Tibetan
ཆེར་མཆེད་ཅིང་འཕེལ་བའི་རྒྱུན་ལས་ཕྱིས་མཚོ་སྣ་པ་ཆེན་(༡༤༣ན)པོ་བྱོན་ཏེ་མནལ་ལམ་དུ་ཡོན་ཏན་འོད་ལས་མདོ་རྩ་གསན། མགོན་པོ་ཏྲཀྴད་ཀྱིས་བསྐུལ་ནས་འདུལ་བའི་རྣམ་བཤད་ཉི་མའི་འོད་ཟེར་སོགས་བརྩམས་ཏེ་འདུལ་བའི་བསྟན་པ་གཞི་བཞེངས་སུ་བཏང༌། གཞན་ཡང་ཕྱི་དར་བོད་ཀྱི་འདུལ་འཛིན་ལ་གྲགས་ཆེ་བ། རྒྱ་འདུལ་བ་དབང་ཕྱུག་ཚུལ་ཁྲིམས་དང༌། བྱ་འདུལ་བ་དབང་ཕྱུག་འབར་སོ་སོས་མདོ་རྩའི་ཊཱིཀ་མཛད་ཅིང་ཟུལ་ཕུ་སོགས་འཆད་ཉན་གྱི་ཆོས་གྲྭ་ཚུགས་པས་འདུལ་བ་བྱ་ལ་ཐུག་ཟེར་བ་བྱུང༌། གཞན་ཡང་རྩིས་འདུལ་བ་འཛིན་པ་སོགས་ཁྱད་པར་འཕགས་པ་མང་དུ་བྱོན་པས་བཤད་རྒྱུན་དེ་ཉིད་འཕེལ་བའི་རྒྱུན་བསོད་ནམས་གྲགས་ལས་ཀུན་མཁྱེན་བུ་སྟོན་གྱིས་གསན། ཡང་ཁ་ཆེ་པཎ་ཆེན་གྱིས་ས་པཎ་ལ་མདོ་རྩ་བཤད། སྣར་ཀླས་མོ་ཆེར་དབྱར་གནས་མཛད་སྐབས་ས་གའི་ལྷས་མཛད་པའི་འདུལ་བ་མེ་ཏོག་ཕྲེང་བརྒྱུད་གསུངས་པ། སེང་གེ་ཟིལ་གནོན་དང་ཤངས་པ་ཇོ་སྟན་གཉིས་ཀྱིས་གསན་ནས་སོ་སོས་ཊཱིཀ་བྱས། སྔ་མ་ལ་ཚད་མའི་སྐྱེས་བུས་གསན། དེ་ལ་བུ་སྟོན་གྱིས་གསན་ཏེ་ཊཱིཀ་ཆེན་ཡང་བརྩམས། དེ་ལྟར་ཀུན་མཁྱེན་བུ་སྟོན་རིན་ཆེན་གྲུབ་ལ་འདུལ་བའི་བཤད་རྒྱུན་གྱི་བཀའ་བབས་ཏེ་ལས་ཆོག་ཆེན་མོ་དང༌། མདོ་རྩའི་དཀའ་འགྲེལ་སོགས་མཛད་ཅིང་འཆད་ཉན་རྩལ་དུ་བཏོན་ནས་རྩོད་པའི་དུས་མཐར་བསྟན་པ་གསལ་བའི་སྒྲོན་མེ་ཐུབ་དབང་གཉིས་པའི་ཕྲིན་ལས་མཛད་དོ། ། གཞན་ཡང་ཀུན་མཁྱེན་རོང་པོས་པཎ་ཆེན་ནགས་རིན་ལ་བརྟེན་ཏེ་རྒྱ་དཔེ་ལ་གཏུགས་ཤིང་རྣམ་བཤད་ཀྱིས་གཏན་ལ་ཕབ་པའི་ཡིག་ཆ་བཤད་རྒྱུན་སོགས་ཀྱང་བྱུང༌། མདོར་ན་འདུལ་བའི་བསྟན་བཅོས་ཀྱི་ནང་ནས་མདོ་རྩ་བའི་བཤད་རྒྱུན་སྔ་རབས་ཀྱི་བཀའ་སྲོལ་ད་ལྟ་བར་རྒྱུན་ཆགས་པར་གནས་སོ། ། ཉ༢ གཉིས་པ་[མངོན་པའི་བཤད་རྒྱུན་བྱུང་ཚུལ་]ནི། ཐོགས་མེད་མཆེད་མཛད་མངོན་པ་གོང་འོག་གཉིས། ། བློ་བརྟན་གང་སྤེལ་དབྱིག་བཤེས་སོགས་ཀྱིས་སྤེལ། ། ཅེས་པ་སྟེ། དེའང་བཤད་བྱའི་གཞི་ནི་དམ་པའི་ཆོས་(༡༤༣བ)ཀྱི་མ་མོ་ཆོས་ཀུན་གྱི་བཤད་པའི་གཞི་དང་འཇུག་སྒོར་གྱུར་པ་རྒྱ་མཚོ་ཆེན་པོ་དང་འདྲ་བའི་ཆོས་མངོན་པ་ཉིད་ཡིན་ལ། འཆད་བྱེད་བསྟན་བཅོས་ནི། ཐེག་ཆེན་མངོན་པ་ཐོགས་མེད་ཀྱིས་བྱམས་པ་ལས་ཆོས་མངོན་སྟོང་ཕྲག་བརྒྱ་པ་སོགས་གསན་ནས་མངོན་པ་ཀུན་ལས་བཏུས་པ་མཛད་པ་དང༌། ཐེག་དམན་མངོན་པ་གཅུང་དབྱིག་གཉེན་གྱི་མངོན་པ་མཛོད་རང་འགྲེལ་དང་བཅས་པ་སྟེ། སྐུ་མཆེད་གཉིས་ཀྱིས་མཛད་པའི་གཞུང་ལ་མངོན་པ་གོང་འོག་ཏུ་གྲགས་ཤིང༌། ཀུན་བཏུས་ལ་ཁ་ཆེ་བློ་བརྟན། སློབ་དཔོན་རྒྱལ་པོའི་སྲས་ལ་སོགས་པས་འགྲེལ་པ་མཛད། མཛོད་ལ་དབྱིག་གཉེན་རང་གི་སློབ་དཔོན་ཁ་ཆེ་འདུས་པ་བཟང་པོ། སློབ་མ་ཕྱོགས་ཀྱི་གླང་པོ། མངོན་པ་རང་ལས་མཁས་པ་བློ་གྲོས་བརྟན་པ། གང་སྤེལ། རྒྱལ་པོའི་སྲས། དབྱིག་གི་བཤེས་གཉེན་སོགས་ཀྱིས་འགྲེལ་པ་དང་འགྲེལ་བཤད་མཛད་ཅིང་སྤེལ་ལོ། ། ཛི་ན་སྐ་ཅོག་དག་གིས་བསྒྱུར་ཅིང་བཤད། ། དབས་དང་གྲུམ་ལ་བརྟེན་ནས་ཡས་སུ་དར། ། བོད་འདིར་བསྟན་པ་སྔ་དར་གྱི་ཚེ་པཎྜི་ཏ་ཛི་ན་མི་ཏྲ་དང༌། ལོ་ཙཱ་བ་སྐ་བ་དཔལ་བརྩེགས་སོགས་ཀྱིས་གདགས་པའི་བསྟན་བཅོས་ལས། འཇིག་རྟེན་གདགས་པ། རྒྱུ་གདགས་པ། ལས་གདགས་པ་གསུམ་དང༌། མངོན་པ་གོང་འོག་རང་འགྲེལ་དང་འགྲེལ་པ་རྒྱལ་སྲས་མ་སོགས་བསྒྱུར་ནས་བཤད། དེ་དག་གི་སློབ་མ་སྣ་ནམ་ཟླ་བའི་རྡོ་རྗེ་དང༌། ལྷ་ལུང་དཔལ་གྱི་རྡོ་རྗེ། དབས་ཡེ་ཤེས་རྒྱལ་ལ་གསུམ་ལས། ཕྱི་མས་ཁམས་སུ་བྱོན་ནས་གྲུམ་རྒྱལ་བའི་ཡེ་ཤེས་ལ་བཤད་ཅིང་དེ་ལས་དབུས་གཙང་གི་ལྗོངས་སུ་ཡས་དར་བ་ཡིན་ནོ། ། ཀུན་མཁྱེན་དྷརྨ་ཀ་རས། འགོས་ལོ་སོགས་ཀྱིས་བརྒྱུད་པ་འདི་ནས་དར་བ་ནི་མངོན་པ་གོང་མ་ཁོ་ན་ཡིན་ལ། མཛོད་ཀྱི་བཤད་སྲོལ་ལ་བརྒྱུད་པ་བསྟར་ཆགས་འདེད་རྒྱུ་མེད་པར་སྨྲས་ཀྱང༌། བཤད་སྲོལ་འདི་ལས་ཀུན་བཏུས་གཙོ་ཆེར་དར་བའི་བྱུང་བ་ནི་བྱུང་སྲིད་མོད་ཀྱི། (༡༤༤ན)མཛོད་འགྲེལ་པ་དང་བཅས་པའང་འདི་ལས་ངེས་པར་འབྱུང་དགོས་ཏེ། ཀུན་མཁྱེན་བུ་སོགས་མཁས་པ་ཐམས་ཅད་ཀྱིས་བརྒྱུད་ཁུངས་འདི་ཉིད་གཙོ་བོར་སྨོས་པའི་ཕྱིར་རོ། །ཞེས་གསུངས་སོ། ། དེ་རྗེས་བྲང་ཏི་དར་མ་སྙིང་པོས་ཀུན་བཏུས་ལ་འཆད་ཉན་རྩལ་དུ་བཏོན། དཔང་ལོ་ཆེན་པོས་རྣམ་བཤད་ཤེས་བྱ་རབ་གསལ། པཎ་ཆེན་ཤཱཀྱ་མཆོག་གིས་བཞེད་དོན་རྒྱ་མཚོའི་རླབས་ཕྲེང་སོགས་མཛད་ཅིང་འཆད་ཉན་སྤེལ་ཡང་བར་སྐབས་ནས་མཛོད་ཀྱི་འཆད་ཉན་དར་ཞིང༌། ཀུན་བཏུས་ཀྱི་འཆད་ཉན་བཤོལ་བས་དེང་སང་རྒྱུན་མི་བཞུགས་སོ། ། པཎ་ཆེན་སྨྲྀ་ཏིས་ཤེས་རབ་གྲགས་སོགས་ལ། ། མཛོད་ཀྱི་བཤད་རྒྱུན་རོག་འབན་ཐོ་ཡིས་བཟུང༌། ། དེང་སང་མཛོད་ཀྱི་བཤད་རྒྱུན་གཙོ་བོར་དར་བ་ནི་ནཱ་རོ་པའི་སློབ་མ་པཎྜི་ཏ་སྨྲྀ་ཏི་ཛྙཱ་ན་བོད་དུ་བྱོན་ནས་ཁམས་ཀྱི་འདན་ཀློང་ཐང་དུ་མངོན་པ་མཛོད་ཀྱི་བཤད་པ་མཛད་པའི་ཚེ་མཁས་བཙུན་མང་དུ་འདུས་པས་མངོན་པ་འོག་མའི་བསྟན་པ་གཞི་བཞེངས་སུ་བཏང༌། དེའི་སློབ་མ་གཡས་ཆེན་པོ་ཤེས་རབ་གྲགས་སོགས་ཀྱིས་དབུས་གཙང་ཁམས་གསུམ་དུ་སྤེལ། བྲང་ཏི་དར་མ་སྙིང་པོ་ལ་མངོན་པ་གོང་འོག་གཉིས་ཀའི་བཤད་སྲོལ་གྱི་བཀའ་བབས། དེའི་སློབ་མ་རོག་ཆོས་ཀྱི་བརྩོན་འགྲུས་དང་གོ་བོ་ཡེ་ཤེས་འབྱུང་གནས། ཕྱི་མའི་སློབ་མ་འབན་དཀོན་མཆོག་རྡོ་རྗེ། དེའི་སློབ་མ་ཐོག་གར་གནམ་ལྡེའམ་ཐོ་ཀུན་དགའ་རྡོ་རྗེ་རྣམས་ཀྱིས་རྒྱ་ཆེར་སྤེལ། མཆིམས་བརྩོན་སེང་གེས་ནག་འཇམ་དུ་གྲགས་པའི་ཊཱིཀ་མཛད་ཅིང་བོད་ཊཱིཀ་གི་ཐོག་མ་བྱུང༌། དེ་ནས་མཆིམས་ནམ་མཁའ་གྲགས་དང་བསམ་གཏན་བཟང་པོ། བཅོམ་ལྡན་རིག་རལ། རེད་མདའ་བ་བརྒྱུད་འཛིན་དང་བཅས་པ་སོགས་མཁས་པ་དུ་མས་འགྲེལ་ཊཱིཀ་མཛད་ཅིང་སྤེལ་ལོ། ། ཤཱཀ་ཤྲཱིས་ས་པཎ་ལ་གསུངས་ཉེ་བརྒྱུད་བཅས། ། ཁྱད་འཕགས་སྨྲ་བའི་ལྗགས་རིང་གཡོ་བར་མཛད། ། པཎ་ཆེན་ཤཱཀྱ་ཤྲཱིས་ས་སྐྱ་པཎ་ཆེན་ལ་མཛོད་ཀྱི་བཤད་པ་གནང་ཞིང༌། (༡༤༤བ)ས་པཎ་གྱིས་མནལ་ལམ་དུ་དབྱིག་གཉེན་ལས་ཟླ་གཅིག་བར་དུ་གསན་པའི་ཐུགས་ཉམས་བྱུང་བས་ཉེ་བརྒྱུད་དུ་གྱུར་པ་བཅས་ཁྱད་པར་དུ་འཕགས་པའི་བཤད་སྲོལ་གྱི་སྨྲ་བའི་ལྗགས་རིང་དུ་གཡོ་བར་མཛད་དོ། ། དེ་ལྟར་བཤད་བྱའི་ཆོས་མངོན་པ་དེ་ལ་གསེར་མདོག་པཎ་ཆེན་གྱིས་བརྗོད་བྱ་དོན་གྱི་མངོན་པ་ལྷག་པ་ཤེས་རབ་ཀྱི་བསླབ་པ་འཁོར་བཅས་དང༌། རྗོད་བྱེད་ཚིག་གི་མངོན་པ་དེ་སྟོན་པའི་གསུང་རབ་གཉིས་སུ་བསྡུས་ནས་འཆད། བོད་བྱིངས་རྣམས་ནི། མཛོད་ལས། ཆོས་མངོན་ཤེས་རབ་དྲི་མེད་རྗེས་འབྲང་བཅས། ། དེ་ཐོབ་བྱ་ཕྱིར་གང་དང་བསྟན་བཅོས་གང༌། ། ཞེས་གསུངས་པའི་དོན། དོན་དམ་པའི་ཆོས་མངོན་པ་དང༌། བརྡར་བཏགས་པའོ། ། དང་པོ་ནི། ཆོས་རྣམས་ཀྱི་རང་དང་སྤྱིའི་མཚན་ཉིད་རྣམ་པར་འབྱེད་པའི་ཟག་པ་མེད་པའི་ཤེས་རབ་ཕུང་པོ་ལྔའི་འཁོར་དང་བཅས་པའོ། ། གཉིས་པ་ལ་གཉིས་ཏེ། ཟག་བཅས་ཀྱི་ཤེས་རབ་དང་། བསྟན་བཅོས་སོ། ། དང་པོ་ནི། ཐོས་བསམ་བསྒོམ་གསུམ་གྱི་ཤེས་རབ་སྦྱོར་བྱུང་དང་སྐྱེས་ཐོབ་ཤེས་རབ་ཟག་བཅས་རྣམས་སོ། ། གཉིས་པ་ནི། བསྟན་བཅོས་མངོན་པ་སྡེ་བདུན་ལ་སོགས་པ་དག་གོ། ། དེའི་དོན་འཆད་པ་མཛོད་ཀྱི་བསྟན་བཅོས་ཀྱི་བརྗོད་བྱ་ལུས་རྣམ་པར་གཞག་པ་ཡང༌། ཟག་བཅས་ཟག་པ་མེད་ཆོས་རྣམས། ། ཞེས་པས་ཀུན་ནས་ཉོན་མོངས་པའི་ཕྱོགས་དང༌། རྣམ་པར་བྱང་བའི་ཕྱོགས་གཉིས་སུ་ཅི་རིགས་པར་འདུ་ཞིང༌། གོ་རིམ་གྱི་འབྲེལ་ཡང་ཟག་བཅས་དང་ཟག་མེད་ཀྱིས་བསྡུས་པའི་ཆོས་དེ་དག་ཀྱང་ཕུང་ཁམས་སྐྱེ་མཆེད་ཀྱིས་བསྡུས་པའི་ཕྱིར་གནས་དང་པོར་ཕུང་ཁམས་སོགས་ཀྱི་རྣམ་བཞག་བསྟན་ཅིང༌། ཁམས་བསྟན་པ་ཤས་ཆེ་བའི་ཕྱིར་ཁམས་ཀྱི་མཛོད་ཀྱི་གནས་ཞེས་བསྒྲགས་སོ། ། དེ་བཞིན་དུ། ཀུན་ཉོན་དང་རྣམ་བྱང་དག་ལ་དབང་པོའི་སྒོ་ནས་འཇུག་ཅིང་དམིགས་པའི་ཕྱིར་དབང་པོ་བསྟན་པ་གནས་གཉིས་པ་དང༌། ཁམས་དང་འགྲོ་བ་སྐྱེ་གནས་སོགས་ཀྱིས་ཕྱེ་བའི་ཁམས་དང་དབང་པོའི་བདག་ཉིད་ཉོན་མོངས་ཅན་སེམས་ཅན་(༡༤༥ན)སྐྱེ་བའི་རིམ་པ་རྟེན་འབྲེལ་བཅས་དང༌། སྣོད་གྲུབ་ཚུལ་སོགས་སྣོད་བཅུད་ཀྱི་འཇིག་རྟེན་བསྟན་པ་གནས་གསུམ་པ་དང༌། སྣོད་བཅུད་ཀྱི་ཁྱད་པར་མཐའ་ཡས་པ་རྣམས་ཀྱང་བྱེད་པོ་གཞན་ཡོད་པ་མ་ཡིན་པའི་ཕྱིར་ལས་ཀྱིས་བསྐྱེད་པས་ལས་བསྟན་པ་གནས་བཞི་པ་དང༌། ལས་ཀྱང་ཉོན་མོངས་པ་དང་བཅས་པས་བསྐྱེད་ནུས་ཀྱི་དེ་མེད་པར་མ་ཡིན་པས་ཕྲ་རྒྱས་བསྟན་པ་གནས་ལྔ་པ་དང༌། ཉོན་མོངས་པ་དེ་རྣམ་པར་བྱང་བའང་མི་སྡུག་པ་སྒོམ་པ་ལ་སོགས་པའི་རིམ་པས་ལམ་རྫོགས་པ་ལ་ལྟོས་པའི་ཕྱིར་ལམ་དང་ལམ་སྒྲུབ་པ་པོའི་གང་ཟག་ཀྱང་བསྟན་པ་གནས་དྲུག་པ་དང༌། ལམ་ལ་ཞུགས་པས་ཉོན་མོངས་པ་འཇོམས་པའང་ཡེ་ཤེས་ཀྱིས་བྱེད་པས་ཡེ་ཤེས་དང་དེའི་ཡོན་ཏན་རྣམས་བསྟན་པ་གནས་བདུན་པ་དང༌། ཡེ་ཤེས་རྣམས་ཀྱང་བསམ་གཏན་ལ་བརྟེན་པ་འབའ་ཞིག་ཡིན་པས་ན་བསམ་གཏན་དང༌། དེའི་རང་བཞིན་གྱི་ཡོན་ཏན་བཅས་སྙོམས་འཇུག་བསྟན་པ་གནས་བརྒྱད་པ་སྟེ། གང་ཟག་གཏན་ལ་དབབ་པ་ཞེས་པ་གནས་དགུ་པ་ནི་གནས་བརྒྱད་པ་འདི་ཉིད་ཀྱི་ཞར་ལས་འོངས་པའོ་ཞེས་བཤད་དོ། ། གནས་དེ་དག་ཆོས་དྲུག་གིས་འཆད་དེ། གྲངས་དང་མཚན་ཉིད་བསྟན་པ་དང༌། ། དེ་བཞིན་རབ་དབྱེ་བསྡུ་བ་དང༌། ། སྒྲུབ་བྱེད་མཚུངས་པར་ལྡན་པ་སྟེ། ། ཆོས་ནི་དྲུག་ཏུ་རབ་ཏུ་བསྒྲགས། ། ཞེས་སོ། ། དེ་ལ་གྲངས་ནི། ཟག་བཅས་ཟག་པ་མེད་ཆོས་རྣམས། ། ཞེས་དང༌། འདུས་བྱས་ཆོས་རྣམས་དེ་དག་ཀྱང༌། ། གཟུགས་ལ་སོགས་པའི་ཕུང་པོ་ལྔ། ། སོགས་སོ། ། མཚན་ཉིད་ནི། ཚོར་བ་མྱོང་བའོ་འདུ་ཤེས་ནི། ། མཚན་མར་འཛིན་པའི་བདག་ཉིད་དོ། ། སོགས་སོ། ། རབ་དབྱེ་ནི། བསྟན་ཡོད་འདིར་ནི་གཟུགས་གཅིག་པུ། ། ཐོགས་དང་བཅས་པ་གཟུགས་ཅན་བཅུ། ། སོགས་སོ། ། བསྡུ་བ་ནི། ཕུང་པོ་དང་ནི་སྐྱེ་མཆེད་དང༌། ། ཁམས་གཅིག་གིས་ནི་ཐམས་ཅད་བསྡུས། ། སོགས་སོ། ། མཚུངས་ལྡན་ནི། བདེ་བ་དག་དང་འདོད་ཆགས་སུ། །(༡༤༥བ) སོགས་སོ། ། སྒྲུབ་བྱེད་ནི། དབང་ཕྱུག་སོགས་མིན་རིམ་སོགས་ཕྱིར། ། ཞེས་པ་ལ་སོགས་པས་སོ། ། ཉ༣ གསུམ་པ་[ཕར་ཕྱིན་གྱི་བཤད་རྒྱུན་བྱུང་ཚུལ་]ནི། ཤེར་ཕྱིན་སྦས་དོན་མངོན་རྟོགས་རྒྱལ་ཚབ་ཆེས། ། ལེགས་བཀྲལ་ཐོགས་མེད་མཆེད་ཀྱིས་སྣང་བར་མཛད། ། བཀའ་འཁོར་ལོ་བར་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དགོངས་འགྲེལ་ཤིང་རྟའི་སྲོལ་གཉིས་སུ་བྱུང་བ་ལས། སྦས་དོན་མངོན་རྟོགས་ཀྱི་རིམ་པ་ནི་རྒྱལ་ཚབ་བྱམས་པས་ལེགས་པར་བཀྲལ་བའི་གཞུང་མངོན་རྟོགས་རྒྱན་དུ་གྲགས་པ་འདི་ཉིད་དེ། གཞུང་དེ་དང་ཉི་ཁྲི་གཉིས་དོན་གཅིག་པར་དགོངས་ནས་འཕགས་པ་ཐོགས་མེད་ཀྱིས་འགྲེལ་པ་དེ་ཉིད་རྣམ་ངེས། མཆེད་དབྱིག་གཉེན་གྱིས་རྣམ་རིག་ཏུ་བཀྲལ་བའི་ཡུམ་གསུམ་གནོད་འཇོམས་སོགས་ཀྱིས་ཐོག་མར་སྣང་བར་མཛད་དོ། ། འཕགས་སེང་གཉིས་ཀྱིས་རང་སྟོང་ཚུལ་དུ་བཀྲལ། ། བཤད་སྲོལ་བཟང་བས་ཕྲིན་ལས་ཁྱད་དུ་འཕགས། ། ཁྱད་པར་དབྱིག་གཉེན་གྱི་སློབ་མ་ཕར་ཕྱིན་རང་ལས་མཁས་པར་གྲགས་པ་འཕགས་པ་རྣམ་གྲོལ་སྡེས་ངོ་བོ་ཉིད་མེད་པར་སྨྲ་བའི་དབུ་མའི་ཚུལ་དང་མཐུན་པར་རྒྱན་དང་ཉི་ཁྲི་སྦྱར་བའི་འགྲེལ་པ་ཉི་ཁྲི་སྣང་བ་མཛད་པས་དེ་ཕྱིན་ཆད་མདོ་རྒྱན་སྦྱར་བའི་སྲོལ་གཏོད། དེའི་འོག་ཏུ་གྲོལ་སྡེ་རྣམ་པར་སྣང་མཛད་བཟང་པོ་སོགས་ཀྱིས་ཀྱང་ཡུམ་རྒྱས་འབྲིང་དང་སྦྱར་བའི་འགྲེལ་པ་ཅི་རིགས་པར་མཛད་ཅིང༌། ཁྱད་པར་སློབ་དཔོན་སེང་གེ་བཟང་པོས་ཤེར་ཕྱིན་གྱི་ལུགས་སྲོལ་མཐའ་དག་ཐུགས་སུ་ཆུད། རྗེ་བཙུན་བྱམས་པས་གནང་བ་སྩལ་བའི་བྱིན་རླབས་ཀྱི་མཐུ་ལས་ཡུམ་བར་པ་དང་སྦྱར་བ་ལེ་བརྒྱད་མའི་བསྡུས་དོན། བརྒྱད་སྟོང་པ་དང་སྦྱར་བ་བརྒྱད་སྟོང་འགྲེལ་ཆེན། སྡུད་པ་དང་སྦྱར་བ་སྡུད་འགྲེལ་རྟོགས་སླ། ཡུམ་གསུམ་ཀ་དང་སྦྱར་བ་འགྲེལ་པ་དོན་གསལ་སོགས་མཛད། དེ་ལྟར་རང་སྟོང་གི་ཚུལ་དུ་བཀྲལ་བ་དེ་དག་བཤད་སྲོལ་ཤིན་ཏུ་བཟང་བས་དེ་ཕྱིན་གྱི་ཤེར་ཕྱིན་འཆད་པ་པོའི་སློབ་དཔོན་མཐའ་དག་དེའི་རྗེས་སུ་འབྲང་བས་ཕྲིན་ལས་ཁྱད་པར་དུ་འཕགས་པའོ། །(༡༤༦ན) བོད་འདིར་རླངས་དང་བཻ་རོའི་བཀའ་དྲིན་ལས། ། ཤེར་ཕྱིན་བཤད་པ་ཉམས་ལེན་རྒྱ་ཆེར་བྱུང༌། ། བོད་ཀྱི་ལྗོངས་འདིར་འཁོར་ལོ་བར་པ་ཤེར་ཕྱིན་གྱི་སྐོར་འཕགས་ཡུལ་དུ་གང་བཞུགས་ཐམས་ཅད་བྱོན་པར་གྲགས་ཏེ། བསྟན་པ་སྔ་དར་གྱི་དུས་སུ་རླངས་ཁམས་པ་གོ་ཆས་འཕགས་ཡུལ་དུ་བྱོན་ཏེ་ཤེར་ཕྱིན་འབུམ་པ་ཐུགས་ལ་བཟུང་ནས་བོད་དུ་ལེགས་པར་བསྒྱུར། རྒྱལ་པོ་ཁྲི་སྲོང་ལྡེའུ་བཙན་གྱིས་ཐེག་ཆེན་གྱི་ཆོས་ལ་གུས་པ་ཆེན་པོས་ཉིད་ཀྱི་མཚལ་ཁྲག་དང་ར་དཀར་མོའི་འོ་མ་སྦྱར་ནས་བྲིས་པ་རེག་ཟིག་དམར་པོར་གྲགས་ཏེ། ལྷ་ས་གོང་གི་སོ་ཕག་མཆོད་རྟེན་གྱི་ནང་དུ་བཞུགས་པ་བླ་འགྱུར་ཆུང་ངུ་། ཡང་དབས་མཉྫུ་ཤྲཱི། ཉང་ཨིནྡྲ་ལྤ་རོ་གཉིས་ཀྱིས་རྒྱ་གར་ནས་དཔེ་བླངས་ཏེ་བསྒྱུར་བ། བཙན་པོའི་དབུ་སྐྲའི་གཞོབ་རམ་དང་ར་དཀར་མོའི་འོ་མ་ལ་སྦྱར་ནས་བྲིས་པ་རེག་ཟིག་སྔོན་པོར་གྲགས་པ་པོད་བཞི་མ་ཞིག་ཀྱང་བྱུང་བར་གྲགས། དེ་ལྟར་རེག་ཟིག་སྔོ་དམར་གཉིས་པོ་ནི་འགྲེས་རྐང་ཐམས་ཅད་མི་རྒྱས་པས། པ་གོར་