Tibetan
ཕུག་ལུགས་ཏེ་བཅོ་བརྒྱད་ལས། ། ས་སྐྱ་ཞ་མའི་རྒྱུན་དར། ཞེས་པ་སྟེ། རབ་ཏུ་ཐོབ་པ་ཞང་སྟོན་ཆོས་འབར་གྱི་བརྒྱུད་པ་འཛིན་པ་ཁྱད་པར་དུ་འཕགས་པ་དཔལ་ས་སྐྱ་པ་ཀུན་དགའ་སྙིང་པོའི་སྔ་བུ་དཔལ་ལྡན་ཕག་མོ་གྲུ་པ་དང་ལྕེ་སྒོམ་གྱི་ལུགས་གཉིས། ཕྱི་བུ་ཉེ་བརྒྱུད་རིང་བརྒྱུད་གཉིས། འབྲོག་ཇོ་སྲས་གཉིས་དང་ཞང་སྟོན་མཆེད་གཉིས་ཏེ་ལུགས་བཞིའི་གསུང་གི་གཅེས་མཛོད་བསྡུས་པ་མང་ལམ་ཞིག་པོའི་ལུགས། ཐ་མར་ཐོབ་པ་བྱང་ཆུབ་(༡༨༢བ)ཡེ་ཤེས་ཀྱིས་ཞིང་ཕུག་པ་ལ་གདམས་པའི་ལུགས་ཏེ། དེ་ལྟར་སྐུ་སྲས་ཐུགས་སྲས་གཉིས། སེའི་བརྒྱུད་པ་ཞ་མ་ཕོ་ལ་སློབ་སྲས་གཉིས། མོ་ལ་གསུམ། བསྲེས་བརྒྱུད་བཞི། ས་ལུགས་བཞི། མང་ལམ་ཞིང་ཕུག་གཉིས། འཆད་འགྱུར་གྱི་ཇོ་ལུགས་བཅས་བསྡམས་པ་ལ་ལམ་འབྲས་ལུགས་སྲོལ་བཅོ་བརྒྱད་ཅེས་གྲགས་སོ། །དེ་དག་ལས་ས་སྐྱ་དང་ཞ་མའི་བཀའ་སྲོལ་གྱི་རྒྱུན་རིང་དུ་དར་ཞིང༌། དེ་ལས་ཀྱང་ས་སྐྱ་པའི་བཀའ་སྲོལ་ནི་ད་ལྟའི་བར་དུ་ཤིན་ཏུ་དར་ཞིང་རྒྱས་སོ། ། ཏ༢ གཉིས་པ་[ས་ལུགས་བྱེ་བྲག་ཏུ་བཤད་པ་]ནི། ཁྱད་པར་དུ། ། ས་ལུགས་ཚོགས་བཤད་ངོར་རྫོང་གངས་དཀར་པ། ། སློབ་བཤད་ཚར་ཆེན་ཡབ་སྲས་འཛིན་སྐྱོང་སྤེལ། ། དགྱེས་རྡོར་བསྐྱེད་རྫོགས་དབྱར་གྱི་མཚོ་ལྟར་རྒྱས། ། ཁྱད་པར་དུའང་ས་ལུགས་ཞེས་གྲགས་པ་ནི་ཇོ་བོ་རྗེས་ས་དཀར་པོའི་ལོགས་ལ་དྷཱིཿབདུན། ཧཱུྃ་གཅིག་གསལ་བར་གཟིགས་པས་འཇམ་དབྱངས་བདུན་དང་ཕྱག་རྡོར་སྤྲུལ་པ་གཅིག་འབྱོན་པར་ལུང་གིས་བསྟན་པ་ལྟར་བྱོན་པའི་ཐོག་མར་དཔལ་བརྩེ་བ་ཆེན་པོ་ཀུན་དགའ་སྙིང་པོ་ལ་འབྲོག་མི་ནས་བརྒྱུད་པའི་ཀྱཻ་རྡོར་རྒྱུད་གསུམ། མལ་ལོ་ནས་བརྒྱུད་པའི་བདེ་མཆོག་ལོ་ཆེན་རིན་བཟང་ནས་རྒྱུད་པའི་ཡོ་ག་དང་མགོན་པོ། བ་རི་བ་ནས་བརྒྱུད་པའི་སྒྲུབ་ཐབས་བརྒྱ་རྩ་སོགས་ལོ་ཙཱ་ཆེན་པོ་བཞི་ནས་བརྒྱུད་པའི་གདམས་ངག་གི་བཀའ་བབས། ཁྱད་པར་དགུང་ལོ་ཞེ་བདུན་པ་ལ་རྗེ་བཙུན་བི་རཱུ་པ་གཙོ་འཁོར་ལྔ་ཆོས་སྒོ་སྐྱེལ་དུ་ཕེབ། ཟླ་བ་གཅིག་ཏུ་བཞུགས་ཏེ་ལྕགས་རིའི་ཁོངས་ལས་མི་འདའ་བའི་ཟབ་ཆོས་བཞི། རྒྱུད་སྡེ་བདུན་ཅུ་རྩ་གཉིས་ཀྱི་དབང་བཤད་མན་ངག །ལམ་འབྲས་ཉེ་བརྒྱུད་སྦས་བཤད་བཅས་སྩལ། བླ་མའི་ལུང་བསྟན་བཞིན་སློབ་མ་གྲུབ་པ་ཐོབ་པ་གསུམ། བཟོད་ཐོབ་བདུན། རྟོགས་པ་དང་ལྡན་པ་བརྒྱད་ཅུ་བྱོན། བདེ་བ་ཅན། པོ་ཏ་ལ། ཨོ་རྒྱན། བྱང་གསེར་མདོག་ཅན་དང་བཞིར་སྐུའི་བཀོད་པ་བཞིས་སྐལ་ལྡན་གྱི་དོན་མཛད་ཅིང་ད་ལྟའང་དངོས་སུ་བཞུགས་པར་གྲགས། དེས་རྗེ་བཙུན་བསོད་(༡༨༣ན)ནམས་རྩེ་མོ་དང་གྲགས་པ་རྒྱལ་མཚན་མཆེད་ལ་གདམས། སྔ་མ་སྐུ་ལུས་མ་སྤངས་པར་མཁའ་སྤྱོད་དུ་བཞུད། ཕྱི་མ་ནི་བོད་ཡུལ་ཙམ་ལ་ཆེ་བའི་རྡོ་རྗེ་འཛིན་པ་ཆེན་པོའི་རྣམ་ཐར་མངའ་ཞིང་དགུང་ལོ་ང་དྲུག་པར་ས་ཆེན་གྱི་ཡེ་ཤེས་སྐུའི་སྣང་བས་ལམ་འབྲས་ཤིན་ཏུ་ཉེ་བརྒྱུད་བརྡ་དོན་གསལ་བ་གནང༌། དེ་ནས་འཇམ་དབྱངས་ས་སྐྱ་པཎ་ཆེན་དང༌། འགྲོ་བའི་མགོན་པོ་ཆོས་རྒྱལ་འཕགས་པ་སོགས་རིམ་གྱིས་བརྒྱུད། དཔལ་ལྡན་བླ་མ་བསོད་ནམས་རྒྱལ་མཚན་གྱི་ཞལ་སློབ་ཡར་ཀླུངས་པ་སེང་གེ་རྒྱལ་མཚན་གྱི་དབོན་པོ་བསོད་ནམས་རྒྱལ་མཆོག་གི་སློབ་མ་གསུང་ངག་འཛིན་པའི་ཐུགས་སྲས་བརྒྱད་ལས་ངོར་རྫོང་བོ་དོང་དགེ་ལུགས་སོགས་ལའང་འཕེལ་ཞིང་བརྒྱུད་པའི་རྣམ་གྲངས་དུ་མར་གྱུར་པ་ལས་གཙོ་བོ་ཚོགས་བཤད་ནི་གྲུབ་ཆེན་བུདྡྷ་ཤྲཱི་ལས་ངོར་ཆེན་རྡོ་རྗེ་འཆང་ཀུན་དགའ་བཟང་པོས་གསན། བསྟན་འགྲོའི་དོན་རླབས་པོ་ཆེ་མཛད་པའི་ཕྲིན་ལས་ཀྱི་རྒྱུན་ད་ལྟའི་བར་དུ་རྒྱ་ཆེ་ལ་རྒྱུན་ཆགས་པ་ཡོངས་སུ་གྲགས་པ་དང༌། སྔགས་འཆང་གཟུངས་ཀྱི་དཔལ་བ་ལས་བརྒྱུད་པ་ལ་ལམ་འབྲས་རྫོང་ལུགས་ཞེས་གྲགས་ཤིང༌། དེའི་རྒྱུན་ལས་ཐམས་ཅད་མཁྱེན་པ་ཀུན་དགའ་རྣམ་རྒྱལ་བ་བྱོན་ཏེ་གངས་དཀར་པ་ཞེས་ཆོས་རྒྱུན་ཟུར་དུ་འཕེལ་བའི་ལུགས་འདི་ལ་ཕྱིས་རིག་འཛིན་ཚེ་དབང་ནོར་བུ་སོགས་ཀྱིས་ཀྱང་བསྔགས་པ་ཆེར་མཛད། སློབ་བཤད་ནི་བདག་ཆེན་བློ་གྲོས་རྒྱལ་མཚན་གྱི་སློབ་མ་རྡོ་རིང་ཀུན་སྤོང་པ་ཆེན་པོ་ལས་ཚར་ཆེན་བློ་གསལ་རྒྱ་མཚོས་གསུང་ངག་རིན་པོ་ཆེ་གསན་ཏེ་ཚར་ལུགས་སློབ་བཤད་ཅེས་པའི་སྲོལ་ཟུར་དུ་ཕྱེས། ཐུགས་སྲས་ཉི་མ་ལྟ་བུ་འཇམ་དབྱངས་མཁྱེན་བརྩེའི་དབང་ཕྱུག །ཟླ་བ་ལྟ་བུ་མང་ཐོས་ཀླུ་སྒྲུབ་རྒྱ་མཚོ་སོགས་བྱོན་ཏེ། མདོར་ན། མཁས་གྲུབ་ཆེན་པོ་དེ་དག་གིས་ས་ལུགས་ཀྱི་བསྟན་པ་འཛིན་སྐྱོང་སྤེལ་བར་མཛད་པས་དགྱེས་པ་རྡོ་རྗེའི་བསྐྱེད་རྫོགས་ཀྱི་ཕྲིན་ལས་ནི་དབྱར་གྱི་མཚོ་ལྟར་དུས་ཀྱི་ཐ་མ་འདི་ལྟ་བུར་ཡང་རྒྱས་པར་གྱུར་ཏོ། ། ཏ༣ གསུམ་པ་[བརྒྱུད་སྲོལ་གཞན་ཞར་བྱུང་དུ་བཤད་པ་]ནི། གྱི་ཇོའི་ལུགས་ཀྱང་ཀུན་སྤོང་(༡༨༣བ)ཆེན་པོར་འདྲེས། ། པཎ་ཆེན་ག་ཡ་དྷ་ར་བོད་དུ་ཕེབ་པའི་ལན་གཉིས་པར་འགོས་ལོ་དང༌། གསུམ་པར་གྱི་ཇོ་དང་གཉོས་ལོ་ཙཱ་བ་རྣམས་ལའང་གསུང་ངག་གི་གདམས་པ་གནང་བར་བཤད་པ་ལས། གྱི་ཇོ་ཟླ་བའི་འོད་ཟེར་གྱི་སློབ་མ་ཞུ་འཁོར་ལོ། ཞུ་དར་མ་རྒྱལ་མཚན་ལ་སོགས་པ་བརྒྱུད་དེ་ཕྱིས་ཇོ་ནང་ཀུན་སྤངས་ཆེན་པོ་ལ་འབྲོག་མིའི་ལུགས་དང་ཆུ་བོ་གཅིག་འདྲེས་སུ་གྱུར་ཏོ། ། ཇ༤ བཞི་པ་མངའ་བདག་མར་པའི་བཀའ་བརྒྱུད་ཀྱི་རིང་ལུགས་འཆད་པ་ལ་གཉིས། ཉ༡ ལུགས་སྲོལ་ངོས་བཟུང་བ། ཉ༢ བརྒྱུད་པའི་རྣམ་གྲངས་སོ་སོར་བཤད་པའོ། ། ཉ༡ དང་པོ་ནི། བཀའ་བཞི་བརྒྱུད་འདུས་ནཱ་རོ་མཻ་ཏྲི་ཡི། ། རྒྱལ་ཚབ་མངའ་བདག་ལོ་ཙཱའི་བཤད་སྒྲུབ་བཀའ། ། དེའང་གྲུབ་པའི་དབང་ཕྱུག་ཏེ་ལོ་པས་ནུབ་ཕྱོགས་སོ་མ་པུ་རིའི་གཙུག་ལག་ཁང་དུ་ཞབས་ལ་ལྕགས་སྒྲོག་གསོལ་ནས་ལོ་བཅུ་གཉིས་སུ་སྒྲུབ་པ་མཛད་པའི་མཐར་བླ་མ་ལྷའི་ལུང་བསྟན་ལྟར་སྨད་འཚོང་མའི་གཡོག་མཛད་ནས་ལམ་གྱི་རྟོགས་པ་སྦྱངས་པས་གྲུབ་པ་ཆེན་པོའི་ས་བརྙེས་ནས་དོ་ཧ་རྡོ་རྗེའི་གླུ་དབྱངས་གསུངས་པ་ཙམ་གྱིས་གྲོང་ཁྱེར་འབུམ་ཕྲག་བཅུ་གཉིས་ཀྱི་སྐྱེ་བོ་གྲོལ། སློབ་མ་གྲུབ་པ་ཐོབ་པ་བརྒྱད་ཀྱིས་ཀྱང་འགྲོ་བའི་དོན་དེ་བཞིན་མཛད་པར་གྲགས་ཤིང༌། ཏེ་ལོ་པ་ལ། རིང་བརྒྱུད་དང་། ཉེ་བརྒྱུད་ཀྱི་བཀའ་གཉིས་སུ་བབས་པ་ལས། སྔ་མ་ནི། དེ་ཉིད་ཀྱི་ཞལ་ནས། ཀླུ་སྒྲུབ་ཙཱརྱལྭ་བ་པ། ། སྐལ་པ་བཟང་མོ་ང་ཡི་ནི། ། བཀའ་བབས་བཞི་ཡི་བླ་མ་ཡིན། ། ཞེས་གསུངས་པ་ལྟར། ཙཱརྱཔ་ལས་གཏུམ་མོ། ཀླུ་སྒྲུབ་ལས་སྒྱུ་ལུས་དང་འོད་གསལ། ལྭ་བ་པ་ལས་རྨི་ལམ། སུ་ཁ་སིདྡྷི་ལས་བར་དོ་དང་འཕོ་བའི་བཀའ་བབས་པ་དང༌། གཞན་ཡང་། ཨིནྡྲ་བྷཱུ་ཏི་བར་པ་ལས་གཞན་ལུས་ཤེས་རབ་དང༌། མ་ཏངྒི་ལས་འགྲོང་འཇུག་གི་གདམས་པ་གསན་ཅིང༌། དེ་ལྟ་བུའི་རིང་བརྒྱུད་ལ་བཞེད་ལུགས་མང་ཡང༌། དཔལ་རང་བྱུང་རྡོ་རྗེས། ཡང་དག་པར་རྫོགས་པའི་སངས་རྒྱས་རྡོ་རྗེ་འཆང་ཆེན་པོས་གསང་བའི་བདག་པོ་ལ་སོགས་པའི་བྱང་ཆུབ་སེམས་(༡༨༤ན)དཔའ་རྣམས་ལ་གསུངས། དེ་རྣམས་བཀའ་བཞི་བརྒྱུད་པའི་བླ་མ་རྣམས་ལ་བརྒྱུད་དེ། ཀླུ་སྒྲུབ། ཨཱརྱདེ་བ། ཟླ་བ་གྲགས་པ། མཱ་ཏངྒི་རྣམས་ལྷོའི་བརྒྱུད་པའོ། ། ཌོམྦྷི་པ། བཱི་ན་པ། ལྭ་བ་པ། ཨིནྡྲ་བྷཱུ་ཏི་རྣམས་ནུབ་ཀྱི་བརྒྱུད་པའོ། ། ལཱུ་ཡི་པ། ཌེངྒི་པ། དཱ་རི་ཀ་པ། སུ་ཁ་དྷ་རི་རྣམས་བྱང་གི་བརྒྱུད་པའོ། ། སུ་ཁ་མ་ཧཱ་སིདྡྷི། ཐང་ལོ་པ། ཤིང་ལོ་པ། ཀརྞ་རི་པ་རྣམས་ཤར་གྱི་བརྒྱུད་པ་སྟེ། ཞེས་གསུངས་པ་ལྟར་ལ། ཕྱོགས་བཞི་ནི་འཕགས་ཡུལ་གྱི་ས་ཕྱོགས་དེ་དག་ཏུ་བྱོན་པ་ཤས་ཆེ་བ་ལ་དགོངས་སོ། ། ཉེ་བརྒྱུད་ལྟར་ན། ཏཻ་ལོ་ང་ལ་མི་ཡི་བླ་མ་མེད། ། ང་ཡི་བླ་མ་ཐམས་ཅད་མཁྱེན་པ་ཡིན། ། ཅེས་གསུངས་པ་ལྟར། སངས་རྒྱས་རྡོ་རྗེ་འཆང་དངོས་ལས་གསང་སྔགས་རྒྱུད་སྡེ་བཞིའི་གདམས་པ་གསན། རྡོ་རྗེ་རྣལ་འབྱོར་མས་སྙན་བརྒྱུད་ནོར་བུ་སྐོར་གསུམ་གྱི་མཛོད་གཏད་པས་གདམས་པའི་བཅུད་ཐམས་ཅད་འདུས་པ་ཡིན། རྗེ་བཙུན་དེ་ཡི་སྤྱན་སྔར་པཎ་ཆེན་ནཱ་རོ་པས་དཀའ་ཆེན་བཅུ་གཉིས་སྤྱད་པ་ལ་མཐར་ཚིག་དང་བརྡ་ལ་བརྟེན་ནས་གསང་སྔགས་ཀྱི་དོན་ཐམས་ཅད་ཁོང་དུ་ཆུད་ཅིང་གྲུབ་པ་བརྙེས། ཌོམྦྷི་ཧེ་རུ་ཀའི་རྣམ་འཕྲུལ་ལྷོ་བྲག་མར་པ་ཆོས་ཀྱི་བློ་གྲོས་འཕགས་ཡུལ་དུ་ལན་གསུམ་བྱོན། ནཱ་རོ་པ་ཉིད་སྔ་རྗེས་བསྡམས་པ་ལོ་བཅུ་དྲུག །ཟླ་བ་བདུན་དུ་བརྟེན་ནས་དགྱེས་གསང་གཙོས་རྒྱུད་སྡེ་དུ་མའི་དབང་བཤད་གདམས་ངག་གསན་ཚུལ་ཡང་། རྡོ་རྗེའི་མགུར་ལས། རྒྱ་གར་གྱི་ནཱ་རོ་པཎ་ཆེན་དང༌། ། བོད་ཡུལ་གྱི་མར་པ་ལོ་ཙཱ་གཉིས། ། སྔོན་སྦྱངས་སྨོན་ལམ་གཅིག་པས་མཇལ། ། ལོ་བཅུ་དྲུག་ཟླ་བ་བདུན་དུ་བསྟེན། ། ཞེས་དང༌། རྗེ་ནཱ་རོ་ཏཱ་པས་གཙོར་མཛད་པའི། ། གྲུབ་ཐོབ་ཀྱི་བླ་མ་རྣམས་དང་མཇལ། ། སྤྱིར་རྒྱུད་སྡེ་བཞི་ཡི་མན་ངག་ཞུས། ། ཞེས་འབྱུང་ཞིང་། ཁྱད་པར་འབྱོན་ཐེབས་རྗེས་མའི་སྐབས་ནཱ་རོ་པ་མཁའ་སྤྱོད་དུ་གཤེགས་ཟིན་ཀྱང་གསོལ་བ་བཏབ་པས་བྱང་པུཥྤ་ཧ་རིའི་དགོན་པར་མངོན་(༡༨༤བ)སུམ་དུ་བྱོན། ཟླ་བ་དྲུག་ཏུ་བཞུགས་ནས་བདེ་མཆོག་ཡབ་ཡུམ་གྱི་སྙན་བརྒྱུད་རྫོགས་པར་གནང༌། གཞན་ཡང་། དཔལ་ལྡན་ཤ་བ་རིས་རྗེས་སུ་བཟུང་བ་རྒྱལ་བ་མཻ་ཏྲི་པ་དང༌། ནུབ་ཏུ་ལཀྵེ་ཏྲའི་མཁས་པ་ཡེ་ཤེས་སྙིང་པོ། ལྷོ་དུག་མཚོའི་གླིང་ན་གྲུབ་ཐོབ་ཞི་བ་བཟང་པོ། ཌཱ་ཀི་མ་མི་རུས་རྒྱན་ཅན་སོགས་མཁས་གྲུབ་དུ་མ་བརྟེན་ནས་མདོ་རྒྱུད་མཐའ་ཡས་པ་གསན་ཅིང༌། ཁྱད་པར་ནཱ་རོ་དང་མཻ་ཏྲི་པ་གཉིས་ཀྱིས་བྱང་ཕྱོགས་ཁ་བ་ཅན་འདུལ་བའི་རྒྱལ་ཚབ་ཏུ་དབང་བསྐུར་བ་མངའ་བདག་ལོ་ཙཱ་ཆེན་པོ་དེ་ལ་བཤད་རྒྱུད་དང་སྒྲུབ་བརྒྱུད་ཀྱི་བཀའ་སྲོལ་ཆེན་པོ་གཉིས་སུ་མཆིས་སོ། ། ཉ༢ གཉིས་པ་[བརྒྱུད་པའི་རྣམ་གྲངས་སོ་སོར་བཤད་པ་]ལ་བཞི། ཏ༡ ཀ་ཆེན་བཞི། ཏ༢ རས་ཆུང་བཀའ་བརྒྱུད། ཏ༣ དྭགས་པོ་བཀའ་བརྒྱུད། ཏ༤ དེ་ལས་ཁྱད་པར་ཀརྨ་ཀཾ་ཚང་བཀའ་བརྒྱུད་བཤད་པའོ། ། ཏ༡ དང་པོ་ནི། ཀ་ཆེན་བཞིར་བབས་ཁྱད་པར་མི་ལ་རྗེའི། ། སྙན་བརྒྱུད་འཛིན་པ་ཉི་ཟླ་ལྟ་བུ་གཉིས། ། རྗེ་ལྷོ་བྲག་པས་གསང་བ་བསམ་གྱིས་མི་ཁྱབ་པའི་བཀོད་པ་ལ་བརྟེན་ནས་གངས་ཅན་གྱི་གདུལ་བྱ་མཐའ་ཡས་པ་འདུལ་བ་ལས་ཐུགས་ཀྱི་སྲས་བཞི། དབུ་ཆེའི་བཤེས་གཉེན་བཅུ་སོགས་གདམས་ངག་འཛིན་པ་མང་དུ་བྱོན་པའི་གཙོ་བོ་ཀ་ཆེན་བཞིར་གྲགས་པ་ལ་བཤད་སྒྲུབ་ཀྱི་བཀའ་བབས་ཏེ། དེའང་གཞུང་གི་རྔོག་སྟོན་ཆོས་རྡོར། དོལ་གྱི་མཚུར་སྟོན་དབང་ངེ། གཙང་རོང་གི་མེས་སྟོན་ཚོན་པོ་གསུམ་ལ་གཙོ་བོར་བཤད་པའི་བཀའ་བབས། རྗེ་བཙུན་མི་ལ་བཞད་པ་རྡོ་རྗེ་ལ་སྒྲུབ་བརྒྱུད་ཀྱི་བཀའ་བབས། རྔོག་སྟོན་སྐུ་ལུས་མ་སྤངས་པར་མཁའ་སྤྱོད་དུ་གཤེགས་ཤིང་རྔོག་བདུན་བརྒྱུད་རྡོར་དྲིལ་འཛིན་ཤེས་པས་ཆོག་པའི་མཁྱེན་བརྩེ་ནུས་མཐུ་ཅན་བྱོན་ཅིང་། དེ་དག་གི་བུ་སློབ་ཏུའང་གངས་ཅན་ན་གྲགས་པ་ཆེ་བ་ཕལ་ཆེར་འདུས་པས་མཚོན་ཕྲིན་ལས་ཤིན་ཏུ་རྒྱ་ཆེ་བར་གྱུར་ཀྱང༌། ཁྱད་པར་གངས་ཅན་གྱི་རྣ་བའི་རྒྱན་གཅིག་རྗེ་བཙུན་མི་ལ་རས་པ་ནི་འཕགས་ཡུལ་གྱི་གྲུབ་པའི་དབང་ཕྱུག་རྣམས་དང་དབྱེ་བ་མེད་པར་སྐུ་ཚེ་གཅིག་ལ་ཟུང་འཇུག་གི་གོ་འཕང་མཐར་ཐུག་(༡༨༥ན)པ་མངོན་དུ་མཛད་ནས་མི་དང་མི་མ་ཡིན་གྱི་འགྲོ་བ་ཚད་མེད་པ་བཏུལ་བ་ལས་མཚན་ཡོངས་སུ་གྲགས་པའི་སློབ་མ་འགྲོ་བ་འདུལ་བའི་མཆོག་གསུམ། མཁའ་སྤྱོད་དུ་གཤེགས་པ་ཕོ་གསུམ་མོ་བཞི། རས་པ་ཆེན་པོ་བརྒྱད་སོགས་བྱོན་པའི་གཙོ་བོ་སྙན་བརྒྱུད་འཛིན་པ་ཉི་ཟླ་ལྟ་བུ་གཉིས་ཁྱད་པར་དུ་འཕགས་པའོ། ། ཏ༢ གཉིས་པ་[རས་ཆུང་བཀའ་བརྒྱུད་]ནི། གྲུབ་རྒྱལ་ཏེ་པུའི་ཐུགས་སྲས་རས་ཆུང་པའི། ། གདམས་ཟབ་གངས་ཅན་གྲུབ་མཐའ་ཡོངས་ཀྱི་གསོས། ། དེ་ལ་ཐུགས་སྲས་ཟླ་བ་ལྟ་བུ། མ་ཅིག་གྲུབ་པའི་རྒྱལ་མོ་དང༌། ཏེ་པུ་པ་དྲི་མེད་བཤེས་གཉེན་ཟུང་གིས་རྗེས་སུ་བཟུང་ནས་ཐུགས་མཛོད་གདམས་པའི་བཅུད་སྩལ་བའི་སྲས་མཆོག་ལུས་མེད་མཁའ་འགྲོའི་ཆོས་སྐོར་ཕྱི་མ་རྣམས་སྤྱན་འདྲེན་པར་མཛད་པ་པོ་རས་ཆུང་རྡོ་རྗེ་གྲགས་པ་ནི་སྐུ་ལུས་མ་སྤངས་པར་ལྕང་ལོ་ཅན་དུ་བཞུད། ཕྱིས་སུའང་དཔལ་ལྡན་འབྲུག་པ་སོགས་སྐལ་ལྡན་མང་པོ་རྗེས་སུ་བཟུང༌། དངོས་སུ་གདམས་པ་སྩལ་བའི་ཐུགས་སྲས་བཅུ་གཉིས་སོགས་བྱུང་བ་ལས་གཙོ་བོར་རྒྱལ་བ་ཁྱུང་ཚང་པ་ལ་སྙན་བརྒྱུད་ཀྱི་མཛོད་གཏད། དེས་མ་ཅིག་ཨང་ཇོ་ལ་གནང་བ་སོགས་རིམ་པར་བརྒྱུད་དེ་འགྲོ་མགོན་གཙང་པ་རྒྱ་རས་ཀྱིས་བཀའ་སྲོལ་རྒྱ་ཆེར་བཏོད། བླ་མ་ཟངས་རི་རས་པ་ལ་འཇིག་རྟེན་དབང་ཕྱུག་རྒྱལ་བ་རྒྱ་མཚོའི་ཟབ་ཆོས་སོགས་གནང༌། དེས་འགྲོ་མགོན་རས་ཆེན་ལ་གནང་ཞིང་ཀཾ་ཚང་བཀའ་བརྒྱུད་ལ་བཀའ་བབས་པས་གྲུབ་པའི་དབང་ཕྱུག་ཀརྨ་པཀྴིའང་གཙོ་བོར་ཆོས་དེ་ཉིད་ལས་གྲུབ་པ་བརྙེས་པ་དང༌། གདམས་ངག་ཤམ་བུ་ཅན་བཅོ་བརྒྱད་ཀྱི་ནང་ཚན་ཚེ་དཔག་མེད་འགྲོ་དོན་གྱི་ཤམ་བུ་ཅན་ནི་ས་ཀར་དགེ་གསུམ་གཙོས་ཐམས་ཅད་ལ་ཁྱབ་པས་མཚོན་སྐྱེས་མཆོག་འདིའི་གདམས་ངག་ཟབ་ཆོས་རྣམས་ནི་གངས་ཅན་གྲུབ་མཐའ་ཡོངས་ཀྱི་གསོས་སུ་གྱུར་པ་ཡིན་ནོ། ། ཏ༣ གསུམ་པ་[དྭགས་པོ་བཀའ་བརྒྱུད་]ནི། རྒྱལ་བས་ལུང་བསྟན་དགེ་སློང་འཚོ་བྱེད་སྲས། ། འབའ་རོམ་ཕག་གྲུ་ཀཾ་ཚང་ཚལ་(༡༨༥བ)པ་སྟེ། ། ཆེ་བཞི་རྩ་བའི་བརྒྱུད་འཛིན་བཅས་ཏེ་ལྔ། ། མི་ལའི་ཐུགས་སྲས་ཉི་མ་ལྟ་བུ་རྒྱལ་བ་ཐུབ་པའི་དབང་པོས་ཏིང་འཛིན་རྒྱལ་པོ་དང༌། སྙིང་རྗེ་པད་དཀར་སོགས་ནས་ཤིན་ཏུ་གསལ་བ་ལུང་བསྟན་པའི་དགེ་སློང་འཚོ་བྱེད་དམ་མཉམ་མེད་དྭགས་པོ་ལྷ་རྗེས་སློབ་མ་ཐུན་མོང་བ་རྣམས་ལ་བཀའ་གདམས་ལམ་རིམ་དང་མདོ་ལུགས་ཏིང་ངེ་འཛིན་ལ་ཕྱག་ཆེན་གྱི་མིང་གིས་བརྒྱན་པ། ཐུན་མིན་རྣམས་ལ་བླ་མ་མི་ལའི་ཐབས་ལམ་དང་འབྲེལ་བའི་སྔགས་ཀྱི་ཕྱག་ཆེན་ཐུན་མོང་མ་ཡིན་པ་བསྟན་ནས་ཆོ་འཕྲུལ་ཆེན་པོས་ཆོས་ཀྱི་འཁོར་ལོ་བསྐོར་བས་ལས་ཅན་དགྲ་བཅོམ་པ་ལྟ་བུ་ལྔ་བརྒྱ་སོགས་གདུལ་བྱ་མཐའ་ཡས་པ་སྨིན་གྲོལ་དུ་མཛད། མདོར་ན། བདག་ཉིད་ཆེན་པོ་འདི་ནི་སངས་རྒྱས་འཇིག་རྟེན་དུ་བྱོན་པ་དང་ཆོས་མཚུངས་པར་མཐོང་ཐོས་དྲན་རེག་ཐམས་ཅད་ད་ལྟའི་བར་དུའང་རྒྱུད་སྨིན་གྲོལ་དུ་མཛད་པར་ནུས་པས་རྣམ་པར་ཐར་པ་བསམ་གྱིས་མི་ཁྱབ་ཅིང༌། སློབ་མའི་གཙོ་བོ་འབའ་རོམ་པ་དར་མ་དབང་ཕྱུག་ལས་འབའ་རོམ་བཀའ་བརྒྱུད། ཕག་གྲུ་རྡོ་རྗེ་རྒྱལ་པོ་ལས་ཕག་གྲུ་བཀའ་བརྒྱུད། ཁམས་པ་དབུ་སེའམ་རྗེ་དུས་གསུམ་མཁྱེན་པ་ལས་ཀཾ་ཚང་བཀའ་བརྒྱུད། དབོན་སྒོམ་ཚུལ་ཁྲིམས་སྙིང་པོའི་སློབ་མ་ཞང་ཚལ་པ་བརྩོན་འགྲུས་གྲགས་པ་ལས་ཚལ་པ་བཀའ་བརྒྱུད་དེ་ཆེ་བཞིར་གྲགས་པ་དང༌། སྒོམ་པོ་རྩ་བའི་གདན་སར་དྭགས་པོ་ཁུ་དབོན་གསུམ། དྭགས་པོ་འདུལ་འཛིན། ཕྱིས་མཁས་གྲུབ་ཆེན་པོ་བཀྲ་ཤིས་རྣམ་རྒྱལ་སོགས་ཟམ་མ་ཆད་པར་བྱོན་པས་དྭགས་པོ་བཀའ་བརྒྱུད་བཅས་ཏེ་ལྔའོ། ། ཕག་གྲུའི་སློབ་མ་འབྲི་སྟག་ཁྲོ་གླིང་གཉིས། ། སྨར་ཡེལ་གཡའ་ཤུག་ཟུང་བཞི་ཡ་བརྒྱད་ལས། ། གླིང་སྲས་འབྲུག་པར་སྟོད་སྨད་བར་དང་གསུམ། ། དཔལ་ལྡན་ཕག་མོ་གྲུ་པ་ནི་སངས་རྒྱས་འཁོར་བ་འཇིག་གམ་ཤཱཀྱའི་རྒྱལ་པོ་རང་ཉིད་དགེ་བའི་བཤེས་གཉེན་གྱི་སྐུར་སྟོན་པ་ཡིན་པས་རྣམ་མཐར་དང་ཕྲིན་ལས་ཚད་བཟུང་དུ་མ་མཆིས་ཀྱང་ཡོངས་(༡༨༦ན)གྲགས་སློབ་མ་གདུགས་ཐོགས་ལྔ་བརྒྱར་གྲགས་པའི་གཙོ་བོ་རྣམས་ལས་བཀའ་བརྒྱུད་ཆུང་བརྒྱད་དུ་གྲགས་པ་རྣམས་བྱུང་སྟེ། སྐྱོབ་པ་འཇིག་རྟེན་གསུམ་གྱི་མགོན་པོ་ལས་འབྲི་གུང་བཀའ་བརྒྱུད། ཐང་པ་བཀྲ་ཤིས་དཔལ་བ་ལས་སྟག་ལུང་བཀའ་བརྒྱུད། འགྲོ་མགོན་རྒྱལ་ཚ་ཁུ་དབོན་ལས་ཁྲོ་ཕུ་བཀའ་བརྒྱུད། གླིང་རས་པདྨ་རྡོ་རྗེ་ལས་གླིང་རས་བཀའ་བརྒྱུད། ཆོས་རྗེ་སྨར་པ་གྲུབ་ཐོབ་ལས་སྨར་ཚང་བཀའ་བརྒྱུད། ཡེལ་པ་ཡེ་ཤེས་བརྩེགས་པ་ལས་ཡེལ་པ་བཀའ་བརྒྱུད། ཟ་ར་བ་ཡེ་ཤེས་སེང་གེ་ལས་གཡའ་བཟང་བཀའ་བརྒྱུད། སྙི་ཕུ་གྱེར་སྒོམ་ཆེན་པོ་ལས་ཤུག་གསེབ་བཀའ་བརྒྱུད་དེ་ཟུང་བཞི་ཡ་བརྒྱད་དུ་གྲགས་པ་རྣམས་བྱུང་ཞིང༌། རེ་རེ་ལའང་ཆོས་བརྒྱུད་གདན་ས་ཕྲིན་ལས་མཐའ་ཡས་པའི་མཁས་གྲུབ་ཀྱི་ཚང་ཆེན་པོ་བརྡོལ་ཞིང༌། ཁྱད་པར་གླིང་རས་ཀྱི་ཐུགས་སྲས་འགྲོ་མགོན་གཙང་པ་རྒྱ་རས་ཀྱི་བུ་སློབ་ཀྱི་བྱ་རྒོད་པོའི་ཉིན་ལམ་བཅོ་བརྒྱད་ཚུན་ཆད་ཁྱབ་པ་ལས། གཙོ་བོ་རྒོད་ཚང་པ་མགོན་པོ་རྡོ་རྗེ་ལས་སྟོད་འབྲུག་གནམ་གྱི་སྐར་མར་གྲགས་པ་སྟེ། འདིའི་སློབ་བརྒྱུད་ལ་རྒྱལ་བ་ཡང་དགོན་པ་དང༌། དེའི་སློབ་བརྒྱུད་ལ་ལ་སྟོད་ཤེས་རབ་མགོན་པོ་དང་འབའ་ར་བ་རྒྱལ་མཚན་བཟང་པོ་སོགས་བྱོན། ལོ་རས་པ་དར་མ་དབང་ཕྱུག་ལས་སྨད་འབྲུག་སའི་འདྲེགས་པ། གདན་ས་འཛིན་པའི་སེང་གེ་དགུ་ཚར་ལས་བར་འབྲུག་ཏུ་གྲགས་པ་སོགས་སྨོས་ཀྱིས་མི་ལངས་ཤིང༌། གཞན་ཡང་དཔལ་ལྡན་ཕག་མོ་གྲུ་པའི་ཞལ་སློབ་ཤེས་རབ་མཐར་ཐུག་སྤར་ཕུ་བ། མེ་ཉག་སྒོམ་རིང༌། གྲུབ་ཐོབ་ཉག་རེ་སེའོ། །འབྱོར་ཆོས་སྐུ་བ་སོགས་ཕྲིན་ལས་རྒྱ་ཆེར་སྐྱོང་བ་པོ་ནི་མཐའ་ཡས་པར་བྱོན་ནོ། ། ཏ༤ བཞི་པ་[དེ་ལས་ཁྱད་པར་ཀརྨ་ཀཾ་ཚང་བཀའ་བརྒྱུད་བཤད་པ་]ནི། དྲུག་པ་སེང་གེ་དུས་མཁྱེན་རྩ་བའི་བརྒྱུད། ། ཟུར་མང་གནས་མདོ་གསུམ་སྟེ་ཕྱི་མ་ལས། ། ཀར་རྙིང་བརྒྱུད་འཛིན་མདོ་སྨད་ཕལ་ཆེར་ཁྱབ། ། མ་བྱོན་སངས་རྒྱས་དྲུག་པ་སེང་གེའི་ང་རོ་བྱང་ཆུབ་སེམས་དཔའི་(༡༨༦བ)ཚུལ་བསྟན་པ་དཔལ་ལྡན་དུས་གསུམ་མཁྱེན་པ། གྲུབ་ཆེན་ཀརྨ་པཀྴི། ཀུན་མཁྱེན་རང་བྱུང་རྡོ་རྗེ་སོགས་ཛམྦུའི་གླིང་དུ་གྲགས་པའི་མི་ཡི་སེང་གེ་སངས་རྒྱས་གཉིས་པའི་སྐྱེས་རབས་ཕྲེང་བ་ད་ལྟ་ཡན་བཅུ་བཞིར་བྱོན་པ་སྐུ་ཕྲེང་རེ་རེའི་རྣམ་ཐར་ཕྲིན་ལས་བུ་སློབ་ཀྱི་གྲངས་ཀྱང་ཚད་བཟུང་བར་མི་ནུས་ཤིང༌། གཙོ་བོར་རྟོགས་ལྡན་གྲགས་པ་སེང་གེའི་སྐྱེས་པ་རབས་ཀྱི་ཕྲེང་བ་འོད་དཔག་མེད་དངོས་རྒྱལ་བ་གར་གྱི་དབང་ཕྱུག་ཞྭ་དམར་ཅོད་པན་འཛིན་པ་བཅུ། གོ་ཤྲཱི་དཔལ་འབྱོར་དོན་གྲུབ་ཀྱི་སྐྱེ་འཕྲེང་གསང་བའི་བདག་པོ་རྒྱལ་ཚབ་ན་རིམ་ལྔ། འགྲོ་མགོན་རས་པ་ཆེན་པོའི་རྣམ་འཕྲུལ་རྒྱལ་ཚབ་བྱམས་མགོན་དངོས་སྣང་སི་ཏུ་ན་རིམ་བཅུ་གསུམ། གཏེར་སྟོན་རིན་ཆེན་གླིང་པའི་སྐྱེ་སྤྲུལ་དཔའ་བོ་ན་རིམ་དགུ། ཏྲེ་ཆེན་ཆོས་ཀྱི་རྒྱ་མཚོའི་