས་དང༌། ཆུ་ཀླུང་རོལ་པའི་མདོ་ལས་ཀྱང༌། ང་ཡི་བསྟན་པའི་ཆོས་ཀྱི་གཞུང༌། ། ཐུགས་ནས་ཐུགས་ཀྱི་གཏེར་དུ་སྦོས། ། ཡང་ན་ས་ཡི་སྙིང་པོར་བྱ། ། ཅི་ཕྱིར་མུ་སྟེགས་ཅན་མགོ་རྒོད། ། དེས་དོན་དཀྲུག་པར་གྱུར་ཏ་རེ། ། དེ་ཕྱིར་ཆུ་ཀླུང་རྒྱུན་མི་གཅོད། ། ཞེས་པ་ལ་སོགས་པ་རྒྱ་ཆེར་གསུངས་པ་ལྟར། ཨོ་རྒྱན་ཆེན་པོས་སྐུ་ཚབ་ལས་ཅན་གྱི་སྐྱེས་བུ་འབྱུང་བར་ལུང་བསྟན། གསུང་ཚབ་བླ་གཏེར་ཐུགས་གཏེར་གྱིས་མཚོན་པའི་གཏེར་ཁའི་རིགས་བཅོ་བརྒྱད་སྦས། ཐུགས་ཀྱི་དགོངས་པ་རྗེ་འབངས་གྲོགས་གསུམ་སོགས་ལས་ཅན་གྱི་བུ་ལ་གཏད་དེ་སྨོན་ལམ་གཏད་རྒྱ་མཛད་པས། ཕྱི་རབས་དུས་སུ་བབས་པ་ན་དེ་དག་གི་རྣམ་པར་འཕྲུལ་པ་རིག་འཛིན་སྤྲུལ་པའི་སྐྱེས་མཆོག་ཉང་རལ་ཉི་མ་འོད་ཟེར། གུ་རུ་ཆོས་ཀྱི་དབང་ཕྱུག་སྟེ་གཏེར་སྟོན་མཆོག་གཉིས་སམ་གཏེར་ཁ་གོང་འོག་ཏུ་གྲགས་པ་དང༌། སངས་རྒྱས་རྡོ་རྗེ་རིན་ཆེན་པདྨ་རཏྣ་ཀུན་སྐྱོང་མདོ་སྔགས་བསྟན་གཉིས་གླིང་པ་བརྒྱད་པོ་གཙོ་བོར་གྱུར་པའི་གླིང་པའི་མཚན་ཅན་དུ་མ་རྣམས་དང༌། རིག་འཛིན་རྒོད་ཀྱི་ལྡེམ་འཕྲུ་ཅན་སོགས་བྱང་གཏེར་ལ་ལོངས་སྤྱོད་པ་རྣམས་དང༌། བདུད་འདུལ་ནུས་ལྡན་རྡོ་རྗེ་གཙོར་གྱུར་ནུས་ལྡན་ཉེར་གཅིག་ཏུ་གྲགས་པ་རྣམས་དང༌། སྙིགས་མའི་མཐར་ཐུག་པའི་སྐབས་འདིར་ཨུ་དུམྦ་ར་ལྟར་ངོ་མཚར་རྨད་དུ་བྱུང་བ་དཔལ་ལྷའི་སྲས་པོ་དམ་འཛིན་ཆོས་ཀྱི་བློ་གྲོས་ཀྱི་རྣམ་པར་འཕྲུལ་པ་སྤྲུལ་པའི་གཏེར་འབྱིན་རྒྱ་མཚོའི་འཁོར་ལོས་སྒྱུར་བ་ཨོ་རྒྱན་མཆོག་གྱུར་བདེ་ཆེན་གླིང་པ་སོགས་རིམ་པར་བྱོན་ཏེ་ཟབ་མོའི་ཆོས་མཛོད་ཆེན་པོ་དང༌། མྱང་གྲོལ་དམ་རྫས་ལ་སོགས་པའི་སྒོ་འཕར་འབྱེད་ཅིང་གྲོལ་བ་བཞི་ལྡན་གྱི་ཕྲིན་ལས་རྨད་དུ་བྱུང་བ་སྤེལ། དེ་དག་གི་ཆོས་བདག་སློབ་མ་བརྒྱུད་འཛིན་དང་བཅས་པས་དུས་ངན་གྱི་ཐ་མར་དམ་པའི་ཆོས་འཛིན་ཅིང་འདུལ་མདོའི་བསྟན་པ་མི་བཞུགས་པའི་གནས་སུའང་གསང་སྔགས་རྡོ་རྗེ་ཐེག་(༡༧༩ན)པའི་བསྟན་པ་ཁོལ་བུ་ཁོལ་བུར་མི་ནུབ་དར་ཞིང་རྒྱས་ཏེ་འགྲོ་བ་འདུལ་དཀའ་བ་མཐའ་དག་སྒྲོལ་བའི་ཕྲིན་ལས་རྒྱ་ཆེ་ཞིང་རྒྱུན་ཆགས་པ་ཉིད་དོ། ། རོང་ཟོམ་པཎྜི་ཏས་གསང་སྔགས་ཀྱི་བཀའ་བབས་བདུན་དུ་བཤད་དེ། སློབ་དཔོན་པདྨ། ནམ་མཁའི་སྙིང་པོ། ཤཱནྟིཾ་གརྦྷ། འདིས་བསམ་ཡས་རབ་གནས་མཛད་པར་གྲགས་ཤིང་གཤེད་སྐོར་ཡང་ཕལ་ཆེར་འདི་ལས་བྱུང༌། བཻ་རོ་ཙ་ན། བི་མ་ལ་ལན་གཉིས། གནུབས་ཆེན་པོ་རྣམས་རིམ་པར་བྱུང་གསུངས་སོ། ། ཇ༢ གཉིས་པ་བཀའ་གདམས་ཀྱི་རིང་ལུགས་བཤད་པ་ལ་གཉིས། ཉ༡ ལུགས་སྲོལ་ངོས་འཛིན་པ། ཉ༢ བརྒྱུད་པའི་རྣམ་གྲངས་བཤད་པའོ། ། ཉ༡ དང་པོ་ནི། ཇོ་བོས་ལྟ་སྤྱོད་གཙོར་སྟོན་གཞུང་གདམས་དང༌། ། ཟུང་འབྲེལ་བྱང་ཆུབ་ལམ་གྱི་སྒྲོན་མ་བསྟན། ། སངས་རྒྱས་སྣང་བ་མཐའ་ཡས་ཀྱི་རྣམ་འཕྲུལ་ཇོ་བོ་རྗེ་དཱི་པཾ་ཀ་ར་ཤྲཱི་ཛྙཱ་ནས་དབུ་མའི་ལྟ་བ་དང་འདུལ་བའི་སྤྱོད་པ་གཙོར་སྟོན། གཞུང་ལུགས་གདམས་ངག་དང་ཟུང་དུ་འབྲེལ་བ་བྱང་ཆུབ་ལམ་གྱི་སྒྲོན་མ་ཞེས་བྱ་བ་སྐྱེས་བུ་གསུམ་གྱི་ལམ་གྱི་རིམ་པ་ཡོངས་སུ་རྫོགས་པའི་བསྟན་བཅོས་ཆེན་པོ་མཛད་ནས་དམ་པའི་ཆོས་ཀྱི་སྒོ་མོ་མཐའ་དག་དེའི་ནང་དུ་འདུས་པར་བསྟན་ཏོ། ། ཉ༢ གཉིས་པ་[བརྒྱུད་པའི་རྣམ་གྲངས་བཤད་པ་]ལ་གསུམ། ཏ༡ དེའི་བཀའ་བརྒྱུད་སྤྱི། ཏ༢ བྱེ་བྲག་བཀའ་གདམས་རྙིང་མ་དང༌། ཏ༣ གསར་མ་སོ་སོར་བཤད་པའོ། ། ཏ༡ དང་པོ་ནི། ནག་ཚོའི་བཀའ་བརྒྱུད་ལ་སོགས་མཐའ་ཡས་ཀྱང༌། ། ཇོ་བོ་རྗེའི་སློབ་མ་རྒྱ་བོད་གཉིས་ཀར་མཁས་ཤིང་གྲུབ་པ་བརྙེས་པ་ཤིན་ཏུ་མང་ཡང་བོད་ཀྱི་སློབ་མའི་ཐོག་མ་སྤྱན་འདྲེན་པ་པོ་ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བས་ཇོ་བོ་ལོ་བཅུ་དགུར་བསྟེན་ཏེ་གདམས་པ་ཕལ་ཆེར་ཐོབ། གཞན་ཡང་། ཛྙཱ་ན་ཨཱ་ཀ་ར་སོགས་བསྟེན་ཅིང་དེའི་རྩ་བའི་བརྒྱུད་པ་ནག་ཚོའི་བཀའ་བརྒྱུད་དུ་གྲགས་པ་དང༌། འབྲོམ་ལ་སོགས་པའི་སློབ་བུ་རོང་པ་ཕྱག་སོར་བས་ཀྱང་ནག་ཚོ་ལ་སྔགས་ཀྱི་གདམས་པ་མང་དུ་ཞུས། དེས་ལུང་བསྟན་པ་བཞིན་རོང་ལག་སོར་དུ་དགོན་པ་མཛད། བྱ་འདུལ་བ་འཛིན་པ་སོགས་རོང་པའི་བུ་བཞིར་གྲགས་པ་(༡༧༩བ)ལས་བརྒྱུད་པ་ཁྱད་པར་ཅན་བྱུང༌། བར་དུ་གཙང་ན་མགར་འགོས་ཡོལ་གསུམ། ཐ་མར་དབུས་ན་ཁུ་རྔོག་འབྲོམ་གསུམ་ཞེས་གྲགས་པ་དང་ལྡན་པ་དེ་དག་ལས་ཀྱང༌། རྔོག་ལེགས་པའི་ཤེས་རབ་ཀྱིས་གསང་ཕུ་ནེའུ་ཐོག་གི་ཆོས་གྲྭ་ཐོག་མར་བཏབ་པ་སོགས་དཔལ་མར་མེ་མཛད་ཀྱིས་ཆོས་ཀྱི་འཁོར་ལོ་བསྐོར་བའི་ཕྲིན་ལས་ནི་མཐའ་ཡས་སོ། ། ཀྱང་ཞེས་པ་ཚིག་ཕྱི་མ་སྡུད་པའི་སྒྲའོ། ། ཏ༢ གཉིས་པ་[བྱེ་བྲག་བཀའ་གདམས་རྙིང་མ་]ནི། གཙོ་བོར་སྤྱན་རས་གཟིགས་དབང་འབྲོམ་གྱི་བརྒྱུད། ། ལྷ་ཆོས་བདུན་ལྡན་བཀའ་གདམས་རིན་པོ་ཆེ། ། སྐུ་མཆེད་གསུམ་སྲོལ་གཞུང་གདམས་མན་ངག་པ། ། འཕགས་ཆེན་དུ་མས་བྱང་ཆུབ་ལམ་བཟང་སྤེལ། ། དེ་དག་ཐམས་ཅད་ལས་གཙོ་བོར་གྱུར་པ་སངས་རྒྱས་ཕལ་པོ་ཆེ་དང་སྙིང་རྗེ་པད་དཀར་ལས་དགེ་བསྙེན་ཆོས་འཕེལ་ཞེས་ལུང་གིས་བསྟན་པ་སྤྱན་རས་གཟིགས་དབང་འབྲོམ་སྟོན་རྒྱལ་བའི་འབྱུང་གནས་ཀྱི་བཀའ་བརྒྱུད་འདི་ལ། ཁྱད་པར་འཕགས་པའི་ལྷ་བཞི་དང༌། ཆོས་སྡེ་སྣོད་གསུམ་སྟེ་ལྷ་ཆོས་བདུན་ལྡན་གྱི་བསྟན་པའི་བདག་པོ་བཀའ་གདམས་རིན་པོ་ཆེ་ཞེས་གྲགས་པ་བྱུང་ཞིང༌། རྒྱལ་བ་འབྲོམ་གྱི་སློབ་མ་སྐུ་མཆེད་གསུམ་དུ་གྲགས་པ་ལ་གཞུང༌། གདམས་ངག་མན་ངག་གི་བཀའ་སྲོལ་ཆེན་པོ་གསུམ་གྱི་བཀའ་བབས་ནས་དེ་གསུམ་གྱི་བརྒྱུད་འཛིན་འཕགས་ཆེན་བྱང་ཆུབ་སེམས་དཔའ་ཕྱིར་མི་ལྡོག་པའི་ས་ལ་གནས་པ་དུ་མ་བྱོན་ནས་འཁྲུལ་པ་མེད་པའི་བྱང་ཆུབ་ཀྱི་ལམ་བཟང་སྤེལ་ཞིང་གསལ་བར་མཛད་དོ། ། དེ་ལ་གཞུང་ནི། སྐྱེས་ཚོམ་དད་པའི་གཞུང༌། ས་རྒྱན་ཏིང་ངེ་འཛིན་གྱི་གཞུང༌། བསླབ་སྤྱོད་སྤྱོད་པའི་གཞུང་སྟེ་གཞུང་དྲུག་གི་བཤད་སྲོལ་འཛིན་པ་པོ་ཏོ་བ་རིན་ཆེན་གསལ་ལ་སློབ་མ་གླང་ཤར་ཉི་ཟླ་ཟུང་འབྲེལ་སོགས་བྱོན་ཅིང༌། ཤར་བའི་སློབ་མའི་ནང་ནས་གཏུམ་སྟོན་བློ་གྲོས་གྲགས་ཀྱིས་དཔལ་སྣར་ཐང་གི་དགོན་པ་བཏབ། འདི་དག་གིས་བཤད་སྲོལ་གཙོ་བོར་བསྐྱངས། གདམས་ངག་ནི་བདེན་པ་བཞི་གདམས་ངག་ཏུ་སྟོན་པའི་བཤད་སྲོལ་ཏེ། སྤྱན་སྔ་ཚུལ་ཁྲིམས་འབར་གྱི་སློབ་མ་བྱ་ཡུལ་བ་(༡༨༠ན)སོགས་ལས་སྤྱན་སྔ་བཀའ་བརྒྱུད་ཅེས་ཁྱད་པར་དུ་འཕགས་པ་བྱོན་ཅིང་སྒྲུབ་བརྒྱུད་གཙོ་བོར་བསྐྱངས། དེང་སང་དེའི་བཀའ་དྭགས་པོ་བཀའ་བརྒྱུད་པ་ལ་བབ་པར་བཞེད། མན་ངག་ནི་ཐིག་ལེ་བཅུ་དྲུག་གི་དབང་ཁྲིད་རྒྱབ་བརྟེན་གླེགས་བམ་རིན་པོ་ཆེ་བཅས་ཕུ་ཆུང་བ་གཞོན་ནུ་རྒྱལ་མཚན་ལ་བཀའ་བབས། དེས་སྟབས་ཀ་བ་རིན་ཆེན་རྒྱལ་མཚན་ལ་གནང༌། ཕྱིས་སྣར་ཐང་པ་གཞོན་ནུ་བློ་གྲོས་ཀྱི་བར་ཆིག་བརྒྱུད་དུ་མཛད། དེ་ནས་རྒྱ་བཀྲོལ་ཏེ་རིམ་པར་བརྒྱུད་པ་ལ་སྨྱུག་པ་པཎ་ཆེན་ལས་དཔལ་གཙུག་ལག་ཕྲེང་བས་གསན་ཏེ་སྒྲུབ་བརྒྱུད་ཀཾ་ཚང་གི་ཕྱོགས་སུ་བྱོན་པ་དང༌། ལོ་ཆེན་ཐུགས་རྗེ་དཔལ་བ་ལས་རྒྱལ་བ་དགེ་འདུན་གྲུབ་ཀྱིས་གསན་ནས་དགེ་ཕྱོགས་ལ་རྒྱུན་བྱུང་ངོ༌། ། ཏ༣ གསུམ་པ་[གསར་མ་སོ་སོར་བཤད་པ་]ནི། ལུགས་དེ་གྲུབ་མཐའ་ཡོངས་ལ་ཁྱབ་མོད་ཀྱང༌། ། ཕྱིས་དུས་འཇམ་དབྱངས་རྣམ་འཕྲུལ་ཙོང་ཁ་པས། ། གཞུང་ལམ་གཙོར་སྟོན་བཀའ་གདམས་གསར་མར་གྲགས། ། ལུགས་སྲོལ་དེ་འཛིན་པའི་དགེ་བའི་བཤེས་གཉེན་གྱིས་དུས་དེ་ཙམ་ན་བོད་ཁམས་ཡོངས་ལ་ཁྱབ་ཅིང་དགོན་གནས་ཀྱང་ཁམས་དབུས་ཀུན་ཏུ་རྒྱ་ཆེར་འཕེལ་བས། བློ་ལྡོག་རྣམ་བཞི་སོགས་ལམ་རིམ་གྱི་དམ་པ་གསར་རྙིང་ཁྲིད་སྲོལ་ཐམས་ཅད་ཀྱི་ཐོག་མར་འབྱུང་བས་མཚོན་གངས་ཅན་གྱི་གྲུབ་མཐའ་ཀུན་ལ་ཁྱབ་མོད་ཀྱང༌། ཕྱི་དུས་རང་རྐང་འཛིན་པའི་སྡེ་ཅུང་ཟད་འགྲིབ་པ་ལྟར་སྣང་བ་ན། རྗེ་བཙུན་འཇམ་དཔལ་དབྱངས་ཀྱི་རྣམ་པར་འཕྲུལ་པ་མི་འཕྲོགས་པའི་མཁྱེན་རབ་དང་ཐུགས་རྗེ་མངའ་བ་ཙོང་ཁ་པ་བློ་བཟང་གྲགས་པའི་དཔལ་ཞེས་སངས་རྒྱས་འཇིག་རྟེན་དུ་བྱོན་པ་ལྟ་བུ་དེས། བཀའ་གདམས་གཞུང་པའི་ལུགས་ཀྱི་བཤད་སྲོལ་གཙོར་བཏོན། ལུགས་གསུམ་གྱི་ཟབ་དོན་མན་ངག་ཏུ་དྲིལ་བ་བྱང་ཆུབ་ལམ་རིམ་ཆེན་མོ་ལ་གདམས་པའི་སྲོག་ཏུ་བཟུང་བ་ནི་བཀའ་གདམས་གསར་མ་སྟེ་ད་ལྟ་དགེ་ལྡན་པར་ཡོངས་སུ་གྲགས་པ་འདི་ཡིན་ལ། དམ་པ་འདིའི་སྐུ་ཆེ་བའི་ཡོན་ཏན་ནི་བསམ་གྱིས་མི་ཁྱབ་སྟེ། བླ་མ་དབུ་མ་པ་དང་ལྷོ་བྲག་གྲུབ་ཆེན་ལས་ཀྱི་(༡༨༠བ)རྡོ་རྗེས་འཇམ་དཔལ་དང་གསང་བའི་བདག་པོའི་ཞུས་ལན་རྣམས་ལས་གསལ་ཞིང༌། མ་ཅིག་ལབ་སྒྲོན་གྱིས་ཀྱང་ཐུབ་པའི་བསྟན་པ་ཇི་སྲིད་གནས་ཀྱི་བར་དུ་རྒྱལ་དབང་ཀརྨ་པ་དང་དམ་པ་འདི་གཉིས་འདྲ་བའི་གང་ཟག་གཞན་མི་འབྱུང་བར་ལུང་གིས་གསལ་བར་བསྟན་པར་སྣང༌། མཛད་པ་ཕྲིན་ལས་ཀྱང་ལྷ་ལྡན་ཆོ་འཕྲུལ་སྨོན་ལམ་ཆེན་མོ་གཙོ་བོར་གྱུར་པའི་མཛད་ཆེན་བཞིས་མཚོན་སོ་སྐྱེའི་བློས་དཔག་པར་དཀའ་བ་དང༌། སློབ་མ་སྡེ་སྣོད་འཛིན་པ་དགོན་སྡེ་ཐེབས་པའང་བརྒྱ་དང་བཞི་བཅུ་ལྷག་ཙམ་བྱོན་པའི་ཕྲིན་ལས་ཀྱི་རྒྱུན་ད་ལྟ་མིག་གི་མཐོང་དུ་ཡོད་པ་སོགས། མདོར་ན། སངས་རྒྱས་ཀྱི་བསྟན་པའི་གཞུང་འདིར་ལུང་གི་བསྟན་པ་ལ་འདི་ཁོ་ན་བཀའ་དྲིན་ཆེ་བ་ཡིན་ནོ། ། དེ་ལྟར་ན། བཀའ་གདམས་པ་ནི་ཇོ་བོ་རྗེའི་དུས་སུ་བསྟན་པའི་དབུ་བརྙེས། སྟོན་པ་རིན་པོ་ཆེས་སྲོལ་ཕྱེ། སྐུ་མཆེད་གསུམ་གྱི་རིང་ལ་དར་ཞིང་རྒྱས། བླང་ཤར་བྱ་ཡུལ་བ་སོགས་ཀྱི་དུས་ཤིན་ཏུ་འཕེལ་བར་གྲགས་སོ། ། ཇ༣ གསུམ་པ་ལམ་འབྲས་བུ་དང་བཅས་པའི་རིང་ལུགས་འཆད་པ་ལ་གཉིས། ཉ༡ ལུགས་སྲོལ་ངོས་འཛིན་པ། ཉ༢ བརྒྱུད་པའི་རྣམ་གྲངས་བཤད་པའོ། ། ཉ༡ དང་པོ་ནི། བི་རཱུ་མཚོ་སྐྱེས་ཞབས་སོགས་ལམ་སྐོར་དགུ། ། བླ་ཆེན་འབྲོག་མིར་བཀའ་བབས་གདམས་པའི་བཅུད། ། སྒོ་དྲུག་ཆོས་འབྲེལ་རྩ་བ་མེད་པ་དང༌། ། ཉེ་བརྒྱུད་ལམ་སྦས་བརྡ་དོན་གསལ་རྣམས་ཀྱི། ། གཙོ་བོར་གསུང་དག་ལམ་དང་འབྲས་བུར་བཅས། ། རྣལ་འབྱོར་དབང་ཕྱུག་འཇིགས་བྲལ་དཔལ་ལྡན་ཆོས་སྐྱོང་ངམ་གྲུབ་ཆེན་བི་རཱུ་པ་ཞེས་གྲགས་པ་དེ་ཉིད་རྡོ་རྗེ་བདག་མེད་མས་སྤྲུལ་པའི་དཀྱིལ་འཁོར་དུ་དབང་བསྐུར། ས་དྲུག་པའི་རྟོགས་པ་ཐོབ་ནས་ཀྱཻ་རྡོ་རྗེའི་རྒྱུད་གསུམ་ལ་བརྟེན། ཤར་ཕྱོགས་ནག་པོ་པའི་དོན་དུ་རྡོ་རྗེའི་ཚིག་རྐང་སྩལ་ཞིང་ལམ་འབྲས་བུ་དང་བཅས་པའི་གདམས་སྐོར་མཛད། གྲུབ་ཆེན་མཚོ་སྐྱེས་ཞབས་ཀྱིས་རྩ་རྒྱུད་བརྟགས་གཉིས་ལ་བརྟེན་ནས་བསྐྱེད་རིམ་ཟབ་པའི་ཚུལ་དགུ། རྫོགས་རིམ་མར་མེའི་རྩེ་མོ་ལྟ་བུའི་ལམ་སྐོར་མཛད། སོགས་(༡༨༡ན)ཁོངས་ནས། འཕགས་པ་ཀླུ་སྒྲུབ་ཀྱིས་འདུས་པ་ལ་བརྟེན་ནས་བྱང་ཆུབ་སེམས་འགྲེལ་གྱི་ལམ་སྐོར་མཛད། ཌོམྦྷི་པས་བརྟག་གཉིས་ལ་བརྟེན་ལྷན་ཅིག་སྐྱེས་གྲུབ་ཀྱི་ལམ་སྐོར་མཛད། ཨིནྡྲ་བོ་དྷིས་རྒྱུད་ཡེ་ཤེས་ཐིག་ལེ་ལ་བརྟེན་ནས་ཕྱག་རྒྱའི་ལམ་ཡོངས་སུ་རྫོགས་པའི་ལམ་སྐོར་མཛད། ཏོག་རྩེ་པས་རྒྱུད་ཁ་སྦྱོར་ལ་བརྟེན་ནས་བསམ་མི་ཁྱབ་ཀྱི་ལམ་སྐོར་མཛད། ནག་པོ་པས་བདེ་མཆོག་ལ་བརྟེན་ནས་ཨོ་ལ་པ་ཏིའི་ལམ་སྐོར་མཛད། ངག་གི་དབང་ཕྱུག་གིས་གསང་འདུས་ལ་བརྟེན་ཕྱག་ཆེན་ཡི་གེ་མེད་པའི་ལམ་སྐོར་མཛད། ནག་པོ་འཆི་བ་མེད་པས་མ་རྒྱུད་མཐའ་དག་ལ་བརྟེན་ནས་ཡོན་པོ་སྲོང་བའི་ལམ་སྐོར་མཛད། དེ་ལྟར་ལམ་སྐོར་དགུ་པོ་བླ་ཆེན་འབྲོག་མི་ལོ་ཙཱ་བ་ཤཱཀྱ་ཡེ་ཤེས་ལ་བཀའ་བབས་ཏེ། འབྲོག་གིས་ཐོག་མར་སློབ་དཔོན་ཤཱནྟི་པ་ལས་འདུལ་བ། ཕར་ཕྱིན། གསང་སྔགས་ཀྱི་ཆོས་ཐམས་ཅད་མཁས་པར་བསླབས། ལམ་སྐོར་སོགས་གདམས་ངག་རྣམས་ག་ཡ་དྷ་ར་དང་དཔའ་བོ་རྡོ་རྗེ་ལས་ཞུས་ཏེ་དེའང་བིར་ཝ་པས་རྒྱུད་ཀྱི་བཤད་པ་ཤིན་ཏུ་བསྡུས་པ་དང༌། མན་ངག་སྙན་བརྒྱུད་ཉམས་ལེན་ཤིན་ཏུ་རྒྱས་པ་ཤར་ཕྱོགས་ནག་པོ་པ་ལ་གནང༌། དེས་ཌཱ་མ་རུ་པ། དེས་ཨ་ཝ་དྷཱུ་ཏི་པ། དེས་ག་ཡ་དྷ་ར་ལ་གདམས། དེ་ཉིད་བོད་དུ་ལན་གསུམ་བྱོན་པའི་དང་པོའི་སྐབས་འབྲོག་མི་ལ་གདམས་ངག་ཡོངས་སུ་རྫོགས་པ་བྱིན་ཅིང་འདི་ནི་དགྱེས་རྡོར་མན་ངག་ལུགས་སུ་གྲགས་སོ། །འདི་ལ་དེང་སང་ལམ་འབྲས་ཞེས་ཡོངས་སུ་གྲགས་ཤིང༌། གོང་སྨོས་ཕྱི་མ་བརྒྱད་ལ་ལམ་འབྲས་ཕྱི་མ་ཞེས་གྲགས་སོ། ། སྤྱིར་མར་འགོས་འབྲོག་གསུམ་ཞེས་ཕྱི་དར་གསང་སྔགས་རྡོ་རྗེ་ཐེག་པའི་འབྱུང་ཁུངས་ཡིན་ཅིང་ཁྱད་པར་མར་འགོས་གཉིས་ཀྱིས་ཀྱང་ཐོག་མར་འབྲོག་མི་ལས་སྦྱངས་པ་མཛད་པ་དང༌། བར་དོར་ཕྱག་རྒྱ་ཆེན་པོའི་མཆོག་བརྙེས་པར་གྲགས་པ་སོགས་ཁྱད་པར་འཕགས་པ་དེ་ལ་གདམས་ངག་རྒྱ་མཚོ་ལྟ་བུ་བཞུགས་པའི་ཟབ་བཅུད་ལམ་སྐོར་དགུ་པོ་དེ་རྣམས་དང༌། རྒྱ་གར་ནས་(༡༨༡བ)བོད་དུ་བྱོན་ཁར་མཁས་པ་སྒོ་དྲུག་ལ་ཆོས་འབྲེལ་རེ་ཞུས་པའི་གདམས་ངག །མདོ་རྒྱུད་བསྲེ་བ། ཕྱི་རོལ་གདོན། འབྱུང་བ་ལུས་འཁྲུགས། ཏིང་འཛིན་སེམས་ཀྱི་བར་ཆད་སེལ་བ་གསུམ། ཕྱག་ཆེན་སྡུག་བསྔལ་གསུམ་སེལ། གཉུག་མ་དྲན་གསལ་རྣམས་དང་ཡང་མཐུ་སྟོབས་དབང་ཕྱུག་བི་རཱུ་པས་ཌོམྦྷི་པ་ལ་རྒྱུད་ཀྱི་བཤད་པ་ཤིན་ཏུ་རྒྱས་པ་དང༌། མན་ངག་ཤིན་ཏུ་བསྡུས་པ་གནང༌། དེས་ཨ་ལ་ལ་བཛྲ། དེས་ནག་ཁྲོད་པ། དེས་གརྦྷ་རི་པ། དེས་ཛ་ཡ་ཤྲཱི། དེས་མི་ཐུབ་ཟླ་བ། དེས་དཔའ་བོ་རྡོ་རྗེ། དེ་ལ་འབྲོག་མིས་རྒྱ་གར་ཤར་ཕྱོགས་སུ་ཞུས་པ་ལ་རྩ་བ་མེད་པའི་ལམ་འབྲས་ཞིག་གནང་ཞེས་གྲགས་པ་དེའི་དོན་སྔ་མ་ལ་རྩ་བ་རྡོ་རྗེའི་ཚིག་རྐང་ཡོད་ཅིང༌། འདི་ལ་མེད་པའི་དོན་ཡིན་ཅིང་དགྱེས་རྡོར་འགྲེལ་པ་ལུགས་སུ་གྲགས་སོ། །རྡོ་རྗེའི་ཚིག་རྐང་ལ། འབྲོག་མི་གྱི་ཇོ། འབྲོམ་གསུམ་གྱིས་རྒྱ་དཔེ་དང་བསྟུན་ནས་བསྒྱུར། ཆ་གན་དང་ཇོ་ནང་ཀུན་སྤངས་པས་རྒྱ་དཔེ་ལ་མ་གཏུགས་པར་གོ་རིམ་དཀྲུགས་པའི་འགྱུར་བཅོས་མཛད་པ་དང༌། གཟུངས་ཀྱི་དཔལ་བའི་ཡིག་ཆར་པཎྜིཏ་རཱ་ཧུ་ལའི་འགྱུར་ཡང་ཡོད་པར་གསུངས་པས་འགྱུར་འགོ་དྲུག་བྱུང༌། གཞན་ཡང་ཕྱིས་སུ་ས་ཆེན་ལ་ཉེ་བརྒྱུད་བྱུང་བའི་ལམ་སྦས་བཤད་དང་གྲགས་རྒྱལ་གྱིས་བརྡ་དོན་གསལ་བ་སོགས་གདམས་ངག་ཐམས་ཅད་ཀྱི་གཙོ་བོ་གསུང་ངག་རིན་པོ་ཆེ་ལམ་འབྲས་བུ་དང་བཅས་པ་ཡི་གེ་དྲུག་ཅུ་མན་ངག་ཕྲ་མོ་དང་བཅས་པ་ཉིད་དོ། ། ཉ༢ གཉིས་པ་[བརྒྱུད་པའི་རྣམ་གྲངས་བཤད་པ་]ལ་གསུམ། ཏ༡ བརྒྱུད་སྲོལ་སྤྱིར་བཤད་པ། ཏ༢ ས་ལུགས་བྱེ་བྲག་ཏུ་བཤད་པ། ཏ༣ བརྒྱུད་སྲོལ་གཞན་ཞར་བྱུང་དུ་བཤད་པའོ། ། ཏ༡ དང་པོ་ནི། སྐུ་དང་ཐུགས་སྲས་སེ་ནས་འཕེལ་བ་གསུམ། ། ཕྱི་མར་ཐོབ་པ་རབ་འབྲིང་ཐ་གསུམ་ལས། ། འབྲིང་པོ་ཞྭ་མར་ཕོ་མོ་བསྲེས་བརྒྱུད་གསུམ། ། ཕོ་ལ་སློབ་སྲས་གཉིས་ཏེ་མོ་བརྒྱུད་གསུམ། ། བསྲེས་བརྒྱུད་ཀོ་བྲག་ཆ་གན་ཇོ་ནང་དང༌། ། ལ་སྟོད་དབང་རྒྱལ་ལུགས་བཞི། ཞེས་པ་སྟེ། འབྲོག་མི་ལ་སློབ་མ་ཕོ་གསུམ་མོ་བཞི་སྟེ་གྲུབ་ཐོབ་བདུན། འཁོན་དཀོན་མཆོག་རྒྱལ་པོ་དང་གི་ལྗོངས་དབུ་དཀར་(༡༨༢ན)སོགས་གཞུང་རྫོགས་པ་བདུན། སེ་མཁར་ཆུང་བ། ཇོ་སྲས་ཨིནྡྲ་སོགས་མན་ངག་རྫོགས་པ་བཞི་སྟེ་བཅོ་བརྒྱད་བྱོན་པ་ལས་ལམ་འབྲས་ཀྱི་བརྒྱུད་སྲོལ་ནི། སྐུའི་སྲས་ཨིནྡྲ་དང་རྡོ་རྗེ། ཐུགས་ཀྱི་སྲས་འབྲོམ་དེ་པ་སྟོན་ཆུང༌། སེ་མཁར་ཆུང་པ་ནས་འཕེལ་བ་གསུམ། ཕྱི་མ་སེ་སྟོན་ལས་རབ་ཏུ་ཐོབ་པ་ཞང་སྟོན་མཆེད། འབྲིང་དུ་ཐོབ་པ་ཞ་མ་ལྕམ་དྲལ། ཐ་མར་ཐོབ་པ་བསེ་སྒོམ་བྱང་ཡེ་རྣམས་སུ་ཡོད་པ་ལས། འབྲིང་དུ་ཐོབ་པ་ཞ་མ་ལྕམ་དྲལ་ནས་འཕེལ་བ་ལ་ཕོ་བརྒྱུད་མོ་རྒྱུད་བསྲེས་པའི་བརྒྱུད་པ་གསུམ། ཕོ་རྒྱུད་ལའང་སློབ་སྲས་གཉིས་ཏེ། ཞ་མ་ཕོ་ནི་རྗེ་འཁོན་ཕུ་བ་ཆོས་ཀྱི་རྒྱལ་པོ་སྟེ། དེའི་སློབ་མ་སེ་སྒོམ་གྲགས་རྒྱལ་སོགས་ལ་བརྒྱུད་པ་དང༌། སྲས་ཞ་མ་ཟླ་བའི་འོད་ཟེར་ནས་སྤང་རྗེ་ཉི་མ་གྲགས་ལ་འཕེལ་བ་གཉིས། མོ་བརྒྱུད་ནི་མ་ཅིག་ཞ་མ་རྣལ་འབྱོར་མའི་སློབ་མ་ཉང་སྐོམ། སྨོན་དཀར་པ་སྟོན་གཞུང༌། དབོན་མོ་ཤེར་ཚུལ་གསུམ་ལས་འཕེལ་བའི་ལུགས་གསུམ། བསྲེས་བརྒྱུད་ལ་ཞ་མ་ཕོ་མོའི་ལུགས་བསྲེས་པ་དུམ་བུ་ཀོ་བྲག་པའི་ལུགས། ཞ་མ་ཕོ་མོ་གཉིས་ས་ལུགས་དང་གསུམ་བསྲེས་པ་ཆ་གན་གྱི་ལུགས། འབྲོག་མི་དང་གྱི་ཇོའི་ལུགས་གཉིས་བསྲེས་པ་ཇོ་ནང་ཀུན་སྤོང་པའི་ལུགས། ལམ་འབྲས་སྦྱོར་དྲུག་རྫོགས་ཆེན་གསུམ་བསྲེས་པ་ལ་སྟོད་དབང་རྒྱལ་གྱི་ལུགས་ཏེ་བཞིའོ། ། རབ་ཐོབ་པ། ། ཞང་བརྒྱུད་ཁྱད་འཕགས་ས་སྐྱའི་སྔ་བུ་ནི། ། ཕག་གྲུ་ལྕེ་སྒོམ་ཕྱི་བུ་ཉེ་རིང་གཉིས། ། མང་ལམ་ཞིང་