བཻ་རོ་ཙ་ན་སླར་ཡང་ཞུ་ཆེན་མཛད་དེ་འགྲེས་རྐང་ཆད་པ་སོགས་བསབས། ཚིག་སྣ་བསྲིངས་ཏེ་བརྗོད་བདེ་བར་བསྒྱུར། འདི་དུས་ལོ་ཙཱ་ཆེན་པོ་ཉིད་ཀྱིས་ཕྱག་བྲིས་མཛད་དེ་བཞུགས་སྣོད་ལས་འབུམ་ཤ་སྒྲོ་ཅན་དུ་གྲགས་པ་ད་ལྟའང་མཆིམས་ཕུ་ན་བཞུགས་པ་བླ་འགྱུར་འབྲིང་པོ། ཁྲི་རལ་གྱི་དུས་སུ་པཎྜི་ཏ་སུ་རེནྡྲ་བོ་དྷི་སོགས་དང་ལོ་ཙཱ་བ་སྐ་ཅོག་གཉིས་ཀྱིས་ཞུ་ཆེན་མཛད་པའི་དུམ་བུ་བཅུ་དྲུག་པ་བླ་འགྱུར་ཆེན་མོ་སོགས་བསྒྱུར་མི་འདྲ་བ་འགའ་ཞིག་བྱུང་བར་གྲགས་ཤིང༌། དཾཥྚ་སེ་ནའི་འབུམ་ཊཱིཀ་སོགས་འགྲེལ་པའི་སྐོར་ཡང་བསྒྱུར་བ་དེ་དག་གི་བཀའ་དྲིན་ལས་བཤད་པ་དང་ཉམས་ལེན་རྒྱ་ཆེར་བྱུང་ངོ༌། ། རིན་ཆེན་བཟང་པོས་མངོན་རྒྱན་བཤད་སྲོལ་བཏོད། ། ཇོ་བོ་རྗེས་ཀྱང་ཁུ་འབྲོམ་ཕྱྭ་ལ་བཤད། ། ཁྱད་པར་རྔོག་ལོ་ཆེན་པོས་དར་རྒྱས་མཛད། ། བསྟན་པ་ཕྱི་དར་ལ་ལོ་ཆེན་རིན་ཆེན་བཟང་པོས་འཕགས་(༡༤༦བ)ཡུལ་དུ་བྱོན་ཏེ་པཎྜིཏ་གུ་ཎ་མི་ཏྲ་ལས་མངོན་རྟོགས་རྒྱན་འགྲེལ་པ་དང་བཅས་པ་གསན་ནས་བཤད་སྲོལ་གྱི་སྒོ་ཐོག་མར་བཏོད། ཇོ་བོ་རྗེ་དཔལ་ལྡན་ཨ་ཏི་ཤས་ཀྱང་ཁུ་ཆེན་པོ་ལྷ་ལྡིངས་པ་དང་འབྲོམ་སྟོན་རྒྱལ་བའི་འབྱུང་གནས་ལ་ཕར་ཕྱིན་གྱི་བཤད་པ་ལེགས་པར་སྩལ། ཨ་ཏི་ཤ་དང་ལོ་ཆེན་རིན་བཟང་གཉིས་ཀྱིས་འགྲེལ་བཤད་རྟོགས་དཀའི་སྣང་བ་བསྒྱུར། བརྒྱད་སྟོང་པ་དང༌། ཉི་སྣང༌། བརྒྱད་སྟོང་འགྲེལ་ཆེན་སོགས་སྔར་འགྱུར་བ་མང་པོ་ལ་ཞུ་དག་མཛད། འབྲོམ་སྟོན་གྱིས་འབྲོམ་སྟོང་བཙན་ནམ་མགོ་བླ་མ་ལ་བཤད་པ་སོགས་ཀྱིས་བཤད་སྲོལ་ཆེ་བ་ཞིག་བྱུང༌། ཡང་ཇོ་བོས་ཕྱ་དར་སྟོན་པ་ལ་བཤད་པས་ཕར་ཕྱིན་ཁམས་ལུགས་སུ་གྲགས་པའང་དར་རོ། ། ཁྱད་པར་འཇམ་དཔལ་རྩ་རྒྱུད་ལས། འདི་ནས་བྱང་ཕྱོགས་གངས་འགྲམ་དུ། ། བློ་ལྡན་གང་ཞིག་འབྱུང་འགྱུར་བ། ། ཡི་གེ་སྒྲ་དང་བཤད་བྱ་ལ། ། བློ་གྲོས་ཐོགས་པ་མེད་པ་འབྱུང༌། ། ཞེས་ལུང་བསྟན་པའི་རྔོག་ལོ་ཆེན་པོ་བློ་ལྡན་ཤེས་རབ་ཀྱིས་པཎྜི་ཏ་བསྟན་སྐྱོང་ངམ་འབུམ་ཕྲག་གསུམ་པ་ལས་ཤེར་ཕྱོགས་ཀྱི་གཞུང་ལུགས་མཐའ་དག་གསན། གཞན་ཡང་མཁས་གྲུབ་དུ་མ་ལས་མདོ་རྒྱུད་ཡོངས་སུ་རྫོགས་པ་ཞུས། བལ་ཡུལ་ཕམ་ཐིང་གི་གཙུག་ལག་ཁང་ན་བཞུགས་པའི་འབུམ་ལས་ཏིང་ངེ་འཛིན་གྱི་མིང་ཆད་པ་བསབས་པ་སོགས་འགྱུར་བཅོས་དང༌། མངོན་རྟོགས་རྒྱན་རྩ་འགྲེལ་འགའ་ཞིག་ཀྱང་འགྱུར་བཅོས་དང་གསར་འགྱུར་ཅི་རིགས་པར་མཛད་དེ་དེ་དག་གི་བཤད་པའང་དཔྱིས་ཕྱིན་པ་གཏན་ལ་ཕབ་སྟེ་དར་རྒྱས་སུ་མཛད་པ་ཡིན་ནོ། ། སྔ་ཕྱིའི་བཀའ་བབ་ཤེར་འབར་བྱང་སེང་ལས། ། རིམ་བརྒྱུད་གཡག་རོང་ཡབ་སྲས་རྣམ་དཔྱོད་ཀྱིས། ། བཤད་པའི་ཆུ་རྒྱུན་བཟང་པོ་མ་ཉམས་བབས། ། བསྟན་པ་སྔ་དར་གྱི་ཤེར་ཕྱིན་བཤད་རྒྱུན་ཁམས་སུ་འཕོས་པ་ལས་བྱུང་བའི་རྒྱུན་དང༌། ཇོ་བོ་དང་རིན་བཟང་རྔོག་ལོ་ཆེན་པོ་བཅས་ཕྱི་འགྱུར་གྱི་བཤད་རྒྱུན་ཐམས་ཅད་(༡༤༧ན)ཀྱི་བཀའ་བབས་པ། རྔོག་ལོའི་སློབ་མ་ཐུ་བོ་བཞི་ལས་ཤེར་ཕྱིན་བཀའ་བབ་འབྲེ་ཤེས་རབ་འབར་གྱིས་བཤད་རྒྱུན་དེ་དག་གཅིག་དྲིལ་གྱི་སྲོལ་ཆེན་པོ་གཏོད་པ་ཨར་བྱང་ཆུབ་སེང་གེས་བཟུང་སྟེ་བསྟན་པ་འདི་ལ་བྱ་བ་ཆེ་ཐང་དུ་མཛད་པ་ལས་རིམ་གྱིས་བརྒྱུད་དེ་བུ་སྟོན་རིན་པོ་ཆེའི་སློབ་མ་ཐུགས་སྲས་ལོ་ཙཱ་རིན་ཆེན་རྣམ་རྒྱལ་ལ་གཡག་མི་ཕམ་ཆོས་ཀྱི་བླ་མས་གསན་ཏེ་འགྲེལ་པ་ཆེ་འབྲིང་ཆུང་གསུམ་མཛད་ཅིང་འཆད་ཉན་རྩལ་དུ་བཏོན་པས་ཕར་ཕྱིན་གཡག་ལ་ཐུག་ཟེར་བ་བྱུང༌། དེའི་སློབ་མ་རོང་སྟོན་ཆེན་པོ་ཤེས་བྱ་ཀུན་གཟིགས་ཀྱིས་ཤེར་ཕྱིན་གཙོས་མདོ་ཕྱོགས་ལ་རྣམ་བཤད་གཞུང་འགྲེལ་བཞི་བཅུ་ཞེ་གསུམ་ཙམ་དང་ཁྱད་པར་ཕར་ཕྱིན་རོང་ཊཱིཀ་ཆེན་མོ་སོགས་མཛད་ཅིང་འཆད་ཉན་གྱི་རྐང་བཟུང་སྟེ། ཡབ་སྲས་དེ་དག་གི་རྣམ་དཔྱོད་ཀྱི་མཐུ་ཕུལ་དུ་བྱུང་བའི་བཤད་པའི་ཆུ་རྒྱུན་བཟང་པོ་ད་ལྟའི་བར་མ་ཉམས་པར་བབས་སོ། ། གྲོ་ལུང་བཤད་སྲོལ་དཔལ་ལྡན་ཕྱྭ་པས་སྤེལ། ། ཡང་རྔོག་ལོའི་སློབ་མ་གྲོ་ལུང་པ་བློ་གྲོས་འབྱུང་གནས་ཀྱི་བཤད་སྲོལ་ལ་བརྟེན་ནས་ཕྱིས་དགེ་བཤེས་ཕྱྭ་པས་རྒྱ་ཆེར་སྤེལ་བའི་བཤད་སྲོལ་བཟང་པོ་རྐང་ཚུགས་པའང་བྱུང་ངོ༌། ། དེ་ལ་མངོན་རྟོགས་རྒྱན་གྱི་བསྟན་བྱའི་དོན་ནི། ཤེས་རབ་ཕ་རོལ་ཕྱིན་པ་ནི། ། དངོས་པོ་བརྒྱད་ཀྱིས་ཡང་དག་བཤད། ། ཅེས་མདོར་བསྟན་ནས། རྣམ་ཀུན་མཁྱེན་ཉིད་ལམ་ཤེས་ཉིད། ། དེ་ནས་