Tibetan
བཞིར་བསྡུས་པ་སྒོམ་པའི་ཚུལ་བརྗོད། སངས་རྒྱས་ཀྱི་གསུང་རབ་གང་ཡང་མི་སྤོང་བའི་ཐབས་བསྟན་པའོ། ། དེ་ལ་དེ་ཉིད་བཅུ་བཞི་ནི། གོས་སམ་གནས་དང་ཕྱག་རྒྱ་ལྔ་ལ་སོགས་པའི་དེ་ཉིད། ཤེས་རབ་ཀྱི་ཡན་ངག་གི་དེ་ཉིད། ཕུར་བུ་དང་གུར་གྱི་དེ་ཉིད། ཨཱ་ལིའི་དེ་ཉིད། ཀཱ་ལིའི་དེ་ཉིད། རྒྱུ་སོགས་སྟོང་པ་སྔོན་དུ་འགྲོ་བའི་དེ་ཉིད། འཇུག་པ་སྒྲ་ལ་སོགས་པའི་དེ་(༡༦༥ན)ཉིད། བསྡུས་པའི་སྦྱོར་བ་དང་ལྡན་པའི་དེ་ཉིད། བདུད་རྩིས་ཚིམས་པར་བྱེད་པའི་དེ་ཉིད། མྱ་ངན་ལས་འདས་པའི་དེ་ཉིད། ལག་མཆོད་ཀྱི་དེ་ཉིད། དབང་བསྐུར་བའི་དེ་ཉིད། གོ་ཆ་ཆེན་པོས་ཡང་དག་པར་སྲུང་བའི་དེ་ཉིད། སྔགས་རྣམས་ཀུན་གྱིས་མཆོད་པའི་དེ་ཉིད་རྣམས་སོ། ། དཔལ་འཁོར་ལོ་སྡོམ་པ་ཉིད་བཤེས་གཉེན་རྡོ་རྗེ་འཛིན་པའི་སྐུར་སྣང་བ་རྗེ་བཙུན་སྒྲོལ་བའི་མགོན་པོས་གོང་སྨོས་འཆད་བྱེད་གསུམ་དང༌། འཕགས་ཡུལ་གྲུབ་ཆེན་དངོས་ཀྱི་ཞལ་ལུང༌། གསང་བའི་གནས་རྣམ་པར་འབྱེད་པའི་མཁྱེན་རྟོགས་ཀྱི་རྩལ་ལས་ཟབ་མོའི་ལེགས་བཤད་ཀྱི་གཏེར་སྒོ་སྔོན་མེད་པ་དབྱེ་བར་མཛད་པ་ལྟར་ན། བརྗོད་བྱ་རྒྱུད་དོན་མངོན་པར་རྟོགས་པའི་སྡོམ་དུ་བསྟན། རྗོད་བྱེད་རྒྱུད་ཀྱི་ཚིག་དོན་དྲང་ངེས་ཀྱི་སྒོ་ནས་བཀྲོལ་བ་གཉིས་སུ་འདུས་ལ། དང་པོ་ལ་གསུམ། གཞིའི་གསང་བ་རྒྱུ་རྒྱུད། ལམ་གྱི་གསང་བ་ཐབས་རྒྱུད། འབྲས་བུའི་གསང་བ་འབྲས་རྒྱུད་བཤད་པའོ། ། དང་པོ་ལ་ལྔ། ཤྲཱི་ཧེ་རུ་ཀ་རྣམ་ཐར་སྒོ་བཞིའི་བདག་ཉིད། སྤྲོས་པ་དང་བྲལ་བའི་ཟུང་འཇུག །རྣམ་པ་ཐམས་ཅད་པར་སྡོམ་པ། ཁྱབ་ཅིང་རྟོགས་དཀའ་བ། གཞི་ཆོས་རྣམས་དེས་བསྡུས་པའི་ཚུལ་ལོ། ། གཉིས་པ་ལ་གསུམ། ལམ་གྱི་རྩ་བ་དམ་ཚིག །ལམ་དངོས་རིམ་པ་གཉིས། བོགས་འབྱིན་སྤྱོད་པ་རྣམས་སོ། ། དེའི་དང་པོ་ལ་གསུམ། དམ་ཚིག་མ་ཐོབ་པ་ཐོབ་པར་བྱེད་པ་དབང་བསྐུར་བ། ཐོབ་པ་མི་ཉམས་པར་བྱེད་པ། དམ་ཚིག་གི་ཚོགས་སྐྱོང་བའོ། ། གཉིས་པ་ལ། བསྐྱེད་རིམ་དང་། རྫོགས་རིམ་གཉིས། དང་པོ་ལ། དབྱེ་བ་རྒྱས་བསྡུས་ཅི་རིགས་སྤྲོས་པ་དང༌། གཉིས་པ་ལ། གང་ལ་སྒོམ་པའི་གཞི་རྩ་ཐིག་རླུང་གསུམ་གྱི་རྣམ་གཞག །བསྒོམ་བྱ་ཕྱག་རྒྱ་བཞིའི་དོན། རྫོགས་རིམ་གྱི་ངོ་བོ་ངོས་བཟུང་བ། དཔེ་དང་དོན་གྱི་ཁྱད་པར། ལམ་གྱི་རིམ་པ་ཇི་ལྟར་བགྲོད་པའི་ཚུལ་དང་ལྔ། གསུམ་པ་སྤྱོད་པ་ལ། སྤྱི་དང་། བྱེ་བྲག་གཉིས་སོ། ། གསུམ་པ་(༡༦༥བ)འབྲས་བུའི་རྒྱུད་ལ་གསུམ། ཞི་སོགས་ཀྱི་ལས། ཐུན་མོང་གི་དངོས་གྲུབ། ཕྱག་རྒྱ་ཆེན་པོ་མཆོག་གི་དངོས་གྲུབ་རྣམས་སུ་བསྟན་ཏོ། ། གཉིས་པ་རྗོད་བྱེད་ཚིག་གི་རྒྱུད་བཤད་པ་ལ་གསུམ། ལེའུ་དང་པོས་མདོར་བསྟན། ལེའུ་གཉིས་པ་ནས་ལྔ་བཅུ་པའི་ཕྱེད་ཡན་གྱིས་རྒྱས་པར་བཤད། དེ་ནས་གཞན་ཡང་བཤད་བྱ་བ། །ཞེས་པ་མན་ཆད་ལེའུ་ཕྱེད་དང་གཉིས་ཀྱིས་དོན་བསྡུ་བའོ། ། དང་པོ་ལ་བརྒྱད། གླེང་སློང་བའི་ཚུལ་གྱིས་དགོས་འབྲེལ་གྱི་ངག་བཀོད། གླེང་གཞིའི་ཕུན་སུམ་ཚོགས་པའི་སྒོ་ནས་འབྲས་བུའི་གསང་བ་གཙོ་བོར་འཆད། ཉན་པར་གདམས་པས་གཞི་དང་ལམ་གྱི་གསང་བ་གཙོར་བསྟན། རིགས་ལྡན་མ་མཆོད་པའི་ཆོ་ག་དང༌། ལམ་གྱི་གསང་བ་ངོས་བཟུང་བ། ལམ་གྱི་ཡན་ལག་དམ་ཚིག་གི་ཚོགས། ཕྱག་རྒྱ་བཞིའི་དོན། གནས་ཀྱི་ངེས་པ་བསྟན་པ་རྣམས་སོ། ། གཉིས་པ་ནི། སློབ་དཔོན་གྱི་མཚན་ཉིད་བསྟན་པ་ནས། དབང་གི་སྦྱིན་སྲེག་གི་བར་གྱིས་ཤིན་ཏུ་རྒྱས་པར་བཤད་ལ། གསུམ་པ་ནི། ལེའུ་ལྔ་བཅུ་པའི་ཕྱེད་ཕྱི་མས་ས་ལ་སོགས་པ་བསྟན། ལེའུ་ང་གཅིག་པ་བཤད་པར་དམ་བཅའ་བ་སྔོན་དུ་འགྲོ་བས། ལམ་གྱི་གསང་བ། གཞིའི་གསང་བ། དེ་ལ་འཇུག་པའི་སྒོ་བསྟན་པ་གསུམ་གྱིས་བསྡུས། དང་པོ་ལ། གསང་བ་དངོས་དེ་ཉིད་བཅུ་བཞི། དེའི་ཕན་ཡོན། བསྐྱེད་རིམ་གྱི་ཁ་སྐོང༌། དེ་ལ་དད་པར་གདམས་པ་བཞི་ལ་ནང་གསེས་ཀྱི་དབྱེ་བ་དང་བཅས་པས་བསྟན་ཅིང༌། དང་པོ་ལ། བསྐྱེད་རིམ་ཁོ་ནའི་དེ་ཉིད་དང་རྫོགས་རིམ་ཁོ་ནའི་དེ་ཉིད། རྒྱུད་དོན་ཡོངས་སུ་རྫོགས་པའི་དེ་ཉིད་ཀྱི་དབང་དུ་བྱས་པ་གསུམ་ལས་འདིར་ཕྱི་མ་ལྟར་འཆད་པར་མཛད་དོ། ། དགྱེས་རྡོར་མཚོ་སྐྱེས་ནག་པོ་མི་ཐུབ་ཟླ། ། རིན་འབྱུང་ནཱ་རོ་མཻ་ཏྲི་སྙན་གྲགས་བཟང༌། ། ཡོངས་རྫོགས་ལུགས་འདུན་འགྲེལ་བྱེད་བཅུ་གཉིས་གྲགས། ། མ་རྒྱུད་མཐར་ཐུག་དགྱེས་པ་རྡོ་རྗེ་ལ་འཕགས་ཡུལ་དུ་ལུགས་སྲོལ་མི་འདྲ་བ་མང་དུ་བྱུང་བའི་གཙོ་བོ་(༡༦༦ན)སློབ་དཔོན་མཚོ་སྐྱེས་རྡོ་རྗེ། ནག་པོ་དམ་ཚིག་