Tibetan
དེ་ལ་ཟབ་མོ་ནང་དོན་གནས་བཅུ་གཅིག་པ་འདི་ནི་བླ་མེད་རྒྱུད་སྡེ་མཐའ་དག་གི་སྤྱི་འགྲེལ། ཕྱི་ནང་གཞན་གསུམ་དང༌། ཁྱད་པར་རྩ་རླུང་ཐིག་ལེའི་རྣམ་གཞག་རྒྱས་པར་སྟོན་པས་ཆོས་དྲུག་སྒོམ་པ་རྣམས་ཀྱིས་མི་ཤེས་སུ་མི་རུང་བ་ཡིན། བརྟག་པ་གཉིས་པ་ནི་བླ་མེད་མ་རྒྱུད་ཐམས་ཅད་ཀྱི་རྒྱལ་པོ་མངའ་བདག་མར་པས་རྩལ་དུ་བཏོན་པའི་ཟབ་ཆོས་ཁྲིད་རྒྱུན་བར་མ་ཆད་ཅིང་རྒྱུད་སྡེ་རྣམས་ཀྱི་བསྐྱེད་རྫོགས་སྒོམ་པ་ལ་ཐོག་མར་འདི་ཉིད་ཤེས་པ་གལ་ཆེ་བ་དང༌། རྒྱུད་བླ་མ་ནི་རྗེ་སྒམ་པོ་པའི་ཞལ་ནས། འོ་སྐོལ་གྱི་ཕྱག་རྒྱ་ཆེན་པོའི་གདམས་པ་འདིའི་གཞུང་ནི་བཅོམ་ལྡན་འདས་བྱམས་པས་མཛད་པའི་ཐེག་པ་ཆེན་པོ་རྒྱུད་བླ་མའི་བསྟན་བཅོས་ཡིན་ནོ། །ཞེས་གསུངས་པ་ལྟར། བདེ་གཤེགས་ཕག་མོ་གྲུ་པ། སྐྱོབ་པ་འཇིག་རྟེན་གསུམ་མགོན་སོགས་ཀྱིས་ཀྱང་ལུགས་དེའི་གྲུབ་མཐའ་འཆའ་ཞིང༌། རང་བྱུང་རྒྱལ་བ་སོགས་ཐམས་ཅད་མཁྱེན་པ་ན་རིམ་གྱིས་ཀྱང་དེའི་དགོངས་པ་རྩལ་འདོན་དུ་(༡༧༤ན)མཛད་པ་འབའ་ཞིག་ཡིན་པས་ཕྱག་རྒྱ་ཆེན་པོ་སྒོམ་པ་ལའང་འདི་ཉིད་ཤེས་པ་གལ་ཆེ་བ་ཡིན། དེས་ན་གཞུང་འདི་གསུམ་ནི་ཁ་བཤད་དང་རྩོད་པའི་ཆོས་མ་ཡིན་གྱི་ཉམས་ལེན་དང་ལྟོ་སྦྱར་བའི་ཆོས་ཡིན་པས་སྒྲུབ་བརྒྱུད་འཛིན་པ་རྣམས་ཀྱིས་བཤད་པའི་རྒྱུན་མ་ཉམས་པར་བཟུང་བ་ཅི་ནས་ཀྱང་གནད་ཆེ་བར་ཡོད་དོ།། གཞུང་ཆེན་བཀའ་བཞི་མི་བསྐྱོད་རྒྱལ་ལ་བབས། ། སྲས་བཅས་ལེགས་བཤད་ཉི་འོད་བརྡལ་བའི་རྒྱུན། ། དེང་སང་ན་ཡང་དོན་གྱིས་མ་ཆད་བཞུགས། ། མཚན་ཉིད་ཕྱོགས་ཀྱི་བཤད་གྲྭ་སྔོན་དུས་སྒྲུབ་བརྒྱུད་འདིར་ཆེར་མ་བྱོན་པ་ལ་རྗེ་དྲུག་པ་མཐོང་བ་དོན་ལྡན་གྱིས་ཀུན་མཁྱེན་རོང་སྟོན་ཆེན་པོ་ལས་གཞུང་ལུགས་དུ་མ་གསན། དེས་ཀྱང་ང་ལ་སངས་རྒྱས་སློབ་མ་ཡོད་པ་ཡིན་ཅེས་སེང་གེའི་སྒྲ་བསྒྲགས། རྗེ་བདུན་པས་ཚད་མ་རིག་གཞུང་རྒྱ་མཚོ་མཛད་ཅིང་གཞུང་ལུགས་རབ་འབྱམས་སྨྲ་བའི་སློབ་མ་དུ་མ་བྱུང༌། ཁྱད་པར་ས་ཀར་གཉིས་ཀྱི་སྡེ་སྣོད་འཛིན་པ་ཆེན་པོ་དྭགས་པོ་རབ་འབྱམས་པ་གསུམ་པ་ཀརྨ་ཕྲིན་ལས་པ་དང་པོ་ཕྱོགས་ཐམས་ཅད་ལས་རྒྱལ་བའི་ལྷ་ལ་རྗེ་བརྒྱད་པ་ཐམས་ཅད་མཁྱེན་པ་ཆེན་པོ་མི་བསྐྱོད་དགའ་བས་གཞུང་ལུགས་མཐའ་ཡས་པ་གསན་ཅིང༌། གཞན་ལ་མ་ལྟོས་པར་ཐམས་ཅད་མཁྱེན་པའི་ཡེ་ཤེས་ཀྱིས་ཤིང་རྟའི་སྲོལ་གསར་དུ་ཕྱེས་ཏེ། འདུལ་བའི་རྣམ་འགྲེལ་ཉི་མའི་དཀྱིལ་འཁོར། མཛོད་འགྲེལ་གྲུབ་བདེའི་དཔྱིད་འཇོ་ལེགས་བཤད་ཡོངས་ཀྱི་རྒྱལ་པོ། མངོན་རྒྱན་འགྲེལ་པ་རྗེ་བཙུན་ངལ་གསོ། འཇུག་ཊཱིཀ་དྭགས་བརྒྱུད་གྲུབ་པའི་ཤིང་རྟ་བདེ་བར་འདྲེན་པའི་ཤུལ་ལམ། ཚད་མ་རིག་གཞུང་གི་འགྲེལ་སོགས་མཛད་ཅིང་གཞུང་ཆེན་བཀའ་བཞིའི་ལམ་གསལ་བར་མཛད་པ་ནས་མི་བསྐྱོད་རྒྱལ་བ་ཁོ་ན་ལ་བཤད་པའི་བཀའ་བབས་པ་ལྟར་གྱུར་ཏེ་དྭགས་པོ་ལེགས་བཤད་གླིང་སོགས་བཤད་གྲྭ་རྣམས་རིམ་པར་བྱུང་ཞིང༌། སྲས་ཀྱི་ཐུ་བོ་རྒྱལ་བ་དཀོན་མཆོག་ཡན་ལག །(༡༧༤བ)དཔའ་བོ་གཙུག་ལག་ཕྲེང་བ། ཀརྨ་ཕྲིན་ལས་གཉིས་པ་དང་བཅས་པ་རྣམས་ཀྱིས་ལེགས་བཤད་ཉི་མའི་འོད་སྣང་རབ་ཏུ་བརྡལ་བར་མཛད་ལ། ཁྱད་པར་རྗེ་དགུ་པས་མངོན་མཛོད་དང་འཇུག་ཊཱིཀ། གར་དབང་ལྔ་པས་མངོན་རྒྱན། དྲུག་པ་ཆོས་ཀྱི་དབང་ཕྱུག་གིས་འདུལ་ཊཱིཀ་བཅས། ཀར་ཊཱིཀ་ཆེན་མོ་རྣམས་ལས་སྙིང་པོ་བསྡུས་པའི་ཚུལ་དུ་མཛད་ཅིང་ཟ་དམ་ཉིན་བྱེད་གླིང་སོགས་སུ་འཆད་རྩོད་ཀྱི་སྲོལ་རྒྱ་ཆེ་བ་བྱུང་བ་ནས་ད་ལྟའི་བར་དུ་འགྲེལ་པ་དེ་དག་གི་བཤད་ལུང་གི་རྒྱུན་བཞུགས་པས་དེང་སང་གི་སྐབས་ནའང་བཤད་གྲྭ་དམིགས་སུ་གསལ་བ་མེད་ཀྱང་བཤད་རྒྱུན་དེ་དག་དོན་གྱིས་མ་ཆད་པར་ཡོད་པ་ཡིན་ནོ། ། དེས་ན་ཀར་ལུགས་ཀྱི་བཤད་སྲོལ་འདི་དག་གི་ཁུངས་ཕལ་ཆེར་ས་ལུགས་དང་དེ་ལས་རོང་སྟོན་ཆེན་པོའི་བཤད་སྲོལ་ཡིན་ལ། ཕྱིས་ནས་རང་ལུགས་འབུར་དོད་ཀྱི་བཤད་སྲོལ་བཏོད་པ་ཡིན་པའང་ཤེས་པར་བྱའོ། ། ཉ༣ གསུམ་པ་[གཞན་ལུགས་ལ་བསྔགས་པ་བརྗོད་པ་]ནི། འདུལ་བསྟན་རྒྱ་མཚོར་འཆད་རྩོམ་རླབས་ཕྲེང་ཅན། ། འཇམ་དཔལ་དབྱངས་དངོས་སྙིང་པོའི་མཚན་གྱིས་བསྐྱིལ། ། ཐུབ་བསྟན་སྒྲོན་མེ་འཕགས་ཞབས་གཉིས་པའོ། ། དེ་ལྟར་བཤད་རྒྱུན་སྒོ་དུ་མ་ནས་བྱུང་ཡང་ཐུབ་བསྟན་ལྔ་བརྒྱ་པའི་ཐ་མ་འདིར། དམ་ཆོས་འདུལ་བའི་བསྟན་པ་རྒྱ་མཚོ་ལ་གནས་བཅས་ཤིང་འཆད་རྩོམ་གྱི་རླབས་ཕྲེང་མཐའ་ཡས་པ་གཡོ་བ་ཅན། རྗེ་བཙུན་འཇམ་དཔལ་དབྱངས་དངོས་བཤེས་གཉེན་གྱི་རྣམ་པར་སྟོན་པ་རྗེ་རོལ་པའི་རྡོ་རྗེས་གནང་བའི་མཚན་ཀུན་དགའ་སྙིང་པོའམ་ཡོངས་སུ་གྲགས་པའི་མཚན་བློ་བཟང་གྲགས་པའི་དཔལ་གྱིས་བསྐྱིལ་ཞིང་བཟུང་བར་མཛད་པ་སྟེ། ཐུབ་བསྟན་གྱི་སྒྲོན་མེ་འཕགས་ཞབས་གཉིས་པ་གངས་ཅན་དུ་བྱོན་པ་སྟེ་དེའི་ཚུལ་རྣམ་པར་ཐར་པ་རྣམས་དང་ད་ལྟའི་ཕྲིན་ལས་ཀྱི་རྒྱུན་ལ་གཟུ་བོའི་བློས་བརྟགས་པས་ཤེས་པར་སླའོ། ། གངས་ཅན་ལྗོངས་སུ་བསྟན་རྩ་འདུལ་བ་དང་བཤད་རྒྱུན་གྱི་བྱུང་བ་བརྗོད་པའི་སྐབས་སོ། ། གངས་ཅན་ལྗོངས་སུ་བསྟན་རྩ་འདུལ་བ་དང་བཤད་རྒྱུན་གྱི་བྱུང་བ་བརྗོད་པ་སྐབས་གཉིས་པའི་འགྲེལ་པའོ།། །། གསུམ་པ། སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་བྱུང་བ་བརྗོད་པའི་སྐབས། ང༣ སྐབས་གསུམ་པ་བོད་ཡུལ་སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་བྱུང་བ་བརྗོད་པ་ལ་གཉིས། ཅ༡ མདོར་བསྟན་པ་དང༌། ཅ༢ རྒྱས་པར་བཤད་པའོ། ། ཅ༡ དང་པོ་ནི། བོད་ཡུལ་སྒྲུབ་བརྒྱུད་ཤིང་རྟ་ཆེན་པོ་བརྒྱད། ། རྙིང་མ་བཀའ་གདམས་ལམ་འབྲས་བཀའ་བརྒྱུད་པ། ། ཤངས་པ་ཞི་བྱེད་སྦྱོར་དྲུག་བསྙེན་སྒྲུབ་བོ། ། བོད་ཀྱི་ཡུལ་འདིར་སྒྲུབ་བརྒྱུད་ཀྱི་རིང་ལུགས་འདྲེན་པ་ཆེ་ཕྲ་དུ་མ་བྱུང་ཡང་གཙོ་བོའི་རིགས་སུ་བསྡུ་ན་ཤིང་རྟ་ཆེན་པོ་བརྒྱད་དེ། སྔ་འགྱུར་རྙིང་མ། བཀའ་གདམས་པ། ལམ་འབྲས་པ། མར་པའི་བཀའ་བརྒྱུད། ཤངས་པ་བཀའ་བརྒྱུད། ཞི་བྱེད་ཡན་ལག་དང་བཅས་པ། སྦྱོར་དྲུག་པ། རྡོ་རྗེ་གསུམ་གྱི་བསྙེན་སྒྲུབ་པའི་ལུགས་རྣམས་སོ། ། ཅ༢ གཉིས་པ་[རྒྱས་པར་བཤད་པ་]ལ་གཉིས། ཆ༡ ཤིང་རྟ་བརྒྱད། ཆ༢ ཞར་བྱུང་ཕྲན་ཚེགས་བཤད་པའོ། ། ཆ༡ དང་པོ་ལ་བརྒྱད་རིམ་པར་བཤད་པའི། ཇ༡ དང་པོ་གསང་སྔགས་རྙིང་མ་ལ་གཉིས། ཉ༡ བསྟན་པ་ངོས་འཛིན་པ། ཉ༢ དེའི་བཀའ་བབས་སོ་སོར་བྱུང་ཚུལ་ལོ། ། ཉ༡ དང་པོ་ནི། སྔ་འགྱུར་གཞུང་ཤིང་མདོ་སྒྱུ་སེམས་གསུམ་སྟེ། ། སྒྲུབ་སྡེ་ཟུར་རྒྱན་གསང་སྐོར་སྲོག་གི་ཐིག ། གསང་སྔགས་རྙིང་མ་ཞེས་གྲགས་པའི་བསྟན་པའམ་ཆོས་ཀྱི་མཚན་གཞི་ནི་བཀའ་མ་རྣམས་ཡིན་ཏེ། སྔ་འགྱུར་གྱི་སྐབས་སུ་བྱུང་བའི་ཆོས་དངོས་དེ་ཡིན་པའི་ཕྱིར་རོ། ། དེས་ན་བསྟན་པའི་གཞུང་ཤིང་ནི། བཀའ་མ་འདུས་པ་མདོ། སྒྱུ་འཕྲུལ། སེམས་སྡེ་ལུགས་གཉིས་རྣམས་ཡིན་ལ། འཇམ་དཔལ་སྐུ། པདྨ་གསུང་སོགས་སྒྲུབ་སྡེ་བརྒྱད་ཡན་ལག་དང་བཅས་པའི་ཟབ་ཆོས་རྣམས་ནི་ཟུར་རྒྱན། རྫོགས་པ་ཆེན་པོ་ཐིག་ལེ་གསང་སྐོར་ཏེ་ད་ལྟ་སྙིང་ཏིག་ཡ་བཞིར་གྲགས་པ་སློབ་དཔོན་རྣམ་གཉིས་ཀྱི་དགོངས་བཅུད་རྣམས་ནི་སྲོག་ཐིག་དྭངས་མའི་ཚུལ་དུ་གནས་པ་ཡིན་ནོ། ། ཉ༢ གཉིས་པ་ལ་དྲུག ། ཏ༡ པདྨ། ཏ༢ བཻ་རོ། ཏ༣ བི་མ། ཏ༤ གནུབས་ཆེན། ཏ༥ རྨ་གཉགས་སོགས་དང༌། ཏ༦ ཕྱིས་ཀྱི་གཏེར་བྱོན་ནོ། ། ཏ༡ དང་པོ་ནི། (༡༧༥བ) གངས་ཅན་བསྟན་པའི་ཤིང་རྟ་ཁྲི་སྲོང་རྗེའི། ། ཐུགས་བསྐྱེད་གཞལ་དུ་མེད་པའི་བཀའ་དྲིན་ལས། ། སངས་རྒྱས་གཉིས་པ་པདྨ་ཀ་ར་ཡིས། ། ཐུན་མོང་སྣང་ངོར་ལྟ་ཕྲེང་ཙམ་ཞིག་གསུངས། ། སྐལ་ལྡན་རྣམས་ལ་སྒྲུབ་པ་སྡེ་བརྒྱད་སོགས། ། སྨིན་གྲོལ་གདམས་སྐོར་བསམ་མི་ཁྱབ་པ་སྩལ། ། མ་འོངས་འགྲོ་ལ་དགོངས་ཏེ་གཏེར་མང་སྦས། ། སྒོམ་གྲྭ་གསུམ་སོགས་གྲུབ་ཐོབ་བགྲང་ཡས་བྱུང༌། ། གངས་ཅན་མུན་པའི་གླིང་དུ་རྒྱལ་བསྟན་ཉིན་བྱེད་གསར་དུ་འདྲེན་པའི་ཤིང་རྟ་ཆེན་པོ་འཇམ་པའི་དབྱངས་ཁྲི་སྲོང་ལྡེའུ་བཙན་གྱིས་ཐུགས་བསྐྱེད་རྨད་དུ་བྱུང་ཞིང་གཞལ་དུ་མེད་པའི་བཀའ་དྲིན་ལ་བརྟེན་ནས། གྲུབ་པའི་སློབ་དཔོན་ཀུན་གྱི་གཙུག་རྒྱན། མགོན་པོ་འོད་དཔག་མེད་རྡོ་རྗེ་སློབ་དཔོན་གྱི་སྐུར་བཞེངས་པ་སངས་རྒྱས་གཉིས་པ་པདྨ་ཀ་ར་སོགས་སྐུ་གཅིག་ལ་མཚན་བརྒྱད་དུ་གྲགས་པ་དེ་བོད་ལ་དངོས་སུ་བྱོན་ནས་གདུལ་བྱ་ཐུན་མོང་བ་རྣམས་ཀྱི་སྣང་ངོར་བསམ་ཡས་སུ་མན་ངག་ལྟ་བའི་ཕྲེང་བ་ཙམ་ཞིག་གསུངས། ཐུན་མོང་མ་ཡིན་པའི་སྐལ་བ་དང་ལྡན་པ་རྗེ་འབངས་གྲོགས་ལྔ་ལ་སོགས་པ་རྣམས་ལ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་སྒྲུབ་གནས་ཆེན་པོ་ལྔ་གཙོ་བོར་གྱུར་པའི་གནས་རྣམས་སུ་སྒྲུབ་པ་སྡེ་བརྒྱད་ཞི་བ་དང་ཁྲོ་བོའི་སྒྲུབ་ཐབས་ལས་ཁ་ཚར་དང་བཅས་པ་བསམ་གྱིས་མི་ཁྱབ་པ་རྣམས་དང༌། འོད་གསལ་རྫོགས་པ་ཆེན་པོ་དམ་ཆོས་ཀུན་གྱི་ཡང་སྙིང་བཅུད་དུ་དྲིལ་བ་བླ་མ་ཞི་དྲག་གི་གདམས་སྐོར་ལ་སོགས་པ་སྨིན་གྲོལ་གྱི་གདམས་པ་བསམ་གྱིས་མི་ཁྱབ་པ་སྩལ། གདམས་ངག་ཕལ་མོ་ཆེ་དུས་སྐབས་དེར་སྤེལ་བའི་གནས་དང་དགོས་པ་མེད་པར་གཟིགས་ནས་མ་འོངས་པའི་འགྲོ་བ་མཐའ་ཡས་པ་ལ་དགོངས་ཏེ་ཕྱོགས་བཞི་དབུས་ལྔའི་གཏེར་ཁ་ཆེན་པོ་ལྔ་ཡིས་མཚོན། མིང་ཅན་བྱེ་བ། མིང་མེད་གྲངས་ལས་འདས་པ་སྦས་ཤིང་རྒྱ་རིམ་པ་བདུན་གྱིས་བཏབ། མཆིམས་ཕུ། ཡེར་པ། ཆུ་བོ་རི་སྟེ། སྒོམ་གྲྭ་ཆེན་པོ་གསུམ་བཙུགས། གཞན་ཡང་རྫུ་འཕྲུལ་གྱི་རོལ་(༡༧༦ན)པས་དབུས་གཙང་ཁམས་གསུམ་གྱིས་མཚོན་བོད་ཀྱི་ས་གནས་རྟ་རྨིགས་ཙམ་ཡང་མ་ལུས་པར་ཞབས་ཀྱིས་གཅགས་ཤིང་རི་བྲག་ཐམས་ཅད་སྒྲུབ་གནས་སུ་བྱིན་གྱིས་བརླབས། སྐལ་ལྡན་རྣམས་ལ་གདམས་པ་སྩལ་བས་མཆིམས་ཕུའི་གྲུབ་ཆེན་ཉེར་ལྔ། ཡང་རྫོང་གི་རྟོགས་ལྡན་ང་ལྔ། ཡེར་པ་དང་ཆུ་བོ་རིའི་འོད་ལུས་གྲུབ་པ་བརྒྱ་བརྒྱད་རེ། ཤེལ་བྲག་གི་སྔགས་པ་སུམ་བཅུ། འོད་སྐུར་གཤེགས་པའི་མཁའ་འགྲོ་ཉེར་ལྔ་སོགས་གྲུབ་པ་ཐོབ་པ་བགྲང་བ་ལས་འདས་པ་བྱུང་ངོ༌། ། ཏ༢ གཉིས་པ་[བཻ་རོ་]ནི། དཔལ་སེང་ཐུགས་བཅུད་བཻ་རོས་དཀའ་བས་བཞེས། ། རིམ་པ་ལྔ་དང་སྤང་སྟོན་ལས་མཆེད་དེ། ། སེམས་ཀློང་གདམས་པས་ཀུན་བཟང་རྒྱལ་སྲིད་བསྐྲུན། ། བོད་ཀྱི་སྐད་གཉིས་སྨྲ་བའི་ཐོག་མ་ལོ་ཆེན་བཻ་རོ་ཙ་ན་ཆོས་རྒྱལ་ཆེན་པོ་ཁྲི་སྲོང་གིས་རྒྱ་གར་ཡུལ་དུ་བརྫངས། དྷ་ན་ཀོ་ཤའི་ཙནྡན་བསིལ་བྱེད་ཀྱི་ནགས་ཀེའུ་ཚང་དགུ་བརྩེགས་ཀྱི་གནས་སུ་རིག་འཛིན་ཆེན་པོ་ཤྲཱི་སིཾ་ཧ་སྟེ་དཔལ་གྱི་སེང་གེ་དང་མཇལ། རྩོལ་མེད་ཀྱི་ཐེག་པ་ཞུས་པས་ཐུགས་ཀྱི་བཅུད་ཕྱུངས་ཏེ་རྫོགས་པ་ཆེན་པོ་སེམས་སྡེ་བཅོ་བརྒྱད། རྒྱུད་སྡེ་དྲུག་ཅུའི་དབང་མན་ངག་ཐམས་ཅད། ཀློང་སྡེ་དཀར་ནག་ཁྲ་གསུམ་སོགས་གནང༌། དེའང་ཤིན་ཏུ་མ་གསང་ན་རྒྱལ་པོའི་ཆད་པ་འོངས་ཀྱི་དོགས་པས་ཉིན་མོ་མཚན་ཉིད་ཀྱི་ཆོས་ལ་སྦྱངས། མཚན་མོ་ཐབས་དང་རྟེན་འབྲེལ་ལ་བརྟེན་ནས་ཞུས། ལམ་བར་དུའང་སྲོག་ལ་ཐུག་པའི་དཀའ་བ་ལྔ་བཅུ་སྤྱད་པ་སོགས་དཀའ་བ་ཆེན་པོ་དང་དུ་བཞེས། གཞན་ཡང་མཁས་པ་ཉི་ཤུ་རྩ་གཅིག་དང༌། དུ་བའི་གནས་ཀྱི་དུར་ཁྲོད་ཆེན་པོར་དགའ་རབ་རྡོ་རྗེ་དང་ཡང་མཇལ་ཏེ་རྫོགས་པ་ཆེན་པོ་འབུམ་ཕྲག་དྲུག་ཅུ་རྩ་བཞིའི་དོན་བརྒྱུད་ཐོབ་པས་དེ་ཉིད་དུ་རྟོགས་གྲོལ་དུས་མཉམ་གྱི་དངོས་གྲུབ་བརྙེས། རྐང་མགྱོགས་ཀྱི་གྲུབ་པ་ལ་བརྟེན་བོད་དུ་བྱོན་ནས་བཙད་པོ་ལ་ལྐོག་ཆོས་སུ་གསུངས་ཤིང་སེམས་སྡེ་སྔ་འགྱུར་ལྔ་བསྒྱུར། ཕྲ་མ་ལ་བརྟེན་རྒྱལ་མོ་ཚ་བ་རོང་དུ་ཕེབ་ནས་རྒྱལ་(༡༧༦བ)རོང་བྲག་ལ་མགོན་པོའི་དགོན་པར་གཡུ་སྒྲ་སྙིང་པོ། ཚ་རོང་སྟག་རྩེ་མཁར་དུ་གསང་སྟོན་ཡེ་ཤེས་བླ་མ། སྟོང་ཁུང་རོང་གི་བྲག་དམར་དགོན་རྫོང་དུ་སྤང་རྒན་སངས་རྒྱས་མགོན་པོ། དབུས་སུ་གཉགས་ཛྙཱ་ན་དང༌། ལི་བཟའ་ཤེས་རབ་སྒྲོན་མ་ལ་རྫོགས་པ་ཆེན་པོའི་ཆོས་གསུངས་པ་རྣམས་ལ་རིམ་པ་ལྔར་གྲགས་ཤིང༌། དེ་དག་དང་ཁྱད་པར་སྤང་རྒན་མི་ཕམ་མགོན་པོ་ལས་བརྒྱུད་ཅིང་རིམ་པར་མཆེད་དེ་སེམས་ཀློང་གི་གདམས་པས་ཀུན་ཏུ་བཟང་པོའི་རྒྱལ་སྲིད་མཐའ་ཡས་པ་བསྐྲུན་པར་མཛད་དོ། ། དེ་ལས་ད་ལྟ་སེམས་སྡེ་ཉང་ལུགས་དང༌། ཨ་རོ་ལུགས་སུ་གྲགས་པ་གཉིས་ཀྱི་རྒྱུད་བཞུགས་པའི་སྔ་མ་ནི་བཻ་རོས་གཉགས། དེ་ནས་རིམ་པར་བརྒྱུད་དེ་ཉང་ཡེ་འབྱུང་དང་ཟུར་པ་མེས་དབོན་སོགས་ལ་བཀའ་བབ་པའི་ཆོས་ཡིན་ལ། ཕྱི་མ་ནི་མདོ་ཁམས་སུ་སྤྲུལ་པའི་སྐུ་ཨ་རོ་ཡེ་ཤེས་འབྱུང་གནས་ཞེས་བྱ་བ་རྒྱ་གར་དང་རྒྱ་ནག་གི་སློབ་དཔོན་བདུན་བརྒྱུད་ཀྱི་ཟབ་ཆོས་མངའ་བ་དེ་ཉིད་ཀྱིས་སྤེལ་བའི་གདམས་པ་ཡིན་ནོ། ། སྤང་སྟོན་ལས་བརྒྱུད་པ་མང་པོའི་བར་དུ་འོད་ལུས་གྲུབ་པ་ཤ་སྟག་བྱུང་བའི་གདམས་པ་ནི་ཀློང་སྡེ་རྡོ་རྗེ་ཟམ་པའོ། ། ཏ༣ གསུམ་པ་[བི་མ་]ནི། བི་མ་ཉང་གི་མན་ངག་འོད་སྐུའི་བཙས། ། དེ་བསྟན་ཀློང་ཆེན་དགའ་རབ་གཉིས་པས་བརྡལ། ། པཎ་ཆེན་ལྔ་བརྒྱའི་གཙུག་རྒྱན་འཇའ་ལུས་རྡོ་རྗེའི་སྐུ་བརྙེས་པ་སློབ་དཔོན་བི་མ་ལ་མི་ཏྲ་བོད་དུ་བྱོན་ཏེ་ཉང་བན་ཤའི་སྤྱན་ཅན་ཏིང་འཛིན་བཟང་པོ་ལ་རྫོགས་པ་ཆེན་པོ་མན་ངག་སྡེའི་གདམས་པ་སྩལ་བས་ཉང་བན་ཀྱང་འོད་དུ་དེངས། གཡུ་སྒྲས་ལོ་ཙཱ་བྱས་སེམས་སྡེ་ཕྱི་འགྱུར་བཅུ་གསུམ་བསྒྱུར། ཉང་གིས་བཀའ་བརྒྱུད་སྦས་བློ་གྲོས་དབང་ཕྱུག་ལ་བཞག །དཔེ་བརྒྱུད་གཏེར་དུ་གདམས་པ་ལྡང་མ་ལྷུན་རྒྱལ་གྱིས་བཏོན་ཅིང་བཀའ་བརྒྱུད་ཀྱང་གསན་ནས་ལྕེ་བཙུན་ལ་དེ་དག་གི་མན་ངག་གནང་བས་ལྕེ་བཙུན་ཀྱང་འོད་སྐུར་གྲོལ། དེ་ནས་རྒྱལ་བ་ཞང་སྟོན་སོགས་རིམ་པར་བརྒྱུད་པ་ལ་བི་མ་སྙིང་ཏིག་ཏུ་གྲགས་པ་དང༌། པདྨ་ལས་འབྲེལ་གྱིས་(༡༧༧ན)པདྨའི་གདམས་ངག་མཁའ་འགྲོ་སྙིང་ཏིག་གཏེར་ནས་བཞེས་ཏེ་སྤྲུལ་སྐུ་རང་བྱུང་རྡོ་རྗེ་དང་ཤོའི་རྒྱལ་སྲས་ལེགས་པ་ལ་གནང༌། སྔ་མ་ནི། ཐལ་འགྱུར་ལས། ས་ལ་གནས་པའི་བྱང་སེམས་ཀྱིས། ། རྒྱ་མཚོའི་བར་དུ་སྤེལ་བར་བྱེད། ། ཅེས་ལུང་བསྟན་པ་ལྟར། ཛམ་གླིང་ཁྱབ་པར་སྤེལ་བའི་འཕྲིན་ལས་མཛད་ཅིང་ཀརྨ་སྙིང་ཏིག་ཅེས་གྲགས་པའི་ཟབ་ཆོས་དགོངས་པའི་ཀློང་ནས་ཕྱུངས། ཕྱི་མས་ཀུན་མཁྱེན་དྲི་མེད་འོད་ཟེར་ལ་གདམས། དེ་ཉིད་ཀྱིས་ཀུན་བཟང་དགོངས་པའི་ཀློང་ནས་བརྡོལ་བའི་བསྟན་བཅོས་བླ་མ་ཡང་ཏིག །ཟབ་མོ་ཡང་ཏིག །མཁའ་འགྲོ་ཡང་ཏིག །མཛོད་ཆེན་བདུན། ངལ་གསོ་སྐོར་གསུམ་རྩ་འགྲེལ་དང་བཅས་པ་སོགས་མཛད་ཅིང་བརྒྱུད་འཛིན་གྱི་སློབ་མ་ཁྱད་པར་ཅན་དུ་མ་བསྐྲུན་ཏེ། མདོར་ན། གདོས་བཅས་ཀྱི་ཕུང་པོ་འོད་སྐུར་སྐྲུན་པའི་བཙས་གསང་བ་སྙིང་ཏིག་གི་བསྟན་པ་ནི་ཀློང་ཆེན་རབ་འབྱམས་བཟང་པོ་ཞེས་དགའ་རབ་རྡོ་རྗེ་གཉིས་པར་བྱོན་པ་དེས་ཁྱབ་ཅིང་བརྡལ་བར་མཛད་དོ། ། ཏ༤ བཞི་པ་[གནུབས་ཆེན་]ནི། འདུས་པ་གཤེད་སྐོར་ལ་སོགས་གནུབས་ཆེན་པོས། ། རྒྱ་བལ་བྲུ་ཤའི་སློབ་དཔོན་བཞི་ལས་བླངས། ། མདོ་དགོངས་པ་འདུས་པ་སོགས་ཨ་ནུ་ལུང་གི་མདོ་བཞི་དང་དེའི་ལམ་རིམ་འདུས་པ་མདོའི་དབང་བཤད་མན་ངག་དང་བཅས་པ། གཤིན་རྗེ་གཤེད་ཕྱག་རྒྱ་ཟིལ་གྱིས་གནོན་པ་གཙོ་བོར་གྱུར་པའི་གཤེད་སྐོར་ལ་སོགས་གདམས་ངག་མཐའ་ཡས་པ་ནི་འོད་བྱེད་ཀྱི་ས་ལ་གནས་པ་གྲུབ་པའི་སློབ་དཔོན་གནུབས་སངས་རྒྱས་ཡེ་ཤེས་རིན་པོ་ཆེས་རྒྱ་གར་ཁྲག་འཐུང་ནག་པོ་དང་ཆོས་རྒྱལ་སྐྱོང༌། བལ་པོ་བ་སུ་བྷཱ་ཤ། བྲུ་ཤའི་སློབ་དཔོན་ཆེ་བཙན་སྐྱེས་སོགས་ལས་བླངས་ཏེ་སྤེལ་བ་ལས་སོ་ཡེ་ཤེས་དབང་ཕྱུག་སོགས་ཐུགས་ཟིན་གྱི་སྲས་བཞི། ཁྱད་པར་སྐུའི་སྲས་ཡོན་ཏན་རྒྱ་མཚོ་ལས་བརྒྱུད་ཅིང་འཕེལ། དྲག་སྔགས་ཕལ་མོ་ཆེ་ནི་གཏེར་དུ་སྦ་བར་མཛད་དོ། ། ཏ༥ ལྔ་པ་[རྨ་གཉགས་སོགས་]ནི། སྒྱུ་འཕྲུལ་ཡང་ཕུར་གཙོ་བོར་གྱུར་པའི་བཀའ། ། རྨ་གཉགས་གནུབས་གསུམ་(༡༧༧བ)ནམ་སྙིང་སོ་དང་ཉང༌། ། འཁོན་སྟོན་ལྷག་གཟིགས་རླངས་དང་འོ་བྲན་རྒྱུས། ། རོང་ཟུར་མྱོས་དཔྱལ་མཆིམས་སྐྱོ་གཡུང་ལ་སོགས། ། བཟང་ལ་བར་མ་ཆད་པའི་གྲུབ་པས་བསྐྱངས། ། སྒྱུ་འཕྲུལ་དང་ཡང་དག་ཕུར་པ་གཙོ་བོར་གྱུར་པའི་རྒྱུད་སྡེ་དང་སྒྲུབ་སྡེའི་བཀའ་ཕལ་མོ་ཆེ་ནི་ཐོག་མར་རྨ་ཐོག་རིན་ཆེན་གྱིས་གསང་སྙིང་རྒྱུད་བསྒྱུར་བཤད་མཛད་པས་མཚོན་མཁས་ཤིང་གྲུབ་པའི་སློབ་དཔོན་དུ་མས་ཉན་བཤད་སྒོམ་སྒྲུབ་ཀྱིས་གཏན་ལ་ཕབ་ཅིང་བསྟན་པ་བསྐྱངས་པ་ཡིན་ཏེ། དེའང་རྡོ་རྗེ་ཐེག་པའི་བསྟན་པ་ཐོག་མར་གཉགས་ལ་བབས། བར་དུ་གནུབས་ལ་བབས། ཐ་མ་ཟུར་ལ་བབས་ཞེས་གཏམ་དུ་གྲགས་པ་སྟེ། གཉགས་ཛྙཱ་ན་ཀུ་མཱ་ར་ལ་སློབ་དཔོན་པོ་པདྨ། བི་མ་ལ། བཻ་རོ། གཡུ་སྒྲ་སྙིང་པོ་སྟེ་བཀའི་ཆུ་བོ་བཞི་འདུས། དེའང་དཀྱུས་བཤད་གཞུང་གི་ཆུ་བོ་འགྲེལ་ཊཱིཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནད་ཡིག་དམར་ཁྲིད་དང་བཅས་པ། བྱིན་རླབས་དབང་གི་ཆུ་བོ་བསྐུར་ཐབས་ངོ་སྤྲོད་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་བཅས་པའོ། །དེ་ལ་སློབ་མའི་གཙོ་བོ་དཔལ་མཚན་བརྒྱད་དུ་གྲགས་པ་ལས་སོག་པོ་དཔལ་གྱི་ཡེ་ཤེས་ཀྱིས་གནུབས་ཆེན་སངས་རྒྱས་ཡེ་ཤེས་ལ་གདམས་པ་མཐའ་དག་སྩལ། ཡང་གནུབས་ནམ་མཁའི་སྙིང་པོ་རྒྱ་གར་དུ་བྱོན། གྲུབ་པའི་སློབ་དཔོན་ཧཱུྃ་ཀ་ར་ལས་ཡང་དག་གི་ཆོས་སྐོར་རྫོགས་པར་ཞུས། གཉིས་སུ་མེད་པའི་ཡེ་ཤེས་ཀྱི་སྐུ་གྲུབ། དེ་ལས་བརྒྱུད་དེ་ཡང་དག་སོ་ལུགས་ཀྱི་གདམས་པ་རྣམས་ཀྱང་ད་ལྟའི་བར་དུ་བྱུང་བ་དང༌། སོ་ཡེ་འབྱུང་གི་སློབ་མ་ཉང་ཤེས་རབ་མཆོག །དེའི་སློབ་མ་ཉང་ཡེ་ཤེས་འབྱུང་གནས། དེ་ལས་ལྷ་རྗེ་ཟུར་པོ་ཆེ་བྱོན་པ་དང༌། གཞན་ཡང་མཁོན་ཀླུའི་དབང་པོ་ལ་སློབ་དཔོན་ཆེན་པོས་སྩལ་བའི་གདམས་པ་རྣམས་ལས་ཡང་ཕུར་གཉིས་དཔལ་ལྡན་ས་སྐྱ་པ་ལས་ད་ལྟའི་བར་དུ་བརྒྱུད་པར་སྣང་བ་དང༌། གཞན་ཡང་། ལྷ་གཟིགས་རླངས་ཀྱི་གདུང་(༡༧༨ན)རིགས་ལས་བྱོན་པ་ཁམས་པ་གོ་ཆ་དང་དཔལ་གྱི་སེང་གེ་ཕྱི་མ། འོ་བྲན་དཔལ་གྱི་དབང་ཕྱུག །མཁར་ཆེན་དཔལ་གྱི་དབང་ཕྱུག །འབྲོག་མི་དཔལ་གྱི་ཡེ་ཤེས། གཉན་དཔལ་དབྱངས། སྣ་ནམ་རྡོ་རྗེ་བདུད་འཇོམས་སོགས་དུ་མ་སློབ་དཔོན་ཆེན་པོ་དེ་དག་གིས་རྗེས་སུ་བཟུང་ཞིང༌། རྙིང་མའི་གྲུབ་ཐོབ་རིག་འཛིན་བརྒྱུད་མར་