Tibetan
ཐོབ་པའང་མང་མོད་ནུས་པའི་སྒོ་ནས་མངོན་སྤྱོད་དྲག་ཤུལ་གྱི་སྦྱོར་བ་གཙོ་བོར་བྱེད་པ་བྲམ་ཟེ་ཙ་ན་ཀ་སོགས་འདི་དུས་བྱུང༌། བཞི་པ་ངེས་པ་ལ་སྤྱོད་པ་ནི་སློབ་དཔོན་ལ་ལི་ཏ་བཛྲ་ནས་ཀ་མ་ལ་རཀྵི་ཏའི་བར་ཡིན་ཏེ་བསྐྱེད་རིམ་ཕྲིན་ལས་དང་བཅས་པ་ལ་ངེས་པར་སྤྱོད་ཅིང་གྲུབ་པའོ། ། དུས་ལྔ་པ་ཆ་ཤས་ལ་སྤྱོད་པ་ནི། དེ་ནས་བརྩམས་ཏེ་ད་ལྟའི་བར་ཡིན་ལ་འཕགས་ཡུལ་དུ་མཁས་པ་སྒོ་དྲུག་ནས་ཨ་བྷ་ཡའི་དུས་ཀྱི་བར་ལོ་བརྒྱ་ཙམ་ལ་དར་ཞིང་ལས་གྲུབ་པ་མྱུར། དེ་ནས་གཤིན་རྗེ་གཤེད་དམར་དར་ཞིང་འཇིགས་མཛད་ཀྱི་ཆོས་སྐོར་ནུབ་པ་ནས་ཡུལ་དབུས་སུ་ཀླ་ཀློ་ཞུགས་པ་འདྲ་ཞིང་བྱུང་བས་ཀླ་ཀློའི་གཉེན་པོ་མཆོག་ཀྱང་སྤྱིར་ཁྲོ་རྒྱལ་ཡ་མཱནྟ་དང་སྒོས་རྡོ་རྗེ་འཇིགས་མཛད་ཆེན་པོ་ཉིད་ཡིན་ནོ། ། ལ་ལི་ཏ་དང་ཡེ་ཤེས་དཔལ་འཛིན་གསུམ། ། དང་པོ་བར་དང་ཐ་མའི་བཀའ་བབས་ཤིང༌། ། དཀྱིལ་འཁོར་ཆེན་པོའི་རྡོ་རྗེ་སློབ་དཔོན་ནོ། ། དེ་ལྟར་དུས་ཀྱི་རིམ་པ་ལྔར་དར་ཡང་ཐུན་མོང་གི་གདུལ་བྱའི་སྣང་ངོར་རྒྱུད་ཀྱི་དབང་བཤད་དངོས་སུ་དར་བར་མཛད་པ་ནི་དང་པོར་སློབ་དཔོན་ལ་ལི་ཏ་བཛྲ་དང༌། བར་དུ་སངས་རྒྱས་ཡེ་ཤེས་ཞབས་དང༌། མཐར་བྲམ་ཟེའི་སློབ་དཔོན་དཔལ་འཛིན་གསུམ་ལ་རིམ་བཞིན་དང་པོ། བར་པ། ཐ་མའི་ཚུལ་དུ་གཤིན་རྗེ་གཤེད་པོའི་བཀའ་བབས་ཤིང༌། དེ་གསུམ་ནི་དཀྱིལ་འཁོར་ཆེན་པོའི་རྡོ་རྗེ་སློབ་དཔོན་ཞེས་མཚན་གསོལ་ཏོ། ། ཁྱད་པར་གཤེད་སྐོར་ཀུན་འདུས་དཔལ་འཛིན་སོགས། ། རིམ་བརྒྱུད་ལྗོངས་འདིར་སྔགས་རྒྱུད་ཐོག་མར་བྱུང༌། ། ཁྱད་པར་གཤེད་སྐོར་དམར་ནག་འཇིགས་གསུམ་གྱི་རྒྱུད་དང་མན་ངག་གི་ཆུ་བོ་ཀུན་འདུས་པ་སློབ་དཔོན་ཆེན་པོ་དཔལ་འཛིན་སོགས་རིམ་པར་བརྒྱུད་དེ་བོད་ཡུལ་དུའང་ཅི་རིགས་པར་བྱུང་ཞིང༌། ལྗོངས་འདིར་སྤྲུལ་པའི་རྒྱལ་པོ་སྲོང་བཙན་སྒམ་པོས་སྒྲུབ་ཐབས་མཛད་པར་གྲགས་པས་སྔགས་བྱུང་བའི་སྔ་ཤོས་ཡིན། རབ་ཏུ་བྱུང་བའི་སྡེ་དར་ཙམ་ན་གཤིན་རྗེ་གཤེད་རྣམ་པར་རྒྱལ་བའི་(༡༦༡ན)རྒྱུད་བསྒྱུར། དབང་བཤད་མན་ངག་ལག་ལེན་བཅས་བྱུང༌། གནུབས་ཆེན་སངས་རྒྱས་ཡེ་ཤེས་ཀྱིས་གཤིན་རྗེ་གཤེད་ཀྱི་ཆོས་སྐོར་མཐའ་ཡས་པ་སྤེལ་བས་རིག་སྔགས་གྲུབ་པ་དུ་མ་བྱོན་པས་མཚོན་སྔགས་རྒྱུད་རྣམས་ཀྱི་ཐོག་མ་ལྟ་བུར་བྱུང་ངོ༌། ། ཕྱི་དར་ཅོག་གྲུ་ནག་ཚོ་རོང་ཟོམ་དཔྱལ། ། རྭ་སྐྱོ་ཞང་གཉོས་རྣམས་ལས་འཇམ་དཔལ་དངོས། ། རྭ་པའི་ལུགས་ཉིད་བཤད་སྒྲུབ་བླ་ན་འཕགས། ། བསྟན་པ་ཕྱི་དར་ལ་དང་པོ་ཅོག་གྲུ་ལོ་ཙཱ་བ་ཤེས་རབ་བླ་མས་གཤིན་རྗེ་གཤེད་ནག་གི་རྒྱུད་དང༌། འཇིགས་བྱེད་རྟོག་བདུན་གཉིས་དང༌། འཇིགས་བྱེད་ཞེ་དགུ་མའི་སྒྲུབ་ཐབས་སོགས་བསྒྱུར། དགྲ་གདོང་འཇིགས་གསུམ་གྱི་དབང་དང་བཤད་པའང་དར་བར་མཛད། ནག་ཚོ་ལོ་ཙཱས་ཀྱང་ཇོ་བོ་དང་དམ་ཚིག་རྡོ་རྗེ་སོགས་ལ་གསན་ཏེ་རྒྱུད་འགྲེལ་བསྒྱུར། དབང་བསྐུར་བ་དང་རྒྱུད་བཤད་པ་སོགས་ལས་ཀྱང་མང་དུ་མཆེད། རོང་ཟོམ་ཆོས་བཟང་གིས་ཨུ་པ་ཡ་ཤྲཱི་མི་ཏྲ་ལ་བསྟེན་ཏེ་ནག་འཇིགས་གཉིས་ཀྱི་རྒྱུད་སོགས་བསྒྱུར་ནས་བཤད་པའང་མཛད་དོ། ། གཞན་ཡང་གཉོས་དང་རྭ་ལོ་དང་ཤུད་ཀེ་ལོ་ཙྭ་སོགས་མང་པོས་དམར་ནག་འཇིགས་གསུམ་སོགས་ཀྱི་རྒྱུད་གཞུང་མན་ངག་དུ་མ་གསར་དུ་སྒྱུར་བ་དང༌། འགྱུར་བཅོས་མཛད་པ་སོགས་ཤིན་ཏུ་མང་ཞིང༌། ཁྱད་པར་སྲོལ་ཆེན་གཏོད་པ་པོ་ནི་དཔྱལ་ལོ་སོགས་བཞི་དང༌། རྭ་སྐྱོ་ཞང་གསུམ་དང༌། གཉོས་ཏེ་བརྒྱད་ཡིན་པ་ལས། སྔ་མ་ནི་གཤེད་དམར་ནག་གི་སྐོར་ཏེ་དཔྱལ་ལོ་ཆོས་དཔལ་བཟང་པོས་ནིཥྐ་ལངྐ་ལ་ཞུས་ནས་བོད་དུ་དར་བ་དང༌། དཱ་ན་ཤཱི་ལས་ས་སྐྱ་པཎ་ཆེན་ལ་གནང་བ་དང༌། ཆགས་ལོས་ཀྱང་བི་རཱུ་པའི་གཞུང་སོགས་བསྒྱུར་ཅིང་བསྟན་པ་དང༌། གློ་བོ་ལོ་ཙཱས་དརྤཎ་ཨཱ་ཙརྱསོགས་ལས་གསན་ཅིང་སྤེལ་བ་རྣམས་ཏེ། དེ་དག་གི་རྒྱུན་ལས་གཤེད་དམར་གྱི་སྐོར་རྣམས་ཀྱི་དབང་ཁྲིད་མན་ངག་དང་བཅས་པ་བྱུང་བ་ཡིན་ནོ། ། རྭ་ལུགས་ནི། རྭ་ལོ་རྡོ་རྗེ་གྲགས་ཀྱིས་བལ་པོ་འབའ་རོ་ཕྱག་ཌཱུ་མ་དང༌། མེ་ཙ་ལིང་པ་གཉིས་བསྟེན་ནས་རྡོ་རྗེ་འཇིགས་བྱེད་ཀྱི་དབང་(༡༦༡བ)རྒྱུད་མན་ངག་དང་བཅས་པ་གསན། ཁྱད་པར་བལ་པོ་ཐུགས་རྗེ་ཆེན་པོ་ལ་དགྲ་གདོང་འཇིགས་གསུམ་སོགས་ཀྱི་སྐོར་རྫོགས་པར་གསན། བོད་དུ་ཆོས་འཁོར་ཆེན་པོ་མཛད་ཅིང༌། གཤེད་སྐོར་གནང་བའི་སློབ་མ་ཁོ་ནའང་ཉིས་སྟོང་བྱུང་བར་གྲགས། གཙོ་བོར་རྭ་ཆོས་རབ་སོགས་ཏེ། དེ་དག་ལས་མཆེད་པའི་ཚུལ་ནི་སྨོས་ཀྱིས་མི་ལང་ངོ༌། ། སྐྱོ་ལུགས་སུ་གྲགས་པ་ནི། བླ་མ་སྐྱོས་ཨ་མོ་གྷ་བཛྲ་སོགས་ལས། རྡོ་རྗེ་འཇིགས་བྱེད་ཀྱི་སྐོར་རྣམས་གསན་ནས་དར་བར་མཛད་པ་ཡིན་ཞིང༌། ཞང་ལུགས་ནི། གོང་གི་ཅོག་གྲུ་ལོ་ཙཱ་བ་དེས་དེ་བཱ་ཀ་ར་ཙནྡྲ་ལ་ནག་འཇིགས་གཉིས་གསན་པ་ནས་ཉེ་བར་བརྒྱུད་པ་རྣམས་ཀྱི་སྲོལ་ཡིན་ནོ། ། གཉོས་ལུགས་ནི། གཉོས་ལོ་ཙཱས་བ་ལིང་ཨཱ་ཙརྱསོགས་ལས། ནག་པོ་སྐོར་གསུམ་གསན་པ་ནས་མཆེད་པ་སྟེ། དེ་དག་རྣམས་ལས་འཇམ་དཔལ་རྡོ་རྗེ་འཇིགས་མཛད་བཤེས་གཉེན་གྱི་རྣམ་པར་དངོས་སུ་བྱོན་པ་རྭ་ལོ་ཆེན་པོའི་ལུགས་སྲོལ་ཉིད་བཤད་སྒྲུབ་ནུས་པའི་རྒྱུན་མ་ཆད་པས་ཕྲིན་ལས་གྲུབ་མཐའ་ཡོངས་ལ་ཁྱབ་ཅིང་བླ་ན་འཕགས་སོ། ། དེང་སང་ནི་རྒྱུད་བཤད་མི་བཞུགས་ལ། རྒྱུད་དང་རྭ་བོད་ཀྱི་ལུང་ལུགས་སྲོལ་མི་འདྲ་བ་བདུན་གྱི་དབང་བསྐུར་བའི་རྒྱུན་མན་ངག་གི་ཁྲིད་རིམ་བཅས་བཞུགས། རྗེ་བརྒྱད་པས་ནི་འཇིགས་བྱེད་གཉོས་ལུགས་ལ་བསྔགས་པ་ཆེ་ཞིང་སྒྲུབ་དཀྱིལ་གྱི་ཡིག་ཆའང་མཛད། དེའི་དབང་ལུང་རྒྱུན་ཀྱང་མཆིས་སོ། ། ད༣ གསུམ་པ་[གཏི་མུག་གི་རིགས་ཀྱི་རྒྱུད་]ནི། གཏི་མུག་རིགས་རྒྱུད་མཚན་བརྗོད་ལོ་ཆེན་འགྱུར། ། བཤད་བཀའ་མན་ངག་སྔ་ཕྱིའི་ལུགས་སྲོལ་གནས། ། ཕ་རྒྱུད་གཏི་མུག་རིགས་ཀྱི་རྒྱུད་འཇམ་དཔལ་སྒྱུ་འཕྲུལ་དྲྭ་བ་ཁྲི་དྲུག་སྟོང་པ་ཏིང་ངེ་འཛིན་དྲྭ་བའི་ལེའུ་ལས་ཕྱུང་བ་རྒྱུད་ཐམས་ཅད་ཀྱི་བདག་པོ་མཚན་ཡང་དག་པར་བརྗོད་པ་འདི་ཉིད་བྱང་ཆུབ་སེམས་དཔའ་རྣམས་ཀྱིས་དུས་འཁོར་ལུགས་སུ་བཀྲལ། སྒེག་པ་རྡོ་རྗེས་བླ་མེད་ཕ་རྒྱུད། འཇམ་དཔལ་གྲགས་པ་དང་འཇམ་དཔལ་བཤེས་གཉེན་གྱིས་ཡོ་གར། བོད་དུ་རྫོགས་ཆེན་དང་། རྒྱ་གར་དུ་དབུ་མར་(༡༦༢ན)བཀྲལ་བའང་ཡོད་པར་བཤད་ཅིང༌། ཐོག་མར་ལོ་ཆེན་རིན་བཟང་གིས་བསྒྱུར། ཕྱིས་ནས་ལོ་ཙཱ་བ་དུ་མས་འགྱུར་བཅོས། པཎ་ཆེན་སྨྲྀ་ཏི་ཛྙཱ་ན་ལས་བརྒྱུད་དེ་བཤད་པའི་བཀའ་དང༌། དབང་རྒྱུན་མན་ངག་དང་བཅས་པ་རྔོག་སྟོན་ཆོས་སྐུ་རྡོ་རྗེས་སྐྱི་བྱེ་མ་ལུང་ལས་གསན་པ་ཡོ་གའི་ལུགས་དང༌། མར་སྟོན་ཆོས་ཀྱི་བློ་གྲོས་ཀྱི་ཞལ་སྔ་ནས་མཻ་ཏྲི་པའི་བཀའ་སྲོལ་བླ་མེད་ལུགས་ཀྱང་ཞུས་པ་དེ་དག་གི་དབང་ལུང་རྒྱུན་ད་ལྟ་མ་ནུབ་པར་གནས་ལ། བརྒྱུད་པ་སྔ་མའི་བཤད་རྒྱུན་ཀྱང་མཆིས་སོ། ། རྒྱུད་ཀྱི་རྒྱལ་པོ་འདི་ལ་ངེས་པ་རྙེད་ན་བླ་མེད་ཀྱི་རྒྱུད་མཐའ་དག་ལ་ངེས་པ་རྙེད་པར་འགྱུར་ལ། རྒྱུད་འདིའི་དོན་མ་ཤེས་ན་བླ་མེད་ཀྱི་ལམ་གྱི་གནད་མི་ཤེས་པ་ནི། དྲི་མེད་འོད་ལས། སེམས་ཅན་རྣམས་ཐེ་ཚོམ་མེད་པར་བྱ་བའི་ཕྱིར་སྔགས་ཀྱི་ཐེག་པ་ཐམས་ཅད་ལས་བསྡུས་ནས། མཚན་ཡང་དག་པར་བརྗོད་པ་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་ཡང་དག་པར་བསྟན་ཏོ། །མཚན་ཡང་དག་པར་བརྗོད་པ་མི་ཤེས་པ་དེས་རྡོ་རྗེ་འཆང་གི་ཡེ་ཤེས་ཀྱི་སྐུ་མི་ཤེས་སོ། །གང་རྡོ་རྗེ་འཆང་གི་ཡེ་ཤེས་ཀྱི་སྐུ་མི་ཤེས་པ་དེས་ནི་སྔགས་ཀྱི་ཐེག་པ་མི་ཤེས་སོ། །གསང་སྔགས་ཀྱི་ཐེག་པ་མི་ཤེས་པ་དེ་འཁོར་བ་སྟེ། ཐམས་ཅད་དུ་བཅོམ་ལྡན་འདས་རྡོ་རྗེ་འཆང་གི་ལམ་དང་བྲལ་བས་སོ། །ཞེས་གསུངས་ཤིང༌། མཚན་ཡང་དག་པར་བརྗོད་པའི་རྒྱུད་འདི་ནི་དཔག་བསམ་གྱི་ཤིང་དང་ཡིད་བཞིན་གྱི་ནོར་བུ་ལྟར་རང་གཞན་སེམས་ཅན་ཐམས་ཅད་ཀྱི་གནས་སྐབས་དང་མཐར་ཐུག་གི་འདོད་དོན་མཐའ་དག་སྟེར་བའི་བྱེད་པོར་གསུངས་ཤིང༌། ཐ་ན་རྒྱུད་འདིའི་ཚིག་ཙམ་བཀླགས་པས་ཀྱང་སྡིག་སྒྲིབ་ཚབས་ཆེན་པོ་འདག་པ་དང༌། རྗེ་བཙུན་འཇམ་དཔལ་དབྱངས་ཀྱི་བྱིན་རླབས་མྱུར་དུ་འཇུག་པ་སོགས་ཕན་ཡོན་མཐའ་ཡས་པ་འབྱུང་བ་འདིའི་ཕན་ཡོན་གྱི་ལེའུར་གསུངས་པ་ལྟར་རོ། ། འདིའི་ལུས་རྣམ་པར་གཞག་པའང་རིགས་ལྡན་པདྨ་དཀར་པོས་ལེའུའི་གཅོད་མཚམས་བཅུ་བཞིར་མཛད་པ་སྟེ། (༡༦༢བ) ཞུས་དང་ལན་བཏབ་རིགས་ལ་གཟིགས། ། སྒྱུ་འཕྲུལ་དྲྭ་བས་མངོན་བྱང་ཆུབ། ། རྡོ་རྗེ་དབྱིངས་དང་ཆོས་ཀྱི་དབྱིངས། ། མེ་ལོང་སོར་རྟོག་མཉམ་པ་ཉིད། ། བྱ་གྲུབ་གཤེགས་ལྔའི་ཡོན་ཏན་བསྟོད། ། ཕན་ཡོན་བསྔགས་དང་ཡི་རང་ངོ༌། ། ཞེས་པ་སྟེ། དེའང་སྒྱུ་འཕྲུལ་དྲྭ་བའི་ལེའུ་རྒྱུད་འདིའི་རྩ་བ། ལེའུ་ཕྱི་མ་རྣམས་བཤད་རྒྱུད་དམ་ཡན་ལག་གི་ཚུལ་དུ་བསྡེབས་ཏེ་དྲང་དོན་དཀྱིལ་འཁོར་དྲུག་སྤྲོ་བ་དང་ངེས་དོན་ཐིག་ལེ་དྲུག་གི་བཤད་པ་ལྟོ་སྦྱར། དེ་ལས་སོར་རྟོག་ལེའུ་ཁོ་ནས་སྨིན་གྲོལ་གྱི་འབྲས་བུ་རྫོགས་པར་སྟོན་ཅིང༌། དེ་ལས་ཀྱང་འཇིག་རྟེན་གསུམ་ན་གཞོན་ལུས་སོགས་ཤློཀ་གཅིག་གིས་རྒྱུད་དོན་ཚང་བར་སྟོན་པས་རྒྱུད་སྤྱིའི་མངོན་རྟོགས་ཀྱི་ཚུལ་དུ་བསྡེབས་ཏེ་འཆད་པར་མཛད་དོ། ། མཚན་བརྗོད་འགྱུར་འགོ་མང་ཡང་དོན་འདྲ་ཞིང༌། གཏན་མི་མཚུངས་པ་ནི། ཐིག་ལེ་སྟོང་པ་ཡི་གེ་བརྒྱ། །ཞེས་པ་རྣལ་འབྱོར་རྒྱུད་དང༌། ཡི་གེ་དྲུག་ཅེས་པ་བླ་མེད་དུ་བྱེད་ནས་འགྲེལ་པའི་སྲོལ་གཉིས་ཡོད་དོ། ། ཐ༢ གཉིས་པ་མ་རྒྱུད་རིགས་དྲུག་ལས་སྐབས་འདིར་གསུམ། ད༡ ཧེ་རུ་ཀའི་རིགས། ད༢ རྟག་པའི་རིགས། ད༣ རྡོ་རྗེ་སེམས་དཔའི་རིགས་སོ། ། ད༡ དང་པོ་ནི། བདེ་མཆོག་ལུགས་སྲོལ་ཉི་ཤུ་རྩ་བདུན་ཙམ། ། འཕགས་བའི་ཡུལ་དང་འདིར་ཡང་ཕལ་ཆེར་བྱུང༌། ། མ་རྒྱུད་ཡང་སྙིང་འཁོར་ལོ་བདེ་མཆོག་ནི་ལུགས་སྲོལ་རྐང་ཚུགས་པ་ཉེར་དྲུག་གམ་ཉི་ཤུ་རྩ་བདུན་ཙམ་འཕགས་པའི་ཡུལ་དུ་བྱུང་བར་གྲགས་ཤིང༌། བོད་འདིར་ཡང་རྩ་བཤད་ཀྱི་དབང་ལུང་བཤད་བཀའ་ཕལ་མོ་ཆེ་བྱུང་བ་སྟེ། དེའང་རྒྱ་གར་གྱི་གྲུབ་ཐོབ་ཤས་ཆེ་བ་ཞིག་རྒྱུད་འདིའི་གྲུབ་ཐོབ་ཡིན་པས་སྤྱིར་ལུགས་སྲོལ་ཤིན་ཏུ་མང་མོད། གཙོ་བོར་ཉི་ཟླ་ལྟར་གྲགས་པ་ལཱུ་དྲིལ་ནག་གསུམ་གྱི་ལུགས་གསུམ། དཱ་རིག་པ་དང༌། ཌེཾ་གི་པ་དང༌། ཨིནྡྲ་བྷཱུ་ཏི་ཆུང་བ་དང༌། ལངྐ་རྒྱལ་བ་བཟང་པོ་དང༌། མི་ཐུབ་ཟླ་བ་དང༌། ཤར་ཕྱོགས་ལྭ་བ་པ་སྟོང་ཉིད་ཏིང་འཛིན་དང༌། ཕྱག་རྡོར་སྟོད་འགྲེལ་ལུགས་དང༌། བྷ་བ་བྷ་དྲ་དང༌། བྲམ་ཟེ་རིན་ཆེན་རྡོ་རྗེ་(༡༦༣ན)རྣམས་ཀྱིས་རྩ་བའི་རྒྱུད་དེ་ལ་ལུགས་སྲོལ་རྐང་ཚུགས་པ་རེ་རེ་ཕྱེས་ཤིང༌། བོད་ཡུལ་འདིར་ཡང་འགྱུར་བ་ཡིན་ནོ། ། འཕགས་པའི་ཡུལ་དུ་གྲུབ་ཐོབ་གླུ་དབྱངས་མཁན་གྱི་ལུགས་དང༌། ཞབས་གཡོན་བརྐྱང་དུ་མཛད་པ་ནག་པོ་རྡོ་རྗེའི་ལུགས་དང༌། གཞན་ཡང་ཀ་ལ་ཧཾ་ས་ཀུ་མཱ་རའི་ལུགས་དང༌། ལྷ་ཚོགས་ཐམས་ཅད་སྐུ་མདོག་ནག་པོར་ཡོད་པ་དྷརྨ་པ་ཡི་ལུགས་དང༌། ལྷ་ཚོགས་ཐམས་ཅད་གདོང་བརྙན་ཅན་དུ་འདོད་པ་ཀུཀྐུ་ཊི་པའི་ལུགས་དང༌། ཡབ་ཡུམ་སྐུ་མདོག་མཚུངས་ཤིང་ལྷ་གཞན་ཐམས་ཅད་སྐུ་མདོག་མ་ངེས་པར་འདོད་པ་བྷུཎྜ་རི་པའི་ལུགས་དང༌། གཞན་ཡང་ཙཊི་པ་དང༌། ནཱཌི་པ་དང༌། གྷནྡྷ་ཏ་པ་རྣམས་ཀྱི་ལུགས་དང༌། ལྷ་ཚོགས་ཐམས་ཅད་ཕྱག་གཉིས་པར་ཡང་འདོད་པ་བཱི་ན་པའི་ལུགས་དང༌། གཞན་ཡང་་ཏྣྚ་པ་དང༌། བྷ་དེ་པ་ཡི་ལུགས་དང༌། ཏ་ཌ་ཀ་པ་དང༌། ཀཾ་ཀ་ལ་པའི་ལུགས་དང༌། ལྷ་ཚོགས་ཐམས་ཅད་སྐུ་མདོག་སེར་པོར་འདོད་པ་ཛ་ཡ་ནནྡི་པའི་ལུགས་རྣམས་ཏེ་དེ་ལྟར་གྲུབ་ཐོབ་ཆེན་པོ་བཅོ་ལྔ་པོ་དེ་ཡི་ལུགས་སྲོལ་རྐང་ཚུགས་པ་རེ་བྱེད་པའང་ཡོད་དོ། གཞན་ཡང་དུས་ཀྱི་འཁོར་ལོའི་རྒྱུད་ཕྱི་མ་ནས་ལུང་བསྟན་པའི་སློབ་དཔོན་བྱང་ཆུབ་རྡོ་རྗེའི་ལུགས་ནི་རྒྱ་གར་དུ་རིང་དུ་མ་དར་མོད་འགྲོ་ལྡིང་གི་ཡུལ་དུ་ད་ལྟའི་བར་དུ་ཡོད་ཅིང༌། བཤད་པའི་རྒྱུད་རྣམས་ལས་དཀྱིལ་འཁོར་དུ་མ་ཞིག་བསྟན་ཅིང་དེ་དག་གི་སྨིན་བྱེད་བཤད་བཀའ་དང་ཡིག་ཆ་སོགས་ཀྱང་འཕགས་ཡུལ་དུ་རྒྱ་ཆེར་བྱུང་བ་ལས། བོད་དུ་ནི་བཤད་རྒྱུད་ཀྱི་དཀྱིལ་འཁོར་དྲུག་ཙམ་བྱོན་ནོ། ། གློག་སྐྱ་མལ་ལོ་དོ་པ་པུ་ཧྲང་པ། ། རོང་གཡག་རྣམ་གཉིས་སྦལ་སྣའི་ལུགས་སོགས་ལས། ། མར་དོ་ཁྱད་འཕགས་གཟེ་པ་སོགས་ཀྱིས་བསྐྱངས། ། བོད་དུ་ཕྱི་དར་གྱི་ཐོག་མར་ལོ་ཆེན་རིན་བཟང་དང་འགོས་ལོ་སོགས་ཀྱིས་རྒྱུད་དང་སྒྲུབ་ཐབས་འགྲེལ་པ་སོགས་བདེ་མཆོག་སྐོར་གྱི་གཞུང་མང་དུ་བསྒྱུར། གློག་སྐྱ་ཤེས་རབ་བརྩེགས་ཀྱིས། བལ་པོར་ཕམ་ཐིང་པ་སྐུ་མཆེད་(༡༦༣བ)ལ་བདེ་མཆོག་གི་ཆོས་སྐོར་རྣམས་གསན་ནས། མལ་ལོ་བློ་གྲོས་གྲགས་སོགས་ལ་གནང་བ་དང༌། མལ་ལོ་ཉིད་ཀྱིས་ཕམ་ཐིང་པ་སྐུ་མཆེད་སོགས་མང་པོ་བསྟེན་ནས་ཞུས་པས། བདེ་མཆོག་སྐོར་ལ་མཁས་པར་གྱུར་པ་དེ་ལ་ས་ཆེན་གྱིས་གསན་པ་སོགས་ནས་ས་སྐྱ་པ་ཡབ་སྲས་བརྒྱུད་པ་དང་བཅས་པ་རྣམས་ལ་ཆེས་དར། མར་པ་ལོ་ཙཱས་ནཱ་རོ་པ་ལ་བདེ་མཆོག་གི་སྐོར་རྣམས་ཀྱི་ངེས་གསང་བླ་ན་མེད་པ་གསན་ནས་ཕྱིས་བོད་དུ་སློབ་མ་རྣམས་ལ་གདམས་པ་ལས། དབང་དང་ཁྲིད་ཀྱི་སྲོལ་ཁྱད་པར་བ་མང་པོ་མར་མིའི་བཀའ་བརྒྱུད་རྣམས་ལ་དར་བར་སྣང་ཞིང༌། ཁྱད་པར་མར་པ་དོ་པ་ཆོས་ཀྱི་དབང་ཕྱུག་གིས་ནཱ་རོ་པའི་སློབ་མ་མ་ན་ཀ་ཤྲཱི་སོགས་བླ་མ་མང་པོ་བསྟེན་ནས། ནཱ་རོའི་ལུགས་ཀྱི་བདེ་མཆོག་གི་དབང༌། རྒྱུད་བཤད་པ་མན་ངག་དང་བཅས་པ་གསན་ཏེ། བདེ་མཆོག་གི་ཆོས་སྐོར་ལ་འགྱུར་ཡང་མང་པོ་མཛད། བོད་དུ་སློབ་མའང་མང་དུ་ཚར། ཡང་ཕམ་ཐིང་པ་སྐུ་མཆེད་གསུམ་སོགས་ལས་པུ་རོང་ལོ་ཆུང་དང་གཉོས་ལོ་སོགས་ཀྱིས་གསན་ནས་རྒྱུན་བྱུང་བའང་ཅི་རིགས་པར་ཡོད་ཅིང༌། དེ་ལས་ཁྱད་པར་པུ་རོང་ལོ་ཆུང་ནས་བརྒྱུད་པ་རྣམས་ཀྱི་བཤད་སྲོལ་བཟང་ལ་ཡུན་རིང་བར་བྱུང༌། ཇོ་བོ་རྗེས་ལོ་ཆེན་རིན་བཟང་དང་རོང་པ་མགར་དགེ་སོགས་ལ་གནང་ཞིང༌། ཕྱི་མས་གཡག་སྡེ་ཟེ་དམར་བ་ལ་བརྒྱུད་དེ་བཤད་སྲོལ་སོགས་བྱུང་བ་དང༌། ཡང་ཇོ་བོ་རྗེས་ནག་ཚོ་ལོ་ཙཱ་བ་ལ་གནང༌། དེའི་རྒྱུན་ལས་སྦལ་སྤང་སྣ་བའི་རྒྱུན་ཞེས་གྲགས་པའང་བྱུང་ཞིང༌། སོགས་ཁོངས་ནས་དེར་མ་ཟད་སུམ་པ་ལོ་ཙཱ་དྷརྨ་ཡོན་ཏན་གྱིས་པཎྜི་ཏ་ཛ་ཡ་སེ་ན་བསྟེན་ཏེ། བདེ་མཆོག་མཁའ་འགྲོ་རྒྱ་མཚོའི་རྒྱུད་འགྲེལ་ཡན་ལག་དང་བཅས་པ་གསན་ནས་འགྱུར་ཡང་མཛད་དེ། བོད་ཡུལ་དུ་དེ་དག་གི་དབང་བཀའ་དང་བཤད་སྲོལ་སོགས་ཆེས་དར། བཤད་རྒྱུད་གཞན་རྣམས་ནི་དབང་བཀའ་བཤད་བཀའ་ཡང་ཅི་རིགས་བྱུང་བ་ལས། མར་པ་དོ་པའི་ལུགས་སྲོལ་ཉིད་ཁྱད་དུ་འཕགས་ཤིང༌། དེའི་སློབ་མ་(༡༦༤ན)གཙང་གི་མཁས་པ་རྒྱ་ནམ་དོ་གཟེ་པ་བློ་ལྡན་སོགས་ཀྱིས་ཆོས་བརྒྱུད་ལེགས་པར་བསྐྱངས་ཏེ་བཤད་སྒྲུབ་ཀྱི་རྒྱུན་གྲུབ་མཐའ་ཀུན་ལ་འཕེལ། བརྒྱུད་པ་དེ་དག་ལས་བུ་སྟོན་རིན་པོ་ཆེས་རྩ་རྒྱུད་དང་ཀུན་སྤྱོད་ལ་ཊཱིཀ་མཛད་པའི་བཤད་རྒྱུན་དགེ་ཕྱོགས་ལ་ད་ལྟའི་བར་དུ་བཞུགས་ཤིང༌། དབང་བསྐུར་ཟུར་བཀའ་ཉི་ཤུ་ལྷག་ཙམ་དང༌། ལཱུ་དྲིལ་ནག་གསུམ་གྱི་ཁྲིད། ཡུམ་བཀའི་བསྐྱེད་རྫོགས་ཀྱི་རིགས་མང་པོ་མ་ཆད་པར་བཞུགས་སོ། ། དེ་ལ་རྣལ་འབྱོར་ཆེན་པོའི་རྒྱུད་ཀྱི་རྒྱལ་པོ་བཀླགས་པས་གྲུབ་པ་དངོས་གྲུབ་ཀྱི་ཆོ་ག་ཤིན་ཏུ་རྨད་དུ་བྱུང་བ་གདོད་ནས་གྲུབ་པའི་རྒྱུད་ཆེན་པོ་འཆད་པ་ལ། མདོ་རྒྱུད་ཀྱི་གནས་ཟབ་མོར་གཞན་དྲིང་མི་འཇོག་པའི་མཁྱེན་དཔྱོད་ངོ་མཚར་ཕུལ་དུ་བྱུང་བ་རྗེ་འཇམ་དཔལ་སྙིང་པོའི་བཤད་སྲོལ་སྦས་དོན་ཀུན་གསལ་ལྟར་ན། སྔོན་དུ་གསུང་རབ་སྤྱི་དང༌། བྱེ་བྲག་ཏུ་བདེ་མཆོག་གི་རྒྱུད་ཀྱི་རྣམ་གཞག ། དེ་ལས་ཉུང་ངུའི་རྩ་རྒྱུད་བཤད་པ་དངོས་ལ་འཇུག་པ་ན། མན་ངག་གང་གིས་འཆད། ཚུལ་ཇི་ལྟར་འཆད། བཤད་པའི་ཚུལ་དངོས་བསྟན་པ་གསུམ་གྱིས་བསྡུས། དང་པོ་ལ། རྒྱུད་རྣམས་རྒྱུད་གཞན་གྱིས་བཤད་པ་དང༌། བྱང་ཆུབ་སེམས་དཔའི་འགྲེལ་པས་འཆད་པ་དང༌། བླ་མའི་མན་ངག་གིས་རྗེས་སུ་འབྲང་བ་གསུམ་ལས། འདིར་དང་པོ་དང་གསུམ་པ་ལ་བརྟེན་པ་སྟེ། དེའང་རྩ་རྒྱུད་ལ་བཤད་པའི་རྒྱུད་ཐུན་མོང་མ་ཡིན་པ་མངོན་བརྗོད་རྡོ་རྗེ་མཁའ་འགྲོ་སྡོམ་འབྱུང་ཀུན་སྤྱོད། ཐུན་མོང་བ་སམྦུཊི་རྣམས་དང༌། ལཱུ་དྲིལ་ནག་གསུམ་གྱི་གཞུང་རྣམས་ལ་བརྟེན་ཏེ་རྩ་བཤད་ལེགས་པར་སྦྱར་ཏེ། དཔལ་ནཱ་རོ་ཏཱ་པའི་མན་ངག་ལ་བརྟེན་ནས་འཆད། གཉིས་པ་ནི། དབྱངས་གསལ་ཡི་གེ་ལྔ་བཅུ་སོ་སོའི་དེ་ཉིད་དང༌། སྤྱིའི་དེ་ཁོ་ན་ཉིད་དང་སྦྱར་བའི་ཐབས་ཤེས་གཉིས་མེད་ཀྱི་དོན་ཅན་བསྡུས་རྒྱུད་ལེའུ་ལྔ་བཅུ་ང་གཅིག་པ་ཉིད། མཁས་པ་སུ་མ་ཏི་ཀཱིརྟིས་མཛད་པའི་ཉུང་ངུའི་རྒྱུད་ཀྱི་མཚམས་སྦྱོར་ལས་(༡༦༤བ)བཤད་པ་ལྟར། ལེའུ་དང་པོས་མདོར་བསྟན། གཉིས་པ་ནས་ལེའུ་ལྔ་བཅུ་པའི་བར་གྱིས་རྒྱས་པར་བཤད། ཐ་མའི་ལེའུས་དེ་དག་གི་དོན་བསྡུས་ཏེ་འཆད་དོ། ། བཤད་བྱའི་བསྡུས་དོན་རྣམ་པར་གཞག་པ་ལ་དྲུག །དབང་བསྐུར་བ་དང་དེ་ལ་དེ་ཉིད་བསྟན་པ། སྔགས་བཏུ་བ་དང་དངོས་གྲུབ་སྒྲུབ་པ། དངོས་གྲུབ་གཉིས་ཀ་ཕོ་ཉ་མོའི་ཕྲིན་ལས་འགྲུབ་པ། ལམ་གྱི་གྲོགས་དམ་ཚིག་དང་བོགས་འབྱིན་པའི་སྤྱོད་པ། ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་བཞི། དངོས་གྲུབ་མྱུར་དུ་འགྲུབ་པའི་མཚན་མ་རྟོགས་པའི་བསྡུས་དོན་རྣམས་སུ་རྣམ་པར་བཞག་ཅིང༌། གོ་རིམ་གྱི་ཞར་ལས་ལམ་གྱི་རིམ་པའི་འབྲེལ་ཡང་རྟོགས་པའོ། ། གསུམ་པ་བཤད་ཚུལ་དངོས་ལ་བཞི། མཚན་གྱི་དོན། འགྱུར་གྱི་ཕྱག །གཞུང་གི་དོན། འཇུག་གི་དོན་ནོ།། གཞུང་དོན་ལ་གསུམ། མདོར་བསྟན། རྒྱས་བཤད། དོན་བསྡུའོ། ། དང་པོ་ལ་བཞི། གསང་བ་བཤད་པ་དམ་བཅའ་བ། གསང་བ་ཉན་པར་བསྐུལ་བ། ལམ་གྱི་གསང་བའི་བགྲོད་པ་རྫོགས་པར་བྱེད་པའི་ཐབས། གསང་བ་སྒྲུབ་པའི་གནས་བསྟན་པ་རྣམས་སྒྲ་ཇི་བཞིན་པ་དང་ཇི་བཞིན་མ་ཡིན་པས་འཆད་དེ་ལེའུ་དང་པོའོ། ། གཉིས་པ་ནི། ལྷག་མ་ལེའུ་བཞི་བཅུ་རྩ་དགུས་འཆད་ལ། གསུམ་པ་ནི་ལེའུ་ང་གཅིག་པ་སྟེ། བཤད་པར་དམ་བཅའ་བ་སྔོན་དུ་སོང་ནས། དེའི་དོན་བཤད་པ་ལ་ལྔ། རྒྱུད་འདིའི་མན་ངག་ཤིན་ཏུ་རྙེད་དཀའ་བར་བསྟན། རྙེད་སླ་བའི་ཐབས་དེ་ཉིད་བཅུ་བཞི་བཤད། དེ་ལ་སྤྱོད་པའི་ཕན་ཡོན་དང་མ་དད་པའི་ཉེས་དམིགས་བསྟན། དེ་ཉིད་བཅུ་