རྡོ་རྗེ། མི་ཐུབ་ཟླ་བ། རཏྣཱ་ཀ་ར། ནཱ་རོ་པ། མཻ་ཏྲི་པ། ཁ་ཆེ་སྙན་གྲགས་བཟང་པོ་སྟེ་དབང་བཤད་མན་ངག་ཡོངས་སུ་རྫོགས་པའི་ལུགས་སྲོལ་བདུན། རྡོ་རྗེ་སྙིང་འགྲེལ་དང༌། དཀའ་འགྲེལ་པདྨ་ཅན་སོགས་འགྲེལ་བྱེད་བཅུ་གཉིས་བྱུང་བར་གྲགས་སོ། ། དེ་ལ་མཚོ་སྐྱེས་ནག་པོ་མི་ཐུབ་གསུམ་གྱི་ལུགས་ནི་ལམ་སྲོལ་རྐང་ཚུགས་པ་རེ་རེ་ཡིན་ལ། གཞན་རྣམས་ནི་དེ་དག་གི་ལེགས་ཆ་བསྡུས་པ་ལྟ་བུ་ཡིན་ཅིང༌། ཁ་ཆེ་སྙན་གྲགས་བཟང་པོ་ནཱ་རོ་པའི་མཚན་གྱི་རྣམ་གྲངས་སུ་བཞེད་པའང་སྣང་ངོ༌། ། བི་རཱུའི་བརྒྱུད་འཛིན་འབྲོག་འགོས་གྱི་ཇོ་ལུགས། ། ནཱ་རོའི་བརྒྱུད་སྲོལ་མར་སྟོན་དཔྱལ་དང་རམ། ། ཁྱད་འཕགས་མར་འབྲོག་མེ་རྔོག་ས་སྐྱ་པ། ། བསྟན་པའི་རྒྱལ་མཚན་སྲིད་མཐའི་བར་དུ་བསྒྲེངས། ། ལུགས་སྲོལ་དེ་དག་རྣམས་ལས་བོད་དུ་སློབ་དཔོན་བི་རཱུ་པའི་ལུགས་སྲོལ་ཌོམྦྷི་པ་སོགས་ཀྱི་བརྒྱུད་པ་འཛིན་པ། འབྲོག་མི་ཤཱཀྱ་ཡེ་ཤེས་ཀྱི་པཎྜི་ཏ་ག་ཡ་དྷ་ར་ལ་སོགས་པ་བསྟེན་ནས་དབང་བཤད་མན་ངག་བཅས་གསན་པ་ལས་ཉེ་བར་བརྒྱུད་དེ་རྗེ་བཙུན་ས་སྐྱ་པ་ཁུ་དབོན་སོགས་ལས་རྒྱ་ཆེར་མཆེད་པ་དང༌། མཚོ་སྐྱེས་དང་ཤཱནྟི་པའི་ལུགས་འགོས་ལྷས་བཙས་ཀྱིས་བྲམ་ཟེ་ནག་པོའི་ཞབས་སོགས་ལས་ཞུས་ཏེ་དར་བ་དང༌། གྱི་ཇོ་ཟླ་བའི་འོད་ཟེར་གྱིས་བསྒྱུར་བཤད་མཛད་པའི་ལུགས་རྣམས་དང༌། པཎ་ཆེན་ནཱ་རོ་པའི་བརྒྱུད་སྲོལ་ལྷོ་བྲག་མར་སྟོན་ཆོས་ཀྱི་བློ་གྲོས་ལས་བརྒྱུད་དེ་མེས་རྔོག་སོགས་ལས་དར་བ་དང༌། དཔྱལ་ལོ་བསོད་ནམས་རྒྱལ་མཚན་གྱིས་ཕམ་ཐིང་པ་ལས་ནཱ་རོའི་ལུགས་གསན་ནས་དར་བ་དང༌། རྔོག་གི་སློབ་བརྒྱུད་རམ་ལུགས་ཞེས་གྲགས་པ་དང༌། ཕྱིས་སུ་སྟག་ལུང་པ་ལ་བཀའ་བབས་པའི་དགྱེས་རྡོར་ཛྙཱ་ན་ལུགས་དང༌། རྗེ་བཙུན་ཐམས་ཅད་མཁྱེན་པ་ཏ་ར་ནཱ་ཐ་ལ་བཀའ་བབས་པའི་དགྱེས་རྡོར་ཞི་སྦས་ལུགས་རྣམས་གཙོ་བོར་གྱུར་པའི་བཀའ་སྲོལ་མང་དུ་བྱོན་པ་ལས། དབང་བཤད་མན་ངག་ཉམས་ལེན་གྱི་རྒྱུན་མ་(༡༦༦བ)ནུབ་པས་ཁྱད་པར་དུ་འཕགས་པ་ནི་ལོ་ཙཱ་བ་མར་འབྲོག་གཉིས་ལས་བརྒྱུད་པ་མེས་རྔོག་མཚུར་གསུམ། ས་སྐྱ་པ་བརྒྱུད་འཛིན་དང་བཅས་པས་དཔལ་དགྱེས་པ་རྡོ་རྗེའི་བཤད་སྒྲུབ་ཀྱི་བསྟན་པའི་རྒྱལ་མཚན་སྲིད་མཐའི་བར་དུ་བསྒྲེང་བ་ཡིན་ནོ། ། དེ་ལ་འབྲོག་མིའི་རྗེས་འབྲང་ས་སྐྱ་པ་ཡབ་སྲས་རྣམས་ལ་དགྱེས་རྡོར་ལུགས་སྲོལ་དྲུག་ཏུ་གྲགས་ཏེ། བིརྺ་པའི་མན་ངག་ལུགས། ཌོམྦིའི་ལུགས་སམ་འགྲེལ་པ་ལུགས། མཚོ་སྐྱེས་ལུགས། ནག་པོའི་ལུགས། ནཱ་རོ་མཻ་ཏྲིའི་ལུགས་སྲོལ་རྣམས་བཞུགས་པ་ལས་ཕྱི་མ་གཉིས་དེང་སང་བཀའ་ཆད་པས་ས་ལུགས་པ་ཕྱི་རབས་པ་རྣམས་ལ་བཀའ་བབ་བཞིར་གྲགས་སོ། ། རྩ་བཤད་ཀྱི་རྒྱུད་གཏན་ལ་དབབ་པ་ན། སྤྱི་དོན་དང་། གཞུང་དོན་གཉིས། སྤྱི་དོན་ལ། རྒྱུད་སྡེ་སྤྱིའི་རྣམ་པར་གཞག་པ། རྒྱུད་ཀྱི་མཚན་དོན་བསྟན་པ། རྒྱུད་བཤད་ཐབས་ཀྱི་མན་ངག་རྒྱུད་ཀྱི་མངོན་པར་རྟོགས་པ་སྟེ་ཚུལ་བཞིའི་སྒོ་ནས་བཤད། སྤྱིའི་རྣམ་པར་གཞག་པ་ལ། ཐོབ་བྱ་འབྲས་བུ་དང༌། འཐོབ་བྱེད་ལམ་གྱི་རྣམ་པར་གཞག་པ་གཉིས། རྒྱུད་ཀྱི་མཚན་དོན་ལ། བརྗོད་བྱ་དོན་དང་། རྗོད་བྱེད་སྒྲའི་རྒྱུད་བསྟན་པ་གཉིས། བཤད་ཐབས་ཀྱི་མན་ངག་ལ། གདམས་ངག་དྲུག་གིས་བཤད་པ། རྒྱུད་གསུམ་གྱིས་བཤད་པ། བདག་ཉིད་གསུམ་གྱིས་བཤད་པ། གནས་པ་བཞིས་བཤད་པ། དག་པ་གསུམ་གྱིས་བཤད་པ། གསང་བ་རྣམ་པ་བདུན་གྱིས་བཤད་པ་དང་དྲུག ། མངོན་རྟོགས་ལ། རྒྱུའི་རྒྱུད་སྔོན་དུ་འགྲོ་བ་རྟེན་གྱི་ངག་ཟག །དེས་ཉམས་སུ་བླང་བར་བྱ་བ་ཐབས་ཀྱི་རྒྱུད། དེ་ལས་བྱུང་བ་འབྲས་བུའི་རྒྱུད་གསུམ། དང་པོ་ལ། རྒྱུ། རིགས། སྤང་བྱ། རྐྱེན་ལ་ལྟོས་པ་སྟེ། ཆོས་བཞི། གཉིས་པ་ལ། སྤྱོད་པ་རིམ་པ་ཅན་ལ་ཆོས་བཅུ། ལྟ་བ་རིམ་པ་ཅན་ལ་བཞི། ཐུན་མོང་མ་ཡིན་པའི་རིམ་པ་ཅན་ལའང་བཞི། རབ་ལ་ཆོས་བདུན། ལམ་དངོས་གཞི་ལ་བཅུ་གཅིག །གནས་སྐབས་ཀྱི་འབྲས་བུ་ལ་ས་བཅུ་གཉིས། མཐར་ཐུག་གི་འབྲས་བུ་ལ་ཡན་ལག་ལྔ་སྟེ་མངོན་པར་རྟོགས་པ་ལྔ་བཅུ་རྩ་བདུན་གྱི་སྒོ་(༡༦༧ན)ནས་འཆད་པར་མཛད་དོ། ། ནཱ་རོ་མཻ་ཏྲིའི་རྗེས་འབྲངས་མངའ་བདག་མར་པའི་བཀའ་བརྒྱུད་པ་རྣམས་ལ་རྩ་བཤད་ཆ་མཐུན་དང་བཅས་པའི་དབང་བཀའ་བཞི། གུར་བརྟག་སཾ་གསུམ་གྱིས་བཤད་བཀའ། བསྲེ་འཕོའི་ཁྲིད་སོགས་བཞུགས་པ་ལས་དེང་སང་གུར་སཾ་གྱི་བཤད་པ་མེད། འདི་ལ་རྔོག་ལུགས། མེས་ལུགས། མཚུར་ལུགས་གསུམ། རྔོག་ལུགས་ལ་རམ་བཙན་ཅན་གྱི་རྒྱུན་ལ་རམ་ལུགས་ཞེས་ཟུར་དུ་དབྱེ་བ་བྱུང་ཞིང༌། རྩ་རྒྱུད་འཆད་པ་ན། བཀའ་སྤྱི་དང་བྱེ་བྲག་རང་མཚན་གྱིས་རྒྱུད་གང་གཏོགས་ངོས་བཟུང༌། མི་ཡུལ་དུ་གང་གིས་སྣང་ཞིང་ཇི་ལྟར་བརྒྱུད་ཚུལ་བཤད། རྒྱུད་ཀྱི་བརྗོད་བྱ་གཞི་ལམ་འབྲས་གསུམ་དུ་རྣམ་པར་བཞག་ཅིང་རྗོད་བྱེད་བཤད་ཐབས་ཀྱི་ཆིངས་སྟོན། ཕུན་སུམ་ཚོགས་པའི་གླེང་གཞི་སྔོན་དུ་འགྲོ་བའི་རྒྱུད་ཀྱི་འབྲུ་ནོན་ཐར་ཆགས་སུ་བཤད་པ་བཞིས་སྡུད་པར་མཛད་དོ། ། ད་ལྟ་དགྱེས་རྡོར་ཡབ་ཡུམ་རྩ་བཤད་བཅས་པའི་དབང་བསྐུར་ཟུར་བཀའ་བཅོ་ལྔ་ཙམ་དང་བཤད་རྒྱུན་ཁྲིད་སྲོལ་ཐམས་ཅད་མ་ཉམས་པར་བཞུགས་སོ། ། ད༢ གཉིས་པ་[རྟག་པའི་རིགས་]ནི། མཱ་ཡཱ་གདན་བཞི་སངས་རྒྱས་ཐོད་པ་ཡང༌། ། མར་ལོ་གྱི་ཇོའི་དྲིན་ལས་རིང་དུ་དར། ། མ་ཧཱ་མཱ་ཡཱ་ནི། རྒྱ་གར་དུ་སློབ་དཔོན་འདུལ་བས་བྱིན་དང་རིན་འབྱུང་ཞི་བ་ལ་སོགས་པའི་བཀའ་སྲོལ་རྣམ་གྲངས་འགའ་ཞིག་བཞུགས་པའི་རྒྱུན་འགོས་ལོ་དང་ཇོ་བོ་རྗེ་གཉིས་ཀྱིས་འགྱུར་བཤད་དར་བར་མཛད་ཀྱང་ད་ལྟ་རྒྱུན་མི་སྣང་ལ། རྗེ་མར་པས་ཞི་བ་བཟང་པོ་ལ་གསན། དབང་བཤད་མན་ངག་བཅས་བྱུང་བའི་དབང་ཁྲིད་དང་རྒྱུད་འགྲེལ་ཇོ་ནང་རྗེ་བཙུན་ཆེན་པོས་མཛད་པ་ལས་ཁྲིད་ལུང་ཙམ་བཞུགས། རྟགས་པའི་རིགས་རྡོ་རྗེ་གདན་བཞི་ནི་རྒྱ་གར་དུ་རྩ་རྒྱུད་ལ་བརྟེན་པ་ཨཱརྱདེ་བའི་ལུགས་དང་བསྡུས་རྒྱུད་ལ་བརྟེན་པ་སློབ་དཔོན་བྷ་བ་བྷ་དྲའི་ལུགས་གཉིས་བྱུང༌། བོད་དུ་པཎྜི་ཏ་སྨྲྀ་ཏིའི་རང་འགྱུར་གྱི་སྐོར་འགོས་ཁོག་པའི་ལུགས། ག་ཡ་དྷ་ར་དང་འབྲོག་མི་དཔོན་སློབ་ཀྱིས་ཀྱང་འགྱུར་བཤད་མཛད་པ་ལས། གཙོ་བོར་(༡༦༧བ)རྗེ་མར་པས་ཌཱ་ཀི་མ་མི་རུས་ཀྱི་རྒྱན་ཅན་སོགས་ལས་གསན་ཏེ་དབང་བཤད་མན་ངག་ཆ་ཚང་བར་བྱུང་བ་ལས་ད་ལྟའང་དབང་དང་ཁྲིད་རྒྱུན་མ་ཆད་པར་བཞུགས། སངས་རྒྱས་ཐོད་པ་གྲུབ་ཆེན་ས་ར་ཧའི་མན་ངག་ལུགས་དང༌། སློབ་དཔོན་ཨ་བྷ་ཡའི་ལུགས་གཉིས་ཀ་བོད་དུ་གྱི་ཇོ་ལོ་ཙཱ་བ་དང་སྒྲོད་ཞོ་གསལ་བ་གྲགས་རྣམས་ཀྱིས་བསྒྱུར་བཤད་མཛད་ཀྱང་ད་ལྟ་མར་པ་ལས་བརྒྱུད་པའི་དབང་རྒྱུན་ཙམ་བཞུགས། དེ་དག་གི་རྒྱུད་གསར་མ་རྒྱུད་འབུམ་གྱི་ཁྲོད་ན་གང་བཞུགས་རྣམས་ཀྱང་ལུང་རྒྱུན་ཡོད་དེ་མདོར་ན་ལོ་ཙཱ་བ་དེ་དག་གི་བཀའ་དྲིན་ལས་རྒྱུད་སྡེ་མང་པོའི་དབང་བཤད་གདམས་ངག་བཅས་ཡུན་རིང་པོའི་བར་དུ་དར་ཞིང་དེ་ལས་གྲུབ་པ་ཐོབ་པའང་མཐའ་ཡས་པ་བྱོན་མོད། ད་ལྟ་ནི་བཤད་སྒྲུབ་ཀྱི་ཉག་ཤིན་ཏུ་ཕྲ་བས་བསྟན་པ་ལ་དགོངས་པ་རྣམས་ཀྱིས་འབད་པ་ཆེན་པོས་ཆོས་ཟབ་མོ་འདི་དག་གི་རྒྱུན་འཛིན་པ་ལ་བརྩོན་པ་ཅི་ནས་ཞུའོ།། གཞན་ཡང་། རྟའི་རྒྱལ་པོའི་རིགས་སྒྲོལ་མ་འབྱུང་བ་དོན་དམ་པའི་རྒྱུད་ལ་ལཱི་ལ་བཛྲ་དང་ལོ་ཀ་པྲ་དའི་ལུགས་གཉིས་བྱུང༌། དབང་རྒྱུད་བཤད་མན་ངག་བཅས་གྲུབ་ཆེན་ཞི་སྦས་ཞབས་ལས་བརྒྱུད་དེ། རྗེ་བཙུན་ཏཱ་ར་ནཱ་ཐས་བསྒྱུར་བཤད་མཛད་པས། དེང་སང་དབང་དང་མན་ངག་བཤད་ལུང་གི་རྒྱུན་ཙམ་བཞུགས་སོ། །འདིར་རྟག་པའི་རིགས་གདན་བཞི་ཁོ་ན་ཡིན་ཀྱང་ཚིགས་བཅད་ཀྱི་དབང་གིས་ཞར་ལས་སྟོན་པའོ། ། ད༣ གསུམ་པ་[རྡོ་རྗེ་སེམས་དཔའི་རིགས་]ནི། དུས་འཁོར་གྱི་ཇོ་ཙ་མི་རྭ་འབྲོ་གཉིས། ། པཎ་ཆེན་ཆག་དཔྱལ་རོང་ལུགས་མང་བྱོན་པའི། ། སྒྲུབ་དང་བཤད་བཀའ་ཇོ་ཞལ་གཉིས་ལ་བབས། ། རྒྱུད་བཤད་སྲོག་རྩ་བུ་སྟོན་ཆེན་པོས་མཐུད། ། དུས་འཁོར་རྒྱ་གར་ཡུལ་དུ་ཤིན་ཏུ་དར་ཡང་། རྒྱུད་དང་འགྲེལ་པ་གཉིས་ཀ་ཞལ་ཤིན་ཏུ་གསལ་བས་ལུགས་སྲོལ་མི་འདྲ་བ་མེད། སློབ་དཔོན་དུས་ཞབས་པ་ཆེན་པོ་འཇམ་པའི་རྡོ་རྗེ་དང༌། སློབ་དཔོན་ཙི་ལུ་པ་དང༌། པི་ཊོ་ཨཱ་ཙརྱགསུམ་སོ་སོས་རེ་རེ་ཞིང་ཤམྦྷ་ལ་ནས་སྤྱན་དྲངས་པ་ལ་ཤོ་ལོ་ཀ་རེ་རེ་གཉིས་གཉིས་མང་ཉུང་ཡོད་ཟེར། (༡༦༨ན) བོད་དུ་ཐོག་མར་པཎྜི་ཏ་ཤྲཱི་བྷ་དྲ་བོ་དྷི་དང༌། གྱི་ཇོ་ལོ་ཙཱས་རྒྱུད་འགྲེལ་བསྒྱུར་ནས་དབང་བཤད་མན་ངག་གི་སྲོལ་བཏོད་པ་ཕྲོམ་ལོ་ཙཱ་བ་སོགས་ལས་བརྒྱུད་པ་གྱི་ཇོ་ལུགས། ཙ་མི་སངས་རྒྱས་གྲགས་ཀྱིས་དུས་ཞབས་པ་ལས་གསན་ཏེ་འགྲེལ་ཆེན་བསྒྱུར་ནས། རྒ་ལོ་སོགས་སློབ་མ་རྣམས་ལ་བཤད་པ་ཙ་མི་ལུགས་དང༌། རྭ་ཆོས་རབ་ཀྱིས་བལ་པོ་པཎྜི་ཏ་ས་མནྟ་ཤྲཱི་ལས་རྒྱུད་འགྲེལ་གསན་ནས་བསྒྱུར་བ་ལས་རྭ་ཡེ་ཤེས་སེང་གེ་སོགས་ལ་མཆེད་པ་རྭ་ལུགས་དང༌། འབྲོ་ལོ་ཙཱ་བས་ཁ་ཆེ་ཟླ་བ་མགོན་པོ་བསྟེན་ནས། མཆོག་མི་འགྱུར་གྱི་ལེའུ་མ་གཏོགས་རྒྱུད་འགྲེལ་རྫོགས་པར་བསྒྱུར། དབང་བཤད་མན་ངག་དང་བཅས་པ་མནོས། ཕྱིས་པཎྜི་ཏས་མཆོག