Tibetan
བྱང་ཆུབ་མཆོག་ཐོབ་སོགས། ། སེམས་ཅན་ཀུན་དོན་བྱེད་ཆོས་རྣམས་དང་ལྡན། ། ཞེས་གསུངས་པ་ལྟར་རོ། ། འབྲེལ་འདིས་ལམ་སྟོན་པ་པོ་སངས་རྒྱས། དེའི་བསྟན་པ་དམ་ཆོས། དེ་ལ་སློབ་པ་དགེ་འདུན། དེ་དག་གིས་གདུལ་བར་བྱ་བའི་རིགས་ཅན། དེ་དག་རྣམ་པར་གྲོལ་བའི་བྱང་ཆུབ། དེའི་ཡོན་ཏན་མཛད་པ་དང་བཅས་པ་སྟེ་རྣམ་པར་གྲོལ་བའི་གཞི་ལམ་འབྲས་བུའི་ལུས་ཡོངས་སུ་རྫོགས་པར་སྟོན་ལ། དེ་དག་ཀྱང་ལམ་ཉམས་སུ་ལེན་པའི་རིམ་པར་བསྡུ་ན། ཐེག་པ་མཆོག་གི་ལམ་ལ་བྱང་ཆུབ་ཏུ་སེམས་བསྐྱེད་པ་ཉིད་དེད་དཔོན་ལྟ་བུ་ཡིན་པས་སེམས་དེ་ཡང་དག་བླང་བའི་རིམ་ལ་བསྟན་པར་གསུངས་ཏེ། དེའང་གསུམ་ལ་སྐྱབས་སུ་འགྲོ་བ་དངོས་སུ་བསྟན། སེམས་བསྐྱེད་པའི་དམིགས་པ་ནི་གཞན་གྱི་དོན་དང་བྱང་ཆུབ་ཡིན་པ་དང༌། གཞན་ནི་གང་གི་ཆེད་དུ་སེམས་བསྐྱེད་པའི་ཡུལ་སེམས་ཅན་ཡིན་པས་དྲི་བཅས་དེ་བཞིན་ཉིད་བསྟན། གཞན་གྱི་དོན་ནི་ཕྲིན་ལས་ཀྱིས་བསྟན། དེའི་རྒྱུ་བྱང་ཆུབ་དང༌། ཡོན་ཏན་ནི་བྱང་ཆུབ་ཀྱིས་གཞན་དོན་བྱེད་པའི་གྲོགས་ཏེ་སྐབས་སོ་སོར་བསྟན་ཅིང་དེ་དག་ཐམས་ཅད་ཀྱང་(༡༥༢ན)བདེན་པ་གཉིས་ཀྱི་ཚུལ་གྱིས་གཏན་ལ་དབབ་པ་ཡིན་ནོ། ། ཇ༢ གཉིས་པ་ཐུན་མིན་གསང་སྔགས་རྡོ་རྗེ་ཐེག་པའི་བཤད་རྒྱུན་ཇི་ལྟར་བྱུང་བ་བརྗོད་པ་ལ་གསུམ། ཉ༡ གསར་མ་དང༌། ཉ༢ རྙིང་མ་དང༌། ཉ༣ ཞར་ལས་འཕྲོས་པའོ། ། ཉ༡ དང་པོ་ལ་གསུམ། ཏ༡ བྱ་སྤྱོད། ཏ༢ རྣལ་འབྱོར། ཏ༣ བླ་མེད་དོ། ། ཏ༡ དང་པོ་ནི། བྱ་སྤྱོད་བྱང་ཆུབ་མཆོག་དང་སངས་རྒྱས་གསང༌། ། ཕྱི་མའི་བཤད་རྒྱུན་མཉྫུ་ཤྲཱིས་སྤེལ། ། གསང་སྔགས་ཕྱི་འགྱུར་གསར་མའི་ལུགས་སུ་རྒྱུད་སྡེ་ཆེན་པོ་བཞིར་གྲགས་པའི་ཐོག་མ་བྱ་བ་དང་སྤྱོད་པའི་རྒྱུད་ནི། འཕགས་ཡུལ་དུ་སློབ་དཔོན་བྱང་ཆུབ་མཆོག་གི་སྐལ་པ་ཅན་དང་སངས་རྒྱས་གསང་བ་རྣམས་ནི་མཁས་པའི་ཕུལ་དུ་གྱུར་པས་སྔ་མས་བྱ་རྒྱུད་དང༌། ཕྱི་མས་སྤྱོད་རྒྱུད་གཙོ་བོར་བཤད་སྒྲུབ་གཉིས་ཀ་རྩལ་འདོན་གྱིས་སྤེལ་བར་མཛད་ལ། གཞན་ཡང་ཛེ་ཏཱ་རི་ལ་སོགས་པ་རྣམས་ཀྱིས་ཀྱང་ཅི་རིགས་པར་སྤེལ་བར་མཛད་དོ། ། བོད་དུ་བསྟན་པ་སྔ་དར་གྱི་སྐབས་ཆོས་རྒྱལ་ཁྲི་སྲོང་ལྡེའུ་བཙན་གྱིས་སློབ་དཔོན་སངས་རྒྱས་གསང་བ་སྤྱན་འདྲེན་དུ་དབས་མཉྫུ་ཤྲཱི་སོགས་བཏང་ཡང་མ་བྱོན་པར་ཀྲི་ཡོག་སྡེ་གསུམ་བཤད་པ་ཉན། ཉིད་ཀྱི་འགྲེལ་པ་རྣམས་གནང་བ་ཁྱེར་ཏེ་སླར་འོངས་ནས་བཙན་པོ་ལའང་ཕུལ། སློབ་མ་རྣམས་ལའང་བཤད་པས་དར་བར་གྱུར། དེའང་དཔུང་བཟང་དང༌། གསང་བ་སྤྱིའི་རྒྱུད་དང༌། བསམ་གཏན་ཕྱི་མ་ལ་སོགས་པ་དང༌། སྤྱོད་པའི་རྒྱུད་ཀྱི་ཡང་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལ་སློབ་དཔོན་སངས་རྒྱས་གསང་བའི་བསྡུས་དོན་གྱི་འགྲེལ་པ་དང༌། སངས་རྒྱས་གསང་བའི་གསུང་ལོ་ཙཱ་བས་ལེགས་པར་བཟུང་སྟེ་ཡི་གེར་བྱས་པ་དང༌། ཕྱག་ན་རྡོ་རྗེ་དབང་བསྐུར་བའི་རྒྱུད་ལ་འགྲེལ་པ་ཞིག་ཀྱང་འགྱུར་ཞིང༌། དེ་ལ་སོགས་པ་ལ་བཤད་པ་དང་ཉན་པའི་རྒྱུན་ཡང་ཡོད་པར་སྣང་མོད། བསྟན་པ་ཕྱི་དར་གྱི་སྐབས་བ་རི་ལོ་ཙཱ་རིན་ཆེན་གྲགས་ཀྱིས་དབང་བཀའ་དུ་མའི་རྒྱུན་སྤེལ་བ་སོགས་སྐྱེས་མཆོག་དུ་མས་ལུགས་སྲོལ་ཅི་རིགས་པ་སྤེལ་ཡང་(༡༥༢བ)རྐང་ཚུགས་པའི་བཤད་རྒྱུན་ཆེར་མ་བྱུང་ཞིང༌། ངོར་ཆེན་རྡོ་རྗེ་འཆང་ཀུན་དགའ་བཟང་པོས་ས་སྐྱའི་སྒོ་རུམ་དཔེ་ཁང་དུ་ལོ་གསུམ་སྐུ་མཚམས་བཅད་དེ་རྒྱུད་དང་རྒྱ་འགྲེལ་རྣམས་ལ་གཟིགས་རྟོག་དཔྱིས་ཕྱིན་པར་མཛད། བྱ་སྤྱོད་ཀྱི་སྤྱི་རྣམ་བརྩམས་ཤིང་བསྟན་པ་སྤེལ་བའི་ཐུགས་བརྩོན་ཆེན་པོ་གནང་ཡང༌། དེང་སང་ནི་རྒྱུད་རྣམས་ཀྱི་ལུང་དང༌། བྱ་རྒྱུད་རིགས་གསུམ་སྤྱི། དྲི་མེད་རྣམ་གཉིས། དམ་ཚིག་གསུམ་བཀོད། སྨན་བླ་ཞེ་བདུན་མ། དོན་ཞགས་ལྷ་མང༌། མི་འཁྲུགས་པ་ལྷ་དགུ། བཅུ་གཅིག་ཞལ་ཀླུ་སྒྲུབ་ལུགས། ཕྱག་རྡོར་འགྲོ་བཟང་ལུགས་སོགས་ཀྱི་དབང་དང༌། རྗེས་གནང༌། རིག་གཏད། ལུང་སྦྱིན་པའི་རིགས་དུ་མ་དང༌། སྤྱོད་རྒྱུད་རྣམ་སྣང་མངོན་བྱང་ལྷ་བརྒྱ་དང་ཉེར་གཉིས་མཚན་མ་གཉིས་དང་བཅས་པ། འཇམ་དབྱངས་ཨ་ར་པ་ཙ་ལྷ་ལྔའི་དབང་གི་རྒྱུན་ཙམ་ལས་བཤད་རྒྱུན་ནི་མི་བཞུགས་སོ། ། ཏ༢ གཉིས་པ་[རྣལ་འབྱོར་གྱི་རྒྱུད་]ནི། རྣལ་འབྱོར་རྒྱུད་ལ་མཁས་པ་རྣམ་གསུམ་སྲོལ། ། ཐོག་མར་ལོ་ཆེན་སྲས་བཞི་ཇོ་བོས་སྤེལ། ། བར་དུ་རྩ་སྣུར་འཛིམ་སོགས་ཆུ་བྲན་བརྒྱ། ། ཐ་མ་བུ་སྟོན་མཁས་པའི་རྒྱ་མཚོར་འཁྱིལ། ། ཡོ་གའི་བསྟན་པ་རྨང་ནས་གསོ་བར་མཛད། ། རྣལ་འབྱོར་རྒྱུད་ནི། ཚིག་ལ་མཁས་པ་ཤཱཀྱ་བཤེས་གཉེན། དོན་ལ་མཁས་པ་སངས་རྒྱས་གསང་བ། གཉིས་ཀ་ལ་མཁས་པ་ཀུན་དགའ་སྙིང་པོ་གསུམ་གྱི་བཀའ་སྲོལ་འཕགས་ཡུལ་དུ་གྲགས་ཆེ་ཞིང་བོད་དུ་སངས་རྒྱས་གསང་བའི་བཀའ་སྲོལ་སྔ་དར་དུས་བྱུང་ཡང་ཕྱིས་སུ་རྒྱུན་མེད་ལ། ཕྱི་དར་ལ་ཀུན་སྙིང་ལུགས་ཁོ་ན་དར་བའི་ཐོག་མར་ལོ་ཆེན་རིན་ཆེན་བཟང་པོ་ཁ་ཆེར་བྱོན་ཏེ་བླ་མ་མང་པོ་བསྟེན། རྒྱུད་དང་གདམས་ངག་མང་པོ་ཉན་ནས་གསང་སྔགས་སྤྱི་དང་ཁྱད་པར་ཡོ་ག་ལ་ཤིན་ཏུ་མཁས། བོད་དུ་རྣལ་འབྱོར་གྱི་རྒྱུད་རྣམས་ཕལ་ཆེར་སྔར་ནས་ཡོད་མོད་ཀྱི། འགྲེལ་པ་དང་བསྟུན་ནས་གསར་དུ་བསྒྱུར། འགྲེལ་པའང་དེ་ཉིད་བསྡུས་པའི་འགྲེལ་པ་དེ་ཉིད་སྣང་བ་སོགས་བསྒྱུར་ནས་འཆད་ཉན་གྱིས་(༡༥༣ན)ལེགས་པར་གཏན་ལ་ཕབ། ཕྱག་ལེན་ངེས་ཏིག་མཛད་དེ། ལོ་ཆུང་ལེགས་པའི་ཤེས་རབ། གུང་ཤིང་བརྩོན་འགྲུས་རྒྱལ་མཚན། གྲ་པ་གཞོན་ནུ་ཤེས་རབ། སྐྱི་ནོར་ཛྙཱ་ན་སྟེ་ཐུགས་སྲས་བཞི་གཙོ་བོར་གྱུར་པའི་སློབ་མ་མང་པོ་ལ་གནང་སྟེ། འཆད་ཉན་གྱིས་བརྒྱུད་པ་ཟིན་པ་ཤིན་ཏུ་མང་བར་བྱུང༌། དེ་ནས་ཕོ་བྲང་ཞི་བ་འོད་ཀྱིས་པཎྜི་ཏ་ཀ་ལ་ཤ་སོགས་སྤྱན་དྲངས་ཏེ། བསྒྱུར་མང་དུ་མཛད་ཅིང་ཁྱད་པར་དཔལ་མཆོག་གི་ཧོར་ཀོང་བསབས། བཤད་རྒྱུད་རྡོ་རྗེ་རྩེ་མོ་སོགས་སློབ་མ་མང་པོ་ལ་བཤད། ཇོ་བོ་རྗེས་ཆེན་པོས་སྤྱོད་རྒྱུད་ཀྱི་དབང་དང་མན་ངག་གོ་མི་སྒོམ་ཆེན་སོགས་ལ་གནང༌། དེ་ལས་སྐྱི་ནོར་ཛྙཱ་ན་དང་གཉལ་པ་ཉི་ཤེ་སོགས་རིམ་པར་བརྒྱུད་ཅིང་རྒྱ་ཆེར་སྤེལ། ཟངས་དཀར་ལོ་ཙཱས་ཀྱང་ཡོ་གའི་སྐོར་ལ་གསན་པ་རྒྱ་ཆེན་པོ་མཛད་ནས་སྨད་འགྲེལ་དུམ་བུ་གསུམ་ཡང་རྫོགས་པར་བསྒྱུར། གཉལ་པ་ཉི་མ་ཤེས་རབ། མར་པ་རྡོར་ཡེས། གཉན་སྟོན་ཚུལ་འབར། སྤྱང་ཚང་པ་སེང་གེ་རྒྱལ་མཚན་ཏེ་ཟངས་དཀར་བུ་བཞིར་གྲགས་པ་སོགས་ལ་སྤེལ་ཞིང་བཤད་པས་ཆེས་དར་རོ། ། བར་དུ་རྩ་སྐྱ་བ་སྟོན་ཤཱཀ། གཉལ་པའི་སློབ་མ་སྣུར་ཉི་མ་འོད་ཟེར། འཛིམ་པ་བློ་ཆེན་གསུམ་གྱིས་འཆད་ཉན་གྱི་རྐང་གཙོ་བོར་བཟུང༌། གཞན་ཡང་བལ་པོ་རེ་བེནྡྲ་ནས་མལ་ལོ་ཙཱ་བ་ལ་བརྒྱུད་པ་དང༌། བི་བྷཱུ་ཏི་ཙནྡྲ་ནས་གཡག་སྡེ་ཟེ་དམར་བ་ལ་བརྒྱུད་པ་སོགས་སྲོལ་དུ་མ་བྱུང༌། ཡང་ཕྱིས་སུ་རྒྱུན་མ་ནུབ་ཙམ་ལས་ཉག་ཤིན་ཏུ་ཕྲ་བར་གྱུར་པ་ལ། བརྒྱུད་སྲོལ་དེ་དག་གི་ཆུ་བྲན་བརྒྱ་རྩ་ཕྱི་མའི་ཐ་མར་རྣལ་འབྱོར་གྱི་རྒྱུད་ལ་བག་ཆགས་ལྷག་པར་སད་པ་བུ་སྟོན་མཁས་པའི་རྒྱ་མཚོ་ཆེན་པོར་འཁྱིལ་ཏེ། དེ་ཉིད་ཀྱིས་རྣལ་འབྱོར་རྒྱུད་ཀྱི་བསྡུས་པའི་དོན་འབྱུང་བའི་བཤད་པ་ཆེན་མོ། གཞན་རྣམས་ཀྱི་དཀྱིལ་ཆོག་སོགས་ཡིག་ཆ་མང་དུ་མཛད་ཅིང་རྣལ་འབྱོར་རྒྱུད་ཀྱི་བསྟན་པ་རྨངས་ནས་གསོས་སོ། ། དེང་སང་བཤད་རྒྱུན་ནི་མི་བཞུགས་ལ། (༡༥༣བ)དཔལ་མཆོག་རིགས་བསྡུས། རྩེ་མོ་རིགས་བསྡུས། རྡོ་རྗེ་དབྱིངས་སོགས་དབང་བཀའ་ཆེ་ཆུང་བཅུ་གསུམ། རྒྱུད་ཀྱི་ལུང༌། ཆ་མཐུན་ནམ་འཕྲོས་པའི་རྒྱུད་སྦྱོང་དཀྱིལ་བཅུ་གཉིས་ཀྱི་དབང་བཀའ་ཙམ་ཞིག་བཞུགས་སོ། ། འདི་ལ་ཡོ་ག་སྟོད་ལུགས་དང་སྨད་ལུགས་ཞེས་གྲགས་པ་ནི། ལོ་ཆེན་གྱི་སྐུ་ཚེའི་སྟོད་དུ་བཤད་པ་ཤཱཀྱ་བཤེས་གཉེན་དང་ལག་ལེན་ཀུན་སྙིང་ལུགས་ལྟར་མཛད་པ་ནི་སྐུ་ཚེའི་སྟོད་ལ་བྱུང་ཡང་ས་ཆ་སྨད་དུ་དར་བ་ལ་ཡོ་ག་སྨད་ལུགས་ཞེས་བྱ་སྟེ། ཉང་སྟོད་ཀྱི་རྒྱལ་པོ་ཆོས་བློ། རིན་སྤུངས་ཀྱི་སུམ་སྟོན། བོ་དོང་གི་སྤང་ག་འདང་ཆུང་རྣམས་ཀྱིས་སྲོལ་བཏོད་པ་རྣམས་ཡིན་ནོ། ། ཡོ་ག་སྟོད་ལུགས་ནི། ཕྱིས་ལོ་ཆེན་གྱིས་བཤད་པ་ལག་ལེན་གཉིས་ཀ་ཀུན་སྙིང་ལུགས་ལྟར་མཛད་པ་ནི་སྐུ་ཚེའི་སྨད་ལ་བྱུང་ཡང༌། ས་ཆ་སྟོད་དུ་དར་བས་དེ་སྐད་ཅེས་བྱ་སྟེ། མལ་ལོ་ཙཱ་བ་ནས་བླ་མ་ས་སྐྱ་པ་ཆེན་པོ་སོགས་ལ་བརྒྱུད་དེ་སྙན་བརྒྱུད་དུ་བཞུགས་པ་རྗེ་བཙུན་ཆེན་པོ་གྲགས་པ་རྒྱལ་མཚན་གྱིས། ཕྱི་རབས་ཀྱི་གདུལ་བྱ་བློ་ཞན་ཅིང་བརྗེད་ངས་པས་སྙན་བརྒྱུད་འཛིན་མི་ནུས་པར་ནུབ་ཀྱི་དོགས་ནས་གཞན་ཕན་སྐོར་གསུམ་སོགས་མཛད་པ་ལས་རིམ་གྱིས་མཆེད་ནས་སྦྱོང་རྒྱུད་ཀུན་རིག་གི་ཕྱག་བཞེས་གྲུབ་མཐའ་ཀུན་ལ་ད་ལྟའི་བར་དུ་དར་ཞིང་རྒྱས་སོ། ། ཏ༣ གསུམ་པ་[བླ་མེད་རྒྱུད་]ལ་གཉིས། ཐ༡ ཕ་རྒྱུད་དང༌། ཐ༢ མ་རྒྱུད་དོ། ། ཐ༡ དང་པོ་ལ་གསུམ། ད༡ འདོད་ཆགས། ད༢ ཞེ་སྡང༌། ད༣ གཏི་མུག་གི་རིགས་ཀྱི་རྒྱུད་དོ། ། ད༡ དང་པོ་ནི། འདུས་པ་ལུགས་སྲོལ་ཉི་ཤུ་རྩ་བཞིར་གྲགས། ། བླ་མེད་ཕ་རྒྱུད་གསང་བ་འདུས་པ་ལ་རྒྱ་གར་དུ་པདྨ་བཛྲ་ཆེན་པོ། ཡན་ལག་མེད་པའི་རྡོ་རྗེ། ཀླུ་སྒྲུབ། སྒེག་པའི་རྡོ་རྗེ། རྡོ་རྗེ་བཞད་པ། མགྲིན་གསུམ་དབང་པོ། དབྱངས་སྙན་སྐྱོང་བ། སངས་རྒྱས་ཡེ་ཤེས། ཤཱནྟི་པ། ཀུན་དགའ་སྙིང་པོ་སོགས་ལུགས་སྲོལ་ཉི་ཤུ་རྩ་བཞི་ཙམ་བྱུང་བར་གྲགས་པ་ལས། ཕྱི་མ་ནི་འཕགས་ཡུལ་གྱི་མཁས་པས་བཀྲལ་བ་ཡིན་ཀྱང་བླ་མེད་ཀྱི་རྒྱུད་ཡིན་ངེས་པ་ཞིག་རྣལ་འབྱོར་གྱི་རྒྱུད་དུ་བཀྲལ་(༡༥༤ན)བས་མི་འཐད་པར་བཞེད་དོ། ། བོད་དུ་བཀའ་སྲོལ་དྲུག་ཙམ་བྱུང་བ་ལས། ། གཙོ་བོ་འཕགས་དང་ཡེ་ཤེས་ཞབས་ལུགས་གཉིས། ། ལུགས་སྲོལ་དེ་དག་ལས་བོད་ཀྱི་ཡུལ་འདིར་འཕགས་ལུགས། ཡེ་ཤེས་ཞབས་ལུགས། ཤཱནྟི་པའི་ལུགས། རྡོ་རྗེ་བཞད་པའི་ལུགས། པདྨ་བཛྲ་གྱི་ལུགས། ཀུན་སྙིང་གི་ལུགས་བཅས་དྲུག་བྱུང་སྟེ། སྔ་དར་གྱི་སྐབས་སུ་ལྕེ་བཀྲ་ཤིས་ཞེས་བྱ་བས་བསྒྱུར་ཞིང་ཏནྟྲ་ཆེན་པོ་སྡེ་བཅོ་བརྒྱད་ལས་ཐུགས་རྒྱུད་གསང་བ་འདུས་པ་ཞེས་གྲགས། འགྲེལ་མཛད་བཤད་པའང་བྱུང་བ་ནི་རྡོ་རྗེ་བཞད་པའི་ལུགས་ཡིན་པས་མཚོན། འོན་ཀྱང་ཕྱི་མ་རྣམས་ཀྱི་དབང་བཤད་མན་ངག་རིང་དུ་མ་དར་ཞིང༌། གཙོ་བོར་འཕགས་སྐོར་ཏེ་ཀླུ་སྒྲུབ་ལུགས་དང༌། སངས་རྒྱས་ཡེ་ཤེས་ཞབས་ཀྱི་ལུགས་གཉིས་དབང་བཤད་མན་ངག་ཚང་བར་བྱོན་ཅིང་ད་ལྟའི་བར་དུ་གནས་པ་ཡིན་ནོ། ། སྔ་མ་མར་འགོས་ཇོ་བོ་ཆག་པཎ་ཆེན། ། ཕྱི་མ་རིན་བཟང་གཉན་རྭ་གཉོས་ཀྱི་ལུགས། ། དེ་ལ་སྔ་མ་འཕགས་ལུགས་ནི་ཕྱི་དར་གྱི་ཐོག་མར་ལོ་ཆེན་རིན་ཆེན་བཟང་པོས་འདུས་པའི་རྒྱུད་ཉིད་དང༌། དེའི་འགྲེལ་པ་སྒྲོན་གསལ་སོགས་གཞུང་ཆེ་ཕྲ་མང་པོ་བསྒྱུར། དེ་དག་གི་དབང་དང་བཤད་པ་སོགས་ཀྱང་དཔྱིས་ཕྱིན་པར་གསན། གཞན་ཡང་། ཕྱི་ནས་ལོ་ཙཱ་བ་མང་པོས་འཕགས་ཡུལ་ནས་ཉན་ཏེ་བསྒྱུར་བཤད་ཅི་རིགས་པར་མཛད་མོད་ཀྱི་གཙོ་བོར་མར་འགོས་ཀྱི་ལུགས་གཉིས་སུ་གྲགས་ཆེ། དེའང་མར་པ་ལོ་ཙཱ་ཆོས་ཀྱི་བློ་གྲོས་ཀྱིས་སློབ་དཔོན་ནཱ་རོ་པ་དང་ཡེ་ཤེས་སྙིང་པོ་ལ་སོགས་པ་བསྟེན་ནས་གསང་བ་འདུས་བའི་སྐོར་རྣམས་ཞུས། བོད་དུ་སློབ་མ་རྣམས་ལ་བསྟན་པ་ལས་སློབ་མའི་མཆོག་ཏུ་གྱུར་པ་ཀ་ཆེན་བཞི་ལས་ཁྱད་པར་དུ་མཚུར་སྟོན་དབང་དེ་ལ་འདུས་པའི་སྐོར་ཡོངས་སུ་རྫོགས་པར་གནང༌། དེས་ཁམས་པ་རོ་མཉམ་རྡོ་རྗེ་ལ་གནང་སྟེ། རོ་མཉམ་རྡོ་རྗེས་རྒྱ་གར་དུ་འདུས་པ་ཉན་པ་ལ་བྱོན་པའི་ཚེ་ལམ་དུ་རྒྱ་གར་བ་གཉིས་མར་པ་ལ་འདུས་པ་ཉན་དུ་འོངས་པ་དང་(༡༥༤བ)ཕྲད་ནས་ཚུར་བྱོན། མར་པ་གཤེགས་ཟིན་པས་མཚུར་སྟོན་ལ་འདུས་པ་གསན་པ་སོགས་ནས་ཉེ་བར་བརྒྱུད་དེ་མར་ལུགས་སུ་གྲགས་སོ། ། འགོས་ལུགས་ནི། ལོ་ཙཱ་བ་ཆེན་པོ་འགོས་ཁུག་པ་ལྷས་བཙས་ཀྱིས་སློབ་དཔོན་ཆེན་པོ་དཱི་པི་ཀ་ར་དང༌། དེ་ཝཱ་ཀ་ར་ཙནྡྲ་དང༌། བིརྱ་བྷ་དྲ་སོགས་པཎྜི་ཏ་བདུན་ཅུ། མཁའ་འགྲོ་མ་གཉིས་རྣམས་ལས་གསང་བ་འདུས་པའི་དབང་རྒྱུད་འགྲེལ་མན་ངག་དང་བཅས་པ་གསན། བོད་དུ་སྔར་འགྱུར་བའི་རྒྱུད་འགྲེལ་ཕྲན་དང་བཅས་པ་རྣམས་ལ་འགྱུར་བཅོས་དང་ཞུས་དག་སོགས་ཤིན་ཏུ་ལེགས་པར་མཛད། སློབ་མ་རྣམས་ལ་རྒྱ་ཆེར་བསྟན་པ་ལས་སློབ་མ་རྒྱུད་ཀྱི་ཀ་བ་ཚུགས་པ་བཞི། མན་ངག་གི་གདུང་མ་ཐེག་པ་བརྒྱད། ལས་ཚོགས་དང་ཕྲིན་ལས་ལ་མཁས་པ་དྲལ་ཕྱམ་གཤིབས་པ་ལྟ་བུ་གྲངས་མེད་ཀྱི་ནང་ནས་མར་པ་བ་སེང་གེ་རྒྱལ་མཚན་སོགས་སློབ་མའི་མཆོག་དྲུག་བྱུང༌། དེ་དག་ལས་ཉེ་བར་བརྒྱུད་དེ་འདུས་པའི་སྐོར་ཤིན་ཏུ་དར་བ་བྱུང་བ་ཡིན་ཏེ་འགོས་ལུགས་སུ་གྲགས་སོ། ། ཡང་ཇོ་བོ་རྗེ་ཨ་ཏི་ཤས་ནག་ཚོལ་གསུངས། དེས་རོང་པ་ཕྱག་སོར་པ་ལ་བཤད་པ་སོགས་ནས་ཇོ་བོ་ལུགས་སུ་གྲགས། ཡང་ཆག་ཆོས་རྗེ་དཔལ་གྱིས་པཎྜི་ཏ་རེ་བེནྡྲ་པ་སོགས་བསྟེན་ནས་འདུས་པ་གསན་པ། འུ་ཡུ་ཀུང་རབ་བླ་མ་དཔལ་སོགས་ལ་བཤད་པ་ནས་ཉེ་བར་བརྒྱུད་དེ་ཆག་ལུགས་སུ་གྲགས། ཡང་ཁ་ཆེ་པཎ་ཆེན་གྱིས་ས་སྐྱ་པཎྜི་ཏ་དང༌། དཔྱལ་ཆོས་ཀྱི་བཟང་པོ་སོགས་ལ་གནང་བ་ནས་པཎ་ཆེན་ལུགས་སུ་གྲགས། དེའང་ས་པཎ་ནས་བརྒྱུད་པ་ལ་ས་ལུགས་དང༌། ཆག་ལུགས་ཞེས་གཉིས་སུ་ཕྱེ་བས་འདུས་པ་ལུགས་སྲོལ་དྲུག་ཏུ་བགྲང་བར་མཛད། གཞན་ཡང་བཤད་སྲོལ་ཅུང་ཟད་འདྲ་མིན་ཡོད་པའི་རྒྱུན་སྣ་ཚོགས་ཞིག་བྱུང་འདུག་གོ །ཕྱི་མ་ཡེ་ཤེས་ཞབས་ལུགས་ནི་དང་པོར་ལོ་ཆེན་རིན་བཟང་ལས་རྐྱང་པོ་ཆོས་བློ་སོགས་ལ་དར་ཞིང་སྨྲྀ་ཏི་ཛྙཱ་ནས་ཀྱང་ཁམས་སུ་བཤད་པས་ཁམས་ལུགས་སུ་གྲགས་པ་(༡༥༥ན)བྱུང༌། པཎྜིཏ་སུ་ན་ཡ་ཤྲཱི་དང་གཉན་ལོ་ནས་བརྒྱུད་པ་ས་སྐྱ་པ་རྣམས་ལ་གྲགས་ཆེ་བས་ས་ལུགས་སུ་གྲགས་པ་དང༌། པཎྜིཏ་པུཎྱེ་ཤྲཱི་སོགས་ལས་རྭ་ཆོས་རབ་ཀྱིས་གསན་ནས་དར་བ་རྭ་ལུགས་དང༌། ཡང་གཉོས་འབྱུང་པོས་བ་ལིང་ཨཱ་ཙརྱབསྟེན་ཏེ་འདུས་པ་ཉན་པ་ནས་གཉོས་ལུགས་སུ་གྲགས་པ་སོགས་བྱུང་ངོ༌། ། དེ་ལྟར་ལུགས་སྔ་ཕྱི་གཉིས་ཀའི་ཕྱོགས་ལ་བོད་ཡུལ་འདིར་ཊཱིཀ་དང༌། སྒྲུབ་ཐབས་དཀྱིལ་ཆོག་དང་མན་ངག་གི་ཡི་གེ་སོགས་རྩོམ་མཁན་ནི་ཤིན་ཏུ་མང་པོ་ཞིག་བྱུང་སྣང་ངོ༌། ། མཆོག་གྱུར་མར་འགོས་སྒྲུབ་བཤད་བཀའ་བབས་ཤིང༌། ། མར་པའི་བཤད་རྒྱུན་མཚུར་ལས་བྱུང་བ་དང༌། ། འགོས་ལུགས་ཀ་གདུང་དྲལ་ཕྱམ་ལ་སོགས་རྒྱུན། ། ཀུན་མཁྱེན་གཉིས་པ་རིན་ཆེན་གྲུབ་ལ་བབས། ། ལུགས་སྲོལ་དེ་དག་གི་ནང་ནས་མཆོག་ཏུ་གྱུར་པ་མར་ལུགས་དང་འགོས་ལུགས་གཉིས་ཏེ། སྔ་མ་ལ་སྒྲུབ་པ་ཉམས་ལེན་དང་ཕྱི་མ་ལ་བཤད་པའི་བཀའ་བབས་ཤིང༌། མར་པའི་བཤད་རྒྱུན་མཚུར་སྟོན་དབང་གི་རྡོ་རྗེ་ནས་ཁམས་པ་རོ་མཉམ་རྡོ་རྗེ་དང༌། འཁོན་གད་པ་ཀཱིརྟི་སོགས་བརྒྱུད་དེ་བྱུང་བ་དང༌། འགོས་ཀྱི་བཤད་རྒྱུན་རྒྱུད་ཀྱི་ཀ་བ་བཞི་ལ་སོགས་པའི་བཤད་སྲོལ་གྱི་རྒྱུན་རྣམས་ཁ་ཆེ་པཎ་ཆེན་གྱི་སྐྱེ་བ་ཀུན་མཁྱེན་ཆོས་སྐུ་འོད་ཟེར་ཞེས་བསྟན་བཅོས་ཐམས་ཅད་གཟིགས་པ་ཙམ་གྱིས་ཐུགས་སུ་ཆུད་པ་དེ་ལ་འདུས། དེས་འཕགས་ཡོག་དུས་གསུམ་ལ་མཁས་པའི་འཕགས་པ་འོད་ལ་གནང༌། དེ་ལས་བུ་སྟོན་རིན་པོ་ཆེས་གསན་ཅིང་ཤིན་ཏུ་མཁས་པར་གྱུར་ཏེ་སྒྲོན་མ་གསལ་བའི་ཊཱིཀ་ཆེན་སོགས་ཡིག་སྣ་མང་དུ་མཛད། དེའི་སློབ་མ་ཁྱུད་ལྷས་པ་གཞོན་ནུ་བསོད་ནམས་ལས་བདག་ཉིད་ཆེན་པོ་བློ་བཟང་གྲགས་པས་གསན་ཏེ་འདུས་པའི་བསྟན་པས་ས་སྟེང་ཐམས་ཅད་ཁྱབ་པར་མཛད་དོ། ། གསང་འདུས་སྤྱན་རས་གཟིགས་ནི་ཇོ་བོ་རྗེའི་རང་ལུགས་ལྷ་བཙུན་བྱང་ཆུབ་འོད་ལ་གནང་བའི་བཀའ་སྲོལ་ཟུར་པ་ཡིན་ཅིང་དབང་རྒྱུན་ཙམ་ད་ལྟའང་(༡༥༥བ)བཞུགས། འདུས་པ་ལུགས་གཉིས་ཀྱི་དབང་བཀའ་དང་རྒྱུད་ཀྱི་ལུང་ཙམ་ཀུན་ལ་ཁྱབ་ཅིང༌། རིམ་ལྔའི་སྨར་ཁྲིད་ཉམས་ལེན་དང་བཅས་པའི་རྒྱུན་ཞྭ་ལུ་དང༌། རྩ་རྒྱུད་ལ་འགྲེལ་ཆེན་སྒྲོན་མ་གསལ་བ་མཆན་བུ་མཐའ་དཔྱོད་བཅས་སྦྱར་བ་བཞི་སྒྲགས་ཀྱི་བཤད་རྒྱུན་དགེ་ཕྱོགས་སུ་མ་ཆད་པར་བཞུགས་སོ། ། དེའང་རྗེ་མར་པ་ལ་འདུས་པའི་བཤད་རྒྱུན་བདུན་ཙམ་བཞུགས་པར་གྲགས་ཀྱང་ཕྱིས་སུ་རྒྱུན་མི་སྣང༌། འགོས་ལོ་ཙཱས་འཕགས་སྐོར་ལྔའི་གཞུང་ལ་བརྟེན་པའི་བཤད་ལུགས་སྲོལ་དུ་མ་གསན་པ་ཐམས་ཅད་ཀྱི་ནང་ནས། བྷངྒ་ལའི་མཁས་པ་མངོན་ཤེས་ཅན། ཟ་ཧོར་གྱི་མཁས་པ་དེ་བཱི་ཀ་ར་སྟེ་བཙུན་མོ་ཅན། རྡོ་རྗེ་གདན་གྱི་མཁས་པ་ནག་པོ་དམ་ཚིག་རྡོ་རྗེ་གསུམ་གྱི་ལུགས་ལ་གཙོ་བོར་མཛད་ཅིང༌། དེ་དག་ལས་ཀྱང་ནག་པོ་པའི་ལུགས་རྩ་བར་བཟུང་སྟེ་འཆད་པའི་སྲོལ་ལྟར་ན། རྒྱུད་ཀྱི་རྒྱལ་པོ་ཆེན་པོ་འདི་ལ་འཕགས་པ་ཡབ་སྲས་ཀྱི་དགོངས་པས་ཆོས་རྣམ་པ་གཉིས་སུ་བཞེད་དེ། དངོས་པོ་ཡང་དག་པའི་དབང་དུ་བྱས་པ་དང༌། གནས་སྐབས་ཀྱི་ཁྱད་པར་ཐོབ་པའི་དབང་དུ་བྱས་པའོ། ། དང་པོ་ནི། དངོས་པོ་མེད་ལ་སྒོམ་པ་མེད། ། ཅེས་སོགས་ཀྱི་བསྟན་དོན་བདེན་པ་གཉིས་སུ་མེད་པའི་གནས་ལུགས་སྨྲ་བརྗོད་ལས་འདས་པ་ཡིན་ལ། གཉིས་པའི་དབང་དུ་བྱས་ནས། བརྗོད་བྱ། རྗོད་བྱེད། དེ་དག་གི་འབྲེལ་སྦྱར་བ་གསུམ་གྱིས་བསྡུས། དང་པོ་ནི། འགོས་ལོ་ཙཱའི་གཏང་ཐུན་ཆེན་མོ་ལས། རྒྱུད་ལ་འཇུག་པར་བྱེད་པའི་རྟེན་གྱི་གང་ཟག་དེས་སྦྱང་གཞི་རང་བཞིན་གྱི་ཆོས་ཐ་མལ་པའི་སྣང་བ་འདི་སྦྱོང་ཞིང་། སྤང་བྱ་རང་གི་སེམས་ཀྱི་རྒྱུད་ལ་རྟོག་པ་གསུམ་གྱི་ས་བོན་ཡོད་པ་དེ་སྤོང་བའི་ཆེད་དུ་དམིགས་ཡུལ་དྲུག་པ་རྡོ་རྗེ་འཆང་ཆེན་པོ་ལ་དམིགས་ནས། ལམ་སྨིན་གྲོལ་གཉིས་ཉམས་སུ་བླངས་པས་འབྲས་བུ་རེ་ཞིག་པ་དང་མཐར་ཐུག་པའི་འབྲས་བུ་ཐོབ་པ་ནི་གསང་བ་འདུས་པའི་བརྗོད་བྱ་ཡིན་ནོ། །ཞེས་འབྱུང་བ་ལྟར་བརྗོད་བྱའི་དོན་དྲུག་སྟེ། རྒྱུད་ལ་འཇུག་པར་བྱེད་པའི་(༡༥༦ན)རྟེན་གྱི་གང་ཟག་དེས་ཤེས་ཤིང་གཞི་བསྒྱུར་བར་བྱ་བ་སྦྱང་གཞི་རང་བཞིན་གྱི་ཆོས། སྤང་བྱ་མི་མཐུན་པ་ལམ་གྱི་དྲི་མ། གང་ལ་དམིགས་པར་བྱ་བའི་ཡུལ། ཇི་ལྟར་ཉམས་སུ་ལེན་པའི་ཐབས། ཉམས་ལེན་མཐར་ཕྱིན་པའི་འབྲས་བུ་རྣམས་སོ། ། དང་པོ་གང་ཟག་ལ་གཉིས། སྤང་བྱ་བདག་ཏུ་ལྟ་བ་མུ་སྟེགས་པའི་གང་ཟག་དང༌། བླང་བྱ་བདག་མེད་སྨྲ་བ་ནང་པའི་གང་ཟག་གོ། ། ཕྱི་མ་ལ་ཐེག་དམན་ཉན་རང་གཉིས། ཐེག་ཆེན་ཆགས་བྲལ་དང་ཆགས་