་མི་འགྱུར་ལ་རང་འགྱུར་མཛད། པཎ་ཆེན་ལ་འཕན་ཡུལ་གྲུབ་སྒོམ་གྱིས་ཐུག་སྟེ། དུས་འཁོར་ལ་མཁས་གྲུབ་གཉིས་ལྡན་དུ་གྱུར། དེས་སྒྲོ་སྟོན་ལ་བཤད་པ་སོགས་ནས་དར་བ་འབྲོ་འགྱུར་གྱི་སྟེང་ནས་བཤད་པ་བྱེད་པའི་སྲོལ་ཡོད་པས་འབྲོ་ལུགས་དང༌། གཞན་ཡང་། ཁ་ཆེ་པཎ་ཆེན་ཤཱཀྱ་ཤྲཱིས་ཆག་དགྲ་བཅོམ་དང་དཔྱལ་ཆོས་ཀྱི་བཟང་པོ་ས་སྐྱ་པཎ་ཆེན་གསུམ་ལ་གནང་བའི་ལུགས་སྲོལ་གསུམ་དང༌། རོང་གླིང་ལོ་ཙཱ་བ་རྡོ་རྗེ་དབང་ཕྱུག །སྟེང་ལོ་ཚུལ་ཁྲིམས་འབྱུང་གནས། ཤེའུ་ལོ་ཙཱ་དང༌། སེ་ལོ་གཞོན་ནུ་ཚུལ་ཁྲིམས་སོ་སོས་ཀྱང་ཙ་མི་དང་ཨ་བྷ་ཡ་སོགས་ལ་ཞུས་ཏེ་སྤེལ་ཞིང་སྔ་མས་རོང་གླིང་སོག་ཀ་ཞེས་པའི་དགོན་བཏབ། ཆག་ལོ་ཆོས་རྗེ་དཔལ་གྱིས་རཱ་ཧུ་ལ་ཤྲཱི་བྷ་དྲ་དང་ཛི་ན་རཀྵི་ཏ་སོགས་ལས་དབང་བཤད་མན་ངག་ཆ་ཚང་བ་ཞུས་པ་ལས་ཚག་ལུགས་དང༌། པཎ་ཆེན་བི་བྷཱུ་ཏི་ཙནྡྲས་བོད་ཀྱི་དགེ་བའི་བཤེས་གཉེན་དུ་མ་ལ་དབང་རྒྱུད་བཤད་ཁྲིད་བཅས་གནང༌། ཁྱད་པར་ཀོ་བྲག་པ་སོགས་སློབ་མ་དམ་པ་དགུ་ལ་ཤ་བ་རིའི་ཉེ་བརྒྱུད་ཀྱི་སྦྱོར་ཟུག་གནང་བ་སོགས་ལུགས་སྲོལ་མང་དུ་བྱོན་ཅིང་རྒྱུད་ཀྱི་འགྱུར་འགོ་མི་གཅིག་པ་རང་ཡང་ཉེར་བཞི་ཙམ་ཡོད་པར་གྲགས་པ་ལས། རྭ་འབྲོ་(༡༦༨བ)ཆག་གསུམ་ཙ་མི་དང་པཎ་ཆེན་བི་བྷཱུ་ཏི་ཙནྡྲའི་ལུགས་བཅས་ལ་དབང་བཤད་མན་ངག་གི་བཀའ་ཚང་བར་བཞུགས། ལུགས་དེ་དག་ཕལ་ཆེར་ཀུན་མཁྱེན་རང་བྱུང་ཞབས་ཀྱིས་སྙེ་མདོ་ཀུན་དགའ་དོན་གྲུབ་ལས་གསན་ཏེ་སྤེལ་བ་སོགས་དར་རྒྱས་སུ་བྱུང༌། ཁམས་ལེའི་དོན་རྩིས་ཀུན་བསྡུས་པ། ནང་ལེའི་དོན་ཟབ་མོ་ནང་དོན། དབང་ལེ་དང་སྒྲུབ་ལེའི་དོན་དབང་དང་སྒྲུབ་ཐབས། ཡེ་ལེའི་དོན་རྣལ་འབྱོར་གསུམ་གྱི་སྙིང་པོ་གསལ་བ་བཅས་མཛུབ་ཁྲིད་ལུང་རྒྱུན། རྫོགས་རིམ་ཡན་ལག་དྲུག་པའི་ཁྲིད་རྒྱུན་བར་མ་ཆོད་པས་དོན་གྱི་བཤད་རྒྱུན་ཀྱང་ད་ལྟའི་བར་དུ་བཞུགས་པ་ཡིན་ཀྱང༌། གཙོ་བོར་འབྲོ་ལུགས་སྒྲུབ་པ་ཉམས་ལེན་དང༌། ར་ལུགས་རྒྱུད་ཀྱི་བཤད་པའི་བཀའ་བབ་ཡིན་པས་དེ་དག་སོ་སོའི་རྒྱུན་ཇོ་ཞལ་གཉིས་ལ་སོ་སོར་བབས་པ་ལྟར་སྣང་ཞིང༌། དེ་ལས་ཀྱང་རྒྱུད་བཤད་ནི་ཇོ་ནང་ཆོས་རྗེ་ཀུན་མཁྱེན་ཆེན་པོས་ཀྱང་བརྩོན་པས་འཆད་སྤེལ་མཛད་ཅིང་རང་འདྲའི་སློབ་མ་བཅུ་བཞི་ཕལ་མོ་ཆེས་རྒྱུན་བཟུང་ཡང་དེང་སང་མི་བཞུགས་ལ། བུ་སྟོན་རིན་པོ་ཆེས་རྭ་པའི་བཤད་རྒྱུན་ལས་གསན་ཅིང་རྒྱུད་བཤད་ལན་གྲངས་སུམ་ཅུ་རྩ་གཉིས་ཙམ་མཛད། རྒྱུད་ལ་ཕྱག་མཆན་བཏབ་པ་ལ་སྐྱོར་བ་དོན་ཡོད་དཔལ་བས་མཆན་སྦྱོར་མཛད་པ་དང༌། བཤད་ཐབས་རིན་ཆེན་གཅེས་པའི་ལྡེའུ་མིག་དང༌། ངེས་དོན་སྙེ་མ། བཤད་སྦྱར་ཟབ་དོན་སྙིང་པོ་སྣང་བའི་འོད་ཟེར། ས་བཅད་དྲི་མེད་འོད་རྒྱན། རྩིས་ཀྱི་བསྟན་བཅོས་མཁས་པ་དགའ་བྱེད་ཡན་ལག་བཅས། ཐུགས་སྲས་ལོ་ཙཱའི་ཟིན་བྲིས་སོགས་ལ་བརྟེན་ཏེ་བཤད་རྒྱུན་ཞྭ་ལུ་རང་ལུགས་ད་ལྟའི་བར་མ་ཆད་པར་བཞུགས། བུ་སྟོན་སློབ་མ་གང་གསུམ་པ་བདེ་ཆེན་ཆོས་ཀྱི་དཔལ་བ་ལས་རྗེ་རིན་པོ་ཆེས་གསན། བཤད་རྒྱུན་ལན་ཅིག་ཁོ་ནར་སྤེལ་བའི་སྐབས་སྡེ་སྣོད་འཛིན་པ་མཐའ་ཡས་པ་འདུས་ཤིང་འགྲེལ་ཆེན་བྱེད་པའང་གསུམ་ཙམ་བྱུང་བ་ལས། མཁས་གྲུབ་དགེ་ལེགས་དཔལ་བའི་ཊཱི་ཀའི་གཤམ་ཞང་ཞུང་པ་ཆོས་དབང་(༡༦༩ན)གྲགས་པས་མཐུད་པ་ལས་འཆད་ཉན་གྱི་རྒྱུན་ད་ལྟའང་བཞུགས་ལ། ཇོ་ཞལ་གྱི་དབང་བཀའ་མན་ངག་ཟབ་ཅིང་རྒྱས་པའི་སྐོར་རྣམས་ཀྱང་རྒྱུན་མ་ཆད་པར་མཆིས་སོ། ། དེ་ལ་རྒྱུད་ཀྱི་རྒྱལ་པོ་འདི་འཆད་པ་ན། བཤད་བྱའི་དོན། འཆད་བྱེད་ཀྱི་ཚིག །ཇི་ལྟར་འཆད་པའི་ཚུལ་གསུམ་གྱིས་སྤྱིར་བསྟན། ཕྱི་མ་ལ། བཤད་ཐབས་ཀྱི་ཡན་ལག་དང་། འཆད་པར་བྱ་བ་གཉིས། དང་པོ་ལ། སྟོན་པ་སངས་རྒྱས་བྱོན་ཚུལ། དེས་ཐེག་པ་སྤྱི་དང་བྱེ་བྲག་དུས་ཀྱི་འཁོར་ལོ་གསུངས་ཚུལ། དེ་གང་ལས་བརྒྱུད་པའི་ལོ་རྒྱུས། དེ་ཉིད་འཆད་ཉན་བྱ་བའི་ཚུལ་བཞིས་འཆད། གཉིས་པ་ལ། འཆད་པ་པོ་སློབ་དཔོན། ཉན་པ་པོ་སློབ་མ། འཆད་ཉན་ཇི་ལྟར་བྱ་བའི་ཚུལ་གསུམ་སྔོན་དུ་འགྲོ་བས། འཆད་བྱེད་རྒྱུད་འགྲེལ་ཆེན་མོ་དངོས་ལ་ལྔ་ཆོས་རྣམས་དག་པའི་ལེའུ་ལྔ། དཔེ་བྱད་དག་པའི་གནས་པ་བརྒྱད་ཅུ་རྩ་གཅིག་བཞུགས་པ་ལས། ལེའུའི་དབང་དུ་བྱས་ན། དང་པོ་འཇིག་རྟེན་ཁམས་ལེར་རྣམ་བཅུ་དབང་ལྡན་དུ་དག་པའི་མདོར་བསྡུས་བཅུ་ཡི་དང་པོ་དྲུག་གིས་རྒྱུད་སྤྱི་ལ་ཁྱབ་བྱེད་ཀྱི་བཤད་པ་བསྟན། འཕྲོས་བཞི་པོས་ཁྱབ་བྱ་རྒྱུད་དོན་ཕྱི་དུས་ཀྱི་འཁོར་ལོའི་ཚུལ་འཆད། གཉིས་པ་ནང་ལེ་ལ་